Klɛŋklɛŋ Wolo Ni Akɛmaje Korintobii Lɛ

7 Agbɛnɛ, yɛ nɔ ni kɔɔ nibii ni nyɛŋma lɛ ahe lɛ, ehi jogbaŋŋ kɛhã nuu akɛ ekata yoo he;* 2 shi akɛni ajwamaŋbɔɔ* ehe shi waa hewɔ lɛ, nuu fɛɛ nuu aná lɛ diɛŋtsɛ eŋa,+ ni yoo fɛɛ yoo aná lɛ diɛŋtsɛ ewu.+ 3 Wu afee eŋa lɛ gbɛnaa nii ehã lɛ, ni ŋa lɛ hu afee nakai nɔŋŋ ehã ewu.+ 4 Ŋa lɛ bɛ hewalɛ yɛ lɛ diɛŋtsɛ egbɔmɔtso lɛ nɔ, shi moŋ ewu lɛ yɔɔ; nakai nɔŋŋ wu lɛ hu bɛ hewalɛ yɛ lɛ diɛŋtsɛ egbɔmɔtso lɛ nɔ, shi moŋ eŋa lɛ yɔɔ. 5 Nyɛteŋ mɔ ko mɔ ko akatsĩ mɔ kroko lɛ naa akɛ ekɛ lɛ akaná bɔlɛ, ja nyɛyi enyɔ lɛ fɛɛ nyɛkpɛlɛ akɛ nyɛbaafee nakai kɛyashi be ko, koni nyɛná be kɛhã sɔlemɔ, no sɛɛ lɛ, nyɛsaa nyɛfea ekome ekoŋŋ, bɔ ni afee ni Satan akaya nɔ eka nyɛ yɛ nyɛhe nɔ ni nyɛnyɛɛɛ nyɛye lɛ hewɔ. 6 Shi nyɛŋɔa nɔ ni mikɛɔ nɛɛ akɛ gbɛ ni miiŋmɛ nyɛ ni nyɛfee nakai, shi jeee kitã miwoɔ nyɛ. 7 Shi miná ni kulɛ, gbɔmɛi fɛɛ tamɔ bɔ ni miyɔɔ lɛ. Shi mɔ fɛɛ mɔ yɛ lɛ diɛŋtsɛ enikeenii+ kɛjɛ Nyɔŋmɔ dɛŋ, mɔ ko nɔ nɛkɛ, mɔ kroko hu nɔ nɛkɛ.

8 Agbɛnɛ, miikɛɛ oshijafoi* kɛ yei okulafoi lɛ akɛ, ehi jogbaŋŋ kɛhã amɛ akɛ amɛbaaya nɔ amɛhi shi tamɔ bɔ ni miyɔɔ lɛ.+ 9 Shi kɛ́ amɛnyɛɛɛ amɛhe nɔ amɛye lɛ, no lɛ, amɛbote gbalashihilɛ mli, ejaakɛ ehi akɛ mɔ baabote gbalashihilɛ mli fe nɔ ni akɔnɔ baahao lɛ.*+

10 Mɛi ni ebote gbalashihilɛ mli lɛ, mikɛ gbɛtsɔɔmɔi miihã amɛ, jeee mi, shi moŋ Nuŋtsɔ lɛ, akɛ esaaa akɛ ŋa tseɔ ehe kɛjeɔ ewu he.+ 11 Shi kɛ́ etse ehe po lɛ, eya nɔ ehi shi oshija, kɛjeee nakai lɛ, ekɛ ewu lɛ ayakpãtã; ni esaaa akɛ wu hu shiɔ eŋa.+

12 Shi mɛi ni eshwɛ lɛ, mi, hɛɛ, mi, jeee Nuŋtsɔ lɛ,+ miikɛɛ amɛ akɛ: Kɛ́ nyɛmi nuu ko yɛ ŋa ni heee yeee, ni yoo lɛ ekpɛlɛ akɛ ekɛ lɛ baahi shi lɛ, ekashi yoo lɛ; 13 ni kɛ́ yoo ko hu yɛ wu ni heee yeee, ni nuu lɛ ekpɛlɛ akɛ ekɛ lɛ baahi shi lɛ, yoo lɛ akashi ewu lɛ. 14 Ejaakɛ afee wu ni heee yeee lɛ krɔŋkrɔŋ yɛ eŋa lɛ hewɔ, ni ŋa ni heee yeee lɛ hu, afee lɛ krɔŋkrɔŋ yɛ nyɛmi nuu lɛ hewɔ; kɛjeee nakai kulɛ, nyɛbii lɛ baafee mɛi ni he tseee, shi amrɔ nɛɛ, amɛyɛ krɔŋkrɔŋ. 15 Shi kɛ́ mɔ ni heee yeee lɛ hala akɛ ebaashi* lɛ, hã ni eshi; afimɔko nyɛmi nuu loo nyɛmi yoo ko yɛ shihilɛi ni tamɔ enɛɛmɛi amli, moŋ lɛ, Nyɔŋmɔ etsɛ nyɛ kɛba toiŋjɔlɛ mli.+ 16 Ejaakɛ ŋa, te ooofee tɛŋŋ ole kɛji bo obaahere owu lɛ yiwala?+ Aloo wu, te ooofee tɛŋŋ ole kɛji bo obaahere oŋa lɛ yiwala?

17 Shi mɔ fɛɛ mɔ anyiɛ yɛ gbɛfaŋnɔ ni Yehowa* kɛhã lɛ, kɛ bɔ ni Nyɔŋmɔ tsɛ lɛ lɛ naa pɛpɛɛpɛ.+ Ni no hewɔ lɛ, mikɛ gbɛtsɔɔmɔ nɛɛ hãa yɛ asafoi lɛ fɛɛ amli. 18 Ani afo mɔ ko ketia momo be ni atsɛ lɛ lɛ?+ Ekatsɔ ehe mɔ ni afoko lɛ ketia. Ani atsɛ mɔ ko be ni eji mɔ ni afoko lɛ ketia? Ekahã afo lɛ ketia.+ 19 Ketiafoo jeee nɔ ko, ni ketia ni afoko mɔ ko hu jeee nɔ ko;+ Nyɔŋmɔ kitãi lɛ anɔyeli moŋ ji nɔ ko.+ 20 Shihilɛ fɛɛ shihilɛ mli ni atsɛ mɔ ko yɛ lɛ, eya nɔ ehi mli.+ 21 Ani be ni atsɛ bo lɛ, nyɔŋ ji bo? Kaahã no gba onaa;+ shi kɛ́ obaanyɛ oye ohe lɛ, no lɛ, ŋɔɔ hegbɛ lɛ kɛfee nakai. 22 Ejaakɛ mɔ fɛɛ mɔ ni atsɛ lɛ yɛ Nuŋtsɔ lɛ mli be ni eji nyɔŋ lɛ, eye ehe, ni eji Nuŋtsɔ lɛ nɔ;+ nakai nɔŋŋ mɔ fɛɛ mɔ ni be ni atsɛ lɛ lɛ ejeee nyɔŋ lɛ, Kristo nyɔŋ ni. 23 Ahé nyɛ kɛ jara ni wa;+ nyɛkatsɔmɔa gbɔmɛi anyɔji dɔŋŋ. 24 Shihilɛ fɛɛ shihilɛ mli ni atsɛ mɔ ko yɛ lɛ, nyɛmimɛi, nyɛhãa eyaa nɔ ehia mli yɛ Nyɔŋmɔ hiɛ.

25 Agbɛnɛ, yɛ oblayei froi* agbɛfaŋ lɛ, mibɛ kitã ko kɛjɛ Nuŋtsɔ lɛ ŋɔɔ, shi moŋ akɛ mɔ ni Nuŋtsɔ lɛ ena lɛ mɔbɔ koni eye anɔkwa lɛ, nɔ ni misusuɔ nɛ.+ 26 No hewɔ lɛ, misusuɔ akɛ ehi jogbaŋŋ kɛhã gbɔmɔ akɛ eya nɔ ehi shi bɔ ni eyɔɔ lɛ, yɛ shihilɛ ni mli wa ni wɔkɛkpeɔ amrɔ nɛɛ hewɔ. 27 Ani afi bo akpɛtɛ oŋa he? Kpa ohe ni otaoɔ ofɛne lɛ.+ Ani oye ohe yɛ oŋa he? Kpa ŋa taomɔ. 28 Shi kɛji obote gbalashihilɛ mli po lɛ, ofeko esha. Ni kɛji oblayoo fro* bote gbalashihilɛ mli lɛ, efeko esha. Shi mɛi ni boteɔ gbalashihilɛ mli lɛ, amɛbaana amanehulu yɛ amɛheloo mli. Shi mi lɛ, miitao ni nyɛhe ajɔ nyɛ.

29 Agbɛnɛ hu, nyɛmimɛi, nɔ ni mikɛɔ ji akɛ, be ni eshwɛ lɛ faaa.+ Kɛjɛ be nɛɛ kɛyaa lɛ, mɛi ni yɔɔ ŋamɛi lɛ afee tamɔ mɛi ni bɛ eko, 30 ni mɛi ni fóɔ lɛ afee tamɔ mɛi ni fóoo, ni mɛi ni nyaa lɛ afee tamɔ mɛi ni nyaaa, ni mɛi ni héɔ nii lɛ afee tamɔ mɛi ni jeee nɔtsɛmɛi, 31 ni mɛi ni kɛ je lɛ tsuɔ nii lɛ afee tamɔ mɛi ni kɛtsuuu nii kɛmɔɔɔ shi; ejaakɛ je nɛŋ nifeemɔ* lɛ miitsake. 32 Anɔkwa, misumɔɔɔ akɛ nyɛyeɔ nyɛtsui. Nuu oshijafo yeɔ etsui yɛ Nuŋtsɔ lɛ nibii ahe, bɔ ni eeefee esa Nuŋtsɔ lɛ hiɛ. 33 Shi nuu ni ebote gbalashihilɛ mli lɛ yeɔ etsui yɛ je lɛ nibii ahe,+ bɔ ni eeefee esa eŋa hiɛ, 34 ni ejwɛŋmɔ mli eja enyɔ. Agbɛnɛ hu, yoo oshijafo loo oblayoo fro yeɔ etsui yɛ Nuŋtsɔ lɛ nibii ahe,+ koni efee krɔŋkrɔŋ yɛ egbɔmɔtso kɛ emumɔ mli. Shi yoo ni ebote gbalashihilɛ mli lɛ yeɔ etsui yɛ je lɛ nibii ahe, bɔ ni eeefee esa ewu hiɛ. 35 Shi nyɛ diɛŋtsɛ nyɛhilɛkɛhamɔ hewɔ miwieɔ enɛ lɛ, jeee nyɛnaa mitsĩɔ,* shi moŋ koni mikɛkanya nyɛ ni nyɛfee nii ni sa jogbaŋŋ, ni agbɛnɛ hu, ehã nyɛsɔmɔ Nuŋtsɔ lɛ daa ni nɔ ko nɔ ko gbalaaa nyɛjwɛŋmɔ.

36 Shi kɛ́ mɔ ko susuɔ akɛ ebaaa ejeŋ jogbaŋŋ yɛ oshijafo* ni eji lɛ gbɛfaŋ lɛ, kɛ́ ejeee gbekɛ dɔŋŋ lɛ, no lɛ, nɔ ni esa akɛ efee nɛ: Efee nɔ ni esumɔɔ; efeee esha. Amɛbote gbalashihilɛ mli.+ 37 Shi kɛ́ mɔ ko ekpɛ mli yɛ etsui mli, ni nɔ ko nɔ ko enyɛɛɛ enɔ, shi eyɛ hewalɛ yɛ nɔ ni lɛ diɛŋtsɛ esumɔɔ nɔ, ni ekpɛ mli yɛ lɛ diɛŋtsɛ etsui mli akɛ eboteŋ gbalashihilɛ mli* lɛ, ebaaná he sɛɛ.+ 38 Nakai nɔŋŋ hu mɔ fɛɛ mɔ ni boteɔ gbalashihilɛ mli* lɛ baaná he sɛɛ, shi mɔ fɛɛ mɔ ni boteee gbalashihilɛ mli lɛ baaná he sɛɛ fe lɛ.+

39 Ŋa lɛ, gbii abɔ ni ewu hiɛ kã nɛɛ, afi lɛ.+ Shi kɛ́ ewu lɛ gbo* lɛ, eyɛ hegbɛ akɛ ekɛ mɔ fɛɛ mɔ ni esumɔɔ boteɔ gbalashihilɛ mli, yɛ Nuŋtsɔ lɛ mli pɛ.+ 40 Shi yɛ misusumɔ naa lɛ, kɛ́ etee nɔ ehi shi bɔ ni eyɔɔ lɛ, ebaaná miishɛɛ fe kɛ́ ebote gbalashihilɛ mli; ni misusuɔ waa akɛ mi hu miyɛ Nyɔŋmɔ mumɔ lɛ.