Yitso 6

Buddha Jamɔ—Anɔkwa Emuuyeli Taomɔ ni Nyɔŋmɔ Bɛ Mli

1. (a) Buddha jamɔ ejie ehe kpo yɛ Anaigbɛ bii ateŋ yɛ mɛɛ gbɛ nɔ? (b) Mɛni ha nibii tee nɔ nɛkɛ yɛ Anaigbɛ lɛ?

ŊMƐNƐ, Buddha jamɔ ni aleee tsɔ yɛ Asia sɛɛ yɛ afii ohai 20 lɛ shishijee mli lɛ ebatsɔ je lɛŋ jamɔ. Yɛ anɔkwale mli lɛ, mɛi pii yɛ Anaigbɛ ni amɛnaa kpɛɔ amɛhe akɛ amɛaana ni Buddha jamɔ miishwere yɛ amɛ akutso mli diɛŋtsɛ. Nɔ titri ni ha ebalɛ nakai ji majimaji ateŋ abobaa he taomɔ kuu lɛ. Asiabii akutsei ni dara saŋŋ ebahe shi yɛ Europa Anaigbɛ, Amerika Kooyigbɛ, Australia kɛ hei krokomɛi. Yɛ be mli ni gbɔi nɛɛ heɔ shi yɛ amɛshikpɔŋ hee lɛ mli lɛ, amɛkɛ amɛjamɔ hu baa. Yɛ nakai beaŋ lɛ Anaigbɛ bii ateŋ mɛi pii miile Buddha jamɔ yɛ klɛŋklɛŋ be mli kwraa. Enɛ, kɛ bɔ ni sɔlemɔi sɔrɔtoi ni ale momo lɛ ŋmɛɔ nɔ fɛɛ nɔ feemɔ gbɛ ni amɛba shi yɛ mumɔŋ hu lɛ eha mɛi komɛi etsɔmɔ jamɔ “hee” lɛ mlibii.—2 Timoteo 3:1, 5.

2. Nɛgbɛ abaana Buddha jamɔ sɛɛnyiɛlɔi lɛ yɛ ŋmɛnɛ?

² No hewɔ lɛ, taakɛ 1989 Britannica Book of the Year lɛ tsɔɔ lɛ, Buddha jamɔ lɛ mlibii shɛɔ akpekpei 300 yɛ je lɛŋ fɛɛ, ni aaafee 200,000 yɛ Europa Anaigbɛ ni nakai yibɔ nɔŋŋ yɛ Amerika Kooyigbɛ, 500,000 yɛ Latin Amerika, kɛ 300,000 hu yɛ tsutsu Soviet Union. Shi anaa mɛi ni diɔ Buddha jamɔ sɛɛ lɛ ateŋ mɛi ni fa yɛ Asia maji lɛ amli lolo, tamɔ Sri Lanka, Myanmar (Burma), Thailand, Japan, Korea, kɛ China. Shi, namɔ ji Buddha lɛ? Te fee tɛŋŋ ni jamɔ nɛɛ je shishi? Mɛni ji Buddha jamɔ tsɔɔmɔi kɛ enifeemɔi?

Ejɛɛhe ni Aaanyɛ Akɛ He Afɔ nɔ lɛ He Sane Lɛ

3. Mɛni mli ana saji ni kɔɔ Buddha lɛ shihilɛ he lɛ kɛjɛ?

³ Wolo ni ji World Religions—From Ancient History to the Present lɛ kɛɔ akɛ: “Nɔ ni ale yɛ Buddha lɛ shihilɛ he lɛ damɔ wolokpoi ni aŋmala ni abuɔ amɛ akɛ anɔkwale, ni aŋmala emli nɔ ni fa babaoo yɛ Pali ni ji blema India wiemɔ ko mli lɛ mli saji anɔ titri.” Nɔ ni enɛ tsɔɔ ji akɛ ebe lɛ mli saji ni aŋmala ko bɛ ni baakɛɛ wɔ nɔ ko yɛ Siddhārtha Gautama, ni to nɛkɛ jamɔ nɛɛ shishi, ni hi India kooyigbɛ yɛ afii ohai ekpaa D.Ŋ.B. lɛ mli lɛ he. Ni yɛ anɔkwale mli lɛ, enɛ kɛ naagba baa. Shi nɔ ni yɔɔ hiɛdɔɔ waa ji be mli ni aŋmala kɛ bɔ ni fee ni aŋmala nakai “wolokpoi” lɛ.

4. Mɛɛ gbɛ nɔ atsɔ abaa Buddha lɛ tsɔɔmɔi lɛ ayi klɛŋklɛŋ kwraa?

⁴ Buddhafoi ablema saji tsɔɔ akɛ beni Gautama gbo pɛ kɛkɛ ni osɔfoi mɔ kome shihilɔi 500 tsɛ kpee koni amɛkɛkpɛ amɛyiŋ yɛ nɔ ni ji Nuŋtsɔ lɛ tsɔɔmɔ ni eŋmala lɛ he. Kɛji akɛ kpee ni tamɔ nɛkɛ tee nɔ diɛŋtsɛ lɛ, no hu ji sane ni Buddha jamɔ mli woloŋlelɔi kɛ yinɔsane-ŋmalalɔi jeɔ he ŋwane. Shi, sane titri ni esa akɛ wɔkadi ji akɛ, Buddha jamɔ mli woji ni aŋmala lɛ kpɛlɛɔ nɔ akɛ aŋmalaaa tsɔɔmɔi ni akpɛlɛ nɔ lɛ ashwieee shi, shi moŋ kaselɔi lɛ kaseɔ amɛwoɔ amɛyitsoŋ ni amɛtãa kɛ amɛnaabu. Ehe bahia ni ŋmalɛi krɔŋkrɔŋi lɛ aŋmalamɔ amɛ yɛ be kakadaŋŋ mli.

5. Mɛɛ be mli aŋmala Pali ŋmalɛi lɛ ashwie shi?

⁵ Taakɛ Sri Lanka afii ohai ejwɛ kɛ ekpaa Ŋ.B. lɛ mli yinɔsane ni aŋmala ashwie shi tsɔɔ lɛ, aje nɛkɛ Pali “wolokpoi” nɛɛ ateŋ nɔ ni etsɛ fe fɛɛ lɛ aŋmalamɔ shishi yɛ Maŋtsɛ Vattagamani Abhaya nɔyeli beaŋ yɛ klɛŋklɛŋ afii oha D.Ŋ.B. lɛ mli. Buddha lɛ shihilɛ he saji krokomɛi ejeee kpo akɛ nɔ ni aŋmala ashwie shi aahu kɛyashi ekolɛ Ŋ.B. klɛŋklɛŋ afii oha loo afii ohai enumɔ lɛ po mli, nɔ ni miihe ashɛ eshihilɛ be lɛ sɛɛ afii akpe.

6. Mɛɛ wiemɔi akɛshiɔ “wolokpoi” loo ŋmalɛi ni abuɔ amɛ akɛ anɔkwale lɛ? (Okɛto 2 Timoteo 3:16, 17 he.)

⁶ No hewɔ lɛ, Abingdon Dictionary of Living Religions lɛ kɛɛ, “‘Ewala shihilɛ he saji ni aŋmala’ lɛ shishijee kpe sɛɛ ni eyi obɔ hu kɛ adesãi kɛ blema saji, ni wolokpoi lɛ amli nɔ ni etsɛ fe fɛɛ lɛ jɛ saji ni akɛ naabu etã sɔŋŋ mli ni eka shi faŋŋ akɛ ati mli ni akɛ babaoo efata he.” Woloŋlelɔ ko po “kɛ hewalɛ wie akɛ tsɔɔmɔi ni aŋmala lɛ ateŋ ekome folo jeee nɔ ni abaanyɛ akɛɛ kɛ nɔmimaa akɛ ejɛ Gautama diɛŋtsɛ ŋɔɔ.” Ani wiemɔi ni akɛteɔ shi awoɔ nɛɛ ja?

Buddha lɛ Hɔŋɔɔ kɛ Efɔmɔ

7. Taakɛ Buddha jamɔ mli ŋmalɛi tsɔɔ lɛ, te fee tɛŋŋ ni Buddha lɛ nyɛ ŋɔ lɛ hɔ?

⁷ Susumɔ wiemɔi ni nyiɛ sɛɛ nɛɛ ni jɛ Jataka, Pali wolo kpo lɛ fa, kɛ Buddha-charita, ni ji Ŋ.B. afii ohai enyɔ Sanskrit ŋmalɛ ni kɔɔ Buddha lɛ shihilɛ he lɛ mli lɛ he okwɛ. Klɛŋklɛŋ lɛ, sane ni kɔɔ bɔ ni fee ni Buddha lɛ nyɛ, Maŋnyɛ Maha-Maya baŋɔ lɛ hɔ yɛ lamɔ mli lɛ.

“Ŋwɛibɔfoi ejwɛ ni buɔ mɔ he lɛ bawo lɛ kɛ esɛ̃i kakadaŋŋ ni eka nɔ lɛ, ni amɛkɛ lɛ tee Himalaya Gɔji lɛ anɔ. . . . Kɛkɛ ni ŋwɛibɔfoi ni buɔ mɔ he nɛɛ aŋamɛi ba, ni amɛkɛ lɛ tee Anotatta Kpaakpo lɛ he, ni amɛyaju ehe yɛ mli, koni amɛjie nɔ fɛɛ nɔ ni ji gbɔmɔ he nɔ ko ni eka ehe lɛ. . . . Nɔ ni bɛŋkɛ jɛmɛ ji Jwiɛtɛi Ŋmeŋme ko, kɛ emli shika shia ko. Kɛkɛ ni amɛŋmɛ ŋwɛi sɛi kakadaŋŋ ko ni eyitso ye bokagbɛ, ni amɛkɛ lɛ fɔ nɔ. Agbɛnɛ wɔsɛɛ be mli Buddha lɛ ebatsɔ shwuɔ yɛŋ ni nɔ bɛ . . . Ekwɔ Jwiɛtɛi Ŋmeŋme lɛ, ni . . . enyiɛ shii etɛ kɛbɔle enyɛ sɛi kakadaŋŋ lɛ, ni eninejurɔ gbɛ bɛŋkɛ sɛi lɛ, ni etswa enyɛ ma yɛ eninejurɔ gbɛ, etamɔ nɔ ni eebote emusuŋ. Nɛkɛ hɔŋɔɔ lɛ ba yɛ latsaa be lɛ teŋgbɛ gbijurɔyeli lɛ mli.”

8. Mɛni atsɔ hiɛ agba afɔ shi yɛ Buddha lɛ wɔsɛɛ be he?

⁸ Beni maŋnyɛ lɛ gba ewu, maŋtsɛ lɛ, lamɔ lɛ, ebua Hindu osɔfoi 64 ni ehe gbɛi anaa, elɛ amɛ ni ewo amɛ atadei, ni ebi ni amɛtsɔɔ lamɔ lɛ shishi. Amɛhetoo nɛ:

“Kaafee yeyeeye, maŋtsɛ kpeteŋkpele! . . . Obaafɔ binuu. Ni kɛji akɛ etee nɔ ehi shia shihilɛ lɛ, ebaatsɔ jeŋ muu fɛɛ maŋtsɛ; shi kɛji akɛ eshi shia shihilɛ ni eŋmɛɛ je lɛ he lɛ, ebaatsɔ Buddha, ni ebaakota eshafeemɔ atatui kɛ je nɛŋ kwashiai anifeemɔ lɛ.”

9. Mɛɛ nibii ni yɔɔ naakpɛɛ akɛɛ enyiɛ Buddha lɛ wɔsɛɛ be he adafi ni atswa lɛ sɛɛ ba?

⁹ Yɛ no sɛɛ lɛ, akɛɛ naakpɛɛ nibii 32 ba:

“Trukaa kɛkɛ ni jeŋ akpei nyɔŋma lɛ fɛɛ hoso, ekpokpo, ni ewoso. . . . Hɛl la haai lɛ fɛɛ gboi; . . . helai fɛɛ sɛɛ fo kɛjɛ gbɔmɛi ateŋ; . . . saŋkutswaa nibii fɛɛ bɔi gbɛɛmɔ ni jeee akɛ gbɔmɛi miitswa; . . . ŋshɔ agbo lɛ mli nui lɛ tsɔ nu ŋma; . . . jeŋ akpei nyɔŋma lɛ fɛɛ batsɔ fɔfɔii agbo kome ni yɔɔ fɛo fe fɛɛ.”

10. Te Buddha jamɔ mli ŋmalɛi krɔŋkrɔŋi lɛ tsɔɔ Buddha lɛ fɔmɔ mli amɛhaa tɛŋŋ?

¹⁰ Kɛkɛ ni Buddha lɛ fɔmɔ ni ekaaa lɛ ba yɛ sal tsei abɔɔ ko ni atsɛɔ lɛ Lumbini Koo Akrabatsa lɛ mli. Beni maŋnyɛ lɛ taoɔ ni emɔ sal tsei ni kwɛ̃ɔ yɛ akrabatsa lɛ mli lɛ ateŋ nɔ ni kɛ fe fɛɛ lɛ nine lɛ ekome mli lɛ, tso lɛ diɛŋtsɛ kpɛlɛ nɔ ni edɔ emli kɛbashɛ he ni ebaanyɛ emɔ mli. Beni ehiɛ tso nine lɛ mli edamɔ shi lɛ, kɛkɛ ni efɔ.

“Efa kpo kɛjɛ enyɛ musuŋ tamɔ shiɛlɔ ni miikpeleke shi kɛmiijɛ eshiɛmɔ kpoku nɔ, aloo nuu ni miikpeleke atrakwei, ekpa eniji kɛ enaji enyɔ lɛ fɛɛ mli, ni nɔ ko ni bɛ krɔŋŋ bɛ ehe kwraa kɛjɛ enyɛ musuŋ. . . . ”

“Beni afɔ lɛ pɛ kɛkɛ ni [wɔsɛɛ be Buddha lɛ] kɛ enaji enyɔ lɛ mamɔ shikpɔŋ, ni efamɔ enaji shii kpawo kɛtee kooyigbɛ, ni ehiɛ yiteŋ-haanɔ yɛŋ ko yɛ eyitso he, ni ekwɛ jeŋ koji ejwɛ lɛ fɛɛ eko kɛkpe, ni ekɛ gbeei ni eko kɛlɛ yeee egbɔ jaje akɛ: Miji onukpa, mɔ ni hi fe fɛɛ kɛ klɛŋklɛŋ mɔ yɛ jeŋ muu lɛ fɛɛ mli; enɛ ji minaagbee fɔmɔ; afɔŋ mi dɔŋŋ.”

11. Mɛɛ sane naa woloŋlelɔi komɛi emu yɛ saji ni kɔɔ Buddha lɛ shihilɛ he ni anaa yɛ amɛ ŋmalɛi krɔŋkrɔŋi lɛ amli lɛ hewɔ?

¹¹ Saji babaoo hu yɛ nakai nɔŋŋ ni kɔɔ egbekɛbiiashi saji, bɔ ni ekɛ obalayei bibii komɛi ni ehe fɛɔ amɛ fɛo kpe, eshifooi, kɛ eshihilɛ mli nɔ fɛɛ nɔ he. Belɛ ebɛ naakpɛɛ akɛ woloŋlelɔi pii kɛɔ akɛ enɛɛmɛi fɛɛ ji adesãi kɛ blema saji ni bɛ mli lɛ. Ŋleshi Blema Nibii Atoohe nɔkwɛlɔ ko po tsɔɔ ejwɛŋmɔ akɛ, yɛ bɔ ni “blema saji kɛ naakpɛɛ nibii lɛ fa babaoo ha hewɔ lɛ, . . . anyɛŋ ana Buddha lɛ shihilɛ he yinɔsane diɛŋtsɛ.”

12, 13. (a) Mɛni ji blema sane ni kɔɔ Buddha lɛ shihilɛ he? (b) Mɛni akpɛlɛɔ nɔ yɛ be mli ni afɔ Buddha lɛ he? (Okɛto Luka 1:1-4 he.)

¹² Yɛ nɛkɛ adesãi nɛɛ fɛɛ sɛɛ lɛ, aja blema saji ni kɔɔ Buddha lɛ shihilɛ he yinɔsane he lɛ babaoo aha. Ŋmɛnɛŋmɛnɛ beaŋ wolo ko, A Manual of Buddhism, ni aŋma yɛ Colombo, Sri Lanka lɛ, kɛ sane ni afo lɛ kuku ni mli ka shi nɛɛ ha.

“Yɛ May gbi ni nyɔŋtsere lɛ eye emuu, yɛ afi 623 D.Ŋ.B. lɛ mli afɔ Indianyo Sakyan Lumɔ, ni egbɛi ji Siddhattha Gotama yɛ Nepal niiaŋ.a Maŋtsɛ Suddhodana ji etsɛ, ni Maŋnyɛ Mahā Māyā ji enyɛ. Yoo nɛɛ gbo beni efɔ gbekɛ lɛ sɛɛ etsɛɛɛ, ni Mahā Pajāpati Gotamī batsɔ yoo ni kwɛ lɛ.

“Beni eye afii nyɔŋma kɛ ekpaa lɛ, ekɛ etsɛkwɛ biyoo, Maŋtsɛ-biyoo Yasodharā fɛfɛo lɛ bote gblashihilɛ mli.

“Ekɛ ehe wo ŋɔɔmɔyeli shihilɛ mli yɛ miishɛɛ gbalashihilɛ nɛɛ sɛɛ nɔ ni miihe ashɛ afii nyɔŋma kɛ etɛ, ni eleee shihilɛ mli saji ni tsakeɔ ni yaa nɔ yɛ maŋtsɛwe lɛ agboi lɛ asɛɛ lɛ ahe nɔ ko kwraa.

“Beni be shwieɔ mli lɛ, ebayoo anɔkwale lɛ fiofio. Beni eye afii 29, ni kadi tsakemɔ be yɛ eshihilɛ mli lɛ, afɔ ebinuu Rāhula. Ebu ebi nɛɛ akɛ gbɛtsii nii, ejaakɛ ebayɔse akɛ mɔ fɛɛ mɔ baa fɔmɔ, hela, kɛ gbele shishi ni ajieee mli. Yɛ be mli ni esusuɔ bɔ ni awerɛho yɔɔ jeŋ muu fɛɛ ha lɛ he lɛ, ekpɛ eyiŋ akɛ ebaatao jeŋ muu fɛɛ hela ni baa gbɔmɔ nɔ nɛɛ naa tsabaa.

“No hewɔ lɛ ekwa odehei ashihilɛ mli ŋɔɔmɔyeli lɛ, ni eshi shia gbɛkɛ ko . . . eku eyitsɔi, ewo atade folo ko kɛkɛ akɛ mɔ ni ekwa ehe, ni ebɔi shifoo akɛ Anɔkwale Taolɔ.”

¹³ Eka shi faŋŋ akɛ eshihilɛ he saji fioo nɛɛ kɛ ehe saji ni yɔɔ gbeyei ni agba ni anaa yɛ “wolokpoi” lɛ amli lɛ kpaaa gbee kwraa. Ni kɛ ajie afi nɔ ni afɔ lɛ lɛ kɛjɛ mli lɛ, akpɛlɛɔ nɔ ni eshwɛ lɛ nɔ.

Emuuyeli Lɛ—Bɔ ni Fee ni Eba

14. Mɛni ji tsakemɔ be yɛ Gautama shihilɛ mli lɛ?

¹⁴ Mɛni ji “tsakemɔ be yɛ eshihilɛ mli” ni atsɔ hiɛ atsi ta lɛ? No ji klɛŋklɛŋ be ni ena helatsɛ, nuumo, kɛ gbɔmɔ ni egbo yɛ eshihilɛ mli. Niiashikpamɔ nɛɛ ha eye awerɛho yɛ nɔ ni shihilɛ diɛŋtsɛ ji he—Mɛni hewɔ afɔ gbɔmɛi, ni amɛbana amanehulu kɛkɛ, amɛgbɔlɔ, ni amɛgboi? Kɛkɛ ni akɛɛ ena mɔ krɔŋkrɔŋ ko, mɔ ko ni ekwa je lɛ ni eetao anɔkwale. Enɛ nyɛ Gautama nɔ ni eshi eweku, enibii kɛ egbɛi akɛ lumɔ lɛ ni ekɛ afii ekpaa ni nyiɛ sɛɛ lɛ nyiɛ ni eetao hetoo lɛ kɛjɛ Hindu tsɔɔlɔi kɛ gurui sɔrɔtoi aŋɔɔ, shi eyeee omanye. Sane lɛ tsɔɔ mli akɛ etu ehe eha sane nɔjwɛŋmɔ, ŋmaahilɛ, Yoga, kɛ hekwamɔ kwraa shihilɛ, shi kɛlɛ enaaa mumɔŋ toiŋjɔlɛ loo emuuyeli.

15. Te fee tɛŋŋ ni yɛ naagbee lɛ Gautama nine shɛ nɔ ni akɛɛ eji emuuyeli lɛ nɔ?

¹⁵ Yɛ naagbee lɛ ebayoo akɛ sɛɛnamɔ ko bɛ ehekwamɔ loo ehe ni epiɔ keketee lɛ mli taakɛ bɔ ni sɛɛnamɔ ko hu bɛ etsutsu shihilɛ ni ha ekɛ ehe wo nɔ fɛɛ nɔ feemɔ mli lɛ lɛ he. Agbɛnɛ ebakɔ nɔ ni atsɛɔ lɛ akɛ Teŋgbɛ Shihilɛ lɛ, ni ekwa shihilɛ gbɛ ni yɔɔ keketee ni enyiɛɔ sɛɛ lɛ. Akɛni ekpɛ eyiŋ akɛ ebaana hetoo lɛ kɛjɛ lɛ diɛŋtsɛ ehenilee loo ehiɛ ni eeeha ahi ehe nɔ lɛ mli hewɔ lɛ, eho eta pipal, loo India agbamitso ko shishi ni eejwɛŋ saji anɔ. Akɛni ete shi ewo tutuamɔi kɛ kaai ni abonsam ni ji Mara kɛba enɔ lɛ hewɔ lɛ, etee nɔ efee shiŋŋ yɛ enɔ́ nɔjwɛŋmɔ lɛ mli otsii ejwɛ (mɛi komɛi kɛɛ otsii kpawo) kɛyashi be mli ni akɛɛ eteke nilee kɛ sɛɛyoomɔ fɛɛ ni eyashɛ emuuyeli he.

16. (a) Mɛni Gautama batsɔ? (b) Mɛɛ jwɛŋmɔi sɔrɔtoi ahiɛ yɛ Buddha lɛ he?

¹⁶ Kɛtsɔ nifeemɔ nɛɛ nɔ lɛ, Gautama batsɔ Buddha lɛ—Mɔ ni Hiɛ Eba Ehe Nɔ, loo Mɔ ni Ena Emuuyeli, taakɛ Hindu wiemɔ tsɔɔ mli lɛ. Enine eshɛ naagbee oti lɛ, Nirvana, ni ji shihilɛ ni tsɔɔ toiŋjɔlɛ kɛ shihilɛ ni yeɔ emuu, ni akɔnɔ kɛ piŋmɔ bɛ mli lɛ nɔ. Abale lɛ hu akɛ Sakyamuni (Sakya akutso lɛ mli nilelɔ), ni efɔɔ ehe tsɛmɔ akɛ Tathagata (Mɔ ni ba ni [ebatsɔɔ nii]). Shi Buddha jamɔ kui sɔrɔtoi hiɛ jwɛŋmɔi sɔrɔtoi yɛ nɛkɛ sane nɛɛ he. Mɛi komɛi buɔ lɛ akɛ gbɔmɔ diɛŋtsɛ ni na gbɛ ni kɛ mɔ yaa emuuyeli mli kɛha lɛ diɛŋtsɛ ehe ni etsɔɔ esɛɛnyiɛlɔi lɛ enɛ. Mɛi krokomɛi buɔ lɛ akɛ Buddhai sɔrɔtoi ni ba je lɛ mli ni amɛbashiɛ loo amɛbatee dharma (Pali, Dhamma), ni ji Buddha tsɔɔmɔ loo gbɛ lɛ shi lɛ ateŋ naagbee mɔ. Ni mɛi krokomɛi hu buɔ lɛ akɛ bodhisattva, mɔ ni nine eshɛ emuuyeli nɔ shi etsi Nirvana ni eeebote lɛ eto sɛɛ koni eye ebua mɛi krokomɛi yɛ amɛ emuuyeli taomɔ lɛ mli. Bɔ fɛɛ bɔ ni eji lɛ, nifeemɔ nɛɛ, ni ji Emuuyeli lɛ ji nɔ titri ni he hiaa yɛ Buddha jamɔ tsɔɔmɔi fɛɛ mli.

Emuuyeli Lɛ—Mɛni Ni?

17. (a) Nɛgbɛ Buddha lɛ ha eklɛŋklɛŋ shiɛmɔ wiemɔ lɛ yɛ, ni eshiɛ etsɔɔ namɛi? (b) Tsɔɔmɔ Anɔkwalei Wuji Ejwɛ lɛ amli kuku.

¹⁷ Beni enine eshɛ emuuyeli nɔ, ni eye shishijee shishashaomɔ nɔ kunim lɛ, Buddha lɛ je shishi akɛ ebaatsɔɔ mɛi krokomɛi anɔkwale hee ni ena lɛ, e-dharma lɛ. Eha eklɛŋklɛŋ shiɛmɔ kɛ ekolɛ nɔ ni he hiaa fe fɛɛ lɛ yɛ Benares maŋ lɛ mli, yɛ ofrotei abɔɔ ko mli etsɔɔ bhikkui—kaselɔi loo mɔ kome shihilɔi enumɔ. Etsɔɔ yɛ mli akɛ, kɛ aaahere mɔ ko yiwala lɛ, esa akɛ mɔ lɛ akwa bɔlɛnamɔ mli akɔnɔi ni akɛ he woɔ mli vii lɛ kɛ gbɔmɔtso lɛ yiwaa ni mɔ lɛ anyiɛ Teŋgbɛ Shihilɛ lɛ nɔ. Kɛkɛ lɛ esa akɛ mɔ lɛ anu Anɔkwalei Wuji Ejwɛ (kwɛmɔ baafa ni yɔɔ ninejurɔ gbɛ) lɛ, ni abaanyɛ atsɔɔ mli kuku nɛkɛ lɛ shishi ni enyiɛ sɛɛ:

(1) Shihilɛ fɛɛ lɛ piŋmɔ ni.

(2) Piŋmɔ baa kɛjɛɔ akɔnɔ loo nii ni ashweɔ ni ana mli.

(3) Akɔnɔi asɛɛfoo tsɔɔ piŋmɔ naagbee.

(4) Nine shɛɔ akɔnɔi asɛɛfoo nɔ kɛtsɔɔ Gbɛ ni Bɔ He Kpaanyɔ lɛ sɛɛnyiɛmɔ, mɔ lɛ jeŋba, kɛ esusumɔ kɛ ehemɔkɛyeli kudɔmɔ nɔ.

18. Mɛni Buddha lɛ kɛɛ akɛ no ji emuuyeli ni ena lɛ jɛɛhe? (Okɛto Hiob 28:20, 21, 28; Lala 111:10 he.)

¹⁸ Nɛkɛ shiɛmɔ wiemɔ ni kɔɔ Teŋgbɛ Shihilɛ kɛ Anɔkwalei Wuji Ejwɛ nɛɛ ahe lɛ kɔɔ nɔ titri ni yɔɔ Emuuyeli lɛ mli lɛ fɛɛ he ni abuɔ no akɛ Buddha tsɔɔmɔi lɛ fɛɛ anaamuu. (Nɔ ni tamɔɔɔ no lɛ, okɛto Mateo 6:25-34; 1 Timoteo 6:17-19; Yakobo 4:1-3; 1 Yohane 2:15-17 he.) Gautama ekɛɛɛ akɛ Nyɔŋmɔ mumɔ lɛ tsirɛ lɛ yɛ nɛkɛ shiɛmɔ wiemɔ nɛɛ mli, shi moŋ etsɔ wiemɔ ni ji, “Tathagata lɛ kpá shi ena” lɛ nɔ ekɛ ehe yijiemɔ ha ehe. Akɛɛ beni Buddha ka egbele saa nɔ lɛ, ekɛɛ ekaselɔi lɛ akɛ: “Nyɛtaoa yiwalaheremɔ kɛjɛa anɔkwale lɛ pɛ mli; nyɛkataoa yelikɛbuamɔ kɛmiijɛ mɔ ko dɛŋ ja nyɛ pɛ.” No hewɔ lɛ, taakɛ Buddha lɛ tsɔɔ lɛ, jeee Nyɔŋmɔ ŋɔɔ emuuyeli baa kɛjɛɔ, shi moŋ ebaa kɛjɛɔ mɔ lɛ diɛŋtsɛ mɔdɛŋbɔɔ koni ena jwɛŋmɔ ni ja, kɛ nitsumɔi kpakpai ni etsuɔ lɛ amli.

19. Mɛni hewɔ mɛi pii kpɛlɛ Buddha lɛ shɛɛ sane lɛ nɔ yɛ nakai be lɛ mli lɛ?

¹⁹ Ewaaa akɛ aaana nɔ hewɔ ni Indiabii kpɛlɛ nɛkɛ tsɔɔmɔ nɛɛ nɔ yɛ nakai be lɛ mli lɛ. Ebuɔ jamɔ mli nifeemɔi ni hiɛjoomɔ kɛ juu kɛ fɔ̃ yɔɔ mli ni Hindu Brahman, loo osɔfoi akuu lɛ haa eyaa nɔ lɛ fɔ yɛ gbɛ kome nɔ, kɛ bɔ ni Jainbii kɛ teemɔŋ jamɔ kui krokomɛi waa gbɔmɔtso lɛ yi keketee lɛ hu. Agbɛnɛ ejie afɔlei kɛ kusum-nifeemɔi, nyɔŋmɔi kɛ nyɔŋmɔyei akpekpei abɔ lɛ kɛtee, kɛ gbɔmɛi amligbalamɔi ni tamɔ jatsu ni tsii ni eŋɔ gbɔmɛi lɛ ashihilɛ mli nibii fɛɛ nom lɛ hu. Yɛ ekukufoo mli lɛ, ekɛ heyeli he shiwoo haa mɔ fɛɛ mɔ ni miisumɔ ni enyiɛ Buddha gbɛ lɛ nɔ lɛ.

Buddha Jamɔ Miilɛɛ Hewalɛ ni Enaa yɛ Mɛi Anɔ lɛ Mli

20. (a) Mɛni ji Buddha jamɔ mli “Jwinei Etɛ” lɛ? (b) Buddha lɛ shiɛmɔ he tafaa lɛ tee shɔŋŋ kɛyashɛ nɛgbɛ?

²⁰ Beni bhikkui enumɔ lɛ kpɛlɛ Buddha tsɔɔmɔ lɛ nɔ lɛ, kɛkɛ ni amɛbatsɔ klɛŋklɛŋ sangha, loo mɔ kome shihilɔi agbɛjianɔtoo. No hewɔ lɛ abagbe Buddha jamɔ “Jwinei Etɛ” loo (Triratna) lɛ naa, ni ji, Buddha lɛ, dharma lɛ, kɛ sangha, ni akɛɛ no yeɔ buaa gbɔmɛi koni amɛyi gbɛ ni kɛ mɔ yaa emuuyeli mli lɛ nɔ lɛ. Akɛni esaa ehe nɛkɛ hewɔ lɛ, Gautama ni ji Buddha lɛ tee nɔ eshiɛ yɛ Ganges Jɔɔ lɛ mli he fɛɛ he. Gbɔmɛi ni jɛ shihilɛi kɛ gbɛhei sɔrɔtoi amli babo lɛ toi, ni amɛbatsɔmɔ ekaselɔi. Beni egboɔ ni eye afii 80 lɛ, no mli lɛ ehe gbɛi ni abuɔ lɛ waa. Abɔ amaniɛ akɛ enaagbee wiemɔ ni ekɛha ekaselɔi lɛ ji: “Fitemɔ yɛ nibii fɛɛ mli. Nyɛkɛ hiɛdɔɔ atsua nyɛ diɛŋtsɛ nyɛ yiwalaheremɔ he nii.”

21. (a) Namɔ ye bua ni Buddha jamɔ shwere? (b) Mɛni jɛ emɔdɛŋbɔɔi lɛ amli ba?

²¹ Yɛ afii ohai etɛ D.Ŋ.B., aaafee afii 200 yɛ Buddha lɛ gbele sɛɛ lɛ, kɛkɛ ni Buddha jamɔ sɛɛfilɔ kpeteŋkpele, Maŋtsɛ Aśoka, ni kɛ India maŋ lɛ fa ni da bahɔ enɔyeli shishi lɛ pue. Akɛni gbɔmɛi ni agbe kɛ basabasa-feemɔ ni ba yɛ ekunimyeli lɛ hewɔ lɛ ha eye awerɛho hewɔ lɛ, ekpɛlɛ Buddha jamɔ nɔ, ni eha Maŋ lɛ fi sɛɛ. Emamɔ jamɔ kaimɔ tɛi, eha afee kpeei, ni ewo gbɔmɛi lɛ ŋaa koni amɛhi shi yɛ Buddha tsɔɔmɔi lɛ anaa. Agbɛnɛ Aśoka tsu Buddha jamɔ lɛ mli sanekpakpa shiɛlɔi kɛtee India he fɛɛ he, kɛtee Sri Lanka, Siria, Mizraim, kɛ Hela. Aśoka mɔdɛŋbɔɔ nɔ titri Buddha jamɔ tsɔ eshwere kɛjɛ India jamɔ kuu ni eji lɛ nɔ kɛbatsɔ je lɛŋ jamɔ. Mɛi komɛi buɔ lɛ akɛ Buddha jamɔ shishitolɔ ni ji enyɔ yɛ gbɛ ni ja nɔ.

22. Te fee tɛŋŋ ni Buddha jamɔ bahe shi yɛ Asia fɛɛ?

²² Buddha jamɔ lɛ jɛ Sri Lanka egbɛ eshwa bokagbɛ kɛtee Myanmar (Burma), Thailand, kɛ Indochina hei krokomɛi. Buddha jamɔ gbɛ eshwa kɛtee kooyigbɛ yɛ Kashmir kɛ Asia teŋgbɛ. Buddha osɔfoi jɛ nɛkɛ hei nɛɛ, yɛ Ŋ.B. klɛŋklɛŋ afii oha lɛ mli tɔŋŋ amɛfa gbɛ kɛteke gɔji kɛ shia ŋai ni ehiii nɔ tsɔmɔ lɛ ni amɛkɛ amɛjamɔ lɛ tee China. Kɛjɛ China lɛ, ewaaa kwraa akɛ Buddha jamɔ aaagbɛ ashwa kɛaaya Korea kɛ Japan. Akɛ Buddha jamɔ hu ba Tibet, maŋ ni India kɛlɛ jeɔ husu yɛ kooyigbɛ lɛ. Akɛni akɛ maŋ lɛ mli hemɔkɛyelii futu mli hewɔ lɛ, ebaje kpo akɛ Lama tsɔɔmɔ, ni enɛ ye jamɔ kɛ maŋkwramɔ shihilɛ fɛɛ nɔ yɛ jɛmɛ. Beni shɛɔ afii ohai ekpaa loo kpawo yɛ Ŋ.B. lɛ, no mli lɛ Buddha jamɔ ehe shi jogbaŋŋ yɛ Asia Wuoyi-bokagbɛ kɛ Bokagbɛ Shɔŋŋ. Shi mɛni yaa nɔ yɛ India?

23. Mɛni ba Buddha jamɔ nɔ yɛ India?

²³ Beni Buddha jamɔ gbɛɔ hewalɛ ni enaa yɛ mɛi anɔ lɛ eshwaa yɛ maji krokomɛi anɔ lɛ, no mli lɛ eeba shi fiofio yɛ India. Akɛni osɔfoi mɔ kome shihilɔi lɛ kɛ amɛhe ewo jeŋ nilee kɛ jeŋ nilee he nikasemɔ ni yaa hiɛ lɛ mli hewɔ lɛ, amɛkɛ amɛsɛɛnyiɛlɔi ni leee nɔ ko lɛ naaa nɔ ko feemɔ tsɔ. Kɛfata he lɛ, akɛni nɔyeli lɛ loo odehei lɛ fiii sɛɛ ni abɔi Hindu jamɔ susumɔi kɛ nifeemɔi anɔ kpɛlɛmɔ hewɔ lɛ, enɛɛmɛi fɛɛ gbe Buddha jamɔ yɛ India. Buddha jamɔ hei krɔŋkrɔŋi tamɔ Lumbini, he ni afɔ Gautama yɛ, kɛ Buddh Gaya, he ni ena “emuuyeli” lɛ yɛ lɛ babɔi fitemɔ. Beni shɛɔ afii ohai 13 lɛ, no mli lɛ, Buddha jamɔ elaaje kwraa kɛjɛ India, shikpɔŋ ni ato shishi yɛ nɔ lɛ.

24, 25. Mɛni nibii ni ba yɛ Buddha jamɔ mli lolo ana yɛ afii ohai 20 lɛ mli?

²⁴ Atsake Buddha jamɔ hiɛ ekoŋŋ yɛ afii ohai 20 lɛ mli. Maŋkwramɔŋ basabasa-feemɔ ni ba yɛ China, Mongolia, Tibet, kɛ maji ni yɔɔ Asia Wuoyi-bokagbɛ lɛ amli lɛ ye lɛ awui diɛŋtsɛ. Akpata jamɔ nikasemɔ he tsui kɛ sɔlemɔtsui akpei abɔ hiɛ, ni ashwie amɛ osɔfoi kɛ osɔfo yei mɔ kome shihilɔi lɛ ateŋ akpei ohai abɔ, awo amɛ tsuŋ loo agbe amɛ po. Ni kɛlɛ, anuɔ Buddha jamɔ hewalɛ lɛ he lolo yɛ gbɔmɛi ni yɔɔ nɛkɛ shikpɔji nɛɛ anɔ lɛ asusumɔi kɛ subaŋi amli.

²⁵ Etamɔ nɔ ni jwɛŋmɔ ni Buddha jamɔ hiɛ, akɛ mɔ atao “anɔkwale” lɛ kɛjɛ lɛ diɛŋtsɛ emli lɛ efee nɔ ni mɛi pii kpɛlɛɔ nɔ yɛ Europa kɛ Amerika Kooyigbɛ, ni enifeemɔ ni ji nɔ nɔjwɛŋmɔ lɛ haa mɔ gbalaa ehe shi kɛjɛɔ Anaigbɛ bii ashihilɛ ni yɔɔ hoo lɛ he. Nɔ ni yɔɔ miishɛɛ ji akɛ, Tenzin Gyatso, Tibet Dalai Lama ni atswa enaneshi tu lɛ ŋma yɛ wolo, Living Buddhism lɛ hiɛkpamɔ wiemɔ lɛ mli akɛ: “Ekolɛ Buddha jamɔ baanyɛ ana gbɛfaŋnɔ ko yɛ bɔ ni ekaiɔ Anaigbɛ bii yɛ mumɔŋ nibii ni yɔɔ amɛshihilɛi amli ŋmɛnɛ lɛ ahe lɛ mli.”

Buddha Jamɔ Gbɛi Sɔrɔtoi Lɛ

26. Buddha jamɔ mli egbala yɛ mɛɛ gbɛi anɔ?

²⁶ Eyɛ mli akɛ afɔɔ Buddha jamɔ he wiemɔ akɛ jamɔ kome moŋ, shi yɛ anɔkwale mli lɛ agbala mli afee lɛ tsɔɔmɔ kɛ susumɔ kui sɔrɔtoi babaoo. Akɛni edamɔ shishitsɔɔmɔi sɔrɔtoi ni akɛhaa yɛ bɔ ni Buddha lɛ kɛ etsɔɔmɔi lɛ ji he lɛ nɔ hewɔ lɛ, eko fɛɛ eko yɛ etsɔɔmɔi, enifeemɔi, kɛ ŋmalɛi. Agbala nɛkɛ tsɔɔmɔ kui nɛɛ amli lolo afee amɛ kui kɛ jamɔ kui sɔrɔtoi babaoo, ni maji anɔ hei ni amɛyɔɔ lɛ mli kusum-nifeemɔi kɛ blema saji naa babaoo nɔ hewalɛ.

27, 28. Te obaatsɔɔ Theravada Buddha jamɔ lɛ mli oha tɛŋŋ? (Okɛto Filipibii 2:12; Yohane 17:15, 16 he.)

²⁷ Theravada (Onukpai Agbɛ lɛ), loo Hinayana (Gbɛ ni Baa Shi), ni ji Buddha jamɔ susumɔ kɛ tsɔɔmɔ kui lɛ shwereɔ yɛ Sri Lanka, Myanmar (Burma), Thailand, Kampuchea (Cambodia), kɛ Laos. Mɛi komɛi buɔ enɛ akɛ jamɔ susumɔ ni tsakeee. Emaa nilee taomɔ kɛ mɔ diɛŋtsɛ yiwalaheremɔ he nii ni mɔ lɛ aaatsu kɛtsɔ je lɛ ni akwaa kɛ shi ni aaahi akɛ mɔ kome shihilɔ, ni mɔ lɛ etuu ehe eha sane nɔjwɛŋmɔ kɛ nikasemɔ yɛ jamɔ nikasemɔ he ko mli lɛ nɔ mi.

²⁸ Afɔɔ obalaŋtai akui ni amɛshɛ amɛyiteŋ tsɔi fɛɛ namɔ yɛ nɛkɛ maji nɛɛ amli, ni amɛwowoo sharon atade yuu ni amɛwooo tokotai, ni hiɛ kãi ni amɛkɛbaa amɛ daa gbi niyenii kɛjɛɔ heyelilɔi ni sɔ ka amɛnɔ akɛ amɛkwɛ amɛ lɛ adɛŋ. Eji kusum-nifeemɔ ni ka amɛnɔ akɛ kɛ hoo lɛ hii lɛ kɛ amɛshihilɛ be ko ayahi jamɔ nikasemɔ he ko mli. Oti ni yɔɔ shihilɛ yɛ jamɔ nikasemɔ he ko lɛ mli ji ni mɔ lɛ atsɔ arhat, ni ji akɛ, mɔ ni eshɛ mumɔŋ emuuyeli kɛ heyeli kɛmiijɛ fɔmɔ shibɔlemɔ lɛ mli piŋmɔi kɛ nɔnaa lɛ mli. Buddha lɛ etsɔɔ gbɛ lɛ; eka mɔ fɛɛ mɔ nɔ akɛ mɔ lɛ aaanyiɛ sɛɛ.

29. Mɛni ji Mahayana Buddha jamɔ lɛ mli sui loo ehe nibii komɛi? (Okɛto 1 Timoteo 2:3, 4; Yohane 3:16 he.)

²⁹ Afɔɔ Mahayana (Gbɛ ni Da), ni ji Buddha jamɔ tsɔɔmɔ kuu lɛ namɔ yɛ China, Korea, Japan, kɛ Vietnam. Atsɛɔ lɛ nakai ejaakɛ emaa Buddha lɛ tsɔɔmɔ lɛ nɔ mi akɛ “anɔkwale kɛ yiwalaheremɔ gbɛ lɛ yɛ kɛha mɔ fɛɛ mɔ, ekɔɔɔ he eko kɛji mɔ lɛ hiɔ tɛkplo mli, jamɔ nikasemɔ he, loo shia ko mli . . . Ebɛ kɛha mɛi ni kwaa je lɛ pɛ.” Mahayana tsɔɔmɔ titri ji akɛ Buddha lɛ suɔmɔ kɛ mɔbɔnalɛ da aahu akɛ etsiii mɔ ko mɔ ko gbɛ kɛjɛɛɛ yiwalaheremɔ he. Etsɔɔ akɛ akɛni Buddha-su lɛ yɛ wɔ fɛɛ wɔmli hewɔ lɛ, mɔ fɛɛ mɔ baanyɛ atsɔ Buddha, mɔ ni ena emuuyeli, loo bodhisattva. Emuuyeli baaa kɛtsɔɔɔ he tsɔsemɔ tridii nɔ, shi moŋ kɛtsɔ Buddha lɛ mli hemɔkɛyeli kɛ mɔbɔnalɛ ni ayɔɔ kɛha nibii ni yɔɔ wala mli fɛɛ lɛ nɔ. Eka shi faŋŋ akɛ, enɛ mɔɔ gbɔmɛi ni kɛ amɛjwɛŋmɔ tsuɔ nii lɛ atsui. Shi yɛ su ni heyeli yɔɔ mli babaoo nɛɛ hewɔ lɛ, kui kɛ jamɔ kui sɔrɔtoi babaoo ete shi.

30. Mɛɛ oti mɛi ni amɛtuu amɛhe amɛha Buddha jamɔ mli “Shikpɔŋ Krɔŋŋ” lɛ taoɔ? (Okɛto Mateo 6:7, 8; 1 Maŋtsɛmɛi 18:26, 29 he.)

³⁰ Nɔ ni fata Mahayana jamɔ kui babaoo ni etetee shi yɛ China kɛ Japan lɛ ahe ji Buddha jamɔ tsɔɔmɔi sɔrɔtoi ni ji Shikpɔŋ Krɔŋŋ kɛ Zen kui lɛ. Klɛŋklɛŋ nɔ lɛ kɛ etsɔɔmɔ damɔɔ Amida Buddha, ni kɛ fɔmɔ hee yɛ Shikpɔŋ Krɔŋŋ, loo Anaigbɛ Paradeiso, miishɛɛ kɛ mlifilimɔ shikpɔŋ ni nyɔŋmɔi kɛ gbɔmɛi fɛɛ hiɔ nɔ lɛ he shiwoo ha esɛɛnyiɛlɔi lɛ yiwalaheremɔ hewalɛ lɛ mli hemɔkɛyeli ni ayɔɔ lɛ nɔ. Ewaaa akɛ aaajɛ biɛ aya Nirvana. Kɛ mɔ ni etu ehe eha enɛ lɛ ti sɔlemɔ, ni ji “Mikɛ mihemɔkɛyeli ewo Amida Buddha mli” lɛ mli, ekolɛ shii akpei abɔ gbi kome lɛ, etsuuɔ ehe koni enyɛ eshɛ emuuyeli he aloo ni ena fɔmɔ hee yɛ Anaigbɛ Paradeiso lɛ mli.

31. Mɛni ji Zen Buddha jamɔ lɛ mli nibii loo tsɔɔmɔi komɛi? (Okɛto Filipibii 4:8 he.)

³¹ Zen Buddha jamɔ (Ch’an kuu ni yɔɔ China) lɛ na egbɛi lɛ kɛjɛ sane nɔjwɛŋmɔ ni afeɔ lɛ mli. Wiemɔi ch’an (Chinese) kɛ zen (Japanese) ji Sanskrit wiemɔ dhyāna, ni eshishi ji “nɔjwɛŋmɔ” lɛ henɔi sɔrɔtoi. Nɛkɛ tsɔsemɔ nɛɛ tsɔɔ akɛ nikasemɔ, nitsumɔi kpakpai, kɛ kusum-nifeemɔi ahe ehiaaa tsɔ ko. Mɔ ko nine baanyɛ ashɛ emuuyeli nɔ kɛtsɔ ajenui loo abɛbuai ni anyɛŋ asusu he loo ale bɔ ni amɛhe hiamɔ ji diɛŋtsɛ lɛ he jwɛŋmɔ nɔ, tamɔ, ‘Kɛ nine kome miitswa edɛ lɛ te egbɛɛmɔ yɔɔ ha tɛŋŋ?’ kɛ, ‘Mɛni wɔnaa yɛ he ko ni nɔ ko nɔ ko bɛ jɛmɛ?’ Bɔ ni Zen Buddha jamɔ tamɔ teemɔŋ sane ko lɛ eha ajie lɛ kpo yɛ fɔfɔii agbɛjianɔtoo fɛfɛo, waonaa niŋmaai fɛfɛo, inki loo blɛgi kɛ nitɛŋmɔ, lalafoo wiemɔi, abɔɔ-feemɔ kɛ nibii krokomɛi amli, ni amɔ enɛɛmɛi amli jogbaŋŋ yɛ Anaigbɛ. Ŋmɛnɛ, anaa Zen saji anɔjwɛŋmɔ nikasemɔ hei yɛ Anaigbɛ maji pii amli.

32. Te atsuɔ Tibet Buddha jamɔ lɛ he nii ahaa tɛŋŋ?

³² Yɛ naagbee lɛ, Tibet Buddha jamɔ, loo Lama jamɔ hu yɛ. Atsɛɔ nɛkɛ Buddha jamɔ nɛɛ yɛ bei komɛi amli akɛ Mantrayana (Mantra Gbɛ), yɛ mantra, ni ji wiemɔi fafaafai ni ato naa ni shishinumɔ yɔɔ mli loo eko bɛ mli ni atiɔ mli akɛɔ ni afɔɔ kɛ nitsumɔ babaoo lɛ hewɔ. Ní eeema nilee loo mɔbɔnalɛ nɔ mi lɛ, nɛkɛ Buddha jamɔ nɛɛ maa kusum-nifeemɔi, sɔlemɔi, ŋkunyaayeli, kɛ mumɔi atsɛmɔ yɛ jamɔ mli lɛ nɔ mi. Atiɔ sɔlemɔ mli shii akpei abɔ daa gbi kɛtsɔ sɔlemɔ ashinaoi kɛ sɔlemɔ shwiilii kɛ nitsumɔ nɔ. Abaanyɛ akase kusum-nifeemɔi ni yɔɔ hwanyaŋŋ nɛɛ kɛtsɔ naabu kɛ wiemɔ ni lamai, loo jamɔ nikasemɔ he lɛ hiɛnyiɛlɔi, ni amɛteŋ mɛi ni ale amɛ jogbaŋŋ ji Dalai Lama lɛ kɛ Panchen Lama lɛ aaatsɔ nɔ atsɔɔ mɔ ko nii lɛ pɛ nɔ. Yɛ lama ko gbele sɛɛ lɛ, ataoɔ gbekɛ ko ni akɛɛ lɛ ji lama lɛ ni afɔ lɛ ekoŋŋ koni ebafee mumɔŋ hiɛnyiɛlɔ ni nyiɛ sɛɛ. Shi yɛ be babaoo mli lɛ akɛ wiemɔ nɛɛ toɔ osɔfoi mɔ kome shihilɔi lɛ fɛɛ, ni beni abu amɛyifalɛ naa yɛ be ko mli lɛ, amɛshɛɔ gbɔmɛi ni yɔɔ Tibet lɛ fɛɛ ayifalɛ mlijaa enumɔ mli ekome lɛ ahe. Lamai lɛ hu tsuɔ nii akɛ tsɔɔlɔi, datrɛfoi, shikpɔŋ-tsɛmɛi, kɛ maŋkwramɔŋ hiɛnyiɛlɔi.

33. Buddha jamɔ mligbalamɔi lɛ tamɔ Kristendom nɔ lɛ yɛ mɛɛ gbɛ nɔ? (Okɛto 1 Korintobii 1:10 he.)

³³ Ajara Buddha jamɔ mligbalamɔi titrii nɛɛ hu mli afee amɛ kui loo jamɔ kui babaoo. Mɛi komɛi etu amɛhe amɛha hiɛnyiɛlɔ pɔtɛɛ ko, tamɔ Nichiren ni yɔɔ Japan lɛ, ni tsɔɔ akɛ Mahayanan Lotus Sutra lɛ pɛ mli Buddha tsɔɔmɔi pɔtɛɛ lɛ yɔɔ lɛ, kɛ Nun Ch’in-Hai ni yɔɔ Taiwan, ni mɛi pii nyiɛɔ esɛɛ lɛ. Sɔrɔto-feemɔ tsɔ ko bɛ Buddha jamɔ kɛ Kristendom kɛ ejamɔi kɛ jamɔ kui sɔrɔtoi lɛ ateŋ yɛ enɛ gbɛfaŋ. Yɛ anɔkwale mli lɛ ewaaa akɛ ooona gbɔmɛi ni kɛɔ akɛ amɛji Buddhafoi ni kɛ amɛhe ewo Tao jamɔ, Shinto jamɔ, blematsɛmɛi ajamɔ, kɛ Kristendom jamɔ nifeemɔi po mli.b Nɛkɛ Buddha jamɔ kui sɔrɔtoi nɛɛ fɛɛ kɛɔ akɛ amɛhemɔkɛyelii kɛ nifeemɔi damɔ Buddha tsɔɔmɔi anɔ.

Kɛntɛŋi Etɛ lɛ kɛ Buddha Ŋmalɛi Krokomɛi

34. Mɛni esa akɛ wɔha ahi wɔjwɛŋmɔ mli yɛ be mli ni wɔsusuɔ Buddha jamɔ mli tsɔɔmɔi lɛ ahe lɛ?

³⁴ Akɛ tsɔɔmɔi ni akɛɛ Buddha kɛba lɛ ha kɛtsɔ naabu kɛ wiemɔ pɛ nɔ, ni aje enɛɛmɛi aŋmalamɔ shishi yɛ be mli ni egbo sɛɛ afii ohai babaoo. No hewɔ lɛ, kɛ hoo lɛ, amɛyɛ akɛ nɔ ni esɛɛnyiɛlɔi ni yɔɔ sɛɛ mli yinɔi lɛ amli lɛ susu akɛ ewie ni efee. Agbɛnɛ nɔ ni haa enɛ feɔ hwanyaŋŋ lolo ji anɔkwale ni eji akɛ, no mli lɛ, Buddha jamɔ mli egbala ewo susumɔi babaoo mli lɛ. No hewɔ lɛ, ŋmalɛi sɔrɔtoi kɛ Buddha jamɔi ni yɔɔ sɔrɔtoi haa.

35. Te nɔ ni ji Buddhafoi aŋmalɛi krɔŋkrɔŋi lɛ ateŋ nɔ ni etsɛ fe fɛɛ lɛ?

³⁵ Aŋmala Buddha ŋmalɛi lɛ amli klɛŋklɛŋ nɔ lɛ yɛ Pali wiemɔ, ni akɛɛ ebɛŋkɛɔ Buddha maŋ wiemɔ diɛŋtsɛ he lɛ mli, yɛ aaafee klɛŋklɛŋ afii oha D.Ŋ.B. lɛ mli. Theravada kuu lɛ kpɛlɛɔ nɔ akɛ ŋmalɛi nɛɛ ji anɔkwale. Fɛɛ feɔ woji 31 ni abua naa awo kui etɛ mli ni atsɛɔ amɛ Tipitaka (Sanskrit, Tripitaka), eshishi ji “Kɛntɛŋi Etɛ,” loo “Naabuamɔi Etɛ.” Vinaya Pitaka (Tsɔsemɔ Kɛntɛŋ) lɛ tsuɔ mlai kɛ gbɛnaa nii kɛha hii kɛ yei mɔ kome shihilɔi lɛ pɛ he nii. Nɔ ni yɔɔ Sutta Pitaka (Wiemɔi kɛ Tsɔɔmɔ Kɛntɛŋ) lɛ mli ji shiɛmɔ wiemɔi, nɔkwɛmɔ nii kɛ abɛbuai ni Buddha kɛ ekaselɔi titrii lɛ kɛha. Yɛ naagbee lɛ, nɔ ni yɔɔ Abhidhamma Pitaka (Naagbee Tsɔɔmɔ Kɛntɛŋ) lɛ mli ji Buddha jamɔ mli tsɔɔmɔi ahe wiemɔi.

36. Mɛni ayɔseɔ yɛ Mahayana Buddha jamɔ mli ŋmalɛi lɛ ahe?

³⁶ Yɛ gbɛ kroko nɔ lɛ, Mahayana kuu lɛ mli niŋmai lɛ yɛ Sanskrit, Chinese, kɛ Tibet wiemɔi amli titri, ni efa babaoo diɛŋtsɛ. Nɔ ni yɔɔ Chinese wiemɔ mli lɛ pɛ fe kpoi 5,000. Saji ni bɛ shishijee nɔ lɛ mli, tamɔ Buddha sɔrɔtoi ni fa babaoo tamɔ Ganges faa lɛ naa shia, ni akɛɛ amɛhi shi afii akpekpei abɔ ni anyɛŋ akane, ni amɛteŋ mɔ fɛɛ mɔ kwɛɔ lɛ diɛŋtsɛ e-Buddha je lɛ nɔ lɛ awiemɔi babaoo yɔɔ mli. Ejeee sane ni awo he tsɔ akɛ niŋmalɔ ko aaakɛɛ akɛ “nɔ ni ayoo yɛ nɛkɛ niŋmalamɔi nɛɛ amli ji nibii sɔrɔtoi ni yɔɔ hwanyaŋŋ, yiŋsusumɔ ni yɔɔ hoo tsɔ, gbɔmɛi ni he gbɛi, kɛ saji amlitii ni shishinumɔ bɛ mli.”

37. Mɛɛ naagbai Mahayana niŋmaai lɛ kɛba? (Okɛto Filipibii 2:2, 3 he.)

³⁷ Taakɛ abaakpa gbɛ lɛ, gbɔmɛi fioo ko pɛ nyɛɔ amɛnuɔ nɛkɛ saji amlitsɔɔmɔ ni bɛ faŋŋ nɛɛ shishi. Nɔ ni ejɛ mli eba ji akɛ, nibii ni ba yɛ sɛɛ mli nɛɛ ejie Buddha jamɔ kɛjɛ nɔ ni Buddha yiŋtoo ji kɛjɛ shishijee lɛ he kɛtee shɔŋŋ. Taakɛ Vinaya Pitaka lɛ tsɔɔ lɛ, Buddha lɛ miisumɔ ni gbɔmɛi sɔrɔtoi fɛɛ anu shishi shi jeee kuu ni le woloŋ loo atsɔse amɛ lɛ pɛ. Yɛ enɛ hewɔ lɛ, ema nɔ mi akɛ atsɔɔ etsɔɔmɔi lɛ yɛ gbɔmɛi foji lɛ awiemɔi amli, jeee yɛ Hindu jamɔ wiemɔ krɔŋkrɔŋ ni egbo lɛ mli. No hewɔ lɛ kɛ Theravada Buddhafoi lɛ te shi wo akɛ woji nɛɛ fataaa ŋmalɛi ni akpɛlɛ nɔ lɛ ahe lɛ, Mahayana sɛɛnyiɛlɔi lɛ haa hetoo akɛ, klɛŋklɛŋ lɛ, Gautama ni ji Buddha lɛ tsɔɔ gbɔmɛi foji ni leee woloŋ lɛ anii, shi kɛha mɛi ni le woloŋ kɛ nilelɔi lɛ, ejie tsɔɔmɔi ni aŋmala yɛ sɛɛ mli yɛ Mahayana woji lɛ amli lɛ kpo etsɔɔ amɛ.

Karma kɛ Samsara Shibɔlemɔ ni Ato Naa Lɛ

38. (a) Kɛ akɛ Buddhafoi kɛ Hindubii atsɔɔmɔi to he lɛ mɛni anaa? (b) Mɛɛ jwɛŋmɔ Buddhafoi hiɛ yɛ susuma lɛ he ni akɛɔ kɛkɛ, kɛ agbɛnɛ hu nɔ ni atsuɔ he nii?

³⁸ Eyɛ amli akɛ Buddha jamɔ ha gbɔmɛi lɛ ye amɛhe kɛjɛ Hindu jamɔ gboklɛi lɛ amli kɛyashɛ he ko moŋ, shi eshishijee tsɔɔmɔi lɛ ka he eji gboshinii ni jɛ Hindu tsɔɔmɔi ni ji Karma kɛ samsara mli. Buddha jamɔ, taakɛ Buddha lɛ diɛŋtsɛ tsɔɔ kɛjɛ shishijee lɛ yɛ sɔrɔto yɛ Hindu jamɔ he, ejaakɛ ekpɛlɛɛɛ nɔ akɛ susuma ni gbooo yɛ, shi ewieɔ mɔ aŋkro lɛ he akɛ “gbɔmɔtsoŋ kɛ jwɛŋmɔŋ hewalɛi loo nyɛmɔi ni abua naa afee lɛ ekome.”c Ni kɛlɛ, etsɔɔmɔi lɛ ka he edamɔ jwɛŋmɔ ni ahiɛ akɛ gbɔmɛi fɛɛ miitsomlo kɛmiijɛ wala kome mli kɛmiiya ekroko mli kɛtsɔ fɔmɔ heei (samsara) babaoo ni anyɛŋ akane kɛ piŋmɔ ni jɛ tsutsu kɛ ŋmɛnɛŋmɛnɛ shihilɛ (Karma) mli lɛ anɔ. Eyɛ mli akɛ eshɛɛ sane ni tsɔɔ emuuyeli kɛ heyeli kɛmiijɛ nɛkɛ shibɔlemɔ ni ato naa nɛɛ mli lɛ baanyɛ atamɔ nɔ ko ni asumɔɔ moŋ, shi mɛi komɛi biɔ akɛ: Mɛɛ anɔkwale yɔɔ nɛkɛ tsɔɔmɔ nɛɛ mli? Mɛɛ odaseyeli yɔɔ ni tsɔɔ akɛ piŋmɔi fɛɛ jɛ mɔ ko nifeemɔ yɛ tsutsu wala shihilɛ mli lɛ mli? Ni yɛ anɔkwale mli lɛ, mɛɛ odaseyeli yɔɔ ni tsɔɔ akɛ tsutsu shihilɛ ko ni eho yɛ?

39. Te Buddhafoi aniŋmaa ko tsɔɔ Karma mla lɛ mli ehaa tɛŋŋ?

³⁹ Karma mla lɛ mlitsɔɔmɔ kome kɛɔ akɛ:

“Kamma [Pali nɔ ni kɛ Karma yeɔ egbɔ] ji mla diɛŋtsɛ. Shi no etsɔɔɔ akɛ esa akɛ mlahalɔ ahi shi. Mlahalɔ he ehiaaa adebɔɔ mli mlai ni yɔɔ daa lɛ, tamɔ hewalɛ ni gbalaa nii lɛ nɛkɛ. Nakai nɔŋŋ Karma mla lɛ hu biii mlahalɔ ko. Etsuɔ nii yɛ eshihilɛ mli ni hewalɛ ko ni jɛ sɛɛ gbɛ, ni hiɛ ehe kɛ ehe wooo mli.”—A Manual of Buddhism.

40. (a) Adebɔɔ mlai ni yɔɔ lɛ tsɔɔ mɛni? (b) Mɛni Biblia lɛ kɛɔ yɛ nifeemɔ kɛ nɔ ni jɛɔ nakai nifeemɔ lɛ mli baa lɛ he?

⁴⁰ Ani jwɛŋmɔ yɛ susumɔ nɛɛ mli? Ani mlahalɔ he ehiaaa adebɔɔ mli mlai lɛlɛŋ? Osramaŋi ahe nilelɔ, Dr. Wernher von Braun kɛɛ be ko akɛ: “Adebɔɔ mlai ni yɔɔ jeŋ muu fɛɛ lɛ yɛ pɛpɛɛpɛ akɛ ewaaa kɛhaaa wɔ akɛ wɔɔfee ŋwɛiniiaŋ lɛlɛ ni baaya nyɔŋtsere lɛ nɔ, ni wɔbaanyɛ wɔkɛ hiŋmɛitswaa fa ko mli be-buu atsɔɔ he ni eshɛ pɛpɛɛpɛ. Mɔ ko ji mɔ ni to nɛkɛ mlai nɛɛ emamɔ shi.” Biblia lɛ hu wieɔ mla ni kɔɔ nɔ ni afeɔ kɛ nɔ ni jɛɔ mli baa lɛ he. Ekɛɔ wɔ akɛ, “Nyɔŋmɔ lɛ, aliii lɛ yaka. Ejaakɛ nɔ pɛ ni gbɔmɔ duɔ lɛ, no nɔŋŋ ebaakpa hu.” (Galatabii 6:7) Ni eeekɛɛ akɛ mla nɛɛ biii mlahalɔ lɛ, etsɔɔ akɛ “Nyɔŋmɔ lɛ aliii lɛ yaka,” ni tsɔɔ akɛ mla nɛɛ Feelɔ, Yehowa, ji mɔ ni kɛba.

41. (a) Kɛ akɛ Karma mla lɛ to saneyeli hei amla he lɛ mɛni abaana? (b) Okɛ sɔrɔto-feemɔ ni ka Karma kɛ Biblia lɛ shiwoo teŋ lɛ ato he ni akwɛ.

⁴¹ Kɛfata he lɛ Biblia lɛ kɛɔ wɔ akɛ, “esha dɛŋ nyɔmɔwoo lɛ gbele ni,” ni “mɔ ni egbo lɛ, abu lɛ bem kɛjɛ esha lɛ mli.” Saneyeli hei po yɔseɔ akɛ esaaa akɛ mɔ ko naa nɔ shii enyɔ yɛ efɔŋ ko ni efee he. Belɛ mɛni hewɔ esa akɛ aku sɛɛ afɔ mɔ ni ewo ehe eshai ahe nyɔmɔ momo kɛtsɔ egbele nɔ lɛ ekoŋŋ koni ebana amanehulu kroko yɛ etsutsu nifeemɔi ahewɔ? Agbɛnɛ hu, kɛ mɔ ko leee nɔ ni efee yɛ etsutsu shihilɛ mli ni no hewɔ agbalaa etoi lɛ, te mɔ lɛ aaafee tɛŋŋ atsake etsui ni eya ehiɛ yɛ gbɛ kpakpa nɔ lɛ? Ani abaanyɛ abu enɛ akɛ jalɛsaneyeli? Ani enɛ kɛ mɔbɔnalɛ ni akɛɛ no ji Buddha lɛ su titri lɛ kpaa gbee? Nɔ ni tamɔɔɔ nakai lɛ, beni Biblia lɛ kɛɛ akɛ “esha dɛŋ nyɔmɔwoo lɛ gbele ni” sɛɛ lɛ, etee nɔ ekɛɛ: “Shi Nyɔŋmɔ duromɔ keenɔ lɛ naanɔ walaŋ, yɛ Kristo Yesu, wɔ-Nuŋtsɔ lɛ mli.” Hɛɛ, ewoɔ shi akɛ Nyɔŋmɔ baajie fitemɔ, esha kɛ gbele fɛɛ kɛya, ni ekɛ heyeli kɛ emuuyeli baaba kɛha adesai fɛɛ.—Romabii 6:7, 23; 8:21; Yesaia 25:8.

42. Te Buddhanyo woloŋlelɔ ko tsɔɔ mɔ fɔmɔ ekoŋŋ lɛ mli eha tɛŋŋ?

⁴² Kɛha fɔmɔ ekoŋŋ lɛ, naa emlitsɔɔmɔ ko ni Buddhanyo woloŋlelɔ, Dr. Walpola Rahula kɛha:

“Gbɔmɔ ni yɔɔ lɛ jeee nɔ ko nɔ ko shi moŋ eji gbɔmɔtsoŋ kɛ jwɛŋmɔŋ hewalɛi loo nyɛmɔi ni abua naa afee lɛ ekome. Nɔ ni wɔtsɛɔ lɛ akɛ gbele lɛ ji gbɔmɔtso lɛ ni kpaa nitsumɔ kwraa. Ani nɛkɛ hewalɛi kɛ nyɛmɔi nɛɛ fɛɛ kpaa nitsumɔ kwraa kɛ gbɔmɔtso ni ekpa nitsumɔ lɛ? Buddha jamɔ kɛɔ akɛ ‘Dabi.’ Suɔmɔnaa nii, nɔ ni mɔ sumɔɔ akɛ efee, akɔnɔ, shwe ni ashweɔ shihilɛ, ni aya nɔ afee babaoo lɛ ji hewalɛ kpele ni tsirɛɔ wala fɛɛ, kɛ shihilɛi fɛɛ, ni etsirɛɔ jeŋ muu lɛ fɛɛ po. Enɛ ji hewalɛ ni da fe fɛɛ, nyɛmɔ ni da fe fɛɛ yɛ je lɛ mli. Taakɛ Buddha jamɔ tsɔɔ lɛ, nɛkɛ hewalɛ nɛɛ kpaaa kɛji gbɔmɔtso lɛ kpa nitsumɔ, ni ji gbele; shi moŋ eyaa nɔ ejieɔ ehe kpo yɛ su kroko mli, ekɛ shihilɛ ekoŋŋ ni atsɛɔ lɛ fɔmɔ ekoŋŋ baa.”

43. (a) Yɛ wala shishijee naa lɛ, te atoɔ nibii ni feɔ mɔ ko wala yibii lɛ ahe gbɛjianɔ ahaa tɛŋŋ? (b) Mɛɛ “odaseyeli” akɛhaa ni akɛmiifi mɔ fɔmɔ ekoŋŋ lɛ sɛɛ yɛ bei komɛi amli? (d) Ani mɔ fɔmɔ ekoŋŋ he “odaseyeli” nɛɛ kɛ daa gbi niiashikpamɔ kpaa gbee?

⁴³ Kɛ aŋɔ mɔ ko hɔ pɛ lɛ, mɔ lɛ naa nibii ni feɔ ewala yibii loo genes lɛ mli oha mlijaa 50 kɛjɛɔ efɔlɔi enyɔ lɛ ateŋ mɔ fɛɛ mɔ ŋɔɔ. No hewɔ lɛ gbɛ ko bɛ ni eeetsɔ nɔ efee oha mlijaa 100 tamɔ mɔ ni ehi tsutsu shihilɛ mli. Yɛ anɔkwale mli lɛ, jeŋ nilee shishitoo mla ko bɛ ni ale ni baanyɛ afi fɔmɔ ekoŋŋ ni yaa nɔ lɛ sɛɛ. Yɛ bei babaoo mli lɛ, akɛ mɛi ni heɔ fɔmɔ ekoŋŋ tsɔɔmɔ lɛ amɛyeɔ lɛ kɛ mɛi komɛi ni kɛɔ akɛ amɛkaiɔ hiɛi, nibii komɛi ni ba, kɛ hei komɛi ni amɛleee tsutsu lɛ aniiashikpamɔ tsuɔ nii akɛ enɛ he odaseyeli. Ani sane-naatsɔɔmɔ ni ja nɛ? Kɛ aaakɛɛ akɛ mɔ ni baanyɛ agba nibii ni ba yɛ bei ni eho lɛ amli lɛ ahe saji lɛ hi shi yɛ nakai bei lɛ amli lɛ, belɛ abaanyɛ akɛɛ hu akɛ mɔ ni baanyɛ agba wɔsɛɛ be mli saji—ni mɛi pii kɛɔ akɛ amɛfeɔ nakai—lɛ hu ehi shi yɛ wɔsɛɛ be mli. Shi eka shi faŋŋ akɛ jeee nɛkɛ sane lɛ ji.

44. Okɛ Biblia lɛ tsɔɔmɔ ni kɔɔ “mumɔ” he lɛ ato Buddha jamɔ mli tsɔɔmɔ ni ji mɔ fɔmɔ ekoŋŋ lɛ he ni akwɛ.

⁴⁴ Biblia lɛ wie wala-hewalɛ ko he, nɔ ni fe afii 400 dani Buddha lɛ ba. Beni etsɔɔ nɔ ni baa yɛ mɔ ko gbele mli lɛ, ekɛɛ: “Ni su lɛ aaaku esɛɛ aya shikpɔŋ bɔ ni eyɔɔ lɛ nɔŋŋ, ni mumɔ lɛ aaaku esɛɛ aya Nyɔŋmɔ ni ŋɔ-ha lɛ ŋɔɔ.” (Jajelɔ 12:7) Atsɔɔ wiemɔ “mumɔ” lɛ shishi kɛjɛ Hebri wiemɔ ruʹach mli, ni eshishi ji wala-hewalɛ ni kanyaa bɔɔnii ni yɔɔ wala mli, gbɔmɛi kɛ kooloi fɛɛ. (Jajelɔ 3:18-22) Shi sɔrɔtofeemɔ ni he hiaa lɛ ji akɛ, ruʹach lɛ ji hewalɛ ko ni bɛ gbɔmɔtso; ebɛ lɛ diɛŋtsɛ esuɔmɔnaa nii ni enyɛɛɛ ehiɛ mɔ ni egbo lɛ su kɛ baŋ loo esui krokomɛi. Enyɛɛɛ eshi mɔ kome mli kɛya mɔ kroko mli yɛ gbele mli, shi moŋ ‘ekuɔ esɛɛ eyaa Nyɔŋmɔ ni ŋɔ-ha lɛ ŋɔɔ.’ Yɛ gbɛ kroko nɔ lɛ, gbɔmɔ lɛ wɔsɛɛ be shihilɛ gbɛkpamɔi—gbohiiashitee he hiɛnɔkamɔ—fɛɛ yɛ Nyɔŋmɔ dɛŋ.—Yohane 5:28, 29; Bɔfoi lɛ Asaji 17:31.

Nirvana—Nine ni Aaashɛ nɔ ni Nine Shɛɛɛ nɔ lɛ Nɔ?

45. Te Buddhafoi tsɔɔ Nirvana shishi amɛhaa tɛŋŋ?

⁴⁵ Enɛ kɛ wɔ baa Buddha lɛ tsɔɔmɔ ni kɔɔ emuuyeli kɛ yiwalaheremɔ he lɛ nɔ. Yɛ Buddhafoi awiemɔ mli lɛ, yiwalaheremɔ he jwɛŋmɔ titri ji heyeli kɛmiijɛ Karma kɛ samsara mlai amli, kɛ agbɛnɛ hu Nirvana ni nine aaashɛ nɔ. Ni mɛni ji Nirvana? Buddha jamɔ mli ŋmalɛi kɛɔ akɛ anyɛŋ atsɔɔ bɔ ni eji loo atsɔɔ mli shi abaanyɛ abote mli kɛkɛ. Ejeee ŋwɛi ni mɔ ko yaa yɛ gbele sɛɛ shi nɔ ko ni nine shɛɔ nɔ, nii ni mɔ fɛɛ mɔ nine baanyɛ ashɛ nɔ, yɛ biɛ kɛ bianɛ. Akɛɛ wiemɔ lɛ diɛŋtsɛ shishi ji “ni aaafili ni egbo.” No hewɔ lɛ, mɛi komɛi tsɔɔ Nirvana mli akɛ tsinebaai kɛ akɔnɔi fɛɛ asɛɛfoo; shihilɛ ni mɔ eye ehe kɛjɛ henumɔi fɛɛ tamɔ, piŋmɔ, gbeyeishemɔ, taomɔ, suɔmɔ, loo hetsɛ̃ mli; naanɔ toiŋjɔlɛ, hejɔɔmɔ, kɛ tsakemɔ ni bɛ shihilɛ ko mli. Titri lɛ akɛɛ eji mɔ aŋkro lɛ shihilɛ ni sɛɛ foɔ.

46, 47. (a) Taakɛ Buddhafoi atsɔɔmɔ ji lɛ, mɛni ji yiwalaheremɔ jɛɛhe? (b) Mɛni hewɔ Buddhafoi ajwɛŋmɔ yɛ yiwalaheremɔ jɛɛhe he lɛ kɛ shihilɛ mli niiashikpamɔ kpaaa gbee lɛ?

⁴⁶ Buddha lɛ tsɔɔ akɛ, emuuyeli kɛ yiwalaheremɔ—Nirvana emuuyeli lɛ—baaa kɛjɛɛɛ Nyɔŋmɔ loo hewalɛ ko ni yɔɔ sɛɛ gbɛ lɛ ŋɔɔ, shi moŋ ebaa kɛjɛɔ mɔ lɛ diɛŋtsɛ mli kɛtsɔ lɛ diɛŋtsɛ emɔdɛŋbɔɔ yɛ nitsumɔi kpakpai kɛ susumɔi ni ja nɔ. Enɛ teeɔ sanebimɔ nɛɛ shi: Ani nɔ ko ni yeɔ emuu baanyɛ aba kɛjɛ nɔ ko ni yeee emuu mli? Ani wɔ diɛŋtsɛ wɔ niiashikpamɔ ekɛɛɛ wɔ, taakɛ Hebri gbalɔ Yeremia kɛɛ lɛ, akɛ “gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifamɔi eha lɛ, ebɛ edɛŋ”? (Yeremia 10:23) Kɛji akɛ mɔ ko mɔ ko bɛ ni nyɛɔ ekudɔɔ loo eyeɔ eshihilɛ nɔ kwraa kɛmɔɔ shi yɛ daa gbi shihilɛ mli nibii bibii po mli lɛ, ani eji sane naatsɔɔmɔ ni ja akɛ aaasusu akɛ mɔ fɛɛ mɔ baanyɛ atsu lɛ diɛŋtsɛ enaanɔ yiwalaheremɔ he nii ekome pɛ?—Lala 146:3, 4.

⁴⁷ Taakɛ bɔ ni enyɛŋ eba akɛ gbɔmɔ ni enyɔ ŋmɔtɔ bu ni miɔ mɔ mli lɛ kome aaanyɛ aje mli lɛ, nakai nɔŋŋ hu adesai fɛɛ eka esha kɛ gbele mli, ni amɛteŋ mɔ ko nyɛŋ ajie ehe kɛjɛ nɔ ko ni tamɔ yaa ni ebala wɔ nɛɛ mli. (Romabii 5:12) Ni kɛlɛ, Buddha lɛ tsɔɔ akɛ yiwalaheremɔ damɔ mɔ ko mɔdɛŋbɔɔ pɛ nɔ. Eŋaawoo ni ekɛha ekaselɔi lɛ beni ekɛ amɛ gbalaa mli lɛ ji, “nyɛkɛ nyɛhe afɔa nyɛ diɛŋtsɛ nyɛhe nɔ, ni nyɛkɛ nyɛhe akafɔa yelikɛbuamɔ ni jɛ he kroko nɔ; nyɛmɔa anɔkwale lɛ mli kpɛŋŋ tamɔ kane loo la; nyɛtaoa yiwalaheremɔ kɛjɛa anɔkwale lɛ pɛ mli; nyɛkataoa yelikɛbuamɔ kɛmiijɛ mɔ kroko dɛŋ ja nyɛ pɛ.”

Emuuyeli aloo Aye He Kɛjɛ Susumɔ ni Ejaaa Mli?

48. (a) Te wolo ko tsɔɔ nɔ ni ejɛ Buddha jamɔ mli susumɔi ni yɔɔ hwanyaŋŋ tamɔ Nirvana lɛ mli eba lɛ mli ehaa tɛŋŋ? (b) Mɛni ejɛ miishɛɛ ni ana yɛ Buddha jamɔ mli tsɔɔmɔi ahe nyɛsɛɛ nɛɛ yɛ hei komɛi lɛ mli eba?

⁴⁸ Mɛni ejɛ tsɔɔmɔ ni tamɔ nɛkɛ mli eba? Ani ekanyaa mɛi ni heɔ yeɔ lɛ kɛyaa anɔkwa hemɔkɛyeli kɛ hetuu-kɛhamɔ mli? Wolo ni ji Living Buddhism lɛ bɔɔ amaniɛ akɛ Buddhafoi amaji komɛi yɛ ni “osɔfoi mɔ kome shihilɔi lɛ susuuu amɛjamɔ lɛ mli nibii ni yɔɔ nyam lɛ ahe tsɔ dɔŋŋ po. Asusuɔ Nirvāna ni nine aaashɛ nɔ lɛ he babaoo akɛ hiɛnyam taomɔ ni jwɛŋmɔ kɛ shishinumɔ bɛ mli, ni amɛfɔɔɔ nɔ̃ nɔjwɛŋmɔ lɛ he nitsumɔ. Yɛ Tipitaka lɛ kasemɔ ni jɛɔ nɔ kome nɔ kɛyaa nɔ kroko nɔ lɛ sɛɛ lɛ, amɛkɛ amɛhe tsɔɔ akɛ mɛi ni feɔ ejurɔ ni ehe gbɛi yɛ gbɔmɛi lɛ ateŋ.” Nakai nɔŋŋ hu yɛ be mli ni World Encyclopedia (Japan nɔ) lɛ wieɔ Buddha jamɔ mli tsɔɔmɔi ahe miishɛɛ babaoo ni ana nyɛsɛɛ nɛɛ lɛ he lɛ, ekɛɛ: “Yɛ be mli ni atoɔ gbɛjianɔ akaseɔ Buddha jamɔ diɛŋtsɛ babaoo lɛ, babaoo hu ní ejeɔ eshishijee yiŋtoo—akɛ akudɔ loo atsɔɔ gbɔmɛi lɛ agbɛ lɛ he ji no. Yɛ jwɛŋmɔ nɛɛ hewɔ lɛ, Buddha jamɔ he nikasemɔ tridii ni yaa nɔ nyɛsɛɛ nɛɛ lɛ etsɔɔɔ hemɔkɛyeli ko ni hiɛ ka ni aatee lɛ shi ekoŋŋ. Shi moŋ esa akɛ ayɔse akɛ, kɛ oti ni ma jamɔ ko hiɛ lɛ batsɔ jeŋ nilee he susumɔ ni yɔɔ hwanyaŋŋ lɛ, belɛ eshihilɛ diɛŋtsɛ akɛ hemɔkɛyeli ko lɛ miilaaje ehewalɛ lɛ.”

49. Buddha jamɔ ebatsɔ mɛni, kɛha mɛi pii?

⁴⁹ Shishijee Buddha tsɔɔmɔ ji akɛ nilee kɛ sane sɛɛyoomɔ kɛ emuuyeli kɛ yiwalaheremɔ baa. Shi nɔ ni Buddha jamɔ nikasemɔ kui sɔrɔtoi lɛ atsɔɔmɔi ni yɔɔ hwanyaŋŋ lɛ kɛba pɛ ji shihilɛ ni atsi ta yɛ yiteŋgbɛ nɛɛ ni “jwɛŋmɔ kɛ shishinumɔ bɛ mli,” ni heyelilɔi pii nyɛɛɛ anu shishi lɛ. Kɛha amɛ lɛ, aba Buddha jamɔ shi kɛbashɛ he ni afeɔ ejurɔ ni adiɔ kusum-nifeemɔi fioo ko kɛ gbɛnaa nii komɛi ni waaa sɛɛ. Ehaaa shihilɛ mli sanebimɔi ni futuɔ mɔ jwɛŋmɔ lɛ ahetoo, tamɔ: Nɛgbɛ wɔba kɛjɛ? Mɛni hewɔ wɔyɔɔ biɛ? Kɛ mɛni ji gbɔmɔ kɛ shikpɔŋ lɛ wɔsɛɛ be?

50. Mɛɛ sanebimɔ baa jwɛŋmɔ mli yɛ Buddhafoi anɔkwafoi komɛi aniiashikpamɔi ahewɔ? (Okɛto Kolosebii 2:8 he.)

⁵⁰ Buddhafoi anɔkwafoi komɛi eyoo yiŋfutumɔ kɛ jwɛŋmɔ ni ejaaa ni amɛna ni jɛ tsɔɔmɔi ni yɔɔ hwanyaŋŋ lɛ kɛ Buddha jamɔ mli kusum-nifeemɔ ni tamɔ jatsu ni atsuɔ he nii ŋmɛnɛ lɛ mli lɛ. Ekolɛ gbɔmɛi ashihilɛ hiɛyaa he mɔdɛŋ ni Buddha jamɔ mli kui kɛ naanyobɔɔi ni yɔɔ maji komɛi amli lɛ bɔɔ lɛ kɛ heyeli kɛmiijɛ nɔnaa kɛ piŋmɔ mli ebaha mɛi pii. Shi akɛ anɔkwa emuuyeli kɛ heyeli jɛɛhe kɛha mɛi fɛɛ lɛ, ani Buddha jamɔ ehi shi yɛ eshiwoo lɛ naa?

Emuuyeli ni Nyɔŋmɔ Bɛ Mli?

51. (a) Mɛni sane kuku ko ni yɔɔ miishɛɛ kɛɔ yɛ Buddha lɛ tsɔɔmɔi ahe? (b) Mɛni ni he hiaa anaa akɛ elaaje yɛ Buddha lɛ tsɔɔmɔi amli? (Okɛto 2 Kronika 16:9; Lala 46:2; 145:18 he.)

⁵¹ Buddha lɛ shihilɛ he saji lɛ gbaa akɛ, be ko lɛ ekɛ ekaselɔi lɛ yɛ koo ko mli. Ni ekɔlɔ baai ewo edɛ kɔkɔ obɔ ni ekɛɛ ekaselɔi lɛ akɛ: “Abaanyɛ akɛ nii ni mitsɔɔ nyɛ lɛ ato baai ni yɔɔ midɛŋ nɛɛ ahe, abaanyɛ akɛ nii ni mitsɔko nyɛ lɛ ato baai ni yɔɔ koo nɛɛ mli lɛ fɛɛ he.” Nɔ ni etsɔɔ ji akɛ, Buddha lɛ etsɔɔ nii ni ele lɛ he nɔ ko bibioo ko kɛkɛ. Shi, nɔ kome ko yɛ ni he hiaa ni ashi—Gautama ni ji Buddha lɛ bɛ nɔ ko kwraa ni ebaawie yɛ Nyɔŋmɔ he; ni asaŋ ekɛɛɛ akɛ eji Nyɔŋmɔ hu. Yɛ anɔkwale mli lɛ, akɛɛ ekɛɛ ekaselɔi lɛ akɛ, “Kɛ Nyɔŋmɔ ko yɛ lɛ, anyɛŋ ahe aye akɛ E-baasusu midaa gbi shihilɛ he,” ni “nyɔŋmɔi komɛi bɛ ni baanyɛ loo amɛbaaye amɛbua gbɔmɔ.”

52. (a) Te Buddha jamɔ susuɔ Nyɔŋmɔ he ehaa tɛŋŋ? (b) Buddha jamɔ eku ehiɛ eshwie mɛni nɔ?

⁵² Yɛ shishinumɔ nɛɛ naa lɛ, gbɛfaŋnɔ ni Buddha jamɔ naa yɛ anɔkwa Nyɔŋmɔ lɛ sɛɛ gbɛ ni gbɔmɛi taoɔ lɛ mli lɛ bafeɔ fioo ko pɛ. The Encyclopedia of World Faiths lɛ kɛɛ akɛ “etamɔ nɔ ni mra be mli Buddha jamɔ susuuu sane ni kɔɔ Nyɔŋmɔ he lɛ he, ni eka shi faŋŋ akɛ enɛ efeee tsɔɔmɔ loo ni eeebi ni ana Nyɔŋmɔ mli hemɔkɛyeli.” Yɛ sane nɔ mi ni emaa akɛ mɔ fɛɛ mɔ atao yiwalaheremɔ eha lɛ diɛŋtsɛ ehe, ni etsɔ ehiɛ eha emligbɛ ni ekwɛ lɛ diɛŋtsɛ ejwɛŋmɔ loo ehiɛ ni aaahi ehe nɔ kɛha emuuyeli lɛ mli lɛ, belɛ Buddha jamɔ leee diɛŋtsɛ akɛ Nyɔŋmɔ yɛ, kɛ jeee Nyɔŋmɔ nɔ po eheee eyeee lɛ. (Kwɛmɔ akrabatsa lɛ, baafa 145.) Yɛ be mli ni Buddha jamɔ bɔɔ mɔdɛŋ ni eshɛrɛ Hindu jamɔ mli apasa hemɔkɛyeli gbokɛlɛi lɛ kɛ blema saji amli nyɔŋmɔi babaoo ni futuɔ mɔ jwɛŋmɔ lɛ eshwie lɛ, eyafee keketee kwraa moŋ yɛ afa gbɛ. Eku ehiɛ eshwie shishijee tsɔɔmɔ ni kɔɔ Nyɔŋmɔ Ofe lɛ he, mɔ ni esuɔmɔnaa nɔ fɛɛ nɔ yɔɔ ni etsiɔ ehe lɛ nɔ.—Bɔfoi lɛ Asaji 17:24, 25.

53. Mɛni abaanyɛ awie yɛ emuuyeli ni ataoɔ ni Nyɔŋmɔ bɛ mli lɛ he? (Okɛto Abɛi 9:10; Yeremia 8:9 he.)

⁵³ Yɛ nɛkɛ mɔ pɛ he susumɔ kɛ heyeli gbɛ ni atsɔɔ nɔ ajwɛŋɔ nɛɛ hewɔ lɛ, nɔ ni ejɛ mli eba ji blema gbɔmɛi ahe blema saji ni amɛshishinumɔ wa diɛŋtsɛ, blema saji loo adesãi, tsɔɔmɔi ni yɔɔ hwanyaŋŋ, kɛ shishitsɔɔmɔi ni mɛi ni hiɛ jwɛŋmɔi sɔrɔtoi kɛ jamɔ kui sɔrɔtoi babaoo lɛ kɛba yɛ afii ohai abɔ lɛ amli. Nɔ ni asusu akɛ kulɛ ekɛ shihilɛ mli naagbai ni yɔɔ hwanyaŋŋ lɛ anaa tsabaa ni yɔɔ mlɛo baaba lɛ, nɔ ni ejɛ mli eba moŋ ji jamɔ kɛ jeŋ nilee mli gbɛjianɔtoo ni gbɔmɛi pii nyɛɛɛ anu shishi loo ana naa. Nɔ ni mɛi ni nyiɛɔ Buddha jamɔ sɛɛ kɛkɛ lɛ kɛ amɛhe ewo mli ji wɔji kɛ amagai kɛ gbohii ahe nibii, nyɔŋmɔi kɛ daimonioi, mumɔi kɛ blematsɛmɛi ajamɔ, kɛ kusum-mifeemɔi kɛ nifeemɔi krokomɛi babaoo asɛɛdii ni kɔɔɔ nɔ ni Gautamɔ ni ji Buddha lɛ tsɔɔ lɛ he nɔ ko kwraa. Eka shi faŋŋ akɛ emuuyeli ni ataoɔ ni Nyɔŋmɔ bɛ mli lɛ nyɛɛɛ nɔ ko afee.

54. Mɛɛ Bokagbɛ jamɔ he nilelɔi krokomɛi atsɔɔmɔi abaasusu he yɛ enɛ sɛɛ?

⁵⁴ Aaafee be kometoo lɛ nɔŋŋ mli ni Gautama ni ji Buddha lɛ taoɔ emuuyeli gbɛ lɛ, no mli lɛ jeŋ nilelɔi enyɔ ni amɛtsɔɔmɔ bana gbɔmɛi akpekpei abɔ shihilɛ nɔ hewalɛ hu yɛ wala mli yɛ Asia shikpɔŋ wulu lɛ fa ko nɔ. Amɛji Lao-tzu kɛ Konfushio, blema nilelɔi enyɔ ni Chinabii ayinɔi babaoo kɛ mɛi krokomɛi kɛ woo haa amɛ lɛ. Mɛni ji amɛtsɔɔmɔ, ni mɛɛ gbɛ nɔ amɛna Nyɔŋmɔ sɛɛ gbɛ ni gbɔmɔ taoɔ lɛ nɔ hewalɛ yɛ? Enɛ ji nɔ ni wɔbaasusu he yɛ yitso ni nyiɛ sɛɛ lɛ mli.

[Shishigbɛ niŋmai]

[Akrabatsa ni yɔɔ baafa 139]

Buddha lɛ Anɔkwalei Wuji Ejwɛ Lɛ

Buddha lɛ tsɔɔ eshishijee tsɔɔmɔi lɛ amli yɛ nɔ ni atsɛɔ lɛ Anɔkwalei Wuji Ejwɛ lɛ mli. Wɔmiitsɛ wiemɔ sɛɛ kɛmiijɛ Dhammacakkappavattana Sutta (Jalɛ Maŋtsɛyeli lɛ Shishitoo), ni T. W. Rhys Davids tsɔɔ shishi lɛ mli:

▪ “O Bhikkui, agbɛnɛ enɛ ji anɔkwale wulu ni kɔɔ piŋmɔ he. Piŋmɔ fata fɔmɔ he, piŋmɔ yɛ fitemɔ mli, piŋmɔ yɛ hela mli, piŋmɔ yɛ gbele mli. Piŋmɔ yɛ ekome ni akɛ nɔ ni eŋɔɔɔ lɛ aaafee mli, piŋmɔ yɛ nɔ ni ŋɔɔ ni atsiɔ he kɛjɛɔ he lɛ mli; ni tsinebaa fɛɛ ni tsui enyɔɔɔ mɔ mli yɛ he lɛ, no hu piŋmɔ ni. . . .

▪ “O Bhikkui, agbɛnɛ enɛ ji anɔkwale wulu ni kɔɔ piŋmɔ shishijee he. Lɛlɛŋ eji, akɛ kumai ni yeɔ mɔ, ni haa ahiɔ shi ekoŋŋ, ni bɔlɛnamɔ mli miishɛɛnamɔ fata he, ni aatao miishɛɛ agbɛnɛ yɛ biɛ, agbɛnɛ yɛ jɛmɛ—ni ji akɛ, ni aatao agbe akɔnɔi, aloo aashwe wala, aloo aashwe omanyeyeli. . . .

▪ “O Bhikkui, agbɛnɛ enɛ ji anɔkwale wulu ni kɔɔ piŋmɔ hiɛkpatamɔ he. Lɛlɛŋ, no ji hiɛkpatamɔ, ní nɛkɛ kumai nɛɛ he akɔnɔ ko bɛ dɔŋŋ; nɔ ni akɛfɔɔ shi, nɔ ni ajieɔ ashɛrɛɔ ashwieɔ, mɔ lɛ ni eye ehe, kumai nɛɛ he akɔnɔ ni bɛ dɔŋŋ. . . .

▪ “O Bhikkui, agbɛnɛ enɛ ji anɔkwale wulu ni kɔɔ gbɛ ni kɛ mɔ yaa awerɛho hiɛkpatamɔ he lɛ he. Lɛlɛŋ, no ji gbɛ wulu ni bɔ he kpaanyɔ nɛɛ; ni ji akɛ: susumɔi kpakpai; taomɔ nii kpakpai; wiemɔ kpakpa; jeŋba kpakpa; shihilɛ kpakpa; mɔdɛŋbɔɔ kpakpa; jwɛŋmɔ kpakpa; kɛ nɔ he jwɛŋmɔ kpakpa.”

[Akrabatsa ni yɔɔ baafa 145]

Buddha Jamɔ kɛ Nyɔŋmɔ

“Buddha jamɔ tsɔɔ gbɛ ni kɛ mɔ yaa ejurɔfeemɔ kɛ nilee yɛ emuuyeli mli lɛ he ni Nyɔŋmɔ diɛŋtsɛ ko ni yɔɔ bɛ mli; nilee ni nɔ kwɔ fe fɛɛ ni ‘kpojiemɔ’ bɛ mli; . . . kpɔmɔ ni aaanyɛ aba ni kpɔlɔ najiaŋdamɔlɔ ko bɛ, yiwalaheremɔ ni mɔ fɛɛ mɔ ji lɛ diɛŋtsɛ eyiwalaherelɔ.”—The Message of Buddhism, ni Bhikkhu Subhadra lɛ ŋma, ni atsɛ sɛɛ yɛ What Is Buddhism? mli.

Belɛ ani Buddhafoi heee Nyɔŋmɔ nɔ amɛyeee? Wolro, What Is Buddhism? ni Buddhist Lodge, London, ŋma lɛ haa hetoo akɛ: “Kɛji akɛ nyɛkɛ nakai wiemɔ lɛ miitsɔɔ mɔ ni kpooɔ Nyɔŋmɔ diɛŋtsɛ ni yɔɔ lɛ he jwɛŋmɔ lɛ, belɛ nakai wɔji.” Kɛkɛ ni etee nɔ ekɛɛ: “Jwɛŋmɔ ni miida lɛ baanyɛ anu Jeŋ Muu Fɛɛ he susumɔ ni Mla ni haa hetoo kudɔɔ lɛ lɛ shishi yɛ gbɛ ni waaa nɔ, taakɛ ebaanyɛ enu Mɔ ko ni yɔɔ shɔŋŋ ni enyɛŋ ena lɛ kɔkɔɔkɔ, ni he ni ehiɔ lɛ eleee, ni yɛ be ko mli lɛ ejɛ nii ni bɛ mli ebɔ Jeŋ Muu Fɛɛ ni nɔ ni egbɛ eshwa mli fɛɛ ji hetsɛ̃, jalɛsane ni ayeee, hegbɛi ni yeee egbɔ, kɛ piŋmɔ kɛ béi ni bɛ naagbee lɛ shishi lɛ.”

No hewɔ lɛ kɛ aaawie kɛkɛ lɛ, Buddha jamɔ fiii Nyɔŋmɔ loo Bɔlɔ ko mli hemɔkɛyeli sɛɛ. Shi anaa Buddha jamɔ sɔlemɔtsui kɛ stupai sɔrɔtoi ŋmɛnɛ yɛ nɔ ni miihe ashɛ maji fɛɛ ni adiɔ Buddha jamɔ sɛɛ yɛ jɛmɛ lɛ amli, ni Buddhai sɔrɔtoi ahe amagai kɛ amɛgbohii ahe nibii kɛ Bodhisattvai sɔrɔtoi etsɔmɔ nibii ni Buddha jalɔi ni amɛtuu amɛhe amɛha waa lɛ sɔleɔ amɛhaa, ni amɛshaa afɔlei amɛhaa ni amɛjaa. Buddha lɛ, ni ekɛɛɛ gbi ko gbi ko akɛ eji Nyɔŋmɔ lɛ, ebatsɔ nyɔŋmɔ ko diɛŋtsɛ yɛ wiemɔ lɛ diɛŋtsɛ shishinumɔ naa.

[Map on page 142]

(For fully formatted text, see publication)

Beni shɛɔ afii ohai kpawo Ŋ.B. lɛ, Buddha jamɔ ejɛ India egbɛ eshwa Asia bokagbɛ fɛɛ

INDIA

Benares

Buddh Gaya

AFII OHAI 3 D.Ŋ.B. SRI LANKA

1 AFII OHA Ŋ.B. CHINA

AFII OHAI 4 Ŋ.B. KOREA

AFII OHAI 6 Ŋ.B. JAPAN

AFII OHAI 7 Ŋ.B. TIBET

[Mfonirii ni yɔɔ baafa 131]

Buddhafoi asɔlemɔtsui yɛ sɔrɔtoi yɛ je lɛŋ fɛɛ

Chengteh, China kooyigbɛ

Kofu, Japan

New York City, U.S.A.

Chiang Mai, Thailand

[Mfoniri ni yɔɔ baafa 133]

Tɛ ni akpɛ, Maya Lamɔ, ni jɛ Gandhara, Pakistan, ni miitsɔɔ wɔsɛɛ be Buddha akɛ shwuɔ yɛŋ, ni la ekpɛ ebɔle eyitso ni eebote Maŋnyɛ Maya ninejurɔ gbɛ koni yoo lɛ aŋɔ hɔ

[Mfonirii ni yɔɔ baafa 134]

Buddha mɔ kome shihilɔi kɛ jalɔi yɛ sɔlemɔ tsu mli yɛ New York City

[Mfonirii ni yɔɔ baafa 141]

Buddha amagai ni miitsɔɔ ninefɔɔ sɔrɔtoi

eebote Nirvana

eetsɔɔ nii

eejwɛŋ nii anɔ

eeku kaa naa

[Mfoniri ni yɔɔ baafa 147]

Ato srɛɛnɛɛ ni akɛmiiwo Buddha lɛ fɔmɔ gbi hiɛ nyam yɛ Tokyo, Japan. Shuɔ yɛŋ ni nyiɛ sɛɛ lɛ damɔ shi kɛha Buddha

[Mfonirii ni yɔɔ baafa 150]

Lotus Sutra (afii ohai 10) lɛ mli baafai ni yɔɔ China wiemɔ mli lɛ mli baafai tsɔɔ hewalɛ ni bodhisattva Kuan-yin lɛ yɔɔ ni ekɛaahere mɔ kɛjɛ la kɛ nu afua mli. Bodhisattva Ksitigarbha, yɛ ninejurɔgbɛ lɛ, hé gbɛi yɛ Korea yɛ afii ohai 14 lɛ mli

[Mfoniri ni yɔɔ baafa 155]

Buddhafoi awolokpo ni jɛ Kyoto, Japan, ni miitsɔɔ piŋmɔi yɛ “hɛl”

[Mfonirii ni yɔɔ baafa 157]

Ŋmɛnɛ Buddhafoi jaa yɛ, kɛjɛ ŋwɛi abɛkugbɛ, lingam hiɛ, yɛ Bangkok, Thailand; blema Buddha Nyanyɔŋ he okadi hiɛ yɛ Kandy, Sri Lanka; Buddha he amagai ahiɛ yɛ Singapore kɛ New York

[Mfonirii ni yɔɔ baafa 158]

Buddhafonyo yoo miisɔle yɛ weku afɔleshaa latɛ hiɛ, kɛ gbekɛbii ni kɛ amɛhe ewo sɔlemɔ tsu mli sɔɔmɔ mli