Bɔ ni Obaafee Owula Mfonirifeemɔŋ Paradeiso Lɛ

1, 2. Yɛ Hebri Ŋmalɛi lɛ amli lɛ, kɛ́ akɛ wiemɔ ni ji “naneshi maaŋoo” lɛ tsu nii lɛ, mɛni he ebaanyɛ ekɔ?

YEHOWA NYƆŊMƆ wie akɛ: “Ŋwɛi lɛ, misɛi ni, ni shikpɔŋ lɛ, minaneshi maaŋoo ni.” (Yesaia 66:1) Be ni Nyɔŋmɔ wie akɛ: “Mawo minaji anaamɔhe lɛ hiɛ nyam” lɛ, no mli lɛ ‘enaneshi maaŋoo’ lɛ he ewieɔ lɛ. (Yesaia 60:13) Mɛɛ gbɛ nɔ Yehowa woɔ enaneshi maaŋoo lɛ hiɛ nyam, loo ewulaa lɛ? Ni mɛni no tsɔɔ kɛhã mɛi ni yɔɔ shikpɔŋ lɛ, ni ji Nyɔŋmɔ naneshi maaŋoo lɛ nɔ lɛ?

² Yɛ Hebri Ŋmalɛi lɛ amli lɛ, kɛ́ akɛ wiemɔ ni ji “naneshi maaŋoo” lɛ tsu nii lɛ, enyɛɔ ekɔɔ blema sɔlemɔwe ni yɔɔ Israel lɛ hu he. (1 Kronika 28:2; Lala 132:7) Nakai sɔlemɔwe lɛ fee Yehowa fɛo waa, ejaakɛ jɛmɛ ji he ni ajá lɛ yɛ. Ni yɛ shikpɔŋ lɛ nɔ fɛɛ lɛ, jɛmɛ ji he ni awo ehiɛ nyam yɛ.

 3. Mɛni ji mfonirifeemɔŋ sɔlemɔwe lɛ? Ni mɛɛ be abɔi anɔkwa Nyɔŋmɔ lɛ jamɔ yɛ jɛmɛ?

³ Ŋmɛnɛ lɛ, nɛgbɛ ajáa anɔkwa Nyɔŋmɔ lɛ yɛ? Ajáaa lɛ yɛ tsũ ko loo sɔlemɔwe ko mli. Moŋ lɛ, ajáa lɛ yɛ mfonirifeemɔŋ sɔlemɔwe lɛ mli. Tsũ ko bɛ ni baanyɛ awo Yehowa hiɛ nyam tamɔ mfonirifeemɔŋ sɔlemɔwe lɛ. Mɛni ji mfonirifeemɔŋ sɔlemɔwe lɛ? No ji gbɛjianɔ ni Nyɔŋmɔ eto koni adesai abatsɔmɔ enanemɛi, ní amɛjá lɛ lɛ. Yesu kpɔmɔnɔ lɛ ji nɔ ni hãa gbɛjianɔtoo nɛɛ yeɔ omanye. Gbɛjianɔtoo nɛɛ bɔi nitsumɔ yɛ afi 29, be ni abaptisi Yesu ní afɔ lɛ mu akɛ Osɔfonukpa yɛ Yehowa mfonirifeemɔŋ sɔlemɔwe lɛ mli lɛ.​—Hebribii 9:11, 12.

4, 5. (a) Yɛ nɔ ni aŋma yɛ Lala 99 lɛ naa lɛ, mɛni Yehowa anɔkwa jálɔi fɛɛ feɔ? (b) Mɛni esa akɛ wɔbi wɔhe?

⁴ Wɔhiɛ sɔɔ gbɛjianɔ ni anɔkwa Nyɔŋmɔ lɛ eto koni anyɛ ajá lɛ lɛ waa. Wɔjieɔ hiɛsɔɔ nɛɛ kpo kɛ́ wɔtsɔɔ mɛi Yehowa gbɛ́i lɛ kɛ gbɛjianɔ fɛfɛo ni eto koni ekpɔ̃ adesai lɛ. Eŋɔɔ wɔnaa waa akɛ anɔkwa Kristofoi fe akpekpei kpaanyɔ miijie Yehowa yi daa gbi! Jamɔi babaoo amli bii susuɔ akɛ, kɛ́ amɛgbo ni amɛtee ŋwɛi lɛ, no dani amɛbaajie Nyɔŋmɔ yi. Shi Yehowa webii le akɛ, ehe miihia ni amɛjie eyi yɛ biɛ, ni amɛfee nakai amrɔ nɛɛ.

⁵ Kɛ́ wɔjie Yehowa yi lɛ, etsɔɔ akɛ wɔmiikase nɔ ni Nyɔŋmɔ tsuji anɔkwafoi ni hi shi yɛ blema lɛ fee, ni awie he yɛ Lala 99:1-3, 5-7 lɛ. (Kanemɔ.) Nakai lala lɛ hãa wɔnaa akɛ, Mose, Aaron, kɛ Samuel kɛ amɛtsui fɛɛ fi gbɛjianɔ ni anɔkwa Nyɔŋmɔ lɛ to akɛ atsɔ nɔ ajá lɛ lɛ sɛɛ. Ŋmɛnɛ lɛ, dani mɛi ni afɔ amɛ mu lɛ baayafata Yesu he akɛ osɔfoi yɛ ŋwɛi lɛ, amɛkɛ anɔkwayeli sɔmɔɔ Yehowa yɛ mfonirifeemɔŋ sɔlemɔwe lɛ fã ni yɔɔ shikpɔŋ lɛ nɔ lɛ mli. “Gwantɛŋi krokomɛi” akpekpei abɔ kɛ anɔkwayeli fataa amɛhe kɛsɔmɔɔ Yehowa. (Yohane 10:16) Kui enyɔ lɛ fɛɛ feɔ ekome kɛjáa Yehowa. Kɛ̃lɛ, esa akɛ wɔteŋ mɔ fɛɛ mɔ abi ehe akɛ, ‘Ani mikɛ mitsui muu fɛɛ miifi gbɛjianɔ ni Yehowa eto akɛ atsɔ nɔ ajá lɛ lɛ sɛɛ?’

6, 7. Mɛɛ naagba ba yɛ Kristofoi asafo ni hi shi yɛ klɛŋklɛŋ afii 100 lɛ mli lɛ mli? Ni be ni shɛɔ afi 1919 lɛ, mɛni eba?

⁶ Be ni ato Kristofoi asafo lɛ shishi lɛ, eyeee afii 100 ni mɛi bɔi anɔkwa jamɔ lɛ kwamɔ, taakɛ agba akɛ ebaaba lɛ pɛpɛɛpɛ. (Bɔfoi 20:28-30; 2 Tesalonikabii 2:3, 4) Enɛ hã ebawa akɛ mɛi baayɔse Nyɔŋmɔ jálɔi anɔkwafoi lɛ. Afii ohai abɔ sɛɛ dani Yehowa tsɔ Yesu nɔ ehã ana mɛi tuuntu ni jáa Nyɔŋmɔ yɛ Efonirifeemɔŋ sɔlemɔwe lɛ mli.

⁷ Be ni shɛɔ afi 1919 lɛ, ana mɛi ni Nyɔŋmɔ kpɛlɛɔ amɛnɔ, ni miisɔmɔ lɛ yɛ efonirifeemɔŋ sɔlemɔwe lɛ mli lɛ faŋŋ. Mɛi nɛɛ fee tsakemɔi koni amɛnyɛ amɛjá Yehowa jogbaŋŋ fe bɔ ni amɛfeɔ tsutsu lɛ. (Yesaia 4:2, 3; Maleaki 3:1-4) Enɛ hã ninaa ko ni bɔfo Paulo na afii ohai komɛi ni eho lɛ fã ko ba mli.

8, 9. Mɛni ji “paradeiso” ni Paulo na yɛ ninaa mli lɛ?

⁸ Paulo ninaa lɛ ji nɔ ni yɔɔ 2 Korintobii 12:1-4 lɛ. (Kanemɔ.) Yɛ nakai ninaa lɛ mli lɛ, Yehowa hã Paulo na nɔ ko ni baaba wɔsɛɛ. Mɛni ji “paradeiso” ni Paulo na lɛ? Klɛŋklɛŋ lɛ, ebaanyɛ ekɔ bɔ ni shikpɔŋ lɛ baafee be ni asaa nɔ fɛfɛo ni etsɔ Paradeiso lɛ he. (Luka 23:43) Nɔ ni ji enyɔ lɛ, ebaanyɛ ekɔ mfonirifeemɔŋ paradeiso ni naagba ko kwraa bɛ he, ni wɔbaaná mli ŋɔɔmɔ yɛ jeŋ hee lɛ mli lɛ he. Ni nɔ ni ji etɛ lɛ, ebaanyɛ ekɔ shihilɛ fɛfɛo ni yɔɔ “Nyɔŋmɔ paradeiso lɛ” mli yɛ ŋwɛi lɛ he.​—Kpojiemɔ 2:7.

⁹ Shi, mɛni hewɔ Paulo wie akɛ, “eyanu wiemɔi ni ehiii wiemɔ ni mla hu eŋmɛɛɛ gbɛ akɛ gbɔmɔ tsĩɔ tã” lɛ? Ewie nakai ejaakɛ be ni ena ninaa lɛ, no mli lɛ be shɛko ni ebaagbala nibii fɛfɛji ni ena lɛ amli fitsofitso. Shi ŋmɛnɛ lɛ, Yehowa eŋmɛ wɔ gbɛ ni wɔgba mɛi krokomɛi jɔɔmɔi ni ewebii lɛ náa mli ŋɔɔmɔ amrɔ nɛɛ!

10. Mɛni hewɔ wɔbaanyɛ wɔkɛɛ akɛ, esoro mfonirifeemɔŋ paradeiso lɛ yɛ mfonirifeemɔŋ sɔlemɔwe lɛ he lɛ?

¹⁰ Wɔfɔɔ mfonirifeemɔŋ paradeiso lɛ he wiemɔ. Shi mɛni ni? Eji toiŋjɔlɛ ni nɔ bɛ ni Nyɔŋmɔ kɛduro ewebii lɛ. No hewɔ lɛ, esoro mfonirifeemɔŋ paradeiso lɛ yɛ mfonirifeemɔŋ sɔlemɔwe lɛ he. Mfonirifeemɔŋ sɔlemɔwe lɛ ji gbɛjianɔ ni anɔkwa Nyɔŋmɔ lɛ eto akɛ atsɔ nɔ ajá lɛ lɛ. Ni mfonirifeemɔŋ paradeiso lɛ ji nɔ ni hãa ayɔseɔ mɛi ni Nyɔŋmɔ ekpɛlɛ amɛnɔ, ni miija lɛ yɛ efonirifeemɔŋ sɔlemɔwe lɛ mli lɛ.​—Maleaki 3:18.

11. Ŋmɛnɛ lɛ, mɛɛ hegbɛ wɔná?

¹¹ Eji miishɛɛ sane akɛ wɔɔle akɛ, kɛjɛ afi 1919 lɛ, Yehowa eŋmɛ adesai ni yeee emuu gbɛ ní amɛhu mfonirifeemɔŋ paradeiso lɛ mli, amɛsaa mli, ni amɛlɛɛ mli. Ani ooye oobua kɛmiitsu nitsumɔ ni sa kadimɔ nɛɛ? Ani ohiɛ sɔɔ hegbɛ ni oná akɛ okɛ Yehowa baafee ekome kɛtsu nii kɛwo ehiɛ nyam yɛ shikpɔŋ lɛ nɔ lɛ?

12. Te wɔfeɔ tɛŋŋ wɔleɔ akɛ gbalɛ ni yɔɔ Yesaia 60:17 lɛ eba mli? (Kwɛmɔ mfoniri ni yɔɔ nikasemɔ lɛ shishijee lɛ.)

¹² Gbalɔ Yesaia gba akɛ, abaafee tsakemɔi ni sa kadimɔ yɛ Nyɔŋmɔ gbɛjianɔtoo lɛ fã ni yɔɔ shikpɔŋ lɛ nɔ lɛ mli. (Kanemɔ Yesaia 60:17.) Kristofoi ni hiɛ fãko loo mɛi ni abaptisi amɛ etsɛko lɛ, ekane tsakemɔi nɛɛ ahe saji loo amɛnu he kɛkɛ. Shi, nyɛmimɛi babaoo yɛ ni ná hegbɛ akɛ amɛbaana tsakemɔi ni sa kadimɔ nɛɛ! Nyɔŋmɔ tsuji anɔkwafoi nɛɛ ená nɔmimaa akɛ Nyɔŋmɔ kɛ Yesu, ni ji wɔ-Maŋtsɛ lɛ miitsu nii kɛmiikudɔ Egbɛjianɔtoo lɛ! Kɛ́ wɔbo Kristofoi anɔkwafoi nɛɛ aniiashikpamɔi lɛ atoi lɛ, ebaahã hiɛkɛnɔfɔɔ kɛ hemɔkɛyeli ni wɔyɔɔ yɛ Yehowa mli lɛ mli awa.

13. Yɛ nɔ ni aŋma yɛ Lala 48:13-15 lɛ naa lɛ, mɛni esa akɛ wɔfee?

¹³ Esa akɛ anɔkwa Kristofoi fɛɛ agba mɛi Yehowa gbɛjianɔtoo lɛ he sane. Eyɛ naakpɛɛ akɛ, yɛ Satan jeŋ fɔŋ nɛɛ mli po lɛ, wɔfee ekome akɛ nyɛmimɛi, ni wɔyɛ toiŋjɔlɛ! Esa akɛ wɔkɛ miishɛɛ agba “yinɔbii ni baa yɛ sɛɛ lɛ” Yehowa gbɛjianɔtoo lɛ kɛ mfonirifeemɔŋ paradeiso lɛ he sane!​—Kanemɔ Lala 48:13-15.

14, 15. Kɛjɛ afi 1970 lɛ, mɛɛ tsakemɔi afee? Ni mɛɛ gbɛ nɔ asafo lɛ ená he sɛɛ?

¹⁴ Nyɛmimɛi ni egbɔlɔ ni yɔɔ wɔsafoi lɛ amli lɛ ateŋ mɛi babaoo yɛ asafo lɛ mli be ni afeɔ tsakemɔi komɛi ni ehã Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ efee fɛo fe tsutsu lɛ. Amɛkaiɔ be ni asafo fɛɛ asafo yɔɔ asafo sɔɔlɔ, nitsumɔhe nine fɛɛ nitsumɔhe nine yɔɔ nitsumɔhe nine nɔkwɛlɔ, ni Watch Tower Society lɛ sɛinɔtalɔ lɛ ji mɔ ni kɛ gbɛtsɔɔmɔ hãa Yehowa webii ni yɔɔ jeŋ fɛɛ lɛ. Eyɛ mli akɛ no mli lɛ, nyɛmimɛi hii ni atuu sɔi nɛɛ awo amɛdɛŋ lɛ yɛ nyɛmimɛi anɔkwafoi ni yeɔ buaa amɛ moŋ, shi kɛ́ wɔɔwie lɛ, amɛ kome pɛ amɛkpɛ yiŋ srɔtoi ni kɔɔ amɛsafoi lɛ, amɛnitsumɔhe niji lɛ, kɛ Yehowa webii ni yɔɔ je lɛŋ fɛɛ lɛ ahe. Shi kɛjɛ afi 1970 lɛ, afee tsakemɔi koni asafoŋ onukpai srɔtoi afee ekome kɛkpɛ yiŋ srɔtoi lɛ. Amrɔ nɛɛ, onukpai akui ni kwɛɔ asafoi lɛ anɔ, Nitsumɔhe Nine Ajinafoi Akui ni kwɛɔ nitsumɔhe niji lɛ anɔ, ni Yehowa Odasefoi a-Gbɛtsɔɔmɔ Kuu lɛ ni kwɛɔ Yehowa webii ni yɔɔ jeŋ fɛɛ lɛ anɔ.

¹⁵ Mɛni hewɔ asafo lɛ ená tsakemɔi nɛɛ ahe sɛɛ lɛ? Ená he sɛɛ ejaakɛ tsakemɔi nɛɛ damɔ shishinumɔi hei ni aná yɛ Ŋmalɛi lɛ amli lɛ anɔ. Akɛni jeee mɔ kome kpɛɔ eyiŋ yɛ nɔ fɛɛ nɔ he hewɔ lɛ, asafo lɛ náa asafoŋ onukpai lɛ fɛɛ ni Yehowa kɛhã “akɛ nikeenii” lɛ asui kpakpai lɛ ahe sɛɛ.​—Efesobii 4:8; Abɛi 24:6.

16, 17. Mɛɛ tsakemɔi ni afee nyɛsɛɛ nɛɛ onya he waa? Ni mɛni hewɔ?

¹⁶ Bo diɛŋtsɛ susumɔ tsakemɔi komɛi ni afee nyɛsɛɛ nɛɛ yɛ bɔ ni afeɔ wɔwoji lɛ ahãa lɛ mli lɛ he okwɛ. Wɔnáa miishɛɛ kɛ́ wɔkɛ wɔwoji lɛ miihã yɛ shiɛmɔ nitsumɔ lɛ nɔ, ejaakɛ amɛyɛ fɛo, ni saji ni yɔɔ amɛmli lɛ ahe yɛ sɛɛnamɔ waa. Agbɛnɛ hu, susumɔ bɔ ni wɔkɛ ilɛtrɔniki nibii ni afee nyɛsɛɛ nɛɛ tsuɔ nii kɛshiɛɔ sane kpakpa lɛ he okwɛ. Akɛ nɔkwɛmɔnɔ lɛ, mɛi babaoo baanyɛ aya jw.org wɛbsaiti lɛ nɔ koni amɛná yelikɛbuamɔ ni he hiaa amɛ lɛ. Tsakemɔi nɛɛ fɛɛ hãa wɔnaa akɛ, Yehowa sumɔɔ mɛi asane waa diɛŋtsɛ, ni esusuɔ amɛhe.

¹⁷ Wɔhiɛ sɔɔ tsakemɔi ni afee yɛ gbii abɔ ni wɔkɛyaa asafoŋ kpee lɛ mli, ejaakɛ no ehã wɔná be babaoo kɛhã weku jamɔ loo aŋkro nikasemɔ. Nakai nɔŋŋ wɔhiɛ sɔɔ tsakemɔi ni afeɔ yɛ wɔkpeei bibii kɛ kpeei wuji lɛ amli lɛ. Tsakemɔi nɛɛ ni afeɔ daa afi lɛ hãa kpeei lɛ ŋɔɔ waa. Nibii ni wɔkaseɔ kɛ́ wɔtee Biblia skul babaoo ni afeɔ lɛ hu hãa wɔmii shɛɔ wɔhe. Tsakemɔi nɛɛ fɛɛ hãa wɔnaa faŋŋ akɛ, Yehowa miikudɔ egbɛjianɔtoo lɛ, ni eewula mfonirifeemɔŋ paradeiso lɛ koni efee fɛo fe tsutsu lɛ!

18, 19. Mɛni wɔbaanyɛ wɔfee kɛwula mfonirifeemɔŋ paradeiso lɛ?

¹⁸ Yehowa ewo wɔhiɛ nyam; ehã wɔ hegbɛ akɛ wɔye wɔbua lɛ kɛwula mfonirifeemɔŋ paradeiso lɛ. Shi te wɔbaafee tɛŋŋ wɔfee nakai lɛ? Wɔbaanyɛ wɔfee nakai kɛ́ wɔshiɛ Maŋtsɛyeli lɛ he sane kpakpa lɛ kɛ ekãa, ni wɔfee mɛi krokomɛi kaselɔi. Be fɛɛ be ni wɔbaaye wɔbua mɔ ko ni ebatsɔ Nyɔŋmɔ tsulɔ lɛ, wɔmiilɛɛ mfonirifeemɔŋ paradeiso lɛ mli.​—Yesaia 26:15; 54:2.

¹⁹ Agbɛnɛ hu, wɔbaanyɛ wɔwula mfonirifeemɔŋ paradeiso lɛ kɛji wɔmia wɔhiɛ wɔjie Kristofoi asui akpo jogbaŋŋ fe bɔ ni wɔfeɔ amrɔ nɛɛ. Enɛ hãa mfonirifeemɔŋ paradeiso lɛ feɔ mɛi krokomɛi fɛo. Biblia mli nilee ni wɔyɔɔ lɛ, bɔ ni wɔbaa wɔjeŋ jogbaŋŋ lɛ, kɛ agbɛnɛ hu, toiŋjɔlɛ sɛɛ ni wɔtiuɔ lɛ, ji nɔ ni hãa mɛi nyaa asafo lɛ he ni amɛbɛŋkɛɔ Yehowa kɛ Yesu. Ni bei pii lɛ, amɛjwɛŋmɔ yaa wɔjeŋba lɛ nɔ waa po fe Biblia mli nilee ni wɔyɔɔ lɛ.

20. Yɛ nɔ ni aŋma yɛ Abɛi 14:35 lɛ naa lɛ, mɛni esa akɛ wɔfee?

²⁰ Ŋmɛnɛ lɛ, kɛ́ Yehowa kɛ Yesu kwɛ bɔ ni wɔwula mfonirifeemɔŋ paradeiso lɛ fɛfɛo lɛ, amɛmii shɛɔ amɛhe waa! Kɛ́ wɔwula mfonirifeemɔŋ paradeiso lɛ, wɔmii shɛɔ wɔhe waa. Shi wɔnyɛŋ wɔkɛ miishɛɛ ni wɔnáa amrɔ nɛɛ ato miishɛɛ ni wɔbaaná wɔsɛɛ be ni wɔsaa shikpɔŋ lɛ nɔ koni ebatsɔ Paradeiso lɛ he kwraa! Be fɛɛ be lɛ, esa akɛ wɔkai wiemɔi ni yɔɔ Abɛi 14:35 lɛ, akɛ: “Tsulɔ nilelɔ lɛ, maŋtsɛ hiɛ sɔɔ lɛ.” Nyɛhãa wɔfea wɔhe nilelɔi, ni wɔgbo deŋme kɛwula mfonirifeemɔŋ paradeiso lɛ!