“Wala Aboloo” Yɛ Kɛha Mɛi Fɛɛ

“Miji aboloo ni hiɛ ka ni jɛ ŋwɛi ba lɛ; kɛji mɔ ko ye aboloo nɛɛ eko lɛ, ehiɛ aaaka kɛaatee naanɔ. Shi aboloo ni mikɛbaaha Iɛ ji miheloo ni mikɛbaaha yɛ je lɛ wala hewɔ lɛ.”—YOHANE 6:51.

 1. Mɛɛ shihilɛ ko ni oshara yɔɔ mli adesai kɛkpeɔ ŋmɛnɛ?

JEEŊMƆ beebe ajɛ akɛ aboloo loo bodobodo, niyenii ni ayeɔ lɛ babaoo yɛ shikpɔŋ nɔ lɛ elɛ adesai aje lɛ. No hewɔ Iɛ atsɛɔ lɛ yɛ gbɛ ni ja nɔ akɛ wala dɛhiɛmɔ tso. Shi ŋmɛnɛ Iɛ aboloo he hɔmɔ ebatsɔ sane ni oshara yɔɔ mli. Ŋmɛnɛ, hɔmɔ miiye shikpɔŋ lɛ nɔ bii amlijaa ejwɛ mli ekome. Nyɛsɛɛ nɛɛ nɔŋŋ The Globe and Mail ni aŋmaa yɛ Toronto, Canada lɛ kɛɛ akɛ: “Hɔmɔ tamɔ tawuu, eleee husui.” Wolo nɛɛ tsi Jeŋmaji Ekomefeemɔ lɛ mli onukpa ko ni kwɛɔ hɔmɔ ni yaa nɔ yɛ Afrika nɔ lɛ ta akɛ eebɔ kɔkɔ akɛ Afrika miihe abote “osharai ni baa adesai anɔ ni da fe fɛɛ, nɔ ni kaà adesai fe fɛɛ eko ni wɔkɛkpe dã Iɛ mli.”

 2, 3. (a) Hɔmɔ ni yaa nɔ lɛ ji mɛɛ “okadi” ko fa? (b) Mɛɛ gbɛ nɔ abaatsɔ ni ana tsabaa aha hɔmɔ he naagbai? (d) Mɛni he hiaa babaoo moŋ fe fɛɛ, ni mɛɛ nɔmimaa ni miishɛɛ yɔɔ mli Yesaia 25:8 kɛhaa?

² Yesu gba akɛ hɔmɔ baafee ba ni eba Maŋtsɛyeli hewalɛ mli lɛ he okadi lɛ fa. (Mateo 24:3, 7, 32, 33; 25:31, 32; Luka 21:11) Kwɛ bɔ ni wɔmii baanyɛ ashɛ wɔhe aha akɛ e-Maŋtsɛyeli lɛ ebɛŋkɛ! Etsɛŋ ni nɛkɛ anunyam Maŋtsɛ nɛɛ baakpata adesai henyɛlɔi fɛɛ ahiɛ ni ejie maŋkwramɔŋ kɛ shika helɛtemɔ mli jalɛ sane ni ayeee ni kɛ piŋmɔi babaoo eba adesai anɔ lɛ kɛya. Kɛkɛ lɛ gbɔmɛi fɛɛ amli baafili amɛ ejaakɛ amɛnine baashɛ amɛ daa ŋmaa nɔ.—Mateo 6:10, 11; 24:21, 22; Daniel 2:44; Abɛi 29:2.

³ Yɛ jalɛ nɔyeli shishi lɛ, wɔshikpɔŋ kpakpa lɛ baanyɛ aba niyenii “babaoo,” nɔ ni fa bɔ ni mɛi ni fa fe mɛi ni yɔɔ shikpɔŋ lɛ nɔ ŋmɛnɛ baanyɛ aye. (Lala 72:12-14, 16, 18) Yehowa baaŋmɛ nibii kpakpai ahe okpɔlɔ aha ewebii. (Yesaia 25:6) Shi no kroko ni fata he hu he miihia. Yɛ be mli ni afii lɛ yaa hiɛ lɛ, ani adesai ahe baaye lolo ni amɛgboi? Yɛ miishɛɛ mli lɛ Yesaia 25:8 yaa nɔ ewieɔ Yehowa he akɛ: “Eeemi gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafonui.” Mɛɛ gbɛ nɔ aaatsɔ afee enɛ yɛ?

Yehowa Gbɛjianɔtoo Ni Suɔmɔ Yɔɔ Mli Lɛ

 4. Mɛɛ gbɛjianɔtoo ni suɔmɔ yɔɔ mli Yehowa fee yɛ Mizraim?

⁴ Beni Yosef ji niyenii anɔkwɛlɔ yɛ Mizraim lɛ, no mli lɛ abele loo ŋmaa babaoo yɛ. No hewɔ ni eba lɛ nakai ji akɛ, beni Farao hala Yosef lɛ, ekɛ nilee saa ehe eto afii kpawo hɔmɔ ni baaba lɛ, ni Yehowa kɛ ejɔɔmɔ fata he. (1Mose 41:49) Niyenii babaoo yɛ kɛha mɔ fɛɛ mɔ, ni babaoo yɛ ni abaanyɛ akɛha mɛi krokomɛi. Beni Yosef tsɛ Yakob kɛ Yosef nyɛmimɛi hii lɛ kɛ amɛwekui bafata ehe yɛ Mizraim lɛ, amɛná nakai Ŋwɛi duromɔ lɛ he sɛɛ babaoo. Ŋwanejee ko kwraa bɛ he akɛ nakai Israelbii lɛ bale masha aboloo jogbaŋŋ yɛ biɛ, ejaakɛ aje enɛ feemɔ shishi yɛ Mizraim.

 5. (a) Mɛɛ gbɛ nɔ Yehowa tsɔ ekɛ niyenii kɛ hehaanɔ ha yɛ ŋa lɛ nɔ? (b) Namɛi kɛ Israel na jɔɔmɔ nɛɛ mli gbɛfaŋnɔ, ni mɛni hewɔ?

⁵ Yɛ sɛɛ mli lɛ, Yehowa to gbɛjianɔ ko ni suɔmɔ yɔɔ mli kɛha ewebii lɛ. Enɛ ji be mli ni Israelbii akpekpei abɔ shi Mizraim ni amɛtsɔ Sinai ŋa kpalanaa lɛ nɔ lɛ. Te afee tɛŋŋ ni nɛkɛ asafo babaoo nɛɛ aaana niyenii yɛ nakai shia ŋa ni nɔ yɔɔ gbeyei lɛ nɔ? Eyɛ mli akɛ Yehowa mli efu amɛ yɛ hemɔkɛyeli ni amɛbɛ lɛ hewɔ moŋ, shi “kɛlɛ efa ŋwɛi atatui lɛ, ni egbele ŋwɛi shinai lɛ hu, ni enɛ mana eshwie amɛnɔ, ni amɛye, ni eha amɛ ŋwɛi ŋmaa lɛ eko.” “Eha amɛtɔrɔ kɛ ŋwɛi aboloo” afii 40 sɔŋŋ. (Lala 78:22-24; 105:40; 2 Mose 16:4, 5, 31, 35) Kaaha ohiɛ miikpa nɔ hu akɛ jeee Israelbii lɛ pɛ ye mana lɛ. “Futufutu gbɔmɛi babaoo” ni jeee Israelbii he Yehowa amɛye, ni amɛfata amɛhe yɛ gbɛ ni amɛfa kɛjɛ Mizraim lɛ mli. Nyɔŋmɔ kɛ mana hu lɛ amɛ.—2 Mose 12:38.

 6. (a) Mɛni ni he hiaa waa ka gbɔmɔ hiɛ, ni mɛni hewɔ? (b) Mɛni nɔ mi Israel afɔleshaa sɔrɔtoi lɛ ma, ni mɛni he mfoniri amɛfee?

⁶ Shi, nɔ ko yɛ ni he hiaa adesai waa fe “aboloo ni jɛ ŋwɛi” diɛŋtsɛ. Mɛi ni ye nakai naakpɛɛ mana lɛ po gbɔlɔ ni amɛgboi, ejaakɛ eshafeemɔ shihilɛ ni gbɔmɔ yɔɔ mli lɛ haa egboɔ ni niyenii fɛɛ niyenii ni ebaaye kɔɔɔ he eko. (Romabii 5:12) Afɔlei ni Israelbii lɛ shashai lɛ gbele gbɛ ko ni baaha adesa ana shidaamɔ kpakpa yɛ Nyɔŋmɔ hiɛ, shi nakai afɔlei lɛ hu ma eshafeemɔ shihilɛ ni maŋ lɛ yɔɔ mli lɛ nɔ mi. Amɛnyɛŋ “amɛjie eshai gbi ko gbi ko.” Agbɛnɛ hu nakai afɔleshaai lɛ fee Yesu afɔleshaa kome ni no nɔ abaatsɔ ajie eshai “kɛya kwraa” lɛ he mfoniri. Agbɛnɛ Yesu baanyɛ ajɛ egbɛhe ni nɔ kwɔ gojoo yɛ ŋwɛi Iɛ ni ekɛ efɔleshaa lɛ mli sɛɛnamɔi lɛ atsu nii agbɛnɛ.—Hebribii 10:1-4, 11-13.

“Anɔkwa Aboloo Ni Jɛ Ŋwɛi”

 7. (a) Mɛɛ shishinumɔ hee esa akɛ akɛha Yesu wiemɔi ni yɔɔ Yohane yitso lɛ? (b) Mɛni hewɔ Yesu ka gbɔmɛi asafo babaoo lɛ hiɛ lɛ?

⁷ Nyɛhaa wɔgbelea Yohane yitso 6 agbɛnɛ. Yesu wiemɔi ni yɔɔ biɛ lɛ jeee nɔ ni aŋma yɛ yitso 5 lɛ nɔtsamɔ. Emli sane lɛ yɛ sɔrɔto, ejaakɛ no mli lɛ afi kome eho. Abashɛ afi 32 Ŋ.B. agbɛnɛ. Jeee Yudafoi ni yɔɔ Yerusalem lɛ ni buɔ amɛhe jalɔi lɛ ateŋ eyɔɔ dɔŋŋ, shi moŋ eyɛ gbɔmɛi foji ni yɔɔ Galilea lɛ ateŋ. Yesu efee naakpɛɛ nii bianɛ, ni ji mɛi 5,000 ni ekɛ aboloi enumɔ kɛ loi bibii enyɔ lɛ amɛ lɛ. Enɔ jetsɛremɔ lɛ, gbɔmɛi babaoo nyiɛ Yesu sɛɛ ni amɛmiikpa niyenii kroko ni amɛbaaye yaka lɛ gbɛ. No hewɔ lɛ Yesu kɛɛ amɛ akɛ: “Jeee okadii lɛ ni nyɛna lɛ hewɔ ni nyɛtaoɔ mi nɛɛ, shi moŋ akɛni nyɛye aboloo lɛ eko ni nyɛtɔrɔ lɛ hewɔ. Nyɛkɛtsua ŋmaa ni fiteɔ lɛ he nii, shi moŋ ŋmaa ni hiɔ shi kɛyaa naanɔ wala mli . . . lɛ he nii.” Yesu Tsɛ lɛ tsu lɛ koni ekɛ niyenii ni tamɔ nakai abaha mɛi fɛɛ ni baahe lɛ aye lɛ. Enɛ baafee “anɔkwa aboloo ni jɛɔ ŋwɛi lɛ,” nɔ ni naanɔ sɛɛnamɔ yɔɔ he fe mana diɛŋtsɛ ni blema Israelbii lɛ ye lɛ.—Yohane 6:26-32.

 8. Te mɔ ko aaafee tɛŋŋ ni enine ashɛ naanɔ wala nɔ?

⁸ Yesu tee nɔ etsɔɔ sɛɛnamɔi ni baajɛ nakai “niyenii” lɛ yeli mli aba lɛ mli: “Miji wala aboloo lɛ; mɔ ni baa miŋɔɔ lɛ hɔmɔ yeŋ lɛ gbi ko gbi ko, ni mɔ ni heɔ minɔ eyeɔ lɛ kumai hu yeŋ lɛ gbi ko gbi ko . . . Ejaakɛ enɛ ji mitsɛ suɔmɔnaa nii Iɛ, akɛ mɔ fɛɛ mɔ ni kwɛɔ bi lɛ ni eheɔ enɔ eyeɔ lɛ ana naanɔ wala, ni mi lɛ matee lɛ shi ekoŋŋ yɛ naagbee gbi lɛ nɔ.”—Yohane 6:35-40.

 9, 10. (a) Esoro “wala aboloo” lɛ yɛ mana lɛ he yɛ mɛɛ gbɛ nɔ? (b) Taakɛ Yohane 6:42-51 tsɔɔ lɛ, namɛi Yesu kɛ eheloo lɛ haa? (d) Mɛnɛɛmɛi ‘yeɔ eheloo’ lɛ yɛ mɛɛ gbɛ nɔ?

⁹ Nakai Yudafoi lɛ ni diɔ heloo naa nibii asɛɛ lɛ amli fu yɛ nɛkɛ wiemɔi nɛɛ ahewɔ. Nɔ ni amɛle yɛ Yesu he pɛ ji Yosef kɛ Maria bi. Yesu bɔ amɛ kɔkɔ akɛ: “Nyɛkawiea huhuuhu yɛ nyɛteŋ. Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ da, ni mi lɛ matee lɛ shi yɛ naagbee gbi lɛ nɔ;” Kɛkɛ ni eti mli akɛ: “Miji wala aboloo lɛ, nyɛtsɛmɛi lɛ ye mana lɛ yɛ ŋa lɛ nɔ ni amɛgboi. Enɛ ji aboloo ni jɛɔ ŋwɛi baa lɛ, koni gbɔmɔ aye ni ekagbo. Miji aboloo ni hiɛ ka ni jɛ ŋwɛi ba lɛ; kɛji mɔ ko ye aboloo nɛɛ eko lɛ, ehiɛ aaaka kɛaatee naanɔ. Shi aboloo ni mikɛbaaha lɛ ji miheloo ni mikɛbaaha yɛ je lɛ wala hewɔ lɛ.”—Yohane 6:42-51.

¹⁰ No hewɔ lɛ, “je lɛ wala hewɔ”—adesai ni abaanyɛ akpɔ amɛ lɛ fɛɛ—hewɔ ni Yesu kɛ eheloo lɛ ha. Ni “mɔ fɛɛ mɔ” ni jɛ adesai aje lɛ mli ni yeɔ nakai okadi “aboloo” lɛ eko kɛtsɔɔ hemɔkɛyeli ni enaa yɛ nakai Yesu afɔleshaa lɛ mli hewalɛ ni kpɔ̃ɔ mɔ lɛ nɔ lɛ baanyɛ atsɔ gbɛ ni kɛ mɔ yaa naanɔ wala mli lɛ nɔ. Biɛ nɛɛ wɔnaa bɔ ni “futufutu gbɔmɛi babaoo” ni kɛ Israelbii lɛ ye mana lɛ yɛ ŋa kpalanaa lɛ nɔ lɛ feɔ asafo babaoo ni ji Yesu “toi krokomɛi” lɛ ni kɛ “Nyɔŋmɔ Israel” mli shwɛɛnii ni afɔ amɛ mu lɛ yeɔ Yesu heloo bianɛ yɛ okadi gbɛ nɔ lɛ he mfoniri yɛ. Hemɔkɛyeli ni amɛnaa yɛ efɔleshaa lɛ mli lɛ nɔ amɛtsɔɔ amɛfeɔ enɛ.—Galatabi 6:16; Romabii 10:9, 10.

11. Mɛɛ Yesu wiemɔi krokomɛi ha Yudafoi lɛ ahe jɔ̃ amɛ Iɛ, ni mɛni hewɔ?

¹¹ Beni eyɔɔ Galilea lɛ, Yesu toibolɔi lɛ ateŋ mɛi pii ahe jɔ̃ amɛ yɛ ewiemɔ nɛɛ hewɔ. No hewɔ lɛ yɛ be mli ni ewieɔ eheloo he sane lɛ he lolo lɛ, etee hiɛ lolo yɛ mli ekɛɛ amɛ akɛ: “Lɛlɛŋ, lɛlɛŋ miikɛɛnyɛ akɛ: Kɛji nyɛyeee gbɔmɔ bi lɛ heloo ni amɛnuuu elá lɛ, nyɛbɛ wala yɛ nyɛmli. Mɔ ni yeɔ miheloo ni enuɔ milá lɛ, eyɛ naanɔ wala, ni mi lɛ matee lɛ shi yɛ naagbee gbi lɛ nɔ. Ejaakɛ miheloo lɛ, anɔkwa ŋmaa ni, ni milá lɛ anɔkwa numɔ nɔ̃ ni.” (Yohane 6:53-55) Nɔ ko ni haa mɔ he jɔɔ lɛ loo ŋmiŋmi mɔɔ mɔ diɛŋtsɛ! Jeee akɛ Yudafoi lɛ nyaŋeɔ gbɔmɔ loo ni aaaye lɛ kɛkɛ, shi moŋ Mla ni yɔɔ 3 Mose 17:14 lɛ hu maa nɔ mi veveeve akɛ agu “lá ko lá ko” ni aaaye.

12. (a) Mɛni nɔ mi Yesu maa yɛ biɛ lɛ? (b) Mɛɛ ŋmalɛi tsɔɔ akɛ enɛ jeee nɔ ni yɔɔ kɛha Yesu hefatalɔi niyelɔi lɛ pɛ?

¹² Shi, Yesu miima nɔ mi yɛ biɛ akɛ mɔ fɛɛ mɔ ni baana naanɔ wala lɛ baafee nakai yɛ hemɔkɛyeli ni mɔ lɛ aaana yɛ Yesu afɔle ni ekɛ egbɔmɔtso lɛ baasha ni efɔse elá lɛ eshwie shi yɛ sɛɛ mli lɛ nɔ. (Hebribii 10:5, 10; 1 Petro 1:18, 19; 2:24) Nɛkɛ gbɛjianɔtoo nɛɛ bɛ kɛha Yesu nanemɛi niyelɔi lɛ pɛ. Esa akɛ “asafo babaoo” ni jeɔ “amanehulu kpeteŋkpele” lɛ mli lɛ afata he, ejaakɛ mɛnɛɛmɛi “efɔ amɛtadei lɛ ahe ni amɛha eyɛ futaa yɛ toobi lɛ lá lɛ mli.” Hemɔkɛyeli ni amɛyɔɔ yɛ Yesu afɔleshaa lɛ mli taakɛ ejeɔ kpo hu akɛ “amɛjaa” Nyɔŋmɔ nyɔɔŋ kɛ shwane lɛ haa abaa amɛyi kɛtsɔɔ shikpɔŋ nɔ haomɔ be ni fe fɛɛ lɛ mli. Nakai nɔŋŋ hu abu Rahab jalɔ ni eyi ná wala beni Yoshua tu Yeriko eha hiɛkpatamɔ lɛ.—Kpojiemɔ 7:9, 10, 14, 15; Yoshua 6:16, 17; Yakobo 2:25.

“Wala Yɛ Nyɛmli”

13. Mɛni abaanyɛ ayoo yɛ be mli ni akɛ Yohane 5:26 toɔ Yohane 6:53 he lɛ? (b) Mɛɛ Hela wiemɔ he mla yeɔ ebuaa wɔ ni wɔnuɔ Yohane 6:53 shishi lɛ? (d) No hewɔ lɛ, “wala yɛ nyɛmli” lɛ tsɔɔ mɛni, ni wiemɔi nɛɛ kɔɔ namɛi ahe?

¹³ Yesu kɛ “naanɔ wala” to “wala yɛ nyɛmli” he yɛ Yohane 6:53, 54. No hewɔ lɛ, yɛ yitso nɛɛ mli lɛ, etamɔ nɔ ni wiemɔ, “wala yɛ nyɛmli” lɛ miitsɔɔ nɔ kroko yɛ nɔ ni Yesu wie yɛ Yohane 5:26 lɛ he. Wiemɔi ni tamɔ nakai wiemɔi ahe mla ni akɛtsu nii akɛ “wala yɛ nyɛmli” lɛ hu jeɔ kpo yɛ Hela Ŋmalɛi lɛ amli. Akɛ nɔkwɛmɔ nɔ lɛ: “Nyɛhaa ŋoo ahia nyɛmli” (Marko 9:50) kɛ “amɛná amɛtɔmɔ lɛ he nyɔmɔwoo ni sa yɛ amɛ diɛŋtsɛ amɛmli (Romabii 1:27, NW).a Yɛ nɔkwɛmɔ nii nɛɛ mli lɛ, wiemɔ kuku lɛ etsɔɔɔ hewalɛ ni mɔ ko yɔɔ ni ekɛaawo mɔ ko ŋoo aloo ni ekɛaagbala mɔ ko toi. Shi moŋ, aatsɔɔ emuuyeli loo obɔyimɔ yɛ mligbɛ. No hewɔ lɛ, taakɛ sane ni yɔɔ Yohane 6:53 lɛ tsɔɔ lɛ, “wala yɛ nyɛmli” lɛ baatsɔɔ akɛ yɛ naagbee lɛ mɔ lɛ ebote wala mli kwraa. “Asafoku bibioo” ni ji Maŋtsɛyeli niyelɔi lɛ nine shɛɔ enɛ nɔ yɛ amɛshitee kɛmiiya ŋwɛi be lɛ mli, ni “toi krokomɛi” lɛ hu anine shɛɔ enɛ nɔ yɛ afii akpe lɛ naagbee, yɛ be mli ni aka amɛ ni abu amɛ jalɔi kɛha naanɔ wala yɛ Paradeiso shikpɔŋ lɛ nɔ lɛ.—1 Yohane 3:2; Kpojiemɔ 20:4, 5.

14. Namɛi hu “aboloo ni jɛɔ ŋwɛi baa” lɛ he baaba sɛɛnamɔ aha amɛ lɛ, ni yɛ mɛɛ gbɛ nɔ?

¹⁴ “Aboloo ni jɛɔ ŋwɛi” lɛ he baaba sɛɛnamɔ aha mɛi krokomɛi hu. Yesu wie yɛ mɔ ni ‘yeɔ eheloo lɛ ni enuɔ elá lɛ’ shi egboɔ lɛ he akɛ: “Ni matee lɛ shi yɛ naagbee gbi lɛ nɔ.” Anuɔ shishi akɛ ateeɔ Kristofoi ni afɔ amɛ mu ni wɔɔ yɛ gbele mli lɛ ashi yɛ “naagbee tɛtrɛmantrɛ” lɛ kpamɔ mli, ni enɛ baa yɛ Yesu Kristo “puemɔ” yɛ Maŋtsɛyeli anunyam mli lɛ mli. (1 Korintobii 15:52; 2 Timoteo 4:1, 8) Shi “toi krokomɛi” ni wɔɔ yɛ gbele mli lɛ hu? Marta wiemɔi yɛ be mli ni Lazaro gbo lɛ yɛ miishɛɛ kɛha wɔ yɛ biɛ, ejaakɛ no mli lɛ Yudafoi ni sheɔ Nyɔŋmɔ gbeyei lɛ bɛ hiɛnɔkamɔ ko kwraa fe shikpɔŋ nɔ shitee lɛ. Atsɔɔ Marta hemɔkɛyeli lɛ yɛ nɛkɛ wiemɔi nɛɛ amli: “Mile akɛ [Lazaro] ebaate shi yɛ naagbee gbi lɛ nɔ.” (Yohane 11:24) No hewɔ lɛ wɔ mɛi ni wɔyɔɔ wala mli bianɛ yɛ ba ni Kristo eba be nɛɛ mli lɛ baanyɛ ana hiɛnɔkamɔ akɛ “asafo babaoo” lɛ mli anɔkwafoi ni wɔɔ yɛ gbele mli lɛ baaná mra shitee yɛ shikpɔŋ nɛɛ nɔ bɔni afee ni amɛbana “aboloo ni jɛɔ ŋwɛi baa” lɛ yeli mli gbɛfaŋnɔ yɛ naanɔ wala hewɔ. Mɛɛ hiɛnɔkamɔ ni yɔɔ nyam po enɛ ji, hiɛnɔkamɔ ni ama nɔ mi akɛ atee Yesu diɛŋtsɛ shi kɛjɛ gbohii ateŋ!—1 Korintobii 15:3-8.

‘Hiɔ Kristo Mli’

15. Yesu wiemɔi ‘hiɔ Kristo mli’ lɛ kɔɔ namɛi ahe, ni mɛni hewɔ ohaa hetoo nakai?

¹⁵ Yesu tee nɔ ekɛɛ akɛ: “Mɔ ni yeɔ miheloo ni enuɔ mila lɛ, ehiɔ mimli, ni mi hu mihiɔ emli.” (Yohane 6:56) No hewɔ lɛ enɛ ji anɔkwale yɛ “mɔ fɛɛ mɔ” ni heɔ Yesu afɔleshaa lɛ eyeɔ, ni eyɔɔ hiɛnɔkamɔ akɛ ‘ebaaná wala yɛ lɛ diɛŋtsɛ emli’ lɛ he. Mɛi fɛɛ ni jieɔ hemɔkɛyeli ni tamɔ nɛkɛ kpo lɛ baanyɛ ‘ahi Yesu mli.’ Shi “asafo babaoo” lɛ ni yɔɔ shikpɔŋ nɔ shihilɛ he hiɛnɔkamɔ lɛ nyɛŋ ‘ahi Kristo mli’ kɛ shishinumɔ akɛ amɛkɛ lɛ baafee nanemɛi niyelɔi, eyɛmforo kuu lɛ mlibii ni nine shɛɔ ŋwɛi shitee nɔ tamɔ enɔ̃ lɛ. (Romabii 8:1, 10; 1 Korintobii 1:2; 2 Korintobii 5:17; 11:2; Galatabii 3:28, 29; Efesobii 1:1, 4, 11; Filipibii 3:8-11) Ni kɛlɛ esa akɛ mɛi fɛɛ ni yɔɔ shikpɔŋ nɔ shihilɛ he hiɛnɔkamɔ lɛ anyɛ ni esa ni amɛkɛ Tsɛ lɛ kɛ Bi lɛ akpa gbee kwraa yɛ “Nyɔŋmɔ suɔmɔnaa nii kpakpai ni hi kɛwula shi lɛ” lee kɛ efeemɔ mli, taakɛ eji anɔkwale hu yɛ asafoku bibioo lɛ he lɛ.—Romabii 12:2; Okɛto Yohane 17:21 he.

16. (a) Mɛi fɛɛ ni tsɔɔ hemɔkɛyeli yɛ Kristo afɔleshaa lɛ mli lɛ ‘hiɔ’ Yesu ‘mli’ yɛ mɛɛ gbɛi sɔrɔtoi ni he hiaa anɔ? (b) Amɛ ekomefeemɔ yɛ yiŋtoo kɛ mɔdɛŋbɔɔ mli lɛ jeɔ kpo yɛ mɛni mli?

¹⁶ No hewɔ lɛ, Kristo heloo kɛ elá ni ekɛsha afɔle lɛ jara lɛ yɛ kɛha mɛi fɛɛ ni tsɔɔ hemɔkɛyeli yɛ mli ŋmɛnɛ lɛ, ni mɛi fɛɛ ni kɛ amɛhe haa enɛ lɛ baanyɛ ‘ahi’ Yesu ‘mli’ yɛ gbɛi sɔrɔtoi ni he hiaa anɔ. Amɛ fɛɛ amɛbaatsɔmɔ Yehowa Nyɔŋmɔ je muu fɛɛ weku lɛ fa. Amɛnaa je muu fɛɛ ekomefeemɔ yɛ hemɔkɛyeli, yiŋtoo kɛ nitsumɔ mli lɛ mli ŋɔɔmɔ yɛ “naagbee gbii” ni ji jaramɔ bei nɛɛ po mli. Akɛni amɛtsɔɔ hemɔkɛyeli yɛ Yesu mli hewɔ lɛ, amɛnyɛɔ amɛtsuɔ “nitsumɔi wuji” ni dara kwraa fe nɔ ni Yesu tsu yɛ shikpɔŋ nɛɛ nɔ lɛ. Ni nyɛkadia akɛ akpei abɔ ni tsuɔ Yehowa nitsumɔ lɛ yɛ nɛkɛ be nɛɛ mli lɛ ateŋ oha fɛɛ mli 99.7 ji “asafo babaoo” lɛ mlibii. (Yohane 14:12; Romabii 10:18) Nɛkɛ ekomefeemɔ yɛ yiŋtoo kɛ mɔdɛŋbɔɔ mli nɛɛ jeɔ kpo yɛ je muu fɛɛ odaseyeli kpeteŋkpele lɛ kɛ suɔmɔ mli ni ajɛɔ afiɔ Buu Mɔɔ Asafo lɛ tsumaa he gbɛjianɔtoo sɔrɔtoi lɛ asɛɛ lɛ mli. (Lala 110:3) Adesai aje lɛ ateŋ mɛi enyiɛ baahe aye lolo ni amɛbatsɔmɔ ekomefeemɔ ni jara wa nɛɛ mlibii lɛ, no lɛ be pɛ baatsɔɔ. Nyɛsɛɛ akɔntaabuu ni je kpo lɛ tsɔɔ akɛ Odasefoi ni yɔɔ ekãa 3,024,131 yɔɔ ni kɛ ekãa sɔmɔɔ.

17. Mɛɛ saji otii esa akɛ mɛi fɛɛ ni baa Kaimɔ lɛ shishi lɛ ayoo?

¹⁷ Wɔyɛ hiɛnɔkamɔ akɛ mɛi ni yɔɔ wiemɔ lɛ he miishɛɛ lɛ ateŋ mɛi pii baaha mɛi ni baaba 1986 Kaimɔ gbijurɔyeli lɛ shishi lɛ ayi afa waa. “Toi krokomɛi” lɛ ateŋ akpekpei abɔ baaba Kaimɔ lɛ shishi, kɛ “asafoku bibioo” ni amɛyibɔ nɔ gbɔɔ lɛ akpei komɛi hu—amɛ fɛɛ amɛhiɛ sɔɔ Yehowa gbɛjianɔtoo ni suɔmɔ yɔɔ mli ni ekɛha kɛtsɔ Kristo nɔ lɛ, ni amɛhiɛ sɔɔ bɔ ni Kristo heloo lɛ kɛ elá lɛ he hiaa waa ha lɛ. Shi esa akɛ mɔ fɛɛ mɔ ayoo he ni edamɔ lɛ jogbaŋŋ. Kaimɔ lɛ shishi nibii lɛ yeli kɛ naanɔ wala haaa mɔ ko. Enɛɛmɛi ji Yesu afɔleshaa lɛ he okaditoo nibii ni akɛtsuɔ nii, klɛŋklɛŋ lɛ, yɛ “kpaŋmɔ hee” lɛ he. Mɛi ni afɔ amɛ mu ni aŋɔɔ amɛ awoɔ nakai kpaŋmɔ lɛ mli lɛ pɛ ji mɛi ni yeɔ nakai Kaimɔ lɛ nibii lɛ eko yɛ gbɛ ni sa nɔ. No ji akɛ, ákɛ mɔ ko yɛ nakai kpaŋmɔ hee lɛ mli, aloo mɔ lɛ bɛ mli. (1 Korintobii 11:20, 23-26) Mɛi ni bɛ kpaŋmɔ hee lɛ mli ni Yesu eŋɔko amɛ ewoko kpaŋmɔ kɛha maŋtsɛyeli lɛ mli lɛ yeee Kaimɔ lɛ shishi nibii lɛ eko, shi esa akɛ amɛyoo bɔ ni Yesu heloo kɛ elá ni ekɛsha afɔle lɛ he hiaa ha lɛ. (Luka 22:14-20, 28-30) Nɛkɛ afɔleshaa nɛɛ ji nɔ ni amɛbaatsɔ nɔ ni amɛnine ashɛ naanɔ wala nɔ yɛ shikpɔŋ nɔ.

18. Mɛɛ miishɛɛ jɛɔ nɔ ni Yesu afɔleshaa lɛ tsɔɔ lɛ shishi ni wɔɔnu faŋŋ lɛ mli baa?

¹⁸ Belɛ eba akɛ wɔ fɛɛ wɔɔba nɛkɛ Kaimɔ gbijurɔyeli nɛɛ shishi kɛ sane shishinumɔ ni mli ka shi faŋŋ yɛ nɔ ni Yesu afɔleshaa lɛ ji kɛha adesai lɛ he. Eba akɛ “asafoku bibioo” lɛ mlibii lɛ aaabu amɛtsɛmɛi lɛ akɛ nɔ ko ni jara wa waa, ni eba hu akɛ asafo babaoo lɛ ni ji “toi krokomɛi” lɛ ni amɛyi faa yɛ be fɛɛ mli lɛ aaaya nɔ anya yɛ hiɛnɔkamɔ mli akɛ amɛbaaná shikpɔŋ nɔ wala ni yeɔ emuu ‘yɛ amɛmli,’ yɛ be mli ni amɛkɛ hiɛsɔɔ buɔ ekome ni amɛkɛ Tsɛ lɛ kɛ Bi lɛ kɛ shwɛɛnii ni yɔɔ shikpɔŋ nɔ lolo ni amɛyibɔ nɔ gbɔɔ lɛ efee bianɛ lɛ waa lɛ. Kwɛ miishɛɛ ni wɔna bianɛ akɛ “wala aboloo” lɛ yɛ bianɛ kɛha mɛi fɛɛ!b

[Shishigbɛ niŋmai]

Sanebimɔi Ni Akɛtiɔ Mli

◻ Mɛɛ mana sɔrɔtoi enyɔ ko Yesu wie he yɛ ofi 32 Ŋ.B. ni akɛhaa namɛi?

◻ Namɛi Yesu fɔɔ nine etsɛɔ amɛ koni ‘amɛbaye eheloo ni amɛnu elá’ lɛ, ni mɛɛ gbɛ nɔ amɛtsɔɔ amɛfeɔ enɛ yɛ?

◻ “Wala yɛ nyɛmli“ lɛ shishi ji mɛni, ni mɛɛ gbɛ nɔ ni mɛɛ be nine shɛɔ enɛ nɔ yɛ?

◻ Mɛɛ miishɛɛ mɔ fɛɛ mɔ baanyɛ ana bianɛ yɛ “wala aboloo” lɛ hewɔ?

[Akrabatsa ni yɔɔ baafa 29]

“Amɛjɛɛɛ je lɛ mli taakɛ bɔ ni mi hu mijɛɛɛ je lɛ mli lɛ. Feemɔ amɛ krɔŋkrɔŋ yɛ onɔkwale lɛ mli; owiemɔ lɛ anɔkwaleŋ . . . Shi jeee mɛnɛɛmɛi ahewɔ kɛkɛ mibiɔ, shi mɛi ni baahe minɔ aye yɛ amɛwiemɔ naa Iɛ hu ahewɔŋ; koni amɛ fɛɛ amɛfee ekome, taakɛ bɔ ni bo, Ataa, oyɔɔ mimli ni mi hu miyɔɔ omli lɛ, koni amɛhu amɛfee ekome yɛ wɔmli, koni je lɛ ahe aye akɛ bo otsu mi.”—Yohane 17:16-22.