Sanebimɔi Ni Jɛ Kanelɔi Adɛŋ

Mɛni hewɔ eja gbɛ akɛ wɔbaawie akɛ, wiemɔ ni ji, “Obaabu amɛhe” ni akɛtsu nii yɛ Lala 12:7 lɛ mli lɛ kɔɔ “nɔnalɔi” ni atsĩ amɛtã yɛ kuku 5 lɛ mli lɛ ahe?

Saji ni awie he yɛ Lala 12 muu lɛ fɛɛ mli lɛ ni hãa wɔnaa akɛ eja gbɛ akɛ wɔbaawie nakai.

Lala 12:​1-4 lɛ wie akɛ, “mɛi ni yeɔ anɔkwa etã yɛ gbɔmɛi ateŋ.” Kɛkɛ ni yɛ kuku 5-7 lɛ, ewie akɛ, Yehowa kɛɛ akɛ:

Kuku 5 lɛ hãa wɔnaa nɔ ni Yehowa baafee ehã ‘mɛi ni naa nɔ’ lɛ. Ewie akɛ, ebaahere amɛ.

Yɛ kuku 6 lɛ mli lɛ, David wie akɛ: “Yehowa wiemɔi lɛ yɛ krɔŋŋ,” ‘tamɔ jwiɛtɛi ni atsuu he.’ Bɔ ni David na Yehowa wiemɔi lɛ, nakai anɔkwa Kristofoi fɛɛ naa lɛ.—Lala 18:30; 119:140.

Agbɛnɛ, nyɛhãa wɔsusua kuku 7 lɛ he. Jɛmɛ kɛɔ akɛ: “Bo Yehowa, obaabu amɛhe; obaabu amɛteŋ mɔ fɛɛ mɔ he kɛjɛ yinɔ nɛɛ he kɛya naanɔ.” Yɛ Biblia shishitsɔɔmɔi komɛi amli lɛ, atsɔɔ kuku nɛɛ shishi akɛ: “Bo, Yehowa, ooobu amɛhe, ooobaa amɛyi kɛaajɛ nɛkɛ yinɔbii nɛɛ adɛŋ daa.”

Akɛni kuku 6 lɛ kɔɔ “Yehowa wiemɔi lɛ” ahe hewɔ lɛ, mɛi komɛi susuɔ akɛ, wiemɔ ni ji “amɛhe” ni akɛtsu nii yɛ kuku nɛɛ mli lɛ kɔɔ “Yehowa wiemɔi lɛ” ahe. Ewaaa akɛ mɔ ko baasusu nakai, ejaakɛ Yehowa ebu Biblia lɛ he lɛɛlɛŋ koni akakpãtã hiɛ.—Yes. 40:8; 1 Pet. 1:25.

Shi wɔle akɛ, Yehowa buɔ mɛi ni awie amɛhe yɛ kuku 5 lɛ mli lɛ hu ahe, ni ebaaya nɔ eye ebua ‘mɛi ni naa nɔ’ kɛ ‘mɛi ni awaa amɛ yi’ lɛ, ni ebaahere amɛ.—Hiob 36:15; Lala 6:4; 31:​1, 2; 54:7; 145:20.

No hewɔ lɛ, mɛni loo namɛi kuku 7 lɛ tsɔɔ akɛ Yehowa buɔ “amɛhe” lɛ? Ewiemɔi lɛ aloo gbɔmɛi lɛ?

Kɛ́ wɔsusu saji ni awie yɛ lala nɛɛ mli lɛ ahe jogbaŋŋ lɛ, wɔnaa faŋŋ akɛ gbɔmɛi lɛ ahe ekɔɔ. Mɛni hewɔ wɔkɛɔ nakai?

Yɛ kuku 1 kɛ 2 lɛ mli lɛ, David wie akɛ, mɛi yeee anɔkwa, ni amɛwieee anɔkwale hu, ni enɛ ehã eetɔ lɛ kɛ Yehowa tsuji anɔkwafoi krokomɛi lɛ waa. Kɛkɛ ni yɛ kuku 3 lɛ mli lɛ, awie akɛ Yehowa baakpãtã mɛi fɛɛ ni kɛ amɛnaabu kɛ amɛlilɛi tsuuu nii yɛ gbɛ kpakpa nɔ lɛ ahiɛ. No hewɔ lɛ, lala muu lɛ fɛɛ hãa wɔnáa hemɔkɛyeli ni mli wa akɛ, Yehowa baaye ebua ewebii lɛ ni ehere amɛ, ejaakɛ ewiemɔi lɛ yɛ krɔŋŋ.

Yɛ nɔ ni wɔsusu he lɛ naa lɛ, wɔbaanyɛ wɔkɛɛ akɛ, mɛi ni awie yɛ kuku 7 lɛ mli akɛ Yehowa baabu “amɛhe” lɛ ji, mɛi ni naa nɔ yɛ mɛi fɔji adɛŋ lɛ.

Kɛ́ nakai ni lɛ, mɛni hewɔ Biblia shishitsɔɔmɔi komɛi tsɔɔ kuku nɛɛ shishi ookɛɛ nɔ ni ekɔɔ Yehowa wiemɔi lɛ ahe? Wiemɔi ni akɛtsu nii yɛ Hebri ŋmalɛi ni akɛ niji ŋmala ni anyɛɔ amuɔ afɔ̃ɔ nɔ lɛ amli lɛ hewɔ amɛtsɔɔ shishi nakai. Shi yɛ Septuagint lɛ, ni ji, klɛŋklɛŋ Biblia shishitsɔɔmɔ ni afee yɛ Greek mli lɛ mli lɛ, be ni atsɔɔ kuku nɛɛ shishi lɛ, akɛ wiemɔi nɛɛ tsu nii, “Bo Yehowa, obaabu wɔhe, obaabu wɔteŋ mɔ fɛɛ mɔ he.” Bɔ ni atsɔɔ shishi ahã nɛɛ hã efee faŋŋ akɛ, aawie mɛi ni aawa amɛ yi kɛ mɛi ni miina nɔ ni atsĩ tã yɛ kuku 5 lɛ mli lɛ ahe. Abaabu mɛi nɛɛ ahe kɛjɛ yinɔ nɛɛ, ni ji mɛi ni nyaa yakayaka saji ahe lɛ ahe. (Lala 12:​7, 8) Be ni atsɔɔ Hebri ŋmalɛ lɛ shishi kɛyaa Aramaik mli lɛ, atsɔɔ Lala 12:7 lɛ shishi akɛ: “Bo, Ao NUŊTSƆ, obaabu jalɔi lɛ ahe, obaabu amɛhe kɛjɛ yinɔ fɔŋ nɛɛ he kɛya naanɔ.” Enɛ ji nɔ kroko ni maa nɔ mi akɛ, Lala 12:7 lɛ kɔɔɔ Nyɔŋmɔ wiemɔi lɛ ahe.

No hewɔ lɛ, wɔbaanyɛ wɔwie akɛ Lala 12:7 lɛ hãa “mɛi ni yeɔ anɔkwa” lɛ náa hiɛnɔkamɔ akɛ, Nyɔŋmɔ baafee nɔ ko kɛye ebua amɛ.