Yitso Nyɔŋmai Enyɔ Kɛ Nɛɛhu
Awo Maŋtsɛ ko Hemɔkɛyeli He Nyɔmɔ
1, 2. Hezekia jie ehe kpo akɛ eji maŋtsɛ kpakpa fe Ahaz yɛ mɛɛ gbɛ nɔ?
HEZEKIA eye afii 25 beni ebatsɔ Yuda maŋtsɛ lɛ. Mɛɛ nɔyelɔ nɛkɛ ebaafee? Ani ebaanyiɛ etsɛ, Maŋtsɛ Ahaz nanemaahei lɛ asɛɛ, ní elaka eshishibii lɛ ní amɛyanyiɛ apasa nyɔŋmɔi asɛɛ? Aloo ebaanyiɛ gbɔmɛi lɛ ahiɛ yɛ Yehowa jamɔ mli, taakɛ eblematsɛ Maŋtsɛ David fee lɛ?—2 Maŋtsɛmɛi 16:2.
2 Beni Hezekia batá maŋtsɛsɛi lɛ nɔ etsɛɛɛ lɛ, ebafee faŋŋ akɛ eto eyiŋ akɛ “[ebaafee] nɔ ni ja yɛ Yehowa hiɛ.” (2 Maŋtsɛmɛi 18:2, 3) Eklɛŋklɛŋ afi lɛ mli lɛ, efã ni asaa Yehowa sɔlemɔtsu lɛ ni aje sɔlemɔtsu mli sɔɔmɔi lɛ ashishi. (2 Kronika 29:3, 7, 11) Kɛkɛ ni eto Hehoo gbijurɔyeli kpeteŋkpele ko he gbɛjianɔ ni efɔ̃ maŋ muu lɛ fɛɛ nine kɛba shishi—ní Israel akutsei nyɔŋma ní yɔɔ kooyigbɛ lɛ fata he. Mɛɛ okpɔlɔŋmɛɛ ní hiɛ kpaŋ nɔ po nɛ! Afeko eko ní tamɔ nakai dã kɛjɛ Maŋtsɛ Salomo gbii lɛ amli aahu kɛbaa.—2 Kronika 30:1, 25, 26.
3. (a) Mɛni Israel kɛ Yuda maji lɛ amli bii ní ba Hehoo ní Hezekia to he gbɛjianɔ lɛ fee? (b) Mɛni Kristofoi ní yɔɔ ŋmɛnɛ lɛ kaseɔ kɛjɛɔ faishitswaa ní mɛi ni ba Hehoo gbijurɔyeli lɛ kɛfee amɛnii lɛ mli?
3 Yɛ Hehoo gbijurɔyeli lɛ naagbee lɛ, akanya mɛi ni ba gbijurɔyeli lɛ shishi lɛ ni amɛgba wɔŋ kooi lɛ, ni amɛkumɔ amagai lɛ, ni amɛjwara hei grɔŋŋi lɛ kɛ apasa nyɔŋmɔi lɛ afɔleshaa latɛi lɛ, ni no sɛɛ lɛ amɛku amɛsɛɛ kɛtee amɛmaŋtiasei lɛ amli, ní amɛtswa amɛfai shi akɛ amɛbaasɔmɔ anɔkwa Nyɔŋmɔ lɛ. (2 Kronika 31:1) Kwɛ bɔ ni esoro enɛ kwraa yɛ amɛ tsutsu jamɔ mli subaŋ lɛ he! Anɔkwa Kristofoi ni yɔɔ ŋmɛnɛ lɛ baanyɛ akase bɔ ni ehe hiaa ní ‘amɛkakwa amɛhe naabuamɔ kutuu’ be fɛɛ be lɛ kɛjɛ enɛ mli. Henaabuamɔi ní tamɔ nɛkɛ, kɛji yɛ asafoi amli loo yɛ kpeei bibii kɛ kpeei wuji ashishi lɛ, tsuɔ gbɛfaŋnɔ ni he hiaa he nii yɛ hewalɛwoo ní amɛnine shɛɔ nɔ, kɛ kanyamɔ ní amɛnyɛmifeemɔ kɛ Nyɔŋmɔ mumɔ lɛ kanyaa amɛ koni ‘amɛhiɛ adɔ suɔmɔ kɛ nitsumɔi kpakpai ahe’ lɛ gbɛfaŋ.—Hebribii 10:23-25.
Aka Hemɔkɛyeli Akwɛ
4, 5. (a) Hezekia tsɔɔ faŋŋ akɛ etsi ehe kɛjɛ Ashur he kwraa yɛ mɛɛ gbɛ nɔ? (b) Mɛɛ tawuu nifeemɔ ko Sanherib fee eshi Yuda, ni mɛni Hezekia fee koni ekɛtsĩ tutuamɔ ní akɛaaba Yerusalem nɔ amrɔ nɔŋŋ lɛ naa? (d) Yɛ mɛɛ gbɛ nɔ Hezekia sáa nibii koni ekɛfã Yerusalem he kɛjɛ Ashurbii lɛ adɛŋ?
4 Kaai ní mli wawai kã Yerusalem hiɛ ní ekɛbaakpe. Hezekia eku ekomefeemɔ kpaŋmɔ ní etsɛ, Ahaz ní bɛ hemɔkɛyeli lɛ kɛ Ashurbii lɛ fee lɛ mli. Eye Filistibii lɛ, ni kɛ Ashur efee kpaŋmɔ akɛ amɛhefatalɔi lɛ po anɔ kunim. (2 Maŋtsɛmɛi 18:7, 8) Enɛ wo Ashur maŋtsɛ lɛ mlila waa. No hewɔ lɛ, wɔkaneɔ akɛ: “Eba mli akɛ maŋtsɛ Hezekia yinɔ afi ni ji nyɔŋma kɛ ejwɛ lɛ nɔ lɛ, Sanherib, Ashur maŋtsɛ lɛ, fã batua Yuda maji ní atswa gbogboi awo he lɛ fɛɛ ni eŋɔ amɛ.” (Yesaia 36:1) Ekolɛ akɛni ehiɛ kã nɔ akɛ ebaabu Yerusalem he kɛjɛ Ashurbii asraafoi ní nijiaŋ ejeee wui lɛ atutuamɔ ni amɛkɛaaba amrɔ nɔŋŋ lɛ he hewɔ lɛ, Hezekia kpɛlɛ nɔ akɛ ebaatsu onia babaoo ní naa shɛɔ jwiɛtɛi talentai 300 kɛ shika talentai 30 kɛyaha Sanherib.a—2 Maŋtsɛmɛi 18:14.
5 Akɛni shika kɛ jwiɛtɛi ní yɔɔ maŋtsɛwe lɛ nitoohei lɛ faaa bɔ ni ebaanyɛ ekɛtsu onia lɛ hewɔ lɛ, Hezekia jie nibii ní jara wawai ní ebaanyɛ ejie lɛ kɛjɛ sɔlemɔwe lɛ. Ekpɔlɔ sɔlemɔwe lɛ naa shinaai ní akɛ shika ehà he lɛ, ni ekɛ fɛɛ tsu kɛyaha Sanherib. Enɛ sa Ashur maŋtsɛ lɛ hiɛ yɛ be kukuoo pɛ mli. (2 Maŋtsɛmɛi 18:15, 16) Eka shi faŋŋ akɛ, Hezekia yɔse akɛ Ashurbii lɛ haŋ Yerusalem aye ehe yɛ be kakadaŋŋ mli. No hewɔ lɛ, esa akɛ amɛsaa amɛhe amɛto. Gbɔmɛi lɛ tsĩ nu kpakpa ní Ashurbii ní eba amɛbaatutua amɛ lɛ baaná anu lɛ naa kwraa. Hezekia sáa Yerusalem mɔji lɛ ni ewaje amɛ jogbaŋŋ ni efee tawuu niiatoohe ni ebua “tawuu nii kɛ tsɛŋi babaoo” naa eto mli.—2 Kronika 32:4, 5.
6. Namɔ nɔ Hezekia kɛ ehiɛ fɔ̃?
6 Shi kɛlɛ, Hezekia kɛ ehiɛ fɔ̃ Yehowa Zebaot nɔ, ni ekɛ ehiɛ efɔ̃ɔɔ tawuu mli ŋaa gbɛ̀i loo mɔji anɔ. Ewo esraafoi onukpai lɛ ŋaa akɛ: “Nyɛwajea nyɛhe ni nyɛfea ekãa! Nyɛkashea gbeyei ni nyɛtsui akafãa yɛ Ashur maŋtsɛ lɛ kɛ asafo babaoo ní kɛ lɛ nyiɛ lɛ hewɔ! Shi mɔ ni kɛ wɔ yɔɔ lɛ da fe mɔ ni kɛ lɛ yɔɔ lɛ: Lɛ lɛ heloo nine kɛ lɛ yɔɔ lɛ; shi wɔ lɛ, Yehowa, wɔ-Nyɔŋmɔ lɛ, kɛ wɔ yɔɔ, koni eye ebua wɔ, ní ewu wɔtai eha wɔ!” Amɛbo toi, ni gbɔmɛi lɛ “ŋɔ amɛhiɛ amɛfɔ̃ Yuda maŋtsɛ Hezekia wiemɔi lɛ anɔ.” (2 Kronika 32:7, 8) Feemɔ nibii ni yɔɔ miishɛɛ ní nyiɛ sɛɛ ba lɛ ahe mfoniri okwɛ, beni wɔsusuɔ Yesaia gbalɛ lɛ yitsei 36 kɛyashi 39 lɛ he lɛ.
Rabshake Tsɔɔ Nɔ Hewɔ ní Eba
7. Namɔ ji Rabshake, ni mɛni hewɔ atsu lɛ kɛtee Yerusalem lɛ?
7 Sanherib tsu Rabshake (ni ji asraafoi asabala, shi jeee gbɛi diɛŋtsɛ lɛ) kɛ maŋ onukpai krokomɛi enyɔ kɛtee Yerusalem koni amɛyakɛɛ amɛ ní amɛŋmɛɛ maŋtiase lɛ he kwraa amɛha amɛ. (2 Maŋtsɛmɛi 18:17) Hezekia najiaŋdamɔlɔi etɛ, ni ji Eliakim, Hezekia shia nɔkwɛlɔ lɛ, kɛ Shebna woloŋmalɔ lɛ, kɛ Yoa, saji aŋmalɔ Asaf bi lɛ, kɛ amɛ bakpe yɛ maŋtiase lɛ gbogbo lɛ sɛɛ.—Yesaia 36:2, 3.
8. Rabshake ka akɛ ebaafite Yerusalem shitee-kɛ-woo lɛ yɛ mɛɛ gbɛ nɔ?
8 Oti ní ma Rabshake hiɛ lɛ yɛ kuku—no ji ní ekɔne Yerusalem yiŋ ní eŋmɛɛ ehe eha ní ekawuu ta lɛ kwraa. Beni ekɛ amɛ wieɔ Hebri wiemɔ lɛ, eje shishi kɛ bolɔmɔ akɛ: “Mɛni nɔ po ohiɛ kã nɛɛ? . . . Namɔ nɔ po ohiɛ kã, hewɔ ni otse mihiɛ atua nɛɛ?” (Yesaia 36:4, 5) Kɛkɛ ni Rabshake bɔ Yudafoi ní tsui efã lɛ ahora, ni ekai amɛ akɛ amɛbɛ mɔ ko kwraa ní fiɔ amɛsɛɛ. Namɔ ŋɔɔ amɛbaanyɛ amɛya kɛha yelikɛbuamɔ? Ani amɛbaaya nakai “gãlã ní amĩa,” ni ji Mizraim ŋɔɔ? (Yesaia 36:6) No mli lɛ, Mizraim tamɔ gãlã ní amĩa lɛ lɛɛlɛŋ; yɛ anɔkwale mli lɛ, no mli lɛ, Kush eye nakai tsutsu jeŋ hewalɛ lɛ nɔ kunim yɛ be kukuoo ko mli, ni Mizraim Farao ní yeɔ nɔ yɛ nakai beaŋ, ni ji Maŋtsɛ Tirhaka, jeee Mizraimnyo shi moŋ eji Kushnyo. Ni Ashur miihe aye enɔ kunim. (2 Maŋtsɛmɛi 19:8, 9) Akɛni Mizraim nyɛŋ ahere lɛ diɛŋtsɛ eyiwala hewɔ lɛ, enyɛŋ ekɛ yelikɛbuamɔ ko aha Yuda.
9. Mɛni eka shi faŋŋ akɛ no ha Rabshake mu sane naa akɛ Yehowa ekwa E-webii lɛ, shi mɛni ji anɔkwa saji lɛ moŋ?
9 Agbɛnɛ Rabshake wie akɛ Yehowa wuuŋ ehaŋ E-webii lɛ ejaakɛ E-náaa amɛhe miishɛɛ. Rabshake wie akɛ: “Shi kɛji oookɛɛ mi akɛ: Yehowa, wɔ-Nyɔŋmɔ lɛ, nɔ moŋ wɔhiɛ kã lɛ! ani jeee lɛ ehei grɔŋŋi kɛ efɔleshaa latɛi Hezekia jie [lɛ]?” (Yesaia 36:7) Yɛ anɔkwale mli lɛ, hei grɔŋŋi kɛ afɔleshaa latɛi ní Yudafoi lɛ jie yɛ shikpɔŋ lɛ nɔ lɛ etsɔɔɔ kwraa akɛ amɛkwa Yehowa, shi moŋ amɛku amɛsɛɛ kɛba Yehowa ŋɔɔ moŋ.
10. Mɛni hewɔ ehe ehiaaa, kɛji Yuda hefalɔi lɛ ayi fá loo amɛyi fáaa lɛ?
10 No sɛɛ lɛ, Rabshake kai Yudafoi lɛ akɛ, yɛ asraafoi ahewalɛ gbɛfaŋ lɛ, amɛnyɛŋ amɛ kwraa. Ekɛ henɔwomɔ wie mpoatswaa wiemɔ nɛɛ, akɛ: “Majie okpɔŋɔi akpei enyɔ mahao, akɛ oooná bo diɛŋtsɛ omɛi otara amɛnɔ lo?” (Yesaia 36:8) Shi yɛ anɔkwale mli lɛ, ani Yuda okpɔŋɔnɔtaralɔi ní atsɔse amɛ lɛ ayi ní fá loo amɛyi ní fáaa lɛ he miihia? Dabi, ejaakɛ Yuda yiwalaheremɔ damɔɔɔ asraafoi ahewalɛ kɛ amɛhesaa nɔ. Abɛi 21:31 lɛ tsɔɔ saji amli yɛ nɛkɛ gbɛ nɔ akɛ: “Asáa okpɔŋɔ atoɔ tawuu gbi; shi kunimyeli lɛ, Yehowa dɛŋ ejɛɔ.” Kɛkɛ ni Rabshake wie akɛ Yehowa jɔɔmɔ yɛ Ashurbii lɛ anɔ, shi jeee Yudafoi lɛ anɔ. Kɛ́ jeee nakai lɛ, taakɛ ekɛɛ lɛ, kulɛ Ashurbii lɛ nyɛŋ aba aahu kɛbashɛ he ni amɛbashɛ yɛ Yuda shikpɔŋ lɛ nɔ lɛ.—Yesaia 36:9, 10.
11, 12. (a) Mɛni hewɔ Rabshake ma nɔ mi doo akɛ ebaawie “Yuda wiemɔ” lɛ, ni ebɔ mɔdɛŋ ní elaka Yudafoi ní boɔ lɛ toi lɛ yɛ mɛɛ gbɛ nɔ? (b) Mɛɛ hewalɛ ekolɛ Rabshake wiemɔi lɛ baanyɛ aná yɛ Yudafoi lɛ anɔ?
11 Hezekia najiaŋdamɔlɔi lɛ miisusu hewalɛ ní Rabshake wiemɔi lɛ baaná yɛ mɛi ní jwere maŋtiase lɛ gbogboi lɛ anɔ ní amɛnuɔ nɔ ni ewieɔ lɛ anɔ lɛ he. Yudafoi amaŋ onukpai nɛɛ kpa lɛ fai akɛ: “Ofainɛ, okɛ otsuji awie Aram wiemɔ, ejaakɛ wɔnuɔ; shi okɛ wɔ akawie Yuda wiemɔ yɛ maŋ ní jwere gbogbo lɛ nɔ lɛ atoiiaŋ.” (Yesaia 36:11) Shi Rabshake ekpɛko eyiŋ kwraa akɛ ebaawie yɛ Aram wiemɔ mli. Eetao ní edũ yiŋkɔshikɔshifeemɔ kɛ gbeyeishemɔ ewo Yudafoi lɛ amli bɔni afee ní amɛŋmɛɛ amɛhe amɛha, koni eye Yerusalem nɔ kunim ní ewuuu ta! (Yesaia 36:12) No hewɔ lɛ, Ashurnyo lɛ wie ekoŋŋ yɛ “Yuda wiemɔ” mli. Ebɔ Yerusalem maŋ lɛ mli bii lɛ kɔkɔ akɛ: “Nyɛkahaa Hezekia miilakaa nyɛ; ejaakɛ enyɛŋ nyɛ ejie.” Yɛ enɛ sɛɛ lɛ, ebɔ mɔdɛŋ akɛ eeelaka mɛi ni boɔ lɛ toi lɛ kɛtsɔ bɔ ni shihilɛ baanyɛ afee aha Yudafoi lɛ yɛ Ashur nɔyeli shishi lɛ he wiemɔ nɔ, ni ekɛɛ: “Nyɛkɛ mi abakpataa ní nyɛjea kpo nyɛbaa miŋɔɔ, koni nyɛteŋ mɔ fɛɛ mɔ aye eweintso kɛ egbamitso yibii, ní nyɛteŋ mɔ fɛɛ mɔ anu enubu mli nu, kɛyashi beyinɔ ní maba ní mabaloo nyɛ kɛya shikpɔŋ ní tamɔ nyɛ diɛŋtsɛ nyɛshikpɔŋ lɛ nɔ, abele kɛ wein shikpɔŋ, aboloo kɛ weintromi ashikpɔŋ ni.”—Yesaia 36:13-17.
12 Yudafoi lɛ kpaŋ ŋmɔshi nii ko kwraa afi nɛɛ—Ashurbii lɛ atutuamɔ lɛ haaa amɛnyɛ amɛdũ nibaanii ko kwraa. Eka shi faŋŋ akɛ mɛi ní boɔ lɛ toi kɛjɛɔ gbogbo lɛ nɔ lɛ baaná gbɛkpamɔ akɛ amɛaaye wein yibii ní ŋɔɔ, ní amɛnu nu hu ní mli ejɔ lɛ he miishɛɛ waa. Shi Rabshake egbeko mɔdɛŋ ní ebɔɔ ní egbɔjɔ Yudafoi lɛ ahekɛnɔfɔɔ lɛ naa lolo.
13, 14. Yɛ Rabshake saji anaataamɔi lɛ fɛɛ sɛɛ lɛ, mɛni hewɔ nɔ ni ba Samaria nɔ lɛ kɔɔɔ Yuda shihilɛ lɛ he eko lɛ?
13 Rabshake kɛ etawuu nii ni ji esane naataamɔ lɛ mli wiemɔ kroko hu tsu nii. Ebɔ Yudafoi lɛ kɔkɔ eshi Hezekia mli hemɔkɛyeli ní amɛaaná, kɛji eeekɛɛ amɛ akɛ: “Yehowa baahere wɔyiwala!” Rabshake kai Yudafoi lɛ akɛ Samaria nyɔŋmɔi lɛ nyɛɛɛ atsĩ Ashurbii lɛ anaa ní amɛkaye akutsei nyɔŋma lɛ anɔ kunim. Ni jeŋmaji krokomɛi ní Ashur eye amɛnɔ kunim lɛ anyɔŋmɔi lɛ hu? Ebi akɛ: “Nɛgbɛ Hamat kɛ Arpad nyɔŋmɔi lɛ yɔɔ? Nɛgbɛ Sefarvaim nyɔŋmɔi lɛ yɔɔ? ani amɛhere Samaria yiwala kɛjɛ midɛŋ?”—Yesaia 36:18-20.
14 Yɛ anɔkwale mli lɛ, Rabshake, ní jáa apasa nyɔŋmɔi lɛ, nuuu shishi akɛ srɔto kpele yɛ Samaria hemɔkɛyeli kwalɔ lɛ kɛ Yerusalem ní yɔɔ Hezekia shishi lɛ teŋ. Samaria apasa nyɔŋmɔi lɛ bɛ hewalɛ ní amɛkɛaahere akutsei nyɔŋma maŋtsɛyeli lɛ yiwala. (2 Maŋtsɛmɛi 17:7, 17, 18) Nɔ ni tamɔɔɔ nakai lɛ, Yerusalem ni yɔɔ Hezekia shishi lɛ ekpoo apasa nyɔŋmɔi lɛ ni eku esɛɛ kɛba Yehowa sɔɔmɔ mli ekoŋŋ. Shi kɛlɛ, Yudafoi lɛ anajiaŋdamɔlɔi etɛ lɛ ebɔɔɔ mɔdɛŋ akɛ amɛaatsɔɔ enɛ mli amɛha Rabshake. “Amɛtswaaa amɛsɛ̃ŋ ni amɛfooo edaaŋ; ejaakɛ maŋtsɛ lɛ kita ji akɛ: Nyɛkafoa edaaŋ!” (Yesaia 36:21) Eliakim, Shebna, kɛ Yoa ku amɛsɛɛ kɛba Hezekia ŋɔɔ ni amɛbabɔ lɛ Rabshake wiemɔi lɛ ahe amaniɛ.—Yesaia 36:22.
Hezekia Fee Yiŋkpɛɛ Ko
15. (a) Mɛɛ yiŋkpɛɛ kã Hezekia hiɛ agbɛnɛ? (b) Yehowa wo ewebii lɛ hewalɛ yɛ mɛɛ gbɛ nɔ?
15 Agbɛnɛ Maŋtsɛ Hezekia yɛ yiŋkpɛɛ ko ní ebaafee. Ani Yerusalem baaŋmɛɛ ehe eha Ashurbii lɛ? ní ekɛ Mizraim afee ekome? aloo ebaahiɛ shidaamɔ ní ekɔ lɛ mli ní ewuu? Hezekia yɛ nɔnyɛɛ kpele shishi. Etsu Eliakim kɛ Shebna, kɛfata osɔfoi lɛ ateŋ onukpai lɛ ahe koni amɛyabi Yehowa nii kɛtsɔ gbalɔ Yesaia nɔ, ni lɛ diɛŋtsɛ hu etee Yehowa sɔlemɔwe lɛ. (Yesaia 37:1, 2) Maŋtsɛ lɛ tsuji ní bumɔ kpekpe lɛ yanina Yesaia ni amɛkɛɛ lɛ akɛ: “Haomɔ kɛ jɛmɔ kɛ heguɔgbee gbi ji ŋmɛnɛ gbi nɛɛ . . . Ekolɛ Yehowa, o-Nyɔŋmɔ lɛ, enu Rabshake, mɔ ni enuntsɔ, Ashur maŋtsɛ lɛ, tsu lɛ ní ebasopa Nyɔŋmɔ hiɛkalɔ lɛ, wiemɔi lɛ, ní ebakã ehiɛ yɛ wiemɔi ní Yehowa, o-Nyɔŋmɔ lɛ, enu lɛ ahewɔ.” (Yesaia 37:3-5) Hɛɛ, Ashurbii lɛ miitswa Nyɔŋmɔ hiɛkalɔ lɛ mpoa! Ani Yehowa baabo amɛ ahorabɔɔ wiemɔi lɛ atoi? Yehowa tsɔ Yesaia nɔ ema nɔ mi kɛha Yudafoi lɛ akɛ: “Kaashe gbeyei yɛ wiemɔi ní onu ní Ashur maŋtsɛ lɛ tsuji lɛ kɛbabɔ musu amɛshi mi lɛ hewɔ. Naa, mikɛ mumɔ ko baawo emli, ni eeenu adafitswaa ko, ni eeeku esɛɛ kɛaatee eshikpɔŋ lɛ nɔ, ni maha enyɔ yɛ klante naa yɛ lɛ diɛŋtsɛ eshikpɔŋ lɛ nɔ.”—Yesaia 37:6, 7.
16. Mɛɛ woji Sanherib kɛtsu kɛba?
16 Beni enɛ yaa nɔ lɛ, aha Rabshake ku esɛɛ kɛtee koni eyafata Sanherib he beni maŋtsɛ lɛ wuɔ ta yɛ Libna lɛ. Sanherib kɛ Yerusalem baagbe naa yɛ sɛɛ mli. (Yesaia 37:8) Shi kɛlɛ, Rabshake sɛɛkuu lɛ haaa nɔnyɛɛ ní kã Hezekia nɔ lɛ naa aba shi. Sanherib kɛ hegbeyeiwoo woji tsu kɛba ni amɛkɛtsɔɔ nɔ ni Yerusalem maŋ lɛ mli bii lɛ baanyɛ amɛkpa gbɛ kɛji amɛŋmɛɛɛ amɛhe amɛhaaa akɛ aye amɛnɔ kunim lɛ: “Bo diɛŋtsɛ onu nii ni Ashur maŋtsɛmɛi lɛ fee shikpɔji lɛ fɛɛ ní amɛfee amɛ musu lɛ, ni bo ni abaahere oyiwala lo? Jeŋmaji lɛ ní mitsɛmɛi lɛ kpata amɛhiɛ lɛ, ani amɛnyɔŋmɔi lɛ here amɛyiwala lo? . . . Nɛgbɛ Hamat maŋtsɛ lɛ kɛ Arpad maŋtsɛ lɛ kɛ Sefarvaim maŋ lɛ kɛ Hena kɛ Iva maŋtsɛ lɛ yɔɔ?” (Yesaia 37:9-13) Nɔ ni Ashurnyo lɛ tsɔɔ kɛkɛ ji akɛ, nilee bɛ mli akɛ aaate shi awo lɛ—shitee-kɛ-woo kɛ naagba babaoo moŋ baaba!
17, 18. (a) Mɛni ji Hezekia yiŋtoo ní ekɛbi Yehowa dɛŋ hebuu lɛ? (b) Te Yehowa tsɔ Yesaia nɔ eha Ashurnyo lɛ hetoo tɛŋŋ?
17 Akɛni nɔ ni baajɛ yiŋkpɛɛ ní eeefee lɛ mli aba lɛ he miihia lɛ waa hewɔ lɛ, Hezekia yagbele Sanherib woji lɛ amli yɛ Yehowa hiɛ yɛ sɔlemɔwe lɛ. (Yesaia 37:14) Ejɛ etsui mli esɔle ekpa Yehowa fai ní ebo Ashurnyo lɛ hegbeyeiwoo wiemɔi lɛ atoi, ni emu esɔlemɔ lɛ naa kɛ wiemɔi nɛɛ, akɛ: “Shi agbɛnɛ, Yehowa, wɔ-Nyɔŋmɔ, miikpao fai, heremɔ wɔyiwala kɛjɛ edɛŋ, koni shikpɔŋ lɛ nɔ maŋtsɛyelii fɛɛ aná ale akɛ bo okome too ji Yehowa!” (Yesaia 37:15-20) Wɔnaa faŋŋ kɛjɛɔ enɛ mli akɛ nɔ ni he hiaa Hezekia fe fɛɛ lɛ jeee lɛ diɛŋtsɛ eyiwalaheremɔ, shi moŋ heguɔgbee ní akɛbaaba Yehowa gbɛi lɛ nɔ kɛji Ashur ye Yerusalem nɔ kunim lɛ.
18 Hetoo ni Yehowa kɛha Hezekia sɔlemɔ lɛ ba kɛtsɔ Yesaia nɔ. Esaaa akɛ Yerusalem ŋmɛɛɔ ehe ehaa Ashur; esa akɛ ehiɛ shidaamɔ ní ekɔ lɛ mli. Beni Yesaia wieɔ tamɔ nɔ ni ekɛ Sanherib miiwie lɛ, ekɛ ekãa jaje Yehowa shɛɛ sane kɛha Ashurnyo lɛ akɛ: “Zion biyoo oblayoo fro lɛ miigbe ohe guɔ, ni eeye ohe fɛo, Yerusalem biyoo lɛ miihoso eyitso yɛ osɛɛ [kɛ hefɛoyeli].” (Yesaia 37:21, 22) Yɛ naagbee lɛ, Yehowa kɛfata he akɛ: ‘Namɔ jio ni obɔɔ Israel Mɔ Krɔŋkrɔŋ lɛ ahora? Mile onitsumɔi lɛ. Okɛ otii wuji emamɔ ohiɛ; oshwãa nibii wuji. Okɛ ohiɛ fɔ̃ɔ asraafoi ahewalɛ ní oyɔɔ lɛ nɔ ni oye shikpɔji babaoo anɔ kunim. Shi ojeee mɔ ni anyɛŋ aye onɔ kunim. Mafite oyiŋtoi lɛ. Maye onɔ kunim. No sɛɛ lɛ, mafee bo tamɔ bɔ ni ofee mɛi krokomɛi lɛ pɛpɛɛpɛ. Mikɛ kpoŋ aaawo ogugɔŋ ni magbala bo kɛku osɛɛ kɛya Ashur!’—Yesaia 37:23-29.
“Enɛ Aaafee Okadi Ahao”
19. Mɛɛ okadi Yehowa kɛha Hezekia, ni mɛni etsɔɔ?
19 Mɛɛ nɔmimaa Hezekia yɔɔ akɛ Yesaia gbalɛ lɛ baaba mli? Yehowa ha hetoo akɛ: “Enɛ aaafee okadi ahao: Afi nɛɛ mli lɛ nyɛaaye nii ní amɛ diɛŋtsɛ amɛkwɛ̃, ni afi ni ji enyɔ lɛ mli hu nyɛaaye nii ní kwɛ̃ yɛ nomɛi asɛɛ lɛ; shi afi ni ji etɛ lɛ mli lɛ nyɛdũa nii ní nyɛkpaa, ní nyɛfea weintromi hu ní nyɛyea emli yibii.” (Yesaia 37:30) Yehowa baaha Yudafoi ní atsĩ amɛnaa lɛ aná niyenii. Eyɛ mli akɛ amɛnyɛɛɛ amɛdũ dumɔwui yɛ Ashurbii lɛ atutuamɔ lɛ hewɔ moŋ, shi amɛbaanyɛ amɛná nii amɛye kɛjɛ afi ní ho lɛ nikpamɔ lɛ shishi kpɛkpɛoyeli mli. No sɛɛ afi, ni ji hejɔɔmɔ afi lɛ, esa akɛ amɛshi amɛshikpɔji lɛ amɛshwie shi ní amɛdũuu nii yɛ nɔ, yɛ amɛ jaramɔ shihilɛ lɛ fɛɛ sɛɛ. (2 Mose 23:11) Yehowa ewo shi akɛ kɛ́ gbɔmɛi lɛ bo egbee toi lɛ, ŋmãa ní fá bɔ ni sa baakwɛ̃ yɛ ŋmɔji lɛ amli ni amɛaana niyenii amɛye. Kɛkɛ lɛ, afi ni nyiɛ sɛɛ lɛ, hii lɛ baadũ dumɔwui tamɔ bɔ ni amɛfɔɔ feemɔ lɛ, ni amɛbaaná amɛdeŋmegbomɔ lɛ mli ŋɔɔmɔ.
20. Mɛi ni baaje Ashurbii lɛ atutuamɔ lɛ mli lɛ “aaatsɛ̃rɛ̃ fãi ekoŋŋ kɛmɔ shi, ni amɛaawo yibii yɛ ŋwɛigbɛ” yɛ mɛɛ gbɛ nɔ?
20 Agbɛnɛ Yehowa kɛ ewebii lɛ to tso ko ní adũ ní anyɛɛɛ afã yɛ gbɛ ni yɔɔ mlɛo nɔ lɛ he, akɛ: “Yuda we lɛ . . . mɛi ní je mli lɛ aaatsɛ̃rɛ̃ fãi ekoŋŋ kɛmɔ shi, ni amɛaawo yibii yɛ ŋwɛigbɛ.” (Yesaia 37:31, 32) Hɛɛ, mɛi ni kɛ amɛhiɛ fɔ̃ɔ Yehowa nɔ lɛ sheŋ nɔ ko kwraa gbeyei. Amɛkɛ amɛshwiei lɛ baahi shi daa yɛ shikpɔŋ lɛ nɔ.
21, 22. (a) Mɛni agba afɔ̃ shi yɛ Sanherib he? (b) Mɛɛ gbɛ nɔ, ni mɛɛ be Yehowa wiemɔi ní kɔɔ Sanherib he lɛ ba mli?
21 Ni Yerusalem he gbeyei ní Ashurbii lɛ woɔ lɛ hu? Yehowa ha hetoo akɛ: “Ebaŋ maŋ nɛŋ ni etsɛ̃ŋ gãi ko kɛbaŋ mli, ni ekɛ tsɛ̃ŋ ko baŋ jɛi, ni asaŋ etswaŋ kpoku ko ewoŋ he! Gbɛ nɔ ní etsɔ kɛba lɛ, no nɔŋŋ nɔ eeetsɔ kɛaatee ekoŋŋ; shi eboteŋ nɛkɛ maŋ nɛɛ mli.” (Yesaia 37:33, 34) Yɛ naagbee lɛ, Ashur kɛ Yerusalem wuŋ ta ko kwraa. Nɔ ni yɔɔ naakpɛɛ ji akɛ, Ashurbii lɛ ji mɛi ní abaaye amɛnɔ kunim kwraa, ní awuuu ta, shi jeee Yudafoi lɛ.
22 Taakɛ Yehowa wie lɛɛlɛŋ lɛ, etsu ŋwɛibɔfo kome ni ebatswia Sanherib asraafoi lɛ ateŋ mɛi ni he esa fe fɛɛ lɛ anii—hii 185,000. Eka shi faŋŋ akɛ enɛ ba yɛ Libna, ni beni Sanherib hiɛ tsɛ̃ɔ leebi lɛ, ena akɛ esraafoi lɛ ahiɛnyiɛlɔi, kɛ asafoiatsɛmɛi, kɛ esraafoi hii kãkãlɔi lɛ fɛɛ egboi. Ekɛ ehiɛgbele lɛ ku esɛɛ kɛtee Ninive, ni enɔ kunim ní aye kɛmɔ shi nɛɛ fɛɛ sɛɛ lɛ, ekɛ kuɛŋtimɔ tee nɔ etuu ehe eha epasa nyɔŋmɔ Nisrok jamɔ lolo. Afii komɛi asɛɛ, beni ejáa Nisrok yɛ esɔlemɔtsu lɛ mli lɛ, Sanherib bihii enyɔ ju shi ni amɛyagbe lɛ. Shi kome ekoŋŋ lɛ, Nisrok ní wala bɛ emli lɛ bɛ hewalɛ ní ekɛaahere eyiwala.—Yesaia 37:35-38.
Awo Hezekia Hemɔkɛyeli Hewalɛ Babaoo Lolo
23. Mɛɛ jaramɔ shihilɛ Hezekia kɛkpe beni Sanherib batutua Yuda klɛŋklɛŋ kwraa lɛ, ni kulɛ mɛni baanyɛ ajɛ jaramɔ shihilɛi nɛɛ amli aba?
23 Aaafee be mli ní Sanherib fã ebatutua Yuda klɛŋklɛŋ kwraa lɛ, Hezekia he baye waa diɛŋtsɛ. Yesaia kɛɛ lɛ akɛ ebaagbo. (Yesaia 38:1) Maŋtsɛ ni eye afii 39 lɛ nijiaŋ je wui kwraa. Jeee lɛ diɛŋtsɛ ehilɛ-kɛhamɔ pɛ kɛkɛ he hiaa lɛ, shi moŋ emaŋbii lɛ awɔsɛɛ hu he miihia lɛ. Yerusalem kɛ Yuda baje oshara ni ji tutuamɔ ní Ashurbii baanyɛ abatutua amɛ lɛ mli. Kɛ́ Hezekia gbó lɛ, namɔ baanyiɛ ta lɛ hiɛ? No mli lɛ, Hezekia bɛ binuu ní baaye esɛɛ akɛ maŋtsɛ. Hezekia kɛ sɔlemɔ ní mli wa waa kpa Yehowa fai ní ena lɛ mɔbɔ.—Yesaia 38:2, 3.
24, 25. (a) Te Yehowa kɛ musuŋtsɔlɛ ha Hezekia sɔlemɔ lɛ hetoo eha tɛŋŋ? (b) Mɛɛ naakpɛɛ nɔ ko Yehowa fee, taakɛ atsɔɔ mli yɛ Yesaia 38:7, 8 lɛ?
24 Yesaia shiko maŋtsɛwe lɛ kpoi lɛ anɔ kɛkɛ ni Yehowa tsu lɛ ekoŋŋ kɛtee maŋtsɛ ní he yeɔ lɛ ŋɔɔ yɛ ehelasaa lɛ nɔ kɛ shɛɛ sane nɛɛ akɛ: “Minu ofaikpamɔ lɛ, ni mina oyaafonui lɛ; naa, maŋɔ afii nyɔŋma kɛ enumɔ mafata ogbii lɛ ahe; ni asaŋ mahere bo kɛ nɛkɛ maŋ nɛɛ yiwala kɛaajɛ Ashur maŋtsɛ lɛ dɛŋ, ni mabu nɛkɛ maŋ nɛɛ he.” (Yesaia 38:4-6; 2 Maŋtsɛmɛi 20:4, 5) Yehowa kɛ okadi ko ní efɔɔɔ kaa baama eshiwoo lɛ nɔ mi, akɛ: “Naa, maha hulu ŋmɛlɛ lɛ nɔ susuma, ní hulu eha enyiɛ yɛ Ahaz hulu ŋmɛlɛ lɛ nɔ lɛ, aku esɛɛ mlijaai nyɔŋma.”—Yesaia 38:7, 8a.
25 Taakɛ Yudafoi ayinɔsaneŋmalɔ Josephus tsɔɔ lɛ, atrakwei komɛi yɛ maŋtsɛ mɔɔ lɛ mli, ni ekolɛ akulashiŋ ko bɛŋkɛ lɛ. Kɛ́ hulu la kpɛ́ eshwie akulashiŋ lɛ nɔ lɛ, ehaa akulashiŋ lɛ susuma shwieɔ atrakwei lɛ anɔ. Anyɛɔ akwɛɔ bɔ ni akulashiŋ lɛ he susuma lɛ kɛlɛ ji yɛ atrakwei lɛ anɔ ni akɛnaa he ni je etsɛre kɛshɛ. Agbɛnɛ, Yehowa baafee naakpɛɛ nii. Kɛ́ susuma lɛ bakã atrakwei lɛ anɔ tamɔ bɔ ni efeɔ daa lɛ, ebaaya esɛɛsɛɛ najifamɔi nyɔŋma. Namɔ enu nɔ ko ní tamɔ nɛkɛ pɛŋ? Biblia lɛ kɛɔ akɛ: “Ni hulu ku esɛɛ mlijaai nyɔŋma ní enyiɛ momo lɛ yɛ hulu ŋmɛlɛ lɛ nɔ.” (Yesaia 38:8b) No sɛɛ be fioo ko lɛ, Hezekia he bawa lɛ kɛjɛ ehela lɛ mli. Enɛ he adafitswaa gbɛ eshwã kɛyashɛ Babilon tɔ̃ɔ. Beni Babilon maŋtsɛ lɛ nu enɛ lɛ, etsu bɔfoi kɛtee Yerusalem koni amɛyatao anɔkwale ní yɔɔ sane lɛ mli.
26. Mɛɛ nɔ kome ko jɛ Hezekia wala ní atsá nɔ aha lɛ lɛ mli?
26 Beni Hezekia he wa lɛ yɛ naakpɛɛ gbɛ nɔ lɛ sɛɛ aaafee afii etɛ ni afɔ́ ekromɔ binuu Manase. Beni Manase da lɛ, ejieee hiɛsɔɔ kpo yɛ Nyɔŋmɔ musuŋtsɔlɛ, ní kɛ jeee no hewɔ kulɛ, afɔɔɔ lɛ lɛ he! Shi moŋ, Manase wala be lɛ babaoo mli lɛ, efee efɔŋ waa diɛŋtsɛ yɛ Yehowa hiɛ.—2 Kronika 32:24; 33:1-6.
Kojomɔ Mli Tɔmɔ Ko
27. Hezekia jie hiɛsɔɔ kpo etsɔɔ Yehowa yɛ mɛɛ gbɛ̀i anɔ?
27 Hezekia ji nuu ni yɔɔ hemɔkɛyeli, tamɔ bɔ ni etsɛ David ji lɛ. Ebuɔ Nyɔŋmɔ Wiemɔ lɛ waa diɛŋtsɛ. Taakɛ Abɛi 25:1 lɛ tsɔɔ lɛ, eto gbɛjianɔ ni abua saji ní wɔnaa amrɔ nɛɛ yɛ Abɛi yitsei 25 kɛyashi 29 lɛ anaa. Mɛi komɛi heɔ yeɔ akɛ lɛ nɔŋŋ ji mɔ ni fo Lala 119 lɛ. Shidaa lala ní kanyaa mɔ ní Hezekia fo beni ehe wa lɛ kɛjɛ ehela lɛ mli lɛ, tsɔɔ akɛ eji nuu ní yɔɔ henumɔi ní mli wa waa diɛŋtsɛ. Emu sane naa akɛ nɔ ni he hiaa fe fɛɛ yɛ shihilɛ mli ji ní wɔnyɛ wɔjie Yehowa yi yɛ E-sɔlemɔwe lɛ “wɔwala gbii fɛɛ.” (Yesaia 38:9-20) Eba akɛ wɔ fɛɛ wɔɔnu he nakai yɛ wɔjamɔ krɔŋŋ lɛ he!
28. Mɛɛ kojomɔ mli tɔmɔ ko Hezekia tɔ̃ yɛ be mli ni atsá lɛ yɛ naakpɛɛ gbɛ nɔ lɛ sɛɛ be ko mli?
28 Eyɛ mli akɛ Hezekia ye anɔkwa moŋ, shi eyeee emuu. Etɔ̃ tɔmɔ ko ní hiɛdɔɔ yɔɔ mli yɛ kojomɔ mli beni Yehowa tsá lɛ lɛ sɛɛ be ko mli. Yesaia tsɔɔ mli akɛ: “Nakai be lɛ mli lɛ Merodak-Baladan, Baladan bi lɛ, ní ji Babel maŋtsɛ lɛ, tsu akɛ woji kɛ nikeenii baha Hezekia; ejaakɛ enu akɛ ehe ye, ni ehe ewa lɛ. Ni Hezekia ná amɛhe tsuijurɔ, ni eŋɔ eshia he ni enibii ní jara wa lɛ yɔɔ lɛ etsɔɔ amɛ, jwiɛtɛi kɛ shika, kɛ tsofa-kɛ-ŋmai kɛ mu ní jara wa, kɛ etawuu nii atsũ lɛ fɛɛ kɛ nibii fɛɛ ní anaa yɛ enitoohei lɛ; nɔ ko nɔ ko bɛ ewe lɛ loo enɔyelihe lɛ ní Hezekia kɛtsɔɔɔ amɛ.”—Yesaia 39:1, 2.b
29. (a) Mɛni ekolɛ no ji jwɛŋmɔ ní Hezekia hiɛ beni ekɛ ejwetrii lɛ tsɔɔ mɛi ní atsu kɛjɛ Babilon kɛba lɛ? (b) Mɛni baajɛ tɔmɔ ní Hezekia tɔ̃ yɛ kojomɔ mli lɛ mli kɛba?
29 Beni Yehowa bɔfo lɛ ye Ashur nɔ kunim kwraa kɛmɔ shi lɛ sɛɛ po lɛ, etee nɔ ewo jeŋmaji babaoo, ní Babilon fata he lɛ ahe gbeyei lolo. Benɛ ekolɛ Hezekia miitao ní esa Babilon maŋtsɛ lɛ hiɛ akɛ mɔ ko ní ebaanyɛ ekɛ lɛ afee kpaŋmɔ wɔsɛɛ. Shi kɛlɛ, Yehowa taooo ní Yuda maŋ lɛ mli bii lɛ kɛ amɛhenyɛlɔi lɛ eko aba gbeekpamɔ ko; eetao ní amɛkɛ amɛhiɛ afɔ̃ enɔ! Yehowa tsɔ gbalɔ Yesaia nɔ ejie nɔ ni baaba wɔsɛɛ lɛ kpo etsɔɔ Hezekia ni ekɛɛ: “Gbii miiba ní aaabaloo nibii fɛɛ ní yɔɔ owe lɛ kɛ nibii ní otsɛmɛi lɛ ebua naa eto kɛbashi ŋmɛnɛ gbi nɛɛ nɔ lɛ kɛaatee Babel; ashiŋ nɔ ko nɔ ko . . . Ni asaŋ obii ní aaajɛ omli ní ooofɔ́ lɛ, aaaŋɔ amɛteŋ mɛi komɛi kɛaatee, ni amɛaatsɔmɔ piafoi yɛ Babel maŋtsɛ lɛ mɔɔ lɛŋ.” (Yesaia 39:3-7) Hɛɛ, yɛ naagbee lɛ nakai jeŋmaŋ pɔtɛɛ ní kulɛ Hezekia taoɔ akɛ esa ehiɛ lɛ baaba ebaloo Yerusalem jwetrii lɛ fɛɛ kɛya ni ebaaba emaŋbii lɛ ashi kɛya nyɔŋyeli mli. Tsɔɔmɔ ní Hezekia kɛ enitoohei lɛ jwetrii lɛ tsɔɔ Babilonbii lɛ tée hiɛkɔɔ henumɔ ní amɛyɔɔ lɛ shi waa.
30. Hezekia jie subaŋ kpakpa kpo yɛ mɛɛ gbɛ nɔ?
30 Eka shi faŋŋ akɛ beni ewieɔ sane ni ba ni ji Hezekia jwetrii ní ekɛtsɔɔ Babilonbii lɛ he lɛ, 2 Kronika 32:26 lɛ kɛɔ akɛ: “Hezekia ba ehe shi yɛ etsuiŋ hewoo lɛ hewɔ, lɛ kɛ Yerusalembii lɛ fɛɛ; ni Yehowa mlifu lɛ baaa amɛnɔ yɛ Hezekia gbii lɛ amli.”
31. Te nibii yagbe naa eha tɛŋŋ kɛha Hezekia, ni mɛni enɛ tsɔɔ wɔ ŋmɛnɛ?
31 Yɛ emuu ní eyeee lɛ fɛɛ sɛɛ lɛ, Hezekia ji nuu ni yɔɔ hemɔkɛyeli. Ele akɛ e-Nyɔŋmɔ, Yehowa, ji mɔ ní yɔɔ diɛŋtsɛ, ní yɔɔ henumɔi hu. Beni Hezekia yaje nɔnyɛɛ shishi lɛ, ekɛ ekãa sɔle eha Yehowa, ni Yehowa ha lɛ hetoo. Yehowa Nyɔŋmɔ ha ená toiŋjɔlɛ yɛ ewala gbii ní eshwɛ lɛ fɛɛ mli, ni Hezekia da shi waa yɛ enɛ he. (Yesaia 39:8) Esa akɛ Yehowa afee mɔ ni yɔɔ diɛŋtsɛ nakai nɔŋŋ kɛha wɔ hu ŋmɛnɛ. Kɛ́ naagbai te shi lɛ, eba akɛ wɔkɛ wɔhiɛ baafɔ̃ Yehowa nɔ kɛha nilee kɛ gbɛ ní wɔɔtsɔ nɔ wɔtsu he nii, taakɛ Hezekia fee lɛ, ejaakɛ “[ehaa] mɛi fɛɛ faa ni ewieee mɔ ko hiɛ.” (Yakobo 1:5) Kɛ́ wɔtee nɔ wɔŋmɛ wɔtsui shi ní wɔná hemɔkɛyeli yɛ Yehowa mli lɛ, no lɛ wɔbaanyɛ wɔná nɔmimaa akɛ ebaatsɔ “mɛi ni taoɔ esɛɛgbɛ lɛ anyɔmɔwolɔ,” amrɔ nɛɛ kɛ wɔsɛɛ be mli hu.—Hebribii 11:6.
[Shishigbɛ niŋmai]
a Ejara wa fe (U.S.) dɔlai akpekpei 9.5 yɛ bɔ ni ejara ji amrɔ nɛɛ naa.
b Yɛ Sanherib nɔ kunimyeli lɛ sɛɛ lɛ, jeŋmaji ní ebɔle amɛ kɛkpe lɛ kɛ nikeenii ni ji shika, jwiɛtɛi, kɛ nibii krokomɛi ní jara wa baha Hezekia. Wɔkaneɔ yɛ 2 Kronika 32:22, 23, 27 lɛ akɛ “Hezekia ná nii kɛ anunyam babaoo diɛŋtsɛ” ni no ha “awó enɔ yɛ jeŋmaji lɛ fɛɛ ahiɛ.” Ekolɛ nɛkɛ nikeenii ní akɛba nɛɛ ha enyɛ ená nibii ekɛwo enibii ní jara wa lɛ atoohe lɛ, ní ejie emli nibii lɛ fɛɛ beni etsu onia eha Ashurbii lɛ obɔ̃ ekoŋŋ.
[Mfoniri ni yɔɔ baafa 383]
Maŋtsɛ Hezekia kɛ ehe fɔ̃ Yehowa nɔ beni ekɛ Ashur nyɛmɔ lɛ kpe lɛ
[[Baafa muu mfoniri ni yɔɔ baafa 384]
[Mfoniri ni yɔɔ baafa 389]
Maŋtsɛ lɛ tsu najiaŋdamɔlɔi kɛtee Yesaia ŋɔɔ koni amɛyabo Yehowa ŋaawoo toi
[Mfoniri ni yɔɔ baafa 390]
Hezekia sɔle ní awó Yehowa gbɛi lɛ nɔ gojoo kɛtsɔ Ashur nɔ kunimyeli nɔ
[Mfoniri ni yɔɔ baafa 393]
Yehowa bɔfo gbe Ashurbii 185,000