Maŋtsɛ Lɛ Akpɔi Lɛ Asɛɛ Ni Anyiɛɔ Pɛpɛɛpɛ
“Okpɔi lɛ ahe mijwɛŋɔ, ni mihiɛ ka ogbɛi lɛ ohe. Ogbɛnai Iɛ ahe mimii shɛɔ, ni mihiɛ kpaŋ owiemɔ Iɛ nɔ.”—LALA 119:15, 16.
1. Mɛni hewɔ mɔ fɛɛ mɔ kɛ nɔ fɛɛ nɔ hu yɔɔ Yehowa akpɔi ashishi lɛ?
MƆ FƐƐ MƆ kɛ nɔ fɛɛ nɔ yɛ Nyɔŋmɔ Ofe Yehowa, naanɔ Maŋtsɛ lɛ akpɔi lɛ ashishi. Lɛ ji Mɔ ni bɔ je muu fɛɛ. Lɛ ji wala fɛɛ jɛɛhe. Lɛ ebɔ shikpɔŋ lɛ ni esaa nɔ ni ahi nɔ. Eji Nyɔŋmɔ gbɛjianɔtolɔ, ni kɛ́ eha anyiɛ egbɛnai asɛɛ lɛ, gbɛjianɔtoo kpakpa hiɔ shi yɛ ebɔɔ nii lɛ fɛɛ mli.—Lala 36:10; Yesaia 45:18; Kpojiemɔ 15:3.
2. Namɔ ji mɔ ni kudɔɔ ŋwɛi ni ŋulamii eyi mli obɔ lɛ, ni yɛ mɛɛ gbɛ nɔ?
2 Yehowa Nyɔŋmɔ ji mɔ ni wo akpɔ akɛ ŋwɛi ni ŋulamii eyi mli obɔ lɛ alɛɛ emli tamɔ buu yɛ shikpɔŋ lɛ nɔ, ni efɔ nine etsɛ ewebii lɛ akɛ: “Nyɛholea nyɛhiŋmɛii anɔ kɛyaa ŋwɛi, ni nyɛkwɛa: Namɔ bɔ enɛɛmɛi? Lɛ Mɔ ni ejieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛi.” Yehowa ji mɔ ni bi Hiob akɛ: “Ani ole ŋwɛi akpɔi lɛ? Aloo bo oto bɔ ni eye shikpɔŋ lɛ nɔ eha?” Lɛ ji mɔ ni enigbalamɔ kɛ hetsimɔ mlai lɛ fimɔɔ ŋulamii kuikui akpekpei abɔ kɛ ŋulamii akpei toi akpei abɔ lɛ, ni no nɔŋŋ yeɔ shikpɔŋ lɛ shibɔlemɔ yɛ be mli ni efãa gbɛ kɛtsɔɔ ŋwɛiniiaŋ lɛ nɔ.—Yesaia 40:26; Hiob 38:33.
3. Namɔ akpɔi anɔ kooloi tsɔɔ amɛhiɔ wala mli, ni mɛni baaba kɛji akɛ amɛbooo toi?
3 Lɛ ji Mɔ ni haa baaŋmɔŋ kwɛ̃ɔ ehaa shikpɔŋ lɛ nɔ fɛfɛo lɛ. Ekpɔi lɛ ji nɔ ni haa dumɔwui kwɛ̃ɔ ni amɛdaraa ni amɛwoɔ yibii. Kooloi sɔrɔtoi babaoo ni anyɛŋ akane yɔɔ shikpɔŋ lɛ nɔ—kɛji shikpɔŋ lɛ yiteŋ yɛ snoo shikpɔji lɛ anɔ kɛyashi nugbɔnɛmɔ kooi lɛ amli, kɛjɛ ŋwɛi shɔŋŋ kɛbashi shikpɔŋ su mli tɔ̃ɔ, kɛjɛ ŋshɔ hiɛ kɛyashi bui ni mli kwɔlɔ lɛ mli. Bɔni afee ni eko fɛɛ eko ni anyɛŋ akane nɛɛ ahi shi lɛ, esa akɛ amɛye akpɔi ni Yehowa kɛha lɛ anɔ. Etsɔ henumɔi anɔ ekɛ ekpɔi ewo amɛmli koni amɛyi ana wala. “Amɛle nii pam.” (Abɛi 30:24) Shi kɛji akɛ loofɔlɔ bibioo ni yɔɔ Alaska lɛ kɛɛ lɛ diɛŋtsɛ ehe akɛ, ‘Mifilikiŋ shitoi akpei abɔ kɛyaŋ Amerika Wuoyigbɛ. Mɛni hewɔ esa akɛ mafee nakai?’ Nakai loofɔlɔ bibioo lɛ baagbo yɛ fɛi be ni snoo nɛɔ lɛ mli. Shi ekɛŋ nakai. Abɔ awo emli akɛ esa akɛ efa gbɛ koni eyi ana wala. Nakai eji yɛ kooloi fɛɛ he. Amɛkɛ henumɔ boɔ akpɔi ni Yehowa, amɛ-Bɔlɔ lɛ etɛo ewo amɛmli lɛ toi. Amɛbɛ nɔ ni amɛbaahala.
4 Mɛɛ nihalamɔ gbɔmɛi yɔɔ, ni mɛni baajɛ mli aba?
4 Shi gbɔmɛi yɛ sɔrɔto. Abɔ wɔ yɛ Nyɔŋmɔ subaŋ nɔ, ni wɔyɛ nɔ ni wɔbaahala. Shi Yehowa ebɔɔɔ wɔ koni wɔtsɔ wɔhenumɔ mli wɔtsu nii yɛ nilee mli pɛ, ni eshiii wɔ hu akɛ mɛi ni leee nɔ ko nɔ ko. Etsɔ ewiemɔ ni ji Biblia lɛ nɔ ekɛ ekpɔi ha wɔ koni wɔyi ana wala. Kɛ wɔye Maŋtsɛ nɛɛ akpɔi nɛɛ anɔ pɛpɛɛpɛ lɛ, wɔbaahi shi. Kɛ́ wɔtsɔ heyeli ni wɔyɔɔ lɛ nɔ wɔku wɔhiɛ wɔshwie nɔ, ni wɔtsɔ wɔ diɛŋtsɛ wɔheyeli gbɛ ni wɔhala lɛ nɔ lɛ, wɔbaagboi. Esa akɛ wɔto gbɛjianɔ bɔ ni no aaaha wɔyi ana wala. Ewaaa kwraa. Lalatsɛ lɛ kɛɛ, “Owiemɔ lɛ ji kane ha minane, kɛ la hu yɛ mitempɔŋ lɛ nɔ.” Yɛ gbɛ kroko nɔ lɛ, “gbɛ ko yɛ ni ja yɛ gbɔmɔ hiɛ, shi enaagbee lɛ, gbele gbɛ ni.” (Lala 119:105; Abɛi 14:12, The New English Bible) Ehe miihia waa yɛ nɛkɛ naagbee be nɛɛ mli akɛ wɔɔŋɔ Lala 119:15, 16 ni awie atsɔɔ Yehowa lɛ akɛ wɔ diɛŋtsɛ wɔwiemɔi: “Okpɔi lɛ ahe mijwɛŋɔ ni mihiɛ ka ogbɛi lɛ ahe. Ogbɛnai lɛ ahe mimii shɛɔ, mihiɛ kpaŋ owiemɔ lɛ nɔ.”
Yehowa, Ewebii Lɛ Agbɛjianɔtolɔ
5. Yehowa ji Israel Kojolɔ, Mlahalɔ kɛ Maŋtsɛ yɛ mɛɛ gbɛi anɔ?
5 Yehowa wie etsɔɔ Mose yɛ Sinai Gɔŋ lɛ nɔ, ni ekɛ akpɔi ha kɛha Israel gbɛtsɔɔmɔ. Nɔ ni ekaaa yɛ enɛɛmɛi amli ji Kitai Nyɔŋma, ni akɛ Nyɔŋmɔ wao eŋmala yɛ tɛtaoi anɔ lɛ. (2 Mose 20:1-17; 31:18) Kɛfata Israel Mlahalɔ ni eji lɛ he lɛ, Yehowa ji amɛ-Kojolɔ, ni etsu nii kɛtsɔ Mose kɛ onukpai krokomɛi anɔ. Mose wo nɛkɛ onukpai nɛɛ aŋaa ni amɛkai akɛ: “Ni nyɛkakwɛa hiɛaŋ yɛ kojomɔ mli; nyɛboa mɔ bibioo kɛ gbɔmɔ agbo fɛɛ toi pɛpɛɛpɛ; nyɛkashea gbɔmɔ hiɛ gbeyei; ejaakɛ kojomɔ lɛ, Nyɔŋmɔ nɔŋ!” (5 Mose 1:17) Yehowa ji amɛ-Maŋtsɛ, lɛ eto gbɔmɛi akpekpei abɔ nɛɛ gbɛjianɔ koni amɛtsu amɛshihilɛ mli nibii ahe nii pɛpɛɛpɛ. Yɛ enɛɛmɛi fɛɛ hewɔ lɛ, egbalɔi lɛ ateŋ mɔ kome jaje yɛ sɛɛ mii akɛ: “Yehowa ji wɔ-Kojolɔ, Yehowa ji wɔ-Mlahalɔ, Yehowa ji wɔ-Maŋtsɛ.”—Yesaia 33: 32, NW.
6. Yehowa bafee Israel Gbɛjianɔtolɔ kɛ Gbɛtsɔɔlɔ yɛ mɛɛ gbɛi anɔ?
6 Ato Israel maŋ lɛ he gbɛjianɔ afee amɛ akutsei, wekui kɛ shiai shiai. Yɛ be mli ni amɛfaa gbɛ kɛtsɔɔ ŋa lɛ nɔ lɛ, Yehowa kɛ gbɛhe loo nitsumɔ woɔ akutso fɛɛ akutso dɛŋ yɛ gbɛfaa lɛ mli. Kɛ amɛbabɔ ŋsara amɛbɔle kpeebuu lɛ, akutso fɛɛ akutso naa shidaamɔ he. (4 Mose 2:1-34; Yoshua 7:14) Yehowa tsɔɔ atatu ko nɔ etsɔɔ amɛ amɛhetsimɔ loo gbɛfaa: “Ni be fɛɛ be ni atatu lɛ aaawo ehe nɔ kɛaajɛ buu lɛ nɔ lɛ, kɛkɛ lɛ Israelbii lɛ efa, ni he ni atatu lɛ aaawa yɛ lɛ, jɛi Israelbii lɛ bɔɔ ŋsara yɛ. Yehowa famɔ naa Israelbii lɛ faa yɛ, ni Yehowa famɔ naa amɛbɔɔ ŋsara yɛ.”—4 Mose 9:17, 18.
7. Namɔ baanyɛ afee tsakemɔi, ni efee nakai hu yɛ Israel gbɛjianɔtoo mli?
7 Yɛ be mli ni tsakemɔ yɛ gbɛjianɔtoo he miihia lɛ, Yehowa fee nakai. Mose wie akɛ: “Mikome too minyɛŋ maŋ muu nɛɛ fɛɛ mahiɛ, ejaakɛ etsii fe mi!” Yehowa ha hetoo: “Buamɔ Israel onukpai lɛ ateŋ mɛi nyɔŋmai kpawo naa ohami, mɛi ni ole akɛ amɛji ma lɛŋ onukpai lɛ amɛnɔkwɛlɔi, . . . ni amɛkɛo atere maŋ lɛ jatsu lɛ, koni okome okatere.” (4 Mose 11:14, 16, 17) Yɛ be mli ni sɛɛ mli lɛ gbɔmɛi lɛ bi adesa maŋtsɛ po lɛ, Maŋtsɛ kpeteŋkpele ni hiɔ shi kɛyaa naanɔ lɛ eŋmɛɛɛ Israelbii lɛ ahe. Akɛ Yehowa Mla lɛ ekome ha adesa maŋtsɛ lɛ. Gbalɔi jajeɔ Yehowa nitsumɔi Maŋtsɛmɛi anɔkwafoi lɛ tee nɔ amɛsɔmɔ akɛ maŋnɔkwɛlɔi kɛha Nyɔŋmɔ yɛ be mli ni ‘amɛtara Yehowa sɛi’ nɔ lɛ.—1 Kronika 29:23; 5 Mose 17:18; 2 Maŋtsɛmɛi 17:13; Yeremia 7:25.
Maŋtsɛ Akpɔi Lɛ Sɛɛnyiɛlɔi Pɛpɛɛpɛ He Nɔkwɛmɔ Nɔ
8. Mɛɛ gbɛ nɔ Yesu tsɔ ejaje Yehowa Maŋtsɛyeli ni baa lɛ, nɛgbɛ ejaje yɛ, ni mɛni jɛ mli ba?
8 Beni Yesu ba akɛ shiwoo Mesia lɛ, enyiɛ etsɛ lɛ akpɔi lɛ asɛɛ kɛ ekaa ni hiɛdɔɔ yɔɔ mli. Beni eje e-Galilea sɔɔmɔ nitsumɔ kpeteŋkpele lɛ shishi lɛ, “ebɔi shiɛmɔ ekɛɛ: Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ! Ni Yesu kpa Galilea muu lɛ fɛɛ, etsɔɔ nii yɛ amɛkpeehei lɛ, ni eshiɛɔ maŋtsɛyeli lɛ he sanekpakpa lɛ etsɔɔ, ni etsaa hela fɛɛ hela kɛ hejaramɔ fɛɛ hejaramɔ. Ni mɛi pii jɛ Galilea kɛ Dekapoli kɛ Yerusalem kɛ Yudea kɛ Yordan sɛɛ nyiɛ esɛɛ.” (Mateo 4:17, 23, 25; Yohane 2:17) Eshiɛɛɛ yɛ kpee hei lɛ pɛ. Eshiɛ maŋtsɛyeli lɛ he sanekpakpa lɛ yɛ he fɛɛ hɔ ni gbɔmɛi yɔɔ ni amɛbaabo toi: sɔlemɔwe lɛ, ŋshɔnaa, gɔji ahe, ŋa nɔ, maŋtiasei amli kɛ akrowai, kɛ gbɔmɛi lɛ ashiai amli. Gbɔmɛi asafoi ba eŋɔɔ amɛbabo lɛ toi, “mɛi babaoo bo lɛ toi kɛ miishɛɛ.” “Maŋ muu lɛ fɛɛ kpɛtɛ lɛ ni amɛboɔ lɛ toi.”—Marko 12:38; Luka 19:48.
9. Mɛni Yesu fee koni ekɛlɛɛ shiɛmɔ nitsumɔ lɛ mli, ni mɛɛ famɔi ekɛha?
9 Eha ekaselɔi lɛ le bɔ ni nitsulɔi babaoo he miihia ha, no hewɔ lɛ “mɛi nyɔŋma kɛ enyɔ nɛɛ Yesu tsu ni efa amɛ akɛ: Nyɛkagbalea jeŋmajiaŋbii lɛ aŋɔɔ, ni nyɛkabotea Samariabii amaŋ ko mli; shi moŋ nyɛyaa Israel we toi ni elaaje lɛ aŋɔɔ. Shi ni nyɛyaa nɛɛ, nyɛshiɛa nyɛkɛa akɛ: Ŋwɛi maŋtsɛyeli lɛ eshɛ shi eta. Shi maŋ fɛɛ maŋ aloo akrowa fɛɛ akrowa mli ni nyɛaatee lɛ, nyɛbia mɔ ni sa shi yɛ jɛi, ni nyɛyato jɛi kɛyashi beyinɔ ni nyɛaatee. Shi kɛ́ nyɛmiibote shia lɛ, nyɛŋaa lɛ. Ni kɛji shia lɛ sa lɛ, nyɛhaa nyɛhejɔlɛ lɛ abaa enɔ; shi kɛji esaaa lɛ, no lɛ nyɛhejɔlɛ lɛ akpale aba nyɛŋɔɔ ekoŋŋ.” (Mateo 10:5-7, 11-13) Yɛ sɛɛ mli lɛ etsu 70 kroko kɛ famɔi ni tamɔ nakai nɔŋŋ, ni akɛni amɛnyiɛ nɛkɛ akpɔi nɛɛ asɛɛ pɛpɛɛpɛ hewɔ lɛ, amɛye omanye ni amɛna miishɛɛ babaoo.—Luka 10:1, 17.
10. (a) Yɛ eshitee lɛ sɛɛ lɛ, mɛɛ nitsumɔ kroko Yesu kɛha, ni mɛni jɛ mli ba? (b) Mɛni hewɔ esa akɛ ahala hii komɛi ni akɛ nitsumɔ awo amɛdɛŋ, ni mɛɛ taomɔ nii esa akɛ ana yɛ amɛhe da?
10 Yɛ egbele kɛ eshitee lɛ sɛɛ lɛ, Kristo Yesu lɛɛ esɛɛnyiɛlɔi lɛ ashikpɔŋkuku lɛ mli, ekɛɛ amɛ akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ. No hewɔ lɛ, nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa tsɛ lɛ kɛ hi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ anɔ.” (Mateo 28:18-20) Beni ekwɔ kɛtee ŋwɛi lɛ, ekɛ akpɔ ko ni tamɔ nɛkɛ nɔŋŋ ha: “Nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ kɛyashi shikpɔŋ lɛ naagbee hei lɛ.” (Bɔfoi lɛ Asaji 1:8) Yɛ be mli ni esɛɛnyiɛlɔi lɛ gbɛɔ Maŋtsɛyeli lɛ he sane lɛ amɛshwaa lɛ, akpei abɔ kɛ amɛhe babɔ amɛhe. (Bɔfoi lɛ Asaji 2:41; 4:4; 5:14; 6:7) Ato asafoi yɛ he fɛɛ he. Ahala nɔkwɛlɔi kɛ asafoŋ sɔɔlɔi ni anaa ŋmalɛ naa taomɔ nii pɔtɛɛ komɛi yɛ amɛhe lɛ akɛ amɛkwɛ nɛkɛ gwantɛŋi ni ji hii kɛ yei nɛɛ anɔ. Asafoi lɛ shwere ni mɛi ni yɔɔ mli lɛ ayi bafa babaoo.—1 Timoteo 3:2-10, 12, 13; Tito 1:5-9.
11. Mɛɛ gbɛjianɔtoo nɛkɛ Yehowa Odasefoi yɔɔ ŋmɛnɛ, ni mɛni hewɔ nɔ ni sa aloo nɔ ni ato he gbɛjianɔ jogbaŋŋ he hiaa bianɛ lɛ?
11 Ehe miihia waa ni Yehowa Odasefoi asafoi ni yɔɔ ŋmɛnɛ lɛ anyiɛ Yesu nɔkwɛmɔ yɛ nitsɔɔmɔ mli sɛɛ. Bɔni afee ni amɛfee nakai kɛ hesaa lɛ, amɛdiɔ gbɛjianɔ ni ato ama shi yɛ bɔfoi lɛ agbii lɛ amli lɛ sɛɛ. Naagbee be lɛ mli wɔyɔɔ lɛ, be ni Yesu gba akɛ je muu fɛɛ shiɛmɔ nitsumɔ ko aya nɔ lɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase ni no dani naagbee lɛ aaaba.” (Mateo 24:14) Jeŋ Ta I sɛɛ ni akpei fioo ko je shishi akɛ amɛaajaje Maŋtsɛyeli nɛɛ he sanekpakpa lɛ; amrɔ nɛɛ amɛyifalɛ etee hiɛ kɛteke akpekpei etɛ! Eji be ni he hiaa ni akɛaanyiɛ naanɔ Maŋtsɛ kpeteŋkpele, Yehowa Nyɔŋmɔ, kɛ maŋtsɛmɛi a-Maŋtsɛ, Yesu Kristo akpɔi lɛ asɛɛ pɛpɛɛpɛ.
Nyɛ Bulɛ Kɛ Sɛɛfimɔ He Miihia Onukpai Lɛ
12. Mɛni ataoɔ yɛ onukpai adɛ̃ŋ ŋmɛnɛ, ni amɛsɔɔmɔ lɛ baanyɛ afee nɔ ni miishɛɛ yɔɔ mli yɛ mɛɛ gbɛ nɔ?
12 Asafoŋ onukpai yɛ nitsumɔ ni da ni amɛbaatsu yɛ Maŋtsɛ lɛ akpɔi lɛ sɛɛnyiɛmɔ mli. Esa akɛ amɛto okadi kpakpa: “Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ, yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa; asaŋ jeee akɛ mɛi ni yeɔ asafoi lɛ anɔ nuŋtsɔmɛiasane, shi moŋ mɛi ni toɔ okadii amɛhaa asafoku lɛ.” (1 Petro 5:1-3) Nyɔŋmɔ asafoku ni. Ebaaha onukpai lɛ abu amɛhe akɔntaa amɛtsɔɔ lɛ, shi toiboo kɛ gbeekpamɔ ni mɔ fɛɛ mɔ kɛaaba amɛ lɛ baaha amɛnitsumɔ lɛ afea nɔ ni ŋɔɔ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee ŋtsɔidɔɔmɔ; ejaakɛ no ehiii haaa nyɛ.”—Hebribii 13:17.
13. Mɛni hewɔ esa ákɛ akɛ woo toi enyɔ aha onukpai lɛ?
13 Esa ákɛ akɛ woo aha mɛi ni yɔɔ asafo lɛ mli lɛ fɛɛ, shi titri lɛ, onukpai ni tsuɔ nii waa lɛ: “Onukpai ni yeɔ nɔ jogbaŋŋ lɛ, esa akɛ aŋɔ woo toi enyɔ awo amɛ, titri lɛ mɛi ni bɔɔ wiemɔ kɛ tsɔɔmɔ he mɔdɛŋ lɛ.” (1 Timoteo 5:17; Romabii 12:10) Mɛni hewɔ esa ákɛ akɛ “woo toi enyɔ” aha onukpai lɛ? Yɛ amɛnitsumɔ kpakpa lɛ hewɔ. Aŋma yɛ amɛhe akɛ: “Mumɔ krɔŋkrɔŋ lɛ ewo nyɛ amɛnɔkwɛlɔi.” (Bɔfoi lɛ Asaji 20:28) Amɛtsuɔ nii waa amɛkɛsɔmɔ bo kɛ mɛi krokomɛi. Ebaabi ni amɛkã aŋkroaŋkroi komɛi ahiɛ kɛ́ amɛku amɛhiɛ amɛshwie Maŋtsɛ lɛ akpɔi lɛ anɔ aloo amɛyeee nɔ lɛ—ni enɛ jeee nitsumɔ ni ŋɔɔ ejaakɛ eji nɔ ni baaha mɛi krokomɛi amli afu. Amɛkɛ ŋaawoo yɛ atadewoo loo jeŋba he baaha ni mɛi komɛi basumɔŋ enɛ. Shi amɛfeɔ enɛɛmɛi fɛɛ yɛ asafo lɛ mumɔŋ hilɛ hewɔ. Esa ákɛ akɛ bulɛ kɛ woo aha onukpai lɛ.
14. (a) Yɛ Yakobo 4:12 hewɔ lɛ, mɛɛ gbɛ nɔ pɛ kojomɔi ni onukpai kɛhaa lɛ baanyɛ afee nɔ ni akɛha yɛ gbɛ ni ja nɔ? (b) Mɛɛ be mli abaanyɛ ana mɔbɔ yɛ kojomɔ mli, ni mɛɛ be mɔbɔnalɛ baanyɛ afee nɔ ni kwɔ fe kojomɔ?
14 Yɛ bei komɛi amli lɛ, onukpai lɛ sɔmɔɔ akɛ kojomɔ ajinafoi ni amɛkojoɔ loo amɛkpɛɔ amɛyiŋ—ni yɛ bei komɛi amli lɛ ekomɛi eŋɔɔɔ mɛi anaa. Kɛ akɛ nɛkɛ kojomɔ nɛɛ to Yakobo 4:12 he lɛ, te anaa tɛŋŋ? Ekɛɔ akɛ: “Mɔ kome ji mlawolɔ kɛ kojolɔ, mɔ ni yɔɔ hewalɛ ni ekɛhereɔ mɔ yiwala ni ekɛkpataa mɔ hiɛ hu; shi bo lɛ, namɔ jio ni okojoɔ onaanyo?” Hɛɛ, esaaa akɛ aŋkroaŋkroi kojoɔ amɛhe. Agbɛnɛ hu esaaa akɛ onukpai lɛ akojomɔi lɛ damɔɔ amɛ diɛŋtsɛ amɛsusumɔ nɔ, shi moŋ esa akɛ edamɔ Yehowa Wiemɔ lɛ nɔ. Kadimɔ bɔ ni Maŋtsɛ Yehoshafat bɔ kojolɔi ni ehala amɛ Iɛ kɔkɔ lɛ: “Jeee gbɔmɛi nyɛkojoɔ nyɛhaa, shi moŋ, Yehowa ni . . . Nyɛhaa Yehowa gbeyeishemɔ ahia nyɛ mli! Nyɛkwɛa jogbaŋŋ ni nyɛfea; ejaakɛ Yehowa, wɔ-Nyɔŋmɔ lɛ, kutumpɔo kɛ hiɛaŋkwɛmɔ kɛ nyɔɔŋnihemɔ bɛ ehe!” (2 Kronika 19:6, 7) Esa akɛ aha asafo lɛ he atse. Ni kɛlɛ esaaa akɛ onukpai lɛ feɔ mɛi ni yi wa. ‘ninekpokpookpotsɛmɛi.’ Agbɛnɛ ajie mɔbɔnalɛ kɛ eshaifaa kpo kɛ́ awerɛho lɛ mli kwɔ ni tsuitsakemɔ lɛ hu ji anɔkwale. Kɛkɛ lɛ, ‘Mɔbɔnalɛ mli baafili lɛ yɛ kunimyeli mli eshi kojomɔ, akɛ ehi fe kojomɔ.’—1 Timoteo 3:3; Yakobo 2:13; kwɛmɔ Reference Bible shishigbɛ niŋmaa.
15. Mɛɛ onukpai lɛ asɔɔmɔ nɛkɛ esa ákɛ akɛ bulɛ kɛ woo aha amɛ yɛ nomɛi ahewɔ lɛ?
15 No hewɔ lɛ onukpai lɛ anitsumɔ lɛ wa yɛ be babaoo mli ni ebiɔ babaoo yɛ amɛdɛ̃, shi onukpai ni kɛ anɔkwayeli kɛ suɔmɔ tsuɔ nɛkɛ gbɛnaa nii nɛɛ ahe nii lɛ baanyɛ afee mumɔŋ hejɔɔmɔ kɛ yibaamɔ jɛɛhe. “Ni mɔ fɛɛ mɔ aaatsɔ tamɔ abobaa he yɛ kɔɔyɔɔ naa kɛ teemɔ he yɛ nyɔŋmɔnɛmɔ naa, tamɔ faai yɛ ŋaa kpataa nɔ loo tɛsaa kpele ko ni haa hɔɔŋ yɛ shikpɔŋ gbiŋ nɔ.” (Yesaia 32:2) Yibaalɔ ni yɔɔ mlihilɛ kɛ suɔmɔ—shi jeee mɔ ni yeɔ oyai efolɔ mɛi anaa aloo ekɛ yiwaa tsɔseɔ mɔ lɛ—ji mɔ ni kɛ miishɛɛ bahaa mɔ fɛɛ mɔ, enaa bulɛ kɛ woo, ni enaa Yehowa nɔkpɛlɛmɔ.
Nyɛtoa Nyɛtsui Shi Nyɛhaa Nyɛhe
16. (a) Te mɛi komɛi feɔ amɛnii yɛ mɛi krokomɛi atɔmɔi ahe amɛhaa tɛŋŋ, ni mɛni baanyɛ aha amɛfee mɛi ni bɛ keketee tsɔ loo mɛi ni yɔɔ shishinumɔ babaoo? (b) Te Yehowa buɔ tsuji anɔkwafoi ni tɔ̃ɔ lɛ tɛŋŋ?
16 Be fɛɛ be ni gbɔmɛi aaatsu nii kutuu yɛ kuu ko mli lɛ, efɔɔ kaa akɛ naagbai teɔ shi. Mɛi komɛi tɔ̃ɔ. Kɛ́ enɛ ba lɛ, mɛi komɛi haoɔ waa. Mɛi komɛi po kɛ mɛi krokomɛi atɔmɔi jieɔ amɛnaa akɛ no hewɔ ni amɛhu amɛtɔ̃ɔ tɔmɔ ni fe fɛɛ lɛ—amɛkpaa Yehowa sɔɔmɔ! Kɛ́ amɛ diɛŋtsɛ lɛ amɛkwɛ amɛtɔmɔi amli jogbaŋŋ taakɛ bɔ ni amɛkwɛɔ mɛi krokomɛi anɔ mli fitsofitso lɛ, kulɛ amɛwieŋ babaoo amɛshiŋ mɛi krokomɛi ni amɛbaana shishinumɔ babaoo. Mose tɔ̃. Maŋtsɛ David hu fee nakai. Ni nakai ji Petro. Shi Yehowa tee nɔ ekɛ nɛkɛ blema hii anɔkwafoi nɛɛ tsu nii, ni eyaa nɔ ekɛ wɔ tsuɔ nii. No hewɔ lɛ, “bo lɛ namɔ jio ni okojoɔ mɔ kroko wenuu? Lɛ diɛŋtsɛ enuŋtsɔ edamɔɔ shi loo egbeɔ shi ehaa; shi aaaha edamɔ shi; ejaakɛ Nyɔŋmɔ yɛ hewalɛ ni eeeha edamɔ shi.”—Romabii 14:4.
17. Yɛ sane ni kɔɔ tɔmɔi ni afeɔ yɛ mɛi krokomɛi akojomɔ he nɛɛ mli lɛ, mɛɛ saji otii krokomɛi hu esa akɛ wɔkai?
17 Nyɛhaa wɔkaia hu akɛ: Yehowa kɛ gbɔmɛi ni ejaaa tsuɔ nii ni yɛ shikpɔŋ nɛɛ nɔ—fɛɛ ni eyɔɔ yɛ ŋmɛnɛŋmɛnɛ beaŋ nɛ. Yɛ anɔkwale mli lɛ, enɛ ji yijiemɔ kɛha Yehowa. Ekɛ nɔ ko bibioo tsuɔ nibii babaoo! Wɔgbɔjɔmɔi lɛ haa ehewalɛ lɛ daa babaoo: “Miduromɔ lɛ fa hao, ejaakɛ mihewalɛ lɛ, gbedeefeemɔ mli eyeɔ emuu yɛ.” (2 Korintobii 12:9) Je muu fɛɛ odase nitsumɔ lɛ shwereɔ yɛ yiŋtoo ni Yehowa diɛŋtsɛ kɛhaa lɛ hewɔ: “Jeee nyɛmɔ naa lɛ, jeee hewalɛ naa, shi mimumɔ lɛ naa! Yehowa Zebaot kɛɛ.” (Zakaria 4:6) No hewɔ lɛ, nyɛhaa wɔkɛ mɛi krokomɛi atɔmɔi kɛ emuu ni amɛyeee lɛ akea amɛ koni akɛ wɔ diɛŋtsɛ wɔnɔ̃ hu ake wɔ. Kaimɔ akɛ: “Kɛji nyɛkɛ mɛi atɔmɔi faa amɛ lɛ, wɔtsɛ ni yɔɔ ŋwɛi lɛ kɛ aaafa nyɛ hu.”—Mateo 6:14, 15.
Gbɛjianɔ Ni Ato Koni Anyiɛ Maŋtsɛ Lɛ Akpɔ Akɛ Ashiɛ Lɛ Sɛɛ
18. Bɔni afee ni akɛ gbɛtsɔɔmɔ yɛ ekomefeemɔ mli aha asafoi lɛ ashiɛmɔ nitsumɔ lɛ, mɛɛ gbɛjianɔtoo yɔɔ yɛ bɔfoi lɛ egbii lɛ amli ni eyɔɔ hu yɛ wɔgbii nɛɛ amli?
18 Bɔfoi lɛ kɛ onukpai lɛ ni yɔɔ Yerusalem lɛ bafee nɔyeli kuu ni kpɛɔ amɛyiŋ ni amɛkɛ gbɛtsɔɔmɔ ha mra be mli Kristofoi asafo lɛ yɛ ekomefeemɔ mli. (Bɔfoi lɛ Asaji 15:1-31; 16:1-5) Ŋmɛnɛ, Yehowa Odasefoi ni afɔ amɛ mu lɛ, “tsulɔ anɔkwafo kɛ nilelɔ” lɛ yɛ Nɔyeli Kuu yɛ amɛnitsumɔ he lɛ yitso lɛ yɛ Brooklyn, New York. (Mateo 24:45-47) Ekudɔɔ je muu fɛɛ Maŋtsɛyeli odaseyeli nitsumɔ ni yaa nɔ bianɛ yɛ shikpɔŋ muu lɛ fɛɛ nɔ ni haa famɔ akɛ atswa Yehowa Maŋtsɛyeli lɛ he adafi lɛ baa mli lɛ fɛɛ. (Mateo 24:14) Kɛ gbɛjianɔtoo bɛ lɛ, anyɛŋ atsu nɛkɛ nitsumɔ nɛɛ kɔkɔɔkɔ. Gbɔmɔ aŋkro ko nyɛŋ ajɛ lɛ diɛŋtsɛ ehewalɛ mli afee enɛ.
19. Mɛɛ nitsumɔ ni aŋkroaŋkroi nyɛŋ atsu kɔkɔɔkɔ Yehowa Odasefoi tsuɔ yɛ omanyeyeli mli kɛtsɔɔ Nuŋtsɔ lɛ akpɔi Iɛ asɛɛnyiɛmɔ pɛpɛɛpɛ nɔ?
19 Gbɔmɔ aŋkro ko loo kui ni amɛgbɛ amɛshwa ni atoko amɛ gbɛjianɔ nyɛŋ ashiɛ yɛ wiemɔi fe 190 mli ni agbɛnɛ yɛ shikpɔji 205 nɔ, ni amɛfee shia Biblia mli nikasemɔi fe akpekpei enyɔ kɛ ohai enyɔ kɛ nyɔŋmai enumɔ daa, ni daa afi lɛ amɛbaptisi Maŋtsɛyeli lɛ he sanekpakpa lɛ he sɔɔlɔi heei aaafee 190,000. Dabi, ehé Odasefoi fe akpekpei etɛ nɔ ni miihe ashɛ ŋmɛlɛtswai akpekpei ohai ekpaa dani amɛkɛtsu nakai nitsumɔ babaoo lɛ yɛ afi 1985 mli. Amɛnyɛ amɛfee nakai ejaakɛ ato amɛ gbɛjianɔ jogbaŋŋ awo asafoi aaafee 50,000 mli, ni amɛ fɛɛ amɛyɛ amɛ Nɔyeli Kuu kome lɛ gbɛtsɔɔmɔ ni anaa lɛ shishi. Amɛnyɛ amɛfee nakai, ejaakɛ Nɔyeli Kuu lɛ, kɛ nitsumɔ hé niji 94 lɛ, kɛ asafoi 50,000 lɛ kɛ Odasefoi aŋkroaŋkroi 3,000,000 lɛ fee efee ekome kɛmiinyiɛ Maŋtsɛ lɛ akpɔi lɛ asɛɛ pɛpɛɛpɛ.a
[Shishigbɛ niŋmaa]
a Ajie kɛjɛ June 1, 1986 Watchtower lɛ mli.
Ani Okaiɔ?
◻ Yehowa to Israel maŋ lɛ gbɛjianɔ yɛ mɛɛ gbɛ nɔ?
◻ Mɛɛ nɔkwɛmɔ nɔ ni yeɔ emuu Yesu shi koni atsɔ nɔ akɛtswa Yehowa ◻ Maŋtsɛyeli lɛ he adafi agbe naa?
◻ Mɛɛ nitsumɔi sɔrɔtoi ni onukpai lɛ tsuɔ hewɔ ni esa akɛ wɔkɛ woo aha amɛ lɛ?
◻ Mɛni hewɔ aŋkroaŋkroi aloo kui ni amɛtse amɛhe nyɛŋ atsu odaseyeli nitsumɔ Iɛ?
[Wiemɔ ni akɔ ni akɛmiitsu nii ni yɔɔ baafa 25]
“Yehowa mla lɛ hi kɛwula shi, ehaa susuma tsui nyɔɔ emli; Yehowa odase lɛ ma shi shiŋŋ, ehaa kwashia leɔ nii. Yehowa akpɔi lɛ ja pɛ, ni ehaa mɔ tsui nyaa; Yehowa kita lɛ yɛ krɔŋŋ, ni ehaa mɔ hiŋmɛii anɔ tseɔ. Yehowa gbeyeishemɔ lɛ he tse, ehiɔ shi kɛyaa naanɔ. Yehowa kojomɔi lɛ, anɔkwale ni, ni fɛɛ ja kwraa.”—Lala 19:8-10.
[Mfoniri ni yɔɔ baafa 23]
Bɔlɔ lɛ toɔ kooloi fɛɛ ayibaamɔ he gbɛjianɔ
Esa akɛ gbɔmɛi ato amɛyibaamɔ he gbɛjianɔ kɛtsɔ Yehowa akpɔi lɛ kasemɔ nɔ