Ani Oona Nyɔŋmɔ Nine yɛ Oshihilɛ Mli?

1, 2. Mɛɛ jwɛŋmɔ mɛi komɛi hiɛ yɛ Nyɔŋmɔ he?

MƐI babaoo susuɔ akɛ Nyɔŋmɔ bɛ amɛhe dekã. Amɛkɛɔ akɛ Nyɔŋmɔ ekpoo amɛjeŋ ehã amɛ. Akɛ nɔkwɛmɔnɔ lɛ, be ni ahum ko ni naa wa waa fite nii yɛ maŋ ni ji Philippines lɛ nɔ, yɛ November 2013 lɛ, onukpa ko ni kwɛɔ maŋ wulu ko ni yɔɔ jɛmɛ lɛ nɔ lɛ wie akɛ: “Efeɔ mi akɛ, no mli lɛ, Nyɔŋmɔ eshi wɔkpokpaa lɛ nɔ.”

² Mɛi komɛi ni feɔ nibii gbohii lɛ hu susuɔ akɛ Nyɔŋmɔ enaaa amɛ. (Yesaia 26:10, 11; 3 Yohane 11) Yɛ bɔfo Paulo beiaŋ lɛ, no mli lɛ mɛi komɛi hiɛ susumɔ ni tamɔ nakai. Paulo wie yɛ amɛhe akɛ: “Amɛsusu akɛ ehe ehiaaa ni amɛle Nyɔŋmɔ.” No hewɔ lɛ, “amɛyimɔ obɔbɔ kɛ nii ni ejaaa, efɔŋfeemɔ, amimyeli, kɛ nibii gbohii fɛɛ.”​—Romabii 1:28, 29.

 3. (a) Mɛɛ saji esa akɛ wɔbi wɔhe? (b) Kɛ́ akɛ wiemɔ ni ji Nyɔŋmɔ “nine” tsu nii yɛ Biblia lɛ mli lɛ, mɛni he ekɔɔ?

³ Ni wɔ hu? Wɔ lɛ, wɔle akɛ Yehowa naa nɔ fɛɛ nɔ ni wɔfeɔ. Shi, ani wɔheɔ wɔyeɔ akɛ esusuɔ wɔhe? Ani wɔnaa enine yɛ wɔshihilɛ mli? Yɛ Biblia lɛ mli lɛ, bei pii lɛ, kɛ́ Nyɔŋmɔ kɛ ehewalɛ lɛ tsu nii lɛ, awieɔ he akɛ Nyɔŋmɔ “nine.” Yehowa kɛ ehewalɛ lɛ yeɔ buaa etsuji, ni ekɛyeɔ ehenyɛlɔi anɔ kunim. (Kanemɔ 5 Mose 26:8.) Yesu wie akɛ mɛi komɛi ‘baana Nyɔŋmɔ.’ (Mateo 5:8) Ani wɔfata mɛi nɛɛ ahe? Te wɔbaafee tɛŋŋ ‘wɔna Nyɔŋmɔ’? Nyɛhãa wɔsusua Biblia mli saji komɛi ni kɔɔ mɛi ni na Nyɔŋmɔ nine yɛ amɛshihilɛ mli, kɛ mɛi ni enaaa enine yɛ amɛshihilɛ mli lɛ ahe lɛ he. Koni no sɛɛ lɛ, wɔkwɛ bɔ ni hemɔkɛyeli baanyɛ aye abua wɔ ni wɔna Nyɔŋmɔ nine yɛ wɔshihilɛ mli.

 4. Mɛni hewɔ Israelbii lɛ ahenyɛlɔi lɛ sumɔɔɔ ni amɛnaa Nyɔŋmɔ nine lɛ?

⁴ Yɛ blema lɛ, mɛi babaoo nu nibii ni Nyɔŋmɔ fee kɛye bua Israel maŋ lɛ he, ni amɛna ekomɛi hu kɛ amɛhiŋmɛi. Yehowa tsɔ naakpɛɛ gbɛ nɔ ekpɔ̃ ewebii lɛ kɛjɛ Ejipt, ni eye ebua amɛ ni amɛkpãtã maŋtsɛmɛi ni yɔɔ Shiwoo Shikpɔŋ lɛ nɔ lɛ ateŋ mɛi babaoo ahiɛ. (Yoshua 9:3, 9, 10) Maŋtsɛmɛi krokomɛi na ni amɛnu nɔ ni Yehowa efee ehã ewebii lɛ, shi fɛɛ sɛɛ lɛ, “amɛbua amɛhe naa ni amɛfee ekome,” koni amɛkɛ Yoshua kɛ Israel ayawu. (Yoshua 9:1, 2) Be ni maŋtsɛmɛi nɛɛ kɛ Israelbii lɛ bɔi wuu lɛ, Yehowa kɛ ehewalɛ kpele lɛ tsu nii. Ehã “hulu wa, ni nyɔŋtsere hu damɔ shi, kɛyashi beyinɔ ni [Israel] maŋ lɛ tɔ amɛhe owele yɛ amɛhenyɛlɔi lɛ anɔ.” (Yoshua 10:13) Kulɛ, esa akɛ nibii ni tee nɔ lɛ ahã maŋtsɛmɛi nɛɛ ana akɛ, Nyɔŋmɔ nine yɛ sane lɛ mli. Shi, eyabaaa lɛ nakai, “ejaakɛ Yehowa dɛŋ ejɛ, ni awaje amɛtsui ni amɛkɛ Israel awu.” (Yoshua 11:20) Israelbii lɛ ahenyɛlɔi lɛ ahiɛ kpãtã, ejaakɛ amɛkpɛlɛɛɛ nɔ akɛ Yehowa miiwu eehã ewebii lɛ.

 5. Mɛni Maŋtsɛ Ahab yitsoŋwalɔ lɛ ekpɛlɛɛɛ nɔ?

⁵ Afii pii asɛɛ lɛ, Maŋtsɛ Ahab yitsoŋwalɔ lɛ hu na naakpɛɛ nii srɔtoi pii ni gbalɔ Elia tsɔ Nyɔŋmɔ hewalɛ nɔ efee lɛ. Akɛ nɔkwɛmɔnɔ lɛ, Elia kɛɛ Ahab akɛ: “Kɛji bɔ́ loo nugbɔ aaanɛ yɛ afii nɛɛ amli fĩi, ja mi miwie!” (1 Maŋtsɛmɛi 17:1) Elia wiemɔi lɛ ba mli, ni Ahab na. Sɛɛ mli lɛ, Elia sɔle ni Yehowa hã la jɛ ŋwɛi ba. Ahab na enɛ hu. No sɛɛ lɛ, Elia kɛɛ Ahab akɛ, Yehowa baahã nugbɔ anɛ koni nuhɔmɔ lɛ sɛɛ afo, ni nugbɔ lɛ nɛ lɛɛlɛŋ. (1 Maŋtsɛmɛi 18:22-45) Ahab na naakpɛɛ nii nɛɛ fɛɛ. Ni kulɛ, esa akɛ ekpɛlɛ nɔ akɛ Nyɔŋmɔ nine yɛ mli, shi efeee nakai. Mɛni wɔkaseɔ yɛ Ahab sane lɛ, kɛ nɔ ni ba maŋtsɛmɛi lɛ anɔ lɛ mli? Nɔ ni wɔkaseɔ ji akɛ, esa akɛ wɔyɔse gbɛi srɔtoi ni Nyɔŋmɔ kɛ ehewalɛ lɛ tsuɔ nii yɛ wɔshihilɛ mli.

6, 7. Mɛni Gibeonbii lɛ kɛ Rahab fɛɛ yɔse?

⁶ Gibeonbii lɛ na Nyɔŋmɔ nine, ni enɛ hã esoro amɛ kwraa yɛ maji ni bɔle amɛ lɛ ahe. Yɛ nɔ najiaŋ ni amɛkɛ Israelbii lɛ aaawuu lɛ, amɛkɛ amɛ kpaŋ toiŋjɔlɛ kpaŋmɔ. Mɛni hewɔ? Amɛtsɔɔ mli akɛ, amɛnu Yehowa kɛ nibii fɛɛ ni efee lɛ he sane. (Yoshua 9:3, 9, 10) Nɔ ni Gibeonbii lɛ fee lɛ tsɔɔ akɛ amɛhiɛ kã shi, ejaakɛ amɛyɔse akɛ Yehowa ji mɔ ni wuɔ hãa Israel.

⁷ Rahab hu na Yehowa nine, eyɛ mli akɛ jeee Israelnyo ji lɛ. Enu bɔ ni Yehowa kpɔ̃ ewebii lɛ kɛjɛ Ejipt lɛ he. Be ni saralɔi enyɔ komɛi ni Israelbii lɛ tsu lɛ ba eŋɔɔ lɛ, ekɛɛ amɛ akɛ: “Mile akɛ Yehowa eŋɔ shikpɔŋ lɛ ehã nyɛ.” Rahab ná hemɔkɛyeli akɛ, Yehowa baanyɛ ahere lɛ kɛ eweku lɛ yiwala. Ni ejie hemɔkɛyeli nɛɛ kpo, eyɛ mli akɛ ele bɔ ni nakai feemɔ yɔɔ oshara hã.​—Yoshua 2:9-13; 4:23, 24.

 8. Mɛɛ gbɛ nɔ Israelbii komɛi yɔse Nyɔŋmɔ nine?

⁸ Israelbii lɛ ekomɛi efeee amɛnii tamɔ Maŋtsɛ Ahab yitsoŋwalɔ lɛ; be ni amɛna akɛ Yehowa ehã Elia sɔlemɔ lɛ hetoo, ni la ejɛ ŋwɛi eba lɛ, amɛyɔse akɛ Nyɔŋmɔ nine yɛ sane lɛ mli. No hewɔ lɛ, amɛwie akɛ: “Yehowa lɛ, lɛ ji Nyɔŋmɔ!” (1 Maŋtsɛmɛi 18:39) Amɛna faŋŋ akɛ, Nyɔŋmɔ hewalɛ nɔ atsɔ afee naakpɛɛ nii nɛɛ.

 9. Mɛni esa akɛ wɔfee koni wɔna Yehowa kɛ enine yɛ wɔshihilɛ mli ŋmɛnɛ?

⁹ Nɔkwɛmɔnii srɔtoi ni wɔsusu he nɛɛ ehã wɔna nɔ ni atsɔɔ kɛ́ akɛɛ ‘wɔna Nyɔŋmɔ’ loo wɔna Nyɔŋmɔ nine. Kɛ́ wɔbale Yehowa kɛ esui lɛ, ‘wɔkɛ wɔtsui hiŋmɛii’ baana enine yɛ wɔshihilɛ mli. (Efesobii 1:18) Ni kɛ́ wɔfee nakai lɛ, belɛ wɔmiikase anɔkwafoi ni hi shi yɛ blema kɛ mɛi ni yɔɔ ŋmɛnɛ ni ena bɔ ni Yehowa eye ebua ewebii lɛ. Shi, mɛni tsɔɔ akɛ Nyɔŋmɔ miiye eebua ewebii lɛ ŋmɛnɛ?

10. Mɛni tsɔɔ akɛ Yehowa miiye eebua mɛi ŋmɛnɛ? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁰ Nibii pii yɛ ni tsɔɔ akɛ Yehowa miiye eebua mɛi ŋmɛnɛ. Wɔnu niiashikpamɔi babaoo ni kɔɔ mɛi komɛi ni sɔle ni Nyɔŋmɔ aye abua amɛ yɛ shihilɛ mli lɛ he, kɛ bɔ ni Nyɔŋmɔ hã amɛsɔlemɔi lɛ ahetoo. (Lala 53:3) Akɛ nɔkwɛmɔnɔ lɛ, be ko lɛ nyɛmi nuu ko ni atsɛɔ lɛ Allan lɛ miishiɛ yɛ ŋshɔkpɔ bibioo ko ni yɔɔ Philippines lɛ nɔ, ni ekɛ yoo ko kpe. Be ni ekɛɛ yoo lɛ akɛ Yehowa Odasefonyo ji lɛ lɛ, yoo lɛ bɔi yaafo. Be ni Allan tsɔɔ nɔ hewɔ ni yoo lɛ bɔi yaafo lɛ, ewie akɛ, “Nakai leebi lɛ nɔŋŋ ni esɔle koni Yehowa ahã e-Dasefoi lɛ aba eŋɔɔ. Be ni eji oblayoo lɛ, Odasefoi kɛ lɛ kaseɔ Biblia lɛ, shi kɛjɛ be ni ebote gbalashihilɛ mli, ni efã kɛba nakai ŋshɔkpɔ lɛ nɔ lɛ, enyɛko etsa nikasemɔ lɛ nɔ. Bɔ ni Nyɔŋmɔ hã esɔlemɔ lɛ hetoo oya lɛ ji nɔ ni ta etsuiŋ waa ni ebɔi yaafo lɛ.” Eyeee afi ni ejɔɔ ewala nɔ ehã Yehowa.

11, 12. (a) Ŋmɛnɛ lɛ, mɛni Yehowa feɔ kɛyeɔ ebuaa etsuji? (b) Mɛɛ gbɛ nɔ Yehowa ye bua nyɛmi yoo ko?

¹¹ Yehowa tsuji babaoo ni tsutsu ko lɛ, amɛshɛreɔ tawa, amɛkɛ tsofai tsuɔ nii yɛ gbɛ ni esaaa nɔ, amɛkwɛɔ ponografi, loo amɛfeɔ nibii gbohii krokomɛi lɛ, ena Yehowa nine yɛ amɛshihilɛ mli. Amɛteŋ mɛi komɛi ewie akɛ, amɛbɔ mɔdɛŋ akɛ amɛbaakpa, shi amɛnyɛɛɛ. Kɛ̃lɛ, be ni amɛsɔle amɛbi Yehowa dɛŋ yelikɛbuamɔ lɛ, ehã amɛ “hewalɛ ni fa kɛteke nɔ,” ni no dani amɛnyɛ amɛtsi amɛhe kɛje nifeemɔi gbohii nɛɛ ahe.​—2 Korintobii 4:7; Lala 37:23, 24.

¹² Agbɛnɛ hu, Yehowa yeɔ ebuaa etsuji ni amɛnyɛɔ amɛkpeɔ naagbai ni amɛkɛkpeɔ yɛ shihilɛ mli lɛ anaa. Nyɛmi yoo ko ni atsɛɔ lɛ Amy lɛ ná enɛ mli niiashikpamɔ. Be ko lɛ, asafo lɛ kɛ lɛ tee ŋshɔkpɔ bibioo ko ni yɔɔ Pasifik Ŋshɔ lɛ mli lɛ nɔ, koni eyaye ebua kɛma Maŋtsɛyeli Asa kɛ tsũ ni maŋsɛɛ sɔɔlɔi baahi mli. Esoro bɔ ni mɛi ni yɔɔ jɛmɛ lɛ feɔ amɛnii amɛhãa. Agbɛnɛ hu, agbeɔ kane yɛ jɛmɛ waa, aŋmɛɔ paipi mli, ni nu taa gbɛjegbɛi lɛ anɔ fɛɛ. Kɛfata he lɛ, ehiɛ tse ewekumɛi lɛ, ni tsũ ni ewɔɔ mli lɛ hu edaaa. Gbi ko lɛ, ebo ewo nyɛmi yoo ko ni ekɛtsuɔ nii lɛ. Sɛɛ mli lɛ, eshwa ehe waa yɛ nɔ ni efee lɛ hewɔ. Be ni etee shĩa lɛ, esɔle ni Yehowa aye abua lɛ. No mli lɛ agbe kane. Be ni asũ kane lɛ, ekane sane ko yɛ Buu-Mɔɔ lɛ mli, ni kɔɔ kpee ni akɛ mɛi ni etee Gilead skul lɛ feɔ kɛ́ amɛgbe skul lɛ naa lɛ he. Awie naagbai ni ekɛkpeɔ lɛ ahe yɛ Buu-Mɔɔ lɛ mli. Amy wie akɛ: “Nakai gbɛkɛ lɛ, minu he tamɔ nɔ ni Yehowa kɛ mi miiwie. Nɔ ni mikane lɛ wo mi hewalɛ ni matsa nitsumɔ ni akɛwo midɛŋ lɛ nɔ.”​—Lala 44:26, 27; Yesaia 41:10, 13.

13. Mɛni tsɔɔ akɛ Yehowa yeɔ ebuaa ewebii lɛ koni amɛfã hegbɛ ni amɛyɔɔ akɛ amɛshiɛɔ lɛ he?

¹³ Gbɛ kroko hu ni Yehowa tsɔɔ nɔ eyeɔ ebuaa ewebii lɛ ji akɛ, eyeɔ ebuaa amɛ ni ‘amɛfãa sane kpakpa lɛ he, ni amɛmaa nɔ mi yɛ mla naa.’ (Filipibii 1:7) Akɛ nɔkwɛmɔnɔ lɛ, nɔyelii komɛi bɔɔ mɔdɛŋ akɛ amɛbaatsĩ shiɛmɔ nitsumɔ lɛ naa. Shi kɛ́ eba lɛ nakai lɛ, wɔkɛ sane lɛ yaa saneyelihei, ni wɔfãa hegbɛ ni wɔyɔɔ akɛ wɔshiɛɔ lɛ he. Yɛ jeŋ fɛɛ lɛ, wɔye kunim yɛ, kɛ́ hooo kwraa lɛ, saji 268 ni wɔkɛtee saneyelihei wuji lɛ amli. Ni saji ni wɔkɛtee Yuropabii a-Saneyelihe ni Yeɔ Hegbɛi ni Adesai Yɔɔ lɛ Ahe Saji kɛjɛ afi 2000 lɛ ateŋ 24 fata he. Eyɛ faŋŋ akɛ, mɔ ko mɔ ko nyɛŋ atsĩ Nyɔŋmɔ nine naa!​—Yesaia 54:17; kanemɔ Yesaia 59:1.

14. Mɛɛ nibii krokomɛi tsɔɔ akɛ Nyɔŋmɔ kɛ ewebii lɛ yɛ?

¹⁴ Bɔ ni ashiɛɔ sane kpakpa lɛ yɛ je lɛŋ fɛɛ lɛ, ji nɔ kome hu ni tsɔɔ akɛ Nyɔŋmɔ miiye eebua etsuji. (Mateo 24:14; Bɔfoi 1:8) Ekomefeemɔ ni yɔɔ Yehowa tsuji ni jɛ jeŋmaji fɛɛ mli lɛ ateŋ lɛ, ji nɔ kroko hu ni tsɔɔ akɛ Yehowa kɛ wɔ yɛ. Ekomefeemɔ ni yɔɔ wɔteŋ lɛ sa kadimɔ waa diɛŋtsɛ! Mɛi ni jáaa Yehowa po yeɔ enɛ he odase, ni amɛkɛɔ akɛ: “Nyɔŋmɔ yɛ nyɛteŋ lɛɛlɛŋ.” (1 Korintobii 14:25) Nibii ni tsɔɔ akɛ Nyɔŋmɔ kɛ ewebii lɛ yɛ lɛ fa babaoo. (Kanemɔ Yesaia 66:14.) Ani bo hu oona Yehowa nine yɛ oshihilɛ mli?

15. Bei komɛi lɛ, mɛni hewɔ wɔnaŋ Yehowa nine yɛ wɔshihilɛ mli lɛ?

¹⁵ Bei komɛi lɛ, naagbai pii ni wɔkɛkpeɔ yɛ shihilɛ mli lɛ baanyɛ ahã wɔhiɛ akpa nɔ akɛ, Yehowa eye ebua wɔ shii abɔ. Ni kɛ́ eba lɛ nakai lɛ, ekolɛ wɔnaŋ Nyɔŋmɔ nine yɛ wɔshihilɛ mli. Nakai ji bɔ ni eba lɛ yɛ Elia gbɛfaŋ. Elia yɛ ekãa waa, shi be ni Maŋnyɛ Yezebel kɛɛ lɛ akɛ ebaagbe lɛ lɛ, eshe gbeyei. Yɛ nakai ŋmɛlɛtswaa lɛ mli lɛ, ehiɛ kpa bɔ ni Yehowa eye ebua lɛ be ko ni eho lɛ nɔ. Biblia lɛ kɛɔ akɛ, Elia bi Yehowa ni ehã ni egbo. (1 Maŋtsɛmɛi 19:1-4) Mɛni ehe bahia ni Elia afee koni ená ekãa ekoŋŋ? Ehe bahia ni ekɛ ehiɛ afɔ̃ Yehowa nɔ.​—1 Maŋtsɛmɛi 19:14-18.

16. Kɛ́ wɔkɛ naagbai kpe lɛ, mɛni baaye abua wɔ ni wɔna Nyɔŋmɔ nine yɛ wɔshihilɛ mli?

¹⁶ Hiob kɛ ejwɛŋmɔ ma naagbai ni ekɛkpeɔ lɛ anɔ aahu akɛ, ená jwɛŋmɔ ni ejaaa yɛ enaagbai lɛ ahe. (Hiob 42:3-6) Bei komɛi lɛ, naagbai ni wɔ hu wɔkɛkpeɔ lɛ baanyɛ ahã ewa kɛhã wɔ akɛ wɔbaana Nyɔŋmɔ. Yɛ be ni tamɔ nɛkɛ mli lɛ, mɛni baaye abua wɔ ni wɔna nibii ni Nyɔŋmɔ feɔ ehãa wɔ lɛ? Esa akɛ wɔsusu nɔ ni Biblia lɛ kɛɔ yɛ wɔnaagbai lɛ ahe lɛ he jogbaŋŋ. Kɛ́ wɔfee nakai lɛ, wɔbaana Yehowa akɛ mɔ ko ni yɔɔ diɛŋtsɛ. Kɛkɛ lɛ, wɔ hu wɔbaanyɛ wɔwie akɛ: “Mitoi kɛkɛ mikɛnu ohe; shi agbɛnɛ mihiŋmɛi enao.”

17, 18. (a) Mɛni ji nibii komɛi ni baanyɛ ahã ona Yehowa nine yɛ oshihilɛ mli? (b) Gbaa niiashikpamɔ ko ni tsɔɔ bɔ ni Nyɔŋmɔ yeɔ ebuaa wɔ ŋmɛnɛ.

¹⁷ Mɛni ji nibii komɛi ni baanyɛ ahã ona Yehowa nine yɛ oshihilɛ mli? Susumɔ nibii enumɔ ni nyiɛ sɛɛ nɛɛ ahe okwɛ. Klɛŋklɛŋ lɛ, ekolɛ onuɔ he akɛ Yehowa ji mɔ ni ye bua bo ni obale anɔkwale lɛ. Nɔ ni ji enyɔ lɛ, ekolɛ okaiɔ akɛ otee Kristofoi akpee ko, ni nɔ ko ni oyanu yɛ jɛmɛ lɛ tsu onaagba ko he nii. Nɔ ni ji etɛ lɛ, ekolɛ ona bɔ ni Yehowa ehã osɔlemɔ ko hetoo. Nɔ ni ji ejwɛ lɛ, ekolɛ oshwe akɛ ofee pii yɛ Yehowa sɔɔmɔ lɛ mli, ni Yehowa eye ebua bo ni onyɛ oshɛ nakai oti lɛ he. Nɔ ni ji enumɔ lɛ, ekolɛ okpa nitsumɔ ko ni hãaa oná dekã kɛsɔmɔ Yehowa lɛ tsumɔ, ni ona bɔ ni Yehowa ye eshiwoo akɛ ‘ekwaŋ bo kɔkɔɔkɔ’ lɛ nɔ. (Hebribii 13:5) Kɛ́ wekukpaa ni yɔɔ wɔ kɛ Yehowa teŋ lɛ mli wa lɛ, ewaaa akɛ wɔbaana enine yɛ wɔshihilɛ mli.

¹⁸ Nyɛmi yoo ko ni yɔɔ Kenya, ni atsɛɔ lɛ Sarah lɛ kɛɛ akɛ: “Misɔle yɛ mi-Biblia mli nikaselɔ ko ni misusu akɛ enyaaa nikasemɔ lɛ he lɛ he. Mibi Yehowa kɛji mikɛ lɛ akpa nikasemɔ. Be ni mibo ‘Amen’ nɔŋŋ kɛkɛ ni mifoŋ lɛ gbɛɛ. Mi-Biblia mli nikaselɔ lɛ ni, ni ebi mi kɛji ebaanyɛ eba ni wɔya asafoŋ kpee! Midaaŋ jɔ!” Kɛ́ wɔyɔse nɔ ni Nyɔŋmɔ feɔ ehãa wɔ lɛ, wɔbaana enine yɛ wɔshihilɛ mli. Nyɛmi yoo ko ni yɔɔ Asia, ni atsɛɔ lɛ Rhonna lɛ wie akɛ: “Ja okɛ ohiɛ afɔ̃ shi dani obaana bɔ ni Yehowa yeɔ ebuaa bo yɛ shihilɛ mli. Shi kɛ́ obɔ mɔdɛŋ ofee nakai lɛ, obaana akɛ esusuɔ wɔhe waa diɛŋtsɛ!”

19. Mɛɛ nɔ kroko esa akɛ wɔfee koni wɔna Nyɔŋmɔ nine yɛ wɔshihilɛ mli?

¹⁹ Yesu wie akɛ: “Mɛi ni tsuii amli tse lɛ yɛ miishɛɛ, ejaakɛ amɛbaana Nyɔŋmɔ.” (Mateo 5:8) Te wɔɔfee tɛŋŋ wɔhã wɔtsui mli atse? Esa akɛ wɔkwɛ jogbaŋŋ yɛ nibii ni wɔsusuɔ he lɛ ahe, ni wɔkpa nibii fɔji afeemɔ. (Kanemɔ 2 Korintobii 4:2.) Nikasemɔ nɛɛ ehã wɔna akɛ, kɛ́ wɔtee nɔ wɔhã wekukpaa ni yɔɔ wɔ kɛ Nyɔŋmɔ teŋ lɛ mli wa lɛ, wɔbaana lɛ. Nikasemɔ ni nyiɛ sɛɛ lɛ baahã wɔna bɔ ni hemɔkɛyeli baanyɛ aye abua wɔ ni wɔna Yehowa nine jogbaŋŋ yɛ wɔshihilɛ mli.