Jɔɔmɔ Yehowa Gbɛi Krɔŋkrɔŋ Lɛ!
“Minaabu aaagba Yehowa yijiemɔ; ni ha heloo fɛɛ ajɔɔ egbɛi krɔŋkrɔŋ lɛ daa, kɛya naanɔ.”—LALA 145:21, NW.
1, 2. (a) Satan etswa Nyɔŋmɔ nɔyeli lɛ mpoa yɛ mɛɛ gbɛ nɔ? (b) Mɛɛ saji ateeɔ amɛ shi yɛ Lala 145:11-21 he?
SANEBIMƆ ko kwraa bɛ Jeŋ Muu Fɛɛ Maŋtsɛ ni Yehowa ji lɛ he. Shi Satan etswa jalɛ ni Nyɔŋmɔ nɔyeli lɛ ji kɛ bɔ ni eja ha lɛ mpoa. (1 Mose 2:16, 17; 3:1-5) Abonsam ebi sane hu yɛ emuuyeli mli ni Nyɔŋmɔ tsuji fɛɛ ni yɔɔ ŋwɛi kɛ shikpɔŋ nɔ aaahiɛ lɛ he. (Hiob 1:6-11; 2:1-5; Luka 22:31) No hewɔ lɛ Yehowa eŋmɛ gbɛ koni be aho koni bɔɔ nii ni yɔɔ jwɛŋmɔ lɛ fɛɛ ana yibii fɔŋ ni ejɛ atua ni atse enɔyeli lɛ mli eba lɛ koni amɛtsɔɔ he ni amɛdamɔ yɛ nɛkɛ saji otii nɛɛ ahe.
2 Lala 145 yeɔ ebuaa wɔ koni wɔkɔ shidaamɔ ni yɔɔ shiŋŋ wɔha Nyɔŋmɔ nɔyeli. Yɛ mɛɛ gbɛ nɔ? Mɛni David kɛɔ yɛ Yehowa maŋtsɛyeli he? Ni te Nyɔŋmɔ kɛ mɛi ni fiɔ esɛɛ lɛ yeɔ haa tɛŋŋ? Hetooi ni yeɔ ebuaa jeɔ kpo yɛ Lala 145:11-21.
Wiemɔ Yehowa Maŋtsɛyeli lɛ He
3. Kɛ wɔsumɔɔ Yehowa nɔyeli lɛ waa lɛ, mɛni wɔbaafee?
3 Yehowa nɔyeli lɛ he hiaa David waa, mɔ ni kɛɛ: “Amɛaawie omaŋtsɛyeli lɛ anunyam lɛ he, ni amɛaagba ohewalɛ lɛ he sane, koni amɛha gbɔmɛi abii ale ehewalɛ nitsumɔi lɛ kɛ emaŋtsɛyeli lɛ nyam kɛ agbojee lɛ.” (Lala 145:11, 12) Gbɔmɛi wieɔ nibii ni amɛnyaa he lɛ ahe. No hewɔ lɛ nuu wieɔ eweku he, eshia, kɛ enibaa nii ahe. Yesu kɛɛ, “Gbɔmɔ kpakpa jieɔ nɔ kpakpa kɛjɛɔ etsui mli jwetri kpakpa lɛ mli.” (Luka 6:45) Kɛ wɔsumɔɔ Nyɔŋmɔ nɔyeli yɛ wɔtsui mli lɛ, wɔbaasɔle ni e-Maŋtsɛyeli lɛ aba, ni wɔbaagba mɛi krokomɛi jalɛsaneyeli, toiŋjɔlɛ kɛ jalɛ nifeemɔ ni baahi enɔyeli lɛ shishi lɛ he sane. Wɔbaajie Yehowa yi akɛ “naanɔ Maŋtsɛ,” ni wɔbaawie enɔyeli kɛtsɔ Mesia Maŋtsɛyeli ni yɔɔ E-Bi Yesu Kristo ni esumɔɔ lɛ lɛ dɛŋ lɛ he. (Kpojiemɔ 15:3; Yesaia 9:6, 7) Mɛɛ hegbɛ enɛ ji akɛ wɔɔwie Yehowa maŋtsɛyeli lɛ ŋwɛi anunyam ni etsɛŋ ebaaje kpo yɛ paradeiso shikpɔŋ ni yɔɔ fɛo ni bɔɔ nii ni yeɔ emuu ni yɔɔ miishɛɛ eyi nɔ obɔ lɛ mli lɛ nɛkɛ!—Luka 23:43.
4. Mɛɛ be mli wɔnaa hegbɛ wɔwieɔ Yehowa “hewalɛ” lɛ he, ni awajeɔ wɔ yɛ nitsumɔ ni tamɔ nɛkɛ mli yɛ mɛɛ gbɛ nɔ?
4 Hiɛsɔɔ hu baatsirɛ wɔ koni wɔwie Yehowa “hewalɛ” lɛ he. Eyɛ mli akɛ “ehewalɛ teke nɔ” moŋ, shi ekɛtsuuu nii yɛ gbɛ ni esaaa nɔ. (Hiob 37:23) Ekɛ ehewalɛ lɛ tsu nii ni ekɛbɔ shikpɔŋ lɛ kɛ adesai, ni ekɛbaatsu nii ni ekɛkpata mɛi fɔji ahiɛ. Wɔnaa hegbɛ akɛ wɔɔwie Nyɔŋmɔ hewalɛ lɛ he yɛ be mli ni wɔjajeɔ sanekpakpa lɛ. Ni ani eŋɔɔɔ wɔnaa akɛ nɛkɛ naagbee Hewalɛ Jɛɛhe nɛɛ woɔ wɔ hewalɛ koni wɔtsu nitsumɔ nɛɛ? (Yesaia 40:29-31) Hɛɛ, akɛ Yehowa Odasefoi lɛ, Nyɔŋmɔ hewalɛ kɛ emumɔ lɛ wajeɔ wɔ yɛ esɔɔmɔ krɔŋkrɔŋ lɛ mli. Nɛkɛ gbɛ nɔ pɛ atsɔɔ ni ajajeɔ Maŋtsɛyeli lɛ he sane lɛ kɛ naakpɛɛ omanyeyeli yɛ jeŋ fɛɛ.—Lala 28:7, 8; Zakaria 4:6.
5. Akɛni gbɔmɛi babaoo leee Yehowa “hewalɛ nitsumɔi” lɛ hewɔ lɛ, mɛni sa akɛ wɔfee?
5 Ehe miihia ni wɔha adesai abii ale Yehowa “hewalɛ nitsumɔi” lɛ, taakɛ bɔ ni Israelbii lɛ gba amɛbii gbɛ ni Nyɔŋmɔ tsɔ nɔ ejie amɛ kɛjɛ Mizraim nyɔŋyeli mli lɛ he sane lɛ. (2 Mose 13:14-16) Gbɔmɛi mamɔɔ kaimɔ tɛi amɛhaa adesai ni amɛsusuɔ akɛ esa akɛ akai amɛ nifeemɔi lɛ, shi amɛteŋ mɛi enyiɛ le Nyɔŋmɔ hewalɛ nitsumɔi lɛ? Taakɛ woloŋlelɔ ko wie he lɛ: “Amɛkadiɔ amɛ mɛi ni ehe gbɛi lɛ anifeemɔi yɛ ayawa he, shi amɛŋmalaa Yehowa anunyam nitsumɔi lɛ yɛ shia nɔ, ni be ni baa ni yaa lɛ fɔɔ amɛ kɛhoɔ kɛjɛɔ kaimɔ mli.” Afɔɔɔ nakai nitsumɔi lɛ kɛyaaa diɛŋtsɛ, eyɛ mli akɛ mɛi babaoo leee enɛ. No hewɔ lɛ yɛ wɔ shia-kɛ-shia nitsumɔ lɛ mli lɛ, kɛ wɔmiifee shia Biblia mli nikasemɔi, kɛ agbɛnɛ yɛ bei krokomɛi amli lɛ, nyɛhaa wɔkɛ ekaa awiea Nyɔŋmɔ hewalɛ nitsumɔ lɛ ahe.
6. (a) Mɛɛ be mli yɛ afii pii ni eho nɛ ni ajie mumɔ ni yɔɔ ekaa ni wɔkɛtsuɔ nii yɛ wɔsɔɔmɔ lɛ mli lɛ kpo jogbaŋŋ yɛ? (b) Kɛ aaatsɔɔ mli diɛŋtsɛ lɛ, mɛni awie yɛ 1922 yɛ Maŋtsɛyeli lɛ he adafitswaa he?
6 Esa akɛ wɔkɛ ekaa hu aha ale Nyɔŋmɔ anunyam maŋtsɛyeli lɛ. Ekaa kɛha nɛkɛ Maŋtsɛyeli sɔɔmɔ lɛ hu jeɔ kpo diɛŋtsɛ, yɛ be mli ni yɛ 1922 mli lɛ, J. F. Rutherford, ni no mli lɛ eji Buu Mɔɔ Asafo lɛ sɛinɔtalɔ lɛ wie etsɔɔ mɛi ni amɛba kpee yɛ Cedar Point, Ohio, lɛ shishi ni ekɛɛ: “Kɛjɛ 1914 kɛbaa nɛɛ, anunyam Maŋtsɛ lɛ eŋɔ hewalɛ lɛ . . . Ŋwɛi maŋtsɛyeli lɛ ebɛŋkɛ; Maŋtsɛ lɛ miiye nɔ; Satan maŋtsɛyeli lɛ miigbee shi; akpekpei abɔ ni yɔɔ wala mli bianɛ lɛ gboiŋ gbi ko gbi ko. Ani oheɔ enɛ oyeɔ? . . . Belɛ nyɛyaa sɔɔmɔ lɛ nɔ, O nyɛ ŋwɛi flofloo Nyɔŋmɔ lɛ bii! Nyɛkɛ nyɛ tawuu nii lɛ awulaa nyɛhe! Nyɛhiɛ akaa shi, nyɛhiɛ ahia nyɛhe nɔ, nyɛfea ekaa, nyɛtsui asaa, nyɛfea Nuŋtsɔ lɛ odasefoi anɔkwafoi. Nyɛyaa nyɛhiɛ kɛyashi be mli ni Babilon he nibii fɛɛ aaatsɔ amaŋfɔ. Nyɛgbɛa sane lɛ nyɛshwaa kɛyaa shɔŋŋ kɛ he fɛɛ he. Esa akɛ je lɛ ana ale akɛ Yehowa ji Nyɔŋmɔ, ni akɛ Yesu Kristo ji maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ. Enɛ ji gbii fɛɛ amli gbi lɛ. Naa, Maŋtsɛ lɛ miiye nɔ! Nyɛji enajiaŋdamɔlɔi sanejajelɔi. No hewɔ lɛ nyɛtswaa, nyɛtswaa nyɛtswaa Maŋtsɛ lɛ kɛ e-Maŋtsɛyeli lɛ he adafi.”
7. Te esa akɛ wɔnu wɔnitsumɔ akɛ Maŋtsɛyeli jajelɔi lɛ he wɔha tɛŋŋ?
7 Mɛɛ miishɛɛ ji enɛ akɛ ‘aaasusu Nyɔŋmɔ gbɛi lɛ he,’ ni agba mɛi krokomɛi enɔyeli lɛ, ni atswa e-Bi ni esumɔɔ lɛ lɛ Mesia Maŋtsɛyeli lɛ he adafi! (Maleaki 3:16) Akɛ Maŋtsɛyeli jajelɔi kɛ sɛɛfilɔi lɛ, wɔsumɔɔ hegbɛ ni wɔna akɛ wɔjaje sanekpakpa lɛ ni wɔtsɔ mɛi krokomɛi atsuii kɛya Nyɔŋmɔ, Kristo, kɛ Maŋtsɛyeli lɛ he lɛ hewɔ. Esa akɛ shwe ni wɔshweɔ akɛ wɔɔgba Yehowa maŋtsɛyeli lɛ anunyam fɛfɛo lɛ he sane wɔtsɔɔ mɛi krokomɛi lɛ hu atso yɛ wɔmli.—Okɛto Yeremia 20:9 he.
8. (a) Mɛni damɔ shi kɛha Yehowa nɔyeli lɛ ŋmɛnɛ? (b) Mɛni hewɔ ni abaanyɛ akɛɛ akɛ Nyɔŋmɔ yeɔ lumɔ “kɛyaa yinɔi fɛɛ nɔ lɛ?
8 Esa akɛ enɛ atsirɛ wɔ ni wɔtswa Maŋtsɛyeli lɛ he adafi kɛ ekaa babaoo, ejaakɛ David kɛɛ kɛnyiɛ sɛɛ akɛ: “Omaŋtsɛyeli lɛ, naanɔ maŋtsɛyeli ni, ni olumɔyeli lɛ hiɔ shi kɛyaa yinɔi fɛɛ nɔ.” (Lala 145:13) Yɛ be mli ni bɔ ni lalatsɛ lɛ jwɛŋɔ Yehowa maŋtsɛyeli lɛ he lɛ yaa nɔ lɛ, etsake enajiaŋ gbɛi lɛ kɛjɛ “e-” kɛtee “bo” loo “o-” yɛ be mli ni ekɛ esɔlemɔ wiemɔi lɛ fɔɔ Nyɔŋmɔ hiɛ tɛɛ lɛ. Shi Yehowa nɔyeli ni Mesia Maŋtsɛ lɛ damɔ shi kɛha lɛ lɛ yeee Nyɔŋmɔ maŋtsɛyeli lɛ najiaŋ. Yɛ anɔkwale mli lɛ, yɛ be mli ni awo adesai ni feɔ toiboo lɛ anɔ kɛshɛ emuuyeli mli lɛ, Kristo kɛ Maŋtsɛyeli lɛ baaha e-Tsɛ lɛ. (1 Korintobii 15:24-28) No hewɔ lɛ Nyɔŋmɔ yeɔ lumɔ “kɛyaa yinɔi fɛɛ nɔ.” Yehowa ji Maŋtsɛ beni abɔ Adam lɛ, ni ebaaye lumɔ yɛ adesai ni ji jalɔi lɛ anɔ kɛya naanɔ.
9. Mɛni abaanyɛ awie yɛ Lala 145 he yɛ kuku ko ni jeɔ shishi kɛ Hebri wiemɔ nun lɛ?
9 Yɛ nɛkɛ lala ni akɛ alafabɛta lɛ eto naa lɛ mli lɛ, Masoretic niŋmaai lɛ shiɔ kuku ni Hebri wiemɔ nun jeɔ no shishi lɛ. Shi yɛ Hela Septuagint, Syriac Peshitta lɛ, kɛ Latin Vulgate lɛ kɛ gbeekpamɔ naa lɛ, Hebri niŋmaa ko kaneɔ yɛ biɛ akɛ: “Yehowa yeɔ ewiemɔi fɛɛ anɔkwa, ni ekɛ mlihilɛ jieɔ suɔmɔ kpo [aloo, “anɔkwayeli”] yɛ enitsumɔi fɛɛ mli.” (New World Translation of the Holy Scriptures—With References, shishigbɛ niŋmaa) Nyɔŋmɔ haa eshiwooi fɛɛ baa mli ni eyeɔ anɔkwa, ni eyɛ suɔmɔ kɛ mlihilɛ kɛha mɛi fɛɛ ni hiɛ sɔɔ ejurɔ ni efeɔ lɛ.—Yoshua 23:14.
Yehowa Sɛɛfimɔ Efeee Yaka
10. Nyɔŋmɔ ‘haa wɔ sɛɛfimɔ’ yɛ mɛɛ gbɛ nɔ?
10 Naanɔ Maŋtsɛ lɛ ekuuu ehiɛ efɔɔɔ etsuji amanehului anɔ. No hewɔ lɛ David baanyɛ akɛɛ akɛ: “Yehowa sɔoɔ mɛi fɛɛ ni gbeɔ shi lɛ, ni eholeɔ mɛi fɛɛ ni edɔrɔ kɔmɔɔ lɛ anɔ.” (Lala 145:14) Kɛjɛ Habel gbii lɛ amli tɔɔ ni Yehowa efi E-jalɔi asɛɛ. Kɛ eshwɛ wɔ pɛ lɛ, wɔbaagbee shi shii abɔ yɛ wɔjatsui lɛ ashishi. Wɔbɛ hewalɛ ni fa ni wɔkɛaatere wala nɛɛ mli haomɔi lɛ fɛɛ kɛ yiwaa ni baa wɔ gbɛ nɔ akɛ Nyɔŋmɔ webii lɛ, shi Yehowa holeɔ wɔnɔ. Hebri feemɔ-wiemɔ ni akɛtsu nii yɛ biɛ lɛ tsɔɔ akɛ Nyɔŋmɔ yaa nɔ ‘ehaa wɔ sɛɛfimɔ.’ Abaanyɛ akadi akɛ Yohane Baptisilɔ lɛ kɛ Nyɔŋmɔ diɛŋtsɛ Bi lɛ ye bua koni ahole eshafeelɔi ni egbee shi lɛ anɔ yɛ jeŋba mli. Beni nɛkɛ aŋkroaŋkroi nɛɛ tsake amɛtsui ni amɛbatsɔmɔ Yehowa tsuji lɛ, amɛna naakpɛɛ jɔɔmɔi ni ji ŋwɛi sɛɛfimɔ mli ŋɔɔmɔ.—Mateo 21:28-32; Marko 2:15-17.
11. Yehowa ‘holeɔ mɛi fɛɛ ni edɔrɔ lɛ anɔ’ yɛ mɛɛ gbɛ nɔ?
11 Eji miishɛjemɔ akɛ aaale akɛ ‘Yehowa holeɔ mɛi fɛɛ ni edɔrɔ lɛ anɔ’ kɛtsɔɔ kaai sɔrɔtoi amli. Ehaa mɛi ni bɛ hiɛnɔkamɔ yɛ wɔteŋ lɛ naa miishɛɛ, ni eshɛjeɔ wɔteŋ mɛi ni yeɔ ŋkɔmɔ lɛ amii, ni eyeɔ ebuaa wɔ ni wɔkɛ ekaa ashiɛ ewiemɔ lɛ kɛ aaawa wɔ yi. (Bɔfoi lɛ Asaji 4:29-31) Eŋmɛɛɛ gbɛ kɔkɔɔkɔ koni wɔjatsui lɛ akumɔ wɔ kɛ wɔkpɛlɛ eyelikɛbuamɔ lɛ nɔ. (Lala 55:23) No hewɔ lɛ, taakɛ “Abraham biyoo” ni “enyɛɛɛ emli ekpa” shi Yesu tsa ehela lɛ ji lɛ, esa akɛ “wɔwo Nyɔŋmɔ hiɛ nyam,” kɛ ejɛ suɔmɔ mli ehole wɔnɔ yɛ mumɔŋ lɛ. (Luka 13:10-17) Mɛi ni afɔ amɛ mu lɛ ni amɛdɔrɔ yɛ Babilon nyɔŋyeli shishi lɛ na miishɛɛ be ni Nyɔŋmɔ hole amɛnɔ yɛ 1919 lɛ, ni etee nɔ ehole “tooi krokomɛi” lɛ ni hiɛ sɔɔ nii lɛ anɔ kɛjɛ 1935 kɛbaa.—Yohane 10:16.
12. Nyɔŋmɔ “gbɛ hiŋmɛii fɛɛ kwɛɔ” yɛ mɛɛ gbɛ nɔ.
12 Yehowa haaa ewebii lɛ anine anyɛ shi kɔkɔɔkɔ taakɛ David fee lɛ faŋŋ kɛnyiɛ sɛɛ lɛ, akɛ: “Bo gbɛ hiŋmɛii fɛɛ kwɛɔ, ni bo ohaa amɛ amɛniyenii yɛ be ni sa mli. Ogbɛɔ odɛŋ ni ohaa nɔ fɛɛ nɔ ni hiɛ ka tɔɔ kɛ nii ni etaoɔ.” (Lala 145:15, 16) Etamɔ nɔ ni bɔɔ nii ni yɔɔ wala mli lɛ fɛɛ etuu amɛhiŋmɛii yɛ hiɛnɔkamɔ mli amɛshwie Jeŋ Muu Fɛɛ Maŋtsɛ lɛ nɔ. Ŋwɛibɔfoi lɛ kwɛɔ Nyɔŋmɔ gbɛ kɛha wala ni hiɔ shi daa. Ni taakɛ bɔ ni gbekɛ kwɛɔ efɔlɔi gbɛ kɛha nibii ni he hiaa lɛ lɛ, wɔ hu wɔkwɛɔ wɔŋwɛi Tsɛ lɛ gbɛ. Yɛ anɔkwale mli lɛ, lɛ eŋɔɔ adesai kɛ kooloi fɛɛ anine shɛɔ ŋmaa nɔ kɛjɛɔ. Mɔ ko mɔ ko bɛ ni baanyɛ aha amɛ amɛhiamɔ nii. Nyɔŋmɔ “haa amɛ amɛniyenii yɛ be ni sa mli,” ni ji akɛ, kɛ ehe miihia.
13. Yehowa ‘gbɛɔ edɛŋ ni ehaa bɔɔ nii fɛɛ ni hiɛ ka tɔɔ kɛ nii ni etaoɔ’ yɛ mɛɛ gbɛi anɔ?
13 Nyɔŋmɔ ‘gbɛɔ edɛŋ ni ehaa bɔɔ nii ni hiɛ ka fɛɛ tɔɔ kɛ nii ni etaoɔ.’ (Lala 104:10-28) Eji anɔkwale akɛ kooloi komɛi gboiɔ yɛ niyenii ni bɛ hewɔ. Hɔmɔ yeɔ adesai pii yɛ gbɔmɛi apɛsɛmkunya, nɔnyɛɛ kɛ nibii ni ayɔɔ ni akɛtsuuu nii yɛ gbɛ kpakpa nɔ lɛ hewɔ. Agbɛnɛ, Yesu gba akɛ “hɔmɔ” baafee be ni eba yɛ naagbee gbii nɛɛ amli lɛ “okadi” lɛ fa. (Mateo 24:3, 7) Shi jeee akɛ enɛɛmɛi fɛɛ miiba akɛni Yehowa feɔ kpɛkpɛi aloo ni enyɛɛɛ eha nii lɛ hewɔ. Susumɔ bɔɔ nii akpekpei toi akpei abɔ ni elɛɔ amɛ lɛ ahe! Agbɛnɛ, nɛkɛ lala nɛɛ maa nɔ mi ehaa wɔ akɛ yɛ Maŋtsɛyeli nɔyeli lɛ shishi lɛ, beni ‘gbɔmɔ yeee enyɛmi gbɔmɔ nɔ ni ekɛye lɛ awui lɛ,’ Nyɔŋmɔ baaha wɔ wɔheloo naa kɛ mumɔŋ hiamɔ nii fɛɛ. (Jajelɔ 8:9; Yesaia 25:6) Ŋmɛnɛ po, mumɔŋ niyenii he hɔmɔ yeee wɔ, ejaakɛ Nyɔŋmɔ kɛ babaoo haa wɔ yɛ be ni sa mli kɛtsɔɔ “tsulɔ anɔkwafo kɛ nilelɔ” lɛ nɔ. (Mateo 24:45-47; 1 Petro 2:2) Kɛ wɔɔwie yɛ mumɔŋ shishinumɔ naa lɛ, Yehowa Odasefoi ji gbɔmɛi ni akɛ lɛɛ nii kpakpai lɛɔ amɛ fe fɛɛ yɛ shikpɔŋ nɔ. Ani ojieɔ hiɛsɔɔ ni mli kwɔ kpo ohaa nɛkɛ nibii babaoo nɛɛ?
Yehowa Buɔ Mɛi ni Sumɔɔ Lɛ lɛ Ahe
14. Mɛni hewɔ David baanyɛ akɛɛ akɛ “Yehowa ja yɛ egbɛi fiaa mli, ni durolɔ ji lɛ yɛ enitsumɔi fiaa mli” lɛ?
14 Wɔ buulufeemɔ baanyɛ ‘afite wɔgbɛ’ ni ekɛ tɔlɛ aba wɔnɔ, shi ekaba lɛ kɔkɔɔkɔ akɛ wɔɔshwa Nyɔŋmɔ yɛ nɛkɛ naagbai nɛɛ ahe. (Abɛi 19:3) David tsɔɔ nɔ hewɔ be ni ekɛɔ akɛ: “Yehowa ja yɛ egbɛi fiaa mli, ni durolɔ ji lɛ yɛ enitsumɔi fiaa mli.” (Lala 145:17) Nyɔŋmɔ feɔ enii yɛ gbɛi ni yɔɔ trɔmɔɔ, ni ja ni mɔbɔnalɛ yɔɔ mli hu nɔ. Emɔbɔnalɛ lɛ jeɔ kpo titri yɛ yiwalaheremɔ he gbɛjianɔ ni eto kɛtsɔ Yesu kpɔmɔ afɔleshaa lɛ nɔ lɛ mli. (Bɔfoi lɛ Asaji 2:21; 4:8-12) Agbɛnɛ hu, Yehowa ji “durolɔ . . . yɛ enitsumɔi fiaa mli.” Eyeɔ anɔkwa daa, eyɛ suɔmɔ, ni ekwɛɛɛ hiɛaŋ. Akɛ “Nyɔŋmɔ kaselɔi” lɛ, belɛ nyɛhaa wɔfea mɛi ni yɔɔ trɔmɔɔ, mɛi ni ja, mɛi ni naa mɔbɔ, mɛi ni kwɛɛɛ hiɛaŋ, kɛ mɛi ni yeɔ anɔkwa.—Efesobii 5:1, 2; 5 Mose 32:4; Lala 7:10; 25:8; Yesaia 49:7; Bɔfoi lɛ Asaji 10:34, 35.
15. Yɛ mɛɛ gbɛ nɔ ‘wɔtsɛ Nyɔŋmɔ yɛ anɔkwayeli mli,’ ni mɛni ejɛ nakai ni wɔfee lɛ mli eba?
15 Akɛni Nyɔŋmɔ ji jalɔ ni eyeɔ anɔkwa hewɔ lɛ, enɛ gbalaa wɔ. Agbɛnɛ hu, David maa nɔ mi ehaa wɔ akɛ: “Yehowa bɛŋkɛɔ mɛi fɛɛ ni tsɛɔ lɛ yɛ anɔkwale mli lɛ.” (Lala 145:18) Yɛ be mli ni abaptisiɔ wɔ akɛ heyelilɔi ni ejɔɔ amɛhe nɔ lɛ, wɔtsɛ Yehowa gbɛi lɛ. (Bɔfoi lɛ Asaji 8:12; 18:8; Romabii 10:10-15) Akɛni wɔkɛ enɛ bɛŋkɛɔ Nyɔŋmɔ he hewɔ lɛ, lɛ hu ebɛŋkɛɔ wɔ. (Yakobo 4:8) Wɔ “tsɛɔ lɛ yɛ anɔkwale mli,” ejaakɛ wɔfeɔ nakai yɛ anɔkwale gbɛ lɛ nɔ, kɛtsɔɔ Yesu Kristo nɔ. Ni Yehowa hu baabɛŋkɛ wɔ kɛji akɛ wɔja lɛ “yɛ mumɔ kɛ anɔkwale mli,” ni wɔjie “hemɔkɛyeli ni apasa ko bɛ mli” lɛ kpo, ni ‘wɔtee nɔ wɔdamɔ shi shiŋŋ taakɛ wɔmiina Mɔ ni anaaa lɛ lɛ.’ (Yohane 4:23, 24; 1 Timoteo 1:5; Hebribii 11:27) Kɛkɛ lɛ wɔsɔleŋ yaka aloo ni wɔ kome wɔkɛ Satan je lɛ aaakpe, shi moŋ wɔbaaya nɔ wɔna yelikɛbuamɔ kɛ gbɛtsɔɔmɔ. (Lala 65:3; 1 Yohane 5:19) Mɛɛ hebuu enɛ tsɔɔ kɛhaa wɔ nɛkɛ!
16. Mɛni hewɔ, ni mɛɛ gbɛ nɔ Yehowa ‘feɔ nɔ ni mɛi ni sheɔ lɛ gbeyei lɛ taoɔ lɛ ehaa amɛ’ yɛ?
16 Wɔyɛ anɔkwa hebuu loo shweshweeshwe shihilɛ hu, yɛ nibii krokomɛi ni Yehowa feɔ yɛ wɔgbɛfaŋ lɛ hewɔ. David kɛɛ: “Mɛi ni sheɔ lɛ gbeyei lɛ, efeɔ nɔ ni amɛtaoɔ ehaa amɛ, eboɔ amɛbolɔmɔ toi, ni ehereɔ amɛyiwala.” (Lala 145:19) Yehowa ‘feɔ nɔ ni wɔtaoɔ ehaa wɔ,’ ejaakɛ wɔkɛ woo ni mli kwɔ haa Nyɔŋmɔ, ni wɔsheɔ gbeyei akɛ wɔɔfee nii ni esaŋ ehiɛ. (Abɛi 1:7) Wɔ toiboo tsui lɛ tsirɛɔ wɔ koni wɔjɔɔ wɔhe nɔ wɔha Yehowa, ni wɔsubaŋ ji, “Ha afee osuɔmɔnaa nii.” Akɛni esuɔmɔnaa nii ji akɛ wɔjaje Maŋtsɛyeli lɛ he sane lɛ hewɔ lɛ, ehaa bɔ ni wɔshweɔ akɛ wɔɔtsu nakai nitsumɔ lɛ baa mli. (Mateo 6:10; Marko 13:10) Nyɔŋmɔ ‘feɔ nii ni wɔtaoɔ lɛ ehaa wɔ,’ ejaakɛ wɔsɔleee yɛ pɛsɛmkunya gbɛ nɔ, shi moŋ wɔbiɔ nii ni kɛ esuɔmɔnaa nii kpaa gbee. Ekpɛlɛɔ nɔ ni kɛ esuɔmɔnaa nii kpaa gbee ni hi kɛha wɔ lɛ nɔ.—1 Yohane 3:21, 22; 5:14, 15; okɛto Mateo 26:36-44 he.
17. Mɛni hewɔ wɔbaanyɛ wɔna nɔmimaa akɛ Nyɔŋmɔ baabo ‘wɔbolɔmɔ kɛha yelikɛbuamɔ’ lɛ toi lɛ?
17 Akɛ Yehowa Odasefoi anɔkwafoi lɛ, wɔbaanyɛ wɔna nɔmimaa akɛ ebaabo ‘wɔbolɔmɔ kɛha yelikɛbuamɔ’ lɛ toi. Nyɔŋmɔ jie David kɛjɛ amanehulu mli ni ehere Yesu yiwala, ni etee lɛ shi po kɛjɛ gbohii ateŋ. Kɛ henyɛlɔi lɛ miitutua wɔ, titri lɛ yɛ Gog tutuamɔ shishi lɛ, wɔbaanyɛ wɔna nɔmimaa akɛ Yehowa baajie wɔ. (Ezekiel 38:1–39:16) Yɛ anɔkwale mli lɛ, yɛ haomɔ bei fɛɛ mli lɛ, taakɛ David ji lɛ, wɔbaanyɛ wɔkɛ hekɛnɔfɔɔ asɔle akɛ: “Naa mi mɔbɔ, Yehowa, shi efi mi! . . . Minu mɛi pii ashekuyeli, nihiinii ebɔle mi kɛkpe; be ni amɛtse miyi nɔ ajina lɛ, amɛkpaŋ miyi nɔ ni amɛkpata misusuma hiɛ. Shi mi lɛ, bo onɔ mihiɛ ka, Yehowa; mikɛɛ akɛ: Bo ji mi-Nyɔŋmɔ!.”—Lala 31:9-14.
18. Le ni wɔleɔ akɛ Yehowa ‘buɔ mɛi fɛɛ ni boɔ lɛ lɛ ahe’ shi ‘ebaakpata mɛi fɔji lɛ ahiɛ’ lɛ he baa sɛɛnamɔ kɛhaa wɔ yɛ mɛɛ gbɛ nɔ?
18 Yehowa Nyɔŋmɔ efee klalo yɛ bei fɛɛ mli akɛ ebaaye ebua wɔ. Taakɛ David kɛɛ lɛ: “Yehowa baa mɛi fɛɛ ni sumɔɔ lɛ lɛ ayi; shi mɛi fɔji lɛ, eeekpata amɛ fɛɛ amɛhiɛ.” (Lala 145:20) Hɛɛ, kɛ wɔsumɔɔ Nyɔŋmɔ lɛ, ebaajɔɔ wɔ ni ebaa wɔyi. (4 Mose 6:24-26) Ewoɔ ‘henɔwolɔi lɛ anyɔmɔ babaoo,’ shi ebaa etsuji heshibalɔi lɛ ayi, ni ehaaa nɔ ko ni baaye amɛ awui kɛya naanɔ aba amɛnɔ. Akɛni Yehowa kɛ wɔ yɔɔ hewɔ lɛ, nyɛhaa wɔtsuii asaa. (Lala 31:21-25; Bɔfoi lɛ Asaji 11:19-21) ‘Tawuu nii ni aaashɔ ashi wɔ lɛ yeŋ omanye.’ (Yesaia 54:17; Lala 9:17; 11:4-7) Enɛ ji mɛi ni jieɔ amɛsuɔmɔ kpo amɛhaa Nyɔŋmɔ akɛ etsuji anɔkwafoi ni amɛjɔɔ amɛhe nɔ amɛha lɛ lɛ aniiashikpamɔ. Akɛ kuu lɛ, Yehowa Odasefoi baatsɔ “amanehulu kpeteŋkpele” ni akɛbaa mɛi fɔji anɔ lɛ mli shweshweeshwe (Kpojiemɔ 7:14) Ni mɛɛ jɔɔmɔ Yehowa jeŋ muu fɛɛ maŋtsɛyeli lɛ he sane kpeteŋkpele lɛ ni ana naa kwraa lɛ baaji aha “mɛi fɛɛ ni sumɔɔ lɛ lɛ” nɛkɛ!
Yaa nɔ Ojɔɔ Yehowa Gbɛi Krɔŋkrɔŋ Lɛ
19. Mɛni hewɔ wɔnaabui jajeɔ “Yehowa yijiemɔ lɛ”?
19 David mu elala ni kanyaa mɔ lɛ naa kɛ wiemɔ nɛɛ: “Minaabu aaagba Yehowa yijiemɔ, ni heloo fɛɛ aaajie egbɛi krɔŋkrɔŋ lɛ yi kɛaatee naanɔ.” (Lala 145:21) Akɛ Yehowa Odasefoi lɛ, wɔhiɛ sɔɔ Nyɔŋmɔ jalɛ, ejurɔ ni efeɔ wɔ lɛ, emaŋtsɛyeli ni mli hi lɛ, esɛɛfimɔ ni efeee yaka kɛ kwɛmɔ ni tɔlɛ bɛ mli lɛ. No hewɔ lɛ, taakɛ David ji lɛ, wɔnaabui gbaa Nyɔŋmɔ yijiemɔi. Enɛ tsirɛɔ wɔ koni wɔkɛ hetuu-kɛhamɔ aha ekome, ni wɔda lɛ shi yɛ ejɔɔmɔi babaoo lɛ ahewɔ, ni wɔjie “egbɛi krɔŋkrɔŋ” lɛ yi.—1 Kronika 29:10-13; 2 Mose 20:4-6.
20. Akɛni naanɔ ka wɔhiɛ hewɔ lɛ, mɛni sa akɛ efee wɔfaishitswaa bianɛ?
20 Akɛni Yehowa jɔɔ wɔ daa gbi hewɔ lɛ, nyɛhaa wɔjɔɔa lɛ daa, aloo wɔwiea ehe jogbaŋŋ. Nyɛhaa wɔkɛ ekaa ashiɛa sanekpakpa lɛ ni wɔkɛjie Nyɔŋmɔ yi, ni wɔkɛɛ mɛi krokomɛi akɛ etsɛŋ, ‘heloo fiaa baajie egbɛi lɛ yi.’ Kwɛ fɛo ni enɛ aaaji akɛ wɔɔhi shi yɛ be mli ni shikpɔŋ lɛ nɔ bii fɛɛ—yɛ anɔkwale mli lɛ, bɔɔ nii ni yɔɔ jwɛŋmɔ fɛɛ yɛ jeŋ muu fɛɛ—aaala yijiemɔ lalai aha wɔŋwɛi Tsɛ lɛ! (Lala 148:1-13) Ajɔɔ Yehowa akɛni ejie egbɛi lɛ kpo ni eha wɔ hegbɛ akɛ wɔfee e-Dasefoi. (Lala 83:19; Yesaia 43:10-12) Eba akɛ wɔɔba wɔjeŋ jogbaŋŋ yɛ gbɛ ni sa mɛi ni mɔɔ nakai gbɛi krɔŋkrɔŋ lɛ mli ni amɛsɔleɔ amɛhaa ehetsemɔ lɛ. (Luka 11:2) Nyɛhaa wɔsɔmɔa Nyɔŋmɔ yɛ anɔkwayeli mli koni yɛ egbɛjianɔtoo hee lɛ mli lɛ, anu wɔgbee he afata mɛi ni jɔɔ Yehowa gbɛi krɔŋkrɔŋ lɛ ahe kɛya naanɔi anaanɔ.
Mɛni Ji Ohetooi?
◻ Mɛni wɔbaafee kɛji akɛ wɔsumɔɔ Yehowa nɔyeli Iɛ waa Iɛ?
◻ Mɛni damɔ shi kɛha Nyɔŋmɔ nɔyeli Iɛ ŋmɛnɛ?
◻ Yehowa ‘holeɔ mɛi fɛɛ ni edɔrɔ lɛ anɔ yɛ mɛɛ gbɛ nɔ?
◻ Nyɔŋmɔ gbɛɔ edɛŋ ni ehaa bɔɔ nii fɛɛ ni hiɛ ka tɔɔ kɛ nii ni etaoɔ yɛ mɛɛ gbɛ nɔ?
◻ Te wɔɔfee tɛŋŋ wɔjɔɔ Yehowa gbɛi krɔŋkrɔŋ Iɛ?
[Mfoniri ni yɔɔ baafa 17]
Yɛ 1922 mli lɛ, wiemɔ ni ji ‘nyɛtswaa Maŋtsɛ lɛ kɛ Maŋtsɛyeli lɛ he adafi’ Iɛ kanyaa mɛi ni fiɔ Yehowa nɔyeli Iɛ sɛɛ lɛ kɛtee nifeemɔ ni da mli