Tuu Ohe Oha Nikanemɔ
“Hii wolo kanemɔ kɛ ŋaawoo kɛ nitsɔɔmɔ he kɛyashi beyinɔ ni maba.”—1 TIMOTEO 4:13.
1. Te wɔɔfee tɛŋŋ ni Biblia kanemɔ he aba sɛɛnamɔ aha wɔ?
YEHOWA NYƆŊMƆ kɛ nikanemɔ kɛ niŋmaa he nyɛmɔ ni yɔɔ naakpɛɛ eha adesai. Ekɛ e-Wiemɔ, Biblia lɛ, hu eha, koni anyɛ atsɔɔ wɔ nii jogbaŋŋ. (Yesaia 30:20, 21) Ebaafai lɛ haa wɔnyɛɔ wɔkɛ blematsɛmɛi tamɔ Abraham, Isak, kɛ Yakob ‘nyiɛɔ’ yɛ okadi gbɛ nɔ. Wɔnyɛɔ ‘wɔnaa’ yei ni sheɔ Nyɔŋmɔ gbeyei tamɔ Sara, Rebeka, kɛ Moab yoo Rut anɔkwafo lɛ. Hɛɛ, ni wɔbaanyɛ ‘wɔnu’ ni Yesu Kristo kɛ e-Gɔŋ nɔ Shiɛmɔ lɛ miiha. Miishɛɛ kɛ tsɔsemɔ kpakpa ni jɛ Ŋmalɛi Krɔŋkrɔŋi lɛ mli lɛ fɛɛ baanyɛ atsɔ wɔnɔ̃ kɛ wɔji nikanelɔi kpakpai.
2. Mɛni tsɔɔ akɛ Yesu kɛ ebɔfoi lɛ nyɛɔ amɛkaneɔ nii jogbaŋŋ?
2 Ŋwanejee ko bɛ he akɛ, Yesu Kristo, nuu ni yeɔ emuu lɛ yɛ nikanemɔ he nyɛmɔ ni nɔ bɛ, ni eyɛ faŋŋ akɛ ele Hebri Ŋmalɛi lɛ jogbaŋŋ diɛŋtsɛ. No hewɔ lɛ, beni Abonsam ka lɛ lɛ, Yesu tsɛ wiemɔi kɛjɛ mli shii abɔ ni ekɛɛ, “Aŋma akɛ.” (Mateo 4:4, 7, 10) Be ko, yɛ Nazaret kpeehe lɛ, ekane nii yɛ faŋŋ mli, ni ekɛ Yesaia gbalɛ lɛ fã ko to lɛ diɛŋtsɛ ehe. (Luka 4:16-21) Ni Yesu bɔfoi lɛ hu? Amɛtsɛ wiemɔi asɛɛ kɛjɛ Hebri Ŋmalɛi lɛ amli shii abɔ yɛ amɛ niŋmaai amli. Eyɛ mli akɛ Yudafoi nɔyelɔi lɛ bu Petro kɛ Yohane akɛ mɛi ni leee woloŋ kɛ gbɔmɛi foji kɛkɛ akɛni amɛkaseko nii yɛ Hebri skul wuji sɔrɔtoi lɛ amli moŋ, shi amɛ woji ni jɛ mumɔŋ lɛ yeɔ odase faŋŋ akɛ amɛnyɛɔ amɛkaneɔ nii ni amɛŋmaa nii jogbaŋŋ. (Bɔfoi lɛ Asaji 4:13) Shi ani nii ni anyɛɔ akaneɔ lɛ he miihia nakai?
“Miishɛɛ Ji Mɔ ni Kaneɔ lɛ Waa Lɛ”
3. Mɛni hewɔ ehe hiaa waa akɛ aaakane Ŋmalɛi lɛ kɛ Kristofoi awoji lɛ?
3 Naanɔ wala baanyɛ ajɛ Ŋmalɛi lɛ ahe anɔkwa nilee ni anaa ni akɛtsuɔ nii lɛ mli aba. (Yohane 17:3) No hewɔ lɛ, Yehowa Odasefoi yɔseɔ akɛ ehe miihia waa akɛ akane ni akase Ŋmalɛi Krɔŋkrɔŋi lɛ kɛ Kristofoi awoji ni Nyɔŋmɔ tsɔɔ tsulɔ anɔkwafo kɛ nilelɔ kuu ni ji Kristofoi ni afɔ amɛ mu lɛ nɔ ekɛhaa lɛ. (Mateo 24:45-47) Yɛ anɔkwale mli lɛ, akɛni amɛkɛ Buu Mɔɔ woji ni aje gbɛ ato he gbɛjianɔ lɛ tsu nii hewɔ lɛ, anyɛ atsɔɔ gbɔmɛi akpei abɔ nikanemɔ ni enɛ haa amɛnine shɛɔ Nyɔŋmɔ Wiemɔ lɛ mli nilee ni haa wala lɛ nɔ.
4. (a) Mɛni hewɔ miishɛɛ jɛɔ nikanemɔ, nikasemɔ, kɛ Nyɔŋmɔ Wiemɔ lɛ kɛ nitsumɔ mli baa lɛ? (b) Yɛ nikanemɔ gbɛfaŋ lɛ, mɛni Paulo kɛɛ Timoteo?
4 Miishɛɛ jɛɔ nikanemɔ, nikasemɔ, kɛ Nyɔŋmɔ Wiemɔ lɛ kɛ nitsumɔ mli baa. Nakai eji, ejaakɛ wɔsaa Nyɔŋmɔ hiɛ ni wɔwoɔ ehiɛ nyam, wɔnine shɛɔ ejɔɔmɔ nɔ, ni wɔnyãa. Yehowa miisumɔ ni ewebii ana miishɛɛ. No hewɔ lɛ, efa osɔfoi lɛ ni amɛkane e-Mla lɛ amɛtsɔɔ blema Israelbii lɛ. (5 Mose 31:9-12) Beni Ezra woloŋmalɔ lɛ kɛ mɛi krokomɛi kane Mla lɛ amɛtsɔɔ mɛi fɛɛ ni amɛbua amɛhe naa yɛ Yerusalem lɛ, aha eshishinumɔ lɛ mli fee faŋŋ, ni nɔ ni jɛ mli ba ji akɛ “amɛna miishɛɛ babaoo.” (Nehemia 8:6-8, 12) Yɛ sɛɛ mli lɛ Kristofonyo bɔfo Paulo kɛɛ enaanyo nitsulɔ Timoteo akɛ: “Hii wolo kanemɔ kɛ ŋaawoo kɛ nitsɔɔmɔ he kɛyashi beyinɔ ni maba.” (1 Timoteo 4:13) Shishitsɔɔmɔ kroko kaneɔ akɛ: “Tuu ohe oha Ŋmalɛ kanemɔ yɛ faŋŋ mli.”—New International Version.
5. Kpojiemɔ 1:3 kɛ miishɛɛ tsaa nikanemɔ yɛ mɛɛ gbɛ nɔ?
5 Akɛ wɔ miishɛɛ damɔ Nyɔŋmɔ Wiemɔ lɛ kanemɔ kɛ ekɛ nitsumɔ nɔ lɛ jeɔ kpo faŋŋ yɛ Kpojiemɔ 1:3, (NW). Akɛɔ wɔ yɛ jɛmɛ akɛ: “Miishɛɛ ji mɔ ni kaneɔ lɛ waa kɛ mɛi ni nuɔ gbalɛ nɛɛ mli wiemɔi lɛ, kɛ mɛi ni yeɔ nibii ni aŋmala yɛ mli lɛ anɔ lɛ; ejaakɛ be ni ato lɛ ebɛŋkɛ.” Hɛɛ, ehe miihia ni wɔkane Nyɔŋmɔ gbalɛ wiemɔi ni yɔɔ Kpojiemɔ lɛ kɛ nɔ ni yɔɔ Ŋmalɛi lɛ fɛɛ mli lɛ waa ni wɔnu. Mɔ ni yɔɔ miishɛɛ diɛŋtsɛ ji mɔ ni “Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ!” Mɛni jɛɔ mli baa? “Nɔ fɛɛ nɔ ni efeɔ lɛ shwereɔ.” (Lala 1:1-3) No hewɔ lɛ, yiŋtoo kpakpai ahewɔ ni Yehowa gbɛjianɔtoo lɛ woɔ wɔteŋ mɔ fɛɛ mɔ hewalɛ koni ekane ni ekase e-Wiemɔ lɛ yɛ teemɔŋ, akɛ wekui, kɛ nanemɛi lɛ.
Miamɔ Ohiɛ ni Ojwɛŋ Jogbaŋŋ ni Ojwɛŋ Sane Nɔ
6. Afa Yoshua ni ekane mɛni, ni enɛ he yɛ sɛɛnamɔ yɛ mɛɛ gbɛ nɔ?
6 Te ooofee tɛŋŋ ona babaoo kɛjɛ Nyɔŋmɔ Wiemɔ lɛ kɛ Kristofoi awoji ni okaneɔ lɛ mli? Ekolɛ ooona bɔ ni sɛɛnamɔ yɔɔ he akɛ ooofee nɔ ni Yoshua, blema Israel hiɛnyiɛlɔ ni sheɔ Nyɔŋmɔ gbeyei lɛ fee lɛ. Afã lɛ akɛ: “Kaaha nɛkɛ mla wolo nɛɛ mli wiemɔi lɛ miikpa yɛ odaaŋ, shi jwɛŋmɔ he nyɔɔŋ kɛ shwane, koni ojwɛŋ nɔ ni ofee tamɔ bɔ ni aŋma yɛ mli lɛ pɛpɛɛpɛ; ejaakɛ no aaaha ofee nɔbatsɛ kɛ hiɛshikalɔ.” (Yoshua 1:8) ‘Ehe ni aaajwɛŋ’ lɛ tsɔɔ akɛ okɛ gbee ni baa shi baakane wiemɔi lɛ oha bo diɛŋtsɛ ohe. Enɛ yeɔ ebuaa nikaimɔ, ejaakɛ ehaa sane lɛ kaa ojwɛŋmɔ mli. Esa akɛ Yoshua akane Nyɔŋmɔ Mla lɛ “nyɔɔŋ kɛ shwane,” loo daa. No ji gbɛ ni haa mɔ ko tsɔɔ nɔbatsɛ ni ekɛ hiɛshikamɔ tsuɔ gbɛnaa nii ni Nyɔŋmɔ kɛha lɛ lɛ ahe nii. Nyɔŋmɔ Wiemɔ lɛ kanemɔ daa nɛkɛ baanyɛ aye abua bo yɛ gbɛ ni tamɔ nakai nɔŋŋ nɔ.
7. Mɛni hewɔ esaaa akɛ wɔkaneɔ nii kɛ foi kɛ wɔmiikane Nyɔŋmɔ Wiemɔ lɛ?
7 Kaaha foi ni akɛkaneɔ nii miiye onɔ beni okaneɔ Nyɔŋmɔ Wiemɔ lɛ. Kɛ oto gbɛjianɔ akɛ obaaye be ko yɛ Biblia lɛ kanemɔ loo Kristofoi awoji komɛi akanemɔ mli lɛ, obaasumɔ ni oto otsui shi. Enɛ he miihia waa kɛ ookase nii kɛ yiŋtoo akɛ obaakai otii titrii ni yɔɔ mli lɛ. Ni kɛ okane lɛ, miamɔ ohiɛ ni ojwɛŋ. Susumɔ Biblia ŋmalɔ lɛ wiemɔi lɛ ahe. Bi ohe akɛ, ‘Mɛni ji eyiŋtoo? Mɛni esa akɛ mikɛ nɛkɛ sane nɛɛ atsu?’
8. Mɛni hewɔ sɛɛnamɔ yɔɔ sane nɔjwɛŋmɔ he beni okaneɔ Ŋmalɛi ko lɛ?
8 Ŋɔɔ be ni okɛjwɛŋ sane nɔ beni okaneɔ Ŋmalɛ Krɔŋkrɔŋ lɛ. Enɛ baaye abua bo ni okai Biblia mli saji lɛ ni okɛ Ŋmalɛ mli shishitoo mlai atsu nii. Nyɔŋmɔ Wiemɔ lɛ nɔjwɛŋmɔ kɛ saji otii ni kaa ojwɛŋmɔ mli lɛ baaha onyɛ owie kɛjɛ tsui lɛ mli hu, ni okɛ hetooi ni ja baaha anɔkwafoi ni biɔ saji lɛ, fe ni oookɛɛ nɔ ko ni ekolɛ eeeha edɔ bo yɛ sɛɛ mli. Abɛbua ko ni ŋwɛi kanya eŋmaa kɛɔ akɛ: “Jalɔ tsui jwɛŋɔ hetoohamɔ he.”—Abɛi 15:28.
Okɛ Saji Otii Heei Ato Tsutsu Nɔ̃ lɛ He
9, 10. Te ooofee tɛŋŋ oha o-Biblia kanemɔ aya hiɛ kɛtsɔ Ŋmalɛ mli saji otii heei ni okɛtoɔ nɔ ni ole momo lɛ ahe lɛ nɔ?
9 Esa akɛ Kristofoi pii akpɛlɛ nɔ akɛ be ko lɛ nɔ ko bibioo pɛ amɛle yɛ Nyɔŋmɔ, e-Wiemɔ lɛ, kɛ eyiŋtoi ahe. Shi ŋmɛnɛ, sɔɔlɔi Kristofoi nɛɛ baanyɛ aje shishi kɛjɛ nibɔɔ kɛ gbɔmɔ shigbeemɔ kɛmiiya esha mli lɛ nɔ atsɔɔ yiŋtoo ni yɔɔ Kristo afɔleshãa lɛ sɛɛ, amɛbaanyɛ amɛgba nibii agbɛjianɔtoo fɔŋ nɛɛ hiɛkpatamɔ lɛ he sane, ni amɛbaanyɛ amɛtsɔɔ bɔ ni akɛ naanɔ wala yɛ paradeiso shikpɔŋ nɔ baajɔɔ adesai toibolɔi lɛ mli. Amɛnyɛɔ amɛfeɔ enɛ titri lɛ yɛ “Nyɔŋmɔ he nilee” ni nɛkɛ Yehowa tsuji nɛɛ ena, kɛtsɔ Biblia lɛ kɛ Kristofoi awoji akasemɔ nɔ lɛ hewɔ. (Abɛi 2:1-5) Amɛkɛ saji otii ni amɛkase lɛ eto tsutsu nɔ̃ ni amɛnu shishi momo lɛ ahe fiofio.
10 Ŋmalɛ mli saji otii heei ni akɛtoɔ nɔ ni ale momo lɛ ahe lɛ he yɛ sɛɛnamɔ ni ekɛ nyɔmɔwoo baa. (Yesaia 48:17) Kɛ akɛ Biblia mlai, shishitoo taomɔ nii, loo susumɔi ni bɛ shiŋŋ po ba lɛ, okɛ enɛɛmɛi ato nɔ ni ole momo lɛ ahe. Ha saji lɛ kɛ nɔ ni okase yɛ ‘tsamɔ wiemɔi akadi’ lɛ he lɛ akpa gbee. (2 Timoteo 1:13) Taomɔ saji ni baanyɛ aye abua bo ni ewo wekukpaa ni ka okɛ Nyɔŋmɔ teŋ lɛ mli hewalɛ, ni eha o-Kristofoi asu kɛ baŋ aya hiɛ, loo eye ebua bo ni okɛ mɛi krokomɛi aja Biblia mli anɔkwale lɛ.
11. Mɛni obaanyɛ ofee beni okaneɔ nɔ ko ni Biblia lɛ wieɔ yɛ jeŋba he? Feemɔ he nɔkwɛmɔ nɔ.
11 Kɛ ookane nɔ ko ni Biblia lɛ kɛɔ yɛ jeŋba he lɛ, bɔɔ mɔdɛŋ ni oyoo shishitoo mla ni kɔɔ he lɛ. Jwɛŋmɔ nɔ, ni okpɛ oyiŋ yɛ nɔ ni obaafee yɛ shihilɛi ni tamɔ nakai nɔŋŋ shishi lɛ he. Yakob bi Yosef kpoo shii abɔ akɛ ekɛ Potifar ŋa lɛ kɛ amɛhe aaawo bɔlɛnamɔ jeŋba shara mli, ni ebi akɛ: “Te aaafee tɛŋŋ ni mafee efɔŋ kpeteŋkpele ni tamɔ nɛkɛ nɛɛ, ni mafee esha mashi Nyɔŋmɔ hu?” (1 Mose 39:7-9) Onaa shishitoo mla yɛ sane ni naa mɔ nɔ hewalɛ nɛɛ mli—bɔlɛnamɔ jeŋba shara ji esha ni afeɔ ashiɔ Nyɔŋmɔ. Obaanyɛ okɛ shishitoo mla nɛɛ ato wiemɔi krokomɛi ni yɔɔ Nyɔŋmɔ Wiemɔ lɛ mli lɛ ahe yɛ ojwɛŋmɔ mli, ni obaanyɛ okai ni ehe aba sɛɛnamɔ kɛha bo kɛ aaka bo ni okɛ ohe awo efɔŋ feemɔ ni tamɔ nɛkɛ mli.—1 Korintobii 6:9-11.
Feemɔ Ŋmalɛ Mli Saji Ahe Mfoniri yɛ Ojwɛŋmɔ Mli
12. Mɛni hewɔ esa akɛ ofee Biblia mli saji ni okaneɔ lɛ ahe mfoniri yɛ ojwɛŋmɔ mli?
12 Bɔni afee ni oha saji otii aka ojwɛŋmɔ mli beni okaneɔ nii lɛ, feemɔ nɔ ni yaa nɔ lɛ he mfoniri. Kwɛmɔ shikpɔŋ lɛ, shiai lɛ, gbɔmɛi lɛ, yɛ ojwɛŋmɔ mli. Bo amɛgbeei atoi. Nú bodobodo ni ashãa yɛ flɔnɔɔ mli lɛ ŋma lɛ. Tsɔ̃ shihilɛ lɛ mli ekoŋŋ. Kɛkɛ lɛ onikanemɔ lɛ baafee niiashikpamɔ ni kanyãa mɔ, ejaakɛ obaanyɛ “ona” blema maŋ ko, okwɔ gɔŋ ni kwɔ ko, onaa akpɛ ohe yɛ adebɔɔ nibii ahe, loo okɛ hii kɛ yei ni yɔɔ hemɔkɛyeli babaoo lɛ abɔ.
13. Te obaatsɔɔ nɔ ni aŋma afɔ shi yɛ Kojolɔi 7:19-22 lɛ mli oha tɛŋŋ?
13 Ŋɔɔ lɛ akɛ ookane Kojolɔi 7:19-22. Feemɔ nɔ ni yaa nɔ lɛ he mfoniri. Kojolɔ Gideon kɛ Israelbii ekãalɔi ohai etɛ eyabɔ ŋsara kɛbɔle Midianbii aŋsara he kɛkpe. Atswa aaafee gbɛkɛ ŋmɛji nyɔŋma, “nyɔɔŋteŋ buu be lɛ shishijee mli.” Atsake Midian bulɔi ni yɔɔ buu hé lɛ etsɛko, ni duŋ eha Israel henyɛlɔi ni wɔɔ lɛ aŋsara lɛ nɔ. Kwɛmɔ! Gideon kɛ ehii lɛ hiɛ tɛtrɛmantɛrɛi. Amɛhiɛ nu kpuji wuji ni kɔtii hɔlɔ mli yɛ amɛbɛku. Trukaa ni kui etɛ ni eko fɛɛ eko feɔ hii oha lɛ kpãkpãa amɛ tɛtrɛmantɛrɛi lɛ, amɛjwara kpuji lɛ, ni amɛhole amɛ kɔtii lɛ anɔ, ni amɛbo akɛ: “Yehowa kɛ Gideon klante!” Okwɛ ŋsara lɛ mli. Midianbii lɛ bɔi foijee ni amɛbɔi bolɔmɔ! Beni hii ohai etɛ lɛ yaa nɔ amɛkpãa amɛ tɛtrɛmantɛrɛi lɛ, Nyɔŋmɔ ha Midianbii lɛ dɔ amɛ klantei lɛ amɛwo amɛhe. Awo Midian foi, ni Yehowa eha Israel eye kunim.
Nii ni Sɛɛnamɔ Yɔɔ He ni Akaseɔ
14. Mɛɛ gbɛ nɔ abaatsɔ ni akɛ Kojolɔi yitso 9 lɛ atsu nii ni akɛtsɔɔ gbekɛ bɔ ni ehe hiaa ni aba he shi?
14 Wɔbaanyɛ wɔkase nibii pii kɛtsɔ Nyɔŋmɔ Wiemɔ lɛ kanemɔ nɔ. Akɛ nɔkwɛmɔ nɔ lɛ, ekolɛ ootao ni obii ale bɔ ni ehe hiaa ni amɛba amɛhe shi. Ojogbaŋŋ, esaaa akɛ ewaa kɛhaa bo akɛ ooofee nɔ ni awie yɛ Gideon bi Yotam gbalɛ lɛ mli lɛ he mfoniri, ni onu nɔ ni ataoɔ atsɔɔ lɛ shishi. Jee shishi okane Kojolɔi 9:8. Yotam kɛɛ: “Gbi ko lɛ, tsei yiŋ tee amɛyaafɔ mɔ ko mu amɛwó lɛ amɛnɔ maŋtsɛ.” Mutso, agbamitso, kɛ weintso kpoo akɛ amɛaaye mɔ ko nɔ. Shi ŋmeitso ni baa shi lɛ yɛ miishɛɛ akɛ eeetsɔ nɔyelɔ. Beni okane sane lɛ waa otsɔɔ obii lɛ, obaanyɛ otsɔɔ mli akɛ, tsei ni sɛɛnamɔ yɔɔ amɛhe lɛ damɔ shi kɛha gbɔmɛi ni sa ni taooo ni amɛye amɛnyɛmimɛi Israelbii lɛ anɔ maŋtsɛ. Ŋmeitso ni sɛɛnamɔ ni yɔɔ ehe pɛ ji ni akɛfee lai lɛ damɔ shi kɛha Abimelek henɔwolɔ lɛ, gbɔmɔgbelɔ ni miisumɔ ni eye mɛi krokomɛi anɔ lɛ maŋtsɛyeli lɛ, shi agbe lɛ koni Yotam gbalɛ lɛ aba mli. (Kojolɔi, yitso 9) Mɛɛ gbekɛ baasumɔ ni eda ni etsɔ tamɔ ŋmeitso?
15. Ama bɔ ni anɔkwayeli he hiaa ha lɛ nɔ mi yɛ Rut wolo lɛ mli yɛ mɛɛ gbɛ nɔ?
15 Áha bɔ ni anɔkwayeli he hiaa ha lɛ efee faŋŋ yɛ Biblia wolo ni ji Rut lɛ mli. Ŋɔɔ lɛ akɛ oweku lɛ mli bii lɛ ateŋ mɔ fɛɛ mɔ kaneɔ nakai sane lɛ kɛ eshɛ enɔ, ni amɛmiibɔ mɔdɛŋ ni amɛnu nɔ ni ekɛɔ lɛ shishi. Ona Moab yoo Rut yɛ gbɛfaa mli kɛmiiya Betlehem kɛ eshaayoo okulafo Naomi, ni onu ni Rut miikɛɛ akɛ: “Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ.” (Rut 1:16) Ana ni Rut ni tsuɔ nii waa lɛ miiye kpɛkpɛo yɛ nikpalɔi lɛ asɛɛ yɛ Boaz ŋmɔ lɛ mli. Onu ni eejie eyi akɛ: “Mimaŋ bii lɛ fɛɛ le akɛ yoo kpakpa ji bo.” (Rut 3:11) Etsɛɛɛ ni Boaz kɛ Rut bote gbalashihilɛ mli. Yɛ gbɛjianɔtoo kɛha wu nyɛmi gbalashihilɛ lɛ hewɔ lɛ, ekɛ Boaz fɔ binuu ‘amɛha Naomi.’ David batsɔ Rut seshinyo, ni yɛ naagbee mli lɛ Yesu Kristo hu batsɔ eseshinyo. No hewɔ lɛ, ‘awo lɛ nyɔmɔ shishiishi.’ Agbɛnɛ hu mɛi ni kaneɔ Ŋmalɛ mli sane lɛ kaseɔ nɔ ko waa: Ye Yehowa anɔkwa, ni abaajɔɔ bo babaoo.—Rut 2:12; 4:17-22; Abɛi 10:22; Mateo 1:1, 5, 6.
16. Mɛɛ kaa Hebribii etɛ lɛ tsɔ mli, ni sane nɛɛ baanyɛ aye abua wɔ yɛ mɛɛ gbɛ nɔ?
16 Hebribii ni atsɛɔ amɛ Shadrak, Meshak, kɛ Abednego lɛ ahe sane baanyɛ aye abua wɔ ni wɔye Nyɔŋmɔ anɔkwa yɛ shihilɛi ni kaa mɔ lɛ amli. Feemɔ nɔ ni ba lɛ he mfoniri yɛ be mli ni akaneɔ Daniel yitso 3 waa ni anuɔ lɛ. Shika amaga ni kwɔ waa ma Dura ŋa lɛ nɔ, yɛ he ni abua Babilon maŋ onukpai anaa yɛ lɛ. Kɛ amɛnu saŋku kɛ bɛji alalai ahe lɛ, amɛbaakula shi ni amɛja amaga ni Maŋtsɛ Nebukadnezar kɛma shi lɛ. No ji akɛ, amɛ fɛɛ amɛfee nakai, ja Shadrak, Meshak, kɛ Abednego pɛ. Amɛkɛ bulɛ, shi kɛ shiŋŋ feemɔ kɛɛ maŋtsɛ lɛ akɛ amɛsɔmɔŋ enyɔŋmɔi lɛ ni amɛjaŋ shika amaga lɛ. Ashɛrɛ nɛkɛ Hebri obalahii nɛɛ awo la flɔnɔɔ ni aha edɔ fe nine mli. Shi mɛni ba? Beni maŋtsɛ lɛ kwɛɔ mli lɛ, ena hii ejwɛ ni yɔɔ hewalɛ, ni amɛteŋ mɔ kome “su tamɔ nyɔŋmɔi lɛ abi!” (Daniel 3:25) Ajie Hebribii etɛ lɛ kɛjɛ flɔnɔɔ lɛ mli, ni Nebukadnezar kafo amɛ Nyɔŋmɔ lɛ. Sane ni afee he mfoniri yɛ jwɛŋmɔ mli lɛ he eba sɛɛnamɔ. Ni mɛɛ nikasemɔ ekɛhaa wɔ yɛ anɔkwayeli kɛha Yehowa yɛ kaa shishi nɛ!
Nyɛhaa Biblia lɛ Kanemɔ akɛ Weku He Aba Sɛɛnamɔ Kɛha Nyɛ
17. Tsii nibii ni he yɔɔ sɛɛnamɔ ni nyɛ weku lɛ baanyɛ akase kɛtsɔ Biblia lɛ kanemɔ kutuu nɔ lɛ fioo ko ta.
17 Oweku lɛ baanyɛ ana sɛɛnamɔi babaoo mli ŋɔɔmɔ kɛ nyɛkɛ be ma shi kɛha Biblia lɛ kanemɔ kutuu. Nyɛbaanyɛ nyɛjɛ 1 Mose nyɛye nibɔɔ he odase ni nyɛkwɛ gbɔmɔ shishijee Paradeiso shia lɛ mli. Nyɛbaanyɛ nyɛna blematsɛmɛi anɔkwafoi lɛ kɛ amɛwekui lɛ aniiashikpamɔi ni nyɛnyiɛ Israelbii lɛ asɛɛ beni amɛtsɔɔ Ŋshɔ Tsuru lɛ mli yɛ shikpɔŋ gbiŋ nɔ lɛ. Obaanyɛ ona bɔ ni obalanyo tookwɛlɔ David ye Filistinyo oblaŋ Goliat nɔ kunim lɛ. Oweku lɛ baanyɛ ana Yehowa sɔlemɔtsu lɛ maa yɛ Yerusalem, ana bɔ ni Babilon asraafoi lɛ kpata hiɛ, ni amɛna bɔ ni Amralo Zerubabel ku sɛɛ ema ekoŋŋ lɛ. Obaanyɛ onu Yesu fɔmɔ he adafi ni ŋwɛibɔfo tswa lɛ kɛfata tookwɛlɔi heshibalɔi ni bɛŋkɛ Betlehem lɛ ahe. Obaanyɛ ole nibii fɛɛ ni kɔɔ ebaptisimɔ kɛ esɔɔmɔ lɛ he, obaanyɛ ona bɔ ni ekɛ ewala akɛ adesa lɛ ha akɛ kpɔmɔ nɔ, ni obaanyɛ ona nyamɔ ni kɔɔ eshitee lɛ he lɛ mli gbɛfaŋnɔ. No sɛɛ lɛ, obaanyɛ okɛ bɔfo Paulo afa gbɛ ni ona bɔ ni etoɔ asafoi ashishi beni Kristojamɔ gbɛɔ eshwãa lɛ. Kɛkɛ lɛ, oweku lɛ baanyɛ ana bɔfo Yohane ninaa kpeteŋkpele ni kɔɔ wɔsɛɛ be he, ni Kristo Afii Akpe Nɔyeli lɛ fata he lɛ mli ŋɔɔmɔ yɛ Kpojiemɔ wolo lɛ mli.
18, 19. Mɛɛ ŋaawoi akɛhaa yɛ weku Biblia kanemɔ he?
18 Akɛ weku lɛ, kɛ nyɛmiikane Biblia lɛ waa lɛ, nyɛkanea kɛ miishɛɛ ni emli atse. Kɛ nyɛmiikane Ŋmalɛi lɛ fai komɛi lɛ, weku lɛ mlinyo ko—eeenyɛ efee tsɛ lɛ—baanyɛ akane sane lɛ mli wiemɔi lɛ. Nyɛteŋ mɛi komɛi baanyɛ afee amɛhe tamɔ Biblia mli gbɔmɛi lɛ, ni nyɛkɛ henumɔi ni sa akane fa ni akɛha nyɛ lɛ.
19 Yɛ be mli ni nyɛkɛ nyɛhe woɔ Biblia kanemɔ mli akɛ weku lɛ, onyɛmɔ yɛ nikanemɔ mli baaya hiɛ. Ebaaha Nyɔŋmɔ he nilee ni oyɔɔ lɛ aya hiɛ, ni esa akɛ enɛ agbala bo kɛbɛŋkɛ ehe. Asaf la akɛ: “Shi mi lɛ, Nyɔŋmɔ ŋɔɔ hilɛ hi ha mi; mikɛ Nuntsɔ Yehowa efee mibobaa he, koni magba onitsumɔi lɛ fɛɛ.” (Lala 73:28) Enɛ baaye abua oweku lɛ ni amɛtamɔ Mose, ni ‘mɔ̃ Mɔ ni anaaa lɛ lɛ’ ni ji, Yehowa Nyɔŋmɔ “mli tamɔ nɔ ni eena lɛ.”—Hebribii 11:27.
Nikanemɔ kɛ Kristofoi Asɔɔmɔ Lɛ
20, 21. Wɔ shiɛmɔ nitsumɔ ni kã wɔnɔ lɛ kɔɔ nyɛmɔ ni akɛkaneɔ nii he yɛ mɛɛ gbɛ nɔ?
20 Esa akɛ bɔ ni wɔshweɔ ni wɔja ‘Mɔ ni anaaa lɛ lɛ’ atsirɛ wɔ ni wɔbɔ mɔdɛŋ wɔtsɔmɔ nikanelɔi kpakpai. Nyɛmɔ ni akɛkaneɔ nii jogbaŋŋ lɛ yeɔ ebuaa wɔ ni wɔjɛɔ Nyɔŋmɔ Wiemɔ lɛ mli wɔyeɔ odase. Eyeɔ ebuaa wɔ diɛŋtsɛ ni wɔyaa nɔ yɛ Maŋtsɛyeli-shiɛmɔ nitsumɔ ni Yesu kɛwo esɛɛnyiɛlɔi lɛ adɛŋ lɛ mli, beni ekɛɛ: “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛnyɛ lɛ nɔ.” (Mateo 28:19, 20; Bɔfoi lɛ Asaji 1:8) Odaseyeli ji Yehowa webii anitsumɔ titri, ni mɔdɛŋbɔɔ yɛ nikanemɔ mli yeɔ ebuaa wɔ ni wɔtsũɔ enɛ he nii.
21 Mɔdɛŋbɔɔ he miihia dani afee nikanelɔ kpakpa kɛ Nyɔŋmɔ Wiemɔ lɛ tsɔɔlɔ ni he esa. (Efesobii 6:17) No hewɔ lɛ, ‘feemɔ bɔ fɛɛ bɔ ni ooonyɛ ni okɛ ohe adamɔ Nyɔŋmɔ hiɛ akɛ mɔ ni sa, mɔ ni tsuɔ anɔkwale wiemɔ lɛ he nii yɛ gbɛ ni ja nɔ.’ (2 Timoteo 2:15) Ha Ŋmalɛ mli anɔkwale lɛ he nilee ni oyɔɔ lɛ kɛ onyɛmɔ akɛ Yehowa Odasefonyo lɛ aya hiɛ, kɛtsɔ ohe ni oootu oha nikanemɔ nɔ.
Mɛni Ji Ohetooi?
◻ Miishɛɛ damɔ Nyɔŋmɔ Wiemɔ lɛ kanemɔ nɔ yɛ mɛɛ gbɛ nɔ?
◻ Mɛni hewɔ esa akɛ ojwɛŋ nɔ ni okaneɔ yɛ Biblia lɛ mli lɛ nɔ?
◻ Mɛni hewɔ esa akɛ okɛ saji ato saji ahe ni okɛ mfoniri feemɔ atsu nii beni okaneɔ Ŋmalɛi lɛ?
◻ Mɛni nibii komɛi abaanyɛ akase kɛjɛ Biblia lɛ kanemɔ mli?
◻ Mɛni hewɔ esa akɛ akane Biblia lɛ waa ni anu akɛ weku, ni nikanemɔ kɔɔ Kristofoi asɔɔmɔ lɛ he yɛ mɛɛ gbɛ nɔ?
[Mfonirii ni yɔɔ baafa 13]
Kɛ nyɛmiikane Biblia lɛ akɛ weku lɛ, feemɔ saji lɛ ahe mfoniri yɛ ojwɛŋmɔ mli, ni ojwɛŋ nɔ ni amɛtsɔɔ lɛ nɔ