‘Wiemɔi Ni Ŋɔɔ, Wiemɔi Ni Ja Lɛ Taomɔ’

“NAABUALƆ lɛ tao ni ena wiemɔi ni ŋɔɔ kɛ anɔkwale wiemɔi ni ja lɛ aŋmalamɔ.” (Jajelɔ 12:​10, NW) Kwɛ bɔ ni ‘wiemɔi ni ŋɔɔ ni ja’ ni damɔ ŋmalɛi ni jɛ mumɔŋ lɛ anɔ lɛ baafee nɔ ni jara wa waa ha! Akɛtoɔ “shika akutui yɛ jwiɛtɛi kpanyai amli” he, ni eyɛ fɛo ni ejeɔ agbo be fɛɛ be ni enɔ bɛ yɛ nɔnyɛɛ shihilɛ bei amli.​—Abɛi 25:⁠11.

Yɛ wɔgbii nɛɛ amli lɛ, Naabualɔ Kpeteŋkpele, Yesu Kristo, kɛ mumɔŋ nibii ni fa kwraa fe nɔ ni Nyɔŋmɔ webii na mli ŋɔɔmɔ yɛ blema Israel maŋtsɛmɛi lɛ ashishi lɛ eha. (Mateo 12:42) Nɔ ni fe afi oha nɛ, ni akɛ anɔkwale wiemɔi ni ŋɔɔ ni ja ni kɔɔ shihilɛ mli nibii fɛɛ he eha yɛ Buu Mɔɔ Asafo lɛ woji amli ni aja lɛ babaoo yɛ wiemɔi pii amli. No hewɔ lɛ wekui kɛ aŋkroŋkroi babaoo enyɛ amɛbua woji ni tsɔɔ Biblia lɛ mli ni anyɛɔ akɛ he fɔɔ nɔ lɛ anaa yɛ amɛ diɛŋtsɛ amɛ woji atoohei yɛ amɛshiai amli. Kɛfata he lɛ, Yehowa Odasefoi asafoi pii yɛ woji atoohei kpakpai ni amɛkɛtsuɔ nii yɛ amɛ Maŋtsɛyeli Asai anɔ.

Ni kɛlɛ, wiemɔi ni ŋɔɔ ni ja ni he hiaa yɛ shihilɛ pɔtɛɛ ko mli lɛ biɔ etaomɔ dani ana. Akɛni Buu Mɔɔ Asafo lɛ yɔse enɛ yɛ mra mli yɛ eyinɔsane shishijee mli hewɔ lɛ, efee indexes (ni tsɔɔ woji amli saji) efata ewoji lɛ ahe.​—Kwɛmɔ akrabatsa ni yɔɔ baafai 28 kɛ 29 lɛ.

Nifeemɔ Gbɛjianɔtoo loo Mla Hee

Afi 1985 je Watch Tower Publications Indexes yinɔsane hee shishi. Abua Indexes nɛɛhu ni atsɔ hiɛ afee lɛ anaa afee lɛ wolo kpo kome, kɛjɛ 1930 kɛbashi 1985, nitsumɔ ni he gbɔmɔ mɔdɛŋbɔɔ afii 14. Sɛɛnamɔi ni yɔɔ Index wolo kpo kome ni kɔɔ afii pii ahe lɛ ha akɛ nifeemɔ gbɛjianɔtoo hee ba yɛ 1986 mli, ni no ji ni afee Indexes sɔrɔtoi ni abua naa agbɛnɛ. Daa afi lɛ, yɛ afii ejwɛ ni baatsara nɔ aba lɛ amli lɛ, abaana Index wolo bibioo ni abua naa ni afi kome, enyɔ, etɛ kɛ afii ajwɛ mli saji yɔɔ mli. Yɛ daa afii enumɔ lɛ, abaana Index ni akɛ wolo ni wa eha sɛɛ ni Indexes sɔrɔtoi lɛ fɛɛ kɛjɛ 1986 kɛbaa, tamɔ 1986-90, 1986-95 kɛ nii yɔɔ mli. No hewɔ lɛ ehe ebahiaŋ ni akwɛ Indexes fe etɛ mli: 1930-1986 Index, Index hee ni yɔɔ ni akɛ wolo ni wa eha sɛɛ, kɛ wolo bibioo hee ni yɔɔ lɛ.

Index ni Afee yɛ Ohe Jwɛŋmɔ ni Ahiɛ Hewɔ

Index lɛ klɛŋklɛŋ fa hiɛ saji loo wiemɔi ni ato naa. Kɛ aato saji loo wiemɔi komekomei ahe gbɛjianɔ lɛ, asusuɔ sanebimɔi enyɔ he: (1) Mɛɛ adafitswaa loo saji esa akɛ ato naa? (2) Nɛgbɛ mɔ ko baanyɛ akwɛ kɛha nakai adafitswaa loo saji lɛ?

Akɛ nikanelɔ lɛ, onyaŋ nɔ ko fioo ko ni aaawie yɛ sane ko he lɛ taomɔ he yɛ be fɛɛ mli. Akɛni otaoɔ adafitswaa loo saji ni kɔɔ nɔ ni otsuɔ he nii loo ehe yɔɔ sɛɛnamɔ diɛŋtsɛ lɛ he hewɔ lɛ, enɛ ahalaa ni akɛtoɔ saji loo wiemɔi komekomei lɛ anaa. Shi esaaa akɛ saji nɛɛ feɔ babaoo tsɔ. Wiemɔ loo saji ni akɛwoɔ Index lɛ mli baanyɛ afee nɔ ni kɔɔ sane kuku kome he, tamɔ wiemɔ kuku ni kɔɔ Asafo lɛ nifeemɔ gbɛjianɔtoo loo mla yɛ sane ko he. Aloo ebaanyɛ ekɔ sane muu loo wolo muu he. Shi yɛ be babaoo mli lɛ, nɔ ni atoɔ naa awoɔ mli lɛ haa asusuɔ kukuji babaoo he.

Sane ni kɔɔ he ni esa akɛ akwɛ ni esa akɛ eje kpo yɛ Index lɛ mli lɛ hu he hiaa nakai nɔŋŋ, ejaakɛ nikanelɔi susuɔ nibii ahe yɛ gbɛi sɔrɔtoi anɔ ni amɛbaakwɛ saji ayitsei sɔrɔtoi ashishi. Akɛ nɔkwɛmɔ nɔ lɛ, adafitswaa ni kɔɔ Babel Mɔɔ lɛ he lɛ jeɔ kpo yɛ TOWER OF BABEL shishi. Shi nikanelɔi komɛi baakwɛ BABYLON, ARCHAEOLOGY, loo LANGUAGE(S) shishi, ni enɛ damɔ sane lɛ mli nɔ ni ŋɔɔ amɛnaa lɛ nɔ. No hewɔ lɛ abɔɔ mɔdɛŋ koni ati he ni esa akɛ akwɛ lɛ mli yɛ yitsei sɔrɔtoi ni sa lɛ ashishi, ejaakɛ wɔhaa ehiɔ jwɛŋmɔ mli akɛ nikanelɔi lɛ eye afi sɔrɔtoi ni amɛshihilɛ hei hu yɛ sɔrɔto, ni amɛhiɛ yiŋtoi sɔrɔtoi.

Bɔ ni Index lɛ Baanyɛ Aye Abua Bo

Taakɛ shikpɔŋ he mfoniri ji lɛ, Index lɛ hu baanyɛ aye abua bo kɛ okɛtsu nii. Mɛni okpaa gbɛ akɛ obaana yɛ saji loo wiemɔi ni ato naa lɛ loo Ŋmalɛi ni ato naa ni nyiɛ sɛɛ lɛ mli?

He ni abaakwɛ ni yɔɔ Ŋmalɛi ni ato naa lɛ ashishi lɛ ji saji ni tsɔɔ kukuji komekomei lɛ amli. Obaanyɛ ona saji amlitsɔɔmɔ ni kɔɔ bɔ ni atsɔɔ nakai ŋmalɛ lɛ mli aha, nɔ hewɔ ni aŋma, mɔ loo mɛi ni ekɔɔ amɛhe, aloo wiemɔi komekomei loo saji kukuji lɛ ashishi. Enɛ he nɔkwɛmɔ nɔ baanyɛ afee nɔ ni abi yɛ Yesu sɔlemɔ nɔkwɛmɔ nɔ lɛ mli lɛ: “Okɛwɔ akaya kaa lɛ mli.” (Mateo 6:13) Mɛni hewɔ awie nakai? Ŋmalɛi ni ato naa lɛ baaye abuao ni ona nɔ hewɔ.

Saji loo wiemɔi ni ato naa, taakɛ egbɛi lɛ tsɔɔ lɛ, ji saji ni ato naa titri moŋ fe wiemɔi loo wiemɔi kukuji. Ewaa kɛhaa kanelɔi komɛi akɛ amɛaana sane ko ni amɛkaiɔ yɛ be mli ni akɛ sane lɛ yitso taoɔ enɛ lɛ. Naagba nɛɛ baanyɛ ate shi yɛ be mli ni wiemɔ ko bɛ yitso lɛ mli ni baanyɛ aha ayoo sane lɛ. Enɛ he nɔkwɛmɔ nɔ baanyɛ afee sane, “How Much Is Too Much?” [Efalɛ Enyiɛ Fa fe Nine] lɛ nɛkɛ, ni tsɔɔ nibii ni jɛɔ daanumɔ mli baa lɛ. Kɛ okai sane lɛ mli wiemɔi lɛ, no lɛ obaanyɛ ogbele yitsei tamɔ ALCOHOLIC BEVERAGES loo DRINKING yɛ Index lɛ mli, ni obaana ni atsɔɔ he ni obaakwɛ lɛ yɛ jɛmɛ.

Index lɛ baanyɛ afee nɔ ni sɛɛnamɔ krɛdɛɛ yɔɔ he yɛ naagbai ni okɛaakpe lɛ ahe saji ataomɔ mli. Akɛ nɔkwɛmɔ nɔ lɛ, kɛ oji fɔlɔ lɛ, ani onuɔ nijiaŋwujee he yɛ bei komɛi amli yɛ be mli ni obɔɔ mɔdɛŋ ni otsɔse ni okudɔ obii lɛ? Kɛ okwɛ CHILDREN shishi lɛ obaana he ni obaakwɛ ni baatsɔɔ bo nibii babaoo ni baaha onu amɛsusumɔ, henumɔi kɛ hiamɔ nii ashishi. Ni kɛlɛ, yitso ni ji CHILD TRAINING shishi obaana he ni obaakwɛ kɛha amɛ nitsɔɔmɔ kɛ tsɔsemɔ yɛ nibii fɛɛ mli.

Yɛ bei komɛi amli lɛ Buu Mɔɔ Asafo lɛ nine shɛɔ saji ni aŋmala ni miibi yelikɛbuamɔ kɛha gbalashihilɛ mli naagbai anaa tsabaa aloo ni aabi saji yɛ ja ni gbalashihilɛ mli teemɔŋ nibii komɛi ja lɛ ahe. Yɛ be mli ni Asafo lɛ baanyɛ aha hetoo lɛ, abaanyɛ ana nakai ŋaawoo ni henumɔ yɔɔ mli ni anyɛɔ atsuɔ he nii lɛ nɔŋŋ kɛ agbele yitso ni ji MARRIAGE, ni akwɛ eyitsei bibii ni ji “problems” [naagbai] kɛ “sex” loo “sexual relations” [bɔlɛnamɔ], ni akwɛ he ni abaana yɛ ni ato naa lɛ.

Nine shɛɔ woji anɔ hu kɛjɛɔ mɛi ni nɔnyɛɛ loo jwɛŋmɔŋ haomɔi gbaa amɛnaa lɛ aŋɔɔ. Obaanyɛ ona nɔmimaa kɛ yelikɛbuamɔ ni woloŋmaa kɛhaa lɛ oya yɛ bo diɛŋtsɛ owoji atoohe lɛ loo nɔ ni yɔɔ Maŋtsɛyeli Asa lɛ nɔ kɛ ogbele kɛtee yitso ni ji DEPRESSION kɛ MENTAL ILLNESS ni yɔɔ Index lɛ mli lɛ. Saji ni tsɔɔ bɔ ni aaafee adamɔ jwɛŋmɔŋ helai anaa, tsamɔi ni yɔɔ kɛ mɛi ni nɔnyɛɛ nɛɛ egba amɛnaa lɛ aniiashikpamɔi ni saa mɔ he lɛ yɛ ni obaanyɛ okane.

Ani oji obalaŋta? Ekolɛ obaasusu gbalashihilɛ, weku shihilɛ, skul, wekukpaa ni ka okɛ ofɔlɔi ateŋ, kɛ nibii krokomɛi ahe. Yitso titri ni ji YOUTHS lɛ yɛ babaoo kɛɛmɔ yɛ yitsei bibii lɛ fɛɛ kɛ babaoo shishi. Kɛfata he lɛ, yitsei tamɔ RELATIONSHIPS, SOHOOLS, CAREER, kɛ COURTSHIP yɛ pii ni amɛkɛbaaha. Yɛ amaniɛbɔɔi ni kɔɔ skul he lɛ, Index lɛ yɛ babaoo kɛɛmɔ yɛ saji kpakpai ni kɔɔ adebɔɔ, jeŋ nileei, tsofai fɔji kɛ nitsumɔ, shika helɛtemɔ, kɛ saji sɔrɔtoi babaoo he.

Sɛɛnamɔi Kɛha Mɛi ni Eye Afii Sɔrɔtoi Fɛɛ

Yoo ko ni eye afii 81 ŋma akɛ: “Woji lɛ kɛ woji tɛtrɛbii lɛ tamɔ adafitswaa shika bu kɛ mumɔŋ hewalɛwoo jɛɛhe​—ni Index lɛ kɛ shika lɛ jɛɔ bu lɛ shishi kɛbaa hiɛ.” Nyɛ ko ni ebii eye afii kpaanyɔ kɛ nɛɛhu lɛ kɛɛ: “Amrɔ nɛɛ misusuɔ nɔ ni kulɛ manyɛ mafee kɛ enɛ bɛ lɛ he. Ekɛmi etee sanebimɔi ni misusu he yɛ be kakadaŋŋ mli lɛ ahetooi ahe, ni eha nibii amlipɛimɔ yɛ be mli ni asaa he kɛhaa asafoŋ kpeei lɛ efee mlɛo. . . . Masumɔ ni makɛɛ nyɛ bɔ ni wolo nɛɛ eye ebua wɔ weku Biblia mli nikasemɔ lɛ hu. . . . Kɛ miwu kɛ hegbɛ ha gbekɛbii yei lɛ ni amɛhala nɔ ni amɛbaasumɔ ni amɛfee lɛ, yɛ be babaoo mli lɛ amɛsumɔɔ ni amɛtsɔ Index nɛɛ nɔ amɛtao saji amli. Amɛsumɔɔ ni amɛhala sane ko ni amɛyɔɔ he miishɛɛ, tamɔ kooloi ni amɛsumɔɔ amɛsane loo maji ni amɛsumɔɔ, ni amɛnyɛɔ amɛkwɛɔ ni amɛleɔ saji ni kɔɔ enɛ he lɛ yɛ gbɛ ni waaa kwraa nɔ. Enɛ etsɔɔ amɛ hu akɛ Biblia mli nikasemɔ feemɔ yɛ miishɛɛ.”

Sɛɛnamɔi babaoo yɛ wiemɔi ni ŋɔɔ kɛ anɔkwale wiemɔi ni ja lɛ ataomɔ mli. Naabualɔ lɛ mɔdɛŋbɔɔi lɛ kɛ sɛɛnamɔi ni fe eshishijee yiŋtoo lɛ baha lɛ, ejaakɛ wiemɔi ni tamɔ nɛkɛ ewo Yehowa tsuji ahewalɛ ni ekudɔ amɛ kɛbashi ŋmɛnɛ gbi nɛɛ. Wɔ mɔdɛŋbɔɔi ni kɔɔ enɛ he lɛ hu kɛ Yehowa jɔɔmɔi baa, ni nɔ ni baajɛ mli aba lɛ baanyɛ afee nɔ ni baahi shi kɛya naanɔ.​—Abɛi 3:​13-18, 21-26.

[Akrabatsa/Mfoniri ni yɔɔ baafa 28, 29]

Mra Mli Index Sɔrɔtoi

Afii 1902 mli ni afee Holman Parallel Edition Bible krɛdɛɛ lɛ aha Buu Mɔɔ Asafo lɛ, ni saji ni yeɔ buaa babaoo ni Asafo lɛ fee efata he yɛ mli. Nɔ ni yɔɔ enaagbee baafai lɛ ji saji kɛ ŋmalɛi ni ato naa ni jɛ Millennial Dawn woji ni afee atsara nɔ (ni sɛɛ mli lɛ abale akɛ Studies in the Scriptures lɛ, woji bibii titrii enyɔ, kɛ Zion’s Watch Tower kɛha 1879-1901 lɛ amli.

Berean Bibliai ni afee yɛ 1907 kɛ agbɛnɛ yɛ no sɛɛ lɛ kɛ wiemɔi kɛ ŋmalɛi ni ato naa ni tamɔ nakai ha. Akɛ Asafo lɛ woji fɛɛ ahe Index ni ato naa ni hi baye enɛ najiaŋ yɛ 1922. Indexes nɛɛ je kpo yɛ Watch Tower lɛ kpoi kpawo lɛ naagbee kpo ni aku sɛɛ akala ekoŋŋ (1879-1919) lɛ mli. Kɛbashi ŋmɛnɛ lɛ, nɛkɛ naagbee kpo nɛɛ ji nɔ titri ni atsɔɔ nɔ anaa saji ni jeɔ kpo yɛ Buu Mɔɔ Asafo lɛ klɛŋklɛŋ woji lɛ amli.

Shi yɛ afii 40 ni nyiɛ sɛɛ ba lɛ amli lɛ, ehe bahia ni akɛ index sɔrɔtoi ni egbɛ eshwɛ ni yɔɔ woji lɛ asɛɛ kɛ naagbee wolo tɛtrɛɛ ni baa afi fɛɛ afi mli lɛ sɛɛ ni ajie amɛ kpo kɛjɛ 1919 kɛbaa lɛ atao saji sɔrɔtoi lɛ. Shi afi 1959 mli ni Asafo lɛ je nitsumɔ wulu ko shishi koni ana saji kɛ ŋmalɛi ni ato naa yɛ wolo kpo kome mli kɛha woji fɛɛ ni akalaa yɛ Ŋleshi wiemɔ mli lɛ. Abua kuu ko naa ni mɛi ni yɔɔ mli ji Asafo lɛ yitso lɛ nitsulɔi, maŋsɛɛ sanekpakpa shiɛlɔi ni amɛgbe nikasemɔ naa yɛ Buu Mɔɔ Asafo lɛ Skul ni ji Gilead, kɛ nɔkwɛlɔi gbɛfalɔi ni yɔɔ New York maŋtiase lɛ mli. Yɛ afi kɛ fa mɔdɛŋbɔɔ diɛŋtsɛ ni nitsulɔi 18 ni amɛjɔɔ amɛhe nɔ nɛɛ kɛwo mli lɛ sɛɛ lɛ, ajie klɛŋklɛŋ Watch Tower Publications Index, ni efai hiɛ saji ni asusu he kɛ ŋmalɛi ni atsɔɔ mli, ni he afii 31 kɛjɛ 1930 kɛbashi 1960 lɛ kpo. Ajie enɛ kpo klɛŋklɛŋ aha toibolɔi ni na miishɛɛ yɛ 1961 Jalɔi ni Amɛfee Ekome Kpeei lɛ ashishi.

Kɛjɛ no nɔ kɛbaa nɛɛ, Watch Tower Publications Index jeɔ kpo yɛ Blɔfo mli daa afi, kɛ Index ni abuaa naa akɛ wolo ni wa haa sɛɛ afeɔ lɛ wolo kpo kome ni akɛ eko fataa he daa afii enumɔ.