Ye Obua Shwilafoi ni Amɛkase Yehowa He Nii

 1. Mɛni Yesu fee kɛtsɔɔ akɛ emusuŋ tsɔɔ lɛ yɛ shwilafoi ahe?

¹ Eshwɛ gbii fioo ni Yesu baagbo. Be ni eshiɔ Yeriko maŋ lɛ mli lɛ, shwilafoi enyɔ komɛi kpa lɛ fai amɛkɛɛ: “Nuŋtsɔ, . . . naa wɔ mɔbɔ!” Eyɛ mli akɛ no mli lɛ Yesu miijwɛŋ shihilɛ ni jaraa ni ekɛbaakpe lɛ he moŋ, shi Yesu wa edamɔ shi, kɛkɛ ni etsɛ amɛ, ni etsa amɛ. (Mat. 20:29-34) Te wɔɔfee tɛŋŋ wɔkase musuŋtsɔlɛ ni Yesu jie lɛ kpo etsɔɔ shwilafoi lɛ?

 2. Kɛ́ wɔkɛ shwilafo ko kpe lɛ, te wɔɔfee tɛŋŋ wɔye lɛ odase?

² Ye Obua Amɛ: Kɛ́ okɛ shwilafo ko kpe lɛ, hã ele mɔ ni oji, ni obi lɛ kɛji nɔ ko yɛ ni obaanyɛ ofee kɛwa lɛ. Akɛni be pii lɛ, mɛi shishiuɔ shwilafoi hewɔ lɛ, ekolɛ shishijee lɛ ejwɛŋmɔ baafee lɛ enyɔnyɔɔnyɔ. Shi kɛ́ ojie naanyobɔɔ su kpo ni ena akɛ oosumɔ ni oye obua lɛ lɛɛlɛŋ lɛ, esheŋ bo gbeyei. Hã ehi ojwɛŋmɔŋ hu akɛ, jeee shwilafoi ni okɛbaakpe lɛ fɛɛ eshwila kwraa, no hewɔ lɛ esoro yelikɛbuamɔ ni he baahia amɛteŋ mɔ fɛɛ mɔ. Be ni oye obua lɛ sɛɛ lɛ, obaanyɛ ohã ele akɛ okɛ mɛi kaseɔ Biblia lɛ. Hã ele akɛ obaakane ŋmalɛ ko ohã lɛ; obaanyɛ okane Lala 146:8 loo Yesaia 35:5, 6. Kɛ́ enyɛɔ ekaneɔ Braille lɛ, bi lɛ kɛ́ ebaasumɔ ni obahã lɛ wolo ni afee yɛ Braille mli ní baaye abua lɛ ni ekase nibii babaoo yɛ Biblia lɛ mli. Obaanyɛ oye obua lɛ hu ni enine ashɛ nibii ni arikɔdi ni yɔɔ jw.org/gaa lɛ nɔ lɛ ekomɛi anɔ. Kɛ́ eyɛ screen reader ni kaneɔ nibii ni yɔɔ kɔmpiuta nɔ lɛ eko yɛ ekɔmpiuta nɔ lɛ, ekolɛ ebaanya woji krokomɛi hu ni yɔɔ jw.org lɛ nɔ, kɛ ekrokomɛi hu ni abaanyɛ aŋɔ yɛ RTF (Rich Text Format) mli lɛ he.​—Kwɛmɔ akrabatsa ni ji “Kɛ́ Ooye Obua Shwilafo ko lɛ . . .”

 3. Te wɔɔfee tɛŋŋ wɔnine ashɛ shwilafoi ni yɔɔ wɔshikpɔŋkuku lɛ mli lɛ anɔ?

³ Taomɔ Shwilafoi: Wɔkɛ shwilafoi efɔɔɔ kpee yɛ shĩa fɛɛ shĩa shiɛmɔ nitsumɔ lɛ mli akɛni amɛteŋ mɛi babaoo nyaaa he akɛ amɛkɛ mɛi ni amɛlé lɛ baagba sane lɛ hewɔ. Enɛ hewɔ lɛ, ja wɔmia wɔhiɛ dani wɔbaanyɛ ‘wɔtao’ amɛ ni wɔshiɛ wɔhã amɛ. (Mat. 10:11) Ani okɛ shwilafo ko tsuɔ nii loo okɛ lɛ yaa skul? Ŋɔɔ hegbɛ lɛ ni okɛ lɛ agba sane. Kɛ́ shwilafoi askul yɛ nyɛshikpɔŋkuku lɛ mli lɛ, hã amɛ wɔwoji ni afee yɛ Braille mli lɛ eko ni amɛkɛ wo amɛskul wojiatoohe lɛ. Ani ole mɔ ko ni yɔɔ wekunyo ko ni eshwila? Ani kuu ko yɛ oshikpɔŋkuku lɛ mli ni yeɔ buaa shwilafoi loo amɛfee shihilɛhei kɛhã shwilafoi? Hã shwilafo lɛ wekunyo lɛ, mɔ ni hereɔ gbɔi kɛbaa he ni shwilafoi lɛ yɔɔ lɛ, loo mɔ ni kwɛɔ kuu lɛ nɔ lɛ ale akɛ Yehowa Odasefoi miisumɔ waa ni amɛye amɛbua shwilafoi, ní okɛɛ lɛ akɛ obaahã lɛ wɔwoji ni afee yɛ Braille mli loo nibii ni arikɔɔdi lɛ eko. Hã ele shi ni Biblia ewo akɛ etsɛŋ, Nyɔŋmɔ baagbele shwilafoi ahiŋmɛi kwraa lɛ. Obaanyɛ ojie vidio ni ji Mináaa Enɛ Kulɛ, Mileee Nɔ ni Mafee ni yɔɔ jw.org lɛ nɔ ni tsɔɔ bɔ ni shwilafo ko ni ená Biblia ni yɔɔ Braille mli lɛ he sɛɛ lɛ ohã lɛ. Kɛ́ otsɔɔ lɛ yiŋtoo hewɔ ni oba lɛ, no baagbele gbɛ koni onine ashɛ shwilafoi ni yɔɔ jɛmɛ lɛ anɔ.

 4. Mɛni wɔbaanyɛ wɔkase kɛjɛ Janet niiashikpamɔ lɛ mli?

⁴ Nyɛmi yoo ko ni atsɛɔ lɛ Janet, ni eji shwilafo lɛ tee he ko ni shwilafoi yɔɔ. Ekɛ oblayoo ko bɔi sanegbaa. Janet kɛɛ lɛ akɛ, “Yesu tsa shwilafoi, ni ekɛtsɔɔ nɔ ni ebaafee ehã shwilafoi wɔsɛɛ.” Amɛkane Kpojiemɔ 21:3, 4 lɛ, ni Janet tsɔɔ lɛ bɔ ni Nyɔŋmɔ Maŋtsɛyeli lɛ baahã nakai shiwoo lɛ aba mli. Yoo lɛ fee diŋŋ ni ekɛɛ: “Minuko nɔ ko ni tamɔ nɛkɛ pɛŋ yɛ shwilafo ko naa. Mɛi pii susuɔ akɛ nɔ ko ni mɛi ni eshwila lɛ loo amɛblematsɛmɛi lɛ fee lɛ hewɔ ni amɛshwila lɛ.” Janet sɛndi yoo lɛ e-mail ko ni kɛ́ egbele ni ekliki nɔ ni yɔɔ mli lɛ nɔ lɛ ekɛ lɛ baaya Biblia lɛ Tsɔɔ wolo lɛ nɔ, ni bianɛ lɛ amɛkaseɔ Biblia shii enyɔ daa otsi.

 5. Eyɛ mli akɛ wɔnyɛŋ wɔtsa mɛi ni eshwila lɛ tamɔ Yesu fee lɛ moŋ, shi kɛ́ wɔmusuŋ tsɔ wɔ yɛ amɛhe lɛ, mɛni baajɛ mli kɛba?

⁵ Eji anɔkwale akɛ wɔnyɛŋ wɔtsa shwilafoi ahiŋmɛi tamɔ Yesu fee lɛ, shi wɔbaanyɛ wɔye wɔbua mɛi fɛɛ ni shihilɛ gbɛjianɔtoo nɛɛ nyɔŋmɔ lɛ eshwila amɛjwɛŋmɔi, ní shwilafoi hu fata he lɛ, koni amɛnu Nyɔŋmɔ Wiemɔ lɛ mli anɔkwale lɛ shishi. (2 Kor. 4:4) Yesu ‘musuŋ ni tsɔ lɛ’ lɛ hewɔ ni etsa shwilafoi enyɔ lɛ yɛ he ko ni bɛŋkɛ Yeriko lɛ. (Mat. 20:34) Kɛ́ wɔ hu wɔmusuŋ tsɔ wɔ yɛ shwilafoi ahe lɛ, wɔbaaná hegbɛ kɛye wɔbua amɛteŋ mɛi komɛi koni amɛkase Yehowa, mɔ ni baatsa shwilafoi fɛɛ kɛya naanɔ lɛ he nii.