Akɛmaje Hebribii Lɛ
11 Hemɔkɛyeli ji nɔmimaa ni akɛkwɛɔ nii ni hiɛ kã nɔ lɛ gbɛ,+ eji nii ni anaaa lɛ ahe odaseyeli ni yɔɔ faŋŋ.* 2 Akɛni mɛi ni hi shi yɛ blema* lɛ ná hemɔkɛyeli ni tamɔ nɛkɛ hewɔ lɛ, Nyɔŋmɔ ye odase etsɔɔ amɛ akɛ ená amɛhe miishɛɛ.
3 Hemɔkɛyeli naa wɔkɔɔ sɛɛ akɛ Nyɔŋmɔ wiemɔ lɛ naa abɔ nibii ni yɔɔ je lɛ mli lɛ,* no hewɔ lɛ nii ni anaa lɛ jɛ nii ni anaaa lɛ mli kɛba.
4 Hemɔkɛyeli Habel kɛ afɔle ni fe Kain nɔ lɛ hã Nyɔŋmɔ,+ ni Nyɔŋmɔ tsɔ nakai hemɔkɛyeli lɛ nɔ eye odase etsɔɔ lɛ akɛ jalɔ ji lɛ, ejaakɛ Nyɔŋmɔ ná enikeenii lɛ ahe miishɛɛ,*+ ni eyɛ mli akɛ egbo moŋ, shi etsɔɔ ehemɔkɛyeli lɛ nɔ ewieɔ lolo.+
5 Hemɔkɛyeli hewɔ ajie Henok+ kɛtee koni ekana gbele, ni anaaa lɛ yɛ he ko he ko ejaakɛ Nyɔŋmɔ jie lɛ kɛtee;+ ejaakɛ dani abaajie lɛ kɛya lɛ, Nyɔŋmɔ ye odase etsɔɔ lɛ akɛ esa ehiɛ jogbaŋŋ. 6 Agbɛnɛ hu, kɛ́ hemɔkɛyeli bɛ lɛ, anyɛŋ asa Nyɔŋmɔ hiɛ jogbaŋŋ, ejaakɛ mɔ fɛɛ mɔ ni bɛŋkɛɔ Nyɔŋmɔ lɛ, esa akɛ ehe eye akɛ eyɛ, ni eji mɛi ni kɛ hiɛdɔɔ taoɔ esɛɛ gbɛ lɛ ajwerelɔ.+
7 Hemɔkɛyeli Noa+ hu kɛjie Nyɔŋmɔ gbeyeishemɔ kpo ni ekpɛ adeka+ kɛhã eshĩabii lɛ ayiwalaheremɔ, be ni Nyɔŋmɔ bɔ lɛ kɔkɔ yɛ nii ni anáko ana lɛ ahe lɛ;+ ni etsɔ ehemɔkɛyeli lɛ nɔ ebu je lɛ fɔ,+ ni ebatsɔ jalɛ ni jɛɔ hemɔkɛyeli mli kɛbaa lɛ niyelɔ.
8 Hemɔkɛyeli Abraham+ kɛbo Nyɔŋmɔ toi be ni atsɛ lɛ lɛ, ni eyiŋ etee he ni enine baashɛ gboshinii ko nɔ yɛ lɛ; eyiŋ etee, eyɛ mli akɛ eleee he ni eyaa.+ 9 Hemɔkɛyeli ekɛyato gbɔ yɛ shikpɔŋ ni awo he shi lɛ nɔ oookɛɛ eyɛ maŋsɛɛ shikpɔŋ ko nɔ,+ ni ekɛ Isak kɛ Yakob, mɛi hu ni kɛ lɛ fɛɛ ji nakai shiwoo lɛ nɔŋŋ niyelɔi lɛ,+ hi mama tsũi amli.+ 10 Ejaakɛ no mli lɛ eemɛ maŋ ni yɔɔ faneshii diɛŋtsɛ ni mɔ ni to he ŋaa kɛ mɔ ni ma ji Nyɔŋmɔ lɛ.+
11 Hemɔkɛyeli Sara hu kɛná hewalɛ ni ená musu,* be mli po ni efo fɔmɔ afii lɛ,+ ejaakɛ ebu mɔ ni wo shi lɛ akɛ anɔkwafo.* 12 Enɛ hewɔ lɛ, ajɛ nuu kome ni tamɔ mɔ ni egbo momo lɛ mli+ afɔ bii ni fa babaoo+ tamɔ ŋwɛi ŋulamii, tamɔ ŋshɔnaa shia ni anyɛɛɛ akane lɛ.+
13 Hemɔkɛyeli mli mɛnɛɛmɛi fɛɛ gboi yɛ, eyɛ mli akɛ amɛnine shɛɛɛ shiwoi lɛ amlibaa lɛ nɔ moŋ;+ shi amɛna nomɛi yɛ shɔŋŋ+ ni amɛkɛ miishɛɛ mɔ mli, ni amɛjaje amɛtsɔɔ yɛ faŋŋ akɛ amɛji mɛikpɔji kɛ gbɔi yɛ shikpɔŋ lɛ nɔ. 14 Ejaakɛ mɛi ni wieɔ yɛ nakai gbɛ nɔ lɛ hãa efeɔ faŋŋ akɛ amɛkɛ hiɛdɔɔ miitao amɛ diɛŋtsɛ amɛshihilɛhe. 15 Shi eji amɛtee nɔ amɛkai he ni amɛjɛ kɛba lɛ kulɛ,+ amɛbaaná hegbɛ kɛku amɛsɛɛ. 16 Shi agbɛnɛ amɛmiitao he ko ni hi fe no, ni ji, he ko ni ji ŋwɛi nɔ. No hewɔ lɛ, efeee Nyɔŋmɔ hiɛgbele akɛ aaabo atsɛ lɛ akɛ amɛ-Nyɔŋmɔ,+ ejaakɛ esaa maŋ ko eto amɛ.+
17 Hemɔkɛyeli naa efee tamɔ nɔ ni Abraham kɛ Isak eshã afɔle momo be ni aka Abraham akwɛ lɛ+—nuu ni mɔ shiwoi lɛ amli kɛ miishɛɛ lɛ ka akɛ ekɛ ebi koome lɛ baashã afɔle+— 18 eyɛ mli akɛ akɛɛ lɛ akɛ: “Mɔ ni abaatsɛ lɛ oseshi* lɛ, Isak mli ebaajɛ kɛba” moŋ,+ 19 shi ejwɛŋ nɔ, ni ena akɛ Nyɔŋmɔ baanyɛ atee Isak shi kɛjɛ gbohii ateŋ po, ni enine shɛ enɔ kɛjɛ jɛmɛ yɛ mfonirifeemɔ gbɛ nɔ.+
20 Hemɔkɛyeli Isak kɛjɔɔ Yakob+ kɛ Esau+ yɛ nibii ni baaba lɛ ahe.
21 Hemɔkɛyeli Yakob kɛjɔɔ Yosef bii lɛ ateŋ mɔ fɛɛ mɔ+ be ni eshwɛ fioo ni ebaagbo lɛ,+ ni ejá Nyɔŋmɔ be mli ni ema eyi shi yɛ edɛhiɛmɔtso lɛ nɔ lɛ.+
22 Hemɔkɛyeli Yosef hu kɛwie Israelbii lɛ ashimɔ kɛmiije Ejipt lɛ he, be ni egbele miibɛŋkɛ lɛ,* ni ekɛ gbɛtsɔɔmɔi* hã yɛ ewui lɛ ahe* lɛ.+
23 Hemɔkɛyeli Mose fɔlɔi lɛ kɛŋɔ lɛ amɛtee nyɔji etɛ yɛ efɔmɔ sɛɛ,+ ejaakɛ amɛna akɛ gbekɛ lɛ he yɛ fɛo,+ ni amɛsheee maŋtsɛ lɛ famɔ lɛ gbeyei.+ 24 Hemɔkɛyeli naa be ni Mose da lɛ,+ ekpoo akɛ ebaahã atsɛ lɛ Farao biyoo lɛ bi,+ 25 ni ehala akɛ afee lɛ kɛ Nyɔŋmɔ maŋ lɛ niseniianii moŋ fe nɔ ni eeeye esha mli ŋɔɔmɔ be fioo ko lɛ, 26 ejaakɛ ebu ehiɛ ni baashwie shi akɛ Mɔ Ni Nyɔŋmɔ Ehala Lɛ lɛ* akɛ eji ninámɔ kpele fe Ejipt jwetrii lɛ, ejaakɛ ekwɛ jweremɔnɔ lɛ ni enine baashɛ nɔ lɛ waa. 27 Hemɔkɛyeli ekɛshi Ejipt,+ ni esheee maŋtsɛ lɛ mlifu lɛ gbeyei,+ ejaakɛ etee nɔ efi shi shiŋŋ tamɔ nɔ ni eena mɔ ni anaaa lɛ lɛ.+ 28 Hemɔkɛyeli ekɛye Hehoo lɛ ni ekɛ lá kpa shinaatsei lɛ ahe lɛ, koni hiɛkpatalɔ lɛ akaye amɛkromɔbii lɛ awui.*+
29 Hemɔkɛyeli amɛkɛtsɔ Ŋshɔ Tsuru lɛ mli tamɔ amɛnyiɛ shikpɔŋ gbiŋ nɔ lɛ,+ shi be ni Ejiptbii lɛ hu ka nakai feemɔ lɛ, emii amɛ.+
30 Hemɔkɛyeli naa Yeriko gbogboi lɛ kumɔ shwie shi be ni mɛi lɛ nyiɛ kɛbɔle gbogboi lɛ gbii kpawo lɛ.+ 31 Hemɔkɛyeli hewɔ Rahab, ni ji ashawo yoo lɛ, hiɛ kpãtãaa eshiii mɛi ni gbo toi lɛ anɔ lɛ, ejaakɛ ehere shikpálɔi lɛ yɛ toiŋjɔlɛ mli.+
32 Ni mɛni ekoŋŋ makɛɛ? Ejaakɛ be eŋmɛŋ mi gbɛ bɔ ni mikɛaaya nɔ magba Gideon+ kɛ Barak+ kɛ Samson+ kɛ Yefta+ kɛ David+ kɛ agbɛnɛ hu Samuel+ kɛ gbalɔi krokomɛi lɛ ahe sane. 33 Mɛi nɛɛ tsɔ hemɔkɛyeli nɔ amɛye maŋtsɛyelii anɔ kunim,+ amɛhã jalɛ he shi, amɛnine shɛ shiwoi anɔ,+ amɛtsĩmɔ jatai anaa,+ 34 amɛgbe la hewalɛ,+ amɛjo klante naa foi,+ ahã amɛhe wa be ni amɛgbɔjɔ,+ amɛtsɔmɔ mɛi ni he wa yɛ ta mli,+ amɛfee asraafoi akui ni tutua amɛ lɛ butuu.+ 35 Yei anine shɛ amɛmɛi ni egboi anɔ kɛtsɔ gbohiiashitee nɔ,+ shi mɛi krokomɛi lɛ, apiŋ amɛ ejaakɛ amɛkpɛlɛɛɛ ni atsɔ kpɔmɔnɔ ko nɔ ajie amɛ, bɔ ni afee ni amɛná gbohiiashitee ni hi fe no. 36 Hɛɛ, mɛi krokomɛi hu na amɛmanehulu kɛtsɔ amɛhe fɛo ni aye kɛ yi ni ayi amɛ lɛ nɔ, anɔkwa, nɔ ni fe nakai lɛ, awo amɛ tsein*+ ni awo amɛ tsuŋ.+ 37 Atswia amɛ tɛi,+ aka amɛhemɔkɛyeli lɛ, akɛ saalai gbála amɛmli enyɔ,* akɛ klante gbe amɛ,+ amɛwo gwantɛŋi ahewoji kɛ abotiai ahewoji kɛnyiɛ,+ ohia hia amɛ, amɛna amanehulu,+ afee amɛ niseniianii;+ 38 ni amɛhi kwraa fe nakai je lɛ mli bii lɛ. Amɛhi shia ŋai kɛ gɔji anɔ kɛ tɛkploi+ kɛ bui ni yɔɔ shikpɔŋ lɛ shishi lɛ amli.
39 Shi mɛnɛɛmɛi fɛɛ lɛ, eyɛ mli akɛ Nyɔŋmɔ ye amɛhe odase kpakpa etsɔɔ amɛ yɛ amɛhemɔkɛyeli lɛ hewɔ moŋ, shi amɛnine shɛɛɛ shiwoo lɛ mlibaa lɛ nɔ, 40 ejaakɛ Nyɔŋmɔ esaa nɔ ko kpakpa eto wɔ,+ koni amɛkaye emuu amɛshi wɔ.