Nibii Etɛ ni Baaha Onitsɔɔmɔ Amɔ Shi Jogbaŋŋ
1. Mɛni hewɔ esa akɛ wɔbɔ mɔdɛŋ wɔha wɔnitsɔɔmɔ amɔ shi jogbaŋŋ lɛ?
1 Kristofoi shiɛlɔi fɛɛ ji tsɔɔlɔi. Kɛ́ wɔtee mɔ ko ŋɔɔ klɛŋklɛŋ jio, wɔmiifee sɛɛkuu kɛsaramɔ jio, wɔmiifee Biblia mli nikasemɔ jio lɛ, wɔmiiha mɛi ale nɔ ko. Ni sane ni wɔtsɔɔ lɛ, jeee sane folo kɛkɛ ni. Wɔmiitsɔɔ mɛi “ŋmalɛi krɔŋkrɔŋi lɛ” ní baanyɛ aha ‘amɛle nii kɛha yiwalaheremɔ’ lɛ. (2 Tim. 3:15) Mɛɛ hegbɛ kpele po enɛ ji nɛkɛ! Naa nibii etɛ ni baaha wɔnitsɔɔmɔ amɔ shi jogbaŋŋ fe tsutsu lɛ.
2. Te wɔɔfee tɛŋŋ wɔha wɔnitsɔɔmɔ afee mlɛo?
2 Ha Efee Mlɛo: Kɛ́ wɔle sane ko he nii jogbaŋŋ lɛ, ewaaa akɛ wɔhiɛ aaakpa bɔ ni sane lɛ shishinumɔ baanyɛ awa kɛha mɔ ko ni leee he nɔ ko lɛ nɔ. No hewɔ lɛ, kɛ́ okɛ mɔ ko miikase Biblia lɛ, okɛ nibii krokomɛi ni he ehiaaa akafata onitsɔɔmɔ lɛ he. Moŋ lɛ, wiemɔ otii titrii lɛ pɛ ahe. Jeee wiemɔ pii baatsɔɔ akɛ ole nitsɔɔmɔ jogbaŋŋ. (Abɛi 10:19) Bei pii lɛ, ehi jogbaŋŋ akɛ oookane ŋmalɛi titrii lɛ pɛ. Kɛ́ okane ŋmalɛ ko otã lɛ, gbalamɔ efã ni kɔɔ sane ni nyɛsusuɔ he lɛ he lɛ pɛ mli. Yesu tsɔɔ anɔkwalei ni nɔ bɛ yɛ e-Gɔŋ nɔ Shiɛmɔ ni aŋma yɛ Mateo yitso 5 kɛyashi yitso 7 lɛ mli, ni kɛlɛ eha enitsɔɔmɔ lɛ fee mlɛo ni ekɛ wiemɔi fioo pɛ tsu nii.
3. Mɛɛ sɛɛnamɔ yɔɔ nɔkwɛmɔnii ahe, ni bei pii lɛ mɛɛ nɔkwɛmɔnii hi jogbaŋŋ?
3 Nɔkwɛmɔnii: Nɔkwɛmɔnii haa mɔ jwɛŋɔ nii anɔ, etaa mɔ tsuiŋ, ni ehaa mɔ kaiɔ nii oya. Kaasusu akɛ kɛ́ obaaha nɔkwɛmɔnii ni mɔɔ shi lɛ, esa akɛ ole bɔ ni atãa adesã. Yesu kɛ nɔkwɛmɔnii kukuji, ní shishinumɔ waaa tsu nii bei babaoo. (Mat. 7:3-5; 18:2-4) Abaanyɛ atɛŋ mfonirii hu yɛ wolo nɔ kɛfee nɔkwɛmɔnɔ. Kɛ́ otsɔ hiɛ ojwɛŋ nii anɔ lɛ, obaanyɛ oná nɔkwɛmɔnii ní baamɔ shi jogbaŋŋ.
4. Te wɔɔfee tɛŋŋ wɔkɛ sanebimɔi atsu nii jogbaŋŋ?
4 Sanebimɔi: Sanebimɔi haa o-Biblia mli nikaselɔ lɛ susuɔ nii ahe. No hewɔ lɛ, kɛ́ obi sane lɛ, ná tsui oha lɛ. Kɛ́ bo diɛŋtsɛ oha sane lɛ hetoo oya nɔŋŋ lɛ, oleŋ bɔ ni o-Biblia mli nikaselɔ lɛ enu sane lɛ shishi eha diɛŋtsɛ. Kɛ́ eha hetoo ni ejaaa lɛ, ebaahi akɛ ooobibii lɛ saji krokomɛi ni baaye abua lɛ ni eha hetoo ni ja, moŋ fe ní oootsɔɔ lɛ hetoo lɛ. (Mat. 17:24-27) Yɛ anɔkwale mli lɛ, wɔteŋ mɔ ko yeee emuu kɛnitsɔɔmɔ. No hewɔ lɛ, Biblia lɛ woɔ wɔ hewalɛ koni wɔha wɔhiɛ ahi wɔnitsɔɔmɔ lɛ nɔ be fɛɛ be. Kɛ́ wɔfee nakai lɛ, wɔ kɛ mɛi ni boɔ wɔ toi lɛ fɛɛ baaná he sɛɛ kɛya naanɔ.—1 Tim. 4:16.