Yitso 9
Mɛni Baa Wɔsuɔlɔi ni Egboi lɛ Anɔ?
1. Te gbɔmɛi nuɔ he amɛhaa tɛŋŋ beni suɔlɔ ko egbo lɛ?
“KƐ MƆ ko suɔlɔ gbo lɛ, mɔ lɛ naa nɔ̃ ejaakɛ gbele ji nii ni alaaje ni anaaa dɔŋŋ ni anuuu shishi kwraa.” Nakai ji bɔ ni binuu ko wie beni etsɛ gbo ni no sɛɛ etsɛɛɛ lɛ enyɛ gbo lɛ. Epiŋmɔ kɛ nii ni elaaje ni mli wa lɛ ha enu he akɛ “henumɔ eye enɔ kwraa.” Ekolɛ bo hu ona nɔ yɛ nakai gbɛ nɔ. Ekolɛ osusu he ni osuɔlɔi lɛ yɔɔ kɛ agbɛnɛ kɛji akɛ ooona amɛ ekoŋŋ lɛ he.
2. Mɛɛ sanebimɔi ni gbaa mɔ jwɛŋmɔ naa teɔ shi yɛ gbele he?
2 Akɛɛ fɔlɔi komɛi ni yeɔ awerɛho lɛ akɛ, “Nyɔŋmɔ halaa fɔfɔii ni yɔɔ fɛo fe fɛɛ lɛ kɛhaa lɛ diɛŋtsɛ ehe yɛ ŋwɛi.” Ani eji anɔkwale? Ani wɔsuɔlɔi ni egboi lɛ etee mumɔi ashihilɛ he lɛ? Ani no ji nɔ ni mɛi komɛi tsɛɔ lɛ Nirvana, ni atsɔɔ mli akɛ eji hejɔɔmɔ shihilɛ ko ni anuuu piŋmɔ kɛ taomɔ nii ko he kwraa lɛ? Ani mɛi ni wɔsumɔɔ amɛ lɛ etsɔ gbɛ ko ni kɛ mɔ yaa shihilɛ ni gbele bɛ mli yɛ paradeiso mli lɛ nɔ? Aloo taakɛ mɛi krokomɛi kɛɔ lɛ, ani gbele ji shigbeemɔ kɛmiibote piŋmɔ ni baaa naagbee mli kɛha mɛi ni etɔ̃ Nyɔŋmɔ nɔ lɛ? Ani gbohii lɛ baanyɛ ana wɔ shihilɛi anɔ hewalɛ? Kɛ wɔɔnyɛ wɔna sanebimɔi nɛɛ ahetoo ni ja lɛ, esa akɛ wɔbi Nyɔŋmɔ Wiemɔ, ni ji Biblia lɛ.
MƐNI JI “MUMƆ” NI YƆƆ GBƆMƐI AMLI LƐ?
3. Mɛɛ jwɛŋmɔ Socrates kɛ Plato yɔɔ yɛ gbohii lɛ ahe, ni te enɛ saa gbɔmɛi ni yɔɔ ŋmɛnɛ lɛ ahe ehaa tɛŋŋ?
3 Blema Hela jeŋ nilelɔi Socrates kɛ Plato tsɔɔ akɛ esa akɛ nɔ ko ni gbooo ahi nuu kɛ yoo mli—susuma ni hiɔ shi yɛ gbele sɛɛ ni egbooo kwraa diɛŋtsɛ. Gbɔmɛi akpekpei abɔ heɔ enɛ amɛyeɔ yɛ shikpɔŋ muu lɛ fɛɛ nɔ ŋmɛnɛ. Hemɔkɛyeli ni tamɔ nɛkɛ teeɔ gbeyei ni asheɔ gbohii lɛ ashi taakɛ ebaa yɛ amɛhilɛ-kɛhamɔ mli lɛ. Biblia lɛ tsɔɔ wɔ nɔ ko ni yɔɔ sɔrɔto kwraa yɛ gbohii lɛ ahe.
4. (a) Mɛni 1 Mose kɛɔ wɔ yɛ susuma lɛ he? (b) Mɛni Nyɔŋmɔ kɛwo Adam mli koni eha eba wala mli?
4 Yɛ be mli ni wɔsusuɔ shihilɛ mli ni gbohii lɛ yɔɔ lɛ he lɛ, esa akɛ wɔkai akɛ wɔ shishijee tsɛ Adam, bɛ susuma. Eji susuma. Nyɔŋmɔ tsɔ enaakpɛɛ nibɔɔ nɔ, ebɔ gbɔmɔ—susuma lɛ—kɛjɛ shikpɔŋ nɔ sũ mli nibii amli ni emu “wala mumɔ” ewo emli. 1 Mose 2:7 kɛɔ wɔ akɛ: “Ni Yehowa Nyɔŋmɔ kɛ shikpɔŋ sũ shɔ̃ gbɔmɔ ni emu wala mumɔ ewo egugɔ mli, ni gbɔmɔ tsɔ wala susuma.” Adam wala yaa nɔ kɛtsɔɔ mumɔ lɛ nɔ. Ni kɛlɛ, efe kɔɔyɔɔ kɛkɛ ni amuɔ awoɔ gbɔmɔ flufla mli beni Nyɔŋmɔ kɛ wala mumɔ lɛ wo Adam mli lɛ. Biblia lɛ wieɔ “wala hewalɛ” ni miitsu nii yɛ shikpɔŋ nɔ bɔɔ nii amli lɛ he.—1 Mose 7:22, NW.
5, 6. (a) Mɛni ji “wala mumɔ [hewalɛ]” lɛ? (b) Mɛni baa beni “mumɔ” ni atsi etã yɛ Lala 146:4 lɛ ekpa gbɔmɔtso lɛ kanyamɔ lɛ?
5 Mɛni ji “wala mumɔ” nɛɛ? No ji wala kanyamɔ ni he hiaa ni Nyɔŋmɔ kɛwo Adam gbɔmɔtso ni wala bɛ mli lɛ mli lɛ. Ni nɛkɛ hewalɛ nɛɛ hiɔ shi kɛtsɔɔ kɔɔyɔɔ mumɔ ni yaa nɔ lɛ nɔ. Shi mɛni ji “mumɔ” ni Lala 146:4 wieɔ he lɛ? Nakai kuku lɛ wieɔ mɔ ni gboɔ lɛ he akɛ: “Kɛ emumɔ je emli lɛ, ekuɔ esɛɛ kɛyaa esũ lɛ mli ekoŋŋ; nakai gbi lɛ nɔŋŋ eyiŋtoi lɛ laajeɔ.” Beni Biblia ŋmalɔi lɛ kɛ wiemɔ “mumɔ” tsu nii yɛ nɛkɛ gbɛ nɔ lɛ, no mli lɛ susuma ko ni eshi gbɔmɔtso lɛ ni yaa nɔ ehiɔ shi yɛ gbɔmɔtso lɛ gbele sɛɛ bɛ amɛjwɛŋmɔ mli.
6 “Mumɔ” ni shiɔ adesai amli yɛ gbele mli lɛ ji wala hewalɛ ni jɛ wɔ Bɔlɔ lɛ ŋɔɔ lɛ. (Lala 36:10; Bɔfoi lɛ Asaji 17:28) Nɛkɛ hewalɛ nɛɛ bɛ sui ni bɔɔ nɔ ni ehaa ehiɔ wala mli lɛ yɔɔ lɛ eko, taakɛ bɔ ni ehe ehiaaa ni sarawa hewalɛ ana dɛŋdadei loo nibii ni ewoɔ mli hewalɛ lɛ eko lɛ. Kɛ mɔ ko gbo lɛ, mumɔ (wala hewalɛ) lɛ kanyaaa gbɔmɔtso lɛ wala yibii lɛ dɔŋŋ, taakɛ bɔ ni kane gboɔ beni agbe sarawa hewalɛ lɛ. Kɛ wala hewalɛ lɛ kpa adesa gbɔmɔtso lɛ wajemɔ lɛ—susuma lɛ—gboɔ.—Lala 104:29; Jajelɔ 12:1, 7.
“SU MLI OOOKU OSƐƐ KƐAATEE!”
7. Mɛni baaba Adam nɔ kɛ ebooo Nyɔŋmɔ toi?
7 Yehowa tsɔɔ nɔ ni gbele baaji aha eshafeelɔ Adam lɛ mli faŋŋ eha lɛ. Nyɔŋmɔ kɛɛ: “Ohiɛ latsaa mli oooye nii yɛ, kɛyashi beyinɔ ni oooku osɛɛ kɛaatee shikpɔŋ sũ mli, ejaakɛ emli ajieo kɛjɛ. Ejaakɛ sũ jio, ni sũ mli oooku osɛɛ kɛaatee!” (1 Mose 3:19) Adam baaku esɛɛ kɛaaya nɛgbɛ? Kɛya shikpɔŋ, sũ ni ajie lɛ kɛjɛ mli lɛ. Yɛ gbele mli lɛ, Adam kpaa shihilɛ!
8. Akɛ susumai lɛ, mɛɛ gbɛ nɔ gbɔmɛi anɔ kwɔɔɔ fe kooloi yɛ?
8 Yɛ enɛ hewɔ lɛ, esorooo adesa gbele yɛ kooloi anɔ he. Susumai ji amɛ hu, ni mumɔ loo wala hewalɛ kome too lɛ nɔŋŋ kanyaa amɛ. (1 Mose 1:24) Nilelɔ Salomo kɛɔ wɔ yɛ Jajelɔ 3:19, 20 akɛ: “Bɔ ni mɔ nɛ gboɔ lɛ, nakai mɔ nɛ hu gboɔ, ni mumɔ kome lɛ nɔŋŋ amɛ fɛɛ amɛmuɔ, ni gbɔmɔ ehiii fe kooloo [yɛ gbele mli]; . . . amɛ fɛɛ amɛjɛ sũ mli, ni amɛ fɛɛ amɛtsɔɔ sũ ekoŋŋ.” Gbɔmɔ nɔ kwɔ fe kooloi lɛ kɛ shishinumɔ akɛ abɔ lɛ yɛ Nyɔŋmɔ subaŋ nɔ, ni ejieɔ Yehowa sui lɛ akpo etsɔɔ. (1 Mose 1:26, 27) Ni kɛlɛ, yɛ gbele mli lɛ, gbɔmɛi kɛ kooloi fɛɛ kuɔ amɛsɛɛ kɛyaa sũ mli.
9. Mɛɛ shihilɛ mli gbohii lɛ yɔɔ, ni nɛgbɛ amɛyaa?
9 Salomo tee nɔ etsɔɔ nɔ ni gbele ji lɛ mli lolo akɛ: “Shi hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko.” Hɛɛ, gbohii lɛ leee nɔ ko nɔ ko kwraa. Yɛ enɛ hewɔ lɛ, Salomo wo hewalɛ akɛ: “Nɔ fɛɛ nɔ tsumɔ ni onine aaashɛ nɔ lɛ, okɛ ohewalɛ atsu; ejaakɛ nitsumɔ loo yiŋshwiemɔ loo nilee loo ŋaa ko bɛ gbohiiaje [Sheol] he ni oyaa lɛ.” (Jajelɔ 9:5, 10) Nɛgbɛ gbohii lɛ yaa? Amɛyaa gbohiiaje (Hebri, sheʼohlʹ), adesai akwamaŋ gbonyobu lɛ. Wɔsuɔlɔi ni egboi lɛ leee nɔ ko nɔ ko kwraa. Amɛbɛ piŋmɔ mli, ni amɛnyɛŋ amɛna wɔnɔ hewalɛ yɛ gbɛ ko nɔ.
10. Mɛni hewɔ wɔbaanyɛ wɔkɛɛ akɛ esaaa akɛ gbele gbeɔ nɔ fɛɛ nɔ naa lɛ?
10 Ani esa akɛ wɔ fɛɛ kɛ wɔsuɔlɔi lɛ ahi shi afii fioo pɛ ni agbɛnɛ wɔkpa shihilɛ kwraa? Jeee nakai Biblia lɛ tsɔɔ. Yɛ Adam atuatsemɔ lɛ mli lɛ, Yehowa Nyɔŋmɔ to gbɛjianɔ amrɔ nɔŋŋ koni etsake nii ni yɔɔ gbeyei ni gbɔmɔ esha lɛ kɛba lɛ. Gbele jeee Nyɔŋmɔ yiŋtoo kɛha adesai lɛ fã. (Ezekiel 33:11; 2 Petro 3:9) No hewɔ lɛ, esaaa akɛ gbele feɔ naagbee nii kɛhaa wɔ kɛ wɔsuɔlɔi lɛ.
“EWƆ”
11. Te Yesu tsɔɔ shihilɛ mli ni eshieŋtsɛ Lazaro yɔɔ lɛ mli eha tɛŋŋ?
11 Yehowa yiŋtoo ji ni ejie wɔ kɛ wɔsuɔlɔi ni egboi lɛ kɛjɛ Adam gbele lɛ mli. No hewɔ lɛ, Nyɔŋmɔ Wiemɔ lɛ wieɔ gbohii lɛ ahe akɛ amɛwɔ. Akɛ nɔkwɛmɔ nɔ lɛ, beni enu akɛ eshieŋtsɛ Lazaro egbo lɛ, Yesu Kristo kɛɛ E-kaselɔi lɛ akɛ: “Wɔshieŋtsɛ Lazaro ewɔ; shi miiya ni mayatsiɛ lɛ yɛ wɔ lɛ mli.” Akɛni kaselɔi lɛ nuuu wiemɔ nɛɛ shishi amrɔ nɔŋŋ hewɔ lɛ, Yesu kɛɛ yɛ faŋŋ mli akɛ: “Lazaro egbo.” (Yohane 11:11, 14) Yesu tee Betania maŋ lɛ mli, he ni Lazaro nyɛmimɛi yei Marta kɛ Maria miifo amɛ nyɛmi nuu lɛ gbele lɛ yɛ lɛ. Beni Yesu kɛɛ Marta akɛ, “Onyɛmi nuu lɛ baate shi” lɛ, etsɔɔ ehemɔkɛyeli yɛ Nyɔŋmɔ yiŋtoo ni ekɛaatsake nɔ ni gbele kɛba adesa weku lɛ nɔ lɛ mli. Ekɛɛ: “Mile akɛ ebaate shi, yɛ gbohiiashitee lɛ mli, yɛ naagbee gbi lɛ nɔ.”—Yohane 11:23, 24.
12. Mɛɛ hiɛnɔkamɔ Marta ni agbo ashi lɛ lɛ yɔɔ yɛ gbohii lɛ ahe?
12 Marta etsɔɔɔ susumɔ ko ni tsɔɔ susuma ni gbooo ni hiɔ shi yɛ he kroko yɛ gbele sɛɛ. Eheee eyeee akɛ Lazaro etee mumɔi ashihilɛ he ko momo koni eyatsa shihilɛ nɔ yɛ jɛmɛ. Marta yɛ hemɔkɛyeli yɛ gbohiiashitee he hiɛnɔkamɔ ni yɔɔ nyam lɛ mli. Enu shishi akɛ, jeee akɛ susuma ni gbooo eshi Lazaro gbɔmɔtso lɛ, shi moŋ enyɛmi nuu ni egbo lɛ ekpa shihilɛ. Nɔ ni akɛbaasaa enɛ ji enyɛmi nuu lɛ shitee kɛmiijɛ gbohii ateŋ.
13. Mɛɛ hewalɛ ni Nyɔŋmɔ kɛhaa Yesu yɔɔ, ni efee hewalɛ nɛɛ he nɔkwɛmɔ nɔ yɛ mɛɛ gbɛ nɔ?
13 Yesu Kristo ji mɔ ni Yehowa Nyɔŋmɔ eha lɛ hewalɛ koni ekpɔ̃ adesai. (Hoshea 13:14) No hewɔ lɛ, yɛ Marta wiemɔ lɛ naa lɛ, Yesu kɛɛ: “Mi lɛ, miji shitee lɛ kɛ wala lɛ; mɔ ni heɔ minɔ eyeɔ lɛ, kɛji egbo tete lɛ, ehiɛ aaaka.” (Yohane 11:25) Yesu jie hewalɛ ni Nyɔŋmɔ kɛha lɛ lɛ kpo yɛ enɛ gbɛfaŋ beni etee Lazaro, mɔ ni egbo aaafee gbii ejwɛ lɛ gbonyobu lɛ naa, ni ekɛ lɛ ba wala mli ekoŋŋ lɛ. (Yohane 11:38-44) Susumɔ miishɛɛ ni mɛi ni na shitee nɛɛ loo ekrokomɛi ni Yesu Kristo fee lɛ baana lɛ he okwɛ!—Marko 5:35-42; Luka 7:12-16.
14. Mɛni hewɔ gbohiiashitee lɛ kɛ jwɛŋmɔ ni ahiɛ ni ji susuma ni gbooo lɛ kpãaa kwraa lɛ?
14 Mɛɛ fioo ni osusu enɛ he: Kɛ susuma ni gbooo hiɔ shi yɛ gbele sɛɛ lɛ, belɛ ehe ebahiaŋ ni atee mɔ ko shi, loo akɛ mɔ ko aba wala mli. Yɛ anɔkwale mli lɛ, efeŋ mlihilɛ akɛ aaatee mɔ ko ni tamɔ Lazaro shi kɛba shikpɔŋ nɔ wala ni yeee emuu lɛ mli kɛji akɛ efo mli momo kɛtee ŋwɛi nyɔmɔwoo ni yɔɔ naakpɛɛ ko mli. Yɛ anɔkwale mli lɛ, Biblia lɛ kɛ wiemɔ “susuma ni gbooo” ko tsuuu nii. Yɛ no najiaŋ lɛ, Ŋmalɛi lɛ kɛɔ akɛ adesa susuma ni feɔ esha lɛ gboɔ. (Ezekiel 18:4, 20) No hewɔ lɛ Biblia lɛ tsɔɔ gbohiiashitee he gbɛjianɔtoo lɛ akɛ tsabaa diɛŋtsɛ kɛha gbele.
“MƐI FƐƐ NI YƆƆ GBOHIIABUI LƐ AMLI”
15. (a) Mɛni wiemɔ “gbohiiashitee” lɛ tsɔɔ? (b) Mɛni hewɔ aŋkroaŋkroi ni aaatee amɛ shi lɛ efeŋ naagba kɛhaŋ Yehowa Nyɔŋmɔ lɛ?
15 Wiemɔ ni Yesu kaselɔi lɛ kɛtsu nii kɛha “gbohiiashitee” lɛ shishi diɛŋtsɛ ji “aate shi” loo “aate shi adamɔ shi.” Enɛ tsɔɔ akɛ aate shi kɛmiidamɔ shi kɛmiijɛ gbele shihilɛ ni wala bɛ mli lɛ mli—taakɛ eji lɛ, aate shi kɛmiijɛ adesai akwamaŋ gbonyobu lɛ mli. Yehowa Nyɔŋmɔ baanyɛ atee mɔ ko shi yɛ gbɛ ni waaa kwraa nɔ. Mɛni hewɔ? Ejaakɛ Yehowa ji wala Shishijelɔ. Ŋmɛnɛ, gbɔmɛi baanyɛ amɔmɔ hii kɛ yei agbeei kɛ amɛ mfonirii amɛwo video kpaa nɔ, ni amɛbaanyɛ amɛku sɛɛ amɛtswa nɔ ni amɛmɔmɔ amɛwo kpaa nɔ nɛɛ beni aŋkroaŋkroi nɛɛ egboi sɛɛ. Yɛ anɔkwale mli lɛ, belɛ wɔ Bɔlɔ ofe lɛ baanyɛ akai aŋkroaŋkroi ahe saji fɛɛ ni etee nakai mɔ lɛ nɔŋŋ shi, ni eha lɛ gbɔmɔtso hee ni afee.
16. (a) Mɛɛ shiwoo Yesu kɛha yɛ mɛi fɛɛ ni yɔɔ [kaimɔ] gbohiiabui amli lɛ ahe? (b) Mɛni baatsɔɔ nɔ ni baajɛ mɔ ko shitee lɛ mli aba?
16 Yesu Kristo kɛɛ: “Ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ gbohiiabui lɛ amli lɛ aaanu [Yesu] egbee, ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.” (Yohane 5:28, 29) Abaatee mɛi fɛɛ ni yɔɔ Yehowa kaimɔ mli lɛ ashi ni atsɔɔ amɛ egbɛ̀i lɛ. Mɛi ni tsuɔ nii yɛ Nyɔŋmɔ he nilee lɛ kɛ gbeekpamɔ naa lɛ baafee mɛi ni ateeɔ amɛ shi kɛbaa wala mli. Shi, ebaafee shitee kɛmiiya fɔbuu kojomɔ mli aha mɛi ni kpoɔ Nyɔŋmɔ tsɔɔmɔi kɛ enɔyeli lɛ.
17. Namɛi abaatee amɛ shi lɛ?
17 Eyɛ faŋŋ akɛ, abaatee mɛi ni amɛdi jalɛ gbɛi asɛɛ akɛ Yehowa tsuji lɛ ashi. Yɛ anɔkwale mli lɛ, gbohiiashitee hiɛnɔkamɔ lɛ waje mɛi pii ni amɛnyɛ amɛdamɔ gbele naa, yɛ yiwaa kɛ awuiyeli po naa. Amɛle akɛ Nyɔŋmɔ baanyɛ ekɛ amɛ aba wala mli ekoŋŋ. (Mateo 10:28) Shi gbɔmɛi akpekpei abɔ egboi ni amɛtsɔɔɔ kɛji akɛ amɛbaabo Nyɔŋmɔ jalɛ taomɔ nii atoi. Abaatee amɛ hu shi. Akɛni eyɔɔ hekɛnɔfɔɔ yɛ Nyɔŋmɔ yiŋtoo mli yɛ enɛ gbɛfaŋ hewɔ lɛ Paulo kɛɛ: “Ni miyɛ Nyɔŋmɔ nɔ hiɛnɔkamɔ akɛ gbohiiashitee baaba, ni jalɔi kɛ mɛi ni ejaaa fɛɛ baate shi.”—Bɔfoi lɛ Asaji 24:15.
18. (a) Mɛɛ ninaa bɔfo Yohane nine shɛ nɔ ni kɔɔ gbohiiashitee lɛ he? (b) Mɛni akpataa hiɛ yɛ “la kpaakpo” lɛ mli lɛ, ni mɛni ji nɔ ni nɛkɛ “kpaakpo” nɛɛ feɔ he mfoniri?
18 Bɔfo Yohane nine shɛ ninaa ko ni yɔɔ miishɛɛ ni kɔɔ mɛi ni atee amɛ shi ni damɔɔ Nyɔŋmɔ maŋtsɛsɛi lɛ hiɛ lɛ ahe lɛ nɔ. Yohane ŋma akɛ: “Ni ŋshɔ jie gbohii ni yɔɔ emli lɛ eha, ni gbele kɛ gbohiiaje [Hades] jie gbohii ni yɔɔ amɛmli lɛ amɛha; ni akojo amɛ, mɔ fɛɛ mɔ bɔ ni sa enitsumɔi lɛ. Ni gbele kɛ gbohiiaje [Hades] lɛ, ashɛrɛ amɛ ashwie la kpaakpo lɛ mli. Enɛ ji gbele ni ji enyɔ lɛ, la kpaakpo lɛ nɛ.” (Kpojiemɔ 20:12-14) Susumɔ he okwɛ! Gbohii fɛɛ ni yɔɔ Nyɔŋmɔ kaimɔ mli lɛ yɛ gbɛkpamɔ akɛ abaakpɔ̃ amɛ kɛjɛ gbohiiaje (Hela, haiʹdes), loo Sheol, adesai akwamaŋ gbonyobu lɛ mli. (Lala 16:10; Bɔfoi lɛ Asaji 2:31) Amɛbaana hegbɛ ni amɛtsɔ amɛnifeemɔi anɔ amɛtsɔɔ akɛ ani amɛbaasɔmɔ Nyɔŋmɔ lo. Kɛkɛ lɛ “gbele kɛ gbohiiaje” lɛ abaashɛrɛ amɛ awo nɔ ni atsɛɔ lɛ “la kpaakpo,” ni damɔ shi kɛha hiɛkpatamɔ kwraa lɛ mli, taakɛ wiemɔ “Gehena” tsɔɔ lɛ. (Luka 12:5) Abaaha adesai akwamaŋ gbonyobu lɛ mli nibii fɛɛ atã ni ebaakpa shihilɛ beni agbe gbohiiashitee lɛ naa lɛ. Kwɛ miishɛɛ ni eji akɛ aaakase kɛjɛ Biblia lɛ mli akɛ Nyɔŋmɔ efeee mɔ ko mɔ ko niseniianii!—Yeremia 7:30, 31.
GBOHIIASHITEE KƐMIIYA NƐGBƐ?
19. Mɛni hewɔ abaatee adesai komɛi ashi kɛya ŋwɛi lɛ, ni mɛɛ gbɔmɔtsei Nyɔŋmɔ kɛbaaha amɛ?
19 Abaatee hii kɛ yei fioo ko shi kɛya wala mli yɛ ŋwɛi. Akɛ maŋtsɛmɛi kɛ osɔfoi kɛ Yesu lɛ, amɛbaana gbɛfaŋnɔ yɛ nɔ ni ejɛ gbele ni adesai anine shɛ nɔ kɛjɛ klɛŋklɛŋ nuu Adam ŋɔɔ lɛ mli kɛba lɛ saamɔ mli. (Romabii 5:12; Kpojiemɔ 5:9, 10) Mɛi enyiɛ Nyɔŋmɔ kɛ amɛ baaya ŋwɛi ni amɛkɛ Kristo ayaye maŋtsɛ? Taakɛ Biblia lɛ tsɔɔ lɛ, mɛi 144,000 pɛ. (Kpojiemɔ 7:4; 14:1) Yehowa baaha mɛi ni atee amɛ shi nɛɛ ateŋ mɔ fɛɛ mɔ mumɔŋ gbɔmɔtso koni amɛnyɛ amɛhi ŋwɛi.—1 Korintobii 15:35, 38, 42-45; 1 Petro 3:18.
20. Mɛni adesai toibolɔi anine baashɛ nɔ, ni mɛi ni abaatee amɛ shi lɛ fata he?
20 Shi abaatee mɛi ni egboi lɛ ateŋ mɛi ni fa lɛ ashi kɛba shikpɔŋ nɔ paradeiso mli. (Lala 37:11, 29; Mateo 6:10) Yiŋtoo hewɔ ni ateeɔ amɛ shi kɛbaa ŋwɛi lɛ fã ji ni akɛgbe Nyɔŋmɔ yiŋtoo kɛha shikpɔŋ lɛ naa. Yesu Kristo kɛ 144,000 ni yɔɔ ŋwɛi lɛ baahole adesai toibolɔi lɛ anɔ fiofio kɛba emuuyeli ni wɔ shishijee fɔlɔi lɛ shɛrɛ shwie lɛ mli ekoŋŋ. Nɔ ni baafata enɛ he ji mɛi ni abaatee amɛ shi, taakɛ Yesu tsɔɔ beni ekɛɛ nuu ni gboɔ ni asɛŋ lɛ yɛ emasɛi lɛ akɛ: “Obaafata mihe yɛ Paradeiso” lɛ.—Luka 23:42, 43, NW.
21. Taakɛ gbalɔ Yesaia kɛ bɔfo Yohane tsɔɔ lɛ, mɛni baaba gbele nɔ?
21 Abaajie gbele ni kɛ yakayaka shihilɛ baa ŋmɛnɛ lɛ kɛjɛ Paradeiso shikpɔŋ lɛ nɔ. (Romabii 8:19-21) Gbalɔ Yesaia jaje akɛ Yehowa Nyɔŋmɔ “baami gbele kɛaatee naanɔ.” (Yesaia 25:8) Akɛ be mli ni adesai toibolɔi baana heyeli kɛjɛ piŋmɔ kɛ gbele dɛŋ lɛ he ninaa ha bɔfo Yohane. Hɛɛ, “Nyɔŋmɔ diɛŋtsɛ kɛ amɛ baahi shi. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:1-4.
22. Te gbohiiashitee lɛ he nilee saa ohe ehaa tɛŋŋ?
22 Biblia mli tsɔɔmɔi ni yɔɔ faŋŋ lɛ jieɔ yiŋfutumɔ ni kɔɔ nɔ ni baaba gbohii lɛ anɔ lɛ kɛyaa. Ŋmalɛi lɛ kɛɔ yɛ faŋŋ mli akɛ gbele ji “naagbee henyɛlɔ” ni abaakpata hiɛ. (1 Korintobii 15:26) Mɛɛ hewalɛ kɛ miishɛjemɔ wɔbaanyɛ wɔna kɛjɛ gbohiiashitee hiɛnɔkamɔ lɛ he nilee mli nɛkɛ! Ni kwɛ miishɛɛ ni wɔbaanyɛ wɔna akɛ abaatee wɔsuɔlɔi ni amɛgboi ni yɔɔ Nyɔŋmɔ kaimɔ mli lɛ ashi kɛjɛ gbele wɔ lɛ mli koni amɛbana nibii kpakpai fɛɛ ni esaa eto eha mɛi ni sumɔɔ lɛ lɛ mli ŋɔɔmɔ! (Lala 145:16) Jɔɔmɔi ni tamɔ nɛkɛ baaba kɛtsɔ Nyɔŋmɔ Maŋtsɛyeli lɛ nɔ. Shi mɛɛ be enɔyeli lɛ baaje shishi? Nyɛhaa wɔkwɛa.
KAA ONILEE OKWƐ
Mɛni ji mumɔ ni yɔɔ adesai amli lɛ?
Te obaatsɔɔ shihilɛ ni gbohii lɛ yɔɔ mli lɛ mli oha tɛŋŋ?
Namɛi abaatee amɛ shi lɛ?
[Mfoniri ni yɔɔ baafa 85]
Taakɛ bɔ ni Yesu tsɛ Lazaro kɛjɛ gbonyobu mli lɛ, nakai abaatee akpekpei abɔ shi
[Mfoniri ni yɔɔ baafa 86]
Miishɛɛ baahi shi beni ‘Nyɔŋmɔ miɔ gbele kɛyaa naanɔ lɛ’