Saji Ni Atsɛ Yisɛɛ Yɛ Wɔshiɛmɔ Kɛ Wɔshihilɛ Kpee Nifeemɔ Wolo Lɛ Mli

NOVEMBER 1-7

NYƆŊMƆ WIEMƆ LƐ MLI JWETRII | YOSHUA 18-19

“Yehowa Jɛ Hiɛshikamɔ Mli Eja Shikpɔŋ Lɛ”

it-1 359 kk. 1

Husu

Etamɔ nɔ ni adamɔ nibii enyɔ nɔ aja shikpɔŋ lɛ ahã wekui lɛ: bɔ ni oshiki ni afɔ̃ lɛ naa yakpa hã, kɛ weku lɛ dalɛ. Oshikifɔ̃ɔ lɛ hã ana he ni weku fɛɛ weku baaná eshikpɔŋ yɛ, kɛ́ yɛ kooyigbɛ loo wuoyigbɛ jio, bokãgbɛ loo anaigbɛ jio, ŋshɔnaagbɛ loo hei ni gɔji yɔɔ jio. Bɔ ni oshiki ni afɔ̃ lɛ naa yakpa hã lɛ jɛ Yehowa ŋɔɔ, ni no hewɔ lɛ, ehãaa awuŋayeli loo béi ate shi yɛ wekui lɛ ateŋ. (Abɛ 16:33) Nyɔŋmɔ tsɔ nɛkɛ gbɛ nɔ ekudɔ saji koni gbalɛ ni ekɛ mumɔ tsirɛ blematsɛ Yakob ni egba yɛ weku fɛɛ weku he be ni eshwɛ fioo ni ebaagbo lɛ aba mli, ni aŋma gbalɛ nɛɛ yɛ 1 Mose 49:1-33.

it-1 1200 kk. 1

Gboshinii

Yɛ Yakob gbalɛ ni yɔɔ 1 Mose 49:5, 7 lɛ naa lɛ, ahãaa Simeon kɛ Levi amɛ sɔŋŋ amɛshikpɔŋ akɛ amɛgboshinii. Ahã Simeon shikpɔŋ (kɛ maji ni ajie ato) yɛ Yuda nɔ lɛ mli (Yos 19:1-9), ni ahã Levi maji 48 yɛ Israel kpokpaa lɛ fɛɛ nɔ. Akɛni Levibii lɛ ná hegbɛ krɛdɛɛ akɛ amɛbaayasɔmɔ yɛ jamɔhe lɛ hewɔ lɛ, awie akɛ Yehowa ji amɛgboshinii. Akɛ nibii amlijai nyɔŋma mli ekomekomei lɛ hã amɛ akɛ amɛgbɛfaŋnɔ loo amɛgboshinii yɛ sɔɔmɔ ni amɛsɔmɔ lɛ hewɔ.​—4Mo 18:20, 21; 35:6, 7.

it-1 359 kk. 2

Husu

Be ni oshikifɔ̃ɔ lɛ ehã ana he ni weku fɛɛ weku baaná eshikpɔŋ yɛ lɛ, no sɛɛ lɛ, adamɔɔ weku fɛɛ weku dalɛ nɔ atsɔɔ he ni eshikpɔŋ lɛ naa baayawa. Afã amɛ akɛ: “Nyɛfɔ̃a oshiki kɛjaa shikpɔŋ lɛ nyɛhãa nyɛwekui lɛ akɛ amɛgbɛfaŋnɔ. Kui ni dara lɛ, nyɛhãa amɛgboshinii lɛ afaa, ni kui ni daraaa lɛ, nyɛtsea amɛgboshinii lɛ nɔ. Mɔ fɛɛ mɔ lɛ, he ni eshiki lɛ baagbee lɛ, jɛmɛ baatsɔ egboshinii.” (4Mo 33:54) Atsakeee he ni oshikifɔ̃ɔ lɛ hã ana akɛ weku fɛɛ weku baaná eshikpɔŋ yɛ lɛ, shi atsake he ni wekui lɛ ekomɛi ashikpɔji anaa yawaa. Enɛ hewɔ lɛ, be ni ana akɛ Yuda weku lɛ shikpɔŋ lɛ da tsɔ lɛ, akɛ shikpɔji komɛi ni yɔɔ enɔ lɛ mli lɛ, hã Simeon weku lɛ.​—Yos 19:9.

Pɛimɔ Ŋmalɛi Lɛ Amli Jogbaŋŋ

it-1 359 kk. 5

Husu

Etamɔ nɔ ni akpa shikpɔŋ lɛ jaa kɛyashi be ko, ejaakɛ Biblia lɛ hãa wɔnaa akɛ, Israel nsara lɛ fã kɛjɛ Gilgal kɛtee Shilo. (Yos 14:6; 18:1) Atsɔɔɔ be ni enɛ he moŋ, shi sɛɛ mli lɛ, Yoshua kã wekui kpawo ni eshwɛ lɛ ahiɛ akɛni amɛmiishashao shi akɛ amɛbaayaŋɔ shikpɔŋ ni eshwɛ lɛ hewɔ. (Yos 18:2, 3) Mɛi hiɛ susumɔi srɔtoi yɛ nɔ hewɔ ni wekui kpawo ni eshwɛ lɛ fee amɛnii yɛ nakai gbɛ nɔ lɛ he. Mɛi komɛi tsɔɔ mli akɛ, be ni Israelbii lɛ kɛ Kanaanbii lɛ wu ta lɛ, amɛná ta mli nii babaoo, ni agbɛnɛ hu, no mli lɛ Kanaanbii lɛ gbaaa amɛnaa tsɔ, ni no hewɔ lɛ, eeenyɛ efee akɛ, wekui nɛɛ nuuu he akɛ ehe hiaa waa ni amɛyaŋɔ shikpɔŋ ni eshwɛ lɛ. Kanaan maji lɛ ekomekomei komɛi yɛ ni kɛ Israelbii lɛ tswa waa, ni eeenyɛ efee akɛ, no ni hã Israelbii lɛ shashao shi akɛ amɛbaayaŋɔ shikpɔŋ ni eshwɛ lɛ. (Yos 13:1-7) Agbɛnɛ hu, etamɔ nɔ ni amɛleee Shiwoo Shikpɔŋ lɛ fã nɛɛ shikamɔ lɛ jogbaŋŋ, kɛ́ akɛto nɔ ni aja ahã amɛ momo lɛ he.

NOVEMBER 8-14

NYƆŊMƆ WIEMƆ LƐ MLI JWETRII | YOSHUA 20-22

Pɛimɔ Ŋmalɛi Lɛ Amli Jogbaŋŋ

it-1 402 kk. 3

Kanaan

Eyɛ mli akɛ Israelbii lɛ eyanyɛɛɛ amɛkpãtã Kanaanbii lɛ pii ahiɛ, ni Kanaanbii nɛɛ eŋmɛɛɛ gbɛ ni aye amɛnɔ moŋ, shi loloolo lɛ, abaanyɛ akɛɛ akɛ “Yehowa kɛ shikpɔŋ lɛ fɛɛ ni ekã kitã akɛ ekɛbaahã Israelbii lɛ atsɛmɛi lɛ hã Israel,” ni akɛ, ehã “amɛ hejɔɔmɔ kɛkpe,” ni akɛ, “nibii kpakpai fɛɛ ni Yehowa wo shi akɛ ebaafee ehã Israelbii lɛ ateŋ ekome folo po ekaaa shi; fɛɛ ba mli.” (Yos 21:43-45) Israelbii lɛ ahenyɛlɔi lɛ fɛɛ atsui fã, ni no hewɔ lɛ, amɛnyɛŋ amɛfee Israelbii lɛ nɔ ko. Mra mli lɛ, Nyɔŋmɔ ekɛɛ Israelbii lɛ akɛ, ebaashwie Kanaanbii lɛ kɛje shikpɔŋ lɛ nɔ “fiofio,” koni kooloi awuiyelɔi ayi akafa yɛ shikpɔŋ ni baakã shi efolo trukaa lɛ nɔ. (2Mo 23:29, 30; 5Mo 7:22) Eyɛ mli akɛ Kanaanbii lɛ yɛ tawuu nibii ni hi fe Israelbii lɛ anɔ lɛ, tamɔ shwiilii kɛ amɛhe dadei moŋ, shi anyɛŋ ashwa Yehowa akɛ eyeee eshiwoi lɛ anɔ, akɛni Israelbii lɛ eyanyɛɛɛ amɛŋɔ Kanaanbii lɛ ashikpɔji lɛ ekomɛi lɛ hewɔ. (Yos 17:16-18; Koj 4:13) Amaniɛ ni abɔ yɛ Biblia lɛ mli lɛ hãa efeɔ faŋŋ akɛ, Israelbii lɛ atoigbele hewɔ aye amɛnɔ kunim bei fioo komɛi lɛ.​—4Mo 14:44, 45; Yos 7:1-12.

NOVEMBER 15-21

NYƆŊMƆ WIEMƆ LƐ MLI JWETRII | YOSHUA 23-24

“Naagbee Ŋaa Ni Yoshua Wo Maŋbii Lɛ”

it-1 75

Kpaŋmɔ

Nyɔŋmɔ Ofe lɛ ye shi ni ewo Israelbii lɛ ablematsɛmɛi lɛ nɔ, ni ekɛ Shiwoo Shikpɔŋ lɛ hã Israelbii akɛ amɛnɔ kwraa. No hewɔ lɛ, be ni amɛtee Shiwoo Shikpɔŋ lɛ nɔ lɛ, amɛyaaa akɛ gbɔi, ni Yehowa wo amɛ kitã hu akɛ, amɛkɛ jeŋmaji ni jáa amagai ni yɔɔ shikpɔŋ lɛ nɔ lɛ akakpaŋ kpaŋmɔ ko kwraa. (2Mo 23:31-33; 34:11-16) Esa akɛ amɛye Nyɔŋmɔ mlai kɛ ekitãi lɛ pɛ anɔ, shi jeee jeŋmaji ni etsɛŋ abaashwie amɛ kɛje shikpɔŋ lɛ nɔ lɛ amlai lɛ. (3Mo 18:3, 4; 20:22-24) Awo amɛ kitã waa akɛ, amɛkɛ jeŋmaji nɛɛ akakpaŋ gbãla kpaŋmɔ. Kɛ́ amɛfee nakai lɛ, jeee amɛŋamɛi ni ji amagajalɔi lɛ pɛ amɛkɛbaashãra, shi moŋ, amɛkɛ amɛŋamɛi lɛ awekumɛi, ni ji amagajalɔi lɛ hu baashãra, ni amɛbaana amale jamɔ nifeemɔi kɛ kusumii, ni enɛ baanyɛ atsɔ amɛ tsɔne ni ehã amɛkwa anɔkwa jamɔ.​—5Mo 7:2-4; 2Mo 34:16; Yos 23:12, 13.

DECEMBER 13-19

NYƆŊMƆ WIEMƆ LƐ MLI JWETRII | KOJOLƆI 8-9

Pɛimɔ Ŋmalɛi Lɛ Amli Jogbaŋŋ

it-1 753 kk. 1

Efɔd, I

Eyɛ mli akɛ Gideon fee efɔd lɛ koni akɛkai kunim ni Yehowa hã Israel ye lɛ, ni akɛwo Nyɔŋmɔ hiɛ nyam moŋ, shi “ebatsɔ tsɔne kɛhã Gideon kɛ eshĩabii lɛ,” ejaakɛ Israelbii lɛ yajá efɔd lɛ, ni no tsɔɔ akɛ, amɛje Yehowa sɛɛ. (Koj 8:27) Shi Biblia lɛ ekɛɛɛ akɛ Gideon hu já efɔd lɛ; moŋ lɛ, bɔfo Paulo tsĩ Gideon tã efata “odasefoi babaoo tamɔ atatu,” ni ji Yehowa Odasefoi anɔkwafoi ni hi shi dani Kristo ba lɛ ahe.​—Heb 11:32; 12:1.

DECEMBER 20-26

NYƆŊMƆ WIEMƆ LƐ MLI JWETRII | KOJOLƆI 10-12

“Yefta Ji Nyɔŋmɔ Gbɔmɔ”

it-2 27 kk. 2

Yefta

Yefta hã ana akɛ, ejeee tawulɔ ni hiɛ gbeleko ni leee nɔ ko, shi moŋ, ele blema saji jogbaŋŋ, titri lɛ, nɔ ni kɔɔ Nyɔŋmɔ kɛ ewebii lɛ ahe. Ehã ana akɛ Amonbii lɛ asusumɔ lɛ ejaaa, ni etsɔɔ akɛ (1) Israelbii lɛ haooo Amonbii lɛ, Moabbii lɛ, loo Edombii lɛ (Koj 11:14-18; 5Mo 2:9, 19, 37; 2Kr 20:10, 11); (2) be ni Israelbii lɛ kɛ maji lɛ wuɔ ta lɛ, no mli lɛ, jeee Amonbii lɛ ji mɛi ni yɔɔ shikpɔŋ ni awieɔ he lɛ nɔ, shi moŋ Amorbii ni ji Kanaanbii lɛ, ejaakɛ Nyɔŋmɔ kɛ Amorbii lɛ amaŋtsɛ Sihon kɛ eshikpɔŋ lɛ hã Israelbii lɛ; (3) yɛ afii 300 ni Israelbii lɛ kɛhi nakai shikpɔŋ lɛ nɔ lɛ mli fɛɛ lɛ, Amonbii lɛ ewieee akɛ shikpɔŋ lɛ ji amɛnɔ; no hewɔ lɛ, amrɔ nɛɛ, amɛbɛ yiŋtoo kpakpa ko hewɔ ni amɛbaakɛɛ akɛ amɛnɔ ni.​—Koj 11:19-27.

it-2 27 kk. 3

Yefta

Yefta tsɔɔ akɛ, sane lɛ kɔɔ jamɔ he, ni ekɛtsɔɔ akɛ, no ji nɔ ni he hiaa fe fɛɛ yɛ sane lɛ mli. Ewie akɛ, Yehowa kɛ shikpɔŋ lɛ ehã Israelbii lɛ, ni no hewɔ lɛ, amɛŋmɛŋ shikpɔŋ lɛ fã bibioo po he amɛhãŋ mɛi ni jáa amale nyɔŋmɔ.

Pɛimɔ Ŋmalɛi Lɛ Amli Jogbaŋŋ

it-2 26

Yefta

Yefta Jeee Ajwamaŋbi. No mli lɛ, Yefta mami ji “ashawo yoo,” shi no etsɔɔɔ akɛ ashawofeemɔ mli ajɛ afɔ lɛ, loo eji ajwamaŋbi. No mli lɛ, emami ji ashawo yoo dani Gilead ŋɔ lɛ ni ekɛ lɛ hi shi akɛ ehemɔ, tamɔ bɔ ni Rahab ji ashawo yoo, shi sɛɛ mli lɛ, Salmon kɛ lɛ bote gbãla mli lɛ. (Koj 11:1; Yos 2:1; Mat 1:5) Gilead ŋa diɛŋtsɛ lɛ bihii lɛ shwie amɛtsɛ bi Yefta koni ekɛ amɛ akaye amɛgboshinii lɛ, ni no tsɔɔ akɛ, Yefta jeee ajwamaŋbi. (Koj 11:2) Kɛfata he lɛ, sɛɛ mli lɛ, Gileadbii lɛ kpɛlɛ Yefta nɔ akɛ amɛhiɛnyiɛlɔ (ni etamɔ nɔ ni Yefta nyɛmimɛi hii lɛ ji mɛi nɛɛ ateŋ hiɛnaanɔbii). (Koj 11:11) Agbɛnɛ hu, eyashã afɔle ehã Nyɔŋmɔ yɛ sɔlemɔ buu lɛ naa. (Koj 11:30, 31) Eji Yefta ji ajwamaŋbi kulɛ, enyɛŋ efee nibii nɛɛ ateŋ eko eko, ejaakɛ aŋma yɛ Mla lɛ mli akɛ: “Ajwamaŋbi ko ajwamaŋbi ko akaba Yehowa asafo lɛ mli. Ni eseshibii lɛ ateŋ mɔ ko kwraa akaba Yehowa asafo lɛ mli, aahu kɛyashi yinɔ ni ji nyɔŋma lɛ po nɔ.”​—5Mo 23:2.