Yitso Nyɔŋmai Enyɔ Kɛ Ekpawo
Yehowa Fɔse Mlifu Eshwie Jeŋmaji lɛ Anɔ
1, 2. (a) Mɛni wɔbaanyɛ wɔná nɔmimaa yɛ he, yɛ Yehowa oweletɔɔ lɛ he? (b) Mɛni Nyɔŋmɔ tsuɔ kɛtsɔɔ owele ní etɔɔ lɛ nɔ?
YEHOWA NYƆŊMƆ toɔ etsui shi jeee kɛha etsuji anɔkwafoi lɛ pɛ kɛkɛ, shi moŋ etoɔ etsui shi ehaa ehenyɛlɔi hu, kɛ́ eyiŋtoo biɔ ní efee nakai. (1 Petro 3:19, 20; 2 Petro 3:15) Ekolɛ Yehowa henyɛlɔi lɛ yɔseee etsuishitoo lɛ, ni ekolɛ amɛbuɔ enɛ akɛ nyɛ ní enyɛɛɛ loo esumɔɔɔ ní efeee nɔ ko. Ni kɛlɛ, taakɛ Yesaia yitso 34 lɛ tsɔɔ lɛ, yɛ naagbee lɛ, Yehowa biɔ akɔntaabuu kɛjɛɔ ehenyɛlɔi lɛ adɛŋ be fɛɛ be. (Zefania 3:8) Nyɔŋmɔ ŋmɛ Edom kɛ jeŋmaji krokomɛi agbɛ yɛ be ko mli ni amɛte shi amɛwo ewebii lɛ ní etsĩii amɛnaa. Shi Yehowa yɛ lɛ diɛŋtsɛ ebe ní eto kɛha toigbalamɔ. (5 Mose 32:35) Nakai nɔŋŋ hu yɛ lɛ diɛŋtsɛ ebe ní eto mli lɛ, Yehowa baatɔ owele yɛ yiwalɛ jeŋ ní yɔɔ amrɔ nɛɛ, ni tseɔ maŋtsɛ ní eji lɛ hiɛ atua lɛ fãi srɔtoi lɛ fɛɛ nɔ.
2 Yiŋtoo titri hewɔ ní Nyɔŋmɔ baatɔ owele lɛ ji ní ekɛjie maŋtsɛ ní eji lɛ kpo faŋŋ ní ekɛwo egbɛi lɛ hiɛ nyam. (Lala 83:14-19) Toigbalamɔ ní ekɛbaa lɛ hu buɔ etsuji lɛ bem akɛ amɛji enajiaŋdamɔlɔi lɛɛlɛŋ, ni ekpɔ̃ɔ amɛ kɛjɛɔ shihilɛi fɔji ní amɛyɔɔ mli lɛ amli. Kɛfata he lɛ, Yehowa oweletɔɔ lɛ kɛ ejalɛsaneyeli lɛ kpãa gbee kɛmɔɔ shi be fɛɛ be.—Lala 58:11, 12.
Nyɛboa Toi, Nyɛ Jeŋmaji
3. Mɛɛ ninefɔɔ Yehowa tsɔ Yesaia nɔ ekɛha jeŋmaji lɛ?
3 Dani eeegbala jwɛŋmɔ kɛya toigbalamɔ ní ekɛbaaba Edom nɔ lɛ nɔ lɛ, Yehowa tsɔ Yesaia nɔ ekɛ ninefɔɔ ko ní hiɛdɔɔ yɔɔ mli ha jeŋmaji lɛ, akɛ: “Nyɛ jeŋmaji, nyɛtsia nyɛbɛŋkɛa ní nyɛnua; nyɛ majimaji hu, nyɛboa toi! Ha shikpɔŋ kɛ emli nii lɛ fɛɛ, je lɛ kɛ nii fɛɛ ní kwɛ̃ɔ yɛ mli lɛ anu!” (Yesaia 34:1) Gbalɔ lɛ ewie eshi jeŋmaji ní sheee Nyɔŋmɔ gbeyei lɛ aahu shii abɔ. Agbɛnɛ ebaamu naafolɔmɔ wiemɔi ní ajɛ ŋwɛi ajaje ashi amɛ lɛ naa. Ani kɔkɔbɔɔi nɛɛ hiɛ shishinumɔ ko kɛha wɔ ŋmɛnɛ?
4. (a) Mɛni akɛɔ jeŋmaji lɛ akɛ amɛfee, taakɛ aŋma afɔ̃ shi yɛ Yesaia 34:1 lɛ? (b) Ani kojomɔ ní Yehowa baatsu he nii yɛ jeŋmaji lɛ anɔ lɛ yeɔ he odase akɛ eji Nyɔŋmɔ yiwalɔ? (Kwɛmɔ akrabatsa ni yɔɔ baafa 363 lɛ.)
4 Hɛɛ. Jeŋ muu fɛɛ Maŋtsɛ lɛ kɛ nibii agbɛjianɔtoo ní sheee Nyɔŋmɔ gbeyei nɛɛ fãi srɔtoi lɛ fɛɛ yɛ sane ko ní ekɛ amɛ baatao naa. No hewɔ ni abiɔ ní “majimaji” kɛ “shikpɔŋ” lɛ abo shɛɛ sane ní damɔ Biblia lɛ nɔ, ní Yehowa eha ajajeɔ atsɔɔ yɛ je lɛŋ fɛɛ lɛ toi lɛ. Yesaia kɛ wiemɔi ní haa akaiɔ Lala 24:1 lɛ mli wiemɔi lɛ kɛɛ akɛ shikpɔŋ lɛ nɔ jeŋmaji fɛɛ baanu shɛɛ sane nɛɛ—ni ji gbalɛ ko ní eba mli anɔkwale yɛ wɔbe nɛɛ mli, beni Yehowa Odasefoi shiɛɔ “kɛyashi shikpɔŋ lɛ naagbeehei lɛ.” (Bɔfoi lɛ Asaji 1:8) Shi kɛlɛ, jeŋmaji lɛ booo toi. Amɛkɛ hiɛdɔɔ susuuu amɛhiɛkpatamɔ ní baa lɛ he kɔkɔbɔɔ ní akɛhaa amɛ lɛ he. Ni kɛlɛ, enɛ etsiŋ Yehowa naa koni ekaha ewiemɔ lɛ ba mli.
5, 6. (a) Mɛni Nyɔŋmɔ baabi ní jeŋmaji lɛ abu he akɔntaa amɛha lɛ lɛ? (b) Eji anɔkwale akɛ “gɔji lɛ aaasere kɛ amɛlá lɛ” yɛ mɛɛ gbɛ nɔ?
5 Agbɛnɛ gbalɛ lɛ wie gbɛkpamɔ ní hiɛnɔkamɔ bɛ mli kɛha jeŋmaji ní sheee Nyɔŋmɔ gbeyei lɛ he—shihilɛ ní yɔɔ srɔto kwraa kɛ́ akɛto Nyɔŋmɔ webii ahiɛnɔkamɔ ní yɔɔ nyam ni ewie he yɛ sɛɛ mli lɛ he lɛ. (Yesaia 35:1-10) Gbalɔ lɛ jaje akɛ: “Yehowa mli efũ jeŋmaji lɛ fɛɛ ni egiri ewo amɛtai lɛ fɛɛ; efee amɛ musu, ekɛ amɛ eha ní agbe amɛ. Ni aaashɛrɛ amɛmɛi ní enyɔnyɔi lɛ ashwie, ni amɛgbohii lɛ aaaje fũ, ni gɔji lɛ aaasere kɛ amɛlá lɛ.”—Yesaia 34:2, 3.
6 Agbala jwɛŋmɔ kɛtee jeŋmaji lɛ aláyisɔyeli lɛ nɔ. Ŋmɛnɛ, jeŋmaji ní yɔɔ Kristendom lɛ ji mɛi ni eye lá yi sɔ̃ kpele fe fɛɛ. Amɛkɛ adesai alá efɔ shikpɔŋ lɛ diɛŋtsɛ, yɛ jeŋ tai enyɔ kɛ tai bibii babaoo ní awuu lɛ amli. Namɔ eja gbɛ akɛ ekwɛ ní atsu jalɛsaneyeli he nii yɛ láyisɔyeli babaoo nɛɛ hewɔ? Jeee mɔ ko mɔ ko, fe Bɔlɔ, ni ji Wala-Halɔ kpeteŋkpele lɛ. (Lala 36:10) Yehowa mla efo tɛ efɔ̃ shi momo, akɛ: “Oŋɔ susuma oto susuma najiaŋ.” (2 Mose 21:23-25; 1 Mose 9:4-6) Lɛɛlɛŋ hu taakɛ mla nɛɛ tsɔɔ lɛ, ebaaha jeŋmaji lɛ amli bii lɛ alá aho—ni eeefee amɛgbele. Amɛgbohii ní afũuu amɛ lɛ afũ baayi kɔɔyɔɔ lɛ mli obɔ̃—ebaafee gbele ní yɔɔ hiɛgbele lɛɛlɛŋ! (Yeremia 25:33) Lá ní abaabi shi yɛ amɛdɛŋ ákɛ nyɔmɔwoo lɛ baafa babaoo diɛŋtsɛ, bɔ ni kɛ́ wɔɔkɛɛ lɛ, ebaasere loo ebaakumɔ gɔji lɛ. (Zefania 1:17) Akɛni abaakpata amɛ asraafoi atai lɛ ahiɛ kwraa hewɔ lɛ, je lɛŋ majimaji lɛ baana amɛnɔyelii ní bei komɛi lɛ, afeɔ amɛhe mfoniri ákɛ gɔji yɛ Biblia gbalɛ mli lɛ ashigbeemɔ.—Daniel 2:35, 44, 45; Kpojiemɔ 17:9.
7. Mɛni ji “ŋwɛi” lɛ, ni mɛni ji “ŋwɛi asafo lɛ”?
7 Beni ekɛ mfonirifeemɔ ní mli kã shi faŋŋ tsuɔ nii ekoŋŋ lɛ, Yesaia tee nɔ ekɛɛ akɛ: “Ŋwɛi asafo lɛ fɛɛ aaafite, aaakota ŋwɛi tamɔ wolo, ni esafo lɛ fɛɛ aaaŋãlã, tamɔ bɔ ni baai ŋãlãa yɛ weintso nɔ, loo tamɔ bɔ ni agbamitso yi baai ŋãlãa lɛ.” (Yesaia 34:4) Wiemɔ ni ji “ŋwɛi asafo lɛ fɛɛ” lɛ etsɔɔɔ ŋulamii diɛŋtsɛ kɛ shibɔlemɔ ŋulamii ní wɔnaa lɛ. Kukuji 5 kɛ 6 lɛ wieɔ hiɛkpatamɔ klante ko ní akɛ nakai “ŋwɛi” lɛ alá ewu he lɛ he. No hewɔ lɛ, enɛ feɔ nɔ ko ní yɔɔ adesai anɔyelihe lɛ he mfoniri. (1 Korintobii 15:50) Akɛni amɛnɔ kwɔlɔ ákɛ hegbɛi ní yeɔ nɔ hewɔ lɛ, akɛ adesai anɔyelii lɛ toɔ ŋwɛii ní miiye adesai agbɛjianɔtoo nɔ yɛ shikpɔŋ nɔ lɛ ahe. (Romabii 13:1-4) No hewɔ lɛ “ŋwɛi asafo lɛ” damɔ shi kɛha adesai anɔyelii nɛɛ amli asraafoi lɛ fɛɛ ní afee amɛ ekome.
8. Mfonirifeemɔŋ ŋwɛii lɛ baafee “tamɔ wolo” kɛkɛ yɛ mɛɛ gbɛ nɔ, ni mɛni baaba amɛ ‘asafoi’ lɛ anɔ?
8 Nɛkɛ “asafo” nɛɛ “aaafite,” loo eeefufulu, tamɔ nɔ ko ní hiɛ kpataa. (Lala 102:27; Yesaia 51:6) Kɛ́ akɛ hiŋmɛi folo miikwɛ lɛ, ŋwɛii diɛŋtsɛ ní yɔɔ wɔyiteŋ lɛ tamɔ nɔ ni edɔ kɔŋtɔŋŋ, tamɔ blema wolokpo ní efɔɔ kaa akɛ emli niŋmaa lɛ hiɔ emligbɛ lɛ. Kɛ́ nibii ní aŋmala yɛ wolokpo lɛ mligbɛ lɛ batsɔ nikanelɔ lɛ hiɛ kɛho ní ena nɔ ni aŋma lɛ, no sɛɛ lɛ akotaa wolokpo ní ekane etã lɛ ni akɛyatoɔ. Nakai nɔŋŋ hu, “aaakota ŋwɛi tamɔ wolo,” kɛ shishinumɔ akɛ adesai anɔyelii lɛ baaba amɛnaagbee. Akɛni amɛshɛ amɛyinɔsane naagbee baafa lɛ hewɔ lɛ, akɛ amɛ baaba amɛnaagbee kwraa yɛ Harmagedon. Amɛ ‘asafoi’ ní tamɔ nɔ ni sa kadimɔ waa lɛ baagbee shi tamɔ bɔ ni baai ní egbi tserɛɔ shwieɔ shi kɛjɛɔ weintso nɔ, loo “agbamitso yi baai” tserɛɔ kɛjɛɔ agbamitso nɔ lɛ. No mli lɛ, amɛbe etã kwraa.—Okɛto Kpojiemɔ 6:12-14 he.
Toigbalamɔ Gbi
9. (a) Nɛgbɛ ji Edom shishijeehe, ni mɛɛ wekukpaa bakã Israel kɛ Edom teŋ? (b) Mɛɛ akpɔ Yehowa wo yɛ Edom he?
9 Agbɛnɛ, gbalɛ lɛ gbalaa jwɛŋmɔ kɛyaa maŋ kome ko ní yɔɔ yɛ Yesaia gbii lɛ amli—ni ji Edom nɔ. Edombii lɛ ji Esau (Edom), mɔ ni hɔɔ ekromɔbi gbɛhe lɛ eha enyɛmi nuu Yakob ní afɔ́ ekɛ lɛ haaji lɛ kɛha aboloo kɛ abɔbɔi lɛ seshibii. (1 Mose 25:24-34) Akɛni Yakob baye enajiaŋ yɛ kromɔbi gbɛnaa lɛ mli hewɔ lɛ, Esau baná hetsɛ̃ ní mli wa waa kɛha enyɛmi nuu lɛ. Yɛ sɛɛ mli lɛ, Edom maŋ lɛ kɛ Israel maŋ lɛ batsɔmɔ henyɛlɔi, eyɛ mli akɛ amɛji nyɛmimɛi hii enyɔ ni ji haaji nɛɛ aseshibii. Yɛ nyɛ̃ɛ ní amɛyɔɔ kɛha Nyɔŋmɔ webii nɛɛ hewɔ lɛ, Yehowa mlifu ba Edom nɔ, ni ewie agbɛnɛ akɛ: “Miklante lɛ etɔ dãa yɛ ŋwɛi; naa, ebaayi Edom nɔ, ebaaba maŋ ní mifee lɛ musu lɛ nɔ ebakojo. Yehowa klante lɛ, lá sɔŋŋ ewu he, fɔ sɔŋŋ ehà he, too gwantɛŋbii kɛ too kpakpoi alá, kɛ too agboi asabai ahe fɔ; ejaakɛ Yehowa miishã afɔle yɛ Bozra, ni eegbe gbee kpeteŋkpele yɛ Edom shikpɔŋ lɛ nɔ.”—Yesaia 34:5, 6.
10. (a) Namɔ Yehowa baaba lɛ shi beni ebaawó eklante lɛ nɔ “yɛ ŋwɛi” lɛ? (b) Mɛɛ su Edom jie lɛ kpo beni Babilon batutua Yuda lɛ?
10 Edom kã gɔji ashikpɔŋ ní nɔ kwɔ nɔ. (Yeremia 49:16; Obadia 8, 9, 19, 21) Shi kɛlɛ, nɛkɛ adebɔɔ naa hefamɔ nibii nɛɛ kɛ yelikɛbuamɔ ko kwraa haŋ lɛ beni Yehowa baawó ekojomɔ klante lɛ nɔ “yɛ ŋwɛi,” ní eeeba Edom nɔyelɔi lɛ ashi kɛaajɛ amɛgbɛhei ní nɔ kwɔlɔ lɛ. Edom ewula ehe jogbaŋŋ yɛ tawuu mli, ni esraafoi atai lɛ nyiɛɔ kɛtsɔɔ gɔji ní nɔ kwɔlɔ lɛ anɔ ni amɛkɛbuɔ maŋ lɛ he. Shi Edom ní he wa waa lɛ kɛ yelikɛbuamɔ ko haaa beni Babilon asraafoi lɛ batutua Yuda lɛ. Shi moŋ, Edom ná miishɛɛ kɛteke nɔ beni enaa ní abutuɔ Yuda maŋtsɛyeli lɛ, ni ewo mɛi ní yeɔ enɔ kunim lɛ po hewalɛ ní amɛya nɔ. (Lala 137:7) Edom tiu Yudafoi ní joɔ foi ní amɛkɛhere amɛyiwala lɛ po ni eyamɔmɔ amɛ kɛbaha Babilonbii lɛ. (Obadia 11-14) Edombii lɛ kpɛ amɛyiŋ akɛ amɛbaaŋɔ Israelbii lɛ ashikpɔŋ ni amɛshi amɛfɔ̃ shi lɛ, ni amɛwie mpoatswaa wiemɔi po amɛshi Yehowa.—Ezekiel 35:10-15.
11. Yehowa baawo Edombii lɛ nyɔmɔ yɛ amɛkutumpɔo subaŋ lɛ hewɔ yɛ mɛɛ gbɛ nɔ?
11 Ani Yehowa ku ehiɛ efɔ̃ nifeemɔ ní etsɔɔɔ nyɛmimɛi asu ní Edombii lɛ jie lɛ kpo nɛɛ nɔ? Dabi. Shi moŋ, egba efɔ̃ shi yɛ Edom he akɛ: “Wuoi kɛ amɛ aaanyɔnyɔi, kɛ tsina hii kɛ tsina osaii hu, ni amɛshikpɔŋ lɛ aaatɔ kɛ lá, ni amɛsũ lɛ aaafee ŋɛ̃lɛ̃ŋŋ kɛ fɔ sɔŋŋ.” (Yesaia 34:7) Yehowa wie mɛi ní nɔ kwɔlɔ kɛ mɛi ní baa shi yɛ maŋ lɛ mli lɛ ahe akɛ mfonirifeemɔŋ wuoi kɛ tsina obalahii, tamɔ too gwantɛŋi kɛ abotiai obalahii. Akɛ gbɔmɛi lɛ diɛŋtsɛ alá baafɔ jeŋmaŋ ní eye lá yi sɔ̃ nɛɛ ashikpɔŋ lɛ kɛtsɔ Yehowa “klante” ní kpataa mɔ hiɛ lɛ nɔ.
12. (a) Namɛi Yehowa kɛtsu nii ni ekɛ toigbalamɔ ba Edom nɔ? (b) Mɛni gbalɔ Obadia gba efɔ̃ shi yɛ Edom he?
12 Nyɔŋmɔ eto eyiŋ akɛ ebaagbala Edom toi yɛ nɔ ni ekɛ nyɛ̃ɛ fee E-shikpɔŋ nɔ gbɛjianɔtoo, ní atsɛɔ lɛ Zion lɛ hewɔ. Gbalɛ lɛ kɛɔ akɛ: “Yehowa oweletɔɔ gbi ni, kɛ najiaŋtoo afi ní ekɛbaaye Zion sane eha lɛ.” (Yesaia 34:8) Yerusalem hiɛkpatamɔ ní ba yɛ afi 607 D.Ŋ.B. lɛ sɛɛ be fioo mli lɛ, Yehowa bɔi ejalɛ oweletɔɔ lɛ kpojiemɔ fiofio yɛ Edombii lɛ anɔ kɛtsɔ Babilon maŋtsɛ, Nebukadnezar nɔ. (Yeremia 25:15-17, 21) Kɛ́ Babilon asraafoi lɛ fã kɛbatutua Edom lɛ, nɔ ko nɔ ko nyɛŋ ahere Edombii lɛ ayiwala! Eji “najiaŋtoo afi” ni baaba nakai gɔji ashikpɔŋ lɛ nɔ. Yehowa tsɔ gbalɔ Obadia nɔ egba efɔ̃ shi akɛ: “Yi ni owa onyɛmi Yakob hewɔ lɛ hiɛgbele aaahà ohe, ni aaakpata ohiɛ kɛaatee naanɔ. . . . Bɔ ni ofee lɛ, nakai aaafeeo, onifeemɔ nii lɛ aaaku sɛɛ awula oyiteŋ!”—Obadia 10, 15; Ezekiel 25:12-14.
Kristendom Wɔsɛɛ Be ní Hiɛnɔkamɔ Bɛ Mli
13. Namɔ tamɔ Edom ŋmɛnɛ, ni mɛni hewɔ?
13 Gbɛjianɔtoo ko yɛ ŋmɛnɛŋmɛnɛ beaŋ ní nibii ní efee kɛho lɛ tamɔ nɔ ni Edom fee lɛ pɛpɛɛpɛ. Mɛɛ gbɛjianɔtoo ni? Ojogbaŋŋ, namɔ enyiɛ hiɛ yɛ ŋmɛnɛŋmɛnɛ beaŋ ni akɛbɔ Yehowa tsuji ahora ni awa amɛ yi hu lɛ? Ani jeee Kristendom, kɛtsɔ esɔfoi akuu lɛ nɔ? Hɛɛ! Kristendom ewó ehe nɔ kɛyashɛ he ni nɔ kwɔ waa tamɔ gɔŋ, yɛ je nɛŋ saji amli. Ekɛɔ akɛ eyɛ gbɛhe ní nɔ kwɔ yɛ adesai anibii agbɛjianɔtoo nɛɛ mli, ni ejamɔi lɛ feɔ Babilon Kpeteŋkpele lɛ fã ní da fe fɛɛ. Shi Yehowa ewo akpɔ akɛ ekɛ “najiaŋtoo afi” ko baaba nɛkɛ ŋmɛnɛŋmɛnɛ beaŋ Edom nɛɛ nɔ, yɛ mlifu ní ekɛfee nibii fɔji eshi E-webii, ni ji E-Dasefoi lɛ hewɔ.
14, 15. (a) Mɛni baaba Edom shikpɔŋ lɛ kɛ Kristendom fɛɛ nɔ? (b) Mɛni amã ní miitso kɛ lasu ní teɔ shi kɛyaa naanɔ ní awie he lɛ tsɔɔ, ni mɛni amɛtsɔɔɔ?
14 No hewɔ lɛ, beni wɔsusuɔ Yesaia gbalɛ lɛ fã nɛɛ mli nibii ní eshwɛ lɛ ahe lɛ, jeee blema Edom pɛ he wɔsusuɔ, shi moŋ wɔsusuɔ Kristendom hu he: “Emli faai lɛ aaatsɔmɔ amã, ni jɛi sũ hu aaatsɔ swɔɔ, ni eshikpɔŋ lɛ aaatsɔ amã ní tsoɔ; egboŋ nyɔɔŋ kɛ shwane fɛɛ, elasũ aaate shi kɛaatee naanɔ.” (Yesaia 34:9, 10a) Edom shikpɔŋ lɛ baagbi kekeree aahu akɛ ebaafee tamɔ nɔ ni sũ lɛ etsɔ swɔɔ, ni faai lɛ eyimɔ, jeee kɛ nu, shi moŋ kɛ amã. Kɛkɛ lɛ awo nɛkɛ nibii ní tsoɔ waa nɛɛ mli la koni eshã!—Okɛto Kpojiemɔ 17:16 he.
15 Mɛi komɛi buɔ la, amã, kɛ swɔɔ ní atsĩ tã lɛ akɛ eji odaseyeli ní tsɔɔ akɛ hɛl la ní tsoɔ waa yɛ. Shi ashɛɛɛ Edom afɔ̃ɔɔ adesã mli hɛl la ko mli ákɛ eyashã yɛ jɛmɛ kɛya naanɔ. Shi moŋ, akpata ehiɛ, ni eje je lɛŋ loo shihilɛ mli kwraa tamɔ nɔ ni akɛ la kɛ swɔɔ eshã lɛ kwraa. Taakɛ gbalɛ lɛ tee nɔ etsɔɔ lɛ, nɔ ni baajɛ mli aba enɔ yɛ naagbee kwraa lɛ efeŋ naanɔ piŋmɔ, shi moŋ eeefee “olɛŋlɛ . . . amaŋfɔ . . . amɛjeee nɔ ko dɔŋŋ.” (Yesaia 34:11, 12) Lasu ‘ní teɔ shi kɛyaa naanɔ’ lɛ feɔ enɛ he mfoniri jogbaŋŋ diɛŋtsɛ. Kɛ́ shia ko shã lɛ, lamulu lɛ yaa nɔ ejeɔ lasu lolo yɛ be ko mli, yɛ be mli ní la lɛ diɛŋtsɛ ekpa tsoo lɛ sɛɛ, ni no feɔ odaseyeli kɛhaa mɛi ní bakwɛɔ lɛ akɛ lɛɛlɛŋ, la etso waa diɛŋtsɛ yɛ mli. Akɛni Kristofoi ní yɔɔ ŋmɛnɛ lɛ miikase nii kɛmiijɛ Edom hiɛkpatamɔ lɛ mli hewɔ lɛ, yɛ shishinumɔ ko naa lɛ, Edom shãa lɛ he lasu lɛ miiya nɔ eete shi lolo.
16, 17. Mɛni Edom baatsɔ, ni mɛɛ be ebaahi nakai shihilɛ mli kɛyashi?
16 Yesaia gbalɛ lɛ yaa nɔ, ni egbaa efɔ̃ɔ shi akɛ akɛ jwɛiaŋ kooloi baaye gbɔmɛi ní yɔɔ Edom shikpɔŋ lɛ nɔ lɛ anajiaŋ, ní tsɔɔ amaŋfɔfeemɔ kwraa ni akɛbaaba lɛ, akɛ: “Eeetsɔ amaŋfɔ yɛ yinɔi fɛɛ nɔ, ni mɔ ko mɔ ko tsɔŋ jɛi kɛaatee naanɔ; shi kpokukpokui kɛ kɔtɔkɔi aaaŋɔ jɛi afee amɛnɔ̃, ni patui kɛ kwãakwãalabitei aaahi jɛi; ni eeeŋmɛ olɛŋɛlɛ kpãa yɛ nɔ, ni ekɛ amaŋfɔ kulomulo aaato he; ni amɛbladei lɛ hu, mɔ ko bɛ ní aaashiɛ maŋtsɛyeli lɛ; amɛlumɛi lɛ fɛɛ lɛ, amɛjeee nɔ ko dɔŋŋ. Ni ŋmeii aaakwɛ̃ yɛ amɛmɔji lɛ amli, sãnsrɔ̃i kɛ aŋlɛ̃ŋlɛ̃i hu aaakwɛ̃ yɛ amɛmɔji ní wa lɛ amli, ni eeetsɔ ŋãŋgbeei ashihilɛhe, kɛ dugumai aniyelihe. Ni ŋãŋ kooloi kɛ klãji aaabakpe yɛ jɛi, ni sasabonsami hu anaa aaakpe shi; nyɔɔŋ sisa aaahi jɛi, ni eeená hejɔɔmɔhe yɛ jɛi. Ahurutia aaafee etsu yɛ jɛi ni eeeŋmɛ.”—Yesaia 34:10b-15.a
17 Hɛɛ, Edom baatsɔ shikpɔŋ ní kã shi amaŋfɔ. Ebaatsɔ shikpɔŋ gbiŋ ní jwɛiaŋ kooloi, loofɔji, kɛ onufui pɛ hiɔ nɔ. Nɛkɛ shikpɔŋ gbiŋ shihilɛ nɛɛ baaya nɔ aahu, taakɛ kuku 10 lɛ kɛɔ lɛ, “kɛaatee naanɔ.” Akuŋ sɛɛ abahiŋ nɔ dɔŋŋ.—Obadia 18.
Yehowa Wiemɔ lɛ Baaba Mli Pɛpɛɛpɛ
18, 19. Mɛni ji “Yehowa wolo” lɛ, ni mɛni ato akɛ ebaaba Kristendom nɔ wɔsɛɛ yɛ “wolo” nɛɛ mli?
18 Kwɛ wɔsɛɛ be ní hiɛnɔkamɔ bɛ mli ní enɛ feɔ he mfoniri kɛha Kristendom, ni ji ŋmɛnɛŋmɛnɛ beaŋ Edom lɛ! Ejie ehe kpo ákɛ Yehowa Nyɔŋmɔ henyɛlɔ kpele diɛŋtsɛ, ni ekɛ yiwaa ní mli wa waa baa e-Dasefoi lɛ anɔ. Ni ŋwanejee ko bɛ he akɛ Yehowa baaha ewiemɔ lɛ aba mli. Be fɛɛ be ní mɔ ko kɛ gbalɛ lɛ baato emlibaa lɛ he lɛ, ebaana akɛ enyɔ lɛ fɛɛ kɛ amɛhe nyiɛɔ pɛpɛɛpɛ—tamɔ bɔ ni kooloi ní yɔɔ Edom shikpɔŋ ní etsɔ amaŋfɔ lɛ nɔ lɛ ‘eko fɛɛ eko yɔɔ amɛhefatalɔi lɛ’ pɛpɛɛpɛ. Yesaia kɛ Biblia gbalɛ he nikaselɔi ní baaba wɔsɛɛ lɛ wie, ni ekɛɛ: “Nyɛtaoa yɛ Yehowa wolo lɛŋ ní nyɛkanea: nii nɛɛ ateŋ ekome folo eshwɛŋ, eko eko hefatalɔ ebɔŋ lɛ; ejaakɛ minaabu efã, ni emumɔ lɛ ji mɔ ni buaa naa. Ni lɛ nɔŋŋ efɔ̃ oshiki eha amɛ, ni enine ja mli ha amɛ yɛ susumɔ kpãa naa: eeetsɔ amɛnɔ̃ kɛaatee naanɔ, ni amɛaahi jɛi yɛ yinɔi fɛɛ nɔ.”—Yesaia 34:16, 17.
19 Agba Kristendom hiɛkpatamɔ ní baa lɛ afɔ̃ shi yɛ “Yehowa wolo” lɛ mli. Nɛkɛ “Yehowa wolo” nɛɛ tsɔɔ saji fɛɛ ní Yehowa kɛ mɛi ní efee amɛhe ehenyɛlɔi ní tsakeee, ní amɛji ewebii lɛ ayiwalɔi ní tsakeee amɛtsui lɛ baabu he akɔntaa lɛ mli fitsofitso. Nɔ ni aŋma afɔ̃ shi yɛ blema Edom he lɛ ba mli anɔkwale, ni enɛ woɔ hekɛnɔfɔɔ ní wɔyɔɔ lɛ mli hewalɛ akɛ gbalɛ ní kɔɔ Kristendom, ni ji ŋmɛnɛŋmɛnɛ beaŋ Edom henɔ lɛ he lɛ, hu baaba mli anɔkwale nakai nɔŋŋ. “Susumɔ kpãa,” ni ji Yehowa nifeemɔ he mla lɛ, maa nɔ mi akɛ nɛkɛ gbɛjianɔtoo ní egbo etã yɛ mumɔŋ nɛɛ baatsɔ shikpɔŋ ní kã shi amaŋfɔ.
20. Mɛni baaba Kristendom nɔ, taakɛ eba blema Edom nɔ lɛ?
20 Kristendom feɔ nɔ fɛɛ nɔ ní eeenyɛ ní ekɛkpata emaŋkwramɔŋ nanemɛi lɛ, shi eyeee omanye! Taakɛ Kpojiemɔ yitsei 17 kɛ 18 lɛ tsɔɔ lɛ, Yehowa, Nyɔŋmɔ Ofe lɛ, kɛbaawo amɛtsuii amli ni amɛbaate shi amɛwo Babilon Kpeteŋkpele lɛ fɛɛ, ní Kristendom fata he lɛ. Enɛ baajie apasa Kristojamɔ kwraa kɛjɛ shikpɔŋ lɛ nɔ fɛɛ. Kristendom shihilɛ lɛ baatsɔ tamɔ shihilɛ ní hiɛnɔkamɔ bɛ mli, ní awie he yɛ Yesaia yitso 34 lɛ. Ehiŋ shihilɛ mli po yɛ “Nyɔŋmɔ Ofe lɛ gbi wulu lɛ nɔ ta” ní akɛbaana saji fɛɛ anaa shikome nyɔŋlo lɛ mli! (Kpojiemɔ 16:14) Taakɛ blema Edom ji lɛ, abaabɛɛ Kristendom kɛbaajɛ shikpɔŋ lɛ nɔ kwraa, “kɛaatee naanɔ.”
[Shishigbɛ niŋmaa]
a Beni shɛɔ Maleaki beaŋ lɛ, no mli lɛ gbalɛ nɛɛ eba mli. (Maleaki 1:3) Maleaki bɔɔ amaniɛ akɛ kulɛ Edombii lɛ ahiɛ kã nɔ akɛ amɛbaaku sɛɛ amɛbaŋɔ amɛshikpɔŋ ní etsɔ amaŋfɔ lɛ ekoŋŋ. (Maleaki 1:4) Shi kɛlɛ, jeee Yehowa suɔmɔnaa nii nɛ, ni sɛɛ mli lɛ maŋ kroko nɔ bii, ni ji Nabataeabii lɛ, baŋɔ Edom shikpɔŋ ní eshwɛ lɛ kwraa.
[Akrabatsa ni yɔɔ baafa 363]
Ani Eji Nyɔŋmɔ Mlifutsɛ?
Wiemɔi ní tamɔ nɔ ni wɔnaa yɛ Yesaia 34:2-7 lɛ etsirɛ mɛi babaoo ni ehaa amɛsusuɔ akɛ bɔ ni awieɔ Yehowa he yɛ Hebri Ŋmalɛi lɛ amli lɛ tsɔɔ akɛ eji Nyɔŋmɔ yiwalɔ, kɛ mlifutsɛ. Shi ani nakai eji?
Dabi. Eyɛ mli akɛ bei komɛi lɛ Nyɔŋmɔ jieɔ emlifu kpo moŋ, shi emlifu nɛɛ ja gbɛ be fɛɛ be. Edamɔɔ shishitoo mla nɔ be fɛɛ be, jeee henumɔ ní akudɔɔɔ lɛ nɔ. Kɛfata he lɛ, nɔ ni kɛ enɛ baa be fɛɛ be ji hegbɛ ní Bɔlɔ lɛ yɔɔ ákɛ akɛ hetuu-kɛhamɔ aha ekome too, kɛ bɔ ni ehiɛɔ anɔkwale mli daa hu lɛ. Suɔmɔ ní Nyɔŋmɔ yɔɔ kɛha jalɛnifeemɔ, kɛ suɔmɔ ní eyɔɔ kɛha mɛi ní sumɔɔ jalɛnifeemɔ lɛ fɛɛ kudɔɔ mlifu ní ejɛɔ ŋwɛi ejieɔ lɛ kpo lɛ. Yehowa naa nibii fɛɛ ní kɔɔ sane fɛɛ sane he, ni eyɛ shihilɛ fɛɛ shihilɛ he nilee ní eye emuu, ní husu bɛ he. (Hebribii 4:13) Enyɛɔ enaa tsui mli saji; enaa nifeemɔi ní jɛ nilee ní abɛ, anyagbafeemɔ, kɛ esha ní aje gbɛ afee lɛ mli lɛ jogbaŋŋ; ni efeɔ nii ní hiɛaŋkwɛmɔ bɛ mli.—5 Mose 10:17, 18; 1 Samuel 16:7; Bɔfoi lɛ Asaji 10:34, 35.
Shi kɛlɛ, Yehowa Nyɔŋmɔ ‘toɔ tsui, ni emɔbɔnalɛ kɛ anɔkwale fá pii.’ (2 Mose 34:6) Mɛi ní sheɔ lɛ gbeyei ní amɛbɔɔ mɔdɛŋ ní amɛfee jalɛ nii lɛ anine shɛɔ mɔbɔnalɛ nɔ, ejaakɛ Ofe lɛ yɔseɔ emuu ní adesa yeee, ní ená kɛjɛ fɔmɔ mli lɛ, ni ejieɔ mɔbɔnalɛ kpo etsɔɔ lɛ yɛ enɛ hewɔ. Ŋmɛnɛ, Nyɔŋmɔ damɔɔ Yesu afɔleshaa lɛ nɔ efeɔ enɛ. (Lala 103:13, 14) Yɛ be ni sa mli lɛ, Yehowa jieɔ emlifu lɛ kɛjɛɔ mɛi ní kpɛlɛɔ amɛhe eshai lɛ anɔ, ní amɛshwaa amɛhe, ní amɛsɔmɔɔ lɛ lɛɛlɛŋ lɛ anɔ. (Yesaia 12:1) Nɔ ni he hiaa titri ji akɛ, Yehowa jeee Nyɔŋmɔ mlifutsɛ, shi moŋ eji miishɛɛ Nyɔŋmɔ, ni ejeee mɔ ni anyɛɛɛ abɛŋkɛ lɛ, shi moŋ mɔ ni hereɔ mɔ atuu, mɔ ní sumɔɔ toiŋjɔlɛ, ní he jɔ ha mɛi ní bɛŋkɛɔ lɛ yɛ gbɛ kpakpa nɔ lɛ. (1 Timoteo 1:11) Enɛ yɛ srɔto kwraa, kɛ́ akɛto mɔbɔnalɛ ní abɛ, kɛ yiwalɛ sui ní anaa yɛ wɔŋjalɔi lɛ apasa nyɔŋmɔi lɛ ahe, ní nakai nyɔŋmɔi lɛ ahe amagai feɔ he mfoniri lɛ.
[Shikpɔŋ he mfoniri ni yɔɔ baafa 362]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Ŋshɔ Kpeteŋkpele
Damasko
Zidon
Tiro
ISRAEL
Dan
Galilea Ŋshɔ
Yordan Faa
Megido
Ramot-gilead
Samaria
FILISTIA
YUDA
Yerusalem
Libna
Lakish
Beersheba
Kadesh-barnea
Ŋoo Ŋshɔ
AMON
Raba
MOAB
Kir-hareset
EDOM
Bozra
Teman
[Mfonirii ni yɔɔ baafa 359]
Kristendom kɛ lá efɔ shikpɔŋ lɛ nɔ fɛɛ
[Mfoniri ni yɔɔ baafa 360]
“Aaakota ŋwɛi tamɔ wolo”