Sɔɔmɔ Yehowa Yɛ Anɔkwayeli Mli
“Mɔ ni yeɔ anɔkwa lɛ, [Yehowa] okɛ lɛ baaye yɛ anɔkwayeli mli.”—2 SAMUEL 22:26, New World Translation.
1. Te Yehowa kɛ mɛi ni yeɔ lɛ anɔkwa lɛ yeɔ haa tɛŋŋ?
ANYƐŊ ato nɔ ni Yehowa feɔ haa ewebii lɛ fɛɛ najiaŋ aha lɛ. (Lala 116:12) Kwɛ bɔ ni emumɔŋ kɛ heloo naa nikeenii kɛ emɔbɔnalɛ lɛ yɔɔ naakpɛɛ ha! Maŋtsɛ David ni hi blema Israel lɛ le hu akɛ Nyɔŋmɔ feɔ nii yɛ anɔkwayeli mli yɛ mɛi ni yeɔ lɛ anɔkwa lɛ ahe. David kɛɛ nakai yɛ lala ko ni efo lɛ mli yɛ “gbi ni Yehowa jie lɛ yɛ ehenyɛlɔi lɛ fɛɛ adɛŋ kɛ [Maŋtsɛ] Saul hu dɛŋ lɛ.”—2 Samuel 22:1.
2. Mɛni ji saji otii ni jeɔ kpo yɛ David lala ni yɔɔ 2 Samuel yitso 22 lɛ mli?
2 David je elala (ni tamɔ Lala 18) lɛ shishi kɛtsɔ Yehowa yijiemɔ akɛ “e-Herelɔ” yɛ esɔlemɔ lɛ hetoo-hamɔ mli lɛ nɔ. (2 Samuel 22:2-7) Nyɔŋmɔ jɛ eŋwɛi sɔlemɔwe lɛ efee nii koni ekɛhere etsulɔ anɔkwafo lɛ kɛjɛ ehenyɛlɔi ni he wa lɛ adɛŋ. (2Sa 22 Kukuji 8-19) No hewɔ lɛ awo David nyɔmɔ yɛ gbɛ ni ja ni etsɔ nɔ lɛ kɛ Yehowa gbɛ̀i ni enyiɛ nɔ lɛ hewɔ. (2Sa 22 Kukuji 20-27) Nɔ ni etsi ta kɛnyiɛ sɛɛ ji nii ni etsu yɛ hewalɛ ni Nyɔŋmɔ kɛha lɛ lɛ mli. (2Sa 22 Kukuji 28-43) Yɛ naagbee lɛ, David tsi eyiwala ni ahere kɛjɛ tɔmɔ-taolɔi ni yɔɔ emaŋ lɛ mli lɛ kɛ ehenyɛlɔi ni yɔɔ maŋsɛɛ lɛ adɛŋ lɛ ta ni eda Yehowa shi akɛ “Mɔ ni kɛ yiwalaheremɔ kpele haa [e]maŋtsɛ lɛ, ni [e]feɔ mɔ ni [e]fɔ lɛ mu lɛ ni ji David kɛ eseshibii lɛ ejurɔ kɛyaa naanɔ lɛ!” (2Sa 22 Kukuji 44-51) Yehowa baanyɛ ahere wɔ hu kɛji akɛ wɔdi gbɛ ni ja sɛɛ ni wɔkɛ wɔhe fɔ enɔ kɛha hewalɛ.
Nɔ Ni Anɔkwa Ni Aaaye lɛ Tsɔɔ
3. Kɛ aasusu he yɛ Ŋmalɛ naa lɛ, ni aaaye anɔkwa lɛ tsɔɔ mɛni?
3 David kpɔmɔ lala lɛ kɛ nɔmimaa ni shɛjeɔ wɔmii nɛɛ haa wɔ: “Mɔ ni yeɔ anɔkwa lɛ, [Yehowa] okɛ lɛ baaye yɛ anɔkwayeli mli.” (2 Samuel 22:26) Hebri wiemɔ sutsɔɔlɔ, cha·sidhʹ lɛ ji nɔ ni tsɔɔ “mɔ ni yeɔ anɔkwa,” loo “mɔ ni ji durolɔ [ni mli hi].” (Lala 18:26, NW shishigbɛ niŋmaa) Jwɛŋmɔ ni yɔɔ wiemɔ, che’sedh lɛ sɛɛ ji mlihilɛ ni jɛɔ suɔmɔ mli ekɛ ehe kpɛtɛɔ nɔ ko he kɛyashiɔ be mli ni eyiŋtoo ni kɔɔ he lɛ baa mli. Yehowa jieɔ mlihilɛ ni tamɔ nakai kpo yɛ etsuji ahe, taakɛ bɔ ni amɛ hu amɛjieɔ lɛ kpo amɛtsɔɔ lɛ lɛ. Atsɔɔ anɔkwayeli ni yɔɔ krɔŋkrɔŋ nɛɛ shishi akɛ “mlihilɛ” kɛ “anɔkwa suɔmɔ.” (1 Mose 20:13; 21:28, NW) Yɛ Hela Ŋmalɛi lɛ amli lɛ, “anɔkwayeli” hiɛ jwɛŋmɔ ni ji krɔŋkrɔŋfeemɔ kɛ woo, ni ajieɔ enɛ kpo yɛ wiemɔ, ho·si·oʹtes kɛ sutsɔɔlɔ hoʹsi·os mli. Nɔ ni fata anɔkwayeli ni tamɔ nɛkɛ he ji hetuu-kɛhamɔ, ni etsɔɔ mɔ ni kɛ ehe eha Nyɔŋmɔ jamɔ kwraa ni kɛ henɔkwɛmɔ jogbaŋŋ tsuɔ nitsumɔi fɛɛ ni kɔɔ Nyɔŋmɔ he. Ni mɔ ko aaafee mɔ ni yeɔ Yehowa anɔkwa lɛ tsɔɔ bɔ ni ekɛ ehe ekpɛtɛ ehe yɛ hetuu-kɛhamɔ ni mli wa mli tamɔ ama ko ni wa waa ni ehiii kpɔmɔ.
4. Ajieɔ Yehowa anɔkwayeli lɛ kpo yɛ mɛɛ gbɛ nɔ?
4 Atsɔɔ Yehowa diɛŋtsɛ anɔkwayeli lɛ yɛ gbɛi pii anɔ. Akɛ nɔkwɛmɔ nɔ lɛ, etsuɔ kojomɔ he nii eshiɔ efɔŋfeelɔi lɛ, yɛ suɔmɔ ni yeɔ anɔkwa ni eyɔɔ kɛhaa ewebii lɛ kɛ anɔkwa ni eyeɔ kɛhaa jalɛsaneyeli kɛ jalɛ-nifeemɔ lɛ hewɔ. (Kpojiemɔ 15:3, 4; 16:5) Anɔkwa ni eyeɔ kpaŋmɔ ni ekɛ Abraham fee lɛ tsirɛ lɛ ni ejie musuŋtsɔlɛ kpo yɛ Israelbii lɛ ahe. (2 Maŋtsɛmɛi 13:23) Mɛi ni yeɔ Nyɔŋmɔ anɔkwa lɛ baanyɛ ni amɛkɛ amɛhe afɔ yelikɛbuamɔ ni ekɛaaha amɛ kɛyashi amɛ anɔkwayeli gbɛ lɛ naagbee lɛ nɔ, ni amɛbaanyɛ amɛna nɔmimaa akɛ ebaakai amɛ. (Lala 37:27, 28; 97:10) Nilee ni Yesu yɔɔ akɛ Nyɔŋmɔ “mɔ krɔŋkrɔŋ” loo “anɔkwafo” lɛ wo lɛ hewalɛ akɛ ashiŋ esusuma yɛ Sheol.—Lala 16:10; Bɔfoi lɛ Asaji 2:25, 27.
5. Akɛni Yehowa yeɔ anɔkwa hewɔ lɛ, mɛni etaoɔ kɛjɛɔ etsuji adɛŋ, ni mɛɛ sanebimɔ esa akɛ wɔsusu he?
5 Akɛni Yehowa Nyɔŋmɔ yeɔ anɔkwa hewɔ lɛ, ebiɔ anɔkwayeli kɛjɛɔ etsuji adɛŋ. (Efesobii 4:24) Akɛ nɔkwɛmɔ nɔ lɛ, esa akɛ hii afee anɔkwafoi dani amɛhe asa kɛha halamɔ akɛ asafoŋ onukpai (Tito 1:8) Mɛni nibii esa akɛ etsirɛ Yehowa webii koni amɛsɔmɔ lɛ yɛ anɔkwayeli mli?
Hiɛsɔɔ Kɛha Nibii ni Akase Lɛ
6. Te esa akɛ wɔnu Ŋmalɛ mli nibii ni wɔkase lɛ he wɔha tɛŋŋ, ni mɛni esa akɛ wɔkai yɛ nilee ni tamɔ nɛkɛ he?
6 Esa akɛ shi ni wɔdaa yɛ Ŋmalɛ mli nibii ni wɔkase lɛ ahe lɛ atsirɛ wɔ ni wɔsɔmɔ Yehowa yɛ anɔkwayeli mli. Bɔfo Paulo wo Timoteo hewalɛ akɛ: “Hii shi yɛ nii ni okase ni oyɔɔ nɔ hewalɛ lɛ mli, ejaakɛ ole mɔ naa ni okase yɛ, ni ogbekɛbiiashi ojɛ ole ŋmalɛi krɔŋkrɔŋi lɛ ni aaanyɛ aha ole nii ni atsɔ Kristo Yesu nɔ hemɔkɛyeli nɔ kɛya yiwalaheremɔ mli lɛ.” (2 Timoteo 3:14, 15) Kaimɔ akɛ nilee ni tamɔ nɛkɛ ba kɛjɛ Nyɔŋmɔ ŋɔɔ kɛtsɔ “tsulɔ anɔkwafo kɛ nilelɔ” lɛ nɔ.—Mateo 24:45-47.
7. Te esa ekɛ onukpai lɛ anu mumɔŋ niyenii ni Nyɔŋmɔ tsɔɔ tsulɔ anɔkwafo lɛ nɔ ekɛhaa lɛ he amɛha tɛŋŋ?
7 Onukpai ni ahala amɛ titri ji mɛi ni esa akɛ amɛhiɛ asɔ mumɔŋ niyenii kpakpa ni Nyɔŋmɔ tsɔɔ tsulɔ anɔkwafo lɛ nɔ ekɛhaa lɛ. Afii komɛi ni eho nɛ ni no mli lɛ onukpai komɛi bɛ hiɛsɔɔ ni tamɔ nɛkɛ. Mɔ ko ni yɔse enɛ lɛ kɛɛ akɛ nɛkɛ hii nɛɛ “wieɔ shiɔ saji ni yɔɔ Buu-Mɔɔ lɛ mli lɛ, ni amɛsumɔɔɔ ni amɛkpɛlɛ nɔ akɛ . . . gbɛ ni Nyɔŋmɔ tsɔɔ nɔ ekɛ anɔkwale lɛ haa, ni amɛmiibɔ mɔdɛŋ be fɛɛ be ni amɛgbala gbɔmɛi kɛba bɔ ni amɛsusuɔ nii ahe amɛhaa lɛ nɔ.” Shi, onukpai anɔkwafoi lɛ ebɔɔɔ mɔdɛŋ akɛ amɛaana mɛi krokomɛi anɔ hewalɛ koni amɛkpoo mumɔŋ niyenii ni Nyɔŋmɔ kɛhaa kɛtsɔɔ tsulɔ anɔkwafo lɛ nɔ lɛ.
8. Shi kɛji akɛ wɔnuuu Ŋmalɛ mli sane ko ni tsulɔ anɔkwafo kɛ nilelɔ lɛ kɛhaa lɛ shishi jogbaŋŋ lɛ, mɛni?
8 Akɛ Yehowa Odasefoi ni wɔjɔɔ wɔhe nɔ lɛ, esa akɛ wɔ fɛɛ wɔye lɛ kɛ egbɛjianɔtoo lɛ anɔkwale. Esaaa akɛ wɔsusuɔ wɔhe ni wɔɔtsi kɛaajɛ Nyɔŋmɔ naakpɛɛ la lɛ he, ni wɔyadi hemɔkɛyeli kwamɔ gbɛ ni kɛ wɔmumɔŋ gbele aaaba bianɛ kɛ naagbee lɛ hiɛkpatamɔ lɛ sɛɛ. (Yeremia 17:13) Shi kɛji akɛ ewa kɛha wɔ akɛ wɔɔkpɛlɛ loo wɔɔnu ŋmalɛ mli saji otii komɛi ni tsulɔ anɔkwafo lɛ kɛbaa lɛ hu shishi jogbaŋŋ hu? No lɛ nyɛhaa wɔkɛ heshibaa akpɛlɛa he ni wɔkase anɔkwale lɛ kɛjɛ lɛ nɔ ni wɔsɔle wɔbi nilee ni wɔkɛaatsu nɛkɛ kaa nɛɛ he nii kɛyashi be mli ni saji komɛi ni aaaŋmala ni tsɔɔ nibii amli faŋŋ lɛ kɛ nɛkɛ sane nɛɛ aba naagbee—Yakobo 1:5-8.
Ohiɛ Asɔ Kristofoi a-Nyɛmifeemɔ Lɛ
9. Mɛɛ gbɛ nɔ 1 Yohane 1:3-6 tsɔɔ yɛ akɛ esa akɛ Kristofoi ana naanyobɔɔ su?
9 Tsuiŋ hiɛsɔɔ kɛha naanyobɔɔ su loo mumɔ ni yɔɔ wɔ Kristofoi anyɛmifeemɔ lɛ mli lɛ kɛ hewalɛ kroko ni aaaha wɔsɔmɔ Yehowa yɛ anɔkwayeli mli haa wɔ. Yɛ anɔkwale mli lɛ, wekukpaa ni ka wɔkɛ Nyɔŋmɔ kɛ Kristo teŋ lɛ nyɛŋ afee nɔ ni ma shi shiŋŋ yɛ mumɔŋ kɛ su loo mumɔ ni tamɔ nɛkɛ fataaa he. Bɔfo Yohane kɛɛ Kristofoi ni afɔ amɛ mu lɛ akɛ: “Nɔ ni wɔna ni wɔnu lɛ, no wɔjajeɔ wɔtsɔɔ nyɛ hu, koni nyɛ hu nyɛkɛ wɔ abɔ naanyo; shi naa, wɔnaanyobɔɔ lɛ, Tsɛ lɛ kɛ e-Bi Yesu Kristo lɛ wɔkɛbɔɔ. . . . Kɛji wɔkɛɛ akɛ wɔkɛ lɛ miibɔ naanyo, ni wɔnyiɛɔ duŋ lɛ mli lɛ, wɔmiimale ni wɔyeee anɔkwa.” (1 Yohane 1:3-6) Shishitoo mla nɛɛ kɔɔ Kristofoi fɛɛ he, kɛ amɛhiɛnɔkamɔ yɛ ŋwɛi loo shikpɔŋ nɔ.
10. Eyɛ mli akɛ ewa kɛha Evodia kɛ Sintika akɛ amɛaasaa amɛteŋ bei lɛ moŋ, shi te Paulo buɔ nɛkɛ yei nɛɛ ehaa tɛŋŋ?
10 Ebiɔ mɔdɛŋbɔɔ dani anyɛ ahiɛ naanyobɔɔ mumɔ mli. Akɛ nɔkwɛmɔ nɔ lɛ, Kristofoi yei ni ji Evodia kɛ Sintika na yɛ faŋŋ mli akɛ ewa akɛ amɛaasaa bei ni ka amɛteŋ lɛ. No hewɔ lɛ Paulo wo amɛ ŋaa akɛ “amɛjwɛŋmɔ afee ekome yɛ Nuŋtsɔ lɛ mli.” Ekɛfata he akɛ: “Hɛɛ, bo hu miikpao fai, minaanyo sɔɔlɔ kpakpa, akɛ oye obua yei nɛɛ ni kɛ mi pele sanekpakpa lɛ he lɛ, kɛ Klemente hu kɛ minanemɛi nitsulɔi krokomɛi ni amɛgbɛi yɔɔ wala wolo lɛ mli lɛ.” (Filipibii 4:2, 3) Nakai yei ni sheɔ Nyɔŋmɔ gbeyei lɛ kɛ Paulo kɛ mɛi krokomɛi pele “sanekpakpa lɛ he,” ni eyɛ nɔmimaa akɛ amɛfata ‘mɛi ni gbɛi yɔɔ wala wolo lɛ mli lɛ ahe.’
11. Kɛ Kristofonyo anɔkwafo ko kɛ mumɔŋ naagba ko kpe lɛ, mɛni eeefee nɔ ni sa jogbaŋŋ akɛ eeeha ehi ejwɛŋmɔ mli?
11 Kristofoi wooo okadi ko ni amɛkɛtsɔɔ nɔ ni amɛna hegbɛ amɛtsu yɛ Yehowa gbɛjianɔtoo lɛ mli kɛ bɔ ni amɛsɔmɔ lɛ yɛ anɔkwayeli mli amɛha. Shi kɛ mumɔŋ naagbai komɛi ba amɛnɔ lɛ, kwɛ bɔ ni efeŋ nɔ ni suɔmɔ yɔɔ mli akɛ aaaku hiɛ ashwie sɔɔmɔ ni amɛkɛha Yehowa yɛ anɔkwayeli mli lɛ nɔ! Eka shi faŋŋ akɛ, mɔ ni atsɛ lɛ “naanyo sɔɔlɔ kpakpa” lɛ ji nyɛmi nuu anɔkwafo ni kɛ hehiamɔ miisumɔ ni eye ebua mɛi krokomɛi. Kɛ oji onukpa lɛ, ani oji “naanyo sɔɔlɔ kpakpa,” ni ofee klalo akɛ okɛ yelikɛbuamɔ baaha yɛ musuŋtsɔlɛ naa? Eba akɛ wɔ fɛɛ wɔɔsusu ekpakpa ni nanemɛi heyelilɔi lɛ feɔ lɛ he, taakɛ Nyɔŋmɔ feɔ lɛ, koni wɔkɛ suɔmɔ aye abua amɛ ni amɛtere amɛjatsũi lɛ.—Galatabii 6:2; Hebribii 6:10.
He Ko He Ko Bɛ ni Wɔbaaya
12. Beni Yesu wiemɔi lɛ ha ‘kaselɔi lɛ pii shi lɛ kɛtee nibii ni yɔɔ sɛɛ lɛ anɔ lɛ,’ mɛɛ shidaamɔ Petro kɔ?
12 Kɛ wɔkai akɛ he ko he ko bɛ ni wɔɔya kɛha naanɔ wala lɛ, no baatsirɛ wɔ ni wɔkɛ Yehowa gbɛjianɔtoo lɛ asɔmɔ lɛ yɛ anɔkwayeli mli. Beni Yesu wiemɔi lɛ ha ‘kaselɔi lɛ pii shi lɛ kɛtee nibii ni yɔɔ sɛɛ lɛ anɔ lɛ,’ ebi ebɔfoi lɛ akɛ: “Nyɛsumɔɔɔ ni nyɛ hu nyɛyaa, aloo?” Petro ha hetoo akɛ: “Nuŋtsɔ, namɔ ŋɔɔ wɔɔtee? Bo oyɔɔ naanɔ wala wiemɔi lɛ; ni wɔ lɛ wɔhe wɔye ni asaŋ wɔna wɔle akɛ bo ji Mɔ Krɔŋkrɔŋ ni jɛ Nyɔŋmɔ ŋɔɔ lɛ.”—Yohane 6:66-69, NW.
13, 14. (a) Mɛni hewɔ ŋwɛi duromɔ bɛ klɛŋklɛŋ afii oha lɛ mli Yuda jamɔ nɔ lɛ? (b) Mɛni Yehowa Odasefonyo ko ni etsɛ wie yɛ Yehowa gbɛjianɔtoo ni anaa lɛ he?
13 Anaaa “naanɔ wala wiemɔi” lɛ yɛ Ŋ.B. klɛŋklɛŋ afii oha lɛ mli Yuda jamɔ lɛ mli. Esha titri ni efee ji Yesu akɛ Mesia lɛ ni ekpoo lɛ lɛ. Yuda jamɔ mli sɔrɔtoi lɛ eko kwraa bɛ ni damɔ Hebri Ŋmalɛi lɛ pɛ nɔ. Sadukifoi lɛ heee shihilɛ mli ni ŋwɛibɔfoi yɔɔ lɛ amɛyeee ni amɛheee gbohiiashitee lɛ amɛyeee. Eyɛ mli akɛ Farisifoi lɛ kɛ amɛ kpaaa gbee yɛ enɛɛmɛi amli moŋ, shi amɛkɛ eshafeemɔ ha Nyɔŋmɔ Wiemɔ lɛ fee efolo yɛ amɛ blema saji ni damɔɔɔ ŋmalɛi lɛ anɔ lɛ hewɔ. (Mateo 15:1-11; Bɔfoi lɛ Asaji 23:6-9) Nɛkɛ blema saji nɛɛ ha Yudafoi lɛ tsɔmɔ nyɔji ni eha ebawa kɛha amɛ akɛ amɛaakpɛlɛ Yesu Kristo nɔ. (Kolosebii 2:8) Ekãa ni Saul (Paulo) fee yɛ ‘etsɛmɛi lɛ ablema saji ahe’ lɛ ha efee Kristo sɛɛnyiɛlɔi lɛ ayiwalɔ ni ehiii fe fɛɛ akɛni eleee hewɔ.—Galatabii 1:13, 14, 23.
14 Juda jamɔ bɛ Nyɔŋmɔ hiɛ duromɔ ko, shi Yehowa jɔɔ e-Bi lɛ sɛɛnyiɛlɔi lɛ agbɛjianɔtoo lɛ—‘gbɔmɛi ni hiɛ dɔɔ yɛ nitsumɔi kpakpai ahe lɛ.’ (Tito 2:14) Nakai gbɛjianɔtoo lɛ yɛ lolo, ni Yehowa Odasefonyo ko ni kɛ afii pii esɔmɔ wie he akɛ: “Kɛji akɛ nɔ ko yɛ ni efee nɔ ni he hiaa mi fe fɛɛ lɛ, belɛ no ji Yehowa gbɛjianɔtoo ni anaa lɛ ni akɛ he aaabɔ he kpaakpa. Mi mra mli niiashikpamɔ tsɔɔ mi bɔ ni ejaaa kwraa akɛ akɛ he aaafɔ adesa susumɔ nɔ. Beni mikpɛ miyiŋ yɛ nakai sane lɛ he lɛ, kɛkɛ ni mitswa mifai shi akɛ mikɛ gbɛjianɔtoo ni yeɔ anɔkwa lɛ baahi shi. Mɛɛ gbɛ kroko yɔɔ ni mɔ ko aaatsɔ nɔ ana Yehowa duromɔ kɛ jɔɔmɔ?” He ko he ko bɛ ni aaaya kɛha ŋwɛi duromɔ kɛ naanɔ wala.
15. Mɛni hewɔ esa akɛ okɛ Yehowa gbɛjianɔtoo ni anaa lɛ kɛ mɛi ni gbɛnaa nii jwere amɛnɔ yɛ mli lɛ afee ekome lɛ?
15 Esa akɛ wɔtsuii akanya wɔ ni wɔkɛ Yehowa gbɛjianɔtoo lɛ afee ekome, ejaakɛ wɔle akɛ no pɛ emumɔ lɛ kudɔɔ ni eeha ale egbɛi kɛ eyiŋtoi. Shi mɛi ni gbɛnaa nii jwere amɛnɔ yɛ mli lɛ yeee emuu. (Romabii 5:12) Shi “Yehowa mli wo . . . la” eshi Aaron kɛ Miriam beni amɛwie Mose he efɔŋ, ni amɛhiɛ kpa nɔ akɛ, lɛ ji mɔ ni Nyɔŋmɔ kɛ gbɛnaa nii ewo edɛŋ, shi jeee amɛ lɛ. (4 Mose 12:7-9) Ŋmɛnɛ, anɔkwa Kristofoi kɛ ‘mɛi ni nyiɛɔ hiɛ yɛ asafo lɛ mli lɛ’ feɔ ekome ejaakɛ no ji nɔ ni Yehowa taoɔ. (Hebribii 13:7, 17) Nɔ ni fata wɔ anɔkwayeli he odase lɛ he ji Kristofoi akpeei ni wɔɔya daa ni wɔwie wiemɔi ni ‘kanyaa suɔmɔ kɛ nitsumɔi kpakpai.’—Hebribii 10:24, 25.
Feemɔ Mɔ ni Haa Mɔ Nane Mɔɔ Shi
16. Esa akɛ suɔmɔ ni ayɔɔ akɛ aaafee mɛni aha mɛi krokomɛi lɛ hu atsirɛ wɔ ni wɔsɔmɔ Yehowa yɛ anɔkwayeli mli?
16 Esa akɛ bɔ ni wɔshweɔ akɛ wɔɔha mɛi anane amɔ shi lɛ hu akanya wɔ ni wɔsɔmɔ Yehowa yɛ anɔkwayeli mli. Paulo ŋma akɛ: “Nilee haa mɔ woɔ ehe nɔ; shi suɔmɔ lɛ haa mɔ nane mɔɔ shi.” (1 Korintobii 8:1) Akɛni nilee ko haa mɛi holeɔ amɛhe nɔ hewɔ lɛ, ekolɛ Paulo miitsɔɔ akɛ suɔmɔ haa mɛi ni jieɔ nakai su lɛ kpo lɛ anane mɔɔ shi. Wolo ko ni Nilelɔi Weiss kɛ English ŋmalɛ kɛɔ akɛ: “Mɔ ni yɔɔ nyɛmɔ ni ekɛsumɔɔ mɔ lɛ, lɛ hu asumɔɔ lɛ atoɔ najiaŋ. Nyɛmɔ ni akɛaakpã ejurɔfeemɔ kɛ mɛi ahesusumɔ mli yɛ shihilɛ mli nibii fɛɛ mli lɛ . . . naa mɔ ni kɛ henumɔ ni tamɔ nɛkɛ tsuɔ nii lɛ kɛ mɔ ni nine shɛɔ nɔ lɛ fɛɛ nɔ hewalɛ kpakpa ni ehaa amɛ fɛɛ amɛnaa miishɛɛ.” Kɛ wɔjie suɔmɔ kpo wɔtsɔɔ lɛ, wɔtswaa mɛi krokomɛi kɛ wɔ diɛŋtsɛ wɔhe wɔmaa shi, taakɛ Yesu wiemɔi nɛɛ tsɔɔ lɛ: “Nɔ hamɔ mli yɛ jɔɔmɔ fe hemɔ.”—Bɔfoi lɛ Asaji 20:35.
17. Suɔmɔ haa mɔ nane mɔɔ shi loo etswaa mɔ emaa shi yɛ mɛɛ gbɛ nɔ, ni ebaatsi wɔ gbɛ koni wɔkafee mɛni?
17 Paulo kɛ Hela wiemɔ a·gaʹpe, ni tsɔɔ suɔmɔ ni damɔ shishitoo mla nɔ lɛ tsu nii yɛ 1 Korintobii 8:1. Etswaa mɔ emaa shi loo ehaa mɔ nane mɔɔ shi, ejaakɛ etoɔ etsui shi ni emli hi, emiɔ ŋɔɔ yɛ nii fɛɛ mli, ni esɛɛ efooo gbiko gbi ko. Suɔmɔ nɛɛ jieɔ henumɔi ni yeɔ awui, tamɔ henɔwomɔ kɛ awuŋayeli kɛyaa. (1 Korintobii 13:4-8) Suɔmɔ ni tamɔ nɛkɛ haŋ wɔwie huhuuhu wɔshi wɔnyɛmimɛi ni yeee emuu tamɔ bɔ ni wɔ hu wɔyeee emuu lɛ. Ebaatsi wɔ gbɛ koni wɔkatamɔ ‘hii ni sheee Nyɔŋmɔ gbeyei’ ni ‘ju shi babote’ klɛŋklɛŋ afii oha lɛ mli anɔkwa Kristofoi lɛ ateŋ lɛ. Nɛkɛ hii nɛɛ “gbeɔ nɔyeli he guɔ, ni amɛwieɔ gbɔmɛi agboi ahe wiemɔi fɔji,” eka shi faŋŋ akɛ amɛmiifite aŋkroaŋkroi tamɔ nɔkwɛlɔi Kristofoi ni afɔ amɛ mu lɛ ni awo amɛhiɛ nyam yɛ gbɛ ko nɔ lɛ. (Yuda 3, 4, 8) Yɛ anɔkwa ni wɔyeɔ Yehowa hewɔ lɛ, nyɛkahaa wɔŋmɛa wɔhe wɔhaa kaa ni aaaha wɔfee nɔ ko ni tamɔ nakai.
Nyɛtea Shi Nyɛwoa Abonsam!
18. Mɛni Satan baasumɔ ni efee Yehowa webii, shi mɛni hewɔ enyɛŋ efee nakai lɛ?
18 Esa akɛ nilee ni wɔyɔɔ akɛ Satan miisumɔ ni efite ekome ni wɔfee akɛ Nyɔŋmɔ webii lɛ aha wɔfai shi ni wɔtswa akɛ wɔɔsɔmɔ Yehowa yɛ anɔkwayeli mli lɛ aya hiɛ. Satan baasumɔ po ni ekpata Nyɔŋmɔ webii fɛɛ ahiɛ, ni Abonsam tsuji ni yɔɔ shikpɔŋ nɔ lɛ gbeɔ anɔkwa jalɔi yɛ bei komɛi amli. Shi Nyɔŋmɔ eŋmɛŋ gbɛ ni Satan agbe amɛ fɛɛ. Yesu gbo koni “etsɔ gbele nɔ ekpata mɔ ni yɔɔ gbele nɔ hewalɛ ni ji Abonsam lɛ hiɛ.” (Hebribii 2:14) Aje gbɛ aje husu awo he ni Satan yeɔ nɔ kɛjɛɔ lɛ he kɛjɛ be mli ni ashwie lɛ kɛjɛ ŋwɛi ni Kristo batsɔ Maŋtsɛ yɛ 1914 sɛɛ nɛɛ. Ni yɛ Yehowa be ni sa mli lɛ, Yesu baakpata Satan kɛ egbɛjianɔtoo lɛ hiɛ.
19. (a) Mɛɛ Satan mɔdɛŋbɔɔ he kɔkɔbɔɔ wolo tɛtrɛɛ nɛɛ kɛha afii pii ni eho nɛ? (b) Bɔni afee ni wɔje Satan tsɔnei amli lɛ, mɛɛ henɔkwɛmɔ jogbaŋŋ esa akɛ wɔkɛtsu nii yɛ be mli ni wɔkɛ nanemɛi heyelilɔi yeɔ lɛ?
19 Wolo tɛtrɛɛ nɛɛ bɔ kɔkɔ be ko akɛ: “Kɛ Satan Abonsam baanyɛ aha basabasa-feemɔ aba Nyɔŋmɔ webii ateŋ, eha amɛbe ni amɛkɛ amɛhe anɔ, aloo ni amɛjie pɛsɛmkunya su ni baafite suɔmɔ ni amɛyɔɔ kɛha nyɛmimɛi lɛ, no lɛ ebaanyɛ ekpata amɛhiɛ.” (Buu-Mɔɔ, May 1, 1921, baafa 134) Wɔkaŋmɛ gbɛ ni Abonsam miifite ekomefeemɔ ni yɔɔ wɔteŋ lɛ, ekolɛ kɛtsɔ wɔ lakamɔ nɔ koni wɔgbe mɛi ahe guɔ ni wɔkɛ wɔhe anɔ. (3 Mose 19:16) Ekaba kɔkɔɔkɔ akɛ Satan nine aaashɛ wɔnɔ yɛ gbɛ ni aaaha wɔ diɛŋtsɛ lɛ wɔye mɛi ni sɔmɔɔ Yehowa yɛ anɔkwayeli mli lɛ awui, aloo ni wɔɔha shihilɛ mli awa babaoo aha amɛ. (Okɛto 2 Korintobii 2:10, 11 he.) Shi moŋ, nyɛhaa wɔkɛ Petro wiemɔi lɛ atsua nii: “Nyɛhiɛ akaa shi, nyɛsaraa; ejaakɛ nyɛhenyɛlɔ Abonsam lɛ nyiɛ tamɔ jata ni huuɔ eetao mɔ ni eeemi; nyɛdamɔa shi shiŋŋ yɛ hemɔkɛyeli lɛ mli nyɛtsia lɛ gbɛ. (1 Petro 5:8, 9) Kɛ wɔdamɔ shi shiŋŋ wɔshi Satan lɛ, wɔbaanyɛ wɔhiɛ wɔ ekomefeemɔ ni jɔɔmɔ yɔɔ mli akɛ Yehowa webii lɛ mli.—Lala 133:1-3.
Tsɔ Sɔlemɔ nɔ Okɛ Ohe Afɔ Nyɔŋmɔ Nɔ
20, 21. Yɛ mɛɛ gbɛ nɔ sɔlemɔ nɔ ni atsɔɔ akɛ he fɔɔ Yehowa nɔ lɛ kɔɔ esɔɔmɔ yɛ anɔkwayeli mli lɛ he?
20 Nyɔŋmɔ ni atsɔɔ sɔlemɔ nɔ akɛ he fɔɔ enɔ lɛ baaye abua wɔ ni wɔya nɔ wɔsɔmɔ Yehowa yɛ anɔkwayeli mli. Kɛ wɔna akɛ eeha wɔsɔlemɔi ahetoo lɛ, egbalaa wɔ kɛbɛŋkɛɔ ehe kpaakpa. Awo sɔlemɔ nɔ ni aaatsɔ akɛ he afɔ Yehowa Nyɔŋmɔ nɔ lɛ he hewalɛ beni bɔfo Paulo ŋma akɛ: “Miitao akɛ hii asɔle yɛ he fɛɛ he, ni amɛhole niji ni he tse nɔ, ni mlifu loo ŋwanejee akaba mli.” (1 Timoteo 2:8) Akɛ nɔkwɛmɔ nɔ lɛ, kwɛ bɔ ni ehe hiaa ha akɛ onukpai aaatsɔ sɔlemɔ nɔ ni amɛkɛ amɛhe afɔ Nyɔŋmɔ nɔ! Anɔkwayeli kpo ni ajieɔ atsɔɔ Yehowa nɛkɛ beni akpeɔ koni asusu asafoŋ saji ahe lɛ baaye abua ni etsi ŋwanejeei ni bɛ naagbee kɛ ekolɛ mlifu ni aaafɛ lɛ naa.
21 Sɔlemɔ nɔ ni atsɔɔ akɛ he fɔɔ Yehowa Nyɔŋmɔ nɔ lɛ yeɔ ebuaa wɔ ni wɔkwɛɔ hegbɛi anɔ yɛ esɔɔmɔ mli. Nuu ko ni ekɛ afii nyɔŋmai abɔ esɔmɔ Yehowa yɛ anɔkwayeli mli lɛ nyɛ ekɛɛ: “Suɔmɔ mli ni wɔɔjɛ wɔkpɛlɛ nitsumɔ fɛɛ nitsumɔ ni akɛaaha wɔ kɛaajɛ Nyɔŋmɔ jeŋ muu fɛɛ gbɛjianɔtoo lɛ ŋɔɔ, kɛ nitsumɔ ni akɛha wɔ lɛ mli ni wɔɔhiɛ daa, ni wɔhosooo lɛ kɛ Nyɔŋmɔ nɔkpɛlɛmɔ baa wɔ mɔdɛŋbɔɔ yɛ anɔkwayeli mli lɛ nɔ. Kɛji akɛ nitsumɔ ni akɛwo wɔdɛŋ lɛ baa shi tamɔ mɛni po lɛ, yɛ be babaoo mli lɛ, nɔ ni jɛɔ mli baa ji akɛ, kɛ atsuuu nɔ ni baa shi nɛɛ he nii yɛ anɔkwayeli mli lɛ, ehaaa anyɛ atsu nitsumɔi krokomɛi ni he hiaa lɛ hu he nii. No hewɔ lɛ kɛ wɔbaa wɔhe shi ni wɔyɛ Yehowa gbɛi lɛ hiɛnyam woo he miishɛɛ diɛŋtsɛ shi jeee wɔ diɛŋtsɛ wɔ nɔ lɛ, no lɛ wɔbaanyɛ wɔna nɔmimaa akɛ ‘wɔbaanyɛ wɔfi shi ni wɔgbugbaaa, ni wɔbaateke nɔ yɛ Yehowa nitsumɔ lɛ mli daa.’”—1 Korintobii 15:58.
22. Te esa akɛ Yehowa jɔɔmɔi babaoo lɛ asa wɔ anɔkwayeli he aha tɛŋŋ?
22 Yɛ nɔ fɛɛ nɔ ni wɔfeɔ yɛ Yehowa sɔɔmɔ mli lɛ sɛɛ lɛ, wɔnyɛŋ wɔto nɔ ni efeɔ ehaa wɔ lɛ najiaŋ kɔkɔɔkɔ. Kwɛ bɔ ni wɔhiɔ shi shweshweeshwe yɛ Nyɔŋmɔ gbɛjianɔtoo lɛ mli, ni mɛi ni ji eshieŋtsɛmɛi lɛ ebɔle wɔhe kɛkpe! (Yakobo 2:23) Yehowa kɛ ekomefeemɔ ni jɛɔ nyɛmimɛi asuɔmɔ mli ejɔɔ wɔ, ni bɔ ni ehe shi loo emli kwɔ ha sɔŋŋ hewɔ lɛ, Satan diɛŋtsɛ po nyɛŋ afa. No hewɔ lɛ nyɛhaa wɔkɛ wɔhe akpɛtɛa wɔŋwɛi Tsɛ anɔkwafo lɛ he ni wɔtsu nii yɛ ekomefeemɔ mli akɛ ewebii. Nyɛhaa wɔsɔmɔa Yehowa yɛ anɔkwaye mli kɛjɛa benɛ kɛyaa naanɔ.
Te Obaaha Hetoo Oha Tɛŋŋ?
◻ Akɛ aaaye anɔkwa lɛ tsɔɔ mɛni?
◻ Mɛni ji nibii komɛi ni esa akɛ etsirɛ wɔ ni wɔsɔmɔ Yehowa yɛ anɔkwayeli mli?
◻ Mɛni hewɔ esa akɛ wɔte shi wɔwo Abonsam lɛ?
◻ Sɔlemɔ baanyɛ aye abua wɔ ni wɔfee Yehowa tsujii anɔkwafoi yɛ mɛɛ gbɛ nɔ?
[Mfoniri ni yɔɔ baafa 23]
Yehowa tsuji anɔkwafoi lɛ eŋmɛɛɛ amɛ Henyɛlɔ, Abonsam, ni tamɔ jata lɛ gbɛ koni efite ekomefeemɔ ni ka amɛteŋ lɛ