Ani Oyɛ ‘Su ni Akɛmɛɔ’?
“Mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? Mɛi ni kwɛɔ gbɛ ni amɛshweɔ [Yehowa] Nyɔŋmɔ gbi lɛ baa lɛ.”—2 PETRO 3:11, 12.
1, 2. Te wɔɔfee tɛŋŋ wɔfee ‘su ni akɛmɛɔ’ yɛ Yehowa gbi lɛ he lɛ he nɔkwɛmɔnɔ?
FEEMƆ weku ko ni miikpa gbɛ ni gbɔi kɛ amɛ abaye nii gbɛkɛ ko lɛ he mfoniri yɛ ojwɛŋmɔ mli. Be ni ato ni amɛbaaba lɛ miibɛŋkɛ oyayaayai. Ŋa lɛ bɛ dekã kwraa kɛ naagbee nibii ni kɔɔ niyenii lɛ he lɛ he nitsumɔ. Ewu lɛ kɛ amɛbii lɛ miiye kɛmiibua koni amɛkwɛ akɛ ato nɔ fɛɛ nɔ he gbɛjianɔ jogbaŋŋ lo. Mɔ fɛɛ mɔ ená miishɛɛ. Hɛɛ, weku muu lɛ fɛɛ kɛ hehiamɔ miikpa gbɛ ni amɛgbɔi lɛ abashɛ shi, ni amɛmiikpa niyenii ni ŋɔɔ yeli kɛ naanyobɔɔ kpakpa gbɛ.
2 Ákɛ Kristofoi lɛ, wɔmiimɛ nɔ ko ni he hiaa babaoo po. Mɛni wɔmɛɔ? Wɔ fɛɛ wɔmiimɛ ‘Yehowa gbi lɛ’! Dani eeeba lɛ, ehe miihia ni wɔtamɔ gbalɔ Mika ni kɛɛ akɛ: “Shi mi lɛ, makwɛ Yehowa gbɛ, mamɛ miyiwalaheremɔ Nyɔŋmɔ lɛ!” (Mika 7:7) Ani enɛ tsɔɔ nii ni atsuuu dɔŋŋ? Dabi. Nitsumɔ babaoo yɛ ni abaatsu.
3. Taakɛ 2 Petro 3:11, 12 tsɔɔ lɛ, mɛɛ su esa akɛ Kristofoi aná?
3 Bɔfo Petro yeɔ ebuaa wɔ koni wɔná su ni ja yɛ be mli ni wɔmɛɔ lɛ. Ekɛɔ akɛ: “Mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? Mɛi ni kwɛɔ gbɛ ni amɛshweɔ [Yehowa] gbi lɛ baa lɛ”! (2 Petro 3:11, 12) Kadimɔ akɛ enɛ ji wiemɔ ni akɛ nɔmimaa wie. Jeee sane Petro biɔ lɛ. Etsɔɔ nɔ gbɔmɛi ni esa akɛ Kristofoi atsɔmɔ yɛ ewoji enyɔ ni mumɔ tsirɛ eŋmaa lɛ mli. Ewo amɛ ŋaa hu ni amɛya nɔ amɛhiɛ “jeŋbai krɔŋkrɔŋi kɛ Nyɔŋmɔ jamɔi amli.” Eyɛ mli akɛ aaafee afii 30 eho kɛjɛ be mli ni Yesu Kristo kɛ okadi ni kɔɔ “nibii agbɛjianɔtoo lɛ naagbee lɛ” he lɛ ha moŋ, shi kɛlɛ esaaa akɛ Kristofoi ahiɛ jeɔ amɛhe nɔ. (Mateo 24:3, NW) Esa akɛ amɛya nɔ ‘amɛmɛ, ni amɛha’ Yehowa gbi lɛ baa lɛ ‘ahi amɛjwɛŋmɔ mli.’
4. Mɛni ‘ba ni Yehowa gbi lɛ baa lɛ ni aaaha ehi jwɛŋmɔ mli waa diɛŋtsɛ’ lɛ kɔɔ he?
4 Hela wiemɔ ni atsɔɔ shishi yɛ biɛ akɛ ‘aha ahi jwɛŋmɔ mli’ lɛ shishi diɛŋtsɛ ji “eeba kɛ foi.” Kɛlɛ, wɔnyɛŋ ‘wɔwo’ Yehowa gbi lɛ ‘foi’ diɛŋtsɛ. Yɛ sane nɛɛ mli lɛ, ‘wɔleee nɔ̃ gbi loo ŋmɛlɛtswaa nɔ’ ni Yesu Kristo baaba ni ekɛ kojomɔ aba e-Tsɛ lɛ henyɛlɔi lɛ anɔ. (Mateo 24:36; 25:13) Wolo ko ni akɛtaoɔ saji amli lɛ tsɔɔ mli akɛ, shishijee feemɔ wiemɔ kɛha wiemɔ ni ji “eeba kɛ foi” ni yɔɔ biɛ lɛ shishi ji “‘aye he oyai,’ ni yɛ enɛ hewɔ lɛ nɔ ni ekɔɔ he waa diɛŋtsɛ ji ‘afee ekãa, atsu nii, asusu nɔ ko he.’” No hewɔ lɛ, Petro miiwo nanemɛi heyelilɔi lɛ hewalɛ koni ‘amɛshwe’ Yehowa gbi lɛ baa lɛ ‘waa.’ Amɛbaanyɛ amɛfee enɛ kɛtsɔ ha ni amɛaaha ehi amɛjwɛŋmɔ mli be fɛɛ be lɛ nɔ. (2 Petro 3:12) Akɛni “Yehowa gbi wulu ní he yɔɔ gbeyei lɛ” ebɛŋkɛ kpaakpa hewɔ lɛ, esa akɛ wɔná jwɛŋmɔ ni tamɔ nakai nɔŋŋ.—Yoel 3:4.
Mɛ ni Amɛɔ Kɛ “Jeŋbai Krɔŋkrɔŋi”
5. Te wɔɔfee tɛŋŋ wɔtsɔɔ akɛ ‘wɔmiishwe waa’ ni wɔna ‘Yehowa gbi lɛ’?
5 Kɛji akɛ ‘wɔmiishwe waa’ ni wɔje Yehowa gbi lɛ mli shweshweeshwe lɛ, wɔbaaha enɛ aje kpo kɛtsɔ ‘wɔjeŋbai krɔŋkrɔŋi kɛ Nyɔŋmɔ jamɔi amli nifeemɔi’ anɔ. Wiemɔ ni ji “jeŋbai krɔŋkrɔŋi” lɛ baanyɛ akai wɔ Petro ŋaawoo nɛɛ, akɛ: “Nyɛfea nyɛhe tamɔ bii toibolɔi, ní nyɛkaba nyɛjeŋ yɛ sá beni nyɛleee nɔ ko lɛ mli akɔnɔi lɛ anaa dɔŋŋ; shi moŋ, bɔ ni mɔ ni tsɛ́ nyɛ lɛ yɔɔ krɔŋkrɔŋ lɛ, nyɛ hu nyɛfea krɔŋkrɔŋ yɛ nyɛjeŋba fɛɛ mli; ejaakɛ aŋma akɛ: ‘Nyɛfea krɔŋkrɔŋ, ejaakɛ krɔŋkrɔŋ ji mi.’”—1 Petro 1:14-16.
6. Bɔni afee ni wɔfee mɛi krɔŋkrɔŋi lɛ, mɛni esa akɛ wɔfee?
6 Bɔni afee ni wɔfee mɛi krɔŋkrɔŋi lɛ, esa akɛ wɔhiɛ gbɔmɔtsoŋ, jwɛŋmɔŋ, jeŋba, kɛ mumɔŋ hetsemɔ mli. Ani wɔmiisaa wɔhe kɛha ‘Yehowa gbi lɛ’ kɛtsɔ krɔŋkrɔŋ ni wɔɔhiɛ wɔhe akɛ aŋkroaŋkroi ni Yehowa gbɛi kã amɛnɔ lɛ nɔ? Ebɛ mlɛo akɛ wɔɔhiɛ krɔŋŋfeemɔ ni tamɔ nɛkɛ mli ŋmɛnɛ, ejaakɛ je lɛ jeŋba he tɛi ni afolɔ ashwie shi lɛ miifite kɛmiiya hiɛ. (1 Korintobii 7:31; 2 Timoteo 3:13) Ani wɔmiina akɛ gbɛ ni kã wɔjeŋba he tɛi ni afolɔ ashwie shi lɛ kɛ je lɛ nɔ̃ lɛ teŋ lɛ miilɛɛ? Kɛ́ jeee nakai lɛ, belɛ wɔyɛ nɔ ko ni esa akɛ wɔjwɛŋ he waa. Ani eeenyɛ efee akɛ ekolɛ tɛi ni wɔ diɛŋtsɛ wɔhiɔ shi yɛ naa lɛ anɔ kwɔlɔ fe je lɛ nɔ̃ lɛ moŋ, shi eefite? Kɛji nakai ni lɛ, no lɛ ehe miihia ni wɔfee he nɔ ko waa koni wɔkɛjaje saji koni wɔsa Nyɔŋmɔ hiɛ.
7, 8. (a) Mɛni baanyɛ aha wɔhiɛ aje bɔ ni “jeŋbai krɔŋkrɔŋi” ni wɔkɛ wɔhe aaawo mli lɛ he hiaa ha lɛ nɔ? (b) Mɛɛ nifeemɔi eeebi koni akɛjaje nii?
7 Akɛni bɔlɛnamɔ he mfonirii ebɔi Internet lɛ nɔ baa, ni akwɛɔ enɛ yɛ teemɔŋ hewɔ lɛ, mɛi ni be ko lɛ amɛnine shɛɛɛ jeŋba shara he nibii nɛɛ anɔ, taakɛ datrɛfonyo ko kɛɛ lɛ, miiná “bɔlɛnamɔ mli hegbɛi babaoo ni bɛ naagbee.” Kɛji akɛ wɔɔtao Internet lɛ nɔ hei ni he tseee nɛɛ, belɛ wɔbaaku wɔhiɛ wɔshwie Biblia mli famɔ akɛ “nyɛkataa nɔ ko ní he tseee he” lɛ nɔ kɛ̃. (Yesaia 52:11) Ani wɔbaafee mɛi ni ‘haa ba ni Yehowa gbi lɛ baa lɛ’ hiɔ amɛjwɛŋmɔ mli diɛŋtsɛ? Aloo wɔmiitsi nakai gbi lɛ wɔmiito yɛ wɔjwɛŋmɔ mli, kɛ susumɔ akɛ, kɛji akɛ wɔkɛ nibii ni ewo muji miiwo wɔjwɛŋmɔ mli po lɛ, wɔyɛ be lolo ni wɔkɛbaatsuu wɔhe? Kɛji akɛ wɔkɛ naagba ko ekpe yɛ nɛkɛ gbɛ̀i nɛɛ anɔ lɛ, kwɛ bɔ ni ebaafee nɔ ni he hiaa waa akɛ wɔɔsɔle wɔkpa Yehowa fai koni ‘ejie wɔhiɛ kɛjɛ yaka nii akwɛmɔ nɔ, ni ebaa wɔyi yɛ lɛ diɛŋtsɛ egbɛi lɛ anɔ’!—Lala 119:37.
8 Yehowa Odasefoi lɛ ateŋ mɛi ni fa babaoo, ni ji oblahii kɛ oblayei bibii kɛ mɛi ni edara lɛ kɛ amɛhe miikpɛtɛ Nyɔŋmɔ jeŋba he tɛi ni nɔ kwɔlɔ lɛ ahe, ni amɛmiikpoo je nɛŋ jeŋba shara he lakamɔi lɛ. Akɛni amɛle bɔ ni wɔbei nɛɛ ahe hiaa ha lɛ kɛ Petro kɔkɔbɔɔ akɛ “[Yehowa] gbi lɛ baaba tamɔ julɔ baa nyɔɔŋ” hewɔ lɛ, amɛyaa nɔ amɛbaa amɛjeŋ “yɛ jeŋbai krɔŋkrɔŋi . . . amli.” (2 Petro 3:10) Amɛnifeemɔi yeɔ odase akɛ ‘amɛmiimɛ ni amɛhaa ba ni Yehowa gbi lɛ baa lɛ hiɔ amɛjwɛŋmɔ mli.’a
Okɛ ‘Nyɔŋmɔ Jamɔ Hetuu-Kɛhamɔ Nifeemɔi’ Amɛ
9. Mɛni esa akɛ Nyɔŋmɔ jamɔ hetuu-kɛhamɔ akanya wɔ ni wɔfee?
9 ‘Nyɔŋmɔ jamɔ hetuu-kɛhamɔ nifeemɔi’ hu ahe miihia kɛji akɛ wɔɔha Yehowa gbi lɛ ahi wɔjwɛŋmɔ mli. ‘Nyɔŋmɔ jamɔ hetuu-kɛhamɔ’ kɔɔ woo ni wɔkɛhaa Nyɔŋmɔ ni tsirɛɔ wɔ koni wɔfee nɔ ni saa ehiɛ lɛ he. Yehowa ni akɛ he kpɛtɛɔ ehe yɛ anɔkwayeli mli lɛ ji hewalɛ ni kanyaa mɔ ni yɔɔ Nyɔŋmɔ jamɔ hetuu-kɛhamɔ nifeemɔi nɛɛ asɛɛ. Esuɔmɔnaa nii ji akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:4) Nyɔŋmɔ “sumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) No hewɔ lɛ, ani esaaa akɛ wɔ Nyɔŋmɔ jamɔ hetuu-kɛhamɔ lɛ kanyaa wɔ koni eha mɔdɛŋ ni wɔbɔɔ ni wɔye wɔbua mɛi ni amɛkase Yehowa he nii ni amɛkase lɛ lɛ mli awa?—Efesobii 5:1.
10. Mɛni hewɔ esa akɛ wɔtsi wɔhe kɛjɛ “nii pii ahe lakamɔ” lɛ he lɛ?
10 Kɛji akɛ wɔtao Nyɔŋmɔ Maŋtsɛyeli lɛ klɛŋklɛŋ lɛ, Nyɔŋmɔ jamɔ hetuu-kɛhamɔ nifeemɔi baayi wɔshihilɛ mli obɔ. (Mateo 6:33) Enɛ kɔɔ heloo gbɛfaŋ nibii ni wɔɔŋmɛ pɛpɛɛpɛ yɛ mli lɛ he. Yesu bɔ kɔkɔ akɛ: “Nyɛhiɛ ahia nyɛhe nɔ jogbaŋŋ yɛ hiɛjoomɔ hewɔ; ejaakɛ jeee gbɔmɔ nii ni ená ni eteke nɔ lɛ mli ewala yɔɔ.” (Luka 12:15) Eyɛ mli akɛ ebaawa akɛ wɔɔsusu wɔ diɛŋtsɛ wɔhe akɛ shika he suɔmɔ miishwila wɔhiŋmɛi moŋ, shi wɔɔfee jogbaŋŋ akɛ wɔɔkadi akɛ, “je nɛŋ he naagbamɔ kɛ nii pii ahe lakamɔ” lɛ baanyɛ ‘agbe’ Nyɔŋmɔ “wiemɔ lɛ.” (Mateo 13:22, wɔma efã ko nɔ mi.) Ekolɛ shihilɛ efeŋ mlɛo. No hewɔ lɛ, yɛ je lɛŋ hei komɛi lɛ, mɛi pii susuɔ akɛ, kɛji akɛ shihilɛ baahi aha amɛ lɛ, esa akɛ amɛfã kɛya maŋ ni etee hiɛ waa lɛ mli, ekolɛ amɛshiɔ amɛweku lɛ yɛ amɛsɛɛ afii fioo komɛi. Nyɔŋmɔ webii lɛ ateŋ mɛi komɛi po esusu saji ahe yɛ nɛkɛ gbɛ nɔ. Ekolɛ maŋ kroko nɔ ni amɛaaya lɛ baaha amɛnyɛ amɛkɛ ŋmɛnɛŋmɛnɛ beaŋ nibii ni haa mɔ he jɔɔ lɛ lɛ amaje amɛweku. Shi kɛlɛ, mɛni baanyɛ aba amɛsuɔlɔi ni amɛshi yɛ shia lɛ amumɔŋ shihilɛ nɔ? Kɛji akɛ yitsoyeli kpakpa bɛ shia lɛ mli lɛ, ani amɛbaaná mumɔŋ shihilɛ ni he hiaa koni amɛje Yehowa gbi lɛ mli shweshweeshwe?
11. Te nitsulɔ ko ni efa kɛyahi maŋ kroko nɔ lɛ tsɔɔ akɛ Nyɔŋmɔ jamɔ hetuu-kɛhamɔ nifeemɔi ahe hiaa waa fe ninámɔ eha tɛŋŋ?
11 Nitsulɔ ko ni jɛ Philippines ni efa kɛtee maŋ kroko nɔ lɛ kase Biblia mli anɔkwale lɛ kɛjɛ Yehowa Odasefoi aŋɔɔ yɛ Japan. Beni ekase Ŋmalɛ naa gbɛnaa nii ni kɔɔ yitsoyeli he lɛ, eyɔse akɛ ehe miihia ni eye ebua eweku lɛ ni amɛbatsɔmɔ Yehowa jálɔi. (1 Korintobii 11:3) Eŋa ni yɔɔ emaŋ lɛ te shi wo ehemɔkɛyeli hee ni ená lɛ waa, ni eesumɔ ni eya nɔ ekɛ shika amaje fe nɔ ni eeeku esɛɛ eba shia koni ebatsɔɔ weku lɛ ehemɔkɛyeli ni damɔ Biblia lɛ nɔ lɛ. Shi kɛlɛ, akɛni bɔ ni bei lɛ ahe hiaa ha kɛ bɔ ni esusuɔ esuɔlɔi lɛ ahe lɛ wo lɛ hewalɛ hewɔ lɛ, eku esɛɛ kɛtee emaŋ. Awo etsuishitoo yɛ bɔ ni ekɛ eweku lɛ mli bii lɛ ye ha yɛ suɔmɔ mli lɛ he nyɔmɔ. Yɛ be ni sa mli lɛ, eweku lɛ bafee ekome yɛ anɔkwa jamɔ mli, ni eŋa lɛ kɛ ehe wo be-fɛɛ sɔɔmɔ lɛ mli.
12. Mɛni hewɔ esa akɛ wɔkɛ mumɔŋ nibii aye klɛŋklɛŋ gbɛhe yɛ shihilɛ mli lɛ?
12 Abaanyɛ akɛ shihilɛ ni wɔyɔɔ mli lɛ ato aŋkroaŋkroi ni yɔɔ tsũ ni miishã mli lɛ he. Ani nilee baahi mli akɛ wɔkɛ hehiamɔ aaajo foi kɛya kɛba bɔni afee ni wɔbua heloo gbɛfaŋ nibii anaa kɛjɛ tsũ ni shãa ni miihe agbee shi lɛ mli? Yɛ no najiaŋ lɛ, ani efeŋ nɔ ni he hiaa babaoo akɛ aaahere mɛi ayiwala—wɔ diɛŋtsɛ wɔnɔ̃ kɛ wɔweku lɛ kɛ mɛi krokomɛi ni yɔɔ tsũ lɛ mli lɛ anɔ̃? Ojogbaŋŋ, nɛkɛ yiwalɛ nibii agbɛjianɔtoo nɛɛ miiya ehiɛkpatamɔ mli kɛ foi, ni oshara eba mɛi awala he. Akɛni wɔyoo enɛ hewɔ lɛ, yɛ anɔkwale mli lɛ, esa akɛ wɔkɛ mumɔŋ nibii aye klɛŋklɛŋ gbɛhe, ni wɔkɛ ekãa ajwɛŋ Maŋtsɛyeli shiɛmɔ nitsumɔ ni hereɔ mɔ yiwala lɛ nɔ.—1 Timoteo 4:16.
Ehe Miihia ni Wɔfee Mɛi ni ‘Muji ko Bɛ Amɛhe’
13. Mɛɛ shihilɛ esa akɛ wɔsumɔ ni wɔhi mli beni Yehowa gbi lɛ efɛ́ lɛ?
13 Beni Petro maa bɔ ni ehe hiaa ni wɔhiɛ su ni akɛmɛɔ lɛ mli lɛ nɔ mi lɛ, ekɛɛ akɛ: “Suɔmɔmɛi, akɛni nyɛkwɛɔ nii nɛɛ agbɛ nɛɛ, nyɛbɔa mɔdɛŋ, koni [Nyɔŋmɔ] ana nyɛ ní muji loo kpa ko bɛ nyɛhe yɛ ehiɛ, yɛ hejɔlɛ mli.” (2 Petro 3:14) Beni Petro yaa nɔ kɛtekeɔ eŋaawoo akɛ, akɛ he awo jeŋbai krɔŋkrɔŋi kɛ Nyɔŋmɔ jamɔ hetuu-kɛhamɔ nifeemɔi amli lɛ, ema bɔ ni ehe hiaa ni yɛ naagbee lɛ Yehowa ana aŋkroaŋkroi lɛ akɛ amɛji mɛi ni Yesu lá ni jara wa lɛ etsuu amɛhe lɛ nɔ mi. (Kpojiemɔ 7:9, 14) Enɛ biɔ ni mɔ lɛ aná hemɔkɛyeli yɛ Yesu afɔleshaa lɛ mli ni ebatsɔ Yehowa tsulɔ ni ejɔɔ ehe nɔ ni abaptisi lɛ.
14. ‘Muji ko ni bɛ amɛhe’ lɛ kɔɔ mɛni he?
14 Petro woɔ wɔ hewalɛ koni wɔfee bɔ fɛɛ bɔ ni wɔɔnyɛ ni ana wɔ akɛ mɛi ni ‘muji ko bɛ amɛhe.’ Ani wɔmiihiɛ wɔ atadei ni ji Kristofoi ajeŋba kɛ su kɛ baŋ lɛ akɛ nɔ ni muji ko bɛ he, nɔ ni je lɛ su ko kpako mli? Kɛji akɛ wɔkadi muji ko yɛ wɔ atadei amli lɛ, wɔbɔɔ mɔdɛŋ ni wɔjie muji lɛ amrɔ nɔŋŋ. Kɛji akɛ muji lɛ yɛ atade ko ni wɔsumɔɔ waa mli lɛ, wɔkwɛɔ jogbaŋŋ diɛŋtsɛ ni wɔjieɔ muji lɛ kɛjɛɔ mli. Ani wɔnuɔ he nakai nɔŋŋ kɛji akɛ wɔ Kristofoi atadei lɛ amli wo muji yɛ okadi gbɛ nɔ, yɛ fãtɔɔ ko ni yɔɔ wɔsubaŋ loo jeŋba mli hewɔ lɛ?
15. (a) Mɛni hewɔ esa akɛ Israelbii lɛ afee amanyai amɛwo amɛtadei anaa lɛ? (b) Mɛni hewɔ esoro Yehowa tsuji ni yɔɔ ŋmɛnɛ lɛ kwraa lɛ?
15 Esa akɛ Israelbii lɛ afee “amanyai amɛwo amɛtadei anaa” ni “amɛkɛ kpaa bluu afimɔ amanyai lɛ anɔ.” Mɛni hewɔ? Bɔni afee ni amɛkai Yehowa kitai lɛ ni amɛye nɔ, ni amɛtsɔmɔ “mɛi krɔŋkrɔŋi” amɛha amɛ Nyɔŋmɔ lɛ. (4 Mose 15:38-40) Ákɛ ŋmɛnɛŋmɛnɛ beaŋ Yehowa tsuji lɛ, wɔdamɔ shi akɛ mɛi ni yɔɔ srɔto kwraa yɛ je lɛ he, ejaakɛ wɔyeɔ ŋwɛi mlai kɛ shishitoo taomɔ nii anɔ. Ákɛ nɔkwɛmɔnɔ lɛ, wɔhiɔ shi yɛ jeŋba ni he tse mli, wɔkɛ bulɛ haa krɔŋkrɔŋ ni la ji, ni wɔtsiɔ wɔhe kɛjɛɔ wɔŋjamɔi srɔtoi fɛɛ he. (Bɔfoi lɛ Asaji 15:28, 29) Mɛi pii kɛ bulɛ haa wɔ yɛ wɔfaishitswaa ni yɔɔ shiŋŋ akɛ wɔwoŋ wɔhe muji lɛ hewɔ.—Yakobo 1:27.
Ehe Miihia ni Wɔfee Mɛi ni ‘Kpa ko Bɛ Amɛhe’
16. Ní wɔɔhi shi akɛ mɛi ni ‘kpa ko bɛ amɛhe’ lɛ tsɔɔ mɛni?
16 Petro hu kɛɛ akɛ esa akɛ ana wɔ akɛ mɛi ni ‘kpa ko bɛ amɛhe.’ Te aaafee tɛŋŋ ni enɛ aaaba lɛ nakai lɛ? Bei pii lɛ abaanyɛ afɔ́ muji loo atsumɔ ni eje kwraa, shi anyɛŋ afee nakai yɛ kpa he. Kpa tsɔɔ akɛ nɔ ko ni yɔɔ mligbɛ lɛ ejaaa, tɔmɔ yɛ he. Bɔfo Paulo wo nanemɛi Kristofoi ni yɔɔ Filipi lɛ ŋaa akɛ: “Nyɛfea nyɛnii fɛɛ ni huhuuhuwiemɔi kɛ ŋwanejee akahi mli; koni nyɛhe akahi shwamɔ, ni nyɛfee mɛi krɔŋŋi, Nyɔŋmɔ bii ni he bɛ kpa ko yɛ yinɔ kɔ̃ɔdɔ̃ŋ ni bɛ eŋɛlɛ nɔ nɛɛ teŋ, mɛi ateŋ ni nyɛtsoɔ tamɔ kanei yɛ je nɛŋ.” (Filipibii 2:14, 15) Kɛji akɛ wɔnyiɛ nakai ŋaawoo lɛ sɛɛ lɛ, wɔwieŋ huhuuhu, ni wɔjeŋ ŋwane, ni wɔkɛ yiŋtoo ni yɔɔ krɔŋŋ baasɔmɔ Nyɔŋmɔ. Suɔmɔ ni wɔyɔɔ kɛha Yehowa kɛ wɔnanemɛi lɛ baatsirɛ wɔ yɛ be mli ni wɔshiɛɔ “Maŋtsɛyeli lɛ he sanekpakpa nɛɛ.” (Mateo 22:35-40; 24:14) Agbɛnɛ hu, wɔbaaya nɔ wɔshiɛ sanekpakpa lɛ, eyɛ mli moŋ akɛ gbɔmɛi babaoo nuŋ nɔ hewɔ ni wɔjɛɔ wɔsuɔmɔ mli wɔtuɔ wɔbe wɔwoɔ enɛ mli koni wɔye wɔbua mɛi krokomɛi ni amɛkase Nyɔŋmɔ kɛ e-Wiemɔ ni ji Biblia lɛ he nii lɛ shishi.
17. Mɛni esa akɛ efee wɔyiŋtoo beni wɔtaoɔ ni wɔnine ashɛ sɔɔmɔ hegbɛi anɔ yɛ Kristofoi asafo lɛ mli lɛ?
17 Akɛni wɔsumɔɔ ni ana wɔ akɛ mɛi ni ‘kpa ko bɛ amɛhe’ hewɔ lɛ, wɔbaafee jogbaŋŋ akɛ wɔɔpɛi wɔyiŋtoi amli yɛ wɔnitsumɔi fɛɛ mli. Wɔshi pɛsɛmkunya gbɛ ni je lɛ tsɔɔ nɔ efeɔ enii, tamɔ mɔdɛŋ ni abɔɔ koni ana nii kɛ hewalɛ lɛ. Kɛji akɛ wɔmiitao ni wɔnine ashɛ sɔɔmɔ hegbɛi anɔ yɛ Kristofoi asafo lɛ mli lɛ, no lɛ eba akɛ yiŋtoi ahewɔ ni wɔfeɔ enɛ lɛ aaafee nɔ ni yɔɔ krɔŋŋ, ni eba akɛ suɔmɔ kɛha Yehowa kɛ mɛi krokomɛi aaafee nɔ ni kanyaa wɔ. Eyɛ miishɛɛ akɛ abaana ni mumɔŋ gbɔmɛi kɛ nyamɔ kɛ heshibaa “miitao nɔkwɛmɔ nitsumɔ” lɛ koni amɛkɛsɔmɔ Yehowa kɛ amɛnanemɛi heyelilɔi. (1 Timoteo 3:1; 2 Korintobii 1:24) Yɛ anɔkwale mli lɛ, mɛi ni he saa akɛ amɛaasɔmɔ akɛ onukpai lɛ ‘lɛɔ Nyɔŋmɔ asafoku lɛ jeee nɔnyɛ̃ɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa; asaŋ jeee mɛi ni yeɔ asafoi lɛ anɔ nuŋtsɔmɛi asane, shi moŋ mɛi ni toɔ okadii amɛhaa asafoku lɛ.’—1 Petro 5:1-4.
Ehe Miihia ni Wɔhi Shi ‘yɛ Toiŋjɔlɛ Mli’
18. Mɛɛ sui nɛkɛ akɛle Yehowa Odasefoi jogbaŋŋ?
18 Yɛ naagbee lɛ, Petro kɛɔ wɔ akɛ esa akɛ ana wɔ ‘yɛ toiŋjɔlɛ mli.’ Bɔni afee ni wɔhi shi yɛ nɛkɛ taomɔ nii nɛɛ anaa lɛ, esa akɛ toiŋjɔlɛ ahi wɔkɛ Yehowa kɛ wɔnaanyo teŋ. Petro ma bɔ ni ehe hiaa ni wɔha ‘suɔmɔ ni wɔkɛsumɔsumɔɔ wɔhe lɛ mli awa’ ni wɔha toiŋjɔlɛ ahi wɔkɛ wɔnanemɛi Kristofoi ateŋ lɛ nɔ mi. (1 Petro 2:17; 3:10, 11; 4:8; 2 Petro 1:5-7) Bɔni afee ni wɔhiɛ wɔtoiŋjɔlɛ lɛ mli lɛ, esa akɛ suɔmɔ ahi wɔteŋ. (Yohane 13:34, 35; Efesobii 4:1, 2) Wɔsuɔmɔ kɛ toiŋjɔlɛ lɛ jeɔ kpo titri beni afeɔ wɔmajimaji ateŋ kpeei lɛ. Yɛ kpee ko ni afee yɛ Costa Rica yɛ afi 1999 mli lɛ shishi lɛ, nihɔɔlɔ ko ni hɔ̃ɔ nii yɛ kɔɔyɔŋ lɛji adaamɔhe lɛ mli fu waa ejaakɛ Odasefoi ni yɔɔ maŋ lɛ mli ni hereɔ gbɔi ni baa lɛ atuu lɛ etsĩ he ni ehɔ̃ɔ nii yɛ lɛ hiɛ, eyɛ mli moŋ akɛ jeee gbɛ amɛje amɛfee. Shi eyoo suɔmɔ kɛ toiŋjɔlɛ ni ajie lɛ kpo yɛ miishɛɛ ni akɛkpee gbɔi ni baa lɛ mli yɛ gbi ni ji enyɔ lɛ nɔ, eyɛ mli moŋ akɛ Odasefoi ni yɔɔ maŋ lɛ mli lɛ diɛŋtsɛ leee amɛ. Yɛ naagbee gbi lɛ nɔ lɛ, nihɔɔlɔ lɛ diɛŋtsɛ yafata he kɛhere gbɔi ni baa lɛ atuu, ni ebi ni akɛ lɛ akase Biblia lɛ.
19. Mɛni hewɔ ehe hiaa ni wɔtiu wɔkɛ wɔnanemɛi heyelilɔi ateŋ toiŋjɔlɛ sɛɛ lɛ?
19 Anɔkwa ni wɔyeɔ, yɛ wɔkɛ wɔmumɔŋ nyɛmimɛi hii kɛ yei ateŋ toiŋjɔlɛ taomɔ mli lɛ baanyɛ afee nɔ ni kɔɔ bɔ ni wɔkɛ hiɛdɔɔ mɛɔ Yehowa gbi lɛ kɛ eshiwoo jeŋ hee lɛ waa wɔhaa lɛ he. (Lala 37:11; 2 Petro 3:13) Ekolɛ wɔmiina akɛ toiŋjɔlɛ ni wɔɔha ahi wɔkɛ naanyo heyelilɔ ko teŋ lɛ wa. Ani wɔbaanyɛ wɔsusu ni wɔkɛ lɛ miihi shi yɛ toiŋjɔlɛ mli yɛ Paradeiso lɛ he? Kɛji akɛ nyɛmi ko ebɛ wɔ ewo emli lɛ, esa akɛ ‘wɔsaa wɔkɛ lɛ teŋ toiŋjɔlɛ lɛ’ amrɔ nɔŋŋ. (Mateo 5:23, 24) Nakai feemɔ he miihia kɛji akɛ toiŋjɔlɛ aaahi wɔkɛ Yehowa teŋ.—Lala 35:27; 1 Yohane 4:20.
20. Esa akɛ ajie ‘su ni akɛmɛɔ’ lɛ kpo yɛ mɛɛ gbɛ̀i anɔ?
20 Ani wɔ diɛŋtsɛ lɛ ‘wɔmiimɛ ni wɔmiiha ba ni Yehowa gbi lɛ baa lɛ ahi wɔjwɛŋmɔ mli’? Anaa bɔ ni wɔshweɔ waa ni wɔna yiwalɛ nifeemɔ naagbee lɛ yɛ bɔ ni wɔhiɔ shi akɛ mɛi krɔŋkrɔŋi yɛ jeŋ ni ekpɔtɔ nɛɛ mli lɛ mli. Agbɛnɛ hu bɔ ni wɔtaoɔ waa ni Yehowa gbi lɛ aba, kɛ shihilɛ yɛ Maŋtsɛyeli nɔyeli lɛ shishi lɛ jeɔ kpo faŋŋ kɛtsɔɔ wɔ Nyɔŋmɔ jamɔ hetuu-kɛhamɔ nifeemɔi lɛ anɔ. Ni wɔgbɛkpamɔ akɛ wɔɔhi shi yɛ toiŋjɔlɛ jeŋ hee lɛ mli lɛ jeɔ kpo yɛ toiŋjɔlɛ ni wɔtaoɔ ni ehi wɔkɛ wɔnanemɛi jálɔi lɛ ateŋ bianɛ lɛ mli. Kɛtsɔ enɛɛmɛi anɔ lɛ, wɔtsɔɔ akɛ wɔyɛ ‘su ni akɛmɛɔ’ ni ‘wɔmiiha ba ni Yehowa gbi lɛ baa lɛ miihi wɔjwɛŋmɔ mli.’
[Shishigbɛ niŋmaa]
a Akɛ nɔkwɛmɔnɔ lɛ, kwɛmɔ January 1, 2000 Buu-Mɔɔ lɛ baafa 16 kɛ 1997 Yearbook of Jehovah’s Witnesses, baafa 51.
Ani Okaiɔ?
• Ákɛ aha ‘ba ni Yehowa gbi lɛ baa lɛ ahi jwɛŋmɔ mli’ lɛ tsɔɔ mɛni?
• Mɛɛ gbɛ nɔ wɔtsɔɔ wɔjeŋba nɔ wɔfeɔ ‘su ni akɛmɛɔ’ lɛ he nɔkwɛmɔnɔ yɛ?
• Mɛni hewɔ ‘Nyɔŋmɔ jamɔ hetuu-kɛhamɔ nifeemɔi’ ahe hiaa lɛ?
• Mɛni esa akɛ wɔfee koni Yehowa ana wɔ akɛ mɛi ni ‘muji loo kpa ko bɛ amɛhe yɛ hejɔlɛ mli’?
[Mfoniri ni yɔɔ baafa 11]
Ajieɔ ‘su ni akɛmɛɔ’ lɛ kpo yɛ jeŋba mli nifeemɔi krɔŋkrɔŋi amli
[Mfonirii ni yɔɔ baafa 12]
Maŋtsɛyeli shiɛmɔ nitsumɔ lɛ hereɔ mɔ yiwala
[Mfoniri ni yɔɔ baafa 14]
Yɛ be mli ni wɔmɛɔ Yehowa gbi lɛ nɛɛ, nyɛhaa wɔtiua wɔkɛ mɛi krokomɛi ateŋ toiŋjɔlɛ sɛɛ