“Yehowa, Nyɔŋmɔ Musuŋtsɔlɔ kɛ Durolɔ”

“Yehowa, Yehowa, Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii.”—2 MOSE 34:6.

 1. (a) Mɛɛ miishɛjemɔ Biblia lɛ kɛhaa mɛi ni naa bɔ ni amɛsuɔlɔi gbáa afã kɛjɛɔ jamɔ krɔŋŋ he lɛ? (b) Te Yehowa naa mɛi ni duɔ gbɛ lɛ ehaa tɛŋŋ?

“MIBIYOO lɛ kɛɛ mi akɛ esumɔɔɔ ni efee Kristofoi asafo lɛ mlinyo dɔŋŋ,” taakɛ Kristofonyo tsɛ ko kɛɛ lɛ. “Gbii, otsii, kɛ nyɔji babaoo sɛɛ po lɛ, minu piŋmɔ ni naa wa waa he yɛ migbɔmɔtsoŋ tɔ̃ɔ. Eyɛ dɔlɛ babaoo fe gbele.” Eji hejaramɔ diɛŋtsɛ akɛ aaana ní suɔlɔ ko egbá afã kɛjɛ jamɔ krɔŋŋ gbɛ lɛ nɔ. Ani oná niiashikpamɔ ni tamɔ nɛkɛ dã? Kɛ́ nakai lɛ, no lɛ eeefee miishɛjemɔ kɛha bo akɛ ooole akɛ Yehowa yɛ mlitsɔlɛ kɛha bo. (2 Mose 3:7; Yesaia 63:9) Shi te enaa mɛi ni duɔ gbɛ nɛɛ ehaa tɛŋŋ? Biblia lɛ tsɔɔ akɛ Yehowa kɛ mɔbɔnalɛ fɔ̃ɔ amɛ nine koni amɛbaná ehiɛ duromɔ ekoŋŋ. Ekpá Yudafoi atuatselɔi ni hi shi yɛ Maleaki gbii lɛ amli lɛ fai akɛ: “Nyɛkpalea kɛbaa miŋɔɔ! ni makpale kɛba nyɛŋɔɔ.”—Maleaki 3:7.

 2. Biblia lɛ tsɔɔ akɛ mɔbɔnalɛ ji Yehowa su kɛ baŋ lɛ fã ni he hiaa waa yɛ mɛɛ gbɛ nɔ?

² Ama Nyɔŋmɔ mɔbɔnalɛ lɛ nɔ mi aha Mose yɛ Sinai Gɔŋ lɛ nɔ. Yehowa jie lɛ diɛŋtsɛ ehe kpo yɛ jɛmɛ akɛ “Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii.” (2 Mose 34:6) Sanejajemɔ nɛɛ maa nɔ mi akɛ mɔbɔnalɛ ji Yehowa su kɛ baŋ lɛ fã ko ni he hiaa waa. ‘Eesumɔ akɛ mɛi fɛɛ atsake amɛtsui,’ taakɛ Kristofonyo bɔfo Petro ŋma lɛ. (2 Petro 3:9) Shi kɛlɛ, Nyɔŋmɔ mɔbɔnalɛ lɛ jeee nɔ ni husu bɛ he. “Ehaaa mɔ ko mɔ ko aŋɔ ehe aye kwraa,” taakɛ akɛɛ Mose lɛ. (2 Mose 34:7; 2 Petro 2:9) Shi kɛlɛ, “Nyɔŋmɔ lɛ, suɔmɔ ji lɛ,” ni mɔbɔnalɛ ji nakai su lɛ fã ni da waa diɛŋtsɛ. (1 Yohane 4:8; Yakobo 3:17) Yehowa “ehiɛŋ emlifu lɛ mli kɛyaŋ naanɔ,” ni “enáa mɔbɔnalɛ he tsui!”—Mika 7:18, 19.

 3. Mɛɛ srɔtofeemɔ anaa yɛ bɔ ni Yesu susuɔ mɔbɔnalɛ he ehaa lɛ kɛ woloŋmalɔi lɛ kɛ Farisifoi lɛ anɔ̃ lɛ teŋ?

³ Yesu ji eŋwɛi Tsɛ lɛ henɔ pɛpɛɛpɛ. (Yohane 5:19) Bɔ ni ekɛ efɔŋfeelɔi ye yɛ mɔbɔnalɛ mli lɛ etsɔɔɔ akɛ eku ehiɛ efɔ̃ eshai ni amɛfee lɛ anɔ, shi moŋ eji musuŋtsɔlɛ henumɔi ni ejie lɛ kpo etsɔɔ mɛi ni he yeɔ yɛ gbɔmɔtsoŋ lɛ nɔŋŋ kpojiemɔ. (Okɛto Marko 1:40, 41 he.) Hɛɛ, Yesu kɛ mɔbɔnalɛ fata Nyɔŋmɔ Mla lɛ mli “nii ni he jaraa” lɛ ahe. (Mateo 23:23) Nɔ ni tamɔɔɔ enɛ lɛ, susumɔ woloŋmalɔi lɛ kɛ Farisifoi lɛ, ni amɛmla saji ahe susumɔi ni kɔɔ jalɛsaneyeli he lɛ haaa hegbɛ ko kwraa kɛha mɔbɔnalɛ lɛ ahe okwɛ. Beni amɛna akɛ Yesu kɛ eshafeelɔi lɛ náa sharamɔ lɛ, amɛwie amɛshi lɛ akɛ: “Mɔnɛ ŋɔɔ eshafeelɔi ni ekɛ amɛ yeɔ nii.” (Luka 15:1, 2) Yesu kɛ abɛbuai etɛ, ní eko fɛɛ eko maa Nyɔŋmɔ mɔbɔnalɛ lɛ nɔ mi lɛ ha enaafolɔlɔi lɛ ahetoo.

 4. Mɛɛ abɛbuai enyɔ Yesu kɛha, ni mɛni ji oti ni yɔɔ eko fɛɛ eko mli?

⁴ Klɛŋklɛŋ lɛ, Yesu wie nuu ko ni shi etooi 99 koni eyatao ekome ni elaaje lɛ he. Mɛni ji oti ni etaoɔ etsɔɔ lɛ? “Miishɛɛ aaaba ŋwɛi yɛ eshafeelɔ kome ni tsakeɔ etsui lɛ hewɔ fe jalɔi nyɔŋmai nɛɛhu kɛ nɛɛhu ni tsuitsakemɔ ehiaaa amɛ lɛ.” No sɛɛ lɛ, Yesu wie yoo ko ni tao ejwiɛtɛi kuku kome ni laaje, ní ená miishɛɛ beni ena lɛ hu he. Te ekɛto he eha tɛŋŋ? “Miishɛɛ baa yɛ Nyɔŋmɔ bɔfoi lɛ ahiɛ yɛ eshafeelɔ kome ni tsakeɔ etsui lɛ hewɔ.” Yesu gba amɛ enɔkwɛmɔnɔ ni ji etɛ lɛ yɛ abɛbua mli.a Mɛi babaoo buɔ abɛbua nɛɛ akɛ saji kukuji ni ágba atsɔɔ dã lɛ ateŋ nɔ ni ŋɔɔ fe fɛɛ. Abɛbua nɛɛ hesusumɔ baaye abua wɔ ní wɔnu Nyɔŋmɔ mɔbɔnalɛ lɛ shishi jogbaŋŋ ní wɔkase hu.—Luka 15:3-10.

Binuu Atuatselɔ ko Shi Shia

 5, 6. Binuu fioo ni yɔɔ Yesu abɛbua ni ji etɛ lɛ mli lɛ jie trumufeemɔ ni yɔɔ naakpɛɛ kpo yɛ mɛɛ gbɛ nɔ?

⁵ “Nuu ko yɛ bihii enyɔ. Ni amɛteŋ gbekɛ lɛ kɛɛ etsɛ akɛ: Ataa, ha mi onii lɛ amli nɔ ni ji migbɛfaŋnɔ. Ni eja enii lɛ amli eha amɛ. Ni no sɛɛ lɛ yeee gbi ko kɛkɛ ni gbekɛ lɛ bua fɛɛ naa, ni edom etee maŋsɛɛ shɔŋŋ he ko, ni jɛi ekɛ nyenyeŋtswibɔlɔi yakpata enii lɛ ahiɛ yɛ.”—Luka 15:11-13.b

⁶ Binuu fioo lɛ jie trumufeemɔ ni yɔɔ naakpɛɛ diɛŋtsɛ kpo yɛ biɛ. Klɛŋklɛŋ lɛ, ebi ni akɛ egboshinii aha lɛ, kɛkɛ ni “ekɛ nyenyeŋtswibɔlɔi yakpata” fɛɛ hiɛ. Atsɔɔ wiemɔ ‘nyenyeŋtswibɔɔ’ lɛ shishi kɛjɛ Hela wiemɔ ni shishinumɔ ji “ahoshwibɔɔ shihilɛ” mli. Woloŋlelɔ ko kɛɔ akɛ wiemɔ lɛ “tsɔɔ jeŋba kpakpa shihilɛ ní aje gbɛ akpoo kwraa.” Bei pii lɛ, atsɛɔ obalanyo fioo ni yɔɔ Yesu abɛbua nɛɛ mli lɛ kɛ yiŋtoo kpakpa akɛ nyenyeŋtswibɔlɔ, ni ji wiemɔ ni tsɔɔ mɔ ko ni yɔɔ basabasa shihilɛ kɛ ŋɔɔmɔyeli kɛ nifitemɔ subaŋ.

 7. Namɛi tamɔ bi nyenyeŋtswi lɛ ŋmɛnɛ, ni mɛni hewɔ aŋkroaŋkroi nɛɛ ateŋ mɛi pii taoɔ heyeli yɛ “maŋsɛɛ shɔŋŋ he ko” lɛ?

⁷ Ani gbɔmɛi yɛ ŋmɛnɛ ni amɛtamɔ bi nyenyeŋtswi lɛ? Hɛɛ. Dɔlɛ sane ji akɛ, mɛi fioo komɛi eshi wɔŋwɛi Tsɛ, Yehowa “shia” ni yɔɔ shweshweeshwe lɛ amɛtee. (1 Timoteo 3:15) Mɛnɛɛmɛi ateŋ mɛi komɛi nuɔ he akɛ Nyɔŋmɔ we lɛ mli shihilɛ tsĩɔ mɔ naa tsɔ̃, ákɛ Yehowa hiŋmɛi ni kwɛɔ amɛ lɛ ji naatsii moŋ fe hebuu kɛha amɛ. (Okɛto Lala 32:8 he.) Susumɔ Kristofonyo yoo ko ní akɛ Biblia shishitoo mlai tsɔse lɛ, shi sɛɛ mli lɛ ekɛ ehe yawo dãatɔɔ kɛ tsofai fɔji kɛ nitsumɔ mli lɛ he okwɛ. Beni esusuɔ nakai eshihilɛ mli be fɔŋ ni eho lɛ he lɛ, ewie akɛ: “Miitao ni mamã nɔ mi akɛ manyɛ maná shihilɛ kpakpa maha mi diɛŋtsɛ mihe. Miitao mafee nɔ ni misumɔɔ ni mafee, ni misumɔɔɔ ni mɔ ko akɛɛ mi nɔ kroko.” Taakɛ bi nyenyeŋtswi lɛ ji lɛ, obalayoo nɛɛ hu tao heyeli. Awerɛho sane ji akɛ, eba lɛ akɛ esa akɛ ashwie lɛ kɛjɛ Kristofoi asafo lɛ mli, yɛ enifeemɔi ni kɛ ŋmalɛ kpãaa gbee lɛ ahewɔ.—1 Korintobii 5:11-13.

 8. (a) Mɛɛ yelikɛbuamɔ abaanyɛ akɛha mɛi ni sumɔɔ ni amɛhi shi yɛ gbɛ ni kɛ tɛi ni Nyɔŋmɔ efolɔ eshwie shi lɛ kpãaa gbee lɛ anɔ lɛ? (b) Mɛni hewɔ esa akɛ akɛ hiɛdɔɔ asusu nɔ ni ahalaa yɛ jamɔ he sane lɛ mli lɛ he jogbaŋŋ lɛ?

⁸ Eji tsuiŋ dɔlɛ sane lɛɛlɛŋ kɛji akɛ naanyo heyelilɔ ko jie lɛ kpo akɛ eetao ehi shi yɛ gbɛ ni kɛ tɛi ni Nyɔŋmɔ efolɔ lɛ kpãaa gbee nɔ. (Filipibii 3:18) Kɛ́ eba lɛ nɛkɛ lɛ, onukpai kɛ mɛi krokomɛi ni yɔɔ mumɔŋ hesaai lɛ bɔɔ mɔdɛŋ akɛ amɛaajaje mɔ ni tɔ̃ɔ lɛ. (Galatabii 6:1) Shi kɛlɛ, anyɛɛɛ mɔ ko nɔ akɛ ewó Kristofonyo kaselɔfeemɔ apã lɛ ni etere. (Mateo 11:28-30; 16:24) Kɛ́ amɛshɛ mɛi ni edara yɛ mla naa lɛ, esa akɛ obalahii kɛ obalayei bibii lɛ po diɛŋtsɛ ahala nɔ ni amɛsumɔɔ yɛ jamɔ he sane lɛ mli. Yɛ naagbee lɛ, wɔteŋ mɔ fɛɛ mɔ yɛ hegbɛ ni ekɛaafee nɔ ni esumɔɔ, ni wɔbaabu wɔhe akɔntaa wɔha Nyɔŋmɔ. (Romabii 14:12) Shi kɛlɛ, ‘wɔbaakpa nɔ ni wɔduɔ lɛ’—nikasemɔ ko ni etsɛŋ ni bi nyenyeŋtswi ni yɔɔ Yesu abɛbua lɛ mli lɛ baakase lɛ.—Galatabii 6:7, 8.

Nijiaŋwujee yɛ Maŋsɛɛ He ko Shɔŋŋ

 9, 10. (a) Mɛɛ tsakemɔi komɛi ba yɛ bi nyenyeŋtswi lɛ shihilɛ mli, ni te efee enii yɛ he eha tɛŋŋ? (b) Okɛ bɔ ni mɛi ni kpooɔ anɔkwa jamɔ ŋmɛnɛ lɛ ateŋ mɛi komɛi aniiashikpamɔ tamɔ bi nyenyeŋtswi lɛ nɔ̃ lɛ he nɔkwɛmɔnɔ aha.

⁹ “Shi beni efite fiaa lɛ, hɔmɔ ni naa wa ko bate shi yɛ nakai shikpɔŋ lɛ nɔ fɛɛ, ni ebɔi lɛ fimɔ. Ni eyiŋ etee ni ekɛ ehe yakpɛtɛ nakai shikpɔŋ lɛ nɔ bii lɛ eko he; ni eha etee ebɔɔi lɛ amli, eyalɛ kpolokoi. Ni eba etsine akɛ kulɛ ená yɔɔ ni kpolokoi lɛ yeɔ lɛ eko eye ni etɔ, ni mɔ ko haaa lɛ.”—Luka 15:14-16.

¹⁰ Eyɛ mli akɛ ehia lɛ waa moŋ, shi bi nyenyeŋtswi lɛ susuko he akɛ ebaaku esɛɛ kɛya shia. Shi moŋ, etee eyana maŋbii lɛ eko, ni mɔ lɛ ha lɛ nitsumɔ akɛ eyalɛ kpolokoi. Akɛni Mose Mla lɛ etsɔɔ faŋŋ akɛ kpolokoi ji kooloi ni he tseee hewɔ lɛ, ebaanyɛ efee akɛ Yudanyo ekpɛlɛŋ nitsumɔ ni tamɔ nɛkɛ nɔ. (3 Mose 11:7, 8) Shi kɛ́ bi nyenyeŋtswi lɛ nu henilee kanyamɔi komɛi ahe po lɛ, esa akɛ enyɛ̃ nɛkɛ kanyamɔi nɛɛ anɔ. Ejaakɛ, enyɛŋ ekpa enitsumɔtsɛ lɛ, ni eji maŋ lɛ mlinyo lɛ gbɛ akɛ ebaaha gbɔ ni efi lɛ, ni miiye ohia futaa lɛ henumɔi agba ejwɛŋmɔ naa. Bi nyenyeŋtswi lɛ amanehulu shihilɛ lɛ tamɔ mɛi ni kpooɔ jamɔ krɔŋŋ gbɛ ni yɔɔ trɔmɔɔ lɛ ŋmɛnɛ lɛ ateŋ mɛi pii aniiashikpamɔ pɛpɛɛpɛ. Bei pii lɛ, nɛkɛ gbɔmɛi nɛɛ kɛ amɛhe yawoɔ nifeemɔi komɛi ni tsutsu lɛ amɛbuɔ akɛ ebaa mɔ shi lɛ amli. Ákɛ nɔkwɛmɔnɔ lɛ, obalanyo fioo ko tse Kristofoi atsɔsemɔ ni akɛhaa lɛ lɛ hiɛ atua beni eye afii 17. “Jeŋba shara kɛ tsofai fɔji kɛ nitsumɔ fite tsɔɔmɔi ni damɔ Biblia nɔ, ní mikɛ afii abɔ ekase lɛ fɛɛ,” taakɛ ekpɛlɛ nɔ lɛ. Etsɛɛɛ kɛkɛ ni obalanyo nɛɛ yaje tsuŋwoohe, yɛ mɔgbee nibii ni ekɛyaju lɛ kɛ gbɔmɔgbee hewɔ. Eyɛ mli akɛ eba emumɔŋ shihilɛ mli ekoŋŋ moŋ, shi kwɛ nyɔmɔ kpele ni ewo yɛ “esha mli ŋɔɔmɔ fioo” ni eye lɛ hewɔ!—Okɛto Hebribii 11:24-26 he.

11. Bi nyenyeŋtswi lɛ hejaramɔ lɛ mli wo wu yɛ mɛɛ gbɛ nɔ, ni mɛi komɛi ena ŋmɛnɛ akɛ je lɛŋ nibii ni lakaa mɔ lɛ ji “yaka shishiumɔ” yɛ mɛɛ gbɛ nɔ?

¹¹ Anɔkwale ni eji akɛ ‘mɔ ko mɔ ko haaa lɛ nɔ ko nɔ ko’ lɛ ha bi nyenyeŋtswi lɛ hejaramɔ lɛ mli wo wu. Nɛgbɛ nanemɛi heei ní ebaná lɛ yɔɔ? Amrɔ nɛɛ ni ebɛ kpãai-ejwɛ po lɛ, ebatsɔ tamɔ ‘nɔ ko ni anyɛɔ’ kɛha amɛ. (Abɛi 14:20) Nakai nɔŋŋ hu mɛi ni duɔ gbɛ kɛjɛɔ hemɔkɛyeli lɛ mli ŋmɛnɛ lɛ ateŋ mɛi pii yooɔ akɛ je nɛŋ nibii ni lakaa mɔ kɛ esusumɔi lɛ feɔ “yaka shishiumɔ.” (Kolosebii 2:8) “Mina amanehulu kɛ tsuiŋ dɔlɛ babaoo yɛ Yehowa gbɛtsɔɔmɔ ni mibɛ lɛ hewɔ,” taakɛ oblayoo ko ni shi Nyɔŋmɔ gbɛjianɔtoo lɛ yɛ be ko mli lɛ kɛɛ lɛ. “Mibɔ mɔdɛŋ akɛ mikɛ je lɛ aaaye egbɔ, shi akɛni mitamɔɔɔ mɛi krokomɛi lɛ lɛɛlɛŋ hewɔ lɛ, amɛkpoo mi. Minu he tamɔ gbekɛ ko ni elaaje, ni ehe miihia ni maná tsɛ ní ekudɔ mi. Nakai be mli miyoo akɛ Yehowa he miihia mi lɛ. Misumɔɔɔ ni maná heyeli kɛjɛ enɔkwɛmɔ shishi dɔŋŋ.” Yesu abɛbua lɛ mli bi nyenyeŋtswi lɛ hu yoo nɔ ko ni tamɔ nakai.

Bi Nyenyeŋtswi lɛ Hiɛ Tserɛ Lɛ

12, 13. Mɛɛ otii komɛi eye ebua mɛi komɛi ŋmɛnɛ ni amɛhiɛ etserɛ amɛ? (Kwɛmɔ akrabatsa lɛ.)

¹² “Shi beni ehiɛ tserɛ lɛ lɛ, ekɛɛ: Yaakwɛ mitsɛ apaafoi abɔ sɔŋŋ ni yɔɔ niyenii aahu ni amɛkɛkumaa; ni mi lɛ, hɔmɔ gbeɔ mi yɛ biɛ nɛɛ. Mate shi matee mitsɛ ŋɔɔ ni mayakɛɛ lɛ akɛ: Ataa, mifee Nyɔŋmɔ shishi esha ni mifee esha yɛ bo hu ohiɛ, ni misaaa akɛ atsɛɔ mi obi dɔŋŋ; ŋɔɔ mi ofee tamɔ apaafoi lɛ eko. Ni ete shi ni eyiŋ eba etsɛ ŋɔɔ.”—Luka 15:17-20.

¹³ Bi nyenyeŋtswi lɛ “hiɛ tserɛ lɛ.” Ekɛ ehe yawo akɔnɔ kɛ miishɛɛ sɛɛdii mli yɛ be ko mli, tamɔ mɔ ko ni yɔɔ lakamɔ jeŋ ko mli. Shi agbɛnɛ ebale mumɔŋ shihilɛ ni eyɔɔ mli lɛ jogbaŋŋ diɛŋtsɛ. Hɛɛ, eyɛ mli akɛ egbee shi moŋ, shi hiɛnɔkamɔ yɛ lolo kɛha obalanyo nɛɛ. Abaanyɛ ana sui kpakpai komɛi yɛ emli. (Abɛi 24:16; okɛto 2 Kronika 19:2, 3 he.) Shi mɛi ni shĩɔ Nyɔŋmɔ asafoku lɛ ŋmɛnɛ lɛ hu? Ani eeefee nɔ ni nilee yɔɔ mli akɛ aaamu sane naa akɛ hiɛnɔkamɔ ko kwraa bɛ kɛha amɛ fɛɛ, ákɛ amɛ atuatsemɔ gbɛ lɛ maa nɔ mi yɛ shihilɛ fɛɛ shihilɛ mli akɛ amɛfee esha amɛshi Nyɔŋmɔ mumɔ krɔŋkrɔŋ lɛ? (Mateo 12:31, 32) Jeee nakai doo. Amɛteŋ mɛi komɛi lɛ, amɛgbɛ fɔŋ ni amɛkɔ lɛ haoɔ amɛ, ni yɛ be ni sa mli lɛ, mɛnɛɛmɛi ateŋ mɛi babaoo hiɛ tserɛɔ amɛ ekoŋŋ. “Mihiɛ kpaaa Yehowa nɔ kɔkɔɔkɔ, gbi kome po,” taakɛ nyɛmiyoo ko kɛɛ, beni esusuɔ be mli ni eshi Nyɔŋmɔ gbɛjianɔtoo lɛ he lɛ. “Misɔleɔ be fɛɛ be akɛ, gbi ko lɛ, etsɔ gbɛ ko nɔ ni ehere mi kɛba anɔkwale lɛ mli ekoŋŋ.”—Lala 119:176.

14. Mɛni bi nyenyeŋtswi lɛ kpɛ eyiŋ akɛ ebaafee, ni ejie heshibaa kpo yɛ nakai feemɔ mli yɛ mɛɛ gbɛ nɔ?

¹⁴ Shi mɛni mɛi ni edu gbɛ lɛ baanyɛ afee yɛ amɛshihilɛ lɛ he? Yɛ Yesu abɛbua lɛ mli lɛ, bi nyenyeŋtswi lɛ kpɛ eyiŋ akɛ ebaaku esɛɛ kɛya shia ní eyakpa etsɛ fai kɛha eshaifaa. “Ŋɔɔ mi ofee tamɔ opaafoi lɛ eko,” taakɛ bi nyenyeŋtswi lɛ tswa efai shi akɛ ebaakɛɛ lɛ. Kɛ́ abɔ tsulɔ apaa lɛ, abɔɔ apaa lɛ gbi kome gbi kome, no hewɔ lɛ abaanyɛ akɛ gbi kome pɛ akɛɛ lɛ akɛ ashwie lɛ. Ebaa shi fe bɔ ni nyɔŋ ji lɛ po, ejaakɛ yɛ shishinumɔ ko naa lɛ, nyɔŋ tamɔ weku lɛ mlinyo. No hewɔ lɛ, bi nyenyeŋtswi lɛ susuuu he akɛ ebaabi ni asaa akɛ gbɛhe ni eyɔɔ tsutsu ákɛ binuu lɛ aha lɛ ekoŋŋ. Ebaasumɔ ni ekpɛlɛ gbɛhe ni baa shi fe fɛɛ lɛ nɔ, bɔni afee ni ekɛma enɔkwayeli hee ni ená kɛha etsɛ lɛ nɔ mi daa gbi. Shi kɛlɛ, bi nyenyeŋtswi lɛ kɛ nɔ ko ni yɔɔ naakpɛɛ baakpe.

Akɛ Miishɛɛ Here Lɛ Atuu

15-17. (a) Ní tsɛ lɛ na ebinuu lɛ, te efee enii eha tɛŋŋ? (b) Atade, kpotia, kɛ tokotai ni tsɛ lɛ ha akɛbaha ebinuu lɛ feɔ mɛni he mfoniri? (d) Okpɔlɔŋmɛɛ he gbɛjianɔ ni tsɛ lɛ to lɛ tsɔɔ mɛni?

¹⁵ “Shi beni enyiɛ shɔŋŋ kɛbaa beebe lɛ, etsɛ na lɛ, ni emusuŋ tsɔ lɛ, ni eshá foi eho eyagbee ekuɛ nɔ, ni eshɔshɔɔ enaa. Ni bi lɛ kɛɛ lɛ akɛ: Ataa, mifee Nyɔŋmɔ shishi esha ni mifee esha yɛ bo hu ohiɛ, ni misaaa akɛ atsɛɔ mi obi dɔŋŋ! Shi tsɛ lɛ kɛɛ etsuji lɛ akɛ: Nyɛjiea atade ni yɔɔ fɛo fe fɛɛ lɛ kɛbaa mramra, ní nyɛkɛbawoa lɛ, ni nyɛwo enine kpotia kɛ enaji hu tokotai; ní nyɛkɛ tsinabi ni ewo fɔ lɛ abaa nyɛbagbea, ní nyɛhaa wɔyea nii ni wɔnáa tsuijurɔ; ejaakɛ mibi nɛɛ gbo, ni ehiɛ etsɛ̃ ekoŋŋ; elaaje, ni ana lɛ. Ni amɛbɔi nyamɔ.”—Luka 15:20-24.

¹⁶ Fɔlɔ fɛɛ fɔlɔ ni yɔɔ suɔmɔ lɛ baashwe ni ebi aku esɛɛ kɛba mumɔŋ hewalɛnamɔ mli ekoŋŋ. No hewɔ lɛ, wɔbaanyɛ wɔfee bɔ ni bi nyenyeŋtswi lɛ tsɛ kwɛɔ nanegbɛ ni kã eshia lɛ hiɛ lɛ nɔ gbi fɛɛ gbi, ní ekɛ hiɛnɔkamɔ ni mli wa kpáa ebinuu lɛ sɛɛkuu gbɛ lɛ he mfoniri. Agbɛnɛ ena ebinuu lɛ ni enyiɛ gbɛ lɛ nɔ kɛmiiba! Ŋwanejee ko bɛ he akɛ obalanyo fioo lɛ puemɔ etsake. Shi kɛlɛ, “beni enyiɛ shɔŋŋ kɛbaa beebe lɛ,” tsɛ lɛ yoo lɛ. Ekwɛ nii kɛteke ehe atadei ni etserɛ kɛ emumɔ ni ekumɔ kwraa lɛ; ena ebinuu lɛ, ni eshá foi ni ekɛ lɛ yakpe!

¹⁷ Beni tsɛ lɛ yanina ebinuu lɛ, eho egbee ekuɛ nɔ ni ekɛ suɔmɔ henumɔ shɔ enaa. Kɛkɛ ni efã etsuji lɛ akɛ amɛkɛ atade yuu, kpotia, kɛ tokotai abawo ebinuu lɛ. Nɛkɛ atade yuu nɛɛ jeee atade folo ko kɛkɛ ni awoɔ, shi moŋ “atade ni yɔɔ fɛo fe fɛɛ”—ekolɛ nɔhaanɔ fɛfɛo ní alò nibii yɛ mli, tamɔ nɔ ni akɛhaa gbɔ ni hiɛ yɔɔ nyam lɛ eko. Akɛni afɔɔɔ nyɔji anamɔ ni amɛwo kpotia kɛ tokotai hewɔ lɛ, tsɛ lɛ miifee lɛ faŋŋ akɛ eehere ebinuu lɛ atuu kɛmiiba ekoŋŋ akɛ eweku lɛ mlinyo kwraa kɛmɔ shi. Shi tsɛ lɛ fee babaoo po fe nakai. Efã akɛ aŋmɛ okpɔlɔ ní akɛye ebinuu lɛ sɛɛkuu lɛ he gbi jurɔ. Eyɛ faŋŋ akɛ, nuu nɛɛ kɛ ebinuu lɛ he miike lɛ, jeee kɛ mligbigbilimɔ loo akɛni ebinuu lɛ sɛɛkuu lɛ nyɛɔ enɔ ní efee nakai hewɔ; eesumɔ ni ejie eshaifaa kpo etsɔɔ lɛ. Enɛ ha ená miishɛɛ waa.

18, 19. (a) Mɛni bi nyenyeŋtswi lɛ abɛbua lɛ tsɔɔ bo yɛ Yehowa he? (b) Taakɛ atsɔɔ yɛ bɔ ni ekɛ Yuda kɛ Yerusalem ye ha lɛ mli lɛ, Yehowa yaa nɔ ‘emɛɔ’ akɛ eshafeelɔ aaaku esɛɛ yɛ mɛɛ gbɛ nɔ?

¹⁸ Kɛbashi biɛ lɛ, mɛni bi nyenyeŋtswi lɛ he abɛbua lɛ tsɔɔ wɔ yɛ Nyɔŋmɔ ní wɔná hegbɛ akɛ wɔɔjá lɛ lɛ he? Klɛŋklɛŋ lɛ, etsɔɔ wɔ akɛ Yehowa ji “musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii.” (2 Mose 34:6) Lɛɛlɛŋ, mɔbɔnalɛ ji Nyɔŋmɔ su ko ni jeɔ kpo jogbaŋŋ. Nakai ji bɔ ni efeɔ enii be fɛɛ be yɛ mɛi ni ehia amɛ lɛ ahe. No sɛɛ lɛ, Yesu abɛbua lɛ tsɔɔ wɔ akɛ Yehowa ‘ŋɔfaa mra.’ (Lala 86:5) Kɛ́ wɔɔkɛɛ lɛ, ejeɔ gbɛ ekwɛɔ jogbaŋŋ akɛ eeena tsuitsakemɔ ko yɛ adesai eshafeelɔi ahe, ní baaha ená nɔdaamɔnɔ ni ekɛjie mɔbɔnalɛ kpo etsɔɔ amɛ.—2 Kronika 12:12; 16:9.

¹⁹ Ákɛ nɔkwɛmɔnɔ lɛ, susumɔ bɔ ni Nyɔŋmɔ kɛ Israel ye ha lɛ he okwɛ. Yehowa kɛ mumɔ tsirɛ gbalɔ Yesaia ni ewie Yuda kɛ Yerusalem he akɛ ‘amɛhe miiye kɛjɛ amɛyiteŋ aahu kɛbashi amɛnaneshi.’ Ni kɛlɛ, ekɛɛ hu akɛ: “Yehowa miimɛ, koni eduro nyɛ, ni no hewɔ lɛ ewó ehe nɔ, koni ena nyɛ mɔbɔ.” (Yesaia 1:5, 6; 30:18; 55:7, wɔma efã ko nɔ mi; Ezekiel 33:11) Taakɛ tsɛ lɛ fee yɛ Yesu abɛbua lɛ mli lɛ, kɛ́ wɔɔkɛɛ lɛ, Yehowa ‘kwɛɔ gbɛ lɛ nɔ.’ Ekɛ henumɔ ni mli wa kpáa mɔ fɛɛ mɔ ni eshi eshia lɛ kɛtee lɛ sɛɛkuu gbɛ. Ani jeee nɔ ni wɔbaakpa gbɛ yɛ tsɛ ni yɔɔ suɔmɔ he nɛ?—Lala 103:13.

20, 21. (a) Nyɔŋmɔ mɔbɔnalɛ lɛ miigbala mɛi babaoo ŋmɛnɛ yɛ mɛɛ gbɛ nɔ? (b) Mɛni he abaasusu yɛ nikasemɔ ni nyiɛ sɛɛ lɛ mli?

²⁰ Daa afi lɛ, Yehowa mɔbɔnalɛ lɛ gbalaa mɛi babaoo ni ehaa amɛhiɛ tserɛɔ amɛ ni amɛkuɔ amɛsɛɛ kɛbaa anɔkwa jamɔ mli ekoŋŋ. Kwɛ miishɛɛ ni enɛ haa amɛsuɔlɔi náa! Ákɛ nɔkwɛmɔnɔ lɛ, susumɔ Kristofonyo tsɛ ni atsĩ etã yɛ shishijee gbɛ lɛ he okwɛ. Miishɛɛ sane ji akɛ, ebiyoo lɛ ku esɛɛ kɛba mumɔŋ hewalɛnamɔ mli ekoŋŋ, ni amrɔ nɛɛ eesɔmɔ akɛ be-fɛɛ sɔɔlɔ. “Miyɛ miishɛɛ waa diɛŋtsɛ tamɔ bɔ ni mɔ ko aaanyɛ aná yɛ nibii agbɛjianɔtoo momo nɛɛ mli,” taakɛ ekɛɛ lɛ. “Miwerɛho yaafonui lɛ etsake kɛbatsɔ miishɛɛ yaafonui.” Eka shi faŋŋ akɛ, Yehowa hu náa miishɛɛ!—Abɛi 27:11.

²¹ Shi nibii babaoo yɛ bi nyenyeŋtswi lɛ abɛbua lɛ mli. Yesu tsá esane lɛ nɔ koni eha ana srɔtofeemɔ ni yɔɔ Yehowa mɔbɔnalɛ lɛ kɛ keketeefeemɔ, kɛ fɔbuu kojomɔ subaŋ ni afɔɔ namɔ yɛ woloŋmalɔi lɛ kɛ Farisifoi lɛ ahe lɛ teŋ. Abaasusu bɔ ni efee enɛ eha—kɛ nɔ ni etsɔɔ kɛhaa wɔ—lɛ he yɛ nikasemɔ ni nyiɛ sɛɛ lɛ mli.

[Shishigbɛ niŋmai]

Kɛha Emlitii

◻ Yɛ mɔbɔnalɛ he lɛ, esoro Yesu subaŋ yɛ Farisifoi lɛ anɔ̃ he yɛ mɛɛ gbɛ nɔ?

◻ Namɛi tamɔ bi nyenyeŋtswi lɛ ŋmɛnɛ, ni yɛ mɛɛ gbɛ nɔ?

◻ Mɛɛ shihilɛi ha bi nyenyeŋtswi lɛ hiɛ tserɛ lɛ lɛ?

◻ Tsɛ lɛ jie mɔbɔnalɛ kpo etsɔɔ ebinuu ni eshwa ehe lɛ yɛ mɛɛ gbɛ nɔ?

[Akrabatsa ni yɔɔ baafa 11]

AMƐHIƐ TSERƐ AMƐ

Mɛni ye ebua mɛi ni be ko lɛ ashwie amɛ kɛjɛ Kristofoi asafo lɛ mli lɛ ni amɛhiɛ tserɛ amɛ lɛ? Wiemɔi ni nyiɛ sɛɛ lɛ haa wɔnuɔ sane lɛ shishi jogbaŋŋ.

“Yɛ mitsui mli lɛ, mile he ni anɔkwale lɛ yɔɔ lolo. Afii abɔ ni mikɛtee Kristofoi akpeei lɛ ená hewalɛ kpele diɛŋtsɛ yɛ minɔ. Te mafee tɛŋŋ ni maje gbɛ maya nɔ matsɔ misɛɛ maha Yehowa hu? Eshiko mi; mi moŋ mishi lɛ. Yɛ naagbee lɛ, mikpɛlɛ bɔ ni mitɔ̃ kɛ bɔ ni mijie kuɛŋtimɔ kpo, kɛ bɔ ni Yehowa Wiemɔ lɛ ja yɛ bei fɛɛ mli lɛ nɔ—‘nɔ ni adũɔ lɛ, no nɔŋŋ hu abaakpa.’”—C.W.

Mibiyoo abifao lɛ bɔi wiemɔ, ni enɛ sa mitsui he waa ejaake miisumɔ ni matsɔɔ lɛ nibii tamɔ mɔ ni ji Yehowa kɛ gbɛ ni atsɔɔ nɔ asɔleɔ ahaa lɛ. Minyɛɛɛ mawɔ, ni gbi ko gbɛkɛ ní je ena waa lɛ, mifã tsɔne kɛyama maŋ teŋ shwɛmɔhe ko ni mifó yɛ jɛmɛ aahu.Mifó diɛŋtsɛ, ni misɔle miha Yehowa nɔ ni ji klɛŋklɛŋ kwraa yɛ be kakadaŋŋ mli. Nɔ ni mile nɔŋŋ ji akɛ, Yehowa he miihia mi ekoŋŋ yɛ mishihilɛ mli, ni mihiɛ kã nɔ akɛ ebaanyɛ ekɛ mihe ake mi.”—G.H.

“Kɛ́ jamɔ he sane te shi lɛ, mikɛɔ gbɔmei lɛ akɛ kɛ́ akɛɛ mihala jamɔ ni tsɔɔ anɔkwale lɛ, no lɛ masumɔ ni mafee Yehowa Odasefoi ateŋ mɔ kome. Kɛkɛ lɛ mikɛɛ amɛ akɛ kulɛ miji amɛteŋ mɔ kome, shi minyɛɛ mahi shi yɛ amɛtaomɔ nii lɛ anaa, no hewɔ mikpa lɛ. Beni miyoo enɛ lɛ, ehaa mináa fɔbuu henumɔ yɛ bei babaoo mli, ni ehaaa maná miishɛɛ. Yɛ naagbee lɛ, mikpɛlɛ nɔ akɛ, ‘Minii yɛ mɔbɔ. Ehe miihia ni mafee tsakemɔi wuji komɛi.’”—C.N.

“Aswhie mi kɛ miwu fɛɛ aaafee afii 35 ni eho nɛ. Kɛkɛ ni yɛ afi 1991 mli lɛ, efee wɔ miishɛɛ trukaa akɛ onukpai enyɔ komɛi ba amɛbasara wɔ ni amɛwó wɔtoi nɔ akɛ wɔɔnyɛ wɔku wɔsɛɛ kɛba Yehowa ŋɔɔ ekoŋŋ. Nyɔji ekpaa sɛɛ lɛ, wɔná miishɛɛ kɛteke nɔ akɛ ahe wɔ kɛba asafo lɛ mli ekoŋŋ. Miwu eye afii 79, ni mi hu miye afii 63.”—C.A.