Ani Ohesaamɔ Woɔ Nyɔŋmɔ Hiɛ Nyam?

1, 2. Mɛni hewɔ esoro bɔ ni Yehowa Odasefoi saa amɛhe amɛhãa lɛ kwraa? (Kwɛmɔ mfoniri ni yɔɔ nikasemɔ lɛ shishijee lɛ.)

ADAFITSWAA wolo ko ni akalaa yɛ Netherlands lɛ wie yɛ bɔ ni osɔfoi komɛi saa amɛhe kɛtee kpee ko ni amɛfee lɛ shishi lɛ he akɛ: “Akɛni jeŋ edɔ hewɔ lɛ, amɛteŋ mɛi babaoo wowoo shĩa atadei.” Shi nakai adafitswaa wolo lɛ nɔŋŋ kɛfata he akɛ: “Jeee nakai eji yɛ Yehowa Odasefoi lɛ akpee wulu lɛ shishi.” Ewie akɛ, hii onukpai kɛ gbekɛbii fɛɛ wo kootu ni amɛfi tai, ni yei lɛ hu askɛɛtii lɛ kɛlɛ bɔ ni sa ni eyɛ fɛo hu. Mɛi jieɔ Yehowa Odasefoi ayi waa yɛ bɔ ni amɛsaa amɛhe amɛhãa lɛ hewɔ. Bɔfo Paulo wie akɛ, esa akɛ Kristofoi awo “atade ni bulɛ yɔɔ he,” ni amɛkɛ “hiɛ ni gboɔ nɔ kɛ jwɛŋmɔ ni sa awula amɛhe,” ejaakɛ nakai sa mɛi ni “tsɛɔ amɛhe akɛ Nyɔŋmɔ jálɔi.” (1 Tim. 2:9, 10, sh. niŋ.) Eyɛ mli akɛ bɔfo Paulo kɛ gbɛtsɔɔmɔ nɛɛ hã yei moŋ, shi esa akɛ Kristofoi hii hu kɛtsu nii.

² Yehowa tsuji ji wɔ, no hewɔ lɛ, esa akɛ wɔkɛ hiɛdɔɔ asusu atadei ni wɔwoɔ lɛ ahe jogbaŋŋ, ejaakɛ Nyɔŋmɔ ni wɔjáa lɛ buɔ lɛ akɛ eji hiɛdɔɔ sane. (1 Mose 3:21) Biblia lɛ hãa wɔnaa faŋŋ akɛ, Yehowa, ni ji Jeŋ Muu Fɛɛ Nɔyelɔ lɛ, miisumɔ ni etsuji awo atadei ni sa. No hewɔ lɛ, kɛ́ wɔmiikpɛ wɔyiŋ yɛ atade ni wɔbaawo loo bɔ ni wɔbaasaa wɔhe wɔhã lɛ he lɛ, esaaa akɛ wɔsusuɔ nɔ ni wɔ wɔsumɔɔ lɛ pɛ he, esa akɛ wɔsusu nɔ ni Yehowa, Jeŋ Muu Fɛɛ Nɔyelɔ lɛ sumɔɔ lɛ hu he.

 3. Mɛɛ atadei Mose Mla lɛ hãa wɔnaa akɛ Nyɔŋmɔ sumɔɔɔ?

³ Maji ni bɔle Israelbii lɛ kɛ amɛhe wo jeŋba sha mli vii. Shi Mose Mla lɛ bu Israelbii lɛ ahe, koni amɛkakase amɛ. Akɛ nɔkwɛmɔnɔ lɛ, Mla lɛ hã amɛna akɛ, Yehowa miihi atadei ni hãaa ana srɔto ni yɔɔ hii kɛ yei ateŋ. (Kanemɔ 5 Mose 22:5.) Ŋmɛnɛ lɛ, ayɛ atadei ni tamɔ nakai. Mla lɛ hãa wɔnaa akɛ, kɛ́ hii wo atadei ni baahã amɛje yei, ni yei hu wo atadei ni baahã amɛje hii lɛ, Yehowa sumɔɔɔ. Kɛfata he lɛ, esumɔɔɔ ni mɛi woɔ atadei ni haŋ ana kɛji yei ji amɛ loo hii ji amɛ.

 4. Mɛni baaye abua wɔ ni wɔkpɛ yiŋ ni ja yɛ hesaamɔ he?

⁴ Ekɔɔɔ he eko he ni wɔyɔɔ, bɔ ni wɔhiɔ shi wɔhãa, loo bɔ ni kɔɔyɔɔ lɛ mli yɔɔ lɛ, Biblia mli shishitoo mlai baanyɛ aye abua wɔ ni wɔkpɛ yiŋ ni ja yɛ hesaamɔ he. Ehe ehiaaa ni atsɔɔ wɔ atadei pɔtɛi ni esa akɛ wɔwo; esoro mɔ fɛɛ mɔ kɛ atade ni esumɔɔ. Kɛ̃lɛ, kɛ́ wɔhã Biblia mli shishitoo mlai kudɔ wɔ be ni wɔkpɛɔ wɔyiŋ yɛ nɔ ni wɔbaawo he lɛ, ebaaye ebua wɔ ni wɔyɔse “nɔ ni ji Nyɔŋmɔ suɔmɔnaa nii kpakpa ni ekpɛlɛɔ nɔ ni hi kɛwula shi.” Nyɛhãa wɔsusua Biblia mli shishitoo mlai nɛɛ ekomɛi ahe.​—Rom. 12:1, 2.

5, 6. Te esa akɛ wɔhesaamɔ aná mɛi anɔ hewalɛ ehã tɛŋŋ?

⁵ Nyɔŋmɔ mumɔ lɛ tsirɛ bɔfo Paulo ni ekɛ shishitoo mla ni yɔɔ 2 Korintobii 6:4 lɛ hã. (Kanemɔ.) Bɔ ni wɔsaa wɔhe wɔhãa lɛ, hãa anaa mɛi ni wɔji. Mɛi pii yɛ ni bɔ ni amɛnaa wɔ yɛ “kponɔgbɛ” lɛ nɔ amɛdamɔɔ amɛkojoɔ wɔ. (1 Sam. 16:7) No hewɔ lɛ, akɛ Nyɔŋmɔ sɔɔlɔi lɛ, esa akɛ wɔhã ehi wɔjwɛŋmɔ mli akɛ kɛ́ wɔmiihala atade ni wɔbaawo lɛ, jeee nɔ ni wɔ wɔsumɔɔ loo nɔ ni hi hã wɔ lɛ pɛ he esa akɛ wɔsusu. Kɛ́ wɔsusu shishitoo mlai ni yɔɔ Nyɔŋmɔ Wiemɔ lɛ mli lɛ ahe lɛ, wɔwoŋ atadei ni baamɔmɔ wɔ pampii, atadei ni baahã mɛi ana wɔgbɔmɔtso lɛ hei komɛi ni esaaa akɛ amɛnaa, loo nɔ ni baatee mɛi abɔlɛnamɔ henumɔi ashi. Nakai nɔŋŋ wɔwoŋ atadei ni baatɛŋ wɔgbɔmɔtso lɛ fãi komɛi, loo nɔ ni baahã mɛi ana wɔyayaiaŋ. Esaaa akɛ wɔwoɔ atadei ni baahã mɛi ahe ahia amɛ loo amɛwo amɛhiɛ amɛwo he kroko kɛji amɛna wɔ.

⁶ Kɛ́ wɔwo atadei ni he tse ni hiɛ kã shi ni yɔɔ hiŋmɛi nɔ, ni wɔsaa wɔhe bɔ ni sa mɛi ni sɔmɔɔ Yehowa, ni ji Jeŋ Muu Fɛɛ Nɔyelɔ lɛ, mɛi baabu wɔ, ni ekolɛ amɛbaasumɔ ni amɛ hu amɛbatsɔmɔ Nyɔŋmɔ tsuji. Agbɛnɛ hu, ebaahã amɛwie asafo lɛ he ekpakpa, ni ekolɛ amɛbaabo yiwalaheremɔ sane ni wɔshiɛɔ lɛ toi.

7, 8. Mɛɛ be ehe miihia waa ni wɔwo atadei ni sa?

⁷ Eji wɔsɔ̃ yɛ wɔ-Nyɔŋmɔ ni yɔɔ krɔŋkrɔŋ lɛ, wɔnyɛmimɛi Kristofoi lɛ, kɛ mɛi ni yɔɔ wɔkutso lɛ mli lɛ ahiɛ akɛ wɔwo atadei ni baawo Yehowa hiɛ nyam, ni ehã bulɛ aba sane ni wɔshiɛɔ lɛ he. (Rom. 13:8-10) Enɛ he miihia waa titri lɛ, kɛ́ wɔmiiya Kristofoi akpeei loo wɔmiiya shiɛmɔ. Esa akɛ wɔsaa wɔhe bɔ ni sa mɛi ni “tsɛɔ amɛhe akɛ Nyɔŋmɔ jálɔi.” (1 Tim. 2:10) He fɛɛ he kɛ atade ni abuɔ lɛ akɛ eyɛ hiŋmɛi nɔ. No hewɔ lɛ, akɛ Yehowa tsuji lɛ, esa akɛ wɔkwɛ jogbaŋŋ ni wɔhesaamɔ akatɔ̃tɔ mɛi anane, ekɔɔɔ he eko he ni wɔyɔɔ.

⁸ Kanemɔ 1 Korintobii 10:31. Kɛ́ wɔmiiya kpeei bibii kɛ kpeei wuji ashishi lɛ, esa akɛ wɔwo atadei ni sa ni bulɛ yɔɔ he. Esaaa akɛ wɔwoɔ atadei ni bɛ hiŋmɛi nɔ ni eba nɔ yɛ maŋ lɛ mli lɛ. Kɛ́ wɔbaayato gbɔiatoohe lɛ, belɛ, gbi klɛŋklɛŋ ni wɔbaaya jɛmɛ, kɛ gbi ni wɔbaashi jɛmɛ lɛ fɛɛ lɛ, esa akɛ wɔhesaamɔ lɛ afee nɔ ni yɔɔ hiŋmɛi nɔ. Agbɛnɛ hu, dani wɔbaashi kɛya kpee lɛ, kɛ be ni akpa ni wɔku wɔsɛɛ kɛba lɛ, esa akɛ wɔkwɛ wɔhesaamɔ jogbaŋŋ. Kɛ́ wɔfee nakai lɛ, ewaŋ kɛhaŋ wɔ kwraa akɛ wɔbaajie wɔhe shi akɛ Yehowa Odasefoi, ni kɛ́ hegbɛ ko gbele lɛ, wɔbaaye odase ni wɔhiɛ gbooo.

9, 10. Mɛni hewɔ esa akɛ wɔsusu shishitoo mla ni yɔɔ Filipibii 2:4 lɛ he be ni wɔkwɛɔ atade ni wɔbaawo lɛ?

⁹ Kanemɔ Filipibii 2:4. Mɛni hewɔ esa akɛ wɔsusu bɔ ni atadei ni wɔwoɔ lɛ baanyɛ aná wɔnyɛmimɛi lɛ anɔ hewalɛ ehã lɛ he? Yiŋtoo kome ji akɛ, Nyɔŋmɔ tsuji fɛɛ miisumɔ ni amɛbo Biblia mli ŋaawoo nɛɛ toi, akɛ: “Nyɛgbea nyɛgbɔmɔtso lɛ henii ni yɔɔ shikpɔŋ lɛ nɔ lɛ, yɛ bɔlɛnamɔ jeŋba sha, muji nii, bɔlɛnamɔ he akɔnɔ ní atiuɔ sɛɛ ní ayeee he nɔ.” (Kol. 3:2, 5) Wɔsumɔŋ ni wɔhã ewa kɛhã wɔnyɛmimɛi Kristofoi lɛ ateŋ mɔ ko mɔ ko akɛ ebaabo ŋaawoo nɛɛ toi. Amɛteŋ mɛi komɛi yɛ ni be ko ni eho lɛ, amɛkɛ amɛhe ewo bɔlɛnamɔ jeŋba sha mli vii, ni ekolɛ, kɛbashi ŋmɛnɛ lɛ, amɛkã he amɛmiiwu amɛmiishi akɔnɔi fɔji. (1 Kor. 6:9, 10) Ekã shi faŋŋ akɛ, wɔsumɔŋ ni wɔfee nɔ ko ni baahã ta lɛ mli awa ahã amɛ, aloo jeee nakai?

¹⁰ Mɛi fɛɛ ni baa Yehowa asafo lɛ mli lɛ tsiɔ amɛhe kɛjeɔ jeŋba sha he. No hewɔ lɛ, kɛ́ asafoŋ kpeei wɔyaa jio, nyɛmimɛi ahenaabuamɔ kroko shishi wɔyaa jio lɛ, esa akɛ wɔwo atadei ni baaye abua wɔnyɛmimɛi lɛ ni amɛya nɔ amɛhiɛ amɛjeŋba kpakpa lɛ mli. Eyɛ mli akɛ wɔyɛ hegbɛ ni wɔwoɔ atadei ni wɔsumɔɔ moŋ, shi sɔ̃ kã wɔteŋ mɔ fɛɛ mɔ nɔ akɛ esaa ehe bɔ ni baahã efee mlɛo kɛhã mɛi krokomɛi akɛ amɛbaaya nɔ amɛhi shi yɛ Nyɔŋmɔ jeŋba he mlai lɛ anaa, ni amɛhã amɛsusumɔi, amɛwiemɔi, kɛ amɛnifeemɔi fɛɛ asa Yehowa hiɛ. (1 Pet. 1:15, 16) Suɔmɔ krɔŋŋ “efeee nii ni bulɛ bɛ he, etaooo lɛ diɛŋtsɛ enɔ.”​—1 Kor. 13:4, 5.

11, 12. Mɛɛ gbɛ nɔ Jajelɔ 3:1, 17 lɛ baanyɛ aye abua wɔ ni wɔhala atadei ni sa?

¹¹ Yehowa tsuji le akɛ, “nɔ fɛɛ nɔ” kɛ “nitsumɔ fɛɛ nitsumɔ” yɛ ebe ni ato, ni amɛsusuɔ enɛ he kɛ́ amɛmiihala atade ni amɛbaawo. (Jaj. 3:1, 17) Kɛ́ jeŋ dɔ lɛ, ayɛ atade ni awoɔ, ni kɛ́ fɛ̃i miiye hu lɛ, ayɛ atade ni awoɔ. Agbɛnɛ hu, shihilɛ mli ni mɔ ko yɔɔ lɛ baanyɛ asa atade ni ewoɔ kɛ bɔ ni esaa ehe ehãa lɛ he. Fɛɛ sɛɛ lɛ, Yehowa mlai kɛ eshishitoo mlai lɛ tsakeee.​—Mal. 3:6.

¹² Esa akɛ wɔwo atadei ni sa ni bulɛ yɔɔ he be fɛɛ be. Shi kɛ́ jeŋ dɔ lɛ, bei komɛi lɛ, enɛ feemɔ waa kɛhãa wɔ. Kɛ́ atadei ni wɔwoɔ lɛ mɔɔɔ wɔ kpɛŋŋ loo ekãaa wɔhe bɔ ni baahã ana wɔgbɔmɔtso lɛ fãi komɛi ni esaaa ni anaaa lɛ, wɔnyɛmimɛi lɛ atsui baanyɔ amɛmli. (Hiob 31:1) Kɛ́ wɔtee wɔyaawu ŋshɔ, loo wɔtee swimin puul lɛ, esa akɛ wɔwo atadei ni yɔɔ hiŋmɛi nɔ. (Abɛi 11:2, 20) Atadei ni mɛi pii woɔ kɛyaa hei nɛɛ tɛŋɔ amɛ loo ehãa anaa amɛgbɔmɔtso lɛ fãi komɛi ni esaaa akɛ anaa. Shi wɔ lɛ, Yehowa, Mɔ Krɔŋkrɔŋ lɛ tsuji ji wɔ, ni wɔsumɔɔ lɛ, no hewɔ lɛ, esa akɛ wɔwo atadei ni baahã awo ehiɛ nyam.

13. Mɛni hewɔ lɛ esa akɛ wɔsusu ŋaawoo ni yɔɔ 1 Korintobii 10:32, 33 lɛ he be ni wɔkpɛɔ wɔyiŋ yɛ nɔ ni wɔbaawo he lɛ?

¹³ Shishitoo mla kroko yɛ ni baanyɛ aye abua wɔ ni wɔwo atadei ni sa. No ji akɛ, esa akɛ wɔkwɛ jogbaŋŋ ni wɔkaye wɔnyɛmimɛi Kristofoi lɛ kɛ mɛi krokomɛi ahenilee awui. (Kanemɔ 1 Korintobii 10:32, 33.) Eji wɔsɔ̃ akɛ wɔbaakwɛ jogbaŋŋ ni wɔkawo atadei ni baagba mɛi krokomɛi ahenilee naa. Bɔfo Paulo ŋma akɛ: “Nyɛhãa wɔteŋ mɔ fɛɛ mɔ asaa enaanyo gbɔmɔ hiɛ ni ahi ahã enaanyo lɛ, ni etswa lɛ ema shi hu.” Kɛkɛ ni etsɔɔ nɔ hewɔ ni esa akɛ wɔfee nakai. Eŋma akɛ: “Ejaakɛ Kristo lɛ po esaaa lɛ diɛŋtsɛ ehiɛ.” (Rom. 15:2, 3) Yesu na Nyɔŋmɔ suɔmɔnaa nii ni ebaafee lɛ akɛ ehe miihia fe nibii krokomɛi fɛɛ, no hewɔ lɛ, efeee nɔ ni lɛ diɛŋtsɛ esumɔɔ, moŋ lɛ, efee nibii ni baaye abua mɛi krokomɛi. Esa akɛ wɔkase lɛ, ni wɔtsi wɔhe kɛje atadei, hesaamɔ nibii, kɛ nibii krokomɛi ni ekolɛ wɔsumɔɔ, shi ebaanyɛ ehã mɛi akpoo sane kpakpa lɛ ahe.

14. Mɛɛ gbɛ nɔ fɔlɔi baanyɛ atsɔse amɛbii ni amɛsaa amɛhe bɔ ni baawo Nyɔŋmɔ hiɛ nyam?

¹⁴ Eji Kristofoi ni ji fɔlɔi lɛ asɔ̃ akɛ amɛbaaye amɛbua amɛbii lɛ ni amɛkɛ Biblia mli shishitoo mlai atsu nii. Esa akɛ fɔlɔi akwɛ ni amɛ kɛ amɛbii lɛ fɛɛ ahesaamɔ afee nɔ ni sa ni baahã Nyɔŋmɔ tsui anyɔ emli. (Abɛi 22:6; 27:11) Kɛ́ fɔlɔi wo atadei ni yɔɔ hiŋmɛi nɔ, ni amɛsaa amɛhe bɔ ni sa Kristofoi lɛ, no baanyɛ aye abua bii lɛ ni amɛwo Nyɔŋmɔ hiɛ nyam kɛtsɔ amɛhesaamɔ nɔ. Kɛfata he lɛ, esa akɛ fɔlɔi lɛ ajɛ suɔmɔ mli amɛtsɔɔ amɛbii lɛ hei ni amɛbaanyɛ amɛná atadei ni sa yɛ amɛhe, kɛ bɔ ni amɛbaafee amɛna kɛji atade ko sa loo esaaa. Yɛ enɛ gbɛfaŋ lɛ, esa akɛ amɛhã amɛnu shishi akɛ, kɛji amɛyaahe atade lɛ, esa akɛ amɛhe nɔ ni baawo Yehowa Nyɔŋmɔ, Mɔ ni gbɛ́i kã amɛnɔ lɛ hiɛ nyam, jeee nɔ ni amɛsumɔɔ kɛkɛ.

15. Eyɛ mli akɛ wɔbaanyɛ wɔwo atade ni wɔsumɔɔ moŋ, shi mɛni esa akɛ wɔhã ehi wɔjwɛŋmɔŋ?

¹⁵ Biblia lɛ hãa wɔ gbɛtsɔɔmɔi ni baaye abua wɔ ni wɔkpɛ yiŋ ni ja ni baawo Nyɔŋmɔ hiɛ nyam. Shi esoro wɔteŋ mɔ fɛɛ mɔ kɛ atade ni esumɔɔ kɛ shika abɔ ni eyɔɔ, ni enɛ baanyɛ asa atadei ni wɔhalaa akɛ wɔbaawo lɛ he. Kɛ̃lɛ, be fɛɛ be lɛ, esa akɛ wɔwo atadei ni he tse ni hiɛ kã shi ni bulɛ yɔɔ he; nɔ ni sa kɛhã nɔ ni wɔyaafee lɛ kɛ he ni wɔyɔɔ lɛ.

16. Mɛni hewɔ sɛɛnamɔ yɔɔ he akɛ wɔbaagbo deŋme wɔtao atadei ni sa wɔhe lɛ?

¹⁶ Jeee be fɛɛ be eyɔɔ mlɛo akɛ wɔbaaná atade ni sa ni yɔɔ hiŋmɛi nɔ wɔhe. Ŋmɛnɛ lɛ, atadei ni ahɔ̃ɔ yɛ maŋ lɛ mli lɛ pii yɛ ni esaaa Kristofoi. No hewɔ lɛ, ekolɛ ebaatɔ wɔ fioo dani wɔbaaná yei askɛɛtii kɛ atadei ni bulɛ yɔɔ he, loo kootui kɛ trɔzai ni mɔmɔŋ wɔ pampii. Kɛ̃lɛ, kɛ́ wɔmia wɔhiɛ wɔtao atadei ni yɔɔ fɛo ni yɔɔ hiŋmɛi nɔ wɔhe lɛ, ekolɛ wɔnyɛmimɛi lɛ baana ni amɛbaajie wɔyi. Nɔ ni fe fɛɛ lɛ, wɔtsui baanyɔ wɔmli, ejaakɛ wɔle akɛ wɔhesaamɔ lɛ baawo wɔ-Tsɛ ni yɔɔ ŋwɛi ni sumɔɔ wɔ lɛ hiɛ nyam.

17. Mɛni ji nibii komɛi ni esa akɛ nyɛmimɛi hii asusu he be ni amɛkpɛɔ amɛyiŋ kɛji amɛbaato amɛtsɛŋ loo amɛbaashɛ fɛɛ?

¹⁷ Ani esa akɛ nyɛmimɛi hii ato tsɛŋ? Yɛ Mose Mla lɛ mli lɛ, Yehowa wie akɛ esa akɛ hii ato amɛtsɛŋ. Shi Kristofoi bɛ Mose Mla lɛ shishi, no hewɔ lɛ, ejeee doo akɛ amɛye Mla lɛ nɔ. (3 Mose 19:27; 21:5; Gal. 3:24, 25) Yɛ hei komɛi lɛ, kɛ́ nyɛmi nuu ko to tsɛŋ ni esaa he jogbaŋŋ lɛ, bulɛ yɛ he, ni ehaŋ mɔ ko mɔ ko awie Maŋtsɛyeli lɛ he sane ni eshiɛɔ lɛ he efɔŋ. Nyɛmimɛi asafoŋ onukpai kɛ asafoŋ sɔɔlɔi ni yɔɔ hei nɛɛ ateŋ mɛi komɛi po eto tsɛŋ. Shi yɛ hei ni tamɔ nɛkɛ po lɛ, nyɛmimɛi hii komɛi baanyɛ ahala akɛ amɛbaashɛ amɛtsɛŋ fɛɛ. (1 Kor. 8:9, 13; 10:32) Hei komɛi hu yɛ ni hii etooo amɛtsɛŋ, ni no hewɔ lɛ, kɛ́ nyɛmi nuu ko to etsɛŋ lɛ, mɛi naa lɛ akɛ ehiii. Kɛ́ nyɛmi nuu ko ni yɔɔ he ko ni tamɔ nɛkɛ lɛ to etsɛŋ lɛ, ewoŋ Nyɔŋmɔ hiɛ nyam, ni ebaanyɛ ehã aná ‘ehe sane atã.’​—Rom. 15:1-3; 1 Tim. 3:2, 7.

18, 19. Mɛɛ gbɛ nɔ Mika 6:8 lɛ baanyɛ aye abua wɔ ni wɔsaa wɔhe bɔ ni sa Nyɔŋmɔ hiɛ?

¹⁸ Ani eŋɔɔɔ onaa akɛ Yehowa woko wɔ mlai babaoo yɛ atadei ni esa akɛ wɔwo kɛ bɔ ni esa akɛ wɔsaa wɔhe wɔhã lɛ he? Yehowa ehã wɔ shishitoo mlai kpakpai yɛ Biblia lɛ mli ni baaye abua wɔ ni wɔkɛ hiɛshikamɔ akpɛ wɔyiŋ yɛ atade ni wɔmiisumɔ ni wɔwo kɛ bɔ ni wɔmiisumɔ ni wɔsaa wɔhe wɔhã lɛ he. Enɛ hewɔ lɛ, wɔbaanyɛ wɔtsɔ atadei ni wɔwoɔ kɛ bɔ ni wɔsaa wɔhe wɔhãa lɛ nɔ wɔtsɔɔ akɛ, ‘wɔkɛ wɔ-Nyɔŋmɔ lɛ miinyiɛ yɛ heshibaa mli.’​—Mika 6:8.

¹⁹ Kɛ́ wɔbaa wɔhe shi lɛ, wɔbaakpɛlɛ nɔ akɛ Yehowa yɛ krɔŋŋ ni ehe tse kwraa fe wɔ, ni egbɛtsɔɔmɔi lɛ hi kwraa fe wɔ diɛŋtsɛ wɔsusumɔi. Enɛ baatsirɛ wɔ ni wɔkɛ wɔhiɛ afɔ̃ egbɛtsɔɔmɔi lɛ anɔ ni wɔkɛtsu nii. Kɛfata he lɛ, kɛ́ wɔbaa wɔhe shi lɛ, wɔbaasusu bɔ ni wɔhesaamɔ baaná mɛi krokomɛi anɔ hewalɛ ahã lɛ he.

20. Mɛni esa akɛ wɔhesaamɔ lɛ ahã ana faŋŋ yɛ wɔhe?

²⁰ Esa akɛ wɔhesaamɔ ahã mɛi ana faŋŋ akɛ, Yehowa tsuji ji wɔ. Yehowa yɛ krɔŋŋ ni ehe tse diɛŋtsɛ, ni wɔmiisumɔ ni wɔmia wɔhiɛ wɔkase lɛ. Nyɛmimɛi fɛɛ ni tsɔɔ amɛhesaamɔ nɔ amɛwoɔ Yehowa hiɛ nyam lɛ hãa etsui nyɔɔ emli, ni amɛsa yijiemɔ. Amɛjeŋba kpakpa lɛ hãa mɛi ni hiɛ tsui kpakpa lɛ nyaa yiwalaheremɔ sane ni wɔshiɛɔ lɛ he. Kɛ́ wɔjɛ hiɛshikamɔ mli wɔkpɛ wɔyiŋ yɛ nɔ ni wɔbaawo he lɛ, wɔbaaya nɔ wɔwo Yehowa, Mɔ ni kɛ “woo kɛ agbojee” eha ehe tamɔ mama lɛ hiɛ nyam.​—Lala 104:1, 2.