“Namɔ Tamɔ Yehowa, Wɔ-Nyɔŋmɔ Lɛ?”
“Namɔ tamɔ Yehowa, wɔ-Nyɔŋmɔ lɛ, mɔ ni eshitamɔ he yɔɔ ŋwɛi lɛ?”—LALA 113:5.
1, 2. (a) Te Yehowa Odasefoi buɔ Nyɔŋmɔ kɛ Biblia lɛ amɛhaa tɛŋŋ? (b) Mɛɛ sanebimɔi esa akɛ wɔsusu he?
AJƆƆ Yehowa yijielɔi lɛlɛŋ. Mɛɛ hegbɛ nɛ, akɛ aaafata asafo babaoo ni yɔɔ miishɛɛ nɛɛ ahe! Akɛ e-Dasefoi lɛ, wɔkpɛlɛɔ Nyɔŋmɔ Wiemɔ ni ji Biblia lɛ mli ŋaawoo, mlai, tsɔɔmɔi, shiwooi, kɛ gbalɛi anɔ. Eŋɔɔ wɔnaa akɛ wɔɔkase nii kɛaajɛ Ŋmalɛi lɛ amli ni wɔfee “[Yehowa] Nyɔŋmɔ kaselɔi.”—Yohane 6:45.
2 Yɛ bulɛ loo woo babaoo ni amɛyɔɔ amɛhaa Nyɔŋmɔ hewɔ lɛ, Yehowa Odasefoi baanyɛ abi akɛ: “Namɔ tamɔ Yehowa, wɔnyɔŋmɔ lɛ?” (Lala 113:5) Nakai lalatsɛ lɛ wiemɔi lɛ tsɔɔ hemɔkɛyeli. Shi mɛni hewɔ Odasefoi lɛ yɔɔ hemɔkɛyeli ni tamɔ nɛkɛ yɛ Nyɔŋmɔ mli lɛ? Ni mɛni ji yiŋtoi ni amɛyɔɔ ni no hewɔ ni amɛjieɔ Yehowa yi lɛ?
Hemɔkɛyeli kɛ Yijiemɔ Sa
3. Mɛni ji Hallel Lalai lɛ, ni mɛni hewɔ atsɛɔ amɛ nakai lɛ?
3 Yehowa mli hemɔkɛyeli sa, ejaakɛ lɛ ji Nyɔŋmɔ ni esoro lɛ kwraa lɛ. Amaa enɛ nɔ mi yɛ Lala 113, La 114, kɛ La 115, ni ji Hallel Lalai ekpaa lɛ fã lɛ amli. Taakɛ rabifoi a-Hillel Skul lɛ tsɔɔ lɛ, alaa Lala 113 kɛ La 114 yɛ Yudafoi a-Hehoo niyenii lɛ shishi, beni anu wein kpulu ni ji enyɔ lɛ ni atsɔɔ gbijurɔ ni ayeɔ lɛ mli lɛ sɛɛ. Alaa Lalai La 115 kɛyashiɔ La 118 yɛ wein kpulu ni ji ejwɛ lɛ sɛɛ. (Okɛto Mateo 26:30 he.) Atsɛɔ amɛ “Hallel Lalai” ejaakɛ amɛfɔɔ wiemɔ Haleluya—“Nyɛjiea Yah Yi!” lɛ jajemɔ shii abɔ.
4. Mɛni ji wiemɔ “Haleluya” shishi, ni shii enyiɛ epueɔ yɛ Biblia lɛ mli?
4 “Haleluya!” (“Nyɛjiea Yah Yi!”) lɛ ji bɔ ni Hebri wiemɔi ni jeɔ kpo shii 24 yɛ Lalai lɛ amli lɛ shishitsɔɔmɔ gbɛ́ɔ ehaa diɛŋtsɛ. Bɔ ni egbɛ́ɔ yɛ Hela wiemɔ mli lɛ hu jeɔ kpo shii ejwɛ yɛ miishɛɛ ni anaa yɛ Babilon Kpeteŋkpele lɛ, jeŋ apasa jamɔ maŋtsɛyeli lɛ hiɛkpatamɔ mli lɛ hewɔ, kɛ mlifilimɔ akɛni Yehowa Nyɔŋmɔ miiye nɔ akɛ Maŋtsɛ lɛ hewɔ, yɛ Biblia lɛ mli hei krokomɛi. (Kpojiemɔ 19:1-6) Beni wɔsusuɔ Hallel Lalai lɛ amli etɛ he agbɛnɛ lɛ, wɔbaanyɛ wɔsusu wɔ diɛŋtsɛ wɔhe hu akɛ wɔmiila nɛkɛ lalai nɛɛ ni wɔkɛjie Yehowa yi.
Nyɛjiea Yah Yi!
5. Mɛɛ sanebimɔ hetoo Lala 113 haa lɛ, ni famɔ ni yɔɔ Lala 113:1, 2 lɛ kɔɔ namɛi ahe titri?
5 Lala 113 haa sanebimɔ, Mɛni hewɔ esa akɛ ajie Yehowa yi? lɛ hetoo. Ejeɔ shishi kɛ famɔ nɛɛ: “Haleluya! Nyɛ Yehowa tsuji, nyɛjiea eyi, nyɛjiea Yehowa gbɛi lɛ yi! Yijiemɔ aha Yehowa gbɛi lɛ kɛjɛ be nɛɛ mli aaahu kɛyashi naanɔ.” (Lala 113:1, 2) “Haleluyal” Hɛɛ, “Nyɛjiea Yah Yi!” Nakai famɔ lɛ kɔɔ Nyɔŋmɔ webii ahe titri yɛ “naagbee be” nɛɛ mli. (Daniel 12:4) Abaawo Yehowa gbɛi lɛ nɔ gojoo yɛ shikpɔŋ lɛ fɛɛ nɔ kɛjɛ be nɛɛ mli aahu kɛyashi naanɔ. E-Dasefoi lɛ jajeɔ agbɛnɛ akɛ Yehowa ji Nyɔŋmɔ, Kristo ji Maŋtsɛ, ni ato Maŋtsɛyeli lɛ ama shi yɛ ŋwɛi. Satan Abonsam kɛ egbɛjianɔtoo lɛ nyɛŋ atsi Yehowa yijiemɔ nɛɛ naa.
6. Yɛ mɛɛ gbɛ nɔ ajieɔ Yehowa yi ‘kɛjɛɔ hulu shitee he kɛyashiɔ eshinyɔɔ he’?
6 Yijiemɔ lala lɛ baaya nɔ aahu kɛyashi be mli ni Yehowa aaaha ekpele shikpɔŋ muu lɛ fɛɛ nɔ. “Esa akɛ ajie Yehowa gbɛi lɛ yi kɛjɛ hulu shitee he kɛyashi eshinyɔɔ he.” (Lala 113:3) Enɛ fe daa gbi jamɔ kɛkɛ ni shikpɔŋ nɔ bɔɔ nii komɛi kɛaaha lɛ. Hulu teɔ shi yɛ bokagbɛ ni eyanyɔɔ shi yɛ anaigbɛ, ni ehaa shikpɔŋ muu lɛ fɛɛ nɔ. Etsɛŋ ni gbɔmɛi fɛɛ ni aha amɛye amɛhe kɛjɛ apasa jamɔ kɛ Satan gbɛjianɔtoo lɛ mli lɛ baajie Yehowa gbɛi lɛ yi yɛ he fɛɛ he ni hulu kpɛɔ yɛ. Yɛ anɔkwale mli lɛ, Yehowa Odasefoi ni afɔ amɛ mu lɛ kɛ mɛi ni baafee e-Maŋtsɛ Yesu Kristo shikpɔŋ nɔ bii lɛ miila lala ni baŋ naagbee nɛɛ bianɛ. Mɛɛ hegbɛ amɛna nɛkɛ akɛ mɛi ni laa Yehowa yijiemɔi!
Anyɛŋ akɛ Mɔ ko Ato Yehowa He
7. Mɛɛ Yehowa sui titrii enyɔ akadi yɛ Lala 113:4?
7 Lalatsɛ lɛ kɛfata he akɛ: “Yehowa kwɔ gojoo kɛteke jeŋmaji fɛɛ, ni enunyam lɛ teke ŋwɛi.” (Lala 113:4) Enɛ gbalaa jwɛŋmɔ kɛyaa nibii enyɔ ni kɔɔ ofe ni Nyɔŋmɔ ji lɛ he: (1) Kɛha Yehowa, Ofe Lɛ, ni “kwɔ gojoo kɛteke jeŋmaji fɛɛ” lɛ, amɛtamɔ nu kuli yɛ blagee he, ni abuɔ amɛ tamɔ mulu kuli ni kpɛtɛ nsɛni he; (Yesaia 40:15; Daniel 7:18) (2) enunyam da kwraa fe ŋwɛii ni akɛ hiŋmɛii naa nɛɛ nɔ, ejaakɛ ŋwɛibɔfoi lɛ feɔ esuɔmɔnaa nii akɛ maŋtsɛ.—Lala 19:2, 3; 103:20, 21.
8. Mɛni hewɔ ni mɛɛ gbɛ nɔ Yehowa tsɔɔ emaa ehiɛ shi ekwɛɔ saji ni yaa nɔ yɛ ŋwɛi kɛ shikpɔŋ nɔ lɛ yɛ?
8 Akɛni bɔ ni Nyɔŋmɔ kwɔ ha lɛ tsirɛ lɛ hewɔ lɛ, lalatsɛ lɛ kɛɛ: “Namɔ tamɔ Yehowa, wɔ-Nyɔŋmɔ lɛ, mɔ ni eshitamɔ he yɔɔ ŋwɛi lɛ, mɔ ni maa ehiɛ shi ni ekwɛɔ nii ni yɔɔ ŋwɛi kɛ shikpɔŋ lɛ nɔ fɛɛ lɛ? (Lala 113:6, 6) Bɔ ni Nyɔŋmɔ kwɔ gojoo sɔŋŋ ha hewɔ lɛ esa akɛ ema ehiɛ shi, ni ekwɛ saji ni yaa nɔ yɛ ŋwɛi kɛ shikpɔŋ nɔ. Eyɛ mli akɛ Yehowa jeee mɔ ni baa shi fe mɔ ko loo mɔ ni yɔɔ mɛi krokomɛi ashishi moŋ, shi ejieɔ heshibaa kpo yɛ mɔbɔnalɛ kɛ musuŋtsɔlɛ ni ekɛtsuɔ eshafeelɔi ni eba shi lɛ ahe nii lɛ mli. E-Bi Yesu Kristo, ni ekɛ lɛ ha akɛ “eshai ahe kpatamɔ nɔ” kɛha Kristofoi ni afɔ amɛ mu lɛ kɛ adesai aje lɛ hu nɔ̃ lɛ ji Yehowa heshibaa lɛ kpojiemɔ.—1 Yohane 2:1, 2.
Musuŋtsɔlɔ Ji Yehowa
9, 10. Mɛɛ gbɛ nɔ Nyɔŋmɔ tsɔɔ ‘ewoɔ ohiafo nɔ koni ekɛ abladei atara shi’?
9 Yɛ be mli ni emaa Nyɔŋmɔ musuŋtsɔlɛ nɔ mi lɛ, lalatsɛ lɛ kɛfata he akɛ Yehowa “teeɔ humii ashi kɛjɛɔ su mli, ni ewoɔ ohiafo nɔ kɛjɛɔ tumu nɔ, koni eha ekɛ abladei, ni ji emaŋ lɛ mli abladei lɛ atara shi. Ehaa yoo kene tsɔɔ shianyɛ, ni etsɔɔ biianyɛ ni nyaa. Haleluya!” (Lala 113:7-9) Yehowa webii yɛ hemɔkɛyeli akɛ ebaanyɛ ejie ohiafoi ni ja lɛ, ni etsake amɛshihilɛ, ni ekɛ nibii ni he hiaa amɛ diɛŋtsɛ ni amɛtsui shweɔ lɛ aha amɛ. ‘Mɔ ni Kwɔ ni Awo Enɔ lɛ kanyaa heshibalɔi kɛ mɛi ni tswiaa shi lɛ atsui.’—Yesaia 57:15.
10 Mɛɛ gbɛ nɔ Yehowa tsɔɔ ‘ewoɔ ohiafo nɔ ni ehaa ekɛ abladei taraa shi’ yɛ? Kɛ eji Nyɔŋmɔ suɔmɔnaa nii lɛ, ekɛ etsuji woɔ anunyam gbɛhei ni tamɔ abladei anɔ lɛ amli. Efee nakai yɛ Yosef, ni batsɔ Mizraim niyenii anɔkwɛlɔ lɛ sane lɛ mli. (1 Mose 41:37-49) Eji hegbɛ ni asumɔɔ waa yɛ Israel akɛ akɛ abladei loo hii ni yɔɔ hegbɛ aaatara shi yɛ Yehowa webii ateŋ. Taakɛ Kristofoi onukpai ji ŋmɛnɛ lɛ, gbɔmɛi ni tamɔ nɛkɛ lɛ anine shɛ Nyɔŋmɔ yelikɛbuamɔ kɛ jɔɔmɔ nɔ.
11. Mɛni hewɔ abaanyɛ akɛɛ akɛ Lala 113:7-9 kɔɔ Yehowa webii ni yɔɔ ŋmɛnɛŋmɛnɛ beaŋ lɛ ahe titri lɛ?
11 Ni ‘yoo kene ni ehaa etsɔɔ biianyɛ’ lɛ hu? Nyɔŋmɔ ha Hana ni ji kene lɛ fɔ binuu—Samuel, ni etuu lɛ eha E-sɔɔmɔ. (1 Samuel 1:20-28) Nɔ ni sa kadimɔ jogbaŋŋ lɛ, kɛjɛ Yesu nɔ kɛ mumɔ krɔŋkrɔŋ lɛ ni afɔse ashwie ekaselɔi lɛ anɔ yɛ Pentekoste afi 33 Ŋ.B. kɛyaa lɛ, Nyɔŋmɔ okadi yoo lɛ, ŋwɛi Zion lɛ, je shishi efɔ mumɔŋ bii. (Yesaia 54:1-10, 13; Bɔfoi lɛ Asaji 2:1-4) Ni taakɛ bɔ ni Nyɔŋmɔ ku sɛɛ ekɛ Yudafoi lɛ ba amɛshikpɔŋ nɔ ekoŋŋ yɛ Babilon nomŋɔɔ lɛ sɛɛ lɛ, nakai nɔŋŋ eha shwɛɛnii ni afɔ amɛ mu lɛ ni ji “Nyɔŋmɔ Israel” mlibii lɛ ye amɛhe kɛjɛ Babilon nyɔŋyeli mli yɛ 1919, ni ejɔɔ amɛ yɛ mumɔŋ babaoo ákɛ Lala 113:7-9 mli wiemɔi lɛ kɔɔ amɛhe. (Galatabii 6:16) Akɛ Yehowa Odasefoi anɔkwafoi lɛ, mumɔŋ Israel shwɛɛnii lɛ kɛ amɛhefatalɔi ni yɔɔ shikpɔŋ nɔ hiɛnɔkamɔ lɛ kɛ miishɛɛ miihere Lala 113 mli naagbee wiemɔi lɛ anɔ akɛ: “Haleluya!”
Bɔ Ni Esoro Yehowa Kwraa Ha lɛ He Odaseyeli
12. Lala 114 lɛ tsɔɔ bɔ ni esoro Yehowa kwraa ha lɛ yɛ mɛɛ gbɛ nɔ?
12 Lala 114 tsɔɔ bɔ ni esoro Yehowa kwraa ha kɛtsɔ nibii ni ba ni kɔɔ Israelbii lɛ ahe lɛ ni etsiɔ ta lɛ nɔ. Lalatsɛ lɛ fo lala nɛɛ: “Beni Israel je Mizraim, ni Yakob we lɛ je maŋ ni wieɔ maŋsɛɛ wiemɔ lɛ ŋɔɔ lɛ, Yuda tsɔ ehe-krɔŋkrɔŋ, ni Israel tsɔ enɔyeli he.” (Lala 114:1, 2) Nyɔŋmɔ jie Israel kɛjɛ Mizraim, ni amɛwiemɔ tamɔ maŋsɛɛ wiemɔ ni amɛnuu lɛ nyɔŋyeli shishi. Yehowa webii, ni atsɛɔ amɛ Yuda kɛ Israel yɛ lalafoo wiemɔ ni akɛto he lɛ mli lɛ tsɔɔ akɛ, Nyɔŋmɔ baanyɛ ajie etsuji fɛɛ ŋmɛnɛ.
13. Yɛ mɛɛ gbɛ nɔ Lala 114:3-6 tsɔɔ Yehowa agbojee kɛ bɔ ni ekɔɔ blema Israel niiashikpamɔi ahe?
13 Bɔ ni Yehowa ji maŋtsɛ yɛ bɔɔ nii fɛɛ nɔ lɛ jeɔ kpo yɛ wiemɔi nɛɛ amli: “Ŋshɔ lɛ na, ni ejo foi; Yordan hu ku esɛɛ kɛtee. Gɔji lɛ tumɔ tamɔ tooi agboi, gɔŋkpɔi lɛ hu tamɔ too bii. Ŋshɔ, mɛni feɔo ni ojoɔ foi nɛɛ? Bo Yordan hu, ni okuɔ osɛɛ kɛyaa nɛɛ? Nyɛ gɔji lɛ, ni nyɛtumɔɔ tamɔ too agboi, nyɛ gɔŋkpɔi lɛ, tamɔ too bii nɛɛ?” (Lala 114:3-6) Ŋshɔ Tsuru lɛ “jo foi” beni Nyɔŋmɔ gbele gbɛ kɛtsɔ mli kɛha ewebii lɛ. Kɛkɛ ni Israel na Nyɔŋmɔ nine ni wa ni ekɛtsuɔ nii eshiɔ Mizraimbii ni gboi yɛ nui ni baha amɛnɔ ekoŋŋ lɛ mli lɛ. (2 Mose 14:21-31) Yɛ ŋwɛi hewalɛ kpojiemɔ nɛɛ nɔŋŋ mli ni Yordan Faa lɛ hu “ku esɛɛ kɛtee,” ni eha Israelbii lɛ fo mli kɛtee Kanaan lɛ. (Yoshua 3:14-16) ‘Gɔji lɛ tumɔ tamɔ too agboi’ beni Sinai Gɔŋ lɛ je lasu ni ehoso beni ato Mla kpaŋmɔ lɛ. (2 Mose 19:7-18) Beni lala nɛɛ bɛŋkɛɔ enaagbee lɛ, lalatsɛ lɛ kɛ ewiemɔi lɛ wo sanebimɔ mli, ekolɛ eetsɔɔ akɛ, ŋshɔ, faa, gɔji kɛ gɔŋkpɔi lɛ she gbeyei yɛ Yehowa hewalɛ kpojiemɔi nɛɛ ahewɔ.
14. Mɛni Yehowa hewalɛ tsu yɛ Meriba kɛ Kadesh, ni te esa akɛ enɛ asa eŋmɛŋmɛnɛ beaŋ tsuji ahe aha tɛŋŋ?
14 Beni ewieɔ Yehowa hewalɛ he lolo lɛ, lalatsɛ lɛ la akɛ: “Bo shikpɔŋ, hosomɔ yɛ Nuŋtsɔ lɛ hiɛ, yɛ Yakob Nyɔŋmɔ lɛ hiɛ, mɔ ni haa tɛsaa tsɔɔ kpaakpo, ehaa tswɛrɛbo tsɔɔ nu ni baa lɛ.” ( Lala 114:7, 8) Lalatsɛ lɛ miitsɔ okadi wiemɔ mli eetsɔɔ akɛ esa akɛ adesai ashe Yehowa, Nuŋtsɔ kɛ Jeŋ Muu Fɛɛ Nɔyelɔ ni yeɔ shikpɔŋ lɛ fɛɛ nɔ lɛ gbeyei. Lɛ ji “Yakob [loo Israel] Nyɔŋmɔ lɛ” taakɛ eji kɛha mumɔŋ Israelbii kɛ amɛshikpɔŋ nɔ hefatalɔi lɛ. Yehowa jie ehewalɛ kpo yɛ Meriba kɛ Kadesh kɛtsɔ naakpɛɛ gbɛ ni etsɔ nɔ ekɛ nu ha Israelbii lɛ nɔ, “ehaa tɛsaa tsɔɔ kpaakpo, ehaa tswɛrɛbo tsɔɔ nu ni baa.” (2 Mose 17:1-7; 4 Mose 20:1-11) Yehowa hewalɛ kpele lɛ kɛ esuɔmɔ kwɛmɔi nɛɛ akaimɔ haa e-Dasefoi lɛ naa yiŋtoi kpakpai ni aaaha amɛna emli hemɔkɛyeli ni hosooo.
Etamɔɔɔ Amagai
15. Ekolɛ te ala Lala 115 aha tɛŋŋ?
15 Lala 115 woɔ wɔ hewalɛ ni wɔjie Yehowa yi ni wɔkɛ wɔhiɛ afɔ enɔ. Etsɔɔ akɛ lɛ eŋɔɔ jɔɔmɔ kɛ yelikɛbuamɔ jɛɔ ni eyeɔ odase akɛ amagai jeee fɛifɛi. Etamɔ nɔ ni ala lala nɛɛ kɛ nɔheremɔ. Ni ji akɛ, gbee kome baala akɛ: “Yehowa shelɔi, nyɛŋɔa nyɛhiɛ nyɛfɔa Yehowa nɔ.” Kɛkɛ lɛ ekolɛ asafo muu lɛ fɛɛ ehere nɔ akɛ: “Lɛ ji amɛbuamɔ kɛ amɛtsɛŋ.”—Lala 115:11.
16. Mɛɛ sɔrɔto-feemɔ abaanyɛ ana yɛ Yehowa kɛ jeŋmaji lɛ amagai lɛ ateŋ?
16 Jeee wɔ anunyam sa, shi Yehowa gbɛi lɛ, Nyɔŋmɔ ni yɔɔ suɔmɔ kɛ mlihilɛ lɛ, loo anɔkwa suɔmɔ kɛ anɔkwayeli Nyɔŋmɔ lɛ. (Lala 115:1) Henyɛlɔi kɛ hefɛoyeli baabi akɛ: “Nɛgbɛ . . . amɛ-Nyɔŋmɔ lɛ yɔɔ?” Shi Yehowa webii baanyɛ aha hetoo akɛ: ‘Wɔ-Nyɔŋmɔ lɛ yɛ ŋwɛi, ni efeɔ nɔ fɛɛ nɔ ni esumɔɔ.’ (La 115 Kukuji 2, 3) Shi jeŋmaji lɛ amagai lɛ nyɛŋ nɔ ko afee, ejaakɛ eji gbɔmɛi anine naa nitsumɔ ni amɛkɛ jwiɛtɛi kɛ shika efee. Yɛ naabui, hiŋmɛii kɛ toii ni amɛyɔɔ lɛ fɛɛ sɛɛ lɛ, amɛnyɛɛɛ amɛwie, shwilafoi ji amɛ, ni amɛnuuu nii hu. Amɛyɛ gugɔji shi amɛnuuu nɔ he fũ, amɛyɛ naji shi amɛnyɛɛɛ amɛnyiɛ, kɛ sɛ̃ shi amɛnyɛɛɛ amɛtswa amɛsɛŋ. Mɛi ni feɔ amagai ni wala bɛ mli lɛ kɛ mɛi ni kɛ amɛhiɛ fɔɔ amɛnɔ lɛ fɛɛ baatsɔmɔ tamɔ amɛ.—La 115 Kukuji 4-8.
17. Akɛni gbohii lɛ nyɛɛɛ ajie Yehowa yi hewɔ lɛ, mɛni esa akɛ wɔfee, kɛ mɛɛ gbɛkpamɔi?
17 No sɛɛ lɛ awo ŋaa ni akɛ hiɛ afɔ Yehowa nɔ akɛ Yelikɛbuamɔ kɛ Israel yibaamɔ Tsɛ̃ŋ, kɛ Aaron osɔfoi awe lɛ kɛ mɛi fɛɛ ni sheɔ Nyɔŋmɔ gbeyei lɛ ayibaalɔ. (Lala 115:9-11) Akɛ mɛi ni sheɔ Yehowa gbeyei lɛ, wɔkɛ woo babaoo haa Nyɔŋmɔ ni wɔyɛ gbeyeishemɔ kɛha lɛ akɛ wɔfeŋ nii ni esaaa ehiɛ. Wɔyɛ hemɔkɛyeli hu akɛ “ŋwɛi kɛ shikpɔŋ Feelɔ lɛ” jɔɔ ejalɔi anɔkwafoi lɛ hu. (La 115 Kukuji 12-15) Ŋwɛi ji he ni emaŋtsɛsɛi yɔɔ, shi Nyɔŋmɔ fee shikpɔŋ lɛ akɛ adesai anɔkwafoi kɛ toibolɔi anaanɔ shia. Akɛni mɛi ni efee dioo ni amɛgboi ni no hewɔ lɛ amɛleee nɔ ko lɛ nyɛŋ ajie Yehowa yi hewɔ lɛ, esa akɛ wɔ, ni ji hiɛkalɔi lɛ afee nakai yɛ hetuu kɛhamɔ kɛ anɔkwayeli fɛɛ mli. (Jajelɔ 9:5) Mɛi ni jieɔ Yehowa yi lɛ pɛ baana naanɔ wala mli ŋɔɔmɔ ni amɛnyɛ ‘amɛjɔɔ Yah’ kɛya naanɔ, ni amɛwie ehe “aahu kɛyashi naanɔ.” No hewɔ lɛ nyɛhaa wɔkɛ anɔkwayeli adamɔa mɛi ni boɔ kɔkɔbɔɔ nɛɛ toi lɛ masɛi: “Haleluya [ Nyɛjiea Yah yi, nyɛ gbɔmɛi]!”—Lala 115:16-18.
Yehowa Sui ni Yɔɔ Naakpɛɛ Lɛ
18, 19. Yehowa sui lɛ haa efeɔ sɔrɔto yɛ apasa nyɔŋmɔi lɛ ahe yɛ mɛɛ gbɛi anɔ?
18 Nyɔŋmɔ hiɛkalɔ ji Yehowa, ni ejieɔ sui ni yɔɔ naakpɛɛ akpo, ni etamɔɔɔ amagai ni wala bɛ amɛmli lɛ. Eji suɔmɔ fɛɛ naamuu ni eji “musuŋtsɔlɔ kɛ durolɔ, ni toɔ tsui, ni mɔbɔnalɛ kɛ anɔkwale fa pii.” (2 Mose 34:6; 1 Yohane 4:8) Kwɛ bɔ ni esoro lɛ kwraa yɛ Kanaanbii anyɔŋmɔ Molek ni yi wa, ni akɛ gbekɛbii sha afɔle aha lɛ lɛ he! Asusuɔ akɛ nɛkɛ nyɔŋmɔ nɛɛ he amaga lɛ hiɛ gbɔmɔ su kɛ tsina yitso. Abɔɔ amaniɛ akɛ ahaa amaga lɛ dɔɔ waa kɛ tsulɛ diɛŋtsɛ, ni afɔ̃ɔ gbekɛbii awoɔ eniji ni ekpa mli lɛ mli ni amɛshaneɔ kɛyaboteɔ la flɔnɔɔ ni tsoɔ yɛ shishi lɛ mli. Shi Yehowa yɛ suɔmɔ ni emɔbɔnalɛ fa aahu akɛ gbɔmɛi ni akɛ amɛ shaa afɔle ni tamɔ nɛkɛ lɛ ‘bako eyiŋ da.’—Yeremia 7:31.
19 Nɔ ni fata Yehowa sui titrii lɛ ahe hu ji jalɛsaneyeli ni yeɔ emuu, nilee ni bɛ naagbee, kɛ hewalɛ ni fe fɛɛ. (5 Mose 32:4; Hiob 12:13; Yesaia 40:26) Ni adesa mli nyɔŋmɔi lɛ hu? Ni amɛaadi jalɛsaneyeli sɛɛ moŋ lɛ, Babilon nyɔŋmɔi kɛ nyɔŋmɔyei lɛ kɛ sane ekeee. Mizraim nyɔŋmɔi lɛ jeee mɛi ni eye emuu yɛ nilee mli, shi afee amɛhe mfoniri akɛ mɛi ni yɔɔ adesa gbɔjɔmɔi. Enɛ bɛ naakpɛɛ, ejaakɛ nɔ ni kɛ apasa nyɔŋmɔi kɛ nyɔŋmɔ yei nɛɛ ba ji gbɔmɛi ni “amɛfee shwɛm yɛ amɛjwɛŋmɔi amli” ni kɛɔ akɛ amɛle nii. (Romabii 1:21-23) Hela nyɔŋmɔi kpaŋɔ amɛshiɔ amɛhe loo amɛteɔ shi amɛwoɔ amɛhe. Akɛ nɔkwɛmɔ nɔ lɛ, yɛ adesai amli lɛ, Dio kɛ ehewalɛ tsu nii yɛ gbɛ fɔŋ nɔ ni ekɛshwie etsɛ Kronu, ni lɛ hu eshwie lɛ diɛŋtsɛ etsɛ Uranu kɛjɛ maŋtsɛsɛi lɛ nɔ lɛ. Mɛɛ jɔɔmɔ eji nɛkɛ, akɛ aaasɔmɔ ni ajie Yehowa yi, anɔkwa Nyɔŋmɔ hiɛkalɔ lɛ ni jieɔ suɔmɔ, jalɛsaneyeli, nilee, kɛ hewalɛ ni eye emuu kpo lɛ!
Yehowa Sa Naanɔ Yijiemɔ
20. Mɛni ji yiŋtoi ni Maŋtsɛ David kɛha akɛ no hewɔ ni ejieɔ Yehowa gbɛi ayi lɛ?
20 Taakɛ Hallel Lalai lɛ tsɔɔ lɛ, Yehowa sa naanɔ yijiemɔ. Nakai nɔŋŋ hu beni David kɛ Israelbii lɛ bua nibii anaa kɛha sɔlemɔtsu lɛ maa lɛ, ekɛɛ yɛ asafo muu lɛ fɛɛ hiɛ akɛ: “Aaajie Yehowa, wɔtsɛ Israel Nyɔŋmɔ lɛ yi kɛjɛ naanɔ kɛyashi naanɔ! Bo Yehowa, onɔ ji dalɛ kɛ hewalɛ kɛ anunyam kɛ kunimyeli kɛ agbojee; ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ onɔ ni. Bo, Yehowa, onɔ ji maŋtsɛyeli lɛ, ni bo ji mɔ ni ta nii fɛɛ nɔ akɛ yitso! Ni ninamɔ kɛ anunyam fɛɛ jɛ odɛŋ, ni bo nɔŋŋ oyeɔ nii fɛɛ nɔ, ni odɛŋ hu hewalɛ kɛ nyɛmɔ yɔɔ, ni odɛŋ sane nɔŋŋ ji mɔ fɛɛ mɔ dalɛ kɛ hewalɛnamɔ! No hewɔ lɛ, agbɛnɛ, wɔnyɔŋmɔ, wɔmiidao shi ni wɔmiijie ohiɛnyam gbɛi lɛ yi!”—1 Kronika 29:10-13.
21. Mɛɛ odaseyeli Kpojiemɔ 19:1-6 kɛhaa ni tsɔɔ akɛ ŋwɛi asafoi lɛ jieɔ Yehowa yi?
21 Abaajɔɔ Yehowa hu ni ajie eyi kɛya naanɔ yɛ ŋwɛi. Bɔfo Yohane nu “asafo babaoo gbee yɛ ŋwɛi” miikɛɛ akɛ: “Haleluya! Yiwalaheremɔ kɛ anunyam kɛ agbojee kɛ hewalɛ lɛ ji Nuŋtsɔ wɔ-Nyɔŋmɔ lɛ nɔ! Ejaakɛ anɔkwale kɛ jalɛ ji ekojomɔi lɛ, akɛni ekojo ajwamaŋ kpeteŋkpele [Babilon kpeteŋkpele] lɛ ni kɛ ejwamaŋbɔɔ lɛ efite shikpɔŋ lɛ, ni etɔ etsuji lɛ ala lɛ he owele yɛ enɔ lɛ.” Ni amɛkɛɛ ekoŋŋ akɛ: “Haleluya [Nyɛjiea Yah yi, nyɛ gbɔmɛi]!” Ni nakai ji bɔ ni “onukpai nyɔŋmai enyɔ kɛ ejwɛ lɛ kɛ hiɛkalɔi ejwɛ lɛ” fee. Gbee ko jɛ maŋtsɛsɛi lɛ nɔ kɛɛ: “Nyɛjiea wɔ-Nyɔŋmɔ lɛ yi, nyɛ mɛi ni ji etsuji lɛ fɛɛ kɛ nyɛ mɛi ni nyɛsheɔ lɛ gbeyei, mɛi bibii kɛ mɛi wuji lɛ fɛɛ!” Kɛkɛ ni Yohane kɛfata he akɛ: “Ni minu gbee ko tamɔ asafo babaoo gbee kɛ nui babaoo agbee kɛ nugbɔshimɔi ni naa wa agbee miikɛɛ: ‘Haleluya! Ejaakɛ Nuŋtsɔ [Yehowa], wɔ-Nyɔŋmɔ Ofe lɛ, miiye maŋtsɛ.’”—Kpojiemɔ 19:1-6.
22. Mɛɛ gbɛ nɔ aaatsɔ ajie Yehowa yi yɛ eshiwoo jeŋ hee lɛ mli?
22 Kwɛ bɔ ni esa jogbaŋŋ ha akɛ ŋwɛi asafo lɛ jieɔ Yehowa yi! Anɔkwafoi ni atee amɛ shi lɛ baafata mɛi ni amɛje nibii agbɛjianɔtoo nɛɛ naagbee lɛ mli lɛ ahe, yɛ ejeŋ hee ni ebɛŋkɛ lɛ mli, ni amɛjie Yah yi. Gɔji ni kwɔlɔ baahole amɛyitsei anɔ yɛ yijiemɔ lalai amli amɛha Nyɔŋmɔ. Gɔji ni baaŋmɔŋ eyi nɔ obɔ kɛ tsei ni woɔ yibii baala eyijiemɔi. Bɔɔ nɔ fɛɛ bɔɔ nɔ ni yɔɔ wala mli ni muɔ baajie Yehowa gbɛi lɛ yi yɛ Haleluya nɔheremɔ kpeteŋkpele lɛ mli! (Lala 148) Ani abaanu ogbee yɛ nakai asafo babaoo ni amɛna miishɛɛ lɛ anɔ̃ mli? Abaanu, kɛ okɛ Yah webii lɛ sɔmɔ lɛ yɛ anɔkwayeli mli. Esa akɛ no afee yiŋtoo ni yɔɔ oshihilɛ mli, ejaakɛ namɔ yɔɔ ni tamɔ Yehowa, wɔ-Nyɔŋmɔ lɛ?
Te Obaaha Hetoo Oha Tɛŋŋ?
◻ Mɛni hewɔ esa akɛ ojie Yehowa Nyɔŋmɔ yi?
◻ Mɛɛ gbɛi anɔ nɛkɛ mɔ ko kɛ Yehowa yeee egbɔ yɛ?
◻ Mɛɛ odaseyeli yɔɔ ni tsɔɔ akɛ musuŋtsɔlɔ ji Yehowa?
◻ Esoro Yehowa yɛ amagai ni wala bɛ amɛmli lɛ kɛ apasa nyɔŋmɔi lɛ ahe yɛ mɛɛ gbɛ nɔ?
◻ Mɛni hewɔ wɔbaanyɛ wɔkɛɛ akɛ Yehowa nine baashɛ naanɔ yijiemɔ nɔ yɛ ŋwɛi kɛ shikpɔŋ nɔ lɛ?
[Mfoniri ni yɔɔ baafa 9]
Alaa Hallel Lalai lɛ yɛ Hehoo niyenii lɛ shishi