Kristofoi Odasefoi Kɛha Ŋwɛi Maŋtsɛyeli
“Nyɛjaje mɔ ni tsɛ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ.”—1 PETRO 2:9.
1. Mɛɛ Yehowa he odase aye jogbaŋŋ kɛmɔ shi yɛ be ni tsɔ Kristofoi abe lɛ hiɛ lɛ mli?
YƐ BE ni tsɔ Kristofoi abe lɛ hiɛ lɛ mli lɛ, odasefoi babaoo kɛ ekaa ye odase akɛ Yehowa ji anɔkwa Nyɔŋmɔ kome lɛ. (Hebribii 11:4–12:1) Akɛni amɛhe wa yɛ amɛhemɔkɛyeli lɛ mli hewɔ lɛ, amɛkɛ ekaa bo Yehowa mlai atoi ni amɛkpɛlɛɛɛ ni amɛŋmɛɛɔ jamɔ saji ahe akɛsaa. Amɛye Yehowa jeŋ muu fɛɛ maŋtsɛyeli lɛ he odase ni mli wa waa.—Lala 18:22-24; 47:2, 3.
2. (a) Namɔ ji Yehowa Odasefonyo kpele fe fɛɛ? (b) Namɛi baye Israel maŋ lɛ najiaŋ akɛ Yehowa odasefonyo? Te wɔfeɔ tɛŋŋ wɔleɔ?
2 Naagbee odasefonyo kpele fe fɛɛ ni tsɔ Kristofoi abe lɛ hiɛ ji Yohane Baptisilɔ lɛ. (Mateo 11:11) Ena hegbɛ akɛ eeetswa Mɔ ni Ahala Lɛ lɛ baa lɛ he adafi, ni ejie Yesu kpo etsɔɔ mɛi akɛ shiwoo Mesia lɛ. (Yohane 1:29-34) Yesu ji Yehowa Odasefonyo kpele fe fɛɛ, “odasefonyo anɔkwafo lɛ kɛ anɔkwayelɔ lɛ.” (Kpojiemɔ 3:14) Akɛni heloonaa Israel kpoo Yesu hewɔ lɛ, Yehowa kpoo amɛ ni ehala maŋ hee, mumɔŋ Nyɔŋmɔ Israel, koni amɛfee edasefonyo. (Yesaia 42:8-12; Yohane 1:11, 12; Galatabii 6:16) Petro tsɛ gbalɛ ko ni kɔɔ Israel he lɛ sɛɛ, ni etsɔɔ akɛ ekɔɔ “Nyɔŋmɔ Israel,” ni ji Kristofoi asafo lɛ he, beni ewie akɛ: “Shi nyɛ lɛ, weku ni ahala ji nyɛ, maŋtsɛmɛi ni yeɔ osɔfoi, jeŋmaŋ krɔŋkrɔŋ, maŋ ni eŋɔfee enɔ, koni nyɛjaje mɔ ni tsɛ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ.”—1 Petro 2:9; 2 Mose 19:5, 6; Yesaia 43:21; 60:2.
3. Mɛni ji Nyɔŋmɔ Israel, kɛ agbɛnɛ “asafo babaoo” lɛ hu aklɛŋklɛŋ gbɛnaa nii?
3 Petro wiemɔi lɛ tsɔɔ akɛ Nyɔŋmɔ Israel klɛŋklɛŋ gbɛnaa nii ji ni amɛye Yehowa anunyam lɛ he odase amɛtsɔɔ yɛ faŋŋ mli. Odasefoi “asafo babaoo” ko, ni amɛ hu amɛwoɔ Nyɔŋmɔ hiɛ nyam yɛ faŋŋ mli ebafata nɛkɛ mumɔŋ maŋ nɛɛ he yɛ wɔgbii nɛɛ amli. Amɛkɛ gbee ni wa bolɔɔ waa koni mɛi fɛɛ anu akɛ: “Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ, kɛ Toobi lɛ nɔ.” (Kpojiemɔ 7:9, 10; Yesaia 60:8-10) Mɛɛ gbɛ nɔ Nyɔŋmɔ Israel kɛ ehefatalɔi lɛ aaatsɔ amɛgbe amɛ odaseyeli lɛ naa? Kɛtsɔ amɛ hemɔkɛyeli kɛ toiboo nɔ.
Amale Odasefoi
4. Mɛni hewɔ Yesu gbii lɛ amli Yudafoi lɛ ji amale odasefoi lɛ?
4 Hemɔkɛyeli kɛ toiboo biɔ ni ahi shi yɛ shishitoo mlai ni Nyɔŋmɔ gbeyeishemɔ yɔɔ mli naa. Anaa bɔ ni enɛ he hiaa ha yɛ nɔ ni Yesu wie yɛ egbii lɛ amli Yudafoi ajamɔ mli hiɛnyiɛlɔi lɛ ahe lɛ mli. Mɛnɛɛmɛi ‘taraa Mose sɛi lɛ nɔ’ akɛ Mla lɛ tsɔɔlɔi. Amɛtsu maŋsɛɛ sanekpakpa jajelɔi po koni amɛyatsake mɛi ni heee yeee lɛ. Ni kɛlɛ, Yesu kɛɛ amɛ akɛ: “Nyɛbɔleɔ ŋshɔ kɛ shikpɔŋ kpula, koni nyɛna mɔ kome ni etsɔ Yudafonyo; ni beni mɔ lɛ etsɔ nakai lɛ, nyɛfeɔ lɛ Gehena bi shii enyɔ fe nyɛ diɛŋtsɛ nyɛhe.” Amale odasefoi ji nɛkɛ Nyɔŋmɔ jalɔi nɛɛ—henɔwolɔi, osatofoi, kɛ mɛi ni bɛ suɔmɔ. (Mateo 23:1-12, 15) Be ko lɛ Yesu kɛɛ Yudafoi komɛi akɛ: “Nyɛ lɛ nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee.” Mɛni hewɔ esa akɛ ekɛ Nyɔŋmɔ maŋ ni ehala lɛ mli bii awie wiemɔi ni tamɔ nɛkɛ? Ejaakɛ amɛbooo Yehowa Odasefonyo kpeteŋkpele fe fɛɛ lɛ wiemɔi atoi.—Yohane 8:41, 44, 47.
5. Te wɔfeɔ tɛŋŋ wɔleɔ akɛ Kristendom eye Nyɔŋmɔ he amale odase lɛ?
5 Yɛ nakai gbɛ nɔ nɔŋŋ hu lɛ, gbɔmɛi akpekpei ohai abɔ ni yɔɔ Kristendom lɛ etsɛ amɛhe akɛ ekaselɔi, yɛ afii ohai abɔ ni eho kɛjɛ Yesu beaŋ kɛbaa nɛɛ mli. Shi kɛlɛ, amɛfeee Nyɔŋmɔ suɔmɔnaa nii, ni no hewɔ lɛ Yesu ekpɛlɛɛɛ amɛ nɔ. (Mateo 7:21-23; 1 Korintobii 13:1-3) Kristendom etsu maŋsɛɛ sanekpakpa shiɛlɔi, ni ŋwanejee ko bɛ he akɛ amɛteŋ mɛi pii ye anɔkwa. Shi kɛlɛ, amɛtsɔɔ gbɔmɛi lɛ ni amɛja Triniti nyɔŋmɔ ni shãa eshafeelɔi yɛ hɛl la mli, ni odaseyeli bibioo ko pɛ anaa yɛ mɛi ni amɛtsake amɛ lɛ ahe ni tsɔɔ akɛ Kristofoi ji amɛ. Akɛ nɔkwɛmɔ nɔ lɛ, Afrika maŋ ni ji Rwanda ji he ko ni Roma Katolik maŋsɛɛ sanekpakpa shiɛlɔi anitsumɔ shwere waa yɛ. Shi kɛlɛ, Rwandabii Katolikbii jɛ amɛtsui fɛɛ mli amɛfata he yɛ wiemɔ kui ateŋ ta ni awuu nyɛsɛɛ nɛɛ yɛ nakai shikpɔŋ lɛ nɔ lɛ mli. Yibii ni nakai maŋsɛɛ sanekpakpa shiɛmɔ shikpɔŋ lɛ ewo lɛ tsɔɔ akɛ enine shɛɛɛ anɔkwa Kristofoia odaseyeli nɔ kɛjɛɛɛ Kristendom ŋɔɔ.—Mateo 7:15-20.
Ni Aaahi Shi yɛ Nyɔŋmɔ Shishitoo Mlai Anaa
6. Jeŋba kpakpa ji gbɛ ni he hiaa ni atsɔɔ nɔ ayeɔ odase yɛ mɛɛ gbɛi anɔ?
6 Subaŋ fɔŋ ni anaa yɛ mɛi ni tsɛɔ amɛhe Kristofoi ahe lɛ kɛ heguɔgbee baa “anɔkwale gbɛ lɛ” nɔ. (2 Petro 2:2) Anɔkwa Kristofonyo hiɔ shi yɛ Nyɔŋmɔ shishitoo mlai anaa. Ejuuu, emaleee, eshishiuuu mɛi, ni ebaaa ejeŋ yɛ gbɛ gbonyo nɔ hu. (Romabii 2:22) Eka shi faŋŋ akɛ egbeee enaanyo gbɔmɔ hu. Wumɛi Kristofoi kwɛɔ amɛ wekui anɔ yɛ suɔmɔ mli. Ni ŋamɛi jɛɔ bulɛ mli amɛfiɔ nakai nɔkwɛmɔ lɛ sɛɛ. Fɔlɔi tsɔseɔ amɛbii, ni atsɔɔ nakai feemɔ nɔ asaa amɛ koni amɛdara kɛtsɔmɔ Kristofoi ni tsuɔ amɛsɔ̃i ahe nii. (Efesobii 5:21–6:4) Eji anɔkwale akɛ, wɔteŋ mɔ fɛɛ mɔ yeee emuu ni wɔtɔ̃ɔ. Shi Kristofonyo diɛŋtsɛ lɛ buɔ Biblia mli shishitoo mlai, ni ekɛ anɔkwayeli bɔɔ mɔdɛŋ akɛ ekɛaatsu nii. Mɛi krokomɛi naa enɛ ni efeɔ odaseyeli fɛfɛo kɛhaa amɛ. Bei komɛi lɛ, mɛi ni tsutsu ko lɛ amɛteɔ shi amɛwoɔ anɔkwale lɛ naa Kristofonyo lɛ jeŋba kpakpa lɛ ni atsɔɔ no nɔ ni nine shɛɔ amɛnɔ.—1 Petro 2:12, 15; 3:1.
7. Te bɔ ni sa akɛ Kristofoi asumɔ amɛhe lɛ he hiaa ha tɛŋŋ?
7 Yesu tsɔɔ Kristofoi ajeŋba ko ni he hiaa waa beni ekɛɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Nɔ ni kadiɔ Satan je lɛ ji “nishaianii, ajwamaŋbɔɔ, efɔŋ feemɔ, hiɛjoomɔ, nifɔjianii; amɛyimɔ tɔ kɛ nyɛɛ, awuiyeli, bei, shishiumɔ, jeŋba shara; ablɛbi-wielɔi, mɛi ahe-wielɔi, Nyɔŋmɔ nyɛlɔi, mɛi ni hiɛ esɔɔɔ mɔ, hetsɔɔlɔi, shwalɔi, nɔ fɔŋ he ŋaatsɔlɔi, fɔlɔi anɔ toigbolɔi.” (Romabii 1:29, 30) Yɛ shihilɛ ni tamɔ nɛkɛ mli lɛ, jeŋ muu fɛɛ gbɛjianɔtoo ko ni suɔmɔ kadiɔ lɛ lɛ baafee Nyɔŋmɔ mumɔ lɛ nitsumɔ he odaseyeli ni mli wa—odaseyeli ni mɔɔ shi jogbaŋŋ. Yehowa Odasefoi ji nakai gbɛjianɔtoo lɛ.—1 Petro 2:17.
Odasefoi Kaseɔ Biblia Lɛ
8, 9. (a) Nyɔŋmɔ Mla lɛ kasemɔ kɛ enɔjwɛŋmɔ wo lalatsɛ lɛ hewalɛ yɛ mɛɛ gbɛ nɔ? (b) Biblia lɛ kasemɔ kɛ enɔjwɛŋmɔ woɔ wɔ hewalɛ ni wɔya nɔ wɔye odase yɛ mɛɛ gbɛi anɔ?
8 Kɛ Kristofonyo ko baanyɛ ekɛ odaseyeli fɛfɛo aha lɛ, no lɛ esa akɛ ele ni esumɔ Yehowa jalɛ shishitoo mlai lɛ, ni ena nyɛɛ diɛŋtsɛ eha fitemɔ ni yɔɔ je lɛŋ lɛ. (Lala 97:10) Je lɛ kanyaa mɛi yɛ lɛ diɛŋtsɛ esusumɔi agbɛɛ-kɛ-shwamɔ mli, ni ebaanyɛ ewa waa akɛ aaate shi awo emumɔ lɛ. (Efesobii 2:1-3; 1 Yohane 2:15, 16) Mɛni baanyɛ aye abua wɔ ni wɔya nɔ wɔhiɛ jwɛŋmɔ kpakpa mli? Biblia lɛ ni wɔɔkase daa ni wɔnu shishi hu. Mɔ ni ŋma Lala 119 lɛ tĩ bɔ ni esumɔɔ Yehowa Mla lɛ ehaa lɛ mli shii abɔ. Ekaneɔ ni ejwɛŋɔ he be fɛɛ be, “jenamɔ fɛɛ.” (Lala 119:92, 93, 97-105) Enɛ hewɔ lɛ, enyɛ eŋma akɛ: “Minyɛɔ apasa, ni mihiɔ; shi omla lɛ moŋ misumɔɔ.” Kɛfata he lɛ, esuɔmɔ ni mli kwɔ lɛ tsirɛ lɛ ni etsu he nii. Ewie akɛ: “Mijieɔ oyi shii kpawo jenamɔ yɛ ojalɛ kojomɔi lɛ ahewɔ.”—Lala 119:163, 164.
9 Nakai nɔŋŋ hu, Nyɔŋmɔ Wiemɔ lɛ ni wɔɔkase daa ni wɔjwɛŋ nɔ hu lɛ baakanya wɔtsuii, ni ebaatsirɛ wɔ ni ‘wɔjie eyi’—ni wɔye Yehowa he odase—be fɛɛ be, “shii kpawo jenamɔ” po. (Romabii 10:10) Yɛ enɛ kɛ gbeekpamɔ naa lɛ, mɔ ni ŋma klɛŋklɛŋ lala lɛ kɛɔ akɛ gbɔmɔ ni jwɛŋɔ Yehowa wiemɔi anɔ be fɛɛ be lɛ aaatsɔ “tamɔ tso ni atɛo yɛ faai atoi, ni woɔ yibii yɛ ebe lɛ mli, ni eyi baai kpɔŋ; ni nɔ fɛɛ nɔ ni efeɔ lɛ shwereɔ.” (Lala 1:3) Bɔfo Paulo hu tsɔɔ hewalɛ ni Nyɔŋmɔ Wiemɔ lɛ yɔɔ, beni eŋma akɛ: “Ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ, ehi ha nitsɔɔmɔ kɛ hiɛkamɔ kɛ mɔ saamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:16, 17.
10. Mɛɛ odaseyeli anaa faŋŋ yɛ Yehowa webii ahe yɛ naagbee gbii nɛɛ amli?
10 Bɔ ni anɔkwa jalɔi ni yɔɔ afii ohai 20 nɛɛ mli lɛ ayifalɛ yaa hiɛ oyayaayai lɛ tsɔɔ bɔ ni Yehowa jɔɔmɔi yɔɔ amɛnɔ ha. Ŋwanejee ko bɛ he akɛ, akɛ kuu lɛ, nɛkɛ ŋmɛnɛŋmɛnɛ beaŋ odasefoi kɛha ŋwɛi maŋtsɛyeli nɛɛ ena suɔmɔ amɛha Yehowa mla lɛ yɛ amɛtsuii amli. Taakɛ lalatsɛ lɛ ji lɛ, etsirɛɔ amɛ ni amɛboɔ E-mlai atoi, ni amɛkɛ anɔkwayeli yeɔ Yehowa anunyam lɛ he odase “nyɔɔŋ kɛ shwane.”—Kpojiemɔ 7:15.
Yehowa Hewalɛ Nitsumɔi Lɛ
11, 12. Mɛni akɛ naakpɛɛ nii ni Yesu kɛ esɛɛnyiɛlɔi lɛ fee lɛ tsu?
11 Yɛ klɛŋklɛŋ afii oha lɛ mli lɛ, mumɔ krɔŋkrɔŋ lɛ ha Kristofoi odasefoi anɔkwafoi lɛ hewalɛ ni amɛkɛfee naakpɛɛ nii, ni ekɛ nɔmimaa ni mli wa ha akɛ amɛ odaseyeli lɛ ji anɔkwale. Beni Yohane Baptisilɔ lɛ yɔɔ tsuŋwoo mli lɛ, etsu kaselɔi ni amɛyabi Yesu akɛ: “Ani bo ji Mɔ ni Baa lɛ, aloo wɔkwɛ mɔ kroko gbɛ?” Yesu haaa hetoo hɛɛ loo dabi. Shi moŋ, ekɛɛ akɛ: “Nyɛyaa ni nyɛyagbaa Yohane nɔ ni nyɛnuɔ kɛ nɔ ni nyɛnaa nɛɛ: Shwilafoi miina nii, ni obubuafoi miinyiɛ; kpitiyelɔi ahe miitse, ni toimulɔi hu miinu nii; gbohii miite shi, ni ohiafoi lɛ, aajaje sanekpakpa lɛ aatsɔɔ amɛ. Ni ajɔɔ mɔ fɛɛ mɔ ni misane etɔ̃tɔ̃ŋ enane.” (Mateo 11:3-6) Nɛkɛ hewalɛ nitsumɔi nɛɛ bafee odaseyeli kɛha Yohane akɛ Yesu ji “Mɔ ni Baa” lɛ lɛlɛŋ.—Bɔfoi lɛ Asaji 2:22.
12 Nakai nɔŋŋ hu, Yesu sɛɛnyiɛlɔi lɛ ekomɛi tsá helatsɛmɛi ni amɛtee gbohii ashi po. (Bɔfoi lɛ Asaji 5:15, 16; 20:9-12) Nɛkɛ naakpɛɛ nii nɛɛ tamɔ amɛhe odaseyeli ni jɛ Nyɔŋmɔ diɛŋtsɛ ŋɔɔ. (Hebribii 2:4) Ni nitsumɔ ni tamɔ nɛkɛ jieɔ Yehowa hewalɛ ni fe fɛɛ lɛ kpo etsɔɔ. Akɛ nɔkwɛmɔ nɔ lɛ, eji anɔkwale akɛ, Satan ni ji “je nɛŋ lumɔ lɛ,” yɛ hewalɛ ni enyɛɔ ekɛgbeɔ mɔ. (Yohane 14:30; Hebribii 2:14) Shi beni Petro tee Dorka, yoo anɔkwafo lɛ shi kɛjɛ gbele mli lɛ, Yehowa hewalɛ pɛ naa enyɛ efee enɛ yɛ, ejaakɛ Lɛ ekoome pɛ ebaanyɛ eha mɔ wala ekoŋŋ.—Lala 16:10; 36:9; Bɔfoi lɛ Asaji 2:25-27; 9:36-43.
13. (a) Biblia mli naakpɛɛ nii lɛ yeɔ Yehowa hewalɛ he odase lolo yɛ mɛɛ gbɛ nɔ? (b) Gbalɛ mlibaa tsuɔ gbɛfaŋnɔ ni he hiaa he nii yɛ Yehowa Nyɔŋmɔyeli lɛ nɔmimaa mli yɛ mɛɛ gbɛ nɔ?
13 Ŋmɛnɛ, atsuuu nakai naakpɛɛ nitsumɔi lɛ dɔŋŋ. Átsu yiŋtoo ni yɔɔ sɛɛ lɛ he nii agbe naa. (1 Korintobii 13:8) Shi kɛlɛ, wɔyɛ amɛhe saji ni aŋmala yɛ Biblia mli lɛ lolo, ni mɛi ni kɛ amɛhiŋmɛi na lɛ ye he odase. Kɛ Kristofoi ni yɔɔ ŋmɛnɛ lɛ gbala jwɛŋmɔ kɛtee nɛkɛ yinɔsane mli saji nɛɛ anɔ lɛ, nakai nitsumɔi lɛ kã he amɛmiiye Yehowa hewalɛ lɛ he odase ni mɔɔ shi lolo. (1 Korintobii 15:3-6) Kɛfata he lɛ, yɛ Yesaia gbii lɛ amli lɛ, Yehowa gbala jwɛŋmɔ kɛtee gbalɛ ni ja kɛmɔ shi nɔ akɛ odaseyeli ni sa kadimɔ, ni tsɔɔ akɛ Lɛ ji anɔkwa Nyɔŋmɔ lɛ. (Yesaia 46:8-11) Biblia mli gbalɛi babaoo ni ajɛ Nyɔŋmɔ mumɔ mli akɛha lɛ miiba mli ŋmɛnɛ—amɛmli babaoo miiba mli yɛ Kristofoi asafo lɛ nɔ. (Yesaia 60:8-10; Daniel 12:6-12; Maleaki 3:17, 18; Mateo 24:9; Kpojiemɔ 11:1-13) Kɛfata nɔmimaa ni ekɛhaa akɛ wɔyɛ “naagbee gbii lɛ” amli lɛ he lɛ, nɛkɛ gbalɛi nɛɛ amlibaa buɔ Yehowa bem akɛ anɔkwa Nyɔŋmɔ koome lɛ.—2 Timoteo 3:1.
14. Yehowa Odasefoi aŋmɛnɛŋmɛnɛ beaŋ yinɔsane feɔ odaseyeli ni mli wa ni tsɔɔ akɛ Yehowa ji Nuntsɔ Maŋtsɛ, yɛ mɛɛ gbɛi anɔ?
14 Yɛ naagbee lɛ, Yehowa yaa nɔ efeɔ nibii wuji, nibii ni yɔɔ naakpɛɛ ehaa etsuji lolo. Yehowa mumɔ lɛ ji nɔ ni kudɔɔ la kpɛmɔ ni yaa hiɛ daa yɛ Biblia mli anɔkwale lɛ nɔ lɛ. (Lala 86:10; Kpojiemɔ 4:5, 6) Yifalɛ ni sa kadimɔ waa ni abɔɔ he amaniɛ yɛ je lɛŋ he fɛɛ he lɛ ji odaseyeli ni tsɔɔ akɛ Yehowa ‘miiha aafee oya yɛ ebe naa.’ (Yesaia 60:22) Beni yiwaa ni naa wa waa fɛɔ yɛ maji sɔrɔtoi anɔ yɛ naagbee gbii nɛɛ amli fɛɛ lɛ, Yehowa webii nyɛɔ amɛkɛ ekaa ŋmɛɔ amɛtsui shi yɛ mli, yɛ mumɔ krɔŋkrɔŋ lɛ sɛɛfimɔ ni woɔ amɛ hewalɛ lɛ hewɔ. (Lala 18:2, 3, 18, 19; 2 Korintobii 1:8-10) Hɛɛ, Yehowa Odasefoi aŋmɛnɛŋmɛnɛ beaŋ yinɔsane hu diɛŋtsɛ ji odaseyeli ni mli wa ni tsɔɔ akɛ Yehowa ji Nuntsɔ Maŋtsɛ.—Zakaria 4:6.
Abaashiɛ Sanekpakpa lɛ Atsɔɔ
15. Mɛɛ odaseyeli ni mli lɛɛ Kristofoi asafo lɛ kɛbaaha?
15 Yehowa hala Israel akɛ edasefonyo kɛha jeŋmaji lɛ. (Yesaia 43:10) Shi kɛlɛ, Israelbii fioo pɛ ajɛ ŋwɛi akɛ famɔ ha amɛ akɛ amɛyashiɛ amɛtsɔɔ mɛi ni jeee Israelbii, ni bei pii lɛ, amɛfeɔ enɛ ni amɛkɛtswaa Yehowa kojomɔi ahe adafi. (Yeremia 1:5; Yona 1:1, 2) Shi yɛ enɛ fɛɛ sɛɛ lɛ, gbalɛi ni yɔɔ Hebri Ŋmalɛi lɛ amli lɛ tsɔɔ akɛ gbi ko lɛ, Yehowa baagbala ejwɛŋmɔ kɛba jeŋmaji lɛ anɔ yɛ gbɛ ni mli lɛɛ waa nɔ, ni efee enɛ kɛtsɔ Nyɔŋmɔ mumɔŋ Israel nɔ. (Yesaia 2:2-4; 62:2) Dani Yesu baakwɔ kɛbaaya ŋwɛi lɛ, efã esɛɛnyiɛlɔi lɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi.” (Mateo 28:19) Yɛ be mli ni Yesu kɛ ejwɛŋmɔ fɛɛ mã “Israel we tooi ni elaaje lɛ” anɔ lɛ, etsu esɛɛnyiɛlɔi lɛ kɛtee “jeŋmaji fɛɛ” aŋɔɔ, “kɛyashi shikpɔŋ lɛ naagbee hei lɛ” po. (Mateo 15:24; Bɔfoi lɛ Asaji 1:8) Esa akɛ adesai fɛɛ anu Kristofoia odaseyeli lɛ.
16. Mɛɛ nitsumɔ klɛŋklɛŋ afii oha lɛ mli Kristofoi lɛ tsu he nii, ni nɛgbɛ amɛtsu kɛyashɛ?
16 Paulo tsɔɔ akɛ enu enɛ shishi jogbaŋŋ. Beni shɛɔ afi 61 Ŋ.B. lɛ, enyɛ ewie akɛ sanekpakpa lɛ ‘miiwo yibii ni eeshwere yɛ jeŋ muu lɛ fɛɛ mli.’ Ashiɛɛɛ sanekpakpa lɛ ahaaa jeŋmaŋ kome loo jamɔ kuu kome pɛ, tamɔ nɔ ni kɛ ehe woɔ “ŋwɛibɔfoi ajamɔ” mli lɛ. Shi moŋ, “ashiɛɔ atsɔɔ bɔɔ nii fɛɛ ni yɔɔ ŋwɛi shishi lɛ” yɛ faŋŋ mli. (Kolosebii 1:6, 23; 2:13, 14, 16-18) Enɛ hewɔ lɛ, Nyɔŋmɔ Israel ni hi shi yɛ klɛŋklɛŋ afii oha lɛ mli lɛ tsu nitsumɔ ni akɛha amɛ akɛ “[amɛjaje] mɔ ni tsɛ [amɛ] kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ” amɛtsɔɔ lɛ he nii.
17. Mɛɛ gbɛ nɔ Mateo 24:14 kã he ebaa mli lolo yɛ gbɛ ni da nɔ?
17 Shi kɛlɛ, nakai klɛŋklɛŋ afii oha lɛ mli shiɛmɔ nitsumɔ lɛ fee nitsumɔ ni abaatsu yɛ naagbee gbii lɛ amli lɛ he okadi bibioo ko kɛkɛ. Beni ewieɔ wɔ gbii nɛɛ ahe titri lɛ, Yesu kɛɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14; Marko 13:10) Ani nɛkɛ gbalɛ nɛɛ eba mli? Hɛɛ, eba mli. Kɛjɛ shishijee bibioo mli yɛ 1919 lɛ, amrɔ nɛɛ alɛɛ sanekpakpa lɛ shiɛmɔ mli kɛtee maji fe 230 nɔ. Aanu odaseyeli lɛ yɛ Kooyigbɛ ni jɔɔ ŋanii lɛ kɛ hulu liamɔ shikpɔji ni nɔ dɔɔ waa lɛ fɛɛ nɔ. Aatsu nii yɛ shikpɔji wuji anɔ, ni aatao ŋshɔkpɔi ni yɔɔ shɔŋŋ lɛ hu fɛɛ, bɔni afee ni anyɛ aye amɛnɔ bii lɛ hu odase. Aaya nɔ aashiɛ sanekpakpa lɛ lolo, yɛ hei ni basabasa feemɔ yɔɔ waa po, tamɔ ta ni awuɔ yɛ Bosnia kɛ Herzegovina lɛ nɛkɛ. Taakɛ eji yɛ klɛŋklɛŋ afii oha lɛ mli lɛ, odaseyeli lɛ miiwo yibii “yɛ jeŋ muu lɛ fɛɛ mli.” Aatswa sanekpakpa lɛ he adafi yɛ faŋŋ mli “aatsɔɔ bɔɔ nii fɛɛ ni yɔɔ ŋwɛi shishi lɛ.” Ni mɛni ejɛ mli eba? Klɛŋklɛŋ lɛ, abua Nyɔŋmɔ Israel mli bii ni eshwɛ lɛ anaa “kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli.” Nɔ ni ji enyɔ lɛ, akɛ “asafo babaoo” ni ji mɛi akpekpei abɔ lɛ bɔi baa kɛjɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli.” (Kpojiemɔ 5:9; 7:9) Mateo 24:14 miiya nɔ eeba mli yɛ gbɛ ni da nɔ diɛŋtsɛ.
18. Mɛni ji nibii ni atsɔɔ jeŋ muu fɛɛ sanekpakpa shiɛmɔ nitsumɔ lɛ nɔ atsuɔ lɛ ekomɛi?
18 Sanekpakpa lɛ ni ashiɛɔ yɛ je lɛŋ fɛɛ lɛ yeɔ ebuaa kɛmaa nɔ mi akɛ ba ni Yesu eba akɛ odehe lɛ eje shishi. (Mateo 24:3) Kɛfata he lɛ, no ji gbɛ titri ni atsɔɔ nɔ akpaa “shikpɔŋ lɛ nɔ nikpamɔ nii lɛ,” ejaakɛ etsɔɔ gbɔmɛi agbɛ kɛyaa anɔkwa hiɛnɔkamɔ koome pɛ ni yɔɔ kɛha adesai, ni ji Yehowa Maŋtsɛyeli lɛ he. (Kpojiemɔ 14:15, 16) Akɛni anɔkwa Kristofoi pɛ naa sanekpakpa shiɛmɔ lɛ mli gbɛfaŋnɔ hewɔ lɛ, nɛkɛ nitsumɔ ni he hiaa nɛɛ yeɔ ebuaa ni akɛyooɔ anɔkwale Kristofoi kɛjɛɔ amale nɔ̃ lɛ he. (Maleaki 3:18) Kɛtsɔ enɛ nɔ lɛ, nɔ ni jɛɔ mli baa ji yiwalaheremɔ kɛha mɛi ni shiɛɔ kɛ mɛi ni boɔ shiɛmɔ lɛ toi lɛ fɛɛ. (1 Timoteo 4:16) Shi nɔ ni he hiaa fe fɛɛ ji akɛ, sanekpakpa lɛ shiɛmɔ kɛ yijiemɔ kɛ woo bahaa Yehowa Nyɔŋmɔ, mɔ ni fã akɛ ashiɛ, ni efiɔ mɛi ni shiɛɔ lɛ asɛɛ, ni ehaa ewoɔ yibii hu lɛ.—2 Korintobii 4:7.
19. Mɛɛ faishitswaa awoɔ Kristofoi fɛɛ hewalɛ ni amɛna, yɛ be mli ni amɛboteɔ sɔɔmɔ afi hee mli lɛ?
19 Ebɛ naakpɛɛ akɛ enɛ tsirɛ bɔfo Paulo ni ewie akɛ: “Kɛji mijajeee sanekpakpa lɛ, kpoo ha mi!” (1 Korintobii 9:16) Kristofoi nuɔ he nakai nɔŋŋ ŋmɛnɛ. Eji hegbɛ ni yɔɔ nyam kɛ gbɛnaa nii kpele hu akɛ aaafee “Nyɔŋmɔ hefatalɔi nitsulɔi,” ni miiha anɔkwale la lɛ miikpɛ yɛ jeŋ ni mli ewo duŋ nɛɛ mli. (1 Korintobii 3:9; Yesaia 60:2, 3) Amrɔ nɛɛ nitsumɔ ni je shishi bibioo yɛ 1919 mli lɛ mli elɛɛ waa diɛŋtsɛ. Kristofoi aaashɛ akpekpei enumɔ miiye odase kɛmiiha ŋwɛi maŋtsɛyeli lɛ, yɛ be mli ni amɛkɛ ŋmɛlɛtswai ni fa fe akpekpei akpe tsuɔ nii yɛ afi mli ni amɛkɛ yiwalaheremɔ shɛɛ sane lɛ yahaa mɛi krokomɛi lɛ. Mɛɛ miishɛɛ eji nɛkɛ, akɛ aaana nitsumɔ ni akɛtseɔ Yehowa gbɛi lɛ he nɛɛ mli gbɛfaŋnɔ! Beni wɔboteɔ 1996 sɔɔmɔ afi lɛ mli lɛ, nyɛhaa wɔtswaa wɔfai shi akɛ wɔgbɔjɔŋ wɔnijiaŋ. Shi moŋ, wɔbaabo Paulo wiemɔ ni ekɛ Timoteo wie nɛɛ toi jogbaŋŋ fe bei fɛɛ ni eho, akɛ: “Shiɛmɔ wiemɔ lɛ, kã he.” (2 Timoteo 4:2) Beni wɔfeɔ nakai lɛ, wɔkɛ wɔtsuii fɛɛ sɔleɔ akɛ Yehowa baaya nɔ ajɔɔ wɔ mɔdɛŋbɔi lɛ anɔ.
Ani Okaiɔ?
◻ Namɔ akɛye Israel najiaŋ akɛ Yehowa “odasefonyo” kɛha jeŋmaji lɛ?
◻ Kristofoi ajeŋba fataa he kɛyeɔ odase yɛ mɛɛ gbɛ nɔ?
◻ Mɛni hewɔ Biblia lɛ kasemɔ kɛ enɔjwɛŋmɔ he hiaa kɛha Kristofonyo Odasefonyo lɛ?
◻ Yehowa Odasefoi aŋmɛnɛŋmɛnɛ beaŋ yinɔsane tsuɔ nii akɛ odaseyeli ni tsɔɔ akɛ Yehowa ji anɔkwa Nyɔŋmɔ lɛ yɛ mɛɛ gbɛ nɔ?
◻ Mɛɛ nitsumɔ atsɔɔ sanekpakpa shiɛmɔ lɛ nɔ atsuɔ?
[Mfonirii ni yɔɔ baafa 15]
Atsiko naa ahako he ko pɔtɛɛ, shi moŋ amrɔ nɛɛ aajaje sanekpakpa lɛ “aatsɔɔ bɔɔ nii fɛɛ ni yɔɔ ŋwɛi shishi lɛ”