Yehowa Gbɛjianɔtoo Lɛ Miiya Hiɛ​—Ani Okɛ Lɛ Miiya?

ONYƐŊ okane Kristofoi a-Hela Ŋmalɛi lɛ ni onaa ekpɛŋ ohe yɛ anɔkwale ni eji akɛ ato Kristofoi lɛ gbɛjianɔ kɛha jamɔ. Aje gbɛ ato amɛ gbɛjianɔ ni amɛshiɛ, ni amɛgbɛ Nyɔŋmɔ Maŋtsɛyeli lɛ he sanekpakpa lɛ amɛshwa.

Ŋmɛnɛŋmɛnɛ beaŋ yinɔsane ŋmalɔ H. G. Wells kadi enɛ yɛ klɛŋklɛŋ Kristofoi lɛ ajamɔ he: “Egbɛjianɔtoo pɛ ni yɔɔ ji shiɛlɔi agbɛjianɔtoo, ni nɔ ni etsu titri ji ni eshiɛ.” Hɛɛ, taakɛ bɔfo Petro kɛɛ lɛ: “Lɛ [Yesu Kristo] ewowɔ kita akɛ wɔshiɛ wɔtsɔɔ maŋ lɛ ni wɔye odase.”​—Bɔfoi lɛ Asaji 10:​42; Mateo 28:​18, 19.

Shi shiɛmɔ yɛ wɔgbi nɛɛ mli hu​—nɛkɛ nibii agbɛjianɔtoo nɛɛ “naagbee gbii” lɛ hu? (2 Timoteo 2:​1-5) Yesu Kristo gba akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je lɛ fɛɛ, ni akɛye jeŋmaji lɛ fɛɛ odase, ni no dani naagbee lɛ aaaba.” (Mateo 24:14) No hewɔ lɛ, esa akɛ atsu jeŋ muu fɛɛ shiɛmɔ nitsumɔ kpeteŋkpele ko dani nibii agbɛjianɔtoo nɛɛ naagbee aba. Mɛɛ gbɛjianɔtoo feɔ enɛ?

Yɛ anɔkwale mli lɛ, gbɔmɛi kome pɛ yɔɔ ni ato amɛ gbɛjianɔ yɛ jeŋ muu fɛɛ kɛ yiŋtoo akɛ amɛtsu nɛkɛ maŋtsɛyeli shiɛmɔ nɛɛ. Amɛji Yehowa Odasefoi. Amɛshiɛmɔ nitsumɔ lɛ miilɛɛ yɛ shikpɔŋ lɛ fɛɛ nɔ, yɛ shikpɔji 206 nɔ. Odasefoi 2,361,896 ji mɛi ni na nitsumɔ nɛɛ mli gbɛfaŋ nɔ yɛ 1981. Enɛ tsɔɔ maŋtsɛyeli jajelɔi fe akpeiakpe kome mlijaa ejwɛ mli etɛ fe bɔ ni amɛji yɛ afii nyɔŋma pɛ ni eho lɛ!

Bɔni afee ni amɛnyɛ amɛkpee nitsumɔ lɛ mli lɛɛmɔ naa lɛ, afii enyɔ pɛ ni ho nɛ ni Yehowa Odasefoi gbe aloo amɛje nitsumɔhei hee nyɔŋmai enyɔ ni abaakala Biblia kasemɔ he woji yɛ mli lɛ anaa. Agbɛnɛ shweremɔ miiya nɔ oyayaayai yɛ Yehowa Odasefoi asafoi ni yɔɔ majimaji fɛɛ nɔ lɛ yitso lɛ. Yɛ klɛŋklɛŋ afii oha lɛ mli lɛ, Yerusalem bafee he ni ajɛɔ akɛ gbɛtsɔɔmɔ haa Kristofoi agbɛjianɔtoo lɛ. (Bɔfoi lɛ Asaji 15:​1, 2) Shi ŋmɛnɛ lɛ akɛ nakai gbɛtsɔɔmɔ lɛ haa kɛjɛɔ Brooklyn, New York.

Afi nɛɛ, March 15 gbɛkɛnaashi ajɔɔ Asafo lɛ yitso ni yɔɔ Brooklyn lɛ tsu hee ni ama agbe naa lɛ nɔ aha. Enɛ ji 25 Columbia Heights nitsumɔhe tsui lɛ ni anaa yɛ baafa ni tsa nɔ lɛ. Eji tsu ni asaa ama lɛ ehee kɛ ehee kwraa ni ama ni akɛtsa akɛfee tsu agbo kome.

Asafo lɛ yitso ni yɔɔ Brooklyn lɛ weku lɛ mlibii fe akpei enyɔ ba nɔjɔɔmɔ gbɛjianɔtoo ni aje shishi yɛ shia lɛ mli asa wulu lɛ nɔ yɛ gbɛkɛ 6:45 lɛ shishi. Agbɛnɛ atsɔ tɛlivishin nɔ aha ana nifeemɔ lɛ yɛ Maŋtsɛyeli Asa lɛ kɛ niyeli tsui sɔrɔtoi lɛ amli bɔni afee ni ehe aba sɛɛnamɔ aha weku lɛ mlibii ni amɛbua amɛhenaa yɛ jɛmɛ lɛ. Nɔ ni fata he lɛ, weku lɛ mlibii fe ohai ekpaa ni yɔɔ Watchtower Farms ni ekɛ New York jɛkɛmɔ aaafee shitooi nyɔŋmai nɛɛhu lɛ nyɛ amɛbo nɔ ni yaa nɔ lɛ toi kɛtsɔ kpaa nɔ.

Nɔjɔɔmɔ Lɛ Ma Nitsumɔ Mlilɛɛmɔ Nɔ Mi

Yɛ be mli ni Corey W. Barber sɔle sɛɛ lɛ, nɔjɔɔmɔ gbɛjianɔtoo lɛ je shishi kɛ Buu-Mɔɔ nikasemɔ kɛha otsi lɛ naamuamɔ ni John E. Barr fee ni enɛ sa jogbaŋŋ akɛni ekɔɔ henɔjɔɔmɔ he lɛ hewɔ. Kɛkɛ ni Milton G. Henschel, ni ji sɛinɔtalɔ kɛha nakai gbɛkɛ lɛ fɔ Grant Suiter nine koni etsɔɔ, bɔ ni Nyɔŋmɔ gbɛjianɔtoo lɛ “yinɔsɔne lɛ etee nɔ eha” kɛjɛ afi 1919 kɛbashi afi 1935.

Nyɛminuu Suiter je shishi akɛ, “Wɔwieee nɛkɛ nibii nɛɛ ahe yɛ henɔwomɔ mli ni nɔ susuuu Yehowa he, shi moŋ nɔ ni tamɔɔɔ enɛ lɛ, wɔsusuɔ ehe ni wɔyooɔ akɛ eŋɔɔ enaa akɛ ekɛwɔ, ni ji, weku lɛ aaatsu nii kɛtsɔ nɛkɛ afii nyɔŋmanyɔŋmai abɔ nɛɛ mli.” Beni Yehowa Odasefoi fa kɛtee Brooklyn klɛŋklɛŋ yɛ afi 1909 lɛ, no mli lɛ Asafo lɛ yitso lɛ weku lɛ mlibii lɛ ayibɔ aaafee nyɔŋmai etɛ ko pɛ.

Suiter tsɔɔ mli akɛ October 1919 mli gbɛjianɔtoo lɛ je shishi efee wolo tɛtrɛɛ hee ni ji The Golden Age, ni amrɔ nɛɛ atsɛɔ lɛ Awake! lɛ. Ni yɛ afi ni nyiɛ sɛɛ lɛ, Asafo lɛ weku lɛ je shishi amɛkala Biblia kasemɔ he woji yɛ amɛ diɛŋtsɛ amɛtsɔnei anɔ yɛ he ko bibioo ko yɛ Myrtle Avenue. Kɛkɛ ni Suiter kɛɛ akɛ, beni shɛɔ afi 1921 lɛ, no mli lɛ weku lɛ yi efa kɛyashɛ 107. Ekɛɛ akɛ beni shɛɔ afi 1923 lɛ no mli lɛ amɛfeɔ woji akpei enumɔ gbi kome.

Bɔni Nyɔŋmɔ gbɛjianɔtoo lɛ yaa hiɛ lɛ biɔ dɛŋdadei ni dara. No hewɔ lɛ taakɛ Suiter tsɔɔ mli lɛ, ama ahia hee agbo ko aha Asafo lɛ yitso lɛ weku lɛ yɛ 1927, yɛ Columbia Heights, ni ama nitsumɔhe hee ko ni ji ŋwɛitsu ni tsara nɔ kpaanyɔ yɛ 117 Adams Street ni ekɛ amɛteŋ jɛkɛɛɛ.

Yɛ be mii ni eyaa nɔ yɛ “shweremɔ ni ji yinɔsane” he nibii ni aŋmala ashwie shi lɛ mli lɛ, Lyman A. Swingle nyiɛ sɛɛ eba, ebagba bɔ ni Nyɔŋmɔ gbɛjianɔtoo lɛ etee hiɛ kɛjɛ afi 1936 kɛbashi afi 1950. Ekɛɛ akɛ, “Yiwaa miifa yɛ he fɛɛ he yɛ 1926 mli. Ama Hitler gboklɛfoi aŋsra Iɛ.” Kɛkɛ ni ekɛ enine tsɔɔ he ni nyɛmimɛi enyɔ ko ni ji nuumo kɛ yoomo ko tara ni ekɛɛ akɛ: “Amɔmɔ nyɛminuu Poetzinger kɛ eŋa yɛ nakai afi lɛ mli, ni akɛ amɛ wo nakai kpabuŋ lɛ mli, ni amɛnyɛɛɛ amɛshi jɛmɛ aahu afii nɛɛhu.” Yɛ nakai yiwaa nɛɛ fɛɛ sɛɛ lɛ, amɛkɛ afii krokomɛi etee nɔ amɛkɛ Nyɔŋmɔ gbɛjianɔtoo lɛ enyiɛ kɛtee hiɛ.

Swingle tee nɔ akɛ: “Enɛɛmɛi bafee afii ni mli wawai. Hitler fa esraafoi lɛ kɛtee Poland yɛ September 1, 1939, kɛkɛ ni Jeŋ Ta II je shishi.” Haomɔ bafa yɛ United States, Amerika. Etee nɔ ekɛɛ akɛ: “Asafo yuu kɛ gidigidifeemɔ fa kɛbɔle maŋ muu lɛ fɛɛ mii. Ashɔ̃ wɔ Maŋtsɛyeli Asai lɛ saŋŋ. Afite wɔlɔlei . . . Shi yɛ nɛkɛ naagbai nɛɛ fɛɛ sɛɛ lɛ, wɔna shiɛlɔi ayifalɛ ni ji nɔyaa, oha mlijaa 40 yɛ 1940! Enɛ tsɔɔ ekɛ asafo lɛ mlibii lɛ ku bɔ he yɛ ta be lɛ diɛŋtsɛ mli kɛjɛ maŋtsɛyeli shiɛlɔi 71,500 kɛyashi nɔ ni fe 141,000.

Swingle tee nɔ ekɛɛ akɛ: “Afee ta lɛ sɛɛ kpee “yɛ 1946 yɛ Cleveland, Ohio​—ni mɛi akpei nyɔŋmai kpaanyɔ ba.” Ni jɛmɛ atswa adafi yɛ akɛ abaama tsu kroko yɛ Columbia Heights, ni ákɛ nyɛmimɛi lɛ baanyɛ afi nɛkɛ tsumaa he gbɛjianɔtoo nɛɛ sɛɛ kɛ onia. Swingle kɛɛ akɛ: “Kɛkɛ ni wɔma tsu ko ni tsara nɔ nyɔŋma [kɛfata shia ni yɔɔ momo lɛ he], ni eda naakpa. Yɛ enɛ hewɔ lɛ wɔsusu akɛ ehe ebahiaŋ ni wɔma tsu dɔŋŋ yɛ Brooklyn. Yɛ nakai beaŋ nɔŋŋ lɛ wɔma tsu kroko yɛ 117 Adams Street ni tsara nɔ nɛɛhu akɛ nitsumɔhe. Ajɔɔ nɛkɛ tsui nɛɛ anɔ aha yɛ afi 1950 mli tɔɔ.”

Yɛ be mli ni eshɛ wiemɔ lɛ naagbee lɛ, nyɛminuu Swingle kai “1950-Klɛŋklɛŋ Yankee Stadium kpee lɛ​—gbii kpaanyɔ. Nyɛmimɛi jɛ maji nyɔŋmai ekpaa kɛ kpawo nɔ ba. Mɛi ni ba lɛ ayifalɛ ji, 123,707.” Belɛ eji shweremɔ kɛ nitsumɔ mlilɛɛmɔ be! “Kɛjɛ 1936 kɛyashi 1950 lɛ wɔyifalɛ lɛ shwere kɛjɛ 30,000 kɛyashɛ 373,430​—etee nɔ eshwere shii kpawo kɛ fa yɛ nakai afii nyɔŋma kɛ enumɔ lɛ mli!” Shi namɔ ji mɔ ni yijiemɔ lɛ sa lɛ diɛŋtsɛ? Yɛ naagbee lɛ Swingle tsɛ Nehemia wiemɔ lɛ sɛɛ: “Amɛyoo akɛ nɛkɛ nitsumɔ ni atsu nɛɛ, wɔ-Nyɔŋmɔ lɛ dɛŋ ejɛ.”​—Nehemia 6:​15, 16.

No sɛɛ lɛ, nyɛminuu Henschel diɛŋtsɛ wie “nifeemɔ ni ji yinɔsane​—kɛjɛ 1951 kɛyashi 1981 he.” Yɛ be mli ni ejeɔ ewiemɔ lɛ shishi lɛ, ekɛɛ akɛ: “Yehowa haa nibii baa. Yehowa haa eshwereɔ.” Kɛkɛ ni etsɛ nɛkɛ Paulo wiemɔi nɛɛ sɛɛ, “Wɔji Nyɔŋmɔ hefatalɔi nitsulɔi.” Kɛkɛ ni ebi akɛ: “Ani enɛ jeee susumɔ ko ni woɔ mɔ hewalɛ, ni wɔbaanyɛ wɔkɛ Nyɔŋmɔ atsu nii yɛ enitsumɔ lɛ mli ni wɔna nibii ni Yehowa haa ejɛɔ mli baa lɛ?”​—1 Korintobii 3:​6-9.

Henschel tee nɔ akɛ: “Odaseyeli lɛ yɛ jɛmɛ, shweremɔ ni ji yinɔsane lɛ yeɔ odase akɛ Yehowa ji mɔ ni kwɛɔ enitsumɔ lɛ nɔ. . . . Esa akɛ wɔna shiɛlɔi ni amɛshiɛ sanekpakpa nɛɛ yɛ jeŋ fɛɛ. No ji wɔnitsumɔ​—‘wɔshiɛ maŋtsɛyeli lɛ he sanekpakpa lɛ.’” Kɛkɛ ni egbala jwɛŋmɔ kɛba shweremɔ kpeteŋkpele ni etee nɔ lɛ nɔ: “Shiɛlɔi 789,000 yɛ 1958. Kɛkɛ lɛ beni shɛɔ 1968 lɛ, nitsulɔi 1,221,000. Beni shɛɔ 1978, 2,182,000, ni beni shɛɔ 1981 lɛ, 2,361,000.”

Henschel kɛɛ akɛ: “Bɔni afee ni nɛkɛ nitsulɔi ni fe 2,000,000 nɛɛ anyɛ atsu shiɛmɔ nitsumɔ lɛ, esa akɛ amɛna dɛŋdade.” Namɔ kɛbaaha? Asafo lɛ nitsumɔhe weku Iɛ miibii! Henschel kɛɛ akɛ: “Yɛ afi 1950 mli lɛ, no mli lɛ weku lɛ mlibii ayifalɛ ji 355.” Shi etee nɔ etsɔɔ akɛ yɛ be mli ni abɔi Biblia kasemɔ woji babaoo taomɔ lɛ enɛ ha Asafo lɛ yitso lɛ weku lɛ mlibii lɛ hu ayi bafa​—kɛbashɛ 512 yɛ 1960, kɛyashɛ 698 beni shɛɔ afi 1965, kɛyashɛ 1,288 yɛ 1970, kɛ agbɛnɛ aaafee 2,600 ŋmɛnɛ.

Bɔni afee ni ana wɔɔhe aha nɛkɛ nitsulɔi babaoo nɛɛ, ehe bahia ni ana tsui hu. Henschel tsɔɔ nibii amlilɛɛmɔ lɛ mli: Ajɔɔ shia hee ni tsara nɔ nyɔŋma kɛ enyɔ nɔ aha yɛ October 1960, yɛ 107 Columbia Heights. Ama shia hee ko hu yɛ 119 Columbia Heights ni ajɔɔ nɔ May 2, 1969. Kɛkɛ ni abahe Towers Hotel tsu agbo lɛ yɛ 1975, ni asaa enɛ mli akɛ he ni weku lɛ mlibii aaafee ohai nɛɛhu baanyɛ ahi akɛ wɔɔhe. Ni ama tsui hee hu yɛ Watchtower Farms agbe naa yɛ 1968, 1971 kɛ 1973.

Henschel gba gbɛ ni atsɔ nɔ ama tsu Iɛ kɛ nibii ni ahe koni akɛsaa tsu lɛ mli koni anyɛ afee Biblia kasemɔ he woji babaoo lɛ he sane. Yɛ afi 1956 mli lɛ, ama tsu hee ni tsara nɔ nyɔŋma kɛ etɛ yɛ 77 Sands Street. Kɛkɛ ni tsu lɛ hiɛgbɛ nɔŋŋ lɛ ahe tsu kroko (ni etsara nɔ nyɔŋma) yɛ afi 1958 mli. Kɛkɛ ni afi 1968 mli lɛ, agbe tsu kroko ni abaakala woji yɛ mli ni etsara nɔ nyɔŋma kɛ ekome lɛ maa naa. Enɛ kɛ nitsumɔhe yɛ 117 Adams Street lɛ fee tsui wuji ejwɛ ni tsara nɔ ni atsuɔ nii yɛ mli ni agba ni nyiɛ ŋwɛi nɔ atsɔɔ aboteɔ nɛkɛ tsui nɛɛ fɛɛ mli. Kɛkɛ ni November 1969 lɛ ahe Squibb tsui ni bɛŋkɛ lɛ. Ni taakɛ Henschel tsɔɔ mli lɛ, nɛkɛ tsui nɛɛ bafee nɔ ni ayɔɔ he miishɛɛ waa yɛ ŋwɛi jɔɔmɔ gbɛjianɔtoo lɛ mli, ejaakɛ 25 Columbia Heights nitsumɔhe tsui wulu lɛ fata nɛkɛ tsui sɔrɔtoi nɛɛ ahe.

Beni be shweɔ mli lɛ, no mli lɛ aalɛɛ nitsumɔ lɛ mli hu yɛ Watchtower Farms ni ahé yɛ 1963 mli lɛ. Henschel tsɔɔ bɔ ni agbe klɛŋklɛŋ tsu ni abaatsu nii yɛ mli lɛ naa aha yɛ 1973. Kɛkɛ ni aje nitsumɔ shishi yɛ 1975 mli yɛ nɔ ni ji enyɔ ni da fe klɛŋklɛŋ nɔ lɛ mli.

Yɛ be mli ni egba shweremɔ ni ji yinɔsane ni etee nɔ yɛ afii nyɔŋmai etɛ ni eho lɛ mli, ni 1958 Yankee Stadium-Polo Grounds kpee ni mɛi 253,922 ba lɛ fata he lɛ egbe naa lɛ, nyɛminuu Henschel fɔ nine etsɛ Max H. Larson yɛ nɔ ni ebaawie he ni ji “Tsumaa lɛ he nibii komɛi.” Nyɛminuu Larson kɛ mfonirii nyɔŋmai ejwɛ tsɔɔ bɔ ni akumɔ tsutsu Squibb tsui lɛ ashwie shi ni ama nitsumɔ-he hee afata he lɛ mli. Mɛi ni kwɛ enɛ lɛ na bɔ ni akɛ tsu nɛɛ tsa nitsumɔ-he kroko ni yɔɔ momo ni ásaa afee lɛ ehee ni tsɔ nitsumɔhe fɛfɛo lɛ nɔ.

Larson tsɔɔ mli akɛ: “Nitsumɔ lɛ je shishi yɛ 25 Columbia Heights ni aatsake lɛ kɛmiijɛ nitoohe kɛmiifee ŋmɛnɛŋmɛnɛ beaŋ tsu kɛjɛ 1978 teŋ gbɛ. Bɔni afee ni anyɛ atsu enɛ lɛ biɔ ni ana nitsulɔi ni ji nyɛmimɛi hii kɛ yei kɛjɛ 180 kɛyashi 200.” Aje nɛkɛ tsu nɛɛ fa lɛ kuumɔ shishi yɛ September 1979 kɛkɛ ni tsu lɛ maa je shishi kɛjɛ December 1979 yɛ 25 Columbia Heights bokagbɛ.

Franz Ha Nɔjɔɔmɔ Wiemɔ Lɛ

Kɛha nɛkɛ gbɛkɛ wiemɔ he gbɛjianɔtoo ni woɔ mɔ hewalɛ nɛɛ naagbee lɛ, Nyɛminuu Henschel fɔ nine etsɛ Watchtower Bible and Tract Society nɔkwɛlɔ, F. W. Franz. Nyɛminuu Franz je be fɛɛ shiɛmɔ nitsumɔ lɛ shishi yɛ 1914, ni esɔmɔ akɛ Asafo lɛ yitso lɛ weku lɛ mlinyo kɛjɛ 1920. No hewɔ lɛ enyɛ etsɔɔ niiashikpamɔi ni lɛ diɛŋtsɛ ekɛ ehiŋmɛi ena ni ŋɔɔ ni kɔɔ bɔ ni Yehowa gbɛjianɔtoo lɛ etee hiɛ lɛ mli babaoo.

Eyɛ mli akɛ tsu ni ama yɛ 25 Columbia Heights lɛ ji tsu hee ni hi ni yɔɔ fɛɔ fe fɛɛ moŋ, shi nyɛminuu Franz ma nɔ mi akɛ afeee enɛ yɛ pɛsɛmkunya yiŋtoo ko hewɔ. Egbala jwɛŋmɔ kɛtee Biblia mli sane ko ni yɔɔ Marko 7:​11-13 lɛ nɔ, he ni etsɔɔ akɛ nuu ko na heloo gbɛfaŋ nibii babaoo, shi ni ekɛaatsu nii ni ekɛwo efɔlɔi ahiɛ nyam taakɛ esa akɛ efee lɛ, eesumɔ ni lɛ diɛŋtsɛ ekɛtsu nii kɛha epɛsɛmkunya nibii. No hewɔ lɛ ejaje akɛ eji “corban, nikeenii ni ajɔɔ nɔ aha Nyɔŋmɔ.”

Shi kɛlɛ Nyɛminuu Franz kɛɛ: “Wɔnyɛmimɛi hii kɛ yei ni yɔɔ nɛkɛ nitsumɔhe tsui heei nɛɛ ni wɔjɔɔ nɔ wɔhaa Yehowa nɛɛ amli lɛ tamɔɔɔ nakai. Shi moŋ amɛkɛ nibii heei nɛɛ miitsu nii ni amɛkɛ amɛnibii ni hi fe fɛɛ aha Yehowa Nyɔŋmɔ. Amɛmiitsu nii waa, jeee ni amɛkɛna pɛsɛmkunya miishɛɛ kɛjɛ mli yɛ nitsumɔhe ni yɔɔ fɛo ni hi fe fɛɛ mli ni amɛyɔɔ lɛ hewɔ, shi moŋ ni amɛtsu nii babaoo yɛ gbɛ ni hi fe fɛɛ nɔ.”

Yɛ bɔ ni nɛkɛ tsui nɛɛ hi ni etsɛɔ, ni ehi fe fɛɛ eko lɛ fɛɛ sɛɛ lɛ, Nyɛminuu Franz kɛɛ akɛ Yehowa hebuu he miihia wɔ, taakɛ Biblia lɛ kɛɔ yɛ Lala 127:1: “Kɛ jeee Yehowa maa tsu lɛ, no lɛ yakatswaa mɛi ni maa lɛ gboɔ he deŋme.” Nyɛminuu Franz tsɔɔ mli akɛ nakai eji yɛ tsui ni yɔɔ biɛ lɛ agbɛfaŋ, ákɛ kɛ jeee Yehowa ji mɔ ni buɔ he ni ejɔɔ mɔdɛŋ ni wɔbɔɔ yɛ mli lɛ nɔ lɛ, eetɔ wɔ yaka. Shi taakɛ, Yehowa webii ayinɔsane kɛtsɔ afii abɔ lɛ amli yeɔ he odase lɛ, Yehowa miijɔɔ ewebii ni eebu amɛhe.

Yɛ be mli ni ekɛ wiemɔ nɛɛ baa naagbee lɛ, nyɛminuu Franz tsɛ wiemɔ kɛjɛ maŋtsɛ David wiemɔi lɛ amli; “Shi namɔ ji mi, ni namɛi ji mimaŋbii lɛ akɛ wɔɔnyɛ wɔha yɛ tsuijurɔnaa tamɔ nɛkɛ? Ejaakɛ oŋɔɔ fɛɛ jɛ, ni odɛŋ wɔna kɛjɛ ni wɔŋɔɔ wɔhaa bo nɛɛ.” (1 Kronika 29:14) No hewɔ lɛ akɛni Yehowa ji Nɔtsɛ kɛha nɔ fɛɛ nɔ ni wɔnuɔ nɛkɛ nibii nɛɛ kɛjɛɔ edɛŋ hewɔ lɛ, Franz kɛɛ, nɔ pɛ ni wɔfeɔ ji ni wɔkɛ fɛɛ ake Yehowa kɛtsɔ enɔ ni wɔɔjɔɔ wɔha lɛ lɛ nɔ. No hewɔ lɛ yɛ be mli ni ekɛ gbi ni woɔ mɔ mumɔŋ hewalɛ waa nɛɛ baa naagbee yɛ nakai gbɛkɛ lɛ, etswa adafi akɛ, “Masumɔ ni majaje akɛ nɛkɛ nitsumɔ tsu hee nɛɛ mamɔshi ni ajɔɔ nɔ kwraa ni nɔ ko eshwɛɛɛ yɛ sɛɛ aha Yehowa Nyɔŋmɔ.”

Gbi Muu Kɛ Emli Mumɔŋ Jɔɔmɔi Babaoo

Gbɛkɛ nɔjɔɔmɔ gbɛjianɔtoo lɛ bafee naagbee nɔ ko kɛkɛ, taakɛ eji lɛ, gbi krɛdɛɛ nɛɛ mli nitsumɔi lɛ amli nɔ ko ni akɛjieɔ daaŋ. Aje leebi lɛ shishi tamɔ Brooklyn nitsumɔhe yitso lɛ fɛɛ eko kɛ Biblia ŋmalɛ lɛ he susumɔ yɛ leebi ŋmɛlɛ 7, ni akɛ leebi niyenii lɛ nyiɛ sɛɛ. Nɛkɛ ni yɛ leebi ŋmɛlɛ 8, lɛ weku lɛ mlibii ni ji​—mɛi ni tsuɔ nii yɛ shia lɛ kɛ woji afeemɔhe tsui sɔrɔtoi lɛ amli lɛ je shishi akɛ amɛaakpa 25 Columbia Heights Nitsumɔhe Tsui Heei lɛ amli amɛkwɛ. Shi mɛi ni tsuɔ nii yɛ nɛkɛ tsui heei nɛɛ amli lɛ tee amɛnitsumɔi anɔ. Wolo bibioo ni hiɛ baafai nyɔŋmai enyɔ tsɔɔ gbi lɛ gbɛjianɔtoo kɛ tsui lɛ amlikwɛmɔ lɛ mli. Mɛni ji nɔ ni mɛi ni kpaa tsui nɛɛ amli lɛ na?

Akɛni amɛnyiɛ gbɛtsɔɔmɔ sɛɛ hewɔ lɛ, amɛbote 25 Columbia Heights tsu fɛfɛo hee nɛɛ mli yɛ eshishigbɛ ni amɛtsa nɔ kɛtee he ni atsɛɔ lɛ Service Department ni ji tsu nɛɛ nsɔdoi etɛ lɛ nɔ. Biɛ ji he ni nine shɛɔ kpokpaa nɔkwɛlɔi amaniɛbɔɔ 325 nɔ daa otsi yɛ ni mɛi nyɔŋma tsuɔ he nii yɛ Service Department lɛ. Amɛna Territory Department kɛ Pioneer Desk ni ji he ni atsuɔ shikpɔŋkuku kɛ gbɛgbalɔi ahe nii hu yɛ, yɛ tsu loo nsɔdoi enyɔ lɛ nɔ. Amɛjɛ biɛ amɛle akɛ ahe gbɛgbalɔi heei 5,578 awo sɔɔmɔ lɛ mli yɛ afi 1981 mli.

Amɛkɛ tsɔne kwɔ kɛtee nsɔdo ni ji nyɔŋma kɛ enyɔ lɛ nɔ, ni mɛi ni sharaa shi nɛɛ yakwɛ he ni ajɛɔ atsuɔ asafo Iɛ shika he nii yɛ lɛ. Amɛna Cost Accounting Department yɛ nsɔdo ni ji nyɔŋma kɛ ekome lɛ nɔ, he ni abuɔ Asafo lɛ nibii ni eheɔ kɛ woji ni akɛmajeɔ kɛyaa maŋsɛɛ lɛ ahe akɔntaa yɛ lɛ. Agbɛnɛ amɛyana Executive Offices Iɛ hu kɛ agbɛnɛ Nɔyeli Kuu lɛ asa ni amɛkpeɔ yɛ nɔ lɛ, yɛ nsɔdo ni ji nyɔŋma lɛ nɔ. Agbɛnɛ amɛana Art Department ni afeɔ mfonirii yɛ lɛ, yɛ nsɔdo ni ji nɛɛhu lɛ nɔ, ni amɛna gbɛi sɔrɔtoi anɔ ni nitɛŋlɔi lɛ tsɔɔ nɔ amɛkɛfeɔ mfonirii sɔrɔtoi amɛwoɔ Asafo lɛ woji amli lɛ.

He ni ashɛ ji woloŋmaa nitsumɔhe aloo Writing Department ni yɔɔ nsɔdoi kpaanyɔ lɛ nɔ lɛ, ni biɛ ji he ni aŋmaa Asafo Iɛ woji tɛtrɛɛbii, woji wuji kɛ woji krokomɛi amli saji lɛ yɛ. Ni amɛkɛ typewriter loo tsɔnei ni akɛŋmalaa woji ŋmaa, ni niŋmalɔi lɛ ateŋ mɛi pii kɛ nibii ni amɛŋmla lɛ woɔ computer mli tɛɛ. Enɛɛmɛi boteɔ tsɔne ko ni kalaa woji ni kɛ afɛ lɛ, eeenyɛ eŋmala wiemɔi aaafee 700 yɛ miniti kome mli. Etsɛŋ ni abaaná Computer tsɔnei ni akɛ wiemɔi tsɔɔ mli 106 aha nitsumɔhei sɔrɔtoi kɛ nɔ ni kalaa woji nɛɛ 16.

Nɔ ni nyiɛ sɛɛ ni ayakwɛ ji nsɔdoi kpawo lɛ, ni ji Photocomposition Department aloo he ni atoɔ niŋmai lɛ ahe gbɛjianɔ afeɔ Iɛ baafai yɛ lɛ. Atsɔɔ amɛ bɔ ni akɛ saji ni jɛ Writing Department lɛ woɔ plɛtei anɔ ni atoɔ he gbɛjianɔ ni afeɔ lɛ baafai bɔ ni ataoɔ. Agbɛnɛ yɛ Graphic Department ni bɛŋkɛ jɛmɛ lɛ ana bɔni akɛ niŋmai nɛɛ kɛ ehe mfonirii sɔrɔtoi lɛ woɔ kpai ana ahaa. Atsɔɔ enɛ nɔ afeɔ plɛtei ni akɛyaa nitsumɔhe ni kalaa woji lɛ koni akwɛ nɔ afee plɛtei ni akɛbaakala woji lɛ. Nɛkɛ nsɔdoi kpawo nɛɛ no nɔŋŋ weku lɛ yasara Spanish Department ni tsuɔ Spanish wiemɔ he nii kɛ Proofreading Department ni akaneɔ woji ni abaakala lɛ amli yɛ jɛmɛ lɛ. Agbɛnɛ nsɔdo ni ji ekpaa lɛ nɔ atsuɔ Data Processing he nii yɛ, ni ana bɔ ni computer gbɛjianɔtoi loo tsɔnei wuji nɛɛ kɛ nibii ni akɛbaa jɛmɛ lɛ fɛɛ toɔ ahaa lɛ.

Eyɛ mli akɛ ana babaoo moŋ, shi babaoo yɛ lolo ni abaana dani abaamɛ fioo ni aye noko fioo aaafee leebi ŋmɛlɛ 11:​45. No hewɔ lɛ mɛi ni kpaa shi nɛɛ yashɛ Correspondence Department ni ji hei ni ajɛɔ aŋmalaa woji kɛyahaa asafoi kɛ nine nitsumɔhei sɔrɔtoi kɛ Invoicing/Bookkeeping Department ni ji he ni abuɔ woji ajara he akɔŋtaa yɛ kɛ shikai krokomɛi ahe akɔŋtaa ni yɔɔ nsɔɔdoi enumɔ lɛ nɔ lɛ. Kɛkɛ ni amɛfoŋ kɛtsɔ agba lɛ nɔ (abaana enɛ yɛ mfoniri ni yɔɔ baafa 4) ni tsaa 25 Columbia Heights nitsumɔ he tsui lɛ ni yɔɔ gbɛjegbɛ lɛ sɛɛ gbɛ lɛ. Amɛyasara Building Office ni ji nitsumɔhe ni kwɛɔ tsui anɔ, Gilead School, Carton-making Department ni ji hei ni afeɔ adekai ni akɛ Asafo lɛ woji woɔ mli lɛ kɛ agbɛnɛ Seaffold Department ni ji he ni afeɔ pɛnte kɛ tsei ni akɛmaa tsui, Upholster Shop, ni ji tsu mli saamɔ nibii kɛ Handbindery kɛ Mechanical Maintenance ni ji woji atsaramɔ kɛ tsɔnei anɔkwɛmɔ he lɛ.

Mɛi pii nya Recording Studios ni ji he ni akɛ Biblia mli dramai, Biblia mli nikanemɔi kɛ lalai woɔ kpai anɔ yɛ lɛ he. Agbɛnɛ hu nɔ ni yɔɔ miishɛɛ ji he ni afeɔ nɛkɛ Tapes nɛɛ pii hu yɛ lɛ. Afeɔ cassette tapes nɛɛ aaafee akpei nyɔŋma kɛ enumɔ daa gbi, ni​—afee fe akpekpei nɛɛhu kɛjɛ be mli ni ato nɛkɛ nitsumɔhe nɛɛ shishi yɛ 1978 lɛ! Agbɛnɛ hu Eletronic Shop, Braille Department ni ji he ni afeɔ shwilafoi awoji yɛ lɛ, Construction Office, Drafting Office, Convention Office, Photography Department, ni ji he ni afeɔ mfonirii sɔrɔtoi yɛ, Personnel Office ni kwɛɔ nitsulɔi lɛ anɔ lɛ yɛ, kɛ Garage kɛ agbɛnɛ Shipping Department ni kɛ woji majeɔ maŋsɛɛ lɛ hu ni abaana dani ayaye nii shwane.

Mɛɛ ŋmlɛtswaa etɛ kɛ fa shikpaa ni mli eyi obɔ kɛ miishɛɛ nibii sɔŋŋ nɛ! Ákɛ Yehowa gbɛjianɔtoo lɛ miiya hiɛ lɛlɛŋ lɛ, eji nɔ ko ni mɛi fɛɛ le. Beni aye nɔ ko fioo sɛɛ lɛ, weku lɛ je amɛshisharamɔ lɛ shishi kɛtee woji afeemɔ he tsui lɛ diɛŋtsɛ mli. Nitsulɔi lɛ je nitsumɔ shishi shwane 12:30 koni amɛfee tsɔne ni akɛkalaa woji ni akɛkaseɔ Biblia lɛ he nɔkwɛmɔ nɔ amɛtsɔɔ. Nɔ ni yɔɔ miishɛɛ titiri ji offset tsɔne hee agbo lɛ​—tsɔne nɛɛ enumɔ yɔɔ yɛ be mli ni nyɛmimɛi lɛ sharaa shi amɛkwɛɔ lɛ, ni akɛ etɛ baaba abafata he afi nɛɛ. Tsɔnei nɛɛ ateŋ nɔ ni da fe fɛɛ, Bible press, lɛ kɛlɛ ji ninetalɔi 109!

Yɛ be mli ni akpa nitsumɔhe nɛɛ aaafee ŋmlɛtswaa etɛ sɛɛ lɛ, weku lɛ tsɔ amɛhiɛ ni aaya shia, etɔ amɛ shi amɛna miishɛɛ yɛ Yehowa jɔɔmɔ ni ka shi faŋŋ akɛ eyɔɔ mligbelemɔ lɛ nɔ lɛ hewɔ. Amɛbua amɛhenaa ekoŋŋ yɛ niyeli hei ekpaa lɛ yɛ shwane ŋmɛlɛ 4, koni amɛye niyenii krɛdɛɛ ko. No sɛɛ lɛ beni amɛjɔɔ amɛhe fioo lɛ, amɛfɛɛ amɛna tsu lɛ nɔjɔɔmɔ he gbɛjianɔtoo ni woɔ mɔ hewalɛ waa lɛ mli gbɛfaŋ nɔ.

Yehowa Gbɛjianɔtoo Ni Yaa Hiɛ Lɛ Sɛɛfimɔ

Yehowa webii miiná nɛkɛ miishɛɛ kɛ nyamɔ mumɔ nɛɛ nɔŋŋ yɛ maji babaoo mli yɛ be mli ni amɛnaa Yehowa jɔɔmɔ he odaseyeli yɛ mɔdɛŋ ni amɛbɔɔ akɛ amɛaalɛɛ nibii ni amɛtsɔɔ nɔ ni amɛkɛlɛɛɔ maŋtsɛyeli lɛ he sanekpakpa lɛ mli lɛ. Aama nine nitsumɔhe tsui heei yɛ maji sɔrɔtoi babaoo mli ni hei komɛi yɛ ni agbe naa ni hei komɛi yɛ ni akahe aama lolo.

Shi kɛlɛ, nɛkɛ tsumaa kɛ nitsumɔ mligbelemɔ nɛɛ fɛɛ biɔ shika. Eyɛ mli akɛ Yehowa Odasefoi kpako fai ni ake amɛ shika dã moŋ, shi mɛi ni yɔɔ he miishɛɛ akɛ amɛkɛ shika aaaye abua Yehowa Maŋtsɛyeli lɛ he nibii amli gbelemɔ mli lɛ baanyɛ afee nakai kɛtsɔ amɛyelikɛbuamɔ loo onia ni amɛkɛ aaaha Watchtower Asafo lɛ nine nitsumɔhe ni yɔɔ amɛmaŋ lɛ mli lɛ nɔ. Mɛi ni yɔɔ Ghana, lɛ baanyɛ ni amɛkɛ shika ni tamɔ nɛkɛ amaje kɛya Watchtower Society, Box 760, Accra. Aŋmaa woji akɛbadaa nɛkɛ nikeenii nɛɛ ashi.

Yehowa webii yɛ nitsumɔ ni mli ka shi faŋŋ, akɛ ashiɛ Nyɔŋmɔ Maŋtsɛyeli lɛ he sanekpakpa lɛ ni akɛye jeŋmaji lɛ fɛɛ odase dani naagbee lɛ aba. (Mateo 24:14) Yɛ he ni Nyɔŋmɔ eto eyiŋ akɛ ebaaŋmɛ gbɛ ni atsu nitsumɔ nɛɛ kɛyashi lɛ, wɔleee. Shi wɔbaanyɛ wɔna hekɛnɔfɔɔ akɛ bɔ fɛɛ bɔ ni wɔsɛɛ aaaji aha lɛ, Yehowa gbɛjianɔtoo lɛ baaya hiɛ ni efee nɔ ni E-fa akɛ afee lɛ.

[Mfoniri ni yɔɔ baafa 4]

Tsutsu Squibb tsui ni agbɛnɛ ebatsɔ Yehowa Odasefoi anɔ. 25 Columbia Heights nitsumɔhe tsui Iɛ yɔɔ ninejurɔ nɔ lɛ

[Mfonirii ni yɔɔ baafa 5]

124 Columbia Heights shia yɛ 1950

117 Adams Street nitsumɔhe yɛ 1950

[Mfonirii ni yɔɔ baafa 6]

107 Columbia Heights

“Towers” tsu lɛ

119 Columbia Heights

[Mfonirii ni yɔɔ baafa 7]

Nitsumɔhe tsui sɔrɔtoi ejwɛ ni aŋɔtsa ni yɔɔ Brooklyn lɛ

Watchtower Farms nitsumɔhe ni akalaa woji hu yɛ kɛ wɔɔhe kɛha nyɛmimɛi lɛ

[Mfoniri ni yɔɔ baafa 8]

Fred Franz miiha nɔjɔɔmɔ wiemɔ

[Mfonirii ni yɔɔ baafa 9]

25 Columbia Heights nitsumɔhe tsui wuji, kɛ nibii sɔrɔtoi ni atsuɔ yɛ mli

1. Aabote 25 Columbia Heights tsui lɛ amli

2. Aashara shi yɛ nɔyeli kuu lɛ tsu lɛ mli

3. Aakwɛ computer tsu lɛ mli

4. Aasara nɔkwɛlɔ nitsumɔhe lɛ

5. Aakwɛ he ni afeɔ mfonirii sɔrɔtoi yɛ

6. Aakwɛ hei ni aŋmaa Biblia mli saji yɛ kɛ computer tsɔnei