Saji Ni Atsɛ Yisɛɛ Yɛ Wɔshiɛmɔ Kɛ Wɔshihilɛ Kpee Nifeemɔ Wolo Lɛ Mli
SEPTEMBER 6-12
NYƆŊMƆ WIEMƆ LƐ MLI JWETRII | 5 MOSE 33-34
“Baa Abo Yɛ Yehowa ‘Naanɔ Niji’ Lɛ Amli”
it-2 51
Yeshurun
Eji gbɛnaa gbɛ́i ni yɔɔ nyam ni akɛtsɛɔ Israel. Yɛ Greek Septuajint lɛ mli lɛ, akɛ “Yeshurun” tsu nii akɛ wiemɔ ni tsɔɔ akɛ asumɔɔ mɔ ko, ni atsɔɔ shishi akɛ “mɔ ni asumɔɔ.” Kulɛ, esa akɛ gbɛnaa gbɛ́i ni ji “Yeshurun” lɛ akai Israelbii lɛ akɛ, amɛji maŋ ni Yehowa kɛkpaŋ kpaŋmɔ, ni no hewɔ lɛ, esa akɛ amɛya nɔ amɛfee nɔ ni ja. (5Mo 33:5, 26; Yes 44:2) Yɛ 5 Mose 32:15 lɛ, akɛ gbɛnaa gbɛ́i Yeshurun lɛ tsu nii kɛye Israel he fɛo. Kulɛ, esa akɛ Israel ahi shi yɛ egbɛ́i Yeshurun lɛ naa, shi ebatsɔ kuɛŋtilɔ, ekwa e-Feelɔ lɛ, ni egbe e-Yiwalaherelɔ lɛ he guɔ.
Pɛimɔ Ŋmalɛi Lɛ Amli Jogbaŋŋ
it-2 439 kk. 3
Mose
Be ni Mose gbo lɛ, no mli lɛ eye afii 120. Nɔ ni Biblia lɛ wie yɛ ehe lɛ tsɔɔ akɛ, no mli lɛ eyɛ hewalɛ lolo. Ewie akɛ: “No mli lɛ, ehiŋmɛii anɔ ehako, ni ehewalɛ hu etãko.” Yehowa fu lɛ yɛ he ko ni mɔ ko mɔ ko leee kɛbashi ŋmɛnɛ. (5Mo 34:5-7) Ekolɛ, Yehowa fee nakai, koni Israelbii lɛ akayajá lɛ yɛ he ni afu lɛ yɛ lɛ, ni no hã amɛkɛ amɛhe wo amale jamɔ mli. Ekã shi faŋŋ akɛ, Abonsam shwe akɛ ekɛ Mose gbonyo lɛ baatsu yiŋtoo ni tamɔ nakai he nii, ejaakɛ Yesu Kristo nyɛmi nuu Yuda, ni eji Kristofonyo hu lɛ ŋma akɛ: “Be ni ŋwɛibɔfonukpa Mikael kɛ Abonsam taa naa ni amɛpeleɔ Mose gbonyo lɛ he lɛ, ekaaa akɛ ebaakojo lɛ kɛ wiemɔ fɔŋ ko, shi moŋ ekɛɛ akɛ: ‘Yehowa akã ohiɛ.’”—Yu 9.
SEPTEMBER 20-26
NYƆŊMƆ WIEMƆ LƐ MLI JWETRII | YOSHUA 3-5
“Yehowa Jɔɔ Mɛi Ni Jieɔ Hemɔkɛyeli Kpo Lɛ”
it-2 105
Yordan
Bei pii lɛ, Yordan Faa lɛ fã ni yɔɔ Galilea Ŋshɔ lɛ wuoyigbɛ lɛ mlikwɔlɛ ji mita 1 kɛmiimɔ 3 (nanetalɔi 3 kɛmiimɔ 10), ni elɛɛmɔ ji mitai 27 kɛmiimɔ 30 (nanetalɔi 90 kɛmiimɔ 100). Shi kɛ́ snoonɛmɔ be lɛ ho lɛ, Yordan Faa lɛ yiɔ kɛtekeɔ nɔ, ni elɛɔ waa ni emli kwɔɔ waa hu. (Yos 3:15) Akɛni faa lɛ eyi kɛteke nɔ hewɔ lɛ, efeŋ nɔ ni sa akɛ Israel maŋ lɛ kɛ emli hii, yei, kɛ gbekɛbii lɛ baafo, titri lɛ, yɛ he ni bɛŋkɛ Yeriko lɛ. Faa lɛ hoɔ kɛ foi waa yɛ jɛmɛ, ni yɛ ŋmɛnɛŋmɛnɛ beiaŋ po lɛ, ehole mɛi komɛi ni yawu lɛ kɛtee. Shi, Yehowa tsɔ naakpɛɛ gbɛ nɔ ehã Yordan Faa lɛ wa kɛdamɔ shi, ni no hã Israelbii nyɛ amɛtsɔ shikpɔŋ gbiŋ nɔ kɛfo.—Yos 3:14-17.
OCTOBER 4-10
NYƆŊMƆ WIEMƆ LƐ MLI JWETRII | YOSHUA 8-9
“Nɔ Ni Wɔbaanyɛ Wɔkase Yɛ Gibeonbii Lɛ Asane Lɛ Mli”
it-1 930-931
Gibeon
Eyɛ mli akɛ Gibeonbii lɛ ahe wa, ni amɛmaŋ lɛ ji maŋ wulu moŋ, shi amɛna akɛ, Yehowa miiwu eehã Israel, no hewɔ lɛ, esaaa akɛ amɛkɛ Israelbii lɛ wuɔ ta, ejaakɛ amɛyeŋ kunim. No hewɔ lɛ, be ni akpãtã Yeriko kɛ Ai hiɛ lɛ sɛɛ lɛ, Gibeonbii lɛ tsu kɛtee Yoshua ŋɔɔ yɛ Gilgal koni amɛyakpaŋ toiŋjɔlɛ kpaŋmɔ, ni eeenyɛ efee akɛ, amɛtee yɛ Hivbii amaji etɛ krokomɛi, ni ji Kefira kɛ Beerot kɛ Kiriat-yearim lɛ hu najiaŋ. (Yos 9:17) Gibeonbii ni tee Yoshua ŋɔɔ lɛ wo atadei memeji kɛ tokotai memeji ni atsaratsarai, ni amɛhiɛ wain kotokui memeji ni egbálagbálai, kotokui memeji, kɛ blodoi ni egbigbii ni amɛfee fulufulu, koni ana amɛ tamɔ mɛi ni jɛ maŋsɛɛ shɔŋŋ ni fataaa mɛi ni esa akɛ Israel akpãtã amɛhiɛ lɛ ahe. Amɛkpɛlɛ nɔ akɛ, Yehowa ji mɔ ni hã aye Ejipt kɛ Amorbii lɛ amaŋtsɛmɛi, Sihon kɛ Og nɔ kunim lɛ. Shi amɛkɛ hiɛshikamɔ tsu nii, ni amɛtsĩii nɔ ni ba Yeriko kɛ Ai nɔ lɛ tã, ejaakɛ kɛ́ amɛjɛ “maŋsɛɛ shɔŋŋ” lɛɛlɛŋ lɛ, amɛnáŋ amɛnu he dani amɛshi kɛba Yoshua ŋɔɔ. Israel najiaŋdamɔlɔi lɛ kwɛ amɛnibii lɛ, ni amɛkpɛlɛ nɔ akɛ, nɔ ni amɛwieɔ lɛ ji anɔkwale, ni amɛkɛ amɛ kpaŋ akɛ amɛkpãtãŋ amɛhiɛ.—Yos 9:3-15.
Pɛimɔ Ŋmalɛi Lɛ Amli Jogbaŋŋ
it-1 1030
Sɛŋmɔ
Yɛ mla ni Yehowa kɛhã Israelbii lɛ mli lɛ, kɛ́ agbe efɔŋfeelɔi komɛi lɛ, abaanyɛ asɛŋ amɛ yɛ tso jaŋŋ nɔ akɛ “Nyɔŋmɔ loomɔ nɔ,” ní akɛ amɛ atsɔɔ kɛbɔ kɔkɔ. Mla lɛ bi ni kɛ́ agbe mɔ ko ni asɛŋ lɛ lɛ, ajie lɛ ni afũ lɛ dani je ana; kɛ́ ahã gbonyo lɛ hi tso jaŋŋ lɛ nɔ jenamɔ muu fɛɛ lɛ, no baabule shikpɔŋ ni Nyɔŋmɔ kɛhã Israelbii lɛ. (5Mo 21:22, 23) Israelbii lɛ kɛ mla nɛɛ tsu nii, kɛ́ mɔ ni agbe lɛ lɛ jeee Israelnyo po.—Yos 8:29; 10:26, 27.
KASEMƆ BƆ NI ASHIƐƆ JOGBAŊŊ
Wiemɔ
it-1 520; 525 kk. 1
Kpaŋmɔ
Eji gbeekpamɔ ni yɔɔ mɛi enyɔ loo nɔ ni fa fe nakai ateŋ akɛ amɛbaafee nɔ ko, loo amɛfeŋ nɔ ko. Abɛ nɔmimaa yɛ bɔ ni fee ni aná Hebri wiemɔ ni ji berithʹ, ni atsɔɔ shishi akɛ kpaŋmɔ lɛ he. Eje kpo yɛ Hebri Ŋmalɛ lɛ mli nɔ ni fa fe shii 280; ni emli nɔ ni fa fe 80 jeɔ kpo yɛ Mose woji enumɔ lɛ amli.
Kpaŋmɔi Krokomɛi. (a) Kpaŋmɔ ni Israel onukpai lɛ fata Yoshua he ni amɛkɛ Gibeonbii lɛ kpaŋ akɛ amɛkpãtãŋ amɛhiɛ lɛ. Eyɛ mli akɛ Gibeonbii lɛ ji Kanaanbii ni alomɔ amɛ ni esa akɛ Israelbii lɛ akpãtã amɛhiɛ moŋ, shi akɛni Israelbii lɛ kɛ amɛ ekpaŋ hewɔ lɛ, akpãtãaa amɛhiɛ, shi ahã amɛtsɔmɔ laiyalɔi kɛ faaŋyalɔi amɛhã Israel maŋ lɛ, ejaakɛ alomɔ amɛ.—Yos 9:15, 16, 23-27.
OCTOBER 11-17
NYƆŊMƆ WIEMƆ LƐ MLI JWETRII | YOSHUA 10-11
“Yehowa Wu Ehã Israel”
it-1 50
Adoni-zedek
Be ni Israelbii lɛ wuɔ amɛshiɔ maji ni yɔɔ Shiwoo Shikpɔŋ lɛ nɔ lɛ, no mli lɛ, Adoni-zedek ji Yerusalem maŋtsɛ. Adoni-zedek kɛ maŋtsɛyelii bibii krokomɛi ni yɔɔ Yordan Faa lɛ anaigbɛ lɛ fee ekome koni amɛkɛ Yoshua asraafoi lɛ awu ni amɛkanyɛ amɛŋɔ Shiwoo Shikpɔŋ lɛ. (Yos 9:1-3) Shi, Hivbii ni yɔɔ Gibeon lɛ, kɛ Yoshua kpaŋ toiŋjɔlɛ kpaŋmɔ. Adoni-zedek kɛ Amorbii lɛ amaŋtsɛmɛi ejwɛ krokomɛi fee ekome ni amɛyabɔ nsara amɛwo Gibeon he koni amɛkɛ amɛ awu. Amɛfee nakai koni maji krokomɛi ni yɔɔ Kanaan shikpɔŋ lɛ nɔ lɛ hu kɛ Israelbii lɛ akayakpaŋ toiŋjɔlɛ kpaŋmɔ.
it-1 1020
Nyɔŋmɔŋtɛ
Be ni Amorbii lɛ amaŋtsɛmɛi enumɔ lɛ yabɔ nsara amɛwo Gibeonbii lɛ ahe koni amɛkɛ amɛ awu lɛ, Yoshua nyiɛ Israelbii lɛ ahiɛ koni amɛyaye amɛbua Gibeonbii lɛ. Be ni awuɔ ta lɛ, Yehowa hã nyɔŋmɔŋtɛi wuji nɛ shwie Amorbii lɛ anɔ. Mɛi ni nyɔŋmɔŋtɛi lɛ gbe lɛ ayi fa fe mɛi ni Israelbii lɛ kɛ klante gbe lɛ.—Yos 10:3-7, 11.
OCTOBER 18-24
NYƆŊMƆ WIEMƆ LƐ MLI JWETRII | YOSHUA 12-14
Pɛimɔ Ŋmalɛi Lɛ Amli Jogbaŋŋ
it-1 902-903
Gebal
Yehowa tsĩ “Gebalbii lɛ ashikpɔŋ lɛ” tã efata shikpɔji ni eshwɛ ni esa akɛ Israelbii lɛ aŋɔ yɛ Yoshua gbii lɛ amli lɛ ahe. (Yos 13:1-5) Gebal maŋ lɛ yɛ Israel kooyigbɛ shɔŋŋ (aaafee kilomitai 100 [mailii 60] yɛ Dan kooyigbɛ), ni etamɔ nɔ ni Israelbii lɛ náaa amɛŋɔ nakai maŋ lɛ, no hewɔ lɛ, mɛi ni wieɔ amɛshiɔ Biblia lɛ tsĩɔ sane nɛɛ tã amɛkɛɔ akɛ saji komɛi yɛ Biblia lɛ mli ni ejaaa. Nilelɔi komɛi susuɔ akɛ, atsake Hebri Ŋmalɛ lɛ hiɛ yɛ kuku nɛɛ mli, ni amɛtsɔɔ akɛ, be ni aŋma klɛŋklɛŋ kwraa yɛ blema lɛ, nɔ aŋma yɛ jɛmɛ ji, “shikpɔŋ ni kɛ Lebanon jeɔ husu lɛ,” loo ‘aahu kɛyashi Gebalbii lɛ ahusu lɛ naa.’ Shi esa akɛ wɔkadi akɛ, yɛ shiwoi ni atsĩ tã yɛ Yoshua 13:2-7 lɛ gbɛfaŋ lɛ, Yehowa bi ni Israelbii lɛ afee nɔ ko dani eye shiwoi lɛ anɔ. No hewɔ lɛ, ekolɛ, Israelbii lɛ náaa aŋɔ Gebal, yɛ amɛ diɛŋtsɛ amɛtoigbele hewɔ.—Okɛto Yos 23:12, 13 lɛ he.
OCTOBER 25-31
NYƆŊMƆ WIEMƆ LƐ MLI JWETRII | YOSHUA 15-17
“Buu Ogboshinii Ni Jara Wa Lɛ He”
it-1 1083 kk. 3
Hebron
Be ni Israelbii lɛ wuɔ ta koni amɛŋɔ Kanaan wuoyi lɛ, amɛkpãtã mɛi ni yɔɔ Hebron lɛ ahiɛ, ni amɛmaŋtsɛ lɛ (ni ekã shi faŋŋ akɛ, lɛ eye Hoham sɛɛ lɛ) hu fata he. (Yos 10:36, 37) Eyɛ mli akɛ Yoshua nyiɛ Israelbii lɛ ahiɛ ni amɛye Kanaanbii lɛ anɔ kunim moŋ, shi etamɔ nɔ ni kɛ́ amɛye maŋ ko nɔ lɛ, amɛshiii asraafoi lɛ ekomɛi yɛ jɛmɛ koni amɛbu he. Ekã shi faŋŋ akɛ, be ni Israelbii lɛ wuɔ ta yɛ he kroko lɛ, Anakbii lɛ ku sɛɛ amɛba Hebron ekoŋŋ, ni no hewɔ ni ehe bahia ni Kaleb aŋɔ maŋ lɛ (loo Kaleb anyiɛ Yudabii lɛ ahiɛ kɛyaŋɔ maŋ lɛ) kɛje amɛdɛŋ ekoŋŋ lɛ.—Yos 11:21-23; 14:12-15; 15:13, 14; Koj 1:10.
it-1 848
Nitsumɔ Ni Wa
Be ni Israelbii lɛ yashɛ Shiwoo Shikpɔŋ lɛ nɔ lɛ, amɛnyɛ Kanaanbii lɛ anɔ koni amɛtsu nitsumɔ ni wa, moŋ fe ni amɛbaaye Yehowa famɔ akɛ, amɛkpãtã amɛhiɛ kɛjie amɛ kwraa kɛje shikpɔŋ lɛ nɔ lɛ nɔ. Nɔ ni amɛfee lɛ hã amɛyajá amale nyɔŋmɔi.—Yos 16:10; Koj 1:28; 2:3, 11, 12.
it-1 402 kk. 3
Kanaan
Eyɛ mli akɛ Kanaanbii lɛ yɛ tawuu nibii ni hi fe Israelbii lɛ anɔ lɛ, tamɔ shwiilii kɛ amɛhe dadei moŋ, shi anyɛŋ ashwa Yehowa akɛ eyeee eshiwoi lɛ anɔ, akɛni Israelbii lɛ eyanyɛɛɛ amɛŋɔ Kanaanbii lɛ ashikpɔji lɛ ekomɛi lɛ hewɔ. (Yos 17:16-18; Koj 4:13) Amaniɛ ni abɔ yɛ Biblia lɛ mli lɛ hãa efeɔ faŋŋ akɛ, Israelbii lɛ atoigbele hewɔ aye amɛnɔ kunim bei fioo komɛi lɛ.—4Mo 14:44, 45; Yos 7:1-12.
Pɛimɔ Ŋmalɛi Lɛ Amli Jogbaŋŋ
Ani Ole?
Ani no mli lɛ tsei babaoo yɛ blema Israel tamɔ Biblia lɛ tsɔɔ lɛ?
BIBLIA lɛ tsɔɔ akɛ, no mli lɛ, koi yɛ Shiwoo Shikpɔŋ lɛ nɔ hei komɛi, ni akɛ, tsei ‘ebu’ yɛ jɛmɛ. (1 Maŋ. 10:27; Yos. 17:15, 18) Shi ŋmɛnɛ lɛ, bɔ ni tsei etã yɛ Shiwoo Shikpɔŋ lɛ nɔ hei babaoo lɛ baahã mɛi ni yiŋ etɛ̃ɛɛ amɛ yɛ Biblia lɛ he lɛ asusu akɛ sane nɛɛ bɛ mli.
Wolo ni ji, Life in Biblical Israel lɛ tsɔɔ mli akɛ, “no mli lɛ, koi ni yɔɔ blema Israel lɛ fa kwraa fe bɔ ni eji ŋmɛnɛ lɛ.” No mli lɛ, tsei titri ni yɔɔ gɔji lɛ anɔ ji, Alɛpo paini (Pinus halepensis), ooki ni yɔɔ frɔ̃frɔ̃ be fɛɛ be (Quercus calliprinos), kɛ terebinti (Pistacia palaestina). No mli lɛ, sikamore agbami tsei (Ficus sycomorus) hu ebu yɛ Shefela lɛ, ni ji he ko ni kã gɔji lɛ kɛ Mediterenia Ŋshɔ lɛ teŋ lɛ.
Wolo ni ji, Plants of the Bible lɛ tsɔɔ mli akɛ, bianɛ lɛ, tsei etã kwraa yɛ Israel hei komɛi. Mɛni hã eba lɛ nakai? Wolo lɛ tsɔɔ mli akɛ, nifeemɔ nɛɛ tee nɔ fiofio, ni ewie akɛ: “Akɛni adesai miitao he ko kɛfee ŋmɔ, he ko ni amɛkooloi baaye nii yɛ, kɛ he ko ni amɛbaaná tsumaa nibii kɛ lai ni amɛkɛbaashɛre la hewɔ lɛ, amɛtee nɔ amɛkpãtã koi lɛ ahiɛ.”