“Jiemɔ Yehowa Yi, Misusuma”

“NANCY kɛɛ akɛ: “Miishɛɛ kɛ ŋɔɔmɔ ko bɛ misɔɔmɔ nitsumɔ lɛ mli yɛ nyɛsɛɛ nɛɛ nyɔji lɛ amli.”a Ekɛ afii nyɔŋmai komɛi esɔmɔ akɛ gbɛgbalɔ, ni ji be-fɛɛ sanekpakpa jajelɔ. Shi kɛlɛ, ekɛɛ kɛfata he akɛ: “Mibɛ nɔ ni yaa nɔ yɛ migbɔmɔtsoŋ lɛ he miishɛɛ. Etamɔ nɔ ni mikɛ ekãa ko kwraa tsuuu Maŋtsɛyeli shɛɛ sane lɛ he nii, ni etamɔ nɔ ni ejɛɛɛ mitsui mli. Mɛni esa akɛ mafee?”

Agbɛnɛ hu susumɔ Keith ni ji Yehowa Odasefoi asafoŋ onukpa lɛ sane lɛ he okwɛ. Kwɛ bɔ ni efee lɛ naakpɛɛ eha beni enu ni eŋa miikɛɛ akɛ: “Efeɔ mi akɛ oosusu nɔ kroko he. Be ni osɔleɔ lɛ, oda shi yɛ niyenii lɛ hewɔ, shi jeee niyeli be po nɛ!” Keith kpɛlɛ nɔ akɛ: “Minyɛɔ minaa akɛ misɔleɔ kɛkɛ.”

Ŋwanejee ko bɛ he akɛ osumɔɔɔ ni wiemɔi ni okɛjieɔ Yehowa Nyɔŋmɔ yi lɛ afee nɔ ni miishɛɛ bɛ mli ni oowie kɛkɛ. Nɔ ni tamɔɔɔ nakai lɛ, oosumɔ ni efee nɔ ni jɛ otsui mli, nɔ ni jɛ shidaa henumɔi amli tɔ̃ɔ. Shi kɛlɛ, henumɔ jeee nɔ ni awoɔ aloo ajieɔ afɔɔ shi tamɔ atade. Esa akɛ efee nɔ ni jɛ gbɔmɔ mligbɛ tɔ̃ɔ. Te mɔ ko aaafee tɛŋŋ enyɛ ená shidaa henumɔ yɛ etsui mli hu? Lala 103 lɛ kɛ sɛɛyoomɔ ni kɔɔ enɛ he haa wɔ.

Maŋtsɛ David, ni hi shi yɛ blema Israel lɛ ji mɔ ni fo Lala 103 lɛ. Ekɛ wiemɔi nɛɛ je shishi akɛ: “Jiemɔ Yehowa yi, misusuma, ni mimli nii fɛɛ, nyɛjiea egbɛi krɔŋkrɔŋ lɛ yi!” (Lala 103:⁠1) Saji amlitaomɔ ko kɛɔ akɛ, “wiemɔ ni ji [jɔɔmɔ, NW] Nyɔŋmɔ lɛ tsɔɔ yijiemɔ, ni etsɔɔ suɔmɔ ni mli wa ni ayɔɔ kɛha lɛ be fɛɛ be, kɛ agbɛnɛ hu, shidaa henumɔ ni anáa kɛhaa lɛ.” Akɛni David miisumɔ ní ejɛ tsui ni eyi obɔ kɛ suɔmɔ kɛ hiɛsɔɔ mli koni ejie Yehowa yi hewɔ lɛ, David wie etsɔɔ lɛ diɛŋtsɛ esusuma​—⁠lɛ diɛŋtsɛ ehe akɛ​—⁠“jiemɔ Yehowa yi.” Shi mɛni kanya miishɛɛ henumɔ ni tamɔ nɛkɛ yɛ David tsui mli kɛha Nyɔŋmɔ ni ejáa lɛ lɛ?

David tee nɔ etsɔɔ mli akɛ: ‘Ohiɛ akakpa Yehowa nijujifeemɔi lɛ fiaa nɔ!’ (Lala 103:2) Eka shi faŋŋ akɛ, Yehowa “nijujifeemɔi” lɛ anɔ jwɛŋmɔ kɛ hiɛsɔɔ ji nɔ ni haa anáa shidaa henumɔ. Mɛɛ Yehowa nijujifeemɔi diɛŋtsɛ yɔɔ David jwɛŋmɔ mli? Nibii ni Yehowa Nyɔŋmɔ ebɔ, tamɔ gbɛkɛ ni jeŋ etse ni ŋwɛi ni eyi tɔ kɛ ŋulamii lɛ akwɛmɔ baanyɛ aha mɔ tsuiŋ ayi obɔ kɛ shidaa kɛha Bɔlɔ lɛ. Ŋwɛi ŋulamii babaoo lɛ sa David tsui he waa diɛŋtsɛ. (Lala 8:​4, 5; 19:2Ga Bible) Kɛlɛ, David kaiɔ Yehowa nifeemɔi krokomɛi hu yɛ Lala 103 lɛ mli.

Yehowa ‘Kɛ Onishaianii Fɛɛ Faa’ Bo

Yɛ nɛkɛ lala nɛɛ mli lɛ, David gba Nyɔŋmɔ suɔmɔ-mlihilɛ nifeemɔi lɛ etsɔɔ. Beni etsɔɔ amɛteŋ klɛŋklɛŋ nɔ̃ kɛ nɔ̃ ni fe fɛɛ lɛ mli lɛ, ela akɛ: ‘Yehowa kɛ onishaianii lɛ fɛɛ faa bo.’ (Lala 103:3) Eka shi faŋŋ akɛ David hiɛ kpaaa esha shihilɛ mli ni lɛ diɛŋtsɛ eyɔɔ lɛ nɔ. Beni Natan banina lɛ yɛ gbãla ni ekɛ Batsheba fite lɛ hewɔ lɛ sɛɛ lɛ, David kpɛlɛ nɔ akɛ: “[Yehowa] Bo okome too mifee esha mishi, ni mifee efɔŋ yɛ ohiɛ.” (Lala 51:​6) Ejɛ tsui ni ekumɔ mli ekpa fai akɛ: “Naa mi mɔbɔ, Nyɔŋmɔ, yɛ omlihilɛ naa; yɛ omusuŋtsɔlɛ falɛ naa lɛ, gbee minɔtɔ̃mɔi lɛ! Juu mihe kwraa kɛjɛ mi nɔsha lɛ mli, ni otsuu mihe kɛjɛ mihe esha lɛ mli!” (Lala 51:​3, 4Ga Bible) Kwɛ bɔ ni David baada shi eha akɛni akɛ ehe eke lɛ lɛ hewɔ! Ákɛ adesa ni yeee emuu lɛ, efee eshai krokomɛi yɛ eshihilɛ mli, shi ekpaaa etsui tsakemɔ, ekpɛlɛ kãmɔ nɔ, ni ejaje egbɛ̀i. Mlihilɛ kpo ni Nyɔŋmɔ jie etsɔɔ David yɛ naakpɛɛ gbɛ nɔ lɛ he susumɔ tsirɛ David ni ejie Yehowa yi.

Ani jeee eshafeelɔi ji wɔ hu? (Romabii 5:​12) Bɔfo Paulo po ye awerɛho akɛ: “Mimligbɛ gbɔmɔ lɛ mii shɛɔ yɛ Nyɔŋmɔ mla lɛ he; shi minaa mla kroko yɛ mihe nii lɛ amli ni kɛ mijwɛŋmɔ mla lɛ wuɔ ta ni eŋɔɔ mi nom ehaa esha mla lɛ ni yɔɔ mihe nii lɛ amli lɛ. Gbɔmɔ ni nii yɔɔ mɔbɔ ji mi; namɔ aaajie mi kɛjɛ nɛkɛ gbele gbɔmɔtso nɛɛ dɛŋ?” (Romabii 7:​22-​24) Kwɛ bɔ ni wɔdaa shi akɛ Yehowa kaiii wɔnɔtɔ̃mɔi lɛ! Kɛ́ wɔtsake wɔtsui ni wɔbi eshaifaa lɛ ekɛ miishɛɛ gbeeɔ.

David kai ehe akɛ: “[Yehowa] tsaa ohelai fiaa kwa.” (Lala 103:3) Akɛni tsamɔ tsɔɔ shihilɛ ni akɛ mɔ ko baa mli ekoŋŋ lɛ hewɔ lɛ, etsɔɔ babaoo fe efɔŋ ni afee ni akɛaake kɛkɛ. Ekɔɔ ‘helai’ jiemɔ he​—⁠ni ji nɔ ni ehiii ni ejɛ gbɛ gbonyo ni wɔkɔ lɛ mli eba lɛ he lɛ. Yɛ jeŋ hee ni ekɛbaa lɛ mli lɛ, Yehowa baajie gbɔmɔtsoŋ naagbai ni esha kɛbaa lɛ kɛya, tamɔ hela kɛ gbele. (Yesaia 25:8; Kpojiemɔ 21:​1-4) Ŋmɛnɛ po lɛ, Nyɔŋmɔ miitsa wɔmumɔŋ helai lɛ. Kɛha mɛi komɛi lɛ, enɛ kɔɔ henilee gbonyo kɛ amɛ kɛ lɛ teŋ wekukpaa ni efite lɛ ahe. “Ohiɛ akakpa” nibii ni Yehowa efee momo eha wɔteŋ mɔ fɛɛ mɔ ákɛ aŋkroaŋkro yɛ nɛkɛ gbɛ nɔ lɛ nɔ.

Lɛ “Ehereɔ Oyiwala”

David la akɛ: ‘Yehowa hereɔ oyiwala kɛjɛɔ bu mli.’ (Lala 103:4) “Bu” lɛ ji adesai akwamaŋ gbonyobu​—⁠Sheol, loo Hades. Dani David aaaye Israel nɔ maŋtsɛ po lɛ, no mli lɛ ewala yaje oshara mli. Ákɛ nɔkwɛmɔnɔ lɛ, Israel Maŋtsɛ Saul nyɛ̃ David, ni ená ni kulɛ egbe lɛ, ni eka lɛ gbee shii abɔ. (1 Samuel 18:​9-​29; 19:10; 23:​6-​29) Filistibii lɛ hu tao ni amɛgbe David. (1 Samuel 21:10-​15) Shi yɛ eko fɛɛ eko mli lɛ, Yehowa jieɔ lɛ kɛjɛɔ “bu” lɛ mli. Kwɛ bɔ ni David baada shi aha, kɛ́ eekai Yehowa nifeemɔi nɛɛ lɛ!

Ni bo hu? Ani Yehowa ehere bo kɛjɛ nɔnyɛɛ loo oshara bei amli? Aloo yɛ wɔ bei nɛɛ amli lɛ, ole gbɛ̀i komɛi anɔ ní etsɔ ejie Odasefoi anɔkwafoi kɛjɛ Sheol bu lɛ mli? Ekolɛ enifeemɔi ni ekɛkpɔ̃ mɛi lɛ he nii ni okaneɔ yɛ wolo tɛtrɛɛ nɛɛ baafai lɛ amli lɛ eta otsuiŋ. Mɛni hewɔ oheee be ni okɛ hiɛsɔɔ susu anɔkwa Nyɔŋmɔ lɛ nifeemɔi nɛɛ ahe waa? Ni yɛ anɔkwale mli lɛ, wɔteŋ mɔ fɛɛ mɔ yɛ yiŋtoo hewɔ ni eeeda Yehowa shi yɛ gbohiiashitee hiɛnɔkamɔ lɛ hewɔ.​—⁠Yohane 5:​28, 29; Bɔfoi lɛ Asaji 24:15.

Yehowa haa wala kɛ nibii fɛɛ ni haa efeɔ miishɛɛ, kɛ nɔ ni haa ehe baa sɛɛnamɔ hu. Lalatsɛ lɛ la akɛ Nyɔŋmɔ ‘kɛ mlihilɛ kɛ musuŋtsɔlɛ fĩɔ bo akekre.’ (Lala 103:4) Kɛ nɔ ko he miihia wɔ lɛ, Yehowa shiii wɔ efolo, shi eyeɔ ebuaa wɔ kɛtsɔɔ egbɛjianɔtoo ni anaa lɛ nɔ, kɛ onukpai ni ahala loo nɔkwɛlɔi ni yɔɔ asafo lɛ mli lɛ anɔ. Yelikɛbuamɔ ni tamɔ nakai lɛ haa wɔnyɛɔ wɔtsuɔ shihilɛ ni mli wa lɛ he nii, yɛ be mli ni wɔlaajeee bulɛ kɛ hegbɛ ni wɔyɔɔ lɛ. Kristofoi nɔkwɛlɔi kwɛɔ tooi lɛ anɔ jogbaŋŋ. Amɛwoɔ helatsɛmɛi kɛ mɛi ni nii efee mɔbɔ lɛ hewalɛ, ni amɛfeɔ nɔ fɛɛ nɔ ni amɛbaanyɛ koni amɛkɛjaje mɛi ni egbee shi lɛ ekoŋŋ. (Yesaia 32:​1, 2; 1 Petro 5:​2, 3; Yuda 22, 23) Yehowa mumɔ lɛ tsirɛɔ nɛkɛ nɔkwɛlɔi nɛɛ koni amɛjie musuŋtsɔlɛ kɛ suɔmɔ kpo amɛtsɔɔ tookuu lɛ. ‘Emlihilɛ kɛ musuŋtsɔlɛ’ lɛ tamɔ akekre ni akɛwulaa wɔ lɛɛlɛŋ, ni ehaa wɔhiɛ baa nyam! Nyɛhaa wɔhiɛ akakpaa enijujifeemɔi lɛ anɔ, ni wɔjie Yehowa kɛ egbɛi krɔŋkrɔŋ lɛ yi.

Beni lalatsɛ David tsaa ŋaa ni ewoɔ lɛ diɛŋtsɛ ehe lɛ nɔ lɛ, ela akɛ: ‘Yehowa kɛ nii kpakpai woɔ odaaŋ obɔ, ni ehaa oblahiaŋ tsɔɔ ehee tamɔ okropɔŋ.’ (Lala 103:5) Wala ni Yehowa kɛhaa lɛ ji nɔ ni haa mɔ tsui nyɔɔ emli kɛ miishɛɛ. Anɔkwale lɛ he nilee po diɛŋtsɛ ji jwetri ko ni anyɛŋ akɛ nɔ ko ato he, kɛ nɔ ni haa mɔ náa miishɛɛ waa diɛŋtsɛ! Ni susumɔ bɔ ni nitsumɔ, ni ji shiɛmɔ kɛ kaselɔi afeemɔ nitsumɔ ni Yehowa kɛha lɛ hu haa mɔ tsui nyɔɔ emli waa ha lɛ he okwɛ. Kwɛ miishɛɛ ni eji akɛ aaaná mɔ ko ni yɔɔ anɔkwa Nyɔŋmɔ lɛ he nikasemɔ he miishɛɛ ni aye abua nakai mɔ lɛ ni ebale Yehowa ni ejie eyi! Kɛlɛ, kɛ he ni wɔyɔɔ lɛ, mɔ ko bo wɔ toi aloo ebooo wɔ toi jio, eji hegbɛ kpele diɛŋtsɛ akɛ aaaná nitsumɔ ni kɔɔ Yehowa gbɛi lɛ hetsemɔ kɛ maŋtsɛ ni eji lɛ bembuu he lɛ mli gbɛfaŋnɔ.

Namɔ kɛɛ lɛ lɛ egbɔjɔɔɔ loo etɔɔɔ lɛ yɛ be mli ni wɔyaa nɔ wɔtsuɔ Nyɔŋmɔ Maŋtsɛyeli lɛ jajemɔ nitsumɔ lɛ? Shi Yehowa yaa nɔ ehaa etsuji hewalɛ hee, ni ehaa amɛtsɔmɔɔ ‘tamɔ okropɔŋi’ ni yɔɔ fiji ni hewalɛ yɔɔ mli ni amɛfilikiɔ kɛyaa ŋwɛi shɔŋŋ diɛŋtsɛ. Kwɛ bɔ ni wɔdaa shi akɛ wɔŋwɛi Tsɛ ni yɔɔ suɔmɔ lɛ haa wɔ ‘hewalɛ babaoo’ tamɔ nakai, bɔni afee ni wɔkɛ anɔkwayeli atsu wɔsɔɔmɔ nitsumɔ lɛ he nii daa gbi!​—Yesaia 40:29-​31.

Ákɛ nɔkwɛmɔnɔ lɛ: Clara kɛ ebe-fɛɛ tsuɔ heloonaa nitsumɔ, ni ekɛ ŋmɛlɛtswai 50 hu shiɛɔ daa nyɔŋ. Ekɛɔ akɛ: “Bei komɛi lɛ etɔɔ mi, shi mibɔɔ mɔdɛŋ ni mikɛ mihe woɔ shiɛmɔ nitsumɔ lɛ mli akɛni mikɛ mɔ ko eto gbɛjianɔ momo lɛ hewɔ. Shi kɛ mikɛ mihe wo mli pɛ kɛkɛ lɛ, mináa hewalɛ.” Ekolɛ bo hu ona bɔ ni oná hewalɛ oha akɛni Nyɔŋmɔ fĩɔ osɛɛ hewɔ yɛ ohe ni okɛwoɔ Kristofoi asɔɔmɔ nitsumɔ lɛ mli lɛ hewɔ. Eba akɛ, obaaná kanyamɔ ni okɛɛ taakɛ David kɛɛ yɛ nɛkɛ lala nɛɛ shishijee wiemɔi lɛ amli lɛ: “Jiemɔ Yehowa yi, misusuma, ni mimli nii fɛɛ, nyɛjiea egbɛi krɔŋkrɔŋ lɛ yi.”

Yehowa Kpɔ̃ɔ Ewebii Lɛ

Lalatsɛ lɛ la hu akɛ: “Yehowa yeɔ jalɛ sane ni ekojoɔ ehaa mɛi fɛɛ ni ayeɔ amɛ amim lɛ. Eha Mose le egbɛ̀i lɛ, ni Israelbii lɛ hu le enifeemɔ nii lɛ.” (Lala 103:​6, 7) Etamɔ nɔ ni David miisusu “amim” ni Mizraimbii yeɔ Israelbii ni amɛnyɛɔ amɛnɔ yɛ Mose beaŋ lɛ he. Eka shi faŋŋ akɛ, David ná shidaa henumɔ ko yɛ etsui mli beni ejwɛŋɔ bɔ ni Yehowa ha Mose le gbɛ̀i anɔ ni eeetsɔ ekpɔ̃ Israel lɛ.

Wɔ hu wɔbaanyɛ wɔná shidaa su ni tamɔ nakai nɔŋŋ kɛtsɔ bɔ ni Nyɔŋmɔ kɛ Israelbii lɛ ye ha lɛ he susumɔ nɔ. Shi esaaa akɛ wɔtsiɔ wɔhe kɛjɛɔ Yehowa tsuji ni yɔɔ ŋmɛnɛŋmɛnɛ lɛ ahe, tamɔ mɛi ni atsĩ amɛgbɛi atã yɛ Jehovah’s Witnesses​—Proclaimers of God’s Kingdom wolo lɛ yitsei 29 kɛ 30 lɛ mli lɛ. Saji ni aŋmala awo mli kɛ Buu Mɔɔ Asafo lɛ woji krokomɛi amli lɛ yeɔ ebuaa wɔ koni wɔna bɔ ni Yehowa ye ebua ewebii yɛ ŋmɛnɛŋmɛnɛ beaŋ koni amɛŋmɛ amɛtsui shi yɛ tsuŋwoo, basabasafeemɔ, nitsumɔ lɛ guu, yiwalɛ nsrai, kɛ nitsumɔ ni atsuɔ tamɔ nyɔji yɛ nsrai amli lɛ. Amɛkɛ kaai ekpe yɛ tawuu shikpɔji anɔ, tamɔ Burundi, Liberia, Rwanda, kɛ tsutsu Yugoslavia maji lɛ amli. Yɛ he fɛɛ he ni yiwaa baa yɛ lɛ, Yehowa nine hereɔ etsuji anɔkwafoi lɛ ayiwala. Yehowa, wɔ Nyɔŋmɔ kpeteŋkpele lɛ nijujifeemɔi nɛɛ anɔ jwɛŋmɔ baanyɛ atsu nii ni etsu eha David lɛ pɛpɛɛpɛ yɛ be mli ni esusuɔ kpɔ̃mɔ kɛmiijɛ Mizraim lɛ he sane lɛ he lɛ.

Agbɛnɛ hu, susumɔ bɔ ni Yehowa jɛɔ suɔmɔ mli ekpɔ̃ɔ wɔ kɛjɛɔ jatsu ni esha kɛbaa wɔnɔ lɛ he okwɛ. Eŋɔ “Kristo lá” lɛ eha koni ‘etsuu wɔhenilee lɛ he kɛjɛ nitsumɔi gbohii amli.’ (Hebribii 9:14) Kɛ́ wɔdamɔ Kristo lá ni efɔse eshwie shi lɛ nɔ wɔtsake wɔtsui ni wɔbi eshaifaa lɛ, Nyɔŋmɔ jieɔ ejwɛŋmɔ kwraa kɛjɛɔ wɔnɔtɔ̃mɔi lɛ anɔ​—⁠‘tamɔ boka kɛ anai teŋ jekɛmɔ’​—⁠ni ehaa wɔnáa ehiɛ duromɔ. Agbɛnɛ hu susumɔ Yehowa gbɛjianɔtoo ni ji Kristofoi akpeei, naanyobɔɔ ni tswaa mɔ emaa shi, nɔkwɛlɔi ni yɔɔ asafo lɛ mli lɛ, kɛ Biblia kasemɔ he woji ni wɔnine shɛɔ nɔ kɛjɛɔ “tsulɔ anɔkwafo kɛ nilelɔ” lɛ dɛŋ lɛ he okwɛ. (Mateo 24:45) Ani Yehowa nijujifeemɔi nɛɛ yeee ebuaaa wɔ ni wɔha wekukpaa ni kã wɔ kɛ lɛ teŋ lɛ mli awa? David jaje akɛ: “Mɔbɔnalɔ kɛ durolɔ ji Yehowa, emli fuuu mra, ni emɔbɔnalɛ fa. . . . Jeee wɔhe eshai lɛ anaa ekɛ wɔ yeɔ yɛ, ni jeee wɔnishaianii lɛ anaa ewoɔ wɔ nyɔmɔ yɛ.” (Lala 103:​8-​14) Yɛ anɔkwale mli lɛ, Yehowa suɔmɔ kwɛmɔ lɛ nɔ jwɛŋmɔ baanyɛ atsirɛ wɔ koni wɔwo ehiɛ nyam ni wɔkafo egbɛi krɔŋkrɔŋ lɛ.

“Nyɛjiea Yehowa Yi, Nyɛ Enitsumɔi lɛ Fɛɛ”

Kɛ akɛ Yehowa ni bɛ naagbee, “naanɔ Mawu” lɛ to ‘adesa ni gboɔ’ lɛ ‘gbii’ ahe lɛ, eyɛ kuku lɛɛlɛŋ​—⁠“tamɔ jwɛiaŋ fɔfɔi.” Shi David kɛ hiɛsɔɔ susu akɛ: “Yehowa mɔbɔnalɛ lɛ yɛ kɛjɛ naanɔ kɛmiiya naanɔ yɛ mɛi ni sheɔ lɛ gbeyei lɛ anɔ, ni ejalɛ lɛ yɛ ha bii abii, ha mɛi ni toɔ ekpaŋmɔ lɛ kɛ mɛi ni hiɛ yɔɔ ekpɔi lɛ anɔ ni amɛyeɔ nɔ lɛ.” (1 Mose 21:33, NW shishigbɛ niŋmaa; Lala 103:15-​18) Yehowa hiɛ kpaaa mɛi ni sheɔ lɛ gbeyei lɛ anɔ. Ebaaha amɛ naanɔ wala yɛ be ni sa mli.⁠—⁠Yohane 3:​16; 17:⁠3.

Beni ewieɔ hiɛsɔɔ ni eyɔɔ kɛha maŋtsɛ ni Yehowa ji lɛ he lɛ, David kɛɛ akɛ: “Yehowa lɛ, eŋɔ emaŋtsɛyeli lɛ ema shi yɛ ŋwɛi, ni emaŋtsɛyeli lɛ yeɔ nii fɛɛ nɔ.” (Lala 103:19) Eyɛ mli akɛ awie Yehowa maŋtsɛyeli lɛ he yɛ faŋŋ mli yɛ be ko mli yɛ Israel maŋtsɛyeli beaŋ moŋ, shi emaŋtsɛsɛi lɛ yɛ ŋwɛi diɛŋtsɛ. Akɛni lɛ ji Bɔlɔ lɛ hewɔ lɛ, Yehowa ji Jeŋ Muu Fɛɛ Nɔyelɔ ni etsuɔ nɔ ni esumɔɔ he nii yɛ ŋwɛi kɛ shikpɔŋ lɛ nɔ taakɛ lɛ diɛŋtsɛ eyiŋtoo ji ha lɛ naa.

David wo ŋwɛibɔfoi lɛ po ŋaa. Ela akɛ: “Nyɛjiea Yehowa yi, nyɛ ebɔfoi lɛ, nyɛ hewalɔi ekãalɔi ni yeɔ ewiemɔ nɔ, ni nyɛboɔ ewiemɔ lɛ gbee toi lɛ! Nyɛjiea Yehowa yi, nyɛ etai lɛ fɛɛ, nyɛ esuɔlɔi ni feɔ esuɔmɔnaa nii lɛ! Nyɛjiea Yehowa yi, nyɛ enitsumɔi fɛɛ ni yɔɔ emaŋtsɛyelihei lɛ fɛɛ lɛ! Jiemɔ Yehowa yi, misusuma!” (Lala 103:20-​22) Ani esaaa akɛ Yehowa nifeemɔi ni mlihilɛ yɔɔ mli lɛ ahe susumɔ tsirɛɔ wɔ hu koni wɔjie eyi? Eka shi faŋŋ akɛ hɛɛ! Ni wɔbaanyɛ wɔná nɔmimaa akɛ, wɔ diɛŋtsɛ wɔgbee ni wɔkɛaajie Nyɔŋmɔ yi lɛ elaajeŋ yɛ yijiemɔ lala ni gbɛɔ waa ni bɔfoi anɔkwafoi anɔ po fata he lɛ mli. Eba akɛ, wɔbaajɛ wɔtsui muu fɛɛ mli wɔjie wɔŋwɛi Tsɛ lɛ yi, ni wɔwie ehe ekpakpa daa gbi. Lɛɛlɛŋ, nyɛhaa wɔkɛ David wiemɔi lɛ atsuɔ nii, “Jiemɔ Yehowa yi, misusuma.”

[Shishigbɛ niŋmai]

[Mfoniri ni yɔɔ baafa 23]

David jwɛŋ Yehowa suɔmɔ mlihilɛ nifeemɔi lɛ ahe. Ani ofeɔ nakai?