Be Ni Sa Akɛ Akpɛ Yiŋ Nɛ
‘Mɛɛ be yinɔ nɔŋŋ nyɛaadidãa yɛ saji enyɔ teŋ kɛyashi?’—1 Maŋtsɛmɛi 18:21.
1. Mɛni haa esoroɔ be ni wɔyɔɔ mli lɛ kwraa yɛ bei ni eho lɛ ahe lɛ?
ANI oheɔ oyeɔ akɛ Yehowa ji anɔkwa Nyɔŋmɔ koome lɛ? Ani oheɔ oyeɔ hu akɛ Biblia gbalɛi tsɔɔ akɛ wɔyɛ Satan yiwalɛ nibii agbɛjianɔtoo lɛ “naagbee gbii lɛ” amli? (2 Timoteo 3:1) Kɛ́ nakai ni lɛ, belɛ obaakpɛlɛ nɔ akɛ amrɔ nɛɛ ji be ni he hiaa fe fɛɛ ni esa akɛ okpɛ oyiŋ. Mɛi babaoo awala eyajeko oshara mli tamɔ ŋmɛnɛ.
2. Mɛni tee nɔ yɛ Israel akutsei nyɔŋma maŋtsɛyeli lɛ mli beni Maŋtsɛ Ahab yeɔ nɔ lɛ?
2 Yɛ afi 900 D.Ŋ.B. afii lɛ amli lɛ, ehe bahia ni Israel maŋ lɛ akpɛ amɛyiŋ yɛ sane ko ni yɔɔ hiɛdɔɔ he. Sane lɛ ji akɛ, namɔ amɛbaajá? Maŋtsɛ Ahab ŋa Izebel ni ji wɔŋjalɔ lɛ wo lɛ hewalɛ ni eha Baal jamɔ shwere yɛ Israel akutsei nyɔŋma maŋtsɛyeli lɛ mli. No mli lɛ, abuɔ Baal akɛ eji nyɔŋmɔ ko ni haa nugbɔ nɛɔ ni ŋmɔshi nibii baa babaoo. Ekolɛ Baal jalɔi lɛ ateŋ mɛi babaoo feɔ okadi yɛ kɔɔyɔɔŋ kɛtsɔɔ akɛ amɛmiishɔ́ nyɔŋmɔ ni amɛjáa lɛ lɛ he amaga lɛ naa loo amɛyakulaa amaga lɛ hiɛ amɛjáa lɛ. Baal jalɔi lɛ kɛ ajwamaŋi ni yɔɔ egbatsui lɛ amli lɛ kɛ amɛhe woɔ bɔlɛnamɔ jeŋba shara nifeemɔi ni yɔɔ nyaŋemɔ amli koni no aha Baal ajɔɔ amɛ ni amɛŋmɔshi nibii kɛ lɛɛ-kooloi lɛ ashwere. Nɔ kroko hu ni amɛfɔɔ feemɔ ji akɛ, amɛfolɔɔ amɛhe kakla kɛyashiɔ lá hoɔ yɛ amɛhe.—1 Maŋtsɛmɛi 18: 28.
3. Mɛɛ hewalɛ Baal jamɔ ná yɛ Nyɔŋmɔ webii lɛ anɔ?
3 Israelbii aaafee 7,000 kɛ amɛhe wooo amaga jamɔ ni jeŋba shara kɛ yiwalɛ nifeemɔ eyi mli obɔ̃ nɛɛ mli. (1 Maŋtsɛmɛi 19:18) Amɛjɛ anɔkwayeli mli amɛhi shi yɛ kpaŋmɔ ni amɛ kɛ Yehowa Nyɔŋmɔ fee lɛ naa, ni awa amɛ yi yɛ enɛ ni amɛfee lɛ hewɔ. Ákɛ nɔkwɛmɔnɔ lɛ, Maŋnyɛ Izebel ha agbe Yehowa gbalɔi lɛ babaoo. (1 Maŋtsɛmɛi 18:4, 13) Akɛni shihilɛ lɛ mli yawa hewɔ lɛ, Israelbii lɛ ateŋ mɛi babaoo bɔ mɔdɛŋ koni amɛsa Yehowa kɛ Baal fɛɛ hiɛ kɛtsɔ wɔŋjamɔ nifeemɔi ni amɛkɛfutu jamɔ ni amɛkɛhaa Yehowa lɛ nɔ. Shi Israelnyo ni kwáa Yehowa ni eyajáa apasa nyɔŋmɔ lɛ batsɔɔ hemɔkɛyeli kwalɔ. Yehowa wo Israelbii lɛ shi akɛ kɛji amɛsumɔ lɛ ni amɛbo ekitãi lɛ atoi lɛ, ebaajɔɔ amɛ. Shi kɛlɛ, ebɔ amɛ kɔkɔ akɛ kɛji ‘amɛjáaa lɛ pɛ’ lɛ, no lɛ ‘ebaakpata amɛhiɛ.’—5 Mose 5:6-10; 28:15, 63.
4. Mɛni Yesu kɛ ebɔfoi lɛ gba amɛfɔ̃ shi akɛ ebaaya nɔ yɛ Kristofoi ateŋ, ni mɛɛ gbɛ nɔ enɛ eba mli?
4 Shihilɛ ni tamɔ nakai nɔŋŋ miiya nɔ yɛ Kristendom ŋmɛnɛ. Sɔlemɔyalɔi lɛ kɛɔ akɛ Kristofoi ji amɛ, shi gbii juji ni amɛyeɔ, amɛnifeemɔi, kɛ nibii ni amɛheɔ amɛyeɔ lɛ kɛ nɔ ni Biblia lɛ tsɔɔ lɛ kpãaa gbee. Taakɛ Izebel fee lɛ, Kristendom osɔfoi lɛ nyiɛɔ hiɛ kɛwaa Yehowa Odasefoi ayi. Ale Kristendom osɔfoi lɛ kɛjɛ blema tɔ̃ɔ akɛ amɛfiɔ tawuui asɛɛ, ni no hewɔ lɛ, amɛ amɛha agbe amɛ diɛŋtsɛ amɛsɔlemɔ lɛ mli bii akpekpei abɔ ni gboi yɛ tai amli lɛ. Biblia lɛ wieɔ sɛɛfimɔ ni jamɔi lɛ kɛhaa je lɛŋ nɔyelii lɛ he akɛ eji mumɔŋ ajwamaŋbɔɔ. (Kpojiemɔ 18:2, 3) Kɛfata he lɛ, Kristendom kpɛlɛɔ ajwamaŋbɔɔ diɛŋtsɛ hu nɔ, ni emli osɔfoi lɛ po kɛ amɛhe woɔ mli. Yesu Kristo kɛ ebɔfoi lɛ gba amɛfɔ̃ shi akɛ hemɔkɛyeli kwamɔ kpeteŋkpele ni tamɔ nɛkɛ baaba. (Mateo 13:36-43; Bɔfoi lɛ Asaji 20:29, 30; 2 Petro 2:1, 2) Te gbɔmɛi ni fa fe akpekpe-toi-akpe kome ni yɔɔ Kristendom jamɔi lɛ amli lɛ anaagbee baafee aha tɛŋŋ? Ni mɛɛ sɔ̃ shihilɛ mli ni gbɔmɛi nɛɛ kɛ mɛi krokomɛi fɛɛ ni alaka amɛ awo apasa jamɔ mli lɛ yɔɔ lɛ kɛbafɔ̃ɔ Yehowa anɔkwa jálɔi lɛ anɔ? Nibii ni tee nɔ yɛ naakpɛɛ gbɛ nɔ, ní no ha ‘akpata Baal hiɛ kɛjɛ Israel’ lɛ amli ni wɔɔpɛi wɔkwɛ lɛ baaye abua wɔ koni wɔná sanebimɔi nɛɛ ahetooi ni mli kã shi faŋŋ.—2 Maŋtsɛmɛi 10:28.
Suɔmɔ ni Nyɔŋmɔ Jie lɛ Kpo Etsɔɔ Ewebii ni Kɔ Gbɛ Fɔŋ Lɛ
5. Mɛɛ gbɛ nɔ Yehowa tsɔ ejie suɔmɔ ni mli kwɔ kpo etsɔɔ ewebii ni kɔ gbɛ fɔŋ lɛ?
5 Yehowa Nyɔŋmɔ náaa toigbalamɔ ni ekɛbaa mɛi ni yeee lɛ anɔkwa lɛ anɔ lɛ he miishɛɛ. Ákɛ Tsɛ ni yɔɔ suɔmɔ lɛ, eshweɔ koni eshafeelɔi lɛ atsake amɛtsui ni amɛku amɛsɛɛ kɛba eŋɔɔ. (Ezekiel 18:32; 2 Petro 3:9) Nɔ ni yeɔ enɛ he odase ji akɛ, yɛ Ahab kɛ Izebel gbii lɛ amli lɛ, Yehowa kɛ gbalɔi babaoo tsu nii kɛbɔ E-webii lɛ akɔkɔ yɛ nɔ ni baajɛ Baal jamɔ mli aba lɛ he. Gbalɔi nɛɛ ateŋ mɔ kome ji Elia. Beni nu hɔmɔ ko ni naa wa ni Elia tsɔ hiɛ etswa he adafi lɛ ba mli lɛ, ekɛɛ Maŋtsɛ Ahab koni ebua Israelbii lɛ kɛ Baal gbalɔi lɛ fɛɛ anaa yɛ Karmel Gɔŋ lɛ nɔ.—1 Maŋtsɛmɛi 18:1, 19.
6, 7. (a) Mɛɛ gbɛ nɔ Elia tsɔ eha ana nɔ̃ tuuntu ni ha ni Israelbii lɛ tsɔmɔ hemɔkɛyeli kwalɔi lɛ? (b) Mɛni Baal gbalɔi lɛ fee? (d) Mɛni Elia hu fee?
6 Ekolɛ bɔni afee ni maŋtsɛ lɛ asa Izebel hiɛ lɛ, eha mɛi lɛ anaa yakpe shi yɛ Yehowa afɔleshaa latɛ ko ni ‘akumɔ’ lɛ masɛi. (1 Maŋtsɛmɛi 18:30) Shi dɔlɛ sane ji akɛ, Israelbii ni naa yakpe shi lɛ bɛ nɔmimaa kɛji Yehowa aloo Baal ni yɔɔ nyɛmɔ ni ekɛaaha nugbɔ ni he hiaa amɛ babaoo lɛ anɛ aha amɛ. Baal gbalɔi 450 yadamɔ enajiaŋ, shi Elia pɛ ji gbalɔ ni yadamɔ Yehowa najiaŋ. Beni Elia wieɔ nɔ tuuntu ni gbáa gbɔmɛi lɛ anaa lɛ he lɛ, ebi amɛ akɛ: ‘Mɛɛ be yinɔ nɔŋŋ nyɛaadidãa yɛ saji enyɔ teŋ kɛyashi?’ Kɛkɛ ni efee lɛ faŋŋ eha amɛ akɛ: “Kɛji Yehowa ji Nyɔŋmɔ lɛ, nyɛnyiɛa esɛɛ; shi kɛji Baal ni lɛ, no lɛ nyɛnyiɛa esɛɛ!” Bɔni afee ni ekanya Israelbii ni nyɛɛɛ akpɛ amɛyiŋ lɛ koni amɛtu amɛhe amɛha Yehowa pɛ jamɔ lɛ, Elia bi ni aka Yehowa kɛ Baal akwɛ akɛ amɛteŋ namɔ ji anɔkwa Nyɔŋmɔ lɛ. Abaagbe tsina hii enyɔ kɛshã afɔle, Yehowa nɔ̃ kome kɛ Baal hu nɔ̃ kome. Amɛteŋ mɔ ni baaha la abashã efɔle lɛ, belɛ lɛ ji anɔkwa Nyɔŋmɔ lɛ. Kɛkɛ ni Baal gbalɔi lɛ saa amɛfɔle lɛ amɛgbe naa, ni amɛbɔi bolɔmɔ ŋmɛlɛtswai abɔ amɛkɛɛ: “Baal heremɔ wɔ nɔ!” Beni Elia bɔi amɛhe fɛoyeli lɛ, amɛkɛ kaklai bɔi amɛhe folɔmɔ kɛyashi la bɔi hoo yɛ amɛhe, ni amɛkɛ gbee ni wa tee nɔ amɛbolɔ. Shi klãnaa, mɔ ko efooo amɛdaaŋ.—1 Maŋtsɛmɛi 18:21, 26-29.
7 Kɛkɛ ni ebashɛ Elia nɔ. Klɛŋklɛŋ lɛ, esaa Yehowa afɔleshãa latɛ lɛ, ni efolɔ tsina nuu lɛ mli eshwie nɔ. No sɛɛ lɛ, efã koni ayayɛ nu gbɛi ejwɛ abashwie afɔleshãa lɛ nɔ. Afee nakai shii etɛ sɔŋŋ kɛyashi nu batá afɔleshãa latɛ lɛ shishi obɔ. Kɛkɛ ni Elia sɔle akɛ: “Yehowa, Abraham kɛ Isak kɛ Israel Nyɔŋmɔ! ŋmɛnɛ ha ni aná ale akɛ bo ji Nyɔŋmɔ ni yɔɔ Israel, ni akɛ miji otsulɔ, ni owiemɔ lɛ naa mifeɔ nii nɛɛ fɛɛ yɛ! Heremɔ mi nɔ, Yehowa, heremɔ mi nɔ, koni nɛkɛ maŋ nɛɛ aná ale akɛ bo Yehowa ji Nyɔŋmɔ, ni akɛ bo nɔŋŋ oha amɛtsui ekpale kɛba ekoŋŋ!”—1 Maŋtsɛmɛi 18:30-37.
8. Mɛɛ gbɛ nɔ Nyɔŋmɔ tsɔ ebo Elia sɔlemɔ lɛ toi, ni mɛni gbalɔ lɛ fee?
8 Anɔkwa Nyɔŋmɔ lɛ here lɛ nɔ kɛtsɔ la ni eha ejɛ ŋwɛi bashã afɔle lɛ kɛ afɔleshãa latɛ lɛ fɛɛ lɛ nɔ. La nɛɛ ha nu ni ta afɔleshãa latɛ lɛ shishi lɛ fɛɛ mii! Susumɔ bɔ ni enɛ ná Israelbii lɛ anɔ hewalɛ eha lɛ he okwɛ. “Ni maŋ muu lɛ fɛɛ na, ni amɛkɛ amɛhiɛaŋ bumɔ shi, ni amɛkɛɛ: Yehowa lɛ, lɛ ji Nyɔŋmɔ! Yehowa lɛ, lɛ ji Nyɔŋmɔ!” Enɛ sɛɛ lɛ, Elia tsu nifeemɔ kroko ni he hiaa waa he nii. Efã Israelbii lɛ akɛ: “Nyɛmɔmɔa Baal gbalɔi lɛ; nyɛkahaa amɛteŋ mɔ kome folo miijoa foi!” Kɛkɛ ni agbe Baal gbalɔi 450 lɛ fɛɛ yɛ Karmel Gɔŋ lɛ shishi.—1 Maŋtsɛmɛi 18:38-40.
9. Aku sɛɛ aka anɔkwa jálɔi lɛ akwɛ yɛ mɛɛ gbɛ nɔ?
9 Yɛ nakai gbi ni hiɛ kpaŋ nɔ lɛ nɔŋŋ nɔ lɛ, Yehowa ha nugbɔ nɛ shikpɔŋ lɛ nɔ klɛŋklɛŋ kwraa yɛ afii etɛ kɛ fã mli! (Yakobo 5:17, 18) Obaanyɛ osusu sanegbaa ni baaya nɔ yɛ Israelbii lɛ ateŋ beni amɛkuɔ amɛsɛɛ kɛyaa shia lɛ he yɛ ojwɛŋmɔ mli; Yehowa tsɔɔ akɛ Nyɔŋmɔ ji lɛ lɛɛlɛŋ. Shi kɛlɛ, Baal jálɔi lɛ eŋmɛɛɛ saji ahe. Izebel tee nɔ ewa Yehowa tsuji lɛ ayi. (1 Maŋtsɛmɛi 19:1, 2; 21:11-16) Atsɔ nɛkɛ gbɛ nɔ aku sɛɛ aka anɔkwa ni Nyɔŋmɔ webii yeɔ lɛ lɛ akwɛ. Kɛ́ gbi ni Yehowa baakojo Baal jálɔi lɛ shɛ lɛ, ani ebaana ni ewebii lɛ miijá ekome pɛ?
Kpɛɛ Oyiŋ Amrɔ Nɛɛ
10. (a) Mɛni Kristofoi ni afɔ amɛ mu lɛ feɔ yɛ ŋmɛnɛŋmɛnɛ beaŋ? (b) Mɛni fãmɔ ni yɔɔ Kpojiemɔ 18:4 lɛ toiboo biɔ ni mɔ afee?
10 Yɛ ŋmɛnɛŋmɛnɛ beaŋ hu lɛ, Kristofoi ni afɔ amɛ mu lɛ miitsu nitsumɔ ko ni tamɔ Elia nɔ lɛ nɔŋŋ. Amɛbɔ gbɔmɛi ni jɛ jeŋmaji fɛɛ mli, ni ji mɛi ni yɔɔ Kristendom kɛ mɛi ni bɛ mli lɛ fɛɛ kɔkɔ yɛ oshara ni yɔɔ apasa jamɔ ni amɛyɔɔ mli lɛ he, ni amɛfee enɛ kɛtsɔ mɛi lɛ ni amɛkɛwieɔ tɛ̃ɛ kɛ agbɛnɛ hu woji ni amɛkalaa lɛ anɔ. Nɔ ni ejɛ mli kɛba ji akɛ mɛi akpekpei abɔ ekpɛ amɛyiŋ ni amɛ kɛ apasa jamɔi ni amɛyɔɔ mli lɛ efo tako mli. Amɛjɔɔ amɛhe nɔ amɛha Yehowa, ni amɛbatsɔmɔ Yesu Kristo kaselɔi ni abaptisi amɛ. Hɛɛ, amɛtsu nɔ ko ní Nyɔŋmɔ biɔ koni atsu he nii amrɔ nɔŋŋ lɛ he nii. Ekɛɛ akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ní nyɛkaná ehaomɔi lɛ eko.”—Kpojiemɔ 18:4.
11. Mɛni he hiaa ni mɔ afee koni ená Yehowa nɔkpɛlɛmɔ?
11 Mɛi akpekpei krokomɛi hu yɛ ní sumɔɔ Biblia mli shɛɛ sane ni Yehowa Odasefoi lɛ shiɛɔ lɛ, shi amɛkã he amɛbɛ nɔmimaa yɛ nɔ ni sa akɛ amɛfee he. Mɛi nɛɛ ateŋ mɛi komɛi baa Kristofoi akpeei tamɔ Nuŋtsɔ lɛ Gbɛkɛnaashi Niyenii lɛ kɛ kpokpaa wulu nɔ kpeei ni afeɔ lɛ ekomɛi ashishi. Wɔmiiwo mɛi nɛɛ fɛɛ ahewalɛ koni amɛsusu Elia sanebimɔ lɛ he. Ebi akɛ: “Be enyiɛ nyɛmɛɔ ni nyɛkpɛ nyɛyiŋ?” (1 Maŋtsɛmɛi 18:21, New English Bible) Yɛ nɔ najiaŋ ni amɛaashashao shi lɛ, ehe miihia ni amɛkpɛ amɛyiŋ amrɔ nɛɛ, koni amɛmia amɛhiɛ ni amɛbatsɔmɔ Yehowa jálɔi ni ejɔɔ amɛhe nɔ amɛha lɛ ni abaptisi amɛ. Kɛ́ amɛtsuuu enɛ he nii lɛ, no lɛ naanɔ wala baabɔ amɛ!—2 Tesalonikabii 1:6-9.
12. Mɛɛ shihilɛ ni yɔɔ oshara Kristofoi komɛi ni abaptisi amɛ lɛ eyaje mli, ni mɛni esa akɛ amɛfee?
12 Dɔlɛ sane ji akɛ, Kristofoi komɛi ni abaptisi amɛ lɛ ekpa shiɛmɔyaa loo ákɛ amɛfee kpɔkee. (Hebribii 10:23-25; 13:15, 16) Gbeyei ni mɛi komɛi sheɔ akɛ abaawa amɛ yi, yeyeeye ni amɛfeɔ yɛ amɛdaaŋ ŋmaa námɔ he, mɔdɛŋ ni amɛbɔɔ koni amɛná nii babaoo, kɛ pɛsɛmkunya akɔnɔi asɛɛdii eha ekãa ni amɛyɔɔ lɛ eba shi. Yesu bɔ kɔkɔ akɛ nibii nɛɛ baatsĩ esɛɛnyiɛlɔi lɛ ateŋ mɛi komɛi anaa, ni ebaaha amɛteaŋ mɛi komɛi adũ gbɛ, loo etɔ̃tɔ̃ amɛnaji. (Mateo 10:28-33; 13:20-22; Luka 12:22-31; 21:34-36) Yɛ nɔ najiaŋ ni amɛaaya nɔ ‘amɛdidã yɛ saji enyɔ teŋ’ taakɛ amɛfeɔ lɛ, esa akɛ mɛi nɛɛ ‘ahiɛ adɔ ni amɛtsake amɛtsui’ kɛtsɔ amɛyiŋ ni amɛaakpɛ koni amɛtsu amɛhenɔ ni amɛjɔɔ amɛha Nyɔŋmɔ lɛ he nii lɛ nɔ.—Kpojiemɔ 3:15-19.
Apasa Jamɔ Hiɛkpatamɔ ni Baaba Trukaa
13. Tsɔɔmɔ nibii ni yaa nɔ yɛ Israel beni afɔ Yehu mu akɛ maŋtsɛ lɛ.
13 Nɔ ni tee nɔ yɛ Israel, yɛ afii 18 sɛɛ beni ana mɔ ni ji anɔkwa Nyɔŋmɔ lɛ he sane lɛ naa yɛ Karmel Gɔŋ lɛ nɔ lɛ haa anaa nɔ hewɔ ni ehe hiaa ni adesai akpɛ amɛyiŋ amrɔ nɛɛ. Yehowa kojomɔ gbi lɛ bati Baal jálɔi lɛ ashi trukaa ní amɛkpaaa gbɛ, ni no mli lɛ, Elia sɛɛyelɔ Elisha miisɔmɔ akɛ gbalɔ. No mli lɛ, Maŋtsɛ Ahab binuu Yoram ji mɔ ni yeɔ Israel nɔ, ni Izebel kã he eeye maŋnyɛ. Elisha tsu etsuji lɛ ateŋ mɔ kome koni eyafɔ Israel asafoiatsɛ Yehu mu akɛ Israel maŋtsɛ hee. No mli lɛ, Yehu nyiɛ Israelbii lɛ ahiɛ amɛ kɛ amɛhenyɛlɔi lɛ miiwu yɛ Yordan faa lɛ bokagbɛ yɛ Ramot-Gilead. Ni Maŋtsɛ Yoram hu etee Yezreel yɛ Megido jɔɔ lɛ mli eyaatsá epilamɔi komɛi ni epila yɛ ta mli lɛ.—2 Maŋtsɛmɛi 8:29–9:4.
14, 15. Mɛɛ nitsumɔ akɛwo Yehu dɛŋ, ni te etsu he nii eha tɛŋŋ?
14 Yehowa fã Yehu akɛ: “Ni oootswia onuŋtsɔ Ahab we lɛ nii, koni mikɛtɔ mitsuji gbalɔi lɛ alá kɛ Yehowa tsuji lɛ fɛɛ alá he owele yɛ Izebel nɔ; ni Ahab we lɛ fɛɛ hiɛ aaakpata, . . . Izebel lɛ, gbeei aaaye lɛ yɛ Yezreel shikpɔŋ nɔ, ni anáŋ mɔ ko mɔ ko afu lɛ!”—2 Maŋtsɛmɛi 9:7-10.
15 Yehu ji mɔ ko ni shashaooo shi kɛ yiŋkpɛɛ. Oya nɔŋŋ ni eho eta eshwiili lɛ mli ni eyiŋ kɛtee Yezreel. Yehu shwiili lɛ foi woo ha bulɔ ko ni yɔɔ Yezreel lɛ yɔse lɛ, ni eyiŋ eyabɔ Maŋtsɛ Yoram amaniɛ, kɛkɛ ni Yoram bote eshwiili mli koni ekɛ asafoiatsɛ Yehu ayakpe. Beni amɛkpe lɛ, Yoram bi lɛ akɛ: “Hejɔlɛ sane ni lo, Yehu?” Yehu ha lɛ hetoo akɛ: “Mɛɛ hejɔlɛ ni, gbii abɔ ni onyɛ Izebel ajwamaŋbɔɔi kɛ ekunyãayelii lɛ fa babaoo lolo nɛɛ?” Kɛkɛ ni Maŋtsɛ Yoram ka foijee, shi Yehu tsɛ̃ lɛ gãi, ni gãi mlibi lɛ tsɔ etsui mli ni egbo.—2 Maŋtsɛmɛi 9:20-24.
16. (a) Mɛɛ shihilɛ Izebel piafoi lɛ kɛkpe trukaa? (b) Mɛɛ gbɛ nɔ tsɔ ni Yehowa gbalɛ ni kɔɔ Izebel he lɛ ba mli?
16 Oya nɔŋŋ ni Yehu ho eta eshwiili lɛ mli, ni ekɛ foi shwie nɔ kɛbote maŋ lɛ mli. No mli lɛ, Izebel esaa ehe haŋtsii kɛta samfɛlɛ ko naa eekwɛ mɛi ni yaa kɛbaa lɛ, ni beni ena Yehu lɛ, ekɛ hegbeyeiwoo wiemɔi kpee lɛ. Yehu efooo edaaŋ, shi moŋ etao mɛi koni amɛye amɛbua lɛ. No hewɔ lɛ ebi akɛ: “Namɔ yɔɔ migbɛfaŋ, namɔ?” Esa akɛ Izebel piafoi loo etsuji lɛ akpɛ amɛyiŋ amrɔ. Piafoi enyɔ loo etɛ jie amɛhiɛ kpo yɛ samfɛlɛ lɛ mli. Amrɔ nɔŋŋ ni aka amɛ akwɛ akɛ amɛbaaye anɔkwa lo. Yehu fã amɛ akɛ: “Nyɛtsia lɛ nyɛgbea shi!” Ni piafoi lɛ tsi Izebel kɛtsɔ samfɛlɛ lɛ mli amɛgbee shi, ni Yehu okpɔŋɔi kɛ shwiili lɛ naanaa enɔ. Nɛkɛ gbɛ nɔ atsɔ akpata mɔ ni je Baal jamɔ shishi yɛ Israel lɛ hiɛ. Ni beni atee koni ayawo lɛ ni afu lɛ lɛ, no mli lɛ gbeei eye eheloo fɛɛ taakɛ agba afɔ̃ shi lɛ pɛpɛɛpɛ.—2 Maŋtsɛmɛi 9:30-37.
17. Esa akɛ kojomɔ ni Nyɔŋmɔ kɛba Izebel nɔ lɛ awo wɔhemɔkɛyeli mli hewalɛ yɛ mɛɛ nifeemɔ ni baaba mli wɔsɛɛ lɛ he?
17 Hiɛkpatamɔ ni tamɔ nakai nɔŋŋ ní baaha mɛi anaa akpɛ amɛhe baaba mfonirifeemɔŋ yoo ajwamaŋ ni ale lɛ akɛ “Babilon Kpeteŋkpele” lɛ nɔ. Ajwamaŋ nɛɛ damɔ shi kɛha apasa jamɔi ni yɔɔ Satan je lɛ mli, ní ná amɛshishifã kɛjɛ blema Babilon maŋtiase lɛ mli lɛ. Kɛ́ akpata apasa jamɔ hiɛ agbe naa lɛ, Yehowa Nyɔŋmɔ baagbala ejwɛŋmɔ kɛba adesai fɛɛ ni eshwɛ ni yɔɔ Satan afã lɛ anɔ. Abaakpata mɛi nɛɛ hu ahiɛ, ni no baagbele gbɛ kɛha jalɛ jeŋ hee ni baa lɛ.—Kpojiemɔ 17:3-6; 19:19-21; 21:1-4.
18. Mɛni ba Baal jálɔi ni yɔɔ Israel lɛ anɔ yɛ Izebel gbele sɛɛ?
18 Beni Izebel gbo lɛ, Maŋtsɛ Yehu fiteee be ko kwraa ni ekpata Ahab seshibii lɛ kɛ mɛi titri ni fiɔ esɛɛ lɛ fɛɛ ahiɛ. (2 Maŋtsɛmɛi 10:11) Shi Baal jálɔi ni ji Israelbii babaoo shwɛ yɛ maŋ lɛ mli. Yehu kpɛ eyiŋ amrɔ nɔŋŋ yɛ mɛi nɛɛ ahe kɛtsɔɔ ‘bɔ ni eyeɔ Yehowa he awuŋa’ ehaa. (2 Maŋtsɛmɛi 10:16) Yehu kwa efee ehe Baal jálɔ, ni eto gbijurɔyeli wulu ko he gbɛjianɔ yɛ gbatsu ni Ahab ma eha Baal yɛ Samaria lɛ mli. Baal jalɔi fɛɛ ni yɔɔ Israel lɛ ba gbijurɔ nɛɛ shishi. Aŋa amɛyi awo gbatsu lɛ mli, ni hii ní kɛ Yehu yɔɔ lɛ gbe amɛ fɛɛ. Biblia lɛ mu bɔ ni sane lɛ tee nɔ eha lɛ naa akɛ: “Nɛkɛ Yehu kpata Baal hiɛ kɛjɛ Israel.”—2 Maŋtsɛmɛi 10:18-28.
19. Mɛɛ miishɛɛ sane ko mɛɔ “asafo babaoo” ni ji Yehowa anɔkwa jálɔi lɛ?
19 Abule Baal jamɔ shishi kwraa kɛjɛ Israel. Nakai nɔŋŋ je nɛŋ apasa jamɔi lɛ ahiɛkpatamɔ baaba trukaa yɛ gbɛ ni baaha mɛi anaa akpɛ amɛhe nɔ. Kɛ́ nakai kojomɔ gbi wulu lɛ shɛ lɛ, namɔ sɛɛ obaafĩ? Kpɛɛ oyiŋ amrɔ nɛɛ, ni ekolɛ obaaná hegbɛ akɛ ofata “asafo babaoo” ni ji adesai ni baaje “amanehulu kpeteŋkpele lɛ” mli shweshweeshwe lɛ ahe. Kɛkɛ lɛ, be mli ni osusuɔ nibii ni eho lɛ ahe lɛ, okɛ miishɛɛ baajie Nyɔŋmɔ yi ákɛ ekojo “ajwamaŋ kpeteŋkpele lɛ ni kɛ ejwamaŋbɔɔ lɛ efite shikpɔŋ lɛ.” Agbɛnɛ hu okɛ anɔkwa jálɔi krokomɛi lɛ baafee ekome kɛlá lala ni ŋɔɔ ni ŋwɛibɔfoi lɛ láa akɛ: “Haleluya! ejaakɛ Nuŋtsɔ, wɔ-Nyɔŋmɔ Ofe lɛ, miiye maŋtsɛ.”—Kpojiemɔ 7:9, 10, 14; 19:1, 2, 6.
Sanebimɔi Kɛha Sane Nɔjwɛŋmɔ
• Mɛni hewɔ blema Israelbii lɛ ye fɔ́ yɛ Baal jamɔ ni amɛkɛ amɛhe wo mli lɛ mli?
• Mɛɛ hemɔkɛyeli kwamɔ kpeteŋkpele Biblia lɛ gba efɔ̃ shi akɛ ebaaba, ni mɛɛ gbɛ nɔ tsɔ ni gbalɛ nɛɛ ba mli?
• Mɛɛ gbɛ nɔ Yehu tsɔ ebule Baal jamɔ shishi kwraa?
• Mɛni esa akɛ wɔfee koni wɔyi aná wala yɛ Nyɔŋmɔ kojomɔ gbi lɛ nɔ?
[Shikpɔŋ he mfoniri ni yɔɔ baafa 25]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Soko
Afek
Helkat
Yokneam
Megido
Taanak
Dotan
SAMARIA
En-Dor
Shunem
Ofra
Yezreel
Ibleam (Gat-Rimon)
Tirza
Bet-Shemesh
Bet-Shean (Bet-shan)
Yabesh-Gilead?
Abel-Mehola
Arbel We
Ramot-Gilead
[Gɔji ni Kwɔlɔ]
Karmel Gɔŋ
Tabor Gɔŋ
More
Gilboa Gɔŋ
[Nui]
Mediterranean Ŋshɔ
Galilea Ŋshɔ
[Faa]
Yordan Faa
[Nubu]
Harod Nubu
[He ni Sane lɛ Jɛ]
Based on maps copyrighted by Pictorial Archive (Near Eastern History) Est. and Survey of Israel
[Mfonirii ni yɔɔ baafa 26]
Wɔhe ni wɔkɛaawo shiɛmɔ nitsumɔ lɛ mli daa kɛ Kristofoi akpeei ni wɔɔya daa lɛ ji anɔkwa jamɔ nifeemɔi komɛi ni he hiaa waa
[Mfoniri ni yɔɔ baafa 28, 29]
Taakɛ Yehu fee lɛ, esa akɛ mɛi fɛɛ ni sumɔɔ akɛ amɛyi aná wala yɛ Yehowa gbi lɛ nɔ lɛ akpɛ amɛyiŋ