Kanemɔ Nyɔŋmɔ Wiemɔ lɛ ni Osɔmɔ lɛ yɛ Anɔkwale Mli
“Yehowa, tsɔɔmɔ mi ogbɛ lɛ, manyiɛ onɔkwale lɛ mli.” —LALA 86:11.
1. Mɛni wolo tɛtrɛɛ nɛɛ klɛŋklɛŋ nɔ̃ ni afee lɛ wie yɛ anɔkwale ni he hiaa diɛŋtsɛ he?
YEHOWA tsuɔ la kɛ anɔkwale kɛyaa. (Lala 43:3) Ekɛ nyɛmɔ ni wɔkɛaakane e-Wiemɔ, ni ji Biblia lɛ, ni wɔkase anɔkwale lɛ hu haa wɔ. Wolo nɛɛ klɛŋklɛŋ nɔ ni afee—July 1879—kɛɛ: “Nɔ ni ebɔle anɔkwale he kɛkpe ni eehe etsi nɔ kwraa ji tɔmɔ jwɛi ni ebu kusuu, taakɛ fɔfɔi bibioo ni baa shi ji yɛ wala shihilɛ ŋã nɔ lɛ. Kɛ obaana lɛ, no lɛ esa akɛ ohiɛ ahi ohe nɔ be fɛɛ be. Kɛ obaanyɛ ona bɔ ni eyɔɔ fɛo ha lɛ, no lɛ esa akɛ ohũ tɔmɔ jwɛi lɛ kɛ kuɛŋtimɔ ŋmei ni akɛsusuɔ mɔ pɛ he lɛ oshwie. Kɛ oosumɔ ni etsɔ onɔ̃ lɛ, no lɛ esa akɛ oba ohe shi kwraa dani onine ashɛ nɔ. Otsui akanyɔ omli yɛ anɔkwale fɔfɔi kome he. Eji ekome yafee nɔ ni fa kɛkɛ kulɛ eko baaa dɔŋŋ. Buamɔ babaoo naa, taomɔ babaoo.” Nyɔŋmɔ Wiemɔ lɛ kanemɔ kɛ ekasemɔ haa wɔnyɛɔ wɔnaa anɔkwa nilee ni wɔnyiɛɔ yɛ enɔkwale lɛ mli.—Lala 86:11.
2. Mɛni ba beni Ezra kɛ mɛi krokomɛi lɛ kane Nyɔŋmɔ Mla lɛ amɛtsɔɔ Yudafoi ni yɔɔ blema Yerusalem lɛ?
2 Beni aku sɛɛ atswa Yerusalem gbogboi lɛ ekoŋŋ yɛ 455 D.Ŋ.B. lɛ, osɔfo Ezra kɛ mɛi krokomɛi kane Nyɔŋmɔ Mla lɛ amɛtsɔɔ Yudafoi lɛ. Nɔ ni nyiɛ enɛ sɛɛ ji Asesei Agbijurɔ, eshai jajemɔ ni yɔɔ miishɛɛ, ni amɛkɛ “kpaŋmɔ ni mli wa” mu naa. (Nehemia 8:1–9:38) Wɔkaneɔ akɛ: “Amɛkane wolo lɛ ni ji Nyɔŋmɔ mla lɛ faŋŋ, ni amɛtsɔɔ shishi, koni anu nɔ ni akaneɔ lɛ shishi.” (Nehemia 8:8) Mɛi komɛi susuɔ akɛ Yudafoi lɛ nuuu Hebri wiemɔ lɛ shishi jogbaŋŋ, no hewɔ lɛ atsɔɔ shishi kukuji yɛ Aramaik wiemɔ mli. Shi ŋmalɛ lɛ etsɔɔɔ wiemɔ lɛ shishitsɔɔmɔ kɛkɛ. Ezra kɛ mɛi krokomɛi lɛ tsɔɔ Mla lɛ mli koni gbɔmɛi lɛ anyɛ anu shishi ni amɛkɛ emli shishitoo taomɔ nii lɛ atsu nii. Kristofoi awoji kɛ kpeei hu haa ‘anuɔ’ Nyɔŋmɔ Wiemɔ lɛ “shishi.” Nakai onukpai ni ahala amɛ “ni le nitsɔɔmɔ” lɛ feɔ.—1 Timoteo 3:1, 2; 2 Timoteo 2:24.
Sɛɛnamɔ ni Sɛɛ Tsɛɔ
3. Mɛni ji sɛɛnamɔi komɛi ni ana kɛjɛ Biblia kanemɔ mli?
3 Kɛ Kristofoi awekui kane Biblia lɛ kutuu lɛ, amɛnine baanyɛ ashɛ sɛɛnamɔi ni sɛɛ tsɛɔ nɔ. Amɛbaleɔ Nyɔŋmɔ mlai ni amɛkaseɔ anɔkwale ni kɔɔ tsɔɔmɔi, gbalɛ mli saji, kɛ saji krokomɛi ahe lɛ he nii. Beni akane Biblia lɛ fã ko sɛɛ lɛ, weku yitso lɛ baanyɛ abi akɛ: Te esa akɛ enɛ asa wɔhe aha tɛŋŋ? Enɛ kɔɔ Biblia mli tsɔɔmɔi krokomɛi ahe yɛ mɛɛ gbɛ nɔ? Mɛɛ gbɛ nɔ wɔɔtsɔ wɔkɛ saji otii nɛɛ atsu nii yɛ sanekpakpa lɛ shiɛmɔ mli? Kɛ weku ko miikane Biblia lɛ ni amɛkɛ Watch Tower Publications Index loo woji krokomɛi amli saji ataomɔ he tsu nii lɛ, amɛnuɔ Biblia lɛ shishi babaoo. Amɛbaanyɛ amɛkwɛ Insight on the Scriptures wolo kpoi enyɔ lɛ mli koni ehe aba sɛɛnamɔ kɛha amɛ.
4. Te Yoshua kɛ fãmɔ ni aŋma yɛ Yoshua 1:8 lɛ baatsu nii aha tɛŋŋ?
4 Shishitoo mlai ni anaa kɛjɛɔ Ŋmalɛi lɛ amli lɛ baanyɛ akudɔ wɔ yɛ shihilɛ mli. Agbɛnɛ hu, ‘niŋmaai krɔŋkrɔŋi’ lɛ akanemɔ kɛ kasemɔ ‘baanyɛ aha wɔna nilee ni kɛ mɔ yaa yiwalaheremɔ mli.’ (2 Timoteo 3:15) Kɛ wɔha Nyɔŋmɔ Wiemɔ lɛ tsɔɔ wɔ gbɛ lɛ, wɔbaaya nɔ wɔnyiɛ yɛ enɔkwale lɛ mli, ni wɔnine baashɛ wɔ taomɔ nii ni ja lɛ anɔ. (Lala 26:3; 119:130) Shi, ehe miihia ni wɔtao shishinumɔ, taakɛ Mose sɛɛyelɔ Yoshua fee lɛ. Esaaa akɛ “mla wolo” lɛ mli wiemɔi lɛ kpaa yɛ edaaŋ, ni esa akɛ ekane shwane kɛ nyɔɔŋ. (Yoshua 1:8) Ni ekaha “mla wolo” lɛ miikpa yɛ edaaŋ lɛ tsɔɔ akɛ, Yoshua akakpa emli saji ni kɛ hiɛtɛ̃jemɔ haa ni ewieɔ he etsɔɔ mɛi krokomɛi lɛ ahe wiemɔ. Mla lɛ kanemɔ shwane kɛ nyɔɔŋ lɛ tsɔɔ akɛ esa akɛ Yoshua ajwɛŋ nɔ, ekase. Nakai nɔŋŋ bɔfo Paulo wo Timoteo hewalɛ ni ‘esusu’—ejwɛŋ—ejeŋba, sɔɔmɔ, kɛ etsɔɔmɔ lɛ he. Akɛ Kristofonyo onukpa lɛ, ehe miihia ni Timoteo akwɛ jogbaŋŋ titri lɛ koni akana nɔ ko atã yɛ ejeŋba he, ni akɛ, Ŋmalɛ mli anɔkwale lɛ etsɔɔ.—1 Timoteo 4:15.
5. Mɛni he hiaa kɛ wɔɔna Nyɔŋmɔ anɔkwale lɛ?
5 Nyɔŋmɔ anɔkwale lɛ ji jwetri ko ni anyɛŋ akɛ shika ahe. Enamɔ biɔ shitsaa, Ŋmalɛi lɛ amlitaomɔ kɛ hekãmɔ. Mɛi ni tamɔ Tsɔɔlɔ ni Fe Fɛɛ lɛ kaselɔi ni tamɔ gbekɛbii ni wɔɔtsɔmɔ pɛ nɔ wɔbaatsɔ wɔna nilee koni wɔnu Yehowa gbeyeishemɔ ni woo yɔɔ mli lɛ shishi. (Abɛi 1:7; Yesaia 30:20, 21) Shi, esa akɛ wɔdamɔ Ŋmalɛ lɛ nɔ wɔna bɔ ni nibii yɔɔ ha diɛŋtsɛ. (1 Petro 2:1, 2) Yudafoi ni yɔɔ Beroia lɛ “asu hi fe mɛi ni yɔɔ Tesalonika lɛ, ni amɛ lɛ amɛjie amɛyitsoŋ amɛmɔ wiemɔ lɛ mli, ni daa amɛkpaa ŋmalɛi lɛ amli amɛkwɛɔ akɛ nibii nɛɛ [ni Paulo wie lɛ] yɛ mli nakai lo.” Ejie Beroiabii lɛ ayi moŋ fe ni eeekã amɛhiɛ.—Bɔfoi lɛ Asaji 17:10, 11.
6. Mɛni hewɔ Yesu nyɛ etsɔɔ akɛ Ŋmalɛi lɛ amli ni Yudafoi komɛi taoɔ lɛ he eyabaaa sɛɛnamɔ kɛhaaa amɛ?
6 Yesu kɛɛ Yudafoi komɛi akɛ: “Nyɛtaoa ŋmalɛi lɛ amli, ejaakɛ nyɛ diɛŋtsɛ nyɛsusuɔ akɛ nomɛi amli nyɛnaa naanɔ wala yɛ, ni nomɛi nɔŋŋ ji nii ni yeɔ mihe odase lɛ. Ni nyɛsumɔɔɔ akɛ nyɛbaa miŋɔɔ ni nyɛna wala.” (Yohane 5:39, 40) Amɛkɛ jwɛŋmɔ kpakpa tao Ŋmalɛi lɛ amli—ákɛ enɛɛmɛi baanyɛ atsɔɔ amɛ gbɛ kɛya wala he. Yɛ anɔkwale mli lɛ, Mesia lɛ he gbalɛi ni tsɔɔ akɛ Yesu ji mɔ ni abaatsɔ enɔ ana wala, yɛ Ŋmalɛi lɛ amli. Shi Yudafoi lɛ kpoo lɛ. No hewɔ lɛ Ŋmalɛi lɛ amlitaomɔ lɛ ahe eyabaaa sɛɛnamɔ kɛhaaa amɛ.
7. Mɛni he hiaa koni ada yɛ Biblia lɛ shishinumɔ mli, ni mɛni hewɔ?
7 Kɛ wɔɔda yɛ Biblia lɛ he shishinumɔ mli lɛ, belɛ Nyɔŋmɔ mumɔ lɛ, loo enitsumɔ hewalɛ lɛ gbɛtsɔɔmɔ he miihia wɔ. “Ejaakɛ Mumɔ lɛ taoɔ nibii fɛɛ mli, Nyɔŋmɔ nibii ni mlikwɔlɔ tete” koni amɛha wɔnu shishi. (1 Korintobii 2:10) Esa akɛ Kristofoi ni yɔɔ Tesalonika lɛ “ana nɔmimaa yɛ nɔ fɛɛ nɔ he” yɛ gbalɛ fɛɛ gbalɛ ni amɛnu lɛ he. (1 Tesalonikabii 5:20, 21, NW) Beni Paulo ŋma wolo eyaha Tesalonikabii (aaafee 50 Ŋ.B.) lɛ, no mli lɛ Hela Ŋmalɛi lɛ fã pɛ ni aŋma momo ji Mateo Sanekpakpa lɛ. No hewɔ lɛ Tesalonikabii lɛ kɛ Beroiabii lɛ baanyɛ ana nɔmimaa yɛ nɔ fɛɛ nɔ he, eeenyɛ efee akɛ kɛtsɔ Hela Septuagint shishitsɔɔmɔ lɛ ni jɛ Hebri Ŋmalɛi lɛ amli lɛ amlipɛimɔ nɔ. Ehe miihia ni amɛkane ni amɛkase Ŋmalɛi lɛ, ni nakai esa akɛ wɔfee.
Ehe Hiaa Mɔ Fɛɛ Mɔ
8. Mɛni hewɔ esa akɛ onukpai ni ahala amɛ lɛ aná Biblia mli nilee ni fa lɛ?
8 Esa akɛ onukpai ni ahala amɛ lɛ afee mɛi ni yɔɔ Biblia mli nilee babaoo. Esa akɛ amɛfee mɛi “ni le nitsɔɔmɔ,” ni esa akɛ ‘amɛhiɛ anɔkwa wiemɔ lɛ mli kpɛŋŋ.’ Esa akɛ nɔkwɛlɔ Timoteo afee mɔ ni ‘kɛ anɔkwale wiemɔ lɛ tsuɔ nii yɛ gbɛ ni ja nɔ.’ (1 Timoteo 3:2; Tito 1:9; 2 Timoteo 2:15) Enyɛ Eunike kɛ enaa Loise etsɔɔ lɛ ŋmalɛi krɔŋkrɔŋi lɛ kɛjɛ gbekɛbiiashi, ni amɛdu ‘hemɔkɛyeli ni osato bɛ mli’ amɛwo emli, eyɛ mli akɛ etsɛ jeee heyelilɔ. (2 Timoteo 1:5; 3:15) Esa akɛ tsɛmɛi ni heɔ yeɔ lɛ atsɔse amɛbii lɛ “yɛ Nuntsɔ [Yehowa, NW] tsɔsemɔ kɛ ŋaawoo lɛ mli,” ni esa akɛ onukpai ni ji tsɛmɛi lɛ titri ana ‘bii ni heɔ yeɔ ni bɛ basabasa loo awieɔ amɛhe akɛ nyenyeŋtswibɔlɔi.’ (Efesobii 6:4; Tito 1:6) Belɛ, bɔ fɛɛ bɔ ni wɔshihilɛ ji lɛ, esa akɛ wɔbu bɔ ni ehe hiaa akɛ wɔkane, wɔkase, ni wɔkɛ Nyɔŋmɔ Wiemɔ lɛ atsu nii lɛ akɛ hiɛdɔɔ sane.
9. Mɛni hewɔ esa akɛ wɔkɛ nanemɛi Kristofoi afee ekome yɛ Biblia lɛ kasemɔ mli?
9 Esa akɛ wɔkɛ nanemɛi heyelilɔi lɛ hu akase Biblia lɛ kutuu. Paulo miisumɔ ni Tesalonika Kristofoi lɛ kɛ amɛhe asusu eŋaawoo lɛ he. (1 Tesalonikabii 4:18) Kɛ wɔmiisumɔ ni wɔha anɔkwale lɛ he nilee ni wɔyɔɔ lɛ aya hiɛ waa lɛ, belɛ nɔ ko bɛ ni hi fe kaselɔi krokomɛi ni amɛtu amɛhe amɛha ni wɔɔfata amɛhe kɛtao Ŋmalɛi lɛ amli. Abɛi nɛɛ ji anɔkwale: “Dade jɔɔ dade naa, ni gbɔmɔ haa enaanyo nɔ tseɔ.” (Abɛi 27:17) Nitsumɔ dade naa baanyɛ agbo kɛ akɛtsuuu nii ni ajɔɔɔ naa. Nakai nɔŋŋ ehe hiaa ni wɔkpe daa ni wɔjɔ wɔhe naa kɛtsɔ nilee ni wɔna kɛjɛ Nyɔŋmɔ anɔkwale Wiemɔ lɛ kanemɔ, ekasemɔ, kɛ enɔjwɛŋmɔ mli ni wɔkɛ wɔhe aaaja lɛ nɔ. (Hebribii 10:24, 25) Agbɛnɛ hu, enɛ ji gbɛ kome ni wɔtsɔɔ nɔ wɔnaa nɔmimaa akɛ wɔmiina mumɔŋ la-kpɛmɔi lɛ ahe sɛɛ.—Lala 97:11; Abɛi 4:18.
10. Akɛ anyiɛ yɛ anɔkwale lɛ mli lɛ tsɔɔ mɛni?
10 Wɔbaanyɛ wɔsɔle wɔha Nyɔŋmɔ yɛ gbɛ ni sa nɔ, taakɛ lalatsɛ lɛ fee lɛ, yɛ Ŋmalɛi lɛ ni wɔkaseɔ lɛ mli, akɛ: “Ha ola kɛ onɔkwale lɛ aba, ni amɛbatsɔɔ mi gbɛ.” (Lala 43:3) Kɛji akɛ wɔmiisumɔ ni wɔna Nyɔŋmɔ nɔkpɛlɛmɔ lɛ, esa akɛ wɔnyiɛ yɛ enɔkwale lɛ mli. (3 Yohane 3, 4) Nɔ ni fata enɛ he ji etaomɔ nii ni wɔɔhi shi yɛ naa, ni wɔsɔmɔ lɛ yɛ anɔkwayeli mli. (Lala 25:4, 5; Yohane 4:23, 24) Esa akɛ wɔsɔmɔ Yehowa yɛ anɔkwale mli, taakɛ ajie lɛ kpo yɛ e-Wiemɔ lɛ mli, ni aha efee faŋŋ yɛ “tsulɔ anɔkwafo kɛ nilelɔ” lɛ woji ni efee lɛ amli lɛ. (Mateo 24:45-47) Enɛ biɔ Ŋmalɛi lɛ amli anɔkwale nilee. Belɛ, mɛɛ gbɛ esa akɛ wɔtsɔ nɔ wɔkane ni wɔkase Nyɔŋmɔ Wiemɔ lɛ yɛ? Ani esa akɛ wɔje shishi wɔkane kɛjɛ Klɛŋklɛŋ Mose yitso 1, kuku 1, aahu kɛtsɔ woji 66 lɛ fɛɛ mli? Hɛɛ, esa akɛ Kristofonyo fɛɛ Kristofonyo ni yɔɔ Biblia muu lɛ fɛɛ yɛ ewiemɔ mli lɛ akane kɛjɛ Klɛŋklɛŋ Mose kɛyashi Kpojiemɔ. Ni nɔ ni esa akɛ efee oti ni ma wɔhiɛ yɛ Biblia lɛ kɛ Kristofoi awoji akanemɔ mli ji ni wɔha Ŋmalɛ mli anɔkwalei babaoo ni Nyɔŋmɔ etsɔ “tsulɔ anɔkwafo” lɛ nɔ ekɛha lɛ ahe shishinumɔ ni wɔyɔɔ lɛ aya hiɛ.
Kanemɔ Nyɔŋmɔ Wiemɔ lɛ Waa ni Anu
11, 12. Mɛni hewɔ sɛɛnamɔ yɔɔ Biblia lɛ ni aaakane waa ni anu yɛ kpeei ashishi lɛ he lɛ?
11 Wɔbaanyɛ wɔkane blɛoo kɛ wɔ pɛ wɔyɔɔ. Shi, yɛ blema bei amli lɛ akaneɔ teemɔŋ nikanemɔ lɛ waa. Beni Etiopia piafonyo lɛ ta eshwiili mli kɛyaa lɛ, sanekpakpa shiɛlɔ Filipo nu ni eekane nii kɛmiijɛ Yesaia gbalɛ lɛ mli. (Bɔfoi lɛ Asaji 8:27-30) Hebri wiemɔ ni atsɔɔ shishi akɛ “kane” lɛ shishinumɔ diɛŋtsɛ ji “tsɛ́.” No hewɔ lɛ, mɛi ni nyɛɛɛ akane nii blɛoo ni amɛnu nɔ ni amɛkaneɔ lɛ shishi lɛ anijiaŋ akaje wui kɛmiijɛ wiemɔ fɛɛ wiemɔ ni amɛaatsɛ́ ni anu lɛ he. Nɔ ni he hiaa titri ji ni akase anɔkwale lɛ kɛtsɔ Nyɔŋmɔ Wiemɔ ni aŋma lɛ kanemɔ nɔ.
12 Sɛɛnamɔ yɛ he akɛ aaakane Biblia lɛ waa ni anu yɛ Kristofoi akpeei ashishi. Bɔfo Paulo wo enaanyo nitsulɔ Timoteo hewalɛ akɛ: ‘Hii wolo kanemɔ kɛ ŋaawoo kɛ nitsɔɔmɔ he.’ (1 Timoteo 4:13) Paulo kɛɛ Kolosebii lɛ akɛ: “Ni kɛ akane nɛkɛ wolo nɛɛ yɛ nyɛŋɔɔ lɛ, nyɛhaa akanea yɛ Laodikea asafo lɛ mli hu, ni amɛha nyɛ hu nyɛkane Laodikea nɔ̃ lɛ.” (Kolosebii 4:16) Ni Kpojiemɔ 1:3 kɛɔ akɛ: “Ajɔɔ mɔ ni kaneɔ lɛ kɛ mɔ ni nuɔ gbalɛ wiemɔi lɛ, kɛ mɛi ni ŋɔɔ nibii ni aŋma yɛ mli lɛ amɛtoɔ lɛ; ejaakɛ be lɛ eshɛ eta.” No hewɔ lɛ, esa akɛ maŋ shiɛlɔ lɛ akane ŋmalɛi kɛjɛ Biblia lɛ mli ni ekɛfi nɔ ni ekɛɔ asafo lɛ sɛɛ.
Nikasemɔ Kɛtsɔ Saji Otii ni Ato Naa Nɔ
13. Mɛni ji gbɛ ni hi fe fɛɛ ni atsɔɔ nɔ akaseɔ Biblia mli anɔkwalei, ni mɛni baanyɛ aye abua wɔ ni wɔle he ni ŋmalɛi lɛ yɔɔ?
13 Nikasemɔ kɛtsɔ saji otii ni ato naa nɔ lɛ ji gbɛ ni hi fe fɛɛ ni yaa hiɛ ni atsɔɔ nɔ akaseɔ Ŋmalɛ mli anɔkwalei. Concordance sɔrɔtoi ni toɔ Biblia mli wiemɔi anaa yɛ alfabɛta naa yɛ wolo, yitso, kɛ kuku naa lɛ haa efeɔ mlɛo akɛ aaana ŋmalɛi ni kɔɔ sane pɔtɛɛ ko he. Ni abaanyɛ akɛ ŋmalɛi nɛɛ ato eko he, ejaakɛ Biblia lɛ Feelɔ lɛ eteee shi ewooo ehe. Etsɔ emumɔ krɔŋkrɔŋ lɛ nɔ ekɛ mumɔ tsirɛ hii aaafee 40 koni amɛŋma Biblia lɛ ni eŋmaa he fe afii ohai 16 lɛ, ni ekasemɔ kɛtsɔ saji otii ni ato naa nɔ lɛ ji gbɛ ni atsɔɔ nɔ akaseɔ anɔkwale lɛ ni aka akwɛ yɛ be kakadaŋŋ mli ni mɔɔ shi.
14. Mɛni hewɔ esa akɛ wɔkase Hebri kɛ Kristofoi a-Hela Ŋmalɛi lɛ fɛɛ?
14 Esa akɛ hiɛsɔɔ ni wɔyɔɔ kɛha Biblia mli anɔkwale akanya wɔ ni wɔkane ni wɔkase Kristofoi a-Hela Ŋmalɛi lɛ kɛ Hebri Ŋmalɛi lɛ fɛɛ. Enɛ baatsɔɔ bɔ ni Hela Ŋmalɛi lɛ kɔɔ Nyɔŋmɔ yiŋtoi ahe, ni ebaaha wɔnu Hebri Ŋmalɛi lɛ amli gbalɛi lɛ ashishi faŋŋ. (Romabii 16:25-27; Efesobii 3:4-6; Kolosebii 1:26) Nyɔŋmɔ tsuji ni amɛjɔɔ amɛhe nɔ, ni ŋɔ hegbɛ ni shishijee Biblia niŋmaa kɛ agbɛnɛ emli wiemɔ jɛɛhe he nilee ni yɔɔ bianɛ ni etee hiɛ kɛ ewiemɔi ahe mla kɛhaa lɛ tsu nii, ni amɛkɛfee New World Translation of the Holy Scriptures lɛ. Nɔ ni he hiaa hu ji Biblia kasemɔ he woji ni Yehowa etsɔ “tsulɔ anɔkwafo kɛ nilelɔ” lɛ nɔ ekɛha lɛ.
15. Mɛɛ gbɛ nɔ oootsɔ otsɔɔ akɛ esa akɛ atsɛɔ ŋmalɛi kɛjɛɔ hei sɔrɔtoi yɛ Biblia lɛ mli?
15 Mɛi komɛi baakɛɛ akɛ, ‘Nyɛ woji lɛ tsɛɔ wiemɔi akpei abɔ sɛɛ kɛjɛɔ Biblia lɛ mli, shi mɛni hewɔ nyɛŋɔɔ enɛɛmɛi kɛjɛɔ hei sɔrɔtoi lɛ?’ Yɛ Biblia mli woji 66 lɛ ni amɛtsɛɔ ŋmalɛi sɔrɔtoi kɛjɛɔ mli hewɔ lɛ, woji krokomɛi lɛ miitsɛ odasefoi babaoo ni mumɔ lɛ tsirɛ amɛ lɛ ni amɛye anɔkwale ni tsɔɔmɔ ko ji he odase. Yesu diɛŋtsɛ kɛ nɛkɛ nitsɔɔmɔ gbɛ nɛɛ tsu nii. Beni ekɛ e-Gɔŋ nɔ Shiɛmɔ lɛ ha lɛ, etsɛ wiemɔi 21 sɛɛ kɛjɛ Hebri Ŋmalɛi lɛ amli. Nɔ ni yɔɔ ewiemɔ lɛ mli ji ŋmalɛi etɛ ni etsɛ kɛjɛ 2 Mose, enyɔ kɛjɛ 3 Mose, ekome kɛjɛ 4 Mose, ekpaa kɛjɛ 5 Mose, ekome kɛjɛ 2 Maŋtsɛmɛi, ejwɛ kɛjɛ Lalai lɛ amli, etɛ kɛjɛ Yesaia, ni ekome kɛjɛ Yeremia. Ani Yesu kɛ enɛ feemɔ ‘miibɔ mɔdɛŋ ni ekɛye nɔ fɛɛ nɔ kɛkɛ he odase’? Dabi, ejaakɛ ‘etsɔɔ nii tamɔ mɔ ni yɔɔ hegbɛ, shi jeee tamɔ woloŋmalɔi lɛ.’ Nakai eji, ejaakɛ Yesu kɛ Nyɔŋmɔ Wiemɔ ni aŋma lɛ mli hewalɛ fi etsɔɔmɔ lɛ sɛɛ. (Mateo 7:29) Ni nakai bɔfo Paulo fee.
16. Mɛɛ Ŋmalɛi Paulo tsɛ sɛɛ yɛ Romabii 15:7-13?
16 Paulo tsɛ wiemɔi kɛjɛ Hebri Ŋmalɛi lɛ amli fai etɛ mli—Mla lɛ, Gbalɔi lɛ, kɛ Lalai lɛ, yɛ ŋmalɛ ni anaa yɛ Romabii 15:7-13 lɛ mli. Etsɔɔ akɛ Yudafoi kɛ Jeŋmajiaŋbii baawo Nyɔŋmɔ hiɛ nyam, ni esa akɛ Kristofoi ahere gbɔmɛi ni jɛ jeŋmaji fɛɛ mli lɛ atuu. Paulo kɛɛ: “No hewɔ lɛ, nyɛhereherea nyɛhe, taakɛ bɔ ni Kristo ehere nyɛ kɛba Nyɔŋmɔ anunyam lɛ mli lɛ. Shi miikɛɛ akɛ Yesu Kristo tsɔ sɔɔlɔ eha ketiafoo lɛ yɛ Nyɔŋmɔ anɔkwale lɛ hewɔ, koni ekɛma shiwooi ni awo tsɛmɛi lɛ anɔ mi; shi jeŋmaji lɛ aaawo Nyɔŋmɔ hiɛ nyam yɛ mɔbɔnalɛ hewɔ, taakɛ bɔ ni aŋma lɛ [yɛ Lala 18:50] akɛ: ‘Enɛ hewɔ lɛ majie oyi yɛ jeŋmaji ateŋ, ni matsi ogbɛi ata mala.’ Ni esaa ekɛɛ [yɛ 5 Mose 32:43] akɛ: ‘Nyɛ jeŋmaji, nyɛkɛ emaŋ lɛ mli afilia nyɛ!’ Ni asaŋ [yɛ Lala 117:1]: ‘Nyɛjiea Nuntsɔ lɛ yi, nyɛ jeŋmaji fɛɛ, ni nyɛkafoa lɛ, nyɛ maji fɛɛ!’ Ni asaŋ Yesaia [11:1, 10] kɛɛ akɛ: ‘Ishai shishifaa lɛ aaaba, mɔ hu ni aaate shi koni ebaye jeŋmaji lɛ anɔ lɛ; lɛ enɔ jeŋmaji lɛ aaaŋɔ amɛhiɛ amɛfɔ.’ Shi nɔhiɛkamɔ Nyɔŋmɔ lɛ kɛ miishɛɛ kɛ hejɔlɛ fɛɛ awonyɛ obɔ̃bɔ̃ɔbɔ̃ yɛ hemɔkɛyeli mli, koni nyɛna hiɛnɔkamɔ ni ateke nɔ yɛ Mumɔ krɔŋkrɔŋ hewalɛ mli.” Paulo tsɔɔ bɔ ni atsɛɔ ŋmalɛi asɛɛ ni akɛmaa Biblia mli anɔkwalei anɔ mi kɛtsɔ saji otii ni atoɔ naa nɛɛ nɔ.
17. Mɛni ni atsɔ hiɛ afee hewɔ ni Kristofoi tsɛɔ ŋmalɛi asɛɛ kɛjɛɔ Biblia muu lɛ fɛɛ mli lɛ?
17 Saji 34 ni atsɛ kɛjɛ woji nyɔŋma, ni jɛ Mla lɛ, Gbalɔi lɛ, kɛ Lalai lɛ amli lɛ yɛ bɔfo Petro klɛŋklɛŋ wolo ni jɛ mumɔŋ lɛ mli. Yɛ ewolo ni ji enyɔ lɛ mli lɛ, Petro tsɛ ŋmalɛi asɛɛ shii ekpaa kɛjɛ woji etɛ mli. Mateo Sanekpakpa lɛ tsɛ ŋmalɛi asɛɛ shii 122 kɛjɛ 1 Mose kɛyashi Maleaki. Yɛ woji 27 ni yɔɔ Hela Ŋmalɛi lɛ amli lɛ, atsɛ ŋmalɛi 320 asɛɛ tɛ̃ɛ kɛjɛ 1 Mose kɛyashi Maleaki, kɛ shii ohai abɔ, ni Hebri Ŋmalɛi lɛ ahe awieɔ. Yɛ nɔkwɛmɔ nɔ ni Yesu fee efɔ shi ni ebɔfoi lɛ nyiɛ sɛɛ lɛ kɛ gbeekpamɔ naa lɛ, kɛ ŋmɛnɛŋmɛnɛ beaŋ Kristofoi miikase Ŋmalɛ mli sane ko ni ato naa lɛ, amɛtsɛɔ ŋmalɛi kɛjɛɔ Biblia muu lɛ fɛɛ mli. Enɛ sa jogbaŋŋ yɛ “naagbee gbii” nɛɛ amli, beni Hebri kɛ Hela Ŋmalɛi naa amɛmlibaa babaoo nɛɛ. (2 Timoteo 3:1) “Tsulɔ anɔkwafo” lɛ kɛ Biblia lɛ tsuɔ nii nɛkɛ yɛ ewoji amli, shi ekɛ nɔ ko fataaa Nyɔŋmɔ Wiemɔ lɛ he kɔkɔɔkɔ loo ni eeejie nɔ ko kɛjɛ mli.—Abɛi 30:5, 6; Kpojiemɔ 22:18, 19.
Nyiɛmɔ Anɔkwale lɛ Mli Daa
18. Mɛni hewɔ esa akɛ ‘wɔnyiɛ yɛ anɔkwale lɛ mli’ lɛ?
18 Esaaa akɛ wɔjieɔ nɔ ko kɛjɛɔ Biblia lɛ mli, ejaakɛ Kristofoi atsɔɔmɔi muu lɛ fɛɛ ni yɔɔ Nyɔŋmɔ Wiemɔ lɛ mli lɛ ji “anɔkwale lɛ” loo “sanekpakpa lɛ anɔkwale lɛ.” Anɔkwale nɛɛ ni akɛ he kpɛtɛɔ he—emli ‘nyiɛmɔ’—he hiaa kɛha yiwalaheremɔ. (Galatabii 2:5; 2 Yohane 4; 1 Timoteo 2:3, 4) Akɛni Kristojamɔ ji “anɔkwale gbɛ lɛ” hewɔ lɛ, kɛ wɔye wɔbua mɛi krokomɛi ni wɔha ehe nibii shwere lɛ, wɔbatsɔmɔɔ “anɔkwale lɛ he nanemɛi nitsulɔi.”—2 Petro 2:2; 3 Yohane 8.
19. Te wɔɔfee tɛŋŋ ‘wɔya nɔ wɔnyiɛ yɛ anɔkwale lɛ mli’?
19 Kɛ wɔɔya nɔ wɔfee mɛi ni ‘nyiɛɔ yɛ anɔkwale lɛ mli’ lɛ, belɛ esa akɛ wɔkase Biblia lɛ ni wɔkɛ wɔhe aha mumɔŋ yelikɛbuamɔ ni Nyɔŋmɔ kɛhaa kɛtsɔɔ “tsulɔ anɔkwafo” lɛ nɔ lɛ. (3 Yohane 4) Eba akɛ wɔɔfee enɛ, kɛha wɔ diɛŋtsɛ wɔhilɛ kɛhamɔ, koni wɔnyɛ wɔtsɔɔ mɛi krokomɛi Yehowa Nyɔŋmɔ, Yesu Kristo, kɛ ŋwɛi yiŋtoo lɛ ahe nii. Ni nyɛhaa wɔdaa shi akɛ Yehowa mumɔ lɛ yeɔ ebuaa wɔ koni wɔnu e-Wiemɔ lɛ shishi, ni wɔnyɛ wɔsɔmɔ lɛ yɛ anɔkwale mli.
Mɛni Ji Ohetooi?
◻ Mɛni ji Biblia kanemɔ mli sɛɛnamɔi komɛi ni sɛɛ tsɛɔ?
◻ Mɛni hewɔ esa akɛ okɛ nanemɛi heyelilɔi afee ekome kɛkase Biblia lɛ?
◻ Mɛni hewɔ eja akɛ aaatsɛ ŋmalɛi kɛjɛ Biblia lɛ mli hei sɔrɔtoi?
◻ Akɛ ‘anyiɛ yɛ anɔkwale lɛ mli’ lɛ tsɔɔ mɛni, ni te wɔɔfee tɛŋŋ wɔfee nakai?
[Mfoniri ni yɔɔ baafa 17]
Fɔlɔi, nyɛtsɔɔa nyɛbii Ŋmalɛi lɛ
[Mfoniri ni yɔɔ baafa 18]
Yesu tsɛ ŋmalɛi asɛɛ kɛjɛ Hebri Ŋmalɛi lɛ amli hei sɔrɔtoi yɛ e-Gɔŋ nɔ Shiɛmɔ lɛ mli