Yitso Enumɔ
Yehowa Baa Henɔwolɔi Ashi
1, 2. Mɛni hewɔ wɔyɔɔ gbalɛ shɛɛ sane ni Yesaia kɛha egbii lɛ amli Yudafoi lɛ he miishɛɛ lɛ?
AKƐNI shihilɛ ni yɔɔ Yerusalem kɛ Yuda lɛ eje gbalɔ Yesaia tsine hewɔ lɛ, etsɔ ehe kɛtee Yehowa Nyɔŋmɔ ŋɔɔ agbɛnɛ ni ejaje akɛ: “Oshɛ omaŋ ni ji Yakob we lɛ ofɔ̃.” (Yesaia 2:6a) Mɛni ewo Nyɔŋmɔ mlila, ni eha ekpoo gbɔmɛi ni lɛ diɛŋtsɛ ehala akɛ “lɛ diɛŋtsɛ emaŋ” lɛ?—5 Mose 14:2.
2 Wɔyɛ Yudafoi ni hi shi yɛ Yesaia gbii lɛ amli lɛ aheguɔgbee wiemɔi ni ewie lɛ he miishɛɛ waa. Mɛni hewɔ? Ejaakɛ shihilɛ ni yɔɔ Kristendom ŋmɛnɛ lɛ tamɔ Yesaia maŋbii lɛ abeaŋ nɔ̃ lɛ pɛpɛɛpɛ, ni nakai nɔŋŋ ji kojomɔ ni Yehowa jajeɔ lɛ. Yesaia gbalɛ lɛ toiboo baaha wɔná nɔ ni Nyɔŋmɔ buɔ lɛ fɔ́ lɛ he shishinumɔ ni mli kã shi faŋŋ, ni ebaaye ebua wɔ ní wɔtsi wɔhe kɛjɛ nifeemɔi ni ekpɛlɛɛɛ nɔ lɛ ahe. Belɛ, ha wɔkɛ gbɛkpamɔ ni mli wa waa asusu Yehowa gbalɛ wiemɔ ni aŋma afɔ̃ shi yɛ Yesaia 2:6–4:1 lɛ he.
Amɛkotoɔ Shi yɛ Henɔwomɔ Mli
3. Mɛɛ emaŋbii lɛ atɔmɔ Yesaia jaje yɛ faŋŋ mli?
3 Beni Yesaia jajeɔ emaŋbii lɛ atɔmɔi lɛ, ekɛɛ akɛ: “Amɛyimɔ obɔbɔ kɛ bokagbɛ nifeemɔ, ni amɛtsɔmɔ klamɔi tamɔ Filistibii lɛ, ni amɛkpɛtɛ maŋsɛɛ bii ahe.” (Yesaia 2:6b) Aaafee afii 800 ni etsɔ hiɛ lɛ, Yehowa kɛ famɔ hã ewebii ni ehala lɛ akɛ: “Nyɛkɛ nɛkɛ nii nɛɛ akabulea nyɛhe; ejaakɛ nɛkɛ nii nɛɛ fɛɛ jeŋmaji ni mibashwie yɛ nyɛhiɛ lɛ kɛbule amɛhe lɛ.” (3 Mose 18:24) Yehowa nyɛ Bileam nɔ ni ewie yɛ mɛi ni ehala akɛ lɛ diɛŋtsɛ emaŋ krɛdɛɛ lɛ he akɛ: “Tɛsaai ayiteŋ mijɛ mina lɛ, ni gɔŋkpɔi anɔ mijɛ mikwɛ lɛ. Naa, maŋ nɛɛ, ekome too eeehi shi, ni ebuŋ ehe eshiŋ jeŋmaji lɛ anɔ.” (4 Mose 23:9, 12) Ni kɛlɛ, beni shɛɔ Yesaia gbii lɛ amli lɛ, no mli lɛ Yehowa webii ni ehala amɛ lɛ eŋɔ jeŋmaji ni ebɔle amɛ lɛ anifeemɔi ni ahiɔ lɛ ni “amɛyimɔ obɔbɔ kɛ bokagbɛ nifeemɔi.” Yɛ nɔ najiaŋ ní amɛaaná Yehowa kɛ ewiemɔ lɛ mli hemɔkɛyeli lɛ, “amɛtsɔmɔ klamɔi tamɔ Filistibii lɛ.” Akɛni amɛtsiii amɛhe kɛjɛɛɛ jeŋmaji lɛ ahe hewɔ lɛ, shikpɔŋ lɛ nɔ ‘eyi obɔ’ kɛ “maŋsɛɛ bii”—ni ŋwanejee ko bɛ he akɛ, amɛji maŋsɛɛ bii ni kɛ nifeemɔi ni Nyɔŋmɔ gbeyeishemɔ bɛ mli bawo Nyɔŋmɔ webii lɛ ateŋ.
4. Yɛ nɔ najiaŋ ni eeeha amɛda Yehowa shi lɛ, te ninámɔ kɛ asraafoi ahewalɛ sa Yudafoi lɛ ahe eha tɛŋŋ?
4 Beni ewieɔ Yuda shika gbɛfaŋ shweremɔ kɛ asraafoi ahewalɛ ni ená yɛ Yuda Maŋtsɛ Uzia shishi lɛ he lɛ, Yesaia jaje akɛ: “Amɛshikpɔŋ lɛ nɔ eyi obɔ kɛ jwiɛtɛi kɛ shika, ni amɛjwetri lɛ bɛ naagbee; amɛshikpɔŋ lɛ nɔ eyi obɔ kɛ okpɔŋɔi, ni amɛshwiilii lɛ bɛ naagbee.” (Yesaia 2:7) Ani gbɔmɛi lɛ daa Yehowa shi yɛ ninámɔ kɛ asraafoi ahewalɛ ni tamɔ nɛkɛ he? (2 Kronika 26:1, 6-15) Dabi kwraa! Yɛ no najiaŋ lɛ, amɛkɛ amɛhiɛ fɔ̃ ninámɔ lɛ diɛŋtsɛ nɔ ni amɛtsi amɛhe kɛjɛ e-Jɛɛhe, ni ji Yehowa Nyɔŋmɔ he. Mɛni jɛ mli ba? “Amɛshikpɔŋ lɛ nɔ eyi obɔ kɛ yakayaka wɔji, amɛ diɛŋtsɛ amɛninenaa nitsumɔ, nii ni amɛ diɛŋtsɛ amɛwaabii fee lɛ, amɛjáa. Ni gbɔmɔ hoɔ kotoɔ shi, ni nuu hu baa shi; no hewɔ lɛ kaaŋɔfa amɛ!” (Yesaia 2:8, 9) Amɛtsɔɔ amɛhiɛ kɛjɛɔ Nyɔŋmɔ hiɛkalɔ lɛ he kɛyaa afã ni amɛkotoɔ shi amɛhaa amagai ni wala bɛ amɛmli.
5. Mɛni hewɔ shi ni akotoɔ ahaa amagai lɛ jeee heshibaa nifeemɔ lɛ?
5 Shikotomɔ baanyɛ afee heshibaa he okadi. Shi shikotomɔ kɛha nibii ni wala bɛ amɛmli lɛ feɔ yaka nɔ ko, ni ehaa amaga jálɔ lɛ “baa shi,” eyaa sɛɛsɛɛ. Te Yehowa aaafee tɛŋŋ ekɛ esha ni tamɔ nɛkɛ ake hu? Kɛ́ Yehowa bi ní amaga jálɔi nɛɛ abu amɛhe akɔntaa lɛ, mɛni amɛbaafee?
‘Hewoo Hiŋmɛii lɛ Baaba Shi’
6, 7. (a) Mɛni baaba henɔwolɔi anɔ yɛ Yehowa kojomɔ gbi lɛ nɔ? (b) Mɛni kɛ namɛi anɔ Yehowa jie emlifu kpo yɛ, ni mɛni hewɔ?
6 Yesaia yaa nɔ akɛ: “Botemɔ tɛsaa mli, ni oyatee ohe yɛ sũ mli, yɛ Yehowa he gbeyei kɛ egbojee anunyam lɛ naa!” (Yesaia 2:10) Shi tɛsaa ko bɛ ni baafee nɔ ni da bɔ ni ebaanyɛ ebu amɛhe, ni nɔhaanɔ̃ ko hu bɛ ni mli ti bɔ ni ebaanyɛ etee amɛ kɛjɛ Yehowa, Ofe lɛ hiɛ. Kɛ́ eba ní ebaatsu ekojomɔ lɛ he nii lɛ, “gbɔmɛi ahewoo hiŋmɛii lɛ aaaba shi, aaadɔ adesai ahenɔwomɔ lɛ kɛaaba shi, ni aaawó Yehowa kome too nɔ yɛ nakai gbi lɛ nɔ!”—Yesaia 2:11.
7 “Yehowa Zebaot gbi lɛ” miiba. Ebaafee be ni Nyɔŋmɔ kɛbaajie emlifu kpo yɛ “Lebanon tsenedru tsei ni dara ni kwɔlɔ kɛtee ŋwɛi lɛ kɛ Bashan tsei kpelei lɛ fiaa nɔ, kɛ gɔji grɔŋŋi fɛɛ kɛ gɔŋkpɔi ni kwɔlɔ fɛɛ, kɛ mɔji ni kwɔlɔ fɛɛ kɛ gbogboi ni wa fɛɛ, kɛ Tarshish lɛji fɛɛ kɛ nibii ni yɔɔ fɛo fɛɛ nɔ!” (Yesaia 2:12-16) Hɛɛ, abaagbala jwɛŋmɔ kɛba gbɛjianɔtoo fɛɛ gbɛjianɔtoo ní adesa kɛma shi ákɛ ehenɔwomɔ lɛ he okadi, kɛ mɔ aŋkro fɛɛ mɔ aŋkro ni sheee Nyɔŋmɔ gbeyei lɛ nɔ yɛ Yehowa mlifu gbi lɛ nɔ. Nɛkɛ gbɛ nɔ aaatsɔ ni “aaadɔ gbɔmɛi ahewoo kɛ adesai ahenɔwomɔ kɛaaba shi, ni aaawó Yehowa kome too nɔ yɛ nakai gbi lɛ nɔ!”—Yesaia 2:17.
8. Kojomɔ gbi ni agba afɔ̃ shi lɛ ba Yerusalem nɔ yɛ afi 607 D.Ŋ.B. yɛ mɛɛ gbɛ nɔ?
8 Kojomɔ gbi ni agba afɔ̃ shi lɛ ba Yudafoi lɛ anɔ yɛ afi 607 D.Ŋ.B. beni Babilonbii a-Maŋtsɛ Nebukadnezar kpata Yerusalem hiɛ lɛ. Maŋbii lɛ na ní amɛmaŋ ni amɛsumɔɔ lɛ miishã, akumɔ etsũi wuji fɛfɛji lɛ ashwie shi, ni akumɔ egbogboi wuji lɛ hu. Akumɔ Yehowa sɔlemɔtsu lɛ hu ashwie shi. Amɛ jwetrii lɛ kɛ amɛ ta shwiilii lɛ nyɛɛɛ nɔ ko kwraa afee yɛ “Yehowa Zebaot gbi lɛ” nɔ. Ni amɛ amagai lɛ hu? Eba mli taakɛ Yesaia gba efɔ̃ shi lɛ pɛpɛɛpɛ, akɛ: “Yakayaka wɔji lɛ asɛɛ aaafo kwraa!” (Yesaia 2:18) Alóo Yudafoi lɛ—ní lumɛi kɛ hii kãkãlɔi lɛ fata he lɛ—kɛtee nomŋɔɔ mli yɛ Babilon. Yerusalem baakã shi amaŋfɔ afii 70.
9. Shihilɛ ni yɔɔ Kristendom lɛ tamɔ shihilɛ ni hi shi yɛ Yerusalem kɛ Yuda yɛ Yesaia gbii lɛ amli lɛ yɛ mɛɛ gbɛ nɔ?
9 Kwɛ bɔ ni Kristendom shihilɛ tamɔ shihilɛ ni Yerusalem kɛ Yuda hi mli yɛ Yesaia gbii lɛ amli lɛ pɛpɛɛpɛ ha! Eyɛ faŋŋ akɛ Kristendom kɛ je nɛŋ jeŋmaji lɛ ená wekukpaa ko ni bɛŋkɛ kpaakpa. Eji mɔ ko ni kɛ ekãa diɛŋtsɛ fiɔ Jeŋmaji Ekomefeemɔ lɛ sɛɛ waa, ni ekɛ amagai kɛ nifeemɔ ni ŋmalɛ fiii sɛɛ ewo eshia lɛ mli obɔ̃. Mɛi ni kɛ amɛhe ekpɛtɛ ehe lɛ sumɔɔ heloonaa ninámɔ, ni amɛkɛ amɛhiɛ fɔ̃ɔ asraafoi ahewalɛ nɔ. Ni ani amɛnaaa amɛ osɔfoi lɛ akɛ amɛsa hiɛnyamwoo kpele ko, ni amɛkɛ sabalai kɛ woo haa amɛ? Ŋwanejee ko bɛ he akɛ abaaba Kristendom henɔwomɔ lɛ shi kwraa. Shi mɛɛ be?
‘Yehowa Gbi’ ni Eshɛ Etã Lɛ
10. Mɛɛ ‘Yehowa gbi’ bɔfo Paulo kɛ bɔfo Petro gbalaa jwɛŋmɔ kɛyaa nɔ lɛ?
10 Ŋmalɛi lɛ gbalaa jwɛŋmɔ kɛyaa ‘Yehowa gbi’ ko ni he hiaa kwraa fe kojomɔ gbi ni ba blema Yerusalem kɛ Yuda nɔ lɛ nɔ. Bɔfo Paulo jɛ mumɔŋ ekɛ ‘Yehowa gbi’ ni baa lɛ to ba ni Maŋtsɛ Yesu Kristo ní akɛ lɛ eta maŋtsɛsɛi nɔ lɛ eba lɛ he. (2 Tesalonikabii 2:1, 2) Petro wie nakai gbi lɛ he beni ewieɔ “ŋwɛi hee kɛ shikpɔŋ hee ni jalɛ hiɔ mli” lɛ shishitoo he lɛ. (2 Petro 3:10-13) No ji gbi nɔ ní Yehowa baatsu ekojomɔ he nii yɛ nibii agbɛjianɔtoo fɔŋ lɛ fɛɛ, ní Kristendom fata he lɛ nɔ.
11. (a) Namɔ “aaanyɛ” “Yehowa gbi” ni baa lɛ “naa adamɔ”? (b) Mɛɛ gbɛ nɔ wɔɔtsɔ wɔkɛ Yehowa afee wɔbobaahe?
11 Gbalɔ Yoel kɛɛ akɛ: “Ao, nakai gbi lɛ! ejaakɛ Yehowa gbi lɛ ebɛŋkɛ, ni eeeba tamɔ hiɛkpatamɔ kɛaajɛ Ofe lɛ ŋɔɔ.” Yɛ bɔ ni nakai “gbi” lɛ ebɛŋkɛ kpaakpa lɛ hewɔ lɛ, ani esaaa ni wɔteŋ mɔ fɛɛ mɔ susuɔ shweshweeshwe ní wɔɔfee yɛ nakai gbi ni yɔɔ gbeyei lɛ nɔ lɛ he? Yoel bi akɛ: “Namɔ aaanyɛ naa adamɔ?” Eha hetoo akɛ: “Yehowa aaatsɔ abobaahe eha emaŋ lɛ.” (Yoel 1:15; 2:11; 3:16) Ani Yehowa Nyɔŋmɔ baatsɔ abobaahe eha mɛi ni yɔɔ henɔwomɔ mumɔ kɛ mɛi ni kɛ amɛhiɛ fɔ̃ɔ ninámɔ, asraafoi ahewalɛ, kɛ nyɔŋmɔi ní adesai efee lɛ anɔ lɛ? Enyɛŋ eba lɛ nakai kɔkɔɔkɔ! Nyɔŋmɔ kpoo ewebii ní ehala amɛ lɛ po beni amɛfee amɛnii yɛ nɛkɛ gbɛ nɔ lɛ. Kwɛ bɔ ni ehe hiaa akɛ Nyɔŋmɔ tsuji fɛɛ ‘atao jalɛ sɛɛgbɛ, ni amɛtao heshibaa sɛɛgbɛ,’ ní amɛkɛ hiɛdɔɔ apɛi gbɛhe ni Yehowa jamɔ yɔɔ yɛ amɛshihilɛ mli lɛ mli amɛkwɛ!—Zefania 2:2, 3.
‘Kɛha Obishii kɛ Afutufatai’
12, 13. Mɛni hewɔ esa jogbaŋŋ kɛha amaga jálɔi lɛ akɛ amɛaashɛrɛ amɛnyɔŋmɔi lɛ amɛshwie “aha obishii kɛ afutufatai” yɛ Yehowa gbi lɛ nɔ lɛ?
12 Te amaga jálɔi baabu amɛ amagai lɛ tɛŋŋ yɛ Yehowa gbi kpeteŋkpele lɛ nɔ? Yesaia ha hetoo akɛ: “Gbɔmɛi aaabote tɛkpoloi kɛ shikpɔŋ bui amli, yɛ Yehowa he gbeyei kɛ egbojee anunyam lɛ naa, beni eeete shi ebahoso shikpɔŋ lɛ. Nakai gbi lɛ nɔ gbɔmɔ aaashɛrɛ ejwiɛtɛi wɔji kɛ eshika wɔji . . . lɛ ashwie aha obishii kɛ afutufatai, koni eyabote tɛkpoloi kɛ tɛsaa fɔji amli, yɛ Yehowa he gbeyei kɛ egbojee anunyam lɛ naa, beni eeete shi ebahoso shikpɔŋ lɛ. Nyɛgbalaa nyɛhe shi kɛjɛa gbɔmɔ ni emumɔ yɔɔ yɛ egugɔŋ lɛ he, shi mɛni mli po abuɔ lɛ yɛ!”—Yesaia 2:19-22.
13 Obishii hiɔ bui amli yɛ shikpɔŋ, ni afutufatai sɔ̃mɔ̃ɔ tɛkpoloi ni mli ewo duŋ ní nɔ ko bɛ mli lɛ amli. Kɛfata he lɛ, he fɛɛ he ni afutufatai sɔ̃mɔ̃ɔ babaoo lɛ, jɛmɛ jeɔ fũ waa diɛŋtsɛ, ni amɛwamɔ babaoo shwieɔ shi yɛ jɛmɛ. Amagai ní aaashɛrɛ ashwie hei ni tamɔ nɛkɛ lɛ sa jogbaŋŋ. He ni sa amɛ nɔŋŋ ji he ko ni ewo duŋ, ní jɛmɛ tseee. Yɛ gbɔmɛi lɛ gbɛfaŋ lɛ, amɛbaatao abobaahei yɛ tɛkpoloi kɛ tɛsaa mli fɔji amli yɛ Yehowa kojomɔ gbi lɛ nɔ. No hewɔ lɛ nɔ kome too lɛ nɔŋŋ pɛpɛɛpɛ baaba amagai lɛ kɛ mɛi ni jáa amɛ lɛ anɔ. Yɛ Yesaia gbalɛ lɛ naa pɛpɛɛpɛ lɛ, amagai ni wala bɛ amɛmli lɛ hereee mɛi ni jáa amɛ lɛ loo Yerusalem yiwala kɛjɛɛɛ Nebukadnezar dɛŋ yɛ afi 607 D.Ŋ.B.
14. Mɛni gbɔmɛi ni je lɛ ehé amɛjwɛŋmɔ lɛ baafee yɛ Yehowa kojomɔ gbi ni ekɛaaba jeŋ apasa jamɔ maŋtsɛyeli lɛ nɔ lɛ nɔ?
14 Mɛni gbɔmɛi baafee, yɛ Yehowa kojomɔ gbi ni baaba Kristendom kɛ jeŋ apasa jamɔ maŋtsɛyeli lɛ fãi krokomɛi ni eshwɛ lɛ anɔ lɛ nɔ? Akɛni amɛkɛ shihilɛ ni baaya nɔ afite yɛ shikpɔŋ lɛ nɔ fɛɛ baakpe hewɔ lɛ, ekolɛ amɛteŋ mɛi pii baayoo akɛ sɛɛnamɔ ko kwraa bɛ amɛ amagai lɛ ahe. Yɛ enɛɛmɛi anajiaŋ lɛ, ekolɛ amɛbaaya amɛyatao abobaahe kɛ hebuu kɛjɛ shikpɔŋ nɔ gbɛjianɔtoi ni susuuu mumɔŋ nibii ahe, ní ekolɛ Jeŋmaji Ekomefeemɔ lɛ, ni ji “kooloo ni tsuɔ tamɔ muneele” ni yɔɔ Kpojiemɔ yitso 17 lɛ fata he lɛ adɛŋ. Nakai mfonirifeemɔŋ kooloo lɛ “akolontoi nyɔŋma lɛ” ji nɔ ni baakpata Babilon Kpeteŋkpele lɛ, ni ji jeŋ apasa jamɔ maŋtsɛyeli lɛ, ní Kristendom ji efã ni sa kadimɔ waa lɛ hiɛ.—Kpojiemɔ 17:3, 8-12, 16, 17.
15. “Aaawó” Yehowa kome too “nɔ” yɛ ekojomɔ gbi lɛ nɔ yɛ mɛɛ gbɛ nɔ?
15 Eyɛ mli akɛ ekolɛ Babilon Kpeteŋkpele lɛ hiɛkpatamɔ kɛ eshãa baafee nakai mfonirifeemɔŋ akolontoi nyɔŋma lɛ nitsumɔ tɛ̃ɛ moŋ, shi yɛ anɔkwale mli lɛ, eji Yehowa kojomɔ he nitsumɔ. Kpojiemɔ 18:8 lɛ jajeɔ yɛ Babilon Kpeteŋkpele lɛ he akɛ: “No hewɔ lɛ gbi kome nɔ ehaomɔi lɛ aaaba, gbele kɛ awerɛho kɛ hɔmɔ, ni akɛ la aaashã lɛ, ejaakɛ [Yehowa, NW] Nyɔŋmɔ lɛ ni kojoɔ lɛ he wa.” No hewɔ lɛ akɛ kpɔmɔ ni akpɔ̃ adesai kɛjɛ apasa jamɔ hewalɛ shishi lɛ he yijiemɔ haa Yehowa Nyɔŋmɔ, Ofe lɛ. Taakɛ Yesaia jaje lɛ, “aaawó Yehowa kome too nɔ yɛ nakai gbi lɛ nɔ! Ejaakɛ Yehowa Zebaot gbi lɛ [ni].”—Yesaia 2:11b, 12a.
‘Gbɛtsɔɔlɔi lɛ Miiha Oodũ Gbɛ’
16. (a) Mɛni feɔ adesai ashihilɛ gbɛjianɔtoo lɛ “sɛɛtso kɛ waomɔtso”? (b) Yesaia maŋbii lɛ baana amanehulu yɛ amɛshihilɛ gbɛjianɔtoo lɛ “sɛɛtso kɛ waomɔtso” lɛ jiemɔ hewɔ yɛ mɛɛ gbɛ nɔ?
16 Kɛ́ adesai ashihilɛ gbɛjianɔtoo baadamɔ shi shiŋŋ lɛ, no lɛ esa akɛ ená “sɛɛtso kɛ waomɔtso”—nibii ni he hiaa tamɔ niyenii kɛ nu, kɛ nɔ ni he hiaa fe fɛɛ lɛ, hiɛnyiɛlɔi ní anyɛɔ akɛ he fɔ̃ɔ amɛnɔ, ní nyɛɔ amɛtsɔɔ gbɔmɛi lɛ agbɛ ni amɛhaa shihilɛ kpakpa hiɔ shi. Shi, Yesaia gba efɔ̃ shi yɛ blema Israel he akɛ: “Naa, Nuntsɔ, Yehowa Zebaot aaafamɔ sɛɛtso kɛ waomɔtso kɛaajɛ Yerusalem kɛ Yuda, aboloo tso fɛɛ aboloo tso kɛ nu tso fɛɛ nu tso, ekãalɔ kɛ tabilɔ, kojolɔ kɛ gbalɔ, kɛ okɔmfo kɛ onukpa fɛɛ, mɛi nyɔŋmai enumɔ nɔ asafoiatsɛ kɛ gbɔmɔ ni hiɛ yɔɔ nyam kɛ ajinafonyo kɛ ŋaalɔ ni le ŋaa jogbaŋŋ, kɛ ŋkunyaayelɔ ni he esa fɛɛ.” (Yesaia 3:1-3) Gbekɛbii bibii baatsɔmɔ lumɛi ni amɛbaaye nɔ kɛ yiŋfɛlɛfɛlɛ. Jeee akɛ nɔyelɔi lɛ baawa gbɔmɛi lɛ ayi kɛkɛ, shi moŋ “maŋ lɛ aaawawaa amɛhe yi . . . Gbekɛ aaawo ehe aha onukpa, ni mɔ ni abuuu lɛ aaawo ehe aha mɔ ni hiɛ yɔɔ nyam.” (Yesaia 3:4, 5) Gbekɛbii ‘aaawo amɛhe’ amɛtsɔɔ onukpai, ni tsɔɔ akɛ amɛbɛ bulɛ kɛha amɛ. Shihilɛ lɛ baaba shi aahu akɛ mɔ kome baakɛɛ mɔ kroko ní bɛ nɔyeli hegbɛ akɛ: “Oyɛ atade, baaye wɔnɔ lumɔ, ní nɛkɛ maŋ ni ejwa nɛɛ ahi odɛŋ!” (Yesaia 3:6) Shi mɛi ni akɛ ninefɔɔ nɛɛ baaha amɛ lɛ ekpɛlɛŋ, ni amɛaakɛɛ akɛ amɛbɛ nyɛmɔ ni amɛkɛaatsa maŋ ní epila lɛ loo ninámɔ ní amɛkɛaatsu gbɛnaa nii lɛ he nii. Amɛbaakɛɛ akɛ: “Jeee tsálɔ ji mi, ni miwe lɛ, aboloo bɛ jɛi, atade hu bɛ jɛi, nyɛkawoa mi maŋ lɛ nɔ lumɔ!”—Yesaia 3:7.
17. (a) Yerusalem kɛ Yuda he esha lɛ “tamɔ Sodom” nɔ̃ lɛ yɛ mɛɛ gbɛ nɔ? (b) Namɔ Yesaia shwaa yɛ shihilɛ ni emaŋbii lɛ yɔɔ mli lɛ hewɔ?
17 Yesaia yaa nɔ akɛ: “Yerusalem ejwa, ni Yuda hu ebutu, ejaakɛ amɛkɛ amɛlilɛi kɛ amɛnifeemɔ nii ete shi ewo Yehowa, koni amɛtse enunyam hiŋmɛii lɛ ahiɛ atua. Amɛhiɛ su yeɔ odase shiɔ amɛ, ni amɛgbaa amɛhe eshai hu tamɔ Sodom, amɛkɛteee. Kpóo ha amɛsusuma! ejaakɛ amɛfee amɛ diɛŋtsɛ amɛhe efɔŋ.” (Yesaia 3:8, 9) Nyɔŋmɔ webii lɛ etse anɔkwa Nyɔŋmɔ lɛ hiɛ atua yɛ wiemɔi kɛ nifeemɔi amli. Amɛhiɛ su ni etsɔɔɔ hiɛgbele kɛ heshwamɔ lɛ po jieɔ eshai ní amɛfee, ni yɔɔ nyaŋemɔ tamɔ Sodom eshai lɛ pɛpɛɛpɛ lɛ kpo. Amɛkɛ Yehowa Nyɔŋmɔ efee kpaŋmɔ, ni kɛlɛ, etsakeŋ tɛi ni efolɔ eshwie shi eha amɛ lɛ. “Jalɔi lɛ . . . aaahi aha amɛ, ejaakɛ amɛaaye amɛnifeemɔ nii lɛ amli yibii. Kpóo ha efɔŋfeelɔ lɛ! ehiŋ haŋ lɛ; ejaakɛ eninenaa nitsumɔ lɛ nɔŋŋ he nyɔmɔ abaawo lɛ. Mimaŋ lɛ yiwalɔi lɛ, gbekɛbii ni, ni yei miiye enɔ! Mimaŋ! ogbɛtsɔɔlɔi lɛ hãa oduɔ gbɛ ni amɛfiteɔ gbɛ ni onyiɛ nɔ lɛ.”—Yesaia 3:10-12.
18. (a) Mɛɛ kojomɔ Yehowa jaje eshwie onukpai kɛ lumɛi ni hi shi yɛ Yesaia gbii lɛ amli lɛ anɔ? (b) Mɛni wɔkaseɔ kɛjɛɔ Yehowa kojomɔ ni ekɛba onukpai kɛ lumɛi lɛ anɔ lɛ mli?
18 Yehowa ‘bu’ Yuda onukpai kɛ lumɛi lɛ ‘atɛŋ,’ ni ‘ekojo amɛ’ akɛ: “Nyɛ lɛ nyɛye weintrom lɛ mli nii; ohiafoi anii ni ashɔ̃ yɛ nyɛwe lɛ. Te nyɛjwɛŋɔ tɛŋŋ ni nyɛmiaa mimaŋ lɛ, ni nyɛkɛ ohiafoi ahiɛ shwishwiaa shi nɛɛ?” (Yesaia 3:13-15) Yɛ nɔ najiaŋ ní hiɛnyiɛlɔi lɛ aaatsu nii kɛha gbɔmɛi lɛ ahilɛ-kɛhamɔ lɛ, amɛkɛ amɛhe ewo shishiumɔ nifeemɔi moŋ mli. Amɛkɛ hegbɛ ni amɛyɔɔ lɛ tsuɔ nii yɛ gbɛ fɔŋ nɔ kɛtsɔ ninámɔ kɛ ohiafoi kɛ mɛi ni efi amɛ lɛ ashishiumɔ nɔ. Shi esa akɛ hiɛnyiɛlɔi nɛɛ abu akɔntaa amɛha Yehowa Zebaot yɛ nɔnyɛɛ ni amɛkɛba mɛi ni naa amanehulu lɛ anɔ lɛ hewɔ. Kwɛ kɔkɔbɔɔ ni enɛ ji kɛha mɛi ni hiɛ nɔyeli hegbɛi ŋmɛnɛ lɛ! Eba akɛ amɛaakwɛ jogbaŋŋ be fɛɛ be koni amɛkɛ hegbɛ ni amɛná lɛ akatsu nii yɛ gbɛ fɔŋ nɔ.
19. Mɛɛ nɔnyɛɛ kɛ yiwaa Kristendom eye he fɔ́?
19 Kristendom—titri lɛ esɔfoi kɛ emɛi wuji lɛ—etsɔ shishiumɔ nɔ amɛná nii babaoo ní kulɛ esa akɛ nii nɛɛ afee gbɔmɛi foji, ní enyɛ amɛnɔ, ní eeya nɔ eenyɛ amɛnɔ lolo lɛ anii. Éyi Nyɔŋmɔ webii lɛ hu, ni ewa amɛ yi, ni efee amɛ niseniianii, ni ekɛ heguɔgbee kpele diɛŋtsɛ eba Yehowa gbɛi lɛ nɔ. Eka shi faŋŋ akɛ, Yehowa baaba ebakojo lɛ yɛ lɛ diɛŋtsɛ ebe ni eto mli.
“La Faladokui Aaabaye Hefɛo Najiaŋ”
20. Mɛni hewɔ Yehowa wie eshi “Zion biyei lɛ”?
20 Beni Yehowa wie eshi hiɛnyiɛlɔi lɛ anifeemɔi fɔji lɛ sɛɛ lɛ, egbala ejwɛŋmɔ kɛtee Zion, loo Yerusalem yei lɛ anɔ. Eyɛ faŋŋ akɛ yɛ hesaamɔ ni eba nɔ lɛ hewɔ lɛ, “Zion biyei lɛ” woɔ “naneshi kɔsɔŋkɔsɔi”—ni ji kɔsɔŋkɔsɔi bibii ni awoɔ yɛ nanetalɔ—ní jijeɔ kɛ ŋɔɔmɔ kɛ́ akɛmiinyiɛ lɛ. Yei lɛ kpãaa amɛnaji amli, ni kɛ́ amɛnyiɛ lɛ, “tsiamɔ amɛtsiaa,” ni amɛhaa amɛnyiɛmɔ lɛ feɔ tamɔ yei agwaseaŋ gbɔmɛi anyiɛmɔ. Shi, mɛɛ tɔmɔ yɔɔ enɛ mli? No ji subaŋ ní yei nɛɛ jieɔ lɛ kpo lɛ. Yehowa kɛɔ akɛ: “Zion biyei lɛ woɔ amɛhe, ni amɛnyiɛɔ kɛ kuɛ kuumɔ kɛ ahoshwibɔɔ hiŋmɛii.” (Yesaia 3:16) Nɛkɛ hewoo nɛɛ ejoŋ toigbalamɔ naa foi.
21. Te kojomɔ ní Yehowa kɛba Yerusalem nɔ lɛ sa Yudafoi yei lɛ ahe eha tɛŋŋ?
21 No hewɔ lɛ, kɛ́ Yehowa kojomɔ ba shikpɔŋ lɛ nɔ lɛ, nɛkɛ “Zion biyei” hewolɔi nɛɛ baalaaje nɔ fɛɛ nɔ—kɛ hefɛo ní amɛkɛwoɔ amɛhe waa lɛ po. Yehowa gba efɔ̃ shi akɛ: “No hewɔ lɛ Nuntsɔ lɛ aaaha Zion biyei lɛ ayiteaŋ ashwie gbɛ̃i, ni Yehowa aaaha amɛyayaiaŋ aje kpo. Nakai gbi lɛ nɔ lɛ Nuntsɔ lɛ aaajie amɛnaneshi gai ni amɛkɛwulaa amɛhe lɛ, kɛ ntãŋi kɛ nyɔɔŋtsere fãfãi lɛ, toiiaŋ nii kɛ nineshi nii kɛ hiɛhaa nii lɛ, yitsofii nii fɛfɛji kɛ naneshi kɔsɔŋkɔsɔi kɛ mlifii nii kɛ tsofa-kɛ-ŋma tɔi [ekolɛ anoatrɛ tɔi] kɛ sɛbɛi [loo, wɔŋ kpãai] lɛ, nineshi gai kɛ gugɔŋ gai lɛ, wulamɔ atadei kɛ atadei wuyawuyaai kɛ mamai kɛ kotokui lɛ, ashwishwɛi kɛ sɛkii kɛ dukui ni aŋafiɔ yitso kɛ nɔhaa nii lɛ.” (Yesaia 3:17-23, kwɛmɔ “NW” shishigbɛ niŋmaai.) Mɛɛ nibii atsakemɔ sɛɛsɛɛ ni yɔɔ oshara nɛ!
22. Mɛni hu Yerusalem yei lɛ laaje kɛfata amɛhewulamɔ nibii lɛ ahe?
22 Gbalɛ shɛɛ sane lɛ yaa nɔ ekɛɔ akɛ: “Fũjee aaabaye tsofa-kɛ-ŋma najiaŋ, ni taŋkpee aaabaye mlifii nii najiaŋ, ni yi kpataa aaabaye yi ni ahɔ najiaŋ, ni kpekpe aaabaye atade wuyaa najiaŋ, ni la faladokui aaabaye hefɛo najiaŋ.” (Yesaia 3:24) Yɛ afi 607 D.Ŋ.B. lɛ, Yerusalem yei hewolɔi lɛ gbee shi kɛjɛ ninámɔ mli kɛtee ohia mli. Amɛlaaje amɛheyeli lɛ ni amɛná nyɔŋyeli “la faladokui.”
“Lɛ Diɛŋtsɛ lɛ, Eeeshwɛ lɛ Efolo”
23. Mɛni Yehowa jaje yɛ Yerusalem he?
23 Beni Yehowa kɛ Yerusalem maŋtiase lɛ wieɔ agbɛnɛ lɛ, ejaje akɛ: “Ohii lɛ aaanyɔ̃nyɔ̃i yɛ klante naa, ni okãkãlɔi lɛ hu aaanyɔ̃ yɛ ta mli. Ni egbói lɛ aaaye ŋkɔmɔ ni amɛaafee yara, ni lɛ diɛŋtsɛ lɛ, eeeshwɛ lɛ efolo ni eeeshwata shikpɔŋ.” (Yesaia 3:25, 26) Abaagbe Yerusalem hii, ni ji ekãkãlɔi lɛ po yɛ ta mli. Abaakumɔ maŋtiase lɛ fɛɛ ashwie shi shwɛtɛɛ. No baafee ‘ŋkɔmɔyeli kɛ yarafeemɔ’ be kɛha “egbói” lɛ. Abaashi Yerusalem “efolo” ni abaafee lɛ amaŋfɔ.
24. Mɛɛ shihilɛi ni mli wa waa klante ní akɛgbe hii lɛ kɛba Yerusalem yei lɛ anɔ?
24 Klante ni akɛaagbe hii lɛ kɛ shihilɛi ni mli wa waa diɛŋtsɛ baaba Yerusalem yei lɛ anɔ. Beni Yesaia gbeɔ egbalɛ wolo lɛ fã nɛɛ naa lɛ, egba efɔ̃ shi akɛ: “Nakai gbi lɛ nɔ lɛ yei kpawo aaamɔ nuu kome ni amɛaakɛɛ: Wɔɔye wɔ diɛŋtsɛ wɔŋmãa ni wɔɔwo wɔ diɛŋtsɛ wɔtade: hã akɛ ogbɛi kɛkɛ awo wɔ! Jiemɔ wɔhiɛgbele yɛ wɔnɔ!” (Yesaia 4:1) Bɔ ni anáŋ hii ni abaanyɛ akɛ amɛ abote gbalashihilɛ mli kwraa lɛ mli baawa aahu akɛ yei babaoo kɛ amɛhe baakpɛtɛ nuu kome he bɔni afee ni akɛ egbɛi atsɛ́ amɛ—ni tsɔɔ akɛ, koni ale amɛ faŋŋ akɛ eŋamɛi—koni no aha amɛye amɛhe kɛjɛ ahora ní aaabɔ amɛ akɛ amɛbɛ wu lɛ mli. Mose Mla lɛ biɔ ni wu lɛ aha eŋa lɛ edaaŋ ŋmãa kɛ ehehaa nii. (2 Mose 21:10) Shi kɛlɛ, akɛni amɛkpɛlɛ akɛ ‘amɛaaye amɛ diɛŋtsɛ amɛŋmãa ni amɛaawo amɛ diɛŋtsɛ amɛtade’ hewɔ lɛ, yei nɛɛ miisumɔ ní amɛha nuu lɛ aye ehe kɛjɛ gbɛnaa nii ni jwere enɔ yɛ mla naa lɛ ahe. Mɛɛ jaramɔ shihilɛ po eji kɛha “Zion biyei lɛ” ní be ko lɛ amɛwoɔ amɛhe lɛ nɛkɛ!
25. Mɛni yɔɔ wɔsɛɛ be ni ebɛŋkɛ kpaakpa lɛ mli kɛha henɔwolɔi?
25 Yehowa baa henɔwolɔi ashi. Yɛ afi 607 D.Ŋ.B. lɛ, eha ewebii ní ehala amɛ lɛ ahewoo lɛ ‘dɔ kɛbashi’ ni eha ‘amɛhenɔwomɔ’ lɛ ‘ba shi.’ Eba akɛ anɔkwa Kristofoi ahiɛ kpaŋ nɔ kɔkɔɔkɔ akɛ, “Nyɔŋmɔ lɛ, ekuɔ hewolɔi anaa, shi heshibalɔi eduroɔ.”—Yakobo 4:6.
[Mfoniri ni yɔɔ baafa 50]
Amagai, ninámɔ, kɛ asraafoi anyɛmɔ ní ekaaa hereee Yerusalem yiwala yɛ Yehowa kojomɔ gbi lɛ nɔ
[Mfoniri ni yɔɔ baafa 55]
Abaakpata jeŋ apasa jamɔ maŋtsɛyeli lɛ hiɛ kwraa yɛ “Yehowa gbi lɛ” nɔ