Aaatee Amɛ Shi—“Mɔfɛɛmɔ Yɛ Lɛdiɛŋtsɛ Egbɛhe Ni Salɛ”
“Aaaha mɛi fɛɛ aba wala mli yɛ Kristo mli; shi mɔfɛɛmɔ yɛ lɛdiɛŋtsɛ egbɛhe ni salɛ.”—1 Kor. 15:22, 23, The New English Bible.
1. Mɛɛ gbɛ nɔ Marta tsɔɔ yɛ akɛ eheɔ eyeɔ akɛ kulɛ Yesu aaanyɛ atsa enyɛminuu Lazaro hela ni gbele lɛ?
1 GBI ko leebi yɛ fei-be mli yɛ Betania lɛ, atsi tɛ ko akɛtsĩ Lazaro ni alelɛ jogbaŋŋ lɛ kaimɔ gbonyobu lɛ naa. Enyɛmimɛiyei ni eshi yɛ esɛɛ ni ji Marta kɛ Maria, kɛ amɛweku lɛ he gbɔmɛi lɛ susu akɛ amɛnaŋ Lazaro dɔŋŋ yɛ nibii agbɛjianɔtoo nɛɛ mli. Ebafee tamɔ nɔni Lazaro naanyo ni esumɔɔ waa ni ji Yesu Kristo lɛ baaa mra ejaakɛ ebashɛ shi yɛ Lazaro gbele sɛɛ gbi ni ji ejwɛ lɛ nɔ. Marta je kpo ekɛ Yesu yakpe, ni ekɛɛlɛ akɛ: “Nuntsɔ, eji oyɛ biɛ kulɛ, minyɛmi lɛ naaa agbo.”
2, 3. (a) Marta kpa gbɛ akɛ enyɛminuu ni afulɛ lɛ shitee lɛ aaaba yɛ mɛɛ gbi nɔ? (b) Yɛ gbohiiashitee gbɛfaŋ lɛ, Marta tsɔɔ mɛɛ eblematsɛ ko hemɔkɛyeli lɛ eko nɔŋŋ?
2 Yesu kɛɛ Marta akɛ: “Onyɛminuu lɛ baate shi.” Marta tsɔɔ hemɔkɛyeli ni eyɔɔ yɛ gbohiiashitee lɛ mli lɛ, ni ekɛɛ Yesu akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.”—Yoh. 11:1-24.
3 Marta miisusu adesai ni egboi lɛ fɛɛ ashitee kɛmiiba wala mli ekoŋŋ yɛ shikpɔŋ nɛɛ nɔ yɛ Nyɔŋmɔ maŋtsɛyeli ni e-Mesia loo Kristo Iɛ baakwɛ nɔ lɛ shishi lɛ he. Ehé eye akɛ Yesu ji Mesia lɛ diɛŋtsɛ, mɔni teé mɛikrokomɛi ashi kɛba wala mli ekoŋŋ tamɔ bɔni gbalɔi Elia kɛ Elisha fee mra mli afii ohai babaoo ni eho lɛ. (Yoh. 11:27) Hemɔkɛyeli ni eyɔɔ yɛ gbohiiashitee mli lɛ tamɔ eblematsɛ Abraham nɔ̃ lɛ nɔŋŋ, mɔni abatsɛlɛ akɛ “Nyɔŋmɔ shieŋtsɛ” lɛ. (Yak. 2:21-23) Marta nyɛminuu Lazaro egbo ni afulɛ momo, shi yɛ Abraham gbɛfaŋ lɛ, ebi Isak yɛ wala mli ni kpaako ekɛlɛ yaashã afɔle. Shi etamɔ nɔni Isak egbo nɔŋŋ moŋ, ejaakɛ Abraham etswa efai shi akɛ ebaaye Yehowa famɔ akɛ ekɛlɛ ashã afɔle lɛ nɔ. Paulo ni eji Abraham seshinyo lɛ ŋma yɛ hemɔkɛyeli ni Abraham tsɔɔ yɛ nakai kaa lɛ mli lɛ he, ni ekɛɛ:
4. Te ebalɛ eha tɛɛŋ ni Abraham nine shɛ ebinuu Isak nɔ kɛjɛ gbohii ateŋ ‘yɛ mfonirifeemɔ gbɛ nɔ’ lɛ?
4 “Hemɔkɛyeli naa Abraham ŋɔ Isak eyashã afɔle, beni akalɛ lɛ, ni ekɛ ebi kome lɛ ba ebaha, beni enine eshɛ shiwoi lɛ anɔ momo lɛ, lɛ mɔni akɛɛlɛ akɛ: ‘Isak mli aaatsɛ oseshi yɛ’ lɛ; ejaakɛ ebu akɛ Nyɔŋmɔ yɛ hewalɛ ni ekɛ aaateelɛ shi kɛaajɛ gbohii ateŋ tete, ni lɛɛlɛŋ, enine shɛ enɔ nakai ekoŋŋ.”—Heb 11:17-19; 1 Mose 22:1-18; Yes. 41:8; 2 Kron. 20:7.
5, 6. (a) Abraham kpa gbɛ akɛ adesai ni egboi lɛ ashitee lɛ baaba mɛɛbe? (b) Ani Abraham, Isak kɛ Yakob anine ni shɛɛɛ nibii ni awo he shi lɛ anɔ dani amɛgboi lɛ fite hemɔkɛyeli ni amɛyɔɔ yɛ Nyɔŋmɔ Mesia maŋtsɛyeli lɛ mli lɛ?
5 Nohewɔ lɛ Abraham yɛ hemɔkɛyeli yɛ adesai agbohii ni abaatee amɛ shi yɛ Kristo maŋtsɛyeli shishi lɛ mli. Yesu Kristo, mɔni lsak shitee lɛ fee lɛdiɛŋtsɛ eshitee lɛ he mfonri kɛtsɔ hiɛ, lɛ kɛɛ Abraham seshibii ni ji Yudafoi lɛ gbi ko akɛ: “Nyɛtsɛ Abraham mli fililɛ akɛ eeena migbi lɛ, ni ena ni emii shɛ.” (Yoh. 8:56) Yɛ nɔni Yesu kɛɛ yɛ Abraham, mɔni ji Isak tsɛ kɛ Yakob nìi he lɛ kɛ gbeekpamɔ naa lɛ, wɔkaneɔ akɛ:
6 “Hemɔkɛyeli mli mɛnɛɛmɛi fɛɛ gboi yɛ, tsɛ amɛnine shɛko nii ni awo shi lɛ anɔ, shi moŋ shɔŋŋ kɛkɛ amɛna yɛ, ni amɛkɛshɛje amɛmii, ni amɛnya he, ni amɛjaje akɛ gbɔi kɛ mɛikpɔji ji amɛ yɛ shikpɔŋ lɛ nɔ. Ejaakɛ mɛi ni wieɔ nakai nibii lɛ, amɛtsɔɔ faŋŋ akɛ amɛmiishwe amɛdiɛŋtsɛ amɛmaŋ. . . . Shi agbɛnɛ lɛ amɛmiitao maŋ ni hi fe no, ni ji ŋwɛi nɔ̃ [ŋwɛi maŋtsɛyeli ni Kristo yeɔ maŋtsɛ yɛ mli] lɛ. Nohewɔ lɛ efeee Nyɔŋmɔ hiɛgbele akɛ aaatsɛlɛ amɛ-Nyɔŋmɔ, ejaakɛ esaa maŋ eto amɛ.”—Heb. 11:13-16.
7, 8. (a) Mɛɛ gbɛ nɔ nɔni Yesu kɛɛ Sadukifoi lɛ yɛ Abraham, Isak, kɛ Yakob ahe lɛ ye odase etsɔɔ amɛ akɛ blematsɛmɛi nɛɛ yɛ gbohiiashitee nɔmimaa lɛ? (b) Yɛ Lala 45:17 kɛ gbeekpamɔ naa lɛ mɛni Mesia lumɔ ni baaye nɔ yɛ ŋwɛi nɔyeli lɛ mli lɛ baafee eha Abraham Isak kɛ Yakob?
7 Akɛni Nyɔŋmɔ eto gbɛjianɔ ko eha Abraham, Isak, kɛ Yakob ni egboi jeeŋmɔ lɛ hewɔ lɛ, nakai blemabii ni yɔɔ hemɔkɛyeli lɛ baana gbohiiashitee bɔfɛɛbɔ ni fee yɛ “maŋ,” aloo nɔyeli ni Mesia loo Kristo ni awo ehiɛ nyam lɛ yeɔ lumɔ yɛ mli lɛ shishi. Yesu Kristo diɛŋtsɛ ha anɔkwasane nɛɛ je kpo yɛ saneko ni ekɛ Yudafoi Sadukifoi ni heee yeee akɛ Abraham, Isak, kɛ Yakob baana gbohiiashitee lɛ gba lɛ mli. Ekɛɛ: “Gbohiiashitee lɛ mli lɛ amɛwɛɛɛ yei, ni asaŋ akɛ yei haaa gbalã; shi moŋ amɛtamɔ Nyɔŋmɔ bɔfoi [shi jeee: amɛji Nyɔŋmɔ bɔfoi] yɛ ŋwɛi. Shi gbohiiashitee lɛ hewɔ lɛ, [ani] nyɛkaneko nɔni Nyɔŋmɔ kɛɛ nyɛ akɛ: ‘Mi lɛ, Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ ji mi lɛ’? Nyɔŋmɔ lɛ jeee gbohii a-Nyɔŋmɔŋ, shi moŋ hiɛkaalɔi a-Nyɔŋmɔŋ.”—Mat. 22:30-32.
8 Yehowa ji Abraham, Isak, kɛ Yakob a-Nyɔŋmɔ dani amɛgboi. Ja eteé Abraham, Isak, kɛ Yakob ashi kɛjɛ gbohiiaje dani eeenyɛ etsɔ amɛ-Nyɔŋmɔ akɛ hiɛkaalɔi. Amɛbaatsɔmɔ mɛi ni baahi shikpɔŋ nɛɛ nɔ yɛ nakai “maŋ” aloo ŋwɛi nɔyeli ni Yehowa ni ji amɛ-Nyɔŋmɔ lɛ esaa eto amɛ lɛ shishi. No baawo Lala 45:17 obɔ koni Mesia ni awo ehiɛ nyam ni ji Yesu ni yeɔ nakai “maŋ” lɛ nɔ lɛ ahala amɛ akɛ “lumɛi” yɛ shikpɔŋ lɛ nɔ fɛɛ. Ŋwɛi Mesia lɛ baaha sablai ni akɛwolɛ ni agba ato yɛ Yesaia 9:5 lɛ fɛɛ, kɛ Naanɔ Tsɛ sabla lɛ hu aba mli yɛ emli yɛ amɛteŋ mɔfɛɛmɔ gbɛfaŋ
9. Mɛni gbalɔ Yesaia ŋma efɔ̃ shi yɛ adesai ni egboi lɛ ashitee lɛ he; ni no baaba beni Nyɔŋmɔ elomɔ mɛni?
9 Abaatee Abraham, Isak, kɛ Yakob, kɛ blemabii krokomɛi ni yɔɔ hemɔkɛyeli lɛ ashi yɛ “naagbee gbi” ni Marta wie he etsɔɔ Yesu dani Yesu teé enyɛminuu Lazaro shi kɛba wala mli, lɛ nɔ. (Yoh. 11:24-44) Akpɔ̃ adesai ni abaatee amɛ shi lɛ kɛtsɔ Yesu Kristo kpɔmɔ afɔle lɛ nɔ, ni gbalɔ Yesaia jɛ Nyɔŋmɔ mumɔ mli eŋma yɛ mɛnɛɛmɛi ahe akɛ: “Nakai gbi lɛ nɔ lɛ aaala lala nɛɛ yɛ Yuda shikpɔŋ lɛ nɔ akɛ: omɛi ni egboi lɛ ahiɛ aaakamɔ, migbohii lɛ aaate shi. Nyɛhiɛ atsɛ̃a, nyɛlaã yijiemɔ lalai, nyɛ mɛi ni nyɛyɔɔ sũ mli lɛ! Shi obɔ́ lɛ, la bɔ́ ni, ni shikpɔŋ lɛ aaajie [mɛi ni egboi ni amɛbɛ hewalɛ ko kwraa] lɛ ashwie.” (Yes. 26:1, 19) Nohewɔ lɛ abaasaa afɔ shikpɔŋ nɛɛ nɔ gbohii lɛ ekoŋŋ aloo akɛ abaafee amɛ ehee. Enɛ baaba beni Yehowa ekojo je ni yeɔ lá yi sɔ̃ nɛɛ yɛ mɛi ni efeko nɔko kwraa ni aha amɛbote Sheol loo gbohiiaje be mli ni eshɛko amɛgbele be, lɛ fɛɛ ahewɔ. Enɛ baaba yɛ “Nyɔŋmɔ Ofe lɛ gbi wulu lɛ nɔ ta” ni abaawuu yɛ shihilɛ ko ni aaaba je nɛɛ mli ni Biblia lɛ tsɛɔlɛ Harmagedon lɛ mli lɛ sɛɛ.—Kpoj. 16:14, 16; 19:11-21.
10. Nohewɔ lɛ yɛ nakai “naagbee gbi” lɛ nɔ lɛ mɛni hewɔ shikpɔŋ nɛɛ ebafeŋ fuuhe kutruku agbo ko ni tsotsoro shi ekɛ dɔŋŋ lɛ?
10 Nohewɔ lɛ yɛ nakai “naagbee gbi” ni Marta wie he lɛ nɔ lɛ, abaaha adesai ni egboi lɛ asaa aba wala mli ekoŋŋ yɛ najiaŋ ni amɛ aaahɔlɔ shikpɔŋ sũ lɛ mli. (Yes. 26:20, 21) Mɛɛ adesa wala hee ni bɔ́ enɛ eshwie nɔ fɔrɔfɔrɔ po nakai “naagbee gbi” lɛ kɛbaaha adesai ni akpɔ̃ amɛ nɛɛ! Shikpɔŋ nɛɛ ebafeŋ fuuhe kutruku agbo ko dɔŋŋ.
11, 12. Mɛɛ gbɛ nɔ Maŋtsɛ Herode Kpele lɛ nine nyɛ̀ shi yɛ, yɛ mɔdɛŋ ni ekɛ yiwalɛ bɔ akɛ egbe “Yudafoi amaŋtsɛ” ni afɔle eŋmɔŋ lɛ mli lɛ?
11 Akɛ hegbɛi ni baaha abifabii ni egboi kɛ gbekɛbii bibii ni tereee sɔ̃ ko lɛ anyɛ adara ni amɛtsɔmɔ oblahii kɛ oblayei ni amɛhi shi kɛya naanɔ yɛ Paradeiso shikpɔŋ ko nɔ lɛ, aaduro amɛ. Yɛ nakai gbɛ nɔ lɛ, abaajaje mɔgbee nitsumɔ ni Maŋtsɛ Herode Kpele lɛ batsu lɛ. Etsu ŋulamiiaŋkwɛlɔi ni jɛ Bokagbɛ lɛ kɛtee Betlehem koni amɛyatao heni “Yudafoi amaŋtsɛ” ni afɔle eŋmɔŋ lɛ yɔɔ amɛhalɛ. Eto ŋaa akɛ eeegbe Yesu ni ji oblayoo folo Maria, Yudanyo lɛ binuu lɛ. Beni Herode anine nyɛ̀ shi yɛ mɔdɛŋ ni ekɛ ŋaa fɔŋ bɔ koni ekɛle heni mɔni baatsɔ “Yudafoi amaŋtsɛ” lɛ yɔɔ lɛ mli lɛ, otsu esraafoi ni amɛyagbe gbekɛbii fɛɛ ni yeko afii enyɔ. Agba yara ni biianyɛmɛi ni agbe amɛbii lɛ wo lɛ he sane ato yɛ Biblia gbalɛ mli, ni akɛ gbohiiashitee he miishɛjemɔ wiemɔi hu fata he.
12 Sanekpakpa ŋmalɔ Mateo kɛɔ wɔ akɛ: “Nɛkɛ nɔni gbalɔ Yeremia kɛɛ lɛ ba mli akɛ: ‘Anu gbee yɛ Rama, ŋkɔmɔyeli kɛ yaafo kɛ yarafeemɔ babaoo: Rahel miifo ebii, ni ekpɛlɛɛɛ kpatamɔ; ejaakɛ amɛbɛ.’” (Mat. 2:1-18) Shi Maria fataaa biianyɛmɛi ni foɔ ni amɛbolɔɔ lɛ ahe, ejaakɛ ekɛ gbekɛ Yesu ejo foi kɛtee Mizraim momo, koni eyahi jɛi kɛyaashi Herode aaagbo.
13. Yɛ bɔni Mateo kɛ Yeremia gbalɛ lɛ tsu nii eha lɛ naa lɛ, mɛni ji nakai “henyɛlɔ lɛ shikpɔŋ” ni gbekɛbii bibii ni efeko nɔko ni agbe amɛ efolo lɛ baaku amɛsɛɛ kɛjɛ nɔ kɛba lɛ?
13 Kɛlɛ hiɛnɔkamɔ ko yɛ kɛha biianyɛmɛi ni amɛbii egboi lɛ. Yeremia gbalɛ ni Mateo tsɛ̃ wiemɔi kɛjɛ mli lɛ tee nɔ ekɛɛ: “Bɔni Yehowa kɛɛ nɛ: Tsĩi ogbee naa ni okafo, kɛ ohiŋmɛii hu ni yaafonu akaje mli; ejaakɛ abaawo onitsumɔ lɛ he nyɔmɔ kɛ̃, Yehowa kɛɛ, ni amɛ aaaku amɛsɛɛ kɛaajɛ henyɛlɔ lɛ shikpɔŋ lɛ nɔ.” (Yer. 31:15, 16) Yɛ bɔni Mateo jɛ Nyɔŋmɔ mumɔ mli ekɛ Yeremia gbalɛ lɛ tsu nii eha lɛ naa lɛ, “henyɛlɔ lɛ shikpɔŋ lɛ” efeŋ Babilon ni yɔɔ yɛ Yeremia gbii anɔ lɛ. No baafee shikpɔŋ heni henyɛlɔ ni ji Herode Kpele lɛ ha mɛi ni agbe amɛ be mli ni eshɛko amɛgbele be lɛ tee ni ji gbohiiaje lɛ. Awieɔ gbele he akɛ “henyɛlɔ” hu ejaakɛ 1 Korintobii Awolo 15:26 kɛɔ akɛ: “Naagbee henyɛlɔ ni abaafo esɛɛ ji gbele.”
14. (a) Mɛɛ gbɛ nɔ Babilon shikpɔŋ lɛ batsɔ heko ni gbele yɔɔ kɛha Israelbii lɛ yɛ, yɛ Yeremia gbii lɛ anɔ? (b) Te Betlehem abifabii ni efeko nɔko lɛ aaafee tɛɛŋ ‘amɛku amɛsɛɛ’ hu; ni mɛɛ gbi nɔ amɛ aaafee nakai?
14 Babilon bafee hé ni mɛi ni baŋɔ Yudafoi lɛ nom lɛ loó amɛ kɛtee akɛ “gbelebii” lɛ. Nomii nɛɛ ateaŋ mɛi pii gboi lɛɛlɛŋ yɛ jɛmɛ akɛ gbɔi. (Lala 79:11; 102:20; Yes. 14:17) Yɛ afi 537 D.Ŋ.B. mli kɛ no sɛɛ lɛ, Yudafoi “nomii” akpei abɔ ‘ku amɛsɛɛ’ lɛɛlɛŋ kɛjɛ henyɛlɔ ni ji Babilon lɛ shikpɔŋ nɔ. Betlehem abifabii ni efeko nɔko lɛ asɛɛkuu lɛ nako aba. No baaba kɛtsɔ “naagbee gbi” lɛ nɔ gbohiiashitee ni Marta ni jɛ Betania lɛ tsĩ tã lɛ nɔ; “naagbee gbi” ni jeɔ shishi yɛ “Nyɔŋmɔ Ofe lɛ gbi wulu lɛ nɔ ta” ni abaawuu yɛ Harmagedon lɛ sɛɛ be mli ni afimɔ Satan Abonsam kɛ ebɔfoi daimonioi lɛ ni akɛ amɛ ewo bu kwɔŋkwɔŋ lɛ mli lɛ.—Kpoj. 20:1-3, 11-15.
KOJOMƆ GBI KO
15. Mɛɛ gbɛ nɔ Yesu tsɔɔ yɛ akɛ “naagbee gbi” lɛ baafee gbi nɔ ni abaakojo adesai ni egboi ni atee amɛ shi lɛ?
15 Nakai “naagbee gbi” lɛ nɔŋŋ aaafee kojomɔ gbi ko kɛha adesai ni aaatee amɛ shi kɛ adesai ni ku amɛhiɛ amɛfɔ̃ Yesu nɔ ni amɛmɔɔɔ ewiemɔ lɛ mli hu lɛ. Yesu tsɔɔ enɛ ni ekɛɛ: “Mɔni kwaa mi ni emɔɔɔ miwiemɔi lɛ amli lɛ, eyɛ mɔko ni kojoɔlɛ; wiemɔ ni miwie lɛ, no nɔŋŋ aaakojolɛ yɛ naagbee gbi lɛ nɔ.” (Yoh. 12:48) Yesu kɛ be, nɔ̃ mli ni abaakojo adesai aje lɛ tsa gbohiiashitee lɛ nɔ, ni ekɛɛ: “Ni [Nyɔŋmɔ] ehalɛ hegbɛ akɛ ekojo hu, ejaakɛ Gbɔmɔbi jilɛ. Enɛ akafee nyɛ naakpɛɛ; ejaakɛ ŋmlɛtswaa lɛ miiba, nɔ̃ mli ni mɛi fɛɛ ni yɔɔ gbohiiabui lɛ amli lɛ aaanu egbee, ni amɛ aaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.” (Yoh. 5:27-29; kwɛmɔ March 1, 1979 Buu-Mɔɔ mli yɛ sane ni ji “Wala Gbohiiashitee kɛ Kojomɔ Gbohiiashitee” ni yɔɔ bf. 18-21 Iɛ mli.) Shi nakai “naagbee gbi” lɛ ebafeŋ ŋmlɛtswai nyɔŋmai-enyɔ kɛ ejwɛ gbi. Ebaafee be ko ni sɛɛjɛkɛmɔ ji afii 1,000. No kɛ Kristo nɔyeli afii 1,000 lɛ baanyiɛ pɛpɛɛpɛ.—2 Pet. 3:8; Kpoj. 20:4, 6.
16. Mɛɛ yiŋtoo hewɔ nakai kojomɔ “gbi” ni baa lɛ aaafee gbi ko ni hiɛ yɔɔ nyam taakɛ atsɔɔ yɛ 1 Korintobii Awolo 15:25 kɛ 26 lɛ?
16 Nakai “gbi” lɛ baafee nɔni hiɛ yɔɔ nyam, ejaakɛ no mli abaajie hewalɛi fɛɛ ni gbele ni wɔ fɛɛ wɔná kɛjɛ Adam kɛ Hawa ŋɔɔ yɛ gbele fɔbuu ni akɛba amɛnɔ hewɔ, lɛ ena yɛ wɔnɔ lɛ kɛya. Nohewɔ lɛ Kristo nɔyeli afii 1,000 lɛ ji nɔko ni sa akɛ wɔ fɛɛ wɔkpaa gbɛ, ejaakɛ aŋma yɛ 1 Korintobii Awolo 15:25 kɛ 26 akɛ: “Ja eye maŋtsɛ kɛyashi beyinɔ ni eeeŋɔ henyɛlɔi lɛ fɛɛ eto enaji ashi. Naagbee henyɛlɔ ni abaafo esɛɛ ji gbele [ni wɔná kɛjɛ Adam dɛŋ lɛ].”
17. Kɛji mɔko gbo yɛ nakai kojomɔ “gbi” jɛ sɛɛ lɛ mɛni hewɔ eeebalɛ nakai; ni mɛɛ gbele ji nɔni no aaaji?
17 Nɔni Yesu tsɔ bɔfo Yohane nɔ ni eŋma efɔ̃ shi lɛ feɔ gbele ni wɔna kɛjɛ Adam dɛŋ lɛ hiɛkpatamɔ he mfoniri. Kpojiemɔ 20:13 kɛ 14 wieɔ “naagbee gbi” kɛha adesai agbohii ashitee lɛ he, ni ekɛɔ akɛ: “Ni ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha; ni akojo amɛ, mɔfɛɛmɔ bɔni sa enitsumɔi lɛ. Ni gbele kɛ gbohiiaje lɛ, ashɛrɛ amɛ ashwie la kpaakpo lɛ mli. Enɛ ji gbele ni ji enyɔ lɛ, la kpaakpo lɛ nɛ.” Nohewɔ lɛ mɔni yɔɔ shikpɔŋ nɔ ni eeegbo yɛ enɛ sɛɛ lɛ, jeee gbele ni ena kɛjɛ Adam dɛŋ lɛ hewɔ eeegbo. Eeegbo ejaakɛ eje gbɛ eku Nyɔŋmɔ mla mli ni efee esha. Nohewɔ lɛ egbele lɛ aaafee “gbele ni ji enyɔ” nɔ̃ mli ni enaŋ shitee kɛjɛŋ kɔkɔɔkɔ lɛ.
18. Mɛɛ gbele nɛkɛ kɛ no mli hewalɛi ashishi Yesu Kristo kpoɔ adesai kɛjeɔ lɛ; ni nohewɔ lɛ mɛni eji kɛha amɛ?
18 Yesu Kristo kpɔ̃ɔ adesai kɛjɛɔ Adam gbele kɛ wɔ fɛɛ wɔgbonyobu ni ji Haʹdes lɛ pɛ amli. Ema enɛ nɔ mi eha wɔ ni ekɛɛ: “Miji Klɛŋklɛŋmɔ lɛ kɛ Naagbeemɔ lɛ kɛ hiɛkaalɔ lɛ; . . . ni mihiɛ gbohiiaje kɛ gbele [Ha’des] naa samfei lɛ.” (Kpoj. 1:17, 18) Nohewɔ lɛ Yesu kɛ yiŋtoo kpakpa ko kɛɛ Marta akɛ: “Mi lɛ miji shitee lɛ kɛ wala lɛ.”—Yoh. 11:25.
19. Mɛɛ nuu ko ni hé gbɛi waa yɛ etsuishiŋmɛɛ hewɔ lɛ baafata mɛi ni aaatee amɛ shi lɛ ahe kɛba lɛ; ni eeekã shi dioo yɛ Sheol kɛyaashi mɛɛbe?
19 Mɛi ni Maŋtsɛ Yesu Kristo ni yeɔ nɔ lɛ kɛ Ha’des [aloo Sheol, yɛ Hebri wiemɔ mli] lɛ naa samfee lɛ baatsu amɛhe nii Iɛ ateŋ mɔkome ji nuu ko ni hé gbɛi waa yɛ tsuishiŋmɛɛ hewɔ lɛ. Mɔnɛ ji Hiob ni hi shi yɛ Uz shikpɔŋ lɛ nɔ yɛ blema Boka Teŋgbɛ lɛ. Yɛ jaramɔi ni faa yɛ wɔnɔ ŋmɛnɛ hewɔ lɛ, ekolɛ wɔteaŋ mɛikomɛi aaasusu tamɔ Hiob ni wɔshwe akɛ wɔɔɔgboi ni afu wɔ yɛ Haʹdes aloo Sheol moŋ. Shi esa akɛ wɔna nɔni Hiob yɔɔ lɛ eko, ni no ji gbohiiashitee lɛ mli hemɔkɛyeli. Ele akɛ kɛji no ba yɛ “naagbee gbi” lɛ nɔ lɛ, ebaaye ehe kɛjɛ naagbai ni adesai kɛkpeɔ amrɔ nɛɛ fɛɛ amli. Kɛji ewɔ yɛ gbele mli ni afulɛ lɛ, eeejɔɔ ehe kɛyaashi “ŋwɛi” loo hewalɛi ni fe adesai anɔ̃ ni kudɔɔ gbɔmɛi abii amrɔ nɛɛ bɛ dɔŋŋ. Kɛ́ nomɛi ho amɛtee lɛ, ebaaha abɔi shikpɔŋ nɛɛ nɔ saamɔ yɛ gbɛ ko ni hiɛ yɔɔ nyam nɔ. Nohewɔ lɛ Hiob sɔle ekpa Yehowa Nyɔŋmɔ fai akɛ:
20. Taakɛ Hiob 14:12-15 tsɔɔ lɛ, Hiob sɔle ekpa Nyɔŋmɔ fai kɛha mɛni?
20 “Nakai nɔŋŋ gbɔmɔ kãa shi ni eteee shi . . . ni asaŋ atsĩɛŋ amɛhiɛ kɛjɛŋ amɛwɔ lɛŋ. Mina ni kulɛ oŋɔ mi otee yɛ gbohiiaje [ni ji Sheol], ni oŋɔ mi ohɔ shi kɛyashi beyinɔ ni omlifu lɛ aaaho, ni oto be oha mi ni okai mi! Kɛji gbɔmɔ gbo lɛ, ani ehiɛ aaakã ekoŋŋ? Kulɛ mitawuu gbii [ni ba yɛ efɔŋfeemɔ ni Nyɔŋmɔ eŋmɛ gbɛ akɛ eya nɔ lɛ hewɔ] lɛ amli fɛɛ lɛ makwɛ gbɛ kɛyashi beyinɔ ni mitsakemɔ lɛ aaaba! Kulɛ oootsɛ, ni mahereo nɔ; ni oootao oninenaa nitsumɔ lɛ sɛɛgbɛ.”—Hiob 14:12-15.
21. Mɛɛ hiɛtsakemɔ Hiob tao akɛ ena; ni mɛni ekpa gbɛ akɛ ‘ekpɔlɔ lɛ’ baafee ehalɛ?
21 Yɛ Hiob amanehulu lɛ mli lɛ, enaaa akɛ Nyɔŋmɔ miikwɛlɛ kɛ tsuijurɔ. Ani ŋmɛnɛ, yɛ naagbai komɛi ni Nyɔŋmɔ ŋmɛɔ gbɛ ni amɛbaa wɔnɔ hewɔ lɛ, wɔsusuɔ akɛ ebɛ wɔhe miishɛɛ, ni wɔmiitao ni Yehowa aŋmɔ atsɔɔ wɔ? Yɛ “naagbee gbi” ni baa lɛ nɔ lɛ, abaatee adesai ni egboi lɛ ashi kɛjɛ Sheol loo Haʹdes, ni anɔkwasane nɛɛ kɛkɛ aaatsɔɔ akɛ Nyɔŋmɔ yɛ adesai ni akpɔ̃, amɛ lɛ ahe tsui. Hiob hé eye akɛ abaatee ekɛ adesai krokomɛi ashi ejaakɛ “kpɔlɔ” ko yɛ, mɔko ni baaŋɔ kpɔmɔ jara eha koni akɛkpɔlɛ kɛjɛ ‘tawuu gbii’ ni ahɔ̃ɔlɛ awo mli lɛ amli.
22, 23. (a) Mɛni mli nɔmimaa ni Hiob ná hewɔ ehé eye akɛ mɔko baaba ni baaha ateelɛ shi lɛ? (b) Mɛɛbe mli Hiob kpa gbɛ akɛ ‘ekpɔlɔ’ lɛ baaba; ni namɔ tsuijurɔ Hiob kpa gbɛ akɛ eeena?
22 Yɛ mɛi ni bamale amɛfɔlɔ Hiob naa fɛɛ sɛɛ lɛ, eyɛ nɔmimaa yɛ lɛdiɛŋtsɛ enɔkwa ni eyeɔ Yehowa lɛ mli. Nohewɔ lɛ ehé eye akɛ ebaana ‘kpɔlɔ’ ko kɛ̃. Nɛkɛ ‘kpɔlɔ’ nɛɛ baaba yɛ Hiob gbele sɛɛ, shi Hiob baashi lɛdiɛŋtsɛ ehe sanekpakpa efɔ̃ shi eha nɛkɛ kpɔlɔ nɛɛ koni ekwɛ mli. Yɛ nɔmimaa ni eyɔɔ akɛ nɛkɛ ‘kpɔlɔ’ nɛɛ baaha gbohiiashitee aba hewɔ lɛ, Hiob jaje akɛ:
23 “Mile akɛ mikpɔlɔ lɛ hiɛ kã, ni naagbee lɛ eeedamɔ sũ nɔ; ni kɛji akpata mihewolo hiɛ nɛkɛ sɛɛ, ni heloo bɛ mihe lɛ, mana Nyɔŋmɔ! Lɛ nɔŋŋ makwɛ maha mihe, ni mihiŋmɛii aaanalɛ, ni jeee mɔkpɔŋ ko! Misabai miitã yɛ mimli,” yɛ bɔni gbɛkwɛmɔ lɛ da eha lɛ sɔŋŋ hewɔ.—Hiob 19:25-27.
24. Te tee tɛɛŋ ni ‘kpɔlɔ’ ni Nyɔŋmɔ ŋɔ eha lɛ batsɔ adesai awekunyo hu; ni mɛni ji nɔni mɔnɛ ŋɔ eha “yɛ mɛi pii akpɔmɔ hewɔ” Iɛ?
24 Nohewɔ lɛ Satan Abonsam baanyɛ eya nɔ egbe adesai ahe guɔ akɛ mɛi ni gbohiiashitee esaaa amɛ ejaakɛ amɛnyɛɛɛ ni amɛna hii kɛ yei komɛi yɛ amɛteŋ ni baaye Nyɔŋmɔ anɔkwa. Shi abaatee adesai ni egboi lɛ ashi kɛ̃ yɛ “naagbee gbi” ni Marta ni jɛ Betania lɛ wie he lɛ nɔ. Mɛni hewɔ? Ejaakɛ Nyɔŋmɔ mɔni nyɛɔ nii fɛɛ efeɔ lɛ eŋɔ ‘kpɔlɔ’ ni ji e-Bi koome ni batsɔ adesai awekunyo akɛni afɔlɛ akɛ gbɔmɔ ni eye emuu hewɔ lɛ eha. Ebaje shikpɔŋ nɛɛ nɔ bekukuoo ko, jeee koni asɔmɔlɛ, shi moŋ koni “eŋɔ esusuma [ni ji adesai asusuma] lɛ eha yɛ mɛi pii akpɔmɔ hewɔ.” (Mat. 20: 28; Mar. 10:45) Enɛ gbele gbɛ eha Nyɔŋmɔ koni eha hegbɛ akɛ atee mɛi fɛɛ ni Yesu Kristo afɔleshaa gbele lɛ kpɔ̃ lɛ ashi.
25. Mɛni hewɔ nakai “naagbee gbi” lɛ ebafeŋ naagbee gbi ni adesai kɛaahi wala mli lɛ: ni yɛ nakai “gbi” lɛ nɔ lɛ, mɛni Nyɔŋmɔ baafee eha adesai?
25 Nohewɔ lɛ “naagbee gbi” lɛ etsɔɔɔ naagbee gbi ni adesai kɛbaahi wala mli, ejaakɛ adesai ni akpɔ̃ amɛ lɛ ashitee baaba yɛ nakai “gbi” lɛ nɔ yɛ Kristo afii akpe nɔyeli lɛ mli. Enɛ baafee “naagbee gbi” yɛ gbii krokomɛi fɛɛ ni tsɔ no hiɛ, nɔ̃ nɔ ni Nyɔŋmɔ ha esha kɛ gbele ye adesai anɔ ni adesai akpe toi akpei abɔ tee shikpɔŋ sũ mli yɛ Sheol loo Ha’des lɛ, asɛɛ. Nakai “gbi” lɛ nɔ Nyɔŋmɔ baakojo akɛ adesai fɛɛ eye amɛhe kɛjɛ eshai ni amɛ́fee kɛho lɛ amli, ni etsɔɔ amɛ ejalɛ taomɔnii ni baaha amɛna naanɔ wala yɛ Paradeiso ni asaa akɛba shikpɔŋ nɛɛ nɔ lɛ mli lɛ.—Yes. 26:9; Rom. 6:7.
26. (a) Mɛni ji Kristo ‘diɛŋtsɛ gbɛhe ni salɛ’ yɛ gbohiiashitee gbɛfaŋ lɛ? (b) Mɛɛ gbɛ nɔ 1 Tesalonikabii Awolo 4:16 tsɔɔ yɛ akɛ abaatee mɛikrokomɛi hu ashi yɛ bɔni amɛgbɛnaa loo amɛgbɛhe he hiaa eha lɛ naa Iɛ?
26 Nohewɔ lɛ ehe bahia akɛ ‘kpɔlɔ’ lɛ agbo ni ateelɛ shi hu beni afee ni adesai ni ebiɔ ni akpɔ amɛ lɛ hu ana gbohiiashitee. Yɛ nɛkɛ gbɛ nɔ lɛ, Kpɔlɔ Yesu Kristo shitee lɛ bafee nɔni hiɛ klɛŋklɛŋ gbɛhe. Ateelɛ shi “yɛ lɛdiɛŋtsɛ egbɛhe ni salɛ” kɛji aawie bɔni ehe hiaa eha lɛ he lɛ. Agbɛnɛ hu abaatee mɛikrokomɛi ashi yɛ bɔni shitei sɔrɔtoi lɛ ahe hiaa amɛha lɛ naa, dani agbɛnɛ atee Hiob kɛ Betlehem abifabii lɛ ashi, kɛ adesai krokomɛi ni egboi lɛ hu. Agbala wɔjwɛŋmɔ kɛba enɛ nɔ kɛtsɔ wiemɔi ni ajɛ Nyɔŋmɔ mumɔ mli aŋmala yɛ 1 Tesalonikabii Awolo 4:16 lɛ anɔ, ni jɛi kaneɔ akɛ: “Gbohii ni yɔɔ Kristo mli lɛ tsutsu baate shi.” Namɛi baana gbohiiashitee mli gbɛfaŋnɔ klɛŋklɛŋ, mɛɛbe no baaba, ni mɛɛ gbɛ nɔ ebaaba yɛ?a
[Shishigbɛ niŋmaa]
a Ajie kɛjɛ June 15, 1979 Blɔfo Buu-Mɔɔ lɛ mli.
[Mfoniri ni yɔɔ baafa 4]
Bo lɛ kwɛmɔ miishɛɛ ni aaana akɛ aaahere blema anɔkwafoi ni egboi lɛ atuu kɛaajɛ gbohiiaje, kɛ bɔni nyɛmɛi amii aaashɛ amɛhe amɛha akɛ amɛnine aaashɛ amɛbifabii ni Herode gbe amɛ lɛ anɔ ekoŋŋ lɛ!