Bɔ Ni Asafoŋ Onukpai Lɛ Yeɔ Amɛbuaa Mɛi Ni Ajie Amɛ Kɛje Asafo Lɛ Mli Lɛ

1-2. (a) Kɛ́ mɔ ko fee esha ni etsakeee etsui lɛ, ani Yehowa kuɔ ehiɛ efɔ̃ɔ nɔ? (b) Mɛni Yehowa miisumɔ ni mɛi fɛɛ ni efee esha lɛ afee?

YEHOWA miisumɔ ni etsuji fɛɛ ahi shi yɛ mlai kɛ shishitoo mlai ni yɔɔ e-Wiemɔ lɛ mli lɛ anaa. Enyɛɔ esha. No hewɔ lɛ, kɛ́ mɔ ko fee esha ni etsakeee etsui lɛ, ekuuu ehiɛ efɔ̃ɔɔ nɔ. (Lala 5:​4-6) Yehowa le akɛ wɔyeee emuu, ele akɛ wɔnyɛŋ wɔbo lɛ toi yɛ nɔ fɛɛ nɔ mli ni wɔtɔ̃ɔɔ shi kome po. (Lala 130:​3, 4) Shi yɛ nakai beiaŋ nɔŋŋ lɛ, esumɔɔɔ ni wɔtsɔmɔɔ ‘mɛi ni ebuuu Nyɔŋmɔ, ni kɛ Nyɔŋmɔ dromɔ lɛ jieɔ amɛnaa ni amɛkɛ amɛhe woɔ jeŋba gbonyo ni efeee mɔ hiɛgbele mli.’ (Yuda 4) Biblia lɛ kɛɔ akɛ, Yehowa baakpãtã ‘mɛi ni ebuuu Nyɔŋmɔ’ lɛ ahiɛ yɛ Harmagedon ta lɛ mli.—2 Pet. 3:7; Kpo. 16:16.

² Shi Yehowa sumɔɔɔ ni mɔ ko mɔ ko hiɛ kpãtãa. Tamɔ bɔ ni atsɔ hiɛ awie yɛ Buu-Mɔɔ nɛɛ mli lɛ, Biblia lɛ kɛɔ wɔ faŋŋ akɛ, “eesumɔ ni mɛi fɛɛ atsake amɛtsui.” (2 Pet. 3:9) Bɔ ni Yehowa toɔ etsui shi ehãa mɛi ni efee esha lɛ, nakai nɔŋŋ asafoŋ onukpai lɛ toɔ amɛtsui shi amɛhãa amɛ, ni amɛyeɔ amɛbuaa amɛ ni amɛtsake amɛtsui koni Yehowa aná amɛhe miishɛɛ ekoŋŋ. Shi mɛi ni efee esha lɛ ateŋ mɛi komɛi yɛ ni ayeɔ abuaa amɛ, shi loloolo lɛ, amɛtsakeee amɛtsui. (Yes. 6:9) Asafoŋ onukpai lɛ kaa shii abɔ akɛ amɛbaaye amɛbua amɛ ni amɛtsake amɛtsui, shi amɛkpɛlɛɛɛ, amɛyaa nɔ amɛfeɔ efɔŋ. Kɛ́ eba lɛ nakai lɛ, mɛni esa akɛ asafoŋ onukpai lɛ afee?

“NYƐJIEA EFƆŊFEELƆ LƐ”

 3. (a) Mɛni Biblia lɛ kɛɔ akɛ afee mɛi ni efee esha ni yɔɔ hiɛdɔɔ shi amɛtsakeee amɛtsui lɛ? (b) Mɛni hewɔ wɔbaanyɛ wɔwie akɛ, yɛ gbɛ ko nɔ lɛ, mɔ ni efee esha lɛ diɛŋtsɛ ni ejie ehe kɛje asafo lɛ mli?

³ Kɛ́ mɔ ko fee esha ni yɔɔ hiɛdɔɔ, ni asafoŋ onukpai lɛ ye amɛbua lɛ shi etsakeee etsui lɛ, nɔ ko bɛ dɔŋŋ ni amɛbaafee akɛ ja amɛkɛ gbɛtsɔɔmɔ ni yɔɔ 1 Korintobii 5:13 lɛ etsu nii. Jɛmɛ kɛɔ akɛ: “Nyɛjiea efɔŋfeelɔ lɛ kɛjea nyɛteŋ.” Mɔ ni efee esha lɛ le akɛ, kɛ́ etsakeee etsui lɛ, abaajie lɛ kɛje asafo lɛ mli. No hewɔ lɛ, yɛ gbɛ ko nɔ lɛ, lɛ diɛŋtsɛ ejie ehe kɛje asafo lɛ mli, ejaakɛ asafoŋ onukpai lɛ ka shii abɔ akɛ amɛbaaye amɛbua lɛ ni etsake etsui, shi ekpɛlɛɛɛ. (2 Maŋ. 17:​12-15; Gal. 6:7) Gbɛ ni ekɔ lɛ tsɔɔ akɛ, esumɔɔɔ ni ehiɔ shi yɛ Yehowa mlai kɛ eshishitoo mlai lɛ anaa.—5 Mo. 30:​19, 20.

 4. Kɛ́ ajie mɔ ko kɛje asafo lɛ mli lɛ, mɛni hewɔ atswaa he adafi lɛ?

⁴ Kɛ́ ajie mɔ ko ni efee esha ni yɔɔ hiɛdɔɔ shi etsakeee etsui lɛ kɛje asafo lɛ mli lɛ, atswaa adafi ahãa asafo lɛ akɛ ejeee Yehowa Odasefonyo dɔŋŋ.a Jeee mɔ lɛ hiɛ ashi ni ataoɔ ashwie hewɔ atswaa nakai adafi lɛ. Moŋ lɛ, atswaa nakai adafi lɛ koni nyɛmimɛi lɛ anyɛ amɛkɛ Ŋmalɛ naa gbɛtsɔɔmɔ ni kɛɔ akɛ amɛkɛ nakai mɔ lɛ “akpa bɔɔ” ni ‘amɛkɛ lɛ akaye nii po’ lɛ atsu nii. (1 Kor. 5:​9-11) Nakai gbɛtsɔɔmɔ lɛ he yɛ sɛɛnamɔ waa. Bɔfo Paulo kɛɛ: “Ashikishaŋ-sha bibioo shaa ashikishaŋ muu lɛ fɛɛ.” (1 Kor. 5:6) Kɛ́ ajieee mɔ ni efee esha ni yɔɔ hiɛdɔɔ shi etsakeee etsui lɛ kɛjeee asafo lɛ mli lɛ, mɛi krokomɛi ni yɔɔ asafo lɛ mli lɛ baanu he akɛ, ejeee doo akɛ amɛhi shi yɛ Yehowa mlai kɛ eshishitoo mlai lɛ anaa.—Abɛi 13:20; 1 Kor. 15:33.

 5. Kɛ́ ajie mɔ ko kɛje asafo lɛ mli lɛ, te esa akɛ wɔkɛ lɛ aye wɔhã tɛŋŋ? Ni mɛni hewɔ?

⁵ Kɛ́ ajie mɔ ko kɛje asafo lɛ mli lɛ, te esa akɛ wɔkɛ lɛ aye wɔhã tɛŋŋ? Tamɔ bɔ ni awie kɛtsɔ hiɛ lɛ, esa akɛ wɔkɛ lɛ akpa bɔɔ. Shi esaaa akɛ wɔnuɔ he akɛ hiɛnɔkamɔ ko kwraa bɛ kɛhã lɛ. Elaaje moŋ nɛ, shi ebaanyɛ eku esɛɛ. Kaimɔ akɛ, mɔ ni ajie lɛ kɛje asafo lɛ mli lɛ ejɔɔ ehe nɔ ehã Yehowa. Dɔlɛ sane ji akɛ, bianɛ lɛ ehiii shi yɛ ehenɔjɔɔmɔ lɛ naa, ni enɛ yɛ oshãra waa. (Eze. 18:31) Shi bei abɔ ni Yehowa mɔbɔnalɛ lɛ etãko ni be yɔɔ lolo nɛɛ, wɔsɔlemɔ ji ebaatsake etsui ni eku esɛɛ eba. No hewɔ lɛ, mɛni asafoŋ onukpai lɛ baanyɛ afee kɛye abua mɔ ni ajie lɛ kɛje asafo lɛ mli lɛ koni eku esɛɛ?

MƐNI ASAFOŊ ONUKPAI LƐ FEƆ KƐYEƆ AMƐBUAA MƐI NI AJIE AMƐ KƐJE ASAFO LƐ MLI LƐ?

 6. Mɛni asafoŋ onukpai lɛ baafee kɛye abua mɔ ko ni ajie lɛ kɛje asafo lɛ mli lɛ?

⁶ Kɛ́ ajie mɔ ko kɛje asafo lɛ mli lɛ, ani asafoŋ onukpai lɛ baajie amɛnine yɛ ehe koni lɛ diɛŋtsɛ ekwɛ bɔ ni ebaafee eku esɛɛ kɛba Yehowa ŋɔɔ? Dabi kwraa! Kɛ́ asafoŋ onukpai ni kɛ mɔ lɛ ta shi lɛ kɛɛ lɛ akɛ abaajie lɛ kɛje asafo lɛ mli lɛ, amɛbaatsɔɔ lɛ nibii ni esa akɛ efee koni anyɛ ahe lɛ kɛba asafo lɛ mli ekoŋŋ. Shi amɛkɛwaŋ jɛmɛ. Bei pii lɛ, amɛbaahã mɔ ni efee esha lɛ ale akɛ, amɛbaasumɔ ni amɛkɛ lɛ akpe ekoŋŋ yɛ nyɔji fioo komɛi asɛɛ koni amɛkwɛ akɛ aleenɔ etsake etsui lo. Kɛ́ ekpɛlɛ nɔ lɛ, no lɛ, kɛ́ amɛkɛ lɛ kpe lɛ, amɛbaawo lɛ hewalɛ ni etsake etsui ni eku esɛɛ kɛba Yehowa ŋɔɔ. Kɛ́ be ni amɛkɛ lɛ baakpe lɛ etsakeko etsui lolo lɛ, amɛbaato gbɛjianɔ ni kɛ́ efee lɛ amɛyasara lɛ koni amɛwo lɛ hewalɛ ni etsake etsui.

 7. Kɛ́ ajie mɔ ko kɛje asafo lɛ mli lɛ, mɛni asafoŋ onukpai lɛ feɔ ni hãa anaa akɛ amɛmusuŋ tsɔɔ amɛ tamɔ Yehowa? (Yeremia 3:12)

⁷ Bɔ ni Yehowa musuŋ tsɔɔ lɛ lɛ, nakai nɔŋŋ asafoŋ onukpai lɛ amusuŋ tsɔɔ amɛ yɛ mɛi ni ajie amɛ kɛje asafo lɛ mli lɛ ahe. Akɛ nɔkwɛmɔnɔ lɛ, Yehowa musuŋtsɔlɛ lɛ hewɔ lɛ, emɛɛɛ ni Israelbii lɛ atsake amɛtsui dani eye ebua amɛ. Moŋ lɛ, be ni amɛfeko nɔ ko nɔ ko ni tsɔɔ akɛ amɛtsake amɛtsui po lɛ, etsu egbalɔi lɛ kɛtee amɛŋɔɔ. Yɛ Buu-Mɔɔ nɛɛ nikasemɔ ni ji enyɔ lɛ mli lɛ, awie akɛ Yehowa kɛɛ Hosea ni ekɛ eŋa lɛ he ake lɛ ni eyaŋɔ lɛ kɛba, eyɛ mli akɛ no mli lɛ yoo lɛ miiya nɔ eefee esha. Yehowa tsɔ enɛ nɔ etsɔɔ ewebii lɛ akɛ emusuŋ tsɔɔ lɛ waa yɛ amɛhe. (Hos. 3:1; Mal. 3:7) Asafoŋ onukpai lɛ kaseɔ Yehowa, no hewɔ lɛ, yɛ amɛtsui mli tɔ̃ɔ lɛ, amɛ hu amɛmiisumɔ ni mɔ ni efee esha lɛ aku esɛɛ kɛba asafo lɛ mli, ni amɛfeɔ bɔ fɛɛ bɔ ni amɛbaanyɛ koni enɛ feemɔ akawa kɛhã mɔ lɛ.—Kanemɔ Yeremia 3:12.

 8. Mɛɛ gbɛ nɔ Yesu nɔkwɛmɔnɔ ni kɔɔ bi ni laaje lɛ he lɛ hãa wɔnaa akɛ, Yehowa musuŋ tsɔɔ lɛ waa ni enaa mɔbɔ? (Luka 15:7)

⁸ Yɛ Buu-Mɔɔ nɛɛ nikasemɔ ni ji enyɔ lɛ nɔŋŋ mli lɛ, awie Yesu nɔkwɛmɔnɔ ni kɔɔ bi ni laaje lɛ he lɛ he. Yɛ nɔkwɛmɔnɔ lɛ mli lɛ, be ni tsɛ lɛ na akɛ ebi lɛ miiku esɛɛ kɛmiiba shĩa lɛ, “esha foi ni eyafua lɛ atuu ni ekɛ suɔmɔ shɔ enaa.” (Luka 15:20) Kadimɔ akɛ, tsɛ lɛ emɛɛɛ ni ebi lɛ akpa lɛ fai akɛ ekɛ ehe eshai ake lɛ dã. Moŋ lɛ, lɛ klɛŋklɛŋ esha foi kɛtee ebi lɛ ŋɔɔ, ejaakɛ esumɔɔ lɛ. Nɔkwɛmɔnɔ nɛɛ hãa wɔnaa bɔ ni Yehowa musuŋ tsɔɔ lɛ waa yɛ mɛi ni ajie amɛ kɛje asafo lɛ mli lɛ ahe. Asafoŋ onukpai lɛ feɔ bɔ fɛɛ bɔ ni amɛbaanyɛ ni amɛkase Yehowa. Amɛ hu amɛmiisumɔ waa ni mɛi fɛɛ ni ajie amɛ kɛje asafo lɛ mli lɛ aku amɛsɛɛ kɛba ekoŋŋ. (Luka 15:​22-24, 32) Kɛ́ mɔ ko ni ajie lɛ kɛje asafo lɛ mli lɛ ku esɛɛ kɛba lɛ, Yehowa, Yesu, ŋwɛibɔfoi lɛ, kɛ asafo muu lɛ fɛɛ náa miishɛɛ waa!—Kanemɔ Luka 15:7.

 9. Mɛni Yehowa miisumɔ waa ni mɛi ni efee esha lɛ afee?

⁹ Kɛbashi he ni wɔshɛ nɛɛ, wɔna faŋŋ akɛ, kɛ́ mɔ ko fee esha ni yɔɔ hiɛdɔɔ, shi etsakeee etsui lɛ, Yehowa ekuuu ehiɛ efɔ̃ɔɔ nɔ; ehãa ajieɔ lɛ kɛjeɔ asafo lɛ mli. Shi Yehowa ejieee enine yɛ mɔ lɛ he; eyaa nɔ eyeɔ ebuaa lɛ, ejaakɛ eesumɔ ni eku esɛɛ kɛba eŋɔɔ. Hosea 14:4 lɛ hãa wɔnaa bɔ ni Yehowa nuɔ he ehãa kɛ́ mɔ ni efee esha lɛ tsake etsui ni eku esɛɛ kɛba eŋɔɔ. Jɛmɛ kɛɔ akɛ: “Matsa anɔkwa ni amɛyeee lɛ. Majɛ misuɔmɔ mli masumɔ amɛ, ejaakɛ mimlifu lɛ eje enɔ.” Kɛ́ asafoŋ onukpai lɛ susu bɔ ni Yehowa nuɔ he ehãa lɛ he lɛ, no baatsirɛ amɛ ni amɛkɛ amɛhiɛ afɔ̃ shi akɛ amɛbaana nɔ ko bibioo po ni tsɔɔ akɛ mɔ lɛ miitsake etsui lo. Ni kɛ́ mɛi ni ajie amɛ kɛje asafo lɛ mli lɛ hu susu he lɛ, no baahã amɛna akɛ Yehowa sumɔɔ amɛ waa ni eeshwe ni amɛku amɛsɛɛ kɛba oya nɔŋŋ.

10-11. Mɛni asafoŋ onukpai lɛ baanyɛ afee kɛye abua mɛi ni ajie amɛ kɛje asafo lɛ mli be ko ni eho lɛ?

¹⁰ Ni mɛi ni ajie amɛ kɛje asafo lɛ mli momo, ekolɛ afii pii ni eho nɛ lɛ hu? Mɛni asafoŋ onukpai lɛ baanyɛ afee kɛye abua amɛ? Mɛi nɛɛ ateŋ mɛi komɛi yɛ ni amɛkpa esha ni amɛfee ni hã ajie amɛ kɛje asafo lɛ mli lɛ. Amɛteŋ mɛi komɛi po yɛ ni amɛkaiii nɔ tuuntu ni hã ajie amɛ kɛje asafo lɛ mli. Ekɔɔɔ he eko be ni ajie mɔ ko kɛje asafo lɛ mli lɛ, esa akɛ asafoŋ onukpai lɛ atao esɛɛgbɛ ni amɛsara lɛ. Kɛ́ amɛyasara lɛ lɛ, amɛbaanyɛ amɛkɛ lɛ asɔle ni amɛjɛ suɔmɔ mli amɛwo lɛ hewalɛ ni eku esɛɛ kɛba asafo lɛ mli. Kɛ́ mɔ lɛ kpa asafoŋ kpeei baa afii pii ni eho nɛ lɛ, belɛ ekã shi faŋŋ akɛ, ehiɛ ekpa nibii pii ni ekase yɛ Biblia lɛ mli lɛ anɔ. No hewɔ lɛ, kɛ́ ehã ale akɛ ebaasumɔ ni eku esɛɛ kɛba asafo lɛ mli lɛ, asafoŋ onukpai lɛ baanyɛ ato gbɛjianɔ ni mɔ ko kɛ lɛ akase Biblia lɛ, eyɛ mli akɛ aheko lɛ po. Yɛ shihilɛ fɛɛ shihilɛ mli lɛ, asafoŋ onukpai lɛ ni esa akɛ amɛto gbɛjianɔ koni akɛ mɔ lɛ akase nii.

¹¹ Asafoŋ onukpai lɛ miisumɔ ni amɛkase bɔ ni Yehowa musuŋ tsɔɔ lɛ yɛ mɛi ahe lɛ. No hewɔ lɛ, amɛtaoɔ mɛi fɛɛ ni ekpa Yehowa sɔɔmɔ lɛ, ni amɛwoɔ amɛhewalɛ ni amɛku amɛsɛɛ kɛba Yehowa ŋɔɔ ekoŋŋ. Kɛ́ mɔ ni efee esha lɛ tsake etsui ni ekwa egbɛ fɔŋ lɛ, abaanyɛ ahe lɛ oya nɔŋŋ.—2 Kor. 2:​6-8.

12. (a) Mɛɛ be esa akɛ asafoŋ onukpai lɛ asusu nii ahe jogbaŋŋ dani amɛhe mɔ ko kɛba asafo lɛ mli? (b) Mɛni hewɔ esaaa akɛ wɔnáa jwɛŋmɔ lɛ akɛ eshai komɛi yɛ ni kɛ́ mɔ ko fee lɛ, Yehowa enaŋ mɔ lɛ mɔbɔ kɔkɔɔkɔ? (Kwɛmɔ shishigbɛ niŋmaa lɛ hu.)

¹² Shi eshai komɛi yɛ ni kɛ́ mɔ ko fee lɛ, esa akɛ asafoŋ onukpai lɛ asusu nii ahe jogbaŋŋ ni amɛná nɔmimaa akɛ, mɔ lɛ etsake etsui lɛɛlɛŋ dani ahe lɛ kɛba asafo lɛ mli ekoŋŋ. Eshai nɛɛ ekomɛi ji, kɛ́ mɔ ko fee gbekɛ ko niseniianii, etsɔ ehe jamɔkwalɔ, loo etsɔ̃ ŋaa koni etse ehefatalɔ gbãla. (Mal. 2:14; 2 Tim. 3:6) Yɛ shihilɛi ni tamɔ nɛkɛ amli lɛ, esa akɛ asafoŋ onukpai lɛ asusu nii ahe jogbaŋŋ koni amɛkɛbu asafoŋbii lɛ ahe. Shi yɛ nakai beiaŋ nɔŋŋ lɛ, esa akɛ wɔhã ehi wɔjwɛŋmɔ mli akɛ, kɛ́ eshafeelɔ ko tsake etsui lɛɛlɛŋ ni ekpa nibii gbohii ni efeɔ lɛ, Yehowa baahe lɛ kɛba asafo lɛ mli ekoŋŋ, ekɔɔɔ he eko esha ni efee. No hewɔ lɛ, eyɛ mli akɛ asafoŋ onukpai lɛ miisumɔ ni amɛná nɔmimaa akɛ mɛi ni efee eshai ni eye mɛi awui waa lɛ etsake amɛtsui lɛɛlɛŋ moŋ, shi esaaa akɛ amɛnáa jwɛŋmɔ lɛ akɛ Yehowa nyɛŋ ena mɛi ni tamɔ nakai lɛ mɔbɔ kɔkɔɔkɔ.b—1 Pet. 2:10.

NƆ NI ASAFOŊBII LƐ BAANYƐ AFEE

13. Mɛɛ srɔto yɔɔ bɔ ni wɔkɛ mɔ ko ni ajaje lɛ lɛ yeɔ wɔhãa kɛ bɔ ni wɔkɛ mɔ ko ni ajie lɛ kɛje asafo lɛ mli lɛ yeɔ wɔhãa lɛ teŋ?

¹³ Tamɔ bɔ ni wɔna yɛ nikasemɔ ni tsɔ hiɛ lɛ mli lɛ, bei komɛi lɛ, atswaa adafi akɛ ajaje mɔ ko. Kɛ́ eba lɛ nakai lɛ, wɔbaanyɛ wɔya nɔ wɔkɛ lɛ abɔ, ejaakɛ wɔle akɛ etsake etsui ni ekwa egbɛ fɔŋ lɛ. (1 Tim. 5:20) Ajieko lɛ kɛjeko asafo lɛ mli, no hewɔ lɛ esa akɛ wɔkɛ lɛ abɔ ni wɔwo lɛ hewalɛ koni eya nɔ efee nɔ ni sa Yehowa hiɛ. (Heb. 10:​24, 25) Shi kɛ́ ajie mɔ ko kɛje asafo lɛ mli lɛ, esoro bɔ ni esa akɛ wɔkɛ lɛ aye wɔhã kwraa. Esa akɛ wɔkɛ lɛ “akpa bɔɔ,” ni esaaa akɛ ‘wɔkɛ lɛ yeɔ nii po.’—1 Kor. 5:11.

14. Kɛ́ ajie mɔ ko kɛje asafo lɛ mli lɛ, mɛni wɔbaanyɛ wɔdamɔ wɔhenilee ni wɔkɛ Biblia lɛ etsɔse lɛ nɔ wɔkpɛ wɔyiŋ akɛ wɔbaafee loo wɔfeŋ? (Kwɛmɔ mfoniri lɛ hu.)

¹⁴ Ani nɔ ni awie yɛ kuku ni tsɔ hiɛ lɛ mli lɛ tsɔɔ akɛ, wɔnyɛŋ wɔfɔ̃ mɔ ko ni ajie lɛ kɛje asafo lɛ mli lɛ nine kɛba asafoŋ kpeei, loo kɛ́ eba asafoŋ kpee lɛ wɔnyɛŋ wɔŋa lɛ? Dabi. Eyɛ mli akɛ wɔkɛ mɔ lɛ ebɔŋ moŋ, shi wɔbaanyɛ wɔdamɔ wɔhenilee ni wɔkɛ Biblia lɛ etsɔse lɛ nɔ wɔhala akɛ wɔbaafɔ̃ lɛ nine kɛba asafoŋ kpeei, titri lɛ, kɛ́ eji wɔwekunyo loo no mli lɛ eji wɔnaanyo kpaakpa. Kɛ́ mɔ ko ni tamɔ nakai ba asafoŋ kpee lɛ, te esa akɛ wɔkɛ lɛ aye wɔhã tɛŋŋ? Be ko ni eho lɛ, wɔŋaŋ lɛ. Shi bianɛ lɛ, wɔteŋ mɔ fɛɛ mɔ baadamɔ ehenilee ni ekɛ Biblia lɛ etsɔse lɛ nɔ ekpɛ eyiŋ kɛji ebaaŋa mɔ lɛ ni ehere lɛ kɛba asafoŋ kpee lɛ shishi aloo eŋaŋ lɛ. Shi wɔkɛ lɛ egbaŋ sane kakadaŋŋ, ni wɔkɛ lɛ ebɔŋ hu.

15. Namɛi ahe gbɛtsɔɔmɔ ni yɔɔ 2 Yohane 9-11 lɛ kɔɔ? (Kwɛmɔ akrabatsa ni ji, “Ani Mɛi Kome Too Lɛ Nɔŋŋ Ahe Yohane Kɛ Paulo Wieɔ Lɛ?” hu.)

¹⁵ Shi ekolɛ mɔ ko baabi akɛ, ‘Bɛ sane ni awie yɛ 2 Yohane 9-11 lɛ tsɔɔ akɛ kɛ́ wɔŋa mɛi ni tamɔ nɛkɛ lɛ, wɔkɛ amɛ efee ekome yɛ amɛnitsumɔi fɔji lɛ amli?’ (Kanemɔ.) Saji krokomɛi ni kɔɔ ŋmalɛ nɛɛ he lɛ hãa wɔnaa akɛ, gbɛtsɔɔmɔ ni akɛhã yɛ mli lɛ kɔɔ mɛi ni ekwa anɔkwa jamɔ lɛ kɛ mɛi ni miiwo mɛi hewalɛ ni amɛfee nibii gbohii lɛ ahe. (Kpo. 2:20) No hewɔ lɛ, kɛ́ mɔ ko miitsɔɔ mɛi nibii ni teɔ shi ewoɔ anɔkwale lɛ, loo eewo mɛi hewalɛ ni amɛfee nibii gbohii lɛ, asafoŋ onukpai lɛ eyasaraŋ lɛ. Fɛɛ sɛɛ lɛ, wɔle akɛ mɛi ni tamɔ nɛkɛ lɛ po baanyɛ atsake amɛtsui. Shi kɛyashi amɛbaatsake lɛ, esaaa akɛ wɔŋaa amɛ loo wɔfɔ̃ɔ amɛ nine kɛbaa asafoŋ kpeei.

KASEMƆ BƆ NI YEHOWA MUSUŊ TSƆƆ LƐ KƐ BƆ NI ENAA MƆBƆ LƐ

16-17. (a) Mɛni Yehowa miisumɔ ni mɛi ni efee esha lɛ afee? (Ezekiel 18:32) (b) Mɛni kɛ́ asafoŋ onukpai lɛ fee lɛ, no baatsɔɔ akɛ amɛkɛ Yehowa efee ekome kɛmiitsu nii?

¹⁶ Mɛni wɔkase yɛ nikasemɔi enumɔ ni yɔɔ Buu-Mɔɔ nɛɛ mli lɛ amli? Wɔkase akɛ, Yehowa sumɔɔɔ ni mɔ ko mɔ ko hiɛ kpãtãa! (Kanemɔ Ezekiel 18:32.) Eesumɔ ni mɛi fɛɛ ni efee esha lɛ asaa amɛ kɛ lɛ teŋ. (2 Kor. 5:20) Enɛ hewɔ kɛjɛ blema beebe lɛ, kɛ́ etsuji gba afã kɛje emlai kɛ eshishitoo mlai lɛ ahe lɛ, ewoɔ amɛ hewalɛ daa koni amɛtsake amɛtsui ni amɛku amɛsɛɛ kɛba eŋɔɔ lɛ. Asafoŋ onukpai lɛ ená hegbɛ akɛ amɛkɛ Yehowa baafee ekome kɛye amɛbua mɛi ni efee esha lɛ, akɛ aleenɔ, amɛbaatsake amɛtsui lo.—Rom. 2:4; 1 Kor. 3:9.

¹⁷ Kɛ́ eshafeelɔ ko tsake etsui lɛ, miishɛɛ kpele baa ŋwɛi! Yehowa, wɔ-Tsɛ ni yɔɔ ŋwɛi lɛ, náa miishɛɛ waa kɛ́ etsuji ni egba afã lɛ ateŋ mɔ ko tsake etsui ni eku esɛɛ kɛba asafo lɛ mli, ejaakɛ amɛjara wa waa hã lɛ. Kɛ́ wɔhe be ni wɔsusu bɔ ni Yehowa musuŋ tsɔɔ lɛ, ni enaa mɔbɔ, ni emli hi lɛ he jogbaŋŋ lɛ, wɔbaasumɔ lɛ waa.—Luka 1:78.