Yitso 7

Tao Jamɔ kɛ Konfushio Jamɔ—Ŋwɛi Gbɛ Taomɔ

Tao jamɔ, Konfushio jamɔ, kɛ Buddha jamɔ feɔ China kɛ Bokagbɛ Shɔŋŋ jamɔi titrii etɛ lɛ. Shi nɔ ni tamɔɔɔ Buddha jamɔ lɛ, Tao jamɔ kɛ Konfushio jamɔ tsɔmɔko jeŋ jamɔi, shi China titri ehi kɛ he fɛɛ he ni China hiŋmɛigbelemɔ naa mɛi anɔ hewalɛ yɛ lɛ. Eyɛ mli akɛ aleee bɔ ni amɛ sɛɛnyiɛlɔi lɛ ayibɔ ji yɛ China bianɛ moŋ, shi kɛlɛ Tao jamɔ kɛ Konfushio jamɔ fɛɛ eye nɔ ni miihe ashɛ jeŋ gbɔmɛi ayifalɛ mlijaa ejwɛ mli ekome jamɔ shihilɛ nɔ, nɔ ni fe afii 2,000 ni eho nɛ.

1. (Akɛ hiɛkpamɔ lɛ afata he.) (a) Nɛgbɛ atsuɔ Tao jamɔ kɛ Konfushio jamɔ he nii waa yɛ, ni egbɛ eshwa kɛyashɛ nɛgbɛ? (b) Mɛɛ be kpalaŋŋ he wɔtsɔɔ wɔhe kɛyaa agbɛnɛ koni wɔkɛpɛi tsɔɔmɔi nɛɛ amli?

‘HA FƆFƆII oha agba; ha tsɔɔmɔ kui oha apele he.’ Nakai wiemɔ, ni Mao Tse-tung, ni jɛ People’s Republic of China lɛ ha ehe gbɛi yɛ ewiemɔ ko mli yɛ 1956 lɛ ji wiemɔ ko ni afo lɛ kuku ni China woloŋlelɔi kɛtsu nii amɛkɛtsɔɔ be ko mli yɛ China, kɛjɛ afii ohai enumɔ kɛbashi afii ohai etɛ D.Ŋ.B. lɛ mli, ni atsɛɔ lɛ Tawuu Maji lɛ abe lɛ. No mli lɛ Chou maŋtsɛyeli ni he wa (af. 1122-256 D.Ŋ.B.) lɛ efite ni etsɔ kui bibii ni nɔyelɔi yeɔ nɔ ni kɛ amɛhe miiwuu ta yɛ be fɛɛ mli, ni miigba gbɔmɛi foji lɛ anaa waa.

2. (a) Mɛni kɛ “tsɔɔmɔ kui oha” lɛ he susumɔ lɛ ba? (b) Mɛni shwɛ yɛ “tsɔɔmɔ kui oha” ni ba lɛ sɛɛ?

² Basabasa-feemɔ kɛ piŋmɔ ni tai lɛ kɛba lɛ gbɔjɔ blema kuu ni yeɔ nɔ lɛ hewalɛ lɛ. Gbɔmɛi foji ni ayeɔ amɛnɔ lɛ ekpɛlɛɛɛ nɔ dɔŋŋ akɛ amɛaaba amɛhe shi amɛha abladei anɔyeli lɛ suɔmɔnaa nii kɛ lakamɔi, ni amɛfee dioo yɛ piŋmɔi ni jɛɔ mli baa amɛnɔ lɛ shishi. Nɔ ni jɛ mli ba ji akɛ, susumɔi kɛ taomɔ nii ni atsi naa yɛ be kakadaŋŋ mli lɛ gba tamɔ “fɔfɔii oha.” Tsɔɔmɔ kui ni hiɛ susumɔi sɔrɔtoi tsɔɔ amɛjwɛŋmɔ yɛ nɔyeli, mla, kwasafo gbɛjianɔtoo, jeŋba kɛ jeŋba kpakpa he gbɛjianɔtoo, kɛ agbɛnɛ saji tamɔ okwaayeli, lalai, kɛ woji ahe, akɛ nɔ ni abaatsɔ nɔ aha shihilɛ afee nɔ ni ŋmɛɔ pɛpɛɛpɛ. Abale amɛ akɛ “tsɔɔmɔ kui oha.” Ekomɛi naaa gbɔmɛi lɛ anɔ hewalɛ kɛyaaa shɔŋŋ. Shi tsɔɔmɔi kui enyɔ he gbɛi aahu akɛ eha amɛna gbɔmɛi ashihilɛ nɔ hewalɛ yɛ China fe afii 2,000. Nomɛi ji nɔ ni abale amɛ yɛ naagbee akɛ Tao jamɔ kɛ Konfushio jamɔ lɛ.

Tao—Eji Mɛni?

3. (a) Mɛni ji Chinabii ajwɛŋmɔ yɛ Tao he? (b) Ni eeefee Bɔlɔ lɛ moŋ lɛ, mɛni Chinabii he ye akɛ no kɛ nibii fɛɛ ba? (Okɛto Hebribii 3:4 he.)

³ Bɔni afee ni onu nɔ hewɔ ni Tao jamɔ (egbɛɔ dow jamɔ; tamɔ now) kɛ Konfushio jamɔ bana hewalɛ waa ni sɛɛ tsɛɔ yɛ Chinabii, kɛ agbɛnɛ mɛi ni yɔɔ Japan, Korea kɛ maji krokomɛi ni bɛŋkɛ jɛmɛ lɛ anɔ lɛ shishi lɛ, ehe miihia ni wɔna shishijee jwɛŋmɔ ni Chinabii hiɛ yɛ Tao he lɛ he shishinumɔ ko da. Wiemɔ lɛ diɛŋtsɛ shishi ji “gbɛ, gbɛjegbɛ, loo nanegbɛ.” Kɛ akpã mli lɛ, ebaanyɛ etsɔɔ “gbɛjianɔtoo, shishitoo mla, loo tsɔɔmɔ.” Kɛha Chinabii lɛ, gbeekpamɔ kɛ gbɛjianɔtoo kpakpa ni amɛna yɛ jeŋ muu fɛɛ lɛ ji Tao kpojiemɔi, ŋwɛi suɔmɔnaa nifeemɔ loo mla ko ni yɔɔ ni kudɔɔ jeŋ muu fɛɛ. Yɛ gbɛ kroko nɔ lɛ, ni amɛaahe Nyɔŋmɔ ko ni ji Bɔlɔ, ni kudɔɔ jeŋ muu fɛɛ lɛ amɛye lɛ, amɛheɔ ŋwɛi kwɛmɔ, ŋwɛi suɔmɔnaa nii, aloo yɛ ekukufoo mli lɛ, ŋwɛi diɛŋtsɛ amɛyeɔ akɛ nɔ ni ha nɔ fɛɛ nɔ ba.

4. Te Chinabii kɛ Tao he jwɛŋmɔ lɛ to adesai ashihilɛ mli nibii ahe amɛha tɛŋŋ? (Okɛto Abɛi 3:5, 6 he.)

⁴ Kɛ Chinabii kɛ Tao he jwɛŋmɔ ni amɛhiɛ lɛ miito adesai ashihilɛ mli nibii ahe lɛ, amɛheɔ amɛyeɔ akɛ adebɔɔ mli gbɛ ni ja yɛ ni akɛfeɔ nɔ fɛɛ nɔ, ni akɛ nɔ fɛɛ nɔ kɛ mɔ fɛɛ mɔ yɛ egbɛhe ni ja kɛ enitsumɔ ni sa. Akɛ nɔkwɛmɔ nɔ lɛ, amɛhe amɛye akɛ, kɛji akɛ nɔyelɔ lɛ tsu nii kɛtsɔ jalɛsane ni ekɛ gbɔmɛi lɛ aaaye nɔ, ni etsu afɔleshaa kɛ kusum-nifeemɔi ni kɔɔ ŋwɛi he lɛ ahe nii lɛ, toiŋjɔlɛ kɛ shweremɔ baaba maŋ lɛ nɔ. Nakai nɔŋŋ hu kɛji akɛ gbɔmɛi lɛ miisumɔ ni amɛtao gbɛ lɛ, loo Tao, ni amɛnyiɛ sɛɛ lɛ, nɔ fɛɛ nɔ kɛ ehe baakpa gbee, toiŋjɔlɛ baaba, ni ebaamɔ shi. Shi kɛji akɛ amɛfeee nakai aloo amɛte shi amɛwo enɛ lɛ, nɔ ni baajɛ mli aba ji basabasa-feemɔ kɛ oshara.

5. (a) Te Tao jamɔ tsuɔ Tao he nii ehaa tɛŋŋ? (b) Mɛni Konfushio jamɔ tsuɔ yɛ Tao he? (d) Mɛɛ sanebimɔi ehe hiaa ni aha hetoo?

⁵ Jwɛŋmɔ ni ahiɛ akɛ, esa akɛ Tao anyiɛ ni akatsi lɛ gbɛ lɛ ji nɔ titri yɛ Chinabii ajeŋ nilee kɛ jamɔ susumɔ mli. Abaanyɛ akɛɛ akɛ Tao jamɔ kɛ Konfushio jamɔ ji wiemɔi sɔrɔtoi enyɔ ni akɛtsɔɔ jwɛŋmɔ kometoo lɛ nɔŋŋ. Tao jamɔ kɛ teemɔŋ saji tsuɔ nii, ni yɛ eshishijee mli lɛ, efiɔ nii ni afeee, dioofeemɔ, kɛ nii ni atsuuu yɛ nɔ ko he, gbɔmɛi ni akpooɔ amɛ kɛ adebɔɔ he ni akuɔ sɛɛ kɛyaa lɛ sɛɛ. Amɛ shishijee jwɛŋmɔ ji akɛ, kɛji akɛ gbɔmɛi yatara sɛɛ flɛŋŋ, amɛfeee nɔ ko nɔ ko, ni amɛha adebɔɔ diɛŋtsɛ tsu enii lɛ, nɔ fɛɛ nɔ baaja pɛpɛɛpɛ. Shi yɛ gbɛ kroko nɔ lɛ, Konfushio jamɔ tsuɔ shihilɛ lɛ he nii. Etsɔɔ akɛ kwasafoŋ shihilɛ kpakpa baahi shi kɛji akɛ mɔ fɛɛ mɔ tsu egbɛhe ni ato aha lɛ kɛ nitsumɔ ni ka enɔ lɛ he nii lɛ. Yɛ enɛ hewɔ lɛ, etoɔ mla ehaa gbɔmɛi kɛ kwasafoŋ nifeemɔi fɛɛ—nɔyelɔ kɛ eshishibii, tsɛ kɛ bi, wu kɛ ŋa, kɛ ekrokomɛi—ni ekɛ gbɛtsɔɔmɔi haa amɛ fɛɛ. No hewɔ lɛ enɛ kɛ sanebimɔi ni nyiɛ sɛɛ nɛɛ baa, akɛ: Te fee tɛŋŋ ni gbɛjianɔtoi enyɔ nɛɛ ba hu? Namɛi to shishi? Te atsuɔ he nii ŋmɛnɛ ahaa tɛŋŋ? Ni mɛni amɛfee yɛ Nyɔŋmɔ sɛɛ gbɛ ni gbɔmɛi taoɔ nɛɛ mli?

Tao Jamɔ—Eje Shishi kɛ Jeŋ Nilee

6. (a) Mɛni ale yɛ mɔ ni to Tao jamɔ shishi lɛ he? (b) Te fee tɛŋŋ ni abale mɔ ni to Tao jamɔ shishi lɛ akɛ Lao-tzu?

⁶ Yɛ eshishijee mra mli lɛ, Tao jamɔ tamɔ jeŋ nilee ko moŋ fe jamɔ ko. Mɔ ni to shishi, Lao-tzu, mii shɛɛɛ ehe yɛ basabasa-feemɔi kɛ naagbai ni yaa nɔ yɛ nakai bei lɛ amli lɛ he ni etao hejɔlɛ kɛtsɔ ehe ni etsi kɛjɛ gbɔmɛi ahe kwraa ni ebɛŋkɛ adebɔɔ lɛ nɔ. Aleee nuu ni akɛɛ ehi shi yɛ afii ohai ekpaa D.Ŋ.B. lɛ mli, ni no hu anyɛɛɛ ama nɔ mi nɛɛ he saji pii tsɔ ko. Afɔɔ lɛ tsɛmɔ akɛ Lao-tzu, ni eshishi ji “Blema Nuŋtsɔ” aloo “Blemanyo,” ejaakɛ taakɛ blema saji tsɔɔ lɛ, hɔ ni enyɛ ŋɔ lɛ lɛ sɛɛ tsɛ aahu akɛ beni afɔ lɛ lɛ, no mli lɛ eyiteŋ tsɔi eje waŋ momo po.

7. Mɛni wɔkaseɔ yɛ Lao-tzu he kɛjɛɔ “Yinɔsane Niŋmaai” amli?

⁷ Niŋmaai pɛ ni yɔɔ ni akpɛlɛ nɔ ni kɔɔ Lao-tzu he lɛ yɛ Shih Chi (Yinɔsane Niŋmaai), ni Ssu-ma Ch’ien, ni ji saneyeli he yinɔsane-ŋmalɔ ni abuɔ lɛ waa ni hi shi yɛ afii ohai enyɔ kɛ afii oha D.Ŋ.B. lɛ mli lɛ ŋma lɛ mli. Taakɛ wolo nɛɛ tsɔɔ lɛ, Lao-tzu gbɛi diɛŋtsɛ ji Li Erh. Etsu nii akɛ klakefonyo yɛ blema woji atoohe yɛ Loyang, ni yɔɔ China teŋgbɛ lɛ. Shi nɔ ni sa kadimɔ babaoo ji akɛ, ewieɔ yɛ Lao-tzu he akɛ:

“Lao Tzu kɛ eshihilɛ be ni fa hi Chou. Beni etsɔ hiɛ ena Chou fitemɔ ni baa lɛ, kɛkɛ ni eshi jɛmɛ kɛba maŋ lɛ husu naa. Husu naa kwɛlɔ Yin Hsi kɛɛ: ‘Owula, akɛni oosumɔ ni okpa nitsumɔ ni oyajɔɔ ohe hewɔ lɛ, miibio ni oŋma wolo ko yɛ mihewɔ.’ No hewɔ lɛ, Lao Tzu ŋma wolo ko ni hiɛ fai enyɔ ni feɔ wiemɔi akpei enumɔ kɛ ekrokomɛi ni yɔɔ naakpɛɛ, ni etsɔɔ nɔ ni Gbɛ [Tao] lɛ kɛ Hewalɛ [Te] lɛ tsɔɔ lɛ mli yɛ mli. Kɛkɛ ni eshi jɛmɛ etee. Mɔ ko mɔ ko leee he ni egbo yɛ.”

8. (a) Mɛɛ wolo akɛɛ Lao-tzu ŋma? (b) Mɛni hewɔ anyɛɔ atsɔɔ wolo lɛ shishi yɛ gbɛi sɔrɔtoi pii anɔ lɛ?

⁸ Woloŋlelɔi pii heee anɔkwale ni nɛkɛ sane nɛɛ ji lɛ amɛyeee. Fɛɛ sɛɛ lɛ, atsɛɔ wolo ni afee nɛɛ akɛ Tao Te Ching (ni afɔɔ eshishitsɔɔmɔ akɛ “Gbɛ lɛ kɛ Hewalɛ lɛ he Nɔkwɛmɔ Nɔ”) ni abuɔ enɛ akɛ Tao jamɔ wolo titri. Aŋmala yɛ wiemɔi fioo mli ni akɛ kukuji lɛ ashishinumɔ hu etee, ni ekomɛi po yɛ ni amɛkɛlɛmɔ aaafee wiemɔi etɛ loo ejwɛ pɛ. Yɛ enɛ kɛ bɔ ni eniŋmaai lɛ ekomɛi ashishinumɔ etsake babaoo kɛjɛ Lao-tzu be lɛ mli kɛbaa nɛɛ hewɔ lɛ, atsɔɔ wolo lɛ shishi yɛ gbɛi sɔrɔtoi babaoo nɔ.

“Tao Te Ching” Mli Kwɛmɔ Fioo Ko

9. Te Lao-tzu tsɔɔ bɔ ni Tao ji yɛ Tao Te Ching lɛ mli eha tɛŋŋ?

⁹ Lao-tzu tsɔɔ Tao, adebɔɔ naagbee gbɛ lɛ mli yɛ Tao Te Ching mli, ni ekɛto adesa shihilɛ mli nɔ fɛɛ nɔ he. Wɔmiitsɛ ŋmɛnɛŋmɛnɛ beaŋ shishitɔɔmɔ ni Gia-fu Feng kɛ Jane English fee lɛ mli wiemɔi komɛi asɛɛ ni wɔkɛkwɛ Tao Te Ching lɛ mli fioo. Ewie nɔ ni nyiɛ sɛɛ nɛɛ yɛ Tao he akɛ:

10. (a) Mɛni ji Tao jamɔ yiŋtoo? (b) Te akɛ nɛkɛ Taobii ajwɛŋmɔ nɛɛ tsuɔ adesa jeŋba he nii ahaa tɛŋŋ?

¹⁰ Mɛni wɔbaanyɛ wɔmɔ kɛjɛ nɛkɛ saji kukuji ni amɛshishinumɔ wa nɛɛ amli? Akɛ, kɛha Taobii lɛ, Tao ji teemɔŋ ŋwɛiniiaŋ hewalɛ ko ni ha jeŋ muu fɛɛ ni anaa nɛɛ ba. Oti ni ma Tao jamɔ hiɛ ji ni etao nakai Tao lɛ, ni eshi je lɛ yɛ esɛɛ, ni ekɛ adebɔɔ afee ekome. Nɛkɛ shishinumɔ nɛɛ hu jeɔ kpo yɛ bɔ ni Taobii susuɔ adesa jeŋba he amɛhaa lɛ mli. Naa bɔ ni amɛwieɔ nii ni amɛbuɔ lɛ nɔ kpakpa nɛɛ he yɛ Tao Te Ching lɛ mli:

11. Te abaanyɛ atsɔɔ Taobii anɔ kpakpa lɛ mli aha tɛŋŋ?

¹¹ Nɛkɛ nɔkwɛmɔ nii fioo nɛɛ tsɔɔ akɛ, kɛ hoo lɛ, Tao jamɔ ji jeŋ nilee he tsɔɔmɔ kuu ko kɛjɛ shishijee. Yɛ be mli ni amɛtsuɔ jalɛsane ni ayeee, piŋmɔ, nibii ahiɛkpatamɔ, kɛ yakayaka shihilɛ ni jɛ kui bibii anɔyeli ni yi wa ni hi shi yɛ nakai beaŋ lɛ he nii lɛ, Taobii he ye akɛ gbɛ ni aaatsɔ nɔ ana toiŋjɔlɛ kɛ gbeekpamɔ ji ni aku sɛɛ aya blemabii lɛ ablema saji ni yɔɔ dani maŋtsɛmɛi kɛ maŋsɔɔlɔi ni baye gbɔmɛi lɛ anɔ lɛ ba lɛ ahe ekoŋŋ. Nɔ kpakpa ni amɛtaoɔ lɛ ji ni amɛhi shi yɛ kpoofeemɔ, ni ji akrowai ashihilɛ mli, ni amɛkɛ adebɔɔ afee ekome.—Abɛi 28:15; 29:2.

Tao Jamɔ Mli Nilelɔ ni ji Enyɔ

12. (a) Namɔ ji Chuang Chou? (b) Mɛni ekɛfata Lao-tzu klɛŋklɛŋ tsɔɔmɔi lɛ ahe?

¹² Chuang Chou, loo Chuang-tzu, ni eshishi ji “Nuŋtsɔ Chuang” (369-286 D.Ŋ.B.), ni abuɔ lɛ akɛ Lao-tzu sɛɛyelɔ kpanaa lɛ ji mɔ ni ha Lao-tzu jeŋ nilee lɛ tee hiɛ shikome ekoŋŋ. Jeee akɛ etsɔɔ Tao lɛ mli babaoo yɛ ewolo, Chuang Tzu lɛ mli kɛkɛ, shi moŋ etsɔɔ yin kɛ yang he jwɛŋmɔ ni je shishi klɛŋklɛŋ yɛ I Ching lɛ mli lɛ mli faŋŋ. (Kwɛmɔ baafa 83.) Yɛ ejwɛŋmɔ naa lɛ, nɔ ko nɔ ko bɛ ni hiɔ shi daa loo eyeɔ emuu, shi nɔ fɛɛ nɔ nyɛɔ etsakeɔ yɛ nibii enyɔ ni teɔ shi woɔ amɛhe lɛ mli. Eŋma yɛ yitso ni ji “Autumn Flood” [Gbo Be Nu Afua] lɛ mli akɛ:

“Nɔ ko nɔ ko bɛ jeŋ muu fɛɛ nɛɛ mli ni hiɔ shi daa, ejaakɛ nɔ fɛɛ nɔ hiɔ shi be kakadaŋŋ bɔ ni sa koni egbo. Tao pɛ, ni bɛ shishijeee loo naagbee lɛ, hiɔ shi daa. . . . Abaanyɛ akɛ wala ato okpɔŋɔ ko ni joɔ foi waa ni kɛ ehewalɛ fɛɛ miijo foi lɛ he—etsakeɔ be fɛɛ be kɛyaa nɔ nakai, yɛ hiŋmɛitswaa fɛɛ hiŋmɛitswaa fa bibioo ko mli. Mɛni esa akɛ ofee? Mɛni esaaa akɛ ofeɔ? Sɔrɔto-feemɔ diɛŋtsɛ ko bɛ mli.”

13. (a) Mɛni ji Taobii ajwɛŋmɔ yɛ wala shihilɛ he yɛ nɔ ni Chuang-tzu kɛtsɔɔ mli efata he lɛ hewɔ? (b) Mɛɛ Chuang-tzu lamɔ ko akaiɔ jogbaŋŋ?

¹³ Yɛ nɛkɛ jeŋ nilee ni kɔɔ nii ni anyɛɛɛ afee yɛ nɔ ko he nɛɛ hewɔ lɛ, Taonyo jwɛŋmɔ ji akɛ, ehe ehiaaa ni mɔ ko afee nɔ ko ni ekɛgba nɔ ni adebɔɔ eto efɔ eshi ni yaa nɔ lɛ naa. Etsɛŋ, aloo yɛ sɛɛ mli lɛ, nɔ fɛɛ nɔ baaku sɛɛ etsake kɛya esɛɛsɛɛ. Bɔ fɛɛ bɔ ni anyɛɛɛ adamɔ shihilɛ ko ni mli wa naa aha lɛ, etsɛŋ ni ebaahi ekoŋŋ. Bɔ fɛɛ bɔ ni shihilɛ ko ŋɔɔ ha lɛ, etsɛŋ ni fɛɛ baalaaje. (Nɔ ni tamɔɔɔ nakai lɛ, kwɛmɔ Jajelɔ 5:18, 19.) Afee jeŋ nilee gbɛ ni atsɔɔ nɔ akɛkwɛɔ shihilɛ nɛɛ he mfoniri yɛ Chung-tzu lamɔ ko ni gbɔmɛi foji lɛ kɛkaiɔ lɛ jogbaŋŋ lɛ mli:

“Be ko lɛ Chuang Chou la akɛ etsɔ abɛi, abɛi ni miitswa efijiaŋ kɛmiifiliki kɛmiiya kɛmiiba, ni ena ehe miishɛɛ ni eefee nɔ ni esumɔɔ. Eleee akɛ eji Chuang Chou. Trukaa pɛ kɛkɛ ni ehiɛ tsɛ̃, ni naa lɛ, Chuang Chou ni yɔɔ shiŋŋ ni tɔmɔ ko kwraa bɛ he. Shi eleee akɛ lɛ nɔŋŋ ji Chuang Chou ni la akɛ eji abɛi lɛ, aloo abɛi ko ni miila akɛ eji Chuang Chou.”

14. Mɛni mli hewalɛ ni Taobii naa yɛ mɛi anɔ lɛ jeɔ kpo yɛ?

¹⁴ Anaa bɔ ni jeŋ nilee nɛɛ ena mɛi anɔ hewalɛ eha lɛ yɛ lalafoo wiemɔi kɛ nitɛŋmɔi ni China ŋaa nitsulɔi ni ba yɛ sɛɛ mli yinɔi lɛ amli lɛ kɛba lɛ mli. (Kwɛmɔ baafa 171.) Shi Tao jamɔ ehiŋ shi akɛ jeŋ nilee ni kwɛɔ nɔ ni yaa nɔ kɛkɛ ni sɛɛ baatsɛ.

Kɛjɛ Jeŋ Nilee nɔ kɛtee Nyɔŋmɔjamɔ Mli

15. (a) Nibii ni yɔɔ naakpɛɛ kɛ fɛo yɛ adebɔɔ he lɛ ha Taobii na mɛɛ jwɛŋmɔ? (b) Mɛɛ wiemɔi ni yɔɔ Tao Te Ching lɛ mli ha amɛna jwɛŋmɔ ni tamɔ nɛkɛ?

¹⁵ Yɛ mɔdɛŋ ni amɛbɔɔ koni amɛkɛ adebɔɔ afee ekome hewɔ lɛ, gbɔlɛ ni bɛ kɛ shihilɛ ni feɔ ehee daa bahe Taobii ajwɛŋmɔ fɛɛ. Amɛsusu akɛ, ekolɛ kɛ ahi shi yɛ Tao, loo adebɔɔ gbɛ nɔ lɛ, ekolɛ mɔ nine baashɛ adebɔɔ mli teemɔŋ saji anɔ koni ebatsɔ mɔ ni gbɔmɔtsoŋ pilamɔ, helai kɛ gbele po bɛ enɔ hewalɛ. Eyɛ mli akɛ Lao-tzu kɛ enɛ efeee sane titri ko moŋ, shi wiemɔi kukuji komɛi yɛ Tao Te Ching lɛ mli ni tsɔɔ jwɛŋmɔ ni tamɔ nɛkɛ. Akɛ nɔkwɛmɔ nɔ lɛ, yitso 16 kɛɔ akɛ : “Ekome ni mɔ ko kɛ Tao aaafee lɛ ji naanɔ nɔ. Ni eyɛ mli akɛ gbɔmɔtso lɛ gboɔ moŋ, shi Tao lɛ hoŋ eyaŋ gbi ko gbi ko.”a

16. Chuang-tzu niŋmaai lɛ ha Tao jamɔ mli hemɔkɛyelii ni kɔɔ ŋkunyaayeli he lɛ tee hiɛ yɛ mɛɛ gbɛ nɔ?

¹⁶ Chuang-tzu hu ye ebua yiŋsusumɔ ni tamɔ nɛkɛ. Akɛ nɔkwɛmɔ nɔ lɛ, adesã mli gbɔmɔ ko bi mɔ kroko sane yɛ Chuang Tzu lɛ mli sanegbaa ko mli akɛ, “Oda saŋŋ, ni kɛlɛ ohewolo tamɔ gbekɛ nɔ. Mɛni hewɔ ebalɛ nakai?” Mɔ ni abi lɛ sane lɛ ha hetoo akɛ: “Mikase Tao.” Chuang-tzu ŋma yɛ Taonyo jeŋ nilelɔ kroko he akɛ: “Agbɛnɛ Liehtse baanyɛ ata kɔɔyɔɔ nɔ. Ebaanyɛ eta kɔɔyɔɔ ni mli ejɔ nɔ yɛ miishɛɛ mli, ebaanyɛ eya nɔ aahu gbii nyɔŋma kɛ enumɔ dani eku esɛɛ. Afɔɔɔ gbɔmɔ ni tamɔ nɛkɛ namɔ yɛ gbɔmɛi ni gboiɔ ni nine shɛɔ miishɛɛnamɔ nɔ lɛ ateŋ.”

17. Mɛɛ Taobii anifeemɔi jɛ mra be mli susumɔi amli, ni mɛni jɛ mli ba? (Okɛto Romabii 6:23; 8:6, 13 he.)

¹⁷ Saji ni tamɔ nɛkɛ kanya Taobii asusumɔi, ni amɛje shishi akɛ amɛkɛ sane nɔjwɛŋmɔ, niyeli, kɛ mu ni amuɔ kɔɔyɔɔ kasemɔi ni akɛɛ ebaanyɛ egbala gbɔmɔtso lɛ fitemɔ kɛ egbele sɛɛ lɛ aaaka akwɛ. Etsɛɛɛ ni blema saji ni kɔɔ gbɔmɛi ni gbooo, ni nyɛɔ amɛfilikiɔ yɛ atatui anɔ ni amɛjieɔ amɛhe kpo ni amɛlaajeɔ ekoŋŋ yɛ amɛsuɔmɔ naa, ni amɛhiɔ shi yɛ gɔji krɔŋkrɔŋi loo ŋshɔkpɔi ni yɔɔ shɔŋŋ lɛ anɔ afii pii ni aleee, ni bɔ́ loo ŋkunyaayeli aduawai wajeɔ amɛ lɛ ahe lɛ je shishi amɛgbɛ amɛshwa. China yinɔsane bɔɔ amaniɛ akɛ yɛ afi 219 D.Ŋ.B. lɛ, Ch’in maŋtsɛ lɛ, Shih Huang-Ti, tsu lɛji ni gbekɛbii hii kɛ yei 3,000 yɔɔ mli akɛ amɛya ni amɛyatao blema saji loo adesãi amli P’eng-lai ŋshɔkpɔ, ni mɛi ni gbooo lɛ yɔɔ jɛmɛ lɛ, ni amɛkɛ shihilɛ ni gbele bɛ mli tsofa loo tsabaa lɛ aba. Taakɛ abaakpa gbɛ lɛ, amɛkɛ tsofa ni akɛɛ ehereɔ mɔ yiwala nɛɛ baaa, shi moŋ blema saji kɛɔ akɛ, amɛ amɛhi ŋshɔkpɔi ni abale akɛ Japan lɛ anɔ.

18. (a) Mɛni ji Taobii ajwɛŋmɔ yɛ ‘shihilɛ ni gbele bɛ mli he tsofa’ lɛ he? (b) Mɛɛ ŋkunyaayeli nifeemɔi krokomɛi Tao jamɔ kɛba?

¹⁸ Han maŋtsɛmɛi anɔyeli be lɛ mli (206 D.Ŋ.B.-220 Ŋ.B.), ni Tao jamɔ mli ŋkunyaayeli nifeemɔi yashɛ he ni kwɔ fe fɛɛ. Akɛɔ akɛ eyɛ mli akɛ Maŋtsɛ Wu Ti fiɔ Konfushio jamɔ sɛɛ akɛ Maŋ lɛ tsɔɔmɔ moŋ, shi Tao jamɔ jwɛŋmɔ ni kɔɔ gbɔmɔtso ni gbooo he lɛ gbala ejwɛŋmɔ. Nɔ ni enya he waa ji ‘shihilɛ ni gbele bɛ mli he tsofai’ ni tsofa-futulɔ loo su mli nibii ahe nilelɔ futuɔ. Yɛ Taonyo susumɔ naa lɛ, kɛji yin kɛ yang (nuu kɛ yoo) hewalɛi ni teɔ shi woɔ amɛhe lɛ fee ekome lɛ, no kɛ wala baa. No hewɔ lɛ, kɛ tsofa-futulɔi loo su mli dadei ahe nilelɔi kɛ sumui (ni diɔ, loo yin) futu mɛkuri (ni kpɛlɛɔ, loo yang) lɛ, belɛ tsofa-futulɔi loo su mli dadei ahe nilelɔi lɛ miikase adebɔɔ mli nifeemɔ, ni amɛsusuɔ akɛ, nɔ ni baajɛ mli aba lɛ ji tsofa ni haa mɔ shihilɛ ni gbele bɛ mli. Taobii hu kɛ kpɔiaŋgbɔlemɔi, bɔ ni amuɔ kɔɔyɔɔ ahaa lɛ kudɔmɔ, niyenii komɛi ni ayeee, kɛ bɔlɛnamɔ mli nifeemɔi komɛi ni akɛɛ ewajeɔ mɔ ko nyɛmɔ kɛ hewalɛ, ni ehaa mɔ wala sɛɛ tsɛɔ, ni tamɔ Yoga nifeemɔi lɛ ba. Nɔ ni fata amɛjamɔ mli nibii lɛ ahe ji ŋkunyaayeli sɛbɛi ni akɛɛ ehaa mɔ feɔ mɔ ni anaaa lɛ ni tawuu nii nyɛɛɛ agbe lɛ aloo ehaa mɔ ko nyiɛɔ nu hiɛ loo efilikiɔ kɛtsɔɔ ŋwɛiniiaŋ. Agbɛnɛ amɛyɛ ŋkunyaayeli naasɔomɔ nii, ni nɔ ni yɔɔ mli titri ji yin-yang okadi lɛ, ni akɛkpɛtɛɔ tsũi ahe kɛ shinaai anaa koni eshwie mumɔi fɔji kɛ kooloi awuyelɔi.

19. Mɛɛ gbɛ nɔ atsɔ ato Tao jamɔ he gbɛjianɔ?

¹⁹ Beni shɛɔ Ŋ.B. afii ohai enyɔ lɛ mli lɛ, no mli lɛ ato Tao jamɔ he gbɛjianɔ. Mɔ ko ni akɛɛ atsɛɔ lɛ Chang Ling, aloo Chang Tao-ling, to Tao jamɔ teemɔŋ kuu ko shishi yɛ China anaigbɛ ni ekɛ ŋkunyaayeli kɛ tsofa futumɔ ni akɛtsaa helai tsuɔ nii. Akɛni ahe emlibii lɛ ateŋ mɔ fɛɛ mɔ omɔ peck enumɔ hewɔ lɛ, abale ekuu lɛ akɛ Omɔ-Peck-Enumɔ Tao jamɔ lɛ (wu-tou-mi tao).b Akɛni ekɛɛ Lao-tzu diɛŋtsɛ jie ehe kpo etsɔɔ lɛ hewɔ lɛ, Chang bafee klɛŋklɛŋ “ŋwɛi nuŋtsɔ.” Yɛ naagbee lɛ, akɛɛ enyɛ efee tsofa ni haa wala ni ekwɔ kɛtee ŋwɛi hiɛkalɔ, ni eta kootsɛ nɔ, kɛjɛ Lung-hu Gɔŋ (Drako-Kootsɛ Gɔŋ) ni yɔɔ Kiangsi Niiaŋ lɛ nɔ. Chang Tao-ling nɔ atsɔ ato Taobii “aŋwɛi nuŋtsɔmɛi” ni tsara nɔ ba aahu afii oha, ni akɛɛ amɛteŋ mɔ fɛɛ mɔ ji Chang ni afɔ lɛ ekoŋŋ lɛ ama shi.

Buddha Jamɔ Kaa lɛ Naa ni Aaadamɔ

20. Mɛɛ mɔdɛŋ Tao jamɔ bɔ koni eku hewalɛ ni Buddha jamɔ naa yɛ mɛi anɔ lɛ naa?

²⁰ Beni shɛɔ afii ohai kpawo lɛ mli, yɛ T’ang maŋtsɛmɛi anɔyeli be (618-907 Ŋ.B.) lɛ mli lɛ, no mli lɛ Buddha jamɔ miigbu shi kɛmiibote Chinabii ajamɔ shihilɛ mli. Kɛha enɛ naatsii lɛ, Tao jamɔ jie ehe kpo akɛ jamɔ ni Chinabii to shishi. Abafee Lao-tzu nyɔŋmɔ, ni abu Taobii aniŋmaai akɛ woji krɔŋkrɔŋi. Amamɔ sɔlemɔtsui, osɔfoi hii kɛ yei ashihilɛ hei, ni ato osɔfoi mɔ kome shihilɔi ni ji hii kɛ yei ahe gbɛjianɔ, tamɔ Buddha jamɔ gbɛjianɔtoo ji lɛ nɔŋŋ pɛpɛɛpɛ. Kɛfata he lɛ, Tao jamɔ hu na sɔlemɔtsu loo gbatsu kɛha lɛ diɛŋtsɛ enyɔŋmɔi, nyɔŋmɔyei, asamanukpai, Chinabii ablema saji loo adesãi ni atãa yɛ gbɔmɛi ni gbooo lɛ ahe, tamɔ Mɛi Kpaanyɔ ni Gbooo (Pa Hsien), lashɛremɔ he nyɔŋmɔ (Tsao Shen), maŋtiase nyɔŋmɔi (Ch’eng Huang), kɛ shinaa naa bulɔi (Men Shen). Nɔ ni jɛ mli ba ji Buddha jamɔ, blema apasa hemɔkɛyelii, mumɔi atsɛmɔ kɛ blematsɛmɛi ajamɔ ni afutu fɛɛ.—1 Korintobii 8:5.

21. Yɛ naagbee lɛ, Tao jamɔ tsake ehe kɛbote mɛni mli, ni yɛ mɛɛ gbɛ nɔ?

²¹ Beni be hoɔ lɛ, Tao jamɔ fite fiofio kɛbote wɔŋjamɔ kɛ apasa hemɔkɛyeli gbɛjianɔtoo ko mli. Mɔ fɛɛ mɔ jaa enyɔŋmɔi loo nyɔŋmɔyei ni esumɔɔ yɛ maŋ lɛ sɔlemɔtsu lɛ mli, ni amɛkpaa amɛ fai koni amɛbu amɛhe kɛjɛ efɔŋ he ni amɛye amɛbua amɛ ni amɛna nii yɛ shikpɔŋ nɔ. Abɔɔ osɔfoi lɛ apaa koni amɛkwɛ yarafeemɔi anɔ; ni amɛhala hei ni hi akɛ fuuhei, shiai, kɛ nitsumɔ hei; amɛkɛ gbohii lɛ agba sane; amɛshwie mumɔi fɔji kɛ sisai; amɛkwɛ gbijurɔyelii anɔ; ni amɛtsuɔ kusum-nifeemɔi krokomɛi sɔrɔtoi fɛɛ he nii. No hewɔ lɛ nɔ ni je shishi akɛ jeŋ nilee mli teemɔŋ sane he tsɔɔmɔ kuu lɛ etsake kwraa ebatsɔ nyɔŋmɔjamɔ ni kɛ ehe ewo mumɔi ni gbooo, hɛl-la, kɛ gbɔmɛi ni etsɔmɔ amɛhe nyɔŋmɔi amli vii—susumɔi ni ana kɛjɛ blema Babilon apasa hemɔkɛyelii ni bua shi tamɔ kpaakpo lɛ mli lɛ.

China Nilelɔi Krokomɛi ni He Gbɛi Lɛ

22. Mɛɛ tsɔɔmɔ kuu bahe shi waa yɛ China, ni mɛɛ sanebimɔi ehe hiaa ni wɔbi?

²² Yɛ be mli ni wɔtao Tao jamɔ shishijee, enɔyaa, kɛ efitemɔ mli lɛ, esa akɛ wɔkai akɛ eji “tsɔɔmɔ kui oha” ni he gbɛi yɛ Tawuu Maji abe lɛ mli lɛ ateŋ ekome pɛ. Tsɔɔmɔ kuu kroko ni yɛ naagbee lɛ ebahe gbɛi, ní yɛ anɔkwale mli lɛ, ebahe shi waa ji Konfushio jamɔ. Shi mɛni hewɔ Konfushio jamɔ bahe gbɛi waa nakai lɛ? Ŋwanejee ko bɛ he akɛ, yɛ China nilelɔi lɛ fɛɛ ateŋ lɛ, Konfushio ji mɔ ni ale jogbaŋŋ yɛ China sɛɛ, shi namɔ diɛŋtsɛ ji nɛkɛ mɔ nɛɛ? Ni mɛni etsɔɔ?

23. Mɛɛ saji ni kɔɔ Konfushio diɛŋtsɛ he akɛha yɛ ‘Yinɔsane Mli Niŋmaai’ lɛ mli?

²³ Yɛ saji ni kɔɔ Konfushio he lɛ, wɔbaatsɔ wɔhe kɛya Ssu-ma Ch’ien Shih Chi (Yinɔsane mli Niŋmaai) lɛ ahe ekoŋŋ. Nɔ ni tamɔɔɔ Lao-tzu he sane ni yɔɔ kuku lɛ, wɔnaa Konfushio wala shihilɛ he saji babaoo. Naa lɛ diɛŋtsɛ ehe saji komɛi ni aŋmala kɛjɛ nɔ ni China woloŋlelɔ, Lin Yutang tsɔɔ shishi lɛ mli:

“Afɔ Konfushio yɛ Tsou maŋ lɛ mli, yɛ Ch’angping kpokpaa lɛ nɔ yɛ Lu maŋ wulu lɛ mli. . . . [Enyɛ] sɔle yɛ Nich’iu ŋmeŋme lɛ nɔ ni efɔ Konfushio akɛ esɔlemɔ lɛ hetoo, yɛ Ablade Hsiang ni jɛ Lu lɛ nɔyeli afi ni ji nyɔŋmai enyɔ kɛ enyɔ (551 B.C.) lɛ mli. Ana ni epampaŋ etere yɛ efɔmɔ mli, no hewɔ ni atsɛ lɛ akɛ ‘Ch’iu’ lɛ (eshishi ji “gɔŋ”). Egbɛi diɛŋtsɛ ji Chungni, ni eweku gbɛi ji K’ung.”c

24. Mɛni ba yɛ Konfushio gbekɛbiiashi?

²⁴ Efɔmɔ sɛɛ etsɛɛɛ ni etsɛ gbo, shi eyɛ mli akɛ enyɛ lɛ ohiafo ni moŋ, shi ebɔ mɔdɛŋ ekɛ tsɔsemɔ kpakpa ha ebi lɛ. Gbekɛ nuu lɛ nya yinɔsane, lalafoo wiemɔi, kɛ lalai akasemɔ he waa. Taakɛ The Analects, Konfushio Woji Ejwɛ lɛ ateŋ ekome tsɔɔ lɛ, etuu ehe eha woloŋlee kasemɔ beni eye afii 15. Beni eye afii 17 lɛ, akɛ nɔyeli lɛ mli nitsumɔ fioo ko wo edɛŋ yɛ emaŋ ni ji Lu mli.

25. Konfushio nyɛ gbele sa ehe yɛ mɛɛ gbɛ nɔ? (Okɛto Jajelɔ 9:5, 6; Yohane 11:33, 35 he.)

²⁵ Eka shi faŋŋ akɛ enɛ ha ena shika, no hewɔ lɛ ebote gbalashihilɛ mli beni eye afii 19, ni efɔ binuu yɛ no sɛɛ afi. Shi enyɛ gbo beni eye kɛjɛ afii 20 kɛyaa lɛ teŋgbɛ. Eka shi faŋŋ akɛ enɛ sa ehe waa. Akɛni Konfushio yeɔ blema saji anɔ fitsofitso hewɔ lɛ, ekpa maŋ nitsumɔ, ni efee enyɛ yara yɛ egbonyo bu nɔ nyɔji 27, ni enɛ to toiboo kɛ bulɛ ni ayɔɔ kɛha fɔlɔi lɛ he okadi efɔ shi eha Chinabii lɛ.

Konfushio, Tsɔɔlɔ Lɛ

26. Mɛɛ nitsumɔ Konfushio tsu yɛ enyɛ gbele sɛɛ?

²⁶ Yɛ no sɛɛ lɛ, eshi eweku lɛ ni enitsumɔ bafee mɔ ni kpaa shi etsɔɔ enii. Nɔ ni fata nibii ni etsɔɔ lɛ ahe ji lalai, lalafoo wiemɔi, woji sɔrɔtoi akasemɔ, maŋ gbɛnaa nii ahe nikasemɔ, kɛ jeŋ nilee, aloo nɔ ni ale yɛ he yɛ nakai be lɛ mli. Eyɛ faŋŋ akɛ efee gbɛi diɛŋtsɛ eha ehe, ejaakɛ awie akɛ be ko shɛ ni ena nikaselɔi 3,000 sɔŋŋ.

27. Mɛni ale yɛ Konfushio he akɛ tsɔɔlɔ? (Okɛto Mateo 6:26, 28; 9:16, 17; Luka 12:54-57; Yohane 4:35-38 he.)

²⁷ Akɛ woo haa Konfushio yɛ Bokagbɛ akɛ tsɔɔlɔ nukpa. Yɛ anɔkwale mli lɛ, nibii ni aŋmala yɛ egbonyo bu nɔ yɛ Ch’ü-fou, yɛ Shantung Niiaŋ lɛ tsɛɔ lɛ kuku kɛkɛ akɛ “Blemanyo, Tsɔɔlɔ Krɔŋkrɔŋ Fe Fɛɛ.” Anaigbɛ niŋmalɔ ko tsɔɔ enitsɔɔmɔ gbɛ lɛ mli yɛ nɛkɛ gbɛ nɔ: “Enyiɛɔ ‘kɛjɛɔ he kome kɛyaa he kroko ni mɛi ni kaseɔ esusumɔ yɛ shihilɛ he lɛ fata ehe.’ Be fɛɛ be ni gbɛfaa lɛ kɛ amɛ yaa he ko ni jɛkɛ lɛ, etaa tsina shwiili mli. Bɔ ni kooloo lɛ nyiɛɔ blɛoo lɛ haa mɛi ni etsɔɔ amɛ nii lɛ nyɛɔ amɛnyiɛɔ esɛɛ, ni eka shi faŋŋ akɛ ekɛ ewiemɔi lɛ damɔɔ nibii ni yaa nɔ yɛ gbɛ lɛ nɔ lɛ anɔ titri.” Nɔ ni yɔɔ miishɛɛ ji akɛ, Yesu kɛ gbɛ ni tamɔ nɛkɛ tsu nii yɛ sɛɛ mli, shi jeee akɛ ekɛmiikase lɛ.

28. Taakɛ Chinanyo niŋmalɔ Lin Yutang tsɔɔ lɛ, mɛni ha Konfushio batsɔ tsɔɔlɔ ni akɛ woo haa lɛ lɛ?

²⁸ Ŋwanejee ko bɛ he akɛ nɔ ni ha Konfushio fee tsɔɔlɔ ni akɛ woo haa lɛ yɛ Bokagbɛbii ateŋ lɛ jɛ anɔkwale ni eji akɛ lɛ diɛŋtsɛ lɛ eji nikaselɔ kpakpa, titri lɛ yɛ yinɔsane kɛ jeŋba kpakpa he mlai amli. Lin Yutang ŋma akɛ: “Gbɔmɛi yaa Konfushio ŋɔɔ, ni jeee akɛni lɛ ji nilelɔ ni fe fɛɛ yɛ ebe lɛ mli lɛ hewɔ, shi moŋ akɛni eji woloŋlelɔ ni le nii waa fe fɛɛ, mɔ pɛ ni yɔɔ egbii lɛ amli ni baanyɛ atsɔɔ amɛ blema woji kɛ blema nikasemɔi ahe nii lɛ hewɔ.” Yɛ be mli ni etsɔɔ akɛ ekolɛ nɛkɛ suɔmɔ kɛha nikasemɔ nɛɛ ji nɔ titri hewɔ ni Konfushio jamɔ ye omanye fe tsɔɔmɔ kui krokomɛi lɛ, Lin mua sane lɛ naa yɛ nɛkɛ gbɛ nɔ: “Konfushio tsɔɔlɔi lɛ yɛ nɔ ko pɔtɛɛ ni amɛtsɔɔ, ni Konfushio kaselɔi lɛ hu yɛ nɔ ko pɔtɛɛ ni amɛkaseɔ, ni ji, yinɔsane mli nikasemɔ, yɛ be mli ni anyɛɔ tsɔɔmɔ kui krokomɛi lɛ anɔ koni amɛwie amɛ diɛŋtsɛ amɛsusumɔi ahe nii kɛkɛ.”

“Ŋwɛi Ji Mɔ Ni Le Mi!”

29. (a) Mɛni ji Konfushio taomɔ nii diɛŋtsɛ yɛ shihilɛ mli? (b) Mɛɛ gbɛ nɔ etsɔ ebɔ mɔdɛŋ koni enine ashɛ taomɔ nii nɛɛ nɔ, ni mɛni jɛ mli ba?

²⁹ Yɛ omanye ni Konfushio ye akɛ tsɔɔlɔ lɛ fɛɛ sɛɛ lɛ, ebuuu nitsɔɔmɔ akɛ eshihilɛ be mli nitsumɔ. Enu he akɛ jwɛŋmɔ ni ehiɛ yɛ jeŋba kpakpa he mlai kɛ subaŋ he lɛ baanyɛ ahere egbii lɛ amli je ni haomɔ yɔɔ mli lɛ yiwala kɛji akɛ nɔyelɔi lɛ kɛbaatsu nii kɛtsɔ lɛ loo ekaselɔi lɛ ni amɛaaŋɔ amɛ ni amɛtsu nii yɛ amɛnɔyelii amli lɛ nɔ. Yɛ enɛ hewɔ lɛ, lɛ kɛ ekaselɔi ni bɛŋkɛ lɛ kpaakpa lɛ akuu fioo ko shi emaŋ ni ji Lu, ni amɛfaa gbɛ kɛjɛɔ maŋ kome mli kɛyaa maŋ kroko mli, ni amɛmiibɔ mɔdɛŋ ni amɛná nɔyelɔ nilelɔ ko ni kɛ esusumɔi yɛ nɔyeli kɛ kwasafoŋ shihilɛ he lɛ baatsu nii. Mɛni jɛ mli ba? Shih Chi kɛɛ: “Yɛ naagbee lɛ eshi Lu, akpoo lɛ yɛ Ch’i, ashwie lɛ kɛjɛ Sung kɛ Wei, eye ohia yɛ Ch’en kɛ Ts’ai.” Yɛ be mli ni efa gbɛ aahu afii 14 lɛ, eku esɛɛ kɛba Lu, ni ehiɛnɔkamɔ efee efolo, shi enijiaŋ ejeko wui.

30. Mɛɛ woji aŋmalamɔ bafee Konfushio jamɔ shishitoo?

³⁰ Etuu ehe eha woji aŋmalamɔ kɛ nitsɔɔmɔ yɛ egbii ni eshwɛ lɛ mli. (Kwɛmɔ baafa 177.) Eyɛ mli akɛ ŋwanejee ko bɛ he akɛ eye awerɛho yɛ bɔ ni anuuu lɛ shishi lɛ he moŋ, shi ekɛɛ: “Miwieee huhuuhu mishiii Ŋwɛi. Migbigbiliii mimli mishiii gbɔmɔ. Mitiuɔ minikasemɔi yɛ shikpɔŋ nɛɛ nɔ, ni mikɛ Ŋwɛi ni yɔɔ yiteŋgbɛ nɛɛ yeɔ sharamɔ. Ŋwɛi ji mɔ ni le mi!” Yɛ naagbee lɛ egbo yɛ afi 479 D.Ŋ.B., beni eye afii 73.

Konfushio Tsɔɔmɔ lɛ mli Nɔ Titri

31. Mɛni Konfushio tsɔɔ akɛ no ji gbɛ ni aaatsɔ nɔ ni nine ashɛ kwasafoŋ shihilɛ kpakpa nɔ?

³¹ Eyɛ mli akɛ Konfushio he gbɛi akɛ woloŋlelɔ kɛ tsɔɔlɔ moŋ, shi gbɛi ni ena lɛ kɔɔɔ woloŋlee he nitsumɔi ahe pɛ. Yɛ anɔkwale mli lɛ, jeee Konfushio yiŋtoo ji ni etsɔɔ jeŋba he mlai kɛkɛ, shi moŋ ni ekɛ toiŋjɔlɛ kɛ gbɛjianɔtoo kpakpa, ni no mli lɛ tawuu ni yaa nɔ be fɛɛ be yɛ nuŋtsɔmɛi nɔyelɔi lɛ ateŋ lɛ egbala amɛmli lɛ aba ekoŋŋ. Bɔni afee ni enine ashɛ oti nɛɛ nɔ lɛ, Konfushio tsɔɔ akɛ esa akɛ mɔ fɛɛ mɔ, kɛjɛ maŋtsɛ lɛ nɔ aahu kɛyashi gbɔmɔ folo ni nyiɛ lɛ nɔ lɛ akase nii ni akpaa lɛ gbɛ akɛ ebaatsu yɛ gbɔmɛi ateŋ lɛ he nii ni ehi shi nakai hu.

32, 33. (a) Mɛni ji Konfushiobii ajwɛŋmɔ yɛ li he? (b) Taakɛ Konfushio tsɔɔ lɛ, mɛni baajɛ li ni akɛaatsu nii lɛ mli aba?

³² Ale jwɛŋmɔ ni tamɔ nɛkɛ yɛ Konfushio jamɔ mli akɛ li, ni eshishi ji nɔ ni ja yɛ jeŋba mli, bulɛ, nibii agbɛjianɔtoo yɛ gbɛ kpakpa nɔ, ni kɛ aaakpa mli lɛ, kusum-nifeemɔ, gbijurɔyeli, kɛ woo. Yɛ hetoo-hamɔ kɛha sanebimɔ, “Mɛni ji nɛkɛ li kpeteŋkpele nɛɛ”? lɛ, Konfushio kɛ sane-mlitsɔɔmɔ ni nyiɛ sɛɛ nɛɛ ha akɛ:

“Yɛ nibii fɛɛ ni gbɔmɛi hiɔ shi yɛ naa lɛ ateŋ lɛ, li ji nɔ ni da fe fɛɛ. Kɛ li bɛ lɛ, wɔleee bɔ ni wɔɔfee ni wɔkɛ jamɔ ni sa aha mumɔi ni yɔɔ jeŋ muu fɛɛ lɛ; aloo bɔ ni wɔɔfee wɔto gbɛhe kpakpa ni sa maŋtsɛ lɛ kɛ sɔɔlɔi lɛ, nɔyelɔ lɛ kɛ mɛi ni ayeɔ amɛnɔ lɛ, kɛ onukpai lɛ kɛ gbekɛbii lɛ wɔma shi; aloo bɔ ni wɔɔfee wɔto nuu kɛ yoo teŋ ekomefeemɔ wɔma shi, yɛ fɔlɔi kɛ amɛbii, kɛ agbɛnɛ yɛ nyɛmimɛi ateŋ; aloo bɔ ni wɔɔfee wɔha ale tsakpaa sɔrɔtoi ni yɔɔ weku lɛ mli lɛ. Enɛ hewɔ ni agwaseaŋ gbɔmɔ shwɛɛɛ li he kwraa lɛ.”

³³ No hewɔ lɛ, li ji jeŋba he mla ni agwaseaŋ gbɔmɔ diɛŋtsɛ (chün-tzu, atsɔɔ shishi yɛ bei komɛi amli akɛ “gbɔmɔ ni nɔ kwɔ”) lɛ kɛtsuɔ ekwasafoŋ wekukpaai fɛɛ he nii. Kɛ mɔ fɛɛ mɔ bɔ mɔdɛŋ akɛ eeefee nakai lɛ, Konfushio kɛɛ, “nɔ fɛɛ nɔ yaa nɔ jogbaŋŋ yɛ weku lɛ mli, maŋ kɛ je lɛ mli,” ni no ji beni atsu Tao, loo ŋwɛi gbɛ lɛ he nii. Shi mɛɛ gbɛ nɔ abaatsɔ atsɔɔ bɔ ni li ji lɛ mli? Enɛ kɛ wɔ yaa Konfushio jamɔ tsɔɔmɔi titrii lɛ ekroko he—jen (egbɛɛɔ ren), adesa mlihilɛ.

34. Mɛni ji Konfushiobii ajwɛŋmɔ yɛ jen he, ni eyeɔ ebuaa yɛ shihilɛ mli nibii gbohii ahe nitsumɔ mli yɛ mɛɛ gbɛ nɔ?

³⁴ Yɛ be mli ni li maa tsuishitoo kɛtsɔ sɛɛ gbɛ mlai anɔ mi lɛ, jen tsuɔ adesa su kɛ ban loo mligbɛ gbɔmɔ lɛ he nii. Konfushionyo shishinumɔ, titri lɛ taakɛ Konfushio kaselɔ titri, Mencius tsɔɔ mli lɛ ji akɛ, gbɔmɔ su hi kɛjɛ shishijee. No hewɔ lɛ shihilɛ mli naagbai fɛɛ anaa tsabaa baajɛ mɔdɛŋ ni gbɔmɔ aaabɔ ni eya ehiɛ lɛ mli aba, ni woloŋlee kɛ nilee akɛjeɔ enɛ shishi. The Great Learning lɛ shishijee yitso lɛ kɛɔ akɛ:

“Kɛ nine shɛ anɔkwa nilee nɔ lɛ, kɛkɛ lɛ suɔmɔnaa nii lɛ ebafee anɔkwale nɔ; kɛ suɔmɔnaa nii lɛ ji anɔkwale lɛ, kɛkɛ lɛ ato tsui lɛ ama gbɛ ni ja nɔ . . . ; kɛ ato tsui lɛ ama gbɛ ni ja nɔ lɛ, kɛkɛ lɛ akanya mɔ shihilɛ; kɛ akanya mɔ shihilɛ lɛ, kɛkɛ lɛ ato weku shihilɛ he gbɛjianɔ; kɛ ato weku shihilɛ he gbɛjianɔ lɛ, kɛkɛ lɛ gbɛjianɔtoo kpakpa eba maŋ shihilɛ he; kɛ ato maŋ shihilɛ he gbɛjianɔ kpakpa lɛ, kɛkɛ lɛ toiŋjɔlɛ eba je nɛɛ mli. Esa akɛ mɔ fɛɛ mɔ, kɛjɛ maŋtsɛ lɛ nɔ aahu kɛbashi gbɔmɔ folo lɛ nɔ ato lɛ diɛŋtsɛ eshihilɛ he gbɛjianɔ kpakpa akɛ shishifa loo shishitoo nɔ.”

35. (a) Te abaanyɛ amu li kɛ jen shishitoo mlai lɛ anaa aha tɛŋŋ? (b) Enɛɛmɛi fɛɛ jeɔ kpo yɛ bɔ ni Chinabii susuɔ shihilɛ he amɛhaa lɛ mli yɛ mɛɛ gbɛ nɔ?

³⁵ No hewɔ lɛ wɔmiina akɛ, taakɛ Konfushio tsɔɔ lɛ, li nɔ yeli baaye abua gbɔmɛi ni amɛba amɛjeŋ jogbaŋŋ yɛ shihilɛi fɛɛ shishi, ni jen he nitsumɔ baaha amɛkɛ mɔ fɛɛ mɔ aye yɛ mlihilɛ naa. Nɔ ni jɛɔ mli baa yɛ wiemɔ naa kɛkɛ ji toiŋjɔlɛ kɛ gbeekpamɔ yɛ gbɔmɛi ateŋ. Abaanyɛ amu Konfushio jwɛŋmɔ, ni damɔ li kɛ jen shishitoo mlai anɔ lɛ naa yɛ nɛkɛ gbɛ nɔ:

Enɛɛmɛi fɛɛ yeɔ buaa ni etsɔɔ nɔ hewɔ ni Chinabii pii, kɛ mɛi krokomɛi po ni jɛ Bokagbɛ lɛ, maa weku tsakpaa, nitsumɔ, woloŋlee, kɛ mɔ gbɛhe ni eeele ni eeetsu he nii nɔ mi waa lɛ. Ehi jio, ehiii jio, anyɛ nɛkɛ Konfushio shishinumɔ nɛɛ nɔ vii awo Chinabii ahenilee mli kɛtsɔ afii ohai abɔ tsɔsemɔ nɔ.

Konfushio Jamɔ Batsɔ Maŋ Jamɔ Ko

36. Te fee tɛŋŋ ni Konfushio jamɔ bana gbɛhe akɛ Maŋ lɛ jamɔ lɛ?

³⁶ Beni Konfushio jamɔ he shi pɛ kɛkɛ ni “tsɔɔmɔ kui oha” be lɛ ba naagbee. Maŋtsɛmɛi ni ye nɔ yɛ Han maŋtsɛmɛi aweku lɛ mli lɛ na nɔ ko ni tamɔ mla ko yɛ Konfushio tsɔɔmɔ ni biɔ anɔkwayeli kɛha nɔyelɔ lɛ mli ni ji nɔ pɛpɛɛpɛ ni he hiaa amɛ ni baaha maŋtsɛsɛi lɛ nɔyeli lɛ mli awa. Awó Konfushio jamɔ nɔ yɛ Maŋtsɛ Wu Ti, ni wɔwie ehe momo yɛ Tao jamɔ he lɛ nɔyeli beaŋ, ni ebatsɔ Maŋ jamɔ. Mɛi ni le Konfushio tsɔɔmɔi lɛ jogbaŋŋ pɛ ahalaa akɛ Maŋ onukpai, ni esa akɛ mɔ fɛɛ mɔ ni hiɛ ka nɔ akɛ eeebote nɔyeli lɛ sɔɔmɔ mli lɛ aye kaai ni abaafee yɛ maŋ muu lɛ fɛɛ mli yɛ Konfushio tsɔɔmɔi ahe lɛ mli omanye. Konfushio kusum nibii kɛ nifeemɔi batsɔ odehei awe lɛ jamɔ.

37. (a) Te fee tɛŋŋ ni Konfushio jamɔ batsɔ nyɔŋmɔjamɔ? (b) Mɛni hewɔ yɛ anɔkwale mli lɛ Konfushio jamɔ fe jeŋ nilee ko kɛkɛ lɛ?

³⁷ Nɛkɛ saji atsakemɔ nɛɛ wó gbɛhe mli ni Konfushio yɔɔ lɛ nɔ gojoo yɛ Chinabii ashihilɛ mli. Han maŋtsɛmɛi lɛ ji mɛi ni je afɔlei ni ashaa yɛ Konfushio gbonyo bu he ni ebatsɔ blema sane lɛ shishi. Akɛ sabalai ni tsɔɔ woo ha lɛ. Kɛkɛ ni yɛ afi 630 Ŋ.B. lɛ, T’ang maŋtsɛ T’ai Tsung fa akɛ ama Maŋ sɔlemɔtsu aha Konfushio yɛ maŋtsɛyeli lɛ nɔyeli hei kɛ maji fɛɛ mli, ni akɛ esa akɛ asha afɔlei daa. Anaa yɛ nifeemɔi fɛɛ mli akɛ, awó Konfushio nɔ akɛ nyɔŋmɔ, ni Konfushio jamɔ batsɔ nyɔŋmɔjamɔ ko ni ewa akɛ aaana sɔrɔto ni ka no kɛ Tao jamɔ loo Buddha jamɔ teŋ.—Kwɛmɔ akrabatsa lɛ, baafa 175.

Bokagbɛ Nilee lɛ Mli Gboshinii

38. (a) Mɛni eba Tao jamɔ kɛ Konfushio jamɔ nɔ kɛjɛ 1911? (b) Shi mɛni ka he eji anɔkwale lolo yɛ nɛkɛ jamɔi nɛɛ ashishijee tsɔɔmɔi ahe?

³⁸ Kɛjɛ be mli ni maŋtsɛmɛi anɔyeli ba naagbee yɛ China yɛ 1911 kɛbaa nɛɛ, awie ashi Konfushio jamɔ kɛ Tao jamɔ waa, ni akɛ yiwaa po ba amɛnɔ. Ashwie Tao jamɔ hiɛ shi yɛ ŋkunyaayeli kɛ apasa hemɔkɛyeli mli nifeemɔi lɛ ahewɔ. Ni abatsɛ Konfushio jamɔ akɛ abladei anɔyeli, ni haa gbɔmɛi tsɔmɔɔ tamɔ nyɔji yɛ amɛjwɛŋmɔŋ, koni etsi gbɔmɛi, titri lɛ yei anaa ewo eshishi. Shi yɛ ahorabɔɔ ni jɛ maŋ onukpai adɛŋ nɛɛ fɛɛ sɛɛ lɛ, jamɔi nɛɛ ashishijee tsɔɔmɔi lɛ ehe shi yɛ Chinabii ajwɛŋmɔi amli vii aahu akɛ amɛyɛ gbɔmɛi lɛ ateŋ mɛi babaoo nɔ hewalɛ lolo.

39. Mɛni adafitswaa wolo ko mli amaniɛbɔɔ wie yɛ apasa hemɔkɛyeli jamɔ mli nifeemɔi ahe yɛ China?

³⁹ Akɛ nɔkwɛmɔ nɔ lɛ, Canada adafitswaa wolo, Globe and Mail bɔ amaniɛ yɛ 1987, yɛ wiemɔ ni ji ‘Afɔɔɔ Chinabii Ajamɔ Mli Kusum Nifeemɔi Anamɔ yɛ Beijing, Shi Eeshwere yɛ Ŋshɔnaa Kpokpai Anɔ’ lɛ shishi akɛ, yɛ nɔ ni miihe ashɛ afii 40, ni nɔyeli ni leee Nyɔŋmɔ eye China nɔ lɛ fɛɛ sɛɛ lɛ, yarafeemɔ mli kusum-nifeemɔi, sɔɔmɔ yɛ sɔlemɔtsui amli, kɛ apasa hemɔkɛyeli mli nifeemɔi babaoo miiya nɔ yɛ akrowai kɛ maji bibii amli. Amaniɛbɔɔ lɛ kɛɛ, “akrowai kɛ maji bibii pii yɛ fengshui, ni ji nuumo ni yɔɔ maŋ lɛ mli ni le bɔ ni akwɛɔ kɔɔyɔɔ (feng) kɛ nu (shui) hewalɛi amli, ni akɛtsɔɔ he ni hi fe fɛɛ kɛha nɔ fɛɛ nɔ, tamɔ blematsɛmɛi agbonyo bu, shia hee loo asa loo tsu mli saamɔ nibii.”

40. Mɛɛ jamɔ mli nifeemɔi anaa yɛ Taiwan?

⁴⁰ Yɛ hei krokomɛi lɛ, anaa Tao jamɔ kɛ Konfushio jamɔ yɛ he fɛɛ he ni Chinabii akusum-nifeemɔi ehe shi yɛ lɛ. Nuu ko yɛ Taiwan ni kɛɔ akɛ eji Chang Tao-ling seshinyo ni taa shi akɛ “ŋwɛi nuŋtsɔ,” ni yɔɔ hewalɛ akɛ ehalaa Tao osɔfoi (Tao Shih). Ajaa nyɔŋmɔyoo Matsu, ni ehe gbɛi, ni atswaa ehe adafi akɛ “Nyɛ Krɔŋkrɔŋ ni yɔɔ Ŋwɛi” lɛ akɛ hetselɔ kɛ sɛɛfilɔ kɛha ŋshɔkpɔ lɛ kɛ amlakui kɛ wolɛi. Yɛ gbɔmɛi foji lɛ agbɛfaŋ lɛ, nɔ ni amɛfeɔ titri ji nikee nii kɛ afɔlei ni amɛshaa amɛhaa faai, gɔji, kɛ ŋulamii amumɔi; ŋaa nitsumɔi sɔrɔtoi fɛɛ anyɔŋmɔi kɛ sɛɛfilɔi; kɛ gbɔmɔtsoŋ hewalɛnamɔ, shade kpakpa, kɛ ninamɔ nyɔŋmɔi lɛ.d

41. Te atsuɔ Konfushio jamɔ akɛ nyɔŋmɔjamɔ ko lɛ he nii ahaa tɛŋŋ yɛ ŋmɛnɛ?

⁴¹ Shi Konfushio jamɔ hu? Aba enitsumɔ akɛ jamɔ lɛ shi kɛba gbɛhe ko mli akɛ maŋ kaimɔ nɔ. Maŋ lɛ kwɛɔ Konfushio Sɔlemɔtsu kɛ eweku shikpɔŋ ni yɔɔ China, yɛ Ch’ü-fou, he ni afɔ Konfushio yɛ lɛ nɔ akɛ he ko ni gbɔi jɛɔ maŋsɛɛ amɛbakwɛɔ. Ni taakɛ wolo tɛtrɛɛ, China Reconstructs lɛ tsɔɔ lɛ, amɛhaa shwɛlɔi “feɔ kusum-nifeemɔ ni akɛjaa Konfushio lɛ he nɔkwɛmɔ amɛtsɔɔ.” Ni gbɔmɛi yaa nɔ amɛyeɔ Konfushio fɔmɔ gbi lolo yɛ Singapore, Taiwan, Hong Kong, kɛ hei krokomɛi yɛ Asia bokagbɛ.

42. Yɛ mɛɛ gbɛ nɔ Tao jamɔ kɛ Konfushio jamɔ nyɛɛɛ afee gbɛtsɔɔmɔi ni kɛ mɔ yaa anɔkwa Nyɔŋmɔ lɛ sɛɛ gbɛ taomɔ he?

⁴² Wɔnaa bɔ ni gbɛjianɔtoo ko ni damɔ gbɔmɔ nilee kɛ susumɔ nɔ, ni bɔ ni shishinumɔ yɔɔ mli ni jwɛŋmɔ kpakpa yɔɔ sɛɛ ha lɛ fɛɛ sɛɛ lɛ, yɛ naagbee lɛ enine shɛɛɛ anɔkwa Nyɔŋmɔ lɛ sɛɛ gbɛ taomɔ nɔ lɛ yɛ Konfushio jamɔ kɛ Tao jamɔ mli. Mɛni hewɔ? Ejaakɛ ejieɔ nɔ kome ko ni he hiaa, ni ji, Nyɔŋmɔ diɛŋtsɛ ko ni yɔɔ lɛ suɔmɔnaa nii kɛ etaomɔ nii lɛ yɛ mli kwraa. Konfushio jamɔ tsɔɔ ehe kɛyaa adesa loo gbɔmɔ su he akɛ hewalɛ ni kanyaa lɛ koni efee ekpakpa, ni Tao jamɔ tsɔɔ ehe kɛyaa adebɔɔ diɛŋtsɛ he. Shi hekɛnɔfɔɔ ni ejaaa nɛ, ejaakɛ nɔ ni etsɔɔ kɛkɛ ji nibii ni abɔ lɛ ajamɔ moŋ fe Bɔlɔ lɛ.—Lala 62:10; 146:3, 4; Yeremia 17:5.

43. Yɛ mɛɛ gbɛ nɔ Chinabii ablema saji amli nifeemɔi yɛ jamɔ mli lɛ yeee buaa amɛ yɛ anɔkwa Nyɔŋmɔ lɛ sɛɛ gbɛ taomɔ mli?

⁴³ Shi yɛ gbɛ kroko nɔ lɛ, blematsɛmɛi kɛ amagai ajamɔ ahe blema saji, woo ni akɛhaa nibii ni yɔɔ ŋwɛi, kɛ jamɔ ni akɛhaa adebɔɔ mli mumɔi, kɛ agbɛnɛ kusumii kɛ kusum-nifeemɔi ni fata he lɛ ehe shi waa yɛ gbɛ ni Chinabii susuɔ nii ahe lɛ nɔ aahu akɛ amɛkpɛlɛɔ enɛɛmɛi anɔ akɛ anɔkwale ni awieko. Yɛ be babaoo mli lɛ ewa akɛ aaawie Nyɔŋmɔ loo Bɔlɔ ko ni yɔɔ shihilɛ mli diɛŋtsɛ lɛ he atsɔɔ Chinanyo ejaakɛ enuko sane ko ni tamɔ nɛkɛ da.—Romabii 1:20-25.

44. (a) Te jwɛŋmɔi ni kɔɔ sane sɛɛ lɛ feɔ amɛnii yɛ adebɔɔ mli nibii ni yɔɔ naakpɛɛ lɛ ahe amɛhaa tɛŋŋ? (b) Mɛni awoɔ wɔ hewalɛ ni wɔfee?

⁴⁴ Anyɛŋ aje naakpɛɛ nibii kɛ nilee ni eyi adebɔɔ mli obɔ, kɛ jwɛŋmɔŋ nyɛmɔi kɛ susumɔi kɛ henilee ni akɛduro wɔ adesai lɛ he ŋwane. Shi taakɛ atsɔɔ yɛ yitso ni kɔɔ Buddha jamɔ he lɛ mli lɛ, naakpɛɛ nibii ni wɔnaa yɛ adebɔɔ je lɛ mli lɛ eha jwɛŋmɔi ni kɔɔ sane lɛ sɛɛ emu sane naa akɛ, Gbɛjianɔtolɔ loo Bɔlɔ ko yɛ kɛ̃. (Kwɛmɔ baafai 151-2.) Akɛni nakai sane lɛ ji hewɔ lɛ, belɛ ani ejeee sane naatsɔɔmɔ ni ja, akɛ esa akɛ wɔbɔ mɔdɛŋ ni wɔtao Bɔlɔ lɛ? Yɛ anɔkwale mli lɛ Bɔlɔ lɛ fɔɔ wɔ nine koni wɔfee nakai: “Nyɛholea nyɛhiŋmɛii anɔ kɛyaa ŋwɛi, ni nyɛkwɛa: Namɔ bɔ enɛɛmɛi? Lɛ Mɔ ni ejieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛii.” (Yesaia 40:26) Kɛ wɔfee nakai lɛ, jeee mɔ ni ji Bɔlɔ lɛ pɛ, ni ji Yehowa Nyɔŋmɔ, wɔbaale, shi moŋ nɔ ni esaa eto kɛha wɔ yɛ wɔsɛɛ be mli lɛ hu.

45. Mɛɛ Bokagbɛ jamɔ kroko wɔbaasusu he yɛ enɛ sɛɛ?

⁴⁵ Kɛfata Buddha jamɔ, Konfushio jamɔ, kɛ Tao jamɔ ni etsu babaoo yɛ gbɔmɛi ni jɛ Bokagbɛ lɛ ajamɔ shihilɛ mli lɛ he lɛ, jamɔ kroko yɛ, nɔ ni Japanbii pɛ le jogbaŋŋ—Shinto. Eyɛ sɔrɔto yɛ mɛɛ gbɛ nɔ? Nɛgbɛ ejɛ? Ani enyiɛ gbɔmɛi ahiɛ kɛtee anɔkwa Nyɔŋmɔ lɛ ŋɔɔ? Wɔbaasusu enɛ he yɛ yitso ni nyiɛ sɛɛ lɛ mli.

[Shishigbɛ niŋmai]

[Akrabatsa ni yɔɔ baafa 162]

Bɔ Ni Atsɛɔ Chinabii Awiemɔi ni Egbɛɔ Ehaa

Bɔni afee ni ekɛ woji krokomɛi ni aŋmala akpa gbee lɛ, akɛ bɔ ni Wade-Giles tsɔɔ Chinabii awiemɔi komekomei ashishi eha lɛ etsu nii yɛ wolo nɛɛ mli. Akɛ Ŋleshi henɔ yɛ egbɛɛmɔ mli eha yɛ shishigbɛ nɛɛ:

ch j, taakɛ eyɔɔ Tao Te Ching (jing) mli

ch’ ch, taakɛ eyɔɔ Ch’in (chin) maŋtsɛmɛi aweku mli

hs sh, taakɛ eyɔɔ Ta Hsüeh (shu-eh), The Great Learning mli

j r, taakɛ eyɔɔ jen (ren), adesa mlihilɛ mli

k g, taakɛ eyɔɔ Buddhafoi anyɔŋmɔyoo Kuan-yin (gwan-yin) mli

k’ k, taakɛ eyɔɔ K’ung-fu-tzu (kung-fu-tzu, loo Konfushio mli

t d, taakɛ eyɔɔ Tao (dao), Gbɛ lɛ mli

t’ t, taakɛ eyɔɔ T’ang (tang) maŋtsɛmɛi aweku mli

[Akrabatsa ni yɔɔ baafa 175]

Konfushio Jamɔ—Jeŋ Nilee loo Nyɔŋmɔjamɔ?

Akɛni saji fioo ko pɛ Konfushio wie yɛ Nyɔŋmɔ he hewɔ lɛ, mɛi pii buɔ Konfushio jamɔ akɛ eji jeŋ nilee ko shi jeee nyɔŋmɔjamɔ. Ni kɛlɛ, nɔ ni ekɛɛ ni efee lɛ tsɔɔ akɛ eji nyɔŋmɔ jalɔ. Abaanyɛ ana enɛ yɛ gbɛi sɔrɔtoi enyɔ nɔ. Klɛŋklɛŋ lɛ, eyɛ gbeyeishemɔ ko ni woo yɔɔ mli kɛha mumɔŋ hewalɛ ni da fe fɛɛ yɛ ŋwɛi, nɔ ni Chinabii tsɛɔ lɛ T’ien, loo Ŋwɛi, ni ebuɔ jɛmɛ akɛ jeŋba kpakpa kɛ ejurɔfeemɔ fɛɛ jɛɛhe, kɛ mɔ ni enuɔ he akɛ esuɔmɔnaa nii kudɔɔ nɔ fɛɛ nɔ lɛ. Nɔ ni ji enyɔ lɛ, emaa kusum-nifeemɔi kɛ gbijurɔyelii ni kɔɔ ŋwɛi kɛ blematsɛmɛi ni egboi lɛ amumɔi ajamɔ he lɛ nɔ mi waa.

Eyɛ mli akɛ Konfushio ewieee susumɔi nɛɛ ahe akɛ jamɔ ko moŋ, shi amɛbatsɔmɔ nɔ ni jamɔ ji kɛha Chinabii ayinɔi babaoo.

[Box/Pictures on page 177]

Konfushio Woji Ejwɛ kɛ Woji Enumɔ ni Nɔ Kwɔlɔ Fe Fɛɛ

Woji Ejwɛ Lɛ

1. The Great Learning (Ta Hsüeh), nɔ ni agwaseaŋ gbɔmɔ tsɔsemɔ damɔ nɔ, klɛŋklɛŋ wolo ni skulbii kase yɛ blema China

2. The Doctrine of the Mean (Chung Yung), nɔ ni ataoɔ ale yɛ adesa su kɛ baŋ nɔyaa he kɛtsɔ hiɛshikamɔ nɔ

3. The Analects (Lun Yü), Konfushio wiemɔi ni abua naa, ni abuɔ no akɛ Konfushiobii asusumɔi ajɛɛhe titri

4. The Book of Mencius (Meng-tzu), Konfushio kaselɔ ni fe fɛɛ, Meng-tzu, loo Mencius niŋmaai kɛ wiemɔi

Woji Enumɔ ni nɔ Kwɔlɔ Fe Fɛɛ Lɛ

1. The Book of Poetry (Shih Ching), lalafoo wiemɔi 305 ni tsɔɔ bɔ ni daa gbi shihilɛ yɔɔ yɛ mra mli Chou beaŋ (1000-600 D.Ŋ.B.)

2. The Book of History (Shu Ching), ekɔɔ Chinabii ayinɔsane afii ohai 17 ni jeɔ shishi kɛjɛɔ Shang maŋtsɛmɛi aweku lɛ nɔ lɛ he (1766-1122 D.Ŋ.B.)

3. The Book of Changes (I Ching), ŋkunyaayeli wolo, ni damɔ liamɔi muji ekpaa loo kukuji ni akɛbɔ he 64 lɛ shishitsɔɔmɔi anɔ

4. The Book of Rites (Li Chi), gbijurɔyelii kɛ kusum-nifeemɔi ahe mlai ni abua naa

5. Annals of Spring and Autumn (Ch’un Ch’iu), Konfushio maŋ Lu he yinɔsane, kɛjɛ 721-478 D.Ŋ.B.

[Mfonirii]

Woji Enumɔ ni Nɔ Kwɔlɔ Fe Fɛɛ lɛ, yiteŋgbɛ, kɛ The Great Learning lɛ, (woji ejwɛ lɛ ateŋ ekome) fa ko, abɛkugbɛ, ni atsɛ emli wiemɔ asɛɛ yɛ baafa 181 lɛ

[Mfoniri ni yɔɔ baafa 163]

Tao, ‘gbɛ ni esa akɛ gbɔmɔ atsɔ nɔ’

[Mfoniri ni yɔɔ baafa 165]

Lao-tzu, Tao jamɔ mli jeŋ nilelɔ lɛ, ni eta wuo nɔ

[Mfoniri ni yɔɔ baafa 166]

Taobii asɔlemɔtsu yɛ Matsu, “Nyɛ Krɔŋkrɔŋ ni Yɔɔ Ŋwɛi,” yɛ Taiwan

[Mfoniri ni yɔɔ baafa 171]

Gɔji ni afua ewo yɛ nɔ, faai ni hoɔ dioo, tsei ni kpaa, kɛ woloŋlelɔi ni miijɔɔ amɛhe—saneyitsei ni ehe gbɛi yɛ Chinabii ashikpɔŋ nɔ nitɛŋmɔi amli—jieɔ Taobii ajwɛŋmɔ yɛ adebɔɔ kɛ shihilɛ yɛ gbeekpamɔ naa lɛ kpo

[Mfonirii ni yɔɔ baafa 173]

Blema Taobii atsogbɔɔ, abɛkugbɛ, ni miitsɔɔ Wala Sɛɛkɛlɛ nyɔŋmɔ kɛ Mɛi Kpaanyɔ ni Gbooo Lɛ.

Ninejurɔgbɛ, Tao osɔfo ni ewula ni eekwɛ yarafeemɔ nɔ

[Mfoniri ni yɔɔ baafa 179]

Akɛ woo haa Konfushio, China nilelɔ fe fɛɛ lɛ akɛ jeŋba kɛ jeŋba kpakpa he mlai atsɔɔlɔ

[Mfoniri ni yɔɔ baafa 181]

Gbijurɔyelii, kɛ lalai, yɛ Sung Kyun Kwan, afii ohai 14 lɛ mli Konfushio tsɔsemɔ kɛ nikasemɔ he ni yɔɔ Seoul, yɛ Korea lɛ haa Konfushio kusum-nifeemɔi shwereɔ

[Mfonirii ni yɔɔ baafa 182]

Kɛ mɔ lɛ ji Buddhanyo, Taonyo, loo Konfushionyo po lɛ, Chinanyo diɛŋtsɛ lɛ, kɛjɛ abɛkugbɛ, kɛ woo haa eblematsɛmɛi yɛ shia, ejaa ninamɔ nyɔŋmɔ lɛ, ni eshaa afɔlei yɛ sɔlemɔtsui amli yɛ gbijurɔyeli gbii anɔ