Wɔyɛ Nɔ ni Wɔɔdamɔ nɔ Wɔbolɔ kɛ Miishɛɛ
“Amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi.”—YESAIA 35:10.
1. Namɛi titri yɔɔ nɔ ni amɛaadamɔ nɔ amɛna miishɛɛ ŋmɛnɛ?
EKA shi faŋŋ akɛ, ekolɛ oyoo akɛ gbɔmɛi fioo ko pɛ yɔɔ miishɛɛ diɛŋtsɛ ŋmɛnɛ. Kɛlɛ, akɛ anɔkwa Kristofoi lɛ, Yehowa Odasefoi yɛ miishɛɛ. Ni hegbɛ ni akɛaana nakai miishɛɛ lɛ nɔŋŋ eko ka akpekpei abɔ krokomɛi ni abaptisiko amɛ, gbekɛbii kɛ onukpai fɛɛ, ni kɛ amɛhe bɔɔ Odasefoi lɛ ahe lɛ ahiɛ. Anɔkwale ni eji akɛ ookane nɛkɛ wiemɔi nɛɛ bianɛ yɛ wolo tɛtrɛɛ nɛɛ mli lɛ tsɔɔ akɛ miishɛɛ nɛɛ etsɔ onɔ̃ momo loo onine baanyɛ ashɛ nɔ.
2. Kɛ akɛ Kristofonyo miishɛɛ to mɛi krokomɛi anɔ he lɛ mɛni anaa?
2 Mɛi pii nuɔ he akɛ nɔ ko elaaje yɛ amɛshihilɛ mli. Shi bo hu? Eji anɔkwale akɛ, ekolɛ jeee heloonaa nibii ni otaoɔ lɛ fɛɛ eko oyɔɔ, eka shi faŋŋ akɛ jeee nibii fɛɛ ni mɛi ni yɔɔ nii ni amɛyɔɔ hewalɛ lɛ yɔɔ lɛ eko. Shi ekolɛ obaasumɔ ni ona gbɔmɔtsoŋ hewalɛ kpakpa. Shi kɛlɛ, abaanyɛ awie kɛ nɔmimaa diɛŋtsɛ akɛ, kɛ eba yɛ miishɛɛ gbɛfaŋ lɛ, oyɛ nii kɛ gbɔmɔtsoŋ hewalɛ babaoo fe shikpɔŋ nɔ gbɔmɛi akpekpei toi akpei abɔ lɛ ateŋ mɛi pii. Yɛ mɛɛ gbɛ nɔ?
3. Mɛɛ wiemɔi ni shishinumɔ yɔɔ mli esa akɛ wɔgbala wɔjwɛŋmɔ kɛya nɔ, ni mɛni hewɔ?
3 Kaimɔ Yesu wiemɔi lɛ: “Mikɛ nyɛ wie enɛɛmɛi, koni mimiishɛɛ lɛ ahi nyɛmli, ni nyɛ miishɛɛ lɛ ayi.” (Yohane 15:11) “Nyɛ miishɛɛ lɛ ayi.” Mɛɛ sane mlitsɔɔmɔ nɛ! Kristofonyo shihilɛ gbɛ lɛ kasemɔ jogbaŋŋ baajie yiŋtoi pii ni haa wɔ miishɛɛ lɛ yiɔ obɔ lɛ kpo. Shi amrɔ nɛɛ, kadimɔ wiemɔi komɛi ni he hiaa waa ni yɔɔ Yesaia 35:10 (NW) lɛ. Wɔkɛɛ amɛhe hiaa waa ejaakɛ amɛhiɛ shishinumɔ diɛŋtsɛ ko kɛha wɔ ŋmɛnɛ. Wɔkaneɔ akɛ: “Mɛi ni Yehowa ekpɔ̃ amɛ lɛ aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala; ni miishɛɛ kɛmiiya be ni aleee aaahi amɛyiteaŋ. Amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi.”
4. Mɛɛ miishɛɛ nɛkɛ atsi ta yɛ Yesaia 35:10 lɛ, ni mɛni hewɔ esa akɛ wɔsusu enɛ he?
4 “Miishɛɛ kɛmiiya be ni aleee.” Wiemɔ kuku, “be ni aleee” lɛ ji nɔ ni Yesaia ŋma yɛ Hebri mli lɛ shishitsɔɔmɔ ni ja. Shi, taakɛ ŋmalɛi krokomɛi kɛbaa lɛ, nɔ ni kuku nɛɛ tsɔɔ ji “kɛmiiya naanɔ.” (Lala 45:7; 90:2; Yesaia 40:28) No hewɔ lɛ miishɛɛ lɛ baafee nɔ ni bɛ naagbee, yɛ shihilɛi ni baaŋmɛ gbɛ—hɛɛ, baasa—naanɔ miishɛɛ. Ani jeee wiemɔi ni haa mɔ mli filiɔ lɛ nɛ? Shi, ekolɛ onuɔ ŋmalɛ kuku nɛɛ shishi akɛ wiemɔ ko ni aawie kɛmiikɔ mfoniri feemɔŋ shihilɛ ko he, ni ehaa onuɔ he akɛ: ‘Ekɔɔɔ mihe yɛ gbɛ ko nɔ tamɔ bɔ ni mi daa gbi haomɔi kɛ nibii ni misusuɔ he feɔ lɛ.’ Shi ekɔɔ wɔhe. Gbalɛ shiwoo ni yɔɔ Yesaia 35:10 lɛ hiɛ shishinumɔ ko kɛha bo ŋmɛnɛ. Bɔni afee ni wɔle bɔ ni nakai eji lɛ, nyɛhaa wɔsusua yitso fɛfɛo, ni ji Yesaia 35 lɛ he, ni wɔkadi efa fɛɛ fa ni yɔɔ sane lɛ mli lɛ. Na nɔmimaa akɛ obaana nɔ ni wɔbaana lɛ he miishɛɛ.
Gbɔmɛi ni Esa akɛ Amɛna Miishɛɛ
5. Mɛɛ gbalɛ shihilɛ mli anaa gbalɛ ni yɔɔ Yesaia 35 lɛ yɛ?
5 Akɛ nɔ ni baaye abua wɔ ni wɔnu shishi lɛ, nyɛhaa wɔsusua gbalɛ ni yɔɔ miishɛɛ nɛɛ yinɔsane he fioo wɔkwɛa. Hebri gbalɔ Yesaia ŋma enɛ aaafee afi 732 D.Ŋ.B. Afii nyɔŋmai abɔ dani Babilon asraafoi bakpata Yerusalem hiɛ. Taakɛ Yesaia 34:1, 2 tsɔɔ lɛ, Nyɔŋmɔ egba akɛ ebaatɔ owele yɛ jeŋmaji lɛ anɔ, tamɔ Edom ni atsĩ etã yɛ Yesaia 34:6 lɛ. Eyɛ faŋŋ akɛ, ekɛ blema Babilonbii tsu nii kɛfee enɛ. Nakai nɔŋŋ hu Nyɔŋmɔ ha Babilonbii lɛ fee Yuda amaŋfɔ ejaakɛ Yudafoi lɛ yeee lɛ anɔkwa. Ni mɛni jɛ mli ba? Aŋɔ Nyɔŋmɔ webii nom kɛtee, ni amɛ shikpɔŋ lɛ kã shi amaŋfɔ afii 70 sɔŋŋ.—2 Kronika 36:15-21.
6. Mɛɛ sɔrɔtofeemɔ yɔɔ nɔ ni agba afɔ shi aha Edombii lɛ kɛ nɔ ni agba afɔ shi aha Yudafoi lɛ teŋ?
6 Shi, sɔrɔtofeemɔ agbo ko ka Edombii lɛ kɛ Yudafoi lɛ ateŋ. Ŋwɛi toigbalamɔ ni akɛba Edombii lɛ anɔ lɛ baahi shi nakai daa; yɛ be ko sɛɛ lɛ, amɛlaaje kwraa akɛ gbɔmɛi. Hɛɛ, obaanyɛ oya ni oyasara amaŋfɔi ni tsɔɔ he ni Edombii lɛ hi tsutsu lɛ, tamɔ Petra ni ehe gbɛi yɛ jeŋ fɛɛ lɛ. Shi ŋmɛnɛ, maŋ ko bɛ ni abaanyɛ ayoo amɛ akɛ ‘Edombii.’ Shi yɛ gbɛ kroko nɔ lɛ, ani amaŋfɔ ni Babilonbii lɛ fee Yuda lɛ baahi shi kɛya naanɔ, ni eshi shikpɔŋ lɛ ni miishɛɛ bɛ nɔ kɛmiiya naanɔ?
7. Te Yudafoi nomii ni yɔɔ Babilon lɛ baanyɛ ahere Yesaia yitso 35 lɛ nɔ amɛha tɛŋŋ?
7 Biɛ ji he ni gbalɛ ni yɔɔ nyam, ni yɔɔ Yesaia yitso 35 lɛ hiɛ shishinumɔ ni yɔɔ miishɛɛ kɛha wɔ yɛ. Abaanyɛ atsɛ lɛ akɛ gbalɛ ni tsɔɔ sɛɛkuu kɛmiiya tsutsu shihilɛ mli ekoŋŋ, ejaakɛ ena eklɛŋklɛŋ mlibaa lɛ yɛ be mli ni Yudafoi lɛ ku amɛsɛɛ kɛba amɛshikpɔŋ nɔ yɛ afi 537 D.Ŋ.B. lɛ. Aha Israelbii ni amɛtsɔmɔ nomii yɛ Babilon lɛ ye amɛhe koni amɛku amɛsɛɛ amɛya amɛ shikpɔŋ nɔ ekoŋŋ. (Ezra 1:1-11) Shi, dani enɛ aaaba lɛ, Yudafoi nomii ni yɔɔ Babilon ni susu nɛkɛ ŋwɛi gbalɛ nɛɛ he lɛ baanyɛ asusu nɔ̃ shihilɛi ni amɛbaana yɛ amɛmaŋ ni ji Yuda shikpɔŋ nɔ lɛ he. Ni mɛɛ shihilɛ diɛŋtsɛ amɛbaana amɛhe yɛ mli? Hetooi lɛ kɔɔ nɔ hewɔ ni wɔyɔɔ nɔ ni wɔɔdamɔ nɔ wɔbolɔ kɛ miishɛɛ diɛŋtsɛ lɛ he. Nyɛhaa wɔkwɛa.
8. Mɛɛ shihilɛi Yudafoi lɛ baana kɛ amɛku amɛsɛɛ kɛjɛ Babilon amɛba lɛ? (Okɛto Ezekiel 19:3-6; Hoshea 13:8 he.)
8 Eka shi faŋŋ akɛ shihilɛ lɛ efeŋ shihilɛ kpakpa kɛhaŋ Yudafoi lɛ beni amɛnu akɛ amɛbaanyɛ amɛku amɛsɛɛ kɛya amɛmaŋ ekoŋŋ lɛ. Amɛ shikpɔŋ lɛ ekã shi amaŋfɔ afii nyɔŋmai kpawo sɔŋŋ, ni ji wala be muu. Mɛni eba shikpɔŋ lɛ nɔ? Yɛ be nɛɛ mli lɛ ŋmɔji ni ahuɔ, weintromi, loo abɔɔi etsɔmɔ ŋa kplanaa. Tromii ni agbala nu jɔɔi loo nu niji awo mli lɛ fɛɛ efite ni amɛtsɔmɔ shikpɔŋ gbiŋ loo shia-ŋa. (Yesaia 24:1, 4; 33:9; Ezekiel 6:14) Agbɛnɛ hu susumɔ jwɛiaŋ kooloi ni baafa babaoo yɛ mli lɛ ahe okwɛ. Nɔ ni baafata he ji kooloi ni yeɔ milɛloo, tamɔ jatai kɛ kootsɛi. (1 Maŋtsɛmɛi 13:24-28; 2 Maŋtsɛmɛi 17:25, 26; Lalai Amli Lala 4:8) Asaŋ amɛnyɛŋ amɛku amɛhiɛ amɛshwie oshishibrishii ni baanyɛ atswa nuu, yoo, loo gbekɛ nɔ̃ lɛ anɔ. (1 Samuel 17:34-37; 2 Maŋtsɛmɛi 2:24; Abɛi 17:12) Ni ehe ehiaŋ po ni wɔtsi onufui kɛ shikpãai krokomɛi ni ebɔɔ yɔɔ amɛnaa, loo nyɔŋmɔŋkrakroi lɛ ata. (1 Mose 49:17; 5 Mose 32:33; Hiob 20:16; Lala 58:5; 140:3; Luka 10:19) Eji ofata Yudafoi ni kuɔ amɛsɛɛ kɛjɛɔ Babilon yɛ 537 D.Ŋ.B. lɛ ahe kulɛ, ekolɛ obaashashao shi akɛ oookpa shi yɛ hei ni tamɔ nɛkɛ. Eka shi faŋŋ akɛ beni amɛshɛ jɛmɛ lɛ, ejeee paradeiso kwraa.
9. Mɛɛ yiŋtoo hewɔ mɛi ni kuɔ amɛsɛɛ lɛ yɔɔ nɔ ni amɛaadamɔ nɔ amɛna hiɛnɔkamɔ kɛ hekɛnɔfɔɔ lɛ?
9 Shi kɛlɛ, Yehowa ji mɔ ni nyiɛ ejálɔi lɛ ahiɛ kɛba shia, ni eyɛ hewalɛ kɛ nyɛmɔ ni ekɛaatsake amaŋfɔ shihilɛ lɛ. Ani oheee enɛ oyeee yɛ Bɔlɔ lɛ he? (Hiob 42:2; Yeremia 32:17, 21, 27, 37, 41) No hewɔ lɛ, mɛni ebaafee—ni mɛni efee—eha Yudafoi ni kuɔ amɛsɛɛ lɛ kɛ amɛ shikpɔŋ lɛ? Te enɛ kɔɔ Nyɔŋmɔ webii ni yɔɔ ŋmɛnɛŋmɛnɛ bei nɛɛ amli lɛ kɛ oshihilɛ—ŋmɛnɛ kɛ wɔsɛɛ be he ehaa tɛŋŋ? Klɛŋklɛŋ lɛ nyɛhaa wɔkwɛa nɔ ni ba yɛ no be lɛŋ.
Miishɛɛ yɛ Shihilɛ ni Etsake He
10. Mɛɛ tsakemɔ Yesaia 35:1, 2 gba fɔ shi?
10 Mɛni baaba, yɛ be mli ni Koresh ŋmɛ Yudafoi lɛ agbɛ, ni amɛku amɛsɛɛ kɛtee nakai shikpɔŋ ni nɔ yɔɔ gbeyei lɛ nɔ lɛ? Kanemɔ gbalɛ ni yɔɔ miishɛɛ nɛɛ yɛ Yesaia 35:1, 2: “Ŋa kpataa kɛ shikpɔŋ gbiŋ lɛ aaanyã, ŋa kplanaa lɛ hu mli aaafili lɛ, ni eeegba afofro tamɔ fɔfɔi! Eeegba afofro babaoo ni emli aaafili lɛ, ni emli aaafili lɛ kɛ miishɛɛ kɛ nyamɔ sɔŋŋ; aaaŋɔ Lebanon anunyam lɛ aha lɛ, kɛ Karmel kɛ Sharon wulamɔ lɛ hu. Amɛaana Yehowa anunyam lɛ, kɛ wɔ-Nyɔŋmɔ lɛ wulamɔ lɛ hu.”
11. Mɛɛ shikpɔŋ lɛ he nilee ni Yesaia yɔɔ ekɛtsu nii?
11 Yɛ Biblia bei amli lɛ, ale Lebanon, Karmel, kɛ Sharon jogbaŋŋ kɛ bɔ ni tsei haa jɛmɛ feɔ fɛo lɛ. (1 Kronika 5:16; 27:29; 2 Kronika 26:10; Lalai Amli Lala 2:1; 4:15; Hoshea 14:5-7) Yesaia kɛ nakai nɔkwɛmɔ nii lɛ tsu nii ni ekɛtsɔɔ bɔ ni shikpɔŋ ni atsake lɛ kwraa lɛ baatamɔ, kɛtsɔ Nyɔŋmɔ yelikɛbuamɔ nɔ. Shi ani enɛ baafee nɔ ni kɔɔ shikpɔŋ sũ lɛ pɛ he? Dabida!
12. Mɛni hewɔ wɔbaanyɛ wɔkɛɛ akɛ gbalɛ ni yɔɔ Yesaia yitso 35 lɛ kɔɔ gbɔmɛi ahe lɛ?
12 Yesaia 35:2 lɛ wieɔ bɔ ni shikpɔŋ lɛ “mli aaafili lɛ, emli aaafili lɛ kɛ miishɛɛ kɛ nyamɔ sɔŋŋ” he. Wɔle jogbaŋŋ akɛ shikpɔŋ sũ kɛ tsei diɛŋtsɛ ‘amli efiliii amɛ kɛ miishɛɛ.’ Shi kɛlɛ, bɔ ni atsake amɛ koni amɛtsɔ sũ kpakpa ni baa nii babaoo lɛ baanyɛ aha gbɔmɛi anu he nakai. (3 Mose 23:37-40; 5 Mose 16:15; Lala 126:5, 6; Yesaia 16:10; Yeremia 25:30; 48:33) Tsakemɔi ni ba shikpɔŋ lɛ diɛŋtsɛ nɔ lɛ kɛ nɔ ni ba gbɔmɛi ateŋ lɛ baakpã gbee, ejaakɛ gbalɛ nɛɛ kɔɔ gbɔmɛi ahe. No hewɔ lɛ, wɔyɛ nɔ ni wɔɔdamɔ nɔ wɔnu Yesaia wiemɔi lɛ ashishi akɛ ekɔɔ tsakemɔi ni ba mli yɛ Yudafoi ni ku amɛsɛɛ lɛ ashihilɛ mli lɛ ahe klɛŋklɛŋ, titri lɛ amɛ miishɛɛ.
13, 14. Mɛɛ tsakemɔ yɛ gbɔmɛi ashihilɛ mli Yesaia 35:3, 4 gba fɔ shi?
13 Enɛ hewɔ lɛ, nyɛhaa wɔsusua gbalɛ ni kanyaa mɔ nɛɛ he babaoo ni wɔkwɛ bɔ ni ena emlibaa yɛ Yudafoi lɛ akpɔmɔ kɛ amɛ sɛɛkuu kɛmiijɛ Babilon lɛ anɔ. Yesaia wieɔ tsakemɔi krokomɛi ni ba yɛ gbɔmɛi ni ku amɛsɛɛ lɛ ahe yɛ kukuji 3 kɛ 4, akɛ: “Nyɛwajea niji ni mli eje wui lɛ, nyɛwoa nakutsei ni egbɔjɔ lɛ hewalɛ! Mɛi ni tsui fãa lɛ, nyɛkɛa amɛ akɛ: ‘Nyɛwajea nyɛhe, nyɛkashea gbeyei! Naa, nyɛ-Nyɔŋmɔ lɛ miiba kɛ oweletɔɔ kɛ Nyɔŋmɔ najiaŋtoo, ni eeehere nyɛ yiwala hu.’ ”
14 Ani ewooo wɔ hewalɛ akɛ wɔɔsusu akɛ wɔ-Nyɔŋmɔ, ni baanyɛ atsake shikpɔŋ lɛ amaŋfɔ shihilɛ lɛ, yɛ ejálɔi ahe miishɛɛ babaoo? Esumɔɔɔ ni Yudafoi ni aŋɔ amɛ nom lɛ anu gbɔjɔmɔ kɛ nijiaŋwujee he, loo ni amɛhao yɛ wɔsɛɛ be he. (Hebribii 12:12) Susumɔ shihilɛ mli ni nakai Yudafoi nomii lɛ yɔɔ mli lɛ he. Yɛ hiɛnɔkamɔ ni amɛsusuɔ akɛ amɛbaanyɛ amɛna kɛjɛ Nyɔŋmɔ gbalɛi ni kɔɔ amɛ wɔsɛɛ be he lɛ mli lɛ sɛɛ lɛ, ebaawa kɛha amɛ akɛ amɛaaná jwɛŋmɔ kpakpa. Ebafee tamɔ nɔ ni amɛyɛ tsuŋwoo he ko ni mli ewo duŋ kpii, ni amɛnyɛɛɛ amɛya he ko ni amɛna ekãa yɛ Yehowa sɔɔmɔ mli. Efee tamɔ nɔ ni la ko kwraa kpɛɛɛ yɛ amɛhiɛ.—Okɛto 5 Mose 28:29; Yesaia 59:10 he.
15, 16. (a) Mɛni wɔbaanyɛ wɔkɛɛ akɛ Yehowa fee kɛha mɛi ni ku amɛsɛɛ lɛ? (b) Mɛni hewɔ mɛi ni ku amɛsɛɛ lɛ nyɛŋ amɛkpa naakpɛɛ helatsamɔi agbɛ lɛ, shi mɛni Nyɔŋmɔ fee ni kɛ Yesaia 35:5, 6 kpaa gbee?
15 Shi, kwɛ bɔ ni enɛ tsake kwraa, beni Yehowa ha Koresh ŋmɛɛ amɛhe koni amɛku amɛsɛɛ kɛya shia lɛ! Odaseyeli ko bɛ Biblia lɛ mli ni tsɔɔ akɛ Nyɔŋmɔ tsɔ naakpɛɛ gbɛ nɔ etsa Yudafoi ni eshwila lɛ, ni egbele mɛi ni nuuu nii lɛ atoii diɛŋtsɛ, aloo etsa obubuafoi. Shi efee nɔ ko diɛŋtsɛ ni nɔ kwɔ kwraa fe enɛ. Esaa ekɛ amɛ ba la-kpɛmɔ kɛ heyeli ni yɔɔ amɛ shikpɔŋ ni amɛsumɔɔ lɛ nɔ lɛ mli ekoŋŋ.
16 Nɔ ko bɛ ni tsɔɔ akɛ mɛi ni ku amɛsɛɛ lɛ kpa gbɛ akɛ Yehowa baafee nɛkɛ naakpɛɛ gbɔmɔtsoŋ helatsamɔi nɛɛ. Amɛyoo akɛ Nyɔŋmɔ efeee nakai yɛ Isak, Samson, loo Eli gbɛfaŋ. (1 Mose 27:1; Kojolɔi 16:21, 26-30; 1 Samuel 3:2-8; 4:15) Shi kɛji akɛ amɛkpa ŋwɛi tsakemɔ gbɛ yɛ okadi gbɛ nɔ yɛ amɛshihilɛ lɛ he lɛ, kɛlɛ, amɛnine enyɛɛɛ shi. Yɛ anɔkwale mli lɛ, kukuji 5 kɛ 6 na amɛmlibaa diɛŋtsɛ yɛ okadi gbɛ nɔ. Yesaia gba fɔ shi pɛpɛɛpɛ akɛ: “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaala kɛ nyamɔ.”
Shikpɔŋ lɛ ni Afeɔ lɛ Tamɔ Paradeiso
17. Mɛɛ tsakemɔi ni anaa faŋŋ Yehowa kɛba?
17 Eyɛ faŋŋ akɛ mɛi ni ku amɛsɛɛ lɛ ná nɔ ni amɛbaadamɔ nɔ amɛbolɔ kɛ miishɛɛ yɛ shihilɛi ni tamɔ nɔ ni Yesaia tee nɔ etsɔɔ mli lɛ hewɔ: “Faai aaatue yɛ ŋa kpataa nɔ, ni faai aaaho yɛ ŋa olɛŋlɛ nɔ. Shia-ŋa ni nɔ edɔ aaatsɔ kpaakpo, ni shikpɔŋ ni nu bɛ nɔ aaatsɔ nui ni baa sɔŋŋ; ni ŋaŋ-gbeei ashihilɛ hé, he ni amɛbumɔɔ lɛ, jwɛi kɛ gãlai kɛ ŋtoo aaakwɛ̃ yɛ jɛi.” (Yesaia 35:6b, 7) Eyɛ mli akɛ wɔnaŋ enɛ yɛ nakai kpokpaa lɛ fɛɛ nɔ ŋmɛnɛ moŋ, shi odaseyeli lɛ tsɔɔ akɛ he ni ji Yudea lɛ ji “tookwɛlɔi aparadeiso”a yɛ be ko mli.
18. Te Yudafoi ni ku amɛsɛɛ lɛ baanyɛ ahere Nyɔŋmɔ jɔɔmɔi lɛ anɔ amɛha tɛŋŋ?
18 Yɛ nɔ ni kɛ miishɛɛ baa lɛ gbɛfaŋ lɛ, susumɔ bɔ ni Yudafoi shwɛɛnii lɛ baanu he aha beni ajie amɛ kɛba Shiwoo Shikpɔŋ lɛ nɔ lɛ he okwɛ! Amɛna hegbɛ ni amɛkɛaaŋɔ amɛ shikpɔŋ ni eka shi amaŋfɔ, ni ŋaŋ-gbeei kɛ jwɛiaŋ kooloi krokomɛi yɔɔ nɔ lɛ, ni amɛtsake lɛ agbɛnɛ. Ani onáŋ nitsumɔ ni akɛsaa nii ekoŋŋ nɛɛ he miishɛɛ, titri lɛ kɛ ole akɛ Nyɔŋmɔ miijɔɔ omɔdɛŋbɔi anɔ?
19. Sɛɛkuu kɛmiijɛ Babilon nomŋɔɔ mli lɛ damɔ nɔ ko nɔ, yɛ mɛɛ shishinumɔ naa?
19 Shi kɛlɛ, ejeee nɔ ni Yudafoi nomii ni yɔɔ Babilon lɛ ateŋ mɔ fɛɛ mɔ kɛkɛ baanyɛ aya, loo aku esɛɛ ni eya ni eyaná nakai tsakemɔi ni yɔɔ miishɛɛ lɛ amli gbɛfaŋnɔ. Nyɔŋmɔ diɛŋtsɛ tsɔɔ taomɔ nii ni akɛyaa. Mɛi ni kɛ Babilonbii awɔŋjamɔ nifeemɔi ewo amɛhe muji lɛ ateŋ mɔ ko kwraa bɛ hegbɛ akɛ ekuɔ esɛɛ kɛyaa. (Daniel 5:1, 4, 22, 23; Yesaia 52:11) Ni nakai nɔŋŋ hu eji yɛ mɔ fɛɛ mɔ ni kɛ buulu-feemɔ ekɔ gbɛ ni nilee bɛ mli lɛ gbɛfaŋ. Mɛi fɛɛ ni tamɔ nɛkɛ lɛ ateŋ mɔ ko kwraa esaaa. Yɛ gbɛ kroko nɔ lɛ, mɛi ni shɛɔ Nyɔŋmɔ taomɔ nii ahe, ni kɛ akɛto he lɛ, ebuɔ amɛ krɔŋkrɔŋ yɛ gbɛ ko nɔ lɛ, baanyɛ aku amɛsɛɛ kɛya Yuda. Amɛbaanyɛ amɛfa gbɛ lɛ tamɔ mɛi ni nyiɛ Gbɛ Krɔŋkrɔŋ nɔ kɛmiiya. Yesaia fee enɛ faŋŋ yɛ kuku 8: ‘Ni aaaje gbɛjegbɛ yɛ jɛi kɛ gbɛ ko ni aaatsɛ lɛ Gbɛ Krɔŋkrɔŋ lɛ; mɔ ko ni he tseee enyiɛŋ nɔ; ejaakɛ amɛ aje aha, ni mɛi ni nyiɛɔ nɔ lɛ, kɛ́ kwashiai tete ni lɛ, amɛduŋ gbɛ.’
20. Ehe ehiaaa ni Yudafoi lɛ ashe mɛni gbeyei beni amɛkuɔ amɛsɛɛ lɛ, ni mɛni jɛ mli ba?
20 Ehe ehiaaa ni Yudafoi ni kuɔ amɛsɛɛ lɛ ashe gbɔmɛi ni tamɔ kooloi awuiyelɔi loo ojotswalɔi akui gbeyei. Mɛni hewɔ? Ejaakɛ Yehowa eŋmɛŋ gbɛ ni enɛ afata ewebii ni ekpɔ amɛ lɛ ahe yɛ Gbɛ lɛ nɔ. No hewɔ lɛ amɛbaanyɛ amɛfa gbɛ kɛ mlifilimɔ kɛ jwɛŋmɔ kpakpa, kɛ gbɛkpamɔi kpakpai. Kwɛmɔ bɔ ni Yesaia tsɔɔ enɛ mli eha, beni egbeɔ gbalɛ nɛɛ naa lɛ: “Jata ko jata ko ehiŋ jɛi, ni kooloo awuiyelɔ ko enyiɛŋ nɔ, anaŋ amɛ yɛ jɛi kwraa; mɛi ni ajie amɛ lɛ aaanyiɛ nɔ. Mɛi ni Yehowa ekpɔ̃ amɛ lɛ aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala; naanɔ miishɛɛ aaahi amɛyiteaŋ, amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi.”—Yesaia 35:9, 10.
21. Te esa akɛ ŋmɛnɛ, wɔkwɛ Yesaia yitso 35 ni eba mli momo lɛ wɔha tɛŋŋ?
21 Kwɛ gbalɛ mli mfoniri ni afee aha wɔ yɛ biɛ! Shi, esaaa akɛ wɔsusuɔ enɛ he akɛ ekɔɔ yinɔsane be ni eho lɛ pɛ he, tamɔ nɔ ni eji sane ko ni aje gbɛ aŋma lɛ jogbaŋŋ, shi ekɔɔɔ wɔ shihilɛ loo wɔ wɔsɛɛ be he yɛ gbɛ ko kwraa nɔ. Anɔkwale lɛ ji akɛ, gbalɛ nɛɛ naa emlibaa ni yɔɔ naakpɛɛ ŋmɛnɛ yɛ Nyɔŋmɔ webii ateŋ, no hewɔ lɛ ekɔɔ wɔteŋ mɔ fɛɛ mɔ he diɛŋtsɛ. Ekɛ nɔ kpakpa ni wɔɔdamɔ nɔ wɔbolɔ kɛ miishɛɛ haa wɔ. Asusu efa ni kɔɔ oshihilɛ he bianɛ kɛ agbɛnɛ yɛ wɔsɛɛ be mli lɛ he yɛ nikasemɔ ni nyiɛ enɛ sɛɛ lɛ mli.
[Shishigbɛ niŋmaa]
a Nɔ ni okwaayeli nitsumɔi ahe nilelɔ, Walter C. Lowdermilk, (ni damɔ Jeŋmaji Ekomefeemɔ lɛ Niyenii kɛ Okwaayeli Gbɛjianɔtoo lɛ najiaŋ lɛ) mu naa yɛ enikasemɔi amli ji akɛ: “Be ko lɛ shikpɔŋ nɛɛ ji tookwɛlɔi aparadeiso.” Etsɔɔ hu akɛ, kɔɔyɔŋ tsakemɔ ni yɔɔ jɛmɛ lɛ tsakeko babaoo tsɔ “kɛjɛ Romabii abei lɛ amli,” ni “ ‘shia ŋa’ ni baye be ko shikpɔŋ ni yɔɔ frɔfrɔ nɛɛ najiaŋ lɛ jɛ gbɔmɔ nifeemɔ, shi jeee adebɔɔ.”
Ani Okaiɔ?
◻ Mɛɛ be Yesaia yitso 35 na eklɛŋklɛŋ mlibaa?
◻ Mɛni baajɛ gbalɛ lɛ klɛŋklɛŋ mlibaa lɛ mli aba?
◻ Yehowa ha Yesaia 35:5, 6 ba mli yɛ mɛɛ gbɛ nɔ?
◻ Mɛɛ tsakemɔi ni ba shikpɔŋ lɛ nɔ kɛ amɛ shihilɛi amli Yudafoi ni kuɔ amɛsɛɛ lɛ yoo?
[Mfoniri ni yɔɔ baafa 9]
Petra amaŋfɔ yɛ he ni Edombii lɛ hi be ko lɛ
[He ni Sane lɛ Jɛ]
Garo Nalbandian
[Mfonirii ni yɔɔ baafa 10]
Beni Yudafoi lɛ yɔɔ nomŋɔɔ mli lɛ, Yudea shikpɔŋ lɛ fa titri batsɔ tamɔ ŋa, ni kooloi awuiyelɔi tamɔ oshishibrishii kɛ jatai bafa yɛ nɔ
[He ni Sane lɛ Jɛ]
Garo Nalbandian
Oshishibrishii kɛ Jata: Safari-Zoo ni yɔɔ Ramat-Gan, Tel Aviv