NIKASEMƆ 17
LALA 111 Nibii Ni Hãa Wɔnáa Miishɛɛ
Kaashi Mfonirifeemɔŋ Paradeiso Lɛ Mli Kɔkɔɔkɔ!
“Nyɛnyaa ni nyɛmli afilia nyɛ kɛyaa naanɔ yɛ nɔ ni mibɔɔ lɛ hewɔ.”—YES. 65:18.
NƆ NI WƆBAAKASE
Wɔbaakase bɔ ni wɔnáa mfonirifeemɔŋ paradeiso lɛ he sɛɛ kɛ nɔ ni wɔbaafee ni baagbala mɛi krokomɛi kɛba mli lɛ he nii.
1. Mɛni ji mfonirifeemɔŋ paradeiso lɛ? Ni mɛni esa akɛ wɔtswa wɔfai shi akɛ wɔbaafee?
PARADEISO ko yɛ shikpɔŋ nɛɛ nɔ ŋmɛnɛ, ni emli eyi kɛ mɛi ni miifee nibii kpakpai babaoo. Mɛi akpekpei abɔ ni yɔɔ mli lɛ yɛ toiŋjɔlɛ diɛŋtsɛ. Amɛtswa amɛfai shi akɛ, amɛshiŋ mli kɔkɔɔkɔ! Agbɛnɛ hu, amɛmiisumɔ ni amɛye amɛbua mɛi babaoo ni amɛbafata amɛhe. Mɛɛ paradeiso he wɔwieɔ lɛ? No ji, mfonirifeemɔŋ paradeiso lɛ.a
2. Mɛɛ nibii komɛi sa kadimɔ waa yɛ mfonirifeemɔŋ paradeiso lɛ he?
2 Nɔ ko ni sa kadimɔ waa ji, yɛ Satan jeŋ fɔŋ nɛɛ ni nibii gbohii eyi mli obɔ ni mɛi nyɛɔ amɛhe nɛɛ mli lɛ, Yehowa eto mfonirifeemɔŋ shihilɛhe ko he gbɛjianɔ ehã ewebii lɛ, ni amɛfee ekome ni amɛyɛ toiŋjɔlɛ. (1 Yoh. 5:19; Kpo. 12:12) Wɔ-Nyɔŋmɔ lɛ le akɛ nibii ni yaa nɔ yɛ jeŋ fɔŋ nɛɛ mli lɛ baanyɛ afite wɔ kɛ lɛ teŋ, shi akɛni esumɔɔ wɔ hewɔ lɛ, ehã wɔ shihilɛhe nɛɛ koni no abu wɔhe ni wɔya nɔ wɔsɔmɔ lɛ kɛ miishɛɛ. Biblia lɛ wieɔ mfonirifeemɔŋ paradeiso lɛ he akɛ “abobaahe” ni yɔɔ shweshweeshwe kɛ “abɔɔ ni náa nu daa.” (Yes. 4:6; 58:11) Akɛni Yehowa miijɔɔ mɛi ni yɔɔ paradeiso nɛɛ mli lɛ hewɔ lɛ, amɛyɛ miishɛɛ ni amɛsheee nɔ ko nɔ ko gbeyei yɛ naagbee gbii ni mli shihilɛ wa nɛɛ mli.—Yes. 54:14; 2 Tim. 3:1.
3. Mɛɛ be gbalɛ ni yɔɔ Yesaia yitso 65 lɛ ba mli klɛŋklɛŋ kwraa? Ni te eba mli ehã tɛŋŋ?
3 Yehowa tsɔ gbalɔ Yesaia nɔ etsɔɔ bɔ ni mɛi ni baahi shi yɛ mfonirifeemɔŋ paradeiso lɛ mli lɛ ashihilɛ baaji. Wɔbaana enɛ yɛ Yesaia yitso 65 lɛ. Gbalɛ nɛɛ ba mli klɛŋklɛŋ kwraa yɛ afi 537 D.Ŋ.B. Yɛ nakai afi lɛ mli lɛ, Yudafoi ni etsake amɛtsui lɛ ye amɛhe kɛjɛ Babilon nomŋɔɔ mli ni amɛku amɛsɛɛ kɛba amɛmaŋ ekoŋŋ. Yehowa jɔɔ ewebii lɛ ni eye ebua amɛ ni amɛsaa Yerusalem maŋtiase lɛ ni efee koikoi lɛ fɛfɛo, ni amɛma esɔlemɔ shĩa lɛ ekoŋŋ koni Israelbii lɛ ajá Yehowa yɛ jɛmɛ.—Yes. 51:11; Zak. 8:3.
4. Mɛɛ be Yesaia yitso 65 lɛ ba mli nɔ ni ji shii enyɔ nɔ? Ni te eba mli ehã tɛŋŋ?
4 Yesaia gbalɛ lɛ ba mli nɔ ni ji shii enyɔ nɔ yɛ afi 1919 Ŋ.B. Nakai be lɛ mli Yehowa webii ni yɔɔ ŋmɛnɛŋmɛnɛ beiaŋ lɛ ye amɛhe kɛjɛ Babilon Kpeteŋkpele lɛ nomŋɔɔ mli. Kɛkɛ ni abɔi mfonirifeemɔŋ paradeiso lɛ mli lɛɛmɔ koni ekpele shikpɔŋ lɛ nɔ fɛɛ. Nyɛmimɛi lɛ kɛ ekãa shiɛ Maŋtsɛyeli lɛ he sane lɛ, ni no hã ato asafoi babaoo, ni agbɛnɛ hu, amɛjie sui kpakpai akpo. Hii kɛ yei ni be ko ni eho lɛ amɛhiɛ yɔɔ laŋlaŋ ni amɛjeŋba ekpɔtɔ lɛ ‘wo gbɔmɔ hee ni abɔ yɛ Nyɔŋmɔ suɔmɔ naa’ lɛ. (Efe. 4:24) Eyɛ mli akɛ jɔɔmɔi ni Yesaia wie he lɛ ateŋ babaoo baaba mli be ni shikpɔŋ lɛ etsɔ paradeiso diɛŋtsɛ wɔsɛɛ lɛ moŋ, shi bianɛ po lɛ, wɔmiiná mfonirifeemɔŋ paradeiso lɛ he sɛɛ yɛ gbɛi babaoo anɔ. Hã wɔkwɛ bɔ ni wɔnáa he sɛɛ bianɛ kɛ nɔ hewɔ ni esaaa akɛ wɔshiɔ mli kɔkɔɔkɔ lɛ.
BƆ NI MƐI NI YƆƆ MFONIRIFEEMƆŊ PARADEISO LƐ MLI LƐ NUƆ HE AMƐHÃA
5. Tamɔ bɔ ni Yehowa ewo shi yɛ Yesaia 65:13 lɛ, mɛɛ jɔɔmɔi wɔnáa yɛ mfonirifeemɔŋ paradeiso lɛ mli?
5 Wɔnáa hewalɛ daa. Yesaia gbalɛ lɛ hãa wɔnaa akɛ, esoro bɔ ni mɛi ni yɔɔ mfonirifeemɔŋ paradeiso lɛ mli lɛ ashihilɛ ji lɛ kwraa yɛ bɔ ni mɛi ni bɛ mli lɛ ashihilɛ ji lɛ he. (Kanemɔ Yesaia 65:13.) Yehowa hãa mɛi ni jáa lɛ lɛ nibii ni he hiaa amɛ koni naanyobɔɔ ni yɔɔ amɛ kɛ lɛ teŋ lɛ mli awa daa. Akɛni ehã wɔ mumɔ krɔŋkrɔŋ lɛ, e-Wiemɔ lɛ, kɛ asafo lɛ woji lɛ hewɔ lɛ, ‘wɔyeɔ nii, wɔnuɔ nɔ ko, ni wɔnyaa babaoo.’ (Okɛto Kpojiemɔ 22:17 lɛ he.) Shi mɛi ni bɛ mfonirifeemɔŋ paradeiso lɛ mli lɛ náaa lɛ nakai kwraa, amɛ lɛ, ‘hɔmɔ yeɔ amɛ, kumai yeɔ amɛ, ni amɛhiɛ shwieɔ shi.’ Naanyobɔɔ ko bɛ amɛ kɛ Nyɔŋmɔ teŋ.—Amos 8:11.
6. Tamɔ bɔ ni Yoel 2:21-24 lɛ hãa wɔnaa lɛ, mɛɛ nibii Yehowa kɛdroɔ wɔ ŋmɛnɛ? Ni mɛɛ gbɛ nɔ wɔnáa he sɛɛ?
6 Be ni gbalɔ Yoel wieɔ bɔ ni Yehowa jɛɔ esuɔmɔ mli ehãa ewebii lɛ gbɛtsɔɔmɔi kɛjɛɔ Biblia lɛ mli, kɛ agbɛnɛ hu, nɔ fɛɛ nɔ ni he hiaa amɛ koni amɛhemɔkɛyeli lɛ mli awa lɛ he lɛ, ekɛ nibii ni he hiaa yɛ shihilɛ mli tamɔ ŋmaa, wain, kɛ oliv mu tsu nii. (Yoel 2:21-24) Yehowa tsɔɔ Biblia lɛ, asafo lɛ woji lɛ, wɔwɛbsaiti lɛ, asafoŋ kpeei, kpeei bibii, kɛ kpeei wuji anɔ ehãa wɔ nibii ni he hiaa wɔ lɛ. Daa gbi lɛ, wɔyɛ nɔ ko ni baanyɛ aye abua wɔ ni wɔ kɛ Yehowa teŋ wekukpaa lɛ mli awa. Enɛ hewɔ lɛ, wɔnáa hewalɛ daa.
7. Mɛɛ nibii hãa ‘wɔtsui nyɔɔ wɔmli’? (Yesaia 65:14)
7 Wɔyɛ miishɛɛ ni wɔtsui nyɔɔ wɔmli. Nyɔŋmɔ webii lɛ ‘láa nyamɔ lala’ ejaakɛ amɛhiɛ sɔɔ nibii babaoo ni Yehowa feɔ ehãa amɛ lɛ waa. (Kanemɔ Yesaia 65:14.) Anɔkwalei ni yɔɔ Nyɔŋmɔ Wiemɔ lɛ mli lɛ tswaa wɔ emaa shi, ni emli shiwoi lɛ shɛjeɔ wɔmii, agbɛnɛ hu, Kristo kpɔmɔ afɔleshaa lɛ hewɔ lɛ, wɔyɛ hiɛnɔkamɔ ni ma shi shiŋŋ, enɛɛmɛi fɛɛ ahewɔ lɛ, ‘wɔtsui nyɔɔ wɔmli.’ Kɛ́ wɔkɛ wɔnyɛmimɛi Kristofoi lɛ miigba nibii nɛɛ ahe sane lɛ, wɔnáa miishɛɛ waa!—Lala 34:8; 133:1-3.
8. Mɛɛ nibii titrii enyɔ obaana yɛ mfonirifeemɔŋ paradeiso lɛ mli?
8 Suɔmɔ kɛ ekomefeemɔ ni yɔɔ Yehowa webii lɛ ateŋ lɛ ji nibii titrii enyɔ ni obaana yɛ mfonirifeemɔŋ paradeiso lɛ mli. (Kol. 3:14) Ehãa wɔnaa bɔ ni shihilɛ baaji ehã diɛŋtsɛ yɛ jeŋ hee lɛ mli, ejaakɛ Yehowa webii baajie suɔmɔ kpo amɛtsɔɔ amɛhe waa, ni amɛbaafee ekome po fe bɔ ni amɛji ŋmɛnɛ lɛ. Be ni nyɛmi yoo ko tsɔɔ nɔ ni ekadi yɛ Yehowa webii lɛ ahe klɛŋklɛŋ be ni ena amɛ lɛ, ewie akɛ: “No mli lɛ, mileee nɔ ni atsɛɔ lɛ miishɛɛ, ni eko bɛ miweku lɛ mli po. Yehowa Odasefoi lɛ ateŋ mina bɔ ni ajieɔ suɔmɔ kpo atsɔɔ mɛi klɛŋklɛŋ kwraa.” Mɔ fɛɛ mɔ ni miisumɔ ni ená miishɛɛ diɛŋtsɛ ni etsui anyɔ emli lɛ, esa akɛ eba wɔfonirifeemɔŋ paradeiso lɛ mli. Ekɔɔɔ he eko bɔ ni mɛi ni yɔɔ je lɛ mli lɛ naa Yehowa webii lɛ, amɛyɛ gbɛ́i kpakpa yɛ Yehowa kɛ mɛi ni jáa lɛ lɛ ahiɛ.—Yes. 65:15.
9. Yɛ Yesaia 65:16, 17 lɛ, mɛni Yehowa ewo shi akɛ ebaafee yɛ nibii ni hãa wɔpiŋɔ ni wɔnaa nɔ lɛ ahe?
9 Wɔyɛ hejɔlɛ ni wɔyeee wɔtsui. Yesaia 65:14 lɛ kɛɛ mɛi ni baaa mfonirifeemɔŋ paradeiso lɛ mli lɛ ‘baafó yɛ amɛtsui mli dɔlɛ lɛ hewɔ ni amɛbaawo yara yɛ amɛwerɛ ni eho amɛhe lɛ hewɔ.’ Shi bɛ nibii komɛi hãa Nyɔŋmɔ webii lɛ hu naa nɔ ni amɛpiŋɔ? Hɛɛ, shi etsɛŋ ‘hiɛ baakpa amɛtsutsu haomɔi lɛ anɔ ni akɛbaatee kɛbaaje Nyɔŋmɔ hiɛ.’ (Kanemɔ Yesaia 65:16, 17.) Yehowa baajie wɔnaagbai lɛ fɛɛ kɛje jɛmɛ, ni fiofio lɛ wɔhiɛ baakpa piŋmɔi ni wɔtsɔ mli lɛ fɛɛ anɔ.
10. Mɛni hewɔ kɛ́ oyɛ onyɛmimɛi Kristofoi lɛ ateŋ lɛ, onáa miishɛɛ waa lɛ? (Kwɛmɔ mfoniri lɛ hu.)
10 Bianɛ po lɛ, kɛ́ wɔtee wɔ-Kristofoi akpeei srɔtoi lɛ, wɔtsui nyɔɔ wɔmli ni wɔjieɔ wɔjwɛŋmɔ kɛjeɔ naagbai ni yɔɔ jeŋ fɔŋ nɛɛ mli lɛ anɔ. Agbɛnɛ hu, kɛ́ wɔjie sui tamɔ suɔmɔ, miishɛɛ, toiŋjɔlɛ, mlihilɛ, kɛ mlijɔlɛ, ni fata yibii ni mumɔ lɛ woɔ lɛ ahe lɛ akpo lɛ, ehãa wɔnyɛmimɛi Kristofoi lɛ hu atsui nyɔɔ amɛmli. (Gal. 5:22, 23) Wɔmiida Yehowa shi waa akɛ wɔfata esafo lɛ he! Kɛ́ wɔtee nɔ wɔhi mfonirifeemɔŋ paradeiso lɛ mli lɛ, kɛ́ shi ni Nyɔŋmɔ ewo akɛ “ŋwɛi hee kɛ shikpɔŋ hee” baaba lɛ ba mli lɛ, wɔbaana.
Wɔmiida Yehowa shi waa akɛ wɔyɛ ewebii lɛ ateŋ yɛ mfonirifeemɔŋ paradeiso lɛ mli! (Kwɛmɔ kuku 10)c
11. Tamɔ bɔ ni awie yɛ Yesaia 65:18, 19 lɛ, te esa akɛ mfonirifeemɔŋ paradeiso ni Yehowa efee lɛ ahã wɔnu he wɔhã tɛŋŋ? Ni mɛni hewɔ?
11 Wɔnyaa ni wɔmli filiɔ wɔ. Agbɛnɛ hu, Yesaia tsɔɔ nɔ hewɔ ni esa akɛ ‘wɔnya ni wɔmli afili’ wɔ yɛ mfonirifeemɔŋ paradeiso lɛ mli. Yehowa ni fee mfonirifeemɔŋ paradeiso nɛɛ, kɛ́ wɔɔkɛɛ lɛ, lɛ ebɔ. (Kanemɔ Yesaia 65:18, 19.) No hewɔ lɛ, ebɛ naakpɛɛ akɛ Yehowa miitsɔ wɔnɔ eeye eebua mɛi koni amɛshi jeŋ fɔŋ nɛɛ ni etsɔɔɔ amɛ Nyɔŋmɔ he anɔkwale lɛ mli ni amɛba mfonirifeemɔŋ paradeiso fɛfɛo nɛɛ mli! Anɔkwale lɛ ni wɔbale lɛ ehã wɔná jɔɔmɔi babaoo, ni enɛ hãa wɔmli filiɔ wɔ ni etsirɛɔ wɔ ni wɔgba mɛi nibii ni wɔbale lɛ.—Yer. 31:12.
12. Kɛ́ ojwɛŋ jɔɔmɔi ni awie he yɛ Yesaia 65:20-24 lɛ he lɛ, te ehãa onuɔ he ohãa tɛŋŋ? Ni mɛni hewɔ?
12 Agbɛnɛ hu, wɔnyaa ni wɔmli filiɔ wɔ, ejaakɛ wekukpaa kpakpa ni yɔɔ wɔ kɛ Yehowa teŋ lɛ hewɔ lɛ, wɔná hiɛnɔkamɔ. Bo lɛ, susumɔ nibii fɛɛ ni wɔbaana kɛ nibii fɛɛ ni wɔbaafee yɛ jeŋ hee ni Nyɔŋmɔ kɛbaaba lɛ mli lɛ he okwɛ! Biblia lɛ ewo shi akɛ: “Abifao ni yeɔ gbii fioo ko, kɛ nuumo hu ni yeee egbii etãaa lɛ ehiŋ jɛmɛ.” Agbɛnɛ hu, ‘wɔbaamamɔ tsũi ni wɔbaahi mli, ni wɔbaafee wain ŋmɔji ni wɔbaaye amɛmli yibii lɛ.’ ‘Wɔgboŋ deŋme efolo’ ejaakɛ wɔbaatsɔmɔ “mɛi ni Yehowa ejɔɔ amɛ.” Yehowa ewo shi akɛ ebaahã wɔhi shi shweshweeshwe, ni wɔtsui baanyɔ wɔmli. ‘Dani wɔbaabo wɔtsɛ lɛ’ po lɛ, ebaale nɔ ni he hiaa wɔ, ni ‘ebaahã nɔ fɛɛ nɔ ni hiɛ kã lɛ atɔ kɛ nɔ ni etao.’—Yes. 65:20-24; Lala 145:16.
13. Yɛ nɔ ni awie yɛ Yesaia 65:25 lɛ naa lɛ, mɛɛ tsakemɔi mɛi pii feɔ kɛ́ amɛbɔi Yehowa sɔɔmɔ?
13 Wɔyɛ toiŋjɔlɛ ni wɔyɛ shweshweeshwe. Nyɔŋmɔ mumɔ lɛ eye ebua mɛi babaoo ni tsutsu ko lɛ amɛhiɛ yɔɔ laŋlaŋ loo amɛjeŋba ekpɔtɔ lɛ ni amɛtsake kwraa. (Kanemɔ Yesaia 65:25.) Amɛmia amɛhiɛ waa amɛjie sui gbohii ni tsutsu ko lɛ amɛyɔɔ lɛ. (Rom. 12:2; Efe. 4:22-24) Shi akɛni wɔyeee emuu hewɔ lɛ, yɛ be kɛ beiaŋ lɛ wɔbaatɔ̃. Fɛɛ sɛɛ lɛ, Yehowa efee wɔ fɛɛ ekome, eyɛ mli akɛ wɔjɛ hei srɔtoi, ni suɔmɔ kɛ toiŋjɔlɛ yɛ wɔteŋ. (Tito 2:11) Nyɔŋmɔ Ofe lɛ pɛ ni baanyɛ afee nɔ ko ni tamɔ nɛkɛ!
14. Mɛɛ gbɛ nɔ Yesaia 65:25 lɛ eba mli yɛ nyɛmi nuu ko gbɛfaŋ?
14 Ani mɛi nyɛɔ amɛtsakeɔ amɛjeŋba lɛɛlɛŋ? Naa niiashikpamɔ ko ni kɔɔ oblanyo ko ni be ni eyeɔ afii 20 lɛ awo lɛ tsũŋ shii abɔ lɛ he. Oblanyo nɛɛ jeŋba ekpɔtɔ ni ehiɛ yɛ laŋlaŋ waa. Ejuɔ mɛi atsɔji, ejwaa mɛi ashinai eyajuɔ amɛnibii, ni efeɔ nibii gbohii krokomɛi hu. Daa nɛɛ eetao ekɛ mɔ ko anɔ. Be ni enu Biblia mli anɔkwale lɛ klɛŋklɛŋ kwraa, ni ebɔi asafoŋ kpeeiyaa lɛ, ena bɔ ni esa akɛ ehi shi ehã, no ji ni ebajá Yehowa yɛ mfonirifeemɔŋ paradeiso lɛ mli. Be ni abaptisi lɛ ni ebatsɔ Yehowa Odasefonyo lɛ, daa nɛɛ enuɔ he akɛ ŋmalɛ ni yɔɔ Yesaia 65:25 lɛ eba mli yɛ egbɛfaŋ. Mɛni hewɔ? Ejaakɛ tsutsu ko lɛ, ehiɛ yɛ laŋlaŋ tamɔ jata, shi bianɛ lɛ etsake kwraa ni ehe ejɔ tamɔ gwantɛŋbi.
15. Mɛni hewɔ wɔmiisumɔ ni wɔye wɔbua mɛi ni amɛba mfonirifeemɔŋ paradeiso lɛ mli? Ni te wɔbaafee tɛŋŋ wɔfee nakai?
15 Yesaia 65:13 lɛ jeɔ shishi kɛ wiemɔi nɛɛ akɛ: “Nɔ ni Nuŋtsɔ Ofe Yehowa kɛɛ nɛ.” Ni kuku 25 lɛ muɔ naa kɛ wiemɔi nɛɛ akɛ: “Yehowa kɛɛ.” Yehowa wiemɔi lɛ baa mli be fɛɛ be. (Yes. 55:10, 11) Mfonirifeemɔŋ paradeiso ni wɔyɔɔ mli bianɛ lɛ po yeɔ enɛ he odase. Bɔ ni Yehowa ehã wɔfee ekome akɛ nyɛmimɛi lɛ nɔ bɛ kwraa. Akɛni wɔyɛ mfonirifeemɔŋ paradeiso lɛ mli hewɔ lɛ, wɔyɛ toiŋjɔlɛ ni wɔnuɔ he akɛ wɔyɛ shweshweeshwe eyɛ mli akɛ wɔyɛ jeŋ fɔŋ mli moŋ. (Lala 72:7) Yiŋtoi nɛɛ ahewɔ lɛ, wɔmiisumɔ ni wɔye wɔbua mɛi babaoo ni amɛbafata wɔhe. Gbɛ ni wɔbaatsɔ nɔ wɔfee nakai ji, ni wɔbaafee mɛi kaselɔi.—Mat. 28:19, 20.
NƆ NI WƆBAANYƐ WƆFEE NI BAAGBALA MƐI KƐBA MFONIRIFEEMƆŊ PARADEISO LƐ MLI
16. Mɛni gbalaa mɛi kɛbaa mfonirifeemɔŋ paradeiso lɛ mli?
16 Wɔteŋ mɔ fɛɛ mɔ baanyɛ agbala mɛi kɛba mfonirifeemɔŋ paradeiso lɛ mli. Nɔ ni baawa wɔ ni wɔnyɛ wɔfee nakai ji, ni wɔbaakase Yehowa. Yehowa enyɛɛɛ mɛi anɔ ni amɛba esafo lɛ mli. Moŋ lɛ, ‘egbalaa’ amɛ blɛoo. (Yoh. 6:44; Yer. 31:3) Kɛ́ mɛi ni yɔɔ tsui kpakpa lɛ kase Yehowa sui kpakpai lɛ ahe nii ni amɛbale bɔ ni efeɔ enii ehãa lɛ, amɛbasumɔɔ lɛ waa, ni no gbalaa amɛ kɛbaa eŋɔɔ. Ni wɔ hu? Wɔ hu wɔbaanyɛ wɔtsɔ wɔsui kpakpai kɛ wɔjeŋba kpakpa lɛ nɔ wɔgbala mɛi kɛba mfonirifeemɔŋ paradeiso lɛ mli. Te wɔbaafee lɛ wɔhã tɛŋŋ?
17. Mɛni ji nɔ kome ni kɛ́ wɔfee lɛ egbalaa mɛi kɛbaa wɔfonirifeemɔŋ paradeiso lɛ mli?
17 Nɔ kome ni kɛ́ wɔfee lɛ ebaagbala mɛi kɛba mfonirifeemɔŋ paradeiso lɛ mli ji, ni wɔkɛ wɔnyɛmimɛi lɛ baaye yɛ suɔmɔ kɛ mlihilɛ mli. Yɛ blema lɛ, be ni mɛi ni jeee Kristofoi lɛ tee Kristofoi ni yɔɔ Korinto lɛ asafoŋ kpee ko shishi lɛ, amɛwie akɛ: “Nyɔŋmɔ yɛ nyɛteŋ lɛɛlɛŋ.” Nakai nɔŋŋ wɔ hu wɔsumɔɔ ni mɛi hei ni baaba wɔsafoŋ kpeei lɛ anu he. (1 Kor. 14:24, 25; Zak. 8:23) Enɛ hewɔ lɛ, esa akɛ wɔya nɔ wɔbo ŋaa ni awoɔ wɔ akɛ ‘wɔhã toiŋjɔlɛ ahi wɔteŋ’ lɛ toi.—1 Tes. 5:13.
18. Mɛni ji nɔ kome ni baanyɛ agbala mɛi kɛba asafo lɛ mli?
18 Be fɛɛ be lɛ, esa akɛ wɔna wɔnyɛmimɛi Kristofoi lɛ tamɔ bɔ ni Yehowa naa amɛ lɛ. Nɔ kome ni baaye abua wɔ ni wɔnyɛ wɔfee nakai ji, ni wɔkɛ wɔjwɛŋmɔ baama amɛsui kpakpai lɛ anɔ, moŋ fe amɛfatɔi lɛ, ejaakɛ amɛfatɔi lɛ ehiŋ shi kɛyaŋ naanɔ. Kɛ́ naagba ko ba wɔ kɛ nyɛmi ko teŋ lɛ, esa akɛ wɔtsu he nii bɔ ni baahã ana akɛ wɔyɛ suɔmɔ, ni wɔbaanyɛ wɔfee nakai kɛji be fɛɛ be lɛ ‘wɔmli hi hã wɔnyɛmimɛi lɛ, wɔmusuŋ tsɔɔ wɔ yɛ amɛhe, ni wɔkɛkeɔ amɛ tswaa.’ (Efe. 4:32) Kɛ́ mɛi na akɛ wɔkɛ wɔnyɛmimɛi lɛ yeɔ yɛ nɛkɛ gbɛ nɔ lɛ, no baagbala amɛ kɛba mfonirifeemɔŋ paradeiso lɛ mli, ejaakɛ amɛ hu amɛmiisumɔ ni akɛ amɛ aye nakai.b
KAASHI MFONIRIFEEMƆŊ PARADEISO LƐ MLI KƆKƆƆKƆ!
19. (a) Tamɔ bɔ ni wɔnaa yɛ akrabatsa ni ji, “Amɛtee Ni Amɛku Amɛsɛɛ Amɛba” lɛ mli lɛ, mɛni mɛi komɛi ni shi mfonirifeemɔŋ paradeiso lɛ mli shi amɛku amɛsɛɛ amɛba lɛ ewie? (b) Mɛni esa akɛ wɔtswa wɔfai shi akɛ wɔbaafee? (Kwɛmɔ mfoniri lɛ hu.)
19 Eŋɔɔ wɔnaa waa akɛ wɔyɛ mfonirifeemɔŋ paradeiso lɛ mli! Wɔparadeiso lɛ mli efee fɛo waa fe bei fɛɛ ni eho, ni mɛi pii hu eba mli fe bei fɛɛ ni eho. Esa akɛ wɔda Yehowa shi daa akɛ efee paradeiso nɛɛ ehã wɔ. Mɔ fɛɛ mɔ ni miisumɔ ni ená hewalɛ, etsui anyɔ emli, ehe ajɔ lɛ, ni ehi shi shweshweeshwe lɛ, esa akɛ eba mfonirifeemɔŋ paradeiso lɛ mli ni ekashi mli kɔkɔɔkɔ! Shi esa akɛ wɔhiɛ ahi wɔhe nɔ waa, ejaakɛ Satan miitao elaka wɔ ni wɔshi mfonirifeemɔŋ paradeiso lɛ mli. (1 Pet. 5:8; Kpo. 12:9) Nyɛkahãa wɔŋmɛa lɛ gbɛ. Moŋ lɛ, nyɛhãa wɔfea nɔ fɛɛ nɔ ni wɔbaanyɛ kɛbu mfonirifeemɔŋ paradeiso lɛ he koni emli afee fɛo, emli atse, ni toiŋjɔlɛ ahi mli.
Mɛi ni baaya nɔ ahi mfonirifeemɔŋ paradeiso lɛ mli lɛ baahi shikpɔŋ lɛ nɔ paradeiso ni baaba wɔsɛɛ lɛ hu mli (Kwɛmɔ kuku 19)
TE OBAAHÃ HETOO OHÃ TƐŊŊ?
Mɛni ji mfonirifeemɔŋ paradeiso lɛ?
Mɛɛ jɔɔmɔi wɔnáa yɛ mfonirifeemɔŋ paradeiso lɛ mli?
Mɛɛ nibii kɛ́ wɔfee lɛ, ebaagbala mɛi kɛba mfonirifeemɔŋ paradeiso lɛ mli?
LALA 144 Hã Ohiɛ Ahi Wɔsɛɛ Jɔɔmɔi Lɛ Anɔ!
a WIEMƆ NI ATSƆƆ MLI: Kɛ́ akɛɛ wɔyɛ “mfonirifeemɔŋ paradeiso” lɛ mli lɛ, etsɔɔ akɛ wɔkɛ wɔnyɛmimɛi lɛ efee ekome kɛmiijá Yehowa. Wekukpaa kpakpa yɛ mɛi fɛɛ ni yɔɔ mfonirifeemɔŋ paradeiso lɛ mli lɛ kɛ Yehowa teŋ, kɛ agbɛnɛ hu amɛkɛ amɛnyɛmimɛi lɛ ateŋ.
b Kwɛmɔ jw.org lɛ nɔ vidio ni ji, Nɛgbɛ Amɛyɔɔ Bianɛ? Alena Žitníková: Bɔ Ni Fee Ni Miná Shihilɛ Kpakpa Ni Mishwe Lɛ. Ebaahã ona jɔɔmɔi ni nyɛmi yoo ko ná akɛni eyɛ mfonirifeemɔŋ paradeiso lɛ mli lɛ hewɔ.
c NƆ NI WƆNAA YƐ MFONIRI LƐ MLI: Atee asafoŋ kpee ni nyɛmimɛi lɛ miiŋaŋaa amɛhe ni amɛmiigba sane, shi nyɛmi nuu ko ta shi ni ekɛ mɔ ko mɔ ko egbaaa sane.