“Nɔ Fɛɛ Nɔ Yɛ Ebe Ní Ato”
“Nɔ fɛɛ nɔ yɛ ebe ní ato, ni nitsumɔ fɛɛ nitsumɔ ni yɔɔ ŋwɛi shishi nɛɛ yɛ ebe.”—JAJELƆ 3:1.
1. Mɛɛ naagbai adesai ni yeee emuu lɛ yɔɔ, ni mɛni enɛ eha eba yɛ shihilɛi komɛi amli?
GBƆMƐI fɔɔ kɛɛmɔ akɛ: “Kulɛ, esa akɛ benɛ mifee momo.” Aloo ekolɛ beni amɛna bɔ ni nibii efee eha lɛ sɛɛ lɛ amɛkɛɔ akɛ: “Kulɛ esa akɛ mamɛ fioo.” Wiemɔi ni tamɔ enɛ tsɔɔ bɔ ni ewa kɛha adesai ni yeee emuu lɛ akɛ amɛaale be ni sa kɛha nibii komɛi afeemɔ. Nɛkɛ nyɛmɔ ni baa shi nɛɛ efite wekukpai. Ekɛ nijiaŋwujee kɛ nine ni nyɛɔ shi eba. Ni nɔ ni ehiii fe fɛɛ lɛ, egbɔjɔ mɛi komɛi ahemɔkɛyeli yɛ Yehowa kɛ egbɛjianɔtoo lɛ mli.
2, 3. (a) Mɛni hewɔ kpɛlɛmɔ ni wɔkpɛlɛɔ nyɛmɔ ni Yehowa kɛhalaa bei ní ato lɛ ji nilee gbɛ lɛ? (b) Mɛɛ jwɛŋmɔ ni ŋmɛɔ pɛpɛɛpɛ esa akɛ wɔná yɛ Biblia mli gbalɛi amlibaa he?
2 Akɛni Yehowa yɛ nilee kɛ sɛɛyoomɔ ni adesai bɛ lɛ hewɔ lɛ, kɛ́ eesumɔ ni ele nɔ ni jɛɔ nifeemɔ fɛɛ nifeemɔ ko mli kɛbaa lɛ, enyɛɔ etsɔɔ hiɛ eleɔ. Ebaanyɛ ‘ejɛ shishijee ejaje naagbee nii lɛ.’ (Yesaia 46:10) No hewɔ lɛ, ebaanyɛ ehala be ni sa ní ekɛaafee nɔ fɛɛ nɔ ni etaoɔ akɛ efee ní etɔ̃ɔɔ. No hewɔ lɛ, yɛ nɔ najiaŋ ni wɔkɛ wɔhe baafɔ̃ wɔ diɛŋtsɛ wɔbe he gbɛjianɔtoo ní ejaaa lɛ nɔ lɛ, wɔbafeɔ nilelɔi kɛji wɔkpɛlɛ nyɛmɔ ni Yehowa kɛhalaa be ní eto lɛ nɔ!
3 Ákɛ nɔkwɛmɔnɔ lɛ, Kristofoi ni edara yɛ mumɔŋ lɛ kɛ anɔkwayeli mɛɔ be ní Yehowa eto kɛha Biblia mli gbalɛi komɛi amlibaa. Amɛyaa nɔ amɛkɛ amɛdekã fɛɛ tsuɔ nii yɛ esɔɔmɔ mli, ni amɛhaa shishitoo mla ni yɔɔ Yaafo 3:26 lɛ feɔ faŋŋ yɛ amɛjwɛŋmɔ mli be fɛɛ be, akɛ: “Ehi akɛ afee dioo amɛ Yehowa yiwalaheremɔ.” (Okɛto Habakuk 3:16 he.) Yɛ nakai beaŋ nɔŋŋ lɛ, amɛyɛ nɔmimaa akɛ, Yehowa kojomɔ lɛ he adafi ni etswa ji akɛ, “kɛ́ eshashao shi hu jiŋŋ, . . . ebaaba lɛɛlɛŋ, ekpeŋ sɛɛ!”—Habakuk 2:3.
4. Esa akɛ Amos 3:7 kɛ Mateo 24:45 aye abua wɔ ni wɔkɛ tsuishitoo amɛ Yehowa yɛ mɛɛ gbɛ nɔ?
4 Yɛ gbɛ kroko nɔ lɛ, kɛji wɔnuuu Biblia ŋmalɛi loo shishitsɔɔmɔi komɛi ni Buu Mɔɔ Asafo lɛ woji lɛ kɛha lɛ ashishi jogbaŋŋ lɛ, ani wɔyɛ nɔ ni wɔɔdamɔ nɔ wɔkaná tsuishitoo? Yehowa be ní eto ni ekɛaaha saji afee faŋŋ lɛ ní wɔɔmɛ lɛ ji nilee gbɛ. “Ejaakɛ Nuntsɔ Yehowa efeŋ nɔ ko, akɛ ja ejie eyiŋtoo lɛ kpo etsɔɔ etsuji, gbalɔi lɛ, dã.” (Amos 3:7) Mɛɛ shiwoo ni yɔɔ naakpɛɛ po nɛ! Shi esa akɛ wɔkadi akɛ Yehowa jieɔ eteemɔŋ saji akpo etsɔɔ yɛ be ni esusuɔ akɛ esa lɛ mli. Enɛ hewɔ lɛ, Nyɔŋmɔ efã “tsulɔ anɔkwafo kɛ nilelɔ” ko koni eha ewebii lɛ ‘mumɔŋ ŋmãa yɛ be ni sa nɔ.’ (Mateo 24:45) No hewɔ lɛ, esaaa akɛ wɔhaoɔ wɔhe babaoo loo wɔfeɔ yeyeeye po akɛ, atsɔɔɔ saji komɛi ashishi jogbaŋŋ kɛmɔɔɔ shi. Shi moŋ, wɔbaanyɛ wɔná hekɛnɔfɔɔ akɛ kɛ́ wɔkɛ tsuishitoo mɛ Yehowa lɛ, ebaatsɔ tsulɔ anɔkwafo lɛ nɔ ekɛ nɔ ni he hiaa lɛ aha “yɛ be ni sa nɔ.”
5. Jajelɔ 3:1-8 lɛ hesusumɔ he yɛ sɛɛnamɔ yɛ mɛɛ gbɛ nɔ?
5 Nilelɔ Maŋtsɛ Salomo wie nibii srɔtoi 28 he, ni eko fɛɛ eko yɛ “ebe ní ato.” (Jajelɔi 3:1-8) Nɔ ni Salomo wie, kɛ nɔ ni ewiemɔ lɛ tsɔɔ lɛ shishinumɔ baaye abua wɔ koni wɔle be ni sa kɛ be ni esaaa kɛha nifeemɔi komɛi taakɛ Nyɔŋmɔ buɔ lɛ lɛ. (Hebribii 5:14) Ni no feemɔ baaye ebua wɔ koni wɔsaa wɔshihilɛi bɔ ni sa.
“Yaafo Be yɛ, ni Ŋmɔlɔ Be Yɛ”
6, 7. (a) Mɛni haa mɛi ni susuɔ nii ahe ŋmɛnɛ lɛ ‘foɔ’? (b) Je lɛ bɔɔ mɔdɛŋ ni etsĩ shihilɛ ni hiɛdɔɔ yɔɔ mli ni wɔnaa wɔhe yɛ mli lɛ naa yɛ mɛɛ gbɛ nɔ?
6 Eyɛ mli akɛ “yaafo be yɛ, ni ŋmɔlɔ be yɛ” moŋ, shi namɔ sumɔɔ yaafo fe ŋmɔlɔ? (Jajelɔi 3:4) Mɔbɔ sane ji akɛ, wɔyɛ jeŋ ko ni haa wɔ nɔ ni wɔɔdaamɔ nɔ wɔfo. Adafitswai ni haoɔ mɔ pɛ awieɔ yɛ he fɛɛ he. Wɔtsui fãa kɛ́ wɔnu akɛ gbekɛbii miitswara amɛnanemɛi skulbii atui yɛ skul, ákɛ fɔlɔi miifee amɛbii niseniianii, ákɛ hegbeyeiwolɔi miigbe mɛi ni efeko nɔ ko loo amɛmiito amɛ kpá, kɛ nɔ ni akɛɛ atsɛɔ lɛ adebɔɔ mli osharai miikpata adesai awala kɛ nibii ahiɛ lɛ. Ajieɔ gbekɛbii ni hɔmɔ miiye amɛ, ní amɛhiŋmɛii enyɔ kɛbote mli, kɛ abobalɔi ni ejo foi kɛshi amɛshihilɛhei lɛ yɛ tɛlivishiŋ nɔ ni wɔnaa be fɛɛ be. Wiemɔi komɛi ní be ko lɛ aleee, tamɔ weku shishi bulemɔ, AIDS, muawai kɛ tawuu, kɛ El Niño ebatee yeyeeyefeemɔ shi yɛ wɔjwɛŋmɔi kɛ wɔtsuii amli amrɔ nɛɛ—ni eko fɛɛ eko yɛ nɔ ni etsuɔ.
7 Ŋwanejee ko bɛ he akɛ, ŋmɛnɛ je lɛ eyi obɔ kɛ oshara kɛ tsuiŋdɔlɛ. Shi kɛlɛ, oookɛɛ nɔ ni aaba bɔ ni hiɛdɔɔ yɔɔ shihilɛ lɛ mli lɛ shi lɛ, hiɛtserɛjiemɔ nitsumɔhei yaa nɔ amɛjieɔ nibii ni nilee bɛ mli, nibii ni bɛ hiŋmɛi nɔ, ní bei pii lɛ, jeŋba shara kɛ awuiyeli nifeemɔi yɔɔ mli amɛtsɔɔ, ni ato he gbɛjianɔ koni akɛlaka wɔ ni wɔku wɔhiɛ wɔfɔ̃ haomɔi ni mɛi krokomɛi naa mli amanehulu lɛ anɔ. Shi esaaa akɛ wɔkɛ mumɔ ni ŋmɛɔ nɔ fɛɛ nɔ feemɔ gbɛ, ni ji kwashiai ashwɛmɔi kɛ yakayaka ŋmɔlɔ ni nakai hiɛtserɛjiemɔi lɛ kɛhaa futuɔ anɔkwa miishɛɛ namɔ. Miishɛɛ, ni ji Nyɔŋmɔ mumɔ lɛ yibii lɛ ji nɔ ko ni Satan je lɛ nyɛŋ ekɛha kɔkɔɔkɔ.—Galatabii 5:22, 23; Efesobii 5:3, 4.
8. Ani esa akɛ Kristofoi ni yɔɔ ŋmɛnɛ lɛ agbala amɛjwɛŋmɔ kɛya yaafo nɔ titri loo ŋmɔlɔ nɔ titri? Tsɔɔmɔ mli.
8 Akɛni wɔmiiyɔse je lɛ shihilɛ fɔŋ lɛ hewɔ lɛ, wɔbaanyɛ wɔnu shishi akɛ, ŋmɛnɛ jeee be ni sa akɛ abu ŋmɔlɔ akɛ nɔ ko ni he hiaa fe nine. Jeee be ni esa akɛ wɔkɛhi shi kɛha hiɛtserɛjiemɔ kɛ shwɛmɔ loo ni wɔŋmɛ “miishɛɛnamɔ” gbɛ koni ebaye mumɔŋ nibii asɛɛtiumɔ hiɛ nɛ. (Okɛto Jajelɔ 7:2-4 he.) Bɔfo Paulo kɛɛ akɛ “mɛi ni tsuɔ je nɛɛ he nii lɛ” afee ‘tamɔ mɛi ni tsuuu he nii.’ Mɛni hewɔ? Ejaakɛ “je nɛŋ subaŋ lɛ hoɔ yaa.” (1 Korintobii 7:31) Anɔkwa Kristofoi hiɛ hiɔ amɛhe nɔ be fɛɛ be yɛ hiɛdɔɔ ni yɔɔ be ni wɔyɔɔ mli nɛɛ he lɛ he.—Filipibii 4:8.
Amɛmiifo Moŋ, Shi Amɛyɛ Miishɛɛ Diɛŋtsɛ!
9. Mɛɛ shihilɛ ni yɔɔ mɔbɔ hi shi dani Nu Afua lɛ ba, ni mɛni enɛ tsɔɔ kɛha wɔ ŋmɛnɛ?
9 Mɛi ni hi shi yɛ jeŋ fɛɛ Nu Afua lɛ mli lɛ kɛ hiɛdɔɔ susuuu shihilɛ he. Amɛtee nɔ amɛfee nibii ni amɛfeɔ daa lɛ, ni amɛfooo yɛ ‘gbɔmɛi anɔ fɔŋ feemɔ ni fa yɛ shikpɔŋ lɛ nɔ lɛ he,’ ni amɛfee mɛi ni nɔ ko jeee amɛhe sane yɛ be mli ni “awo shikpɔŋ lɛ nɔ obɔ kɛ yiwalɛ” lɛ. (1 Mose 6:5, 11) Yesu wie nakai shihilɛ ni yɔɔ mɔbɔ lɛ he, ni egba su ni tamɔ nakai nɔŋŋ ni yɔɔ mɛi ni yɔɔ wɔgbii nɛɛ amli lɛ hu ahe lɛ efɔ̃ shi. Ebɔ kɔkɔ akɛ: “Bɔ ni yɔɔ yɛ gbii ni nyiɛ nu afua lɛ hiɛ lɛ amli, ni mɛi lɛ hiɛ niyeli kɛ ninumɔ kɛ yoowɛɛ kɛ gbalahamɔ mli aahu kɛyashi gbi ni Noa yabote adeka lɛ mli, ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee lɛ, nakai nɔŋŋ gbɔmɔbi lɛ baa lɛ aaatamɔ.”—Mateo 24:38, 39.
10. Israelbii ni hi shi yɛ Hagai gbii lɛ amli lɛ tsɔɔ akɛ amɛbɛ hiɛsɔɔ kɛha Yehowa be ní eto lɛ yɛ mɛɛ gbɛ nɔ?
10 Aaafee afii 1,850 yɛ Nu Afua lɛ sɛɛ, yɛ Hagai gbii lɛ amli lɛ, Israelbii babaoo jie mumɔŋ nibii ni akɛ hiɛdɔɔ susuuu he ni tamɔ nakai nɔŋŋ kpo.[1] Akɛni amɛbɛ dekã kɛmiitiu nibii ni amɛnyaa he lɛ asɛɛ hewɔ lɛ, amɛnyɛɛɛ amɛyoo akɛ be ni amɛyɔɔ mli lɛ ji be ni esa akɛ amɛkɛ Yehowa nibii aye klɛŋklɛŋ gbɛhe. Wɔkaneɔ akɛ: “Nɛkɛ maŋ nɛɛ kɛɔ akɛ: Be lɛ shɛko, be ni akɛaama Yehowa we lɛ! Shi Yehowa wiemɔ lɛ tsɔ gbalɔ Hagai nine nɔ ba akɛ: Aso nyɛ lɛ eshɛ be eha nyɛ, ni nyɛhiɔ nyɛtsũi ni asɛŋ nɔ lɛ amli, beni nɛkɛ shia nɛɛ kã shi amaŋfɔ lɛ lo? No hewɔ lɛ agbɛnɛ, bɔ ni Yehowa Zebaot kɛɛ nɛ: Nyɛjwɛŋa nyɛgbɛi lɛ ahe!”—Hagai 1:1-5.
11. Mɛɛ sanebimɔi esa akɛ wɔbi wɔhe?
11 Ákɛ Yehowa Odasefoi ni hiɛ gbɛnaa nii kɛ hegbɛi yɛ Yehowa hiɛ ŋmɛnɛ taakɛ nakai Israelbii ni hi shi yɛ Hagai gbii lɛ amli lɛ ji lɛ, esa akɛ wɔ hu wɔbɔ mɔdɛŋ waa ni wɔsusu wɔshihilɛ gbɛ̀i lɛ ahe kɛ hiɛdɔɔ. Ani ‘wɔfoɔ’ yɛ je lɛŋ shihilɛi kɛ heguɔgbee ni enɛ kɛbaa Nyɔŋmɔ gbɛi lɛ nɔ lɛ he? Kɛji akɛ gbɔmɛi kpoo shihilɛ mli ni Nyɔŋmɔ yɔɔ, loo amɛkpoo ejalɛ shishitoo mlai lɛ yɛ faŋŋ lɛ, ani edɔɔ wɔ? Ani wɔfeɔ wɔnii tamɔ aŋkroaŋkroi ni akadi amɛ, ní Ezekiel na amɛ yɛ ninaa mli aaafee afii 2,500 ni eho nɛ lɛ?[2] Wɔkaneɔ yɛ amɛhe akɛ: “Yehowa kɛɛ [nuu ní wo klala ni woloŋmaatɔ ŋmɔ ehɛ] lɛ akɛ: Yaakpa shi kɛtsɔ maŋ lɛ teŋ, kɛtsɔ Yerusalem teŋ, ni okadi hii ni dɔmɔɔ ŋtsɔi ni amɛyeɔ ŋkɔmɔ yɛ nihiinii fɛɛ ni afeɔ yɛ eteŋ lɛ hewɔ lɛ ahiɛnaai!”—Ezekiel 9:4.
12. Mɛɛ shishinumɔ Ezekiel 9:5, 6 lɛ hiɛ kɛha gbɔmɛi ŋmɛnɛ?
12 Nɔ ni sane nɛɛ tsɔɔ kɛha wɔ ŋmɛnɛ lɛ bafeɔ faŋŋ kɛ wɔkane famɔi ni akɛha hii ekpaa ni hiɛ jaramɔ dadei lɛ: “Nyɛnyiɛa esɛɛ kɛkpaa ma lɛŋ, ni nyɛtswiaa nii; nyɛhiŋmɛii akanaa mɔbɔ, ni nyɛkabaa yi hu! Onukpai kɛ oblahii kɛ oblayei kɛ gbekɛbii kɛ yei lɛ, nyɛgbea amɛ butubutu; shi mɔ fɛɛ mɔ ni okadi lɛ yɔɔ ehe lɛ nyɛkataa ehe; ni nyɛbɔia kɛjɛa mi he krɔŋkrɔŋ lɛ!” (Ezekiel 9:5, 6) Wɔyibaamɔ kɛmiijɛ nakai amanehulu kpeteŋkpele ni baa oyayaayai lɛ mli lɛ damɔ yɔsemɔ ní wɔɔyɔse akɛ ŋmɛnɛ ji be ni esa akɛ akɛfo lɛ nɔ.
13, 14. (a) Mɛɛ gbɔmɛi Yesu kɛɛ amɛyɔɔ miishɛɛ lɛ? (b) Tsɔɔmɔ nɔ hewɔ ni osusuɔ akɛ nɛkɛ wiemɔ nɛɛ saa Yehowa Odasefoi lɛ.
13 Shi kɛlɛ, anɔkwale ní eji akɛ Yehowa tsuji ‘foɔ’ yɛ je lɛŋ shihilɛ ni efite lɛ he lɛ etsĩii amɛ miishɛɛnamɔ naa. Jeee nakai kwraa! Amɛji gbɔmɛi akuu ni yɔɔ miishɛɛ fe fɛɛ yɛ shikpɔŋ lɛ nɔ. Yesu kɛ shishitoo mla kɛha miishɛɛnamɔ lɛ ha beni ekɛɛ akɛ: “Miishɛɛ ji mɛi ni amɛhiɛ yɔɔ amɛmumɔŋ hiamɔ nii anɔ lɛ, . . . mɛi ni yeɔ ŋkɔmɔ, . . . mɛi ni he jɔ lɛ, . . . mɛi ni jalɛ he hɔmɔ kɛ kumai yeɔ amɛ lɛ, . . . mɛi ni naa mɔbɔ, . . . mɛi ni tsuii amli tse lɛ, . . . mɛi ni sumɔɔ toiŋjɔlɛ, . . . mɛi ni awaa amɛyi yɛ jalɛ hewɔ lɛ.” (Mateo 5:3-10, NW) Odaseyelii babaoo yɛ ni tsɔɔ akɛ, nɛkɛ wiemɔi nɛɛ kɔɔ Yehowa Odasefoi ahe akɛ kuu, fe bɔ ni ekɔɔ jamɔŋ gbɛjianɔtoo krokomɛi ahe.
14 Kɛjɛ be mli ni akɛ anɔkwa jamɔ ma shi ekoŋŋ yɛ afi 1919 titri ji be ni Yehowa webii ni yɔɔ miishɛɛ lɛ ná nɔ ni amɛbaadamɔ nɔ amɛná “miishɛɛ.” Amɛkɛ mɛi ni ku amɛsɛɛ kɛjɛ Babilon yɛ afii ohai ekpaa D.Ŋ.B. lɛ ná niiashikpamɔ ni yɔɔ miishɛɛ mli gbɛfaŋnɔ yɛ mumɔŋ gbɛ nɔ akɛ: “Beni Yehowa kpala Zion nomii lɛ kɛba lɛ, efee wɔ tamɔ nɔ ni la wɔlaa. No mli lɛ wɔdaaŋ yimɔ obɔbɔ kɛ ŋmɔlɔ ni wɔlilɛi hu kɛ nyamɔ lala; . . . Yehowa efee nibii wuji eha wɔ; no hewɔ wɔmii eshɛ wɔhe nɛɛ.” (Lala 126:1-3) Yɛ mumɔŋ ŋmɔlɔ lɛ mli po lɛ, Yehowa Odasefoi haa hiɛdɔɔ ni yɔɔ bei lɛ ahe lɛ hiɔ amɛjwɛŋmɔ mli lolo. Kɛji jeŋ hee lɛ ba diɛŋtsɛ ni shikpɔŋ lɛ nɔ bii lɛ mɔ “anɔkwa wala lɛ mli” lɛ, no dani be lɛ baashɛ ni wɔkɛ ŋmɔlɔ baaye yaafo najiaŋ kɛya naanɔi anaanɔ.—1 Timoteo 6:19; Kpojiemɔ 21:3, 4.
“Be yɛ ni Aloɔ Mɔ Atuu, ni Be yɛ ni Alooo Mɔ Atuu”
15. Mɛni hewɔ Kristofoi halaa nanemɛi amli lɛ?
15 Kristofoi halaa mɛi ni amɛkɛbɔɔ akɛ amɛnanemɛi lɛ mli. Amɛhaa Paulo kɔkɔbɔɔ lɛ hiɔ amɛjwɛŋmɔ mli akɛ: “Nyɛkahaa ashishiua nyɛ. Naanyobɔɔ fɔŋ fiteɔ jeŋba kpakpa.” (1 Korintobii 15:33) Ni nilelɔ Maŋtsɛ Salomo wie akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeená amane.”—Abɛi 13:20.
16, 17. Te Yehowa Odasefoi buɔ naanyobɔɔ, nyiɛmɔ ni tsɔɔ gbalashihilɛ hiɛ, kɛ gbalashihilɛ amɛhaa tɛŋŋ, ni mɛni hewɔ?
16 Yehowa tsuji halaa aŋkroaŋkroi ní yɔɔ suɔmɔ kɛha Yehowa kɛ ejalɛ lɛ, tamɔ bɔ ni amɛyɔɔ lɛ nɔŋŋ akɛ amɛnanemɛi. Yɛ be mli ni amɛhiɛ sɔɔ ni amɛnáa amɛkɛ amɛ naanyobɔɔ lɛ mli miishɛɛ lɛ, amɛkɛ nilee kpooɔ nyiɛmɔ ni tsɔɔ gbalashihilɛ hiɛ lɛ mli nɔ fɛɛ nɔ feemɔ gbɛ ni aŋmɛɔ ni yaa nɔ babaoo yɛ maji komɛi amli ŋmɛnɛ lɛ. Yɛ nɔ najiaŋ ni amɛkɛ amɛhe aaawo mli akɛ miishɛɛnamɔ ni yeee awui lɛ, amɛbuɔ nyiɛmɔ ni tsɔɔ gbalashihilɛ hiɛ akɛ nifeemɔ ni hiɛdɔɔ yɔɔ mli ni akɛboteɔ gbalashihilɛ mli, ni ákɛ, esa akɛ mɔ kɛ ehe awo mli kɛji efee klalo yɛ gbɔmɔtsoŋ, jwɛŋmɔŋ, kɛ mumɔŋ—ni agbɛnɛ hu eyeɔ ehe yɛ Ŋmalɛ naa—koni ebote gbalashihilɛ wekukpaa ni hiɔ shi daa lɛ mli.—1 Korintobii 7:36.
17 Ekolɛ, mɛi komɛi baanu he akɛ susumɔ ni tamɔ enɛ ni ahiɛ yɛ nyiɛmɔ ni tsɔɔ gbalashihilɛ hiɛ kɛ gbalashihilɛ mlibotemɔ he lɛ be eho. Shi Yehowa Odasefoi eŋmɛɛɛ gbɛ ni tipɛŋfoi anɔnyɛɛ aná nanemɛi ni amɛhalaa loo yiŋkpɛi ni amɛfeɔ yɛ nyiɛmɔ ni tsɔɔ gbalashihilɛ hiɛ kɛ gbalashihilɛ mlibotemɔ he lɛ nɔ hewalɛ. Amɛle akɛ ‘abuɔ nilee jalɔ kɛtsɔ enitsumɔi anɔ.’ (Mateo 11:19) Akɛni Yehowa le nɔ ni hi fe fɛɛ be fɛɛ be hewɔ lɛ, amɛkɛ hiɛdɔɔ tsuɔ eŋaawoo akɛ abote gbalashihilɛ mli yɛ “Nuntsɔ lɛ mli” lɛ he nii. (1 Korintobii 7:39; 2 Korintobii 6:14) Amɛyeee amɛhe oyai kɛboteee gbalashihilɛ mli, kɛ susumɔ ni ejaaa akɛ, akpɛlɛɔ gbalamlitsemɔ loo gbalamligbalamɔ nɔ akɛ eja gbɛ kɛji naagba ba gbalashihilɛ wekukpaa lɛ mli. Amɛŋɔɔ amɛbe ni amɛkɛtaoɔ hefatalɔ ni sa, ni amɛyɔseɔ akɛ kɛ́ akã gbalashihilɛ kita lɛ, Yehowa mla nɛɛ tsuɔ nii, akɛ: “Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli.”—Mateo 19:6; Marko 10:9.
18. Mɛni baanyɛ afee shishijee nɔ̃ kɛha gbalashihilɛ ni miishɛɛ yɔɔ mli?
18 Gbalashihilɛ ji hetuu-kɛhamɔ ni akɛhaa yɛ wala be fɛɛ mli ní biɔ gbɛjianɔtoo kpakpa. Nuu baanyɛ abi ehe yɛ shishinumɔ ni ja naa akɛ, ‘Ani eji mɔ ni sa mi diɛŋtsɛ?’ Shi nakai nɔŋŋ hu ehe miihia ni ebi akɛ, ‘Ani miji mɔ ni sa lɛ diɛŋtsɛ? Ani Kristofonyo ni eda yɛ mumɔŋ ji mi, ni manyɛ matsu emumɔŋ hiamɔ nii ahe nii?’ Sɔ̃ kã mɛi enyɔ ni baatsɔmɔ hefatalɔi lɛ fɛɛ anɔ yɛ Yehowa hiɛ akɛ amɛhe awa yɛ mumɔŋ, ní amɛnyɛ amɛto gbalashihilɛ ekomefeemɔ ni mli wa shishi bɔ ni Nyɔŋmɔ baakpɛlɛ nɔ. Kristofoi gbalashihilɛ mli hefatalɔi akpei abɔ baanyɛ aye he odase akɛ, akɛni amaa nɔ̃ hamɔ nɔ mi fe ehemɔ hewɔ lɛ, be-fɛɛ sɔɔmɔ nitsumɔ lɛ ji gbalashihilɛ ni miishɛɛ yɔɔ mli lɛ shishijee ni hi fe fɛɛ.
19. Mɛni hewɔ Kristofoi komɛi hiɔ shi oshija lɛ?
19 Kristofoi komɛi haaa ‘aloo’ amɛ ‘atuu’ kɛtsɔ oshijayeli shihilɛ ni amɛhalaa akɛ amɛaahi mli yɛ sanekpakpa lɛ hewɔ lɛ nɔ. (Jajelɔ 3:5) Mɛi krokomɛi hu tsiɔ gbalashihilɛ mlibotemɔ kɛyaa sɛɛ kɛyashi be mli ni amɛbaanu he akɛ amɛhe esa yɛ mumɔŋ ni amɛkɛaaná hefatalɔ ni sa. Shi kɛlɛ, nyɛhaa wɔkaia Kristofoi oshijafoi ni taoɔ ni amɛná naanyobɔɔ ni mli wa kɛ sɛɛnamɔi ni yɔɔ gbalashihilɛ mli ni kɛlɛ, amɛnáaa hefatalɔ lɛ. Wɔbaanyɛ wɔná nɔmimaa akɛ, Yehowa náa ŋwɛi shishitoo mlai ni amɛŋmɛɛɛ he kɛsaaa yɛ amɛgbalashihilɛ mlibotemɔ sɛɛtiumɔ mli lɛ he miishɛɛ. Wɔbaafee jogbaŋŋ hu akɛ wɔhiɛ baasɔ anɔkwa ni amɛyeɔ lɛ, ni wɔkɛ hewalɛwoo ni sa ni he hiaa amɛ lɛ aha amɛ.
20. Mɛni hewɔ bei komɛi lɛ, gbalashihilɛ mli hefatalɔi po haaa ‘aloo’ amɛ ‘atuu’ lɛ?
20 Ani esa akɛ gbalashihilɛ mli hefatalɔi po akaha ‘aloo’ amɛ ‘atuu’ yɛ bei komɛi amli? Eka shi faŋŋ akɛ, nakai eji yɛ shishinumɔ ko naa, ejaakɛ Paulo wie akɛ: “Anyɛmimɛi, nɔ ni mikɛɔ ji akɛ, be lɛ faaa dɔŋŋ; nɔ ni eshwɛ ji akɛ, mɛi ni yɔɔ ŋamɛi tete afee tamɔ mɛi ni bɛ eko.” (1 Korintobii 7:29) Enɛ hewɔ lɛ, esa akɛ bei komɛi lɛ, gbalashihilɛ mli miishɛɛ kɛ jɔɔmɔi lɛ aba gbɛhe ni ji enyɔ yɛ teokrase gbɛnaa nii asɛɛ. Susumɔ ni ŋmɛɔ pɛpɛɛpɛ yɛ sane nɛɛ he lɛ gbɔjɔŋ gbalashihilɛ lɛ, shi moŋ ebaawaje lɛ ejaakɛ eyeɔ ebuaa ni akɛkaiɔ hefatalɔi enyɔ lɛ fɛɛ akɛ esa akɛ Yehowa afee mɔ titri yɛ amɛwekukpaa lɛ mli.—Jajelɔi 4:12.
21. Mɛni hewɔ esaaa akɛ wɔkojoɔ gbalashihilɛ mli hefatalɔi yɛ bii afɔmɔ he lɛ?
21 Kɛfata he lɛ, gbalashihilɛ mli hefatalɔi komɛi etsi amɛhe kɛjɛ bii afɔmɔ he bɔni afee ni amɛná hegbɛ koni amɛkɛtsu amɛsɔɔmɔ kɛha Nyɔŋmɔ lɛ he nii. Enɛ efee afɔleshaa yɛ amɛgbɛfaŋ, ni Yehowa baawo amɛ nyɔmɔ nakai pɛpɛɛpɛ. Heniianaa lɛ, yɛ be mli ni Biblia lɛ woɔ oshijayeli he hewalɛ yɛ sanekpakpa lɛ hewɔ lɛ, ewieee nɔ ko pɔtɛɛ yɛ bii ni afɔɔɔ yɛ nakai yiŋtoo lɛ nɔŋŋ he. (Mateo 19:10-12; 1 Korintobii 7:38; okɛto Mateo 24:19 kɛ Luka 23:28-30 he.) No hewɔ lɛ, esa akɛ gbalashihilɛ mli hefatalɔi akpɛ amɛ diɛŋtsɛ amɛyiŋ yɛ bɔ ni amɛshihilɛ ŋmɛɔ amɛ gbɛ kɛ bɔ ni amɛnuɔ he amɛhaa lɛ he. Bɔ fɛɛ bɔ ni ekolɛ nakai yiŋkpɛɛ lɛ baatamɔ aha lɛ, esaaa akɛ awieɔ ashiɔ gbalashihilɛ mli hefatalɔi lɛ.
22. Mɛni ehe hiaa akɛ wɔle?
22 Hɛɛ, “nɔ fɛɛ nɔ yɛ ebe ní ato, ni nitsumɔ fɛɛ nitsumɔ ni yɔɔ ŋwɛi shishi nɛɛ yɛ ebe.” “Tawuu” po “be yɛ, ni hejɔlɛ be yɛ.” (Jajelɔi 3:1, 8) Nikasemɔ ni nyiɛ sɛɛ lɛ baatsɔɔ nɔ hewɔ ni ehe hiaa akɛ wɔle enyɔ lɛ mli nɔ ni be eshɛ amrɔ nɛɛ.
Ani Obaanyɛ Otsɔɔ Mli?
◻ Mɛni hewɔ ehe hiaa ni wɔle akɛ “nɔ fɛɛ nɔ yɛ ebe ní ato” lɛ?
◻ Mɛni hewɔ be nɛɛ titri ji “yaafo be” lɛ?
◻ Mɛni hewɔ eyɛ mli akɛ Kristofoi ‘miifo’ moŋ, shi kɛlɛ amɛyɛ miishɛɛ diɛŋtsɛ lɛ?
◻ Kristofoi komɛi tsɔɔ akɛ amɛbuɔ ŋmɛnɛŋmɛnɛ be nɛɛ akɛ ‘be ni akɛlooo mɔ atuu’ yɛ mɛɛ gbɛ nɔ?
[Mfonirii ni yɔɔ baafa 6, 7]
Eyɛ mli akɛ Kristofoi ‘foɔ’ yɛ je lɛŋ shihilɛi ahewɔ moŋ . . .
. . . shi kɛlɛ, amɛji gbɔmɛi ni yɔɔ miishɛɛ fe fɛɛ yɛ je lɛ mli
[Caption on page 8]
Be-fɛɛ sɔɔmɔ nitsumɔ lɛ ji nɔdaamɔnɔ ni hi fe fɛɛ kɛha gbalashihilɛ ni miishɛɛ yɔɔ mli