Fiji Anɔ ni Aholeɔ Tamɔ Okropɔŋi
TE GBƆMƆ nuɔ he ehaa tɛŋŋ beni eto etsui shi yɛ Nazi yiwalɛ ŋsarai amli afii enumɔ sɛɛ lɛ? Ani enijiaŋ jeɔ wui? Ani edɔɔ lɛ waa? Ani oweletɔɔ yiɔ emli obɔ?
Nɔ ni yɔɔ naakpɛɛ moŋ ji akɛ, nuu ko ni tamɔ nɛkɛ ŋma akɛ: “Mimii bashɛ mihe waa yɛ shihilɛ mli kwraa fe bɔ ni mikpa gbɛ.” Mɛni hewɔ enu he nakai lɛ? Etsɔɔ mli akɛ: “Mina abobaa he yɛ Ŋwɛi Flooflonyo lɛ fiji ashishi, ni gbalɔ Yesaia wiemɔi lɛ ba mli yɛ mihe, beni ekɛɛ akɛ: ‘Mɛi ni hiɛ kã Yehowa nɔ lɛ naa hewalɛ hee, amɛholeɔ amɛfiji anɔ tamɔ okropɔŋi, . . . amɛnyiɛɔ hu, ni amɛgbɔjɔɔɔ.’ ”—Yesaia 40:31.
Nɛkɛ Kristofonyo nuu, ni akɛ niseniianii ni yɔɔ gbeyei waa diɛŋtsɛ fe bɔ ni aaanyɛ afee he mfoniri yɛ jwɛŋmɔŋ lɛ wa lɛ yi nɛɛ, ná jwɛŋmɔ mli nyɛmɔ ni tee ŋwɛi shɔŋŋ yɛ mfoniri feemɔ gbɛ nɔ, mumɔ ko ni Nazi yiwalɛ nifeemɔ lɛ nyɛɛɛ aye nɔ kunim. Taakɛ David ji lɛ, ena abobaa he yɛ Nyɔŋmɔ ‘fiji’ ashishi hɔ̃ɔŋ lɛ mli. (Lala 57:2) Kristofonyo nuu nɛɛ kɛ wiemɔ ni gbalɔ Yesaia kɛto sane he lɛ tsu nii, ni ekɛ emumɔŋ nyɛmɔ lɛ to nyɛmɔ ni okropɔŋ ni filikiɔ kɛyaa ŋwɛi shɔŋŋ, yɛ atatu mli lɛ yɔɔ lɛ he.
Ani onuɔ he daa akɛ naagbai ena onɔ hewalɛ waa? Ŋwanejee ko bɛ he akɛ bo hu obaasumɔ ni ona abobaa he yɛ Ŋwɛi Flooflonyo lɛ fiji ashishi, ‘ni ohole ofiji anɔ tamɔ okropɔŋi.’ Bɔni afee ni onu bɔ ni enɛ baanyɛ aba lɛ aha lɛ shishi lɛ, ebaafee yelikɛbuamɔ nɔ akɛ ooole okropɔŋ, ni afɔɔ kɛ nitsumɔ yɛ mfoniri feemɔ gbɛ nɔ yɛ Ŋmalɛi lɛ amli lɛ he nɔ ko.
Yɛ Okropɔŋ lɛ Aflaŋaa Shishi
Yɛ loofɔji fɛɛ ni mɛi ni hi shi yɛ blema beaŋ lɛ yɔse jogbaŋŋ lɛ ateŋ lɛ, ekolɛ okropɔŋ ji nɔ ni anaa ehe miishɛɛ fe fɛɛ, yɛ ehewalɛ kɛ agbojee ni ekɛfilikiɔ lɛ hewɔ. Blema asraafoi akui babaoo, ni Babilon, Persia, kɛ Roma asraafoi fata he lɛ shiɔ ako yɛ aflaŋaa ni feɔ okropɔŋ he okadi lɛ shishi. Koresh Kpeteŋkpele lɛ asraafoi akuu lɛ ji mɛnɛɛmɛi ateŋ ekome. Biblia lɛ gba efɔ shi akɛ Persia maŋtsɛ nɛɛ baafee tamɔ loofɔlɔ ni yeɔ kooloi krokomɛi, ni baajɛ bokagbɛ ebaye Babilon Maŋtsɛyeli lɛ. (Yesaia 45:1; 46:11) Beni aŋma gbalɛ nɛɛ afɔ shi lɛ sɛɛ afii ohai enyɔ lɛ, Koresh asraafoi ni yɔɔ okropɔŋi ahe okadii yɛ amɛ tawuu aflaŋaai amli lɛ, ke yuu kɛba Babilon maŋ lɛ nɔ tamɔ okropɔŋ ni nine egbe loo ko.
Nyɛsɛɛ nɛɛ nɔŋŋ lɛ, tatsɛmɛi tamɔ Charlemagne kɛ Napoleon kɛ maji tamɔ United States kɛ Germany hu ehala okropɔŋ akɛ amɛ okadi. Akɛ famɔ hã Israelbii lɛ ni amɛkajá okropɔŋi ahe mfonirii loo bɔɔ nɔ ko kwraa. (2 Mose 20:4, 5) Ni kɛlɛ, Biblia ŋmalɔi tsi sui komɛi ni okropɔŋ yɔɔ lɛ atã yɛ gbɛ ko nɔ koni amɛkɛtsɔɔ amɛ shɛɛ saji lɛ amli. Enɛ hewɔ lɛ, akɛ okropɔŋi, loofɔlɔ ni afɔɔ etãtsii fe fɛɛ yɛ Ŋmalɛi lɛ amli lɛ tsuɔ nii koni akɛfee nilee, ŋwɛi hebuu, kɛ oyaiyeli he okadi.
Okropɔŋ Hiŋmɛi
Akɛ okropɔŋ hiŋmɛi ni naa nii jogbaŋŋ lɛ etsu nii yɛ bei fɛɛ mli akɛ abɛbua. Eyɛ mli akɛ jeee bei fɛɛ mli okropɔŋ wuɔfɔ lɛ tsiimɔ fa fe kilogram enumɔ moŋ, shi ehiŋmɛi da waa diɛŋtsɛ fe gbɔmɔ nɔ̃, ni ehiŋmɛi naa nii jogbaŋŋ fe gbɔmɔ nɔ̃. Beni Yehowa diɛŋtsɛ tsɔɔ Hiob nyɛmɔ ni okropɔŋ yɔɔ ni ekɛtaoɔ eniyenii lɛ, ekɛɛ: “Ehiŋmɛii naa nii yɛ shɔŋŋ.” (Hiob 39:27, 29) Alice Parmelee bɔ amaniɛ yɛ ewolo, All the Birds of the Bible lɛ mli akɛ, “be ko lɛ, okropɔŋ ko na loo ko ni egbo ni tɛo kpaakpo ko hiɛ, ni ekɛ lɛ teŋ jɛkɛmɔ ji kilomitai enumɔ, ni etsɛ̃ kɛtsɔ ekoŋ nɔ kɛtee jɛmɛ tuuŋtu. Jeee akɛ okropɔŋ lɛ nyɛ ena nɔ ko bibioo ni yɔɔ shɔŋŋ fe bɔ ni gbɔmɔ baanyɛ ana kɛkɛ, shi moŋ loofɔlɔ lɛ tee nɔ ekwɛ loo lɛ gãa aahu yɛ kilomitai enumɔ ni ekɛtsɛ̃ kɛtee lɛ fɛɛ mli.”
Yɛ okropɔŋ lɛ hiŋmɛi ni naa nii jogbaŋŋ hewɔ lɛ, eji nilee he okadi ni sa, Yehowa sui titrii lɛ ateŋ ekome. (Okɛto Ezekiel 1:10; Kpojiemɔ 4:7 he.) Mɛni hewɔ nakai eji lɛ? Nilee kɔɔ hiɛ ni atsɔɔ anaa nɔ ni baajɛ nifeemɔ gbɛ ko ni wɔɔkɔ lɛ mli aba lɛ he. (Abɛi 22:3) Okropɔŋ, ni yɔɔ nyɛmɔ akɛ eeena nii kɛya shɔŋŋ lɛ, baanyɛ ayɔse oshara ko yɛ shɔŋŋ diɛŋtsɛ ni etsɔ hiɛ ekwɛ ehe nɔ jogbaŋŋ, taakɛ nuu nilelɔ ni yɔɔ Yesu abɛbua lɛ mli, ni tsɔ hiɛ ena ahum ni baanyɛ atswa lɛ ni emã etsũ yɛ tɛsaa nɔ lɛ ji lɛ. (Mateo 7:24, 25) Eyɛ miishɛɛ akɛ yɛ Spania wiemɔ mli lɛ, ni aaawie mɔ ko he akɛ eji okropɔŋ lɛ tsɔɔ akɛ mɔ lɛ yɛ sanesɛɛkɔmɔ loo sɛɛyoomɔ.
Kɛ oná hegbɛ be ko akɛ ooona okropɔŋ ni ebɛŋkɛ bo kpaakpa lɛ, kwɛmɔ bɔ ni ekɛ ehiŋmɛii tsuɔ nii ehaa. Ekwɛŋ bo oya nɔŋŋ ni etsɔ ehiɛ eto he kroko; shi moŋ, etamɔ nɔ ni ekwɛɔ ohe nɔ fɛɛ nɔ jogbaŋŋ kɛmɔɔ shi. Nakai nɔŋŋ hu nuu nilelɔ taoɔ sane mli fitsofitso dani ekpɛɔ eyiŋ, fe ni ekɛ ehe aaafɔ enyɛmɔi loo ehenumɔi anɔ. (Abɛi 28:26) Beni okropɔŋ hiŋmɛii ni naa nii jogbaŋŋ lɛ ji ŋwɛi nilee he okadi ni sa jogbaŋŋ lɛ, Biblia ŋmalɔi kɛ bɔ ni ekɛ agbojee filikiɔ ehaa lɛ hu tsu nii yɛ mfoniri feemɔ mli.
“Okropɔŋ Gbɛ yɛ Ŋwɛi”
“Okropɔŋ gbɛ yɛ ŋwɛi” lɛ sa kadimɔ jogbaŋŋ, yɛ bɔ ni efilikiɔ waa kɛ foi lɛ, kɛ bɔ ni etamɔ nɔ ni efilikiɔ ni ewaaa haaa lɛ kwraa hu lɛ hewɔ, yɛ be mli ni enyiɛɛɛ gbɛ pɔtɛɛ ko ni ato afɔ shi nɔ ní eshiii okadi ko kwraa yɛ esɛɛ lɛ. (Abɛi 30:19) Awie bɔ ni okropɔŋ he yɔɔ oya yɛ Yaafo 4:19, he ni awie Babilon asraafoi ahe yɛ, akɛ: “Wɔtiulɔi lɛ ahe yɛ oyá fe ŋwɛi okropɔŋi; amɛnyiɛ wɔ sɛɛ yɛ gɔji lɛ anɔ.” Amaniɛbɔi komɛi tsɔɔ akɛ, kɛ okropɔŋ ko miibɔle shi yɛ ŋwɛigbɛ ni ena kooloo ko ni eyeɔ lɛ, ekpaa efiji afã, ni etsɛ̃ɔ waa kɛbaa yɛ be mli ni efoidamɔ yɛ efilikimɔ mli lɛ baanyɛ ashɛ kilomitai 130 yɛ ŋmɛlɛtswaa kome mli. Ebɛ naakpɛɛ akɛ, Ŋmalɛi lɛ kɛ okropɔŋ tsuɔ nii akɛ wiemɔ ni kɔɔ bɔ ni mɔ he yɔɔ oya he, titri lɛ kɛ aawie asraafoi akuu he.—2 Samuel 1:23; Yeremia 4:13; 49:22.
Yesaia wieɔ bɔ ni ewaaa haaa okropɔŋ kwraa akɛ eeefiliki lɛ he yɛ gbɛ kroko nɔ akɔ, “Mɛi ni hiɛ kã Yehowa nɔ lɛ naa hewalɛ hee, amɛholeɔ amɛfiji anɔ tamɔ okropɔŋi, amɛjoɔ foi, ni etɔɔɔ amɛ, amɛnyiɛɔ hu, ni amɛgbɔjɔɔɔ.” (Yesaia 40:31) Mɛni hɔ okropɔŋ filikimɔ yɛ gbɛ ni ekaaa nɔ yɛ kɔɔyɔŋ lɛ sɛɛ? Akɛni okropɔŋ kɛ kɔɔyɔɔ mli dɔlɛ loo kɔɔyɔɔ kulɔkulɔ ni yaa ŋwɛigbɛ lɛ tsuɔ nii hewɔ lɛ, ŋwɛigbɛ ni eeefiliki kɛaaya lɛ waaa haaa lɛ. Anyɛɛɛ ana kɔɔyɔɔ ni mli edɔ nɛɛ, shi okropɔŋ he esa waa yɛ enɛɛmɛi anamɔ mli. Kɛ okropɔŋ na he ni kɔɔyɔŋ dɔlɛ ko yɔɔ nɔŋŋ lɛ, egbɛɔ efiji kɛ elei mli ni ebɔleɔ kɔɔyɔɔ kulɔkulɔ ni woɔ okropɔŋ lɛ nɔ kɛyaa ŋwɛi shɔŋŋ lɛ mli. Kɛ etee ŋwɛi saŋŋ lɛ, efilikiɔ blɛoo kɛyaa kɔɔyɔŋ dɔlɛ kroko he, ni efeɔ nakai ekoŋŋ. Yɛ nɛkɛ gbɛ nɔ lɛ, okropɔŋ lɛ baanyɛ ahi ŋwɛi shɔŋŋ ŋmɛlɛtswai abɔ, yɛ be mli ni hewalɛ fioo ko pɛ ekɛfeɔ nakai.
Yɛ Israel, titri lɛ, Rift Valley [Bú Jɔɔ] ni jɛɔ Ezion-geber yɛ Ŋshɔ Tsuru lɛ naa gbɛ kɛyashi Dan ni yɔɔ kooyigbɛ lɛ, okropɔŋi ji nɔ ni afɔɔ namɔ waa. Amɛyi faa babaoo, titri lɛ kɛ́ shɛ agbiɛnaa kɛ gbo be mli ni amɛshi he ni amɛyɔɔ lɛ kɛtee he ko shɔŋŋ lɛ. Yɛ afii komɛi ni eho lɛ amli lɛ, akane okropɔŋi ni amɛ yifalɛ miihe ashɛ 100,000. Kɛ leebi hulu lɛ ha kɔɔyɔɔ lɛ mli fee kulɔkulɔ lɛ, abaanyɛ ana loofɔji ohai abɔ ni yeɔ kooloi aloo ni miifiliki yɛ tɛsaai gɔgɔmeei ni kɛ Bú Jɔɔ lɛ eje husu lɛ yiteŋ.
Bɔ ni okropɔŋ filikiɔ ni ewaaa haaa lɛ lɛ feɔ Yehowa hewalɛ ni nɔ bɛ, ni baanyɛ ahole wɔnɔ yɛ mumɔŋ kɛ henumɔŋ bɔni afee ni wɔya nɔ wɔtsu wɔ nitsumɔi lɛ he mfoniri. Taakɛ bɔ ni okropɔŋ nyɛŋ ekɛ lɛ diɛŋtsɛ ehewalɛ afiliki kɛya ŋwɛi shɔŋŋ nɛkɛ lɛ, nakai nɔŋŋ wɔnyɛŋ wɔdamɔ shihilɛ lɛ naa kɛ wɔkɛ wɔhe fɔ̃ wɔ diɛŋtsɛ wɔnyɛmɔi anɔ. Bɔfo Paulo tsɔɔ mli akɛ: “Minyɛɔ nii fɛɛ mifeɔ yɛ mɔ ni wajeɔ mi . . . lɛ mli.” (Filipibii 4:13) Taakɛ be fɛɛ be lɛ, okropɔŋ taoɔ kɔɔyɔŋ dɔlɛ ni anaaa lɛ, ‘wɔyaa nɔ wɔbiɔ’ Yehowa nitsumɔ hewalɛ ni anaaa lɛ, kɛtsɔ wɔ sɔlemɔi ni mli wawai anɔ.—Luka 11:9, 13.
Okropɔŋi ni fãa kɛyahiɔ he kroko lɛ naa kɔɔyɔŋ dɔlɛ lɛ kɛtsɔɔ loofɔji krokomɛi ni yeɔ kooloi aloo ni amɛkwɛɔ amɛ lɛ nɔ. Adebɔɔ he nikaselɔ, D. R. Mackintosh bɔ amaniɛ akɛ, be ko mli lɛ, ana okropɔŋi kɛ akpaŋai 250 ni miibɔle shi yɛ ŋwɛigbɛ yɛ he kometoo lɛ nɔŋŋ mli. Nakai nɔŋŋ ŋmɛnɛ, Kristofoi hu baanyɛ akase bɔ ni akɛ he fɔ̃ɔ Yehowa hewalɛ lɛ nɔ, kɛtsɔ anɔkwayeli he nɔkwɛmɔ nii ni tsuji ni ji Nyɔŋmɔ gbeyeishelɔi krokomɛi efee efɔ shi lɛ kasemɔ nɔ.—Okɛto 1 Korintobii 11:1 he.
Yɛ Okropɔŋ Fiji Ashishi Hɔ̃ɔŋ lɛ Mli
Okropɔŋ wala shihilɛ be titri kome ni yɔɔ oshara waa ji beni ekaseɔ filikimɔ. Okropɔŋi babaoo gboiɔ yɛ enɛ ni amɛkaa akɛ amɛaafee lɛ mli. Israel maŋ ni nako niiashikpamɔ lɛ hu baje oshara mli beni amɛshi Mizraim lɛ. Enɛ hewɔ lɛ Yehowa wiemɔi ni ekɛha Israelbii lɛ sa jogbaŋŋ diɛŋtsɛ: “Nyɛ diɛŋtsɛ nyɛna nɔ ni mifee Mizraimbii lɛ, kɛ bɔ ni mitere nyɛ yɛ okropɔŋi afiji anɔ, ni mikɛ nyɛ ba miŋɔɔ nɛɛ.” (2 Mose 19:4) Ayɛ amaniɛbɔi ni tsɔɔ okropɔŋi ni kpɛɔ amɛbii yɛ amɛsɛɛ be kukuoo mli, bɔni afee ni amɛbii ni darako lɛ akagbee shi beni amɛkaa klɛŋklɛŋ kwraa akɛ amɛaafiliki lɛ. Beni G. R. Driver wieɔ yɛ Palestine Exploration Quarterly lɛ mli yɛ amaniɛbɔi ni tamɔ nɛkɛ mli lɛ, ekɛɛ: “Nii ahe mfoniri ni afee yɛ [Biblia] mli lɛ jeee filikimɔ kɛkɛ ni afeɔ he mfoniri yɛ jwɛŋmɔŋ, shi edamɔ anɔkwa sane diɛŋtsɛ nɔ.”
Okropɔŋi feɔ nɔkwɛmɔ nɔ akɛ fɔlɔi hu yɛ gbɛi krokomɛi anɔ. Jeee akɛ amɛkɛ niyenii haa bii abifabii lɛ daa kɛkɛ, shi moŋ loofɔlɔ nyɛ lɛ hu bɔɔ mɔdɛŋ etsɛrɛɔ loo ni okropɔŋ nuu lɛ kɛbaa tsũ lɛ mli lɛ mli bibiibii, bɔni afee ni okropɔŋ bi lɛ anyɛ ami. Akɛni efɔɔ kaa akɛ amɛmamɔɔ amɛtsũi yɛ tɛsaai gɔgɔmeei loo tsei kakadaji anɔ hewɔ lɛ, loofɔji abifabii lɛ nuɔ kɔɔyɔŋ tsakemɔi lɛ ahe. (Hiob 39:27, 28) Kɛ jeee kwɛmɔ ni okropɔŋ fɔlɔi kɛhaa kulɛ, hulu ni tsoɔ waa yɛ Biblia shikpɔji anɔ lɛ baanyɛ agbe loofɔlɔ ni edako lɛ. Okropɔŋ ni eda lɛ gbɛɔ efiji amli, bei komɛi lɛ ŋmɛlɛtswai abɔ yɛ be ko mli bɔni afee ni eha okropɔŋ bi ni esako lɛ aná hɔ̃ɔŋ.
Enɛ hewɔ lɛ esa jogbaŋŋ akɛ, akɛ okropɔŋ fiji aaatsu nii yɛ Ŋmalɛi lɛ amli akɛ ŋwɛi hebuu he okadi. 5 Mose 32:9-12 tsɔɔ bɔ ni Yehowa bu Israelbii lɛ ahe, be mli ni amɛfaa gbɛ kɛnyiɛ ŋa lɛ nɔ lɛ: “Ejaakɛ Yehowa gbɛfaŋnɔ ji emaŋ lɛ, Yakob ji egboshinii ni ená. Ena lɛ yɛ ŋa nɔ shikpɔŋ ko nɔ, yɛ ŋa olɛŋlɛ ni kooloi bolɔɔ yɛ nɔ lɛ nɔ. Ebu ehe, ekwɛ lɛ, ebaa eyi tamɔ ehiŋmɛi mli ajaŋmalaatɛ. Bɔ ni okropɔŋ hosoɔ etsũ ni etswaa efijiaŋ etsɔɔ ebii lɛ, nakai egbɛ efijiaŋ ni ewó lɛ, ehiɛ lɛ yɛ efiji anɔ. Yehowa kometoo kpala lɛ.” Kɛ wɔna hekɛnɔfɔɔ yɛ Yehowa mli lɛ, ekɛ hebuu ni suɔmɔ yɔɔ mli nɛkɛ nɔŋŋ baaha wɔ.
Gbɛ ni Atsɔɔ nɔ Ajeɔ Mli
Kɛ wɔkɛ naagbai kpe bei komɛi lɛ, ekolɛ wɔbaana akɛ wɔmiishwe ni wɔfiliki kɛje wɔnaagbai lɛ fɛɛ mli. Nakai pɛpɛɛpɛ David nu he. (Okɛto Lala 55:7, 8 he.) Shi eyɛ mli akɛ Yehowa ewo shi akɛ ebaaye ebua wɔ kɛ wɔkɛ kaai kɛ amanehului miikpe yɛ shihilɛ nɛɛ mli moŋ, shi ejieee wɔ kwraa kɛjɛɛɛ mli. Biblia lɛ maa nɔ mi kɛhaa wɔ akɛ: “Kaa ko bako nyɛnɔ ni jeee gbɔmɔ he nɔ; shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ni nyɛje mli hu, koni nyɛnyɛ̃ mli nyɛmɔ.”—1 Korintobii 10:13.
Nɔ ni fata “gbɛ ni akɛjeɔ mli” loo “gbɛ ko ni atsɔɔ nɔ ajeɔ mli” (King James Version) lɛ he ji ni aaakase bɔ ni akɛ he aaafɔ Yehowa nɔ aha. Enɛ ji nɔ ni Max Liebster, ni atsɛ ewiemɔi asɛɛ yɛ sane nɛɛ shishijee mli lɛ yɔse. Ebale Yehowa ni eŋɔ ehiɛ efɔ enɔ yɛ afii ni eye yɛ yiwalɛ ŋsarai amli lɛ mli. Taakɛ Max yɔse lɛ, Yehowa woɔ wɔ hewalɛ kɛtsɔɔ e-Wiemɔ, emumɔ, kɛ egbɛjianɔtoo lɛ nɔ. Yɛ ŋsarai lɛ amli po lɛ, Odasefoi lɛ tao hefatalɔi heyelilɔi ni amɛkɛ mumɔŋ yelikɛbuamɔ hã amɛ, amɛnaa Ŋmalɛ mli saji ahesusumɔ kɛ Biblia woji fɛɛ ni yɔɔ lɛ mli gbɛfaŋnɔ. Ni taakɛ anɔkwafoi ni je yiwaa lɛ mli lɛ yeɔ he odase shii abɔ lɛ, Yehowa wo amɛ hewalɛ. Max tsɔɔ mli akɛ: “Mitee nɔ mibi Yehowa ni eye ebua mi, ni emumɔ lɛ waje mi.”
Nakai nɔŋŋ hu wɔbaanyɛ wɔkɛ wɔhe afɔ̃ Nyɔŋmɔ mumɔ krɔŋkrɔŋ lɛ nɔ yɛ kaa fɛɛ kaa ni wɔkɛkpeɔ lɛ mli, kɛji wɔɔya nɔ wɔbi. (Mateo 7:7-11) Kɛ “hewalɛ ni fa kɛteke nɔ” nɛɛ waje wɔ lɛ, wɔbaafiliki kɛya ŋwɛi shɔŋŋ fe ni wɔ naagbai lɛ aaaye wɔ nɔ butuu. Wɔbaaya nɔ wɔnyiɛ yɛ Yehowa gbɛ nɔ, ni etɔŋ wɔ. Wɔbaahole wɔfiji anɔ tamɔ okropɔŋi.—2 Korintobii 4:7; Yesaia 40:31.
[Wiemɔ ni akɔ ni akɛmiitsu nii ni yɔɔ baafa 10]
Ekwɛŋ bo oya nɔŋŋ ni etsɔ ehiɛ eto he kroko
[He ni Mfoniri ni yɔɔ baafa 9 lɛ Jɛ]
Foto: Cortesía de GREFA
[He ni Mfoniri ni yɔɔ baafa 10 lɛ Jɛ]
Foto: Cortesía de Zoo de Madrid