Yitso 42

Ŋwɛi Hee kɛ Shikpɔŋ Hee

 1. Mɛni Yohane tsɔɔ akɛ ena beni bɔfo lɛ ku sɛɛ ekɛ lɛ tee Afii Akpe Nɔyeli lɛ shishijee lɛ?

AYAA nɔ agbeleɔ nɛkɛ anunyam ninaa nɛɛ mli beni bɔfo lɛ kɛ Yohane ku esɛɛ kɛtee Afii Akpe Nɔyeli lɛ shishijee mli lɛ. Mɛni etsɔɔ mli? “Ni mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee, ni ŋshɔ bɛ dɔŋŋ.” (Kpojiemɔ 21:1) Ninaa ko ni kanyaa mɔ je kpo!

 2. (a) Yesaia gbalɛ ni kɔɔ ŋwɛi hee kɛ shikpɔŋ hee lɛ he lɛ ba mli yɛ Yudafoi ni aku sɛɛ akɛ amɛ eba amɛ shikpɔŋ nɔ yɛ 537 D.Ŋ.B. lɛ anɔ yɛ mɛɛ gbɛ nɔ? (b) Te wɔfeɔ tɛŋŋ wɔleɔ akɛ Yesaia gbalɛ lɛ mlibaa krokomɛi yɛ lolo lɛ, ni shiwoo nɛɛ baa mli yɛ mɛɛ gbɛ nɔ?

² Afii ohai abɔ dani Yohane gbi lɛ aaashɛ lɛ, no mli lɛ Yehowa ekɛɛ Yesaia akɛ: “Ejaakɛ naa, miibɔ ŋwɛi hee kɛ shikpɔŋ hee, ni akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ.” (Yesaia 65:17; 66:22) Gbalɛ nɛɛ ba mli klɛŋklɛŋ beni Yudafoi anɔkwafoi lɛ ku amɛsɛɛ amɛba Yerusalem yɛ afi 537 D.Ŋ.B., beni amɛtee nomŋɔɔ mli yɛ Babilon afii 70 lɛ. Amɛbatsɔ gbɔmɛi asafo ko ni atsuu amɛhe, “shikpɔŋ hee,” ni yɔɔ nɔyeli gbɛjianɔtoo hee, “ŋwɛi hee” shishi yɛ nɛkɛ saamɔ nɛɛ mli. Shi bɔfo Petro tsɔɔ gbalɛ nɛɛ mlibaa kroko mli akɛ: “Shi yɛ eshiwoo lɛ naa lɛ, wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Agbɛnɛ Yohane tsɔɔ akɛ nɛkɛ shiwoo nɛɛ baa mli yɛ Nuŋtsɔ lɛ gbi lɛ nɔ. “Tsutsu ŋwɛi lɛ kɛ tsutsu shikpɔŋ lɛ,” ni ji Satan nibii agbɛjianɔtoo kɛ enɔyeli gbɛjianɔtoo ni Satan kɛ edaimonioi lɛ naa amɛnɔ hewalɛ lɛ baaho aya. “Ŋshɔ” ni efee hamahama ni ji adesai yiwalɔi kɛ atuatselɔi lɛ ehiŋ shi dɔŋŋ. Nɔ ni akɛbaato najiaŋ ji “ŋwɛi hee kɛ shikpɔŋ hee”—shikpɔŋ nɔ weku hee ni yɔɔ nɔyeli hee, Nyɔŋmɔ Maŋtsɛyeli lɛ shishi.—Okɛto Kpojiemɔ 20:11 he.

 3. (a) Mɛni Yohane tsɔɔ mli, ni mɛni ji Yerusalem Hee lɛ? (b) Yerusalem Hee lɛ ‘kpelekeɔ shi kɛjɛɔ ŋwɛi’ yɛ mɛɛ gbɛ nɔ?

³ Yohane tee nɔ akɛ: “Mina maŋ krɔŋkrɔŋ lɛ ni ji Yerusalem hee lɛ jɛ Nyɔŋmɔ ŋɔɔ yɛ ŋwɛi miikpeleke shi, ni asaa lɛ tamɔ ayemforo ni awula lɛ aha ewu.” (Kpojiemɔ 21:2) Yerusalem hee lɛ ji Kristo ayemforo lɛ, ni mɛi ni feɔ enɛ ji Kristofoi ni afɔ amɛ mu ni yeɔ anɔkwale kɛyashiɔ gbele mli ni ateɔ amɛ shi koni amɛbatsɔmɔ maŋtsɛmɛi kɛ osɔfoi kɛ Yesu ni awo ehiɛ nyam lɛ. (Kpojiemɔ 3:12; 20:6) Taakɛ bɔ ni shikpɔŋ nɔ Yerusalem batsɔ blema Israel nɔyeli lɛ maŋtiase lɛ, Yerusalem Hee lɛ hu ni yɔɔ fɛo lɛ kɛ e-Yemforowu lɛ feɔ nibii agbɛjianɔtoo hee lɛ nɔyeli lɛ. Enɛ ji ŋwɛi hee lɛ. ‘Ayemforo lɛ kpelekeɔ shi kɛjɛɔ ŋwɛi,’ jeee ni eekpeleke shi diɛŋtsɛ, shi moŋ kɛ shishinumɔ akɛ eegbala ejwɛŋmɔ kɛmiiba shikpɔŋ lɛ nɔ. Toobi lɛ ayemforo lɛ baafee eyelikɛbualɔ anɔkwafo ni akɛtsu jalɛ nɔyeli ni baahi adesai fɛɛ nɔ lɛ he nii. Jɔɔmɔ diɛŋtsɛ kɛha shikpɔŋ hee lɛ nɛ!

 4. Mɛɛ shiwoo Nyɔŋmɔ kɛhaa tamɔ nɔ ni ekɛha Israel maŋ hee ni ato lɛ?

⁴ Yohane kɛɔ wɔ lolo akɛ: “Ni minu gbee kpeteŋkpele ko jɛ maŋtsɛsɛi lɛ mli kɛɛ: Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ.” (Kpojiemɔ 21:3) Beni Yehowa kɛ Israel maŋ hee lɛ fee Mla kpaŋmɔ lɛ, ewo shi akɛ: “Ni maŋɔ mishihilɛ he lɛ mama nyɛteŋ, ni misusuma nyaŋeŋ nyɛ. Ni manyiɛ nyɛteŋ, ni matsɔ nyɛ-Nyɔŋmɔ, ni nyɛ hu nyɛaatsɔ mimaŋ.” (3 Mose 26:11, 12) Agbɛnɛ Yehowa kɛ shiwoo ko ni tamɔ nakai nɔŋŋ miiha adesai anɔkwafoi lɛ ekoŋŋ. Amɛbaatsɔmɔ lɛ diɛŋtsɛ ewebii krɛdɛɛ yɛ afii akpe Kojomɔ Gbi lɛ mli.

 5. (a) Mɛɛ gbɛ nɔ Nyɔŋmɔ baatsɔ ni ekɛ adesai ahi shi yɛ Afii Akpe Nɔyeli be lɛ mli? (b) Nyɔŋmɔ kɛ adesai baahi shi yɛ Afii Akpe Nɔyeli lɛ sɛɛ yɛ mɛɛ gbɛ nɔ?

⁵ Yehowa diɛŋtsɛ kɛ adesai “aaahi shi” yɛ Afii Akpe Nɔyeli lɛ mli, yɛ gbɛjianɔtoo ko ni sɛɛ etsɛŋ tsɔ mli, ni e-Bi anɔkwafo Yesu Kristo baadamɔ enajiaŋ. Shi yɛ Afii Akpe Nɔyeli lɛ naagbee, beni Yesu kɛ Maŋtsɛyeli lɛ haa e-Tsɛ lɛ, najiaŋdamɔlɔ odehe ko loo mlidamɔlɔ he ebahiaŋ dɔŋŋ. Yehowa kɛ “ewebii” lɛ baahi shi yɛ mumɔŋ kɛya naanɔ yɛ gbɛ ni yɔɔ tɛɛ nɔ. (Okɛto Yohane 4:23, 24 he.) Mɛɛ hegbɛ ni nɔ kwɔ enɛ ji kɛha adesai ni aku sɛɛ asaa ato amɛ gbɛjianɔ ekoŋŋ lɛ nɛkɛ!

6, 7. (a) Mɛɛ shiwoi wuji Yohane jieɔ amɛ kpo, ni namɛi baana jɔɔmɔi nɛɛ amli ŋɔɔmɔ? (b) Te Yesaia tsɔɔ paradeiso ni ji mumɔŋ nɔ kɛ heloo naa nɔ fɛɛ mli eha tɛŋŋ?

⁶ Yohane tee nɔ ekɛɛ: “Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:4) Aakai wɔ shishijee shiwoi ni jɛ mumɔŋ lɛ shikome ekoŋŋ. Yesaia hu kpa be mli ni gbele kɛ awerɛho kɛ ŋkɔmɔyeli bɛ dɔŋŋ ni akɛ mlifilimɔ baato najiaŋ lɛ gbɛ. (Yesaia 25:8; 35:10; 51:11; 65:19) Agbɛnɛ Yohane miima nɔ mi akɛ nɛkɛ shiwoi nɛɛ baaba mli yɛ naakpɛɛ gbɛ nɔ yɛ afii akpe Kojomɔ Gbi lɛ mli. Klɛŋklɛŋ lɛ, asafo babaoo lɛ baana jɔɔmɔi amli ŋɔɔmɔ. “Toobi lɛ, ni yɔɔ maŋtsɛsɛi lɛ teŋ lɛ,” baaya nɔ akwɛ amɛ, “ni eeetsɔɔ amɛ gbɛ kɛaatee wala nu bui ahe, ni Nyɔŋmɔ aaatsumɔ amɛhiɛaŋ yaafonui fɛɛ.” (Kpojiemɔ 7:9, 17) Shi yɛ naagbee lɛ, mɛi ni atee amɛ shi lɛ fɛɛ ni naa hemɔkɛyeli yɛ Yehowa gbɛjianɔtoo lɛ mli lɛ kɛ amɛ baahi jɛmɛ, ni amɛbaana paradeiso ni ji mumɔŋ nɔ kɛ heloo naa nɔ fɛɛ mli ŋɔɔmɔ.

⁷ Yesaia kɛɔ akɛ, “no mli lɛ aaagbele shwilafoi ahiŋmɛii, ni aaagbele toimulɔi atoii.” Hɛɛ, “no mli lɛ obubuafoi aaatumɔ akɛ ofrote, ni mumuii alilɛii hu aaala kɛ nyamɔ.” (Yesaia 35:5, 6) Ni yɛ nakai be lɛ mli hu lɛ, “amɛaamamɔ tsui, ni amɛaahi mli, ni amɛaafee weintromii, ni amɛaaye mli yibii! Amɛmamɔŋ tsui, ni mɔ kroko ahi mli, ni amɛhuŋ hu, ni mɔ kroko aye; ejaakɛ mimaŋ lɛ gbii aaatamɔ tsei agbii, ni mɛi ni mihala lɛ aaaye amɛnine naa nitsumɔ lɛ mli nii aahu po.” (Yesaia 65:21, 22) No hewɔ lɛ afamɔŋ amɛ kɛjɛŋ shikpɔŋ lɛ nɔ.

 8. Mɛni Yehowa diɛŋtsɛ kɛɔ yɛ bɔ ni nɛkɛ shiwoi wuji nɛɛ ji anɔkwale ni anyɛɔ akɛ he fɔɔ nɔ lɛ he?

⁸ Mɛɛ nibii ni yɔɔ naakpɛɛ ni baaba lɛ ahe ninaai yiɔ wɔjwɛŋmɔi amli obɔ nɛkɛ yɛ be mli ni wɔjwɛŋɔ nɛkɛ shiwoi nɛɛ ahe lɛ! Gbɛjianɔtoo ni yɔɔ naakpɛɛ yɛ kɛha adesai anɔkwafoi yɛ ŋwɛi suɔmɔ nɔyeli lɛ shishi. Ani nɛkɛ shiwoi nɛɛ hi tsɔ fe bɔ ni eeenyɛ efee anɔkwale? Ani amɛji nuumo ko ni atswa enane shishi tu kɛtee Patmo ŋshɔkpɔ lɛ nɔ lɛ alamɔi kɛkɛ? Yehowa diɛŋtsɛ haa hetoo: “Ni mɔ ni ta maŋtsɛsɛi lɛ nɔ lɛ kɛɛ: Naa, miifee nii fɛɛ ehee. Ni ekɛɛ mi akɛ: Ŋmaa, ejaakɛ nɛkɛ wiemɔi nɛɛ anɔkwa wiemɔi ni ma shi shiŋŋ ni. Ni ekɛɛ mi akɛ: Agbe naa. Mi ji Alfa lɛ kɛ Omega lɛ, shishijee lɛ kɛ naagbee lɛ.”—Kpojiemɔ 21:5, 6a.

 9. Mɛni hewɔ abaanyɛ asusu nɛkɛ wɔsɛɛ be mli jɔɔmɔi nɛɛ ahe akɛ eji nɔ ko ni baaba mli diɛŋtsɛ lɛ?

⁹ Etamɔ nɔ ni Yehowa diɛŋtsɛ kɛ ewaonaa gbɛi miiwo shiwoo ko nɔmimaa shishi, aloo gboshinii ahe wolo ko shishi akɛ nɛkɛ wɔsɛɛ be jɔɔmɔi nɛɛ ji anɔkwale. Namɔ yɔɔ ekaa ni eeenyɛ ebi Mlidamɔlɔ ni tamɔ nɛkɛ lɛ sane? Bɔ ni Yehowa shiwoi nɛɛ ji anɔkwale ha sɔŋŋ hewɔ lɛ ewieɔ he tamɔ nɔ ko ni eba mli momo po: “Agbe naa!” Ani jeee Yehowa ji “Alfa lɛ kɛ Omega lɛ . . . Mɔ ni yɔɔ lɛ kɛ Mɔ ni yɛ lɛ kɛ Mɔ ni baaba lɛ, (ni ji) Ofe lɛ”? (Kpojiemɔ 1:8) Lɛlɛŋ, lɛ ni! Lɛ diɛŋtsɛ ejajeɔ akɛ: “Mi ji klɛŋklɛŋ mɔ kɛ sɛɛkpee mɔ, ni Nyɔŋmɔ ko bɛ, ja mi!” (Yesaia 44:6) Bɔ ni eji nɛɛ hewɔ lɛ, ebaanyɛ ni ekɛ emumɔ lɛ aha ni agba gbalɛi ni eha emli nɔ fɛɛ nɔ aba mli. Kwɛ bɔ ni enɛ wajeɔ hemɔkɛyeli ehaa! No hewɔ lɛ ewoɔ shi akɛ: “Naa! Miifee nii fɛɛ ehee”! Ni wɔɔbi sane akɛ ani nɛkɛ naakpɛɛ nibii nɛɛ baaba mli diɛŋtsɛ lɛ, yɛ anɔkwale mli lɛ nɔ ni esa akɛ wɔsusu he moŋ ji: ‘Mɛni esa akɛ mi diɛŋtsɛ lɛ mafee koni minine ashɛ jɔɔmɔi ni tamɔ nɛkɛ nɔ?’

“Nu” Kɛha Mɛi ni Kumai Yeɔ Amɛ Lɛ

10. Mɛɛ “nu” Yehowa kɛhaa, ni edamɔ shi kɛha mɛni?

¹⁰ Yehowa diɛŋtsɛ ji mɔ ni jajeɔ akɛ: “Mɔ ni kumai yeɔ lɛ lɛ, maha lɛ wala nu bu lɛ mli nu lɛ eko enu yaka.” (Kpojiemɔ 21:6b) Bɔni afee ni mɔ ko anyɛ agbe nakai kumai lɛ, esa akɛ mɔ lɛ afee mɔ ni emumɔŋ nibii ahe hiaa lɛ kɛ mɔ ni sumɔɔ akɛ eeekpɛlɛ “nu” ni Yehowa kɛhaa lɛ nɔ. (Yesaia 55:1; Mateo 5:3) Mɛɛ “nu” nɛ? Yesu diɛŋtsɛ ha nakai sanebimɔ lɛ hetoo yɛ be mli ni eyeɔ yoo ko ni ta nu bu ko he yɛ Samaria lɛ odase lɛ. Ekɛɛ lɛ akɛ: “Shi mɔ ni nuɔ nu ni mi maha lɛ lɛ eko lɛ, kumai yeŋ lɛ dɔŋŋ kɛaatee naanɔ; shi moŋ, nu ni maha lɛ lɛ aaatsɔ nu hiŋmɛi ni baa kɛyaa naanɔ wala mli yɛ emli.” Nakai “wala nu bu lɛ mli nu” lɛ hoɔ kɛjɛɔ Nyɔŋmɔ ŋɔɔ kɛtsɔɔ Kristo nɔ akɛ egbɛjianɔtoo ni akɛbaasaa adesai ni amɛba wala ni eye emuu mli. Taakɛ Samaria yoo lɛ fee lɛ, kwɛ bɔ ni esa akɛ wɔhe atswa shi aha akɛ wɔɔnu nakai nu bu lɛ mli nu babaoo! Ni taakɛ nakai yoo lɛ fee lɛ, kwɛ bɔ ni esa akɛ wɔfee klalo akɛ wɔɔŋmɛɛ nibii ni wɔyɔɔ he miishɛɛ yɛ je nɛɛ mli lɛ ahe koni wɔgba mɛi krokomɛi nɛkɛ sanekpakpa nɛɛ moŋ!—Yohane 4:14, 15, 28, 29.

Mɛi ni Yeɔ Kunim Lɛ

11. Mɛɛ shiwoo Yehowa kɛha, ni wiemɔi lɛ kɔɔ namɛi ahe klɛŋklɛŋ?

¹¹ Esa akɛ mɛi ni nuɔ nakai “nu” ni shɛjeɔ mɔ mii lɛ hu aye kunim, taakɛ Yehowa yaa nɔ ekɛɔ lɛ: “Kunimyelɔ lɛ aaatsɔ nɛkɛ nii nɛɛ fɛɛ yelɔ, ni matsɔ e-Nyɔŋmɔ, ni lɛ hu eeetsɔ mibi.” (Kpojiemɔ 21:7) Nɛkɛ shiwoo nɛɛ tamɔ shiwoi ni anaa yɛ shɛɛ saji ni akɛyaha asafoi kpawo lɛ mli lɛ; no hewɔ lɛ, klɛŋklɛŋ lɛ esa akɛ nɛkɛ wiemɔi nɛɛ akɔ kaselɔi ni afɔ amɛ mu lɛ ahe. (Kpojiemɔ 2:7, 11, 17, 26-28; 3:5, 12, 21) Kristo mumɔŋ nyɛmimɛi ni amɛhi shi yɛ yinɔi lɛ fɛɛ mli lɛ kɛ hehiamɔ ekpa hegbɛ ni amɛaana akɛ amɛaafee Yerusalem Hee lɛ mli bii lɛ gbɛ. Kɛ amɛye kunim taakɛ Yesu ye kunim lɛ, amɛhiɛnɔkamɔi lɛ baaba mli.—Yohane 16:33.

12. Mɛɛ gbɛ nɔ Yehowa shiwoo ni yɔɔ Kpojiemɔ 21:7 lɛ aaatsɔ aba mli yɛ asafo babaoo lɛ ahe yɛ?

¹² Asafo babaoo lɛ ni jɛ jeŋmaji fɛɛ mli lɛ hu kɛ amɛhiɛ fɔɔ nɛkɛ shiwoo nɛɛ nɔ. Esa akɛ amɛ hu amɛye kunim, amɛkɛ anɔkwayeli asɔmɔ Nyɔŋmɔ kɛyashi be mli ni amɛaaje amanehulu kpeteŋkpele lɛ mli. Kɛkɛ lɛ amɛbaabote amɛ shikpɔŋ nɔ gboshiniyeli lɛ mli, ‘maŋtsɛyeli ni asaa ato amɛ kɛjɛ jeŋ shishijee lɛ.’ (Mateo 25:34) Atsɛɔ mɛnɛɛmɛi kɛ Nuŋtsɔ lɛ shikpɔŋ nɔ toi krokomɛi ni yeɔ kaa ni baa yɛ afii akpe lɛ naagbee lɛ mli kunim lɛ akɛ “mɛi krɔŋkrɔŋi.” (Kpojiemɔ 20:9) Amɛbaana amɛkɛ amɛ-Bɔlɔ, Yehowa Nyɔŋmɔ teŋ wekukpaa ko ni tamɔ bii ni yɔɔ krɔŋkrɔŋ mli ŋɔɔmɔ akɛ ejeŋ muu fɛɛ gbɛjianɔtoo lɛ mli bii.—Yesaia 66:22; Yohane 20:31; Romabii 8:21.

13, 14. Bɔni afee ni nine ashɛ Nyɔŋmɔ shiwoi ni yɔɔ nyam lɛ anɔ lɛ, mɛɛ nifeemɔi esa akɛ wɔkpoo kwraa, ni mɛni hewɔ?

¹³ Yɛ nɛkɛ gbɛkpamɔ nɛɛ hewɔ lɛ, kwɛ bɔ ni ehe hiaa akɛ Yehowa Odasefoi lɛ aaahi shi akɛ mɛi ni etsi amɛhe kɛjɛ Satan je lɛ mli nibii ni buleɔ mɔ lɛ ahe bianɛ! Esa akɛ wɔfee mɛi ni he wa, mɛi ni ekpɛ mli, kɛ mɛi ni etswa amɛfai shi akɛ wɔŋmɛŋ gbɛ ni Abonsam agbala wɔ kɛbote kuu ni Yehowa diɛŋtsɛ tsɔɔ mli yɛ biɛ lɛ mli: “Shi mɛi ni tsui faa kɛ mɛi ni heee yeee kɛ mɛi ni feɔ nihii nii kɛ awuiyelɔi kɛ ajwamaŋbɔlɔi kɛ sulɔi kɛ wɔŋjalɔi kɛ amalelɔi fɛɛ lɛ, amɛaana amɛgbɛnaa yɛ kpaakpo lɛ ni tsoɔ kɛ la kɛ swɔɔ lɛ mli, nɔ ni ji gbele ni ji enyɔ lɛ.” (Kpojiemɔ 21:8) Hɛɛ, esa akɛ mɔ ni taoɔ akɛ etsɔ gboshiniyelɔ lɛ akpoo nifeemɔi ni ebule nibii agbɛjianɔtoo momo nɛɛ lɛ. Esa akɛ eye kunim kɛtsɔ anɔkwale ni eeeya nɔ eye yɛ nɔnyɛɛi kɛ kaai fɛɛ ni aaaba enɔ lɛ fɛɛ sɛɛ lɛ nɔ.—Romabii 8:35-39.

¹⁴ Eyɛ mli akɛ Kristendom kɛɔ akɛ lɛ ji Kristo ayemforo lɛ moŋ, shi nɔ ni eka ehe ji nifeemɔi ni ahiɔ ni Yohane etsɔɔ mli yɛ biɛ lɛ. No hewɔ lɛ ebaagbee shi kɛya naanɔ hiɛkpatamɔ mli kɛ mɛi ni eshwɛ yɛ Babilon Kpeteŋkpele lɛ mli lɛ. (Kpojiemɔ 18:8, 21) Nakai nɔŋŋ hu mɛi ni afɔ amɛ mu lɛ ateŋ mɔ ko loo asafo babaoo lɛ mli bii lɛ eko ni diɔ nɔ fɔŋ feemɔ ni tamɔ nɛkɛ sɛɛ aloo ejeɔ shishi akɛ eeewo enɛ he hewalɛ lɛ hiɛ aaakpata kɛaatee naanɔ. Kɛ amɛtee nɔ akɛ amɛaahi shi yɛ nifeemɔi nɛɛ amli lɛ, amɛnine shɛŋ shiwoi lɛ anɔ. Ni mɔ fɛɛ mɔ ni aaabɔ mɔdɛŋ akɛ ekɛ nifeemɔi ni tamɔ nɛkɛ aaaba shikpɔŋ hee lɛ mli lɛ, abaakpata ehiɛ oya, ni ebaabote gbele ni ji enyɔ ni shitee he hiɛnɔkamɔ ko bɛ mli lɛ mli.—Yesaia 65:20.

15. Namɛi ji kunimyelɔi ni ekaaa lɛ, ni mɛɛ ninaa nɔ atsɔɔ akɛ Kpojiemɔ baa naagbee yɛ woo ni kwɔ fe fɛɛ mli?

¹⁵ Mɛi ni ayoo amɛ yɛ gbɛ ni ekaaa nɔ akɛ kunimyelɔi lɛ ji Toobi lɛ, Yesu Kristo, kɛ eyemforo ni ji 144,000 lɛ, Yerusalem Hee lɛ. Kwɛ bɔ ni esa jogbaŋŋ mɔ akɛ akɛ Kpojiemɔ aaaba naagbee kɛtsɔ Yerusalem Hee lɛ he ninaa ni je agbo ni kwɔ fe fɛɛ nɔ! Agbɛnɛ Yohane tsɔɔ naagbee ninaa kome ko mli.

[Mfonirii ni yɔɔ baafa 302]

Nitsumɔ ni yɔɔ miishɛɛ kɛ naanyobɔɔ kɛha mɛi fɛɛ baahi shi yɛ shikpɔŋ hee lɛ mli bii ateŋ