NIKASEMƆ 43
LALA 90 Nyɛwowoa Nyɛhe Hewalɛ
Nɔ Ni Obaanyɛ Ofee Kɛ́ Oyiŋ Miifee Bo Enyɔnyɔɔnyɔ
“Nyɛkaa nii fɛɛ nyɛkwɛa.”—1 TES. 5:21.
NƆ NI WƆBAAKASE
Wɔbaana nɔ ni esa akɛ wɔfee kɛ́ wɔyiŋ miifee enyɔnyɔɔnyɔ yɛ saji komɛi ahe koni wɔnyɛ wɔya nɔ wɔsɔmɔ Yehowa jogbaŋŋ.
1-2. (a) Mɛɛ saji komɛi ekolɛ Yehowa tsuji baabi amɛhe? (b) Mɛni nikasemɔ nɛɛ baahã wɔna?
EKƆƆƆ he eko afii abɔ ni wɔye lɛ, bei shɛɔ ni wɔyiŋ feɔ wɔ enyɔnyɔɔnyɔa yɛ saji komɛi ahe. Akɛ nɔkwɛmɔnɔ lɛ, ekolɛ oblanyo ko ni ji shiɛlɔ lɛ yiŋ baanyɛ afee lɛ enyɔnyɔɔnyɔ kɛji Yehowa jwɛŋɔ ehe lɛɛlɛŋ. Ni no hewɔ lɛ, efeee lɛ akɛ ekɛ ehe ahã ni abaptisi lɛ. Aloo ŋɔɔ lɛ akɛ, be ni nyɛmi nuu ko ji oblanyo lɛ, ekɛ Yehowa sɔɔmɔ ye klɛŋklɛŋ gbɛhe moŋ fe ni ebaatiu ninámɔ sɛɛ. Bianɛ lɛ eda ni eyɛ weku, ni shika fioo pɛ enáa kɛkwɛɔ eweku lɛ. Ekolɛ bei komɛi lɛ, ebaabi ehe kɛji yiŋ ni ekpɛ be ni eji oblanyo lɛ ja lo. Naa shihilɛ kroko hu, nyɛmi yoo ko egbɔ ni ebɛ gbɔmɔtsoŋ hewalɛ tsɔ. Bei komɛi lɛ, enijiaŋ jeɔ wui ejaakɛ enyɛɛɛ etsu babaoo tamɔ bɔ ni tsutsu ko lɛ etsuɔ lɛ. Ani bo hu bei komɛi lɛ, obiɔ ohe saji tamɔ: ‘Ani Yehowa jwɛŋɔ mihe lɛɛlɛŋ? Ani ehi akɛ mikɛ nibii shã afɔle yɛ Yehowa sɔɔmɔ lɛ hewɔ? Ani loloolo lɛ, mihe yɛ sɛɛnamɔ kɛhã Yehowa?’
2 Kɛ́ wɔbi wɔhe saji ni tamɔ enɛɛmɛi ni wɔbɔɔɔ mɔdɛŋ ni wɔná amɛhetoo lɛ, ebaanyɛ ehã hemɔkɛyeli ni wɔyɔɔ yɛ Yehowa mli lɛ agbo, ni wɔkpa lɛ jamɔ po. Kɛ́ ekolɛ wɔnuɔ he akɛ (1) Yehowa jwɛŋŋ wɔhe, (2) yiŋ ni wɔkpɛ be ko ni eho lɛ ehiii, loo (3) bianɛ lɛ wɔhe bɛ sɛɛnamɔ kɛhã Yehowa lɛ, nikasemɔ nɛɛ baahã wɔna bɔ ni Biblia mli shishitoo mlai baanyɛ aye abua wɔ.
MƐNI BAAWA WƆ NI WƆNÁ SAJI NI GBAA WƆNAA LƐ AHETOO
3. Kɛ́ wɔyiŋ feɔ wɔ enyɔnyɔɔnyɔ yɛ saji komɛi ahe lɛ, mɛni esa akɛ wɔfee?
3 Kɛ́ wɔyiŋ feɔ wɔ enyɔnyɔɔnyɔ yɛ saji komɛi ahe lɛ, ehi akɛ wɔbaatao saji nɛɛ anaa yɛ Biblia lɛ mli. Kɛ́ wɔfee nakai lɛ, hemɔkɛyeli ni wɔyɔɔ yɛ Yehowa mli lɛ mli baawa ni wɔkɛ Yehowa baabɔ naanyo waa, ni no baahã ‘wɔdamɔ shi shiŋŋ yɛ hemɔkɛyeli lɛ mli.’—1 Kor. 16:13.
4. Mɛni kɛ́ wɔfee lɛ, no baatsɔɔ akɛ ‘wɔmiika nii fɛɛ wɔmiikwɛ’? (1 Tesalonikabii 5:21)
4 Kanemɔ 1 Tesalonikabii 5:21. Ŋmalɛ nɛɛ woɔ wɔ ŋaa ni ‘wɔka nii fɛɛ wɔkwɛ.’ Te wɔbaafee tɛŋŋ wɔfee nakai? Kɛ́ wɔyiŋ miifee wɔ enyɔnyɔɔnyɔ yɛ nɔ ko he lɛ, esa akɛ wɔtao nɔ ni Biblia lɛ kɛɔ yɛ he. Akɛ nɔkwɛmɔnɔ lɛ, hã wɔsusu oblanyo lɛ ni yiŋ miifee lɛ enyɔnyɔɔnyɔ kɛji Yehowa jwɛŋɔ ehe lɛɛlɛŋ lɛ he wɔkwɛ. Ani ehi akɛ ebaahiɛ nakai susumɔ lɛ mli ni efeee nɔ ko yɛ he? Dabi, moŋ lɛ esa akɛ ekase Biblia lɛ ni ena bɔ ni Yehowa naa lɛ ehãa, ni no baatsɔɔ akɛ ‘eeka nii fɛɛ eekwɛ.’
5. Te wɔbaafee tɛŋŋ wɔna Yehowa susumɔ yɛ saji ahe?
5 Kɛ́ wɔkane Biblia lɛ, etamɔ nɔ ni Yehowa kɛ wɔ miiwie. Shi kɛ́ wɔmiitao wɔna Yehowa susumɔ yɛ saji komɛi ahe lɛ, esa akɛ wɔfee babaoo fe Biblia lɛ kɛkɛ ni wɔbaakane. Esa akɛ wɔtao ŋmalɛi ni baawa wɔ ni wɔná wɔsanebimɔi lɛ ahetoo ni wɔkase ŋmalɛi nɛɛ. Wɔbaanyɛ wɔtsɔ woji kɛ nibii ni Yehowa asafo lɛ efee lɛ anɔ wɔfee nakai. (Abɛi 2:3-6) Esa akɛ wɔsɔle wɔhã Yehowa ni ewa wɔ ni wɔná wɔsanebimɔi lɛ ahetoo. No sɛɛ lɛ, wɔbaanyɛ wɔtao Biblia mli shishitoo mlai kɛ ŋaawoi kpakpai ni baawa wɔ ni wɔtsu wɔnaagba lɛ he nii. Ebaafee nɔ ni hi hu akɛ wɔbaakane Nyɔŋmɔ tsuji anɔkwafoi ni nu he tamɔ bɔ ni wɔnuɔ he lɛ ahe saji ni yɔɔ Biblia lɛ mli lɛ.
6. Mɛɛ gbɛ nɔ asafoŋ kpeei waa wɔ koni wɔná saji ni gbaa wɔnaa lɛ ahetoo?
6 Yehowa kɛ wɔ wieɔ hu yɛ wɔsafoŋ kpeei lɛ ashishi. Kɛ́ wɔyaa asafoŋ kpeei daa lɛ, wɔbaanyɛ wɔnu sane ko yɛ wiemɔ ko ni mɔ ko hãa lɛ mli loo mɔ ko baahã hetoo ko ni baahã wɔna sane ni gbaa wɔnaa lɛ hetoo. (Abɛi 27:17) Amrɔ nɛɛ, wɔbaasusu nɔ ni baawa wɔ ni wɔná saji pɔtɛi ni gbaa wɔnaa lɛ ahetoo lɛ he.
KƐ́ EEFEE BO TAMƆ NƆ NI YEHOWA JWƐŊŊ OHE
7. Mɛɛ sane ekolɛ mɛi baabi amɛhe?
7 Ani obi ohe pɛŋ akɛ, ‘Ani Yehowa jwɛŋɔ mihe lɛɛlɛŋ?’ Kɛ́ onuɔ he akɛ ojeee mɔ ko lɛ, ekolɛ obaanu he akɛ onyɛŋ otsɔ mɔ ni bɔ je lɛ naanyo kɔkɔɔkɔ. Ekolɛ nakai ji bɔ ni Maŋtsɛ David nu he be ko. Enaa kpɛ ehe akɛ Yehowa jwɛŋɔ adesai po ahe, ni ebi akɛ: “Ao Yehowa, mɛni ji gbɔmɔ ni ojwɛŋɔ ehe, kɛ gbɔmɔ bi hu, ni ogbaa ohe naa yɛ ehe?” (Lala 144:3) No hewɔ lɛ, nɛgbɛ obaanyɛ oná sanebimɔ ni ji ‘Ani Yehowa jwɛŋɔ mihe lɛɛlɛŋ’ lɛ hetoo yɛ?
8. Yɛ amaniɛ ni abɔ yɛ 1 Samuel 16:6, 7, 10-12 lɛ naa lɛ, kɛ́ Yehowa miikwɛ gbɔmɛi lɛ, mɛni ekɛ ejwɛŋmɔ yaa nɔ?
8 Biblia lɛ hãa wɔleɔ akɛ, Yehowa jwɛŋɔ mɛi ni abuuu amɛ lɛ po ahe. Akɛ nɔkwɛmɔnɔ lɛ, be ko lɛ, Yehowa tsu Samuel ni eya Yishai shĩa lɛ ni eyafɔ ebihii lɛ ateŋ mɔ kome mu akɛ mɔ ni baaye Israel nɔ maŋtsɛ wɔsɛɛ. Yishai tsɛ ebihii lɛ fɛɛ ehã Samuel, shi eshi David, ni ji amɛteŋ gbekɛ kwraa lɛ.b Shi David moŋ ji mɔ ni Yehowa hala. (Kanemɔ 1 Samuel 16:6, 7, 10-12.) Yehowa le nɔ ni yɔɔ David tsui mli. Ele akɛ oblanyo nɛɛ sumɔɔ lɛ waa.
9. Mɛni hewɔ obaanyɛ ohe oye akɛ Yehowa jwɛŋɔ ohe lɛ? (Kwɛmɔ mfoniri lɛ hu.)
9 Yɛ anɔkwale mli lɛ, Yehowa efee nɔ ko momo ni tsɔɔ akɛ ejwɛŋɔ ohe. Ekwɛɔ shihilɛ ni oyɔɔ mli lɛ ni ewoɔ bo ŋaa ni hi fe fɛɛ. (Lala 32:8) Enɛ tsɔɔ akɛ Yehowa le bo jogbaŋŋ. (Lala 139:1) Kɛ́ okɛ Yehowa ŋaawoo lɛ tsu nii, ni ona akɛ no miiwa bo lɛ, ebaahã ohe oye akɛ ejwɛŋɔ ohe. (1 Kro. 28:9; Bɔf. 17:26, 27) Yehowa naa nibii fɛɛ ni ofeɔ koni onyɛ ojá lɛ ni obo lɛ toi lɛ. Enaa sui kpakpai ni oyɔɔ lɛ, ni eesumɔ ni otsɔ enaanyo. (Yer. 17:10) Kɛ́ ena akɛ bo hu oosumɔ ni otsɔ enaanyo lɛ, emii baashɛ ehe waa.—1 Yoh. 4:19.
“Kɛ́ otao [Yehowa sɛɛ] gbɛ lɛ, ebaahã ona lɛ.”—1 Kro. 28:9 (Kwɛmɔ kuku 9)c
KƐ́ OYIŊ MIIFEE BO ENYƆNYƆƆNYƆ YƐ YIŊ KO NI OKPƐ BE KO NI EHO LƐ HE
10. Kɛ́ wɔsusu yiŋ ko ni wɔkpɛ be ko ni eho lɛ he lɛ, ekolɛ mɛɛ saji wɔbaabi wɔhe?
10 Bei komɛi lɛ, nyɛmimɛi komɛi susuɔ yiŋ ko ni amɛkpɛ be ko ni eho lɛ he, ni efeɔ amɛ tamɔ nɔ ni jwɛŋmɔ bɛ yiŋ ni amɛkpɛ lɛ mli. Ekolɛ amɛshi nitsumɔ ko ni awoɔ amɛ nyɔmɔ jogbaŋŋ yɛ mli lɛ, loo amɛkpɛ amɛyiŋ akɛ amɛtoŋ nitsumɔ ko shishi koni amɛnyɛ amɛsɔmɔ Yehowa jogbaŋŋ fe bɔ ni kulɛ amɛfeɔ lɛ. Shi ekolɛ kɛjɛ be ni amɛkpɛ yiŋ nɛɛ, afii babaoo eho. Ni ekolɛ amɛle mɛi komɛi ni kpɛ yiŋ kroko ni amrɔ nɛɛ etamɔ nɔ ni amɛná nii ni nɔ fɛɛ nɔ miiya nɔ jogbaŋŋ eehã amɛ. Enɛɛmɛi baanyɛ ahã amɛbi amɛhe akɛ: ‘Ani ehi akɛ mikɛ nibii shã afɔle yɛ Yehowa sɔɔmɔ lɛ hewɔ? Aloo yiŋ ni mikpɛ lɛ ehã nibii komɛi eŋmɛɛ mi?’
11. Mɛni hã mɔ ni fo Lala 73 lɛ hao?
11 Kɛ́ obi ohe saji ni tamɔ enɛɛmɛi pɛŋ lɛ, no lɛ sane ni yɔɔ Lala 73 lɛ baanyɛ aye abua bo. Mɔ ni fo lala nɛɛ na mɛi komɛi ni sɔmɔɔɔ Yehowa, shi kɛ̃lɛ amɛyɛ gbɔmɔtsoŋ hewalɛ kpakpa, amɛná nii, ni etamɔ nɔ ni nɔ ko nɔ ko gbaaa amɛnaa. (Lala 73:3-5, 12) Be ni ena bɔ ni nibii yaa lɛ jogbaŋŋ kɛhãa amɛ lɛ, enu he akɛ sɛɛnamɔ ko bɛ mɔdɛŋ ni ebɔɔ koni enyɛ esɔmɔ Yehowa lɛ he. ‘Ehao gbi muu fɛɛ’ yɛ sane nɛɛ hewɔ, ni no je enijiaŋ wui. (Lala 73:13, 14) Mɛni efee koni ekanu he nakai dɔŋŋ?
12. Yɛ nɔ ni aŋma yɛ Lala 73:16-18 lɛ naa lɛ, mɛni ye ebua lalatsɛ lɛ ni ehaooo dɔŋŋ?
12 Kanemɔ Lala 73:16-18. Lalatsɛ lɛ tee Yehowa jamɔhe lɛ. Be ni etee jɛmɛ lɛ, enyɛ ejwɛŋ saji anɔ jogbaŋŋ. Ebana akɛ eyɛ mli akɛ etamɔ nɔ ni efɔŋfeelɔi komɛi ená shihilɛ kpakpa moŋ, shi wɔsɛɛ lɛ nibii ehiŋ ehãŋ amɛ. No hewɔ lɛ ehaooo dɔŋŋ, ni ená nɔmimaa akɛ yiŋ ni ekpɛ akɛ ekɛ Yehowa sɔɔmɔ baaye klɛŋklɛŋ gbɛhe lɛ ji nɔ ni hi fe fɛɛ. Etswa efai shi akɛ ebaaya nɔ esɔmɔ Yehowa.—Lala 73:23-28.
13. Kɛ́ oyiŋ miifee bo enyɔnyɔɔnyɔ yɛ yiŋ ko ni okpɛ be ko ni eho lɛ he lɛ, mɛɛ nibii komɛi obaanyɛ ofee koni onyɛ otsɛ otsui oŋmɛ omli? (Kwɛmɔ mfoniri lɛ hu.)
13 Tamɔ bɔ ni lalatsɛ lɛ tsɛ etsui eŋmɛ emli lɛ, bo hu obaanyɛ otsɛ otsui oŋmɛ omli kɛ́ ohã Nyɔŋmɔ Wiemɔ lɛ wa bo. Yɛ mɛɛ gbɛ nɔ? Yehowa ehã bo nibii kpakpai pii, ni eyɛ ohe miishɛɛ hu, no hewɔ lɛ jwɛŋmɔ nomɛi anɔ, ni okai hu akɛ mɛi ni jáaa lɛ lɛ bɛ enɛɛmɛi. Yɛ mɛi ni sɔmɔɔɔ Yehowa lɛ ateŋ mɛi babaoo agbɛfaŋ lɛ, nɔ ni he hiaa amɛ fe fɛɛ ji ni amɛbaaná nitsumɔ kpakpa ni baahã amɛtsɔmɔ niiatsɛmɛi ejaakɛ amɛbɛ hiɛnɔkamɔ ko kwraa kɛhã wɔsɛɛ. Shi bo lɛ, Yehowa ehã bo nibii kpakpai pii bianɛ, ni ewo shi hu akɛ wɔsɛɛ lɛ, ebaajɔɔ bo babaoo bɔ ni ojwɛŋmɔ nyɛŋ ashɛ he. (Lala 145:16) Susumɔ sane nɛɛ hu he okwɛ: Eji okpɛ yiŋ kroko kulɛ, oleee bɔ ni oshihilɛ baaji bianɛ. Shi naa sane ko ni no lɛ obaanyɛ oná nɔmimaa yɛ he: Kɛ́ suɔmɔ ni oyɔɔ kɛhã Nyɔŋmɔ kɛ onyɛmi gbɔmɔ lɛ hewɔ okpɛ yiŋ komɛi lɛ, bɔ fɛɛ bɔ ni fee lɛ, obaaná nibii ni baahã oná miishɛɛ lɛɛlɛŋ.
Feemɔ ohe mfoniri akɛ oyɛ Paradeiso lɛ mli (Kwɛmɔ kuku 13)d
KƐ́ EEFEE BO TAMƆ NƆ NI OHE EHIAAA YEHOWA
14. Mɛɛ shihilɛ mɛi komɛi yɔɔ mli? Ni mɛɛ sane ekolɛ amɛbaabi amɛhe?
14 Yehowa tsuji komɛi nyɛɛɛ atsu babaoo yɛ esɔɔmɔ lɛ mli ejaakɛ amɛgbɔlɔ, amɛbɛ gbɔmɔtsoŋ hewalɛ tsɔ, loo amɛje kpa. No hewɔ lɛ, ekolɛ amɛbaanu he akɛ amɛhe ehiaaa Yehowa. Ekolɛ amɛbaabi amɛhe akɛ, ‘Ani loloolo lɛ, mihe yɛ sɛɛnamɔ kɛhã Yehowa?’
15. Mɛni lalatsɛ lɛ he eye waa?
15 Mɔ ni fo Lala 71 lɛ nu he nakai nɔŋŋ. Esɔle akɛ: “Kɛ́ mihewalɛ tã lɛ, kaakwa mi.” (Lala 71:9, 18) Fɛɛ sɛɛ lɛ, lalatsɛ nɛɛ he eye waa akɛ, kɛ́ etee nɔ esɔmɔ Yehowa lɛ, ebaatsɔɔ lɛ gbɛ ni ebaawa lɛ hu. Afii komɛi asɛɛ lɛ, lalatsɛ lɛ bayɔse akɛ, kɛ́ mɔ ko bɛ hewalɛ tsɔ, shi fɛɛ sɛɛ lɛ, ejɛ etsuiŋ fɛɛ esɔmɔ Yehowa lɛ, Yehowa náa ehe miishɛɛ.—Lala 37:23-25.
16. Mɛɛ gbɛi anɔ mɛi ni egbɔlɔ lɛ ahe yɔɔ sɛɛnamɔ kɛhã Yehowa? (Lala 92:12-15)
16 Kɛ́ oji mɔ ko ni egbɔ lɛ, ofainɛ susumɔ bɔ ni Yehowa naa bo ehãa lɛ he. Kɛ́ ekolɛ obɛ gbɔmɔtsoŋ hewalɛ tsɔ po lɛ, Yehowa baanyɛ awa bo ni oya nɔ osɔmɔ lɛ. (Kanemɔ Lala 92:12-15.) Okɛ ojwɛŋmɔ ama nɔ ni obaanyɛ ofee lɛ nɔ, moŋ fe ni okɛ ojwɛŋmɔ baama nɔ ni onyɛɛɛ ofee dɔŋŋ lɛ nɔ. Akɛ nɔkwɛmɔnɔ lɛ, kɛ́ otee nɔ osɔmɔ Yehowa ni okɛ onifeemɔi tsɔɔ akɛ osusuɔ mɛi ahe lɛ, mɛi baaná he sɛɛ waa. Obaanyɛ ogba mɛi bɔ ni Yehowa eye ebua bo yɛ afii ni eho lɛ amli ni ogba amɛ Biblia mli shiwoi lɛ ateŋ nɔ ni okpaa gbɛ waa hu. Ni kaahã ohiɛ kpa nɔ akɛ sɔlemɔ ni osɔleɔ ohãa mɛi lɛ yɛ hewalɛ waa. (1 Pet. 3:12) No hewɔ lɛ, ekɔɔɔ he eko nɔ shihilɛ mli ni wɔteŋ mɔ fɛɛ mɔ yɔɔ lɛ, wɔ fɛɛ wɔyɛ nɔ ko kɛ̃ ni wɔbaanyɛ wɔkɛshã afɔle wɔhã Yehowa kɛ mɛi krokomɛi.
17. Mɛni hewɔ esaaa akɛ wɔkɛ wɔhe toɔ mɛi krokomɛi ahe lɛ?
17 Kɛ́ eefee bo ahuntoo akɛ onyɛɛɛ otsu babaoo yɛ Yehowa sɔɔmɔ lɛ mli lɛ, ná ole akɛ nɔ fɛɛ nɔ ni onyɛɔ ofeɔ lɛ jara wa waa kɛhã Yehowa. Ekolɛ okɛ nɔ ni ofeɔ lɛ baato nɔ ni mɛi krokomɛi feɔ lɛ he. Shi kaafee nakai! Mɛni hewɔ? Ejaakɛ Yehowa efeee nakai. (Gal. 6:4) Akɛ nɔkwɛmɔnɔ lɛ, Maria fɔse ojeŋma ko ni jara wa waa diɛŋtsɛ eshwie Yesu naji ahe. (Yoh. 12:3-5) Ni yoo okulafo ohiafo ko hu kɛ kapɛji bibii enyɔ ni shɛɛɛ nɔ ko yatsu onia yɛ sɔlemɔ shĩa lɛ. (Luka 21:1-4) Shi Yesu kɛ nɔ ni Maria fee lɛ etooo nɔ ni yoo okulafo lɛ fee lɛ he, moŋ lɛ, Yesu tsɔɔ akɛ nɔ ni amɛyi enyɔ lɛ fɛɛ amɛfee lɛ tsɔɔ akɛ amɛyɛ hemɔkɛyeli. Yesu feɔ enii tamɔ e-Tsɛ Yehowa pɛpɛɛpɛ. No hewɔ lɛ, obaanyɛ ohe oye waa akɛ, Yehowa naa nɔ fɛɛ nɔ ni ofeɔ akɛni oheɔ lɛ oyeɔ ni osumɔɔ lɛ lɛ hewɔ. Kɛ́ onuɔ he akɛ nɔ ni ofeɔ lɛ faaa po lɛ, ejara wa waa kɛhã lɛ.
18. Mɛni baawa wɔ ni wɔná saji ni gbaa wɔnaa lɛ ahetoo? (Kwɛmɔ akrabatsa ni ji, “Yehowa Wiemɔ Lɛ Baanyɛ Awa Bo Ni Otsɛ Otsui Oŋmɛ Omli” lɛ hu.)
18 Wɔ fɛɛ lɛ, bei shɛɔ ni wɔyiŋ feɔ wɔ enyɔnyɔɔnyɔ yɛ saji komɛi ahe. Shi yɛ nikasemɔ nɛɛ mli lɛ, wɔbana akɛ Nyɔŋmɔ Wiemɔ lɛ baanyɛ aye abua wɔ ni wɔtsɛ wɔtsui wɔŋmɛ wɔmli. No hewɔ lɛ, feemɔ bɔ fɛɛ bɔ ni obaanyɛ kɛtao saji ni gbaa onaa lɛ ahetoo, ni no baahã okɛ miishɛɛ asɔmɔ Yehowa moŋ fe ni onijiaŋ baaje wui. Yehowa le bo jogbaŋŋ. Ehiɛ sɔɔ afɔlei ni oshãa yɛ ehewɔ lɛ, ni bɔ fɛɛ bɔ ni fee lɛ ebaaye shi ni ewo akɛ ebaajwere bo lɛ nɔ. Ná ole akɛ Yehowa sumɔɔ etsuji anɔkwafoi lɛ ateŋ mɔ fɛɛ mɔ, ni ejwɛŋɔ amɛhe.
LALA 111 Nibii Ni Hãa Wɔnáa Miishɛɛ
a WIEMƆ NI ATSƆƆ MLI: Yɛ nikasemɔ nɛɛ mli lɛ, wɔbaasusu saji komɛi ni wɔbiɔ wɔhe ni tsɔɔ akɛ wɔyiŋ miifee wɔ enyɔnyɔɔnyɔ lɛ ahe. Nomɛi ji, ‘Ani mihe miihia Yehowa?’ kɛ ‘Ani jwɛŋmɔ yɛ yiŋ komɛi ni mikpɛ yɛ Yehowa sɔɔmɔ hewɔ lɛ mli?’ Sanebimɔi enyɔ nɛɛ fataaa saji ni Biblia lɛ tsɔɔ akɛ kɛ́ mɔ ko yiŋ miifee lɛ enyɔnyɔɔnyɔ yɛ he lɛ, no baanyɛ atsɔɔ akɛ ebɛ hemɔkɛyeli yɛ Yehowa kɛ eshiwoi lɛ amli lɛ ahe.
b Eyɛ mli akɛ Biblia lɛ etsɔɔɔ wɔ afii abɔ ni David eye be ni Yehowa hã afɔ lɛ mu lɛ moŋ, shi eeenyɛ efee akɛ no mli lɛ eji oblanyo ni yeko afii 20.—Kwɛmɔ October 1, 2011 Buu-Mɔɔ lɛ, bf. 21, kk. 2.
c NƆ NI WƆNAA YƐ MFONIRI LƐ MLI: Odasefonyo oblayoo ko miikase Biblia lɛ koni ena bɔ ni Yehowa naa lɛ ehãa.
d NƆ NI WƆNAA YƐ MFONIRI LƐ MLI: Nyɛmi nuu ko miitsumɔ shwapo ko samfɛlɛ mli koni ená nɔ ko ekɛkwɛ eweku lɛ. Be ni etsuɔ nii lɛ, eefee ehe mfoniri akɛ eyɛ Paradeiso lɛ mli.