Wɔyɛ Miishɛɛ Bianɛ ni Agbɛnɛ Kɛmiiya Naanɔ
“Nyɛnyaa ni nyɛmli afilia nyɛ kɛyaa naanɔ yɛ nii ni mibɔɔ lɛ ahewɔ; ejaakɛ naa, miibɔ Yerusalem ni etsɔ mlifilimɔ, kɛ emli bii lɛ hu, ni amɛtsɔ nyamɔ.”—YESAIA 65:18.
1. Te anɔkwa jamɔ esa aŋkroaŋkroi ahe yɛ afii ohai abɔ lɛ amli eha tɛŋŋ?
GBƆMƐI pii ni anyɛŋ akane amɛ ena miishɛɛ babaoo yɛ Yehowa, anɔkwa Nyɔŋmɔ lɛ sɔɔmɔ mli yɛ afii ohai abɔ lɛ fɛɛ mli. David ji amɛteŋ mɔ ko ni na miishɛɛ yɛ anɔkwa jamɔ mli. Biblia lɛ wieɔ akɛ, beni akɛ kpaŋmɔ adeka lɛ ba Yerusalem lɛ, “David kɛ Israel we lɛ fɛɛ yawo Yehowa adeka lɛ kɛba kɛ oshebɔɔ kɛ tɛtrɛmantɛrɛ kpamɔ.” (2 Samuel 6:15) Miishɛɛ ni akɛsɔmɔɔ Yehowa nɛkɛ lɛ jeee tsutsu nii ko kɛkɛ ni eho. Obaanyɛ ona mli gbɛfaŋnɔ. Ni etsɛŋ ni miishɛɛ heei babaoo po baanyɛ atsɔ onɔ̃!
2. Yɛ Yesaia yitso 35 gbalɛ lɛ klɛŋklɛŋ mlibaa ni kɔɔ Yudafoi lɛ asɛɛkuu he lɛ sɛɛ lɛ, namɛi hu emlibaa kroko kɔɔ amɛhe?
2 Wɔkwɛ gbalɛ ni kanyaa mɔ ni aŋma afɔ shi yɛ Yesaia yitso 35 lɛ klɛŋklɛŋ mlibaa lɛ mli yɛ nikasemɔ ni tsɔ hiɛ lɛ mli. Wɔbaanyɛ wɔtsɛ enɛ yɛ gbɛ ni ja nɔ akɛ nisaamɔ gbalɛ, ejaakɛ nakai ji bɔ ni efee kɛha blema Yudafoi lɛ. Eyɛ emlibaa ni tamɔ nakai yɛ wɔbe nɛɛ mli. Yɛ mɛɛ gbɛ nɔ? Ojogbaŋŋ, kɛjɛ Yesu bɔfoi lɛ kɛ mɛi krokomɛi anɔ yɛ Pentekoste 33 Ŋ.B. kɛbaa nɛɛ, Yehowa kɛ mumɔŋ Israelbii lɛ yeɔ agbɛnɛ. Mɛnɛɛmɛi ji adesai ni akɛ Nyɔŋmɔ mumɔ krɔŋkrɔŋ lɛ efɔ amɛ mu ni batsɔmɔɔ mɛi ni bɔfo Paulo tsɛɔ amɛ “Nyɔŋmɔ Israel lɛ” fa. (Galatabii 6:16; Romabii 8:15-17) Kaimɔ hu akɛ, atsɛɔ nɛkɛ Kristofoi nɛɛ yɛ 1 Petro 2:9 akɛ, “weku ni ahala . . . maŋtsɛmɛi ni yeɔ osɔfoi, jeŋmaŋ krɔŋkrɔŋ, maŋ ni eŋɔfee enɔ.” Petro tee nɔ etsɔɔ nitsumɔ ni akɛha mumɔŋ Israel, ni ekɛfata he akɛ, “ ‘koni nyɛjaje’ mɔ ni tsɛ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ ‘agbojee’ lɛ.”
Emlibaa ko yɛ Wɔbe Nɛɛ Mli
3, 4. Te shihilɛ lɛ yɔɔ tɛŋŋ beni Yesaia yitso 34 ba mli yɛ ŋmɛnɛŋmɛnɛ beaŋ lɛ?
3 Be ko shɛ yɛ wɔ afii oha nɛɛ shishijee mli ní mumɔŋ Israel shwɛɛnii ni yɔɔ shikpɔŋ nɔ lɛ kɛ ekãa ejajeee sane ni tamɔ nɛkɛ amɛtsɔɔɔ be fɛɛ be. Amɛmli efiliii amɛ kɛmɔɔɔ shi yɛ Nyɔŋmɔ la ni yɔɔ naakpɛɛ lɛ mli. Yɛ anɔkwale mli lɛ, no mli lɛ amɛyɛ duŋ kpii mli. Mɛɛ be nɛ? Ni mɛni Yehowa Nyɔŋmɔ fee yɛ he?
4 No ji Jeŋ Ta I be lɛ, be mli ni akɛ Nyɔŋmɔ Mesia Maŋtsɛyeli lɛ ma shi yɛ ŋwɛi yɛ 1914 lɛ sɛɛ nɔŋŋ lɛ. Jeŋmaji lɛ, ni sɔlemɔi ni yɔɔ shikpɔji sɔrɔtoi anɔ lɛ mli osɔfoi lɛ fiɔ amɛsɛɛ lɛ amli efũfũu amɛhe. (Kpojiemɔ 11:17, 18) Shi Nyɔŋmɔ teɔ shi ewoɔ Kristendom ni ekwa hemɔkɛyeli lɛ kɛ esɔfoi akuu ni ehole amɛhe nɔ lɛ waa, taakɛ efee yɛ Edom maŋ ni wó ehe nɔ waa lɛ he lɛ. Enɛ hewɔ lɛ, Kristendom, ni ji mfoniri feemɔŋ Edom, baanu ŋmɛnɛŋmɛnɛ beaŋ Yesaia yitso 34 lɛ mlibaa he. Emlibaa kɛtsɔ naanɔ hiɛkpatamɔ nɔ lɛ baaba mli kɛ̃ tamɔ bɔ ni aha eba mli yɛ blema Edom nɔ lɛ pɛpɛɛpɛ.—Kpojiemɔ 18:4-8, 19-21.
5. Mɛɛ mlibaa nɛkɛ Yesaia yitso 35 ena yɛ wɔbei nɛɛ amli?
5 Shi Yesaia gbalɛ lɛ yitso 35, ni maa miishɛɛ nɔ mi lɛ hu? No hu eba mli yɛ wɔbe nɛɛ mli. Yɛ mɛɛ gbɛ nɔ? Eba mli yɛ mumɔŋ Israel saamɔ kɛmiijɛ nomŋɔɔ shihilɛ ko mli lɛ mli. Nyɛhaa wɔpɛia anɔkwa saji ni kɔɔ nɔ ni ji nyɛsɛɛ teokrase yinɔsane he ni ba mli yɛ mɛi ni yɔɔ wala mli bianɛ lɛ ateŋ mɛi pii ashihilɛ mli lɛ mli.
6. Mɛni hewɔ abaanyɛ akɛɛ akɛ mumɔŋ Israel shwɛɛnii lɛ baje nomŋɔɔ shihilɛ mli lɛ?
6 Mumɔŋ Israel shwɛɛnii lɛ ehiɛɛɛ amɛhe yɛ hetsemɔ mli ni amɛkɛ amɛhe kpɛtɛɛɛ Nyɔŋmɔ suɔmɔnaa nifeemɔ he yɛ be fioo ko ni ba yɛ Jeŋ Ta I be lɛ mli lɛ mli. Amɛteŋ mɛi komɛi kɛ tsɔɔmɔi amli tɔmɔi wo amɛhe muji ni amɛŋmɛɛ amɛ shidaamɔ lɛ he kɛtsɔ shidaamɔ ni yɔɔ shiŋŋ ni amɛkɔɔɔ amɛhaaa Yehowa beni akɛ nɔnyɛɛ ba amɛnɔ koni amɛfi jeŋmaji ni kɛ amɛhe wuuɔ ta lɛ asɛɛ lɛ nɔ. Amɛna amanehulu yɛ yiwaai sɔrɔtoi fɛɛ shishi, ni agu amɛ Biblia kasemɔ woji lɛ po yɛ hei babaoo yɛ nakai ta afii lɛ amli. Yɛ naagbee lɛ, adamɔ amale naafolɔmɔi anɔ awo nyɛmimɛi ni nyiɛɔ hiɛ lɛ ateŋ mɛi komɛi atsuŋ. Yɛ nibii ni ba nɛɛ hewɔ lɛ, ewaaa akɛ aaana akɛ, yɛ shishinumɔ ko naa lɛ, ni Nyɔŋmɔ webii aaaye amɛhe moŋ lɛ, amɛyɛ nomŋɔɔ shihilɛ mli. (Okɛto Yohane 8:31, 32 he.) Amɛbɛ mumɔŋ ninaa ko kwraa. (Efesobii 1:16-18) Ni amɛgbeleee amɛ daaŋ yɛ Nyɔŋmɔ yijiemɔ gbɛfaŋ, ni nɔ ni jɛ mli ba ji akɛ, amɛwooo yibii yɛ mumɔŋ. (Yesaia 32:3, 4; Romabii 14:11; Filipibii 2:11) Ani onaa bɔ ni enɛ tamɔ blema Yudafoi lɛ ashihilɛ yɛ Babilon nomŋɔɔ mli lɛ?
7, 8. Mɛɛ saamɔ ŋmɛnɛŋmɛnɛ beaŋ shwɛɛnii lɛ ná?
7 Shi ani Nyɔŋmɔ baashi eŋmɛnɛŋmɛnɛ beaŋ tsuji lɛ yɛ shihilɛ ni tamɔ nɛkɛ mli? Dabi, etswa efai shi akɛ ebaasaa amɛ ekoŋŋ, taakɛ atsɔ Yesaia nɔ agba afɔ shi lɛ. Enɛ hewɔ lɛ, nɛkɛ gbalɛ nɛɛ nɔŋŋ ni yɔɔ yitso 35 nɛɛ naa emlibaa ni yɔɔ faŋŋ yɛ wɔbe nɛɛ mli, kɛtsɔɔ mumɔŋ Israel shwɛɛnii ni asaa akɛ amɛ ba shweremɔ kɛ hewalɛnamɔ mli yɛ mumɔŋ paradeiso mli lɛ anɔ. Paulo kɛ Yesaia 35:3 tsu nii yɛ Hebribii 12:12 yɛ okadi gbɛ nɔ, ni tsɔɔ bɔ ni eja akɛ wɔkɛ Yesaia gbalɛ lɛ fa nɛɛ aaatsu nii yɛ mumɔŋ lɛ.
8 Yɛ tawuu be lɛ sɛɛ lɛ, aŋmɛɛ mumɔŋ Israel shwɛɛnii ni afɔ amɛ mu lɛ ahe kɛjɛ nomŋɔɔ mli, kɛ wɔɔwie he yɛ okadi gbɛ nɔ lɛ. Yehowa Nyɔŋmɔ kɛ Yesu Kristo, Koresh Kpeteŋkpele lɛ tsu nii ni ekɛkpɔ̃ amɛ. Enɛ hewɔ lɛ, shwɛɛnii nɛɛ nyɛ amɛtsu tsũtswaa nitsumɔ ko, ni tamɔ bɔ ni blema Yudafoi ni ku amɛsɛɛ kɛtee amɛshikpɔŋ nɔ koni amɛyasaa amɛma sɔlemɔtsu lɛ diɛŋtsɛ yɛ Yerusalem lɛ fee lɛ. Agbɛnɛ, nɛkɛ mumɔŋ Israelbii ni yɔɔ ŋmɛnɛŋmɛnɛ bei nɛɛ amli lɛ baanyɛ aje mumɔŋ paradeiso ko mli saamɔ shishi, ni ji mfoniri feemɔŋ Eden trom ko.
9. Te fee tɛŋŋ nɔ ko ni tamɔ nɔ ni atsɔɔ mli yɛ Yesaia 35:1, 2, 5-7 lɛ ba yɛ wɔbe nɛɛ mli?
9 Beni enɛ yɔɔ wɔjwɛŋmɔ mli lɛ, nyɛhaa wɔsusua Yesaia yitso 35 he shikome ekoŋŋ, ni klɛŋklɛŋ lɛ wɔkwɛ kukuji 1 kɛ 2. Obaana akɛ nɔ ni fee tamɔ shikpɔŋ gbiŋ kɛha amɛ lɛ bɔi afofro gbamɔ diɛŋtsɛ, ni ebawo yibii babaoo tamɔ blema Sharon shikpɔŋ kplanaa lɛ ji lɛ. Agbɛnɛ hu, kwɛmɔ kuku 5 kɛyashi 7. Agbele shwɛɛnii lɛ ni amɛteŋ mɛi komɛi yɔɔ wala mli lolo ni amɛyɔɔ ekãa yɛ Yehowa sɔɔmɔ mli lɛ aniiashishinumɔ hiŋmɛii. Amɛnyɛ amɛnu nɔ ni ba yɛ 1914 kɛ no sɛɛ lɛ shishi jogbaŋŋ agbɛnɛ. Ni enɛ hu ná wɔteŋ mɛi pii ni feɔ “asafo babaoo” ni wɔfata shwɛɛnii lɛ ahe kɛmiisɔmɔ bianɛ lɛ anɔ hewalɛ.—Kpojiemɔ 7:9.
Ani Ofata Emlibaa lɛ He?
10, 11. (a) Yesaia 35:5-7 mlibaa kɔɔ ohe yɛ mɛɛ gbɛ nɔ? (b) Te bo diɛŋtsɛ lɛ onuɔ nɛkɛ tsakemɔi nɛɛ ahe ohaa tɛŋŋ?
10 Okɛ bo diɛŋtsɛ ohe afee nɔkwɛmɔ nɔ okwɛ. Dani okɛ Yehowa Odasefoi aaabɔ lɛ, ani okaneɔ Biblia lɛ daa? Kɛ okaneɔ lɛ, no mli lɛ shishinumɔ enyiɛ oyɔɔ yɛ he? Akɛ nɔkwɛmɔ nɔ lɛ, amrɔ nɛɛ ole anɔkwale ni kɔɔ shihilɛ ni gbohii lɛ yɔɔ mli lɛ he nɔ ko. Ekolɛ onyɛɔ otsɛɔ mɛi ni yɔɔ wiemɔ lɛ he miishɛɛ lɛ ajwɛŋmɔ yisɛɛ kɛyaa ŋmalɛi ni yɔɔ 1 Mose yitso 2, Jajelɔ yitso 9, kɛ Ezekiel yitso 18 lɛ, kɛ ŋmalɛi krokomɛi babaoo ni tamɔ nakai lɛ anɔ. Hɛɛ, ekolɛ onuɔ nɔ ni Biblia lɛ tsɔɔ yɛ saji loo otii babaoo he lɛ shishi. Kɛ aaawie he kuku lɛ, shishinumɔ yɛ Biblia lɛ mli kɛha bo, ni obaanyɛ otsɔɔ babaoo mli oha mɛi krokomɛi, taakɛ ŋwanejee ko bɛ he akɛ ofee lɛ.
11 Shi, wɔteŋ mɔ fɛɛ mɔ baafee jogbaŋŋ akɛ eeebi akɛ, ‘Te mifee tɛŋŋ mikase nibii fɛɛ ni mile yɛ Biblia mli anɔkwale he lɛ? Dani mikɛ Yehowa webii aaakase nii lɛ, ani no mli lɛ mile ŋmalɛi ni atsi ta nɛɛ fɛɛ? Ani no mli lɛ minuɔ shishi, ni minyɛɔ mimuɔ sane naa yɛ gbɛ ni ja nɔ yɛ bɔ ni amɛhe hiaa ha lɛ naa?’ Hetoo ni ja yɛ anɔkwale mli ji ekolɛ dabi. Mɔ ko mɔ ko mli akafũ yɛ wiemɔ nɛɛ hewɔ, shi abaanyɛ akɛɛ akɛ, kɛjɛ shishijee lɛ ohiŋmɛii eshwila yɛ ŋmalɛi nɛɛ kɛ amɛ shishinumɔ he. Ani jeee nakai eji? Amɛyɛ Biblia lɛ mli, shi onuuu shishi loo ni ooona nɔ ni amɛtsɔɔ. No hewɔ lɛ, te fee tɛŋŋ ni ohiŋmɛii gbele yɛ mumɔŋ? Eba lɛ nakai kɛtsɔ nɔ ni Yehowa efee ni ha Yesaia 35:5 ba mli yɛ shwɛɛnii ni afɔ amɛ mu lɛ anɔ lɛ nɔ. Nɔ ni jɛ mli ba ji ohiŋmɛii ni gbele. Agbɛnɛ obɛ mumɔŋ duŋ mli dɔŋŋ. Onyɛɔ onaa nii.—Okɛto Kpojiemɔ 3:17, 18 he.
12. (a) Mɛni hewɔ wɔbaanyɛ wɔkɛɛ akɛ enɛ jeee be ni akɛtsaa gbɔmɔtsoŋ helai yɛ naakpɛɛ gbɛ nɔ lɛ? (b) Nyɛminuu F. W. Franz sane lɛ feɔ bɔ ni Yesaia 35:5 baa mli yɛ wɔbe nɛɛ mli lɛ he mfoniri yɛ mɛɛ gbɛ nɔ?
12 Nikaselɔi ni nyaa Biblia lɛ kɛ bɔ ni Nyɔŋmɔ nifeemɔi ji yɛ afii ohai abɔ lɛ amli lɛ le akɛ, jeee yinɔsane mli be ni akɛfeɔ naakpɛɛ nii ni akɛtsaa gbɔmɔtsoŋ helai nɛ. (1 Korintobii 13:8-10) No hewɔ lɛ wɔkpaaa gbɛ akɛ Yesu Kristo baaya nɔ agbele hiŋmɛii ni eshwila koni ekɛye odase akɛ lɛ ji Mesia, Nyɔŋmɔ Gbalɔ lɛ. (Yohane 9:1-7, 30-33) Ni asaŋ jeee akɛ eeye eebua ni toimulɔi fɛɛ anu wiemɔi ekoŋŋ. Beni eshwɛ fioo ni Frederick W. Franz, ni ji mɛi ni afɔ amɛ mu lɛ ateŋ mɔ kome kɛ Buu Mɔɔ Asafo lɛ tsutsu sɛinɔtalɔ lɛ baaye afii 100 lɛ, no mli lɛ eshwila kwraa etã, ni ekɛ nɔ ko woɔ etoi dani kɛ aawie lɛ enuɔ. Ehi shi afii saŋŋ ni enaaa nii ni enyɛɛɛ ekane nii; ni kɛlɛ namɔ baasusu akɛ shwilafo loo toimulɔ ji lɛ, yɛ shishinumɔ ni yɔɔ Yesaia 35:5 lɛ naa? Emumɔŋ ninaa ni yɔɔ faŋŋ lɛ ji jɔɔmɔ kɛha Nyɔŋmɔ webii yɛ jeŋ fɛɛ.
13. Mɛɛ tsakemɔ loo saamɔ ŋmɛnɛŋmɛnɛ beaŋ Nyɔŋmɔ webii lɛ anine shɛ nɔ?
13 Aloo olilɛi hu? Ekolɛ aha Nyɔŋmɔ webii ni afɔ amɛ mu lɛ bumɔ amɛnaa yɛ amɛ mumɔŋ nomŋɔɔ be lɛ mli. Shi, beni Nyɔŋmɔ tsake nakai shihilɛ lɛ pɛ kɛkɛ ni amɛlilɛii kɛ mlifilimɔ bɔi wiemɔ waa, yɛ nɔ ni amɛle yɛ Nyɔŋmɔ Maŋtsɛyeli ni ato ama shi lɛ kɛ eshiwooi kɛha wɔsɛɛ be mli lɛ he. Amɛye amɛbua ni bo hu olilɛi efɛne. Be enyiɛ okɛwie Biblia mli anɔkwale lɛ he otsɔɔ mɛi krokomɛi yɛ tsutsu? Ekolɛ osusu yɛ be ko mli akɛ, ‘Misumɔɔ nikasemɔ lɛ, shi miyaŋ ni mikɛ mɛi krokomɛi ayawie kɔkɔɔkɔ.’ Shi, ani ejeee anɔkwale akɛ “mumui lilɛi” ‘miila kɛ nyamɔ’ amrɔ nɛɛ?—Yesaia 35:6.
14, 15. Mɛi pii enyiɛ ‘Gbɛ Krɔŋkrɔŋ’ lɛ nɔ yɛ wɔbe nɛɛ mli yɛ mɛɛ gbɛ nɔ?
14 Blema Yudafoi ni akpɔ̃ amɛ kɛjɛ Babilon lɛ yɛ gbɛ kakadaŋŋ ni amɛbaafã kɛya amɛ shikpɔŋ nɔ. Enɛ kɔɔ wɔbe nɛɛ he yɛ mɛɛ gbɛ nɔ? Ojogbaŋŋ, kwɛmɔ Yesaia 35:8: ‘Ni aaaje gbɛjegbɛ ko yɛ jɛi kɛ gbɛ ko ni aaatsɛ lɛ Gbɛ Krɔŋkrɔŋ lɛ; mɔ ko ni he tseee enyiɛŋ nɔ.’
15 Kɛjɛ be mli ni ajie amɛ kɛjɛ mumɔŋ nomŋɔɔ mli nɛɛ, shwɛɛnii ni afɔ amɛ mu, ni amrɔ nɛɛ tooi krokomɛi akpekpei abɔ ebafata amɛhe lɛ, eje kpo kɛjɛ Babilon Kpeteŋkpele lɛ mli kɛbayi okadi gbɛjegbɛ ko, gbɛ krɔŋkrɔŋ ni nɔ tse, ni kɛ mɔ yaa mumɔŋ paradeiso mli lɛ nɔ. Wɔmiibɔ mɔdɛŋ fɛɛ ni wɔɔnyɛ koni wɔfee mɛi ni sa Gbɛ Krɔŋkrɔŋ nɛɛ nɔ nyiɛmɔ. Susumɔ bo diɛŋtsɛ ohe okwɛ. Ani jeŋba kpakpa he tɛi kɛ shishitoo mlai ni ohiɔ shi yɛ naa lɛ anɔ kwɔlɔɔɔ amrɔ nɛɛ fe be mli ni oyɔɔ je lɛŋ lɛ kwraa? Ni ani okɛ mɔdɛŋbɔɔ babaoo miaaa ohiɛ koni oha osusumɔi kɛ ojeŋba kɛ Nyɔŋmɔ nɔ̃ akpa gbee?—Romabii 8:12, 13; Efesobii 4:22-24.
16. Mɛɛ shihilɛi wɔbaanyɛ wɔna mli ŋɔɔmɔ yɛ be mli ni wɔnyiɛ Gbɛ Krɔŋkrɔŋ lɛ nɔ lɛ?
16 Beni oyaa nɔ onyiɛɔ Gbɛ Krɔŋkrɔŋ nɛɛ nɔ lɛ, oyeɔ ohe kɛjɛɔ haomɔ ni ooohao ohe yɛ adesai ni tamɔ kooloi ahe lɛ he. Eji anɔkwale akɛ, kɛ oyɛ je lɛŋ lɛ, esa akɛ ohiɛ ahi ohe nɔ, koni gbɔmɛi hiɛjoolɔi loo hetsɛ̃lɔi ‘akami bo hiɛkalɔ,’ kɛ wɔɔwie yɛ mfoniri feemɔŋ. Gbɔmɛi babaoo etsɔmɔ tamɔ klaji fulɔi yɛ bɔ ni amɛkɛ mɛi krokomɛi yeɔ haa lɛ mli. Shi kwɛ bɔ ni esoro Nyɔŋmɔ webii kwraa ha! Oyɛ he ko ni abuɔ ohe. Eyɛ mli akɛ onanemɛi Kristofoi lɛ yeee emuu moŋ; amɛteŋ mɔ ko nyɛɔ etɔ̃ɔ loo efeɔ mɔ nidɔɔ nii. Shi ole akɛ onyɛmimɛi lɛ ejeee gbɛ amɛkaaa akɛ amɛaaye bo awui loo amɛaami bo. (Lala 57:5; Ezekiel 22:25; Luka 20:45-47; Bɔfoi lɛ Asaji 20:29; 2 Korintobii 11:19, 20; Galatabii 5:15) Shi moŋ, amɛnaa ohe miishɛɛ; amɛye amɛbua bo; amɛmiisumɔ ni amɛkɛ bo fɛɛ asɔmɔ.
17, 18. Paradeiso yɛ shihilɛ mli bianɛ yɛ mɛɛ shishinumɔ naa, ni te enɛ esa wɔhe eha tɛŋŋ?
17 No hewɔ lɛ, wɔbaanyɛ wɔkwɛ Yesaia 35, yɛ be mli ni kuku 1 kɛyashi 8 mlibaa amrɔ nɛɛ yɔɔ wɔjwɛŋmɔ mli lɛ. Ani ebɛ faŋŋ akɛ wɔna nɔ ni atsɛɔ lɛ mumɔŋ paradeiso lɛ yɛ gbɛ ni ja nɔ? Dabi, eyeko emuu—be lɛ shɛko. Shi eji paradeiso kɛ̃, ejaakɛ, taakɛ kuku 2 tsĩ tã lɛ, amrɔ nɛɛ ‘wɔnaa Yehowa anunyam lɛ kɛ wɔ-Nyɔŋmɔ lɛ wulamɔ lɛ’ yɛ mli. Ni mɛni ejɛ mli eba? Kuku 10 kɛɔ akɛ: “Mɛi ni Yehowa ekpɔ̃ amɛ lɛ aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala; naanɔ miishɛɛ aaahi amɛyiteaŋ, amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi.” Yɛ anɔkwale mli lɛ, apasa jamɔ ni wɔjo foi kɛjɛ mli lɛ kɛ anɔkwa jamɔ ni wɔdiɔ sɛɛ yɛ Nyɔŋmɔ duromɔ shishi lɛ haa wɔnaa miishɛɛ.
18 Miishɛɛ ni fata anɔkwa jamɔ he lɛ yaa nɔ efaa be fɛɛ be, aloo jeee nakai? Onaa ni mɛi heei lɛ miifee tsakemɔi ni amɛnane miimɔ shi jogbaŋŋ yɛ Biblia mli anɔkwale lɛ mli. Onaa obalahii kɛ obalayei bibii hu ni miidara, ni amɛmiiya amɛhiɛ yɛ mumɔŋ yɛ asafo lɛ mli. Abaptisiɔ mɛi, ni onaa bɔ ni abaptisiɔ mɛi ni ole amɛ lɛ. Ani enɛɛmɛi jeee yiŋtoi ni wɔɔdamɔ nɔ wɔna miishɛɛ, ni wɔna miishɛɛ babaoo ŋmɛnɛ? Hɛɛ, kwɛ miishɛɛ ni eji akɛ wɔɔná mɛi krokomɛi ni amɛbafata wɔhe yɛ wɔ mumɔŋ heyeli kɛ paradeiso shihilɛ lɛ mli!
Emlibaa ko ni Kã Wɔhiɛ ni Baaba!
19. Yesaia yitso 35 kɛ mɛɛ gbɛkpamɔ ni hiɛnɔkamɔ yɔɔ mli woɔ wɔmli obɔ?
19 Wɔsusu Yesaia yitso 35 klɛŋklɛŋ mlibaa yɛ Yudafoi lɛ asɛɛkuu kɛ emlibaa yɛ mumɔŋ ni yaa nɔ ŋmɛnɛ lɛ he. Shi jeee enaagbee nɛ. Babaoo yɛ lolo. Ekɔɔ Biblia mli nɔmimaa akɛ, akɛ shikpɔŋ nɔ paradeiso shihilɛi diɛŋtsɛ baaba ekoŋŋ lɛ he.—Lala 37:10, 11; Kpojiemɔ 21:4, 5.
20, 21. Mɛni hewɔ eja yɛ sane naatsɔɔmɔ kɛ Ŋmalɛ naa akɛ wɔɔhe wɔye akɛ Yesaia yitso 35 mlibaa kroko yɛ lolo ni baaba?
20 Efeŋ nii ni kɛ ehe kpaa gbee akɛ Yehowa kɛ paradeiso mlitsɔɔmɔ diɛŋtsɛ aaaha, ni kɛlɛ eha emlibaa akɔ mumɔŋ nibii pɛ he. Shi, enɛ etsɔɔɔ akɛ mumɔŋ mlibaai ahe ehiaaa tsɔ. Kɛji akɛ akɛ paradeiso diɛŋtsɛ eba po lɛ, wɔtsui enyɔŋ wɔmli kɛ yɛ shihilɛ fɛfɛo ni ebɔle wɔ kɛ kooloi ni he jɔ lɛ fɛɛ sɛɛ lɛ, gbɔmɛi ni ebɔle wɔ lɛ efite yɛ mumɔŋ, adesai ni feɔ amɛnii tamɔ kooloi awuiyelɔi. (Okɛto Tito 1:12 he.) Hɛɛ, esa akɛ mumɔŋ nɔ lɛ aba klɛŋklɛŋ, ejaakɛ ehe miihia waa diɛŋtsɛ.
21 Ni kɛlɛ, Paradeiso ni baa lɛ efeŋ nɔ ni kɔɔ mumɔŋ nibii ni wɔnaa mli ŋɔɔmɔ bianɛ, ni wɔbaana mli ŋɔɔmɔ babaoo yɛ wɔsɛɛ lɛ pɛ he. Wɔyɛ yiŋtoo kpakpa ni wɔɔdamɔ nɔ wɔkpa gbalɛi tamɔ nɔ ni yɔɔ Yesaia 35 lɛ mlibaa diɛŋtsɛ gbɛ. Mɛni hewɔ? Ejaakɛ Yesaia gba “ŋwɛi hee kɛ shikpɔŋ hee” efɔ shi yɛ yitso 65. Bɔfo Petro kɛ nakai ŋmalɛ lɛ tsu nii beni etsɔɔ nibii ni baanyiɛ Yehowa gbi lɛ sɛɛ aba lɛ. (Yesaia 65:17, 18; 2 Petro 3:10-13) Petro miitsɔɔ akɛ nibii ni Yesaia wie he lɛ baahi shihilɛ mli diɛŋtsɛ beni “shikpɔŋ hee” lɛ baa mli diɛŋtsɛ lɛ. Nibii ni fata he lɛ ekomɛi yɛ ni ole momo—tsũi ni aaamamɔ ni ahi mli; weintromii afeemɔ kɛ eyibii lɛ yeli; mɔ diɛŋtsɛ ninenaa nitsumɔ ni eeeye mli ŋɔɔmɔ be kakadaŋŋ; klaŋ kɛ too gwantɛŋ bi ni aaahi shi yɛ he kome; kɛ awui ni ayeŋ dɔŋŋ yɛ shikpɔŋ lɛ nɔ fɛɛ. Yɛ wiemɔ kroko mli lɛ, wala sɛɛtsɛlɛ, shiai ni yɔɔ shweshweeshwe, niyenii babaoo, nitsumɔ ni haa mɔ tsui nyɔɔ emli, kɛ toiŋjɔlɛ yɛ kooloi ateŋ, kɛ kooloi kɛ gbɔmɛi ateŋ.
22, 23. Mɛɛ nɔdaamɔ nɔ kɛha miishɛɛ baahi Yesaia yitso 35 mlibaa yɛ wɔsɛɛ be mli lɛ mli?
22 Ani nakai gbɛkpamɔ lɛ haaa ona miishɛɛ kɛteke nɔ? Hɛɛ, esa akɛ eha ona miishɛɛ, ejaakɛ nakai ji bɔ ni Nyɔŋmɔ bɔ wɔ ni wɔhi shi. (1 Mose 2:7-9) No hewɔ lɛ, gbalɛ ni yɔɔ Yesaia 35 ni wɔsusuɔ he lɛ tsɔɔ mɛni? Etsɔɔ akɛ wɔyɛ yiŋtoo babaoo ni wɔɔdamɔ nɔ wɔbolɔ kɛ miishɛɛ. Shia-ŋa kɛ shikpɔŋ gbiŋ diɛŋtsɛ nɛɛ baagba afofro, ni ebaaha wɔmli afili wɔ. Yɛ nakai be lɛ mli lɛ, gbɔmɛi ni hiŋmɛii amli bluu loo eyɛŋ, loo nɔ ni hiɛ su kroko ni yɔɔ fɛo, shi amrɔ nɛɛ amɛshwila lɛ, baanyɛ ana nii ekoŋŋ. Wɔnanemɛi Kristofoi ni emu toi, loo wɔteŋ mɛi ni wɔtoii nuuu nii jogbaŋŋ amrɔ nɛɛ po, baanu gbɛɛmɔi ni mli tse faŋŋ. Kwɛ miishɛɛ ni eeefee akɛ wɔkɛ nakai nyɛmɔ lɛ aaatsu nii ni wɔkɛnu Nyɔŋmɔ Wiemɔ lɛ kanemɔ kɛ emlitsɔɔmɔ, ni wɔkɛnu kɔɔyɔɔ gbɛɛmɔ yɛ tsei amli, abifao ŋmɔlɔ, kɛ loofɔlɔ lala hu!
23 Ebaatsɔɔ hu akɛ obubuafoi, kɛ mɛi ni kuumɔ helai haaa amɛnyɛ amɛnyiɛ bianɛ lɛ fɛɛ baaya amɛba ni amɛnuuu piŋmɔ ko he dɔŋŋ. Mɛɛ heyeli nɛ! No mli lɛ, nu diɛŋtsɛ baaho babaoo kɛtsɔ shia-ŋai anɔ. Wɔbaana nui ni hoɔ lɛ ni wɔnu amɛ gbɛɛmɔi. Wɔbaanyɛ wɔnyiɛ jɛmɛ ni wɔkɛ wɔ niji atara jwɛi fɔ kɛ gãlãi ni kwɛ̃ɔ lɛ ahe. Ebaafee Paradeiso ni asaa akɛba ekoŋŋ lɛlɛŋ. Ni miishɛɛ ni wɔɔna akɛ jata loo jwɛiaŋ kooloi krokomɛi ni tamɔ nakai aaahi wɔmasɛi ni wɔsheee gbeyei lɛ hu? Ehe ehiaaa ni wɔbɔi enɛ mlitsɔɔmɔ, ejaakɛ wɔteŋ mɔ fɛɛ mɔ efee he mfoniri ni ena he miishɛɛ momo.
24. Mɛni hewɔ obaanyɛ ni okɛ wiemɔ ni yɔɔ Yesaia 35:10 lɛ akpa gbee lɛ?
24 Yesaia maa nɔ mi kɛhaa wɔ akɛ: “Mɛi ni Yehowa ekpɔ̃ amɛ lɛ aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala; naanɔ miishɛɛ aaahi amɛyiteaŋ.” No hewɔ lɛ, wɔbaanyɛ wɔkpɛlɛ nɔ akɛ wɔyɛ yiŋtoo kpakpa ni wɔɔdamɔ nɔ wɔbolɔ kɛ miishɛɛ. Miishɛɛ yɛ nɔ ni Yehowa feɔ ehaa ewebii amrɔ nɛɛ yɛ wɔ mumɔŋ paradeiso lɛ mli, kɛ miishɛɛ hu yɛ nɔ ni wɔbaanyɛ wɔkpa gbɛ yɛ Paradeiso diɛŋtsɛ ni ebɛŋkɛ kpaakpa lɛ mli. Yesaia ŋma yɛ mɛi ni yɔɔ miishɛɛ lɛ ahe—yɛ wɔhe—akɛ: “Amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi.”—Yesaia 35:10.
Ani Okadi?
◻ Mɛɛ emlibaa ni ji enyɔ Yesaia yitso 35 ena?
◻ Mɛni kɛ naakpɛɛ tsakemɔi ni Yesaia gba fɔ shi lɛ yeɔ egbɔ yɛ mumɔŋ?
◻ Mɛɛ gbɛ nɔ ona gbalɛ nɛɛ mlibaa mli gbɛfaŋnɔ yɛ?
◻ Mɛni hewɔ wɔbaanyɛ wɔkɛɛ akɛ Yesaia yitso 35 haa wɔnaa wɔsɛɛ be he hiɛnɔkamɔ babaoo?
[Mfoniri ni yɔɔ baafa 15]
Raymond Street gbokɛlɛfoi atsu ni yɔɔ Brooklyn, New York, he ni atsi nyɛmimɛi onukpai kpawo ni ale amɛ waa lɛ anaa yɛ, yɛ June 1918 lɛ
[Mfoniri ni yɔɔ baafa 16]
Eyɛ mli akɛ Nyɛminuu Franz eshwila kwraa yɛ enaagbee afii lɛ amli moŋ, shi emumɔŋ ninaa hi shi akɛ nɔ ni mli tse keŋkeŋ
[Mfonirii ni yɔɔ baafa 17]
Mumɔŋ dalɛ kɛ nɔyaa ji nibii ni adamɔɔ nɔ anaa miishɛɛ