Nibɔɔ Kɛɔ Akɛ, “Amɛbɛ Naajiemɔ Ko”
“Ehe nii ni anaaa ni ji enaanɔ hewalɛ kɛ nyɔŋmɔyeli lɛ fɛɛ lɛ, kɛjɛ jeŋbɔɔ mli beebe lɛ atsɔɔ enii ni afee lɛ anɔ ayɔseɔ ni anaa faŋŋ, no hewɔ lɛ amɛbɛ naajiemɔ ko.”—ROMABII 1:20.
1, 2. (a) Hiob kɛ dɔlɛ wie mɛni he etsɔɔ Yehowa? (b) Mɛni fai Hiob kpa yɛ enɛ sɛɛ?
HIOB, nuu ni hi shi yɛ blema bei lɛ amli ni hiɛ emuuyeli ni anyɛɛɛ aku mli kɛha Yehowa Nyɔŋmɔ lɛ ji mɔ ni Satan kɛ kaa ko ni yɔɔ gbeyei ba enɔ. Abonsam ha Hiob laaje eheloo naa nibii fɛɛ, eha ebihii kɛ biyei gboi, ni ekɛ hela ni haa anyaŋeɔ mɔ ba enɔ. Hiob susu akɛ Nyɔŋmɔ ji mɔ ni kɛ nɛkɛ amanehului nɛɛ baa enɔ, ni ekɛ dɔlɛ wie enɛ he etsɔɔ Yehowa akɛ: “Ani ehi hao akɛ owaa mɔ yi . . . hewɔ ni obiɔ minɔtɔmɔ lɛ shi, ni odiɔ mihe esha lɛ sɛɛ? Tsɛbelɛ ole akɛ mijeee mɔ fɔŋ.”—Hiob 1:12-19; 2:5-8; 10:3, 6, 7.
2 Yɛ sɛɛ mli be ko yɛ enɛ sɛɛ lɛ, bɔ ni Hiob kɛ Nyɔŋmɔ wie lɛ bafee nɔ ni etsake kwraa: “Mijaje nɔ ni minaaa naa lɛ, nii ni feɔ mi naakpɛɛ tsɔ ni mileee lɛ. Mitoi kɛkɛ mikɛnu ohe; shi agbɛnɛ mihiŋmɛi enao. No hewɔ lɛ, eedɔ mi, ni miishwa mihe yɛ sũ kɛ lamulu mli.” (Hiob 42:3, 5, 6) Mɛni ha Hiob tsake esubaŋ nɛkɛ?
3. Mɛɛ jwɛŋmɔ hee Hiob na yɛ nibɔɔ he?
3 Dani enɛ aaaba lɛ, Yehowa etsɔ ahum mli ekɛ Hiob etao saji anaa. (Hiob 38:1) Etee nɔ eto sanebimɔi eshwie Hiob nɔ. ‘Nɛgbɛ oyɔɔ beni mito shikpɔŋ lɛ shishi lɛ? Namɔ kɛ shinaai ŋa ŋshɔ lɛ naa, ni efo husu ewo he ni ŋshɔkei lɛ baaba abawa yɛ lɛ? Ani ooonyɛ oha atatui anɛ nui ashwie shikpɔŋ lɛ nɔ? Ani ooonyɛ oha jwɛi akwɛ̃ kɛjɛ shikpɔŋ su mli? Ani ooonyɛ ofi wuɔ-kɛ-ebii ni okudɔ amɛ yɛ amɛgbɛi anɔ?’ Yehowa bibii Hiob saji yɛ ewolo lɛ yitsei 38 kɛyashi 41 lɛ mli fɛɛ, kɛ babaoo hu ni kɔɔ E-nibɔɔ he. Eha Hiob na bu voo ni ka Nyɔŋmɔ kɛ gbɔmɔ teŋ lɛ, ni ekɛ hewalɛ ha Hiob kai nilee kɛ hewalɛ ni jeɔ kpo yɛ Nyɔŋmɔ nibɔɔ mli lɛ, nibii ni dara fe bɔ ni Hiob hewalɛ aaanyɛ afee loo akɛ eeenu shishi po. Hiob ni Nyɔŋmɔ hewalɛ kpeteŋkpele lɛ kɛ Nyɔŋmɔ ofe lɛ nilee babaoo ni jeɔ kpo kɛtsɔɔ enibɔɔ mli lɛ eha enaa ekpɛ ehe lɛ hiɛ fee lɛ yaa akɛ enyɛ ena ekãa po ni ekɛ Yehowa je ŋwane. No hewɔ lɛ ekɛɛ: “Mitoi kɛkɛ mikɛnu ohe, shi agbɛnɛ mihiŋmɛi enao.”—Hiob 42:5.
4. Mɛni esa akɛ wɔyoo kɛjɛ Yehowa nibɔɔi amli, ni mɛɛ shihilɛ mli mɛi ni nyɛɛɛ ana enɛ lɛ yɔɔ?
4 Afii ohai babaoo sɛɛ lɛ, Biblia mli niŋmalɔ ko ni mumɔ yɔɔ enɔ ma nɔ mi akɛ abaanyɛ atsɔ Yehowa nibɔɔi anɔ ana esui kɛ enyɛmɔi. Bɔfo Paulo ŋma yɛ Romabii 1:19, 20, akɛ: “Nyɔŋmɔ he nii ni aaanyɛ ale lɛ yɛ faŋŋ yɛ amɛmli, ejaakɛ Nyɔŋmɔ jie tsɔɔ amɛ faŋŋ. Ejaakɛ ehe nii ni anaaa ni ji enaanɔ hewalɛ kɛ nyɔŋmɔyeli lɛ fɛɛ lɛ, kɛjɛ jeŋbɔɔ mli beebe lɛ atsɔɔ enii ni efee lɛ anɔ ayɔseɔ ni anaa faŋŋ, no hewɔ amɛbɛ naajiemɔ ko.”
5. (a) Mɛɛ hiamɔ ko gbɔmɛi yɔɔ ni akɛfɔ amɛ, ni mɛɛ gbɛ ni ejaaa nɔ mɛi komɛi tsɔɔ amɛtsuɔ he nii? (b) Mɛni ji ŋaa ni Paulo wo Helabii ni yɔɔ Ateene lɛ?
5 Abɔ gbɔmɔ kɛ mligbɛ hiamɔ nii ko akɛ eja hewalɛ ko ni nɔ kwɔ. Dr. C. G. Jung, wie hiamɔ nɛɛ he akɛ “henumɔŋ subaŋ ko ni anaa yɛ gbɔmɔ he, ni abaanyɛ adi bɔ ni ejieɔ ehe kpo ehaa lɛ sɛɛ yɛ adesa yinɔsane be fɛɛ mli” yɛ ewolo, The Undiscovered Self lɛ mli. Bɔfo Paulo wie mligbɛ su ni kanyaa gbɔmɔ akɛ eja nɔ ko, ni tsɔɔ nɔ hewɔ ni Helabii ni yɔɔ Ateene lɛ fee amagai kɛ afɔleshaa latɛi babaoo amɛha nyɔŋmɔi babaoo, ni ale kɛ nɔ ni aleee, lɛ he. Paulo ha amɛle anɔkwa Nyɔŋmɔ lɛ hu ni etsɔɔ akɛ esa akɛ amɛtsu nɛkɛ kanyamɔ nɛɛ he nii yɛ gbɛ ni ja nɔ, kɛtsɔ Yehowa, anɔkwa Nyɔŋmɔ lɛ ni amɛaatao esɛɛ gbɛ lɛ nɔ, “akɛ aleee nɔ, kɛ amɛgbugbuu shi lɛ, amɛaana lɛ lo; tsɛbelɛ ekɛ wɔteŋ mɔ fɛɛ mɔ teŋ jɛkɛɛɛ.” (Bɔfoi lɛ Asaji 17:22-30) Bɔ ni wɔbɛŋkɛ enibɔɔi lɛ ahe kpaakpa ha hewɔ lɛ, nakai nɔŋŋ wɔbɛŋkɛ esui kɛ enyɛmɔi lɛ ni wɔɔna lɛ ahe wɔha.
Nu Shibɔlemɔ ni Yɔɔ Naakpɛɛ Lɛ
6. Mɛɛ Yehowa nyɛmɔi loo esui wɔnaa yɛ nu shibɔlemɔ lɛ mli?
6 Mɛɛ Yehowa sui wɔnaa, akɛ nɔkwɛmɔ nɔ lɛ, yɛ nyɛmɔ ni atatui ni tamɔ odonti lɛ yɔɔ ni amɛkɛaahiɛ nui ni tsiimɔ shɛɔ tɔn abɔ lɛ mli? Wɔnaa esuɔmɔ kɛ enilee, ejaakɛ ehaa nui lɛ nɛɔ ni eshwaa kɛhaa shikpɔŋ lɛ jɔɔmɔ. Efeɔ enɛ kɛtsɔɔ gbɛjianɔtoo ko ni yɔɔ naakpɛɛ ni kɔɔ nu shibɔlemɔ ni atsi ta yɛ Jajelɔ 1:7 lɛ he lɛ nɔ: “Faai fɛɛ hoɔ kɛyaa ŋshɔŋ, kɛlɛ ŋshɔ yiii: he ni faai lɛ hoɔ kɛyaa lɛ, jɛmɛ nɔŋŋ amɛhoɔ kɛyaa ekoŋŋ.” Biblia mli wolo ni ji Hiob lɛ tsɔɔ bɔ ni efeɔ enɛ ehaa lɛ mli pɛpɛɛpɛ.
7. Te feɔ tɛŋŋ ni nu jɛɔ ŋshɔŋ kɛyaa atatuiaŋ lɛ, ni mɛɛ gbɛ nɔ atatui ni nui yɔɔ mli lɛ nyɛɔ ehiɛɔ nui ni tsiimɔ shɛɔ tɔn babaoo lɛ mli?
7 Kɛ fɛ̃i be mli faai lɛ ho kɛtee ŋshɔŋ lɛ, amɛhiii jɛmɛ. Yehowa “gbalaa nu kulibii lɛ kɛjɛɔ ŋshɔŋ ni ehaa etsɛ̃rɛ̃ɔ kɛjɛɔ efua ni efee lɛ mli.” Akɛni nu lɛ tamɔ lamɔ ni yɛ naagbee lɛ efeɔ nu kulibii hewɔ lɛ, “atatui lɛ sɛŋɔ shi, ni mɔ ni le nii lɛ naakpɛɛ nitsumɔi ni.” (Hiob 36:27; 37:16; The New English Bible) Atatui sɛŋɔ shi yɛ ŋwɛi bei abɔ ni amɛji nu kulibii: “Efiɔ nui ewoɔ eblɔtui lɛ amli, ni kɛlɛ atatu lɛ fɛɛɛ yɛ amɛshishi.” Aloo taakɛ shishitsɔɔmɔ kroko kɛɔ lɛ: “Etsiɔ nui lɛ anaa ewoɔ atatui kutuui amli, ni atatui lɛ fɛɛɛ yɛ amɛshishi.”—Hiob 26:8, The Jerusalem Bible; NE.
8. Mɛɛ gbɛi sɔrɔtoi anɔ atsɔɔ akpaa “ŋwɛi tɔi” lɛ ashwieɔ shi ni agbeɔ nu shibɔlemɔ lɛ naa yɛ?
8 Ni “ŋwɛi tɔi lɛ, namɔ kpooɔ amɛnaa shi” koni eha nu anɛ ashwie shikpɔŋ nɔ lɛ? (Hiob 38:37) Mɔ ni kɛ “hesaa ni yeɔ emuu” kɛ amɛ tsotsoro shi yɛ jɛmɛ klɛŋklɛŋ kwraa, ni “tsereɔ nunɛmɔ kɛjɛɔ efua lɛ mli lɛ ni.” Ni mɛni he hiaa koni eha nu kulibii anɛ kɛjɛ efua lɛ mli? Esa akɛ nibii bibiibii ni anyɛɔ amɔɔ mli ahi shi, tamɔ mulu kulibii loo ŋoo ŋwɛtɛŋwɛtɛ—kɛjɛ akpei abɔ kɛmiiya akpei ohai abɔ ahi kɔɔyɔɔ ni efalɛ loo edalɛ shɛɔ waotalɔ koji-ejwɛ ni ekɛlɛ kɛ elɛɛmɔ kɛ ekwɔlɛ yeɔ egbɔ lɛ eko fɛɛ eko mli—koni efee loo etsu nii akɛ teŋgbɛ nii ni nu kulibii aaabua amɛhe naa kɛbɔle no. Abuɔ naa akɛ eheɔ atatui amli nui kulibii nɛɛ akpeiakpe kome dani anaa nu kuli kome ni nɛɔ kɛjɛɔ ŋwɛi kɛ aja mli. Ni beni enɛɛmɛi fɛɛ etee nɔ lɛ sɛɛ dani atatui lɛ nyɛɔ amɛŋmɛɛɔ amɛnunɛmɔ lɛ he amɛshwieɔ shikpɔŋ nɔ koni efee faai ni kɛ emli nui lɛ yawoɔ ŋshɔ lɛ mli. Nɛkɛ gbɛ nɔ nu shibɔlemɔ lɛ gbeɔ naa yɛ. Ani enɛɛmɛi fɛɛ tee nɔ ni gbɛtsɔɔmɔ ko kwraa bɛ mli? “Amɛbɛ naajiemɔ ko” kwraa lɛlɛŋ!
Salomo Nilee lɛ Jɛɛhe Kome Pɛ Lɛ
9. Mɛni Salomo na ni fee lɛ naakpɛɛ yɛ tsatsubii sɔrɔtoi lɛ eko he?
9 Mɔ ko bɛ ni enilee kɛ Salomo nilee lɛ yeɔ egbɔ yɛ blema je lɛ mli. Nakai nilee lɛ mli nibii babaoo kɔɔ Yehowa nibɔɔ lɛ he: “Ni [Salomo] ewie tsei ahe, kɛjɛ tseneduru tso ni yɔɔ Lebanon lɛ nɔ aahu kɛyashi hisopo ni kwɛ̃ɔ kɛjɛɔ gbogbo mli lɛ nɔ; ni asaŋ ewie kooloi kɛ loofɔji kɛ waamɔ nii kɛ nuŋ looi ahe.” (1 Maŋtsɛmɛi 5:13) Nɛkɛ Maŋtsɛ Salomo nɛɛ nɔŋŋ ŋma akɛ: “Hejɔ̃lɔ, yaa tsatsu ŋɔɔ; jwɛŋmɔ egbɛi lɛ ahe ni ole nii! Lɛ ni ebɛ kojolɔ loo nɔkwɛlɔ loo nɔyelɔ lɛ, etaoɔ eniyenii etoɔ yɛ latsaa be mli, ni ebuaa eŋmaa naa yɛ nikpamɔ be mli.”—Abɛi 6:6-8.
10. Mɛɛ gbɛ nɔ atsɔ abu Salomo nɔkwɛmɔ nɔ ni kɔɔ tsatsubii ni buaa ŋmaakpamɔ niyenii anaa amɛtoɔ lɛ bem yɛ?
10 Namɔ tsɔɔ tsatsubii bɔ ni abuaa niyenii anaa atoɔ yɛ latsaa be mli koni amɛye yɛ fɛi be mli lɛ? Afii ohai babaoo ho ni aheee bɔ ni Salomo sane ni kɔɔ nɛkɛ tsatsubii ni buaa amɛŋmaa naa yɛ nikpamɔ be mli amɛtoɔ kɛhaa fɛi be nɛɛ ahe lɛ ja ha lɛ ayeee. Mɔ ko mɔ ko enako odaseyeli ni tsɔɔ akɛ nakai amɛji. Shi, afi 1871 mli ni Ŋleshinyo adebɔɔ he nilelɔ ko yana amɛŋmaa fiasei ko yɛ shikpɔŋ shishi bui amli, kɛkɛ ni abu bɔ ni Biblia lɛ ewie amɛhe eha ni ja lɛ bem. Shi, te fee tɛŋŋ ni nɛkɛ tsatsubii nɛɛ na le yɛ latsaa be mli akɛ fɛi be miiba, kɛ nilee ni aaaha amɛle nɔ ni esa akɛ amɛfee yɛ he? Biblia lɛ diɛŋtsɛ tsɔɔ mli akɛ Yehowa nibɔɔi lɛ pii yɛ nilee ko ni ato he gbɛjianɔ awo amɛmli kɛha amɛ yibaamɔ. Tsatsubii ŋmaakpalɔi lɛ ji mɛi ni nine shɛɔ Bɔlɔ lɛ jɔɔmɔi anɔ lɛ ateŋ ekomɛi. Abɛi 30:24 wieɔ amɛhe akɛ: “Shi amɛle nii pam.” Jwɛŋmɔ bɛ mli akɛ aaakɛɛ akɛ heniianaa loo trukaa kɛkɛ ni nɛkɛ nilee nɛɛ ba; akɛni amɛnyɛɛɛ amɛyoo Bɔlɔ nilelɔ ni yɔɔ enɛ sɛɛ lɛ hewɔ lɛ amɛbɛ naajiemɔ ko.
11. (a) Mɛni hewɔ sequoia tso wulu lɛ dalɛ yɔɔ naakpɛɛ nakai lɛ? (b) Mɛni yɔɔ naakpɛɛ waa yɛ klɛŋklɛŋ nifeemɔ yɛ fotosintɛsis mli lɛ he?
11 Gbɔmɔ ni damɔ sequoia tso wulu shishi, ni edalɛ kɛ efɛo lɛ eha enaa ekpɛ ehe lɛ, nuɔ shishi akɛ etamɔ tsatsu bibioo ko yɛ tso nɛɛ shishi. Tso lɛ dalɛ yɛ naakpɛɛ kɛ gbeyei: ekɛlɛ ji ninetalɔi 300, elɛɛmɔ ji ninetalɔi 36, tso lɛ he toto lɛ timɔ feɔ ninetalɔi 2, ni eshishifai yaa shɔŋŋ kɛyashɛɔ nɔ ni fe eka etɛ loo ejwɛ. Ni kɛlɛ nɔ ni yɔɔ naakpɛɛ kɛ gbeyei babaoo ji nilee ni kɔɔ amɛmli nui kɛ bɔ ni amɛdaraa amɛhaa lɛ ahe lɛ. Ebaai lɛ gbalaa nu kɛjɛɔ efaji lɛ amli, kɛ kɔɔyɔɔ ni ehiii haa gbɔmɔ kɛjɛɔ kɔɔyɔŋ, kɛ hulu mli hewalɛ ni ekɛfeɔ siklei, ni eŋmɛɛɔ kɔɔyɔɔ kpakpa he ehaa—nifeemɔ ko ni atsɛɔ lɛ fotosintɛsis ni kɔɔ tsofa-futumɔ mli nifeemɔi 70 he, ni anuuu fɛɛ shishi. Nɔ ni yɔɔ naakpɛɛ ji akɛ, klɛŋklɛŋ nifeemɔ lɛ damɔ hulu mli la ni biɛ kɔla loo su ni ja pɛpɛɛpɛ, kɛ eliamɔ loo gbɛ ni yɔɔ trɔmɔɔ ni etsɔɔ nɔ tɛ̃ɛ lɛ nɔ; kɛ jeee nakai lɛ, ebaa ŋmɔŋ lɛ mli nibii bibii ni atsɛɔ lɛ klorofil molekul lɛ gbalaŋ enɛ ni ekɛje fotosintɛsis ni ji niyenii feemɔ lɛ shishi.
12. (a) Mɛni yɔɔ naakpɛɛ yɛ bɔ ni sequoia tso lɛ kɛ nu tsuɔ nii lɛ he? (b) Mɛni hewɔ kɔɔyɔɔ ni ji nitrogen lɛ he hiaa yɛ kwɛɛnii adaramɔ mli lɛ, ni ashibɔlemɔ lɛ baa naagbee yɛ mɛɛ gbɛ nɔ?
12 Nɔ ni yɔɔ naakpɛɛ hu ji anɔkwale ni eji akɛ tso lɛ baanyɛ agbala nui kɛjɛ eshishifai lɛ amli kɛya tso agbo ni ekɛlɛ shɛɔ ninetalɔi 300 lɛ yiteŋ tɔ̃ɔ. Agbalaa nu babaoo fe bɔ ni he hiaa kɛhaa nɛkɛ fotosintɛsis nɛɛ. Tso lɛ ŋmɛɛɔ nɔ ni shwɛɔ lɛ ahe kɛtsɔɔ eyibaai lɛ amli ewoɔ kɔɔyɔɔ mli. Nakai feemɔ haa tso lɛ he jɔɔ, tamɔ latsaa haa mɔ he jɔɔ yɛ sɛɛ mli lɛ. Bɔni afee ni ana niyenii amli nui ni kɛ dalɛ baa lɛ, ehe hiaa ni akɛ nitrogen ni ji kɔɔyɔɔ ni fa babaoo fe fɛɛ yɛ nibii ni wala yɔɔ mli lɛ amli lɛ afata siklei loo staatei ahe. Baa ŋmɔŋ lɛ nyɛŋ ekɛ nitrogen ni agbala kɛjɛ kɔɔyɔɔ mli lɛ atsu nii, shi su mli nibii baanyɛ atsake nitrogen ni tamɔ kɔɔyɔɔ ni yɔɔ su mli lɛ afee lɛ su mli nibii komɛi ni tamɔ ŋoo ni baanyɛ asere yɛ nu mli, ni yɛ no sɛɛ lɛ eeetsɔ tso lɛ faji amli kɛya ebaai lɛ amli. Kɛ kwɛɛnii kɛ kooloi ni kɛ nɛkɛ nitrogen nɛɛ etsu nii yɛ amɛmli lɛ gboi ni amɛkpɔtɔ lɛ, nitrogen kɔɔyɔɔ lɛ jeɔ kpo, nine hu kɛ nitrogen shibɔlemɔ lɛ baa naagbee. Bɔ ni eyɔɔ naakpɛɛ kɛ hwanyaŋŋ ha yɛ enɛɛmɛi fɛɛ mli lɛ yɛ gbeyei, ni ewa akɛ heniianaa loo trukaa nɔ ko aaatsu enɛ ni ŋaa loo gbɛtsɔɔmɔ bɛ mli.
Amɛbɛ Gbeei loo Wiemɔi Shi Kɛlɛ, Amɛwieɔ!
13. Ŋwɛii ni ŋulamii eyi jɛmɛ obɔ lɛ jaje mɛni amɛtsɔɔ David, ni mɛni amɛyaa nɔ amɛkɛɔ wɔ?
13 Mɛɛ Bɔlɔ lɛ kpojiemɔ ni yɔɔ gbeyei baa kɛjɛɔ gbɛkɛ atatuiaŋ ni ŋulamii eyi mli obɔ ni haa mɛi ni naa lɛ kɛ woo haa lɛ nɛkɛ! David tsɔɔ bɔ ni enuɔ he ehaa lɛ yɛ Lala 8:4, 5 akɛ: “Kɛ mikwɛ oŋwɛi lɛ ni ji owaobii anaa nitsumɔi lɛ, nyɔŋtsere kɛ ŋulamii ni osaa oto lɛ: Mɛni ji adesa ni ojwɛŋɔ enɔ? aloo gbɔmɔ bi ni osaraa lɛ po?” Kɛha mɛi ni yɔɔ hiŋmɛii ni amɛkɛaana nii, kɛ mɛi ni yɔɔ toii ni amɛkɛaanu nii, kɛ tsui ni nuɔ nii ahe lɛ, nɛkɛ ŋwɛii ni ŋulamii eyi jɛmɛ obɔ nɛɛ wieɔ, taakɛ amɛwie amɛtsɔɔ David lɛ, akɛ: “Ŋwɛi gbaa Mawu anunyam lɛ.”—Lala 19:1-4.
14. Mɛni hewɔ ni nyɛmɔ ni fa ni ŋulamii lɛ ekome yɔɔ lɛ he hiaa wɔ waa nakai lɛ?
14 Babaoo ni wɔleɔ ŋulamii ahe nii lɛ, babaoo hu amɛkɛ gbee ni naa wa wieɔ tsɔɔ wɔ. Afɔɔ wɔ nine ni wɔyoo amɛhewalɛ kpeteŋkpele lɛ, yɛ Yesaia 40:26: “Nyɛholea nyɛhiŋmɛii anɔ kɛyaa ŋwɛi, ni nyɛkwɛa: Namɔ bɔ enɛɛmɛi? Lɛ mɔ ni ejieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛii; enyɛmɔ ni fa kɛ ehewalɛ kpele lɛ hewɔ lɛ, amɛteŋ ekome folo po eshwɛɛɛ.” Nigbalamɔ hewalɛ, kɛ hewalɛ kpele ni amɛteŋ ekome, wɔ hulu lɛ, yɔɔ lɛ hewɔ ni ehaa wɔshikpɔŋ lɛ hiɔ egbɛhe ni ebɔleɔ ehe yɛ egbɛ nɔ pɛpɛɛpɛ, ni ehaa tsei kwɛ̃ɔ, ni ehaa wɔhe feɔ kulɔkulɔ, ni ehaa wala hiɔ shikpɔŋ nɛɛ nɔ lɛ. Bɔfo Paulo ni mumɔ yɔɔ enɔ lɛ kɛɛ: “Ŋulami kome fe ŋulami kroko anunyam.” (1 Korintobii 15:41) Jeŋ nilee le ŋulamii ni amɛsu tamɔ wuɔfɔ taakɛ wɔ hulu lɛ ji lɛ, kɛ ŋulamii ni amɛsu tamɔ bluu, kɛ ŋulamii wuji tsuji, kɛ ŋulamii bibii yɛji, kɛ neutron ŋulamii, kɛ nɔ ni fɛlɛɔ ni jieɔ hewalɛ ni anyɛɛɛ ana naa kpo.
15. Mɛi ni feɔ nibii heei kwraa lɛ ekase mɛni kɛjɛ adebɔɔ mli ni mɛɛ mɔdɛŋ amɛbɔ koni amɛkase?
15 Mɛi ni amɛfee nibii heei lɛ ateŋ mɛi pii kase nii kɛjɛ adebɔɔ mli ni amɛbɔ mɔdɛŋ akɛ amɛaakase nyɛmɔi ni bɔɔ nii krokomɛi ni yɔɔ wala mli lɛ yɔɔ lɛ. (Hiob 12:7-10) Kadimɔ adebɔɔ he nibii ni ekaaa lɛ fioo ko nɛɛ. Ŋshɔ hiɛ loofɔji yɛ nɔ ni tsakeɔ ŋoo nu efeɔ lɛ nu ŋma yɛ amɛmli; looi kɛ ablekui ni feɔ sarawa hewalɛ; ŋshɔŋ loo, gɔgɔmii, kɛ kooloi filikilɔi bibii haa la ni eshaaa mɔ kpɛɔ; afutufatai kɛ atii ni kɛ nui ashishi gbɛɛmɔi tsuɔ nii; asagbai ni feɔ wolo; tsatsubii ni feɔ agba; kooloo ko ni tamɔ kpiŋ ni tswaa kpoku kɛtsiɔ nu naa; onufui ni yɔɔ jeŋ dɔlɛ susumɔi ahe nyɛmɔ yɛ amɛmli; kpaakpo amli kooloi filikilɔi bibii ni yɔɔ ododobɛŋi ni haa amɛmuɔ kɛjɛɔ nui ashishi kɛ amɛmu mle; atswanaŋi ni hewalɛ ni amɛfɛ̃ɔ kɛyaa sɛɛ lɛ moŋ tsiɔ amɛ kɛ foi kɛyaa hiɛ; anaanui ni feɔ kpãai sɔrɔtoi kpawo, ni amɛfeɔ shinaai ni tsɔɔ tsɔne, yaai loo ntaŋi, kɛ kpaai ni akɛmɔmɔɔ nibii kɛ anaanu bibii ni damɔɔ toofui anɔ kɛfoɔ shi, ni faa gbɛ shitoi akpei abɔ yɛ atatuiaŋ shɔŋŋ; looi kɛ faai amli looi ni yɔɔ nibii ni haa amɛnyɛɔ amɛtɛoɔ nui ahiɛ tamɔ ŋshɔ shishi tawuu lɛji; kɛ loofɔji, filikilɔi, halai, looi, kɛ kooloi ni haa amɛbii fufɔ ni faa gbɛ kɛyaa shɔŋŋ yɛ naakpɛɛ gbɛi anɔ—nyɛmɔi ni jeŋ nilee bɛ hewalɛ ni akɛaatsɔɔ mli.
16. Mɛɛ jeŋ nilee mli anɔkwalei Biblia lɛ ŋma fɔ shi afii akpei abɔ dani jeŋ nilee kpa shi ena?
16 Biblia lɛ ŋma jeŋ nilee mli anɔkwalei eshwie shi afii akpei abɔ dani jeŋ nilee bale enɛɛmɛi. Mose Mla lɛ (afii ohai 16 D.Ŋ.B.) tsɔ hiɛ etsɔɔ muawai ni kɛ hela baa lɛ ahe nilee ni ayɔɔ afii akpei abɔ dani Pasteur bale. (3 Mose, yitsei 13, 14) Hiob jaje yɛ afii ohai 17 B.C.E. lɛ mli akɛ: “Eŋɔɔ shikpɔŋ lɛ etsotsoroɔ shi ni jeee nɔ ko nɔ ema. (Hiob 26:7) Salomo ŋma bɔ ni lá bɔleɔ shi yɛ gbɔmɔtso lɛ mli lɛ he sane afii akpe dani Kristo ba; ehe bahia ni tsofa-feemɔ he nilee amɛ kɛbashi Ŋ.B. afii ohai 17 lɛ mli dani ekase enɛ he nii. (Jajelɔ 12:6) Dani enɛ aaaba lɛ, Lala 139:16 jie fɔmɔ mla lɛ he nilee ni ayɔɔ lɛ kpo: “Beni miji la kukuli kɛkɛ lɛ, ohiŋmɛii na; ni gbii ni atotoi ni amɛteŋ ekome folo shɛko lɛ, aŋma fɛɛ yɛ owolo lɛ mli.” Yɛ afii ohai 7 D.Ŋ.B., dani kooloi awala he nilelɔi aaanu gbɛfaa kɛmiijɛ he kome kɛmiiya he kroko shishi lɛ, no mli lɛ Yeremia eŋma yɛ Yeremia 8:7 akɛ: “Klitso tete ni nyiɛ ŋwɛi lɛ, ele ebe ni ekɛaafa egbɛ, ni kosɛɛ okpo hu kɛ nyɔŋmɔbitɛte kɛ kpokukpoku le be ni amɛkɛaaku amɛsɛɛ.”—NE.
“Bɔlɔ” ni Sutsakemɔ He Nilelɔi Halaa Lɛ
17. (a) Mɛni Romabii 1:21-23 wieɔ yɛ mɛi ni kpooɔ akɛ amɛaana Bɔlɔ ni yɔɔ nilee yɛ naakpɛɛ nibii ni abɔ lɛ asɛɛ lɛ ahe? (b) Yɛ shishinumɔ ko naa lɛ mɛni sutsakelɔi halaa akɛ amɛ “bɔlɔ”?
17 Ŋmalɛ ko wieɔ mɛi ni kpooɔ akɛ amɛaayoo Bɔlɔ nilelɔ ko ni hɔ naakpɛɛ nibii ni abɔ lɛ asɛɛ lɛ ahe akɛ: “Amɛfee shwɛm yɛ amɛjwɛŋmɔi amli, ni amɛtsui ni kɔɔɔ sane sɛɛ lɛ wo duŋ. Amɛtsɛ amɛhe nilelɔi, shi amɛtsɔmɔ kwashiai, ni Nyɔŋmɔ ni fiteee lɛ anunyam lɛ, amɛtsake amɛha gbɔmɔ ni fiteɔ lɛ subaŋ henɔ ko kɛ loofɔji kɛ kooloi naji-ejwɛjwɛtsɛmɛi, kɛ waamɔ nibii anɔ.” Amɛŋɔɔ “Nyɔŋmɔ anɔkwale lɛ amɛtsakeɔ amale, ni amɛjaa ni amɛsɔmɔɔ bɔɔ nɔ lɛ fe Bɔlɔ lɛ.” (Romabii 1:21-23, 25) Nakai nɔŋŋ eji yɛ sutsakemɔ he nilelɔi, ni yɛ anɔkwale mli lɛ amɛkɛ woo haa shishijee nibii bibii ni asusuɔ akɛ etamɔ kɔsɔŋkɔsɔ ko ni tsakeɔ kɛyaa hiɛ—gɔgɔmii-loo-kooloi ni hiɔ nu mli kɛ shikpɔŋ gbiŋ nɔwaamɔ nibii-kooloi ni haa fufɔ—“gbɔmɛi ni tamɔ aduŋ akaa” akɛ amɛ “bɔlɔ.” Shi amɛle jogbaŋŋ akɛ wala yibii kome ko bɛ ni jeɔ nɛkɛ kɔsɔŋkɔsɔ nɛɛ shishi. Nibii ni jeɔ wala shishi loo akɛbɔɔ wala ni ale jogbaŋŋ fe fɛɛ lɛ hiɛ atɔm akpekpei toi akpei oha, kɛ tsofai kɛ nui afutumɔ mli nifeemɔi sɔrɔtoi akpei abɔ ni yaa nɔ yɛ be kome too lɛ nɔŋŋ mli.
18, 19 (a) Namɔ ji Mɔ ni sa akɛ́ akɛ yijiemɔ haa lɛ akɛ lɛ eje wala shishi? (b) Yehowa adebɔɔ nibii lɛ mli enyiɛ wɔnyɛɔ wɔnaa?
18 Yehowa Nyɔŋmɔ ji wala Bɔlɔ lɛ. (Lala 36:10) Lɛji mɔ kpeteŋkpele ni Ha Nɔ Ko Ba Klɛŋklɛŋ. Egbɛi, Yehowa, lɛ shishi ji, “Ehaa ebaa mli.” Anyɛɛɛ akane enibɔɔ nii. Eka shi faŋŋ akɛ akpekpei abɔ yɛ ni gbɔmɔ leee. Lala 104:24, 25 gbalaa wɔjwɛŋmɔ kɛyaa fioo ko nɔ: “Yehowa, kwɛ bɔ ni onitsumɔi lɛ fa ha! Nilee okɛfee fɛɛ.” Hiob 26:14 yɛ faŋŋ yɛ enɛ he: “Naa, egbɛ́i lɛ anaabunaabui kɛkɛ nɛ, ni ehe ablɛbi fioo kɛkɛ wɔnuɔ nɛɛ. Shi ehewalɛ shimɔ lɛ, namɔ aaanu shishi?” Naabunaabui fioo ko pɛ wɔnaa, ehe ablɛbi fioo ko pɛ wɔnuɔ, shi wɔnyɛŋ wɔnu nɔ ni ehewalɛ kpeteŋkpele lɛ shimɔ tsɔɔ diɛŋtsɛ lɛ shishi.
19 Shi, wɔyɛ jɛɛhe kpakpa ni wɔɔtsɔ nɔ wɔna lɛ fe nibii ni ebɔ lɛ amli ni wɔɔtsɔ wɔna lɛ. Nakai jɛɛhe kpakpa lɛ ji e-Wiemɔ, ni ji Biblia lɛ. Wɔmiitsɔ wɔhe kɛmiiya nakai jɛɛhe lɛ he agbɛnɛ yɛ nikasemɔ ni nyiɛ sɛɛ lɛ mli.
Ani Okaiɔ?
◻ Mɛni Hiob kase beni Yehowa jɛ ahum mli ewie etsɔɔ lɛ lɛ?
◻ Mɛni hewɔ Paulo kɛɛ akɛ gbɔmɛi komɛi bɛ naajiemɔ ko lɛ?
◻ Te nu shibɔlemɔ lɛ tsuɔ nii ehaa tɛŋŋ?
◻ Hulu la kpɛmɔ tsuɔ mɛɛ nibii ni he hiaa kɛhaa wɔ?
◻ Mɛɛ jeŋ nilee mli anɔkwalei komɛi Biblia lɛ jie amɛ kpo dani jeŋ nilee kpa shi ena?