Kasemɔ Amɛhemɔkɛyeli Lɛ

Ekwɛ Nii Jogbaŋŋ, ni Emɛ

ELIA miitao ni ekome too pɛ esɔle eha eŋwɛi Tsɛ lɛ yɛ teemɔŋ. Shi etsɛko tsɔ ni mɛi babaoo ni ebɔle gbalɔ anɔkwafo nɛɛ na bɔ ni etsɛ la kɛjɛ ŋwɛi lɛ, ni ŋwanejee ko bɛ he akɛ amɛteaŋ mɛi pii miisumɔ ni amɛná ehiɛ duromɔ. Dani Elia baakwɔ kɛya Karmel Gɔŋ ni kɔɔyɔɔ tswaa yɛ nɔ waa lɛ yiteŋ ni eyasɔle eha Yehowa Nyɔŋmɔ yɛ teemɔŋ lɛ, esa akɛ etsu nitsumɔ ko ni enyaaa he. Esa akɛ ekɛ Maŋtsɛ Ahab awie.

Srɔtofeemɔ agbo yɛ hii enyɔ nɛɛ ateŋ. Ahab ni ewula ehe kɛ odehei atade lɛ ji hiɛjoolɔ, kɛ hemɔkɛyeli kwalɔ ni atsirɛɔ eyisɛɛ dani efeɔ nii. Elia wo gbalɔi atade, ni ji atade ni bɛ haŋtsii ni ekolɛ akɛ kooloo hewolo loo yooma loo abotia he tsɔi lò. Eji nuu ni yɔɔ ekãa babaoo, eyeɔ anɔkwa, ni eyɛ hemɔkɛyeli. Nakai gbi lɛ ni miiba enaagbee lɛ eha ana hii srɔto enyɔ nɛɛ asubaŋ diɛŋtsɛ.a

Nakai gbi lɛ, Ahab kɛ Baal jálɔi krokomɛi lɛ ahiɛaŋ shwie shi waa diɛŋtsɛ. Abayɔse wɔŋjamɔ nifeemɔi ni Ahab kɛ eŋa Maŋnyɛ Izebel wo he hewalɛ yɛ Israel akutsei nyɔŋma maŋtsɛyeli lɛ mli akɛ eji apasa jamɔ. Akpa Baal he mama akɛ eji shishiulɔ. Nakai nyɔŋmɔ ni wala bɛ emli lɛ nyɛɛɛ eha la bibioo po atsɛ̃ yɛ bolɔmɔ ni egbalɔi lɛ bolɔ amɛtsɛ lɛ, jooi ni amɛjo kɛ kaklai ni amɛkɛfolɔfolɔɔ amɛhe kɛkpa lɛ fai lɛ fɛɛ sɛɛ. Baal nyɛɛɛ ebu hii 450 ni sa hiɛkpatamɔ lɛ ahe. Shi apasa nyɔŋmɔ lɛ nyɛɛɛ efee nɔ kroko hu, ni etsɛŋ ni abaaha enɛ aje kpo faŋŋ. Baal gbalɔi lɛ kɛ nɔ ni fe afii etɛ sɔŋŋ etee nɔ amɛkpa amɛnyɔŋmɔ lɛ fai koni efo nuhɔmɔ ni haoɔ maŋbii lɛ sɛɛ, shi Baal nyɛko etsu enɛ he nii. Etsɛŋ ni Yehowa diɛŋtsɛ baatsɔɔ akɛ lɛ ji anɔkwa Nyɔŋmɔ lɛ kɛtsɔ nuhɔmɔ lɛ sɛɛ ni ebaafo lɛ nɔ.—1 Maŋtsɛmɛi 16:30–17:1; 18:1-40.

Shi mɛɛ be Yehowa baafee enɛ? Te Elia baafee enii eha tɛŋŋ kɛyashi nakai be lɛ baashɛ? Ni mɛni wɔbaanyɛ wɔkase yɛ nuu ni yɔɔ hemɔkɛyeli nɛɛ he? Nyɛhaa wɔtaoa enɛ mli beni wɔpɛiɔ amaniɛbɔɔ ni yɔɔ 1 Maŋtsɛmɛi 18:41-46 lɛ mli lɛ.

Etee Nɔ Esɔle

Elia yanina Ahab ni ekɛɛ lɛ akɛ: “Yaa ní oyaye nii ni onu nɔ ko; ejaakɛ nugbɔnɛmɔ babaoo miigbɛɛ kɛ miiba!” (Kuku 41) Ani maŋtsɛ ni yitsoŋ wa nɛɛ ekase nɔ ko kɛjɛ nɔ ni ba yɛ gbi lɛ mli lɛ mli? Amaniɛbɔɔ lɛ ewieee enɛ he, shi wɔnaaa nɔ ko ni tsɔɔ akɛ etsake etsui, ni asaŋ nɔ ko bɛ ni tsɔɔ akɛ ebi gbalɔ lɛ koni eye ebua lɛ ni ebɛŋkɛ Yehowa ni ebi edɛŋ eshaifaa. Dabi, Ahab “yiŋ etee [moŋ] ní eyaye nii ni enu nɔ ko.” (Kuku 42) Ni Elia hu?

“Shi Elia kwɔ kɛtee Karmel yiteŋ, ni eyakoto shi yɛ shikpɔŋ, ni eŋɔ ehiɛ ehɔ enakutsei ateŋ.” Ahab tee moŋ eyaye nii, shi Elia ŋɔ hegbɛ lɛ ni ekɛsɔle eha e-Tsɛ lɛ. Kadimɔ bɔ ni Elia fee enii eha yɛ heshibaa mli lɛ—eyakoto shi yɛ shikpɔŋ ni ema eyi shi aahu akɛ ehiɛ yahɔ enakutsei ateŋ. No mli lɛ, mɛni Elia feɔ lɛ? Ehe ehiaaa ni wɔka wɔyiŋ wɔwie. Biblia lɛ kɛɔ wɔ yɛ Yakobo 5:18 lɛ akɛ, Elia sɔle koni nuhɔmɔ lɛ sɛɛ afo. Ŋwanejee ko bɛ he akɛ esɔle nakai sɔlemɔ lɛ yɛ Karmel gɔŋ lɛ yiteŋ.

Mra mli lɛ, Yehowa kɛɛ akɛ: “Maha nugbɔ abanɛ yɛ shikpɔŋ lɛ nɔ!” (1 Maŋtsɛmɛi 18:1) No hewɔ lɛ, Elia sɔle koni nɔ ni e-Tsɛ lɛ ewie lɛ aba mli, tamɔ bɔ ni aaafee afii akpe kome sɛɛ lɛ Yesu hu tsɔɔ esɛɛnyiɛlɔi lɛ akɛ amɛsɔle lɛ.—Mateo 6:9, 10.

Nɔkwɛmɔnɔ ni Elia fee lɛ haa wɔkaseɔ nii babaoo yɛ sɔlemɔ he. Nɔ ni he hiaa Elia titri ji ní e-Tsɛ lɛ suɔmɔnaa nii aba mli. Kɛ́ wɔmiisɔle lɛ, esa akɛ wɔha ehi wɔjwɛŋmɔ mli akɛ: “Kɛji wɔba nɔ ko yɛ [Nyɔŋmɔ] suɔmɔ naa lɛ, eboɔ wɔ toi.” (1 Yohane 5:14) Belɛ, eyɛ faŋŋ akɛ ehe mihia ni wɔle nɔ ni Nyɔŋmɔ suɔmɔnaa nii ji koni kɛ́ wɔsɔle lɛ ebo toi—ni enɛ hewɔ ni esa akɛ wɔkase Biblia lɛ daa gbi lɛ. Ekã shi faŋŋ akɛ Elia miisumɔ hu koni nuhɔmɔ lɛ sɛɛ afo akɛni emaŋbii lɛ miina nɔ̃ babaoo lɛ hewɔ. Beni ena naakpɛɛ nii ni Yehowa fee nakai gbi lɛ sɛɛ lɛ, eeenyɛ efee akɛ eda Yehowa shi babaoo diɛŋtsɛ. Esa akɛ wɔ hu wɔsɔle kɛha mɛi krokomɛi ahilɛ-kɛhamɔ ni wɔjɛ wɔtsuiŋ wɔda Yehowa shi.—2 Korintobii 1:11; Filipibii 4:6.

Eyɛ Hekɛnɔfɔɔ ni Ekwɛ Nii Jogbaŋŋ

Elia yɛ hekɛnɔfɔɔ akɛ Yehowa baaha nuhɔmɔ lɛ sɛɛ afo, shi eleee be ni Yehowa baafee nakai. No hewɔ lɛ, mɛni gbalɔ lɛ fee beni emɛɔ Yehowa lɛ? Kadimɔ nɔ ni kuku 43 lɛ kɛɔ lɛ, akɛ: “Ekɛɛ etsulɔ lɛ akɛ: Agbɛnɛ kwɔɔ kɛya ni oyakwɛ ŋshɔŋ gbɛ! Ni ekwɔ kɛtee eyakwɛ, ni ekɛɛ: Nɔ ko nɔ ko bɛ! Ni ekɛɛ: Yaa shii kpawo ekoŋŋ!” Kɛ́ hooo kwraa lɛ, wɔkaseɔ nibii enyɔ kɛjɛɔ Elia nɔkwɛmɔnɔ lɛ mli. Klɛŋklɛŋ lɛ, kadimɔ hekɛnɔfɔɔ ni gbalɔ lɛ yɔɔ yɛ Yehowa mli lɛ. No sɛɛ lɛ, susumɔ bɔ ni ekwɛ nii jogbaŋŋ lɛ he.

Elia miishwe ni ena odaseyeli ko ni tsɔɔ akɛ Yehowa baatsu sane lɛ he nii, ni no hewɔ lɛ etsu etsulɔ lɛ koni ekwɔ kɛyadamɔ he ko ni sa ni ekwɛ ŋwɛi akɛ ebaana okadi ko ni tsɔɔ akɛ nugbɔ baanɛ lo. Tsulɔ lɛ ku esɛɛ eba kɛ amaniɛbɔɔ ni jeɔ mɔ nijiaŋ wui nɛɛ akɛ: “Nɔ ko nɔ ko bɛ!” Ŋwɛi kɛ atatu fɛɛ etse heŋŋ. Agbɛnɛ, ani oyɔse nɔ ko ni sa kadimɔ waa? Kaimɔ akɛ, Elia etsɔ hiɛ ekɛɛ Maŋtsɛ Ahab bianɛ nɔŋŋ akɛ: “Nugbɔnɛmɔ babaoo miigbɛɛ kɛ miiba!” Te aaafee tɛŋŋ ni gbalɔ lɛ aaakɛɛ nɔ ko tamɔ nakai kɛji nugbɔnɛmɔ atatu ko kwraa bɛ ni abaana lɛ?

Elia le shi ni Yehowa ewo lɛ. Ákɛ Yehowa gbalɔ kɛ enajiaŋdamɔlɔ lɛ, eyɛ nɔmimaa akɛ Nyɔŋmɔ baaye Ewiemɔ lɛ nɔ. Elia yɛ hekɛnɔfɔɔ ni mli wa aahu akɛ, efee lɛ akɛ eenu ni nugbɔ lɛ ebɔi nɛmɔ momo. Ekolɛ enɛ baaha wɔkai nɔ ni Biblia lɛ wie yɛ Mose he lɛ akɛ: “Emɔ mɔ ni anaaa lɛ lɛ mli tamɔ nɔ ni eena lɛ.” Ani bo hu onaa Nyɔŋmɔ akɛ mɔ ni yɔɔ diɛŋtsɛ? Eha wɔ yiŋtoi babaoo ni wɔɔdamɔ nɔ wɔná hemɔkɛyeli ni tamɔ nakai yɛ lɛ diɛŋtsɛ kɛ eshiwoi lɛ amli.—Hebribii 11:1, 27.

Agbɛnɛ, kadimɔ bɔ ni Elia kwɛ nii jogbaŋŋ eha lɛ. Etsu etsulɔ lɛ ni eku esɛɛ eyakpa nibii ashi shii kpawo sɔŋŋ, shi jeee shikome loo shii enyɔ! Wɔbaanyɛ wɔna bɔ ni ekolɛ etɔ tsulɔ lɛ waa akɛ eeetsu nitsumɔ nɛɛ shii abɔ lɛ, shi Elia tee nɔ eshwe akɛ eeena okadi ko, ni enijiaŋ ejeee wui. Naagbee lɛ, beni tsulɔ lɛ tee nɔ ni ji shii kpawo sɛɛ lɛ, ebɔ amaniɛ akɛ: “Naa, atatu bibioo ko tamɔ gbɔmɔ nine miite shi kɛmiijɛ ŋshɔŋ!” (Kuku 44) Ani obaanyɛ ofee nakai tsulɔ lɛ he mfoniri yɛ ojwɛŋmɔŋ akɛ ehole eniji anɔ kɛmiisusu atatu bibioo ko ni miite shi kɛmiijɛ Ŋshɔ Wulu lɛŋ eetsɔɔ?b Ekolɛ tsulɔ lɛ susu akɛ atatu bibioo nɛɛ nyɛŋ nɔ ko atsu. Shi kɛha Elia lɛ, nakai atatu lɛ he hiaa waa. Agbɛnɛ, ekɛ gbɛtsɔɔmɔ ni esa akɛ atsu he nii amrɔ nɔŋŋ ha etsulɔ lɛ akɛ: “Yaa ní oyakɛɛ Ahab akɛ: Saamɔ oshwiili ni okpeleke shi, koni nugbɔnɛmɔ akatsĩ onaa!”

Shi kome ekoŋŋ lɛ, Elia fee nɔkwɛmɔnɔ ko ni sa jogbaŋŋ eha wɔ. Wɔ hu wɔyɛ be ni etsɛŋ kwraa ni Nyɔŋmɔ baatsu eyiŋtoo he nii lɛ mli. Elia mɛ aahu kɛyashi nuhɔmɔ lɛ sɛɛ fo; Nyɔŋmɔ tsuji ni yɔɔ ŋmɛnɛ lɛ hu miimɛ be ni jeŋ ni ekpɔtɔ nɛɛ baaba naagbee. (1 Yohane 2:17) Kɛyashi be ni Yehowa Nyɔŋmɔ baatsu enɛ he nii lɛ, esa akɛ wɔya nɔ wɔkwɛ nii jogbaŋŋ taakɛ Elia fee lɛ. Yesu ni ji Nyɔŋmɔ Bi lɛ wo esɛɛnyiɛlɔi lɛ ŋaa akɛ: “No hewɔ lɛ nyɛsaraa, ejaakɛ nyɛleee nɔ̃ ŋmɛlɛtswaa nɔ ni nyɛnuŋtsɔ lɛ baa.” (Mateo 24:42) Ani Yesu miitsɔɔ akɛ esɛɛnyiɛlɔi lɛ leŋ be ni je lɛ baaba enaagbee lɛ he nɔ ko kwraa? Dabi, ejaakɛ ewie nibii babaoo ni baakadi je lɛ naagbee lɛ he. Wɔteŋ mɔ fɛɛ mɔ baanyɛ akase “je nɛŋ naagbee lɛ he” okadi nɛɛ he nii fitsofitso.—Mateo 24:3-7.c

Nakai okadi lɛ fã fɛɛ fã kɛ odaseyeli ni mli kã shi faŋŋ, ni kɔneɔ mɔ yiŋ hu haa. Ani nakai odaseyelii lɛ baanyɛ atsirɛ wɔ koni wɔkɛ hiɛdɔɔ atsu saji ahe nii? Atatu bibioo ko ni te shi kɛjɛ ŋshɔŋgbɛ lɛ nyɛ ekɔne Elia yiŋ akɛ etsɛŋ ni Yehowa baatsu saji ahe nii. Ani gbalɔ anɔkwafo lɛ hiɛnɔkamɔ fee yaka?

Yehowa Haa Anáa Hejɔlɛ kɛ Jɔɔmɔi

Amaniɛbɔɔ lɛ tsaa nɔ akɛ: “Eba mli akɛ etsɛɛɛ kɛkɛ ni ŋwɛi badĩ tũu kɛ atatui kɛ kɔɔyɔɔ, ni nugbɔ tue babaoo; ni Ahab tá shwiili mli ni eyiŋ kɛtee Yezreel.” (Kuku 45) Nibii bɔi mlibaa oyayaayai. Beni Elia tsulɔ lɛ kɛ Elia shɛɛ sane lɛ haa Ahab lɛ, nakai atatu bibioo lɛ bafee pii, ni eha ŋwɛi fɛɛ dĩ tũu. Kɔɔyɔɔ ni naa wa ko tswa. Naagbee lɛ, yɛ afii etɛ kɛ fã sɛɛ lɛ, nugbɔ nɛ yɛ Israel shikpɔŋ lɛ nɔ.d Shikpɔŋ ni egbi lɛ mii nu ni nɛ lɛ. Akɛni nugbɔ lɛ nɛ waa hewɔ lɛ, eha Kishon faa lɛ yi, ni ŋwanejee ko bɛ he akɛ efɔ Baal gbalɔi ni akpata amɛhiɛ lɛ alá lɛ kɛtee. Aha Israelbii ni egba afã lɛ hegbɛ koni amɛjie Baal jamɔ nifeemɔi ni ehiii kwraa ni eka shikpɔŋ lɛ nɔ lɛ kɛjɛ nɔ.

Yɛ anɔkwale mli lɛ, Elia hiɛ kã nɔ akɛ nakai ebaaba lɛ! Ani Ahab baatsake etsui ni etsi ehe kɛjɛ Baal jamɔ he? Nibii ni tee nɔ nakai gbi lɛ ha ana yiŋtoi titrii ahewɔ ni esa akɛ efee tsakemɔi ni tamɔ nakai. Yɛ anɔkwale mli lɛ, wɔnyɛŋ wɔle nɔ ni Ahab susuɔ he yɛ nakai beaŋ. Nɔ kɛkɛ ni amaniɛbɔɔ lɛ kɛɔ wɔ ji akɛ, maŋtsɛ lɛ “tá shwiili mli ni eyiŋ kɛtee Yezreel.” Ani ekase nɔ ko? Ani etswa efai shi akɛ ebaatsake egbɛ̀i lɛ? Nibii ni tee nɔ yɛ sɛɛ mli lɛ haa saji nɛɛ ahetoo akɛ dabi. Shi kɛlɛ, gbi lɛ bako naagbee kɛha Ahab kɛ Elia fɛɛ.

Yehowa gbalɔ lɛ bɔi gbɛfãa, ni etsɔ gbɛ ni Ahab tsɔ nɔ lɛ nɔŋŋ nɔ kɛtee. Gbɛ kakadaŋŋ ni nɔ ewo duŋ, ni enɔ hu eyi kɛ nu kã ehiɛ ni ebaafo. Shi agbɛnɛ nɔ ko ni akpaaa gbɛ ba.

“Yehowa nine ba Elia nɔ, ni emĩa, ni ehiɛ foi kɛnyiɛ Ahab hiɛ aahu kɛba Yezreel tɔ̃ɔ.” (Kuku 46) Eyɛ faŋŋ akɛ “Yehowa nine” miitsu nii yɛ naakpɛɛ gbɛ nɔ yɛ Elia nɔ. Yezreel jɛkɛmɔ aaafee kilomitai 30, ni Elia hu hiɛ efã.e Feemɔ gbalɔ nɛɛ he mfoniri yɛ ojwɛŋmɔŋ okwɛ akɛ, eedɔrɔ etade kakadaŋŋ lɛ nɔ, ni efĩ yɛ ehɛ koni enyɛ efamɔ enaji jogbaŋŋ ni ehiɛ foi kɛtsɔ gbɛ ni nɔ eyi tɔ kɛ nu lɛ nɔ—ejo foi waa aahu akɛ enyɛ eyanina maŋtsɛ lɛ shwiili lɛ ni eho ehe!

Mɛɛ jɔɔmɔ po enɛ ji nɛkɛ kɛha Elia! Hewalɛ, nyɛmɔ, kɛ ekãa ni tamɔ nakai ni ená—ni ekolɛ enu he po akɛ nomɛi fe nɔ ni ená yɛ eblahiiaŋ lɛ—bafee niiashikpamɔ ko ni yɔɔ miishɛɛ waa kɛha lɛ. Ekolɛ enɛ haa wɔkaiɔ gbalɛi ni maa nɔ mi ehaa wɔ akɛ adesai anɔkwafoi baaná gbɔmɔtsoŋ hewalɛ ni eye emuu kɛ nyɛmɔ yɛ shikpɔŋ lɛ nɔ Paradeiso ni baaba lɛ mli. (Yesaia 35:6; Luka 23:43) Eyɛ faŋŋ akɛ, beni Elia hiɛ foi kɛnyiɛ gbɛ ni nɔ eyi kɛ nu lɛ nɔ lɛ, ele akɛ eyɛ e-Tsɛ Yehowa ni ji anɔkwa Nyɔŋmɔ koome lɛ nɔkpɛlɛmɔ!

Yehowa efee klalo akɛ ebaajɔɔ mɔ fɛɛ mɔ. Mɔdɛŋ fɛɛ ni wɔɔbɔ kɛtao akɛ wɔnine aaashɛ jɔɔmɔi nɛɛ anɔ lɛ he baaba sɛɛnamɔ diɛŋtsɛ kɛha wɔ. Taakɛ Elia fee lɛ, esa akɛ wɔkwɛ nii jogbaŋŋ, ni wɔpɛi odaseyelii ni yɔɔ faŋŋ ni tsɔɔ akɛ etsɛŋ ni Yehowa baatsu saji ahe nii yɛ bei ni yɔɔ oshara ní faaa dɔŋŋ kwraa nɛɛ amli wɔkwɛ. Taakɛ Elia ji lɛ, wɔ hu wɔyɛ yiŋtoi kpakpai ni wɔɔdamɔ nɔ wɔná hekɛnɔfɔɔ kwraa yɛ Yehowa ni ji “Nyɔŋmɔ anɔkwafo!” lɛ shiwoi lɛ amli.—Lala 31:6.

[Shishigbɛ niŋmai]

[Akrabatsa/Mfoniri ni yɔɔ baafa 19]

Be Sɛɛkɛlɛ Enyiɛ Nuhɔmɔ ni Ba yɛ Elia Gbii lɛ Amli lɛ He?

Yehowa gbalɔ Elia kɛɛ Maŋtsɛ Ahab akɛ etsɛŋ ni nuhɔmɔ ni ehe be kakadaŋŋ lɛ sɛɛ baafo. Enɛ ba mli “yɛ afi ni ji etɛ lɛ nɔ”—ni eeenyɛ efee akɛ abɔi bei nɛɛ kanemɔ kɛjɛ gbi klɛŋklɛŋ ni Elia tswa adafi akɛ nuhɔmɔ lɛ baaba lɛ. (1 Maŋtsɛmɛi 18:1) Beni Elia wie akɛ Yehowa baaha nugbɔ anɛ lɛ sɛɛ etsɛɛɛ nɔŋŋ kɛkɛ ni Yehowa ha nugbɔ lɛ nɛ. Belɛ, ekolɛ mɛi komɛi baamu sane naa akɛ nuhɔmɔ lɛ sɛɛ fo yɛ afii enyɔ lɛ teŋgbɛ, ni no hewɔ lɛ eshɛɛɛ afii etɛ. Shi kɛlɛ, Yesu kɛ Yakobo fɛɛ haa wɔleɔ akɛ nuhɔmɔ lɛ he “afii etɛ kɛ nyɔji ekpaa.” (Luka 4:25; Yakobo 5:17) Ani Biblia lɛ teɔ shi ewoɔ ehe yɛ sane nɛɛ mli?

Dabi kwraa. Sane lɛ ji akɛ, yɛ blema Israel lɛ be ni nugbɔ enɛɛɛ lɛ sɛɛ tsɛɔ, kɛ hooo kwraa lɛ eheɔ nyɔji ekpaa sɔŋŋ. Ŋwanejee ko bɛ he akɛ beni Elia yatswa Ahab adafi yɛ nuhɔmɔ ni baaba lɛ he lɛ, no mli lɛ be ni nugbɔ enɛɛɛ lɛ sɛɛ etsɛ fe bɔ ni akpaa gbɛ ni enaa ewa. Enɛ tsɔɔ akɛ, nuhɔmɔ lɛ je shishi mra aaafee nyɔji ekpaa sɔŋŋ. No hewɔ lɛ, kɛjɛ be klɛŋklɛŋ ni Elia tswa adafi akɛ nuhɔmɔ lɛ baaba lɛ kɛyashi be ni esaa etswa adafi “yɛ afi ni ji etɛ lɛ nɔ” akɛ nuhɔmɔ lɛ sɛɛ baafo lɛ, no mli lɛ nuhɔmɔ lɛ ehe nɔ ni miishɛ afii etɛ kɛ fã momo. Beni maŋbii lɛ fɛɛ bua amɛhenaa kɛha kaa wulu ni tee nɔ yɛ Karmel Gɔŋ lɛ nɔ lɛ, no mli lɛ “afii etɛ kɛ nyɔji ekpaa” lɛ eho momo.

Agbɛnɛ, susumɔ be ni Elia yasara Ahab klɛŋklɛŋ kwraa lɛ he okwɛ. Gbɔmɛi lɛ heɔ amɛyeɔ akɛ Baal ji “mɔ ni kudɔɔ atatui lɛ,” lɛ ji nyɔŋmɔ ni baaha nugbɔ anɛ koni ekɛfo nuhɔmɔ lɛ sɛɛ. Kɛji be ni nugbɔ enɛɛɛ lɛ sɛɛ tsɛ fe bɔ ni akpaa gbɛ lɛ, mɛi ahiɛ feɔ amɛyaa ni amɛbiɔ akɛ: ‘Nɛgbɛ Baal yɔɔ? Mɛɛ be ebaaha nugbɔ anɛ?’ Adafi ni Elia tswa akɛ nugbɔ loo bɔ́ enɛŋ aahu kɛyashi beni ebaafã ni nugbɔ anɛ lɛ baafee nɔ ni hao Baal jálɔi lɛ waa diɛŋtsɛ.—1 Maŋtsɛmɛi 17:1.

[He ni Sane lɛ Jɛ]

Pictorial Archive (Near Eastern History) Est.

[Mfoniri ni yɔɔ baafa 18]

Elia sɔlemɔ lɛ tsɔɔ bɔ ni shwelɛ ni eyɔɔ akɛ afee Nyɔŋmɔ suɔmɔnaa nii lɛ mli wa ha