Tsuitsakemɔ Ni Kɛ Mɔ Yaa Nyɔŋmɔ Ŋɔɔ Ekoŋŋ
“Nyɔŋmɔ mlihilɛ lɛ, wa ewaao ni oshwa ohe.”—Rom. 2:4.
1, 2. Mɛni ji nɔ ni esa akɛ wɔyoo yɛ esha kɛ bɔni Nyɔŋmɔ buɔ enɛ Iɛ he?
1 LALATSƐ David wiemɔi nɛɛ baanyɛ awo wɔteŋ mɔ fɛɛ mɔ hewalɛ:
“Mɔbɔnalɔ kɛ durolɔ ji Yehowa,
Emli fuuu mra, ni emɔbɔnalɛ fa.
Jeee wɔhe eshai lɛ anaa ekɛwɔ yeɔ yɛ,
Ni jeee wɔ nishaianii lɛ anaa ewoɔ wɔ nyɔmɔ yɛ.
Bɔni tsɛ musuŋ tsɔɔ lɛ yɛ ebii ahe lɛ,
Nakai Yehowa musuŋ tsɔɔ Iɛ yɛ mɛi ni sheɔ lɛ lɛ ahe.
Ejaakɛ ele wɔ su kɛ wɔban, Ekaiɔ akɛ sũ kɛkɛ ji wɔ.”—Lala 103:8, 10, 13, 14.
2 Eyɛ mli akɛ Nyɔŋmɔ le ake eshafeelɔi ji wɔ fɛɛ moŋ, shi kɛlɛ eesumɔ ni eye ebua wɔ ni eesumɔ ni ekɛke wɔ. (Lala 32:1, 2) Shi bɔni wɔsusuɔ Nyɔŋmɔ he wɔhaa lɛ efeŋ nɔ ni ja kɛji akɛ wɔkpaleee bɔni, ebuɔ esha ehaa lɛ nɔ. Yɛ be mli ni Lala 103 maa nɔ mi kɛhaa wɔ akɛ Yehowa “ekɛ onishaianii fɛɛ faa” lɛ, etsɔɔ gbɛnaa nii ni ka wɔnɔ hu akɛ: “Shi Yehowa mɔbɔnalɛ lɛ yɛ kɛjɛ naanɔ kɛmiiya naanɔ yɛ mɛi ni sheɔ lɛ gbeyei lɛ anɔ,. . . mɛi ni hiɛ yeɔ ekpɔi lɛ anɔ ni amɛyeɔ nɔ lɛ.”—Lala 103:3, 17, 18.
3. Mɛni hewɔ ni tsuitsakemɔ he hiaa lɛ?
3 Kɛji akɛ mɔ ko fee esha ni hiɛdɔɔ yɔɔ mli, ni etsakeee etsui, ni eeetao Nyɔŋmɔ ŋɔɔ mɔbɔnalɛ akɛ tsɛ, shi moŋ, etee nɔ efee esha lɛ, agbɛnɛ mɛni? 2 Mose 34:6, 7 tsɔɔ wɔ su ni Yehowa hiɛ. Yɛ be mli ni ema emɔbɔnalɛ, emusuŋtsɔɔ kɛ etsui shi ni etoɔ kɛ bɔni esumɔɔ akɛ ekɛ eshai aaafa lɛ nɔ mi sɛɛ lɛ, ekɛ fata he akɛ: “Ni ehaaa mɔ ko mɔ ko aŋɔ ehe aye kwraa.” (Okɛto 4 Mose 25:1-5; Ezekiel 33:12, 13 he.) No hewɔ lɛ, esaaa akɛ wɔbuɔ emɔbɔnalɛ lɛ akɛ nɔ ko ni yɔɔ fɛlɛfɛlɛ aloo wɔkpɛlɛɔ nɔ kɛkɛ. Belɛ mɛni ji nɔ ni esa akɛ anɔkwa jalɔ lɛ afee kɛji akɛ egbee esha mli?
Gbɛjianɔ Ni Atoɔ Koni Aku Sɛɛ Aya Nyɔŋmɔ Ŋɔɔ Ekoŋŋ
4. Mɛɛ gbɛ nɔ wɔɔtsɔ wɔna eshaifaa? (2 Kron. 7:13, 14)
4 Eshaifaa he miihia Kristofonyo ni efee esha eshi Nyɔŋmɔ mla. Namɔ baanyɛ ekɛ enɛ aha? Yɛ anɔkwale mli lɛ, Nyɔŋmɔ pɛ. Bɔfo Yohane ŋma akɛ: “Kɛji wɔjaje wɔhe eshai [wɔtsɔɔ Nyɔŋmɔ] lɛ, anɔkwafo kɛ jalɔ ji lɛ, koni ekɛ wɔhe eshai lɛ afa wɔ ni etsumɔ wɔhe kɛjɛ nii ni ejaaa gbɛ fiaa mli.”—1 Yoh. 1:9; 2:1.
5, 6. Mɛɛ ŋaa Yakobo 5:14-16 woɔ, ni mɛni hewɔ ni jwɛŋmɔ yɔɔ mli akɛ efɔŋfeelɔ lɛ aaanyiɛ ŋaawoo nɛɛ sɛɛ lɛ?
5 Yɛ esha ni hiɛdɔɔ yɔɔ mli lɛ gbɛfaŋ lɛ, Nyɔŋmɔ woɔ Kristofonyo ‘ni jajeɔ ehe eshai’ lɛ ŋaa yɛ nilee mli akɛ esa akɛ efee nɔ kroko hu efata he. Kaselɔ Yakobo ŋma wiemɔ ko ni eka shi faŋŋ akɛ ekɔɔ mumɔŋ hela ni ji “eshai” ahe akɛ: “Kɛ nyɛteŋ mɔ ko he waaa lɛ lɛ, etsɛ asafo lɛ mli onukpai lɛ kɛba eŋɔɔ, ni amɛsɔle amɛha lɛ, ni hemɔkɛyeli sɔlemɔ lɛ aaahere helatsɛ lɛ yiwala, ni Nuŋtsɔ lɛ aaatee lɛ shi, ni kɛji efee eshai lɛ, aaaŋɔ fa lɛ.”—Yak. 5:14-16.
6 Gbɛ nɛɛ sa, ejaakɛ Kristofonyo ni eŋmɛɛ ehe eha eshafeemɔ ni hiɛdɔɔ yɔɔ mli lɛ jieɔ mumɔŋ gbɔjɔmɔ kpo kɛyashɛɔ heko ni yelikɛbuamɔ he miihia lɛ. Ebaanyɛ ena “asafo Iɛ mli onukpai” lɛ ahemɔkɛyeli sɔlemɔ lɛ he sɛɛ. Amɛyɛ hegbɛ hu akɛ amɛkɛ Biblia mli ŋaawoo kɛ yelikɛbuamɔ aaaha lɛ, beni afee ni enyɛ ena mumɔŋ hewalɛ ekoŋŋ. Agbɛnɛ hu, tɔmɔi lɛ ekomɛi ji esha ni afeɔ ashiɔ Kristofoi asafo lɛ, ejaakɛ amɛkɛ heguɔgbee kɛ awerɛho baa Nyɔŋmɔ webii anɔ. Enɛ haa efeɔ nɔ ni sa babaoo akɛ eshafeelɔ ni tamɔ nɛkɛ aaatao onukpai lɛ adɛŋ yelikɛbuamɔ.—2 Kor. 2:10.
7. Mɛɛ gbɛ nɔ atsɔɔ awoɔ onukpai lɛ atoi nɔ yɛ efɔŋfeemɔ he beni afee ni amɛnyɛ amɛye amɛbua? (Abɛi 28:23; 29:24)
7 Eji nilee kɛ heshibaa kpojiemɔ yɛ Kristofonyo ni efee esha ni mliwa lɛ gbɛfaŋ akɛ eeebɛŋkɛ onukpai lɛ lɛ diɛŋtsɛ. “Mɔ ni tsimɔɔ enɔtɔmɔ [“mɔ ni kɛ-teeɔ,” Lamsa] nɔ lɛ, eshwereŋ; shi mɔ ni jajeɔ ni efɔɔ lɛ, anaa lɛ mɔbɔ.” (Abɛi 28:13) Yɛ bei ekomɛi amli lɛ hiɛgbele hewɔ aloo yɛ tɔmɔ henumɔ aloo tsuiŋ awerɛho ni bɛ hewɔ lɛ eshafeelɔ lɛ bɛŋkɛɛɛ onukpai lɛ, taakɛ Yakobo woɔ ŋaa lɛ. Esa akɛ Kristofonyo fɛɛ Kristofonyo ni le esha lɛ he nɔ ko lɛ awo efɔŋfeelɔ lɛ hewalɛ ni etsi ehe kɛjɛ enɔtɔmɔ lɛ he ni etao mumɔŋ yelikɛbuamɔ ni he hiaa lɛ lɛ. Kɛji akɛ efɔŋfeelɔ lɛ eyaaa onukpai lɛ aŋɔɔ lɛ, esa akɛ Kristofoi krokomɛi lɛ awo amɛtoi nɔ beni afee ni amɛnyɛ amɛkɛ yelikɛbuamɔ ni he hiaa lɛ aha. Esa akɛ Kristofoi fɛɛ asumɔ akɛ ‘amɛaakpale eshafeelɔ Iɛ kɛjɛ enɔtɔmɔ gbɛ lɛ nɔ’ koni “ahere eyiwala kɛjɛ gbele mli.”—Yak. 5:19, 20.
Nyɔŋmɔ Wiemɔ Lɛ Ni Akɛ Aaaka Mɔ
8. Te onukpai lɛ jeɔ shishi amɛtsuɔ ajinafoi akpee ahe nii amɛnaa tɛɛŋ?
8 Kɛji akɛ saneyeli ajinafoi lɛ kpe yɛ efɔŋfeemɔ ko he lɛ, amɛkɛ sɔlemɔ taoɔ Yehowa gbɛtsɔɔmɔ. Onukpai lɛ kɛ mɔ ni etɔ̃ lɛ susuɔ nɔ ni tamɔ naagba loo nɔfɔŋfeemɔ lɛ he yɛ tsuishitoo mli yɛ gbɛ ni sa tookwɛlɔi ni yɔɔ suɔmɔ lɛ nɔ. (Efe. 5:1, 2; 1 Pet. 5:2, 3) Kɛji akɛ odasefoi yɛ po ni maa nɔ mi akɛ áfee efɔŋ ko lɛ, saneyeli ajinafoi lɛ woɔ mɔ lɛ hewalɛ koni etsɔɔ nɔ ni kɛ efɔŋ lɛ ba kɛ bɔni enuɔ he ehaa shi jeee efɔŋ lɛ pɛ he wiemɔi. (5 Mose 19:15; Yoh. 8:17) Mɛni hewɔ ni enɛ he hiaa lɛ?
9, 10. Mɛni ji nɔ ni onukpai lɛ bɔɔ mɔdɛŋ akɛ amɛaafee yɛ be mli ni ajinato lɛ ekpe akɛ amɛmiiye sane ko ni eba yɛ efɔŋfeemɔ he lɛ? (Lala 51:15)
9 Eyɛ mli akɛ onukpai ni boɔ sane lɛ toi lɛ baanyɛ amɛkɛ fɔ ni ayeɔ lɛ ama shi aloo amɛha mɔ lɛ anu enɔfɔŋfeemɔ lɛ shishi moŋ, shi nɔ oti ni ma amɛhiɛ ji ni amɛye amɛbua amɛnyɛmi Kristofonyo ni edu gbɛ lɛ. Amɛmiisumɔ ni amɛtsirɛ lɛ ni etsake etsui beni afee ni “hejɔɔmɔ yinɔ ajɛ Nuŋtsɔ lɛ hiɛ aba.” (Bɔf. 3:19, 20) Kɛji akɛ mɔ lɛ ekpɛlɛɛɛ efɔŋ ni efee lɛ nɔ, enaaa bɔni hiɛdɔɔ yɔɔ mli ha aloo enaaa akɛ ehe miihia ni etsake etsui lɛ, amɛbaanyɛ ni amɛkɛ ‘odaseyeli ni tsɔɔ mɔ yiŋ ni kɔɔ esha ni efee lɛ he kɛ agbɛnɛ nɔ ni kɔɔ jalɛ he’ ama shi shiŋŋ. (Okɛto Yohane 16:8 he.) Shi yɛ be mli ni amɛkɛ kamɔ ni Nyɔŋmɔ gbeyeishemɔ yɔɔ mli nɛɛ haa lɛ, esaaa akɛ amɛkɛ mlifu feɔ aloo amɛfeɔ keketee yɛ mli. Biblia lɛ woɔ ŋaa akɛ: “Ka hiɛ; wo ŋaa, bɔɔ kɔkɔ yɛ tsuishitoo kɛ nitsɔɔmɔ fɛɛ mli.” (2 Tim. 4:1, 2) Kɛji wɔkɛ shiŋfeemɔ kɛ mlihilɛ kɛ tsuishitoo ka mɔ lɛ, eeenyɛ eshɛ eshafeelɔ lɛ tsui mli ni eye ebua lɛ ni enyɛ efɔŋ lɛ ni eku esɛɛ eba Nyɔŋmɔ ŋɔɔ.—Yer. 3:12, 13.
10 Wɔbaanyɛ wɔkase nii kɛjɛ Ezra nɔkwɛmɔ nɔ lɛ mli. Elia Yudafoi lɛ le amɛtɔmɔ lɛ yɛ faŋŋ mli. Enɛ jeee ni ekɛwo amɛ hiɛgbele, shi moŋ ni eha amɛkpa, esa amɛtsui he, etsirɛ amɛ ni amɛnyɛ efɔŋ ni amɛtsake amɛtsui. Ehe miihia ni amɛjaje amɛnɔtɔmɔi Iɛ amɛtsɔɔ Yehowa ni amɛfee bɔni sa koni nakai nifeemɔ lɛ atsumɔ amɛnɔfɔŋfeemɔ lɛ. (Ezra 10:7-14) Nakai nɔŋŋ hu ajinafoi ni yeɔ sane ko ni ji esha ni hiɛdɔɔ yɔɔ mli lɛ miisumɔ ni amɛye amɛbua nɔtɔlɔ lɛ koni ena bɔni etɔmɔ lɛ tsii ha ni enu he yɛ etsui mli akɛ ehe miihia ni etsake.—Yes. 1:18
“Oka Amɛ Yɛ Mɛi Fɛɛ Hiɛ”
11. Namɛi Ŋmalɛ mli kamɔ he hiaa amɛ?
11 Onukpai lɛ kɛ bɔfo Paulo wiemɔi ni eŋma eyaha Timoteo lɛ tsuɔ nii yɛ kpeei ni ajinafoi ni yeɔ ‘sane lɛ kɛ efɔŋfeelɔ lɛ kpeɔ lɛ mli: “Mɛi ni feɔ esha lɛ, oka amɛ yɛ mɛi fɛɛ hiɛ, [ni tsɔɔ diɛŋtsɛ akɛ, “yɛ mɛi fɛɛ ni nuɔ nɔ ni yaa nɔ lɛ ahiɛ”] koni mɛi ni eshwɛ lɛ hu ashe gbeyei.” (1 Tim. 5:20) Nɛkɛ nɔtɔlɔi nɛɛ ji mɛi ni ‘yaa nɔ amɛfeɔ eshai (Revised Standard Version) aloo “mɛi ni kaa he amɛfeɔ esha” (New American Standard Bible) aahu kɛyashiɔ be mli ni akɛ kamɔ lɛ diɛŋtsɛ haa.
12. Mɛɛ gbɛ nɔ ajinafoi ni yeɔ sane lɛ kɛ ŋaawoo ni yɔɔ 1 Timoteo 5:20 lɛ tsuɔ nii?
12 Yɛ klɛŋklɛŋ afii oha lɛ mli lɛ Timoteo, ákɛ bɔfo Paulo najiaŋdamɔlɔ ni akɛ hewalɛ ewo edɛŋ lɛ baanyɛ atsu nakai famɔ ni aŋma aha lɛ lɛ he nii lɛ diɛŋtsɛ ‘yɛ mɛi fɛɛ’ ni naa nɔ ni yaa nɔ lɛ ‘ahiɛ’ mɛi ni ekɔɔ amɛhe lɛ, ni nɔtɔlɔ lɛ hu yɛ jɛmɛ. Ŋmɛnɛ, ajinafoi ni ji onukpai ni ahala amɛ ji mɛi ni kɛ nakai kamɔ lɛ haa shi jeee mɔ kome ko. Ekolɛ efeŋ nɔ ni asafo muu lɛ fɛɛ baa mli. Yɛ ajinafoi ni yeɔ sane lɛ akpee lɛ naagbee lɛ, yɛ be mli ni akɛ nɔtɔmɔ lɛ ema shi lɛ, onukpai lɛ kɛ Ŋmalɛ mli kamɔ haa yɛ efɔŋ ni afee lɛ he. Amɛhaa odasefoi ni na esha ni afee lɛ hu wieɔ ni afɔɔ nine atsɛɔ nɛkɛ gbɔmɛi ni na nɔ ni tee nɔ lɛ ni amɛbabo Biblia mli kamɔ lɛ toi. Enɛ tsɔɔ akɛ akɛhaa “yɛ mɛi fɛɛ hiɛ” aloo ‘yɛ mɛi ni yɔɔ jɛmɛ ni naa nɔ ni yaa nɔ lɛ ahiɛ.’ Mɛnɛɛmɛi nii ji “mɛi ni eshwɛ lɛ” ni atsi amɛta yɛ 1 Timoteo 5:20 lɛ hu baafee mɛi ni enɛ aaaye abua amɛ koni amɛna gbeyeishemɔ kpakpa amɛha esha, amɛna bɔni ehe hiaa akɛ amɛkwa esha kɛ shihilɛi ni baanyɛ ekɛ enɛ aba lɛ.
Ani Etsake Etsui?
13. Mɛɛ kaa loo sane ni mliwa bakaa onukpai Iɛ ahiɛ yɛ be mli ni amɛtsuɔ esha ni hiɛdɔɔ yɔɔ mli Iɛ he nii Iɛ?
13 Kaai loo saji ni mliwawai kɛha onukpai ni yeɔ saji ni kɔɔ efɔŋfeemɔ he lɛ ateŋ ekome ji ni amɛaale akɛ efɔŋfeelɔ lɛ miijie anɔkwa tsuitsakemɔ kpo. Esaaa akɛ amɛkojoɔ yɛ hiɛaŋhiɛaŋ aloo amɛdamɔɔ nɔ ni amɛnaa yɛ ehe lɛ pɛ nɔ. No hewɔ lɛ, akɛni amɛnyɛɛɛ amɛle nɔ ni yɔɔ gbɔmɔ tsuiŋ hewɔ lɛ, esa akɛ amɛkɛ sɛɛyoomɔ, ŋmɛ ni amɛaaŋmɛ pɛpɛɛpɛ kɛ nilee babaoo atsu nii yɛ efɔŋ lɛ ni amɛŋmɛɔ amɛkwɛɔ lɛ he, bɔni ekɔɔ Nyɔŋmɔ mla lɛ he kɛ nɔ ni eshafeelɔ lɛ kɛɔ kɛ nɔ ni efeɔ.
14, 15. Mɛni hewɔ esa akɛ onukpai lɛ akwɛ jogbaŋŋ yɛ be mli ni amɛtoɔ amɛyiŋ akɛ mɔ ko etsake etsui aloo efeko nakai he lɛ?
14 Esaaa akɛ onukpai lɛ yeɔ oyai amɛmuɔ sane naa akɛ tsuitsakemɔ yɛ. Mɛni hewɔ? Ejaakɛ kɛji akɛ amɛtɔ̃ yɛ kojomɔ mli ákɛ eshafeelɔ lɛ etsake etsui lɛ, enɛ baanyɛ aye asafoku muu lɛ fɛɛ awui. Shi nyɛfainɛ, nyɛkadia Biblia mli nɔkwɛmɔ nɔ ko ni tamɔɔɔ enɛ ni kɔɔ efɔŋfeelɔ ko ni yɔɔ Korinto asafo lɛ mli lɛ he lɛ. Yɛ be mli ni ashwie lɛ kɛjɛ asafo lɛ mli be ko lɛ, aku sɛɛ ahe lɛ ekoŋŋ, akɛni etsake etsui yɛ anɔkwale mli lɛ hewɔ. Te nyɛmimɛi Iɛ kɛ lɛ baaye aha tɛɛŋ? Akɛni Korintobii lɛ he ye akɛ etsake etsui hewɔ lɛ awo amɛ hewalɛ yɛ mlihilɛ naa akɛ “nyɛŋɔfaa lɛ, ni nyɛshɛjea emii,” ni ‘enɛ maa suɔmɔ ni amɛyɔɔ kɛha lɛ lɛ nɔ mi.’ (2 Kor. 2:6-8) Nakai nɔŋŋ eji ŋmɛnɛ yɛ be mli ni ajinafoi lɛ emu sane naa akɛ efɔŋfeelɔ lɛ etsake etsui Iɛ. Shi kɛji akɛ amɛtɔ yɛ sane lɛ kojomɔ mli ni amɛku sɛɛ amɛkɛ efɔŋfeelɔ ni tsakeko etsui yɛ anɔkwale mli lɛ wo asafo lɛ mli ekoŋŋ lɛ, amɛkɛ asafoku muu lɛ fɛɛ ajeŋba kɛ amɛmumɔŋ krɔŋŋfeemɔ lɛ baawo oshara mli.—1 Kor. 5:6.
15 Mɛni ji nɔ ni ajinafoi lɛ baakwɛ yɛ be mli ni amɛtaoɔ amɛle kɛji akɛ efɔŋfeelɔ lɛ etsake etsui yɛ anɔkwale mli lɛ? Mɔ ni etsake etsui lɛ ebɔɔɔ mɔdɛŋ akɛ eeeba nɔ ni efee lɛ shi loo eeebu egbɛ fɔŋ lɛ bem. Eyɔseɔ yɛ ejwɛŋmɔ mli akɛ efee efɔŋ ni enuɔ he yɛ etsui mli tɔɔ akɛ esha ni efee eshi Nyɔŋmɔ lɛ miidɔ lɛ waa. (Yer 3:25; Bɔf. 3:19) No hewɔ lɛ esa akɛ onukpai lɛ ni yeɔ sane lɛ akwɛ jogbaŋŋ akɛ nɛkɛ heshwamɔ aloo awerɛho nɛɛ yɛ lo.
16, 17. (a) Mɛni ji sɔrɔto ni ka “je nɛŋ dɔlɛ” kɛ “dɔlɛ ni sa Nyɔŋmɔ hiɛ” lɛ teŋ? (Heb.12:16, 17) (b) Mɛɛ gbɛ nɔ esa akɛ onukpai lɛ akwɛ yaafonui loo henumɔi ni ajieɔ lɛ kpo lɛ jogbaŋŋ yɛ?
16 Esa akɛ onukpai lɛ ale sɔrɔto ni ka “je nɛŋ dɔlɛ” lɛ kɛ “dɔlɛ ni sa Nyɔŋmɔ hiɛ ni tsɛɔ heshwamɔ ni kɛ mɔ yaa walaheremɔ mli” lɛ teŋ lɛ. (2 Kor. 7:10) Mɔ ni efee efɔŋ ko lɛ baanu dɔlɛ ko he akɛ ehiɛ eshwie shi, ehiɛ egbo akɛni ayoo lɛ lɛ hewɔ, aloo emii shɛŋ ehe yɛ tsɔsemɔ ni ekolɛ aaaba enɔ lɛ hewɔ. Shi nɛkɛ “je nɛŋ dɔlɛ” nɛɛ etsɔɔɔ akɛ eedɔ lɛ yɛ esha ni efee eshi Nyɔŋmɔ aloo ahorabɔɔ ni ekɛba Nyɔŋmɔ kɛ E-webii anɔ, nɔ ni yeɔ dɔlɛ ‘ni Nyɔŋmɔ gbeyeishemɔ yɔɔ mli’ lɛ he odase lɛ hewɔ. Eyɛ mli akɛ Esau fo waa yɛ ekromɔbi gbɛnaa ni elaaje lɛ hewɔ moŋ, shi Yehowa le akɛ Esau tsakeko etsui yɛ anɔkwale mli. No hewɔ lɛ kɛji akɛ mɔ ko ni efee esha ni hiɛdɔɔ yɔɔ mli bɔi yaafo lɛ, esa akɛ onukpai lɛ abɔ mɔdɛŋ ni amɛle kɛji akɛ enɛ jɛ ‘dɔlɛ ni Nyɔŋmɔ gbeyeishemɔ yɔɔ mli’ lo. Ekolɛ nakai ni. Yɛ Ezra gbii lɛ amli lɛ maŋ lɛ “fo “naakpa” yɛ be mli ni amɛnu sɔlemɔ ni ejɛ etsuiŋ esɔle yɛ amɛhe eshai lɛ ahewɔ Iɛ. Petro hu fo babaoo akɛni ekwa Yesu hewɔ.—1 Mose 25:29-34; 27:34; Ezra 10:1; Luka 22:59-62.
17 Nɛkɛ Ŋmalɛ mli nɔkwɛmɔ nii nɛɛ maa nɔ hewɔ ni onukpai lɛ nyɛŋ adamɔ henumɔ ko kɛkɛ kpojiemɔ nɔ amɛkojo lɛ nɔ mi. Gbɔmɛi yɛ sɔrɔto yɛ amɛhenumɔ kɛ bɔni amɛnyɛɔ amɛyeɔ amɛhe nɔ lɛ mli. No hewɔ lɛ kɛji akɛ yoofonui yɛ jio eko bɛ jio, nɔ ni he hiaa lɛ ji ni efɔŋfeelɔ lɛ tsui akanya lɛ, ena mumɔ ko ni tsɔɔ awerɛho ni aaye aloo dɔlɛ waa ko akɛni efee esha eshi Yehowa ni efite wekukpaa ni ka ekɛ Nyɔŋmɔ teŋ lɛ hewɔ. (Lala 51:1-6) No hewɔ lɛ eka shi faŋŋ akɛ onukpai lɛ baabi kɛji akɛ efɔŋfeelɔ lɛ ejaje ehe eshai lɛ yɛ sɔlemɔ mli eha Yehowa, ni eetao Nyɔŋmɔ dɛŋ eshaifaa, taakɛ David fee lɛ.—Lala 32:3-5; 41:5; Yer. 31:19.
18. Eshai ni mɔ lɛ efee ni Iɛ diɛŋtsɛ eeejaje etsɔɔ lɛ baa sane lɛ mli yɛ mɛɛ gbɛ nɔ?
18 Kɛji akɛ efɔŋfeelɔ lɛ diɛŋtsɛ jɛ esuɔmɔ mli ejaje etɔmɔ etsɔɔ “asafo lɛ mli onukpai lɛ,” enɛ baatsɔɔ nɔ ko ni hĩ yɛ etsui he. (Yak. 5:14, 16) Shi kɛji akɛ ejajeee sane lɛ shi moŋ akɛ sane lɛ kɛ odaseyeli lɛ yafɔ ehiɛ aloo kɛtsɔ odasefoi anɔ hu? Ebaanyɛ eyoo esha ni efee lɛ yɛ jɛmɛ (kpee lɛ shishi) . (Kadimɔ David-tsuitsakemɔ he nɔkwɛmɔ nɔ yɛ eshia ni ekɛ Batsheba fee lɛ mli, yɛ 2 Samuel 12:1-13) Shi titri lɛ kɛji akɛ ehe bahia ni aye odase ni akɛ kamɔ babaoo aha dani efɔŋfeelɔ lɛ aje shishi afee nɔ ko ni tsɔɔ tsuitsakemɔ lɛ, esa akɛ ajinafoi lɛ akwɛ jogbaŋŋ. Esa akɛ nɔ ko atsɔ amɛyiŋ aloo amɛhe amɛye akɛ efɔŋfeelɔ lɛ etsake ni ákɛ eyɛ ekaa akɛ eeejaje tɔmɔ lɛ ni etswa efai shi akɛ ebaakwa efɔŋ lɛ ni efeŋ nakai dɔŋŋ.—2 Kor. 7:10, 11; Kpoj. 3:19.
19. Te esa akɛ efɔŋfeelɔ ni etsake etsui lɛ anu he aha tsɛŋ yɛ asafo lɛ he?
19 Esa akɛ efɔŋfeelɔ lɛ aye awerɛho yɛ heguɔgbee ni ekɛba Nyɔŋmɔ asafo lɛ nɔ lɛ hewɔ. Beni David fee esha yɛ mɛi lɛ akanemɔ hewɔ ni eyoo nɔ ni efee lɛ, ekpɛlɛ ebuulufeemɔ lɛ nɔ. Kɛkɛ ni beni ena toigbalamɔ ni ejɛ mli eba maŋ muu lɛ fɛɛ nɔ lɛ, enɛ tsirɛ lɛ ni eha ekɛɛ akɛ: “‘Naa mi mifee esha lɛ, ni mi mitɔ lɛ; shi nɛkɛ tooi nɛɛ, mɛni ámɛfee?” (2 Sam. 24:10, 17) No hewɔ lɛ, ani efɔŋfeelɔ lɛ yeɔ awerɛho babaoo diɛŋtsɛ yɛ ahorabɔɔ, naagbai kɛ haomɔ ni ekɛba asafo lɛ nɔ lɛ he?
‘Nitsumɔi Ni Sa Tsuitsakemɔ’
20-22. (a) Mɛɛ “nitsumɔi” aloo “yibii” ji nɔ ni onukpãi lɛ baatao mli ale? (b) Feemɔ bɔni mɔ ni etsake etsui lɛ baanyɛ awo “yibii” ni tamɔ nɛkɛ lɛ he nɔkwɛmɔ nɔ.
20 Bɔfo Paulo wo mɛi aŋaa “akɛ amɛtsake amɛtsui ni amɛkpale kɛba Nyɔŋmɔ ŋɔɔ ni amɛtsu nii ni sa tsuitsakemɔ.” (Bɔf. 26:20) Beni Yudafoi lɛ ni yɔɔ Nehemia gbii lɛ amli lɛ tsake amɛtsui yɛ maŋsɛɛ yei ni amɛyaŋɔ amɛ akɛ amɛŋamɛi lɛ hewɔ lɛ, amɛtsu he nii diɛŋtsɛ ni tsɔɔ tsuitsakemɔ (Neh. 9:1, 2; okɛto Yona 3:5-10 he.) Nohewɔ lɛ yɛ be mli ni onukpai lɛ yeɔ sane ko ni ji efɔŋ ni hiɛdɔɔ yɔɔ mli lɛ, amɛbaasumɔ ni amɛna kɛji akɛ efɔŋfeelɔ lɛ ‘ewo yibii ni sa tsuitsakemɔ.’—Mat. 3:8.
21 Kɛji akɛ efee esha eshi mɔ aŋkro ko lɛ ani ejaje ehe esha lɛ etsɔɔ nakai mɔ lɛ ni ebi edɛŋ eshaifaai. Akɛ nɔkwɛmɔ nɔ lɛ, yɛ gbalafitemɔ mli nɛkɛ lɛ, ani ejaje etɔmɔ lɛ etsɔɔ ohefatalɔ ni yeee fɔ lɛ, ni ani ebi edɛŋ eshaifaa? Aloo kɛji akɛ efɔŋfeelɔ lɛ eye fɔ yɛ shishiumɔ hewɔ lɛ, ani eto gbɛjianɔ akɛ eeetsu nɔ ko yɛ nɔ ni elaaje lɛ he koni eto najiaŋ? Yɛ shihilɛi komɛi amli lɛ enyɛŋ esaa nibii ni efite lɛ fɛɛ, shi ani ekɛ odaseyeli ko haa akɛ obaato gbɛjianɔ bɔni sa, ni eto nɔ ni elaaje lɛ najiaŋ? (Luka 19:8) Sane oti lɛ ji akɛ nɛgbɛ ji heni mɔ ni etɔ lɛ ewo ‘yibii ni sa tsuitsakemɔ’ lɛ kɛyashɛ?
22 Ekolɛ esha lɛ jɛ ehiɛ ni eku eshwie Ŋmalɛ mli ŋaawoo nɔ. Akɛ nɔkwɛmɔ nɔ lɛ, ekolɛ ekɛ enanemɛi nitsulɔi ni ji je lɛŋ bii feɔ ekome kɛjieɔ amɛhiɛtserɛ yɛ be fɛɛ mli, ni nɛkɛ naanyobɔɔ ni ehiii nɛɛ gbala lɛ kɛbote jeŋbashara mli. No hewɔ lɛ ani mɔ ni etɔ lɛ ekpa nakai naanyobɔɔ lɛ? (Abɛi 13:20;1 Pet. 4:3 4) Agbɛnɛ hu, ani eebɔ mɔdɛŋ ni ekɛ Nyɔŋmɔ webii lɛ akpe yɛ be fɛɛ mli, ni ani ejie suɔmɔ ni eyɔɔ yɛ etsui mli akɛ eeejie Nyɔŋmɔ yi akɛ enɔkwa jálɔ lɛ kpo? Jeee nɛkɛ ‘yibii’ kome ko pɛ ji nɔ ni adamɔɔ nɔ atsɔɔ akɛ eshafeelɔ lɛ etsake etsui. Onukpai lɛ baasusu naanyobɔɔ kpakpa ni eeena he, Kristofoi akpeei ni eeeya kɛ ehe ni ekɛaawo sɔɔmɔ nitsumɔ lɛ mli yɛ ekaa naa lɛ ahe, ejaakɛ amɛkpɛlɛɔ jwɛŋmɔ ni Nyɔŋmɔ hiɛ akɛ ‘nitsumɔi ni sa tsuitsakemɔ’ aje kpo lɛ nɔ.
23. Mɛni ji nɔ ni esa akɛ ajinafoi lɛ asusu he yɛ esha ni atiɔ mli afeɔ Iɛ he sane lɛ he?
23 Esa akɛ ajinafoi ni yeɔ sane lɛ ahiɛ ahi asafo Iɛ ni amɛaaha ehe atse lɛ nɔ. Esa akɛ amɛkwɛ jogbaŋŋ hu kɛji akɛ efɔŋfeelɔ lɛ kɛ ehe ewo esha ni hiɛdɔɔ yɔɔ mli lɛ mli yɛ teemɔŋ yɛ be kakadaŋŋ mli. Nakai nɔŋŋ hu eji anɔkwale yɛ be mli ni amɛkɛ mɔ ni áyoo lɛ akɛ ekãa he efeɔ esha shi efee tamɔ mɔ ni etsake etsui yeɔ lɛ. Ekolɛ efeɔ eshia yɛ be babaoo mli, shi akɛni etamɔ mɔ ko ni etsake etsui hewɔ lɛ akãa lɛ yɛ be fɛɛ mli ni aŋmɛɔ lɛ gbɛ ni ehiɔ asafo lɛ mli. Agbɛnɛ efee esha ekoŋŋ. Yɛ saji ni tamɔ enɛ mli lɛ esa akɛ onukpai lɛ aha asafoku lɛ nɔyaa ahi amɛjwɛŋmɔ mli, esa akɛ amɛsusu kɛji akɛ eshihilɛ kɛ odaseyeli ni ji anɔkwale haa akɛ eewo “yibii ni sa tsuitsakemɔ.” Ani ekɛ lɛ diɛŋtsɛ eshihilɛ gbɛ lɛ etsɔ̃ko akɛ yiŋkɔshikɔshifeemɔ yɛ Nyɔŋmɔ asafo lɛ ni ekɛɛ efata amɛhe lɛ he lo?—Lala 119:104; Rom.12:9.
24. Mɛni tsɔɔ kɛji akɛ abaaku sɛɛ akɛ efɔŋfeelɔ lɛ akpe ekoŋŋ yɛ bei krokomɛi amli? (Hosh. 5:4; Mat. 21:30)
24 Yɛ bei komɛi amli lɛ eshafeelɔ lɛ bafeɔ keketee aloo béitsɛ, ani ejieee anɔkwale tsuitsakemɔ kpo etsɔɔɔ yɛ onukpai lɛ atsuishitoo yɛ anɔkwale mli ni amɛye amɛbua lɛ lɛ fɛɛ sɛɛ. (Jaj. 8:11) Sɔ̃ ko kaaa amɛnɔ akɛ amɛkɛ efɔŋfeelɔ nɛɛ aaakpe kpitiokpitio tamɔ nɔ ni amɛmiikpa lɛ fai ni etsake etsui. Shi yɛ bei komɛi amli lɛ ekolɛ amɛbaanu he akɛ ehe miihia ni amɛkɛ eshafeelɔ lɛ akpe ekoŋŋ, kɛji akɛ odaseyeli ni kɔɔ ehenumɔi, yiŋtooi kɛ tsuitsakemɔ he Iɛ mli bɛ faŋŋ lɛ. Yɛ be mli ni ena be ni ekɛaasɔle ni esusu Ŋmalɛ mli ŋaawoo ni atsɔ hiɛ akɛha lɛ lɛ he lɛ; ekolɛ sane ni kɔɔ etsuitsakemɔ he lɛ mli baafee faŋŋ.
25. Mɛni hewɔ ni gbɛnaa nii ni tsii ka onukpai lɛ anɔ yɛ efɔŋfeemɔ he lɛ?
25 Gbɛnaa nii ni kaa onukpai lɛ anɔ akɛ amɛaale nɔ ni ji anɔkwale tsuitsakemɔ lɛ tsii waa diɛŋtsɛ. Esa akɛ amɛtsɔɔ mɔbɔnalɛ ni amɛye amɛbua mɛi ni etɔ ni amɛtsake amɛ tsui yɛ anɔkwale mli lɛ. Shi kɛlɛ esa akɛ amɛkwɛ amɛhe nɔ jogbaŋŋ yɛ mɔbɔnalɛ ni esaaa ni amɛaajie Iɛ kpo ni eeenyɛ eha “masha” ni oshara yɔɔ mli ahi asafo lɛ mli lɛ he.—Gal. 5:9.
Yelikɛbuamɔ Ni Akɛaaha Asafo Lɛ
26. Mɛɛ gbɛ nɔ aaatsɔ atsu saji komɛi ni mɛi fioo pɛ le efɔŋfeemɔ lɛ he nɔ ko lɛ he nii?
26 Yɛ saji lɛ ekomɛi amli lɛ, ekolɛ esha ni hiɛdɔɔ yɔɔ mli lɛ ejeŋ kpo, ebafeŋ nɔ ni mɛi pii le. Ekolɛ mɛi fioo ko kɛkɛ tamɔ mɔ lɛ wekumɛi, aloo Odasefoi fioo ko pɛ le esha lɛ. (Eyɛ mli akɛ amɛfata mɛi ni le nɔ ni etee nɔ lɛ ahe moŋ shi esani amɛyoo akɛ ebafeŋ nɔ ni suɔmɔ yɔɔ mli akɛ amɛaaye enɛ he osheku.) No hewɔ lɛ, kɛji akɛ ajinafoi ni yeɔ sane lɛ ná nɔmimaa akɛ efɔŋfeelɔ lɛ etsake etsui lɛ, ehe ehiaaa ni aha, mɛi pii ale sane lɛ, ejaakɛ “mɛi” ni yɔɔ jɛmɛ lɛ fɛɛ enu Ŋmalɛ mli kamɔ ni akɛha lɛ yɛ sane lɛ he lɛ, ni eshafeelɔ lɛ etsake etsui.
27, 28. Mɛɛ be mli ebafeɔ nɔ ni sa akɛ aaabɔ asafo lɛ amaniɛ akɛ ákã amɛteŋ mɔ ko?
27 Yɛ saji krokomɛi amli lɛ, mɛi pii baanyɛ ale esha lɛ yɛ asafo lɛ mli kɛ agbɛnɛ yɛ akutsoŋ ni eyɔɔ lɛ. Aloo bɔni esha lɛ yɔɔ lɛ hewɔ lɛ, bɔ fɛɛ bɔ ni ji lɛ mɛi pii baanu he yɛ be ni sa mli. Esa akɛ atsu sane ni tamɔ nɛkɛ he nii yɛ gbɛ kroko nɔ. Esa akɛ aha asafo muu lɛ fɛɛ tsui anyɔ emli akɛ atsu sane lɛ he nii yɛ gbɛ ni ja nɔ. Agbɛnɛ hu amɛbaanyɛ amɛna Ŋmalɛ mli ŋaawoo ni baanyɛ aye abua amɛ ni amɛna gbeyeishemɔ amɛha esha yɛ gbɛ ni sa nɔ.
28 Aloo ekolɛ ebaanyɛ eba akɛ onukpai lɛ baanu he akɛ esa akɛ amɛkɛ henɔkwɛmɔ jogbaŋŋ atsu nii yɛ biɛ. Akɛ nɔkwɛmɔ nɔ lɛ, eyɛ mli akɛ efɔŋfeelɔ lɛ etsake etsui lɛlɛŋ moŋ, shi efɔŋfeelɔ lɛ jie gbɔjɔmɔ kpo yɛ be ko ni eho lɛ mli yɛ efaishitswaa akɛ eeekwa gbɛ ni kɛ mɔ yaa efɔŋfeemɔ mli lɛ. No hewɔ lɛ yɛ asafo lɛ he susumɔ beni afee ni mɔ ko ni yɔɔ amɛteŋ lɛ akaná hewalɛ fɔŋ yɛ amɛnɔ ni ekɛ oshara ba asafo lɛ mli hewɔ lɛ, ajinafoi ni ji onukpai lɛ baanyɛ ato amɛyiŋ akɛ Ŋmalɛ naa wiemɔ ko he baahia asafo lɛ.
29, 30. (a) Mɛɛ gbɛ anɔ onukpai lɛ baatsɔ ni amɛbɔ asafo lɛ amaniɛ? (b) Mɛɛ sɛɛnamɔ yɔɔ saji komɛi ni aaatsu he nii yɛ nɛkɛ gbɛ nɔ lɛ mli?
29 Asafo lɛ mli onukpai lɛ baanyɛ ato gbɛjianɔ ni amɛtsu shihilɛi nɛɛ ahe nii yɛ daa otsi sɔɔmɔ kpee lɛ mli shi jeee yɛ kpee kroko shishi. [Abaanyɛ atsi ta yɛ sɔɔmɔ kpee lɛ shishi akɛ ajinafoi ni yeɔ sane lɛ ekã tsutsu nɔtɔlɔ lɛ ni ejie tsuitsakemɔ kpo. Agbɛnɛ ajinafoi ni yeɔ sane lɛ baanu he akɛ ehe baahia ni atsi lɛ gbɛ yɛ nibii komɛi ahe. Nɔ ni baafata enɛɛmɛi ahe ji kpeei amli gbɛfaŋnɔ ni enaŋ, enyiɛŋ asafo lɛ hiɛ yɛ sɔlemɔ mli, aloo, ahaŋ ekane ŋmalɛi aloo ni eeeha sanebimɔi ahetoo. Kɛji akɛ ajinafoi lɛ kɛ naatsii komɛi miiha lɛ, amɛbaanyɛ amɛwie he amɛtsɔɔ onukpai lɛ kɛji akɛ amɛnuɔ he akɛ esa akɛ atswa enɛ he adafi atsɔɔ asafo lɛ. Abaanyɛ ajie nɛkɛ naatsii nɛɛ fiofio yɛ wɔsɛɛ be mli.
30 Yɛ nakai gbɛkɛ lɛ nɔŋŋ, ekolɛ yɛ sɔɔmɔ kpee lɛ naagbee mli lɛ, onukpa ko ni akɛ nitsumɔ ewo edɛŋ baaha Ŋmalɛ mli wiemɔ ni hiɛdɔɔ yɔɔ mli. Esaaa akɛ etsiɔ efɔŋfeelɔ lɛ gbɛi ata aloo ejieɔ teemɔŋsaji ni aye ni je kpo yɛ be mli ni ajinafoi lɛ yeɔ sane lɛ kpo. Shi ebaanyɛ ewie nɔ ni Nyɔŋmɔ Wiemɔ lɛ kɛɔ yɛ tɔmɔ ni ba yɛ enɛ mli lɛ he, oshara ni yɔɔ mli kɛ gbɛ ni aaatsɔ nɔ akwa enɛ. Ŋmalɛ mli ŋaawoo ni tamɔ nɛkɛ he baaba sɛɛnamɔ aha asafo muu lɛ fɛɛ.—2 Tim. 4:1, 2.
31. Te esa akɛ wɔnu bɔni Nyɔŋmɔ buɔ tsuitsakemɔ ehaa lɛ he wɔha tɛɛŋ?
31 Esa akɛ wɔfɛɛ wɔhiɛ asɔ bɔni Yehowa sumɔɔ jogbaŋŋ akɛ eeekpɛlɛ tsuitsakemɔ ni ji anɔkwale nɔ̃ lɛ nɔ jogbaŋŋ lɛ. Yɛ anɔkwale mli ni lɛ esaaa akɛ wɔheɔ “Nyɔŋmɔ duromɔ lɛ yakatswaa.” (2 Kor. 6:1) Kɛji akɛ mɔ ko fee nakai, eŋmɛɛ ehe eha eshafeemɔ ni etsakeee etsui Iɛ, Nyɔŋmɔ kudɔɔ asafo lɛ koni akɛ hiɛdɔɔ atsu sane lɛ he nii. Abaasusu enɛ he yɛ nɔ ni baanyiɛ enɛ sɛɛ lɛ mlia.
[Shishigbɛ niŋmai]
a (Ajie kɛjɛ September 1, 1981 Blɔfo Buu-Mɔɔ lɛ mli)
[Akrabatsa ni yɔɔ baafa 16]
MƐNI Jl NƆ Nl OKASE YƐ TSUITSAKEMƆ HE?
Kɛji akɛ wɔfee esha ni hiɛdɔɔ yɔɔ mli lɛ, esa akɛ wɔjaje wɔtsɔɔ Nyɔŋmɔ ni wɔkɛ e-Wiemɔ lɛ mli ŋaawoo lɛ atsu nii ni wɔtao yelikɛbuamɔ kɛjɛ “Onukpai” Iɛ adɛŋ.
Kɛ ajinafoi ni yeɔ sane ekpe lɛ, onukpai lɛ sumɔɔ ni akɛ tɔmɔ lɛ ama shi faŋŋ ni amɛbɔ mɔdɛŋ ni amɛye amɛbua mɔ ni etɔ lɛ ni etsakɛ etsui.
Yɛ nɛkɛ kpee nɛɛ shishi lɛ, ‘kamɔ yɛ mɛi fɛɛ hiɛ’ lɛ tsɔɔ mɛi ni amɛbakpe yɛ saneyelihe lɛ akɛ odasefoi ni le esha ni etee nɔ lɛ.
Mɔ ni etsake etsui lɛlɛŋ lɛ ji mɔ ni sane lɛ eta etsui he akɛni efee esha eshi Nyɔŋmɔ ni ekɛ ahorabɔɔ eba Lɛ kɛ ewebii lɛ anɔ lɛ hewɔ.
Onukpai lɛ baatao odaseyeli ni ji ‘nitsumɔi ni tsɔɔ tsuitsakemɔ.
Yɛ be mli ni amɛyɔɔ miishɛɛ akɛ amɛaaye amɛbua efɔŋfeelɔ lɛ, ajinafoi lɛ hu susuɔ asafo lɛ ni amɛaabaa yi kɛjɛ fitemɔ mli lɛ he.