Lé Yehowa Nyɔŋmɔ ni Yɔɔ Diɛŋtsɛ Lɛ
KƐ AKƐ jwɛŋmɔ ni Hindubii hiɛ yɛ Nyɔŋmɔ he lɛ to jamɔ mli gbɛjianɔtoi krokomɛi anɔ̃ he lɛ, Dr. Radhakrishnan ni yɔɔ India lɛ kɛɔ akɛ: “Esoro Hebribii a-Nyɔŋmɔ lɛ kwraa. Eji mɔ ni yɔɔ diɛŋtsɛ, ni etsu nii waa yɛ yinɔsane mli, ni eyɛ tsakemɔi kɛ hegbɛi ni je nɛɛ yɔɔ ni ekɛyaa ehiɛ lɛ he miishɛɛ. Eji Mɔ Ko ni Yɔɔ ni kɛ wɔ gbaa sane.”
Gbɛ́i ni akɛtsɛɔ Nyɔŋmɔ ni yɔɔ Biblia lɛ mli yɛ Hebri mli ji יהוה, ni afɔɔ shishitsɔɔmɔ akɛ “Yehowa.” Enɔ kwɔ fe nyɔŋmɔi krokomɛi fɛɛ. Mɛni wɔle yɛ ehe? Te ekɛ gbɔmɛi ye ha tɛŋŋ yɛ Biblia bei amli?
Yehowa kɛ Mose “Hiɛ kɛ Hiɛ”
Eyɛ mli akɛ Mose nyɛɛɛ ana Nyɔŋmɔ diɛŋtsɛ moŋ, shi “hiɛ kɛ hiɛ” wekukpaa kã Yehowa kɛ etsulɔ Mose teŋ. (5 Mose 34:10; 2 Mose 33:20) Beni Mose ji obalanyo lɛ, etsui kã Israelbii ni no mli lɛ amɛji nyɔji yɛ Mizraim lɛ anɔ. Ekpoo shihilɛ mli ni eyɔɔ akɛ Farao shiabii lɛ ateŋ mɔ kome ni eji lɛ, ni “eesumɔ moŋ akɛ ekɛ Nyɔŋmɔ maŋ lɛ ana amanehulu.” (Hebribii 11:25) Enɛ hewɔ lɛ Yehowa kɛ hegbɛi krɛdɛɛi babaoo ha Mose.
Ákɛ Farao shiabii lɛ ateŋ mɔ kome lɛ, “atsɔɔ Mose Mizraim nilee fɛɛ.” (Bɔfoi lɛ Asaji 7:22) Shi bɔni afee ni enyɛ enyiɛ Israel maŋ lɛ hiɛ lɛ, ehe miihia ni ená sui ni ji heshibaa, tsuishitoo, kɛ mlijɔlɛ. Ená enɛ yɛ afii 40 ni ekɛtsu nii akɛ tookwɛlɔ yɛ Midia lɛ mli. (2 Mose 2:15-22; 4 Mose 12:3) Eyɛ mli akɛ Mose enaaa Yehowa moŋ, shi ejie ehe kpo kɛ eyiŋtoo etsɔɔ lɛ, ni kɛtsɔ bɔfoi anɔ lɛ, Nyɔŋmɔ kɛ Kitai Nyɔŋma lɛ wo edɛŋ. (2 Mose 3:1-10; 19:3–20:20; Bɔfoi lɛ Asaji 7:53; Hebribii 11:27) Biblia lɛ kɛɔ wɔ akɛ, “Yehowa kɛ Mose wieɔ hiɛ kɛ hiɛ taakɛ mɔ kɛ enaanyo wieɔ.” (2 Mose 33:11) Lɛɛlɛŋ, Yehowa diɛŋtsɛ kɛɛ: “Naabu kɛ naabu mikɛ lɛ wieɔ.” Mɛɛ mɔ diɛŋtsɛ teŋ wekukpaa po Mose kɛ e-Nyɔŋmɔ ni yɔɔ diɛŋtsɛ, shi anaaa lɛ lɛ ná mli ŋɔɔmɔ nɛkɛ!—4 Mose 12:8.
Kɛfata mra be mli Israel maŋ lɛ yinɔsane he lɛ, Mose ŋmala bɔ ni ato Mla lɛ naa aha lɛ fɛɛ eshwie shi pɛpɛɛpɛ. Atu hegbɛ kroko ni jara wa waa hu awo edɛŋ—no ji Mose Klɛŋklɛŋ Wolo lɛ ŋmaa. Nakai wolo lɛ naagbee fã lɛ ji yinɔsane ni ale ni kɔɔ lɛ diɛŋtsɛ eweku lɛ he, ni no hewɔ lɛ, etamɔ nɔ ni ewaaa akɛ aaaŋmala ashwie shi. Shi nɛgbɛ Mose ná gbɔmɔ mra be mli yinɔsane fitsofitso lɛ kɛjɛ? Eeenyɛ efee akɛ Mose yɛ blema saji ni aŋmala, ní etsɛmɛi lɛ ebaa yi lɛ, ni ekɛtsu nii akɛ he ni ená kɛjɛ. Yɛ gbɛ kroko nɔ lɛ, ebaanyɛ ená saji fitsofitso lɛ kɛtsɔ wiemɔ ni aaatsɔ mɔ ko nɔ ni akɛ lɛ awie lɛ nɔ, loo kɛtsɔ nibii akpojiemɔ kɛmiijɛ ŋwɛi kɛjɛ Yehowa ŋɔɔ tɛ̃ɛ lɛ nɔ. Gbɔmɛi ni sheɔ Nyɔŋmɔ gbeyei ni hi shi yɛ afii lɛ fɛɛ mli lɛ yɔse wekukpaa diɛŋtsɛ ni kã Mose kɛ e-Nyɔŋmɔ lɛ teŋ lɛ mli ŋɔɔmɔ ni ena yɛ nɛkɛ gbɛ nɔ lɛ.
Yehowa—Elia Nyɔŋmɔ ni Yɔɔ Diɛŋtsɛ Lɛ
Gbalɔ Elia hu le Yehowa akɛ Nyɔŋmɔ ko ni yɔɔ diɛŋtsɛ. Elia yɛ ekãa kɛha anɔkwale jamɔ, ni esɔmɔ Yehowa yɛ nyɛɛ kɛ shitee-kɛ-woo kpele ni Baal, ni ji Kaananbii lɛ anyɔŋmɔ ni fe fɛɛ lɛ jalɔi lɛ kɛba enɔ lɛ fɛɛ sɛɛ.—1 Maŋtsɛmɛi 18:17-40.
Ahab, Israel Maŋtsɛ lɛ, kɛ eŋa Izebel tao ni amɛgbe Elia. Akɛni eeshe gbeyei akɛ abaagbe lɛ hewɔ lɛ, Elia jo foi kɛtee Beersheba, yɛ Ŋshɔ ni Egbo lɛ anaigbɛ. Ekpa shi yɛ ŋa kpalanaa lɛ nɔ yɛ jɛmɛ ni esɔle koni egbo. (1 Maŋtsɛmɛi 19:1-4) Ani Yehowa eshi Elia? Ani E-bɛ etsulɔ anɔkwafo lɛ he miishɛɛ dɔŋŋ? Ekolɛ Elia susu he nakai, shi kwɛ bɔ ni esane ejaaa! Yɛ sɛɛ mli lɛ, Yehowa kɛ lɛ wie bɛlɛoo akɛ: “Mɛni ofeɔ yɛ biɛ, Elia?” Beni afee naakpɛɛ hewalɛ ni bɛ adesa nyɛmɔ mli atsɔɔ lɛ sɛɛ lɛ, “gbee ko ba eŋɔɔ [ekoŋŋ] akɛ: ‘Mɛni ofeɔ yɛ biɛ, Elia?’ ” Yehowa jie bɔ ni esumɔɔ Elia lɛ kpo etsɔɔ, koni ekɛwo etsulɔ ni eheɔ lɛ eyeɔ lɛ hewalɛ. Nyɔŋmɔ yɛ nitsumɔi babaoo kɛha lɛ ni ebaatsu, ni Elia kɛ ekãa here nakai tsɛmɔ lɛ nɔ! Elia kɛ anɔkwayeli tsu nitsumɔ ni atu awo edɛŋ lɛ he nii, ni ekɛtse Yehowa, e-Nyɔŋmɔ ni yɔɔ diɛŋtsɛ lɛ gbɛ́i lɛ he.—1 Maŋtsɛmɛi 19:9-18.
Kɛjɛ be mli ni Yehowa kpoo Israel maŋ lɛ sɛɛ lɛ, lɛ diɛŋtsɛ ekɛ etsuji ni yɔɔ shikpɔŋ lɛ nɔ lɛ ewieee tɛ̃ɛ dɔŋŋ. Enɛ etsɔɔɔ akɛ suɔmɔ ni eyɔɔ kɛha amɛ lɛ he ejɔ. Kɛtsɔ emumɔ krɔŋkrɔŋ lɛ nɔ lɛ, ekudɔ ni ewo amɛ hewalɛ yɛ esɔɔmɔ lɛ mli. Akɛ nɔkwɛmɔnɔ lɛ, susumɔ bɔfo Paulo, mɔ ni tsutsu ko lɛ ale lɛ akɛ Saulo lɛ he okwɛ.
Mumɔ Krɔŋkrɔŋ lɛ ni Akɛkudɔ Paulo
Saulo jɛ Tarso, ni ji maŋ ni ale jogbaŋŋ ni yɔɔ Kilikia lɛ. Hebribii ji efɔlɔi, shi afɔ lɛ akɛ Romanyo. Shi kɛlɛ, atsɔse Saulo yɛ Farisifoi lɛ ahemɔkɛyeli lɛ naa. Yɛ sɛɛ mli yɛ Yerusalem lɛ, ena hegbɛ akɛ atsɔse lɛ yɛ “Gamaliel,” Mla tsɔɔlɔ ni ale lɛ waa lɛ “naji anaa.”—Bɔfoi lɛ Asaji 22:3, 26-28.
Nɔ ni jɛ Saulo ekãa ni eyɔɔ kɛha Yudafoi lɛ akusum ni ji lakamɔ lɛ mli ba ji akɛ, ekɛ ehe bawo yiwaa nifeemɔ ni akɛte shi awo Yesu Kristo sɛɛnyiɛlɔi lɛ mli. Lɛ po ekpɛlɛ nɔ ni agbe Stefano, klɛŋklɛŋ lá odasefonyo Kristofonyo lɛ. (Bɔfoi lɛ Asaji 7:58-60; 8:1, 3) Yɛ sɛɛ mli lɛ, ekɛɛ akɛ, eyɛ mli akɛ eji musubɔlɔ kɛ yiwalɔ kɛ mɛi aniseniianifeelɔ moŋ, shi ‘ana lɛ mɔbɔ, ejaakɛ eleee ni efee, yɛ he ni eheee eyeee mli.’—1 Timoteo 1:13.
Anɔkwa suɔmɔ ni Saulo yɔɔ akɛ ebaasɔmɔ Nyɔŋmɔ lɛ ji nɔ ni tsirɛ lɛ. Kɛjɛ be mli ni atsake Saulo beni eyaa Damasko lɛ nɔ kɛbaa lɛ, Yehowa kɛ lɛ tsu nii waa diɛŋtsɛ. Kristo ni atee lɛ shi lɛ kudɔ Anania, mra be mli Kristofonyo kaselɔ lɛ koni eye ebua lɛ. Kɛjɛ no sɛɛ lɛ, atsɔ Yehowa mumɔ krɔŋkrɔŋ lɛ nɔ akudɔ Paulo (Roma gbɛ́i ni akɛbale Saulo akɛ Kristofonyo lɛ) ni etsu sɔɔmɔ be kakadaŋŋ ni anɔkwayeli yɔɔ mli he nii yɛ Europa kɛ Asia Bibioo lɛ fã gbɛ niiaŋ fɛɛ.—Bɔfoi lɛ Asaji 13:2-5; 16:9, 10.
Ani abaanyɛ ayɔse kudɔmɔ ni tamɔ nakai kɛtsɔ mumɔ krɔŋkrɔŋ lɛ nɔ ŋmɛnɛ hu? Hɛɛ, abaanyɛ.
Hemɔkɛyeli akɛ Nyɔŋmɔ Bɛ lɛ Etsiii Gbɔmɛi Ahe Miishɛɛ ni Yehowa Yɔɔ Diɛŋtsɛ lɛ Naa
Joseph F. Rutherford ji Buu Mɔɔ Asafo lɛ siɛnɔtalɔ ni ji enyɔ. Abaptisi lɛ yɛ 1906 akɛ Biblia Kaselɔ—ni ji gbɛ́i ni akɛtsɛɔ Yehowa Odasefoi yɛ nakai beaŋ lɛ—ni ahala lɛ akɛ Asafo lɛ mla he ŋaawolɔ yɛ afi ni nyiɛ sɛɛ lɛ mli, ni ebatsɔ esɛinɔtalɔ yɛ January 1917 mli. Shi, be ko lɛ, nɛkɛ obalanyo mlalelɔ nɛɛ ji mɔ ko ni heee eyeee akɛ Nyɔŋmɔ ko yɛ. Te fee tɛŋŋ ni ebatsɔ Yehowa tsulɔ, Kristofonyo ni yɔɔ ekãa tamɔ nakai?
Yɛ July 1913 lɛ, Rutherford sɔmɔ akɛ Majimaji Ateŋ Biblia Kaselɔi Akuu kpee ni afee yɛ Springfield, Massachusetts, U.S.A. lɛ sɛinɔtalɔ. Nakai maŋ lɛ adafitswaa wolo ni ji The Homestead lɛ he amaniɛbɔlɔ ko bibii Rutherford saji, ni aŋmala saji lɛ awo wolo bibioo ni akɛbɔɔ nakai kpee lɛ he amaniɛ lɛ mli.
Rutherford tsɔɔ mli akɛ, yɛ be mli ni ekpɛ eyiŋ akɛ ebaabote gbalashihilɛ mli lɛ, no mli lɛ Baptist sɔlemɔ lɛ jamɔ he nilee eyɔɔ, shi mɔ ni baatsɔ eŋa lɛ ji Prɛsbinyo. Beni Rutherford osɔfo lɛ kɛɛ akɛ “eŋa ni ekɛbaahi shi lɛ baaya hɛl la mli ejaakɛ abaptisiko lɛ, ni ákɛ lɛ lɛ, ebaaya ŋwɛi tɛ̃ɛ ni egbaŋ he ko, ejaakɛ lɛ lɛ abaptisi lɛ lɛ, bɔ ni esusuɔ nii ahe waa ehaa lɛ te shi ewo enɛ, ni eha etsɔ mɔ ni heee eyeee akɛ Nyɔŋmɔ ko yɛ.”
Ehe Rutherford afii abɔ ni ekɛtao saji amli jogbaŋŋ koni ekɛtswa ehemɔkɛyeli yɛ Nyɔŋmɔ ko ni yɔɔ diɛŋtsɛ lɛ mli ema shi. Esusu he, ni ekɛɛ yɛ jwɛŋmɔ ko naa akɛ “nɔ ni nyɛŋ atsu nɔ ko aha jwɛŋmɔ lɛ bɛ hegbɛ ni ekɛaaha tsui anyɔ emli.” Rutherford tsɔɔ mli akɛ, “esa akɛ” Kristofoi “aná Ŋmalɛi lɛ ni amɛheɔ amɛyeɔ lɛ anɔ nɔmimaa akɛ amɛji anɔkwale,” ni ekɛfata he akɛ: “Esa akɛ amɛle shishitoo nɔ ni amɛdamɔ.”—Kwɛmɔ 2 Timoteo 3:16, 17.
Hɛɛ, ŋmɛnɛ po, mɛi ni heɔ yeɔ akɛ Nyɔŋmɔ ko bɛ loo mɛi ni kɛɔ akɛ anyɛŋ ahe aye akɛ Nyɔŋmɔ yɛ lɛ baanyɛ atao Ŋmalɛi lɛ amli, amɛtswa amɛhemɔkɛyeli amɛma shi, ni amɛná amɛ kɛ Yehowa Nyɔŋmɔ teŋ wekukpaa ni mli wa. Beni obalanyo ko ekase Biblia lɛ jogbaŋŋ kɛtsɔ Buu Mɔɔ lɛ wolo ni ji Nilee ni Kɛ Mɔ Yaa Naanɔ Wala Mli lɛ yelikɛbuamɔ nɔ lɛ sɛɛ lɛ, ejaje akɛ: “Beni mije nikasemɔ lɛ shishi lɛ, miheee Nyɔŋmɔ nɔ miyeee, shi bianɛ lɛ mina akɛ nilee ni yɔɔ Biblia lɛ mli lɛ etsake mijwɛŋmɔ kwraa kɛmɔ shi. Miije shishi miile Yehowa kɛ mihe ni mikɛaafɔ enɔ.”
“Kwashia” lɛ kɛ Nyɔŋmɔ
Dr. James Hastings wie yɛ A Dictionary of the Bible lɛ mli akɛ: “Ebaaa KM [Hebri Ŋmalɛi] lɛ ŋmalɔ ko jwɛŋmɔ mli kɔkɔɔkɔ akɛ ebaatsɔɔ loo ebaaje ŋwane akɛ Nyɔŋmɔ yɛ diɛŋtsɛ. Nɔ ko kanyaaa blema je lɛ mli bii lɛ koni amɛje he ŋwane akɛ Nyɔŋmɔ yɛ diɛŋtsɛ, loo ni amɛkɛ sane naataamɔ ama nɔ mi. No mli lɛ, hemɔkɛyeli lɛ ji susumɔ ko ni gbɔmɛi yɔɔ lɛ, ni gbɔmɛi fɛɛ le.” Yɛ anɔkwale mli lɛ, enɛ etsɔɔɔ akɛ gbɔmɛi ni hi shi yɛ nakai beaŋ lɛ fɛɛ ji mɛi ni sheɔ Nyɔŋmɔ gbeyei. Jeee nakai kwraa ji sane lɛ. Lala 14:1 kɛ 53:2 lɛ fɛɛ tsĩ “mɔ ni bɛ jwɛŋmɔ lɛ,” loo taakɛ King James Version lɛ tsɔɔ lɛ “kwashia,” lɛ ni kɛɔ yɛ etsui mli akɛ “Nyɔŋmɔ ko bɛ” lɛ tã.
Mɛɛ gbɔmɔ ji nɛkɛ kwashia nɛɛ, nuu ni jeɔ ŋwane akɛ Nyɔŋmɔ yɛ lɛ? Jeee akɛ eleee yɛ nilee naa. Shi moŋ, Hebri wiemɔ ni ji na·valʹ lɛ tsĩ jeŋba ni abɛ lɛ tã. Nɔ ni nilelɔ S. R. Driver ŋma yɛ The Parallel Psalter lɛ mli lɛ kɛɛ akɛ, tɔmɔ lɛ “jeee niiahesusumɔ ni abɛ, shi moŋ eji henumɔ ni abɛ yɛ jeŋba kɛ jamɔ mli, henumɔ ni bɛ loo niiahesusumɔ ni anyɛɛɛ nɔ kunim aye.”
Lalatsɛ lɛ tee nɔ etsɔɔ mli akɛ jeŋba ni egbee shi lɛ hewɔ ni su ni tamɔ nɛkɛ ba: “Amɛfite, amɛ nifeemɔnii lɛ yɛ nyaŋemɔ; mɔ ko mɔ ko bɛ ni feɔ ekpakpa po.” (Lala 14:1) Dr. Hastings mu sane naa akɛ: “Yɛ kɛɛmɔ ni akɛɔ akɛ Nyɔŋmɔ bɛ jeŋ nɛɛ mli, kɛ heyeli ni ayɔɔ yɛ toigbalamɔ he lɛ hewɔ lɛ gbɔmɛi efite ni amɛfeɔ nyaŋemɔ nibii.” Amɛtsuɔ shishitoo mlai ni Nyɔŋmɔ gbeyeishemɔ bɛ mli lɛ ahe nii, ni amɛkpoɔ Nyɔŋmɔ ko ni yɔɔ diɛŋtsɛ, mɔ ni amɛsumɔɔɔ ni amɛbuɔ amɛhe akɔntaa amɛhaa lɛ lɛ. Shi susumɔ ni tamɔ nakai lɛ ji kwashiai asane kɛ nɔ ni jwɛŋmɔ bɛ mli ŋmɛnɛ tamɔ bɔ ni eji beni lalatsɛ lɛ ŋma ewiemɔi lɛ nɔ ni fe afii 3,000 ni eho nɛɛ lɛ.
Kɔkɔbɔi ni Jɛ Wɔ-Nyɔŋmɔ ni Yɔɔ Diɛŋtsɛ lɛ Ŋɔɔ
Agbɛnɛ nyɛhaa wɔkua wɔsɛɛ kɛyaa saji ni atee lɛ shi yɛ klɛŋklɛŋ sane ni akɛje shishi lɛ nɔ. Mɛni hewɔ yɛ piŋmɔi babaoo ni yɔɔ ŋmɛnɛŋmɛnɛ je nɛɛ mli lɛ hewɔ lɛ, gbɔmɛi babaoo nyɛɛɛ akpɛlɛ nɔ akɛ Nyɔŋmɔ ko ni yɔɔ diɛŋtsɛ yɛ lɛ?
Amaniɛbɔɔ ni aŋmala, ni jɛ gbɔmɛi ni ‘mumɔ krɔŋkrɔŋ lɛ tsirɛ amɛ ni amɛwie’ lɛ aŋɔɔ ji nɔ ni yɔɔ Biblia lɛ mli. (2 Petro 1:21) No pɛ jieɔ Nyɔŋmɔ diɛŋtsɛ ni yɔɔ, ni ji Yehowa lɛ kpo etsɔɔ wɔ. Ebɔɔ wɔ kɔkɔkɔ hu yɛ mɔ fɔŋ ko ni yɔɔ diɛŋtsɛ, ni gbɔmɛi enaaa lɛ, ni yɔɔ hewalɛ ni ekɛkudɔɔ adesa susumɔi lɛ he—Satan Abonsam lɛ. Yɛ shishinumɔ nɛɛ naa lɛ, kɛ wɔheee wɔyeee akɛ Nyɔŋmɔ ko ni yɔɔ diɛŋtsɛ yɛ lɛ, belɛ te wɔɔfee tɛŋŋ wɔhe wɔye akɛ Abonsam, loo Satan ko hu yɛ?
Bɔfo Yohane jɛ mumɔ mli eŋma akɛ: “Mɔ ni . . . atsɛɔ lɛ . . . Abonsam lɛ kɛ Satan . . . ni shishiuɔ jeŋ muu lɛ fɛɛ lɛ.” (Kpojiemɔ 12:9) Yɛ sɛɛ mli lɛ, Yohane kɛɛ: “Wɔle akɛ wɔjɛ Nyɔŋmɔ mli, ni jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Nɛkɛ wiemɔi nɛɛ haa akaiɔ Yesu wiemɔi, ni Yohane diɛŋtsɛ ŋma efɔ shi yɛ e-Sanekpakpa lɛ mli lɛ: “Je lɛŋ lumɔ lɛ miiba, ni ebɛ nɔ ko yɛ mimli.”—Yohane 14:30.
Kwɛ bɔ ni Ŋmalɛ mli tsɔɔmɔ nɛɛ yɔɔ sɔrɔto kwraa yɛ nɔ ni gbɔmɛi heɔ amɛyeɔ bianɛ lɛ he! Catholic Herald lɛ kɛɔ akɛ: “Ni aaawie Abonsam he lɛ ji nɔ ko ni ŋmɛnɛ lɛ afeee kwraa. Wɔ afii nɛɛ amli ní Nyɔŋmɔ mli hemɔkɛyeli bɛ, kɛ jeŋ nilee he nikasemɔ lɛ ejie Satan yɛ amɛjwɛŋmɔ mli.” Kɛlɛ, Yesu kɛ ekãa kɛɛ gbɔmɛi ni taoɔ agbe lɛ lɛ akɛ: “Nyɛ lɛ nyɛtsɛ ni nyɛjɛ emli ji Abonsam, ni nyɛtsɛ lɛ tsinebaanii nyɛsumɔɔ akɛ nyɛfee.”—Yohane 8:44.
Jwɛŋmɔ yɛ bɔ ni Biblia lɛ tsɔɔ bɔ ni Satan hewalɛ ji ha lɛ mli. Etsɔɔ yɛ faŋŋ mli nɔ hewɔ ni yɛ toiŋjɔlɛ kɛ ekomefeemɔ shihilɛ ni gbɔmɛi babaoo taoɔ ahi mli lɛ fɛɛ sɛɛ lɛ hetsɛ̃, tai, kɛ awuiyeli ni henumɔ bɛ mli yɔɔ lɛ, taakɛ afee yɛ Dunblane (ni atsĩ tã yɛ baafai 3 kɛ 4 lɛ mli lɛ). Kɛfata he lɛ, jeee Satan pɛ ji henyɛlɔ ni yɔɔ ni esa akɛ wɔkɛ lɛ awuu. Biblia lɛ kɛ kɔkɔbɔi ni kɔɔ abonsamii, loo daimonioi ahe lɛ fataa he—bɔɔnii ni ji mumɔi fɔji ni be ko ni eho lɛ amɛfata Satan he kɛlaka adesai, ni amɛfee amɛ niseniianii lɛ. (Yuda 6) Yesu Kristo kɛ nɛkɛ mumɔi nɛɛ ahewalɛ lɛ kpe shii abɔ, ni enyɛ eye amɛnɔ kunim.—Mateo 12:22-24; Luka 9:37-43.
Anɔkwa Nyɔŋmɔ lɛ, Yehowa, ekpɛ eyiŋ akɛ ebaajie awuiyeli kɛjɛ shikpɔŋ nɛɛ nɔ, ni yɛ naagbee lɛ ebaajie Satan kɛ daimonioi lɛ anitsumɔi lɛ fɛɛ kɛya kwraa. Wɔbaanyɛ wɔdamɔ Yehowa he nilee ni wɔyɔɔ lɛ nɔ wɔna hemɔkɛyeli ni yɔɔ shiŋŋ, ni wɔkɛ wɔhe afɔ̃ eshiwoi lɛ anɔ. Ekɛɔ akɛ: “Atsɔ̃ko mihiɛ ashɔ̃ko Nyɔŋmɔ ko, ni eko eko baŋ yɛ misɛɛ! Mi, mi nɔŋŋ, miji Yehowa lɛ, ni yiwalaherelɔ ko bɛ, ja mi!” Yehowa ji Nyɔŋmɔ ko ni yɔɔ diɛŋtsɛ lɛɛlɛŋ kɛha mɛi fɛɛ ni le lɛ, ni amɛjaa lɛ, ni amɛsɔmɔɔ lɛ lɛ. Lɛ pɛ gbɛ wɔbaanyɛ wɔkpa kɛha yibaamɔ.—Yesaia 43:10, 11.
[Mfoniri ni yɔɔ baafa 7]
Afii ohai 18 lɛ mli nɔ ko ni akpɛ́ ni feɔ Mose ni miiŋma 1 Mose 1:1 lɛ yɛ mumɔ kudɔmɔ naa lɛ he mfoniri
[He ni Sane lɛ Jɛ]
From The Holy Bible by J. Baskett, Oxford
[Mfoniri ni yɔɔ baafa 8]
Yesu Kristo ye daimonioi lɛ anɔ kunim shii abɔ