Yehowa Webii Sumɔɔ Ni Amɛfee Nɔ Ni Ja

 1. Mɛɛ kaa Yosef kɛkpe? Ni te efee enii yɛ he ehã tɛŋŋ?

YAKOB binuu Yosef kɛ kaa ko ni naa wa waa kpe. Enuŋtsɔ Potifar ŋa lɛ kɛɛ lɛ akɛ ‘ekɛ lɛ abawɔ.’ Shi Yosef ekpɛlɛɛɛ. Ekolɛ mɔ ko hiɛ baafee lɛ yaa akɛ Yosef ekpɛlɛɛɛ, ejaakɛ be ni yoo lɛ kɛ lɛ wie lɛ, no mli lɛ ewu bɛ shĩa. Agbɛnɛ hu, Yosef lɛ nyɔŋ ji lɛ, ni no hewɔ lɛ, kɛ́ ekpɛlɛɛɛ nɔ ni enuŋtsɔ lɛ ŋa lɛ kɛɛ efee lɛ nɔ lɛ, ekolɛ ebaahã shĩa lɛ hilɛ aje etsine. Yoo lɛ kɛ sane nɛɛ su Yosef tsui shii abɔ, shi Yosef ekpɛlɛɛɛ. Mɛni hewɔ? Yosef wie akɛ: “Te aaafee tɛŋŋ ní mafee efɔŋ kpele nɛɛ, ní mafee esha mashi Nyɔŋmɔ lɛ?”​—1 Mo. 39:7-12.   

 2. Te fee tɛŋŋ Yosef le akɛ gbalafitemɔ ji esha yɛ Nyɔŋmɔ hiɛ lɛ?

² Yɛ Mose Mla lɛ mli lɛ, Yehowa fã ewebii lɛ akɛ ‘amɛkafite gbãla.’ (2 Mo. 20:14) Shi Yosef sane lɛ ba aaafee afii 200 dani aŋma Mose Mla lɛ. No hewɔ lɛ, te fee tɛŋŋ Yosef le akɛ gbalafitemɔ ji ‘esha kpele’ yɛ Nyɔŋmɔ hiɛ lɛ? No mli lɛ, Yosef le Yehowa jogbaŋŋ. No hewɔ lɛ, enyɛ ekɔ sɛɛ akɛ, kɛ́ mɔ ko fite gbãla lɛ, belɛ efee nɔ ko ni Yehowa sumɔɔɔ kwraa. Ele akɛ Yehowa to ni nuu kome kɛ yoo kome abote gbalashihilɛ mli. Agbɛnɛ hu, ŋwanejee ko bɛ he akɛ, agba lɛ nɔ ni Yehowa fee shii enyɔ sɔŋŋ kɛbu enanakaŋsowa Sara he koni hii komɛi akahe lɛ yɛ ewu Abraham dɛŋ lɛ. Nakai nɔŋŋ Nyɔŋmɔ bu Isak ŋa Rebeka hu he. (1 Mo. 2:24; 12:14-20; 20:2-7; 26:6-11) Yosef jwɛŋ saji ni tamɔ nɛkɛ lɛ anɔ, ni no hã ele nɔ ni ja kɛ nɔ ni ejaaa yɛ Yehowa hiɛ. Ni akɛni esumɔɔ Yehowa hewɔ lɛ, enya nɔ ni Yehowa kɛɛ eja lɛ he ni etswa efai shi akɛ no pɛpɛɛpɛ ebaafee.

 3. Mɛni he wɔbaasusu yɛ nikasemɔ nɛɛ mli?

³ Ani osumɔɔ ni ofee nɔ ni ja? Ŋwanejee ko bɛ he akɛ osumɔɔ. Shi wɔ fɛɛ wɔyeee emuu, ni no hewɔ lɛ kɛ́ wɔkwɛɛɛ ni ahi lɛ, susumɔ ni je lɛ hiɛ yɛ nibii ni Yehowa kɛɛ ejaaa lɛ ahe lɛ baaná wɔnɔ hewalɛ. (Yes. 5:20; Rom. 12:2) No hewɔ lɛ yɛ nikasemɔ nɛɛ mli lɛ, wɔbaakwɛ nɔ ni atsɔɔ kɛ́ akɛɛ wɔfee nɔ ni ja kɛ bɔ ni kɛ́ wɔná he miishɛɛ waa akɛ wɔfee nɔ ni ja lɛ, wɔnáa he sɛɛ wɔhãa. No sɛɛ lɛ, wɔbaakwɛ nibii etɛ ni kɛ́ wɔfee lɛ ebaahã wɔná he miishɛɛ waa akɛ wɔfee nɔ ni ja yɛ Yehowa hiɛ.

 4. Mɛni mɛi komɛi ni buɔ amɛhe jalɔi lɛ feɔ?

⁴ Mɛi komɛi naa amɛhe akɛ jalɔi ji amɛ, shi amɛwóɔ amɛhe nɔ, amɛnaa tɔmɔi yɛ nɔ fɛɛ nɔ ni mɛi feɔ lɛ he, ni amɛnaa amɛhe akɛ amɛhi fe mɛi krokomɛi. Shi Nyɔŋmɔ sumɔɔɔ kwraa ni wɔfeɔ wɔnii nakai. Be ni Yesu ba shikpɔŋ lɛ nɔ lɛ, ewie eshi jamɔŋ hiɛnyiɛlɔi lɛ waa ejaakɛ amɛbuɔ amɛhe jalɔi. (Jaj. 7:16; Luka 16:15) Mɛi ni buɔ amɛhe jalɔi lɛ nyɛŋ afee nɔ ni ja yɛ Yehowa hiɛ kɔkɔɔkɔ.

 5. Yɛ Biblia lɛ mli lɛ, kɛ́ akɛɛ jalɔ ji mɔ ko lɛ, te atsɔɔ tɛŋŋ? Ni mɛni kɛ́ mɔ ko fee lɛ abaana akɛ jalɔ ji lɛ lɛɛlɛŋ?

⁵ Shi yɛ Biblia lɛ mli lɛ, kɛ́ akɛɛ jalɔ ji mɔ ko lɛ, eji nɔ ko kpakpa. Etsɔɔ akɛ mɔ lɛ hiɔ shi yɛ Yehowa mlai kɛ eshishitoo mlai lɛ anaa. Loo kɛ́ wɔbaafo lɛ kuku lɛ, mɔ lɛ feɔ nɔ ni ja yɛ Yehowa Nyɔŋmɔ hiɛ. Ni wɔle akɛ Yehowa mlai kɛ eshishitoo mlai lɛ anɔ bɛ. Akɛ nɔkwɛmɔnɔ lɛ, Yehowa fã mɛi ni hɔ̃ɔ nii yɛ blema Israel lɛ akɛ, amɛkɛ “nsɛni tɛ ni ja” atsu nii. (5 Mo. 25:15) No hewɔ lɛ, kɛ́ Kristofonyo ko miitao ni Yehowa abu lɛ jalɔ lɛ, belɛ esa akɛ eye anɔkwa yɛ enitsumɔ saji fɛɛ amli. Mɔ fɛɛ mɔ ni sumɔɔ ni efee nɔ ni ja lɛ, sumɔɔ ni aye jalɛ sane hu, ni esumɔɔɔ ni akɛ mɛi yeɔ bɔ ni esaaa. Agbɛnɛ hu, kɛ́ mɔ ko ni ja lɛɛlɛŋ lɛ yaakpɛ eyiŋ yɛ sane ko he lɛ, etaoɔ Yehowa susumɔ yɛ nakai sane lɛ he ejaakɛ eesumɔ ni ‘esa Yehowa hiɛ kwraa.’​—Kol. 1:10.

 6. Mɛni hewɔ esa akɛ wɔhe wɔye kɛ wɔtsui fɛɛ akɛ Yehowa le nɔ ni ja kɛ nɔ ni ejaaa? (Yesaia 55:8, 9)

⁶ Biblia lɛ tsɛɔ Yehowa akɛ “jalɛ shihilɛhe,” ejaakɛ Yehowa ji mɔ ni tsɔɔ nɔ ni abaanyɛ adamɔ nɔ atsɔɔ akɛ mɔ ko loo nɔ ko ja loo ejaaa. (Yer. 50:7) Lɛ pɛ eyɔɔ hegbɛ akɛ efeɔ nakai, ejaakɛ lɛ ebɔ nibii fɛɛ. Yehowa yeɔ emuu, shi wɔ lɛ, wɔyeee emuu ni eshafeelɔi ji wɔ. No hewɔ lɛ, jeee be fɛɛ be wɔbaanu nɔ hewɔ ni Yehowa kɛɔ akɛ nɔ ko ja loo ejaaa lɛ shishi. (Abɛi 14:12; kanemɔ Yesaia 55:8, 9.) Fɛɛ sɛɛ lɛ, wɔbaanyɛ wɔfee nɔ ni ja yɛ Nyɔŋmɔ hiɛ ejaakɛ ebɔ wɔ tamɔ bɔ ni eyɔɔ lɛ. (1 Mo. 1:27) Ni yɛ anɔkwale mli lɛ, wɔyɛ he miishɛɛ waa akɛ wɔbaafee nakai. Mɛni hewɔ? Ejaakɛ wɔsumɔɔ wɔ-Tsɛ Yehowa, ni wɔmiisumɔ ni wɔkase lɛ yɛ nɔ fɛɛ nɔ mli.​—Efe. 5:1.

 7. Mɛni hewɔ esa akɛ aná gbɛtsɔɔmɔi yɛ nibii ahe? Okɛ enɛ he nɔkwɛmɔnɔ ahã.

⁷ Kɛ́ wɔkɛ Yehowa gbɛtsɔɔmɔi yɛ nɔ ni ja kɛ nɔ ni ejaaa lɛ he lɛ tsu nii lɛ, wɔbaaná he sɛɛ. Ani ole nɔ hewɔ? Bo lɛ, susumɔ enɛ he okwɛ. Eji shikatoohe fɛɛ shikatoohe efo lɛ diɛŋtsɛ eshika ni ekɛtsuɔ nii kulɛ, mɛni baaba? Aloo eji datrɛfoi kɛ mlai ni akɛhã amɛ yɛ bɔ ni esa akɛ amɛkwɛ mɛi amɛhã lɛ he lɛ tsuuu nii kulɛ, mɛni baaba? Mɛi baagboi, aloo jeee nakai? No hewɔ lɛ, ehi akɛ ayɛ mlai kɛ gbɛtsɔɔmɔi yɛ nibii nɛɛ ahe, ejaakɛ gbɛtsɔɔmɔi nɛɛ buɔ wɔhe. Nakai nɔŋŋ gbɛtsɔɔmɔi ni Yehowa kɛhã yɛ nɔ ni ja kɛ nɔ ni ejaaa lɛ he lɛ buɔ wɔhe.

 8. Mɛɛ jɔɔmɔi mɛi ni feɔ nɔ ni ja lɛ baaná?

⁸ Yehowa jɔɔ mɛi ni miaa amɛhiɛ akɛ amɛkɛ egbɛtsɔɔmɔi baatsu nii lɛ. Ewo shi akɛ: “Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.” (Lala 37:29) Kɛ́ okwɛ lɛ, te shihilɛ baafee tɛŋŋ yɛ nakai beiaŋ? Akɛni mɔ fɛɛ mɔ kɛ Yehowa gbɛtsɔɔmɔi baatsu nii hewɔ lɛ, wɔbaaná miishɛɛ waa ni wɔbaahi shi yɛ toiŋjɔlɛ kɛ ekomefeemɔ mli. Enɛ ji shihilɛ ni Yehowa taoɔ wɔná. Enɛ hewɔ lɛ, esa akɛ wɔteŋ mɔ fɛɛ mɔ abɔ mɔdɛŋ waa ni efee nɔ ni ja yɛ Yehowa hiɛ. Mɛni baaye abua wɔ ni wɔná he miishɛɛ waa akɛ wɔbaafee nakai? Nyɛhãa wɔkwɛa nibii etɛ ni kɛ́ wɔfee lɛ ebaaye ebua wɔ.

 9. Mɛni baaye abua wɔ ni wɔná he miishɛɛ akɛ wɔbaafee nɔ ni ja?

⁹ Klɛŋklɛŋ nɔ: Suɔmɔ Yehowa, mɔ ni kɛ gbɛtsɔɔmɔi lɛ hãa lɛ waa. Ja wɔsumɔɔ Yehowa, mɔ ni tsɔɔ nɔ ni ja kɛ nɔ ni ejaaa lɛ waa dani wɔbaaná he miishɛɛ akɛ wɔfee nɔ ni ja. No hewɔ lɛ, kɛ́ wɔfee nibii ni baahã wɔsumɔ Yehowa waa lɛ, wɔbaaná he miishɛɛ waa akɛ wɔfee nɔ ni ja yɛ ehiɛ. Akɛ nɔkwɛmɔnɔ lɛ, eji Adam kɛ Hawa sumɔɔ Yehowa kulɛ, amɛbaabo lɛ toi.​—1 Mo. 3:1-6, 16-19.

10. Mɛni Abraham fee ni hã ebale Yehowa jogbaŋŋ?

¹⁰ Wɔsumɔŋ ni wɔfee wɔnii tamɔ Adam kɛ Hawa. No hewɔ lɛ, mɛni baaye abua wɔ ni ekaba lɛ nakai? Nɔ ni baaye abua wɔ ji, ni wɔbaakase Yehowa he nii be fɛɛ be, wɔná esui lɛ ahe miishɛɛ, ni wɔbɔ mɔdɛŋ akɛ wɔbaana nibii tamɔ bɔ ni enaa lɛ ehãa lɛ. Kɛ́ wɔfee nakai lɛ, wɔbaasumɔ Yehowa waa. Hã wɔkɛ Abraham afee enɛ he nɔkwɛmɔnɔ. Abraham sumɔɔ Yehowa waa. Kɛ́ Yehowa kpɛ yiŋ ko ni Abraham nuuu shishi po lɛ, eteee shi ewooo, moŋ lɛ, ebɔɔ mɔdɛŋ akɛ ebaale Yehowa jogbaŋŋ. Akɛ nɔkwɛmɔnɔ lɛ, be ni Yehowa kɛɛ Abraham akɛ eyaakpãtã Sodom kɛ Gomora hiɛ lɛ, Abraham yasusu akɛ “shikpɔŋ lɛ fɛɛ Kojolɔ lɛ” baabɛɛ jalɔ kɛ mɔ fɔŋ fɛɛ eshwie, ni enu he akɛ enɛ ejaaa. No hewɔ lɛ, ejɛ heshibaa mli ebi Yehowa saji komɛi. Yehowa to etsui shi ehã esanebimɔi lɛ fɛɛ hetoo. Enɛ hã Abraham na akɛ, Yehowa kwɛɔ adesa fɛɛ adesa tsui mli, ni ekpãtãŋ jalɔi ahiɛ eshiŋ efɔŋfeelɔi anɔ.​—1 Mo. 18:20-32.

11. Mɛni Abraham fee kɛtsɔɔ akɛ esumɔɔ Yehowa ni eheɔ lɛ eyeɔ?

¹¹ Sane ni Abraham kɛ Yehowa gba yɛ Sodom kɛ Gomora he lɛ ye ebua Abraham waa diɛŋtsɛ. Ehã ebasumɔ e-Tsɛ lɛ waa ni ená bulɛ ehã lɛ fe tsutsu lɛ. Shi yɛ afii komɛi asɛɛ lɛ, Abraham kɛ shihilɛ ko ni mli wa waa kpe, ni ebabi ni emia ehiɛ dani enyɛ ekɛ ehiɛ afɔ̃ Yehowa nɔ. Yehowa kɛɛ lɛ ni ekɛ ebinuu Isak ni esumɔɔ lɛ waa lɛ ashã afɔle ahã lɛ. Akɛni bianɛ lɛ Abraham ebale Yehowa jogbaŋŋ hewɔ lɛ, ebiii lɛ saji yɛ enɛ he. Moŋ lɛ, eyi gbɛ akɛ eyaafee nɔ ni Yehowa ekɛɛ lɛ lɛ. Bo lɛ, susumɔ bɔ ni Abraham baanu he ehã be ni etoɔ gbɛjianɔ ni ekɛ ebinuu lɛ ashã afɔle lɛ he okwɛ. Ŋwanejee ko bɛ he akɛ, ebaahao waa. Shi ekolɛ, Abraham jwɛŋ nibii ni ekase yɛ Yehowa he lɛ anɔ. Ebakase akɛ, Yehowa yɛ suɔmɔ ni efeee nɔ ko ni ejaaa. Bɔfo Paulo wie akɛ, Abraham jwɛŋ saji anɔ ni ena akɛ Yehowa baanyɛ atee ebinuu Isak ni esumɔɔ lɛ waa lɛ shi. (Heb. 11:17-19) Mɛni hewɔ ebaanyɛ esusu nakai? Nɔ hewɔ lɛ ji akɛ, Abraham le akɛ Yehowa ewo shi akɛ Isak baatsɔ jeŋmaji atsɛ, ni ja eyɛ wala mli ni efɔ bii dani shiwoo nɛɛ baaba mli. Abraham basumɔ Yehowa, no hewɔ lɛ ehe eye akɛ Yehowa baafee nɔ ni ja be fɛɛ be. Eyɛ mli akɛ nɔ ni Yehowa kɛɛ efee lɛ wa moŋ, shi hemɔkɛyeli ni eyɔɔ lɛ hewɔ lɛ, ebo Yehowa toi.​—1 Mo. 22:1-12.

12. Te wɔbaafee tɛŋŋ wɔkase Abraham? (Lala 73:28)

¹² Te wɔbaafee tɛŋŋ wɔkase Abraham? Esa akɛ wɔya nɔ wɔkase Yehowa he nii tamɔ Abraham fee lɛ. Kɛ́ wɔfee nakai lɛ, wɔbaatsi wɔbɛŋkɛ Yehowa ni wɔbaasumɔ lɛ waa fe tsutsu lɛ. (Kanemɔ Lala 73:28.) Agbɛnɛ hu, wɔhenilee lɛ baatsu nii jogbaŋŋ, ni wɔbaana nibii tamɔ Yehowa naa lɛ lɛ. (Heb. 5:14) Enɛ hewɔ lɛ, kɛ́ mɔ ko ka akɛ ebaahã wɔfee nɔ ko ni Yehowa sumɔɔɔ lɛ, wɔfeŋ. Ebaŋ wɔjwɛŋmɔ mli kɔkɔɔkɔ akɛ wɔbaafee nɔ ko ni baadɔ wɔ-Tsɛ Yehowa loo ni baafite wɔ kɛ lɛ teŋ. Mɛni ekoŋŋ baaye abua wɔ ni wɔsumɔ waa akɛ wɔfee nɔ ni ja?

13. Kɛ́ akɛɛ wɔtiu jalɛ sɛɛ lɛ, te atsɔɔ tɛŋŋ? (Abɛi 15:9)

¹³ Nɔ ni ji enyɔ: Daa gbi lɛ, feemɔ nibii ni baahã oná he miishɛɛ waa akɛ ofee nɔ ni ja. Kɛ́ wɔmiitao wɔkpɔiaŋ awa lɛ, esa akɛ wɔmia wɔhiɛ wɔgbɔle wɔkpɔiaŋ daa gbi. Nakai nɔŋŋ kɛ́ wɔmiitao wɔná he miishɛɛ waa akɛ wɔfee nɔ ni ja lɛ, esa akɛ wɔmia wɔhiɛ wɔfee nɔ ni ja daa gbi. Ani enɛ ji nɔ ko ni wɔnyɛŋ wɔfee? Wɔbaanyɛ aahu, ejaakɛ Yehowa nuɔ nii ashishi ni ekɛŋ wɔ akɛ wɔfee nɔ ko ni wɔnyɛŋ wɔfee. (Lala 103:14) Yehowa kɛɛ “esumɔɔ mɔ ni tiuɔ jalɛ sɛɛ.” (Kanemɔ Abɛi 15:9.) Bɔ ni kɛ́ wɔkɛ oti ko ma wɔhiɛ yɛ Yehowa sɔɔmɔ lɛ mli lɛ wɔfeɔ nɔ fɛɛ nɔ ni wɔbaanyɛ koni wɔshɛ he lɛ, nakai esa akɛ wɔmia wɔhiɛ wɔfee nɔ ni ja daa gbi. Kɛ́ Yehowa na akɛ wɔmiimia wɔhiɛ wɔfee nɔ ni ja lɛ, ebaaye ebua wɔ ni fiofio lɛ, wɔná he miishɛɛ akɛ wɔfee nɔ ni ja.​—Lala 84:5, 7.

14. Mɛni ji ‘jalɛ dama’ lɛ? Ni mɛni hewɔ esa akɛ wɔwo?

¹⁴ Yehowa miisumɔ ni wɔkai be fɛɛ be akɛ, mlai kɛ gbɛtsɔɔmɔi ni ekɛhãa wɔ yɛ nɔ ni ja kɛ nɔ ni ejaaa he lɛ jeee jatsu. (1 Yoh. 5:3) Yɛ anɔkwale mli lɛ, kɛ́ wɔfee nɔ ni ja daa gbi lɛ, no buɔ wɔhe. Ani okaiɔ mfonirifeemɔŋ tawuu hewulamɔ nii ni bɔfo Paulo wie he lɛ? (Efe. 6:14-18) Ani okaiɔ hewulamɔ nii lɛ fã ni buɔ asraafonyo lɛ tsui he lɛ? No ji, ‘jalɛ dama’ lɛ ni damɔ shi kɛhã nibii ni Yehowa ekɛɛ akɛ kɛ́ wɔfee lɛ eja lɛ. Bɔ ni dama buɔ tsui lɛ he lɛ, nakai nɔŋŋ kɛ́ wɔfee nɔ ni ja yɛ Yehowa hiɛ lɛ, ebaabu wɔfonirifeemɔŋ tsui lɛ he koni je lɛ akafite wɔ. No hewɔ lɛ, nyɛhãa wɔtswaa wɔfai shi akɛ, wɔbaawo jalɛ dama lɛ be fɛɛ be!​—Abɛi 4:23.

15. Mɛni kɛ́ ofee lɛ, ebaatsɔɔ akɛ owo jalɛ dama lɛ?

¹⁵ Mɛni kɛ́ ofee lɛ, ebaatsɔɔ akɛ owo jalɛ dama lɛ? Nɔ kome ni obaanyɛ ofee ji, daa gbi kɛ́ oyaakpɛ yiŋ yɛ nɔ ko he lɛ, kwɛmɔ akɛ mɛni Yehowa ewie yɛ nakai nii lɛ he. Akɛ nɔkwɛmɔnɔ lɛ, kɛ́ oyaawie nɔ ko, loo ootao obo lala ko toi, loo okwɛ nɔ ko yɛ TV lɛ loo Intanɛt lɛ nɔ, loo okane nɔ ko lɛ, klɛŋklɛŋ lɛ, obaanyɛ obi ohe akɛ: ‘Mɛɛ nibii ekɛbaawo mijwɛŋmɔ mli? Ani Yehowa baanya he? Ani ebaahã manya nibii ni ejaaa yɛ Yehowa hiɛ lɛ ahe? Akɛ nɔkwɛmɔnɔ lɛ, ani ebaahã manya jeŋba sha loo awuiyeli he? Ani ebaahã mashwe akɛ maná nii babaoo loo misusu mi pɛ mihe?’ (Fip. 4:8) Kɛ́ ofee nibii ni sa Yehowa hiɛ lɛ, ebaabu otsui he ni ehãŋ je lɛ aná onɔ hewalɛ.

16-17. Mɛɛ gbɛ nɔ Yesaia 48:18 lɛ hãa wɔnaa akɛ wɔbaanyɛ wɔfee nɔ ni ja yɛ Yehowa hiɛ be fɛɛ be?

¹⁶ Bei komɛi lɛ, ani onuɔ he akɛ be ko baaba ni onyɛŋ ofee nɔ ni ja yɛ Yehowa hiɛ dɔŋŋ? Kɛ́ nakai lɛ, susumɔ nɔkwɛmɔnɔ ko ni Yehowa kɛtsu nii yɛ Yesaia 48:18 lɛ he okwɛ. (Kanemɔ.) Yehowa wo shi yɛ jɛmɛ akɛ, wɔjalɛ nifeemɔ lɛ “baafee tamɔ ŋshɔkei.” Bo lɛ, feemɔ he mfoniri akɛ odamɔ ŋshɔ ko naa ni ookwɛ ŋshɔkei lɛ bɔ ni eko nyiɛ eko sɛɛ ni esɛɛ efooo lɛ. Ani obaanu he akɛ be ko baaba ni ŋshɔkei nɛɛ baakpa kuu? Dabi kwraa. Mɛni hewɔ? Ejaakɛ ole akɛ afii akpei abɔ nɛ ni ŋshɔkei nɛɛ bɔi kuu, ni amɛkpaŋ kɔkɔɔkɔ.

¹⁷ Ojalɛ nifeemɔ lɛ baanyɛ afee tamɔ ŋshɔkei. Yɛ mɛɛ gbɛ nɔ? Be fɛɛ be kɛ́ obaakpɛ oyiŋ yɛ sane ko he lɛ, kwɛmɔ akɛ, mɛni Yehowa taoɔ ni ofee, ni kɛ́ ona lɛ, feemɔ. Kɛ́ nɔ ni Yehowa kɛɛ ofee lɛ wa po lɛ, obaanyɛ oná nɔmimaa akɛ o-Tsɛ ni sumɔɔ bo lɛ baaye abua bo ni ebaahã bo hewalɛ ni okɛfee nɔ ni ja yɛ ehiɛ be fɛɛ be.​—Yes. 40:29-31.

18. Mɛni hewɔ esaaa akɛ wɔkojoɔ mɛi?

¹⁸ Nɔ ni ji etɛ: Kɛ́ mɔ ko fee nɔ ko lɛ, shi ohã Yehowa. Esa akɛ wɔya nɔ wɔfee nɔ ni ja yɛ Yehowa hiɛ. Shi esaaa akɛ wɔkɛ wɔhe toɔ mɛi krokomɛi ahe ni wɔnaa wɔhe akɛ wɔ lɛ, wɔja fe amɛ. Yehowa hãko wɔ hegbɛ lɛ akɛ wɔtsɔɔ kɛji mɔ ko miifee nɔ ni ja yɛ ehiɛ loo mɔ lɛ efeee nakai. Esa akɛ wɔkai akɛ, Yehowa ji “shikpɔŋ lɛ fɛɛ Kojolɔ.” (1 Mo. 18:25) Yesu fã akɛ: “Nyɛkpaa mɛi akojomɔ, koni akakojo nyɛ.”​—Mat. 7:1.b

19. Mɛni Yosef fee kɛtsɔɔ akɛ ele akɛ Yehowa ji mɔ ni esa akɛ ekojo?

¹⁹ Hã wɔsusu nuu anɔkwafo Yosef he ekoŋŋ wɔkwɛ. Ekojooo mɔ ko. Ekojooo mɛi ni fee lɛ nibii gbohii lɛ po. Lɛ diɛŋtsɛ enyɛmimɛi hii lɛ mɔ lɛ ni amɛhɔ̃ɔ lɛ akɛ nyɔŋ ni amɛyalaka amɛpapa akɛ egbo. Afii komɛi asɛɛ lɛ, Yosef na ewekumɛi lɛ ekoŋŋ. No mli lɛ, Yosef ebatsɔ maŋ onukpa, ni kulɛ ebaanyɛ ekojo enyɛmimɛi hii lɛ ni etɔ ehe owele. Eyɛ mli akɛ no mli lɛ Yosef nyɛmimɛi hii lɛ etsake amɛtsui lɛɛlɛŋ moŋ, shi amɛyasusu akɛ Yosef baagbala amɛtoi. Yosef kɛɛ amɛ akɛ: “Nyɛkashea gbeyei. Ani miji Nyɔŋmɔ ní makojo nyɛ?” (1 Mo. 37:18-20, 27, 28, 31-35; 50:15-21) Eshi kojomɔ lɛ ehã Yehowa ni ekɛ no tsɔɔ akɛ ebaa ehe shi.

20-21. Mɛni kɛ́ wɔfee lɛ, ehãŋ wɔna wɔhe akɛ wɔja fe mɛi krokomɛi?

²⁰ Wɔ hu esa akɛ wɔshi kojomɔ lɛ wɔhã Yehowa tamɔ Yosef fee lɛ. Akɛ nɔkwɛmɔnɔ lɛ, kɛ́ wɔnyɛmi ko fee nɔ ko lɛ, esaaa akɛ wɔsusuɔ akɛ nɛkɛ kɛ nɛkɛ hewɔ efee nɔ ni efee lɛ. Wɔnyɛŋ wɔle mɔ ko tsui mli. Yehowa pɛ ji mɔ ni “taoɔ susumɔi amli.” (Abɛi 16:2) Esumɔɔ gbɔmɛi fɛɛ, ekɔɔɔ he eko he ni amɛjɛ loo bɔ ni atsɔse amɛ ahã. Ni Yehowa woɔ wɔ hewalɛ ni ‘wɔgbele wɔtsuii anaa’ wɔhã mɛi. (2 Kor. 6:13) Esaaa akɛ wɔkojoɔ wɔnyɛmimɛi lɛ, moŋ lɛ, esa akɛ wɔsumɔ amɛ.

²¹ Agbɛnɛ hu, esaaa akɛ wɔkojoɔ mɛi ni bɛ asafo lɛ mli lɛ. (1 Tim. 2:3, 4) Ani esa akɛ okojo owekunyo ko ni bɛ asafo lɛ mli lɛ ni okɛɛ akɛ, “Nuu nɛɛ nyɛŋ aba anɔkwale lɛ mli kɔkɔɔkɔ”? Kɛ́ ofee nakai lɛ, no baatsɔɔ akɛ oowó ohe nɔ ni oobu ohe jalɔ. Yehowa miihã “gbɔmɛi ni yɔɔ he fɛɛ he” lɛ hegbɛ lolo ni amɛtsake amɛtsui. (Bɔf. 17:30) Kaimɔ akɛ, Yehowa buɔ mɛi fɛɛ ni buɔ amɛhe akɛ amɛja fe mɛi krokomɛi lɛ akɛ amɛmiifee esha.

22. Mɛni hewɔ otswa ofai shi akɛ obaafee nɔ ni ja?

²² Kɛ́ wɔfee nɔ ni ja yɛ Yehowa hiɛ be fɛɛ be lɛ, wɔbaaná miishɛɛ ni wɔnɔkwɛmɔnɔ kpakpa lɛ baaye abua mɛi krokomɛi ni amɛbasumɔ wɔ kɛ Yehowa fɛɛ. Nyɛhãa wɔyaa nɔ wɔfea nɔ ni ja yɛ Yehowa hiɛ be fɛɛ be. (Mat. 5:6) Ná nɔmimaa akɛ, Yehowa naa mɔdɛŋ ni obɔɔ koni ofee nɔ ni ja yɛ ehiɛ lɛ ni ehiɛ sɔɔ omɔdɛŋbɔɔ lɛ waa. Kaahã nibii gbohii ni mɛi ni yɔɔ je lɛ mli lɛ yaa nɔ amɛfeɔ lɛ hã omiishɛɛ tã. Kaimɔ be fɛɛ be akɛ, “Yehowa sumɔɔ jalɔi.”​—Lala 146:8.