Hiɛnɔkamɔ Nyɔŋmɔ Lɛ Hiɛ Nyam Ni Wɔwoɔ
“Bɔ ni Yehowa kɛɛ nɛ:. . . ’Mɛi ni woɔ mihiɛ nyam lɛ, mawo amɛhiɛ nyam; shi mɛi ni gbeɔ mihe guɔ lɛ, abuŋ amɛ ahaŋ nɔ ko nɔ ko.’”—1 SAMUEL 2:30
1. Mɛɛ yiŋtoo ni wɔyɔɔ hewɔ ni wɔsumɔɔ ni wɔkɛ woo aha Yehowa lɛ? (1 Timoteo 1:17; Kpojiemɔ 4:11
YƐ GBƐKPAMƆI ni damɔ Biblia lɛ nɔ ni wɔbaanyɛ wɔna lɛ hewɔ lɛ, eja gbɛ kwraa ni jwɛŋmɔ yɛ mli hu kɛha wɔ akɛ wɔɔwo hiɛnɔkamɔ aloo “nɔhiɛkamɔ Nyɔŋmɔ,” “Nyɔŋmɔ ni haa hiɛnɔkamɔ” lɛ hiɛ nyam. (Romabii 15: 13, New World Translation) Mɛni hewɔ eyɔɔ nakai? Te wɔɔfee tɛŋŋ ni wɔ, ni wɔhe waaa, adesai ni yeee emuu nɛɛ wɔɔnyɛ wɔwo wɔjeŋ muu fɛɛ Bɔlɔ kpeteŋkpele lɛ hiɛ nyam hu? Ní ani lɛ hu eeewo wɔhiɛ nyam kɛto najiaŋ?
2. Te Yesu nu woo ni akɛaaha Nyɔŋmɔ lɛ he eha tɛŋŋ?
2 Wɔbaanyɛ wɔkase nii kɛjɛ nɔ ni ba Yesu nɔ lɛ mli. Wɔteŋ mɔ ko nyɛŋ aje bɔ ni Yesu sumɔɔ yɛ be fɛɛ mli akɛ eeewo e-Tsɛ lɛ hiɛ nyam lɛ he ŋwane. (Yohane 5:23; 12:28; 15: 8) Yɛ anɔkwale mli lɛ, Yesu wie eshi Farisifoi kɛ woloŋmalɔi ni ‘kɛ amɛnaabu woɔ Nyɔŋmɔ shi amɛtsui etsi ehe kɛjɛ ehe kɛtee shɔŋŋ’ lɛ waa. Ofainɛ kadimɔ akɛ woo ni amɛkɛhaaa Nyɔŋmɔ lɛ kɔɔ jwɛŋmɔi kɛ nifeemɔi ni esaaa he. (Mateo 15:7-9) Shi ani wɔbaanyɛ wɔkɛɛ akɛ, Kristo hiɛnɔkamɔ kɔɔ woo ni ekɛha Nyɔŋmɔ lɛ he? Ni te Yehowa here woo ni akɛha lɛ nɛɛ nɔ eha tɛŋŋ?
3. Te wɔfeɔ tɛŋŋ wɔleɔ akɛ Yesu kɛ ehiɛ fɔ Yehowa nɔ?
3 Yesu kɛ David wiemɔi ni yɔɔ Lala 16:10 lɛ to etsui mli: “Ejaakɛ oshiŋ misusuma ohaŋ [sheol] gbohiiaje. Ohaŋ omɔkrɔŋkrɔŋ lɛ ana laajemɔ bu lɛ.” Akɛni eyɔɔ nɛkɛ hiɛnɔkamɔ akɛ abaatee lɛ shi kɛjɛ gbohii ateŋ hewɔ lɛ, Yesu Kristo baanyɛ ni ekɛ wiemɔi ni woɔ mɔ hewalɛ waa nɛɛ aha efɔŋfeelɔ ni asɛŋ lɛ yɛ emasɛi lɛ: “Lɛlɛŋ miikɛɛ bo ŋmɛnɛ akɛ, Obaafata mihe yɛ Paradeiso.” (Luka 23:39-43, New World Translation) Etsɛɛɛ ni nakai efɔŋfeelɔ lɛ gbo, no hewɔ lɛ enyɛɛɛ ni yɛ gbii etɛ sɛɛ lɛ, ena Yesu hiɛnɔkamɔ akɛ abaatee lɛ shi lɛ nɔmimaa lɛ. Shi mɔ ni kɛ ehiŋmɛi na enɛ lɛ bɔ amaniɛ akɛ: “Nɛkɛ Yesu nɛɛ Nyɔŋmɔ tee lɛ shi; no he odasefoi ji wɔ fɛɛ.” (Bɔfoi lɛ Asaji 2:31, 32) Eji anɔkwale diɛŋtsɛ.
4. Mɛɛ woo sa Yesu, ni enine shɛ nɔ hu? (Kpojiemɔ 5:12)
4 Gbɔmɛi foji loo ohiafoi ni Yesu shiɛ eha amɛ lɛ ateŋ mɛi pii le akɛ eji mɔ ni sa wooo waa diɛŋtsɛ. (Luka 4:15; 19:36-38; 2 Petro 1:17, 18) Kɛkɛ ni egbo tamɔ awuyelɔ. Ani enɛ tsake nibii? Dabi, ejaakɛ Nyɔŋmɔ ni Yesu kɛ ehiɛ fɔɔ enɔ lɛ ekpɛlɛ enɔ momo. No hewɔ lɛ, Yehowa kɛ lɛ ba wala mli ekoŋŋ. Yɛ anɔkwale ni eji akɛ hiɛnɔkamɔ aloo “nɔhiɛkamɔ Nyɔŋmɔ” lɛ tee e-Bi lɛ shi kɛba wala mli ni ekɛ shihilɛ ni gbele bɛ mli ha ehe yɛ mumɔŋ shihilɛ he lɛ yeɔ odase akɛ Tsɛ lɛ miiya nɔ eewo e-Bi lɛ hiɛ nyam. Paulo kɛɛ: “Wɔna akɛ Yesu, mɔ ni gbele mli amanehulu lɛ hewɔ ni akɛ anunyam kɛ woo fi lɛ akekre lɛ, bɔni afee ni Nyɔŋmɔ duromɔ naa lɛ, esa enaa gbele eha mɔ fɛɛ mɔ.”—Hebribii 2:7, 9; Filipibii 2:9-11.
5. Awo Yesu hiɛ nyam yɛ mɛɛ gbɛ krɛdɛɛ nɔ, ni mɛɛ woo hu jɛ mli ha Nyɔŋmɔ?
5 Yesu, ni ewo Yehowa hiɛ nyam lɛ tsi gbɛ krɛdɛɛ ko ni Tsɛ lɛ wo ehiɛ nyam yɛ nɔ Iɛ ta. Yɛ be mli ni ejie ehe kpo etsɔɔ ebɔfoi anɔkwafoi lɛ, ekɛɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ. No hewɔ lɛ, nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli . . . Ní naa, milɛ mikɛnyɛ yɛ daa kɛyashi jeŋ naagbee lɛ.” (Mateo 28:18-20) No hewɔ lɛ, Tsɛ lɛ ku sɛɛ ewo Bi lɛ hiɛ nyam kɛtsɔ hegbɛ krɛdɛɛ ko ni ekɛha lɛ lɛ nɔ. Akɛ enɛ baatsu adesai ni baatsu nitsumɔi ni kɛ woo baaha Mɔ ni Yesu bɔɔ mɔdɛŋ ni ewo ehiɛ nyam lɛ ahe nii. Ani enɛ tsɔɔ akɛ wɔ ni ji adesai ni yeee emuu lɛ baanyɛ awo Tsɛ lɛ hiɛ nyam yɛ gbɛ ko nɔ, ni wɔ hu ewo wɔhiɛ nyam akɛ nɔ ni ekɛtoɔ wɔ najiaŋ?
Adesai Woɔ Nyɔŋmɔ Hiɛ Nyam
6. Ani eja gbɛ akɛ wɔɔsumɔ ni awo wɔhiɛ nyam, shi mɛɛ oshara yɔɔ enɛ mli? (Luka 14:10)
6 Adesai pii efɔɔɔ Nyɔŋmɔ ni amɛaawo ehiɛ nyam klɛŋklɛŋ Iɛ he susumɔ, ejaakɛ amɛmiisumɔ waa moŋ ni amɛkɛ woo lɛ aha amɛ diɛŋtsɛ amɛhe. Mɛi komɛi baanyɛ akɛɛ po akɛ, ákɛ wɔɔsɔmɔ ni awo wɔhiɛ nyam lɛ ji nɔ ni afeɔ. Anɔkwale ko yɛ enɛ mli, ejaakɛ akɛ aaatao gbɛi kpakpa, ni woo hu yɔɔ enɛ mli lɛ sa ni eji nɔ ni afeɔ. (1 Timoteo 3:2, 13; 5:17; Bɔfoi lɛ Asaji 28:10) Ni kɛlɛ, ni wɔɔshwe akɛ adesai aaawo wɔhiɛ nyam lɛ baanyɛ afee nɔ ni afeɔ kɛtekeɔ nɔ. Wɔbaanyɛ wɔna enɛ kɛtsɔ bɔ ni mɛi pii diɔ gbɛinamɔ sɛɛ yɛ gbɛ fɛɛ gbɛ nɔ aloo ni amɛaafee nii koni amɛhiɛ akagbo lɛ nɔ.
7. Mɛni hewɔ woo ni gbɔmɛi kɛhaa mɛi krokomɛi lɛ mli sɛɛnamɔi shɛɛɛ shɔŋŋ lɛ?
7 Kɛ osusu he lɛ, hiɛnyam ni da fe fɛɛ ni aaajɛ gbɔmɛi aŋɔɔ aba lɛ po hoɔ eyaa, ejaakɛ etsɛɛɛ ni amɛ fɛɛ amɛgboiɔ. Shi abaanyɛ akai mɛi fioo ko ni he gbɛi ni awo amɛhiɛ nyam yɛ be fioo ko mli, shi hiɛ kpaa gbohii lɛ ateŋ mɛi ni fa titri lɛ anɔ. Mɛi enyiɛ le amɛnanakansowai agbɛi, aloo mɛi ni ji amɛmaŋ lɛ hiɛnyiɛlɔi aaafee afii oha ni eho nɛ lɛ? Yɛ anɔkwale mli lɛ, ákɛ mɔ ko ehi shi pɛŋ, aloo ehiko shi lɛ, enɛ tsakeee saji lɛ, Eji mlu kuli bibioo ko pɛ yɛ be nsɛni lɛ nɔ. Eji kuli ko pɛ yɛ wala ni tamɔ faa lɛ mli. Ni kɛji akɛ awo ehiɛ nyam yɛ be kukuo mli yɛ egbele sɛɛ po lɛ, eleee enɛ. (Hiob 14:21; 2 Kronika 32:33; Jajelɔ 9:5; Lala 49: 13, 21) Nɔ kome pɛ ni feɔ sɔrɔto ji ni mɔ ko ana hiɛnɔkamɔ ni Nyɔŋmɔ kɛhaa lɛ. Wɔwo ehiɛ nyam, ni lɛ hu ewo wɔhiɛ nyam ekɛto najiaŋ. Wɔbaanyɛ wɔna enɛ kɛjɛ mɛi enyɔ ko ni hi shi yɛ be kome mli yɛ blema Israel lɛ ahe.
8. Mɛɛ tsɔne Eli bote mli yɛ woo ni akɛaaha lɛ he?
8 Eli ji amɛteŋ mɔ kome. Esɔmɔ Nyɔŋmɔ yɛ gbɛhe ko ni yɔɔ sɔrɔto mli akɛ osɔfonukpa afii 40 ni ena hegbɛ hu ekɛkojo Israel. (1 Samuel 1:3, 9; 4:18) Ni kɛlɛ, yɛ be ni sa mli lɛ, ebagbɔjɔ yɛ ebihii ni ji Hofni kɛ Pinehas hewɔ. Eyɛ mli akɛ amɛji osɔfoi moŋ, shi amɛfite hegbɛ ni akɛha ‘amɛ lɛ ni amɛja afɔleshaa nibii lɛ ni amɛkɛ amɛhe wɔ ajwamaŋbɔɔ mli. Akɛni nɔ ni amɛtsɛ fee pɛ ji ni eka amɛhiɛ fioo pɛ hewɔ lɛ, Nyɔŋmɔ jaje akɛ Eli ‘yaa nɔ ewoɔ ebihii lɛ moŋ hiɛ nyam fe mi.’ Yehowa ewo shi akɛ ebaaha Aaron osɔfoyeli lɛ aya nɔ moŋ, shi ebaafo Eli shia lɛ eshɛ efɔ kɛjɛ osɔfoyeli nitsumɔ lɛ he. Mɛni hewɔ? Nyɔŋmɔ tsɔɔ mli akɛ: “Mɛi ni woɔ mihiɛ nyam lɛ, mawo amɛhiɛ nyam; shi mɛi ni gbeɔ mihe guɔ lɛ; abuŋ amɛ ahaŋ nɔ ko.”—1 Samuel 2:12-17, 29-36; 3:12-14.
9. Akɛ hegbɛ ha Samuel koni ekɛ woo aha Yehowa yɛ mɛɛ gbɛ nɔ?
9 Nɔ ni tamɔɔɔ enɛ lɛ, Samuel hu yɛ. Eka shi faŋŋ akɛ ole akɛ efɔlɔi kɛ lɛ ba koni ebasɔmɔ yɛ sɔlemɔwe lɛ ni yɔɔ Shilo lɛ yɛ be mli ni edako kwraa. Gbi ko gbɛkɛ lɛ Yehowa kɛ gbekɛ lɛ wie. Obaanya nɛkɛ sane nɛɛ kanemɔ he yɛ 1 Samuel 3:1-14, ni susumɔ bɔ ni atee gbekɛ nɛɛ shi kɛjɛ ewɔɔ Iɛŋ, jeee kɛmiitsɔ sarawa ko gbɛɛmɔ nɔ, shi moŋ, kɛtsɔ gbee ko ni“baa shi ni eyasusu akɛ eji Eli nuumo lɛ nɔ lɛ he. Agbɛnɛ susumɔ bɔ ni enɛ aaawo Samuel he gbeyei aha akɛ eeegba Nyɔŋmɔ osɔfonukpa ni egbɔ nɛɛ nɔ ni Nyɔŋmɔ etswa efai shi akɛ ebaafee ni ji toigbalamɔ ni ekɛaaba Eli we lɛ nɔ lɛ he okwɛ. Ní kɛlɛ Samuel ‘fee nakai; etsɔ toiboo nɔ ewo Nyɔŋmɔ hiɛ nyam.—1 Samuel 3:18, 19.
10. Akɛni Samuel wo Nyɔŋmɔ hiɛ nyam hewɔ lɛ, Nyɔŋmɔ hu wo Samuel hiɛ nyam yɛ mɛɛ gbɛ nɔ?
10 Samuel wo ehiɛ nyam afii babaoo akɛ gbalɔ kɛ kojolɔ, ni Nyɔŋmɔ hu wo ehiɛ nyam. Kadimɔ enɛ yɛ 1 Samuel 7:7-13. Yehowa tsu Samuel sɔlemɔ kɛha yelikɛbuamɔ koni eye Filistibii lɛ anɔ kunim lɛ he nii oya. Ani onuŋ he akɛ awo ohiɛ nyam kɛtsɔ nɛkɛ nɔkpɛlɛmɔ nɛɛ nɔ? Beni Samuel bihii lɛ enyiɛɛɛ amɛtsɛ lɛ sɛɛ lɛ, Nyɔŋmɔ kwaaa lɛ taakɛ ekwa Eli lɛ. Enɛ ka shi faŋŋ akɛ Samuel fee nɔ fɛɛ nɔ ni eeenyɛ ekɛwo Nyɔŋmɔ hiɛ nyam. Beni etsɔɔ enɛ lolo lɛ, Samuel ekpɛlɛɛɛ bɔ ni gbɔmɛi lɛ bi ni aha amɛ adesa maŋtsɛ lɛ nɔ. (1 Samuel 8:6, 7) Nyɔŋmɔ kɛ Samuel tsu nii koni efɔ Saulo kɛ David fɛɛ mu. Beni Samuel gbo lɛ, Israel wo ehiɛ nyam kɛtsɔ fó ni amɛfo lɛ lɛ nɔ. Nɔ ni he hiaa fe fɛɛ Iɛ, Nyɔŋmɔ wo ehiɛ nyam kɛtsɔ tsi ni etsi egbɛi ata yɛ Biblia lɛ mli efata hii ni yɔɔ hemɔkɛyeli ni akɛ gbohiiashitee kɛ nibii kpakpai ni Nyɔŋmɔ esaa eto kɛha amɛ lɛ baajɔɔ amɛ lɛ ahe. (Lala 99:6; Yeremia 15: 1; Hebribii 11:6, 16, 32, 39, 40) Ani enɛ etsɔɔɔ akɛ hiɛnɔkamɔ loo “nɔhiɛkamɔ Nyɔŋmɔ” lɛ hiɛ nyam ni awoɔ lɛ he yɛ sɛɛnamɔ babaoo?
Ani Obaawo Hiɛnɔkamɔ Loo “Nɔhiɛkamɔ Nyɔŋmɔ” Lɛ Hiɛ Nyam?
11, 12. Mɛni ehe hiaa ni wɔsusu he yɛ woo ni wɔkɛhaa Yehowa lɛ mli, mɛni ji gbɛ kome ni wɔɔtsɔ nɔ wɔfee nakai?
11 Kɛ wɔkɛ Biblia mli nɔkwɛmɔ nii enyɔ pɛ baatsu nii lɛ, Yesu kɛ Samuel ma nɔ mi akɛ adesai baanyɛ ni amɛkɛ woo ni amɛkɛaaha amɛ hiɛnɔkamɔ Nyɔŋmɔ lɛ afee nɔ ni he hiaa amɛ fe fɛɛ yɛ amɛshihilɛ mli. Ni nakai saji enyɔ lɛ tsɔɔ akɛ kɛ wɔfee nakai lɛ, wɔbaanyɛ ni wɔtao ni wɔna woo ni jɛ Nyɔŋmɔ ŋɔɔ lɛ yɛ gbɛ ni ja nɔ. Shi te ooofee tɛŋŋ ofee enɛ kɛ nɔmimaa ni sa akɛ obaasa Nyɔŋmɔ hiɛ, ebaawo ohiɛ nyam, ni onine baashɛ ohiɛnɔkamɔ ni damɔ Biblia lɛ nɔ lɛ nɔ?
12 Nyɔŋmɔ hiɛ ni asaŋ lɛ he gbeyeishemɔ ni ayɔɔ diɛŋtsɛ lɛ ji gbɛ kome. (Maleaki 1:6) Eka shi faŋŋ akɛ wɔkpɛlɛɔ nakai wiemɔ lɛ nɔ. Ni kɛlɛ, kaimɔ Eli bihii lɛ. Eji obi amɛ akɛ amɛmiisumɔ ni amɛwo Nyɔŋmɔ hiɛ nyam kɛtsɔ gbeyeishemɔ ni bulɛ yɔɔ mli ni amɛkɛaaha lɛ lɛ nɔ lo kulɛ, eka shi faŋŋ akɛ amɛaaha bo hetoo akɛ hɛɛ. Naagba lɛ baa yɛ be mli ni esa akɛ wɔtsɔɔ bɔ ni wɔshweɔ akɛ wɔɔwo Nyɔŋmɔ hiɛ nyam kɛtsɔ gbeyei ni wɔɔshe lɛ lɛ nɔ yɛ nifeemɔi diɛŋtsɛ mli yɛ wɔdaa gbi shihilɛ mli lɛ.
13. Feemɔ bɔni shwe ni wɔshweɔ akɛ wɔkɛ woo aaaha Nyɔŋmɔ kɛtsɔ gbeyei ni wɔɔshe lɛ lɛ nɔ lɛ baanyɛ aye abua wɔ lɛ he nɔkwɛmɔ nɔ.
13 Kɛ shihilɛ ko ni kaa mɔ ka wɔhiɛ ni no mli lɛ wɔbaanyɛ wɔju aloo wɔkɛ wɔhe awo jeŋba gbonyo ko mli ni mɔ ko mɔ ko leee lɛ, ani bɔ ni wɔsumɔɔ akɛ wɔɔwo Nyɔŋmɔ hiɛ nyam lɛ aaana hewalɛ yɛ wɔnifeemɔi anɔ? Esa akɛ wɔnu he akɛ, ‘Kɛji akɛ nɔ fɔŋ feemɔ lɛ tee nɔ ehi shi akɛ nɔ ni anaaa po lɛ, mihe ni maŋmɛɛ maha esha ni tamɔ nɛkɛ lɛ gbeɔ hiɛnɔkamɔ aloo “nɔhiɛkamɔ Nyɔŋmɔ” lɛ ni egbɛi ka minɔ lɛ he guɔ.’ Ni anɔkwa sane Iɛ ji akɛ nɔ fɔŋ feemɔ lɛ eyaŋ nɔ ehiŋ shi daa ni anaaa, taakɛ bɔ ni nihii ni Elia bihii lɛ fee lɛ hu ehiii shi akɛ nɔ ni anaaa lɛ. Nɔ ni yeɔ enɛ he odase ji wɔwiemɔi ni kɔɔ “Nyɔŋmɔ jalɛ kojomɔ” he lɛ: “Ebaawo mɔ fɛɛ mɔ nyɔmɔ bɔ ni sa enitsumɔi lɛ: mɛi ni kɛ ekpakpafeemɔ mli tsuishiŋmɛɛ taoɔ anunyam kɛ woo kɛ shihilɛ ni fiteee lɛ, aaaha amɛ naanɔ wala; shi mɛi hu ni sumɔɔ bei ni amɛbooo anɔkwale lɛ toi, shi amɛboɔ nishaianii moŋ toi lɛ, amɛnɔ ji mlifu kɛ mlila.”—Romabii 2:5-8.
14. Mɛni ji gbɛ kroko ni wɔɔtsɔ nɔ wɔkɛ woo aha Nyɔŋmɔ, ni mɛni wɔbaanyɛ wɔbi wɔ diɛŋtsɛ wɔhe?
14 Yɛ gbɛ kroko nɔ lɛ, Paulo tsi nitsumɔi kpakpai loo “ekpakpafeemɔ” ni akɛ he aaawo mli ni woɔ Nyɔŋmɔ hiɛ nyam ni nɔ ni jɛɔ mli baa ji “anunyam kɛ woo” ni jɛ eŋɔɔ lɛ ta. Nitsumɔi titri ni tamɔ nɛkɛ ŋmɛnɛ ji nɔ ni Yesu tsi ta yɛ Mateo 28:19, 20 lɛ akɛ: ‘Afee jeŋmaji lɛ fɛɛ amli gbɔmɛi lɛ kaselɔi, abaptisi amɛ ni atsɔɔ amɛ ni amɛyɛ nii fɛɛ ni mifa amɛ lɛ nɔ lɛ.’ Yehowa Odasefoi akpekpei abɔ kɛ amɛhe ewo shiɛmɔ kɛ nitsɔɔmɔ nitsumɔ ni woɔ Nyɔŋmɔ hiɛ nyam nɛɛ mli yɛ ekaa naa. Amɛteŋ mɛi pii po miimia amɛhiɛ ni amɛfee be fɛɛ sɔɔlɔi akɛ gbɛgbalɔi, ákɛ mɛi ni baatsu enɛ daa aloo yɛ gbɛhamɔ be loo hejɔɔmɔ be mli. Akɛni enɛ yɔɔ wɔjwɛŋmɔ mli hewɔ lɛ, esa akɛ wɔteŋ mɔ fɛɛ mɔ asusu nɔ ni efeɔ yɛ nɛkɛ nitsumɔ nɛɛ he lɛ he koni ehe aba sɛɛnamɔ aha lɛ. Akɛ nɔkwɛmɔ nɔ lɛ, obaanyɛ obi akɛ: ‘Ani miiwo hiɛnɔkamɔ loo “nɔhiɛkamɔ Nyɔŋmɔ” lɛ hiɛ nyam kɛtsɔ shiɛmɔ nitsumɔ nɛɛ mli gbɛfaŋnɔ ni mɔɔ shi ni minaa lɛ nɔ?’
15. Mɛni eba mɛi komɛi anɔ yɛ woo ni amɛkɛaaha Yehowa kɛtsɔ maŋ sɔɔmɔ lɛ nɔ lɛ nɔ?
15 Kristofoi komɛi ni kɛ ekaa eshiɛ afii babaoo lɛ anitsumɔ lɛ naa eba shi fiofio. Nɔ ni amɛfeɔ agbɛnɛ ji ni amɛna kaselɔ feemɔ nitsumɔ ni he hiaa nɛɛ mli gbɛfaŋnɔ bibioo ko pɛ aloo amɛfɔɔɔ nakai feemɔ po. Jeee aŋkroaŋkroi ni yɔɔ gbɔmɔtsoŋ fatɔɔi ni haa amɛnitsumɔ lɛ baa shi yɛ gbɔlɛ hewɔ lɛ ahe wɔwieɔ nɛɛ. Yɛ mɛnɛɛmɛi asɛɛ lɛ, anaa nitsumɔ nɛɛ ni baa shi lɛ yɛ Odasefoi komɛi ni amɛyɛ afii sɔrɔtoi hu he. Nɔ ni yɔɔ miishɛɛ lɛ, Paulo ewieee kuu ko ni eye afi ko he yɛ be mli ni ebɔɔ Kristofoi lɛ kɔkɔ eshiɔ ‘tɔlɛ loo nijiaŋwujee’ lɛ. Shi moŋ, bɔ fɛɛ bɔ ni mɔ ko afii ni eye lɛ ji lɛ sɛɛ lɛ, nɔ ni hɔ sane lɛ mli diɛŋtsɛ ji akɛ he ni akɛaawo sɔɔmɔ lɛ mli daa lɛ biɔ mɔdɛŋbɔɔ. Taakɛ eka shi faŋŋ akɛ eba mli yɛ Paulo gbii lɛ amli lɛ, ŋmɛnɛ mɛi komɛi miisusu akɛ, ‘mifee migbɛfaŋnɔ yɛ afii ni eho lɛ amli, no hewɔ lɛ, Kristofoi heei lɛ baanyɛ abɔ amɛhe mɔdɛŋ.—Galatabii 6:9; Hebribii 12:3.
16. Mɛni hewɔ kɛ wɔka wɔhe wɔkwɛ yɛ enɛ gbɛfaŋ lɛ, ehe aaanyɛ aba sɛɛnamɔ aha wɔ lɛ?
16 Mɛi ni yɔɔ shihilɛ ni tamɔ nɛkɛ mli lɛ ayi faaa, shi obaanyɛ obi akɛ, ‘Ani miyɔseɔ su ko ni tamɔ nɛkɛ yɛ mihe? Kɛ mikɛ gbɛfaŋnɔ ni minaa yɛ sɔɔmɔ lɛ mli lɛ to tsutsu nɔ lɛ he lɛ, te eyɔɔ tɛŋŋ? Kɛji akɛ ooba shi loo jeee nakai hu lɛ, esa akɛ wɔ fɛɛ wɔha ahi wɔjwɛŋmɔ mli akɛ wɔhiɛnɔkamɔ aloo “nɔhiɛkamɔ Nyɔŋmɔ” lɛ ewo shi akɛ ekɛ “anunyam kɛ woo kɛ hejɔlɛ aaaba mɔ fɛɛ mɔ ni tsuɔ nii kpakpai lɛ nɔ.” (Romabii 2:10) Paulo kɛ Hela wiemɔi ni tsɔɔ ‘ni atsu nɔ ko, awo yibii, afee nɔ ko’ lɛ tsu nii. Kwɛ bɔ ni ehe hiaa akɛ wɔɔkwa nɔ ni ba Farisifoi kɛ woloŋmalɔi ni kɛ naabu sɔɔmɔ woo Nyɔŋmɔ kɛkɛ lɛ anɔ lɛ. (Marko 7:6; Kpojiemɔ 2:10) Nɔ ni tamɔɔɔ enɛ lɛ, kɛ wɔkɛ wɔtsui fɛɛ wo maŋ sɔɔmɔ nitsumɔ lɛ mli lɛ, wɔmaa nɔ mi wɔhaa wɔ diɛŋtsɛ wɔhe kɛ mɛi krokomɛi akɛ wɔyɛ hiɛnɔkamɔ ko diɛŋtsɛ. Wowoɔ wɔ-Bɔlɔ kɛ Wala-halɔ lɛ hiɛ nyam. Ni wɔbafeɔ mɛi ni Iɛ hu eeewo wɔhiɛ nyam bianɛ kɛ agbɛnɛ kɛyashi naanɔ—Luka 10:1, 2, 17-20.
Kɛ Wɔ Nibii Ni Jara Wa
17, 18. Mɛni ji gbɛ ko ni aaatsɔ nɔ akɛ woo aha Nyɔŋmɔ, shi mɛni hewɔ ni shishashaomɔ yɛ nakai feemɔ mli lɛ ejaaa gbɛ lɛ?
17 Abɛi 3:9 kɛɔ yɛ gbɛ kroko nɔ ni wɔɔtsɔ wɔkɛ woo aha wɔhiɛnɔkamɔ loo “nɔhiɛkamɔ Nyɔŋmɔ” lɛ he akɛ: “Okɛ onii ni jara wa kɛ onibaa nii lɛ fɛɛ mli klɛŋklɛŋ nii awo Yehowa hiɛ nyam.” (New World Translation) Spurell tsoɔ nɛkɛ kuku nɛɛ shishi akɛ: “Okɛ ojwetri ni oyɔɔ lɛ awo Yehowa hiɛ nyam, onii babaoo lɛ mli no ni hi fe fɛɛ.”—A Translation of the Old Testament Scriptures from the Original Hebrew.
18 Akɛni abayoo osɔfoi sɔrɔtoi lɛ agbɛ ni ehiii kɛ amɛ hiɛjoomɔ kɛ ninámɔ he akɔnɔ ni bɛ naagbee lɛ hewɔ lɛ, aŋkroaŋkroi pii shashaoɔ shi akɛ amɛkɛ no ko aaaha sɔlemɔi kɛ jamɔŋ gbɛjianɔtoi ni eka shi faŋŋ akɛ nɔ ni amɛtaoɔ pɛ ji ni amɛná nii lɛ. (Kpojiemɔ 18:4-8) Shi nibii ni ejaaa ni amɛfeɔ nɛɛ fiteee wiemɔi ni ja ni yɔɔ Abɛi 3:9 lɛ. Yɛ nakai ŋaawoo ni jɛ mumɔŋ lɛ kɛ gbeekpamɔ naa lɛ, te wɔɔfee tɛŋŋ ni wɔkɛ “wɔnii ni jara wa” lɛ “awo Yehowa,” wɔhiɛnɔkamɔ loo “nɔhiɛkamɔ Nyɔŋmɔ” lɛ “hiɛ nyam”?
19. Feemɔ bɔ ni mɛi komɛi kɛ Abɛi 3:9 etsu nii lɛ he nɔkwɛmɔ nɔ.
19 Yehowa Odasefoi naa akɛ yɛ gbɔmɛi ni hereɔ Maŋtsɛyeli lɛ he sane lɛ nɔ ni amɛyi faa be fɛɛ be lɛ hewɔ lɛ, ebiɔ ni ana Maŋtsɛyeli Asai babaoo aloo eheei ni amamɔ. Biɛ ji gbɛ kome ni oootsɔ no okɛ “ojwetri awo Yehowa hiɛ nyam” yɛ. Onukpai kɛ gbekɛbii fɛɛ ena enɛ feemɔ mli gbɛfaŋnɔ, tamɔ bɔ ni amɛ diɛŋtsɛ amɛkpɛɔ amɛyiŋ akɛ amɛkɛ no ko aaaha ni akɛwo tsumaa shika lɛ mli lɛ. Ní mɔ ko kɛ ehe aaakpɛtɛ teemɔŋ yiŋkpɛɛ nɛɛ he lɛ baabi ni mɔ lɛ diɛŋtsɛ atsɔse ehe aloo po ekɛ nibii komɛi asha afɔle, titri lɛ, kɛji akɛ tsu ko he gbɛjianɔtoo kɛ enaagbee sɛɛ yakɛ kɛbote be kakadaŋŋ mli lɛ. (2 Korintobii 9:6, 7) Ní kɛlɛ, shika ni akɛaatsu nii yɛ nɛkɛ gbɛ nɔ lɛ woɔ Yehowa hiɛ nyam diɛŋtsɛ, ejaakɛ Maŋtsɛyeli Asai lɛ ji hei ni wɔjaa lɛ yɛ, kɛ hei ni Kristofoi kɛ amɛhefatalɔi naa ehe nilee yɛ. Yesu wiemɔi ni yɔɔ Mateo 6:3, 4 kɛ yiŋtoo kpakpa hewɔ ni esa akɛ wɔhe wɔye akɛ Nyɔŋmɔ baawo mɛi ni ewo ehiɛ nyam yɛ nɛkɛ gbɛ nɔ lɛ hu hiɛ nyam lɛ haa wɔ.
20. (a) Mɛni hewɔ wɔ diɛŋtsɛ wɔmli ni wɔɔpɛi wɔkwɛ yɛ Abɛi 8:9 kɛ nitsumɔ mli lɛ ja gbɛ lɛ? (b) Mɛɛ saji wɔbaanyɛ wɔbi yɛ wɔ diɛŋtsɛ wɔhe?
20 Shi, kɔkɔbɔɔ sane ko nɛ: Farisifoi kɛ woloŋmalɔi lɛ ni Yesu kɛɛ amɛkɛ woo ni akɛaaha Nyɔŋmɔ lɛ yeee klɛŋklɛŋ gbɛhe Iɛ bɔ he mɔdɛŋ akɛ amɛaafee klɛŋklɛŋbii ni amɛaana amɛ diɛŋtsɛ amɛjwetri lɛ he sɛɛ. No hewɔ lɛ, ŋaawoo ni yɔɔ Mateo 15:4-8 lɛ jieɔ yi akɛ wɔpɛi wɔ diɛŋtsɛ wɔmli wɔkwɛ yɛ ‘wɔnibii ni jara wa ni wɔkɛwoɔ Yehowa hiɛ nyam’ lɛ mli. (Yeremia 17:9, 10) Akɛ nɔkwɛmɔ nɔ lɛ, Kristofonyo ni ebatsɔ niiatsɛ kɛtsɔ enitsumɔ nɔ lɛ baaha efee tamɔ jwɛŋmɔ yɛ mli akɛ eeeya nɔ ekɛ ebe fɛɛ atsu nii koni ena shika babaoo. Ebaasusu akɛ, ‘Mɛi krokomɛi kɛ amɛhe woɔ gbɛgbamɔ sɔɔmɔ lɛ mli aloo amɛfaa akɛyaa he ni shiɛlɔi ahe hiaa yɛ titri, shi gbɛ krɛdɛɛ ni matsɔ nɔ masɔmɔ Nyɔŋmɔ ji ni mana nii babaoo koni yɛ no hewɔ lɛ, mikɛ shika babaoo hu atsu onia.’ Ní yɛ anɔkwale mli lɛ, onia ni etsuɔ lɛ aaanyɛ atsu nibii kpakpai babaoo. Shi ebaanyɛ ebi akɛ, ‘Ani mi diɛŋtsɛ mishihilɛ gbɛ lɛ tsɔɔ akɛ, Nyɔŋmɔ hiɛ nyam ni mitaoɔ mawo lɛ ji yiŋtoi titri hewɔ ni mitaoɔ shika babaoo lɛ?’ (Luka 12:16-19; Okɛto Marko 12:41-44 he.) Ní agbɛnɛ mato gbɛjianɔ yɛ shihilɛ mli koni mana nitsumɔ ni he hiaa fe fɛɛ yɛ wɔgbii nɛɛ amli—sanekpakpa lɛ jajemɔ lɛ mli gbɛfaŋnɔ?’ Yɛ anɔkwale mli lɛ, bɔ fɛɛ bɔ ni shihilɛ mli ni wɔyɔɔ lɛ ji lɛ, wɔbaanyɛ wɔpɛi wɔjwɛŋmɔi kɛ wɔnifeemɔi amli ni wɔbi akɛ, Te mafee tɛŋŋ mawo mi Wɔla-halalɔ kɛ “‘nɔhiɛkamɔ Nyɔŋmɔ” lɛ hiɛ nyam babaoo?’
21. Mɛɛ gbɛkpamɔ wɔbaanyɛ wɔna kɛjɛ woo ni wɔkɛaaha Yehowa bianɛ lɛ mli?
21 Yehowa haŋ wɔnine anyɛ shi. Mɛɛ miishɛɛ gbɛkpamɔ eji akɛ eeenyɛ ewie nɔ ni ewie yɛ anɔkwafo Israel he lɛ nɔŋŋ he yɛ wɔhe bianɛ kɛ agbɛnɛ kɛmiiya wɔsɛɛ be mli akɛ: “Akɛni ojara wa yɛ mihiɛ ni ohiɛ eba nyam yɛ mihiɛ hewɔ lɛ, mi lɛ misumɔɔ bo.” (Yesaia 43:4, New World Translation) Nakai mɔ Iɛ nɔŋŋ kɛ ‘naanɔ wala he shiwoo haa mɛi ni taoɔ anunyam kɛ woo lɛ.’ Ekɛ nɛkɛ shiwoo nɛɛ haa mɛi ni ŋmɛɔ amɛtsui shi yɛ ‘nitsumɔi kpakpai amli’ lɛ. Mɛɛ Nyɔŋmɔ ni haa hiɛnɔkamɔ nɛ!
[Shishigbɛ niŋmai]
Ajie kɛjɛ December 15, 1987 Watchtower lɛ mli.
Te Obaaha Hetoo Oha Tɛŋŋ?
◻ Yɛ adesai ni amɛkɛ woo haa Yehowa lɛ mli lɛ, mɛni wɔbaanyɛ wɔkase kɛjɛ Yesu nɔkwɛmɔ nɔ lɛ mli?
◻ Eli kɛ Samuel yɛ sɔrɔto yɛ woo ni akɛhaa Nyɔŋmɔ lɛ mli yɛ mɛɛ gbɛ nɔ?
◻ Mɛni ji gbɛi komɛi anɔ ni oootsɔ oha woo ni akɛhaa Nyɔŋmɔ lɛ afa, ni mɛni baajɛ mli aba?
◻ Mɛɛ Wɔsɛɛ be mɛɔ mɛi ni kɛ wɔ “nɔhiɛkamɔ Nyɔŋmɔ” lɛ woo yeɔ klɛŋklɛŋ gbɛhe lɛ?
ONIATSUMƆ HE WOJI
Naa woji komɛi ni Buu Mɔɔ Asafo lɛ nitsumɔ he ni yɔɔ Brooklyn, New York lɛ nine shɛ nɔ:
“Migbɛi ji Abijah. Miye afii 9. Miitao ni mikɛ dɔlai 4 (aaafee ₵600) nɛɛ ahanyɛ ni nyɛkɛha nyɛmimɛi ni tsuɔ Maŋtsɛyeli Asai ahe nii lɛ. Amɛbaanyɛ amɛkɛhe tsei aloo amɛkɛhe siklitɛ, fɛɛ eko.”—Oregon.
‘Nyɛbaana shika ni mikɛmaje yɛ enɛ mli. Miye fe afii 96 momo ni minuuu nii kpakpai komɛi, shi eŋɔɔ minaa akɛ minyɛ mikɛ shika nɛɛ eto kɛha nyɛ. Hɛɛ, mile akɛ miikudɔ kar ko ni ji emomo, ni kɛ shɛ fɛibe mli lɛ miyaa Florida aloo Kalifornia. Nɔ ko fioo pɛ minyɛɔ mifeɔ yɛ Maŋtsɛyeli lɛ he sanekpakpa lɛ shiɛmɔ mli yɛ shia kɛ shia. Shi mishika ni mikɛtoɔ ni agbɛnɛ eko ni mikɛmajeɔ nyɛ lɛ haa minuɔ he akɛ mihu miina nitsumɔ lɛ mli gbɛfaŋnɔ.’—Ohio.
‘Miida nyɛ shi yɛ nɔ fɛɛ nɔ ni nyɛfee yɛ Maŋtsɛyeli Asai lɛ he lɛ hewɔ. Nɛkɛ shika nɛɛ ni ji dɔlai 5 (aaafee (₵750) lɛ ji nɔ ni mikɛyeɔ mibuaa nyɛ koni nyɛkɛfee woji kɛ Buu—Mɔɔ lɛ nyɛha wɔ ni wɔkane Shika nɛɛ jɛ adeka fioo ko ni áfee lɛ tamɔ kpolotoo ni mikɛ shika toɔ mli lɛ mli. Miida nyɛ shi yɛ nɔ ni School wolo bibioo lɛ kɛɔ wɔ yɛ tsofai fɔji ni akɛtsuɔ nii lɛ he lɛ hewɔ.’
“Nyɛfainɛ mikɛ shika ko miimaje nyɛ. Emli dɔlai ohai enyɔ (aaafee ₵30.000) lɛ akɛtsu Maŋtsɛyeli Asaa Tsumaa Shika Iɛ he nii. Nɔ ni eshwɛ lɛ, akɛtsu nii yɛ gbɛ ni nyɛsumɔɔ nɔ koni akɛlɛɛ shiɛmɔ nitsumɔ lɛ mli.”—Missouri.