Gbele Sɛɛ Shihilɛ—Mɛni Biblia Lɛ Kɛɔ?
“Sũ jio, ni sũ mli oooku osɛɛ kɛaatee!”—1 MOSE 3:19.
1, 2. (a) Mɛɛ susumɔi srɔtoi ayɔɔ yɛ Gbele Sɛɛ Shihilɛ he? (b) Mɛni ehe hiaa ni wɔpɛi mli bɔni afee ni wɔnyɛ wɔle nɔ ni Biblia lɛ tsɔɔ yɛ susuma lɛ he?
“YIŊ ní akaa awieɔ yɛ naanɔ piŋmɔ he lɛ kɛ suɔmɔ ni Nyɔŋmɔ yɔɔ kɛha bɔɔnii lɛ mli hemɔkɛyeli ni ayɔɔ lɛ kpãaa gbee. . . . Ákɛ aaahe aye akɛ apiŋɔ susuma lɛ kɛyaa naanɔ yɛ afii fioo komɛi amli tɔmɔi ahewɔ, ní ahãaa lɛ hegbɛ ni ekɛjaje nakai tɔmɔi lɛ tamɔ nɔ ni aate shi aawo shishitoo mla ni nilee yɔɔ mli lɛ kwraa,” taakɛ Hindu jeŋ nilelɔ Nikhilananda wie lɛ.[1]
2 Taakɛ Nikhilananda ji lɛ, mɛi pii yɛ ŋmɛnɛ ní amɛyiŋ etɛɛɛ amɛ yɛ naanɔ piŋmɔ tsɔɔmɔ lɛ he. Nakai nɔŋŋ hu ewa kɛha mɛi krokomɛi ákɛ amɛaanu susumɔi tamɔ Nirvana ni akɛɛ nine shɛɔ nɔ lɛ kɛ adebɔɔ ní akɛɛ akɛ lɛ feɔ ekome lɛ shishi. Yɛ mɛi ni kɛɔ akɛ amɛhemɔkɛyelii damɔ Biblia lɛ nɔ lɛ po ateŋ lɛ, ahiɛ susumɔi srɔtoi yɛ nɔ ni susuma lɛ ji kɛ nɔ ni baa enɔ kɛ́ wɔgboi lɛ he. Shi mɛni Biblia lɛ tsɔɔ diɛŋtsɛ yɛ susuma lɛ he? Kɛ́ wɔmiitao wɔle lɛ, no lɛ ehe miihia ni wɔpɛi Hebri kɛ Hela wiemɔi ni atsɔɔ shishi akɛ “susuma” yɛ Biblia lɛ mli lɛ amli.
Susuma lɛ Taakɛ Biblia lɛ Tsɔɔ
3. (a) Mɛɛ wiemɔ atsɔɔ shishi akɛ “susuma” yɛ Hebri Ŋmalɛi lɛ amli, ni mɛni ji eklɛŋklɛŋ shishinumɔ? (b) Mɛɛ gbɛ nɔ 1 Mose 2:7 lɛ maa nɔ mi akɛ wiemɔ “susuma” lɛ baanyɛ atsɔɔ gbɔmɔ muu lɛ fɛɛ?
3 Hebri wiemɔ ni atsɔɔ shishi akɛ “susuma” ji neʹphesh, ni ejeɔ kpo shii 754 yɛ Hebri Ŋmalɛi lɛ amli.[2] Mɛni neʹphesh tsɔɔ? Taakɛ The Dictionary of Bible and Religion lɛ tsɔɔ lɛ, “bei pii lɛ ekɔɔ bɔɔnɔ ni yɔɔ wala mli lɛ fɛɛ, gbɔmɔ muu lɛ fɛɛ he.”[3] Bɔ ni Biblia lɛ wieɔ susuma lɛ he ehaa yɛ 1 Mose 2:7 lɛ maa enɛ nɔ mi, akɛ: “Yehowa Nyɔŋmɔ kɛ shikpɔŋ sũ shɔ̃ gbɔmɔ, ni emu wala mumɔ ewo egugɔ mli, ni gbɔmɔ tsɔ̃ wala susuma.” Kadimɔ akɛ klɛŋklɛŋ gbɔmɔ lɛ “tsɔ̃” susuma. Enɛ tsɔɔ akɛ Adam bɛ susuma; eji susuma—tamɔ bɔ ni mɔ ko ni batsɔɔ datrɛfonyo lɛ ji datrɛfonyo lɛ. Belɛ, wiemɔ “susuma” ní yɔɔ biɛ lɛ wieɔ gbɔmɔ muu lɛ fɛɛ he.
4. Mɛɛ wiemɔ atsɔɔ shishi akɛ “susuma” yɛ Kristofoi a-Hela Ŋmalɛi lɛ amli, ni mɛni ji wiemɔ nɛɛ klɛŋklɛŋ shishinumɔ?
4 Wiemɔ ni atsɔɔ shishi akɛ “susuma,” (psy·kheʹ) lɛ jeɔ kpo nɔ ni fe shii oha yɛ Kristofoi a-Hela Ŋmalɛi lɛ mli.[4] Taakɛ neʹphesh ji lɛ, bei pii lɛ wiemɔ nɛɛ kɔɔ gbɔmɔ muu lɛ fɛɛ he. Ákɛ nɔkwɛmɔnɔ lɛ, susumɔ wiemɔi ni nyiɛ sɛɛ nɛɛ ahe okwɛ: “Misusuma miihao.” (Yohane 12:27) “Gbeyei mɔ susuma fɛɛ susuma.” (Bɔfoi lɛ Asaji 2:43, NW) “Hã susuma fɛɛ susuma aba ehe shi aha hegbɛi ni yeɔ nɔ lɛ.” (Romabii 13:1, NW) “Nyɛshɛjea susumai ni ehao lɛ amii.” (1 Tesalonikabii 5:14, NW) “Ahere mɛi fioo, ni ji mɛi kpaanyɔ lɛ, asusumai ayiwala . . . kɛtsɔ nu lɛ mli.” (1 Petro 3:20) Eyɛ faŋŋ akɛ psy·kheʹ kɔɔ gbɔmɔ muu lɛ fɛɛ he, taakɛ neʹphesh ji lɛ. Taakɛ woloŋlelɔ Nigel Turner tsɔɔ mli lɛ, wiemɔ nɛɛ “miitsɔɔ nɔ ni ji gbɔmɔ adesa lɛ, gbɔmɔ lɛ diɛŋtsɛ, helooŋ gbɔmɔtso ni yɔɔ Nyɔŋmɔ rûaḥ [mumɔ] ni emu ewo emli lɛ. . . . Aama gbɔmɔ muu lɛ nɔ mi diɛŋtsɛ.”[5]
5. Ani kooloi ji susumai? Tsɔɔmɔ mli.
5 Miishɛɛ sane ji akɛ, yɛ Biblia lɛ mli lɛ, wiemɔ “susuma” lɛ kɔɔɔ gbɔmɛi adesai pɛ he, shi moŋ ekɔɔ kooloi hu ahe. Ákɛ nɔkwɛmɔnɔ lɛ, beni ewieɔ ŋshɔ mli bɔɔnii lɛ abɔɔ he lɛ, 1 Mose 1:20 (NW) kɛɔ akɛ Nyɔŋmɔ kɛɛ akɛ: “Hã nui lɛ awo susumai ni hiɛ kamɔ nyɛŋɛnyɛŋɛ.” Ni Nyɔŋmɔ wie yɛ adebɔɔ gbi ni nyiɛ sɛɛ lɛ nɔ akɛ: “Hã shikpɔŋ lɛ awo susumai ni hiɛ kamɔ yɛ amɛ henɔ, shĩa kooloi kɛ kooloi ni wamɔɔ kɛ shikpɔŋ kooloi yɛ amɛ henɔ.”—1 Mose 1:24, NW; okɛto 4 Mose 31:28 he.
6. Mɛni abaanyɛ akɛɛ yɛ bɔ ni Biblia lɛ kɛ wiemɔ “susuma” tsuɔ nii ehaa lɛ he?
6 No hewɔ lɛ, wiemɔ “susuma,” taakɛ akɛtsuɔ nii yɛ Biblia lɛ mli lɛ, kɔɔ gbɔmɔ loo kooloo, loo wala ni gbɔmɔ loo kooloo ko náa mli ŋɔɔmɔ lɛ he. (Kwɛmɔ akrabatsa ni yɔɔ ŋwɛigbɛ lɛ.) Bɔ ni Biblia lɛ tsɔɔ susuma lɛ shishi ehaa lɛ yɛ mlɛo, ekɛ ehe kpãa gbee, ni akɛ adesai ajeŋ nilee kɛ amale hemɔkɛyelii lɛ eko kwraa fatako he. Kɛ́ nakai ji sane lɛ, belɛ sanebimɔ ni he hiaa ní esa akɛ abi ji akɛ, Taakɛ Biblia lɛ tsɔɔ lɛ, mɛni baa susuma lɛ nɔ yɛ gbele mli?
Gbohii lɛ Leee nɔ Ko
7, 8. (a) Mɛni Ŋmalɛi lɛ jieɔ lɛ kpo yɛ shihilɛ ní gbohii lɛ yɔɔ mli lɛ he? (b) Okɛ nɔkwɛmɔnii ni jɛ Biblia lɛ mli, ni tsɔɔ akɛ susuma lɛ baanyɛ agbo lɛ ahã.
7 Atsɔɔ shihilɛ ni gbohii lɛ yɔɔ mli lɛ mli faŋŋ yɛ Jajelɔ 9:5, 10, he ni wɔkaneɔ yɛ akɛ: “Gbohii lɛ leee nɔ ko . . . Nitsumɔ ko bɛ, yiŋtoo ko bɛ, nilee loo sɛɛyoomɔ ko bɛ gbonyo bu lɛ mli.” (Moffatt) No hewɔ lɛ, gbele tsɔɔ shihilɛ mli ni abɛ dɔŋŋ. Lalatsɛ lɛ ŋma akɛ kɛ́ gbɔmɔ gbo lɛ, “ekuɔ esɛɛ kɛyaa esũ lɛ mli ekoŋŋ; nakai gbi lɛ nɔŋŋ eyiŋtoi lɛ laajeɔ.” (Lala 146:4) Gbohii lɛ leee nɔ ko nɔ ko, amɛnyɛɛɛ nɔ ko amɛfee.
8 Beni ejajeɔ fɔbuu kojomɔ eshwieɔ Adam nɔ lɛ, Nyɔŋmɔ wie akɛ: “Sũ jio, ni sũ mli oooku osɛɛ kɛaatee!” (1 Mose 3:19) Dani Nyɔŋmɔ baashɔ̃ lɛ kɛjɛ shikpɔŋ sũ mli ní eha lɛ wala lɛ, no mli lɛ Adam bɛ shihilɛ mli. Beni egbo lɛ, eku esɛɛ kɛtee nakai shihilɛ lɛ mli. Etoigbalamɔ ji gbele—jeee jiemɔ kɛmiiya shihilɛ kroko mli. Belɛ, mɛni ba esusuma lɛ nɔ mɔ? Akɛni yɛ Biblia lɛ mli lɛ, bei pii lɛ wiemɔ “susuma” lɛ kɔɔ gbɔmɔ lɛ he hewɔ lɛ, kɛ́ wɔwie akɛ Adam gbo lɛ, belɛ wɔmiitsɔɔ akɛ susuma ni atsɛɔ lɛ Adam lɛ gbo. Ekolɛ enɛ baafee nɔ ko ni yɔɔ srɔto kɛha mɔ ko ni heɔ susuma ni gbooo lɛ eyeɔ. Shi kɛlɛ, Biblia lɛ kɛɔ akɛ: “Susuma ni feɔ esha lɛ, lɛ nɔŋŋ eeegbo!” (Ezekiel 18:4) Mose Wolo ni Ji Etɛ 21:1 (NW) lɛ wieɔ “susuma ni egbo” (“gbonyo,” The Jerusalem Bible) he. Ni akɛɛ Nazirbii lɛ akɛ amɛkabɛŋkɛ “susuma ko ni egbo” (“gbonyo,” Lamsa).—4 Mose 6:6, NW.[6]
9. Mɛni Biblia lɛ tsɔɔ beni ekɛɔ akɛ Rahel ‘susuma heɔ emli aje’ lɛ?
9 Shi, wiemɔ ni awie yɛ 1 Mose 35:18 ni kɔɔ Rahel gbele ni yɔɔ awerɛho, ní ba beni efɔɔ ebinuu ni ji enyɔ lɛ he lɛ hu? Wɔkaneɔ yɛ jɛmɛ akɛ: “Beni esusuma heɔ emli aje ni ebu enaa lɛ, ewo lɛ gbɛi akɛ Benoni; shi etsɛ wo lɛ Benyamin.” Ani ŋmalɛ kuku nɛɛ miitsɔɔ akɛ Rahel yɛ mligbɛ bɔɔnɔ ko ni je emli beni egboɔ lɛ? Dabi kwraa. Kaimɔ akɛ, wiemɔ “susuma” lɛ baanyɛ atsɔɔ wala ni mɔ ko yɔɔ lɛ hu. No hewɔ lɛ, yɛ sane nɛɛ mli lɛ, Rahel “susuma” miitsɔɔ ‘ewala’ kɛkɛ. No hewɔ ni Biblia shishitsɔɔmɔi krokomɛi tsɔɔ wiemɔ kuku ni ji “esusuma heɔ emli aje” lɛ shishi akɛ “ewala nɔ gbɔɔ fiofio kɛyaa” (Knox), “emuɔ enaagbee mumɔ” (JB), kɛ “ewala je emli etee” lɛ (Bible in Basic English). Nɔ ko bɛ ni tsɔɔ akɛ Rahel fã ko ni yɔɔ teemɔŋ hi shi yɛ egbele sɛɛ.[7]
10. Yoo okulafo lɛ binuu ni atee lɛ shi lɛ susuma “kpale ba emli ekoŋŋ” yɛ mɛɛ gbɛ nɔ?
10 Etamɔ nɔ ni ba yɛ yoo okulafo ko binuu ko shitee ni aŋma afɔ̃ shi yɛ 1 Maŋtsɛmɛi yitso 17 lɛ mli lɛ. Wɔkaneɔ yɛ kuku 22 lɛ akɛ beni Elia sɔleɔ yɛ gbekɛ nuu lɛ nɔ lɛ, “Yehowa bo Elia gbee toi, ni gbekɛ lɛ susuma kpale ba emli ekoŋŋ, ni ehiɛ tsɛ̃.” Shikome ekoŋŋ lɛ, wiemɔ “susuma” lɛ miitsɔɔ “wala.” Enɛ hewɔ lɛ, New American Standard Bible lɛ kaneɔ akɛ: “Gbekɛ lɛ wala ku sɛɛ ba emli ekoŋŋ ni ehiɛ tsɛ̃.” Hɛɛ, wala ji nɔ ni ku sɛɛ ba gbekɛ lɛ mli ekoŋŋ lɛ, shi jeee okadi nɔ ko kɛkɛ. Enɛ kɛ nɔ ni Elia kɛɛ gbekɛ nuu lɛ nyɛ lɛ kpãa gbee akɛ: “Kwɛ, obi lɛ [gbɔmɔ muu lɛ fɛɛ] yi ená wala.”—1 Maŋtsɛmɛi 17:23.[8]
Shi Mumɔ lɛ Hu?
11. Mɛni hewɔ wiemɔ “mumɔ” lɛ nyɛŋ atsɔɔ gbɔmɔ lɛ fã ko ni agbala ekɛ gbɔmɔtso lɛ mli, ni hiɔ shi yɛ gbele sɛɛ lɛ?
11 Biblia lɛ kɛɔ akɛ kɛ́ gbɔmɔ gbo, ní “emumɔ je emli lɛ, ekuɔ esɛɛ kɛyaa esũ lɛ mli ekoŋŋ.” (Lala 146:4) Ani enɛ tsɔɔ akɛ mumɔ ni agbala ekɛ gbɔmɔtso lɛ mli lɛ jeɔ kpo diɛŋtsɛ ni eyahiɔ shi yɛ gbɔmɔ gbele sɛɛ? Enyɛŋ eba lɛ nakai, ejaakɛ lalatsɛ lɛ tee nɔ ewie akɛ: “Nakai gbi lɛ nɔŋŋ eyiŋtoi lɛ laajeɔ” (“esusumɔi fɛɛ baa naagbee,” The New English Bible).[9] Belɛ, mɛni ji mumɔ lɛ, ni ‘ejeɔ kpo’ kɛjɛɔ gbɔmɔ mli yɛ egbele beaŋ yɛ mɛɛ gbɛ nɔ?
12. Mɛni Hebri kɛ Hela wiemɔi ni atsɔɔ shishi akɛ “mumɔ” yɛ Biblia lɛ mli lɛ tsɔɔ?
12 Wiemɔi ni atsɔɔ shishi yɛ Biblia lɛ mli akɛ “mumɔ” (Hebri, ruʹach; Hela, pneuʹma) lɛ klɛŋklɛŋ shishinumɔ ji “mumɔ ni amuɔ.” Enɛ hewɔ lɛ, yɛ nɔ najiaŋ ni eeekɛɛ akɛ “emumɔ je emli lɛ,” shishitsɔɔmɔ ni R. A. Knox fee lɛ kɛ wiemɔ kuku ni ji “mumɔ ni emuɔ lɛ shiɔ egbɔmɔtso lɛ” tsuɔ nii. (Lala 145:4) Shi wiemɔ “mumɔ” lɛ tsɔɔ babaoo fe nifeemɔ ni ji mumɔ ni amuɔ kɛkɛ. Ákɛ nɔkwɛmɔnɔ lɛ, beni ewieɔ adesai kɛ kooloi awala ni akpata hiɛ yɛ jeŋ fɛɛ Nu Afua lɛ mli lɛ he lɛ, 1 Mose 7:22 lɛ kɛɛ akɛ: “Nii fɛɛ ni muɔ wala mumɔ [loo, mumɔ; Hebri, ruʹach] yɛ amɛgugɔ mli yɛ shikpɔŋ gbiŋ lɛ nɔ lɛ fɛɛ gboi.” No hewɔ lɛ “mumɔ” baanyɛ atsɔɔ wala hewalɛ ni tsuɔ nii yɛ bɔɔnii ni yɔɔ wala, ní ji gbɔmɛi adesai kɛ kooloi fɛɛ amli, ní mumɔ ni amuɔ lɛ haa eyaa nɔ ehiɔ shi lɛ.[10]
13. Mumɔ lɛ kuɔ sɛɛ kɛyaa Nyɔŋmɔ ŋɔɔ yɛ gbele mli yɛ mɛɛ gbɛ nɔ?
13 Belɛ, mɛni Jajelɔ 12:7 lɛ tsɔɔ beni ekɛɔ akɛ kɛ́ gbɔmɔ gbo lɛ, “mumɔ lɛ aaaku esɛɛ aya Nyɔŋmɔ ni ŋɔha lɛ ŋɔɔ lɛ”? Ani etsɔɔ akɛ mumɔ lɛ fãa gbɛ diɛŋtsɛ kɛtsɔɔ ŋwɛiniiaŋ kɛyaa Nyɔŋmɔ hiɛ diɛŋtsɛ? Jeee nakai nɔ ko kwraa ji nɔ ni etsɔɔ lɛ. Akɛni mumɔ lɛ ji wala hewalɛ lɛ hewɔ lɛ, ‘ekuɔ esɛɛ kɛyaa anɔkwa Nyɔŋmɔ lɛ ŋɔɔ’ kɛ shishinumɔ akɛ, kɛ́ wɔsɛɛ be shihilɛ he hiɛnɔkamɔ ko yɛ kɛha nakai mɔ lɛ, edamɔ Nyɔŋmɔ pɛ nɔ agbɛnɛ. Nyɔŋmɔ pɛ baanyɛ ekɛ mumɔ lɛ, loo wala hewalɛ lɛ aku sɛɛ aba ekoŋŋ koni gbɔmɔ lɛ aba wala mli ekoŋŋ. (Lala 104:30) Shi ani Nyɔŋmɔ eto eyiŋ akɛ ebaafee nakai?
“Ebaate Shi”
14. Mɛni Yesu wie ni mɛni efee ni ekɛha Lazaro nyɛmimɛi yei lɛ ná hejɔlɛ kɛ miishɛjemɔ yɛ amɛnyɛmi nuu lɛ gbele lɛ sɛɛ?
14 Maria kɛ Marta miiye amɛnyɛmi nuu Lazaro gbele ni ba kpatu lɛ he awerɛho, yɛ maŋ bibioo ni ji Betania, ní kɛ Yerusalem jɛkɛmɔ aaafee kilomitai etɛ yɛ ebokagbɛ lɛ mli. Yesu kɛ amɛ ye awerɛho lɛ, ejaakɛ esumɔɔ Lazaro kɛ enyɛmimɛi yei lɛ asane waa. Te Yesu baafee tɛŋŋ eshɛje nyɛmimɛi yei lɛ amii? Jeee kɛtsɔ sane ko ní etsɔmɔ lɛ, ní eeegba amɛ lɛ nɔ, shi moŋ kɛtsɔ anɔkwale ní eeekɛɛ amɛ lɛ nɔ. Yesu wie kuku kɛkɛ akɛ: “Onyɛmi nuu lɛ baate shi.” Kɛkɛ ni Yesu tee gbonyo bu lɛ naa, ni etée Lazaro shi—ni eha nuu ni egbo gbii ejwɛ sɔŋŋ lɛ ku sɛɛ eba wala mli ekoŋŋ!—Yohane 11:18-23, 38-44.
15. Te Marta here nɔ ni Yesu wie kɛ nɔ ni efee lɛ nɔ eha tɛŋŋ?
15 Ani wiemɔ ní Yesu wie akɛ Lazaro “baate shi” lɛ ha Marta naa kpɛ ehe? Eka shi faŋŋ akɛ dabi, ejaakɛ eha lɛ hetoo akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.” Eyɛ gbohiiashitee he shiwoo lɛ mli hemɔkɛyeli momo. Kɛkɛ ni Yesu kɛɛ lɛ akɛ: “Mi lɛ miji shitee lɛ kɛ wala lɛ; mɔ ni heɔ minɔ eyeɔ lɛ, kɛji egbo tete lɛ, ehiɛ aaakã.” (Yohane 11:23-25) Naakpɛɛ nii ni ji Lazaro ní aku sɛɛ akɛ lɛ ba wala mli ekoŋŋ lɛ wo ehemɔkɛyeli lɛ mli hewalɛ ni eha mɛi krokomɛi hu ná hemɔkɛyeli. (Yohane 11:45) Shi mɛni ji nɔ ni wiemɔ “gbohiiashitee” lɛ tsɔɔ diɛŋtsɛ?
16. Mɛni ji wiemɔ “gbohiiashitee” lɛ shishi?
16 Atsɔɔ wiemɔ “gbohiiashitee” lɛ shishi kɛjɛ Hela wiemɔ a·naʹsta·sis mli, ni eshishinumɔ diɛŋtsɛ ji “ní aaadamɔ shi ekoŋŋ.” Hebri wiemɔ shishitsɔɔlɔi ni tsɔɔ Hela wiemɔ lɛ shishi lɛ etsɔɔ a·naʹsta·sis shishi kɛ wiemɔ ni shishi ji “gbohii lɛ ahiɛ tsĩɛmɔ” (Hebri, techi·yathʹ ham·me·thimʹ).a Enɛ hewɔ lɛ, gbohiiashitee lɛ miitsɔɔ gbɔmɔ lɛ shitee kɛmiijɛ gbele shihilɛ ni wala bɛ mli lɛ mli—mɔ aŋkro lɛ wala shihilɛ ní akɛbaa, ní asaa akanyaa lɛ ekoŋŋ.[11]
17. (a) Mɛni hewɔ aŋkroaŋkroi ashitee lɛ efeŋ naagba ko kɛhaŋ Yehowa Nyɔŋmɔ kɛ Yesu Kristo lɛ? (b) Mɛɛ shiwoo Yesu kɛha yɛ mɛi ni yɔɔ kaimɔ bui amli lɛ agbɛfaŋ?
17 Akɛni enilee bɛ naagbee ni eye emuu yɛ enikaimɔ mli hewɔ lɛ, Yehowa Nyɔŋmɔ baanyɛ atee mɔ shi yɛ gbɛ ni waaa nɔ. Gbɔmɛi ni egboi lɛ awala shihilɛ—amɛsu kɛ baŋ mli kadimɔ nii, amɛ aŋkroaŋkro yinɔsane, kɛ amɛsui ahe saji fɛɛ fitsofitso—kaimɔ jeee naagba kwraa kɛha lɛ. (Hiob 12:13; okɛto Yesaia 40:26 he.) Kɛfata he lɛ, taakɛ Lazaro niiashikpamɔ lɛ tsɔɔ lɛ, Yesu Kristo miisumɔ, ni ebaanyɛ etee gbohii lɛ ashi hu. (Okɛto Luka 7:11-17; 8:40-56 he.) Yɛ anɔkwale mli lɛ, Yesu Kristo wie akɛ: “Ŋmɛlɛtswaa lɛ miiba, nɔ mli ni mɛi fɛɛ ni yɔɔ kaimɔ bui lɛ amli lɛ aaanu [Yesu] gbee ni amɛaaje kpo.” (Yohane 5:28, 29, NW) Hɛɛ, Yesu Kristo wo shi akɛ abaatee mɛi fɛɛ ni yɔɔ Yehowa kaimɔ mli lɛ ashi. Taakɛ Biblia lɛ tsɔɔ lɛ, eyɛ faŋŋ akɛ susuma lɛ gboɔ, ni gbele naa tsabaa ji gbohiiashitee. Shi gbɔmɛi akpekpei akpei abɔ ehi shi ni amɛgboi. Amɛteŋ namɛi yɔɔ Nyɔŋmɔ kaimɔ mli ní amɛmiimɛ gbohiiashitee?
18. Namɛi abaatée amɛ shi lɛ?
18 Abaatee mɛi ni edi jalɛ shihilɛ sɛɛ akɛ Yehowa tsuji lɛ ashi. Shi kɛlɛ, gbɔmɛi krokomɛi akpekpei abɔ egboi ní amɛtsɔɔɔ akɛ amɛbaakpɛlɛ Nyɔŋmɔ jalɛ tɛi ni efolɔ eshwie shi lɛ anɔ loo amɛkpɛlɛŋ nɔ. Ekolɛ amɛleee Yehowa taomɔ nii lɛ ahe nɔ ko kwraa, loo amɛnáaa be ni fa ni amɛkɛaafee tsakemɔi ni he hiaa lɛ. Mɛi krokomɛi nɛɛ hu yɛ Nyɔŋmɔ kaimɔ mli, ni no hewɔ lɛ abaatee amɛ shi, ejaakɛ Biblia lɛ woɔ shi akɛ: “Jalɔi kɛ mɛi ni ejaaa fɛɛ baate shi.”—Bɔfoi lɛ Asaji 24:15.
19. (a) Mɛɛ ninaa bɔfo Yohane nine shɛ nɔ yɛ gbohiiashitee lɛ he? (b) Mɛni “ashɛrɛ amɛ ashwie la kpaakpo lɛ mli” lɛ, ni mɛni nakai wiemɔi lɛ tsɔɔ?
19 Bɔfo Yohane na mɛi ni atee amɛ shi ní amɛdamɔ Nyɔŋmɔ maŋtsɛsɛi lɛ hiɛ lɛ ahe ninaa ko ni yɔɔ miishɛɛ waa. Beni ewieɔ he lɛ, eŋma akɛ: “Ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha; ni akojo amɛ, mɔ fɛɛ mɔ bɔ ni sa enitsumɔi lɛ. Ni gbele kɛ gbohiiaje lɛ, ashɛrɛ amɛ ashwie la kpaakpo lɛ mli. Enɛ ji gbele ni ji enyɔ lɛ, la kpaakpo lɛ nɛ.” (Kpojiemɔ 20:12-14) Susumɔ nɔ ni no tsɔɔ lɛ he okwɛ! Abaajie mɛi fɛɛ ni egboi ni amɛyɔɔ Nyɔŋmɔ kaimɔ mli lɛ kɛjɛ Hades, loo Sheol, ni ji adesai akwamaŋ gbonyo bu lɛ mli. (Lala 16:10; Bɔfoi lɛ Asaji 2:31) No sɛɛ lɛ, abaashɛrɛ “gbele kɛ gbohiiaje” ashwie nɔ ni atsɛɔ lɛ akɛ “la kpaakpo lɛ,” ni feɔ hiɛkpatamɔ kwraa he mfoniri lɛ mli. Adesai akwamaŋ gbonyo bu lɛ ehiŋ shi dɔŋŋ.
Gbɛkpamɔ ko ni Yɔɔ Srɔto Kwraa!
20. Abaatée akpekpei abɔ ni egboi bianɛ lɛ ashi kɛba mɛɛ shihilɛi amli?
20 Kɛ́ atée mɛi akpekpei abɔ shi yɛ gbohiiashitee lɛ mli lɛ, akɛ amɛ baŋ wala mli yɛ shikpɔŋ ni gbɔmɛi bɛ nɔ nɔ. (Yesaia 45:18) Amɛhiɛ baatsɛ̃ yɛ shihilɛi fɛfɛji ni aha etee hiɛ mli, ni amɛbaana akɛ asaa shihilɛhei, atadei, kɛ niyenii babaoo ato amɛ. (Lala 67:7; 72:16; Yesaia 65:21, 22) Namɛi baasaa nɛkɛ nibii nɛɛ ato amɛ? Eka shi faŋŋ akɛ, esa akɛ gbɔmɛi ahi shi yɛ jeŋ hee lɛ mli dani shikpɔŋ nɔ gbohiiashitee lɛ aje shishi. Shi namɛi?
21, 22. Mɛɛ gbɛkpamɔ ni yɔɔ srɔto kwraa kã mɛi ni yɔɔ “naagbee gbii lɛ” amli lɛ ahiɛ?
21 Biblia gbalɛ mlibaa tsɔɔ akɛ wɔyɛ nibii agbɛjianɔtoo nɛɛ “naagbee gbii lɛ” amli.b (2 Timoteo 3:1) Etsɛŋ kwraa ni Yehowa Nyɔŋmɔ kɛ ehe baawo adesai asaji amli ni ebaajie efɔŋfeemɔ kɛjɛ shikpɔŋ lɛ nɔ kwraa. (Lala 37:10, 11; Abɛi 2:21, 22) Mɛni baaba mɛi ni kɛ anɔkwayeli sɔmɔɔ Nyɔŋmɔ lɛ anɔ yɛ nakai beaŋ?
22 Yehowa kpataŋ jalɔi lɛ ahiɛ efataŋ mɛi fɔji lɛ ahe. (Lala 145:20) Efeko nakai dã, ni efeŋ nakai beni eeejie efɔŋfeemɔ fɛɛ kɛjɛ shikpɔŋ lɛ nɔ lɛ. (Okɛto 1 Mose 18:22, 23, 26 he.) Yɛ anɔkwale mli lɛ, Biblia lɛ naagbee wolo lɛ wieɔ “asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli,” ni jɛ “amanehulu kpeteŋkpele lɛ mli” lɛ ahe. (Kpojiemɔ 7:9-14) Hɛɛ, gbɔmɛi asafo babaoo ko yi baaná wala kɛfo amanehulu kpeteŋkpele lɛ ni kɛ amrɔ nɛɛ nibii agbɛjianɔtoo lɛ baaba naagbee lɛ, ni amɛbaabote Nyɔŋmɔ jeŋ hee lɛ mli. Adesai toibolɔi lɛ baanyɛ aná Nyɔŋmɔ gbɛjianɔtoo ni yɔɔ naakpɛɛ ní ekɛbaaha adesai aye amɛhe kɛjɛ esha kɛ gbele mli lɛ he sɛɛ kɛmɔ shi yɛ jɛmɛ. (Kpojiemɔ 22:1, 2) Enɛ hewɔ lɛ, ehe ehiaaa ni “asafo babaoo” lɛ aná gbele mli niiashikpamɔ. Mɛɛ gbɛkpamɔ ni yɔɔ srɔto kwraa nɛ!
Shihilɛ ní Gbele Bɛ Mli
23, 24. Kɛ́ ootao ni ohi shi kɛya naanɔ yɛ Paradeiso yɛ shikpɔŋ nɔ lɛ, mɛni esa akɛ ofee?
23 Ani wɔbaanyɛ wɔná hiɛnɔkamɔ ni yɔɔ naakpɛɛ fe nine nɛɛ mli hekɛnɔfɔɔ? Hɛɛ, kɛ nɔmimaa! Yesu Kristo diɛŋtsɛ tsɔɔ akɛ be ko baashɛ ni gbɔmɛi baahi shi ni amɛgboiŋ dɔŋŋ. Beni eshwɛ be fioo ni ebaatee eshieŋtsɛ Lazaro shi lɛ, Yesu kɛɛ Marta akɛ: “Mɔ fɛɛ mɔ ni hiɛ kã ni eheɔ minɔ eyeɔ lɛ, egboŋ gbi ko gbi ko kɛaatee naanɔ.”—Yohane 11:26.
24 Ani oosumɔ ni ohi shi kɛya naanɔ yɛ Paradeiso yɛ shikpɔŋ nɔ? Ani ooshwe ni ona osuɔlɔi lɛ ekoŋŋ? Bɔfo Yohane wie akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:17) Amrɔ nɛɛ ji be ni okɛaale nɔ ni ji Nyɔŋmɔ suɔmɔnaa nii, ní otswa ofai shi akɛ obaahi shi yɛ no kɛ gbeekpãmɔ naa. Ni no lɛ, okɛ mɛi krokomɛi akpekpei abɔ ní miifee Nyɔŋmɔ suɔmɔnaa nii momo lɛ baanyɛ ahi shi kɛya naanɔ yɛ Paradeiso yɛ shikpɔŋ nɔ.
[Shishigbɛ niŋmai]
a Eyɛ mli akɛ wiemɔ “gbohiiashitee” lɛ diɛŋtsɛ ejeee kpo kwraa yɛ Hebri Ŋmalɛi lɛ amli moŋ, shi awie gbohiiashitee hiɛnɔkamɔ lɛ he faŋŋ yɛ Hiob 14:13, Daniel 12:13, kɛ Hoshea 13:14.
b Kwɛmɔ Nilee Ni Kɛ Mɔ Yaa Naanɔ Wala Mli, ni Watchtower Bible and Tract Society of New York, Inc. fee lɛ baafai 98-107.
Ani Okaiɔ?
◻ Mɛni ji wiemɔi ni atsɔɔ shishi akɛ “susuma” yɛ shishijee wiemɔ mli lɛ klɛŋklɛŋ shishinumɔ?
◻ Mɛni baa susuma lɛ nɔ yɛ gbele mli?
◻ Taakɛ Biblia lɛ tsɔɔ lɛ, mɛni ji gbele naa tsabaa?
◻ Mɛɛ gbɛkpamɔ ni yɔɔ srɔto kwraa mɛɔ anɔkwafoi lɛ ŋmɛnɛ?
[Akrabatsa ni yɔɔ baafa 15]
“Susuma” ákɛ Bɔɔnɔ lɛ Wala
Bei komɛi lɛ, wiemɔ “susuma” lɛ kɔɔ wala ni gbɔmɔ loo kooloo ko náa mli ŋɔɔmɔ lɛ he. Enɛ tsakeee bɔ ni Biblia lɛ tsɔɔ susuma lɛ shishi ehaa ákɛ gbɔmɔ loo kooloo lɛ. Ákɛ nɔkwɛmɔnɔ lɛ: Wɔkɛɔ akɛ mɔ ko hiɛ kã, ni tsɔɔ akɛ eji mɔ ko ni yɔɔ wala mli. Wɔbaanyɛ wɔkɛɛ hu akɛ eyɛ wala. Yɛ nakai gbɛ nɔŋŋ nɔ lɛ, mɔ ko ni yɔɔ wala mli lɛ ji susuma. Ni kɛlɛ, beni eyɔɔ wala mli lɛ, abaanyɛ awie “susuma” lɛ he akɛ nɔ ko ni eyɔɔ.
Ákɛ nɔkwɛmɔnɔ lɛ, Nyɔŋmɔ kɛɛ Mose akɛ: “Mɛi fɛɛ ni taoɔ osusuma lɛ egboi.” Eyɛ faŋŋ akɛ, Mose henyɛlɔi lɛ miitao ni amɛgbe lɛ. (2 Mose 4:19; okɛto Yoshua 9:24; Abɛi 12:10, NW he.) Yesu kɛ wiemɔ lɛ tsu nii yɛ gbɛ ni tamɔ nakai nɔŋŋ nɔ, ni ekɛɛ akɛ: “Gbɔmɔ bi lɛ ba . . . ni eŋɔ esusuma lɛ eha yɛ mɛi pii akpɔmɔ hewɔ.” (Mateo 20:28; okɛto 10:28 he.) Yɛ eko fɛɛ eko mli lɛ, wiemɔ “susuma” lɛ miitsɔɔ “bɔɔnɔ ko wala.”
[Mfonirii ni yɔɔ baafa 15]
Susumai ji amɛ fɛɛ
[He ni Sane lɛ Jɛ]
Hummingbird: U.S. Fish and Wildlife Service, Washington, D.C./Dean Biggins
[Mfoniri ni yɔɔ baafa 17]
Yesu fee lɛ faŋŋ akɛ gbele naa tsabaa ji gbohiiashitee lɛ
[Mfoniri ni yɔɔ baafa 18]
“Mɔ fɛɛ mɔ ni hiɛ kã ní eheɔ minɔ eyeɔ lɛ, egboŋ gbi ko gbi ko kɛaatee naanɔ.”—Yohane 11:26