Okɛ Oshihilɛ Atsu Nii Jogbaŋŋ Kɛmɔ Shi
TSƐ lɛ kã saatso nɔ yɛ shia ní eegbo kɛ kansa. Ebinuu lɛ yɛ nitsumɔhe lɛ, ni eetsumɔ nitsumɔ dadei ni etsɛ kɛtsuɔ tsei ahe nii lɛ ahe. Beni ehiɛ nitsumɔ dadei lɛ, esusu nibii ni yɔɔ naakpɛɛ ni etsɛ kɛfee lɛ ahe. Eyɛ mli akɛ nitsumɔhe lɛ yɛ shia lɛ masɛi moŋ, shi ele akɛ etsɛ eyaŋ jɛmɛ dɔŋŋ, ehiɛŋ nitsumɔ dadei ni be ko ni eho lɛ ehe esa waa kɛ nitsumɔ lɛ dɔŋŋ. Nakai be lɛ eho.
Binuu lɛ susu ŋmalɛ ni yɔɔ Jajelɔ 9:10 lɛ he akɛ: “Nɔ fɛɛ nɔ tsumɔ ni onine aaashɛ nɔ lɛ, okɛ ohewalɛ atsu; ejaakɛ nitsumɔ loo yiŋshwiemɔ loo nilee loo ŋaa ko bɛ gbohiiaje [gbonyobu lɛŋ] he ni oyaa lɛ.” Ele nakai ŋmalɛ lɛ jogbaŋŋ. Ekɛtsu nii shii abɔ beni etsɔɔ mɛi krokomɛi Biblia mli anɔkwale ni tsɔɔ akɛ gbele ji shihilɛ ko ni afeee nɔ ko kwraa yɛ mli lɛ. Agbɛnɛ Salomo naataamɔ wiemɔ lɛ bote etsui mli—esa akɛ wɔhi shi jogbaŋŋ kɛmɔ shi ni wɔná wɔgbii lɛ amli ŋɔɔmɔ bɔ ni wɔɔnyɛ, ejaakɛ be lɛ baaba ni wɔnyɛŋ nakai wɔfee dɔŋŋ.
Ná Wala Mli Ŋɔɔmɔ
Maŋtsɛ Salomo nilelɔ lɛ wo enikanelɔi lɛ hewalɛ yɛ Jajelɔ wolo lɛ mli fɛɛ, koni amɛná wala mli ŋɔɔmɔ. Ákɛ nɔkwɛmɔnɔ lɛ, yitso 3 lɛ kɛɛ: “Miyoo akɛ nɔ ko nɔ ko bɛ ni hi ha [gbɔmɛi] fe nɔ ni amɛmii aaashɛ amɛhe ni amɛaafee ekpakpa yɛ amɛwala be lɛ mli. Ni asaŋ miyoo akɛ, kɛ́ gbɔmɔ fɛɛ gbɔmɔ aaaye ni enu, ni eye nii kpakpai amli ŋɔɔmɔ yɛ edeŋmegbomɔ fɛɛ mli lɛ, Nyɔŋmɔ nikeenii ni.”—Jajelɔ 3:12, 13.
Nyɔŋmɔ kɛ mumɔ tsirɛ Salomo koni etĩ esusumɔ lɛ mli akɛ: “Naa, nɔ ni mina nɛ: ehi ni eyɛ fɛo, akɛ gbɔmɔ aaaye ni enu ni eye nii kpakpai amli ŋɔɔmɔ yɛ edeŋme fɛɛ ni egboɔ yɛ hulu shishi nɛɛ lɛ mli, ewala gbii abɔ fɛɛ ni Nyɔŋmɔ eha lɛ lɛ; ejaakɛ no ji egbɛfaŋnɔ.”—Jajelɔ 5:17.
Nakai nɔŋŋ ewo oblahii kɛ oblayei ahewalɛ akɛ: “Oblanyo, ha omii ashɛ ohe yɛ oblahiiaŋ, ni oná tsuijurɔ yɛ oblahiiaŋ [loo, oblayeiaŋ] gbii lɛ amli, ni onyiɛ otsui gbɛ̀i lɛ anɔ, kɛ nii ni ohiŋmɛii naa lɛ asɛɛ.” (Jajelɔ 11:9a) Kwɛ bɔ ni ehi akɛ oooná oblahiiaŋ kɛ oblayeiaŋ nyɛmɔ kɛ gbii lɛ amli ŋɔɔmɔ jogbaŋŋ kɛmɔ shi!—Abɛi 20:29.
“Kaimɔ Obɔlɔ Lɛ”
Yɛ anɔkwale mli lɛ, Salomo etsɔɔɔ akɛ nilee yɛ mli akɛ aaatiu nɔ fɛɛ nɔ ni baanyɛ aŋɔɔ wɔtsui loo wɔhiŋmɛii anaa lɛ sɛɛ. (Okɛto 1 Yohane 2:16 he.) Nɔ ni eŋma kɛnyiɛ sɛɛ nɛɛ fee enɛ faŋŋ akɛ: “Shi ná ole akɛ enɛɛmɛi fɛɛ [nibii asɛɛ ni otiuɔ ni baanyɛ aha ogbe okɔnɔi] hewɔ lɛ Nyɔŋmɔ kɛo baakojo.” (Jajelɔ 11:9b) Yɛ afii ni wɔye lɛ fɛɛ sɛɛ lɛ, esa akɛ wɔkai akɛ Nyɔŋmɔ kwɛɔ nɔ ni wɔkɛ wɔshihilɛi feɔ lɛ jogbaŋŋ ni ebaakojo wɔ yɛ naa pɛpɛɛpɛ.
Kwɛ bɔ ni eji kwashiaiasane akɛ wɔɔsusu sane he akɛ wɔbaanyɛ wɔhi pɛsɛmkunya shihilɛ mli ni wɔtsi Nyɔŋmɔ jamɔ hetuu-kɛhamɔ wɔto sɛɛ kɛyashi wɔnaagbee afii lɛ amli! Wɔwala baanyɛ aba naagbee be fɛɛ be. Kɛ jeee nakai po lɛ, Nyɔŋmɔ sɔɔmɔ bɛ mlɛo yɛ gbɔlɛ beaŋ. Beni Salomo yɔseɔ anɔkwa sane nɛɛ, eŋma akɛ: “Asaŋ kaimɔ obɔlɔ lɛ yɛ oblahiiaŋ gbii lɛ amli, be mli ni gbii fɔji lɛ nako aba, ni afii ni obaakɛɛ yɛ amɛhe akɛ: ‘Minaaa amɛhe miishɛɛ’ lɛ, nako ashɛ lɛ.”—Jajelɔ 12:1.
Gbɔlɛ kpataa mɛi ahiɛ. Yɛ mfonirifeemɔ mli lɛ, Salomo tsɔɔ nɔ ni jɛɔ gbɔlɛ mli kɛbaa lɛ kɛnyiɛ sɛɛ. Niji kpokpoɔ, naji amli gbɔjɔɔ, ni nyanyɔji lɛ famɔɔ. Ajeɔ waŋ ni efãmɔɔ. Wɔ̀ faaa kwraa aahu akɛ loofɔlɔ bolɔmɔ haa mɔ hiɛ tsɛ̃ɔ. Henumɔ nibii—ninamɔ, ninumɔ, niiahetaa, niiahefũu, kɛ niianaasaa—fɛɛ baa shi. Gbɔmɔtso ni egbɔjɔ lɛ haa asheɔ gbeyei akɛ aaagbee shi ni ehaa asheɔ “gbeyei nii” krokomɛi agbeyei yɛ gbɛjegbɛi ni atsɔɔ nɔ lɛ anɔ. Yɛ naagbee lɛ mɔ lɛ gboɔ.—Jajelɔ 12:2-7.
Gbɔlɛ bafeɔ jaramɔ titri kɛhaa mɛi ni ‘kaiii amɛ Bɔlɔ Kpeteŋkpele lɛ’ yɛ amɛblahiiaŋ loo amɛblayeiaŋ lɛ. Akɛni mɔ ni tamɔ nakai lɛ fiteɔ eshihilɛ be hewɔ lɛ, ‘enáaa miishɛɛ’ yɛ naagbee afii lɛ amli. Shihilɛ gbɛ ni Nyɔŋmɔ jamɔ bɛ mli lɛ hu baanyɛ eha naagbai kɛ piŋmɔi ni gbɔlɛ kɛbaa lɛ mli awa. (Abɛi 5:3-11) Mɔbɔ sane ji akɛ, beni mɛi ni tamɔ nakai lɛ kwɛɔ amɛhiɛgbɛ lɛ, amɛnaaa wɔsɛɛ be ko kwraa akɛ ja gbohiiaje.
Miishɛɛ ni Aaaná yɛ Gbɔlɛ Beaŋ
Enɛ etsɔɔɔ akɛ mɛi ni egbɔlɔ lɛ nyɛŋ aná wala mli ŋɔɔmɔ. Awieɔ “gbii asɛɛjɛkɛmɔ kɛ wala afii” hu he yɛ Biblia lɛ mli akɛ Nyɔŋmɔ jɔɔmɔ yɛ mli. (Abɛi 3:1, 2) Yehowa kɛɛ enaanyo Abraham akɛ: “Ni bo lɛ . . . , aaafũo yɛ gbɔlɛ kpakpa mli.” (1 Mose 15:15) Yɛ haomɔi ni gbɔlɛ beaŋ kɛbaa lɛ fɛɛ sɛɛ lɛ, Abraham ná toiŋjɔlɛ kɛ hejɔlɛ yɛ enaagbee afii lɛ amli, ni ekwɛ esɛɛ ni ena bɔ ni etsui enyɔ emli eha yɛ Yehowa ni etu ewala eha lɛ lɛ hewɔ. Ekɛ hemɔkɛyeli hu kwɛ “maŋ ni yɔɔ shishitoo ni wa,” ni ji Nyɔŋmɔ Maŋtsɛyeli lɛ gbɛ. (Hebribii 11:10) No hewɔ lɛ egbo beni eji ‘nuumo ni eye afii pii’ lɛ.—1 Mose 25:8.
No hewɔ lɛ, Salomo wo hewalɛ akɛ: “Kɛ gbɔmɔ hi shi afii pii po lɛ, ha emli afili lɛ yɛ fɛɛ mli.” (Jajelɔ 11:8, NW) Kɛ wɔdarako loo wɔji onukpai lɛ, anɔkwa miishɛɛ kɛ wekukpaa ni kã wɔkɛ Nyɔŋmɔ teŋ lɛ yɛ tsakpaa.
Beni oblanyo ni yɔɔ nibii afeemɔ nitsumɔhe lɛ kɛ etsɛ nitsumɔ dadei lɛ naagbee nɔ̃ fɔ shi lɛ, esusu enɛɛmɛi ahe. Esusu mɛi fɛɛ ni ele ni bɔ mɔdɛŋ akɛ amɛkɛ amɛshihilɛi baatsu nii jogbaŋŋ kɛmɔ shi lɛ ahe, shi amɛnáaa miishɛɛ yɛ wekukpaa ni bɛ amɛkɛ amɛ Bɔlɔ lɛ teŋ hewɔ. Kwɛ bɔ ni etamɔ nɔ ni esa jogbaŋŋ akɛ beni Salomo wo hewalɛ koni mɔ aná miishɛɛ yɛ eshihilɛ mli lɛ, emua saji lɛ anaa kɛ wiemɔi ni ji: “Nyɛhaa wɔboa saji lɛ fɛɛ naagbee toi: She Nyɔŋmɔ gbeyei ni oye ekitai lɛ anɔ! shi enɛ ji gbɔmɛi fɛɛ agbɛnaa”!—Jajelɔ 12:13.