Yitso 40

Onufu lɛ Yitso ni Ajwaraa

Ninaa 14​—Kpojiemɔ 20:1-10

Saneyitso: Satan ni akɛ lɛ wo bu kwɔŋkwɔŋ lɛ mli, Afii Akpe Nɔyeli lɛ, adesai anaagbee kaa, kɛ Satan hiɛkpatamɔ

Emlibaa be: Kɛjɛ amanehulu kpeteŋkpele lɛ naagbee kɛyashi Satan hiɛkpatamɔ nɔ

 1. Te klɛŋklɛŋ Biblia gbalɛ lɛ mlibaa etee nɔ eha tɛŋŋ?

ANI okaiɔ Biblia mli klɛŋklɛŋ gbalɛ lɛ? Yehowa Nyɔŋmɔ ji mɔ ni wie enɛ beni ekɛɛ Onufu lɛ akɛ: “Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitsɔ nɔ ni bo hu oootswa enanetsitsi nɔ.” (1 Mose 3:15) Agbɛnɛ nakai gbalɛ lɛ mlibaa eshɛ enaagbee! Wɔkwɛ bɔ ni Satan kɛ Yehowa ŋwɛi gbɛjianɔtoo ni tamɔ yoo lɛ ewuu lɛ he yinɔsane kɛjɛ shishijee. (Kpojiemɔ 12:1, 9) Onufu lɛ seshibii ni yɔɔ shikpɔŋ nɔ lɛ, kɛ ejamɔ, maŋkwramɔ kɛ ejarayeli nitsumɔi wuji kɛ yiwaa ni naa wa eba yoo lɛ seshi, Yesu Kristo kɛ esɛɛnyiɛlɔi 144,000 ni afɔ amɛ mu ni yɔɔ shikpɔŋ nɛɛ nɔ lɛ anɔ. (Yohane 8:37, 44; Galatabii 3:16, 29) Satan kɛ piŋmɔ gbele ba Yesu nɔ. Shi enɛ batsɔ tamɔ nanetsitsi pilamɔ ko, ejaakɛ Nyɔŋmɔ tee e-Bi anɔkwafo lɛ shi yɛ gbi ni ji etɛ lɛ nɔ.—Bɔfoi lɛ Asaji 10:38-40.

 2. Mɛɛ gbɛ nɔ atsɔɔ ajwaraa Onufu lɛ yitso yɛ, ni mɛni baa Onufu lɛ shikpɔŋ nɔ seshibii lɛ anɔ?

² Ni Onufu lɛ kɛ eseshi lɛ hu? Aaafee afi 56 Ŋ.B. mli ni bɔfo Paulo ŋma wolo kakadaŋŋ ko eyaha Kristofoi ni yɔɔ Roma lɛ. Yɛ be mli ni egbeɔ naa lɛ, ewo amɛ hewalɛ kɛtsɔ nɔ ni ekɛɛ amɛ nɛɛ nɔ akɛ: “Shi etsɛŋ ni hejɔlɛ Nyɔŋmɔ lɛ aaanaanaa Satan nɔ kwraa yɛ nyɛnaji ashishi.” (Romabii 16:20) Enɛ fe hiɛaŋhiɛaŋ pilamɔ ko kɛkɛ. Abaajwara Satan! Paulo kɛ Hela wiemɔ, syn·triʹbo, ni eshishi ji ni aaatswia nɔ ko nɔ kɛyashi eeefee bɔdɔbɔdɔ, anaanaa nɔ, akpata hiɛ kwraa kɛtsɔ ejwaramɔ nɔ tsu nii yɛ biɛ. Yɛ Onufu lɛ seshi ni ji adesai lɛ agbɛfaŋ lɛ, be eshɛ kɛha haomɔ diɛŋtsɛ ni aaaba amɛnɔ yɛ Nuŋtsɔ lɛ gbi lɛ mli, ni enɛ baaya ayagbe naa yɛ amanehulu kpeteŋkpele ni emli ni abaajwara Babilon Kpeteŋkpele lɛ kɛ maŋkwramɔŋ gbɛjianɔtoo ni yɔɔ je lɛ mli lɛ kɛ amɛ shika kɛ tawuu mli hefatalɔi lɛ fɛɛ wɔtsɔwɔtsɔ lɛ mli. (Kpojiemɔ, yitsei 18 kɛ 19) No hewɔ lɛ, Yehowa kɛ nyɛɛ loo hetsɛ ni ka seshii enyɔ lɛ ateŋ lɛ baa naagbee. Nyɔŋmɔ yoo lɛ Seshi lɛ yeɔ Onufu lɛ shikpɔŋ nɔ seshi lɛ nɔ kunim, ni nakai seshi lɛ bɛ dɔŋŋ!

Akɛ Satan Wo Bu Kwɔŋkwɔŋ lɛ Mli

 3. Mɛni Yohane kɛɔ wɔ akɛ ebaaba Satan nɔ?

³ No hewɔ lɛ, mɛni yɔɔ kɛha Satan diɛŋtsɛ kɛ edaimonioi lɛ? Yohane kɛɔ wɔ akɛ: “Ni mina bɔfo ko miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfele lɛ kɛ kɔsɔŋkɔsɔ kpeteŋkpele ko yɛ edɛŋ. Ni emɔ drako lɛ, blema onufu lɛ ni ji diabolo (Abonsam) kɛ Satan lɛ, ni efi lɛ afii akpe, ni eŋɔ lɛ ewo bu kwɔŋkwɔŋ lɛ mli, ni eŋa eyi ni esɔo naa, koni ekashishiu jeŋmaji lɛ dɔŋŋ kɛyashi beyinɔ ni aaagbe afii akpe lɛ naa; ni no sɛɛ lɛ ja afɛne lɛ be fioo ko.”—Kpojiemɔ 20:1-3.

 4. Namɔ ji bɔfo ni hiɛ bu kwɔŋkwɔŋ lɛ naa samfele lɛ, ni te wɔfeɔ tɛŋŋ wɔleɔ?

⁴ Namɔ ji nɛkɛ bɔfo nɛɛ? Esa akɛ efee mɔ ni yɔɔ hewalɛ kpeteŋkpele bɔni afee ni enyɛ ejie Yehowa henyɛlɔ nukpa nɛɛ kɛya. “Ehiɛ bu kwɔŋkwɔŋ lɛ naa samfele lɛ kɛ kɔsɔŋkɔsɔ kpeteŋkpele ko yɛ edɛŋ.” Ani enɛ kaiii wɔ tsutsu ninaa ko? Hɛɛ, atsɛɔ baalabii lɛ anɔ maŋtsɛ lɛ akɛ “bu kwɔŋkwɔŋ lɛ mli bɔfo”! (Kpojiemɔ 9:11) No hewɔ lɛ, biɛ hu wɔmiina Yehowa Bembulɔ Nukpa, Yesu Kristo ni awo ehiɛ nyam lɛ, ni miitsu nii. Nɛkɛ bɔfo nukpa nɛɛ ni shwie Satan kɛjɛ ŋwɛi, ni kojo Babilon Kpeteŋkpele lɛ, ni kpata “shikpɔŋ lɛ nɔ maŋtsɛmɛi lɛ kɛ amɛtai” lɛ ahiɛ yɛ Harmagedon lɛ eŋmɛŋ gbɛ koni bɔfo ko ni baa shi kɛ naagbee yitso nɔ tswaa lɛ aba kɛtsɔ Satan ni akɛ lɛ woɔ bu kwɔŋkwɔŋ lɛ mli lɛ nɔ!—Kpojiemɔ 12:7-9; 18:1, 2; 19:11-21.

 5. Te bu kwɔŋkwɔŋ lɛ naa bɔfo lɛ kɛ Satan Abonsam yeɔ haa tɛŋŋ, ni mɛni hewɔ?

⁵ Beni ashɛ drako tsuru kpeteŋkpele lɛ kɛjɛ ŋwɛi afɔ lɛ, awie ehe akɛ “blema onufu lɛ ni atsɛɔ lɛ diabolo (naafolɔlɔ loo Abonsam) lɛ kɛ Satan (henyɛlɔ) lɛ ni shishiuɔ jeŋ muu lɛ fɛɛ lɛ.” (Kpojiemɔ 12:3, 9) Agbɛnɛ akɛni eshɛ he ni abaamɔ lɛ ni akɛ lɛ awo bu kwɔŋkwɔŋ lɛ mli hewɔ lɛ, atsɔɔ bɔ ni eji lɛ mli jogbaŋŋ ekoŋŋ akɛ “drako lɛ, blema onufu lɛ ni ji diabolo (Abonsam) kɛ Satan lɛ.” Akɛ kɔsɔŋkɔsɔ fiɔ nɛkɛ mɔ ni miɔ mɔ, shishiulɔ, mɔheguɔgbelɔ kɛ mɔ ni hiɛ eshwie shi nɛɛ ni ashɛɔ lɛ afɔɔ “bu kwɔŋkwɔŋ lɛ mli,” ni aŋaa naa ni asɔoɔ naa kpɛŋŋ, “koni ekashishiu jeŋmaji lɛ dɔŋŋ.” Bu kwɔŋkwɔŋ lɛ mli ni akɛ Satan woɔ nɛɛ baaye afii akpe, no mli lɛ hewalɛ ni enaa yɛ adesai anɔ lɛ bɛ dɔŋŋ ni etamɔ gbokɛlɛfonyo ni akɛ lɛ ewo shikpɔŋ tsu ko ni mli kwɔ mli. Bu kwɔŋkwɔŋ lɛ bɔfo lɛ jieɔ Satan kwraa kɛjɛɔ bɛŋkɛmɔ ni eeebɛŋkɛ jalɛ Maŋtsɛyeli lɛ he lɛ he. Mɛɛ heyeli enɛ ji kɛha adesai nɛkɛ!

 6. (a) Mɛɛ odaseyeli yɔɔ ni tsɔɔ akɛ daimonioi lɛ hu yaa bu kwɔŋkwɔŋ lɛ mli? (b) Mɛni baanyɛ aje shishi agbɛnɛ, ni mɛni hewɔ?

⁶ Mɛni baa daimonioi lɛ anɔ? Amɛ hu aŋɔ amɛ aha akɛ “akɛ amɛ ato aha kojomɔ.” (2 Petro 2:4) Atsɛɔ Satan akɛ “Belzebub, daimonioi alumɔ lɛ.” (Luka 11:15, 18; Mateo 10:25) Akɛni amɛkɛ Satan ebɔ yɛ be kakadaŋŋ mli hewɔ lɛ, ani esaaa akɛ akɛ nakai kojomɔ lɛ nɔŋŋ baa amɛnɔ? Bu kwɔŋkwɔŋ lɛ efee nɔ ko ni nakai daimonioi lɛ eshe emliyaa gbeyei kɛjɛ jeeŋmɔ; be ko beni Yesu kɛ amɛ kpe lɛ, “amɛkpa lɛ fai akɛ ekafa amɛ ni eha amɛyabote bu kwɔŋkwɔŋ lɛ mli.” (Luka 8:31) Shi kɛ akɛ Satan wo bu kwɔŋkwɔŋ lɛ mli lɛ, eka shi faŋŋ akɛ abaashɛrɛ ebɔfoi lɛ hu ashwie bu kwɔŋkwɔŋ lɛ mli afata ehe. (Okɛto Yesaia 24:21, 22 he.) Kɛ akɛ Satan kɛ edaimonioi lɛ wo bu kwɔŋkwɔŋ lɛ mli lɛ sɛɛ lɛ, agbɛnɛ Yesu Kristo Afii Akpe Nɔyeli lɛ baanyɛ aje shishi.

 7. (a) Mɛɛ shihilɛ mli Satan kɛ edaimonioi lɛ baahi yɛ be mli ni amɛyɔɔ bu kwɔŋkwɔŋ lɛ mli lɛ, ni te wɔfeɔ tɛŋŋ wɔleɔ? (b) Ani Hades (gbohiiaje) kɛ bu kwɔŋkwɔŋ lɛ ji nɔ kome too? (Kwɛmɔ shishigbɛ niŋmaa lɛ.)

⁷ Ani Satan kɛ edaimonioi lɛ baanyɛ afee nɔ ko beni amɛyɔɔ bu kwɔŋkwɔŋ lɛ mli lɛ? Ojogbaŋŋ, kaimɔ kooloo ni yɔɔ yitsei kpawo ni tsuɔ tamɔ muneele lɛ ni “yɛ, ni ebɛ, ni ebaajɛ bu kwɔŋkwɔŋ lɛ mli eje kpo” lɛ. (Kpojiemɔ 17:8) Beni eyɔɔ bu kwɔŋkwɔŋ lɛ mli lɛ, no mli lɛ ‘ebɛ.’ Enyɛɛɛ etsu nɔ ko, ni enyɛɛɛ etsi ehe, ni eyiŋkpɛi kɛ eyiŋtoi fɛɛ egbo. Nakai nɔŋŋ hu yɛ be mli ni bɔfo Paulo wieɔ Yesu he lɛ, ekɛɛ: “Namɔ aaakpeleke shi kɛaatee shishi bu lɛŋ? No ji, koni eyaŋɔ Kristo kɛjɛ gbohii ateŋ kɛba.” (Romabii 10:7) Beni Yesu yɔɔ nakai bu kwɔŋkwɔŋ lɛ mli lɛ, no mli lɛ egbo.a No hewɔ lɛ jwɛŋmɔ yɛ mli akɛ aaamu sane naa akɛ Satan kɛ edaimonioi lɛ baahi shihilɛ ko ni tamɔ gbele ni anyɛɛɛ no kɔ atsu mli kɛha afii akpe yɛ be mli ni amɛyɔɔ bu lɛ mli lɛ. Mɛɛ sanekpakpa enɛ ji kɛha mɛi ni sumɔɔ jalɛ nifeemɔ lɛ nɛkɛ!

Ekojoɔ Aahu Afii Akpe

8, 9. Mɛni Yohane kɛɔ wɔ agbɛnɛ yɛ mɛi ni tara maŋtsɛsɛii anɔ lɛ he, ni namɛi ji mɛnɛɛmɛi?

⁸ Afii akpe lɛ sɛɛ lɛ, afɛneɔ Satan kɛjɛɔ bu kwɔŋkwɔŋ lɛ mli be fioo. Mɛni hewɔ? Dani eeeha hetoo lɛ, Yohane gbala wɔjwɛŋmɔ kɛtee nakai be kpalaŋŋ lɛ shishijee nɔ. Wɔkaneɔ akɛ: “Ni mina maŋtsɛsɛii,—ni amɛho amɛtara nɔ, ni aŋɔ kojomɔ aha amɛ.” (Kpojiemɔ 20:4a) Namɛi ji mɛi ni tara maŋtsɛsɛii anɔ ni amɛkɛ Yesu ni awo ehiɛ nyam lɛ yeɔ nɔ yɛ ŋwɛi lɛ?

⁹ Amɛji “krɔŋkrɔŋbii” lɛ ni Daniel tsɔɔ mli akɛ amɛkɛ Mɔ “ni tamɔ gbɔmɔ bi” lɛ yeɔ nɔ yɛ e-Maŋtsɛyeli lɛ mli lɛ. (Daniel 7:13, 14, 18) Amɛ nɔŋŋ amɛji onukpai 24 ni tara ŋwɛi maŋtsɛsɛii anɔ yɛ Yehowa hiɛ lɛ. (Kpojiemɔ 4:4) Bɔfoi 12 lɛ, ni Yesu wo amɛ shi akɛ: “Nyɛ mɛi ni nyɛnyiɛ misɛɛ nɛɛ, beni gbɔmɔ bi lɛ aaata enunyam sɛi lɛ nɔ yɛ jeŋ hee lɛ mli lɛ, nyɛ hu nyɛaatara sɛii nyɔŋma kɛ enyɔ nɔ, ni nyɛaakojo Israel akutsei nyɔŋma kɛ enyɔ” lɛ fata he. (Mateo 19:28) Mɛi ni fata he hu ji Paulo, kɛ agbɛnɛ Korinto Kristofoi ni hi shi akɛ anɔkwafoi lɛ. (1 Korintobii 4:8; 6:2, 3) Mɛi ni baafata he hu ji Laodekia asafo lɛ mlibii lɛ ni ye kunim lɛ.—Kpojiemɔ 3:21.

10. (a) Agbɛnɛ te Yohane tsɔɔ bɔ ni maŋtsɛmɛi 144,000 lɛ ji lɛ mli eha tɛŋŋ? (b) Yɛ nɔ ni Yohane etsɔ hiɛ ekɛɛ wɔ lɛ hewɔ lɛ namɛi fata maŋtsɛmɛi 144,000 lɛ ahe?

¹⁰ Asaa maŋtsɛsɛii sɔŋŋ 144,000—aha kunimyelɔi ni afɔ amɛ mu nɛɛ “ni ahe kɛjɛ gbɔmɛi ateŋ ni amɛtsɔmɔ klɛŋklɛŋ yibii amɛha Nyɔŋmɔ kɛ Toobi lɛ.” (Kpojiemɔ 14:1, 4) Yohane tee nɔ akɛ: “Kɛ mɛi ni [akɛ lema] folɔ amɛyii yɛ Yesu odaseyeli lɛ kɛ Nyɔŋmɔ wiemɔ lɛ hewɔ lɛ asusumai lɛ, kɛ mɛi ni jako kooloo lɛ loo emaga lɛ ni amɛheko ekadi lɛ yɛ amɛhiɛŋtsei anɔ loo amɛdɛŋ lɛ.” (Kpojiemɔ 20:4b) Mɛi ni fataa nakai maŋtsɛmɛi lɛ ahe hu ji Kristofoi ni afɔ amɛ mu ni ji la odasefoi, ní yɛ naasɔomɔ ni ji enumɔ lɛ naagbelemɔ shishijee mli lɛ, amɛbi Yehowa akɛ bei enyiɛ esa akɛ amɛmɛ lolo kɛyashi be mli ni aaatɔ amɛla he owele lɛ. Akɛ atadei yɛji ha amɛ yɛ nakai be lɛ mli, ni akɛɛ amɛ akɛ amɛmɛ fioo. Shi agbɛnɛ atɔ amɛla he owele kɛtsɔ Babilon Kpeteŋkpele lɛ fitemɔ, kɛtsɔ maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ lɛ ni kpata jeŋmaji lɛ ahiɛ ni ekɛ Satan wo bu kwɔŋkwɔŋ lɛ mli lɛ nɔ.—Kpojiemɔ 6:9-11; 17:16; 19:15, 16.

11. (a) Te wɔɔfee tɛŋŋ wɔnu wiemɔ “akɛ lema folɔ amɛyii” lɛ shishi hu? (b) Mɛni hewɔ abaanyɛ akɛɛ akɛ 144,000 lɛ fɛɛ gboi yɛ afɔleshaa gbele mli lɛ?

¹¹ Ani “akɛ [lema] folɔ” maŋtsɛmɛi kɛ kojolɔi 144,000 nɛɛ fɛɛ “ayi” diɛŋtsɛ? Eka shi faŋŋ akɛ amɛteŋ mɛi fioo ko yɛ ni afee amɛ nakai diɛŋtsɛ. Ŋwanejee ko bɛ he akɛ akɛ nɛkɛ wiemɔ nɛɛ miidamɔ shi aha Kristofoi ni afɔ amɛ mu lɛ fɛɛ ni gboi akɛ la odasefoi yɛ gbɛ kome loo gbɛ kroko nɔ lɛ.b (Mateo 10:22, 28) Eka shi faŋŋ akɛ, Satan baasumɔ ni akɛ lema agbe amɛ fɛɛ, shi yɛ anɔkwale mli lɛ, jeee Yesu nyɛmimɛi ni afɔ amɛ mu lɛ fɛɛ gboiɔ akɛ la odasefoi. Amɛteŋ mɛi pii gboi yɛ helai loo gbɔlɛ hewɔ. Mɛnɛɛmɛi hu fata kuu ni Yohane na amɛ agbɛnɛ lɛ he. Yɛ shishinumɔ naa lɛ, amɛ fɛɛ amɛgbele lɛ ji afɔleshaa gbele. (Romabii 6:3-5) Kɛfata he lɛ, amɛteŋ mɔ ko mɔ ko jɛɛɛ je lɛ mli. No hewɔ lɛ je lɛ enyɛ amɛ fɛɛ, ni amɛtamɔ gbohii yɛ je lɛ hiɛ. (Yohane 15:19; 1 Korintobii 4:13) Amɛteŋ mɔ ko jaaa kooloo lɛ loo emaga lɛ, ni beni amɛgboi lɛ, anaaa kooloo lɛ kadimɔ ko yɛ amɛhe. Amɛ fɛɛ amɛgboi akɛ kunimyelɔi.—1 Yohane 5:4; Kpojiemɔ 2:7; 3:12; 12:11.

12. Mɛni Yohane bɔ he amaniɛ yɛ maŋtsɛmɛi 144,000 lɛ ahe, ni mɛɛ be mli amɛhiɛ ni kamɔ loo wala mli ni amɛba lɛ ba?

¹² Agbɛnɛ nɛkɛ kunimyelɔi nɛɛ eba wala mli ekoŋŋ! Yohane bɔɔ amaniɛ akɛ: “Ni amɛhiɛ kamɔ ni amɛkɛ Kristo ye maŋtsɛ afii akpe.” (Kpojiemɔ 20:4d) Ani enɛ tsɔɔ akɛ ateee nɛkɛ kojolɔi nɛɛ ashi aahu kɛyashi be mli ni akpata jeŋmaji lɛ ahiɛ ni akɛ Satan kɛ edaimonioi lɛ wo bu kwɔŋkwɔŋ lɛ mli lɛ sɛɛ? Dabi. Amɛteŋ mɛi pii hiɛ kamɔ momo, ejaakɛ amɛtaraa okpɔŋɔi anɔ ni amɛfataa Yesu he amɛkɛ jeŋmaji lɛ wuɔ yɛ Harmagedon. (Kpojiemɔ 2:26, 27; 19:14) Yɛ anɔkwale mli lɛ, Paulo tsɔɔ akɛ amɛshitee lɛ jeɔ shishi beni ba ni Yesu eba yɛ 1914 lɛ eje shishi lɛ sɛɛ nɔŋŋ, ni akɛ ateɔ mɛi komɛi ashi kɛtsɔɔ mɛi krokomɛi ahiɛ. (1 Korintobii 15:51-54; 1 Tesalonikabii 4:15-17) No hewɔ lɛ, wala mli ni amɛbaa lɛ baa yɛ be kpalaŋŋ ko mli yɛ be mli ni akɛ aŋkroaŋkroi lɛ, amɛnine shɛɔ wala ni gbele bɛ mli akɛ nikeenii nɔ yɛ ŋwɛi lɛ.—2 Tesalonikabii 1:7; 2 Petro 3:11-14.

13. (a) Te esa akɛ wɔsusu afii akpe lɛ ni emli ni 144,000 lɛ yeɔ nɔ lɛ he wɔha tɛŋŋ, ni mɛni hewɔ? (b) Te Papias ni jɛ Hierapolis lɛ susu afii akpe lɛ he eha tɛŋŋ? (Kwɛmɔ shishigbɛ niŋmaa lɛ.)

¹³ Maŋtsɛmɛi ni amɛaaye kɛ kojomɔ nitsumɔ ni amɛaatsu lɛ baahe afii akpe. Ani eji afii akpe diɛŋtsɛ, aloo esa akɛ wɔsusu enɛ he akɛ eji okadi be kakadaŋŋ ko ni atsɔɔɔ mli? “Akpeiakpei” (akpei abɔ) baanyɛ atsɔɔ yibɔ ko ni da ni aleee, taakɛ eyɔɔ 1 Samuel 21:11 lɛ. Shi yɛ biɛ lɛ, “akpe” lɛ ji yibɔ pɔtɛɛ diɛŋtsɛ, ejaakɛ ejeɔ kpo shii etɛ yɛ Kpojiemɔ 20:5-7 akɛ “afii akpe lɛ.” Paulo tsɛ nɛkɛ kojomɔ be nɛɛ akɛ “gbi ko” beni ejaje akɛ: “Ejaakɛ [Nyɔŋmɔ] eto gbi ko, nɔ nɔ ni ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa.” (Bɔfoi lɛ Asaji 17:31) Akɛni Petro kɛɔ wɔ akɛ gbi kome tamɔ afii akpe yɛ Yehowa hiɛ hewɔ lɛ, esa akɛ nɛkɛ Kojomɔ Gbi nɛɛ afee afii akpe diɛŋtsɛ.c—2 Petro 3:8.

Gbohii ni Eshwɛ Lɛ

14. (a) Mɛɛ sane Yohane wie yɛ “gbohii ni eshwɛ lɛ” ahe? (b) Mɛɛ gbɛ nɔ wiemɔi ni bɔfo Paulo wie lɛ haa wɔnuɔ sane ni ji “ahiɛ tsɛ” lɛ shishi faŋŋ yɛ?

¹⁴ Shi, namɛi nɛkɛ maŋtsɛmɛi nɛɛ baakojo kɛji akɛ, taakɛ bɔfo Yohane kɛɔ yɛ biɛ lɛ, “(shi gbohii ni eshwɛ lɛ ahiɛ nako atsɛ kɛyashi beyinɔ ni aaagbe afii akpe lɛ naa)” lɛ? (Kpojiemɔ 20:5a) Agbɛnɛ hu esa akɛ anu wiemɔ ‘ahiɛ tsɛ’ lɛ shishi yɛ biɛ yɛ emli sane lɛ naa. Nɛkɛ wiemɔi nɛɛ baanyɛ ahiɛ shishinumɔi sɔrɔtoi yɛ shihilɛi sɔrɔtoi amli. Akɛ nɔkwɛmɔnɔ lɛ, Paulo wie yɛ enanemɛi Kristofoi ni afɔ amɛ mu lɛ ahe akɛ: ‘Nyɛji mɛi ni Nyɔŋmɔ tsiɛ nyɛhiɛ eyɛ mli akɛ nyɛgboi yɛ nyɛnɔtɔmɔi kɛ eshai amli.’ (Efesobii 2:1) Hɛɛ, aha Kristofoi ni akɛ mumɔ lɛ efɔ amɛ mu lɛ ‘ahiɛ tsɛ’ yɛ klɛŋklɛŋ afii oha lɛ mli po, adamɔ hemɔkɛyeli ni amɛyɔɔ yɛ Yesu afɔleshaa lɛ mli lɛ nɔ abu amɛ jalɔi.—Romabii 3:23, 24.

15. (a) Mɛɛ shidaamɔ odasefoi ni tsɔ Kristofoi abe lɛ hiɛ lɛ na mli ŋɔɔmɔ yɛ Nyɔŋmɔ hiɛ? (b) Toi krokomɛi lɛ ‘ahiɛ tsɛ’ aloo amɛbaa wala mli yɛ mɛɛ gbɛ nɔ, ni mɛɛ be mli amɛbaaye shikpɔŋ lɛ nɔ kwraa yɛ eshishinumɔ diɛŋtsɛ naa?

¹⁵ Nakai nɔŋŋ hu abu Yehowa odasefoi ni tsɔ Kristofoi abe lɛ hiɛ lɛ jalɔi yɛ naanyo ni amɛkɛ Nyɔŋmɔ bɔ lɛ hewɔ; ni awie Abraham, Isak, kɛ Yakob he akɛ “hiɛkalɔi” eyɛ mli akɛ amɛgboi diɛŋtsɛ. (Mateo 22:31, 32; Yakobo 2:21, 23) Shi, esa akɛ awo amɛkɛ mɛi krokomɛi fɛɛ ni atee amɛ shi lɛ, kɛ agbɛnɛ asafo babaoo lɛ fɛɛ ni ji toi krokomɛi ni yeɔ anɔkwale ni jeɔ Harmagedon mli lɛ kɛ bii ni mɛnɛɛmɛi baafɔ yɛ jeŋ hee lɛ mli lɛ anɔ kɛba adesa emuuyeli mli. Kristo kɛ ehefatalɔi maŋtsɛmɛi kɛ osɔfoi lɛ baatsu enɛ yɛ afii akpe Kojomɔ Gbi lɛ mli, ni amɛbaadamɔ Yesu kpɔmɔ afɔleshaa lɛ nɔ amɛtsu enɛ. Beni nakai Gbi lɛ aaaba naagbee lɛ, no mli lɛ “gbohii ni eshwɛ lɛ” ‘ahiɛ etsɛ’ kɛ shishinumɔ akɛ amɛtsɔmɔ adesai ni yeɔ emuu. Taakɛ wɔbaana lɛ, esa akɛ amɛye naagbee kaa ko mli omanye, shi amɛkɛ nakai kaa lɛ baakpe akɛ adesai ni yeɔ emuu. Kɛ amɛye kaa lɛ mli kunim lɛ, Nyɔŋmɔ baabu amɛ akɛ mɛi ni sa akɛ amɛhiɔ shi kɛyaa naanɔ, jalɔi yɛ shishinumɔ ni yeɔ emuu naa. Shiwoo nɛɛ baaba mli kwraa yɛ amɛnɔ: “Jalɔi lɛ, shikpɔŋ lɛ aaatsɔ amɛnɔ, ni amɛaahi nɔ daa.” (Lala 37:29) Mɛɛ miishɛɛ wɔsɛɛ be ka adesai toibolɔi lɛ ahiɛ nɛkɛ!

Klɛŋklɛŋ Shitee Lɛ

16. Te Yohane tsɔɔ gbohiiashitee ni mɛi ni kɛ Kristo baaye maŋtsɛ lɛ naa lɛ mli eha tɛŋŋ, ni mɛni hewɔ?

¹⁶ Yɛ be mli ni ekuɔ esɛɛ kɛyaa mɛi ni “amɛhiɛ kamɔ, ni amɛkɛ Kristo ye maŋtsɛ afii akpe” lɛ nɔ ekoŋŋ lɛ, Yohane ŋma akɛ: “Enɛ ji klɛŋklɛŋ shitee lɛ.” (Kpojiemɔ 20:5b) Eji klɛŋklɛŋ yɛ mɛɛ gbɛ nɔ? Eji “klɛŋklɛŋ shitee” yɛ be naa, ejaakɛ mɛi ni naa enɛ lɛ etsɔmɔ “klɛŋklɛŋ yibii amɛha Nyɔŋmɔ kɛ Toobi lɛ.” (Kpojiemɔ 14:4) Eji klɛŋklɛŋ hu yɛ hehiamɔ naa, ejaakɛ mɛi ni naa mli gbɛfaŋnɔ lɛ batsɔmɔɔ Yesu nanemɛi nɔyelɔi yɛ eŋwɛi Maŋtsɛyeli lɛ mli ni amɛkojoɔ adesai ni eshwɛ lɛ. Yɛ naagbee lɛ, eji klɛŋklɛŋ yɛ ehilɛ naa. Yɛ Yesu Kristo diɛŋtsɛ sɛɛ lɛ, mɛi ni ateɔ amɛ shi yɛ klɛŋklɛŋ shitee lɛ mli lɛ pɛ ji bɔɔ nii ni awieɔ amɛhe yɛ Biblia lɛ mli akɛ amɛnine shɛɔ shihilɛ ni gbele bɛ mli nɔ.—1 Korintobii 15:53; 1 Timoteo 6:16.

17. (a) Te Yohane tsɔɔ Kristofoi ni afɔ amɛ mu lɛ agbɛkpamɔ ni jɔɔmɔ yɔɔ mli lɛ mli eha tɛŋŋ? (b) Mɛni ji “gbele ni ji enyɔ lɛ,” ni mɛni hewɔ “ebɛ hewalɛ ko” yɛ kunimyelɔi 144,000 lɛ anɔ lɛ?

¹⁷ Mɛɛ gbɛkpamɔ ni jɔɔmɔ yɔɔ mli enɛ ji kɛha mɛi ni afɔ amɛ mu lɛ nɛkɛ! Taakɛ Yohane jaje lɛ: “Mɔ ni ajɔɔ kɛ mɔ krɔŋkrɔŋ ji mɔ ni aaana gbɛnaa yɛ klɛŋklɛŋ shitee lɛ mli lɛ; gbele ni ji enyɔ lɛ bɛ hewalɛ ko yɛ nakai mɛi lɛ anɔ.” (Kpojiemɔ 20:6a) Taakɛ Yesu wo Kristofoi ni yɔɔ Smirna lɛ shi lɛ, “gbele ni ji enyɔ” lɛ ni tsɔɔ hiɛkpatamɔ ni hiɛnɔkamɔ ko akɛ aaate shi aba bɛ mli lɛ kɛ oshara loo awuiyeli ko baŋ kunimyelɔi ni naa “klɛŋklɛŋ shitee” lɛ mli gbɛfaŋnɔ lɛ anɔ. (Kpojiemɔ 2:11; 20:14) Gbele ni ji enyɔ lɛ “bɛ hewalɛ ko” yɛ nɛkɛ kunimyelɔi nɛɛ anɔ, ejaakɛ no mli lɛ amɛwo shihilɛ ni fiteee ni gbele bɛ mli.—1 Korintobii 15:53.

18. Mɛni Yohane wieɔ agbɛnɛ yɛ shikpɔŋ nɔ nɔyelɔi heei lɛ ahe, ni mɛni amɛbaatsu?

¹⁸ Kwɛ bɔ ni enɛ yɔɔ sɔrɔto yɛ shikpɔŋ nɔ maŋtsɛmɛi ni hiɔ shi yɛ be mli ni Satan yɔɔ hewalɛ lɛ anɔ he! Mɛnɛɛmɛi yeɔ nɔ kɛ hoo lɛ afii 50 loo 60, ni amɛteŋ mɛi ni fa lɛ yeɔ nɔ afii fioo ko pɛ. Amɛteŋ mɛi pii ewa adesai ayi. Shi yɛ fɛɛ mli lɛ, te aaafee tɛŋŋ ni nɔyelɔi ni atsakeɔ amɛ kɛ mlai ni tsakeɔ yɛ be fɛɛ mli lɛ he aaaba sɛɛnamɔ aha jeŋmaji lɛ kɛya naanɔ? Nɔ ni tamɔɔɔ enɛ lɛ, Yohane kɛɔ yɛ shikpɔŋ nɔ nɔyelɔi heei lɛ ahe akɛ: “Shi moŋ amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.” (Kpojiemɔ 20:6b) Amɛkɛ Yesu baafee nɔyeli kome pɛ ni baahi shi afii akpe. Amɛ osɔfoi anitsumɔ, ni ji Yesu adesa afɔleshaa ni yeɔ emuu lɛ ni amɛkɛaatsu adesai ahe nii lɛ baahole adesai toibolɔi lɛ anɔ kɛyashɛ mumɔŋ, jeŋbaŋ kɛ gbɔmɔtsoŋ emuuyeli mli. Nɔ ni baajɛ maŋtsɛ ni amɛyeɔ lɛ mli aba ji jeŋ muu fɛɛ adesa weku ko ni jieɔ Yehowa jalɛ nifeemɔ kɛ krɔŋkrɔŋfeemɔ kpo lɛ ni amɛaatswa amɛma shi. Akɛ kojolɔi kɛha afii akpe lɛ, amɛ, kɛ Yesu, baajɛ suɔmɔ mli amɛkudɔ adesai ni feɔ toiboo lɛ kɛya naanɔ wala oti lɛ he.—Yohane 3:16.

Naagbee Kaa Lɛ

19. Mɛni baafee shikpɔŋ lɛ shihilɛ kɛ adesai ashihilɛ yɛ Afii Akpe Nɔyeli lɛ naagbee, ni mɛni Yesu baafee agbɛnɛ?

¹⁹ Beni Afii Akpe Nɔyeli lɛ aaaba naagbee lɛ, no mli lɛ shikpɔŋ lɛ fɛɛ ebatamɔ shishijee Eden. Ebaafee paradeiso diɛŋtsɛ. Osɔfonukpa ni baadamɔ mli aha amɛ yɛ Nyɔŋmɔ hiɛ he ebahiaŋ adesai ni eye emuu lɛ, ejaakɛ no mli lɛ ajie Adam eshai lɛ ahe nɔ fɛɛ nɔ kɛtee, ni naagbee henyɛlɔ lɛ, gbele, ehiŋ shi dɔŋŋ. No mli lɛ Kristo Maŋtsɛyeli lɛ nine eshɛ Nyɔŋmɔ yiŋtoo akɛ ebaabɔ jeŋ kome kɛ nɔyeli kome pɛ lɛ nɔ. Ni biɛ nɛɛ ji he ni Yesu “eeeŋɔ maŋtsɛyeli lɛ eha Nyɔŋmɔ kɛ Tsɛ lɛ” yɛ.—1 Korintobii 15:22-26; Romabii 15:12.

20. Mɛni Yohane kɛɔ wɔ akɛ ebaaba beni naagbee kaa lɛ eshɛ lɛ?

²⁰ Be eshɛ kɛha naagbee kaa agbɛnɛ. Ani nakai adesai ajeŋ ni eye emuu lɛ, baadamɔ shi shiŋŋ yɛ emuuyeli mli, ni amɛtamɔŋ klɛŋklɛŋ adesai lɛ yɛ Eden? Yohane kɛɔ wɔ nɔ ni baa: “Ni beni agbe afii akpe lɛ naa lɛ, aaafɛne Satan kɛaajɛ etsu lɛŋ, ni eeeje kpo, ni eyashishiu jeŋmaji lɛ ni yɔɔ shikpɔŋ koji ejwɛ lɛ mli lɛ, Gog ni jɛ Magog lɛ, koni ebua amɛnaa kɛkpe ni amɛya ta; mɛi ayibɔ ni tamɔ ŋshɔnaa shia. Ni amɛyiŋ kɛtee shikpɔŋ tɛtrɛɛ lɛ nɔ, ni amɛyabɔle mɛi krɔŋkrɔŋi lɛ aŋsra lɛ kɛ maŋ ni asumɔɔ lɛ kɛkpe.”—Kpojiemɔ 20:7-9a.

21. Mɛni Satan feɔ yɛ enaagbee mɔdɛŋbɔɔ lɛ mli, ni mɛni hewɔ esaaa akɛ efeɔ wɔ naakpɛɛ akɛ mɛi komɛi baanyiɛ Satan sɛɛ yɛ Afii Akpe Nɔyeli lɛ naagbee po lɛ?

²¹ Mɛni baajɛ Satan mɔdɛŋbɔɔ nɛɛ mli aba? Eshishiuɔ “jeŋmaji lɛ ni yɔɔ shikpɔŋ koji ejwɛ lɛ mli lɛ, Gog ni jɛ Magog lɛ,” ni enyiɛɔ amɛhiɛ “ni amɛya ta.” Namɔ po baanyɛ ni ekɛ ehe ayabɔ Satan he yɛ miishɛɛ afii akpe teokrase nɔyeli ni atswa ama shi nɛɛ mli? Ojogbaŋŋ, kaaha ohiɛ miikpa nɔ akɛ Satan nyɛ elaka Adam kɛ Hawa ni yeɔ emuu lɛ yɛ be mli ni amɛnaa wala mli ŋɔɔmɔ yɛ Eden Paradeiso lɛ. Ni enyɛ elaka ŋwɛibɔfoi ni na nɔ ni jɛ shishijee atuatsemɔ lɛ mli ba lɛ. (2 Petro 2:4; Yuda 6) No hewɔ lɛ esaaa akɛ efeɔ wɔ naakpɛɛ akɛ abaalaka adesai komɛi ni eye emuu lɛ ni amɛnyiɛ Satan sɛɛ yɛ Nyɔŋmɔ Maŋtsɛyeli lɛ nɔyeli afii akpe ni yɔɔ miishɛɛ lɛ fɛɛ sɛɛ.

22. (a) Mɛni wiemɔ “jeŋmaji lɛ ni yɔɔ shikpɔŋ koji ejwɛ lɛ” tsɔɔ? (b) Mɛni hewɔ atsɛɔ atuatselɔi lɛ akɛ “Gog kɛ Magog” lɛ?

²² Biblia lɛ tsɛɔ atuatselɔi nɛɛ “jeŋmaji lɛ ni yɔɔ shikpɔŋ koji ejwɛ lɛ mli lɛ.” Enɛ etsɔɔɔ akɛ no mli lɛ ajara adesai amli ekoŋŋ afee amɛ majimaji muji. Etsɔɔ kɛkɛ akɛ mɛnɛɛmɛi baatse amɛhe kɛjɛ Yehowa anɔkwafoi ni ja lɛ ahe ni amɛbaajie nakai mumɔ fɔŋ lɛ nɔŋŋ ni jeŋmaji lɛ ni yɔɔ ŋmɛnɛ lɛ jieɔ lɛ kpo lɛ kpo. Amɛbaajwɛŋ “jwɛŋmɔ fɔŋ,” taakɛ Gog ni jɛ Magog ni yɔɔ Ezekiel gbalɛ lɛ mli lɛ fee lɛ, kɛ yiŋtoo akɛ, amɛbaakpata teokrase nɔyeli ni yɔɔ shikpɔŋ nɔ lɛ hiɛ. (Ezekiel 38:3, 10-12) No hewɔ lɛ, atsɛɔ amɛ “Gog lɛ kɛ Magog lɛ.”

23. Anɔkwale ni eji akɛ atuatselɔi lɛ ayibɔ “tamɔ ŋshɔnaa shia” lɛ tsɔɔ mɛni?

²³ Mɛi ni fataa Satan he yɛ atuatsemɔ nɛɛ mli lɛ ayibɔ “tamɔ ŋshɔnaa shia.” Mɛi enyiɛ nɛ? Atsɔɔɔ yibɔ ko ni aŋma afɔ shi. (Okɛto Yoshua 11:4; Kojolɔi 7:12 he.) Atuatselɔi nɛɛ anaagbee yibɔ lɛ damɔ bɔ ni amɛteŋ mɔ fɛɛ mɔ feɔ enii yɛ Satan lakamɔ nifeemɔi lɛ ahe ehaa lɛ nɔ. Shi ŋwanejee ko bɛ he akɛ, amɛyi baafa saŋŋ, ejaakɛ amɛbaanu he waa akɛ amɛbaanyɛ amɛye “mɛi krɔŋkrɔŋi lɛ aŋsra lɛ kɛ maŋ ni asumɔɔ lɛ” nɔ kunim.

24. (a) Mɛni ji “maŋ ni asumɔɔ lɛ,” ni te aaafee tɛŋŋ abɔle ehe kɛkpe lɛ? (b) Mɛni damɔ shi kɛha “mɛi krɔŋkrɔŋi lɛ aŋsra lɛ”?

²⁴ “Maŋ ni asumɔɔ” lɛ baafee maŋ ni Yesu Kristo ni awo ehiɛ nyam lɛ wie he etsɔɔ esɛɛnyiɛlɔi lɛ yɛ Kpojiemɔ 3:12 ni etsɛ lɛ “mi-Nyɔŋmɔ lɛ maŋ ni ji Yerusalem hee ni jɛɔ ŋwɛi kpelekeɔ shi kɛjɛɔ mi-Nyɔŋmɔ lɛ ŋɔɔ lɛ.” Akɛni enɛ ji ŋwɛi gbɛjianɔtoo hewɔ lɛ, te aaafee tɛŋŋ ni shikpɔŋ nɔ tai lɛ ‘aaabɔle ehe’ lɛ? No ji akɛ amɛbɔleɔ “mɛi krɔŋkrɔŋi lɛ aŋsra lɛ.” Ŋsra hiɔ maŋ lɛ sɛɛ; no hewɔ lɛ, “mɛi krɔŋkrɔŋi lɛ aŋsra” lɛ baadamɔ shi aha mɛi ni yɔɔ shikpɔŋ nɔ yɛ he ni ŋwɛi Yerusalem Hee lɛ yɔɔ lɛ sɛɛ ni kɛ anɔkwayeli fiɔ Yehowa nɔyeli gbɛjianɔtoo lɛ sɛɛ lɛ. Kɛ atuatselɔi ni yɔɔ Satan shishi nɛɛ tutua nɛkɛ anɔkwafoi nɛɛ lɛ, Nuŋtsɔ Yesu buɔ enɛ akɛ aatutua lɛ diɛŋtsɛ. (Mateo 25:40, 45) Nakai “jeŋmaji” lɛ baabɔ mɔdɛŋ ni amɛkpata nɔ fɛɛ nɔ ni ŋwɛi Yerusalem Hee lɛ etsu ni ekɛfee shikpɔŋ lɛ paradeiso lɛ hiɛ. No hewɔ lɛ yɛ be mli ni amɛtutuaa “mɛi krɔŋkrɔŋi lɛ aŋsra lɛ,” belɛ amɛmiitutua “maŋ ni asumɔɔ lɛ” hu.

La kɛ Swɔɔ Kpaakpo Lɛ

25. Te Yohane tsɔɔ nɔ ni jɛ atuatselɔi lɛ ni tutua “mɛi krɔŋkrɔŋi lɛ aŋsra lɛ” mli ba lɛ mli eha tɛŋŋ, ni mɛni enɛ baatsɔɔ aha Satan?

²⁵ Ani naagbee mɔdɛŋ ni Satan aaabɔ nɛɛ baaye omanye? Dabida—taakɛ bɔ ni tutuamɔ ni Gog ni jɛ Magog kɛaaba mumɔŋ Israel nɔ yɛ wɔgbii nɛɛ amli lɛ hu yeŋ omanye lɛ! (Ezekiel 38:18-23) Yohane tsɔɔ nɔ ni jɛ mli ba lɛ mli yɛ faŋŋ mli: “Ni la jɛ Nyɔŋmɔ ŋɔɔ kɛjɛ ŋwɛi, ni ebasha amɛ butuu. Ni Abonsam lɛ ni shishiuɔ amɛ lɛ, aŋɔ lɛ awo la kɛ swɔɔ kpaakpo lɛ mli, he ni kooloo lɛ kɛ amale gbalɔ lɛ hu yɔɔ lɛ.” (Kpojiemɔ 20:9b-10a) Ni aaaŋɔ lɛ awo bu kwɔŋkwɔŋ lɛ mli kɛkɛ lɛ, yɛ nɛkɛ be nɛɛ mli lɛ, abaajwara Satan, ni ji shishijee onufu lɛ wɔtsɔwɔtsɔ diɛŋtsɛ kwraa kɛjɛ shihilɛ mli, ni abaashimɔ lɛ, ni akpata ehiɛ kwraa tamɔ akɛ la feɔ.

26. Mɛni hewɔ “la kɛ swɔɔ kpaakpo lɛ” nyɛŋ afee he ko pɔtɛɛ ni apiŋɔ mɛi yɛ lɛ?

²⁶ Wɔtsɔ hiɛ wɔna momo akɛ “la kɛ swɔɔ kpaakpo lɛ” nyɛŋ afee piŋmɔ he ko pɔtɛɛ. (Kpojiemɔ 19:20) Kɛji akɛ Satan baana nɔ akɛ mɔ ni apiŋɔ lɛ yɛ jɛmɛ kɛmiiya naanɔ lɛ, enɛ baabi ni Yehowa abaa eyi akɛ hiɛkalɔ. Ni kɛlɛ, wala ji nikeenii, jeee toigbalamɔ. Gbele moŋ ji esha he toigbalamɔ, ni taakɛ Biblia lɛ tsɔɔ lɛ, bɔɔ nii ni egboi lɛ nuuu piŋmɔ ko he. (Romabii 6:23; Jajelɔ 9:5, 10) Agbɛnɛ, wɔkaneɔ yɛ sɛɛ mli akɛ, gbele diɛŋtsɛ lɛ, ashɛrɛɔ lɛ kɛ Hades (gbohiiaje) awoɔ nɛkɛ he nɛɛ nɔŋŋ ni ji la kɛ swɔɔ kpaakpo lɛ mli. Eji anɔkwale akɛ gbele kɛ Hades (gbohiiaje) nyɛŋ anu piŋmɔ he!—Kpojiemɔ 20:14.

27. Yɛ mɛɛ gbɛ nɔ nɔ ni ba Sodom kɛ Gomora nɔ lɛ yeɔ buaa wɔ ni wɔnuɔ wiemɔ ni ji la kɛ swɔɔ kpaakpo lɛ shishi?

²⁷ Enɛɛmɛi fɛɛ maa jwɛŋmɔ ni yɔɔ akɛ la kɛ swɔɔ kpaakpo lɛ ji mfoniri loo nɔ ko he okadi lɛ nɔ mi. Kɛfata he lɛ, la kɛ swɔɔ ni atsiɔ ta lɛ haa wɔkaiɔ nɔ ni ba blema Sodom kɛ Gomora nɔ lɛ, maji ni Nyɔŋmɔ kpata amɛhiɛ yɛ amɛyiwalɛ ni ehiii kwraa lɛ hewɔ lɛ. Beni amɛbe lɛ shɛ lɛ, “Yehowa ha swɔɔ kɛ la nɛ kɛjɛ Yehowa ŋɔɔ yɛ ŋwɛi eshwie Sodom kɛ Gomora nɔ.” (1 Mose 19:24) Atsɛɔ nɔ ni ba maji enyɔ nɛɛ anɔ lɛ akɛ “naanɔ la mli nyɔmɔwoo.” (Yuda 7) Ni kɛlɛ, naanɔ piŋmɔ baaa nakai maji enyɔ lɛ anɔ. Shi moŋ, atsumɔ amɛ kwraa kɛtee, akpata amɛhiɛ kɛtee naanɔ, kɛ emlibii ni amɛfite lɛ. Ŋmɛnɛ, nakai maji lɛ bɛ dɔŋŋ, ni mɔ ko mɔ ko nyɛŋ atsɔɔ kɛ nɔmimaa hei ni maji nɛɛ hi.

28. Mɛni ji la kɛ swɔɔ kpaakpo lɛ, ni etamɔɔɔ gbele, Hades (gbohiiaje) kɛ bu kwɔŋkwɔŋ lɛ yɛ mɛɛ gbɛ nɔ?

²⁸ Yɛ enɛ kɛ gbeekpamɔ naa lɛ, Biblia lɛ diɛŋtsɛ tsɔɔ la kɛ swɔɔ kpaakpo lɛ shishi: “Enɛ ji gbele ni ji enyɔ lɛ, la kpaakpo lɛ nɛ.” (Kpojiemɔ 20:14) Eka shi faŋŋ akɛ etamɔ Gehena ni Yesu wie he lɛ nɔŋŋ, he ko ni efɔŋfeelɔi hiɔ akɛ mɛi ni akpata amɛhiɛ kwraa yɛ, jeee ni aapiŋ amɛ yɛ jɛmɛ kɛmiiya naanɔ. (Mateo 10:28) Eji hiɛkpatamɔ kwraa ni gbohiiashitee he hiɛnɔkamɔ bɛ mli. No hewɔ lɛ, yɛ be mli ni gbele, Hades (gbohiiaje), kɛ bu kwɔŋkwɔŋ lɛ naa samfele yɔɔ lɛ, atsiii samfele ko ni akɛgbeleɔ la kɛ swɔɔ kpaakpo lɛ naa lɛ ta. (Kpojiemɔ 1:18; 20:1) Ejieŋ mɛi ni yɔɔ emli lɛ ehaŋ kɔkɔɔkɔ.—Okɛto Marko 9:43-47 he.

Apiŋɔ Amɛ Nyɔɔŋ kɛ Shwane Kɛyaa Naanɔ

29, 30. Mɛni Yohane kɛɔ yɛ Abonsam kɛ agbɛnɛ kooloo lɛ kɛ amale gbalɔ lɛ he, ni te esa akɛ anu enɛ shishi aha tɛŋŋ?

²⁹ Yɛ be mli ni ewieɔ Abonsam kɛ agbɛnɛ kooloo lɛ kɛ amale gbalɔ lɛ he lɛ, agbɛnɛ Yohane kɛɔ wɔ akɛ: “Ni aaapiŋ amɛ nyɔɔŋ kɛ shwane kɛaatee naanɔi anaanɔ.” (Kpojiemɔ 20:10b) Mɛni enɛ baanyɛ atsɔɔ? Taakɛ atsi ta momo lɛ, ejeee sanenaatsɔɔmɔ ni ja akɛ aaakɛɛ akɛ okadii, tamɔ kooloo lɛ kɛ amale gbalɔ lɛ, kɛ agbɛnɛ gbele kɛ Hades (gbohiiaje) baanyɛ ana nɔ tamɔ aapiŋ amɛ yɛ gbɛ diɛŋtsɛ ko nɔ. No hewɔ lɛ, wɔnyɛŋ wɔhe wɔye akɛ Satan baana nɔ kɛya naanɔi fɛɛ mli. Abaakpata ehiɛ kwraa moŋ.

³⁰ Hela wiemɔ ni akɛtsu nii yɛ biɛ aha “piŋmɔ,” ba·sa·niʹzo lɛ shishi diɛŋtsɛ ji “aka (dadei) kɛtsɔ shika-kaa-tɛ nɔ.” “Abi sane kɛtsɔ piŋmɔ nɔ” ji shishinumɔ ni ji enyɔ. (The New Thayer’s Greek-English Lexicon of the New Testament) Kɛ okwɛ emli sane lɛ mli lɛ, obaana akɛ Hela wiemɔ ni akɛtsu nii lɛ tsɔɔ akɛ nɔ ni baa Satan nɔ lɛ baafee nɔ ni baahi shi kɛya naanɔ, akɛ shika-kaa-tɛ yɛ sane ni kɔɔ ja ni Yehowa nɔyeli ja kɛ bɔ ni eji jalɛ nɔ ha lɛ he. No mli lɛ, akɛ sane ni kɔɔ jeŋ muu fɛɛ nɔyeli he lɛ eba naagbee shikome nyɔŋlo kɛha bei fɛɛ. Be ko baŋ ni aaaka shi ni aaate awo jeŋ muu fɛɛ maŋtsɛ ni Yehowa ji lɛ akwɛ ekoŋŋ yɛ be kpalaŋŋ ko mli bɔni afee ni ana amɛ akɛ amɛjaaa.—Okɛto Lala 92:2, 16 he.

31. Yɛ mɛɛ gbɛ nɔ Hela wiemɔi enyɔ ni kɔɔ “piŋmɔ” he lɛ shishinumɔ yeɔ ebuaa wɔ ni wɔnuɔ toigbalamɔ ni baa Satan Abonsam nɔ lɛ shishi?

³¹ Kɛfata he lɛ, akɛ wiemɔ ni kɔɔ enɛ he, ba·sa·ni·stesʹ, “piŋlɔ” lɛ, tsuɔ nii yɛ Biblia lɛ mli akɛtsɔɔ “gbokɛlɛfoi anɔkwɛlɔ.” (Mateo 18:34, Kingdom Interlinear) Yɛ enɛ kɛ gbeekpamɔ naa lɛ, akɛ Satan baawo gbokɛlɛfoi atsuŋ yɛ la kpaakpo lɛ mli kɛya naanɔ; ajieŋ lɛ kwraa. Yɛ naagbee lɛ, yɛ Hela Septuagint, ni Yohane le jogbaŋŋ lɛ mli lɛ, akɛ wiemɔ ni kɔɔ enɛ he ni ji baʹsa·nos tsuɔ nii yɛ mli akɛtoɔ hiɛgbele ni kɛ mɔ yaa gbele mli lɛ he. (Ezekiel 32:24, 30) Enɛ yeɔ ebuaa wɔ ni wɔnaa akɛ toigbalamɔ ni Satan tsɔɔ mli lɛ ji nɔ ni baa lɛ shi loo ewoɔ lɛ hiɛgbele, naanɔ gbele yɛ la kɛ swɔɔ kpaakpo lɛ mli. Enitsumɔi lɛ kɛ lɛ gboɔ.—1 Yohane 3:8.

32. Mɛɛ toigbalamɔ akɛbaaba daimonioi lɛ anɔ, ni te wɔfeɔ tɛŋŋ wɔleɔ enɛ?

³² Agbɛnɛ hu, atsiii daimonioi lɛ ata yɛ kuku nɛɛ mli. Ani abaaŋmɛɛ amɛ kɛ Satan he yɛ afii akpe lɛ naagbee ni amɛkɛ lɛ atsɔ toigbalamɔ ni ji naanɔ gbele lɛ mli? Odaseyeli lɛ haa hetoo akɛ hɛɛ. Ni yɛ gwantɛŋi kɛ abotiai lɛ ahe abɛbua lɛ mli lɛ, Yesu kɛɛ akɛ abotiai lɛ baaya “naanɔ la lɛ ni asaa ato Abonsam kɛ ebɔfoi lɛ mli.” (Mateo 25:41) Esa akɛ wiemɔ “naanɔ la” lɛ akɔ la kɛ swɔɔ kpaakpo lɛ ni abaashɛ Satan afɔ mli lɛ he. Ashɛrɛ Abonsam bɔfoi lɛ afata ehe kɛjɛ ŋwɛi ashwie. Eka shi faŋŋ akɛ amɛkɛ lɛ fɛɛ tee bu kwɔŋkwɔŋ lɛ mli yɛ Afii Akpe Nɔyeli lɛ shishijee mli. No hewɔ lɛ, abaakpata amɛkɛ lɛ hiɛ yɛ la kɛ swɔɔ kpaakpo lɛ mli.—Mateo 8:29.

33. Mɛɛ 1 Mose 3:15 lɛ mlitsɔɔmɔ ni ji naagbee nɔ baaba mli, ni mɛɛ sane Yehowa mumɔ lɛ gbalaa Yohane jwɛŋmɔ kɛyaa nɔ agbɛnɛ?

³³ Nɛkɛ gbɛ nɔ gbalɛ ni aŋma yɛ 1 Mose 3:15 lɛ naagbee mlitsɔɔmɔ lɛ baa mli yɛ. Kɛ ashɛ Satan afɔ la kpaakpo lɛ mli lɛ, ebaagbo tamɔ onufu ni akɛ dade nanetsitsi ekpɔtɔ eyitso. Ekɛ edaimonioi lɛ baaho kɛya naanɔ. Atsiii amɛ ta dɔŋŋ yɛ Kpojiemɔ wolo lɛ mli. Agbɛnɛ, akɛni etsɔ gbalɛ nɔ ejie mɛnɛɛmɛi kɛtee hewɔ lɛ, Yehowa mumɔ lɛ gbalaa jwɛŋmɔ kɛyaa sane ko ni he hiaa mɛi ni shweɔ shikpɔŋ nɔ hiɛnɔkamɔ lɛ nɔ: Mɛni baajɛ “maŋtsɛmɛi a-Maŋtsɛ” lɛ kɛ “mɛi ni atsɛ kɛ mɛi ni ahala kɛ mɛi ni heɔ yeɔ lɛ” a-ŋwɛi nɔyeli lɛ mli aba kɛha adesai? (Kpojiemɔ 17:14) Kɛha ehetoo lɛ, Yohane kuɔ sɛɛ ekɛwɔ baa Afii Akpe Nɔyeli lɛ shishijee lɛ nɔ ekoŋŋ.

[Shishigbɛ niŋmai]

[Mfoniri ni yɔɔ baafa 293]

Ŋshɔ ni Egbo lɛ. He ni Sodom kɛ Gomora baanyɛ ahi

[Mfonirii ni yɔɔ baafa 294]

“Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ”