“Jeŋmaji Fɛɛ Asɔlemɔwe”
“Ani aŋmako akɛ: ‘Aaatsɛ miwe lɛ jeŋmaji fɛɛ asɔlemɔwe’?”—MARKO 11:17.
1. Mɛɛ wekukpaa Adam kɛ Hawa na mli ŋɔɔmɔ kɛjɛ shishijee yɛ amɛkɛ Nyɔŋmɔ teŋ?
BENI abɔ Adam kɛ Hawa lɛ, amɛkɛ amɛ ŋwɛi Tsɛ lɛ na wekukpaa ni bɛŋkɛ kpaakpa mli ŋɔɔmɔ. Yehowa Nyɔŋmɔ kɛ amɛ wie ni etsɔɔ amɛ eyiŋtoo ni yɔɔ nyam kɛha adesai aweku lɛ. Eka shi faŋŋ akɛ bei pii lɛ, enɛ tsirɛɔ amɛ ni amɛjieɔ Yehowa yi babaoo yɛ edebɔɔ nitsumɔi ni yɔɔ nyam lɛ ahewɔ. Kɛji gbɛtsɔɔmɔ he miihia Adam kɛ Hawa, yɛ be mli ni amɛsusuɔ amɛ gbɛhe akɛ tsɛ kɛ nyɛ ni amɛaatsɔmɔ wɔsɛɛ kɛha adesai aweku lɛ he lɛ, amɛbaanyɛ amɛbɛŋkɛ Nyɔŋmɔ kɛjɛ amɛ Paradeiso shia lɛ mli he fɛɛ he ni amɛyɔɔ. Osɔfo sɔɔmɔ yɛ sɔlemɔtsu mli he ehiaaa amɛ.—1 Mose 1:28.
2. Mɛɛ tsakemɔ ba beni Adam kɛ Hawa fee esha lɛ?
2 Shihilɛ lɛ tsake beni ŋwɛibɔfo atuatselɔ ko laka Hawa ni eha esusu akɛ kɛji ekpoo Yehowa nɔyeli lɛ, no baaha eshihilɛ ahi jogbaŋŋ kɛha lɛ, ni ekɛɛ yoo lɛ akɛ eeetsɔ “tamɔ Nyɔŋmɔ.” No hewɔ lɛ, Hawa ye tso yibii ni Nyɔŋmɔ ewo amɛ mla akɛ amɛkaye eyibii lɛ. Kɛkɛ ni Satan kɛ Hawa tsu nii, ni ekɛka ewu. Dɔlɛ sane ji akɛ, Adam bo eŋa eshafeelɔ lɛ toi, ni ekɛ nakai feemɔ tsɔɔ akɛ ebuɔ ekɛ yoo lɛ teŋ wekukpaa lɛ babaoo fe ekɛ Nyɔŋmɔ teŋ wekukpaa. (1 Mose 3:4-7) Nɔ ni enɛ kɛba ji akɛ, Adam kɛ Hawa hala Satan akɛ amɛ nyɔŋmɔ.—Okɛto 2 Korintobii 4:4 he.
3. Mɛɛ nibii fɔji jɛ Adam kɛ Hawa atuatsemɔ lɛ mli kɛba?
3 Yɛ enɛ ni amɛfee lɛ hewɔ lɛ, jeee akɛ klɛŋklɛŋ adesai enyɔ lɛ laaje amɛkɛ Nyɔŋmɔ teŋ wekukpaa ni jara wa lɛ kɛkɛ, shi moŋ amɛlaaje gbɛkpamɔ akɛ amɛaahi shi kɛya naanɔ yɛ paradeiso shikpɔŋ nɔ lɛ hu. (1 Mose 2:16, 17) Yɛ naagbee lɛ amɛgbɔmɔtsei ni esha eba mli lɛ fite aahu kɛyashi amɛgboi. Amɛkɛ nɛkɛ esha shihilɛ nɛɛ fɔ amɛshwiei. “Ni,” taakɛ Biblia lɛ tsɔɔ mli lɛ, “no ha gbele lɛ tsɛŋe gbɔmɛi fɛɛ.”—Romabii 5:12.
4. Mɛɛ hiɛnɔkamɔ Nyɔŋmɔ kɛha adesai eshafeelɔi?
4 Ehe bahia ni ana nɔ ko ni baasaa adesai eshafeelɔi kɛ amɛ-Bɔlɔ krɔŋkrɔŋ lɛ teŋ. Beni ekojoɔ Adam kɛ Hawa lɛ, Nyɔŋmɔ ha amɛshwiei ni amɛbaana wɔsɛɛ lɛ hiɛnɔkamɔ kɛtsɔ “seshi” ni baahere adesai kɛjɛ nibii ni Satan atuatsemɔ lɛ kɛba lɛ mli lɛ he shiwoo ni ekɛha lɛ nɔ. (1 Mose 3:15) Sɛɛ mli lɛ, Nyɔŋmɔ jie lɛ kpo akɛ Seshi ni kɛ jɔɔmɔ baaba nɛɛ baaba kɛtsɔ Abraham nɔ. (1 Mose 22:18) Yɛ yiŋtoo ni tsɔɔ suɔmɔ ni yɔɔ ejwɛŋmɔ mli nɛɛ hewɔ lɛ, Nyɔŋmɔ hala Abraham seshibii, Israelbii lɛ, ni amɛbafee emaŋ ni ehala.
5. Mɛni hewɔ esa akɛ wɔna Mla kpaŋmɔ ni Nyɔŋmɔ kɛ Israel fee lɛ mli nibii ahe miishɛɛ?
5 Afi 1513 D.Ŋ.B. lɛ, Israelbii lɛ kɛ Nyɔŋmɔ bote kpaŋmɔ wekukpaa mli, ni amɛkpɛlɛ nɔ akɛ amɛbaabo emlai atoi. Esa akɛ mɛi fɛɛ ni miisumɔ ni amɛja Nyɔŋmɔ ŋmɛnɛ lɛ, ana nakai Mla kpaŋmɔ lɛ he miishɛɛ waa, ejaakɛ egbala jwɛŋmɔ kɛtee shiwoo Seshi lɛ nɔ. Paulo wie akɛ ehiɛ “nii kpakpai ni baaba lɛ asusuma.” (Hebribii 10:1) Beni Paulo wie wiemɔ nɛɛ, no mli lɛ eewie sɔɔmɔ ni Israel osɔfoi sɔmɔɔ yɛ kpee buu, loo jamɔ buu ni anyɛɔ ajieɔ lɛ mli lɛ he. Atsɛ lɛ akɛ “Yehowa sɔlemɔtsu” loo “Yehowa we.” (1 Samuel 1:9, 24) Kɛ wɔpɛi sɔɔmɔ krɔŋŋ ni akɛha yɛ Yehowa shikpɔŋ nɔ shia lɛ mli lɛ, ebaaha wɔnu gbɛjianɔtoo ni tsɔɔ mɔbɔnalɛ, ni adesai eshafeelɔi baanyɛ atsɔ nɔ, ni asaa amɛkɛ Nyɔŋmɔ teŋ ŋmɛnɛ lɛ shishi jogbaŋŋ kɛmɔ shi.
He Krɔŋkrɔŋ Fe Fɛɛ
6. Mɛni akɛma He Krɔŋkrɔŋ Fe Fɛɛ lɛ, ni mɛni akɛfee jɛmɛ ni Nyɔŋmɔ yɔɔ lɛ he mfoniri?
6 “Ŋwɛinyo lɛ, ehiii tsũi ni akɛ niji fee lɛ amli,” taakɛ Biblia lɛ kɛɔ lɛ. (Bɔfoi lɛ Asaji 7:48) Shi kɛlɛ, atatu ko ni yɔɔ tsu ni yɔɔ mligbɛ fe fɛɛ, ni atsɛɔ jɛmɛ He Krɔŋkrɔŋ Fe Fɛɛ lɛ mli lɛ, damɔɔ shi kɛhaa Nyɔŋmɔ shikpɔŋ nɔ tsu nɛɛ mli ni eyɔɔ. (3 Mose 16:2) Eka shi faŋŋ akɛ, atatu nɛɛ kpɛɔ waa, ni ehaa He Krɔŋkrɔŋ Fe Fɛɛ lɛ tseɔ. Eyɛ adeka krɔŋkrɔŋ ko ni atsɛɔ lɛ “odaseyeli adeka,” ni tɛ taoi ni aŋmala Nyɔŋmɔ kitai ni ekɛha Israel lɛ ekomɛi yɛ nɔ lɛ yɔɔ mli lɛ yiteŋ. Shika kerubim enyɔ ni egbɛ amɛfiji amli yɛ Adeka lɛ naa nɔ̃ lɛ yiteŋ, ni amɛfeɔ mumɔŋ bɔɔ nii ni nɔ kwɔlɔ yɛ Nyɔŋmɔ ŋwɛi gbɛjianɔtoo lɛ mli lɛ ahe mfoniri. Naakpɛɛ atatu ni haa la kpɛmɔ nɛɛ yɛ adeka lɛ naa nɔ̃ lɛ yiteŋ yɛ kerubim enyɔ lɛ ateŋ. (2 Mose 25:22) Enɛ feɔ bɔ ni Nyɔŋmɔ Ofe lɛ ta maŋtsɛsɛi nɔ yɛ ŋwɛi shwiili mli, ni kerubim hiɛkalɔi tere lɛ lɛ he mfoniri. (1 Kronika 28:18) Etsɔɔ nɔ hewɔ ni Maŋtsɛ Hezekia sɔle akɛ: “Yehowa Zebaot, Israel Nyɔŋmɔ, bo ni ohiɔ kerubim anɔ” lɛ mli.—Yesaia 37:16.
He Krɔŋkrɔŋ Lɛ
7. Mɛɛ nibii yɔɔ He Krɔŋkrɔŋ lɛ?
7 Atsɛɔ kpee buu lɛ tsu ni ji enyɔ ni yɔɔ mli lɛ akɛ He Krɔŋkrɔŋ lɛ. Kanetso fɛfɛo ko ni hiɛ niji kpawo ma tsu nɛɛ mli, kɛmiiya shinaa lɛ abɛkugbɛ, ni okpɔlɔ ni hiɛmaa aboloo yɔɔ nɔ hu yɛ ninejurɔ gbɛ. Kɛ otee ohiɛ tɛɛ hu lɛ, afɔleshaa latɛ ko ma jɛmɛ, ni tsofa-kɛ-ŋma ni ashãa yɛ nɔ lɛ ŋmajee teɔ shi kɛyaa ŋwɛigbɛ. Ema muhɔɔ ni gbálaa He Krɔŋkrɔŋ lɛ kɛ He Krɔŋkrɔŋ Fe Fɛɛ lɛ mli lɛ hiɛ.
8. Mɛɛ nitsumɔi osɔfoi lɛ yatsuɔ daa yɛ He Krɔŋkrɔŋ lɛ?
8 Daa leebi kɛ daa gbɛkɛ lɛ, esa akɛ osɔfo ko abote kpee buu lɛ mli ni eyasha tsofa-kɛ-ŋma yɛ tsofa-kɛ-ŋma shãa latɛ lɛ nɔ. (2 Mose 30:7, 8) Leebi mli, beni tsofa-kɛ-ŋma lɛ shãa lɛ, esa akɛ akɛ mu awo kanei kpawo ni mamɔ shika kanetso lɛ nɔ lɛ amli. Gbɛkɛ mli lɛ, esa akɛ asu kanei nɛɛ koni amɛkpɛ He Krɔŋkrɔŋ lɛ. Daa Hejɔɔmɔ Gbi lɛ, esa akɛ osɔfo kɛ abolooi heei 12 ashwie hiɛmaa aboloo okpɔlɔ lɛ nɔ.—3 Mose 24:4-8.
Kpo lɛ Nɔ
9. Mɛɛ yiŋtoo he nii lalakã kɛ nu lɛ tsuɔ, ni mɛni wɔbaanyɛ wɔkase kɛjɛ enɛ mli?
9 Kpee buu lɛ hu yɛ ekpo nɔ, ni akɛ buu mamai efo he fɛɛ kɛkpe. Lalakã agbo ko yɛ kpo nɛɛ nɔ, ni osɔfoi lɛ fɔɔ amɛniji kɛ amɛnaji ahe yɛ jɛmɛ dani amɛboteɔ He Krɔŋkrɔŋ lɛ. Esa akɛ amɛfɔflɔ amɛhe hu dani amɛyasha afɔlei yɛ afɔleshaa latɛ ni ma kpo lɛ nɔ lɛ nɔ. (2 Mose 30:18-21) Nɛkɛ hetsemɔ he taomɔ nii nɛɛ feɔ kaimɔ nɔ ni mli wa kɛha Nyɔŋmɔ tsuji ŋmɛnɛ, akɛ esa akɛ amɛbɔ mɔdɛŋ ni amɛhiɛ gbɔmɔtso, jeŋba, jwɛŋmɔŋ, kɛ mumɔŋ hetsemɔ mli kɛji amɛmiitao ni Nyɔŋmɔ akpɛlɛ amɛjamɔ lɛ nɔ. (2 Korintobii 7:1) Yɛ be ko sɛɛ lɛ, aha sɔlemɔwe nyɔji ni jeee Israelbii yalɛ lai kɛha afɔleshaa latɛ lɛ nɔ la lɛ, ni amɛtee faaŋ amɛwo lalakã lɛ hu mli.—Yoshua 9:27.
10. Mɛni ji afɔlei ni ashaa yɛ afɔleshaa latɛ lɛ nɔ lɛ ekomɛi?
10 Daa leebi kɛ daa gbɛkɛ lɛ, ashãa too gwantɛŋ bi yɛ afɔleshaa latɛ lɛ nɔ afataa ŋmaa kɛ wein afɔle he. (2 Mose 29:38-41) Ashãa afɔlei krokomɛi yɛ gbii krɛdɛɛi komɛi anɔ. Bei komɛi lɛ ehe hiaa ni asha afɔle yɛ mɔ ko he esha pɔtɛɛ ko hewɔ. (3 Mose 5:5, 6) Yɛ bei krokomɛi amli hu lɛ, Israelnyo baanyɛ ajɛ esuɔmɔ mli ebaha niyenii afɔle, ni osɔfoi lɛ kɛ mɔ ni kɛ afɔleshaa nii lɛ ba lɛ yeɔ afɔle nɛɛ fãi komɛi. Enɛ tsɔɔ akɛ adesai eshafeelɔi baanyɛ ana amɛkɛ Nyɔŋmɔ teŋ toiŋjɔlɛ, ni kɛ wɔɔkɛɛ lɛ, amɛkɛ lɛ aye nii po. Gbɔ ni yɔɔ maŋ lɛ mli po baanyɛ atsɔ Yehowa jalɔ, ni ebaana hegbɛ akɛ ekɛ afɔleshaa nii ni jɛ esuɔmɔ mli aaaha yɛ E-we lɛ. Shi osɔfoi lɛ kpɛlɛɔ afɔleshaa nibii ni hi fe fɛɛ pɛ nɔ, bɔni afee ni no kɛ woo ni sa Yehowa lɛ aha lɛ. Esa akɛ awiɛ ŋmaa mamu ni akɛbaasha afɔle lɛ ni aha ebo jogbaŋŋ, ni esaaa ni kpa ko hiɔ kooloi ni akɛbaasha afɔle lɛ eko he.—3 Mose 2:1; 22:18-20; Maleaki 1:6-8.
11. (a) Mɛni akɛ kooloi ni akɛshaa afɔle lɛ ala feɔ, ni mɛni enɛ tsɔɔ? (b) Mɛni ji Nyɔŋmɔ susumɔ yɛ adesai kɛ kooloi fɛɛ ala he?
11 Akɛ kooloi ni akɛsha afɔle nɛɛ ala bashwieɔ afɔleshaa latɛ lɛ nɔ. Enɛ bafee daa gbi kaimɔ nɔ kɛha maŋ lɛ akɛ eshafeelɔi ji amɛ, ni no hewɔ lɛ ehe miihia ni amɛna kpɔlɔ, ni ela ni eeefɔse eshwie shi lɛ baanyɛ ajie amɛhe eshai lɛ daa, ni ehere amɛ yiwala kɛjɛ gbele mli. (Romabii 7:24, 25; Galatabii 3:24; okɛto Hebribii 10:3 he.) Nɛkɛ la kɛ nitsumɔ yɛ gbɛ krɔŋkrɔŋ nɔ nɛɛ hu kai Israelbii lɛ akɛ la damɔ shi kɛha wala, ni wala lɛ, Nyɔŋmɔ nɔ ni. Nyɔŋmɔ egu la ni adesai kɛaatsu nii yɛ gbɛ kroko nɔ lɛ yɛ bei fɛɛ mli.—1 Mose 9:4; 3 Mose 17:10-12; Bɔfoi lɛ Asaji 15:28, 29.
Kpatamɔ Gbi Lɛ
12, 13. (a) Mɛni ji Kpatamɔ Gbi lɛ? (b) Dani osɔfonukpa lɛ baanyɛ ekɛ lá aya He Krɔŋkrɔŋ Fe Fɛɛ lɛ, mɛni esa akɛ efee?
12 Daa afi lɛ, esa akɛ Israel maŋ muu lɛ fɛɛ, kɛ gbɔi ni ebahi amɛteŋ ni amɛjaa Yehowa lɛ, akatsu nitsumɔ ko kwraa ni amɛhi ŋmaa hu, gbi kome, yɛ nɔ ni atsɛɔ lɛ Kpatamɔ Gbi lɛ nɔ. (3 Mose 16:29, 30) Atsuuɔ maŋ lɛ he kɛjɛɔ esha mli yɛ mfoniri feemɔŋ yɛ gbi ni he hiaa nɛɛ nɔ, koni amɛna amɛkɛ Nyɔŋmɔ teŋ toiŋjɔlɛ shihilɛ mli ŋɔɔmɔ afi kroko hu. Nyɛhaa wɔfea nifeemɔ nɛɛ he mfoniri ni wɔsusua emli otii lɛ ekomɛi ahe wɔkwɛa.
13 Osɔfonukpa lɛ eba kpee buu lɛ kpo lɛ nɔ. Akɛni efɔflɔ ehe kɛ nu ni yɔɔ lalakã lɛ mli lɛ egbe naa hewɔ lɛ, egbe tsina nuu kɛha afɔleshaa. Afɔse tsina nuu lɛ la awo kã mli; akɛbaatsu nii yɛ gbɛ krɛdɛɛ nɔ ni akɛkpata aha Levi osɔfoi aweku lɛ he eshai. (3 Mose 16:4, 6, 11) Shi dani eeeya nɔ kɛ afɔleshaa lɛ, nɔ ko yɛ ni esa akɛ osɔfonukpa lɛ afee. Elooɔ tsofa-kɛ-ŋma (ekolɛ ekɛwoɔ ato mli), kɛ ŋãi la ni etsɛ̃ waa ni jɛ afɔleshaa latɛ lɛ nɔ hu yɛ la ŋɛsu mli. Agbɛnɛ ebaabote He Krɔŋkrɔŋ lɛ ni ebaanyiɛ kɛya He Krɔŋkrɔŋ Fe Fɛɛ lɛ muhɔɔ lɛ he. Enyiɛɔ blɛoo kɛtsɔɔ muhɔɔ lɛ he ni eyadamɔɔ kpaŋmɔ adeka lɛ hiɛ. No sɛɛ lɛ, yɛ he ni etee ni adesa ko kwraa enaaa lɛ nɛɛ, efɔseɔ tsofa-kɛ-ŋma eshwieɔ ŋãi la lɛ nɔ, ni He Krɔŋkrɔŋ Fe Fɛɛ lɛ yiɔ obɔ kɛ lasu ni jeɔ ŋma.—3 Mose 16:12, 13.
14. Mɛni hewɔ esa akɛ osɔfonukpa lɛ abote He Krɔŋkrɔŋ Fe Fɛɛ lɛ kɛ kooloi sɔrɔtoi enyɔ ala?
14 Agbɛnɛ Nyɔŋmɔ miisumɔ ni ejie mɔbɔnalɛ kpo, ni akpatã lɛ yɛ mfoniri feemɔ gbɛ nɔ. Enɛ hewɔ lɛ atsɛɔ Adeka lɛ naa nɔ̃ lɛ akɛ “mɔbɔnalɛ sɛ̃i” loo “kpatamɔ nɔ lɛ naa nɔ̃.” (Hebribii 9:5, NW, shishigbɛ niŋmaa) Osɔfonukpa lɛ jeɔ kpo kɛjɛɔ He Krɔŋkrɔŋ Fe Fɛɛ lɛ, ni ebawoɔ tsina nuu lɛ la lɛ, ni esaa aboteɔ He Krɔŋkrɔŋ Fe Fɛɛ lɛ ekoŋŋ. Taakɛ awo kita yɛ Mla lɛ mli lɛ, ekɛ ewao baatsɔ la lɛ mli ni ekɛbaashwã Adeka lɛ naa nɔ̃ lɛ hiɛ gbɛ shii kpawo. (3 Mose 16:14) No sɛɛ lɛ ekuɔ esɛɛ kɛyaa kpo lɛ nɔ ni eyagbeɔ too kpakpo, ni ji eshai afɔleshaa, nɔ “ni ji maŋ lɛ nɔ lɛ.” Ekɛ too kpakpo lɛ la lɛ eko baa He Krɔŋkrɔŋ Fe Fɛɛ lɛ ni ekɛfeɔ nɔ ni ekɛ tsina nuu lɛ la fee lɛ nɔŋŋ pɛpɛɛpɛ. (3 Mose 16:15) Atsuɔ sɔɔmɔi krokomɛi ni he hiaa ahe nii yɛ Kpatamɔ Gbi lɛ nɔ. Akɛ nɔkwɛmɔ nɔ lɛ, esa akɛ osɔfonukpa lɛ kɛ eniji ashwie too kpakpo ni ji enyɔ yiteŋ ni ejaje “Israelbii lɛ anɔtɔmɔi lɛ fɛɛ” eshwie eyiteŋ. No sɛɛ lɛ akɛ too kpakpo hiɛkalɔ nɛɛ baaya ŋa lɛ nɔ koni etere maŋ lɛ he eshai kɛya yɛ mfoniri feemɔŋ shishinumɔ naa. Nɛkɛ gbɛ nɔ etsɔɔ ekpataa “ehaa osɔfoi lɛ kɛ maŋ muu lɛ fɛɛ” daa afi.—3 Mose 16:16, 21, 22, 33.
15. (a) Salomo sɔlemɔtsu lɛ je kpee buu lɛ yɛ mɛɛ gbɛ nɔ? (b) Mɛni Hebribii awolo lɛ kɛɔ yɛ sɔɔmɔ krɔŋŋ ni atsuɔ he nii yɛ kpee buu lɛ mli kɛ sɔlemɔtsu lɛ hu mli lɛ fɛɛ he?
15 Yɛ Israel yinɔsane mli klɛŋklɛŋ afii 486 ni ekɛhi shi akɛ Nyɔŋmɔ webii ni ekɛ amɛ efee kpaŋmɔ lɛ mli lɛ, amɛkɛ kpee buu ni anyɛɔ ajieɔ tsu nii akɛ he ni amɛjaa amɛ-Nyɔŋmɔ, Yehowa yɛ. Kɛkɛ ni, aha Salomo ni jɛ Israel lɛ hegbɛ akɛ ema tsu ni baahi shi daa. Eyɛ mli akɛ sɔlemɔtsu nɛɛ baada ni abaasaa mli jogbaŋŋ diɛŋtsɛ moŋ, shi ehe gbɛjianɔtoo ni ajɛ ŋwɛi akɛha lɛ nyiɛ kpee buu lɛ he gbɛjianɔtoo lɛ sɛɛ pɛpɛɛpɛ. Taakɛ kpee buu lɛ ji lɛ, efeɔ jamɔ gbɛjianɔtoo ni nɔ kwɔ fe no, ni mɔɔ shi jogbaŋŋ, ni Yehowa “diɛŋtsɛ shi jeee gbɔmɔ ko” kɛbaama shi lɛ he mfoniri.—Hebribii 8:2, 5; 9:9, 11.
Klɛŋklɛŋ Sɔlemɔtsu lɛ kɛ Nɔ ni Ji Enyɔ Lɛ
16. (a) Mɛɛ nibimɔ ni jɛ suɔmɔ mli Salomo kɛfata he beni ejɔɔ sɔlemɔtsu lɛ nɔ lɛ? (b) Yehowa tsɔɔ akɛ ekpɛlɛ Salomo sɔlemɔ lɛ nɔ yɛ mɛɛ gbɛ nɔ?
16 Beni Salomo jɔɔ nakai sɔlemɔtsu ni yɔɔ nyam lɛ nɔ lɛ, ekɛ nibimɔ ni jɛ mumɔŋ nɛɛ fata he akɛ: “Ni gbɔ tete ni jɛɛɛ omaŋ Israelbii lɛ ateŋ, shi moŋ ogbɛi kpeteŋkpele lɛ . . . hewɔ ejɛ maŋsɛɛ shɔŋŋ eba lɛ, kɛ eba ni ebasɔle yɛ nɛkɛ shia nɛɛ hiɛ lɛ: no lɛ bo lɛ toi yɛ ŋwɛi ni ji oshihilɛ he lɛ, ni ofee nɔ fɛɛ nɔ ni gbɔ lɛ boɔ tsɛɔo yɛ hewɔ lɛ, beni afee ni shikpɔŋ lɛ nɔ majimaji fɛɛ ale ogbɛi lɛ, koni amɛsheo gbeyei tamɔ omaŋ Israel, ni amɛsaa amɛna amɛle akɛ ogbɛi aŋɔwo nɛkɛ shia ni mima nɛɛ.” (2 Kronika 6:32, 33) Nyɔŋmɔ tsɔɔ akɛ ekpɛlɛ Salomo sɔlemɔ ni ekɛjɔɔ tsu nɛɛ nɔ lɛ nɔ, yɛ gbɛ ni yɔɔ faŋŋ nɔ. Lalilɛi jɛ ŋwɛi bagbee shi ni eshã kooloi afɔleshaai ni jwere afɔleshaa latɛ lɛ nɔ lɛ, ni Yehowa anunyam lɛ yi sɔlemɔwe lɛ obɔ.—2 Kronika 7:1-3.
17. Yɛ naagbee lɛ, mɛni ba sɔlemɔtsu ni Salomo ma lɛ nɔ, ni mɛni hewɔ?
17 Dɔlɛ sane ji akɛ, Israelbii lɛ laaje Yehowa gbeyeishemɔ kpakpa ni amɛyɔɔ lɛ. Yɛ be ko sɛɛ lɛ, amɛbule egbɛi kpeteŋkpele lɛ kɛtsɔ lashishwiemɔ, wɔŋjamɔ, gbalafitemɔ, mɔ kɛ ewekunyo bɔlɛnamɔ, kɛ agbɛnɛ awusãi, okulafoi, kɛ gbɔi aniseniianifeemɔ nɔ. (Ezekiel 22:2, 3, 7, 11, 12, 26, 29) Enɛ hewɔ lɛ, Nyɔŋmɔ ha Babilon asraafoi ba ni amɛbakpata sɔlemɔwe lɛ hiɛ, yɛ afi 607 D.Ŋ.B., ni ekɛtsu kojomɔ he nii. Aŋɔ Israelbii ni yi na wala lɛ nom kɛtee Babilon.
18. Mɛɛ hegbɛi hii komɛi ni jeee Israelbii, shi amɛjɛ amɛtsui muu fɛɛ mli amɛfi Yehowa jamɔ sɛɛ lɛ ná yɛ sɔlemɔtsu ni ji enyɔ lɛ mli?
18 Afii 70 sɛɛ lɛ, Yudafoi shwɛɛnii ni shwa amɛhe lɛ ku amɛsɛɛ kɛba Yerusalem ni aha amɛ hegbɛ akɛ amɛsaa amɛma Yehowa sɔlemɔtsu lɛ ekoŋŋ. Nɔ ni sa kadimɔ ji akɛ, no mli lɛ anaaa osɔfoi kɛ Levibii ni fa ni baasɔmɔ yɛ sɔlemɔtsu ni ji enyɔ nɛɛ mli. Enɛ hewɔ lɛ, aha Nethinim, ni ji sɔlemɔwe tsuji ni jeee Israelbii ji amɛ lɛ aseshibii lɛ hegbɛi ni nɔ kwɔlɔ akɛ sɔɔlɔi yɛ Nyɔŋmɔ we lɛ. Shi kɛlɛ, no haaa amɛtsɔmɔ mɛi ni kɛ osɔfoi kɛ Levibii lɛ yeɔ egbɔ kɔkɔɔkɔ.—Ezra 7:24; 8:17, 20.
19. Mɛɛ shiwoo Nyɔŋmɔ kɛha yɛ sɔlemɔtsu ni ji enyɔ lɛ he, ni mɛɛ gbɛ nɔ wiemɔi nɛɛ ba mli anɔkwale yɛ?
19 Kɛjɛ shishijee lɛ, kulɛ ebafee tamɔ nɔ ni sɔlemɔtsu ni ji enyɔ lɛ shɛŋ nɔ ko kwraa kɛ akɛto tsutsu nɔ lɛ he. (Hagai 2:3) Shi Yehowa wo shi akɛ: “Mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ . . . Shia nɛɛ sɛɛkpee anunyam lɛ aaada fe tsutsu nɔ lɛ.” (Hagai 2:7, 9) Lɛlɛŋ, taakɛ agba afɔ̃ shi lɛ, sɔlemɔtsu ni ji enyɔ lɛ ná anunyam kpele. Ehi shi etsɛ fe klɛŋklɛŋ nɔ lɛ kɛ afii 164 sɔŋŋ, ni Nyɔŋmɔ jálɔi babaoo ni jɛ shikpɔji babaoo nɔ ke yuu kɛba ekpo lɛ nɔ. (Okɛto Bɔfoi lɛ Asaji 2:5-11 he.) Sɔlemɔtsu ni ji enyɔ lɛ saamɔ je shishi yɛ Maŋtsɛ Herode gbii lɛ amli, ni alɛɛ ekpoi lɛ amli. Akɛni ema shishitoo tɛ agbo ko nɔ, ni akɛ akulashiŋi fɛfɛji efo he fɛɛ kɛkpe hewɔ lɛ, enyɛɔ ekɛ klɛŋklɛŋ sɔlemɔtsu ni Salomo ma lɛ yeɔ egbɔ yɛ efɛo mli. Eyɛ kpo teŋ agbo yɛ agbo lɛ naa kɛha jeŋmajiaŋbii ni taoɔ amɛja Yehowa lɛ. Tɛ afabaŋ ko foɔ nɛkɛ Jeŋmajiaŋbii Akpo nɛɛ kɛ mli gbɛ kpo ni ato aha Israelbii pɛ lɛ teŋ.
20. (a) Mɛɛ hiɛnyamwoo ni je kpo faŋŋ kadi sɔlemɔtsu ni ji enyɔ lɛ? (b) Mɛni tsɔɔ akɛ Yudafoi lɛ bu sɔlemɔtsu lɛ yɛ gbɛ ni ejaaa nɔ, ni mɛni Yesu fee yɛ enɛ he?
20 Nɛkɛ sɔlemɔtsu ni ji enyɔ nɛɛ baná hiɛnyamwoo kpele akɛ Nyɔŋmɔ Bi, Yesu Kristo, tsɔɔ nii yɛ ekpo lɛ nɔ. Shi taakɛ eji yɛ klɛŋklɛŋ sɔlemɔtsu lɛ gbɛfaŋ lɛ, Yudafoi lɛ naaa susumɔ kpakpa yɛ hegbɛ ni amɛna, akɛ mɛi ni akɛ Nyɔŋmɔ we lɛ nɔkwɛmɔ ewo amɛdɛŋ lɛ he. Ejaakɛ, amɛŋmɛ jarayelɔi agbɛ ni amɛbaye jara po yɛ Jeŋmajiaŋbii akpo lɛ nɔ. Kɛfata he lɛ, aŋmɛɔ gbɛ ni gbɔmɛi tsɔɔ sɔlemɔwe lɛ kpo lɛ nɔ akɛ gbɛ kuku kɛji amɛtere jatsui yɛ Yerusalem kpokpaa nɔ. Beni eshwɛ gbii ejwɛ ni Yesu baagbo lɛ, ejie nɛkɛ nibii ni jeee jamɔ mli nifeemɔi nɛɛ fɛɛ kɛjɛ sɔlemɔwe lɛ, ni etee nɔ ewie akɛ: “Ani aŋmako akɛ: ‘Aaatsɛ miwe lɛ jeŋmaji fɛɛ asɔlemɔwe’? Shi nyɛ lɛ nyɛkɛfee ojotswalɔi abuu.”—Marko 11:15-17.
Nyɔŋmɔ Ekpoo E-Shikpɔŋ nɔ Shia lɛ Kɛmiiya Naanɔ
21. Mɛni Yesu ha ale yɛ Yerusalem sɔlemɔtsu lɛ gbɛfaŋ?
21 Bɔ ni Yesu kɛ ekaa fiɔ Nyɔŋmɔ jamɔ krɔŋŋ sɛɛ hewɔ lɛ, Yudafoi ajamɔ mli hiɛnyiɛlɔi lɛ tswa amɛfai shi akɛ amɛbaagbe lɛ. (Marko 11:18) Akɛni ele akɛ etsɛŋ ni amɛbaagbe lɛ hewɔ lɛ, Yesu kɛɛ Yudafoi ajamɔ mli hiɛnyiɛlɔi lɛ akɛ: “Aaashi nyɛwe lɛ amaŋfɔ̃ aha nyɛ.” (Mateo 23:37, 38) Ekɛ wiemɔ nɛɛ tsɔɔ akɛ yɛ be fioo sɛɛ lɛ, Nyɔŋmɔ ekpɛlɛŋ jamɔ gbɛ ni akɛtsuɔ nii yɛ Yerusalem sɔlemɔtsu diɛŋtsɛ nɛɛ mli lɛ nɔ dɔŋŋ. Efeŋ “jeŋmaji fɛɛ asɔlemɔwe” dɔŋŋ. Beni Yesu kaselɔi lɛ kɛ lɛ wieɔ sɔlemɔwe tsũi fɛfɛji lɛ ahe lɛ, ekɛɛ amɛ akɛ: “Nto nyɛmiina nii nɛɛ fɛɛ? . . . Ashiŋ tɛ kome yɛ eko nɔ yɛ biɛ ni akpaŋ aluŋ shi.”—Mateo 24:1, 2.
22. (a) Yesu wiemɔi ni kɔɔ sɔlemɔtsu lɛ he lɛ ba mli yɛ mɛɛ gbɛ nɔ? (b) Yɛ nɔ najiaŋ ni amɛkɛ amɛhiɛ aaafɔ̃ shikpɔŋ nɔ maŋ ko nɔ lɛ, mɛni mra be mli Kristofoi lɛ tao?
22 Yesu gbalɛ lɛ ba mli afii 37 sɛɛ yɛ afi 70 Ŋ.B., beni Roma asraafoi kpata Yerusalem kɛ esɔlemɔtsu lɛ hiɛ lɛ. No bafee odaseyeli ni mli wa ni tsɔɔ akɛ Nyɔŋmɔ ekpoo eshia ni anaa diɛŋtsɛ nɛɛ. Yesu egbaaa akɛ abaasaa ama sɔlemɔtsu kroko yɛ Yerusalem. Bɔfo Paulo ŋma wolo eyaha Hebribii Kristofoi lɛ yɛ nakai shikpɔŋ nɔ maŋtiase lɛ he akɛ: “Wɔbɛ maŋ ni kãa shi yɛ biɛ, shi maŋ ni baaba lɛ moŋ sɛɛ gbɛ wɔtaoɔ.” (Hebribii 13:14) Mra be mli Kristofoi kpa gbɛ akɛ amɛaatsɔmɔ “ŋwɛi Yerusalem”—ni ji Nyɔŋmɔ Maŋtsɛyeli ni tamɔ maŋ lɛ fã. (Hebribii 12:22) Enɛ hewɔ lɛ, Yehowa anɔkwa jamɔ shikwɛɛ he bɛ sɔlemɔtsu diɛŋtsɛ ko mli yɛ shikpɔŋ nɛɛ nɔ dɔŋŋ. Wɔbaasusu gbɛjianɔtoo ni nɔ kwɔ ni Nyɔŋmɔ kɛma shi kɛha mɛi fɛɛ ni sumɔɔ ni amɛja lɛ “yɛ mumɔ kɛ anɔkwale mli” lɛ he yɛ wɔ nikasemɔ ni nyiɛ sɛɛ lɛ mli.—Yohane 4:21, 24.
Sanebimɔi ni Akɛtĩɔ Mli
◻ Mɛɛ wekukpaa ni kã amɛkɛ Nyɔŋmɔ teŋ Adam kɛ Hawa laaje?
◻ Mɛni hewɔ esa akɛ wɔna kpee buu lɛ mli nibii ahe miishɛɛ?
◻ Mɛni wɔkaseɔ kɛjɛɔ nibii ni afeɔ yɛ kpee buu lɛ kpo lɛ nɔ lɛ mli?
◻ Mɛni hewɔ Nyɔŋmɔ ŋmɛ gbɛ ni akpata esɔlemɔtsu lɛ hiɛ lɛ?
[Mfonirii ni yɔɔ baafa 10, 11]
Sɔlemɔtsu ni Herode Saa Ema
1. He Krɔŋkrɔŋ Fe Fɛɛ
2. He Krɔŋkrɔŋ
3. Shãa Afɔlei Afɔleshaa Latɛ
4. Ŋshɔ ni Ashwie
5. Osɔfoi Akpo Nɔ
6. Israel Kpo Nɔ
7. Yei Akpo Nɔ