Kwa Je Lɛŋ Yaka Yiŋsusumɔi Lɛ, Dii Maŋtsɛyeli Lɛ He Nibii Ni Yɔɔ Diɛŋtsɛ Lɛ Asɛɛ
“Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”—MATEO 6:33.
1. Mɛɛ kɔkɔbɔɔ Nyɔŋmɔ Wiemɔ lɛ kɛhaa yɛ okadi tsui lɛ he, ni mɛni ji gbɛi titrii ni etsɔɔ nɔ eshishiuɔ wɔ lɛ ateŋ ekome?
“OHIƐ aka otsui he fe nii fɛɛ; ejaakɛ no mli wala jɛɔ.” (Abɛi 4:23) Mɛni hewɔ ehe bahia akɛ Maŋtsɛ Salomo nilelɔ lɛ kɛ kɔkɔbɔɔ ni tamɔ nɛkɛ aha? Ejaakɛ “tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa.” (Yeremia 17:9) Gbɛi titrii ni wɔ okadi tsui lɛ baanyɛ atsɔ nɔ alaka wɔ lɛ ateŋ ekome ji ni eha wɔkɛ wɔhe awo je lɛŋ yaka yiŋsusumɔi amli. Shi mɛni ji yaka yiŋsusumɔi? Amɛji yiŋsusumɔi ni bɛ mli, yiŋ-ŋɔɔmɔi, jwɛŋmɔ ni kpaa shi kɛkɛ. Kɛji akɛ nɛkɛ yiŋ-ŋɔɔmɔi nɛɛ batsɔ je lɛŋ yaka yiŋsusumɔi lɛ, belɛ jeee akɛ amɛji be fitemɔ kɛkɛ, shi amɛyeɔ mɔ awui waa hu. No hewɔ lɛ esa akɛ wɔkpoo fɛɛ kwraa. Yɛ anɔkwale mli lɛ, kɛji akɛ wɔnyɛɔ mlakwamɔ taakɛ Yesu fee lɛ, wɔbaabu wɔtsui he kɛjɛ je lɛŋ yaka yiŋsusumɔi ni wɔkɛ wɔhe aaawo mli lɛ he.—Hebribii 1:8, 9.
2. Mɛni ji je lɛŋ yaka yiŋsusumɔi, ni mɛni hewɔ esa akɛ wɔkpoo enɛɛmɛi lɛ?
2 Shi mɛni ji je lɛŋ yaka yiŋsusumɔi lɛ? Amɛji yaka yiŋsusumɔi ni tamɔ jeŋ ni ka Satan hewalɛ mli nɛɛ nɔ̃ lɛ. Bɔfo Yohane ŋma yɛ enɛ he akɛ: “Nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ Tsɛ lɛ mli, shi moŋ je lɛ mli ejɛ.” (1 Yohane 2:16; 5:19) Mɛni hewɔ esa akɛ Kristofoi akpoo je lɛŋ yaka yiŋsusumɔi lɛ? Ejaakɛ nɛkɛ yaka yiŋsusumɔi nɛɛ kanyaa pɛsɛmkunya akɔnɔi yɛ jwɛŋmɔ kɛ tsui mli. Yɛ anɔkwale mli lɛ, mɔ ko yiŋ ni aaaŋɔɔ lɛ yɛ efɔŋ ni eeesumɔ ni efee lɛ he lɛ ji nɔ ni mɔ lɛ baafee diɛŋtsɛ ni efeɔ he mfoniri yɛ ejwɛŋmɔ mli. Kaselɔ Yakobo bɔ wɔ kɔkɔ akɛ: “Mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ. No sɛɛ lɛ akɔnɔ lɛ, kɛ eŋɔ hɔ lɛ, efɔɔ esha, ni esha lɛ hu, kɛ afee agbe naa lɛ, efɔɔ gbele.”—Yakobo 1:14, 15.
Kɔkɔbɔɔ He Nɔkwɛmɔ Nii
3. Namɔ ji mɔ ni esane lɛ kɛ kɔkɔbɔɔ he nɔkwɛmɔ nɔ ni fe fɛɛ ni kɔɔ bɔ ni pɛsɛmkunya yaka yiŋsusumɔi kɛ efɔŋ baa lɛ haa wɔ?
3 Nyɛhaa wɔsusua nɔkwɛmɔ nii komɛi ni tsɔɔ nɔ hewɔ ni esa akɛ wɔkpoo je lɛŋ yaka yiŋsusumɔi lɛ ahe. Satan Abonsam sane lɛ kɛ nɔkwɛmɔ nɔ ni fe fɛɛ ni kɔɔ efɔŋ ni baanyɛ aba yɛ pɛsɛmkunya yaka yiŋsusumɔi ni akɛ he woɔ mli lɛ he haa. Eŋmɛ gbɛ ni su ni tsɔɔ akɛ ehe miihia tsɔ te shi yɛ etsui mli kɛyashɛ he ni ehiɛ bakɔ̃ Yehowa gbɛhe ni mɔ ko kɛ lɛ yeee egbɔ akɛ Jeŋ Muu Fɛɛ Maŋtsɛ lɛ nɔ, ni eesumɔ ni aja lɛ hu. (Luka 4:5-8) Yaka yiŋsusumɔ ni nyɛŋ aba mli? Nakai pɛ eji! Ni abaaye enɛ he odase ni ŋwanejee ko baŋ he beni aaafimɔ Satan afii akpe, ni titri lɛ beni aaashɛ lɛ afɔ “la kpaakpo lɛ” ni ji gbele ni ji enyɔ lɛ mli lɛ.—Kpojiemɔ 20:1-3, 10.
4. Te fee tɛŋŋ ni Satan laka Hawa lɛ?
4 Wɔyɛ kɔkɔbɔɔ he nɔkwɛmɔ nɔ kroko yɛ klɛŋklɛŋ yoo ni ji Hawa sane lɛ mli. Yɛ Satan mɔdɛŋbɔɔ koni eha nɔ ni eshweɔ lɛ aba mli lɛ, elaka Hawa kɛtsɔ yaka yiŋsusumɔ ko ni eha eba ejwɛŋmɔ mli akɛ kɛ eye tso ni agu eyeli lɛ eko lɛ, egboŋ shi moŋ ebaatsɔ tamɔ Nyɔŋmɔ, ni ele ekpakpa kɛ efɔŋ lɛ nɔ. Ani nakai yaka yiŋsusumɔ lɛ nyɛŋ aba mli, eji pɛsɛmkunya nɔ̃? Nakai pɛpɛɛpɛ eji, taakɛ wɔbaanyɛ wɔna yɛ fɔ ni Yehowa bu Hawa kɛ ewu Adam lɛ mli, yɛ be mli ni ebi amɛ sane ni ebu amɛ fɔ lɛ. Nɔ ni jɛ mli ba ji akɛ, amɛlaaje hegbɛ ni amɛyɔɔ akɛ amɛaana wala yɛ Paradeiso amɛha amɛhe kɛ amɛshwiei fɛɛ ni yeee emuu lɛ.—1 Mose 3:1-19; Romabii 5:12.
5. Mɛni kɛ Nyɔŋmɔ bii ni ji ŋwɛibɔfoi komɛi ashigbeemɔ ba, ni mɛni jɛ mli ba amɛnɔ?
5 Agbɛnɛ wɔyɛ kɔkɔbɔɔ he nɔkwɛmɔ nɔ ni kɔɔ Nyɔŋmɔ bii ni ji ŋwɛibɔfoi komɛi ahe. (1 Mose 6:1-4) Ni amɛtsui aaanyɔ amɛmli yɛ jɔɔmɔi ni amɛnaa mli ŋɔɔmɔ yɛ ŋwɛi yɛ Yehowa hiɛ lɛ he lɛ, amɛtsɔ yaka yiŋsusumɔ nɔ amɛsusu yei ni yɔɔ shikpɔŋ nɔ lɛ kɛ bɔ ni amɛkɛ amɛ bɔlɛnamɔ baaŋɔɔ aha lɛ he. Akɛni amɛtsu nɛkɛ yaka yiŋsusumɔ nɛɛ he nii hewɔ lɛ, atsimɔ ŋwɛibɔfoi toigbolɔi nɛɛ anaa awo Tartarus mumɔŋ duŋ lɛ mli kɛmiimɛ amɛ naagbee hiɛkpatamɔ yɛ Yesu Kristo Afii Akpe Nɔyeli lɛ naagbee.—2 Petro 2:4; Yuda 6; Kpojiemɔ 20:10.
Kpoomɔ Je Lɛŋ Yaka Yiŋsusumɔi Lɛ
6, 7. Mɛni hewɔ je lɛŋ yaka yiŋsusumɔi ni kɔɔ heloo gbɛfaŋ ninamɔ he lɛ yeɔ awui ni elakaa mɔ hu lɛ.
6 Agbɛnɛ nyɛhaa wɔsusua yaka yiŋsusumɔi ni asɛɛɛ he ni he yɔɔ oshara waa ni Satan kɛbaa lɛ ekome he wɔkwɛa. Atsɔɔ adafitswaai sɔrɔtoi fɛɛ nɔ abɔɔ mɔdɛŋ ni wɔkɛ wɔhe awo je lɛŋ yaka yiŋsusumɔi amli. Nɔ ni kɛ enɛɛmɛi baa yɛ bei pii amli ji ninamɔ he akɔnɔ. Sane fɔŋ ko bɛ nii ni mɔ ko yɔɔ lɛ diɛŋtsɛ he. Abraham, Hiob, kɛ Maŋtsɛ David ni sheɔ Nyɔŋmɔ gbeyei lɛ yɛ nii waa, shi amɛdiii ninamɔ he akɔnɔ sɛɛ. Yaka yiŋsusumɔi ni kɔɔ ninamɔ he kanyaa gbɔmɛi ni amɛgboɔ deŋme amɛkɛtsuɔ nii dɛŋdɛŋ afii pii ni amɛkɛna nii. Yaka yiŋsusumɔi ni tamɔ nɛkɛ hu kanyaa amɛ koni amɛkɛ amɛhe awo asɔshwɛmɔi sɔrɔtoi fɛɛ mli, tamɔ okpɔŋɔi ni ataa abasa yɛ amɛhe kɛ loto tikiti ni aheɔ. Nyɛkahaa wɔyiŋ lakaa wɔ yɛ ninamɔ he. Kɛji akɛ wɔsusuɔ akɛ heloo gbɛfaŋ ninamɔ baaha wɔhi shi shweshweeshwe lɛ, belɛ susumɔ abɛbua ni ji anɔkwale nɛɛ he: “Mlifu gbi lɛ nɔ lɛ, nii ahe bɛ sɛɛnamɔ ko; shi jalɛ jieɔ mɔ yɛ gbele dɛŋ.” (Abɛi 11:4) Yɛ anɔkwale mli lɛ, heloo gbɛfaŋ ninamɔ he baŋ sɛɛnamɔ ko yɛ ha ni eeeha mɔ ko aje “amanehulu kpeteŋkpele” lɛ mli lɛ mli.—Mateo 24:21; Kpojiemɔ 7:9, 14.
7 Heloo gbɛfaŋ ninamɔ baanyɛ alaka wɔ yɛ gbɛ ni waaa kwraa nɔ. No hewɔ ni akɛɔ wɔ akɛ: “Niiatsɛ nii lɛ ji emɔ̃ɔ ni wa, ni lɛ diɛŋtsɛ ejwɛŋmɔ naa lɛ etamɔ gbogbo grɔŋŋ.” (Abɛi 18:11) Hɛɛ, yɛ “lɛ diɛŋtsɛ ejwɛŋmɔ naa” pɛ, ejaakɛ hebuu fioo ko pɛ heloo naa ninamɔ kɛhaa yɛ nibii ni amɛjara yaa hiɛ be fɛɛ be, jarayeli ni fiteɔ, maŋkwramɔŋ basabasa-feemɔ, loo hela ni baagbe mɔ lɛ mli. Yesu Kristo bɔ kɔkɔ eshi buulu-feemɔ ni yɔɔ wɔhe ni wɔkɛaafɔ heloo naa ninamɔ nɔ lɛ mli lɛ. (Luka 12:13-21) Wɔyɛ bɔfo Paulo kɔkɔbɔɔ wiemɔi lɛ hu: “Nibii fɔji fɛɛ ashishifa ji shika suɔmɔ ni mɛi komɛi di sɛɛ ni amɛdu gbɛ kɛjɛ hemɔkɛyeli Iɛ mli, ni amɛkɛ piŋmɔi babaoo egbulɔ amɛhe lɛ.”—1 Timoteo 6:10.
8. Te je lɛŋ yaka yiŋsusumɔi ni kɔɔ bɔlɛnamɔ he lɛ egbɛ eshwa eha tɛŋŋ, ni mɛɛ osharai enɛɛmɛi kɛbaa?
8 Yaka yiŋsusumɔi krokomɛi kɔɔ bɔlɛnamɔ ni mla egu lɛ ahe. Anaa bɔ ni adesa eshafeelɔ lɛ su sumɔɔ ni ejwɛŋ bɔlɛnamɔ mli yaka yiŋsusumɔ he lɛ yɛ bɔ ni wiemɔ-sha ni ehe gbɛi lɛ yɔɔ ni nine shɛɔ nɔ kɛtsɔɔ telefon nɔmbai komɛi ni aaatswa ni abo yakayaka wiemɔi loo bɔlɛnamɔ he saji atoi lɛ nɔ. Bɔlɛnamɔ he yakayaka wiemɔi ni atswaa telefon koni abo toi yɛ U.S. Amerika lɛ etsɔ nitsumɔ ni haa anaa dɔlai akpekpei toi akpekpei abɔ. Kɛ wɔha wɔjwɛŋmɔ hi bɔlɛnamɔ ni mla eŋmɛɛɛ gbɛ lɛ nɔ lɛ, ani wɔfeŋ wɔhe osatofoi, ni wɔmiifee wɔhe tamɔ Kristofoi ni he tse pɛ ji wɔ? Ni ani oshara bɛ he akɛ nɛkɛ yaka yiŋsusumɔ nɛɛ kɛ bɔlɛnamɔ jeŋba shara yɛ teemɔŋ baaba? Enɛ eba lɛ nakai, ni nɔ ni ejɛ mli eba ji akɛ ashwie mɛi komɛi kɛjɛ Kristofoi asafo lɛ mli yɛ ajwamaŋ ni amɛbɔ loo gbala ni amɛfite hewɔ. Yɛ Yesu wiemɔi ni yɔɔ Mateo 5:27, 28 lɛ hewɔ lɛ, ani jeee gbala mɛi fɛɛ ni kɛ amɛhe woɔ yaka yiŋsusumɔi nɛɛ amli be fɛɛ be lɛ fiteɔ yɛ amɛtsuii amli lɛ?
9. Mɛɛ ŋaawoo kpakpa yɔɔ Ŋmalɛi lɛ amli ni bɔɔ wɔ kɔkɔ yɛ je lɛŋ yaka yiŋsusumɔi ahe?
9 Bɔni afee ni wɔku su ni wɔ eshafeemɔ tsuii lɛ hiɛ ni aaaha akɛ he awo yaka yiŋsusumɔi ni tamɔ nɛkɛ mli lɛ naa lɛ, ehe miihia ni wɔha Paulo kɔkɔbɔɔ lɛ ahi wɔjwɛŋmɔ mli: “Ni ateee bɔɔ nɔ ko yɛ [Nyɔŋmɔ] hiɛ, shi nibii fɛɛ yɛ faŋŋ ni agbele nɔ yɛ lɛ mɔ ni wɔkɛyɔɔ sane lɛ hiŋmɛiiaŋ.” (Hebribii 4:13) Esa akɛ wɔsumɔ akɛ wɔɔtamɔ Mose yɛ be fɛɛ mli, mɔ ni tee nɔ “emɔ Mɔ ni anaaa lɛ lɛ mli tamɔ nɔ ni eena lɛ” lɛ. (Hebribii 11:27) Hɛɛ, esa akɛ wɔya nɔ wɔkɛɛ wɔhe akɛ je lɛŋ yaka yiŋsusumɔi lɛ esaaa Yehowa hiɛ ni nɔ ni baajɛ mli aba pɛ ji awui ni wɔɔye wɔ diɛŋtsɛ wɔhe. Esa akɛ wɔsusu mumɔ lɛ yibii lɛ fɛɛ ni wɔɔwo lɛ ahe, titri lɛ henɔyeli, ejaakɛ wɔnyɛŋ wɔjo anɔkwale ni eji akɛ kɛ wɔdu nii yɛ heloo mli lɛ, wɔbaakpa fitemɔ kɛjɛ heloo mli lɛ naa foi.—Galatabii 5:22, 23; 6:7, 8.
Maŋtsɛyeli lɛ He Nibii ni Yɔɔ Diɛŋtsɛ Lɛ
10, 11. (a) Mɛɛ anɔkwa saji fiɔ shihilɛ mli ni Bɔlɔ lɛ yɔɔ diɛŋtsɛ lɛ sɛɛ? (b) Mɛɛ odaseyeli yɔɔ ni tsɔɔ akɛ Biblia lɛ ji Nyɔŋmɔ Wiemɔ diɛŋtsɛ? (d) Mɛɛ odaseyeli yɔɔ ni tsɔɔ akɛ Nyɔŋmɔ Maŋtsɛyeli lɛ nɔ Maŋtsɛ lɛ yɛ diɛŋtsɛ?
10 Gbɛ ni hi fe fɛɛ ni aaatsɔ nɔ akpoo je lɛŋ yaka yiŋsusumɔi ji ni wɔya nɔ wɔdi Maŋtsɛyeli lɛ he nibii ni yɔɔ diɛŋtsɛ lɛ asɛɛ. Maŋtsɛyeli lɛ he nibii ni yɔɔ diɛŋtsɛ ni Nyɔŋmɔ kɛbaa lɛ yɛ sɔrɔto kwraa yɛ je lɛŋ yaka yiŋsusumɔi lɛ ahe. Ani Nyɔŋmɔ ji mɔ ni yɔɔ diɛŋtsɛ? Sanebimɔ ko bɛ shihilɛ mli ni eyɔɔ lɛ he. Nibɔɔ ni anaa lɛ yeɔ anɔkwa sane lɛ he odase. (Romabii 1:20) Akaiɔ wɔ yɛ nɔ ni awie fe afii oha nɛ yɛ wolo, The Divine Plan of the Ages, ni Buu Mɔɔ Asafo lɛ fee lɛ mli. Ewie akɛ: “Mɔ ni baanyɛ ni ekɛ shwɛde akwɛ atatuiaŋ, aloo ni ekɛ ehiŋmɛi folo nɛɛ po akwɛ, ni ena bɔɔ nii babaoo ni yɔɔ jɛmɛ, bɔ ni amɛkɛ amɛhe kpaa gbee pɛpɛɛpɛ, amɛ fɛo, gbɛjianɔtoo kpakpa, gbeekpamɔ kɛ bɔ ni eyɔɔ sɔrɔto ha, ni kɛlɛ eyiŋ afee lɛ kɔshikɔshi akɛ nibii nɛɛ a-Bɔlɔ lɛ da fe lɛ kwraa yɛ nilee kɛ hewalɛ mli, aloo ni eeesusu sharao akɛ gbɛjianɔtoo ni tamɔ nɛkɛ ba trukaa, ni Bɔlɔ ko bɛ mli lɛ, elaaje loo eku ehiɛ eshwie nilee loo nyɛmɔ ni akɛjwɛŋɔ lɛ nɔ bɔ ni aaaha asusu ehe yɛ bɔ ni Biblia lɛ tsɛɔ lɛ lɛ naa, kwashia, (mɔ ni kuɔ ehiɛ eshwieɔ jwɛŋmɔ nɔ loo ebɛ eko kwraa po).”—Lala 14:1.
11 Wɔkaseɔ nibii fɛɛ ni kɔɔ Maŋtsɛyeli lɛ he lɛ kɛjɛɔ Biblia lɛ mli. Ani Biblia lɛ ji Nyɔŋmɔ Wiemɔ ni aŋma diɛŋtsɛ? Nakai pɛpɛɛpɛ eji, taakɛ abaanyɛ ana kɛjɛ bɔ ni ekɛ ehe kpaa gbee, ni eji anɔkwale yɛ jeŋ nilee naa, kɛ bɔ ni ehewalɛ nyɛɔ etsakeɔ gbɔmɛi ashihilɛ kɛ agbɛnɛ titri lɛ yɛ egbalɛi amlibaa mli lɛ.a Ni Nyɔŋmɔ Maŋtsɛyeli lɛ nɔ Maŋtsɛ, Yesu Kristo hu? Ani ehi shi diɛŋtsɛ? Sanekpakpai lɛ amli saji lɛ kɛ Kristofoi a-Hela Ŋmalɛi lɛ amli woji ni ajɛ mumɔŋ aŋmala lɛ yeɔ yinɔsane mli gbɔmɔ ni Yesu Kristo ji lɛ he odase yɛ anɔkwayeli mli ni ŋwanejee ko kwraa bɛ he. Yɛ yinɔsane mli gbɔmɔ ni Yesu ji lɛ he lɛ, Yudafoi a-Talmud lɛ odaseyeli ni wieɔ ehe akɛ mɔ ko pɔtɛɛ lɛ hu yɛ. Nakai nɔŋŋ Yudafoi kɛ Romabii yinɔsane ŋmalalɔi ni hi shi yɛ Ŋ.B. klɛŋklɛŋ afii oha lɛ mli lɛ hu yeɔ ehe odase.
12, 13. Mɛɛ anɔkwa saji yeɔ shihilɛ mli ni Nyɔŋmɔ Maŋtsɛyeli lɛ yɔɔ diɛŋtsɛ lɛ he odase?
12 Ni shihilɛ mli diɛŋtsɛ ni Maŋtsɛyeli lɛ yɔɔ lɛ hu? Kristendom kuɔ ehiɛ eshwie enɛ nɔ babaoo, taakɛ anaa yɛ nɔ ni Presbyterianyo ko kɛ dɔlɛ wie shi nɛɛ mli lɛ: “Nɔ ni fe afii nyɔŋmai etɛ nɛ ni minu ni osɔfo ko miibɔ mɔdɛŋ ni etsɔɔ bɔ ni Maŋtsɛyeli lɛ ji nɔ ni yɔɔ diɛŋtsɛ lɛ mli atsɔɔ ewebii.” Ni kɛlɛ, Yehowa gbɛi lɛ he tsemɔ kɛtsɔ Maŋtsɛyeli lɛ nɔ lɛ ji e-Wiemɔ lɛ saneyitso. Nyɔŋmɔ diɛŋtsɛ ji mɔ ni kɛ klɛŋklɛŋ shiwoo ni kɔɔ Maŋtsɛyeli lɛ he lɛ ha, akɛ: “Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ.” (1 Mose 3:15) Akɛ Israel maŋ lɛ fee Maŋtsɛyeli lɛ he mfoniri, titri lɛ yɛ Maŋtsɛ Salomo nɔyeli beaŋ. (Lala 72) Agbɛnɛ, Maŋtsɛyeli lɛ ji Yesu shiɛmɔ wiemɔ lɛ yitso. (Mateo 4:17) Ewie enɛ he yɛ ebɛbuai lɛ babaoo mli, tamɔ nɔ ni yɔɔ Mateo yitso 13 lɛ nɛkɛ. Yesu kɛɛ wɔ akɛ wɔsɔle yɛ Maŋtsɛyeli lɛ he ni wɔya nɔ wɔtao no klɛŋklɛŋ. (Mateo 6:9, 10, 33) Yɛ anɔkwale mli lɛ, atsiɔ Nyɔŋmɔ Maŋtsɛyeli lɛ ta aaafee shii 150 yɛ Kristofoi a-Hela Ŋmalɛi lɛ amli.
13 Maŋtsɛyeli lɛ ji nɔyeli diɛŋtsɛ, ni yɔɔ hewalɛ kɛ hegbɛ, ni ebaaha nibii ni akpaa lɛ gbɛ ni ja yɛ he lɛ fɛɛ aba mli. Eyɛ mlai ni ato naa ni anaa yɛ Biblia lɛ mli. Maŋtsɛyeli lɛ kɛ nibii pii eba shihilɛ mli diɛŋtsɛ momo po. Eyɛ eshishi bii anɔkwafoi—Yehowa Odasefoi fe 4,000,000. Amɛmiishiɛ Nyɔŋmɔ Maŋtsɛyeli lɛ he sanekpakpa lɛ yɛ shikpɔji 211 nɔ, kɛha Mateo 24:14 mlibaa. Amɛkɛ ŋmɛlɛtswaai 951,870,021 tsu nii amɛkɛshiɛ Maŋtsɛyeli lɛ he sane lɛ yɛ amɛ 1991 sɔɔmɔ afi lɛ mli. Nitsumɔ nɛɛ kɛ nibii ni jɛɔ mli baa ni baahi shi daa miiha, yɛ be mli ni gbɔmɛi asafoi babaoo kaseɔ “wiemɔ krɔŋŋ,” ni ji Biblia mli anɔkwale lɛ.—Zefania 3:9.
Maŋtsɛyeli lɛ He Nibii ni Yɔɔ Diɛŋtsɛ lɛ Asɛɛdii
14. Te wɔɔfee tɛŋŋ wɔwaje hiɛsɔɔ ni wɔyɔɔ kɛha shihilɛ mli ni Maŋtsɛyeli lɛ yɔɔ diɛŋtsɛ lɛ?
14 Belɛ te wɔɔfee tɛŋŋ wɔdi Maŋtsɛyeli lɛ he nibii ni yɔɔ diɛŋtsɛ lɛ asɛɛ? Esa akɛ wɔ hiɛnɔkamɔ lɛ afee nɔ ni damɔ hekɛnɔfɔɔ ni mli wa ni yɔɔ shiŋŋ nɔ. Esa akɛ jeŋ hee ni Nyɔŋmɔ ewo shi yɛ he lɛ afee nɔ ni yɔɔ diɛŋtsɛ kɛha wɔ. (2 Petro 3:13) Ni esa akɛ wɔna hemɔkɛyeli yɛ shiwoo akɛ Nyɔŋmɔ “aaatsumɔ [wɔ]hiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ” lɛ mli. (Kpojiemɔ 21:4) Te wɔɔfee tɛŋŋ wɔle akɛ enɛ jeee yaka yiŋsusumɔ ko kɛkɛ? Ebaaba mli kɛ̃, yɛ Nyɔŋmɔ be ni sa lɛ mli, ejaakɛ enyɛŋ emale. (Tito 1:1, 2; Hebribii 6:18) Ehe miihia ni wɔjwɛŋ nakai shiwooi lɛ anɔ. Ni wɔɔfee wɔhe mfoniri akɛ wɔyɛ Nyɔŋmɔ jeŋ hee lɛ mli ni wɔmiina ejɔɔmɔi amli ŋɔɔmɔ lɛ jeee yaka yiŋsusumɔ ni nyɛŋ aba mli, shi moŋ eyeɔ hemɔkɛyeli ni wɔyɔɔ lɛ he odase. Taakɛ Paulo tsɔɔ mli lɛ, “hemɔkɛyeli ji nii ni mɛi ahiɛ ka nɔ lɛ agbɛkpamɔ nɔmimaa, nii ni yɔɔ diɛŋtsɛ lɛ ahe odaseyeli, tsɛbelɛ anaa.” (Hebribii 11:1, NW) Nyɛhaa wɔwajea wɔhemɔkɛyeli kɛtsɔ Nyɔŋmɔ Wiemɔ lɛ kɛ Kristofoi awoji ni yeɔ buaa wɔ koni wɔnu shishi ni wɔkɛtsu nii lɛ kasemɔ daa nɔ. Ni be babaoo ni wɔkɛwoɔ Maŋtsɛyeli lɛ he saji ni wɔgbaa mɛi krokomɛi lɛ mli yɛ gbɛi ni yɔɔ tɛɛ kɛ trukaa sanegbaa hu mli lɛ, babaoo hu ni ewoɔ wɔhemɔkɛyeli hewalɛ ni ehaa wɔhiɛnɔkamɔ lɛ feɔ faŋŋ ji no.
15. Mɛɛ Kristofoi asɔɔmɔ lɛ he gbɛnaa nii ka wɔnɔ?
15 Ehe miihia hu ni wɔtsu nii ni ekɛ Maŋtsɛyeli lɛ he nibii ni yɔɔ diɛŋtsɛ lɛ akpa gbee kɛtsɔ wɔsɔɔmɔ lɛ hilɛ ni wɔɔha eya hiɛ lɛ nɔ. Akɛni babaoo yɛ lolo ni abaatsu hewɔ lɛ, mɛɛ gbɛ nɔ wɔɔtsɔ wɔfee enɛ yɛ? (Mateo 9:37, 38) Wiemɔ akɛ, mɔ ko egbɔko tsɔ fe bɔ ni eeenyɛ ekase nii lɛ ji anɔkwale. Bɔ fɛɛ bɔ ni wɔna odaseyeli nitsumɔ lɛ mli gbɛfaŋnɔ afii babaoo wɔha lɛ, wɔbaanyɛ wɔya wɔhiɛ. Kɛ wɔha wɔhe sa babaoo yɛ Nyɔŋmɔ Wiemɔ lɛ kɛ nitsumɔ mli lɛ, wɔnyɛɔ wɔyeɔ wɔbuaa mɛi krokomɛi jogbaŋŋ, koni amɛbo Maŋtsɛ, Yesu Kristo gbee toi. (Okɛto Yohane 10:16 he.) Kɛ wɔsusu bɔ ni ekɔɔ gbɔmɛi anaanɔ shihilɛ he ehaa lɛ, belɛ esa akɛ wɔsumɔ akɛ wɔɔtsu wɔ shikpɔŋkuku lɛ mli nii jogbaŋŋ kɛmɔ shi, koni wɔkɛ hegbɛ ni aaaha amɛtsɔɔ he ni amɛdamɔ akɛ “gwantɛŋi” loo akɛ “abotiai” lɛ aha amɛ shii abɔ. (Mateo 25:31-46) Ni enɛ tsɔɔ akɛ esa akɛ wɔkadi mɛi ni bɛ shia lɛ agbɛi jogbaŋŋ kɛ agbɛnɛ mɛi ni yɔɔ Maŋtsɛyeli sane lɛ he miishɛɛ lɛ titri.
Yaa nɔ Odi Maŋtsɛyeli lɛ Sɛɛ
16. Namɛi eto okadi kpakpa amɛfɔ shi yɛ Maŋtsɛyeli lɛ he nibii ni yɔɔ diɛŋtsɛ lɛ asɛɛdii mli, ni ‘amɛ-gbalaa’ Maŋtsɛyeli lɛ “yɛ hewalɛ naa” yɛ mɛɛ gbɛ nɔ?
16 Ebiɔ mɔdɛŋbɔɔ yɛ anɔkwayeli mli koni aya nɔ adi Maŋtsɛyeli lɛ he nibii ni yɔɔ diɛŋtsɛ lɛ asɛɛ. Ani Kristofoi ni afɔ amɛ mu ni amɛshwɛ lɛ anɔkwɛmɔ nɔ yɛ ekãa naa lɛ wooo wɔ hewalɛ? Amɛkɛ afii nyɔŋma-nyɔŋmai abɔ edi Maŋtsɛyeli lɛ he nibii ni yɔɔ diɛŋtsɛ lɛ asɛɛ. Atsɔɔ nɛkɛ sɛɛdii nɛɛ mli yɛ Yesu wiemɔi lɛ amli: “Kɛjɛ Yohane Baptisilɔ lɛ yinɔ kɛbaa nɛɛ, hewalɛ naa aŋɔɔ ŋwɛi maŋtsɛyeli lɛ, ni hewalɔi gbalaa lɛ hewalɛ naa.” (Mateo 11:12) Susumɔ ni yɔɔ biɛ lɛ etsɔɔɔ henyɛlɔi ni miishɔ Maŋtsɛyeli lɛ. Shi moŋ enɛ kɔɔ mɛi ni amɛnine baashɛ Maŋtsɛyeli lɛ nɔ lɛ anitsumɔ he. Biblia he nilelɔ ko kɛɛ: “Nɛkɛ gbɛ nɔ atsɔɔ akɛtsɔɔ hehiamɔ, mɔdɛŋbɔɔ ni anyɛɛɛ atsi naa kɛ hepelemɔ ni akɛdiɔ Mesia maŋtsɛyeli ni baa lɛ sɛɛ.” Mɛi ni afɔ amɛ mu lɛ ebɔ mɔdɛŋ fɛɛ ni amɛaanyɛ koni amɛfee Maŋtsɛyeli lɛ amɛ diɛŋtsɛ amɛnɔ̃. Aatao mɔdɛŋbɔɔ kɛ ekãa ni tamɔ nakai nɔŋŋ yɛ “tooi krokomɛi” lɛ ahe dani amɛhe asa akɛ Nyɔŋmɔ ŋwɛi Maŋtsɛyeli lɛ shishibii ni yɔɔ shikpɔŋ lɛ nɔ.—Yohane 10:16.
17. Mɛni baaba mɛi ni diɔ je lɛŋ yaka yiŋsusumɔi asɛɛ lɛ anɔ?
17 Yɛ anɔkwale mli lɛ, hegbɛ krɛdɛɛ be ko mli wɔyɔɔ lɛ. Mɛi ni diɔ je lɛŋ yaka yiŋsusumɔi asɛɛ lɛ baahɛle shi gbi ko yɛ nibii ni naa wa ni yɔɔ diɛŋtsɛ he. Atsɔɔ nɔ ni baaba amɛnɔ lɛ mli jogbaŋŋ yɛ nɛkɛ wiemɔi nɛɛ amli: “Tamɔ bɔ ni mɔ ni hɔmɔ yeɔ lɛ laa, ni naa, eeye nii, ni beni ehiɛ aaatsɛ lɛ, esusuma ka efolo: loo tamɔ bɔ ni mɔ ni kumai yeɔ lɛ laa, ni naa, eenu nu, ni beni ehiɛ aaatsɛ lɛ, etɔ biti ni esusuma miishwe nu lolo lɛ.” (Yesaia 29:8) Eji anɔkwale akɛ, je lɛŋ yaka yiŋsusumɔ lɛ haŋ mɔ ko tsui anyɔ emli ni ena miishɛɛ kɔkɔɔkɔ.
18. Akɛni Maŋtsɛyeli lɛ yɔɔ shihilɛ mli diɛŋtsɛ hewɔ lɛ, esa akɛ wɔdi mɛni sɛɛ, yɛ mɛni ni baajɛ mli aba hewɔ?
18 Yehowa Maŋtsɛyeli lɛ ji nɔ ko ni yɔɔ diɛŋtsɛ. Eeye nɔ bianɛ, yɛ be mli ni naanɔ hiɛkpatamɔ ni miiba ka nibii agbɛjianɔtoo fɔŋ nɛɛ hiɛ. No hewɔ lɛ, bo Paulo ŋaawoo nɛɛ toi: “Belɛ, no hewɔ lɛ, nyɛkahaa wɔmiiwɔa tamɔ mɛi ni eshwɛ lɛ, shi moŋ nyɛhaa wɔshia kpe ni wɔhiɛ akaa shi.” (1 Tesalonikabii 5:6) Eba akɛ wɔɔha wɔjwɛŋmɔi kɛ wɔtsuii ahi Maŋtsɛyeli lɛ he nibii ni yɔɔ diɛŋtsɛ lɛ anɔ koni wɔna enaanɔ jɔɔmɔi lɛ amli ŋɔɔmɔ. Ni eba akɛ, ni wɔɔnu ni nakai Maŋtsɛyeli lɛ nɔ Maŋtsɛ lɛ aaakɛɛ wɔ nɛkɛ lɛ aaafee wɔgbɛfaŋnɔ: “Nyɛbaa, nyɛ mɛi ni mi-Tsɛ ejɔɔ nyɛ, nyɛbaŋɔa maŋtsɛyeli lɛ ni asaa ato nyɛ kɛjɛ jeŋ shishijee lɛ.”—Mateo 25:34.
[Shishigbɛ niŋmai]
a Kwɛmɔ wolo, The Bible—God’s Word or Man’s?, ni Watchtower Bible and Tract Society of New York, lnc. fee lɛ mli.
Te Obaaha Hetoo Oha Tɛŋŋ?
◻ Mɛni ji je lɛŋ yaka yiŋsusumɔi, ni mɛni hewɔ esa akɛ wɔkpoo enɛɛmɛi lɛ?
◻ Mɛɛ nɔkwɛmɔ nii tsɔɔ buulu-feemɔ ni yɔɔ je lɛŋ yaka yiŋsusumɔi ni akɛ he aaawo mli lɛ?
◻ Mɛɛ anɔkwa saji yɔɔ ni yeɔ odase akɛ Bɔlɔ lɛ, e-Wiemɔ ni aŋma lɛ Yesu Kristo, kɛ e-Maŋtsɛyeli lɛ yɛ diɛŋtsɛ?
◻ Te wɔfee tɛŋŋ wɔwaje wɔhemɔkɛyeli yɛ Maŋtsɛyeli lɛ he nibii ni yɔɔ diɛŋtsɛ lɛ amli?
[Mfoniri ni yɔɔ baafa 15]
Nɔ ni kɛ je lɛŋ yaka yiŋsusumɔi baa yɛ be babaoo mli ji heloo gbɛfaŋ ninamɔ he akɔnɔ
[Mfoniri ni yɔɔ baafa 16]
Sanekpakpa lɛ shiɛmɔ lɛ ji gbɛ kome ni aaatsɔ nɔ akɛdi Maŋtsɛyeli lɛ he nibii ni yɔɔ diɛŋtsɛ lɛ asɛɛ
[Mfoniri ni yɔɔ baafa 17]
Ani oodi Maŋtsɛyeli lɛ he nibii ni yɔɔ diɛŋtsɛ lɛ asɛɛ kɛtsɔ Nyɔŋmɔ Wiemɔ lɛ kasemɔ kɛ hiɛdɔɔ nɔ?